Cov Thawj Coj thiab Cov Neeg Ua Hauj Lwm Tej Luag Hauj Lwm (8)

Yam Yim: Qhia Tawm thiab Nrhiav Kev Los Daws Tej Yam Uas Paub Tsis Meej thiab Tej Kev Nyuaj Uas Ntsib Nyob Rau Hauv Tes Hauj Lwm Ntawd Kom Ncav Sij Hawm (Ntu Ob)

Zaum tas los ntawd, peb tau sib qhia txog cov thawj coj thiab cov neeg ua hauj lwm tej luag hauj lwm yim: “Qhia tawm thiab nrhiav kev los daws tej yam uas paub tsis meej thiab tej kev nyuaj uas ntsib nyob rau hauv tes hauj lwm ntawd kom ncav sij hawm.” Txawm hais tias yam yim tsuas ntev ib kab lus xwb, thiab feem ntau tsuas cheem tsum ib yam ntawm cov thawj coj thiab cov neeg ua hauj lwm txog lawv tej luag hauj lwm xwb, uas yooj yim heev, tiam sis peb tau siv sij hawm ib zaug sib txoos ua ke los sib qhia txog lub ncauj lus no. Zaum tas los peb tau sib qhia txog feem twg ntawm lub ncauj lus no kom ntxaws ntxaws? Cov thawj coj thiab cov neeg ua hauj lwm tej luag hauj lwm tseem ceeb uas ntsig txog yog dab tsi? (Tias thaum lawv ntsib tej yam uas paub tsis meej thiab tej kev nyuaj lawv yuav tsum sib txoos ua ke thiab sib qhia, thiab nrhiav kev los daws tej ntawd thiab qhia tawm rau tus Nyob Saud kom ncav sij hawm yog lawv tsis tuaj yeem pom tshab txog tej ntawd los ntawm kev sib qhia.) Cov thawj coj thiab cov neeg ua hauj lwm tej luag hauj lwm tseem ceeb uas yam no ntsig txog ntawd mas yog kev koom nrog ua hauj lwm, thiab siv zog rau hauv ntau yam ntawm tes hauj lwm tiag tiag, kom thiaj li nrhiav pom ntau yam teeb meem uas ntsib nyob rau hauv tes hauj lwm, thiab daws tej ntawd kom ncav sij hawm. Yog tau sim ntau txoj hau kev lawm, tiam sis cov teeb meem tseem daws tsis tau tag nrho, thiab cov teeb meem tseem muaj nyob thiab dhau los ua tej kev paub tsis meej thiab tej kev nyuaj, ces cov thawj coj thiab cov neeg ua hauj lwm yuav tsum tsis txhob cia tej kev paub tsis meej thiab tej kev nyuaj ntawd ua pawg ntau zuj zus los sis muab tso tseg thiab tsis quav ntsej, tiam sis yuav tsum maj nroos nrhiav ib txoj hau kev los daws tej ntawd kom ncav sij hawm. Txoj hau kev uas zoo tshaj plaws los daws tej ntawd, yeej yog kev nrhiav thiab sib qhia nrog cov kwv tij thiab cov muam nrog rau cov thawj coj thiab cov neeg ua hauj lwm nyob rau ntau theem kom daws tau cov teeb meem no. Yog cov teeb meem daws tsis tau, ces cov thawj coj thiab cov neeg ua hauj lwm yuav tsum tsis txhob ua kom tej teeb meem loj zoo li tej teeb meem me, thiab ua kom tej teeb meem me ntawd zoo li tsis muaj teeb meem, los sis cia li muab tso tseg thiab tsis quav ntsej tej teeb meem ntawd, tiam sis yuav tsum qhia tawm rau tus Nyob Saud thiab nrhiav kev daws los ntawm tus Nyob Saud kom ncav sij hawm kom thiaj li daws tau tej teeb meem ntawd. Ua li no, ces tes hauj lwm yuav mus tau zoo, tsis muaj kev nyuaj thiab tsis muaj kev tab kaum lawm.

Cov Thawj Coj thiab Cov Neeg Ua Hauj Lwm Yuav Tsum Qhia Tawm thiab Daws Tej Kev Paub Tsis Meej thiab Tej Kev Nyuaj Uas Ntsib hauv Tes Hauj Lwm Kom Ncav Sij Hawm

I. Qhov Lus Tshab Txhais ntawm Lo Lus “Ncav Sij Hawm”

Cov thawj coj thiab cov neeg ua hauj lwm tej luag hauj lwm yim tau hais txog qhov qhia tawm tej kev paub tsis meej thiab tej kev nyuaj uas ntsib hauv tes hauj lwm kom ncav sij hawm—qhov no tseem ceeb heev. Yog hnub no nrhiav pom ib qho teeb meem, tiam sis ncua qhov kev daws teeb meem ntawd mus txog ntua yim los sis kaum hnub, los sis mus txog ntua ib nrab xyoo los sis ib xyoos, ces qhov ntawd puas hu tau tias “ncav sij hawm”? (Hu tsis tau.) Yog li ntawd, “ncav sij hawm” txhais li cas? (Qhov ntawd txhais tau hais tias daws qhov teeb meem ntawd tam sim ntawd, kiag tam sid, thiab thawj lub sij hawm.) Qhov ntawd tsis yog nruj me ntsis lawm lod? Yog peb siv cov lus uas ntsig txog lub sij hawm los piav qhia qhov ntawd, ces qhov daws teeb meem tam sim ntawd, kiag tam sid, thiab tam sim no kiag ntawd yog lub ntsiab lus ntawm lo lus “ncav sij hawm”, tiam sis yog saib raws li lub ntsiab lus ncaj ncaj ntawm cov lus no, qhov no tsis yooj yim rau tib neeg ua tau, thiab qhov ntawd ua tsis tau tiag. Yog li ntawd, peb yuav tsum tshab txhais lo lus “ncav sij hawm” ntawd li cas thiaj li yuav yog? Yog qhov teeb meem tsis yog ib qho loj tiam sis qhov teeb meem ntawd tseem ua ib qho kev tab kaum rau tes hauj lwm, thiab yog tuaj yeem daws tau nyob rau hauv ob peb teev, ces yuav tsum daws qhov teeb meem ntawd hauv ob peb teev—qhov no puas suav tau tias ncav sij hawm? (Suav tau.) Yog hais tias qhov teeb meem ntawd ntxhov thiab nyuaj me ntsis, thiab tuaj yeem daws tau hauv ob los sis peb hnub, tiam sis yog tib neeg siv zog los nrhiav qhov tseeb, tshawb xyuas cov ntaub ntawv kom ntau ntxiv, thiab siv zog los daws qhov teeb meem ntawd hauv ib hnub xwb—qhov ntawd tsis yog yuav muaj txiaj ntsim ntau dua rau tes hauj lwm lod? Yog hais tias muaj ib qho teeb meem uas tam sim no tseem pom tsis tshab, thiab cheem tsum kev tshawb xyuas thiab kev tshawb fawb, uas yuav tsum siv sij hawm me ntsis, ces qhov teeb meem tiag tiag no ntau kawg nkaus los siv sij hawm peb hnub los daws xwb. Yog siv sij hawm ntau tshaj peb hnub, ces yuav muaj kev xav xyem xyav tias txhob txwm ncua qhov kev daws teeb meem ntawd, thiab txhais hais tias tab tom nkim sij hawm. Yog li ntawd, yuav tsum qhia tawm, nrhiav kev daws, thiab daws hauv peb hnub ntawd. Qhov no yog lub ntsiab lus ntawm lo lus “ncav sij hawm”. Yog qhov daws teeb meem ntawd cheem tsum kev sib txuas lus thiab kev tshawb xyuas ib theem dhau ib theem, nrog rau kev sau cov ntaub ntawv ib theem dhau ib theem, thiab lwm yam—yog cov txheej txheem ntau yam ntawd ntxhov heev—los yeej tseem tsis tsim nyog cia ncua ntev mus txog ib lub hlis. Xam hais tias qhov teeb meem ntawd tuaj yeem daws tau hauv ib lub lim tiam yog cov thawj coj thiab cov neeg ua hauj lwm ua sai, ua hauj lwm kom ceev dua, thiab xaiv thiab siv ob peb tug neeg uas tsim nyog, ces nyob hauv qhov xwm txheej no, lo lus “ncav sij hawm” ntawd txhais hais tias txwv qhov kev daws teeb meem ntawd rau ib lub lim tiam. Qhov siv sij hawm ntau tshaj ib lub lim tiam los daws qhov teeb meem ntawd mas tsis tsim nyog lawm—qhov ntawd tsis yog ncav sij hawm lawm. Qhov no yog lub sij hawm txwv rau kev daws tej xwm txheej uas ntxhov me ntsis zoo li no. Lub sij hawm no yog saib raws li dab tsi? Qhov ntawd txiav txim siab raws li qhov loj los me thiab qib ntawm qhov nyuaj los yooj yim ntawm qhov teeb meem ntawd. Tiam sis feem ntau, xws li cov teeb meem uas ntsig txog kev txawj ntse ntawm tes hauj lwm los sis cov teeb meem ntawm tej hauv paus ntsiab lus uas tsis meej rau tib neeg, ces ob peb kab lus xwb tuaj yeem daws tau—yuav tsum txwv lub sij hawm ntev npaum li cas los daws cov teeb meem no kom thiaj li suav tau tias “ncav sij hawm”? Yog peb tshab txhais lo lus “ncav sij hawm” raws li qhov loj los me thiab qib ntawm qhov nyuaj los yooj yim ntawm qhov teeb meem ntawd, ces cov teeb meem feem tsis txog ib nrab hnub los tuaj yeem daws tau, nrog rau ib feem me me ntawm cov teeb meem ntawd tej zaum ntau kawg los cheem tsum ib lub lim tiam los daws xwb; yog muaj ib qho teeb meem tshiab tshwm tuaj, ces qhov ntawd yog lwm yam lawm. Yog li ntawd, yog peb tshab txhais lo lus “ncav sij hawm” ntawd tias tam sim ntawd, kiag tam sid, thiab tam sim no kiag, ces saib raws li lub ntsiab lus ncaj ncaj ntawm cov lus no mas zoo li yog ib qho kev cheem tsum uas nruj rau tib neeg, tiam sis yog saib lub sij hawm txwv, feem ntau ntawm cov teeb meem ntau kawg nkaus tuaj yeem daws tau hauv ib nrab hnub los sis ib hnub xwb yog tib neeg qhia tawm thiab nrhiav kev daws tej teeb meem ntawd kom ncav sij hawm. Qhov no puas suav tau tias nyuaj nyob rau kis ntawm lub sij hawm? (Tsis nyuaj.) Thiab vim hais tias qhov no tsis nyuaj hauv kis ntawm lub sij hawm, ces qhov ntawd tsim nyog yog ib qho kev cheem tsum yooj yim rau cov thawj coj thiab cov neeg ua hauj lwm ua kom tiav qhov qhia tawm thiab nrhiav kev los daws tej kev paub tsis meej thiab tej kev nyuaj uas ntsib hauv tes hauj lwm ntawd kom ncav sij hawm, thiab tej kev paub tsis meej thiab tej kev nyuaj no yuav tsum tsis txhob muaj nyob tas li thiab tsis raug daws, thiab haj yam yuav tsum tsis txhob cia tej ntawd ua pawg ntau zuj zus hauv tes hauj lwm mus ntev. Tam sim no nej txhua tus tsim nyog paub txog lub tswv yim hauv lub sij hawm ntawm lo lus “ncav sij hawm” lawm—qhov no yog qhov teeb meem uas cov thawj coj thiab cov neeg ua hauj lwm yuav ntsuas lub sij hawm li cas thaum daws tej kev paub tsis meej thiab tej kev nyuaj uas ntsib hauv tes hauj lwm. Muab hais luv luv, qhov lus tshab txhais uas yog tshaj plaws ntawm lo lus “ncav sij hawm” yog ua kom ceev npaum li qhov ceev tau—uas yog hais tias, yog ib qho teeb meem tuaj yeem qhia tawm, nrhiav kev daws, thiab daws tau hauv ib nrab hnub, ces yuav tsum ua li ntawd, thiab yog qhov teeb meem ntawd tuaj yeem daws tau hauv ib hnub, ces yuav tsum ua li ntawd—thiab siv zog kom tsis txhob ua rau muaj kev ncua sij hawm thiab tsis txhob cia tes hauj lwm raug kev cuam tshuam. Qhov no yog cov thawj coj thiab cov neeg ua hauj lwm lub luag hauj lwm. Thaum ntsib thiab nrhiav pom teeb meem hauv tes hauj lwm, cov thawj coj thiab cov neeg ua hauj lwm yuav tsum sib qhia thiab daws tej ntawd ncav sij hawm. Yog lawv daws tsis tau tej ntawd, ces lawv yuav tsum qhia tawm thiab nrhiav kev daws tej ntawd los ntawm tus Nyob Saud kom ceev npaum li qhov ceev tau, tiam sis tsis yog muab tej ntawd tso tseg rau ib sab, tsis quav ntsej tej ntawd, thiab saib tej ntawd tsis tseem ceeb. Thaum muaj teeb meem tshwm tuaj lawm, cov thawj coj thiab cov neeg ua hauj lwm yuav tsum daws tej ntawd kom ncav sij hawm, tsis txhob ncua, tos, los sis vam khom lwm tus—cov thawj coj thiab cov neeg ua hauj lwm yuav tsum tsis txhob nthuav tawm tej kev qhia tshwm uas pom tau meej no.

II. Qhov Tshwm Sim Los ntawm Kev Tsis Daws Tej Teeb Meem Kom Ncav Sij Hawm

Lub hauv paus ntsiab lus tseem ceeb rau kev daws tej teeb meem yog yuav tsum ua kom ncav sij hawm. Vim li cas thiaj li yuav tsum ua kom ncav sij hawm? Yog muaj ntau qho teeb meem tshwm tuaj thiab tom qab ntawd daws tsis tau kom ncav sij hawm, ib kis mas tib neeg yuav daig rau hauv ib qho xwm txheej uas feeb tsis meej thiab tsis paub tias yuav ua li cas, thiab lwm kis mas, yog tib neeg pheej ua raws li ib txoj hau kev uas tsis yog mus ntxiv, thiab tom qab ntawd yuav tau rov ua dua thiab kho tes hauj lwm uas lawv tau ua lawm, ces qhov tshwm sim los yuav yog dab tsi? Tib neeg lub zog, nyiaj txiag, thiab khoom siv uas ntau heev yuav nkim thiab siv tag—qhov no yog ib qho kev poob. Yog muaj teeb meem tshwm tuaj hauv tes hauj lwm, es cov thawj coj thiab cov neeg ua hauj lwm dig muag thiab tsis muaj peev xwm nrhiav pom thiab daws cov teeb meem no kom ncav sij hawm, ces ntau tus tib neeg pheej yuav ua hauj lwm raws li ib txoj hau kev uas tsis yog mus ntxiv. Thaum tib neeg nrhiav pom cov teeb meem no thiab xav daws thiab kho tej ntawd, ces cov teeb meem no twb ua rau muaj kev puas tsuaj rau pawg ntseeg tes hauj lwm lawm. Es tsis yog yuav nkim tag nrho cov tib neeg lub zog thiab cov nyiaj txiag thiab khoom siv ntawd lawm lod? Qhov uas ua rau muaj kev puas tsuaj zoo li no puas muaj feem xyuam rau qhov uas cov thawj coj thiab cov neeg ua hauj lwm tsis daws teeb meem kom ncav sij hawm? (Muaj.) Yog cov thawj coj thiab cov neeg ua hauj lwm muaj peev xwm taug qab, saib xyuas, tshuaj xyuas, thiab muab kev coj qhia rau tes hauj lwm, ces lawv yeej yuav muaj peev xwm nrhiav pom thiab daws cov teeb meem ntawd yam ncav sij hawm. Yog cov thawj coj thiab cov neeg ua hauj lwm ua dog ua dig, thiab lawv tsis taug qab, saib xyuas, tshuaj xyuas, thiab muab kev coj qhia rau tes hauj lwm, yog lawv tsis nquag nyob rau sab no, thiab tos kom cov teeb meem ntau heev es tswj tsis tau tej ntawd kiag li lawm lawv mam li xav txog qhov daws tej ntawd, mam li xav txog qhov qhia tawm tej ntawd rau tus Nyob Saud thiab nrhiav kev daws los ntawm tus Nyob Saud, ces cov thawj coj thiab cov neeg ua hauj lwm zoo li no puas tau ua lawv tej luag hauj lwm kom tiav? (Tsis tau.) Qhov no yog ib qho kev tsis ua lub luag hauj lwm uas hnyav heev; tsis yog cov thawj coj thiab cov neeg ua hauj lwm zoo li no tsis tau daws cov teeb meem xwb, tiam sis lawv tseem ua rau muaj kev puas tsuaj rau tib neeg lub zog thiab khoom siv ntawm Vajtswv lub tsev, nrog rau tsim ib qho kev tab kaum loj heev rau pawg ntseeg tes hauj lwm. Vim yog cov thawj coj thiab cov neeg ua hauj lwm tsis ua lawv lub luag hauj lwm, lawv txoj kev tsis saib xyuas, kev loog, thiab kev ruam, thiab vim lawv tsis tuaj yeem nrhiav pom thiab daws ntau qho teeb meem uas tshwm tuaj hauv tes hauj lwm kom ncav sij hawm, thiab haj tseem tsis tuaj yeem qhia tej ntawd tawm rau tus Nyob Saud thiab nrhiav kev daws los ntawm tus Nyob Saud kom ncav sij hawm, ua rau ntau tes hauj lwm yuav tau rov ua dua thiab, tom qab rov ua dua lawm, kuj muaj teeb meem ntau ntxiv tshwm tuaj vim tsis tuaj yeem nrhiav tau tej hauv paus ntsiab lus. Thaum tej yam no pheej mus zoo li no, sij hawm ua tes hauj lwm kom tiav raug muab ncua ntev heev, thiab ib teg hauj lwm uas tsim nyog siv ib lub hlis ces ua tiav ua rau siv peb lub hlis thiaj li mam ua tiav, thiab ib tes hauj lwm uas tsim nyog siv peb lub hlis ces ua tiav ua rau siv yim los sis cuaj lub hlis thiaj li mam ua tiav—qhov no muaj feem xyuam ncaj qha rau qhov uas cov thawj coj thiab cov neeg ua hauj lwm tsis ua tes hauj lwm tiag tiag. Vim cov thawj coj thiab cov neeg ua hauj lwm tsis ris lub luag hauj lwm rau lawv tes hauj lwm—uas yog, lawv tsis tuaj yeem nrhiav pom thiab kho cov teeb meem kom ncav sij hawm thaum tej teeb meem ntawd tshwm tuaj—ntau yam ntawm tes hauj lwm pheej ua tsis tau txiaj ntsig thiab tseem nyob rau hauv ib qho xwm txheej uas nres mus tsis taus. Thiab leej twg yog tus ris lub txim ncaj qha rau qhov teeb meem no? (Cov thawj coj thiab cov neeg ua hauj lwm.) Yog li ntawd, cov thawj coj thiab cov neeg ua hauj lwm ua tes hauj lwm tiag tiag mas tseem ceeb heev, thiab lawv nrhiav pom tej teeb meem thaum lawv ua tes hauj lwm tiag tiag ntawd mas kuj tseem ceeb heev thiab. Qee zaus cov thawj coj thiab cov neeg ua hauj lwm yuav nrhiav pom cov teeb meem tiam sis tsis paub tias yuav daws li cas, tiam sis lawv muaj peev xwm qhia tawm rau tus Nyob Saud kom ncav sij hawm thiab nrhiav kev daws los ntawm tus Nyob Saud los daws tej teeb meem ntawd, qhov no yog qhov tseem ceeb dua. Ntau tus thawj coj thiab neeg ua hauj lwm xav hais tias, “Peb muaj peb tus kheej txoj hau kev ua hauj lwm. Tus Nyob Saud tsuas yog yuav tsum qhia tej hauv paus ntsiab lus rau peb xwb ces peb mam ua tes hauj lwm tiag tiag uas tshuav ntawd ntawm peb tus kheej. Yog peb ntsib tej kev nyuaj dab tsi, peb mam sib qhia thiab thov Vajtswv ua ke nyob hauv qab no xwb ces txaus lawm.” Hais txog qhov muaj zog ntawm kev daws teeb meem, los sis seb lawv txoj kev daws teeb meem ntawd puas txhij txhua los sis puas muaj txiaj ntsig, lawv txhua tus yeej tsis quav ntsej kiag li los sis tsis nug txog tej no. Qhov no yog hom cwj pwm uas tsis ris lub luag hauj lwm uas lawv muaj thaum lawv ua hauj lwm, thiab thaum kawg qhov no ua rau tag nrho cov hauj lwm hauv pawg ntseeg tsis tuaj yeem mus tau zoo, thiab muaj cov teeb meem loj heev uas tsis raug daws. Qhov no yog qhov tshwm sim los ntawm cov thawj coj thiab cov neeg ua hauj lwm lub peev xwm uas tsis zoo kiag li, los sis los ntawm qhov uas lawv tsis ris lub luag hauj lwm thiab tsis ua tes hauj lwm tiag tiag.

Soj Ntsuam Ob Peb Hom Thawj Coj Cuav Raws Li Tej Luag Hauj Lwm Yim

I. Cov Thawj Coj Cuav Uas Ua Txuj Ua Neeg ntawm Sab Ntsujplig

Zaum tas los ntawd, peb tau sib qhia txog tias tej kev paub tsis meej thiab tej kev nyuaj yog dab tsi, thiab tau tshab txhais qee cov teeb meem uas cheem tsum qhia tawm thiab cheem tsum nrhiav kev daws kom ncav sij hawm. Feem ntau mas, muaj ob hom teeb meem loj. Ib hom yog cov teeb meem hauv tes hauj lwm uas tib neeg tsis paub meej los sis pom tsis tshab. Thaum hais txog cov teeb meem no, tib neeg pom tias qhov ntawd nyuaj heev los nkag siab tej hauv paus ntsiab lus. Txawm hais tias tej zaum lawv yuav to taub tej hauv paus ntsiab lus raws li kev qhuab qhia los, lawv tsis paub tias yuav xyaum ua raws los sis siv tej hauv paus ntsiab lus ntawd li cas. Cov teeb meem no ntsig txog tej kev paub tsis meej. Lwm hom yog tej kev nyuaj thiab tej teeb meem tiag tiag uas tib neeg tsis paub tias yuav daws li cas. Hom no hnyav dua me ntsis yog muab piv rau tej kev paub tsis meej, thiab tej ntawd kuj yog tej teeb meem uas cov thawj coj thiab cov neeg ua hauj lwm yuav tsum qhia tawm thiab nrhiav kev daws thiab. Zaum tas los ntawd, qhov tseem ceeb peb sib qhia tias cov thawj coj thiab cov neeg ua hauj lwm lub luag hauj lwm yog yuav tsum qhia tawm thiab nrhiav kev los daws cov teeb meem uas ntsib hauv tes hauj lwm, thiab peb tau sib qhia los ntawm ib kis uas zoo txog qee yam uas cov thawj coj thiab cov neeg ua hauj lwm yuav tsum tau ua thiab ua tib zoo saib xyuas. Hnub no, peb yuav soj ntsuam tias cov thawj coj cuav muaj tej kev qhia tshwm uas pom tau meej dab tsi txog yam yim, thiab seb lawv puas ua tes hauj lwm uas cov thawj coj tsim nyog ua thiab ua lawv tej luag hauj lwm uas cov thawj coj tsim nyog ua kom tiav. Thaum hais txog kev daws tej teeb meem uas ntsib hauv tes hauj lwm, muaj tseeb tias cov thawj coj cuav yeej tsis muaj peev xwm nyob rau kis no; lawv ua tsis tau sab no ntawm tes hauj lwm thiab lawv ua tsis tau lub luag hauj lwm no kom tiav. Muaj ib hom thawj coj cuav uas muaj ib qho kev xav phem thaum ua hauj lwm, xav hais tias, “Kuv tsis koom nrog tej kev cai ua sab nraud thaum kuv ua hauj lwm, thiab kuv tsis quav ntsej txog ib yam dab tsi xws li kev paub, kev kawm, kev txawj, los sis kev cai li. Kuv tsuas ua kom paub tseeb tias kuv qhia qhov tseeb txog Vajtswv cov lus kom meej meej nyob rau hauv tej kev sib txoos ua ke xwb ces txaus lawm. Txhua lub lim tiam kuv ua kev sib txoos ua ke rau cov pab pawg me ob zaug, txhua ob lub lim tiam kuv tuav kev sib txoos ua ke rau cov thawj coj thiab cov neeg ua hauj lwm ib zaug, thiab txhua lub hli kuv tuav kev sib txoos ua ke loj rau tag nrho cov kwv tij thiab cov muam ib zaug. Qhov kuv npaj txhua hom kev sib txoos ua ke ntawd kom zoo ces yeej txaus lawm.” Qhov no yog lawv lub hauv paus thiab txoj hau kev rau kev ua hauj lwm. Hom thawj coj thiab neeg ua hauj lwm no tsuas pheej xyaum qhuab qhia xwb, thiab lawv siv zog ntau heev los npaj cov lus thiab cov kev qhuab qhia—lawv npaj cov txheej txheem, cov ntsiab lus, cov piv txwv, thiab qhov tseeb uas yuav sib qhia rau txhua qhov kev sib txoos ua ke, thiab lawv kuj npaj qee txoj hau kev los daws qee tus neeg cov yam ntxwv thiab cov teeb meem thiab. Lawv xav hais tias ua ib tug thawj coj los sis ib tug neeg ua hauj lwm, lawv tsuas yuav tsum tau qhuab qhia kom zoo, ces lawv tau ua lawv tej luag hauj lwm tiav lawm. Lawv xav hais tias lawv tsis tas yuav txhawj txog lwm yam, xws li seb txoj hau kev tshaj tawm txoj moo zoo puas tsim nyog, los sis pawg ntseeg cov neeg ua hauj lwm raug faib zoo li cas, los sis seb cov neeg ua hauj lwm uas ua ntau yam hauj lwm qib siab puas muaj peev xwm thiab puas ua tau raws li tus qauv—lawv ntseeg hais tias tsuas cia rau cov neeg saib xyuas daws tej no xwb txaus lawm. Yog li ntawd, txawm hom neeg no mus txog qhov twg los xij, lawv tsom ntsoov rau kev sib txoos ua ke thiab kev qhuab qhia, thiab txawm yuav yog hom kev sib txoos ua ke dab tsi los xij, lawv yeej ib txwm qhuab qhia. Saib sab nraud mas, lawv coj tib neeg nyeem Vajtswv cov lus thiab kawm hu nkauj qhuas Vajtswv, thiab qee zaus lawv tham txog tes hauj lwm. Hom neeg no paub txog cov teeb meem uas pheej sib qhia txog tas li, xws li Vajtswv cov lus twg uas yuav tsum tau siv los piv nrog cov teeb meem uas ntau hom neeg ntsib, nrog rau vim li cas tib neeg thiaj li hnov qaug zog thiab muaj cov yam ntxwv dab tsi tshwm sim hauv lawv, thiab tsim nyog sib qhia qhov tseeb twg ntawm Vajtswv cov lus los daws tej no. Muab xaus lus, lawv cov lus qhuab qhia thiab kev sib qhia ntsig txog ntau kis ntawm qhov tseeb thiab kev xyaum ua raws; qee qhov ntsig txog kev ntuas, qee qhov ntsig txog kev sim siab thiab kev kho kom dawb huv, qee qhov ntsig txog kev nyeem thov Vajtswv cov lus, qee qhov ntsig txog yuav ntsib pom kev txiav txim thiab kev rau txim li cas, thiab lwm yam—lawv tuaj yeem sib qhia me ntsis txog ntau kis ntawm qhov tseeb. Thaum lawv ntsib cov ntseeg tshiab, lawv qhuab qhia rau cov ntseeg tshiab, thiab thaum lawv ntsib cov neeg uas ntseeg Vajtswv ntau xyoo lawm, lawv tuaj yeem tham qee cov lus qhuab qhia txog kev nkag mus rau hauv lub neej txoj sia. Tiam sis thaum hais txog tes hauj lwm uas muaj feem xyuam txog kev txawj qib siab, lawv yeej tsis nug txog tes hauj lwm los sis kawm tej yam uas muaj feem xyuam txog qhov ntawd li, thiab lawv haj yam tsis taug qab, koom nrog, los sis nkag mus tob rau hauv ntau yam ntawm tes hauj lwm los daws cov teeb meem. Nyob hauv lawv lub qhov muag mas, kev qhuab qhia, kev nyeem Vajtswv cov lus, thiab kev kawm hu nkauj qhuas Vajtswv yog tab tom ua hauj lwm, thiab tej no yog cov thawj coj thiab cov neeg ua hauj lwm tej luag hauj lwm; dhau li ntawd, tag nrho lwm tes hauj lwm yog tsis tseem ceeb, yog lwm tus neeg txoj hauj lwm, thiab tsis muaj feem xyuam txog lawv, thiab tsuav lawv tuaj yeem qhuab qhia tau zoo xwb, ces lawv tuaj yeem so tau zoo lawm. “So tau zoo” txhais li cas? Qhov ntawd txhais hais tias kev ua tiav ib qho kev sib txoos ua ke ces cuag nkaus li lawv ua tiav lawv tes hauj lwm lawm, thiab thaum txog sij hawm so ces lawv so. Txawm yuav muaj teeb meem dab tsi tshwm sim hauv pawg ntseeg tes hauj lwm los xij, lawv tsis quav ntsej tej ntawd, thiab thaum tib neeg nrhiav lawv los daws ib qho teeb meem los, nrhiav lawv nyuaj heev. Txawm tes hauj lwm yuav ntau npaum li cas los xij, lawv yuav tsum tau pw tsaug zog tav su, thiab lawv txaus siab rau kev tau zoo thaum lwm tus neeg tuaj yeem tiv kev txom nyem thiab them tus nqi. Lawv xav hais tias, “Kuv tau qhuab qhia tag lawm, qhov kev sib txoos ua ke xaus lawm, thiab kuv tau hais txhua yam uas kuv tsim nyog hais rau nej lawm. Nej tseem xav kom kuv hais dab tsi ntxiv? Kuv tes hauj lwm ua tiav lawm. Qhov tshuav ntawd ces yog nej tes hauj lwm. Kuv twb qhia Vajtswv cov lus rau nej lawm, yog li ntawd tsuas yog ua raws li tej hauv paus ntsiab lus xwb. Hais txog tej teeb meem uas tshwm sim, qhov ntawd yog nej tes hauj lwm xwb, thiab tsis muaj feem xyuam nrog kuv. Nej tus kheej yuav tsum mus rau ntawm Vajtswv xub ntiag thiab thov Vajtswv, sib txoos ua ke, thiab sib qhia los daws tej teeb meem. Tsis txhob tuaj nrhiav kuv.” Thaum ib qho kev sib txoos ua ke xaus lawm, lawv yeej tsis cia leej twg nug lus nug li, lawv yeej tsis xav daws cov teeb meem, thiab lawv haj yam tsis muaj peev xwm nrhiav pom ib qho teeb meem li. Tom qab kev sib txoos ua ke xaus, lawv xav tias lawv tes hauj lwm ua tiav lawm, thiab lawv pw tsaug zog, noj mov, thiab ua si raws sij hawm. Lawv tsis yog cov thawj coj cuav uas tsis ua tes hauj lwm tiag tiag kiag li lod? (Lawv yog.)

Muaj qee qhov xwm txheej uas ib tug thawj coj los sis ib tug neeg ua hauj lwm ua lawv tes hauj lwm los tau ib nrab xyoo lawm, thiab tsuas yog cov uas nyob ze lawv thiaj li tuaj yeem pom lawv tas li xwb, cov kwv tij thiab cov muam feem coob tsis tuaj yeem pom lawv. Lawv tsuas tau hnov lawv qhuab qhia nyob hauv os lais tas li xwb, tiam sis thaum muaj ib qho teeb meem, tus thawj coj los sis tus neeg ua hauj lwm ntawd tsis daws qhov teeb meem ntawd. Qee cov kwv tij thiab cov muam ntsib tej kev nyuaj hauv lawv tej dej num uas lawv tsis paub tias yuav daws li cas, thiab lawv ntxhov siab txog qhov nyob tsis tswm li, thiab thaum lawv mus nrhiav lawv tus thawj coj los nrhiav tsis tau li. Hom thawj coj zoo li no puas tuaj yeem ua tau tes hauj lwm zoo? Cov kwv tij thiab cov muam tsis paub tias txhua hnub lawv tus thawj coj ua dab tsi es thiaj li tsis khoom li, muaj ntau qhov teeb meem thiab tej kev nyuaj uas tso ua pawg ntau zuj zus, thiab lawv tsis paub tias thaum twg lawv tus thawj coj mam li tuaj daws tej ntawd. Txhua tus tos ntsoov heev rau tus thawj coj tuaj pab, tiam sis txawm lawv yuav tos ntev npaum li cas los xij, tus thawj coj yeej tsis tuaj li. Cov thawj coj thiab cov neeg ua hauj lwm zoo li no mas nyuaj nrhiav tau, thiab lawv txawj zais lawv tus kheej heev! Lawv qhuab qhia tau zoo heev, tom qab qhuab qhia tag, lawv tu cev zoo zoo nkauj thiab tsis ua hauj lwm dab tsi li, mus nkaum rau ib qho chaw uas lawv tuaj yeem txaus siab rau kev tau zoo. Thiab txawm yuav muaj tag nrho tej no los xij, lawv tseem xav tias lawv ua hauj lwm tau zoo heev thiab tsim nyog. Lawv xav tias lawv tsis tub nkeeg, tias lawv tau qhuab qhia lawm, ua kev sib txoos ua ke lawm, hais txhua yam uas lawv tsim nyog hais lawm, thiab piav qhia txhua yam uas lawv tsim nyog piav qhia lawm. Lawv yeej ib txwm tsis xav nkag mus kom tob nrog cov kwv tij thiab cov muam mus taug qab txog thiab koom nrog tes hauj lwm, pab lawv tshuaj xyuas, thiab pab lawv saib xyuas thiab daws cov teeb meem kom ncav sij hawm. Yog lawv ntsib ib qho teeb meem uas lawv daws tsis tau, lawv kuj tsis paub qhia tawm rau tus Nyob Saud thiab nrhiav kev daws los ntawm tus Nyob Saud thiab. Lawv kuj tsis xav hauv lawv lub siab hais tias, “Cov kwv tij thiab cov muam puas tuaj yeem tuav tau tej hauv paus ntsiab lus tom qab hnov tej hauv paus ntsiab lus ntawd hauv qhov kev sib qhia? Thiab thaum lawv ntsib tej kev nyuaj thiab tej kev paub tsis meej hauv tes hauj lwm dua, lawv puas yuav muaj peev xwm tuav rawv qhov tseeb thiab saib xyuas tej yam raws li tej hauv paus ntsiab lus? Tsis tas li ntawd, leej twg ua ib qho kev ua uas zoo nyob hauv tes hauj lwm? Thiab cov neeg twg ua ib qho kev ua uas tsis zoo? Thiab puas muaj ib tug neeg twg uas ua rau muaj kev tab kaum thiab kev cuam tshuam, los sis ib tug neeg twg uas ua rau tej yam puas tsuaj, los sis ib tug neeg ruam tsis muaj qab hau twg uas yeej ib txwm muaj tej tswv yim phem? Tes hauj lwm mus tau zoo li cas nyob rau ib ntus los no?” Lawv yeej tsis quav ntsej los sis nug txog tej teeb meem zoo li no kiag li. Saib sab nraud mas zoo li hom neeg no tab tom ua hauj lwm—lawv qhuab qhia, ua kev sib txoos ua ke, npaj cov ntawv qhuab qhia thiab cov txheej txheem, thiab haj tseem sau cov ntawv qhia tawm tes hauj lwm thiab. Qee cov thawj coj kuj pheej sau cov ntawv qhuab qhia txog lawv txoj kev ntsib kev pom lub neej txoj sia thiab; lawv nyob hauv chav thiab sau ntawv tau peb los sis tsib hnub tsis tawm thiab haj tseem cheem tsum kom muaj neeg nqa dej thiab nqa zaub mov rau lawv tshwj xeeb, thiab tsis muaj leej twg pom tau lawv li. Yog koj hais tias lawv tsis ua tes hauj lwm tiag tiag, lawv hnov tias tsis ncaj ncees rau lawv: “Kuv tsis ua tes hauj lwm tiag tiag li cas? Kuv nyob nrog cov kwv tij thiab cov muam thiab kuv yeej ib txwm ua kev sib txoos ua ke thiab qhuab qhia. Kuv qhuab qhia mus txog thaum kuv lub qhov ncauj qhuav qhawv, thiab qee zaus kuv tseem nyob lig thiab.” Saib sab nraud mas zoo li lawv tsis khoom tiag tiag thiab tsis nyob dawb—lawv qhuab qhia ntau heev, thiab siv zog ntau heev los hais lus thiab sau ntawv, lawv pheej qhia tawm xov xwm thiab ntawv tas li, thiab qhia tawm tej hauv paus ntsiab lus uas tus Nyob Saud cheem tsum, thiab lawv kuj mob siab rau thiab ua siab ntev qhia thiab hais tag hais dua txog cov ntsiab lus thaum nyob hauv tej kev sib txoos ua ke—lawv yeej hais lus ntau tiag tiag, tiam sis lawv yeej tsis koom nrog tes hauj lwm tiag tiag, lawv yeej tsis taug qab tes hauj lwm, thiab lawv yeej tsis ntsib tej teeb meem ua ke nrog cov kwv tij thiab cov muam. Yog koj nug lawv tias tes hauj lwm ntawd mus zoo li cas los sis tes hauj lwm ntawd tau txais txiaj ntsig zoo li cas, lawv tsis paub thiab yuav tsum mus nug ib tug neeg twg ua ntej tso. Yog koj nug lawv seb cov teeb meem zaum tas los ntawd puas tau daws lawm, lawv hais tias lawv tau ua kev sib txoos ua ke thiab sib qhia txog tej hauv paus ntsiab lus lawm. Piv txwv tias tom qab ntawd koj nug lawv, “Cov kwv tij thiab cov muam puas tau to taub tiag tiag tom qab koj tau qhia qhov tseeb tej hauv paus ntsiab lus lawm? Lawv puas tseem tuaj yeem mus yuam kev lawm? Leej twg nyob hauv lawv uas muaj kev to taub zoo dua me ntsis txog tej hauv paus ntsiab lus, leej twg txawj ua hauj lwm dua me ntsis, thiab leej twg muaj lub peev xwm zoo dua me ntsis thiab tsim nyog cob qhia?” Lawv tsis paub cov lus teb rau cov lus nug no ib qho twg li; lawv tsis paub dab tsi txog ib qho twg ntawm qhov ntawd li. Thaum twg koj nug lawv txog qhov xwm txheej ntawm tes hauj lwm, lawv hais tias, “Kuv twb sib qhia txog tej hauv paus ntsiab lus lawm, kuv nyuam qhuav ua kev sib txoos ua ke tag, thiab kuv nyuam qhuav ntuas lawv lawm. Lawv tau qhia lawv txoj kev txiav txim siab lawm, thiab lawv muaj lub siab ruaj khov los ua tes hauj lwm no kom zoo.” Tiam sis thaum hais txog tias tes hauj lwm tom qab ntawd mus zoo li cas, lawv tsis paub hlo li. Lawv puas tuaj yeem suav tau tias mus raws li tus qauv ua cov thawj coj thiab cov neeg ua hauj lwm? (Suav tsis tau.) Txoj hau kev uas hom thawj coj thiab neeg ua hauj lwm no ua hauj lwm mas yog tsuas nyeem Vajtswv cov lus thiab qhuab qhia qee cov lus thiab cov kev qhuab qhia rau tib neeg xwb, tiam sis lawv tsis tsom ntsoov rau kev daws cov teeb meem tiag tiag thiab haj yam ntshai qhia tej ntawd tawm rau tus Nyob Saud thiab nrhiav kev daws los ntawm tus Nyob Saud—lawv ntshai heev tsam tus Nyob Saud yuav paub tias lawv qhov xwm txheej tiag tiag yog dab tsi. Lub ntsiab xeeb txawm ntawm tej kev ua zoo li no yog dab tsi? Lawv yog hom neeg dab tsi thaum hais txog lawv lub ntsiab tseeb? Muab hais kom yog kiag ces, cov neeg zoo li no yog cov Falixais tseem tseem ntag. Tej kev qhia tshwm uas pom tau meej ntawm cov Falixais yog li nram qab no: Lawv koom rau tej kev ua sab nraud uas muaj zoo, lawv hais lus thiab coj cwj pwm nyob rau hauv ib txoj hau kev uas zoo, lawv cov lus thiab tej kev ua mas mus raws li phau Vajluskub tag nrho, thiab thaum lawv ntsib thiab tham nrog tib neeg los, lawv hais cov lus los ntawm phau Vajluskub, thiab lawv hais tau ntau kab lus hauv phau Vajluskub los ntawm qhov nco tau. Cov thawj coj cuav ces yeej zoo ib yam li cov Falixais—nyob sab nraud saib mas, koj nrhiav tsis tau lawv ib qho txhaum li, thiab saib mas lawv yog cov neeg ntawm sab ntsujplig tshwj xeeb. Koj nrhiav tsis tau tej teeb meem hauv lawv los ntawm lawv cov lus, tej kev ua, thiab kev coj sab nraud, tiam sis lawv daws tsis tau ntau qho teeb meem uas muaj nyob hauv pawg ntseeg tes hauj lwm li. Yog li ntawd no qhov yog cov neeg ntawm “sab ntsujplig” no txhais li cas? Muab hais kom nruj ces, qhov ntawd yog kev ua txuj ua neeg ntawm sab ntsujplig xwb. Cov uas ua txuj ua cov neeg ntawm sab ntsujplig zoo li no mas lawv tus kheej yeej tsis khoom txhua hnub li, khiav mus los ntawm cov pab pawg loj thiab me, qhuab qhia Vajtswv cov lus txhua qhov chaw uas lawv mus. Saib sab nraud mas zoo li lawv nyiam Vajtswv cov lus ntau dua lwm tus, tias lawv siv zog rau Vajtswv cov lus ntau dua lwm tus, tias lawv paub txog Vajtswv cov lus ntau dua lwm tus, thiab lawv yeej hais tau nplooj ntawv ntawm ib zaj lus tseem ceeb hauv Vajtswv cov lus uas hais tau kiag tam sim ntawd. Yog muaj leej twg ntsib ib qho teeb meem, lawv qhia nplooj ntawv ntawm ib nqe Vajtswv cov lus uas muaj feem xyuam rau lawv thiab qhia kom lawv mus nyeem. Saib sab nraud mas, zoo li lawv muab Vajtswv cov lus ua lawv tus qauv rau txhua yam, ua tim khawv rau Vajtswv cov lus thaum muaj tej yam los raug rau lawv, thiab zoo li lawv tsis muaj teeb meem dab tsi. Tiam sis thaum koj ua tib zoo saib tes hauj lwm uas lawv ua, lawv puas muaj peev xwm nrhiav pom thiab daws cov teeb meem thaum lawv tab tom qhuab qhia cov lus thiab cov kev qhuab qhia no? Yog los ntawm kev sib qhia txog qhov tseeb, lawv nrhiav pom ib qho teeb meem uas tsis tau nrhiav pom ua ntej hauv ib yam twg ntawm tes hauj lwm, thiab daws cov teeb meem uas lwm tus daws tsis tau, ces qhov no qhia tau hais tias lawv to taub Vajtswv cov lus thiab sib qhia txog qhov tseeb tau meej. Cov neeg uas ua txuj ua neeg ntawm sab ntsujplig mas txawv kiag ntawm qhov no. Lawv cim nco Vajtswv cov lus thiab qhuab qhia tej ntawd mus rau txhua qhov chaw, thiab lawv lub siab lub ntsws puv npo nrog Vajtswv cov lus. Txawm li cas los xij, txawm yuav muaj ib qho teeb meem loj los sis ib qho teeb meem me tshwm tuaj hauv tes hauj lwm los xij, lawv tsis tuaj yeem pom los sis tsis tuaj yeem nrhiav pom li. Thaum kev sib txoos ua ke xaus, qhov uas lawv ntshai tshaj plaws yog tsam muaj neeg hais ib qho teeb meem tiag tiag tawm los thiab thov kom lawv daws qhov teeb meem ntawd, thiab vim li ntawd lawv thiaj li maj nroos tawm mus thaum qhov kev sib txoos ua ke xaus, xav hais tias, “Yog muaj neeg nug kuv ib lo lus nug thiab kuv teb tsis tau, ces qhov ntawd yuav txaj muag thiab poob ntsej muag heev!” Qhov no yog lawv lub siab ntseeg tiag tiag thiab tus yam ntxwv tseeb tiag.

Nej xav seb cov thawj coj thiab cov neeg ua hauj lwm twg uas nyob ib puag ncig nej uas txawj qhia qhov tseeb los daws tej teeb meem, thiab muaj peev xwm koom ua ke nrog cov kwv tij thiab cov muam thiab pib ua tes hauj lwm ua ke nrog lawv thaum ua lawv tej dej num—cov thawj coj thiab cov neeg ua hauj lwm no muaj peev xwm ua lawv tej luag hauj lwm kom tiav. Xav seb cov thawj coj thiab cov neeg ua hauj lwm twg uas nyob ib puag ncig nej uas txawj nrhiav pom thiab daws tej teeb meem, thiab tsom ntsoov rau kev ua tes hauj lwm tiag tiag tshaj plaws thiab tau txais txiaj ntsig ntau tshaj plaws hauv lawv tes hauj lwm—cov thawj coj thiab cov neeg ua hauj lwm no yog cov neeg ua siab ncaj uas ris lub luag hauj lwm thiab ua tib zoo ua heev. Qhov txawv, yog ib tug thawj coj txawj tham cov lus thiab cov kev qhuab qhia heev, thiab qhuab qhia yam muaj qab hau thiab muaj qib muaj duas, muaj ib lub ntsiab tseem ceeb thiab muaj ntsiab lus, thiab muaj chaw txawb chaw raws, thiab tib neeg kub siab lug rau lawv cov lus qhuab qhia, tiam sis lawv pheej zam cov kwv tij thiab cov muam tas li, pheej ntshai tias cov kwv tij thiab cov muam yuav nug lus nug, thiab ntshai daws thiab saib xyuas cov teeb meem ua ke nrog cov kwv tij thiab cov muam, ces tus thawj coj ntawd yog tus uas ua txuj ua neeg ntawm sab ntsujplig, thiab lawv yog ib tug thawj coj cuav. Cov thawj coj thiab cov neeg saib xyuas nyob ib puag ncig nej yog hom neeg zoo li cas? Raws li ib txwm, dhau ntawm kev koom kev sib txoos ua ke thiab kev qhuab qhia lawm, lawv puas taug qab thiab koom nrog tes hauj lwm, lawv puas muaj peev xwm nrhiav pom thiab daws cov teeb meem hauv tes hauj lwm tas li, los sis lawv tsuas tshwm ntsej muag hauv kev sib txoos ua ke xwb tom qab ntawd ces ploj mus lawm? Cov thawj coj cuav uas ua txuj ua neeg ntawm sab ntsujplig pheej ntshai tsam tsis muaj dab tsi qhuab qhia, thiab tsis muaj dab tsi hais thaum lawv ntsib cov kwv tij thiab cov muam, yog li ntawd lawv thiaj li xyaum nco Vajtswv cov lus thiab xyaum tias yuav qhuab qhia li cas nyob hauv lawv chav. Lawv ntseeg hais tias kev qhuab qhia yog ib yam uas tuaj yeem kawm tau thiab yog ib yam uas tuaj yeem ua tau tiav los ntawm kev cim nco, zoo ib yam li qhov nrhiav kev paub los sis kev kawm hauv tsev kawm qib siab, thiab tias lawv yuav tsum muaj ib tug ntsujplig uas kawm yam tsis paub nkees thiab siv zog kawg nkaus li. Qhov kev nkag siab uas cov thawj coj cuav no muaj ntawd tsis yog nkhaus lod? (Yog lawm.) Cov neeg zoo li no qhuab qhia tej kev qhuab qhia los ntawm lawv lub meej mom siab, thiab lawv tus kheej quav ntsej txog qee yam uas tsis muaj feem xyuam, ces lawv txawm xav tias lawv ua tes hauj lwm ua thawj coj lawm. Lawv yeej tsis mus rau qhov chaw ua hauj lwm mus coj qhia tes hauj lwm los sis daws tej teeb meem li, tiam sis pheej zaum hauv lawv chav, “muab lawv tus kheej kaw es los tsom ntsoov rau txoj kev cob qhia lawv tus kheej,” npaj Vajtswv cov lus—qhov no puas tsim nyog? Nyob rau cov xwm txheej twg uas cov thawj coj thiab cov neeg ua hauj lwm tuaj yeem muab pawg ntseeg tes hauj lwm thiab cov kwv tij thiab cov muam tso rau ib sab ib lub sij hawm es mus npaj qhov tseeb? Thaum tes hauj lwm tsis ntau, thiab tag nrho cov teeb meem uas yuav tsum tau daws ntawd twb daws tag lawm, thiab tag nrho tej yam uas cheem tsum kom ceev faj thiab tej hauv paus ntsiab lus uas yuav tsum tau piav qhia ntawd twb piav qhia tag lawm, thiab cov kwv tij thiab cov muam tsis muaj lus nug los sis tej kev nyuaj dab tsi lawm, thiab tsis muaj leej twg ua rau muaj kev cuam tshuam thiab kev tab kaum, thiab tes hauj lwm tuaj yeem mus tau zoo, thiab tsis muaj kev tab kaum ntxiv lawm, ces cov thawj coj thiab cov neeg ua hauj lwm tuaj yeem nyeem Vajtswv cov lus thiab npaj qhov tseeb—tsuas yog qhov no xwb thiaj li yog kev ua tes hauj lwm tiag tiag. Cov thawj coj cuav tsis ua tes hauj lwm li no; lawv pheej tsom ntsoov rau qhov ua kom sawv daws pom lawv tus kheej xwb, thiab lawv tsuas ua qee tes hauj lwm uas pom tau meej los khav es kom lwm tus pom xwb. Yog lawv tuaj yeem nrhiav tau qee qhov kev kaj tshiab thaum nyeem Vajtswv cov lus los sis mloog ib zaj lus qhuab qhia, lawv xav tias lawv tau txais qee yam, tias lawv muaj qhov tseeb qhov muaj tiag, thiab tom qab ntawd lawv maj nroos nrhiav ib lub cib fim los qhuab qhia rau lwm tus. Lawv qhuab qhia tej kev qhuab qhia nyob rau hauv ib txoj hau kev uas muaj txheej txheem, muaj qab hau, thiab npaj tau zoo, muaj ib lub ntsiab tseem ceeb thiab muaj lub ntsiab lus, thiab nyob rau hauv ib qho uas muaj zog thiab tob dua li ib zaj lus qhuab qhia los ntawm ib tug neeg muaj npe nrov los sis ib zaj lus qhuab qhia qib siab, thiab lawv xav tias txaus siab heev rau qhov no. Tiam sis lawv xav hauv lawv tus kheej hais tias, “Zaum no qhuab qhia tag lawm, zaum tom ntej kuv yuav qhuab qhia dab tsi? Kuv tsis muaj dab tsi lawm.” Thiab yog li ntawd lawv thiaj li maj nroos mus “muab lawv tus kheej kaw es los tsom ntsoov rau txoj kev cob qhia lawv tus kheej” dua, nrhiav tej kev qhuab qhia uas tob. Yeej tsis muaj leej twg pom lawv nyob ntawm qhov chaw ua pawg ntseeg tes hauj lwm, thiab thaum tib neeg muaj tej kev nyuaj thiab tos kom raug daws, yeej nrhiav tsis tau cov thawj coj cuav no nyob qhov twg li. Cov thawj coj cuav puas hnov lub siab tsis tus thiab tsis kaj siab? Lawv daws tsis tau cov teeb meem tiag tiag thiab txawm li ntawd los lawv tseem xav qhuab qhia cov lus qhuab qhia uas siab los khav tus kheej kom lwm tus pom. Cov neeg no yeej tsis paub txaj muag li.

Tag nrho cov thawj coj cuav puav leej txawj qhuab qhia cov lus thiab cov kev qhuab qhia, lawv puav leej yog cov ua txuj ua neeg ntawm sab ntsujplig, lawv ua tsis tau ib teg hauj lwm tiag tiag li, thiab lawv tsis to taub qhov tseeb txawm yog lawv tau ntseeg Vajtswv ntau xyoo los xij—yeej hais tau tias lawv tsis muaj kev to taub ntawm sab ntsujplig hlo li. Lawv xav hais tias qhov ua ib tug thawj coj pawg ntseeg ntawd mas txhais tau hais tias tsuas yog lawv yuav tsum qhuab qhia qee cov lus thiab cov kev qhuab qhia, qw qee cov lus qw, thiab piav qhia Vajtswv cov lus me ntsis xwb, ces tib neeg txawm yuav to taub qhov tseeb lawm. Lawv tsis paub tias qhov ua hauj lwm ntawd yog txhais li cas, lawv tsis paub tias cov thawj coj thiab cov neeg ua hauj lwm tej luag hauj lwm tiag tiag yog dab tsi, thiab lawv tsis paub tias vim li cas tiag tiag Vajtswv lub tsev thiaj li xaiv ib tug neeg twg los ua ib tug thawj coj los sis ib tug neeg ua hauj lwm, los sis qhov no yog txhawm rau daws cov teeb meem dab tsi tiag tiag. Yog li ntawd, txawm Vajtswv lub tsev yuav qhia npaum li cas tias cov thawj coj thiab cov neeg ua hauj lwm yuav tsum taug qab tes hauj lwm, tshuaj xyuas tes hauj lwm, thiab saib xyuas tes hauj lwm, tias lawv yuav tsum nrhiav kom pom thiab daws cov teeb meem hauv tes hauj lwm kom ncav sij hawm, thiab lwm yam los xij, lawv yeej mloog tsis nkag pob ntseg thiab lawv tsis to taub li. Lawv tsis muaj peev xwm ua tau los sis ua kom tiav raws li cov kev cheem tsum uas Vajtswv lub tsev muaj rau cov thawj coj thiab cov neeg ua hauj lwm, thiab lawv to taub tsis tau cov teeb meem uas muaj feem xyuam txog kev txawj ntse ntawm txoj hauj lwm uas nyob rau hauv kev ua tej dej num, nrog rau qhov teeb meem ntawm lub hauv paus ntsiab lus rau kev xaiv cov neeg saib xyuas, thiab lwm yam, thiab tab txawm yog lawv paub txog cov teeb meem no los, lawv yeej tseem tsis muaj peev xwm daws tau tej ntawd. Yog li ntawd, nyob rau hauv txoj kev coj ntawm cov thawj coj cuav zoo li no, txhua yam teeb meem uas tshwm sim hauv pawg ntseeg tes hauj lwm yeej daws tsis tau. Tsis yog cov teeb meem sab kev txawj ntse ntawm txoj hauj lwm uas cov neeg Vajtswv xaiv tseg ntsib thaum ua lawv tej dej num xwb, tiam sis tej kev nyuaj hauv kev nkag mus rau hauv lub neej txoj sia ntawm cov neeg Vajtswv xaiv tseg los kuj daws tsis tau txais los tau ntev, thiab thaum qee cov thawj coj thiab cov neeg ua hauj lwm los sis cov neeg saib xyuas ntawm ntau yam ntawm tes hauj lwm ua tsis tau tes hauj lwm tiag tiag, lawv tsis raug muab rho tawm los sis hloov tes dej num kom ncav sij hawm, thiab lwm yam. Tsis muaj ib qho ntawm cov teeb meem no raug daws kom ncav sij hawm li, thiab vim li ntawd kev ua hauj lwm tau zoo ntawm ntau yam ntawm hauj lwm hauv pawg ntseeg thiaj li poob qis zuj zus, thiab cov txiaj ntsig ntawm tes hauj lwm thiaj li tsis zoo zuj zus. Nyob ntawm sab cov neeg ua hauj lwm mas, cov uas muaj khoom pub me ntsis thiab txawj hais lus ntawd tau los ua cov thawj coj thiab cov neeg ua hauj lwm, hos cov uas nyiam qhov tseeb, cov uas tuaj yeem rau siab ntso ua hauj lwm, thiab ua hauj lwm yam tsis paub nkees thiab tsis yws, ho tsis raug txhawb thiab cob qhia, thiab raug saib zoo li cov neeg ua dej num txhawb, thiab ntau hom neeg ua hauj lwm uas muaj kev txawj sab thev naus laus ntsis los tsis raug muab siv kom tsim nyog. Tsis tas li ntawd, ib txhia neeg uas ua lawv tes dej num nrog lub siab tseeb tiag tsis tau txais kev yug ntawm lub neej txoj sia, yog li ntawd lawv thiaj li poob mus rau hauv kev xav tsis zoo thiab kev qaug zog. Tsis tas li ntawd xwb, txawm cov tawm tsam khetos thiab cov tib neeg phem yuav ua phem ntau npaum li cas los xij, qhov ntawd zoo li cov thawj coj cuav tsis pom li. Yog muaj neeg qhia tshwm ib tug tib neeg phem los sis ib tug tawm tsam khetos, cov thawj coj cuav haj tseem yuav qhia lawv tias lawv yuav tsum coj rau tus neeg ntawd nrog kev hlub thiab muab cib fim rau lawv lees txim hloov dua siab tshiab. Qhov ua li no, lawv tso cai rau cov tib neeg phem thiab cov tawm tsam khetos ua phem thiab ua kev cuam tshuam hauv pawg ntseeg, thiab qhov no ua rau ncua sij hawm ntev uas cov tib neeg phem, cov tsis ntseeg, thiab cov tawm tsam khetos no mam li raug ntsaig tawm mus los sis raug ntiab tawm, thiab lawv thiaj li tau ua phem hauv pawg ntseeg thiab cuam tshuam pawg ntseeg tes hauj lwm txuas ntxiv. Cov thawj coj cuav tsis muaj peev xwm saib xyuas thiab daws ib qho ntawm cov teeb meem no li; lawv tsis muaj peev xwm coj kom ncaj ncees rau tib neeg los sis npaj tes hauj lwm kom tsim nyog, tiam sis lawv ua yam tsis xav thiab tsuas ua qee tes hauj lwm uas tsis muaj qab hau xwb, ua rau pawg ntseeg tes hauj lwm ntxhov quav niab thiab ntxhov hnyo. Txawm Vajtswv lub tsev yuav qhia txog qhov tseeb npaum li cas los sis hais tag hais dua tej hauv paus ntsiab lus uas yuav tsum ua raws thaum ua pawg ntseeg tes hauj lwm npaum li cas los xij—qhov txwv cov uas tsim nyog raug txwv thiab ntsaig cov uas tsim nyog raug ntsaig tawm mus uas yog ntau hom neeg ua phem thiab cov tsis ntseeg, thiab txhawb thiab cob qhia cov neeg uas muaj peev xwm zoo thiab muaj peev xwm nkag siab, thiab cov neeg uas tuaj yeem caum qhov tseeb, uas tsim nyog raug txhawb thiab cob qhia—txawm hais tias yuav sib qhia tej no ntau zaus yam suav tsis txheeb los xij, cov thawj coj cuav yeej tsis to taub los sis tsis nkag siab tej ntawd thiab tsuas pheej tuav rawv lawv tej kev xam pom uas ua txuj ua neeg ntawm sab ntsujplig thiab tej kev ua uas “muaj kev hlub” ntawd xwb. Cov thawj coj cuav ntseeg tias, nyob rau hauv lawv txoj kev mob siab thiab ua siab ntev qhia, txhua hom neeg puav leej ua lawv tus kheej lub luag hauj lwm yam muaj paus muaj ntsis, tsis ntxhov quav niab, thiab txhua tus muaj kev ntseeg heev, txaus siab hlo ua lawv tej dej num, tsis ntshai tsam raug kaw rau hauv nkuaj thiab tsis ntshai tsam raug kev phom sij, thiab txhua tus neeg muaj kev txiav txim siab los tiv kev txom nyem thiab tsis txaus siab los ua ib tug Yudas. Lawv ntseeg tias qhov uas muaj kev zoo siab nyob rau hauv lub neej hauv pawg ntseeg ntawd txhais hais tias lawv twb ua tau ib txoj hauj lwm zoo lawm. Txawm hais tias muaj cov tib neeg phem ua rau muaj kev cuam tshuam los sis cov tsis ntseeg tshaj tawm tej kev qhuab qhia uas yuam kev thiab cuav nyob rau hauv pawg ntseeg los xij, lawv tsis saib tej no tias yog teeb meem, thiab lawv xav tias tsis tas yuav daws tej ntawd li. Thaum hais txog ib tug neeg uas lawv tau tso tes hauj lwm rau es ua yam tsis xav raws li lawv tus kheej lub siab nyiam thiab cuam tshuam tes hauj lwm tshaj tawm txoj moo zoo, los cov thawj coj cuav haj yam dig muag tsis pom. Lawv hais tias, “Kuv twb tau piav qhia txog tes hauj lwm tej hauv paus ntsiab lus uas kuv tsim nyog piav qhia lawm, thiab kuv twb tau qhia lawv ntau zaus tias yuav tsum ua li cas lawm. Yog muaj teeb meem dab tsi tshwm sim, ces qhov ntawd tsis muaj dab tsi cuam tshuam txog kuv li.” Tiam sis, lawv tsis paub tias tus neeg ntawd puas yog ib tug neeg uas yog, lawv tsis quav ntsej txog qhov ntawd, thiab lawv tsis paub tias yam uas lawv hais thaum lawv piav qhia thiab qhia tus neeg ntawd tias yuav tsum ua dab tsi ntawd puas yuav ua tau txiaj ntsig zoo, los sis yuav ua rau muaj qhov tshwm sim los zoo li cas. Txhua zaus uas cov thawj coj cuav ua kev sib txoos ua ke mas, lawv hais cov lus thiab cov kev qhuab qhia ntau heev yam tsis paub xaus li, tiam sis qhov tshwm sim los yog lawv daws tsis tau ib qho teeb meem li. Tiam sis lawv tseem ntseeg tias lawv tab tom ua tes hauj lwm loj heev, lawv tseem zoo siab rau lawv tus kheej thiab xav tias lawv zoo heev. Qhov tseeb tiag, cov lus thiab cov kev qhuab qhia uas lawv hais ntawd tsuas dag tau cov tib neeg feeb tsis meej, cov tib neeg ruam, thiab cov tib neeg tsis paub qab hau uas tsis paub dab tsi thiab lub peev xwm tsis zoo xwb. Tom qab cov neeg no hnov cov lus no, lawv feeb tsis meej thiab ntseeg tias yam uas cov thawj coj cuav hais ntawd yog heev, tias tsis muaj ib yam uas lawv hais ntawd yuam kev li. Cov thawj coj cuav tsuas ua tau kom cov neeg feeb tsis meej no txaus siab xwb thiab yeej daws tsis tau cov teeb meem tiag tiag hlo li. Muaj tseeb tias, cov thawj coj cuav haj yam tsis muaj peev xwm daws cov teeb meem uas muaj feem xyuam txog kev txawj ntse qib siab thiab kev paub—lawv yeej ua tsis tau ib yam dab tsi li thaum hais txog tej no. Muab Vajtswv lub tsev tes hauj lwm ntawm sab ntaub ntawv los ua piv txwv. Qhov no yog tes hauj lwm uas ua rau cov thawj coj cuav mob taub hau tshaj plaws. Lawv paub tsis tau meej tias cov neeg twg muaj kev to taub ntawm sab ntsujplig, muaj peev xwm zoo, thiab haum rau kev ua tes hauj lwm ntaub ntawv, thiab lawv saib leej twg uas coj tsom iav thiab muaj kev kawm qib siab ces hais tias cov ntawd yog cov uas muaj peev xwm zoo thiab muaj kev to taub ntawm sab ntsujplig, yog li ntawd lawv thiaj li npaj kom cov neeg ntawd ua, thiab qhia lawv tias, “Nej txhua tus puav leej muaj peev xwm ua tes hauj lwm ntaub ntawv. Kuv tsis to taub tes hauj lwm no, yog li ntawd txhua yam cia siab rau nej xwb. Vajtswv lub tsev tsis cheem tsum lwm yam ntawm nej, tsuas yog kom nej muab nej tej kev ua tau zoo coj los siv, tsis txhob zais cia, thiab muab txhua yam uas nej tau kawm ntawd los siv rau hauv. Nej yuav tsum paub ua tsaug thiab ua Vajtswv tsaug uas Nws txhawb tsa nej.” Tom qab cov thawj coj cuav hais ib pawg lus uas tsis muaj qab hau thiab ntiav ntiav lawm, lawv xav tias twb npaj tes hauj lwm tag lawm, thiab tias lawv twb ua txhua yam uas lawv yuav tsum tau ua lawm. Lawv tsis paub li tias cov neeg uas lawv tau npaj los ua tes hauj lwm no puas haum los sis tsis haum, thiab lawv tsis paub tias cov neeg no tu ncua dab tsi ntawm kis kev paub qib siab, los sis lawv yuav tsum ntxiv qhov tu ncua ntawd li cas. Lawv tsis paub saib thiab cais tib neeg, lawv tsis to taub cov teeb meem ntawm txoj hauj lwm, thiab lawv tsis to taub txog kev paub uas muaj feem xyuam txog kev sau ntawv—lawv yeej tsis paub dab tsi txog tej no hlo li. Lawv hais ntawm ncauj tias lawv tsis to taub los sis tsis nkag siab tej no, tiam sis nyob hauv lawv lub siab mas, lawv xav tias, “Nej tsuas yog muaj kev kawm thiab kev paub ntau dua kuv me ntsis xwb tsis yog lod? Txawm hais tias kuv coj qhia tsis tau nej nyob hauv tes hauj lwm no los, kuv paub txog ntawm sab ntsujplig dua nej, kuv txawj qhuab qhia dua nej, thiab kuv to taub Vajtswv cov lus zoo dua nej. Kuv yog tus coj nej, kuv yog nej tus thawj. Kuv yuav tsum yog tus saib xyuas nej, thiab nej yuav tsum ua raws li kuv hais.” Cov thawj coj cuav saib lawv tus kheej siab heev, tiam sis lawv tawm tsis tau ib qho tswv yim uas muaj nqis txog txhua yam ntawm tes hauj lwm uas muaj feem xyuam txog kev txawj ntse qib siab, thiab lawv yeej muab tsis tau kev coj qhia thiab. Qhov ntau tshaj plaws, lawv tsuas npaj tau cov neeg ua hauj lwm kom zoo xwb; lawv ua tsis tau ib tes hauj lwm uas yuav tsum ua tom qab ntawd li. Lawv tsis kawm kom tau kev paub txog txoj hauj lwm, thiab lawv tsis taug qab tes hauj lwm. Tag nrho cov thawj coj cuav yog cov ua txuj ua neeg ntawm sab ntsujplig; txhua yam uas lawv ua tau ces tsuas yog tshaj tawm qee cov lus thiab cov kev qhuab qhia ces lawv txawm xav tias lawv to taub qhov tseeb lawm thiab pheej khav nyob rau ntawm cov neeg Vajtswv xaiv tseg xub ntiag. Txhua zaus sib txoos ua ke, lawv qhuab qhia ntau teev, tiam sis qhov tshwm sim los yog lawv yeej daws tsis tau ib qho teeb meem hlo li. Lawv yeej tsis paub dab tsi hlo li thaum hais txog cov teeb meem uas muaj feem xyuam txog kev paub qib siab nyob hauv tib neeg tej dej num; yeej qhia meej tias lawv yog cov neeg tsis paub, tiam sis lawv tseem ua txuj tias yog cov neeg ntawm sab ntsujplig, los taw qhia tes hauj lwm rau cov kws txawj—lawv yuav ua tes hauj lwm kom zoo li no tau li cas? Qhov uas cov thawj coj cuav tsis kawm kev paub txog txoj hauj lwm thiab ua tsis tau ib teg hauj lwm tiag tiag ntawd xwb twb ua rau tib neeg xeev siab lawm, thiab tshaj qhov no, lawv ua txuj ua cov tib neeg ntawm sab ntsujplig thiab khav txog lawv cov lus ntawm sab ntsujplig, uas yog qhov tsis muaj laj thawj kiag li! Qhov no yeej tsis txawv ntawm cov Falixais li. Qhov uas cov Falixais tsis muaj laj thawj tshaj plaws ntawd yog qhov uas Vajtswv ntxub lawv, tiam sis lawv yeej tsis paub txog qhov ntawd hlo li thiab tseem xav tias lawv tus kheej zoo heev thiab yog cov ntawm sab ntsujplig heev. Cov thawj coj cuav tsis paub txog lawv tus kheej li no; lawv yeej ua tsis tau ib teg hauj lwm tiag tiag tiam sis lawv ua txuj ua cov neeg ntawm sab ntsujplig, lawv dhau los ua cov Falixais uas ntsej muag ncaj siab nkhaus. Lawv yeej yog cov uas Vajtswv ntxub ntxaug thiab tshem tawm ntag.

Tus yam ntxwv tseem ceeb ntawm cov thawj coj cuav uas ua txuj ua cov neeg ntawm sab ntsujplig ntawd yog dab tsi? Qhov ntawd yog lawv txawj qhuab qhia. Tej “lus qhuab qhia” no tsis yog tej lus qhuab qhia tseeb tiag. Tej ntawd tsis yog tej lus qhuab qhia uas sib qhia txog qhov tseeb, thiab tsis yog tej lus qhuab qhia uas muaj qhov tseeb qhov muaj tiag. Tiam sis, tej ntawd yog tej lus qhuab qhia ntawm cov lus thiab cov kev qhuab qhia; yog tej lus qhuab qhia uas ua txuj ntawm sab ntsujplig, yog cov Falixais tej lus qhuab qhia. Cov thawj coj cuav txawj siv zog rau cov lus thiab cov kab lus ntawm Vajtswv cov lus heev, lawv tsom ntsoov tshwj xeeb rau qhov qhuab qhia cov lus thiab cov kev qhuab qhia, tiam sis lawv yeej ib txwm tsis nrhiav qhov tseeb hauv Vajtswv cov lus thiab yeej ib txwm tsis ua tib zoo xav tias lawv yuav tsum nkag mus rau hauv qhov tseeb qhov muaj tiag li cas. Lawv tsuas txaus siab rau qhov uas txawj qhuab qhia cov lus thiab cov kev qhuab qhia xwb; thaum lawv qhuab qhia tej kev qhuab qhia ntawd tau meej thiab muaj laj thawj lawm, lawv xav tias qhov ntawd zoo txaus lawm thiab xav tias lawv muaj qhov tseeb qhov muaj tiag lawm, tias lawv tuaj yeem sawv ntawm lwm tus xub ntiag thiab hais kom lwm tus ua ub ua no, thiab qhuab ntuas tib neeg los ntawm lawv lub meej mom siab. Saib sab nraud mas, yam uas lawv hais thiab ua zoo li muaj feem xyuam rau qhov tseeb, zoo li lawv tsis tsim kev tab kaum los sis kev cuam tshuam, thiab zoo li lawv tsis txhawb tej lus hais uas yuam kev los sis haub ntxias tej kev xyaum ua uas yuam kev. Tiam sis, muaj ib qho teeb meem, uas yog lawv ris tsis tau ib teg hauj lwm tiag tiag li, los sis ua tsis tau lawv lub luag hauj lwm tiav ib qho me me li, uas thaum kawg ua rau lawv nrhiav tsis pom ib qho teeb meem hauv tes hauj lwm li. Txoj kev uas lawv ua hauj lwm mas zoo li ib tug neeg dig muag xuas kev mus: Lawv ib txwm ua raws li lawv tej kev xav thiab tej kev xav hauv nruab siab los muab tej kev cai tswj siv yam dig muag ntsuav, yeej tsis pom lub ntsiab tseeb ntawm cov teeb meem meej hlo li, tiam sis lawv tseem hais lus tsis muaj qab hau txog tej ntawd—lawv yeej daws tsis tau tej teeb meem tiag tiag hlo li. Yog ib tug thawj coj cuav to taub qhov tseeb tiag tiag, lawv yeej yuav cia li nrhiav pom tej teeb meem thiab nrhiav qhov tseeb los daws tej teeb meem ntawd. Tiam sis cov thawj coj cuav yeej tsis to taub qhov tseeb meej li, tiam sis lawv ua txuj ua neeg ntawm sab ntsujplig, xav tias lawv muaj peev xwm ua tau pawg ntseeg tes hauj lwm, thiab tseem muaj cuab kav xyiv fab rau tej txiaj ntsim ntawm lub meej mom yam tsis paub txaj muag. Qhov no tsis yog qhov ua rau xeev siab lod? Lawv xav tias lawv muaj ib qho kev txawj tiag tiag—uas yog lawv txawj qhuab qhia. Tiam sis lawv yeej ua tsis tau tes hauj lwm tiag tiag li. Cov lus thiab cov kev qhuab qhia uas cov thawj coj cuav paub thiab qhuab qhia ntawd pab tsis tau lawv ua lawv tes hauj lwm kom zoo, thiab pab tsis tau lawv nrhiav pom cov teeb meem hauv tes hauj lwm, thiab haj yam pab tsis tau lawv daws tag nrho cov teeb meem uas lawv ntsib. Tom qab ua hauj lwm tau ib ntus, lawv hais tsis tau ib zaj lus tim khawv uas hais txog txoj kev ntsib kev pom li. Ib tug thawj coj los sis ib tug neeg ua hauj lwm uas zoo li no puas mus raws li tus qauv? Yeej pom meej tias lawv tsis mus raws li tus qauv. Ua li yuav daws li cas rau cov thawj coj cuav uas tsis mus raws li tus qauv no? Tsis yog tsuas rho tawm thiab tshem tawm xwb, tiam sis yog lawv tsis lees txim hloov dua siab tshiab, ces lawv yuav tsis raug xaiv dua los ua ib tug thawj coj los sis ib tug neeg ua hauj lwm thaum muaj kev xaiv tsa. Yog muaj neeg xaiv ib tug thawj coj cuav los sis ib tug neeg ua hauj lwm cuav uas raug tshem tawm lawm, ces yog lawv yeej txhob txwm cuam tshuam thiab ua kom pawg ntseeg tes hauj lwm puas tsuaj thiab qhov no qhia tau tias tus neeg pov ntawv ntawd yog tus uas pe hawm thiab raws tus thawj coj cuav ntawd qab, thiab tsis yog ib tug uas ntseeg Vajtswv tiag tiag. Yav tas los nej puas tau xaiv ib tug thawj coj cuav uas ua txuj ua neeg ntawm sab ntsujplig? (Peb tau xaiv lawm.) Kuv xav tias nej twb xaiv ntau tus lawm. Nej xav tias leej twg uas ntseeg Vajtswv tau ntau xyoo lawm, tau nyeem Vajtswv cov lus ntau thiab mloog cov lus qhuab qhia ntau, uas muaj kev ntsib kev pom ntau txog kev qhuab qhia thiab kev ua hauj lwm, uas muaj peev xwm qhuab qhia tau ntau teev ua ke, ces yeej muaj peev xwm ua tau tes hauj lwm xwb. Ces tom qab nej xaiv lawv los ua ib tug thawj coj lawm, nej mam li pom ib qho teeb meem loj: Cov kwv tij thiab cov muam yeej tsis pom lawv li thiab nrhiav tsis tau lawv thaum muaj ib qho teeb meem li. Tsis muaj leej twg paub tias lawv nkaum qhov twg, thiab lawv nkaum rau ib qho chaw thiab tsis pub leej twg los cuam tshuam lawv. Qhov ntawd yog ib qho teeb meem. Lawv pheej ua si nrhiav nkaum thaum txog lub sij hawm tseem ceeb hauv tes hauj lwm thiab cov kwv tij thiab cov muam yeej nrhiav tsis tau lawv li thaum cheem tsum lawv los daws ib qho teeb meem—lawv tsis yog cov uas tsis ua lawv tej dej num uas tsim nyog ua lod? Vim li cas qee tus neeg thiaj li tsis muaj cuab kav ntsib cov kwv tij thiab cov muam thaum lawv los ua ib tug thawj coj lawm? Vim li cas thiaj li nrhiav tsis tau lawv li? Tiag tiag lawm lawv tab tom khwv ua dab tsi? Vim li cas lawv thiaj li tsis daws cov teeb meem tiag tiag? Txawm lawv yuav khwv ua dab tsi los xij, qhov no, nej tuaj yeem paub tseeb tias: Yog lawv tsis ua hauj lwm tiag tiag tau ib ntus, ces lawv yog ib tug thawj coj cuav, thiab lawv yuav tsum raug muab rho tawm kom sai, thiab yuav tsum xaiv lwm tus los hloov. Yav tom ntej nej puas yuav xaiv hom thawj coj cuav zoo li no ntxiv lawm? (Tsis xaiv lawm.) Vim li cas thiaj li tsis xaiv lawm? Nej xav tias qhov tshwm sim los ntawm kev xaiv ib tug neeg dig muag los ua tus coj kev rau nej yog dab tsi? Tus neeg ntawd lawv tus kheej twb dig muag lawm, yog li ntawd lawv puas coj tau lwm tus mus rau txoj kev yog? Qhov ntawd yeej zoo ib yam li Vajtswv cov lus hauv phau Vajluskub hais tias, “Thiab yog hais tias tus dig muag coj tus dig muag kev, ces nkawv ob leeg yeej yuav poob rau hauv kwj deg xwb” (Mathai 15:14). Ib tug neeg dig muag taug kev yam tsis muaj txoj xub ke los sis lub hom phiaj; lawv yuav ua li cas thiaj li coj tau lwm tus? Yog ib tug twg xaiv ib tug neeg dig muag los ua lawv tus coj kev, ces lawv haj yam dig muag tshaj thiab. Muaj ib lo lus paj lug ntawm cov ib txwm tsis ntseeg hais tias: “nug kev ntawm tus neeg dig muag.” Qhov xaiv ib tug thawj coj cuav los ua ib tug thawj coj pawg ntseeg yog qhov nug kev ntawm tus neeg dig muag. Qhov ntawd tsis yog ib qho ruam tsis muaj qab hau lod? Txhua tus uas pov ntawv xaiv ib tug thawj coj cuav ces yog cov neeg dig muag xaiv neeg dig muag, thiab tsis muaj ib tug ntawm lawv to taub qhov tseeb li.

Thaum ib txhia neeg xaiv tau ib tug neeg uas ua txuj ua neeg ntawm sab ntsujplig los ua ib tug thawj coj, lawv zoo siab heev, thiab xav tias, “Tam sim no peb muaj ib tug thawj coj zoo lawm. Peb tus thawj coj mas txawj qhuab qhia heev. Lawv tshaj tawm yam muaj qab hau thiab muaj paus muaj ntsis, thiab lawv cov lus qhuab qhia mas tsim nyog heev.” Ib txhia tib neeg uas tsis muaj kev paub cais los kua muag, lawv nco tus thawj coj no heev tsis xav ncaim li, thiab lawv haj tseem twb tsis xav mus ua lawv tej dej num li lawm thiab. Lawv to taub txhua yam meej meej thaum lawv mloog kev sib qhia, tiam sis thaum lawv pom cov teeb meem thaum tab tom ua lawv tes dej num ntawd, lawv tsis paub tias yuav daws cov teeb meem ntawd li cas thiab lawv xav tsis thoob, xav tias, “Kuv mloog zoo li kuv to taub txhua yam thaum kuv mloog tus thawj coj qhia, ua cas kuv thiaj li daws tsis tau tej kev nyuaj uas kuv ntsib hauv kuv tes hauj lwm?” Qhov no yog teeb meem dab tsi? Txhua yam uas hom thawj coj cuav zoo li no qhuab qhia mas puav leej yog cov lus thiab cov kev qhuab qhia, cov lus tsis muaj ntsiab, cov lus qw, thiab cov lus tsis muaj qab hau. Yam uas lawv qhuab qhia ntawd daws tsis tau koj tej teeb meem tiag tiag; lawv dag tau koj lawm. Lawv muab tej kev xav uas tsis muaj tseeb los ntxias koj, hais ob peb lo lus qw kom ua rau koj ntseeg yuam kev tias tej teeb meem raug daws lawm, tiam sis qhov tseeb tiag lawv tsis tau sib qhia txog qhov tseeb tej hauv paus ntsiab lus uas ntsig txog koj tej teeb meem li. Qhov qhia li no yuav ua li cas thiaj li daws tau tej teeb meem? Cov kev qhuab qhia uas lawv qhuab qhia ntawd mas tsis muaj feem xyuam rau tej teeb meem tiag tiag; lawv tsuas zam lub ntsiab tseeb ntawm txhua qhov teeb meem thiab hais txog tej tswv yim uas tsis muaj ntsiab xwb. Lawv tsuas qhuab qhia cov lus thiab cov kev qhuab qhia thiab tej tswv yim ntawm sab ntsujplig xwb. Lawv yeej tsis paub tias qhov tseeb qhov muaj tiag yog dab tsi, thiab thaum muaj teeb meem tshwm tuaj, lawv cia li paub tsis meej lawm. Cov lus qhuab qhia uas lawv qhuab qhia ntawd daws tsis tau tej teeb meem tiag tiag, tej ntawd tsuas yog ib hom tswv yim, ib hom kev paub thiab kev qhuab qhia xwb. Hom thawj coj cuav zoo li no qhuab qhia Vajtswv cov lus thiab qhov tseeb yam li tej ntawd yog ib hom lus thiab kev qhuab qhia thiab cov lus qw xwb. Lawv zam txhua qhov teeb meem tiag tiag thiab tsuas qhuab qhia cov lus uas tsis muaj ntsiab thiab tsis muaj tiag xwb. Ua li thaum kawg yuav tshwm sim dab tsi? Txawm lawv yuav qhuab qhia ntev npaum li cas los xij, qhov ntau tshaj plaws mas lawv cov lus qhuab qhia ntawd tsuas muaj txiaj ntsig los txhawb zog thiab ntuas tib neeg, ua rau tib neeg kub siab me ntsis thiab muab lub zog ib lub sij hawm rau lawv xwb, tiam sis lawv daws tsis tau lwm qhov teeb meem li. Qhov tseeb tsis yog cais tawm ntawm qhov muaj tiag, tiam sis qhov tseeb txuas nrog qhov muaj tiag thiab txuas nrog txhua hom teeb meem uas yeej muaj nyob tiag tiag. Yog li ntawd, tam sim no nej puas yuav paub cais cov thawj coj cuav uas ua txuj ua neeg ntawm sab ntsujplig thaum nej ntsib lawv lwm zaus? Yog tsis paub, ces thaum nej xav pov ntawv xaiv ib tug neeg los ua ib tug thawj coj, ces xub kom lawv daws ob peb qho teeb meem ua ntej. Yog lawv daws tau cov teeb meem ntawd raws li tej hauv paus ntsiab lus, thiab yog lawv ua tau txiaj ntsig zoo heev thiab daws tej teeb meem ntawd los ntawm qhov siv qhov tseeb qhov muaj tiag, ces nej tuaj yeem pov ntawv xaiv lawv; yog lawv zam thiab tsis hais txog lub ntsiab tseeb ntawm tej teeb meem thiab qhov xwm txheej tiag tiag, thiab txhua yam uas lawv ua tau tsuas yog qhuab qhia kev qhuab qhia yam tsis muaj ntsiab, qw cov lus qw, thiab ua raws nraim li tej kev cai tswj xwb, ces nej tsis tuaj yeem pov ntawv xaiv tus neeg ntawd. Vim li cas nej thiaj li tsis tuaj yeem pov ntawv xaiv tus neeg ntawd? (Vim lawv tsis muaj peev xwm daws tau tej teeb meem tiag tiag.) Ua li hom neeg zoo li cas thiaj li tsis muaj peev xwm daws tau tej teeb meem tiag tiag? Lawv yog tus neeg uas tsuas txawj qhuab qhia cov lus thiab cov kev qhuab qhia xwb—lawv yog cov Falixais uas ntsej muag ncaj siab nkhaus, uas ua txuj ua neeg ntawm sab ntsujplig. Lawv tsis muaj lub peev xwm uas cheem tsum rau kev to taub qhov tseeb, lawv tsis muaj peev xwm daws tej teeb meem, lawv daws tsis tau tej teeb meem, yog li ntawd yog koj xaiv lawv los ua ib tug thawj coj ces lawv yeej yuav dhau los ua ib tug thawj coj cuav xwb. Lawv tsis muaj peev xwm ua ib tug thawj coj tes hauj lwm los sis ua tsis tau ib tug thawj coj tej luag hauj lwm kom tiav hlo. Yog li ntawd, yog koj pov ntawv xaiv lawv ntawd tsis yog koj tab tom ua rau lawv puas tsuaj lod? Ib txhia tib neeg hais tias, “Ua li cas thiaj li yog ua rau lawv puas tsuaj? Peb muaj lub siab zoo thiaj li pov ntawv xaiv lawv. Lawv muaj peev xwm me ntsis, thiab yog peb xaiv lawv, tsis yog peb yuav muaj ib tug neeg uas tuaj yeem ris tes hauj lwm lawm lod?” Muaj tseeb tias qhov uas muaj neeg ris lub luag hauj lwm mas yog ib qho zoo, tiam sis hom neeg zoo li no tsis muaj peev xwm ris tau. Txhua yam uas lawv ua tau tsuas yog hais tej tswv yim yam tsis muaj ntsiab xwb, lawv tsis xav txog qhov xwm txheej tiag tiag, thiab lawv pab tsis tau dab tsi hlo li thaum hais txog qhov daws tej teeb meem, yog li ntawd qhov pov ntawv xaiv lawv ntawd, tsis yog koj tab tom muab cib fim rau lawv ua phem lod? Tsis yog koj tab tom yuam kom lawv taug ib tug thawj coj cuav txoj kev lod? Yog li ntawd, koj yuav tsum tsis txhob xaiv hom neeg zoo li no los ua cov thawj coj.

Nej puas paub cais cov tib neeg uas nyob ib puag ncig nej—cov uas nej pheej nrog lawv sib tham thiab sib paub zoo—cov uas tsuas txawj hais tej kev qhuab qhia yam tsis muaj ntsiab thiab daws tsis tau tej teeb meem tiag tiag? Leej twg pheej qhuab qhia tej tswv yim uas siab thiab tawm tej kev npaj uas tshiab txawv thiab tshwj xeeb uas tsis muaj leej twg tau hnov dua li, tiam sis thaum nug tias yuav xyaum ua raws thiab ua kom tiav raws li tej kev npaj thiab tej ntsiab lus uas muaj tiag ntawd coj los ua kiag ces lawv cia li tsis paub meej thiab tsis muaj lus hais lawm lod? Yam uas lawv hais ntawd tsis muaj ntsiab kiag li thiab tsis muaj tseeb kiag li, tsis muaj feem xyuam los sis tsis mus raws li qhov xwm txheej tiag tiag, qhov chaw ib puag ncig tiag tiag, yam uas tib neeg muaj peev xwm ua tau tiag tiag, tib neeg lub siab ntseeg, thiab qib ntawm lawv tej kev txawj qib siab. Haj yam tshaj ntawd, yam uas lawv hais ntawd tsis mus raws li Vajtswv lub tsev tej kev cheem tsum; lawv tsuas lam hais lus ruam tsis muaj qab hau xwb, lawv ua npau suav nruab hnub, thiab lawv tsuas lam tau lam hais txhua yam uas tshwm hauv lawv lub hlwb los xwb. Lawv xav tias lawv tsis tas yuav ris lub luag hauj lwm rau txhua yam uas lawv hais, tab txawm yog thaum lawv khav thiab hais lus loj los xij. Lawv nthuav tej kev xam pom thiab tawm tej tswv yim nrog tus cwj pwm zoo li no—lawv tsis yog cov ua txuj ua neeg ntawm sab ntsujplig lod? (Yog.) Ib txhia tib neeg ntseeg hais tias yeej tsis muaj leej twg ua tiag rau qhov khav, hais lus loj, los sis tej tswv yim uas mloog zoo li siab heev ntawd li, thiab lawv tau qhia tias lawv muaj peev xwm npaum li cas. Lawv xav tias yog lawv ua yuam kev lawm, los lawv tsis tas yuav ris lub txim rau qhov ntawd, thiab yog lawv hais yog lawm ces txhua tus yuav saib lawv siab, yog li ntawd lawv thiaj li hais txhua yam uas lawv xav hais thiab ua rau txhua yam zoo li yooj yim heev. Lawv muaj tswv yim ntau heev, tiam sis tsis muaj ib qho uas muaj txoj kev npaj xyaum ua raws tiag tiag thiab tuaj yeem coj los ua tau kom muaj txiaj ntsig tiag. Lawv tsis ua tiag tiag rau ib qho kev xam pom twg uas lawv hais tawm los, txawm qhov ntawd yuav yog los sis tsis tseeb los xij. Hnub no lawv hais ib yam thiab tag kis lawv hais lwm yam, thiab txawm hais tias tej kev xam pom, tej tswv yim, thiab tej hauv paus uas lawv tham txog ntawd puav leej siab heev los, tej ntawd puav leej tsis muaj ntsiab thiab tsis muaj tiag. Qee zaus lawv tham txog ib qho kev npaj uas tsis yog yam uas tsis muaj ntsiab los sis tsis tseeb, tiam sis thaum raug nug tias yuav muab txoj kev npaj ntawd coj los ua tiag tiag li cas, lawv hais tsis tau. Thaum qw cov lus qw, hais cov lus uas mloog zoo li siab, thiab nthuav tej kev xam pom tawm, lawv kub siab thiab nquag heev. Tiam sis thaum hais txog qhov ua tes hauj lwm tiag tiag thiab muab tej kev npaj tiag tiag coj los ua ntawd, lawv ploj mus yam tsis muaj hneev taw, lawv mus nkaum lawm, thiab lawv tsis muaj kev xam pom dab tsi ntxiv lawm. Cov neeg zoo li no puas ua tau cov thawj coj? (Ua tsis tau.) Yog li, qhov tshwm sim los ntawm cov neeg zoo li no uas los ua cov thawj coj yuav yog dab tsi? Lawv tsis yog yuav ua phem rau lawv tus kheej thiab lwm tus lod? Lawv yuav ua rau pawg ntseeg tes hauj lwm qeeb thiab, tshaj ntawd, lawv yuav ua rau lawv tus kheej raug kev puas tsuaj loj. Tej kev qhuab qhia uas lawv qhuab qhia ntawd mas tsuas yog qee yam uas muaj qhov txwv xwb, thiab thaum lawv qhuab qhia tej ntawd tag lawm, lawv tsis muaj dab tsi hais ntxiv lawm, yog li ntawd lawv pheej yuav tsum tau nkaum thiab “muab lawv tus kheej kaw es los tsom ntsoov rau txoj kev cob qhia lawv tus kheej.” Qhov no tsis yog yuav ua nyuaj rau lawv lod? Kiag thaum lawv los ua ib tug thawj coj, lawv yuav hnov tias zoo li muaj peb lub roob loj loj nias rau saum lawv lub taub hau, txhua hnub lawv yuav sab heev thiab lawv yuav muaj kev nias qees heev—Ua cas yuav mus raug kev txom nyem li no ua dab tsi? Lawv tsis muaj lub peev xwm ua ib tug thawj coj, thiab thaum lawv ntsib teeb meem, lawv tsuas lam tau lam siv tej kev cai tswj raws li lawv tej kev xav hauv nruab siab thiab daws tsis tau tej teeb meem tiag tiag—cov neeg zoo li no ua tsis tau cov thawj coj. Lawv tsis muaj peev xwm ua tes hauj lwm tiag tiag, yog li ntawd lawv yuav yog cov thawj coj cuav, thiab lawv tseem yuav xav tias lawv zoo heev tab txawm yog lawv ua rau cov kwv tij thiab cov muam txoj kev nkag mus rau hauv lub neej txoj sia qeeb los xij. Yog nej pom thiab paub meej txog lub peev xwm thiab tus yam ntxwv ntawm cov ua txuj ua neeg ntawm sab ntsujplig no, nej puas tseem yuav pov ntawv xaiv lawv los ua cov thawj coj? Yog koj tus kheej yog hom neeg zoo li no thiab muaj neeg xav pov ntawv xaiv koj, koj yuav ua li cas? (Kuv yuav muaj kev paub txog kuv tus kheej me ntsis, thiab qhia tias kuv tsis haum ua ib tug thawj coj.) Thiab yog tias, tom qab koj tau qhia li no lawm, sawv daws tseem xav tias koj zoo thiab yuav tsum pov ntawv xaiv koj xwb no, koj yuav ua li cas? Hais rau lawv tias, “Kuv ua tsis tau tes hauj lwm thawj coj, kuv ris tsis taus tes hauj lwm ntawd. Saib sab nraud mas kuv zoo li muaj peev xwm me ntsis, thiab qee zaus kuv muaj qee lub tswv yim zoo thiab muab tau kev kaj me ntsis, tiam sis feem ntau kuv tsuas qhuab qhia cov lus thiab cov kev qhuab qhia xwb. Kuv yeej ua tsis tau ib tug thawj coj los sis ib tug neeg ua hauj lwm tiag tiag. Kuv tsis zoo dua nej li. Txawm yuav ua li cas los xij, thov txhob pov ntawv xaiv kuv. Tab txawm kuv tau cov ntawv xaiv ntau tshaj los, kuv yeej tseem ua tsis tau ib tug thawj coj. Kuv yuav tsum tsis ua phem rau leej twg li! Yav tas los kuv tau ua ib tug thawj coj lawm, thiab txhua zaus kuv ua tsis tiav thiab raug muab rho tawm. Txhua zaus uas kuv raug rho tawm mas, yog vim kuv lub peev xwm tsis zoo, kuv tsis muaj peev xwm ua hauj lwm thiab ua tsis tau tes hauj lwm tiag tiag. Txhua yam uas kuv ua tau tsuas yog qhuab qhia cov lus thiab cov kev qhuab qhia xwb, thiab dhau qhov ntawd, kuv ua tsis tau zoo los sis ua tsis tau tiav tab txawm yog ib qho ntawm tej luag hauj lwm uas cov thawj coj yuav tsum tau ua kom tiav. Kuv yog ib tug thawj coj cuav.” Qhov no yog qhov muaj kev paub txog tus kheej, tsis yog tsuas hais ob peb lo lus txog qhov tsis haum ua ib tug thawj coj ces tso tseg li ntawd xwb. Ib txhia tib neeg xav tias, “Kuv tau ua kuv tes dej num nyob rau hauv pab pawg no los tau ntau xyoo lawm thiab txawm li cas los xij kuv tsim nyog raug suav tias yog ib tug tswv cuab uas ua hauj lwm ntev lawm. Txawm kuv tsis tau ua ib txoj hauj lwm uas muaj txiaj ntsig los, kuv twb siv zog ua hauj lwm lawm, yog li ntawd ua cas thiaj li tsis muaj leej twg pom kuv tej kev ua tau zoo li? Kuv kuj yog cov neeg uas ua tau thawj coj thiab. Kuv pheej tawm muaj tej kev xav, tej tswv yim, thiab tej lus qhia uas muaj nqis dua me ntsis thiab siv tau tiag tiag. Txawm cov thawj coj yuav siv tej ntawd los tsis siv los xij, txawm li cas los, kuv yog ib tug neeg uas muaj tus cwj pwm, muaj kev xav, thiab muaj kev xam pom. Vim li cas thiaj li tsis muaj leej twg pov ntawv xaiv kuv?” Yog koj xav li no, ces koj sim ntsuas koj tus kheej li no tias: Puas yog tej kev xav, tej tswv yim, thiab tej lus qhia uas koj muaj ntawd tsuas yog lam hais xwb, los sis tej ntawd puas yog ib qho siv tau tiag tiag? Koj puas muaj peev xwm pom thiab daws tau txhua yam kev nyuaj uas ntsib hauv tes hauj lwm? Koj tej kev xav thiab tej tswv yim ntawd puas siv tau? Koj puas ris taus tes hauj lwm ntawd? Yog koj tej kev xav thiab tej kev xam pom tsuas yog nres rau cov lus thiab cov kev qhuab qhia xwb, yog tias tej ntawd yeej siv tsis tau tiag tiag thiab, qhov tseem ceeb tshaj, tej ntawd yeej tsis mus raws li tej hauv paus ntsiab lus ntawm Vajtswv lub tsev tes hauj lwm li, ces koj lub peev xwm yog zoo li cas tiag tiag? Thaum koj raug xaiv los ua ib tug thawj coj lawm, koj puas yuav ua tau cov thawj coj thiab cov neeg ua hauj lwm tej luag hauj lwm kom tiav? Koj xav ua thawj coj vim yog muaj kev ntshaw, los sis vim yog muaj lub nra? Yog koj yeej muaj peev xwm ua hauj lwm thiab muaj peev xwm daws tau teeb meem tiag tiag, thiab thaum koj pom qee cov thawj coj thiab cov neeg ua hauj lwm ua lawv tes hauj lwm tsis zoo kiag li thiab daws tsis tau ib qho teeb meem li, qhov no ua rau koj ntxhov siab, thiab koj muab tswv yim rau lawv tiam sis lawv tsis mloog, thiab lawv daws tsis tau tej teeb meem tiam sis lawv tsis qhia tawm rau tus Nyob Saud, thiab koj txhawj xeeb thiab ntxhov siab rau Vajtswv lub tsev tes hauj lwm, thiab koj nyuaj siab yam tiv tsis taus thaum koj pom cov thawj coj cuav ua rau pawg ntseeg tes hauj lwm qeeb, qhov no qhia tau hais tias koj muaj lub nra. Txawm li cas los xij, yog koj tsuas xav tau sawv daws qhov kev pom zoo, xav nrhiav neeg mloog kom coob dua, thiab xav kom muaj neeg ntau ntxiv los mloog koj qhuab qhia thiab hais lus khav theeb, tsuas yog vim koj muaj qee lub tswv yim xwb, thiab yog koj xav ua tus zoo tshaj sawv daws, ces qhov no tsis yog lub nra—qhov no yog kev ntshaw. Cov neeg uas muaj kev ntshaw tsuas txawj qhuab qhia cov lus thiab cov kev qhuab qhia xwb, thiab txhua lub tswv yim uas lawv muaj los tsuas yog cov lus thiab cov kev qhuab qhia uas tsis muaj ntsiab xwb. Thaum cov neeg zoo li no los ua cov thawj coj, lawv yeej yuav yog cov thawj coj cuav xwb, thiab yog lawv yog cov tib neeg phem, ces lawv yog cov tawm tsam khetos. Yog koj tej tswv yim tsuas nyob rau theem ntawm cov lus uas tsis muaj ntsiab xwb, ces thaum koj los ua ib tug thawj coj lawm, koj yeej yuav zoo ib yam nkaus li txhua tus thawj coj cuav uas yog cov ua txuj ua neeg ntawm sab ntsujplig xwb. Koj pheej yuav tsum tau mus “muab koj tus kheej kaw es los tsom ntsoov rau txoj kev cob qhia koj tus kheej,” yog tsis li ntawd, koj yuav hnov txhawj xeeb tsam tsis muaj dab tsi mus qhuab qhia. Yog koj zoo ib yam nkaus li lawv, thiab thaum koj ua tus nyob siab siab qhuab qhia ntawd, koj nrhiav tsis pom ib qho teeb meem twg uas muaj nyob hauv tes hauj lwm li, thiab yeej daws tsis tau ib qho teeb meem li thiab, ces koj yeej yuav yog ib tug thawj coj cuav xwb. Thiab thaum kawg qhov tshwm sim los rau cov thawj coj cuav yog dab tsi? Lawv raug muab rho tawm hauv lawv lub luag hauj lwm vim lawv ua tsis tau tes hauj lwm tiag tiag—lawv yeej yuav taug txoj kev no xwb.

Muaj ntau tus neeg uas yeej ib txwm xav tias tsis txaus siab thiab lawv lub siab pheej nyob tsis tswm, thiab thaum twg txog sij hawm xaiv ib tug thawj coj los sis ib tug neeg saib xyuas, lawv pheej xav ua tus uas raug xaiv. Ib txhia tib neeg xav tias lawv ntseeg Vajtswv tau ntau xyoo tshaj, lawv tiv kev txom nyem ntau tshaj, lawv tau ua lawv tes dej num los tau lub sij hawm ntev heev thiab muaj kev ua siab ncaj tshaj plaws lawm, thiab yog cov uas tsim nyog ua ib tug thawj coj tshaj plaws, yog li ntawd lawv thiaj li xav kom lwm tus xaiv lawv. Yog lwm tus xaiv koj, koj yuav ua tau dab tsi? Koj puas yuav zam tau lub npe uas hu ua thawj coj cuav? Koj puas yuav ua tau cov thawj coj thiab cov neeg ua hauj lwm tej luag hauj lwm kom tiav? Tej no puav leej yog tej teeb meem tiag tiag, tiam sis tsis muaj leej twg xav txog tej yam zoo li no li. Nyob hauv cov neeg no, qee tus muaj peev xwm txaus. Lawv muaj peev xwm nrhiav qhov tseeb thaum muaj teeb meem hauv lawv tes dej num, thiab thaum lawv to taub qhov tseeb thiab muaj peev xwm daws tej yam raws li tej hauv paus ntsiab lus, lawv yuav ua tau raws li tus qauv lawm. Tsuav yog cov neeg no to taub qhov tseeb, nyiam qhov tseeb, thiab muaj peev xwm caum qhov tseeb, thiab ntxiv ntawd kuj muaj kev ua neeg zoo dua me ntsis, ces qhov ua cov thawj coj thiab cov neeg ua hauj lwm uas tau raws li tus qauv ntawd mas yuav tsis muaj teeb meem dab tsi—qhov ntawd yuav tsis nyuaj heev rau lawv. Ib txhia tib neeg pheej yws tias tes hauj lwm uas lawv ua ntawd nyuaj, lawv tsis txaus siab siv zog los sis them tus nqi thaum hais txog qhov tseeb, thiab lawv yws thaum lawv raug ntuas. Cov neeg zoo li no puas yuav ua tau cov thawj coj thiab cov neeg ua hauj lwm uas mus raws li tus qauv? Lawv txoj kev npaj siab thiab tus cwj pwm yeej tsis yog, lawv tsis yog cov neeg uas caum qhov tseeb, thiab txawm Vajtswv yuav cheem tsum dab tsi ntawm lawv los xij, lawv tseem tuav tus cwj pwm xav phem. Cov tib neeg zoo li no tsis tsim nyog ua cov thawj coj thiab cov neeg ua hauj lwm. Lawv tsis muaj lub nra nyob hauv lawv lub siab, thiab txawm tias Vajtswv lub tsev tej kev npaj tes hauj lwm yuav qhia meej npaum li cas los xij, lawv tseem tsis txaus siab siv zog ua tes hauj lwm kom zoo. Qhov tseeb tiag, qhov ua tes hauj lwm kom zoo mas tsis nyuaj. Vim li cas thiaj li tsis nyuaj? Qhov ib, Vajtswv lub tsev muaj tej kev npaj tes hauj lwm ntxaws ntxaws rau tag nrho pawg ntseeg tes hauj lwm thiab tus Nyob Saud tau ua tej kev cai tswj ntxaws ntxaws rau qhov ntawd, yog li ntawd tsis tau cheem tsum kom nej tsim tej yam tshiab rau ib qho hauj lwm twg, los sis kom nej ua kom tiav ntawm nej tus kheej. Tus Nyob Saud tau muab ib tug ciaj ciam thiab ib txoj xub ke rau nej, thiab tau muab tej hauv paus ntsiab lus rau nej, thiab tau muab cov qauv qis tshaj plaws rau nej; thaum ua nej tes hauj lwm, nej tsis yog ntaus cua xwb, los sis tsis muaj txoj xub ke. Qhov ob, ib teg tes hauj lwm twg, txawm tus neeg saib xyuas yog leej twg los xij, thiab txawm tias qhov tseem ceeb ntawm tes hauj lwm ntawd yog nyob txawv teb chaws los sis hauv teb chaws, qhov tseem ceeb tshaj plaws yog tus kwv tij uas Nyob Saud tab tom taug qab, coj qhia, saib xyuas, tshawb xyuas, thiab tshuaj xyuas tes hauj lwm ntawd yam ntxaws ntxaws, thiab pheej nug txog tas li. Tej kev ua no ntxaws npaum li cas? Tus kwv tij uas Nyob Saud nws tus kheej koom nrog thiab taug qab txhua tsab ntawv yeeb yaj kiab, txhua zaj yeeb yaj kiab, txhua qhov kev ua yeeb yam, txhua zaj nkauj qhuas Vajtswv, thiab lwm yam. Kuv kuj koom rau hauv qee tes hauj lwm thiab, muab ib txoj xub ke thiab ib lub hauv paus loj rau nej. Qhov peb, txawm tes hauj lwm kis twg uas ntsig txog qhov tseeb tej hauv paus ntsiab lus, tus Nyob Saud kuj sib qhia qhov tseeb tej hauv paus ntsiab lus rau nej thiab coj qhia rau nej tes hauj lwm tas li; tus Nyob Saud kuj ntuas nej, tshuaj xyuas tes hauj lwm rau nej, thiab tus Nyob Saud kho nej tej kev tsis tseeb txhua lub sij hawm. Qhov plaub, hais txog tej hauj lwm loj ntawm sab neeg ua hauj lwm thiab tes hauj lwm tswj fwm, tus Nyob Saud nws tus kheej pab txheeb xyuas thiab txiav txim siab rau nej. Qhov tseeb tiag, txawm nej yuav ua tes hauj lwm sab twg los xij, tsis yog nej ua tau tiav ntawm nej tus kheej; txhua yam puav leej yog tus Nyob Saud npaj, coj, qhia, thiab tshuaj xyuas. Yog li ntawd, nej ua dab tsi? Nej tsuas paub xyiv fab rau yam uas luag twb npaj txhij lawm xwb—nej mas tau koob hmoov kawg nkaus li! Nej tsis tas yuav txhawj txog ib yam dab tsi li; nej tsuas yog siv tes siv taw ua hauj lwm xwb. Qhov no yog tes hauj lwm uas raug rau nej. Nej puas tau them tus nqi ntxiv? (Tsis tau.) Tus Nyob Saud twb ua tag nrho tej hauj lwm loj thiab tseem ceeb no lawm; yog li ntawd, tes hauj lwm uas nej ua ntawd mas puav leej yooj yim heev thiab yeej tsis muaj tej kev nyuaj loj li. Nyob hauv tej xwm txheej zoo li no, yog tib neeg tseem tsis ua lawv tes hauj lwm kom zoo thiab, ces qhov ntawd zam tsis tau, thiab qhov ntawd ua pov thawj qhia hais tias lawv yeej tsis muab lawv lub siab thiab lub zog tso rau hauv lawv tes hauj lwm los sis ua lawv tej luag hauj lwm kom tiav hlo li. Ib txhia tib neeg hais tias, “Leej twg ua hauj lwm es thiaj li tsis muaj qhov tsis zoo? Puas yog tsis pub tib neeg muaj teeb meem me ntsis li?” Tsis tau cheem tsum kom nej ua tau zoo tshaj plaws nyob hauv nej tes hauj lwm; tsuas cheem tsum kom nej ua tau dhau theem xwb, ces nej yuav raug suav tias twb ua cov thawj coj thiab cov neeg ua hauj lwm tej luag hauj lwm kom tiav lawm. Qhov no puas nruj dhau? (Tsis nruj.) Nws yooj yim heev los ua kom dhau theem raws li tus Nyob Saud txoj kev qhia thiab kev txheeb xyuas; nws tsuas yog nyob ntawm qhov seb tib neeg puas caum qhov tseeb yam uas siab dawb paug xwb. Yog lawv tsis siv zog qhov tseeb, thiab pheej xav ua dog ua dig, thiab yog lawv txaus siab rau qhov tsuas lam ua kom dhau thaum ua hauj lwm xwb, es tsis ua ib yam dab tsi phem, tsis ua rau muaj kev cuam tshuam los sis kev tab kaum, thiab tsis muaj ib yam dab tsi xeeb txob lawv lub siab txawj xav li, ces lawv tsis muaj peev xwm ua tau dhau theem. Cov thawj coj thiab cov neeg ua hauj lwm feem coob muaj tus cwj pwm zoo li no thaum ua hauj lwm; lawv ua hauj lwm me ntsis tiam sis tsis xav ua kom lawv tus kheej sab, lawv txaus siab rau qhov ua tau dog dig xwb, thiab hais txog qhov txiaj ntsig ntawm lawv tes hauj lwm ntawd mas, lawv xav tias qhov ntawd yog Vajtswv li hauj lwm xwb thiab tsis muaj feem xyuam nrog lawv. Tus cwj pwm no puas txais yuav tau? Yog koj muaj tus cwj pwm zoo li no, ces tes hauj lwm uas koj ua tau ntawd muaj tsawg heev thiab koj tsis tau siv koj lub zog tag nrho rau hauv, qhov no qhia hais tias koj tsis muaj peev xwm ua tes hauj lwm tiag tiag los sis koj tsis ua tes hauj lwm tiag tiag, yog li ntawd yuav tsum muab koj cais ua ib tug thawj coj cuav—qhov no tsim nyog kawg nkaus thiab tsis yog tsis ncaj ncees. Ib txhia tib neeg pheej hais tias, “Koj tej kev cheem tsum rau peb mas siab dhau lawm. Yog peb tsis ua tes hauj lwm no ces peb yog cov thawj coj cuav, thiab yog peb ua tsis tau raws li qhov kev cheem tsum ntawd ces peb kuj yog cov thawj coj cuav thiab. Koj saib peb yog dab tsi? Peb tsis yog neeg hlau, peb tsis yog cov neeg uas zoo tiav log. Peb tsuas yog neeg dog dig, peb tsuas yog neeg uas muaj cev nqaij daim tawv xwb. Koj qhia kom peb ua neeg dog dig, ua neeg li ib txwm muaj, yog li ntawd vim li cas Koj thiaj li muaj tej kev cheem tsum siab ua luaj rau peb cov uas yog thawj coj?” Qhov tseeb tiag, Kuv tej kev cheem tsum rau nej tsis siab. Kuv tsuas yog cheem tsum kom koj ua tej luag hauj lwm uas ib tug tib neeg tsim nyog ua kom tiav xwb. Qhov no yog ib yam uas koj tsim nyog ua thiab yuav tsum tau ua, thiab qhov no yog ib yam uas koj muaj peev xwm ua tau tam li cov thawj coj thiab cov neeg ua hauj lwm. Txawm li cas los xij, yog koj tsis siv zog mus rau qhov tseeb, thiab pheej ntshai tsam raug kev txom nyem thiab pheej ntshaw kev tau zoo, ces txawm koj yuav muaj laj thawj los sis lus zam dab tsi los xij, koj yeej yuav yog ib tug thawj coj cuav xwb. Qhov ntawd zoo ib yam li tej yam uas cov tib neeg uas muaj kev ua neeg li ib txwm muaj yuav tsum ua tau thiab cov neeg loj lawm yuav tsum saib xyuas ntawm lawv tus kheej, xws li ib tug neeg loj yuav tsum sawv thaum tsawg teev sawv ntxov, lawv yuav tsum noj pes tsawg pluas mov thiab lawv yuav tsum ua hauj lwm pes tsawg teev hauv ib hnub, thiab thaum twg lawv tsim nyog ntxhua lawv cov khaub ncaws uas qias neeg—koj yuav tsum ua tej no ntawm koj tus kheej, thiab koj tsis tas yuav nug lwm tus txog tej no. Yog koj nug lwm tus txog txhua yam thiab tsis to taub ib yam dab tsi, qhov no tsis yog txhais hais tias koj tsis muaj kev txawj ntse txaus, thiab tias koj yog ib tug neeg ruam lod? Qhov ntawd tsis yog txhais hais tias koj tsis muaj peev xwm saib xyuas koj tus kheej lod? Cov neeg zoo li no puas ua tau cov thawj coj? Lawv tsis yog cov thawj coj cuav lod? Cov neeg zoo li no yuav tsum raug muab rho tawm. Cov neeg zoo li no tseem xav tuav lawv lub meej mom thiab tsis nqis los, thiab lawv tseem xav ua cov thawj coj! Tom qab ib txhia thawj coj cuav raug muab rho tawm, lawv xav tias lawv raug ua tsis ncaj ncees rau thiab quaj tsis tseg txog qhov ntawd. Lawv quaj txog thaum ob lub qhov muag o tas. Vim li cas lawv thiaj li quaj? Lawv tsis paub tias lawv yog yam dab tsi. Thaum Kuv hais tias Kuv tej kev cheem tsum rau tib neeg mas tsis siab, Kuv txhais hais tias qhov uas hais kom koj ua ntawd mas yog yam uas koj ua tau; twb muab txoj kev pua rau koj lawm thiab twb teem tus ciaj ciam lawm, thiab twb txiav txim siab lawm, thiab koj tsuas yog yuav tsum tau nqis tes ua xwb. Qhov ntawd zoo ib yam li kev noj zaub mov: Twb npaj txhuv, zaub, txhua yam khoom xyaw, lauj kaub, thiab qhov cub rau koj lawm, thiab txhua yam uas koj yuav tsum tau ua yog kawm ua zaub mov xwb; qhov no yog yam uas ib tug neeg loj yuav tsum tau ua thiab ua kom tau. Yog koj ua tsis tau qhov no, ces koj yog ib tug neeg ruam, thiab muab koj suav tsis tau nyob rau hauv theem kev txawj ntse ntawm cov neeg loj li ib txwm muaj. Ib txhia thawj coj tsis muaj peev xwm ua tes hauj lwm tiag tiag no, yog li ntawd lawv yuav tsum raug muab rho tawm. Yog li ntawd, peb yuav tshab txhais thiab txiav txim li cas txog qhov seb ib tug neeg puas muaj peev xwm ua hom hauj lwm no? Yog koj muaj kev txawj ntse thiab lub peev xwm ntawm ib tug neeg loj, thiab koj muaj kev ua lub siab txawj xav thiab paub lub luag hauj lwm uas ib tug neeg loj lawm yuav tsum muaj, ces koj yuav tsum muaj peev xwm ua hom hauj lwm no. Yog koj ua tsis tau, los sis koj tsis ua, ces koj yog ib tug thawj coj cuav. Qhov ntawd yog txoj kev txiav txim, thiab qhov txiav txim li no yog lawm. Qhov no tsis yog kev teem txim los sis kev txiav txim rau ib tug neeg, yog li ntawd qhov ntawd puas nruj dhau? Tej uas muaj tseeb puav leej raug muab tso tawm, thiab qhov no yeej tsis nruj kiag li.

II. Cov Thawj Coj Cuav Uas Lub Peev Xwm Tsis Zoo

Peb nyuam qhuav sib qhia txog ib hom thawj coj cuav tej kev qhia tshwm uas pom tau meej txog qhov qhia tawm thiab nrhiav kev los daws tej kev paub tsis meej thiab tej kev nyuaj uas ntsib hauv tes hauj lwm ntawd kom ncav sij hawm, nrog rau tej laj thawj uas ua rau cov neeg zoo li no ua tsis tau cov thawj coj thiab cov neeg ua hauj lwm tej luag hauj lwm kom tiav. Cov neeg zoo li no yog cov ua txuj ua neeg ntawm sab ntsujplig; vim lawv nrhiav tsis pom tej kev paub tsis meej thiab tej kev nyuaj hauv tes hauj lwm, lawv thiaj li ua tsis tau lub luag hauj lwm no kom tiav. Qhov no yog ib hom neeg. Tseem muaj lwm hom neeg thiab: Lawv zoo ib yam nkaus li cov ua txuj ua neeg ntawm sab ntsujplig ntawd—lawv kuj nrhiav tsis pom tej teeb meem uas muaj nyob hauv tes hauj lwm thiab, thiab qhov ntawd yog qhov laj thawj uas lawv tsis tuaj yeem qhia tej ntawd tawm rau tus Nyob Saud thiab tsis tuaj yeem nrhiav kev daws los ntawm tus Nyob Saud kom ncav sij hawm thiab. Cov neeg zoo li no kuj khwv ua hauj lwm heev thiab, lawv tus kheej ua hauj lwm khwv txhua hnub yam tsis tau nyob li. Lawv khwv rau kev qhuab qhia, khwv rau kev mus saib cov kwv tij thiab cov muam nyob rau ntau qhov chaw, khwv rau qhov npaj tes hauj lwm, thiab haj tseem khwv rau qhov mus yuav txhua yam khoom rau pawg ntseeg tes hauj lwm thiab. Yog ib tug twg muaj mob, lawv pab nrhiav kws kho mob; yog muaj neeg muaj kev nyuaj nyob tom tsev, lawv pab npaj nyiaj txiag rau; yog muaj neeg nyob rau hauv ib tug yam ntxwv tsis zoo, lawv nquag plias mus txhawb cov neeg ntawd thiab nquag pab daws cov neeg ntawd tej teeb meem. Muab hais luv luv, lawv pheej khwv rau qee yam hauj lwm dav dav xwb. Lawv tsis quav ntsej txog pawg ntseeg tes hauj lwm tiag tiag, tes hauj lwm tshaj tawm txoj moo zoo, thiab tej teeb meem hauv lub neej hauv pawg ntseeg. Txhua hnub, lawv ua rau lawv tus kheej sab vim mus mus los los, thiab lawv ua rau lawv tus kheej khwv vim saib xyuas thiab daws pawg ntseeg tej teeb meem thiab cov kwv tij thiab cov muam tej teeb meem ntiag tug. Lawv xav tias, ua cov thawj coj, lawv yuav tsum ua tej hauj lwm no, tiam sis lawv yeej tsis paub tias ib tug thawj coj tes hauj lwm tseem ceeb yog dab tsi, thiab txawm lawv yuav siv zog ua hauj lwm npaum li cas los xij, lawv tseem nrhiav tsis pom tej teeb meem tiag tiag thiab tseem ceeb uas muaj nyob hauv pawg ntseeg. Yog li ntawd, thaum muaj kev cuam tshuam thiab kev thaiv nyob hauv lub neej hauv pawg ntseeg, thiab thaum cov neeg Vajtswv xaiv tseg ntsib kev nyuaj hauv txoj kev nkag mus rau hauv lub neej txoj sia, cov thawj coj no daws tsis tau tej no kom ncav sij hawm. Txawm hais tias lawv khwv ua hauj lwm thiab tsis nyob dawb txhua hnub los xij, lawv yuav ua tau dab tsi los ntawm qhov khwv npaum li no? Muaj ntau yam teeb meem nyob hauv pawg ntseeg tes hauj lwm, tiam sis lawv nrhiav tsis pom tej ntawd li. Saib sab nraud mas, zoo li lawv nquag, ua tib zoo ua, thiab tsis nyob dawb, tiam sis ib qho teeb meem dhau ib qho tshwm tuaj hauv tes hauj lwm, thiab lawv khwv kho tej qhov uas khoob, khwv daws txhua yam “teeb meem nyuaj thiab ntxhov” thiab saib xyuas txhua hom neeg phem thiab cov neeg uas ua rau muaj kev cuam tshuam thiab kev tab kaum uas muaj tshwm sim nyob hauv pawg ntseeg. Lawv khwv rau tes hauj lwm zoo li no, tiam sis lawv tsis muaj peev xwm paub cais tab txawm yog tej teeb meem uas yooj yim tshaj plaws. Lawv tsis muaj peev xwm paub cais meej tias txoj kev ua neeg zoo yog dab tsi thiab txoj kev ua neeg phem yog dab tsi, lub peev xwm zoo yog dab tsi thiab lub peev xwm tsis zoo yog dab tsi, kev muaj peev xwm thiab kev paub tiag tiag yog dab tsi thiab kev muaj khoom pub yog dab tsi. Lawv kuj pom tsis tshab tias Vajtswv lub tsev cob qhia hom neeg twg thiab tshem tawm hom neeg twg, cov neeg twg caum qhov tseeb thiab cov twg tsis caum, cov neeg twg txaus siab ua lawv tes dej num thiab cov twg tsis ua lawv tes dej num, cov neeg twg tuaj yeem raug ua kom zoo tiav log los ua Vajtswv cov neeg, thiab cov neeg twg yog cov neeg ua dej num txhawb, thiab ntau yam ntxiv. Lawv muab cov uas txawj hais lus loj thiab hais tej tswv yim uas tsis muaj ntsiab tiam sis ua tsis tau tes hauj lwm tiag tiag, saib ua cov hom phiaj tseem ceeb rau kev cob qhia, thiab lawv npaj thiab tso tes hauj lwm tseem ceeb rau cov neeg no ua, hos lawv ncua kev txhawb thiab kev cob qhia cov uas muaj kev to taub yog, muaj lub peev xwm, thiab to taub tau qhov tseeb, tsuas yog vim cov neeg ntawd ntseeg Vajtswv tsis tau ntev heev los sis tau nthuav ib tug moj yam khav theeb tawm xwb. Tej teeb meem zoo li no pheej tshwm sim nyob hauv pawg ntseeg thiab qhov no muaj kev cuam tshuam rau pawg ntseeg tes hauj lwm txoj kev nce qib. Tej no yog tej teeb meem tiag tiag, tiam sis hom thawj coj no tsis muaj peev xwm pom los sis nrhiav tsis pom thiab haj tseem tsis paub txog tej teeb meem ntawd kiag li. Thaum cov tib neeg phem ua rau muaj kev cuam tshuam thiab kev tab kaum, lawv muab cib fim rau cov neeg phem ntawd raug soj ntsuam thiab thim xav txog lawv tus kheej, hos thaum lwm tus uas tsis yog tib neeg phem, qee zaus ua qee qhov yuam kev me me vim lawv tseem hluas thiab tsis paub dab tsi thiab ua tej yam tsis muaj tej hauv paus ntsiab lus—tej qhov yuam kev uas tsis yog teeb meem ntawm lub hauv paus ntsiab lus—hom thawj coj no saib tej qhov yuam kev no yam li yog tej kev txhaum uas zam tsis tau thiab xa cov neeg no rov qab mus tsev. Hom thawj coj cuav no khwv ua hauj lwm txhua hnub thiab, saib sab nraud mas, zoo li lawv siv zog ntau thiab siv lawv lub sij hawm ntau, tiam sis txawm lawv yuav ua hauj lwm li cas los xij, tsis muaj leej twg tau txais kev yug rau lub neej txoj sia tiag tiag los ntawm qhov ntawd li. Txawm cov neeg Vajtswv xaiv tseg yuav muaj tej teeb meem thiab tej kev nyuaj dab tsi los xij, hom thawj coj cuav no daws tsis tau los ntawm kev sib qhia txog qhov tseeb, thiab txhua yam uas lawv ua tau tsuas yog ntuas lawv nrog lub siab hlub, thiab qhuab qhia cov lus thiab cov kev qhuab qhia los txhawb cov neeg Vajtswv xaiv tseg xwb. Vim li ntawd, nyob hauv kev coj ntawm cov neeg zoo li no, cov neeg Vajtswv xaiv tseg tsis tau txais kev yug rau lub neej txoj sia, lawv tsuas ntseeg Vajtswv thiab ua lawv tej dej num raws li kev kub siab xwb, thiab tsis muaj kev nkag mus rau hauv lub neej txoj sia—lawv yuav ua li no mus tau ntev npaum li cas? Vim li ntawd, qee tus neeg pheej xav tsis zoo thiab qaug zog thiab pheej niaj hnub ntshaw kom Vajtswv hnub los txog, thiab tej zeem muag yim tsis meej rau lawv zuj zus, thiab thaum lawv ntsib tej teeb meem, lawv muaj tej kev xav phem thiab tej kev xav yuam kev txog Vajtswv, thiab qee tus haj tseem ua xyem xyav rau Vajtswv thiab ceev faj Vajtswv thiab. Thaum cov thawj coj cuav ntsib cov teeb meem no, lawv yeej daws tsis tau kiag li, thiab txhua yam uas lawv ua tsuas yog zam tej ntawd xwb. Lawv yeej tsis nyeem Vajtswv cov lus los sis thov Vajtswv nrog cov neeg Vajtswv xaiv tseg los nrhiav qhov tseeb thiab daws teeb meem—lawv yeej tsis ua tes hauj lwm no li. Txhua hnub, lawv tsuas khwv rau qee tes hauj lwm dav dav thiab qee yam hauj lwm sab nraud, tej xwm txheej uas tsis muaj feem xyuam txog txoj kev nkag mus rau hauv lub neej txoj sia los sis qhov tseeb. Lawv xav tias tsuav lawv khwv ua hauj lwm xwb, ces qhov no yog txhais hais tias lawv tab tom ua lawv tes dej num thiab ua lawv tej luag hauj lwm kom tiav, thiab tias lawv yeej tsis yog cov thawj coj cuav kiag li. Qhov tseeb tiag, qhov uas lawv khwv ua tej hauj lwm dav dav no mas pab tsis tau cov kwv tij thiab cov muam kom loj hlob hauv lawv lub neej txoj sia kiag li, thiab haj yam pab tsis tau cov neeg Vajtswv xaiv tseg kom nkag mus rau hauv qhov tseeb qhov muaj tiag. Qhia Kuv seb, puas yog hom thawj coj cuav no lub peev xwm muaj ib qho teeb meem? Lawv pom tsis tshab ib yam dab tsi li, thiab lawv xav tias tsuav lawv khwv ua hauj lwm xwb, ces txhua yam teeb meem yuav cia li ploj mus, thiab tau daws yam tsis ncaj qha. Cov neeg no tsis yog ruam feeb tsis meej heev lod? Tsis yog lawv lub peev xwm tsis zoo kiag li lod? Lawv pom tsis tshab ib yam dab tsi li, lawv ua tsis tau tes hauj lwm tiag tiag, thiab qhov no ua rau lawv yog cov thawj coj cuav thiab cov neeg ua hauj lwm cuav tseem tseem. Qhov no yog ib yam uas cais tau yooj yim tshaj plaws.

Tam sim no txhua lub pawg ntseeg puav leej muaj cov thawj coj cuav thiab cov neeg ua hauj lwm cuav. Lawv tsuas vam khom lawv txoj kev kub siab los ua hauj lwm thiab tsis to taub qhov tseeb kiag li. Lawv tsis paub tias tes hauj lwm ntawm ib tug thawj coj los sis ib tug neeg ua hauj lwm yog dab tsi, thiab lawv tsis muaj peev xwm qhia txog qhov tseeb los daws tej teeb meem—lawv tsuas khwv yam dig muag ntsuav ua qee tes hauj lwm dav dav tas hnub xwb. Piv txwv li, hais tias pawg ntseeg cheem tsum yuav ib yam khoom. Qhov no tsis yog ib yam loj; tsuas yog npaj kom ib tug neeg uas paub txog qhov ntawd mus yuav xwb. Tiam sis, ib tug thawj coj cuav ntshai tsam siv nyiaj ntau dhau, yog li ntawd lawv thiaj li npaj kom ib tug neeg mus ntau qhov chaw yuav qhov uas pheej yig tshaj plaws. Qhov tshwm sim los ntawm qhov no yog lawv yuav tau ib yam khoom pheej yig uas siv tau ob peb hnub xwb ces puas lawm, thiab lawv yuav tsum tau mus yuav lwm yam ntxiv. Tsis yog lawv txuag tsis tau nyiaj xwb tiam sis, rov qab qees, lawv tau siv nyiaj ntau dua. Qhov no puas yog ib txoj hau kev uas muaj hauv paus ntsiab lus los leg tes hauj lwm ntawd? Thaum yuav khoom tsis tim tsum yuav cov khoom muaj npe nrov, tiam sis qhov uas tsim nyog ua yog yam tsawg tshaj yuav tsum yuav ib yam khoom uas zoo thiab siv tau. Cov thawj coj cuav txhawj xeeb kawg txog tes hauj lwm dav dav no, thiab qhov ntawd tsis txhaum dab tsi. Txawm li cas los xij, lawv tsis quav ntsej tes hauj lwm tseem ceeb ntawm Vajtswv lub tsev, thiab qhov no yog ib qho ua yuam kev loj; qhov no yog lawv tsis ua tes hauj lwm tseem ceeb. Tej hauj lwm xws li tes hauj lwm tshaj tawm txoj moo zoo, tes hauj lwm ua yeeb yaj kiab, tes hauj lwm sau ntawv, tes hauj lwm ua yeeb yaj kiab lus tim khawv uas hais txog txoj kev ntsib kev pom, thiab tes hauj lwm hloov cov thawj coj thiab cov neeg ua hauj lwm, puav leej tseem ceeb tshaj plaws, tiam sis cov thawj coj cuav tsis xav tias tej ntawd tseem ceeb, thiab lawv muab tej hauj lwm no tso rau ib sab thiab tsis quav ntsej. Lawv tsis muaj peev xwm txaus thiab tsis paub xyov yuav ua tes hauj lwm ntawd li cas, tiam sis lawv tsis sim los kawm thiab, tseem xav tias, “Tsis ua li cas tsuav muaj neeg saib xyuas tes hauj lwm no lawm xwb. Puas tim tsum siv kuv thiab? Kuv leg tej hauj lwm tseem ceeb. Tej no tsuas yog tej yam me me uas kuv tsis tas yuav quav ntsej xwb. Thaum kuv qhia tej hauv paus ntsiab lus rau lawv lawm, ces kuv txoj hauj lwm tiav lawm.” Saib sab nraud mas zoo li cov thawj coj cuav tsis khoom heev, tiam sis thaum koj saib tej yam uas lawv khwv ua ntawd mas, tsis muaj ib qho uas yog tes hauj lwm tseem ceeb ntawm pawg ntseeg li, tsis muaj ib qho uas yog tes hauj lwm yug rau tib neeg lub neej txoj sia li, thiab tsis muaj ib qho yog tes hauj lwm uas siv qhov tseeb los daws teeb meem li. Tej yam uas lawv khwv ua ntawd tsis muaj nqis dab tsi kiag li, thiab cov thawj coj cuav no tsuas lam khwv yam dig muag ntsuav xwb. Lawv tsis paub tias cov thawj coj thiab cov neeg ua hauj lwm yuav tsum ua tes hauj lwm dab tsi thiaj li yuav mus raws li Vajtswv tej kev npaj siab; lawv tsuas vam khom lawv txoj kev kub siab los khwv ua qee tes hauj lwm uas lawv nyiam ua xwb. Lawv nug ntxaws ntxaws txog tej yam me me uas tsis muaj feem xyuam nrog pawg ntseeg tes hauj lwm, xws li cov kwv tij thiab cov muam hnav khaub ncaws dab tsi, lawv txiav plaub hau zoo li cas, lawv nrog lwm tus sib cuag zoo li cas, thiab lawv hais lus thiab coj tus kheej zoo li cas. Lawv xav tias qhov no yog qhov lawv ua neeg zoo thiab yooj yim los cuag tau, thiab tias qhov daws tej teeb meem hauv tib neeg lub neej tiag tiag yog ib yam uas ib tug thawj coj yuav tsum ua, ib yam uas txoj kev ua neeg li ib txwm muaj yuav tsum muaj. Tiam sis lawv tsis quav ntsej tes hauj lwm tseem ceeb xws li tes hauj lwm tshaj tawm txoj moo zoo, tes hauj lwm ua yeeb yaj kiab, tes hauj lwm ua nkauj qhuas Vajtswv, tes hauj lwm sau ntawv, tes hauj lwm kev cai tswj fwm, tes hauj lwm ywg dej rau cov ntseeg tshiab, tes hauj lwm tsim tsa pawg ntseeg, tes hauj lwm txhawb thiab cob qhia tib neeg, thiab ntau yam ntxiv. Lawv tsis koom nrog ib qho ntawm tes hauj lwm no li, thiab lawv tsis taug qab li; cuag li tes hauj lwm no tsis muaj feem xyuam nrog lawv. Cov thawj coj cuav no tsis daws ntau yam teeb meem uas sib sau ua pawg nyob hauv pawg ntseeg, lawv tsis rho tawm cov thawj coj cuav uas tsim nyog rho tawm, lawv tsis txwv los sis tsis saib xyuas cov tib neeg phem uas ua phem thiab ua phem yam tsis muaj kev tswj, thiab lawv tsis sib qhia txog qhov tseeb los daws qhov teeb meem ntawm qhov ib txhia tib neeg ua dog ua dig, tsis muaj kev txwv thiab tsis muaj kev qhuab qhia, thiab ua lawv tej dej num qeeb qeeb. Qhov no yog teeb meem dab tsi? Lawv tsis nrhiav qhov tseeb los daws tej teeb meem tiag tiag no—lawv puas yog cov neeg uas ua tes hauj lwm tiag tiag? Tej hauj lwm uas tsis tseem ceeb thiab tsis muaj feem xyuam uas lawv ua ntawd mas zoo li tseem ceeb thiab muaj nqis rau lawv nyob hauv lawv lub siab. Lawv khwv ua tej yam uas tsis muaj nqis ntawd tas hnub, ntseeg hais tias lawv tab tom ua lawv tej luag hauj lwm kom tiav thiab ua siab ncaj, tiam sis lawv tsis ua ib qho hauj lwm tseem ceeb uas Vajtswv tau tso rau lawv ua ntawd li—cov neeg zoo li no tsis yog cov thawj coj cuav lod? Lawv zoo ib yam li cov thawj coj ntawm cov chaw ua hauj lwm nyob rau hauv nroog hauv lub zej lub zos, lawv tsuas yog cov neeg nyob hauv zej zog uas nyiam xav paub xav pom lwm tus tej xwm txheej xwb—lawv puas tseem yog cov thawj coj thiab cov neeg ua hauj lwm ntawm Vajtswv lub tsev thiab? Lawv yog cov thawj coj cuav thiab cov neeg ua hauj lwm cuav tseem tseem. Vim li cas cov neeg no thiaj li raug txiav txim tias yog cov thawj coj cuav thiab cov neeg ua hauj lwm cuav? (Vim lawv lub peev xwm tsis zoo kiag li, lawv ua tsis tau tes hauj lwm tiag tiag, thiab txhua yam uas lawv ua tau tsuas yog saib xyuas qee yam me me tsis tseem ceeb xwb.) Qhov no yog qhov laj thawj tiag tiag. Cov neeg no lub peev xwm tsis zoo kiag li; txawm lawv mloog pes tsawg zaj lus qhuab qhia, lawv nyeem pes tsawg qhov kev npaj tes hauj lwm, lawv ua lawv tes dej num hauv Vajtswv lub tsev tau pes tsawg xyoo, los sis lawv ua thawj coj tau pes tsawg xyoo los xij, lawv yeej tsis paub tias lawv tab tom ua dab tsi, tsis paub tias yam lawv ua ntawd yog los sis yuam kev, los sis seb lawv puas tau ua tej luag hauj lwm uas lawv yuav tsum tau ua kom tiav. Lawv lo lus tshab txhais ntawm lub npe thiab lub meej mom ntawm cov thawj coj thiab cov neeg ua hauj lwm ces yog qhov tias tsis ua li cas tsuav lawv khwv heev xwb ces tau lawm. Zoo li ib tug nees luav uas rub lub zeb, lawv pheej rub mus txog thaum lawv mus tsis tau lawm, thiab lawv xav tias qhov no yog kev ua lawv tej luag hauj lwm tiav lawm. Txawm lawv yuav rub mus rau sab twg los xij, thiab txawm lub zog uas lawv muab tso rau hauv kev rub ntawd puas yog los sis tsis yog los xij, rau lawv mas yog lawv tab tom ua lawv tej luag hauj lwm kom tiav lawm. Muaj ntau yam teeb meem uas lawv pom tsis tshab, thiab lawv tsis daws tej ntawd los sis tsis qhia tej ntawd tawm rau tus Nyob Saud thiab tsis nrhiav kev daws los ntawm tus Nyob Saud. Txawm lawv ua hauj lwm tau pes tsawg xyoo los sis lawv nrog tib neeg sib cuag tau pes tsawg xyoo los xij, lawv yeej tsis paub tias ib tug neeg tej kev qhia tshwm uas pom tau meej ntawd yog ib tug ntseeg tshiab uas muaj lub hauv paus ntiav hauv lawv txoj kev ntseeg thiab tsis to taub qhov tseeb los sis yog ib tug tsis ntseeg, thiab lawv kuj tsis paub cais los sis txiav txim rau tus neeg ntawd li cas thiab. Thaum ob tug neeg puav leej muaj tus yam ntxwv xav tsis zoo, lawv tsis paub tias leej twg tsim nyog cob qhia thiab leej twg tsis tsim nyog; thaum ob tug neeg ua dog ua dig me ntsis hauv kev ua lawv tej dej num, lawv cais tsis tau tias leej twg yog tus caum qhov tseeb thiab leej twg yog tus neeg ua dej num txhawb, leej twg muaj peev xwm nkag mus rau hauv qhov tseeb qhov muaj tiag thiab leej twg tsis muaj qhov tseeb qhov muaj tiag. Lawv tsis paub tias cov neeg twg yuav muaj feem taug cov tawm tsam khetos txoj kev thaum lawv los ua cov thawj coj lawm, tab txawm yog lawv tau nrog cov neeg no sib cuag tau ntau xyoo lawm los xij. Txawm lawv yuav ua tej yam uas tsis muaj qab hau ntau npaum li cas los sis ua tej hauj lwm uas tsis muaj txiaj ntsim ntau npaum li cas los sis muaj teeb meem ntau npaum li cas nyob ib puag ncig lawv los xij, lawv yeej tsis paub txog qhov ntawd, thiab lawv tsis paub tias tej no yog teeb meem li. Vim cov neeg zoo li no lub peev xwm tsis zoo, muaj kev xav tsis meej, thiab tsis muaj peev xwm ua hauj lwm, qhov ntawd nyuaj heev rau lawv los ua ib tug thawj coj los sis ib tug neeg ua hauj lwm tej luag hauj lwm kom tiav. Dhau ntawm qhov uas muaj peev xwm ua tau qee tes hauj lwm dav dav uas yooj yim lawm, cov thawj coj thiab cov neeg ua hauj lwm no tsis muaj peev xwm ua tau ib yam dab tsi uas muaj feem xyuam nrog pawg ntseeg tes hauj lwm tseem ceeb li, thiab lawv tsis muaj peev xwm pom los sis daws tau tej teeb meem tiag tiag nyob hauv tes hauj lwm. Hom thawj coj uas muaj lub peev xwm zoo li no puas tsim nyog cob qhia? Lawv yeej tsis paub tias tej kev paub tsis meej los sis tej kev nyuaj yog dab tsi li, thiab lawv haj yam tsis muaj peev xwm saib xyuas tej ntawd raws li tej hauv paus ntsiab lus. Txawm tias cov teeb meem uas ntsib hauv pawg ntseeg tes hauj lwm yog cov uas muaj tas li los, lawv tseem muab xaus lus thiab cais ua tej hom tsis tau, thiab lawv kuj tsis paub tias yuav qhia txog qhov tseeb los daws tej teeb meem ntawd li cas thiab—hom thawj coj cuav no yeej saib xyuas tsis tau los sis daws tsis tau cov teeb meem uas pheej tshwm sim hauv pawg ntseeg no hlo li. Lawv qhov teeb meem loj tshaj plaws tsis yog tias lawv tsis yeem them tus nqi, los sis tias lawv ntshai tsam tsis khoom thiab sab, tiam sis yog lawv lub peev xwm tsis zoo, muaj lub tswv yim tsis meej, thiab lawv ua tsis tau pawg ntseeg tes hauj lwm tseem ceeb thiab tes hauj lwm tiag tiag. Tiam sis lawv tsuas ua qee tes hauj lwm dav dav los sis nyiam mus quav ntsej tej hauj lwm uas tsis muaj feem xyuam xwb, ces tom qab ntawd lawv xav ua cov thawj coj thiab cov neeg ua hauj lwm—lawv tsis yog cov neeg ruam feeb tsis meej uas muaj tej kev xav ua thiab tej kev ntshaw uas loj dhau heev lawm lod? Cov thawj coj uas lub peev xwm tsis zoo puav leej ua tsis tau pawg ntseeg tes hauj lwm tseem ceeb, uas yog tes hauj lwm uas ntsig txog qhov tseeb tej hauv paus ntsiab lus, los sis tes hauj lwm qib siab uas nyuaj, xws li tes hauj lwm nthuav txoj moo zoo kom dav, tes hauj lwm ywg dej rau cov ntseeg tshiab hauv pawg ntseeg, tes hauj lwm ua yeeb yaj kiab, tes hauj lwm sau ntawv, thiab tes hauj lwm ntawm sab neeg ua hauj lwm uas ntsig txog cov thawj coj thiab cov neeg ua hauj lwm nyob rau ntau theem. Vim li cas lawv thiaj li ua tsis tau tes hauj lwm no? Qhov ntawd yog vim lawv lub peev xwm tsis zoo kiag li thiab lawv tuav tsis tau tej hauv paus ntsiab lus; lawv yeej ua tsis tau tag nrho tes hauj lwm no thiab tsis muaj peev xwm kawm kom paub tias yuav ua tes hauj lwm ntawd li cas li. Piv txwv li, muab tsib tug neeg rau ib tug thawj coj zoo li no thiab kom lawv faib hauj lwm rau tsib tug neeg no raws li qib ntawm lawv txoj kev kawm, lawv lub peev xwm thiab tej yam uas lawv ua tau zoo, thiab lawv tus yam ntxwv. Qhov no puas yog ib teg hauj lwm uas yooj yim ua? Qhov no puas muaj feem xyuam rau cov thawj coj thiab cov neeg ua hauj lwm lub peev xwm? (Muaj.) Cov thawj coj thiab cov neeg ua hauj lwm uas lub peev xwm nruab nrab yuav faib hauj lwm tau raug dua me ntsis tom qab siv sij hawm soj ntsuam, nrog sib cuag, thiab paub txog tsib tug neeg ntawd. Cov thawj coj thiab cov neeg ua hauj lwm uas lub peev xwm tsis zoo yuav xav tias tsib tug neeg mas ntau dhau lawm; thaum muaj neeg ntau dhau, lawv paub tsis meej thiab tsis paub tias yuav faib hauj lwm rau lawv li cas, thiab txawm lawv faib hauj lwm rau lawv lawm los xij, hauv lawv lub siab lawv tsis paub tias lawv tab tom ua qhov ntawd yam tsim nyog los tsis tsim nyog li. Qhov no yog hais txog sab neeg ua hauj lwm. Thaum hais txog kev saib xyuas tej yam, piv txwv li, yog lawv yuav tsum tau saib xyuas thiab daws ob los sis peb yam teeb meem ua ke, lawv yuav tsis paub tias yuav txiav txim thiab cais txoj kev sib txuas ntawm cov teeb meem no li cas, thiab lawv tsis muaj peev xwm ntsuas tias tsim nyog daws qhov teeb meem twg ua ntej, thiab daws qhov teeb meem twg tom qab yam tsis ua rau muaj kev ncua sij hawm. Qhov ntawd hais tau tias, lawv tsis paub tias yuav ntsuas qhov zoo thiab qhov phem li cas, lawv tsis paub tias yuav teem tes hauj lwm twg ua ntej kom raws li qhov tseem ceeb thiab qhov maj npaum li cas, thiab lawv tsis paub tias yuav daws cov teeb meem li cas. Txawm li cas los xij, vim lawv yog cov thawj coj thiab cov neeg ua hauj lwm, txawm lawv tsis to taub los lawv yuav tsum ua txuj tias lawv to taub, txawm lawv tsis nkag siab los lawv yuav tsum ua txuj tias lawv nkag siab, thiab lawv ua tsis tau ib yam dab tsi li tsuas yog yuam tus kheej nyob rau ntawd thiab hais qee cov lus qhuab qhia los ua ua kom dhau xwb, thiab hais ob peb lo lus uas mloog zoo li zoo ces txawm maj nroos muab txhua yam xaus. Lawv yeej paub meej meej tias yam lawv hais ntawd yog los tsis yog, puas mus raws li tej hauv paus ntsiab lus los tsis mus raws, puas daws tau teeb meem los tsis tau, tiam sis lawv tsuas xav lam ua kom dhau xwb. Lawv paub zoo heev tias lawv tsis muaj peev xwm daws tej teeb meem los ntawm qhov lawv ua li ntawd, tiam sis lawv tseem tsis qhia cov teeb meem ntawd tawm mus rau tus Nyob Saud thiab, vim li ntawd thaum kawg lawv ua rau tes hauj lwm qeeb thiab raug muab rho tawm. Qhia Kuv seb, cov neeg no tsis yog neeg ruam lod? Thaum ib txhia thawj coj thiab neeg ua hauj lwm qhia cov teeb meem tawm, lawv rov qab suav tag nrho cov xwm txheej qub, tsis tseem ceeb uas twb dhau los txog rau niaj hnub no lawm, thiab tom qab lawv hais ib pawg lus lawm, koj tseem yuav tsum tau pab lawv soj ntsuam thiab txiav txim tias muaj teeb meem dab tsi. Lawv yeej tsis to taub tias yuav hais txog ib qho teeb meem li cas li, thiab lawv tuaj yeem tham tau ntau teev yam tsis piav qhia meej tias lub ntsiab tseem ceeb thiab lub ntsiab tseeb ntawm ib qho teeb meem yog dab tsi. Txhua yam uas lawv hais tsuas ntsig txog tej yam sab nraud xwb thiab tsuas yog ntau yam lus uas tsis muaj qab hau xwb! Qhov no tsis yog ib qho xwm txheej uas lawv lub peev xwm tsis zoo kiag li thiab lawv lub hlwb tsis txhij txhua lod? Cov neeg uas muaj peev xwm puas txaus siab mloog tej no? Tus neeg uas lawv nrog tham ntawd tsuas xav paub tias tus neeg uas lawv qhia tawm txog ntawd tam sim no qhov xwm txheej thiab tej kev qhia tshwm uas pom tau meej yog dab tsi, thiab muaj tus yam ntxwv twg uas lawv paub tsis meej thiab daws tsis tau. Tiam sis, cov neeg no pheej tham txog tias yav tas los tus neeg ntawd tau ua tes hauj lwm dab tsi, thiab lawv tsis tham txog tus neeg qhov xwm txheej tam sim no, los sis tsis hais txog tias lawv tus kheej tej kev paub tsis meej thiab tej teeb meem yog dab tsi. Lawv hais ib pawg lus, thiab tsis muaj leej twg paub meej tias lawv tab tom tham txog dab tsi tiag tiag. Tab txawm yog lawv xav nug ib qho lus nug los, lawv tsis paub tias yuav pib qhov twg, lawv tsis paub tias yuav piav qhia li cas thiaj li yuav muaj txiaj ntsig thiab ua rau tib neeg to taub lawv—lawv yeej tsis muaj peev xwm npaj lawv cov lus hais li. Qhov no tsis yog ib qho kev qhia tshwm uas pom tau meej ntawm lub peev xwm tsis zoo kiag li lod? Ib txhia thawj coj cuav lub peev xwm tsis zoo, thiab thaum lawv qhia tawm ib qho teeb meem, lawv hais ntau yam lus uas tsis muaj qab hau thiab to taub tsis tau, thiab tom qab ntawd lawv xav tias, “Kuv twb muab tej ntaub ntawv ntau txaus rau koj lawm, puas yog? Kuv twb qhia txhua yam yav tas los thiab tam sim no txog qhov teeb meem no rau koj lawm, yog li ntawd tam sim no koj puas paub tias lo lus nug uas kuv xav nug yog dab tsi?” Txawm koj yuav nug lawv dab tsi los sis koj coj qhia lawv li cas los, lawv tsis paub tias yuav hais dab tsi thiab yeej hais tsis tau lub ntsiab tseem ceeb ntawm qhov teeb meem ntawd li. Tsis yog tias lawv tsis muaj lus los qhia lawv tej kev xav los sis tias lawv muaj kev kawm qis, tiam sis yog tias lawv lub peev xwm tsis zoo thiab lawv tsis muaj tswv yim, yog li ntawd lawv thiaj li tsis paub tias yuav qhia tej no li cas, lawv lub siab ntxhov quav niab, thiab lawv piav qhia tsis tau meej kom lwm tus thiaj li to taub lawv. Lawv muaj lub nra me ntsis, thiab thaum sij hawm dhau mus, lawv kuj paub me ntsis txog qee qhov teeb meem, tiam sis lawv tsis paub tias yuav qhia tej ntawd li cas, lawv tsis muaj peev xwm nkag siab tias lub ntsiab tseeb ntawm cov teeb meem ntawd yog dab tsi, thiab lawv haj yam muab tsis tau cov teeb meem ntawd zuaj zog los hais li thiab. Cov neeg uas lub peev xwm tsis zoo npaum li no puas ua tau tes hauj lwm? Lawv puas ua tau cov thawj coj thiab cov neeg ua hauj lwm tej luag hauj lwm kom tiav? Lawv ua tsis tau. Tab txawm yog koj muab sij hawm thiab lub cib fim rau lawv thiab cia lawv qhia tawm thiab piav txog cov teeb meem ntawd los, lawv ua tsis tau, yog li ntawd koj puas tseem yuav nrog cov neeg zoo li no sib tham tau? Puas tseem siv tau lawv thiab? (Siv tsis tau.) Vim li cas thiaj li siv tsis tau lawv? Lawv haj tseem hais tsis tau lus kom meej meej li, thiab lawv haj tseem tsis muaj qhov peev xwm xeeb txawm tsawg tshaj plaws ntawm ib tug neeg uas siv hom lus los nthuav lawv tej kev xav, tej tswv yim, thiab tej cwj pwm tawm li thiab, yog li ntawd lawv yuav ua tau tes hauj lwm dab tsi? Txawm hais tias lawv muaj zog me ntsis, muaj kev kub siab tiag tiag, muaj lub siab ris lub luag hauj lwm me ntsis, thiab muaj lub siab ncaj ncees kawg los xij, lawv lub peev xwm tsis zoo kiag li, lawv kawm tsis tau ib yam dab tsi txawm koj yuav qhia lawv li cas los xij, thiab tab txawm yog koj qhia lawv kom paub hais lus los lawv yeej tsis to taub li, yog li ntawd koj yuav ntxhov siab thiab npau taws. Thaum lawv hais lus, lawv ua rau ntxhov quav niab, ua rau koj paub tsis meej; lawv hais tsis tau ib yam dab tsi kom meej, thiab yam uas lawv hais ntawd mas tsuas yog ntau yam lus uas tsis muaj qab hau xwb. Qhov uas txaus khuv leej tshaj plaws txog lawv mas yog tias lawv tsis to taub tib neeg cov lus tiam sis lawv tseem pheej ua yam dig muag ntsuav, lawv tseem xav tias lawv muaj peev xwm, thiab lawv tawm tsam thaum koj ntuas lawv. Lawv yuav ua tau tes hauj lwm thawj coj kom zoo tau li cas? Thaum ib tug thawj coj los sis ib tug neeg ua hauj lwm lub peev xwm tsis zoo txog theem uas lawv tsis muaj peev xwm siv lus los nthuav lawv tus kheej tawm no, lawv puas tseem yuav ris taus rau tes hauj lwm ntawd? (Ris tsis tau.) Thiab qhov uas ris tsis tau lawv tes hauj lwm ntawd txhais li cas? Qhov ntawd yog txhais hais tias lawv tsis muaj peev xwm nrhiav pom tej kev nyuaj thiab tej teeb meem uas ntsib hauv tes hauj lwm kom ncav sij hawm thiab, muaj tseeb tias, qhov ntawd txhais hais tias txawm yuav muaj teeb meem dab tsi tshwm tuaj hauv tes hauj lwm los xij, lawv yeej daws tsis tau kom ncav sij hawm li, thiab lawv kuj qhia tawm tsis tau tej ntawd rau tus Nyob Saud thiab nrhiav kev daws los ntawm tus Nyob Saud kom ncav sij hawm thiab—qhov no nyuaj dhau rau lawv, thiab lawv yeej ua tsis tau li. Thaum hais txog cov neeg zoo li no uas lub peev xwm tsis zoo, tes hauj lwm no mas nyuaj heev rau lawv; qhov ntawd zoo ib yam li yuam kom ntses los nyob saum nruab nqhuab los sis yuam kom npua ya—qhov ua tes hauj lwm no mas siv zog heev rau lawv.

Ib txhia hais tias, “Kuv khuv leej rau cov tib neeg ntawd. Lawv maj mus maj los ua ntau yam hauj lwm, thiab thaum kawg txiav txim tias lawv yog cov thawj coj cuav vim lawv lub peev xwm tsis zoo. Yog li ntawd, qhov ntawd puas yog txhais hais tias txoj kev txom nyem uas lawv tau tiv ntawd puav leej tsis muaj qab hau dab tsi? Qhov ntawd tsis yog ua tsis ncaj ncees rau tib neeg lod?” Qhov rho cov thawj coj cuav tawm ntawd yog txhais hais tias ris lub luag hauj lwm rau cov neeg Vajtswv xaiv tseg thiab pawg ntseeg tes hauj lwm, yog li ntawd qhov no yuav ua tsis ncaj ncees rau tib neeg tau li cas? Yog koj tseem yuav kom cov thawj coj cuav ua lawv tes hauj lwm ua thawj coj mus ntxiv, qhov no tsis yog kev ua phem rau cov neeg Vajtswv xaiv tseg lod? Koj yuav hais tias qhov kev ua phem rau cov neeg Vajtswv xaiv tseg ntawd tsis yog ua tsis ncaj ncees rau tib neeg lod? Los ntawm qhov rho ib tug thawj coj cuav tawm ntawd, Vajtswv lub tsev tsis tau teem txim rau tus thawj coj cuav ntawd, thiab tsis tau xa tus thawj coj cuav ntawd mus rau hauv ntuj tawg, tiam sis yog muab lub cib fim rau tus neeg ntawd kom tau txais kev cawm dim. Yog lawv tseem ua ib tug thawj coj cuav mus ntxiv, lawv puas yuav tau txais kev cawm dim? Lawv qhov kawg yuav yog dab tsi? Vim li cas koj thiaj li tsis xav txog qhov teeb meem li no? Tsis tas li ntawd, lub hom phiaj ntawm kev ntseeg Vajtswv yog dab tsi? Qhov ua ib tug thawj coj thiaj li yog tib txoj kev tawm xwb lod? Puas yog tsis muaj lwm yam dej num ua yog tsis ua ib tug thawj coj? Rau cov uas tsis yog thawj coj thiab lub peev xwm tsis zoo ntawd yuav tsis muaj txoj kev ua neej nyob lawm lod? (Tsis yog li ntawd.) Yog li, txoj hau kev xyaum ua raws yog dab tsi? Yam uas peb tab tom soj ntsuam tam sim no yog tej kev qhia tshwm uas pom tau meej thiab cov teeb meem uas muaj nyob hauv hom thawj coj cuav uas lub peev xwm tsis zoo no; peb tsis tau teem txim los sis foom phem rau lawv, peb tsuas yog soj ntsuam lawv xwb. Lub hom phiaj ntawm qhov soj ntsuam lawv ntawd yog kom hom neeg no paub thiab hloov lawv tus kheej kom yog, kom paub txog lawv lub peev xwm tiag tiag, thiab kom to taub raug tias cov thawj coj thiab cov neeg ua hauj lwm yog dab tsi, cov thawj coj thiab cov neeg ua hauj lwm yuav tsum ua tes hauj lwm dab tsi, thiab tom qab ntawd muab tej no los piv rau lawv tus kheej kom pom tias lawv puas haum ua ib tug thawj coj los sis ib tug neeg ua hauj lwm. Yog koj lub peev xwm yeej tsis zoo tiag tiag, tsis zoo txog qhov uas koj tsis muaj peev xwm siv lus los nthuav koj tus kheej tawm, los sis tsis muaj peev xwm los nthuav koj tej kev xav thiab tej kev xam pom tawm, los sis tsis muaj peev xwm pom tej teeb meem, ces koj tsis haum ua ib tug thawj coj los sis ib tug neeg ua hauj lwm, koj tsis muaj peev xwm ua tau ib tug thawj coj los sis ib tug neeg ua hauj lwm tes dej num, thiab koj ua tsis tau ib tug thawj coj los sis ib tug neeg ua hauj lwm tes hauj lwm. Thiab vim koj lub peev xwm tsis zoo, koj yuav tsum muaj txoj kev paub txog koj tus kheej zoo li no. Ib txhia tib neeg hais tias, “Kuv lub peev xwm tsis zoo—ua li cas? Kuv muaj kev ua neeg zoo, yog li ntawd kuv tsim nyog ua ib tug thawj coj.” Qhov no puas yog lub hauv paus ntsiab lus? Lwm tus hais tias, “Dhau ntawm qhov muaj kev ua neeg zoo lawm, kuv kuj txaus siab tiv kev txom nyem thiab them tus nqi, kuv txawj qhuab qhia cov lus qhuab qhia, kuv muaj ib lub hauv paus nyob hauv kuv txoj kev ntseeg, thiab kuv tau raug kaw hauv tsev loj cuj vim kuv txoj kev ntseeg Vajtswv. Tej no tsis suav tias yog peev txheej rau kuv los ua ib tug thawj coj los sis ib tug neeg ua hauj lwm lod?” Qhov uas ib tug twg yuav tsum muaj peev txheej kom los ua tau ib tug thawj coj los sis ib tug neeg ua hauj lwm ntawd puas yog qhov tseeb? (Tsis yog.) Yam uas peb tab tom tham txog tam sim no yog cov thawj coj thiab cov neeg ua hauj lwm tej luag hauj lwm thiab, nyob rau hauv lub ncauj lus no, peb tab tom tham txog teeb meem ntawm lub peev xwm. Yog koj lub peev xwm tsis zoo thiab koj ua tsis tau tej luag hauj lwm no kom tiav, ces txoj kev paub txog koj tus kheej uas koj tsim nyog muaj yog: “Kuv tsis muaj lub peev xwm no thiab kuv ua tsis tau ib tug thawj coj los sis ib tug neeg ua hauj lwm. Txawm kuv yuav muaj peev txheej dab tsi los xij, qhov ntawd yeej tsis muaj qab hau.” Koj hais tias koj muaj kev ua neeg zoo, tias koj yog neeg ntseeg siab tau, tias koj muaj kev txiav txim siab los tiv kev txom nyem, thiab tias koj txaus siab them tus nqi—Vajtswv lub tsev puas tau ua tsis ncaj ncees rau koj? Vajtswv lub tsev siv tib neeg raws li txoj kev uas muab txhua tus tso rau qhov uas lawv ua tau zoo tshaj plaws, muab tes hauj lwm uas haum rau txhua tus tib neeg, thiab ua li ntawd yam tsim nyog heev. Yog koj muaj kev ua neeg zoo tiam sis koj lub peev xwm tsis zoo, ces koj yuav tsum ua koj tes dej num kom zoo yam kawg koj lub siab thiab kawg koj lub zog; tsis yog tias koj yuav tsum ua ib tug thawj coj los sis ib tug neeg ua hauj lwm xwb thiaj li yuav tau txais kev pom zoo los ntawm Vajtswv. Txawm yog tias koj txaus siab hlo ris lub nra rau qhov ntawd los xij, tiam sis koj tsis muaj peev xwm ris lub nra rau qhov uas ib tug thawj coj yuav tsum ua, thiab koj tsis muaj lub peev xwm uas ua ib tug thawj coj tsim nyog muaj, thiab koj ua tsis tau raws li qhov ntawd, ces koj ua tau dab tsi? Tsis txhob yuam koj tus kheej los sis ua tej yam nyuaj rau koj tus kheej; yog koj nqa tau 25 kislus, ces nqa 25 kislus. Tsis txhob sim khav txog qhov muab koj tus kheej thawb mus kom dhau qhov koj ua tau lawm, es hais tias, “25 kislus xwb tsis txaus. Kuv haj tseem xav nqa kom ntau dua thiab. Kuv xav nqa 50 kislus. Kuv txaus siab hlo ua tab txawm kuv yuav tuag los ntawm txoj kev sab los xij li!” Koj tsis muaj peev xwm ua ib tug thawj coj los sis ib tug neeg ua hauj lwm, tiam sis yog koj tseem muab koj tus kheej thawb mus kom dhau qhov koj ua tau los khav txog, ces txawm koj yuav tsis sab los xij, koj yuav ua rau pawg ntseeg tes hauj lwm qeeb, koj yuav cuam tshuam rau kev nce qib thiab kev ua tau zoo ntawm tes hauj lwm, thiab koj yuav ua rau ntau tus neeg lub neej txoj sia kev nce qib qeeb—qhov no tsis yog ib lub luag hauj lwm uas koj yuav ris taus. Vim koj muaj peev xwm tsis txaus, yog koj muaj kev paub txog koj tus kheej, ces koj yuav tsum txaus siab tawm thiab xaiv ib tug neeg uas muaj peev xwm zoo, tus uas nyiam qhov tseeb, thiab tus uas muaj lub siab ris lub luag hauj lwm dua koj los ua ib tug thawj coj los sis ib tug neeg ua hauj lwm. Qhov no yuav yog ib yam uas tsim nyog ua, thiab tsuas yog ua li no xwb mas koj thiaj li yuav yog ib tug neeg uas muaj kev ua neeg thiab laj thawj tiag tiag, thiab yog ib tug neeg uas to taub thiab xyaum ua raws qhov tseeb tiag tiag. Yog koj tawm vim koj tsis muaj peev xwm ua tes hauj lwm thawj coj, es koj xaiv ib tes dej num uas haum rau koj thiab fij koj lub siab ncaj kom koj thiaj li tau txais kev pom zoo los ntawm Vajtswv, ces koj yog ib tug neeg uas ntse tshaj plaws. Koj pheej xav tias, “Txawm kuv lub peev xwm tsis zoo los, kuv muaj kev ua neeg zoo, kuv txaus siab siv zog, tiv kev txom nyem, thiab them ib tug nqi, kuv muaj kev txiav txim siab, kuv thev taus dua nej txhua tus nyob rau hauv txhua yam uas kuv ua, thiab kuv muaj lub siab dav thiab tsis ntshai tsam raug ntuas los sis raug sim siab. Txawm kuv lub peev xwm tsis zoo me ntsis los, kuv tseem ua tau ib tug thawj coj.” Qhov lub peev xwm tsis zoo tsis yog ib qho teeb meem. Qhov no tsis yog txhais hais tias teem txim rau koj, qhov ntawd tsuas yog txhais hais tias muab koj cais thiab ua kom koj to taub meej meej tias koj ua tau dab tsi tiag tiag thiab hom dej num twg uas koj haum ua xwb. Tiam sis, qhov teeb meem tam sim no yog koj lub peev xwm tsis zoo thiab koj ua tsis tau ib tug thawj coj los sis ib tug neeg ua hauj lwm. Txawm tias koj raug xaiv los ua ib tug thawj coj los sis ib tug neeg ua hauj lwm los xij, koj ua tsis tau tes hauj lwm no kom zoo, thiab txhua yam uas koj ua tau tsuas yog ua rau tes hauj lwm ntxhov quav niab xwb. Yog koj muaj kev ua neeg zoo, yog koj muaj lub siab txawj xav thiab muaj laj thawj, thiab koj txaus siab ris lub nra thiab them tus nqi, ces yuav muaj ib txoj hauj lwm uas haum rau koj ua thiab ib teg dej num uas koj tsim nyog ua, thiab Vajtswv lub tsev yuav npaj kom tsim nyog rau koj. Qhov tsis pub koj ua thawj coj yog saib raws li Vajtswv lub tsev tej kev cai tswj thiab tej hauv paus ntsiab lus. Txawm li cas los xij, Vajtswv lub tsev yeej yuav tsis txeeb koj txoj cai ua ib teg dej num los sis koj txoj cai ntseeg thiab raws Vajtswv qab vim koj lub peev xwm tsis zoo ntawd. Qhov no puas tsim nyog? (Yog, tsim nyog.) Puas tim tsum rau peb los sib qhia txog qhov teeb meem no kom ntxaws ntxaws ntxiv? Ib txhia tib neeg uas lub peev xwm tsis zoo hnov qhov no thiab ua tib zoo xav tias, “Tsis txhob qhia txog qhov no ntxiv lawm. Kuv txaj muag dhau tsis muaj ntsej muag ntsib leej twg li lawm. Kuv paub tias kuv lub peev xwm tsis zoo, thiab kuv yuav tsis ua ib tug thawj coj los sis ib tug neeg ua hauj lwm hauv pawg ntseeg ntxiv lawm. Kuv tsuas ua ib tug coj pab pawg los sis neeg saib xyuas xwb, los sis tsis li ntawd kuv ua tej hauj lwm dog dig, ua zaub mov, los sis tu tsev. Ua dab tsi los yeej tau. Kuv yuav tiv kev txom nyem ntawm kuv txoj hauj lwm yam tsis yws, uas raws li Vajtswv lub tsev tej kev npaj, thiab ua raws li Vajtswv tej kev tswj hwm. Qhov uas kuv lub peev xwm tsis zoo yog los ntawm Vajtswv txoj hmoov hlub, thiab Vajtswv tej kev npaj siab zoo nyob rau hauv. Txhua yam uas Vajtswv ua yeej yog.” Yog koj pom tau tej yam zoo li no, ces qhov ntawd zoo lawm, thiab txhais hais tias koj muaj kev paub txog koj tus kheej me ntsis lawm. Kuv yuav tsis qhia txog qhov teeb meem no ntau lawm. Muab zuaj zog los hais ces, thaum hais txog cov neeg uas lub peev xwm tsis zoo no, peb tsuas yog soj ntsuam qhov teeb meem thiab muab qhov tseeb ntawm tej uas muaj tseeb qhia tshwm kom ntau tus neeg thiaj li muaj tus cwj pwm thiab kev xam pom txog cov tib neeg no yog, thiab kom cov tib neeg no muaj tus cwj pwm thiab kev xam pom yog txog qhov teeb meem ntawm lawv tus kheej lub peev xwm tsis zoo, thiab tom qab ntawd thiaj li hloov tau lawv tus kheej kom yog, nrhiav tau ib qhov hauj lwm thiab ib teg dej num uas haum rau lawv, cia lawv txoj kev tiv taus hauv txoj kev raug kev them tus nqi thiab lawv txoj kev txiav txim siab los tiv kev txom nyem kom raug muab siv yam tsim nyog thiab ua kom muaj txiaj ntsig. Qhov no tsis cuam tshuam rau koj txoj kev to taub qhov tseeb thiab xyaum ua raws qhov tseeb, thiab kuj tsis cuam tshuam rau koj tus yam ntxwv nyob hauv Vajtswv lub tsev thiab.

III. Cov Thawj Coj Cuav Uas Tub Nkeeg thiab Ntshaw Kev Tau Zoo

Peb nyuam qhuav sib qhia txog ob hom thawj coj cuav. Tseem muaj lwm hom thawj coj cuav, uas peb pheej hais txog thaum sib qhia txog lub ncauj lus ntawm “cov thawj coj thiab cov neeg ua hauj lwm tej luag hauj lwm.” Hom neeg no muaj peev xwm me ntsis, lawv tsis yog tsis ntse, nyob hauv lawv tes hauj lwm mas, lawv muaj tej hau kev thiab tswv yim, thiab muaj kev npaj los daws teeb meem, thiab thaum muab ib teg hauj lwm rau lawv, lawv muaj peev xwm ua tau tiav ze li cov qauv uas xav tau. Lawv muaj peev xwm nrhiav pom txhua cov teeb meem uas tshwm tuaj hauv tes hauj lwm thiab kuj daws tau qee cov teeb meem ntawd thiab; thaum lawv hnov cov teeb meem uas qee tus neeg qhia tawm, los sis lawv saib qee tus neeg tus cwj pwm, tej kev qhia tshwm uas pom tau meej, kev hais lus thiab kev ua, lawv muaj kev teb rov qab hauv lawv lub siab, thiab lawv muaj lawv tus kheej txoj kev xam pom thiab ib tug cwj pwm. Muaj tseeb, yog cov neeg no caum qhov tseeb thiab muaj lub nra, ces tag nrho cov teeb meem no yeej daws tau. Txawm li cas los xij, tes hauj lwm nyob hauv hom neeg uas hnub no peb tab tom sib qhia txog ntawd saib xyuas mas cov teeb meem ho tsis raug daws li. Vim li cas thiaj zoo li ntawd? Qhov ntawd vim tias cov neeg no tsis ua tes hauj lwm tiag tiag. Lawv nyiam kev tau zoo thiab ntxub kev ua hauj lwm hnyav, lawv tsuas ua dog ua dig kom pom sab nraud xwb, lawv nyiam nyob twj ywm thiab txaus siab rau tej txiaj ntsim ntawm lub meej mom, lawv nyiam txib kom lwm tus ua ub ua no, thiab lawv tsuas siv qhov ncauj hais xwb thiab muab qee lub tswv yim ces xav tias lawv tes hauj lwm tiav lawm. Lawv tsis muab tes hauj lwm tiag tiag ntawm pawg ntseeg los sis tes hauj lwm tseem ceeb uas Vajtswv tso rau lawv ua ntawd tso rau hauv siab—lawv tsis muaj lub nra no, thiab txawm Vajtswv lub tsev hais tag hais dua rau tej no los xij, lawv yeej tseem tsis muab tej no tso rau hauv siab. Piv txwv li, lawv tsis xav mus koom nrog los sis nug txog tes hauj lwm ua yeeb yaj kiab los sis tes hauj lwm ntaub ntawv ntawm Vajtswv lub tsev, thiab lawv tsis xav mus tshuaj xyuas seb cov hauj lwm no nce qib mus li cas thiab ua tau txiaj ntsig zoo li cas lawm. Lawv tsuas nug ntawm txoj kev tsis ncaj qha me ntsis xwb, thiab thaum lawv paub tias tib neeg tab tom khwv thiab ua tes hauj lwm no lawm, lawv tsis quav ntsej txog qhov ntawd ntxiv lawm. Txawm lawv yeej paub zoo tias muaj teeb meem hauv tes hauj lwm los, lawv yeej tseem tsis xav mus sib qhia txog thiab daws cov teeb meem ntawd, thiab lawv tsis nug txog los sis tsis tshuaj xyuas seb tib neeg ua lawv tej dej num li cas. Vim li cas lawv thiaj li tsis nug los sis tshuaj xyuas tej no? Lawv xav tias yog lawv tshuaj xyuas tej ntawd, ces yuav muaj ntau qhov teeb meem tos kom lawv daws, thiab qhov ntawd yuav ua rau txhawj xeeb dhau. Yog lawv pheej yuav tsum tau daws cov teeb meem tas li ces ua neej sab dhau lawm! Yog lawv txhawj xeeb heev dhau lawm, ces lawv yuav noj mov tsis qab, thiab lawv yuav pw tsis tsaug zog zoo, lawv cev nqaij daim tawv yuav sab, thiab yog li ntawd ua neej yuav muaj kev txom nyem siab. Vim li ntawd, thaum lawv pom ib qho teeb meem, lawv zam thiab tsis quav ntsej txog qhov teeb meem ntawd yog lawv ua tau. Qhov teeb meem ntawm hom neeg no yog dab tsi? (Lawv tub nkeeg dhau lawm.) Qhia Kuv seb, cov twg muaj teeb meem loj dua: cov neeg tub nkeeg, los sis cov neeg uas lub peev xwm tsis zoo? (Cov neeg tub nkeeg.) Vim li cas cov neeg tub nkeeg thiaj li muaj teeb meem loj? (Cov neeg uas lub peev xwm tsis zoo ua tsis tau cov thawj coj los sis cov neeg ua hauj lwm, tiam sis lawv tuaj yeem ua tau txiaj ntsig me ntsis thaum lawv ua ib teg dej num uas nyob hauv lawv lub peev xwm. Tiam sis, cov neeg uas tub nkeeg ua tsis tau ib yam dab tsi li; txawm lawv muaj peev xwm los xij, yeej tsis muaj txiaj ntsig dab tsi.) Cov neeg tub nkeeg ua tsis tau ib yam dab tsi li. Muab zuaj zog los ua ob lo lus hais tias, lawv yog cov neeg tsis muaj txiaj ntsim; lawv muaj ib qho tuag tes tuag taw theem ob lawm. Txawm cov neeg tub nkeeg lub peev xwm yuav zoo npaum li cas los xij, qhov ntawd tsuas yog yam khoom dai kom zoo nkauj xwb; txawm lawv muaj peev xwm zoo los xij, yeej tsis muaj qab hau dab tsi li. Lawv tub nkeeg dhau lawm—lawv paub tias lawv yuav tsum ua dab tsi, tiam sis lawv tsis ua, thiab txawm lawv paub tias ib yam twg yog teeb meem los, lawv tsis nrhiav qhov tseeb los daws, thiab txawm lawv paub tias lawv yuav tsum tiv tej kev txom nyem dab tsi kom tes hauj lwm thiaj li muaj txiaj ntsig los, lawv tsis kam tiv cov kev txom nyem uas muaj nqis no—yog li ntawd lawv thiaj li tsis tau txais qhov tseeb twg li, thiab lawv ua tsis tau ib teg hauj lwm tiag tiag li. Lawv tsis xav tiv tej kev txom nyem uas tib neeg tsim nyog tiv; lawv tsuas paub ntshaw txoj kev tau zoo, xyiv fab rau lub sij hawm lom zem thiab nyob dawb, thiab xyiv fab rau lub neej uas ywj pheej thiab xis nyob xwb. Lawv tsis yog cov tsis muaj txiaj ntsim lod? Cov neeg uas tiv tsis taus kev txom nyem tsis tsim nyog ua neej nyob. Cov uas pheej xav ua neej nyob li tus cab yog cov tib neeg uas tsis muaj lub siab txawj xav los sis tsis muaj laj thawj; lawv yog cov tsiaj nyaum, thiab cov neeg zoo li no twb tsis tsim nyog ua dej num txhawb thiab. Vim lawv tiv tsis taus kev txom nyem, txawm thaum lawv ua dej num txhawb los, lawv yeej ua tsis tau kom zoo, thiab yog lawv xav tau txais qhov tseeb, qhov ntawd haj yam tsis muaj kev cia siab li. Tus neeg uas tiv tsis taus kev txom nyem thiab tsis nyiam qhov tseeb yog ib tug neeg tsis muaj txiaj ntsim; lawv twb tsis tsim nyog ua dej num txhawb thiab. Lawv yog ib tug tsiaj nyaum, tsis muaj kev ua neeg ib qho me me li. Cov neeg zoo li no yuav tsum raug muab tshem tawm; tsuas yog qhov no xwb mas thiaj li mus raws li Vajtswv tej kev npaj siab.

Ib txhia neeg saib xyuas tes hauj lwm ua liaj ua teb, thiab lawv nquag tshwj xeeb; lawv muaj ib qho kev npaj hauv lawv lub siab, thiab lawv paub tias yuav tsum ua hauj lwm dab tsi nyob rau txhua lub caij. Thaum txog caij ua liaj, lawv mus rau txhua daim liaj thiab saib. Lawv muab yam uas lawv tau npaj yuav cog rau txhua daim liaj los piv rau qhov xwm txheej tiag tiag ntawm daim liaj ntawd, thiab saib seb lawv txoj kev npaj puas haum thiab puas mus raws li qhov xwm txheej tiag tiag. Tsis tas li ntawd xwb, lawv saib seb xyoo no cov av noo los sis qhuav npaum li cas, yuav tsum siv chiv dab tsi, thiab haum rau kev cog dab tsi. Thaum lawv tau saib thiab lawv to taub txog tej no lawm, lawv mam li nug tam sim ntawd txog qhov seb puas tau ua cov yub thiab ua tau ntau npaum li cas lawm, ces lawv mus rau hauv lub tsev ua yub mus saib thiab saib seb tus neeg ua yub ntawd puas yog tus uas tso siab tau los sis lawv puas yuav ua rau cov yub ntawd puas tsuaj. Yog ib tug neeg ua tsis tau tes hauj lwm no, lawv yuav muab lwm tus neeg los koom tes nrog tus neeg ntawd, thiab kom nkawv ib leeg saib xyuas ib leeg. Cov neeg tub nkeeg puas yuav ua li no? Lawv yuav tsis ua li no. Yog tsis muaj leej twg saib xyuas lawv thiab hais rawv lawv, ces lawv yeej yuav tsis mus rau qhov chaw ua hauj lwm kiag ntawm lawv tus kheej li; yog Vajtswv lub tsev tsis nug txog qhov kev nce qib ntawm ib teg hauj lwm, ces lawv yeej yuav tsis pib mus tshuaj xyuas qhov xwm txheej tiag tiag ntawm tes hauj lwm ntawd hlo li. Rau cov neeg uas lub peev xwm tsis zoo ntawd mas, txawm lawv ua dab tsi los xij, lawv ib txwm ua kiag ntawm lawv tus kheej, tiam sis lawv tsis muaj peev xwm cais tias dab tsi yog qhov maj ceev thiab tseem ceeb ntawm qhov tsis maj ceev thiab tsis tseem ceeb, ces lawv tsuas ua yam dig muag ntsuav xwb. Hos cov neeg tub nkeeg no mas ntse txaus, thiab txawm lawv ua dab tsi los xij, lawv tsuas nyiam siv qhov ncauj hais thiab txib kom lwm tus ua tes hauj lwm ntawd xwb; lawv yeej tsis ua ib yam dab tsi kiag ntawm lawv tus kheej li, thiab lawv ua tsis tau tes hauj lwm tiag tiag li. Lawv xav tias, “Kuv tsuas yuav tsum tau hu xov tooj los sis sau ntawv mus nug qee cov lus nug xwb, ces kuv tes hauj lwm tiav lawm, qhov teeb meem raug daws lawm. Qhov no ua rau kuv yooj yim heev! Saib seb kuv lub peev xwm uas ua ib tug thawj coj zoo li cas. Kuv tuaj yeem ua tes hauj lwm tiav uas tsuas hais ob peb lo lus xwb—qhov no tsis yog kuv tab tom ua kuv tej luag hauj lwm kom tiav lod? Kuv tsis tau tsis ua kuv tej luag hauj lwm. Yog tus Nyob Saud nug kuv txog tej no, kuv tuaj yeem teb tau npliag heev thiab piav tau meej heev. Qhov mus saib rau ntawm qhov chaw ua hauj lwm ntawd muaj qab hau dab tsi? Kuv tseem yuav tau tiv kev txom nyem thiab kev sab, thiab kuv cov tawv nqaij yuav dub vim raug tshav ntuj. Tsis tas yuav ua li qhov ib txwm ua li ntawd. Yog kuv txuag tau kuv tus kheej kom txhob raug kev nyuaj ces qhov ntawd yog qhov kuv yuav ua. Tsis tas yuav ua kom nyuaj rau kuv tus kheej li.” Lawv tsis “ntse” txaus lod? Thaum hom tib neeg no ua hauj lwm mas, tshwj xeeb lawv txawj siv tswv yim ua kom dhau, nrhiav kev los txiav kom luv kom thiaj li ua tau raws li lawv tej hom phiaj, thiab lawv muaj lawv txoj hau kev thiab tswv yim. Lawv tsis ua ib yam dab tsi kiag ntawm lawv tus kheej li, thiab lawv tsis koom nrog ib yam dab tsi li. Lawv tsuas hu xov tooj mus nug, lam ua kom dhau sab nraud xwb, thiab kiag thaum lawv muab xov tooj khwb, ces lawv mus pw los sis mus zuaj ib ce thiab pib txaus siab rau kev tau zoo ntawm lawv lub cev nqaij daim tawv lawm. Hom neeg no yeej paub tias yuav “ua hauj lwm” li cas tiag tiag, lawv yeej paub tias yuav nrhiav cib fim los nyob dawb li cas tiag tiag, thiab lawv yeej paub tias yuav lam ua kom dhau sab nraud thiab dag tib neeg li cas tiag tiag! Lawv muaj lub peev xwm me ntsis ntawd muaj qab hau dab tsi? Lawv zoo ib yam li cov nom tswv hauv lub teb chaws ntawm Pab Koom Tsham, uas tom qab lawv mus txog tom chaw ua hauj lwm ces tsuas haus dej tshuaj yej thiab nyeem ntawv xov xwm, thiab pib xav txog tias lawv yuav noj dab tsi thiab lawv yuav mus ua si qhov twg ua ntej txog sij hawm so hauj lwm—lub neej yeej zoo rau lawv tiag tiag. Qhov no yog lub hauv paus ntsiab lus uas hom thawj coj cuav no ua raws thaum ua lawv tes hauj lwm; lawv tsis tiv kev txom nyem, lawv tsis tiv kev sab, tiam sis lawv tseem ua ib tug nom tswv thiab txaus siab rau tej txiaj ntsim ntawm lub meej mom, thiab cov kwv tij thiab cov muam feem coob tsis muaj peev xwm pom tias qhov no yog ib qho teeb meem. Qhov no yog txoj kev uas hom thawj coj cuav no ua hauj lwm, lawv tsis ua tes hauj lwm tiag tiag, thiab lawv tsis mus rau ntawm qhov chaw ua hauj lwm es taug qab thiab tshuaj xyuas tes hauj lwm li, yog li ntawd lawv puas tuaj yeem nrhiav pom cov teeb meem hauv tes hauj lwm? (Tsis tuaj yeem.) Cov thawj coj cuav uas ua txuj ua neeg ntawm sab ntsujplig thiab cov thawj coj cuav uas lub peev xwm tsis zoo ntawd yog cov dig muag yam rua muag plias, thiab lawv tsis tuaj yeem pom cov teeb meem, yog li ntawd hom neeg uas tsis muaj txiaj ntsim no ne? Lawv hais tias, “Kuv tsis koom rau tes hauj lwm tiag tiag, thiab kuv tus kheej tsis mus rau ntawm qhov chaw ua hauj lwm mus koom nrog cov neeg ua hauj lwm ntawd, yog li ntawd yog muaj teeb meem tshwm tuaj ces nej hais tsis tau tias kuv dig muag yam rua muag plias. Kuv tsis tau mus rau ntawm qhov chaw ua hauj lwm thiab kuv tsis tau pom cov teeb meem, yog li ntawd yog muaj teeb meem tshwm tuaj, qhov ntawd muaj feem xyuam dab tsi rau kuv? Koj yuav tsum mus nrhiav cov neeg uas muaj feem xyuam.” Cov neeg no tsis txawj dag thiab ntxias heev li lod? Lawv xav tias txhua yam uas lawv yuav tsum ua tsuas yog muab lus txib thiab npaj tib neeg kom zoo xwb, ces tag li ntawd, thiab tom qab ntawd lawv tej luag hauj lwm tau ua tiav lawm thiab lawv tuaj yeem xyiv fab rau lawv lub sij hawm so thiab kev lom zem yam tsis paub txaj muag. Txawm hais tias muaj tej teeb meem dab tsi nyob hauv qab los xij, lawv tsis nug txog, thiab lawv tsuas maj nroos mus saib xyuas ib qho teeb meem yog tias muaj neeg qhia tawm rau tus Nyob Saud xwb. Txhua hnub lawv tsuas tsom ntsoov rau kev txaus siab rau tej txiaj ntsim ntawm lub meej mom, taug kev ua si mus txhua qhov chaw, ua txuj li tshuaj xyuas tes hauj lwm, tiam sis lawv yeej tsis mus rau qhov chaw uas muaj teeb meem tiag tiag li, thiab lawv yeej tsis tshuaj xyuas tes hauj lwm tseem ceeb li—qhov no tsis yog zoo ib yam li Pab Koom Tsham cov nom tswv uas ib txwm ua hauj lwm sab nraud thiab tsuas ua tes hauj lwm kom tau ntsej muag xwb lod? Lawv cog tej lus zoo zoo tseg los ua tes hauj lwm uas muab rau lawv, tiam sis lawv tsis taug qab txog tes hauj lwm ntawd los sis tsis saib xyuas tes hauj lwm ntawd, thiab txawm hais tias lawv mus rau ntawm qhov chaw ua hauj lwm los, lawv tsuas ua kom dhau kab ke xwb. Lawv yeej yuav tsis ua tes hauj lwm kiag ntawm lawv tus kheej los sis daws cov teeb meem kiag ntawm lawv tus kheej li. Lawv xav tias, “Tsis tas kuv yuav tiv kev txom nyem thiab them tus nqi los ua tej no. Tsuav muaj neeg ua tej ntawd xwb ces txaus lawm. Txawm li cas los kuv yeej tsis tau nyiaj, yog li ntawd tsuav ua tau hnub dhau hnub xwb ces tau lawm.” Lawv puas tuaj yeem ua lawv tes hauj lwm kom zoo thaum lawv muaj txoj kev xav no? Lawv muaj ib qho kev npaj me me hauv lawv lub siab, xav tias, “Kuv noj npaum cas ces ua npaum li ntawd xwb, thiab kuv yuav ua dog ua dig hnub dhau hnub xwb.” Tiam sis lawv yeej tsis ua tes hauj lwm tiag tiag li, thiab yeej tsis pom lawv nyob rau ntawm qhov chaw ua hauj lwm li. Yog li ntawd, lawv nyob qhov twg? Lawv tab tom xyiv fab nyob hauv ib qho chaw zoo nkauj thiab muaj kev nyab xeeb uas lawv tuaj yeem noj, haus, thiab pw tau zoo, lawv ua neej nyob cuag li ib tug tub huab tais—teem sij hawm da dej, teem sij hawm zuaj ib ce, thiab teem sij hawm hloov khaub ncaws—thiab lawv tsis tiv ib qho kev txom nyem li. Lawv yeej tsis thim xav tias lawv tuaj yeem ua tau tes hauj lwm dab tsi tiag tiag, thiab daws tau tej teeb meem tiag tiag twg, lawv tau ua dab tsi los pab rau Vajtswv lub tsev tes hauj lwm, thiab lawv muaj cai dab tsi xyiv fab rau tag nrho tej yam zoo zoo no—lawv yeej tsis xav txog tej no hlo li. Cov neeg no yog yam dab tsi? Cov neeg tsis tsim txiaj no tsis paub txog lawv tus kheej, lawv yog cov neeg tsis paub txaj muag, thiab lawv tsis tsim nyog ua cov thawj coj thiab cov neeg ua hauj lwm hauv pawg ntseeg.

Tag nrho cov thawj coj cuav yeej ib txwm tsis ua tes hauj lwm tiag tiag. Lawv coj zoo li lawv lub luag hauj lwm ua thawj coj ntawd yog ib txoj hauj lwm nom tswv, es xyiv fab rau tej txiaj ntsim ntawm lub meej mom xwb, thiab lawv saib tes dej num uas lawv yuav tsum ua thiab tes hauj lwm uas lawv yuav tsum ua li ib tug thawj coj ntawd zoo li yog ib lub nra hnyav, zoo li yog ib qho meem txom. Nyob hauv lawv lub siab, lawv muaj kev tawm tsam puv npo rau pawg ntseeg tes hauj lwm: Thaum hais kom lawv saib xyuas tes hauj lwm thiab kawm paub seb muaj teeb meem dab tsi uas yuav tsum tau taug qab thiab daws, lawv yeej tsis txaus siab hlo li. Qhov no yog tes hauj lwm uas cov thawj coj thiab cov neeg ua hauj lwm yuav tsum ua, qhov no yog lawv txoj hauj lwm. Yog koj tsis ua thiab koj tsis txaus siab ua, ces vim li cas koj thiaj li tseem xav ua ib tug thawj coj los sis ib tug neeg ua hauj lwm? Koj ua koj tes dej num kom ua tib zoo xav txog Vajtswv tej kev npaj siab, los sis kom tau ua ib tug nom tswv thiab txaus siab rau tej txiaj ntsim ntawm lub meej mom xwb? Yog koj tsuas ua ib tug thawj coj kom koj thiaj li tau tuav ib lub meej mom nom tswv xwb, qhov ntawd tsis yog tsis paub txaj muag me ntsis lod? Hom neeg zoo li no muaj tus cwj pwm qis tshaj plaws, tsis muaj meej mom, thiab tsis paub txaj muag li. Yog koj xav xyiv fab rau txoj kev tau zoo ntawm lub cev nqaij daim tawv, ces koj kav tsij rov qab mus rau lub ntiaj teb, thiab sib tw, siv zog txeeb, thiab txeeb li koj muaj peev xwm ua tau, thiab yuav tsis muaj leej twg cuam tshuam qhov ntawd. Vajtswv lub tsev yog ib qho chaw rau cov neeg Vajtswv xaiv tseg ua lawv tej dej num thiab pe hawm Nws; qhov ntawd yog ib qho chaw rau tib neeg caum qhov tseeb thiab tau txais txoj kev cawm dim. Qhov ntawd tsis yog ib qho chaw rau leej twg los ntshaw txoj kev tau zoo ntawm lub cev nqaij daim tawv, thiab haj yam tsis yog ib qho chaw uas tso cai rau tib neeg ua neej nyob cuag li cov tub huab tais. Cov thawj coj cuav tsis paub txaj muag, lawv tsis muaj kev txaj muag hlo li, thiab lawv tsis muaj laj thawj. Txawm muab tes hauj lwm ntxaws ntxaws dab tsi rau lawv los xij, lawv tsis saib qhov ntawd tseem ceeb, thiab lawv muab tso rau ib sab es tsis quav ntsej; txawm hais tias lawv tej lus teb mas zoo mloog kawg los, lawv tsis ua ib yam dab tsi tiag tiag li. Qhov no tsis yog tsis muaj kev coj ncaj ncees lod? Tsis yog lawv tsis ua tes hauj lwm tiag tiag xwb, tiam sis lawv kuj xav tuav hwj chim ib leeg xwb—kom muaj hwj chim tswj nyiaj txiag, neeg ua hauj lwm, thiab tag nrho lwm yam rau hauv lawv tus kheej ob txhais tes, thiab kom tib neeg qhia txog tes hauj lwm rau lawv txhua hnub. Hais txog tej yam no mas, lawv ho rau siab kawg li. Thaum txog lub sij hawm rau lawv los qhia tawm txog tes hauj lwm rau tus Nyob Saud mas, lawv muab cov txiaj ntsig ntawm tag nrho tes hauj lwm uas cov kwv tij thiab cov muam ua ntawd los rau lawv tus kheej kom tus Nyob Saud thiaj li ntseeg yuam kev tias lawv tau ua tes hauj lwm zoo kawg, tiam sis qhov tseeb tiag mas yog lwm tus ua tag nrho xwb. Kev tshaj tawm txoj moo zoo tau txais pes tsawg tus neeg los, cov neeg twg raug txhawb thiab tab tom raug cob qhia, cov neeg twg raug rho tawm hauv lawv tes hauj lwm, cov neeg twg raug ntsaig tawm mus, thiab ntau yam ntxiv—tsis muaj ib qho ntawm cov hauj lwm ntxaws ntxaws no yog lawv ua li, tiam sis lawv tseem muaj ntsej muag los qhia txog tej ntawd thiab. Cov neeg no tsis yog tsis muaj kev txaj muag hlo li lod? Tsis yog lawv tab tom ua kev dag ntxias lod? Cov neeg zoo li no mas txawj dag thiab txawj ntxias dhau lawm! Lawv xav tias lawv tus kheej ntse—qhov no yeej yog ib qho uas lawv raug lawv tus kheej tej kev ntse ua puas tsuaj, thiab thaum kawg lawv ua rau lawv tus kheej raug muab nthuav tawm thiab raug muab tshem tawm xwb. Ib txhia neeg tsis hais ua tes hauj lwm dab tsi los sis ua tes dej num dab tsi los xij, lawv tsis muaj peev xwm ua tau, lawv ris tsis taus, thiab lawv tsis muaj peev xwm ua tau ib qho ntawm cov hauj lwm los sis kev ris lub luag hauj lwm uas ib tug neeg tsim nyog ua kom tiav. Lawv tsis yog cov khoom seem txheej lod? Lawv puas tsim nyog raug hu ua tib neeg? Tshwj cov neeg ruam, cov neeg puas hlwb, thiab cov uas muaj kev tuag tes tuag taw lawm, puas muaj leej twg uas tseem ciaj sia nyob es tsis ua lawv tej dej num thiab tsis ua lawv tej luag hauj lwm kom tiav? Tiam sis hom tib neeg no pheej txawj ntxias thiab tub nkeeg, thiab tsis xav ua lawv tej luag hauj lwm kom tiav; qhov no txhais tau tias lawv tsis xav ua ib tug neeg kom tsim nyog. Vajtswv muab cib fim rau lawv ua ib tug neeg, thiab Nws muab peev xwm thiab khoom pub rau lawv, tiam sis lawv tsis tuaj yeem siv tej no los ua lawv tes dej num. Lawv tsis ua dab tsi li, tiam sis lawv xyiv fab rau txoj kev tau zoo txhua lub sij hawm. Ib tug neeg zoo li no puas tsim nyog raug hu ua tib neeg? Txawm muab tes hauj lwm dab tsi rau lawv ua los xij—txawm tes hauj lwm ntawd yuav tseem ceeb los sis dog dig, nyuaj los sis yooj yim—lawv ib txwm ua dog ua dig thiab ua yam tub nkeeg ntsuav xwb. Thaum muaj teeb meem tshwm tuaj, lawv muab lub txim thawb rau lwm tus neeg, lawv tsis ris dab tsi li, thiab lawv xav ua lawv lub neej li tus cab mus ntxiv. Lawv tsis yog kiag cov khoom seem txheej lod? Nyob hauv lub zej zog, leej twg thiaj li yuav tsum tsis tau vam khom lawv tus kheej los khwv noj khwv haus? Thaum ib tug neeg loj hlob lawm, lawv yuav tsum yug lawv tus kheej. Lawv niam lawv txiv twb ua lawv lub luag hauj lwm tiav lawm. Txawm hais tias lawv niam lawv txiv txaus siab yug lawv los, lawv yuav tsis kaj siab rau qhov ntawd. Lawv yuav tsum muaj peev xwm paub tias lawv niam lawv txiv twb ua lawv txoj num yug lawv kom loj hlob tiav lawm, thiab tias lawv yog ib tug neeg loj uas muaj lub cev khov kho, thiab yuav tsum muaj peev xwm ua neej nyob tau ntawm lawv tus kheej. Qhov no tsis yog qhov laj thawj tsawg tshaj plaws uas ib tug neeg loj yuav tsum muaj lod? Yog ib tug neeg twg muaj laj thawj tiag tiag, lawv yeej yuav ua tsis tau neej vam khom lawv niam lawv txiv mus ntxiv; lawv yuav ntshai lwm tus luag, ntshai poob ntsej muag. Yog li ntawd, tus uas nyiam kev tau zoo thiab ntxub kev ua hauj lwm hnyav puas muaj laj thawj? (Tsis muaj.) Lawv pheej xav tau ib yam dab tsi yam tsis tau ua hauj lwm li; lawv xav kom tsis txhob tau ua ib lub luag hauj lwm twg li, xav kom cov khoom qab zib cia li poob saum ntuj los thiab poob rau hauv lawv lub qhov ncauj; lawv pheej xav tau noj ib hnub peb pluag, xav kom muaj neeg ua qhev rau lawv, thiab xyiv fab rau tej zaub mov thiab tej dej haus zoo yam tsis tau ua ib qho hauj lwm me me li. Qhov no tsis yog txoj kev xav ntawm ib tug cab lod? Thiab cov neeg uas yog cov cab puas muaj lub siab txawj xav thiab laj thawj? Lawv puas muaj kev coj ncaj thiab meej mom? Yeej tsis muaj hlo li. Lawv puav leej yog cov neeg tsis muaj qab hau uas nyiam noj dawb xwb, puav leej yog cov tsiaj nyaum uas tsis muaj lub siab txawj xav los sis tsis muaj laj thawj li. Tsis muaj ib tug ntawm lawv tsim nyog nyob hauv Vajtswv lub tsev li.

Yog pawg ntseeg npaj ib teg hauj lwm rau koj, thiab koj hais tias, “Txawm txoj hauj lwm ntawd puas ua rau kuv tau ntsej muag los xij—vim tau muab rau kuv lawm, kuv yuav ua kom zoo thiab ris lub luag hauj lwm no. Yog kuv raug npaj kom tos txais, ces kuv yuav siv tag nrho kuv lub zog los ua kom zoo; kuv yuav saib xyuas cov kwv tij thiab cov muam kom zoo, thiab ua kom zoo tshaj plaws kom paub tseeb tias sawv daws muaj kev nyab xeeb. Yog kuv raug npaj kom tshaj tawm txoj moo zoo, kuv yuav npaj kuv tus kheej nrog qhov tseeb thiab tshaj tawm txoj moo zoo kom zoo nrog kev hlub thiab ua kuv tes dej num kom tiav. Yog kuv raug npaj kom kawm lwm hom lus, kuv yuav muab siab mus kawm thiab siv zog kawm, thiab yuav kawm kom paub sai li sai tau, tsis pub dhau ib los sis ob xyoos, kom kuv thiaj li tuaj yeem ua tau tim khawv txog Vajtswv rau cov neeg txawv teb chaws. Yog kom kuv sau cov ntawv tim khawv, kuv yuav ua tib zoo xyaum, saib txhua yam raws li qhov tseeb tej hauv paus ntsiab lus, thiab kawm txog kev siv lus. Txawm tej zaum kuv sau tsis tau cov ntawv uas muaj cov lus zoo los xij, yam tsawg kawg kuv yeej muaj peev xwm qhia meej meej txog kuv cov lus tim khawv uas hais txog txoj kev ntsib kev pom thiab, qhia kom nkag siab txog qhov tseeb, thiab ua tim khawv tseeb rau Vajtswv, kom tib neeg thiaj li tau txais kev tsim kho thiab tau txais txiaj ntsig los ntawm qhov nyeem kuv cov ntawv. Txawm pawg ntseeg muab txoj hauj lwm dab tsi rau kuv los xij, kuv yuav ua kawg siab thiab kawg zog. Yog muaj ib yam dab tsi uas kuv tsis to taub los sis muaj teeb meem tshwm tuaj, kuv yuav thov Vajtswv, nrhiav qhov tseeb, daws tej teeb meem raws li qhov tseeb tej hauv paus ntsiab lus, thiab ua txoj hauj lwm kom zoo. Txawm kuv ua tes dej num dab tsi los xij, kuv yuav siv txhua yam uas kuv muaj los ua kom zoo thiab ua kom Vajtswv txaus siab. Txhua yam uas kuv ua tau, kuv yuav ua kom zoo tshaj plaws los ris lub luag hauj lwm uas kuv yuav tsum ris, thiab yam tsawg kawg, kuv yuav tsis ua tawm tsam kuv lub siab txawj xav thiab qhov laj thawj, los sis tsis ua dog ua dig, los sis tsis ua dag thiab tub nkeeg ntsuav, los sis ntshaw txoj kev tau zoo ntawm lwm tus txoj kev siv zog ua hauj lwm. Tsis muaj ib yam dab tsi uas kuv ua yuav qis dua tus qauv ntawm lub siab txawj xav.” Qhov no yog tus qauv qis tshaj plaws rau kev coj yus tus kheej, thiab tus uas ua lawv tes dej num zoo li no thiaj li tsim nyog ua ib tug neeg uas muaj lub siab txawj xav thiab laj thawj. Yam tsawg kawg mas koj yuav tsum muaj lub siab txawj xav uas meej thaum ua koj tes dej num, thiab yam tsawg kawg koj yuav tsum tsim nyog rau qhov ib hnub noj peb pluag es tsis txhob noj dawb xwb. Qhov no hu ua qhov muaj lub siab ris lub luag hauj lwm. Txawm koj lub peev xwm yuav siab los sis qis, thiab txawm koj to taub qhov tseeb los tsis to taub, txawm li cas los, koj yuav tsum muaj tus cwj pwm no: “Vim tes hauj lwm no tau muab rau kuv ua lawm, kuv yuav tsum saib tes hauj lwm no tseem ceeb, kuv yuav tsum muab tso rau hauv siab, thiab kuv yuav tsum siv tag nrho kuv lub siab thiab lub zog los ua kom zoo. Hais txog qhov seb kuv puas tuaj yeem ua tau zoo tshaj plaws, kuv tsis paub tseeb tsis tau, tiam sis kuv tus cwj pwm yog kuv yuav siv kawg lub zog los ua kom zoo, thiab kuv yeej yuav tsis ua dog ua dig txog qhov ntawd hlo li. Yog muaj teeb meem tshwm tuaj hauv tes hauj lwm, kuv yuav tsum ris lub txim ntawd, thiab ua kom paub tseeb tias kuv tau txais kev qhia los ntawm qhov ntawd thiab ua kuv tes dej num kom zoo.” Qhov no yog tus cwj pwm uas yog. Nej puas muaj tus cwj pwm zoo li no? Ib txhia tib neeg hais tias, “Kuv tsis tim tsum yuav ua tes hauj lwm uas muab faib rau kuv kom zoo. Kuv tsuas ua li qhov kuv ua tau xwb thiab qhov tau los thaum kawg ntawd yuav zoo li cas los kav liam. Kuv tsis tas yuav ua kom kuv tus kheej sab kiag li, los sis ua yuam kev lawm los kuv tsis tas ntxhov siab npaum li ntawd, thiab kuv tsis tas yuav ris kev nyuaj siab npaum li ntawd. Ua kom kuv tus kheej sab npaum li ntawd muaj qab hau dab tsi? Txawm li cas los xij, kuv ib txwm ua hauj lwm thiab kuv tsis noj dawb xwb.” Tus cwj pwm zoo li no rau yus tes dej num yog qhov tsis ris lub luag hauj lwm. “Yog kuv xav ua hauj lwm, kuv yuav ua me ntsis. Kuv tsuas ua li qhov kuv ua tau xwb thiab qhov tau los thaum kawg ntawd yuav zoo li cas los kav liam. Tsis tas yuav ua tiag npaum li ntawd.” Cov tib neeg zoo li no tsis muaj tus cwj pwm ris lawv tes dej num thiab lawv tsis muaj ib qho kev paub txog qhov ris lub luag hauj lwm li. Nej yog hom neeg zoo li cas? Yog nej yog hom neeg ib, ces nej yog ib tug neeg uas muaj laj thawj thiab kev ua neeg. Yog nej yog hom neeg ob, ces nej yeej tsis txawv ntawm hom thawj coj cuav uas Kuv nyuam qhuav soj ntsuam ntawd li. Nej tsuas ua neej nyob hnub dhau hnub yam tsis muaj nqis li. “Kuv yuav zam kev sab thiab kev txom nyem thiab tsuas xyiv fab rau kev tau zoo kom ntau ntxiv. Txawm hais tias muaj ib hnub kuv raug rho tawm los, kuv yuav tsis poob ib yam dab tsi li. Yam tsawg tshaj plaws mas kuv yuav tau xyiv fab rau tej txiaj ntsim ntawm lub meej mom ob peb hnub lawm, qhov ntawd tsis yog ib qho kev poob peev rau kuv. Yog kuv raug xaiv los ua ib tug thawj coj, kuv yuav ua li ntawd ntag.” Koj xav li cas txog hom neeg no txoj kev xav? Cov neeg zoo li no yog cov tsis ntseeg uas yeej tsis caum qhov tseeb kiag li. Yog koj muaj lub siab ris lub luag hauj lwm tiag tiag, ces qhov ntawd qhia tau tias koj muaj lub siab txawj xav thiab laj thawj. Tsis hais tes hauj lwm yuav loj los sis me npaum li cas, tsis hais leej twg muab tes hauj lwm ntawd rau koj, txawm Vajtswv lub tsev tso rau koj los sis ib tug thawj coj los sis ib tug neeg ua hauj lwm hauv pawg ntseeg muab rau koj los xij, koj tus cwj pwm yuav tsum yog: “Vim tes dej num no tau muab rau kuv lawm, qhov ntawd yog Vajtswv txoj kev txhawb tsa thiab hmoov hlub. Kuv yuav tsum ua kom zoo raws li qhov tseeb tej hauv paus ntsiab lus. Txawm hais tias kuv lub peev xwm nruab nrab los, kuv txaus siab ris lub luag hauj lwm no thiab siv tag nrho kuv lub zog los ua kom zoo. Yog kuv ua tsis zoo, kuv yuav tsum ris lub txim ntawd, thiab yog kuv ua tau zoo, qhov no tsis yog kuv li txiaj ntsig. Qhov no yog qhov kuv yuav tsum ua.” Vim li cas Kuv thiaj li hais tias qhov uas ib tug neeg coj rau lawv tes dej num li cas ntawd mas yog ib qho teeb meem ntawm lub hauv paus ntsiab lus? Yog koj muaj lub siab ris lub luag hauj lwm tiag tiag thiab yog ib tug neeg ris lub luag hauj lwm, ces koj yuav muaj peev xwm ris tau pawg ntseeg tes hauj lwm thiab ua tau tes dej num uas koj yuav tsum ua kom tiav. Yog koj saib koj tes dej num tsis tseem ceeb, ces koj txoj kev xam pom txog kev ntseeg Vajtswv tsis yog lawm, thiab koj tus cwj pwm rau Vajtswv thiab koj tes dej num ntawd muaj teeb meem lawm. Koj txoj kev xam pom txog kev ua koj tes dej num yog ua dog ua dig thiab tsuas lam ua kom dhau tau xwb, thiab txawm tes dej num ntawd yog ib yam uas koj txaus siab ua los tsis txaus siab ua, ib yam uas koj txawj los tsis txawj los xij, koj ib txwm ua nrog tus cwj pwm uas tsuas lam ua kom dhau tau xwb, yog li ntawd koj tsis haum ua ib tug thawj coj los sis ib tug neeg ua hauj lwm thiab koj tsis tsim nyog ua pawg ntseeg tes hauj lwm. Tsis tas li ntawd xwb, muab hais ncaj ncaj tias, cov tib neeg zoo li koj tsis muaj qab hau dab tsi li, raug teem tseg los ua tsis tau ib yam dab tsi tiav li, thiab tsuas yog cov neeg tsis muaj txiaj ntsim xwb. Cov neeg tsis muaj txiaj ntsim ntawd yog hom neeg dab tsi? Cov neeg feeb tsis meej, cov neeg ua neej nyob hnub dhau hnub yam tsis muaj nqis. Hom neeg zoo li no tsis ris lub luag hauj lwm hauv txhua yam uas lawv ua, thiab lawv tsis ua tiag tiag; lawv ua rau txhua yam ntxhov quav niab. Lawv tsis quav ntsej koj cov lus txawm koj yuav qhia txog qhov tseeb li cas los xij. Lawv xav tias, “Kuv yuav lam ua kom dhau li no yog kuv xav ua. Koj xav hais dab tsi los hais! Txawm li cas los xij, tam sim no kuv tab tom ua kuv tes dej num thiab kuv muaj zaub mov noj, qhov ntawd xwb zoo txaus lawm. Yam tsawg tshaj plaws mas kuv tsis tas yuav ua ib tug thov khawv. Yog muaj ib hnub kuv tsis muaj dab tsi noj, kuv mam li xav txog qhov ntawd thaum ntawd. Ntuj yeej ib txwm tseg ib txoj kev tawm rau tib neeg. Koj hais tias kuv tsis muaj lub siab txawj xav los sis laj thawj, thiab tias kuv ruam feeb tsis meej—ho ua li cas? Kuv tsis tau ua txhaum txoj cai. Yam ntau kawg, kuv tsuas muaj tus cwj pwm tsis zoo me ntsis xwb, tiam sis qhov ntawd tsis yog kev poob rau kuv. Tsuav kuv muaj zaub mov noj xwb, ces tsis ua li cas.” Txoj kev xam pom no zoo li cas? Kuv qhia rau koj tias, cov neeg ruam feeb tsis meej zoo li no uas ua neej nyob hnub dhau hnub yam tsis muaj nqis ntawd puav leej raug teem tseg tias yeej yuav raug tshem tawm, thiab yeej tsis muaj txoj kev uas lawv yuav tau txais txoj kev cawm dim li. Txhua tus uas ntseeg Vajtswv ntau xyoos tiam sis yeej tsis lees txais qhov tseeb hlo li thiab tsis muaj cov lus tim khawv uas hais txog txoj kev ntsib kev pom yuav raug muab tshem tawm mus. Yuav tsis muaj ib tug ciaj sia nyob li. Cov niag khoom seem txheej thiab cov neeg tsis muaj txiaj ntsim puav leej yog cov uas noj dawb thiab lawv raug teem tseg tias yuav raug muab tshem tawm mus. Yog cov thawj coj thiab cov neeg ua hauj lwm tsuas yog cov uas noj dawb xwb, lawv haj yam yuav tsum raug muab rho tawm thiab tshem tawm mus. Cov tib neeg ruam feeb tsis meej zoo li no tseem xav ua cov thawj coj thiab cov neeg ua hauj lwm; lawv tsis tsim nyog! Lawv tsis ua ib teg hauj lwm tiag tiag li, tiam sis lawv xav ua cov thawj coj. Lawv yeej tsis paub txaj muag tiag tiag!

Tom qab qee cov thawj coj thiab cov neeg ua hauj lwm raug rho tawm hauv lawv tes hauj lwm lawm, lawv hais tias, “Qhov uas tsis ua ib tug thawj coj los sis ib tug neeg ua hauj lwm mas zoo tiag tiag. Kuv tsis tas yuav txhawj xeeb los sis ua kom kuv tus kheej nyuaj npaum li ntawd lawm. Qhov ua ib tug kwv tij los sis ib tug muam dog dig ntawd mas zoo kawg. Vim li cas kuv thiaj li yuav tsum ua kom kuv tus kheej nyuaj nrog qhov ntawd? Kuv lub peev xwm tsis yog muaj los ua kom kuv tus kheej sab.” Lwm tus neeg hais rau lawv tias, “Tam sim no koj tsis yog ib tug thawj coj los sis ib tug neeg ua hauj lwm lawm, koj yuav ua dab tsi?” Lawv teb tias, “Kuv ua dab tsi los yeej tau, tsuav kom tsis sab dhau thiab tsis siv zog ntau xwb—ib yam dab tsi uas yog taug kev thiab saib ib puag ncig, los sis zaum thiab tham los sis saib khoos phis tawj, thiab tsis tas yuav siv sij hawm ntev heev los sis lub cev nqaij daim tawv tsis tiv kev txom nyem xwb ces yeej tau lawm.” Qhov no yog hom lus dab tsi? Yog nej pom tias tus thawj coj los sis tus neeg ua hauj lwm uas nej xaiv ntawd yog ib niag zoo li no, nej lub siab yuav hnov zoo li cas? Nej yuav tsis khuv xim heev lod? (Khuv xim.) Yog li ntawd, nej puas yuav muaj kev xav txog qhov no? Koj yuav hais tias, “Thaum xub thawj, kuv pom tias koj muaj peev xwm me ntsis thiab kuv xav txhawb thiab cob qhia koj, thiab muab cib fim rau koj, kom koj thiaj li to taub qee qhov tseeb ntxiv. Kuv yeej tsis xav tias koj yuav tsis muaj qab hau dab tsi li. Kuv khuv xim uas thaum ntawd kuv saib koj yam li ib tug tib neeg. Kuv yeej xav tsis txog tias koj tsis yog tib neeg hlo li. Koj haj yam qis dua li ib tug npua los sis ib tug dev thiab, koj yog khoom seem txheej xwb. Koj tsis tsim nyog hnav daim tawv neeg no, thiab koj tsis tsim nyog ua ib tug neeg!” Cov lus no puas yog tsis zoo mloog? (Tsis yog.) Cov lus no tsis yog tsis zoo mloog rau nej, tiam sis cov lus no tsis yog tsis zoo mloog rau hom khoom seem txheej no lod? (Yog.) Hom khoom seem txheej no puas muaj ib lub siab? (Tsis muaj.) Yog li lawv puas paub tias lwm tus tab tom hais lus zoo los sis lus phem txog lawv? Thaum cov neeg uas tsis muaj lub siab ntsib ib yam dab tsi, lawv yuav tsis hloov lawv tus cwj pwm uas ua neej nyob hnub dhau hnub yam tsis muaj nqis ntawd li. Lawv xav tias tsuav lawv tus kheej tau txais txiaj ntsim thiab tau yam zoo thiab xis nyob xwb ces tsis ua li cas. Yog li ntawd txawm lwm tus yuav hais dab tsi los xij, lawv tsis quav ntsej. Cov lus uas lawv nquag hais yog: “Txawm koj yuav hais dab tsi, txawm koj yuav saib kuv los sis ntsuas kuv li cas, los sis koj yuav txiav txim los sis yuav saib xyuas kuv li cas los xij, kuv tsis quav ntsej!” Cov neeg no tsis yog khoom seem txheej lod? Txawm koj yuav hais dab tsi los, lawv yeej tsis muaj kev hnov dab tsi li thiab lawv tsis muab tso rau hauv siab. Vim li cas lawv thiaj li tsis muab tso rau hauv siab? Lawv tsuas yog cov neeg uas nyob dawb xwb, thiab lawv tsis muaj ib lub siab li. Cov neeg uas tsis muaj lub siab mas yeej tsis muaj meej mom los sis kev coj ncaj, lawv tsis quav ntsej txog txhua yam uas koj hais, thiab txawm koj yuav hais lus hnyav npaum li cas rau lawv los xij, lawv yuav tsis hnov mob hauv lawv lub siab li. Tsuas yog cov uas muaj meej mom, kev coj ncaj, thiab laj thawj xwb thiaj li yuav mob thiab hnov zoo li lawv lub siab raug nkaug thaum lawv hnov cov lus zoo li no. Lawv yuav hais tias, “Qhov ntawd yog ib txoj kev coj uas qis heev rau tus kheej, qhov ntawd ua rau tib neeg saib tsis taus kuv, thiab kuv poob kuv lub meej mom, yog li ntawd kuv yuav tsis ua li ntawd ntxiv lawm. Kuv xav nrhiav kom tau kuv lub meej mom rov qab thiab tsis ua rau tib neeg saib tsis taus kuv. Kuv yuav siv zog nrhiav kuv lub meej mom rov qab los, thiab kuv yuav ua txhua yam kom ua neej nyob muaj meej mom thiab ua kom Vajtswv txaus siab.” Lawv muaj ib qho kev paub txog thaum hais txog cov lus uas ua rau lawv lub meej mom puas thiab raug lawv lub siab, ntawm qhov chaw qaug zog—cov no yog cov neeg uas muaj lub siab. Thaum cov uas muaj kev xav thiab muaj meej mom hnov cov lus uas yog thiab pom tej yam uas zoo thiab paub cais tias dab tsi yog thiab dab tsi tsis yog, lawv muaj kev txiav txim siab hloov pauv vim lawv muaj meej mom, thiab lawv tsis xav kom lwm tus saib tsis taus lawv. Cov neeg nyob dawb thiab cov neeg tsis muaj txiaj ntsim ntawd tsis muaj meej mom, yog li ntawd txawm koj yuav hais dab tsi rau lawv los xij, txawm koj cov lus yuav yog los sis raug npaum li cas los sis mus raws li qhov tseeb npaum li cas, los sis koj cov lus yuav yog tej yam zoo npaum li cas los xij, tej ntawd yeej tsis cuam tshuam rau cov neeg no thiab yeej tsis chwv lawv lub siab hlo li. Ib tug neeg uas tsis muaj meej mom yeej tsis muaj kev hnov txog txhua yam zoo, txhua qhov kev txiav txim, los sis txhua qhov kev qhia tshwm hlo li, thiab lawv tsis muaj tus cwj pwm uas yog txog qhov tias yuav xaiv txoj kev ua neej zoo li cas. Yog vim li ntawd, txawm koj yuav hais dab tsi rau lawv, txawm koj yuav qhia tshwm los sis txiav txim rau lawv li cas los xij, lawv yeej tsis kam lees txais kiag li, thiab lawv tsis quav ntsej. Yog li ntawd, qhov qhuab qhia txog qhov tseeb thiab cov lus qhuab qhia rau hom neeg zoo li no puas muaj qab hau dab tsi? Qhov ntuas lawv puas muaj qab hau dab tsi? Qhov txiav txim thiab rau txim rau lawv puas muaj qab hau dab tsi? Tsis muaj! Cov neeg zoo li no yeej tsis muaj txiaj ntsim li. Lawv lam ua kom dhau hnub xwb, thiab lawv nyob rau hauv pab tsiaj nyaum—muab hais kom meej kiag ces, lawv tsis yog tib neeg. Lawv tsis tsim nyog hnov Vajtswv cov lus. Yog cov neeg tsis muaj txiaj ntsim, cov niag cab no, tau los ua cov thawj coj pawg ntseeg, lawv puas tuaj yeem nrhiav pom tej teeb meem uas muaj nyob hauv pawg ntseeg? Lawv puas tuaj yeem daws tau tej teeb meem? Yeej tsis tau li. Yog cov neeg Vajtswv xaiv tseg nug ib qho teeb meem, lawv puas tuaj yeem daws tau? Lawv yeej daws tsis tau kiag li. Lawv tsis muaj peev xwm daws tau ib qho teeb meem li, yog li ntawd lawv yuav ua tau tes hauj lwm thawj coj li cas? Qhov ntawd yeej xav tsis txog li! Ua cov thawj coj thiab cov neeg ua hauj lwm, yam tsawg tshaj plaws mas tib neeg yuav tsum muaj peev xwm daws cov teeb meem uas muaj nyob hauv pawg ntseeg tes hauj lwm thiab cov teeb meem uas muaj nyob rau hauv txoj kev nkag mus rau hauv lub neej txoj sia ntawm cov neeg Vajtswv xaiv tseg. Yog lawv xyaum tau ib ntus, muaj kev ntsib kev pom me ntsis, lawv kuj tuaj yeem sib qhia txog qee qhov tseeb thiab hais txog qee cov lus tim khawv uas hais txog txoj kev ntsib kev pom, ces lawv yuav maj mam muaj peev xwm ua tau tes hauj lwm thawj coj. Yog lawv tsis muaj peev xwm nrhiav pom los sis daws ib qho teeb meem li, ces yeej tsis muaj txoj kev uas lawv yuav ua tau tes hauj lwm thawj coj li; ces lawv yog cov thawj coj cuav, thiab lawv yuav tsum raug muab rho tawm, thiab yuav tsum xaiv cov thawj coj tshiab.

Cov uas ua thawj coj mas yam tsawg kawg nkaus yuav tsum to taub qhov tseeb me ntsis thiab muaj qee qhov kev ntsib kev pom tiag tiag. Yog lawv tsis muaj kev ntsib kev pom kiag li, ces lawv yeej tsis to taub qhov tseeb ib qho li. Ib txhia tib neeg ua thawj coj uas txawj qhuab qhia cov lus thiab cov kev qhuab qhia, thiab lawv tuaj yeem tau txais kev pom zoo thiab kev qhuas los ntawm tib neeg feem coob. Txawm hais tias saib sab nraud mas, cov thawj coj cuav muaj peev xwm teb tau cov lus nug los, lawv tsis muaj peev xwm sib qhia txog qhov tseeb tej hauv paus ntsiab lus. Txhua yam uas lawv qhuab qhia ntawd mas yog kev qhuab qhia uas tsis muaj ntsiab, thiab tsis muaj qhov muaj tiag kiag li. Thaum tib neeg hnov lawv cov lus qhuab qhia, lawv xav tias cov lus qhuab qhia ntawd mas haum rau lawv tus kheej qhov kev nyiam, thiab cov uas tsis muaj kev paub cais pom zoo heev rau cov lus qhuab qhia ntawd. Tiam sis tom qab ntawd, lawv tseem tsis muaj txoj hau kev xyaum ua raws thiab nrhiav tsis tau tej hauv paus ntsiab lus ntawm txoj kev xyaum ua raws. Qhov no puas tuaj yeem suav tau tias daws tej teeb meem lawm? Qhov no tsis yog lawv ua dog ua dig lod? Qhov kev daws tej teeb meem zoo li no puas suav tau tias yog ua tes hauj lwm tiag tiag? Cov thawj coj cuav tsis ua tes hauj lwm tiag tiag, tiam sis lawv paub tias yuav ua ib tug nom li cas. Thawj yam uas lawv ua thaum lawv los ua ib tug thawj coj yog dab tsi? Qhov ntawd yog kev yuav tib neeg lub siab. Lawv siv qhov hais tias “Cov nom tswv tshiab xav ua kom luag qhuas”: Ua ntej tshaj lawv ua ob peb yam los ua kom tib neeg zoo siab thiab saib xyuas ob peb yam uas ua kom txhua tus lub neej txhua hnub zoo dua. Ua ntej lawv sim ua rau tib neeg muaj kev xav zoo txog lawv, los qhia rau txhua tus tias lawv to taub cov tib neeg coob, kom txhua tus qhuas lawv thiab hais tias, “Tus thawj coj no coj rau peb ib yam li niam thiab txiv ntag!” Tom qab ntawd lawv thiaj li los tuav yam raws kev raws cai. Lawv xav tias lawv muaj kev txhawb nqa los ntawm cov neeg coob thiab lawv txoj hauj lwm tau ruaj khov lawm; ces lawv txawm pib xyiv fab rau tej txiaj ntsim ntawm lub meej mom, cuag li tej ntawd yog tej uas lawv tsim nyog tau. Lawv cov lus hais yog, “Lub neej txoj sia yog hais txog kev noj zoo thiab hnav zoo xwb,” “Lub neej txoj sia mas luv luv xwb, yog li ntawd xyiv fab rau lub neej txoj sia thaum koj tseem ua tau,” thiab “Hnub no haus hnub no cov cawv, thiab tag kis mam li txhawj txog tag kis.” Lawv xyiv fab rau txhua hnub uas los txog, lawv muaj kev lom zem thaum lawv tseem ua taus, thiab lawv tsis xav txog yav tom ntej, thiab lawv haj yam tsis xav txog tias cov thawj coj yuav tsum ua tej luag hauj lwm dab tsi thiab ua tes dej num dab tsi. Lawv tham ob peb lo lus thiab kev qhuab qhia thiab ua ob peb yam hauj lwm rau sab nraud yam li yog ib qho kev niaj hnub ua—lawv tsis ua ib qho hauj lwm tiag tiag li. Lawv tsis khawb tej teeb meem tiag tiag hauv pawg ntseeg thiab daws tej teeb meem ntawd kom tag nrho, yog li ntawd qhov uas lawv ua cov hauj lwm sab nraud zoo li ntawd muaj qab hau dab tsi? Qhov no tsis yog kev dag ntxias lod? Puas tuaj yeem tso cov hauj lwm tseem ceeb rau hom thawj coj cuav no? Lawv puas ua raws li tej hauv paus ntsiab lus thiab tej kev cheem tsum ntawm Vajtswv lub tsev thaum xaiv cov thawj coj thiab cov neeg ua hauj lwm? (Tsis mus raws.) Cov tib neeg zoo li no tsis muaj lub siab txawj xav los sis laj thawj kiag li, lawv tsis muaj lub siab ris lub luag hauj lwm kiag li, thiab txawm li ntawd los lawv tseem xav tuav qee txoj hauj lwm ua nom tswv, ua ib tug thawj coj, nyob hauv pawg ntseeg—vim li cas lawv thiaj li tsis paub txaj muag npaum li ntawd? Rau ib txhia tib neeg uas muaj lub siab ris lub luag hauj lwm, yog lawv lub peev xwm tsis zoo, ces lawv twb ua tsis tau cov thawj coj—ces tsis tas hais txog cov neeg tsis muaj txiaj ntsim uas tsis muaj lub siab ris lub luag hauj lwm kiag li ntawd; lawv haj yam tsis tsim nyog ua thawj coj. Hom thawj coj cuav uas ntshaw noj ntshaw haus thiab tub nkeeg zoo li no lawv tub nkeeg mus txog qib twg? Txawm thaum lawv pom ib qho teeb meem, thiab lawv paub tias qhov no yog ib qho teeb meem, lawv tsis saib tseem ceeb thiab tsis quav ntsej qhov teeb meem ntawd. Lawv tsis ris lub luag hauj lwm hlo li! Txawm hais tias lawv txawj hais lus thiab zoo li muaj lub peev xwm me ntsis los, lawv daws tsis tau ntau yam teeb meem hauv pawg ntseeg tes hauj lwm, ua rau tes hauj lwm nres mus tsis taus; cov teeb meem pheej tso ua pawg ntau zuj zus, tiam sis cov thawj coj no tsis quav ntsej txog tej teeb meem ntawd, thiab tuav rawv ua ob peb yam hauj lwm sab nraud yam li yog ib qho kev niaj hnub ua xwb. Thiab qhov tshwm sim los thaum kawg yog dab tsi? Lawv tsis ua rau pawg ntseeg tes hauj lwm ntxhov quav niab thiab ntxhov hnyo lod? Lawv tsis ua rau muaj kev kub ntxhov thiab kev tsis sib haum xeeb hauv pawg ntseeg lod? Qhov no yog qhov tshwm sim los uas zam tsis dhau. Nyob rau hauv qhov xwm txheej no, cov thawj coj cuav puas yuav qhia tawm mus rau tus Nyob Saud? Yeej tsis qhia tawm li. Yog muaj neeg hauv pawg ntseeg xav qhia cov thawj coj cuav tej teeb meem tawm rau tus Nyob Saud, lawv puas yuav pom zoo rau qhov no? Lawv yeej yuav tsuj nias thiab txwv tus neeg ntawd xwb xwb li, lawv yuav tsis cia leej twg qhia ib qho teeb meem tawm rau tus Nyob Saud li, thiab lawv yuav txwv, tsuj nias, thiab cais leej twg uas ua li ntawd tawm. Qhia Kuv seb, cov thawj coj cuav no tsis qias dhau lawm lod? Txawm lawv yuav ua phem rau pawg ntseeg tes hauj lwm ntau npaum li cas los xij, lawv tseem tsis pub tus Nyob Saud paub txog qhov no, tsis tas hais txog qhov cia tus Nyob Saud los daws qhov teeb meem ntawd li. Txhua yam uas lawv quav ntsej txog yog kev txaus siab rau tej txiaj ntsim ntawm lawv lub meej mom thiab tiv thaiv lawv tus kheej lub ntsej muag thiab kev khav theeb—cov neeg zoo li no qias thiab tsis paub txaj muag tshaj plaws li! Lawv tsis yog cov uas tsis muaj lub siab txawj xav thiab tsis muaj kev ua neeg kiag li lod? Thaum tus Nyob Saud nug txog tes hauj lwm, lawv hais khov kho tias tsis muaj teeb meem, lam ua kom dhau thiab dag tus Nyob Saud—ua li no, tsis yog lawv tab tom dag tus Nyob Saud thiab zais tej yam los ntawm cov nyob hauv qab lawv lod? Tej teeb meem nyob hauv pawg ntseeg tes hauj lwm tseem tso ua pawg ntau zuj zus ntxiv, thiab cov thawj coj cuav daws tsis tau tej teeb meem ntawd ntawm lawv tus kheej, tiam sis lawv kuj tsis qhia tej teeb meem no tawm rau tus Nyob Saud thiab. Nyob hauv cov xwm txheej zoo li no, lawv ua yam li tsis muaj dab tsi tshwm sim; lawv tseem txaus siab rau kev tau zoo zoo li qub, lawv zaum tsis ua dab tsi tas hnub thiab nyob dawb hnub dhau hnub, thiab lawv tsis maj kiag li. Thiab thaum tej teeb meem raug nthuav tawm thiab tus Nyob Saud tshawb xyuas txog qhov no, lawv tseem hais tias, “Kuv twb npaj neeg mus ua tes hauj lwm no lawm. Kuv tau ua kuv tej luag hauj lwm tiav lawm. Yog tes hauj lwm ua tsis tau zoo, ces qhov ntawd yog lwm tus neeg qhov txhaum. Qhov ntawd muaj feem xyuam dab tsi txog kuv?” Ntawm ob peb lo lus no xwb, lawv daws lawv tus kheej tawm ntawm kev ris lub txim tag nrho. Cuag li lawv tsis muaj kev ris rau qhov teeb meem no kiag li. Tsis yog lawv tsis tig xav txog lawv tus kheej xwb, lawv kuj xav tias lawv tsim nyog thiab nyob kaj siab, hais tias, “Txawm li cas los xij, kuv tsis tau tub nkeeg hauv kuv tes dej num li; kuv tsis yog neeg noj dawb xwb. Yog tus Nyob Saud tsis rho kuv tawm, ces kuv yuav ua thawj coj mus ntxiv. Yog kuv muab daim ntawv thov tawm, tsis yog kuv tab tom ntxeev siab rau Vajtswv lod? Tsis yog kuv tab tom qhia tshwm kev tsis ua siab ncaj rau kuv tes dej num lod?” Yog koj ntuas lawv, lawv yuav tuaj yeem nrhiav tau ntau yam laj thawj los cav nrog koj. Lawv yuav tsis hais tias lawv yuav ris qhov teeb meem no, lawv yuav tsis hais tias lawv tej luag hauj lwm yog dab tsi, thiab lawv yuav tsis thim xav txog tias lub ntsiab tseeb ntawm qhov uas lawv tsis daws teeb meem thiab tsis ua tes hauj lwm tiag tiag yog dab tsi. Hom neeg zoo li no tsis ntxim ntxub dhau lawm lod? Lawv ua rau pawg ntseeg tes hauj lwm nres mus tsis taus thiab ua phem rau cov neeg Vajtswv xaiv tseg tau ntev npaum li ntawd yam tsis muaj ib qho kev tu siab nyob hauv lawv lub siab li—lawv puas tseem yog tib neeg? Lawv puas tseem muaj lub siab txawj xav los sis laj thawj me me li? Ib txhia tib neeg hais tias, “Cov tib neeg zoo li no yuav tsum tsis txhob xaiv los ua thawj coj.” Raws li lub tswv yim mas yog li no; txawm li cas los xij, yeej muaj ib txhia neeg zoo li no nyob hauv cov thawj coj thiab cov neeg ua hauj lwm uas raug xaiv; qhov no yog qhov muaj tseeb. Qhov no tshwm sim los vim cov neeg Vajtswv xaiv tseg tsis muaj kev paub cais, thiab kuj yog vim tib neeg feem coob nyiam cov tib neeg uas ua kom lwm tus zoo siab, thiab vim li ntawd thiaj li xaiv tau ib txhia thawj coj cuav thiab neeg ua hauj lwm cuav. Yog li ntawd, ua ntej pawg ntseeg qhov kev xaiv tsa, yuav tsum tau sib qhia kom ntau ntxiv txog tej hauv paus ntsiab lus rau kev xaiv cov thawj coj thiab cov neeg ua hauj lwm, thiab tej hauv paus ntsiab lus rau kev cais cov thawj coj cuav thiab cov neeg ua hauj lwm cuav; qhov no yuav ua kom paub tseeb tias tib neeg ntau ntxiv yuav pov ntawv raws li tej hauv paus ntsiab lus. Tsuas yog los ntawm qhov kev ua li no xwb mas thiaj li yuav muaj txiaj ntsig zoo los ntawm pawg ntseeg qhov kev xaiv tsa.

Qhia Kuv seb, cov neeg nyob dawb uas qias thiab tsis paub txaj muag zoo li no puas ua tau pawg ntseeg tes hauj lwm kom zoo thaum los ua cov thawj coj thiab cov neeg ua hauj lwm? Lawv puas tuaj yeem daws tau cov teeb meem uas muaj nyob hauv pawg ntseeg los sis tej kev nyuaj uas cov neeg Vajtswv xaiv tseg tau ntsib? (Daws tsis tau.) Yog li ntawd, nej yuav tsum ua li cas thaum nej ntsib cov thawj coj cuav zoo li no? Yog muaj neeg hais tias, “Peb lub peev xwm tsis zoo thiab peb tsis muaj kev paub cais, yog li ntawd peb yeej ua tsis tau dab tsi li yog peb ntsib ib tug thawj coj cuav.” Qhov no puas yog? Yeej tsis yog txhua tus hauv pawg ntseeg puav leej muaj lub peev xwm tsis zoo thiab tsis muaj kev paub cais lod? Yam tsawg kawg nkaus yuav tsum muaj ob peb tug neeg uas to taub qhov tseeb me ntsis. Yog li ntawd, yog muaj neeg pom ib tug thawj coj cuav uas tsis muaj peev xwm ua tes hauj lwm tiag tiag los sis daws tsis tau ib qho teeb meem twg li, ces lawv yuav tsum nrog cov uas to taub qhov tseeb sib qhia thiab thov kom lawv siv lawv txoj kev paub cais thiab txiav txim. Qhov ua li no puas tsim nyog? (Tsim nyog.) Vim li cas qhov ntawd thiaj li tsim nyog? Yog ib tug thawj coj pawg ntseeg tsis muaj peev xwm ua tes hauj lwm tiag tiag ces qhov tshwm sim los yuav yog dab tsi? Leej twg yuav yog cov neeg raug tsim txom? Lawv tsis yog cov neeg Vajtswv xaiv tseg uas nyob hauv pawg ntseeg lod? Yog ib tug thawj coj cuav tswj pawg ntseeg tau peb los sis tsib xyoos, ces yuav cuam tshuam pes tsawg tus neeg txoj kev to taub qhov tseeb thiab kev nkag mus rau hauv qhov muaj tiag? Yuav ncua pes tsawg tus neeg qhov kev tau txais Vajtswv txoj kev cawm dim? Cov kev tshwm sim los no mas yeej phem tshaj qhov uas xav tau. Yog li ntawd, thaum pom tias ib tug thawj coj cuav tsis ua tes hauj lwm tiag tiag thiab tsis muaj peev xwm daws tau ib qho teeb meem twg li, qhov no yog ib yam loj rau txhua tus ntawm cov neeg Vajtswv xaiv tseg, thiab lawv yuav tsum qhia tshwm thiab qhia tawm tus thawj coj cuav ntawd sai li sai tau kom thiaj li tsis txhob ua rau tes hauj lwm raug ncua. Cov uas raug ua phem los ntawm qhov cov thawj coj pawg ntseeg tsis ua tes hauj lwm tiag tiag ces yog cov neeg Vajtswv xaiv tseg. Yog tsis muaj ib tug ntawm cov neeg Vajtswv xaiv tseg qhia tshwm los sis qhia tawm lawv, thiab lawv txhua tus yeej tsis quav ntsej txog qhov no li, ces pawg ntseeg ntawd yeej tsis muaj kev cia siab lawm. Yog hais tias nyob hauv nej lub siab nej pheej muaj tej kev xav uas tsis ris lub luag hauj lwm xws li, “Txawm li cas los xij, koj yog tus thawj coj. Koj ua tsis tau tes hauj lwm tiag tiag thiab txawm li ntawd los koj tsis qhia tej teeb meem tawm rau tus Nyob Saud—yog qhov no ua rau pawg ntseeg tes hauj lwm raug ncua, tus Nyob Saud yuav kom koj ris lub txim. Qhov ntawd muaj feem xyuam dab tsi txog peb? Peb yuav txhawj txog qhov ntawd ua dab tsi? Peb tsis yog cov saib xyuas. Lub luag hauj lwm no yog nyob rau ntawm koj.” Yog nej pheej muaj qhov kev xav phem no nyob rau hauv nej lub siab, qhov no tsis yog yuav ua rau tej yam raug ncua lod? Qhov no tsis cuam tshuam nej txoj kev caum qhov tseeb, kev nkag mus rau hauv qhov muaj tiag, thiab kev tau txais Vajtswv txoj kev cawm dim lod? Yog tsis muaj leej twg hauv pawg ntseeg ris lub luag hauj lwm, ces yuav nyuaj los hais tias pawg ntseeg no puas tuaj yeem ua tim khawv rau Vajtswv thiab puas tau txais Vajtswv tej koob hmoov, thiab haj yam nyuaj los hais tias yuav muaj pes tsawg tus neeg tau txais kev cawm dim hauv pawg ntseeg no. Yog txhua tus hauv pawg ntseeg no xav li no thiab muaj qhov kev xam pom no, ces pawg ntseeg no yeej tsis muaj kev cia siab kiag li lawm. Tam sim no cov pab pawg ua yeeb yaj kiab puas yog muaj qhov teeb meem no? Ib txhia ntawm nej cov thawj coj tsis daws tej teeb meem los sis tsis qhia tawm tej teeb meem—lawv yog cov thawj coj cuav. Nej puas muaj peev xwm pom qhov no? Cov thawj coj no tsis daws nej tej teeb meem—nej tsis pom tias qhov no yog ib qho teeb meem lod? Nej puas zoo siab txog qhov no tiag tiag lod? “Peb tus thawj coj tsis qhia qhov teeb meem no tawm thiab qhov teeb meem no daws tsis tau, yog li ntawd qhov no yog ib lub sij hawm zoo rau peb so. Qhov ntawd mas zoo dhau lawm! Tsis tas li ntawd, ib ntus no tus Nyob Saud tsis nug txog qhov teeb meem no ntawm nws tus kheej, yog li ntawd peb kuj tsis tas yuav qhia qhov teeb meem no tawm thiab. Vim li cas peb thiaj li tsis sim muab sij hawm so me ntsis rau peb tus kheej? Peb yuav tsum yees cov yeeb yaj kiab kom nrawm npaum li ntawd thiab yees kom tiav raws sij hawm lod? Qhov kev nce qib uas peb ua tau no yeej zoo lawm! Yog li yog peb yees tsis tiav ho ua li cas? Peb yuav raug teem txim vim qhov ntawd lod?” Qhov no puas yog nej tus cwj pwm? Nej puas xav tias yuav tsis muaj ib lub sij hawm teem tseg uas nruj rau tes hauj lwm ntawm Vajtswv lub tsev, es yog li ntawd nej thiaj li muab ncua tau mus yam tsis muaj hnub kawg, thiab tias tsuav tus Nyob Saud tsis nug txog los sis tshawb xyuas txog qhov teeb meem ntawd, ces nej tsis tas yuav txhawj los sis hnov muaj kev nias qees dab tsi, thiab nej daws tej teeb meem twg uas nej daws tau, thiab cia tej uas nej daws tsis tau ntawd dhau mus? Qhov no puas yog nej qhov kev xam pom? (Tsis yog.) Yog li ntawd vim li cas thaum muaj tej teeb meem nej thiaj li tsis qhia tawm? Puas yog cov thawj coj cuav no tswj nej los sis tso tshuaj tsis meej pem rau nej uas ua rau nej feeb tsis meej thiab hais tsis taus lus? Qhov no yog teeb meem dab tsi? Thaum muaj tej teeb meem tshwm tuaj, nej puas paub txog tej ntawd? Yog nej hais tias nej tsis paub txog tej ntawd, ces nej tab tom dag; yog nej paub txog tej ntawd tiam sis tsis qhia tej ntawd tawm, ces nej tsis quav ntsej thiab tsis ua nej tej luag hauj lwm yam hnyav heev, thiab nej tsis muaj kev ua siab ncaj rau nej tes dej num hlo li. Txawm hais tias koj ua hauj lwm khwv nyiaj nyob rau hauv lub ntiaj teb los, koj tseem yuav tsum ua kom tsim nyog rau cov nyiaj hli me me ntawd. Tsis tas hais txog tias, hnub no koj tab tom noj Vajtswv lub tsev tej zaub mov; koj tab tom caum kev cawm dim thaum ua koj tes dej num, thiab los ntawm kev ua li ntawd koj tab tom pua kev thiab npaj rau koj tus kheej qhov chaw kawg. Koj tsis yog ua qhov no rau Vajtswv lub tsev, los sis rau ib tug neeg twg, thiab haj yam tsis yog ua rau Kuv—koj tab tom ua qhov ntawd rau koj tus kheej xwb. Yog muab hais kom zoo mloog me ntsis, tib neeg ua lawv tes dej num kom thiaj li tau txais kev cawm dim, tiam sis muab hais kom meej, lawv ua lawv tes dej num kom lawv tus kheej tau koob hmoov thiab kom muaj ib qho chaw kawg uas zoo. Koj yuav tsum to taub qhov no kom meej; tsis txhob ua neeg ruam. Koj ua koj tes dej num tsis yog ua rau lwm tus tib neeg los sis rau koj niam koj txiv, thiab koj tsis yog ua koj tes dej num kom coj tau lub yeeb koob los rau koj cov poj koob yawm txwv los sis lub koob meej los rau koj tsev neeg lub npe—koj ua tes dej num ntawd rau koj tus kheej xwb. Vajtswv tsim koj, thiab txij thaum Nws tsim lub ntiaj teb los, Nws tau npaj tseg ua ntej lawm tias koj yuav yug los nyob rau tiam kawg. Nws coj koj los rau Nws lub tsev, Nws cia koj hnov Nws lub suab, Nws cia koj noj thiab haus Nws cov lus txhua hnub thiab tau txais kev yug rau lub neej txoj sia, thiab Nws muab ib lub cib fim rau koj kom koj thiaj li ua tau koj tes dej num nyob rau hauv Vajtswv lub tsev. Qhov no yog koj lub cib fim zoo tshaj plaws tam li ib tug neeg uas raug tsim tawm los kom tau txais kev cawm dim, thiab kuj yog koj tib lub cib fim xwb. Yog thaum koj tab tom ua koj tes dej num, koj rhuav tshem lub cib fim no, ces txawm thaum kawg, koj poob rau hauv tej kev puas tsuaj raug kev rau txim los sis quaj tom hniav qawv los, txhua yam no yog koj ua koj xwb, thiab koj tsim nyog tau txais! Nws yog koj tus kheej qhov txhaum. Tsis cheem tsum kom lwm tus neeg ris koj tej txim, thiab tsis cheem tsum kom koj ris lwm tus neeg tej txim thiab. Tsuas yog koj tus kheej xwb thiaj li ris tau txoj kev uas koj taug thiab txhua yam uas koj ua hnub no, thiab tsuas yog koj tus kheej xwb thiaj li ris tau tej kev tshwm sim los thaum kawg ntawd. Qhov uas Kuv ua tau yog ua kom nej to taub tej yam uas Kuv tsim nyog hais thiab tsim nyog qhia rau nej, thiab pua txoj kev rau nej kom nej thiaj li taug tau txoj kev ntawm kev cawm dim. Kuv tau piav qhia txhua yam meej meej lawm, yog li ntawd nej yuav ua tiag tiag li cas yog nyob ntawm nej tus kheej. Kuv tsis quav ntsej txog nej tej hauj lwm; Kuv tsuas ua tes hauj lwm uas poob rau Kuv xwb, thiab Kuv tsis ua tes hauj lwm ntau tshaj qhov no. Tsis yog qhov tseeb tias koj tab tom ua koj tes dej num txhawm rau koj tus kheej qhov chaw kawg lod? Yog koj hais tias, “Muaj tej teeb meem ntau npaum no, tiam sis kuv tus thawj coj tsis qhia tej teeb meem ntawd tawm, yog li ntawd kuv yuav tsis qhia tej teeb meem ntawd tawm thiab,” ces qhov ntawd tsis ruam lod? Qhov ntawd tsis yog kev xav txog tus kheej xwb lod? Thaum koj pom ib qho teeb meem lawm es koj lub luag hauj lwm yog dab tsi? Koj lub luag hauj lwm yog hu txhua tus los ua ke thiab nyob ntsiag to los nrhiav thiab sib qhia txog qhov teeb meem ntawd, saib seb muaj teeb meem tshwm sim nyob rau qhov twg lawm, thiab nrhiav lub hauv paus ntawm qhov teeb meem ntawd. Yog tom qab qee qhov kev sib tham, nrhiav tau lub hauv paus lawm, tiam sis nej daws tsis tau qhov teeb meem ntawd ntawm nej tus kheej, ces nej yuav tsum maj nroos qhia tawm rau tus Nyob Saud. Leej twg tsim nyog qhia tawm? Koj yuav tsum sawv los thiab hais tias, “Kuv ua tus qhia tawm. Yog qhov ntawd tsis tau, ces peb xaiv ob peb tus neeg sawv cev thiab qhia tawm ua ke.” Ib txhia tib neeg hais tias, “Tsis yog peb muaj ib tug thawj coj lod?” Koj teb tias, “Nws tsis yog thawj coj! Nws tsis ua tej luag hauj lwm ntawm ib tug neeg kom tiav kiag li. Nws tsuas yog ib tug tsiaj nyaum nyob rau hauv tib neeg daim tawv xwb, thiab nws yuav tsum raug ncaws tawm mus thiab raug rho tawm! Nws tsis qhia qhov teeb meem tawm, yog li ntawd peb tus kheej yuav tsum qhia tawm—qhov no yog peb lub luag hauj lwm. Tsuas yog thaum peb tau ua peb tej luag hauj lwm tiav lawm xwb mas Vajtswv thiaj li yuav saib peb li yog tib neeg. Yog peb paub meej tias peb tej luag hauj lwm yog dab tsi tiam sis peb tsis ua tej luag hauj lwm ntawd kom tiav, ces peb tsis tsim nyog ua neeg, thiab yeej tsis muaj txoj hau kev uas Vajtswv yuav saib peb li yog tib neeg thiab.” Yog Vajtswv tsis saib koj zoo li ib tug neeg, qhov no qhia tias Nws saib koj zoo li dab tsi? Qhov ntawd qhia tias Nws saib koj zoo li ib tug npua los sis ib tug dev. Ua li Vajtswv puas tseem yuav cawm koj? Yeej tsis muaj hau kev. Yog li ntawd, yog koj tsis muaj ib qho chaw kawg uas zoo, tsis yog koj ua rau koj tus kheej xwb lod? Thiab tsis yog koj ua koj tes dej num tag dawb lawm xwb lod? Txoj kev no nyob ntawm koj tus kheej xaiv, thiab kuj nyob ntawm koj tus kheej taug xwb thiab. Tsis hais koj xaiv txoj kev twg, los sis tej qhov tshwm sim los thaum kawg yog dab tsi, qhov ntawd yog koj tus kheej ris; yeej tsis muaj leej twg yuav ris lub txim txoj kev uas koj taug thiab tej qhov ua tau los ntawd.

Yog ua cov thawj coj thiab cov neeg ua hauj lwm, nej tsis quav ntsej tej teeb meem uas tshwm tuaj hauv kev ua tej dej num, thiab nej haj tseem nrhiav ntau yam laj thawj thiab hais ub hais no los thawb kev ris lub luag hauj lwm, thiab nej tsis daws qee cov teeb meem uas nej muaj peev xwm daws tau, thiab nej tsis qhia tej teeb meem uas nej daws tsis tau tawm rau tus Nyob Saud, cuag li tej ntawd tsis muaj feem xyuam nrog nej, qhov no tsis yog ib qho kev tsis ua lub luag hauj lwm lod? Qhov coj rau pawg ntseeg tes hauj lwm zoo li no yog ib yam kev ua uas ntse, los sis yog ib yam kev ua uas ruam? (Qhov ntawd yog ib yam kev ua uas ruam.) Cov thawj coj thiab cov neeg ua hauj lwm zoo li no tsis yog cov neeg txawj ntxias lod? Lawv tsis yog cov uas tsis muaj lub siab ris lub luag hauj lwm kiag li lod? Thaum lawv ntsib tej teeb meem, lawv tsis quav ntsej tej teeb meem ntawd li—lawv tsis yog cov neeg uas tsis muaj siab tsis muaj ntsws lod? Lawv tsis yog cov neeg txawj dag ntxias lod? Cov neeg txawj dag ntxias yog cov neeg ruam tshaj plaws. Koj yuav tsum ua ib tug neeg coj ncaj, koj yuav tsum muaj lub siab ris lub luag hauj lwm thaum koj ntsib tej teeb meem, thiab koj yuav tsum nrhiav txhua txoj hau kev thiab nrhiav qhov tseeb los daws tej teeb meem ntawd. Koj yeej yuav tsum tsis txhob ua ib tug neeg txawj dag ntxias hlo li. Yog koj tsuas quav ntsej txog koj tus kheej es zam lub luag hauj lwm thiab tsis kam ris lub luag hauj lwm ntawd thaum muaj teeb meem tshwm tuaj, txawm nyob hauv cov ib txwm tsis ntseeg los, koj txoj kev coj no yeej yuav raug thuam, ces tsis tas hais txog qhov nyob hauv Vajtswv lub tsev li! Txoj kev coj no yeej yuav raug Vajtswv teem txim thiab foom phem, thiab yeej yuav raug cov neeg Vajtswv xaiv tseg ntxub thiab tsis lees txais. Vajtswv nyiam cov neeg coj ncaj, thiab Nws tsis nyiam cov neeg txawj dag thiab txawj ntxias kiag li. Yog koj yog ib tug neeg txawj dag ntxias thiab coj ib tug xeeb ceem uas txawj ntxias, Vajtswv yuav tsis ntxub koj li lod? Vajtswv lub tsev puas yuav cia li tso koj mus? Tsis ntxov los lig, koj yuav tsum raug nrhiav kom ris lub txim ntawd. Vajtswv nyiam cov tib neeg coj ncaj thiab tsis nyiam cov neeg txawj dag ntxias. Txhua tus yuav tsum to taub qhov no kom meej, thiab tsis txhob feeb tsis meej thiab ua tej yam ruam ntxiv lawm. Kev tsis paub ib lub sij hawm ntawd mas zam txim tau, tiam sis yog ib tug neeg tsis lees txais qhov tseeb kiag li ces lawv tawv ncauj dhau lawm. Cov tib neeg coj ncaj mas ris tau lub luag hauj lwm. Lawv tsis xav txog lawv tus kheej tej kev tau thiab kev poob; lawv tsuas tiv thaiv Vajtswv lub tsev tes hauj lwm thiab tej txiaj ntsim xwb. Lawv muaj lub siab zoo thiab coj ncaj uas zoo ib yam li tais dej ntshiab uas yus ntsia ib muag pom ti nkaus qab. Thiab kuj muaj kev pom tshab rau lawv tej kev ua thiab. Ib tug neeg txawj dag mas yeej txawj ntxias, yeej ib txwm ua txuj, npog thiab zais tej yam, thiab zais lawv tus kheej zoo heev li. Tsis muaj leej twg muaj peev xwm pom tshab hom neeg no li. Tib neeg pom tsis tshab koj tej kev xav hauv nruab siab, tiam sis Vajtswv muaj peev xwm tshawb xyuas tej yam nyob hauv koj lub siab uas tob tshaj plaws ntawd kom meej. Thaum Vajtswv pom tias koj tsis yog ib tug tib neeg coj ncaj, tias koj yog ib yam uas txawj ntxias, tias koj yeej tsis lees txais qhov tseeb, ib txwm dag ntxias Nws, thiab yeej tsis muab koj lub siab rau Nws li, ces Nws tsis nyiam koj, thiab Nws ntxub thiab tso koj tseg. Cov neeg uas vam meej nyob rau hauv cov ib txwm tsis ntseeg, thiab cov uas txawj hais lus thiab txawj ntse yog hom neeg zoo li cas? Qhov no puas meej rau nej? Lawv lub ntsiab tseeb yog dab tsi? Qhov ntawd yeej hais tau tias lawv txhua tus zais tob tshaj plaws, lawv txhua tus txawj dag thiab txawj dag ntxias heev, lawv yog cov dab phem thiab cov Ntxwgnyoog tiag tiag li. Vajtswv puas cawm cov neeg zoo li no? Vajtswv ntxub cov dab phem tshaj plaws—cov neeg uas txawj dag thiab txawj dag ntxias—thiab Nws yeej yuav tsis cawm cov neeg zoo li no hlo li. Nej yuav tsum tsis txhob ua hom neeg zoo li no kiag li. Cov uas yeej ib txwm txawj saib txhua tus ntsej muag thaum hais lus, cov uas ua lus mog lus muag, ua txuj kom haum rau lub sij hawm, thiab ua kom haum sawv daws siab thaum saib xyuas tej yam—Kuv qhia rau koj tias, Vajtswv ntxub cov neeg zoo li no tshaj plaws, cov neeg zoo li no ces yeej cawm tsis tau lawm. Hais txog tag nrho cov uas suav rau hauv hom neeg txawj dag thiab txawj dag ntxias ntawd, txawm lawv cov lus yuav zoo mloog npaum li cas los xij, tag nrho cov lus ntawd yog cov lus dab uas dag. Cov neeg uas lawv cov lus yim zoo mloog no yim yog cov dab thiab Ntxwgnyoog. Cov no yog hom neeg uas Vajtswv ntxub tshaj plaws. Qhov no yeej yog tiag tiag li. Nej hais li cas: Cov neeg txawj dag, cov neeg uas nquag hais lus dag, thiab cov neeg txawj txawj hais lus puas muaj peev xwm tau txais Vajntsujplig tes hauj lwm? Lawv puas muaj peev xwm tau txais Vajntsujplig txoj kev qhia thiab kev qhia kom paub tseeb? Yeej tsis tau kiag li. Vajtswv tus cwj pwm rau cov neeg uas txawj dag thiab txawj dag ntxias ntawd yog dab tsi? Nws ntxub ntxaug lawv, Nws muab lawv tso tseg thiab tsis quav ntsej lawv, Nws saib lawv zoo tib yam nkaus li cov tsiaj. Nyob ntawm Vajtswv saib mas, cov neeg zoo li no tsuas yog hnav tib neeg daim tawv thiab nyob hauv lub ntsiab tseeb mas lawv yog cov dab thiab Ntxwgnyoog, lawv yog cov cev tuag mus taus kev, thiab Vajtswv yeej yuav tsis cawm lawv kiag li. Yog li ntawd, tam sim no cov neeg no nyob hauv tus yam ntxwv zoo li cas? Nyob hauv lawv lub siab muaj kev tsaus ntuj nti, lawv tsis muaj kev ntseeg tiag tiag, thiab txawm muaj dab tsi tshwm sim rau lawv los xij, lawv yeej tsis tau kev qhia los sis qhia kom paub tseeb li. Thaum ntsib tej kev puas tsuaj thiab kev ceeb laj txom nyem, lawv thov Vajtswv, tiam sis Vajtswv tsis nrog lawv nyob, thiab tsis muaj dab tsi uas lawv tuaj yeem vam khom tau tiag tiag nyob rau hauv lawv lub siab. Kom tau txais koob hmoov, lawv xav qhia tshwm kom zoo, tiam sis lawv tswj tsis tau lawv tus kheej, vim lawv tsis muaj lub siab txawj xav thiab laj thawj. Lawv ua tsis tau neeg zoo txawm lawv xav ua los xij; txawm lawv xav tso tseg kev ua phem los, lawv yuav tswj tsis tau lawv tus kheej, qhov ntawd yeej ua tsis tau. Ua li lawv puas yuav muaj peev xwm paub lawv tus kheej tom qab lawv raug xa mus thiab raug tshem tawm? Txawm hais tias lawv paub tias lawv tsim nyog tau txais qhov no, lawv yuav tsis lees qhov ntawd rau leej twg, thiab txawm hais tias zoo li lawv ua tau ib teg dej num me ntsis los, kuj yog lawv ua yam txawj ntxias, thiab lawv tes hauj lwm yuav tsis muaj txiaj ntsig kom pom tau meej li. Yog li nej hais li cas: Cov neeg no puas muaj peev xwm lees txim hloov dua siab tshiab tiag tiag? Yeej tsis tau kiag li. Qhov no yog vim lawv tsis muaj lub siab txawj xav los sis laj thawj thiab lawv tsis nyiam qhov tseeb. Vajtswv tsis cawm hom neeg txawj dag ntxias thiab neeg phem no. Nyob hauv cov neeg zoo li no txoj kev ntseeg Vajtswv ho muaj kev cia siab dab tsi? Lawv txoj kev ntseeg twb tsis muaj qab hau lawm, thiab lawv yeej yuav tsis tau txais dab tsi los ntawm txoj kev ntseeg ntawd li. Yog thoob plaws hauv lawv txoj kev ntseeg Vajtswv, lawv yeej tsis caum qhov tseeb, ces txawm lawv ntseeg tau ntau xyoo los yuav tsis muaj txiaj ntsig dab tsi; txawm lawv ntseeg mus txog thaum kawg los, lawv yuav tsis tau dab tsi. Yuav kom tau Vajtswv, tib neeg yuav tsum tau qhov tseeb. Tsuas yog lawv to taub qhov tseeb, xyaum ua raws li qhov tseeb, thiab nkag mus rau hauv qhov tseeb qhov muaj tiag xwb lawv thiaj li yuav tau txais qhov tseeb thiab tau txais Vajtswv txoj kev cawm dim; thiab tsuas yog thaum ntawd xwb mas lawv thiaj li yuav tau Vajtswv txoj kev lees paub thiab tej koob hmoov; thiab tsuas yog qhov no xwb mas thiaj li yog kev tau Vajtswv. Yog tib neeg xav tau qhov tseeb, ces thawj kauj ruam uas lawv yuav tsum ua yog kawm paub ua lawv tej luag hauj lwm kom tiav, uas yog lawv yuav tsum ua lawv tes dej num kom zoo—qhov no yog lub hauv paus tshaj plaws. Tib neeg yuav tsum tsis txhob kawm los ntawm cov thawj coj cuav, uas tsuas yog qhuab qhia cov lus thiab cov kev qhuab qhia thiab tsis ua tes hauj lwm tiag tiag, tsis ris lub luag hauj lwm rau ib yam dab tsi uas lawv ua, puav leej ua dog ua dig, thiab thaum kawg raug tshem tawm lawm. Kev ua tes dej num tsis yog ib qho teeb meem me; tib neeg raug nthuav tawm ntau tshaj plaws nyob hauv kev ua lawv tes dej num, thiab Vajtswv txiav txim rau tib neeg qhov kawg raws li lawv qhov kev coj tawm uas ib txwm muaj thaum lawv ua lawv tes dej num. Thaum ib tug neeg twg ua lawv tes dej num tsis tau zoo ntawd yog txhais li cas? Qhov ntawd txhais hais tias lawv tsis lees txais qhov tseeb los sis tsis lees txim hloov dua siab tshiab tiag tiag, thiab raug Vajtswv tshem tawm lawm. Thaum cov thawj coj cuav thiab cov neeg ua hauj lwm cuav raug rho tawm, qhov no txhais tau li cas? Qhov no yog Vajtswv lub tsev tus cwj pwm rau cov neeg zoo li no thiab, muaj tseeb tias kuj sawv cev rau Vajtswv tus cwj pwm rau cov neeg zoo li no thiab. Yog li ntawd, Vajtswv tus cwj pwm rau cov neeg uas tsis muaj txiaj ntsim zoo li no yog dab tsi? Nws ntxub ntxaug lawv, teem txim rau lawv, thiab tshem lawv tawm. Yog li ntawd, nej puas tseem xav txaus siab rau tej txiaj ntsim ntawm lub meej mom thiab ua ib tug thawj coj cuav?

Tom qab tib neeg los ntseeg Vajtswv lawm, qhov uas mob tshaj plaws thiab ua rau tu siab tshaj plaws uas lawv raug ntawd yog dab tsi? Qhov loj tshaj plaws tsuas yog qhov paub tias lawv raug ntsaig tawm mus los sis raug ntiab tawm lawm, thiab tias lawv raug Vajtswv nthuav tawm thiab tshem tawm lawm—qhov no yog qhov uas mob tshaj plaws thiab ua rau tu siab tshaj plaws, thiab tsis muaj leej twg xav kom qhov no tshwm sim rau lawv tom qab lawv los ntseeg Vajtswv lawm. Yog li ntawd, tib neeg yuav ua li cas thiaj li zam tau kom qhov no tsis txhob tshwm sim rau lawv? Yam tsawg kawg nkaus mas, lawv yuav tsum ua raws li lub siab txawj xav, uas yog lawv yuav tsum xub kawm paub ua lawv tej luag hauj lwm kom tiav, lawv yuav tsum tsis txhob ua dog ua dig kiag li, thiab tsis txhob muab yam uas Vajtswv tau tso rau lawv ua ntawd ncua. Vim koj yog ib tug neeg, koj yuav tsum xav txog tias ib tug neeg tej luag hauj lwm yog dab tsi. Tej luag hauj lwm uas cov ib txwm tsis ntseeg saib muaj nqis tshaj plaws, xws li kev hwm niam hwm txiv, kev yug koj niam koj txiv, thiab kev ua kom koj tsev neeg muaj suab npe nrov, tej ntawd tsis tas yuav hais txog. Tej no puav leej yog tej yam uas khoob lug thiab tsis muaj qhov tseem ceeb tiag tiag. Ua li lub luag hauj lwm tsawg tshaj plaws uas ib tug neeg yuav tsum ua kom tiav yog dab tsi? Qhov uas muaj tiag tshaj plaws yog qhov uas tam sim no koj ua koj tes dej num kom zoo li cas. Qhov uas txaus siab rau kev ua kom dhau xwb tsis yog kev ua koj lub luag hauj lwm kom tiav, thiab qhov tsuas hais cov lus thiab cov kev qhuab qhia xwb tsis yog kev ua koj lub luag hauj lwm kom tiav. Tsuas yog kev xyaum ua raws qhov tseeb thiab ua tej yam raws li lub hauv paus ntsiab lus xwb mas thiaj li yog kev ua koj lub luag hauj lwm kom tiav. Tsuas yog thaum koj qhov kev xyaum ua raws qhov tseeb tawg paj txi txiv, thiab muaj txiaj ntsim rau tib neeg lawm xwb, qhov no thiaj li yog koj tau ua koj lub luag hauj lwm tiav lawm tiag tiag. Txawm koj ua tes dej num dab tsi los, tsuas yog thaum koj tuav rawv ua raws li qhov tseeb tej hauv paus ntsiab lus nyob rau hauv txhua yam xwb mas thiaj li yog koj tau ua koj lub luag hauj lwm tiav lawm tiag tiag. Qhov ua kom dhau raws li tib neeg txoj hau kev uas ua tej yam ntawd mas yog kev ua dog ua dig; tsuas yog kev tuav rawv qhov tseeb tej hauv paus ntsiab lus xwb mas thiaj li yog kev ua koj tes dej num kom zoo thiab ua koj lub luag hauj lwm kom tiav. Thiab thaum koj ua koj lub luag hauj lwm kom tiav, qhov no tsis yog qhov kev qhia tshwm uas pom tau meej txog kev ua siab ncaj lod? Qhov no yog qhov kev qhia tshwm uas pom tau meej txog kev ua koj tes dej num yam ua siab ncaj. Tsuas yog thaum koj muaj lub siab ris lub luag hauj lwm no, qhov kev txiav txim siab thiab kev ntshaw no, thiab qhov kev qhia tshwm uas pom tau meej txog kev ua siab ncaj no rau koj tes dej num xwb, Vajtswv thiaj li nyiam koj thiab pom zoo rau koj. Yog koj twb tsis paub txog lub luag hauj lwm no, ces Vajtswv yuav saib koj li yog ib tug neeg nyob dawb, ib tug neeg tsis tseem ceeb, thiab yuav saib tsis taus koj. Los ntawm ib tug neeg qhov kev xam pom, qhov ntawd yog txhais hais tias tsis hwm koj, tsis quav ntsej koj, thiab saib tsis taus koj. Qhov ntawd zoo li qhov uas yog koj tau nrog ib tug neeg sib txuas lus los tau ib ntus, thiab koj pom lawv hais txog tej lus paj lus cua, thiab pheej hais tej yam uas tsis muaj tiag, thiab koj pom tias lawv nyiam khav theeb thiab hais lus loj, thiab tias lawv tsis yog cov neeg uas tso siab tau rau—koj puas yuav hwm lawv? Koj puas yuav kam tso ib tes hauj lwm twg rau lawv ua? Tej zaum lawv yuav muab tes hauj lwm uas koj tso rau lawv ua ntawd ncua vim qee qhov laj thawj, thiab yog li ntawd koj thiaj li yuav tsis kam tso ib yam dab tsi rau cov neeg zoo li ntawd ua lawm. Koj yuav ntxub lawv hauv koj lub siab tuaj, thiab koj yuav khuv xim uas tau nrog lawv sib raug zoo. Koj yuav xav tias muaj hmoo uas koj tsis tau tso ib yam dab tsi rau lawv ua, thiab koj yuav xav tias yog koj tau ua li ntawd, koj yuav khuv xim qhov ntawd mus tas koj lub neej. Yog hais tias koj nrog ib tug neeg sib txuas lus thiab, los ntawm kev sib tham thiab kev sib raug zoo nrog lawv, koj pom tias tsis yog lawv muaj kev ua neeg zoo xwb, tiam sis lawv kuj muaj lub siab ris lub luag hauj lwm thiab, thaum koj tso ib txoj hauj lwm rau lawv ua, txawm koj tsuas lam hais ob peb lo lus rau lawv xwb los, lawv yeej khaws nkaus cia rau hauv lawv lub siab, thiab lawv nrhiav tej hau kev los ua txoj hauj lwm ntawd kom zoo kom koj txaus siab, thiab yog lawv ua tes hauj lwm uas koj muab rau lawv ntawd tsis tau zoo, tom qab ntawd lawv txaj muag los ntsib koj—qhov no yog ib tug neeg uas muaj lub siab ris lub luag hauj lwm. Tsuav yog qhia qee yam rau lawv los sis muab qee yam rau lawv ua—tsis hais txog qhov seb yog muab los ntawm ib tug thawj coj, ib tug neeg ua hauj lwm, los sis tus Nyob Saud los xij li—cov neeg uas muaj lub siab paub txog lub luag hauj lwm yeej ib txwm xav tias, “Vim lawv saib kuv muaj nqis npaum li no, kuv yuav tsum saib xyuas qhov hauj lwm no kom zoo es tsis txhob ua rau lawv tag kev cia siab.” Koj yuav kaj siab thaum tso ib txoj hauj lwm rau cov neeg uas muaj lub siab txawj xav thiab laj thawj zoo li no ua lod? Cov neeg uas koj tuaj yeem tso ib txoj hauj lwm rau ua ntawd yeej yog cov uas koj saib rau qhov zoo thiab ntseeg siab tau. Tshwj xeeb tshaj, yog lawv tau ua ob peb txoj hauj lwm rau koj lawm thiab puav leej ua yam ua tib zoo ua heev, thiab ua tau raws li koj tej kev cheem tsum tag nrho, koj yuav xav tias lawv yog cov neeg uas ntseeg siab tau. Nyob hauv koj lub siab, koj yuav qhuas thiab saib lawv muaj nqis tiag tiag. Tib neeg txaus siab nrog hom neeg zoo li no sib raug zoo, tsis tas yuav hais txog Vajtswv li. Nej xav tias Vajtswv yuav txaus siab tso pawg ntseeg tes hauj lwm thiab tes dej num uas tib neeg yuav tsum tau ua ntawd rau ib tug neeg uas ntseeg siab tsis tau ua lod? (Tsis txaus siab, Nws yuav tsis ua li ntawd.) Thaum Vajtswv muab ib yam ntawm pawg ntseeg tes hauj lwm rau ib tug neeg ua, Vajtswv qhov kev cia siab rau lawv yog dab tsi? Qhov ib, Vajtswv cia siab tias lawv yuav nquag thiab ris lub luag hauj lwm, tias lawv yuav saib tes hauj lwm no yam li yog ib yam loj los ua raws, thiab ua tes hauj lwm kom zoo. Qhov ob, Vajtswv cia siab tias lawv yuav yog ib tug neeg uas tsim nyog ntseeg siab tau, tias txawm lub sij hawm yuav dhau mus ntev npaum li cas, thiab txawm qhov xwm txheej yuav hloov li cas los, lawv lub siab ris lub luag hauj lwm tsis hloov, thiab lawv txoj kev coj ncaj tiv taus kev sim. Yog lawv yog ib tug neeg uas ntseeg siab tau, Vajtswv yuav tso siab, thiab Nws yuav tsis saib xyuas los sis taug qab txoj hauj lwm no ntxiv lawm. Qhov no yog vim hais tias, nyob rau hauv Nws lub siab, Nws ntseeg siab tau rau lawv, thiab paub tseeb lawv yeej yuav ua tes hauj lwm uas muab rau lawv ntawd kom tiav yam tsis muaj ib yam dab tsi yuam kev. Thaum Vajtswv tso ib tes hauj lwm rau ib tug neeg ua, qhov no tsis yog qhov uas Nws cia siab rau lod? (Yog.) Ces thaum koj to taub Vajtswv txoj kev npaj siab lawm, tom qab ntawd koj yuav tsum paub nyob hauv koj lub siab tias yuav ua li cas thiaj li ua tau raws li Vajtswv tej kev cheem tsum, ua kom Vajtswv nyiam thaum Vajtswv pom, thiab tau txais Vajtswv txoj kev ntseeg siab. Yog koj tuaj yeem pom koj tus kheej tej kev qhia tshwm uas pom tau meej thiab kev coj thiab tus cwj pwm uas koj muaj rau koj tes dej num ntawd kom meej meej, yog koj muaj kev paub txog koj tus kheej, thiab koj paub tias koj yog dab tsi, yog li ntawd qhov uas koj thov kom Vajtswv saib koj rau qhov zoo, qhia Nws txoj hmoov hlub rau koj, los sis kom coj tshwj xeeb rau koj ntawd yuav tsis yog qhov tsis tsim nyog lod? (Yog, qhov ntawd tsis tsim nyog.) Txawm yog koj los kuj saib koj tus kheej tsis muaj nqis, kuj saib tsis taus koj tus kheej, es yog li ntawd los koj tseem thov kom Vajtswv nyiam koj—qhov no tsis muaj laj thawj li. Vim li ntawd, yog koj xav kom Vajtswv nyiam koj, yam tsawg kawg nkaus mas koj yuav tsum ua kom lwm tus ntseeg siab tau rau koj. Yog koj xav kom lwm tus ntseeg siab tau rau koj, saib koj rau qhov zoo, saib koj muaj nqis, ces yam tsawg kawg koj yuav tsum muaj meej mom, muaj lub siab ris lub luag hauj lwm, ua raws li koj cov lus, thiab ntseeg siab tau. Tsis tas li ntawd, koj yuav tsum los ua neeg nquag, ris lub luag hauj lwm, thiab ua siab ncaj nyob rau ntawm Vajtswv xub ntiag—ces koj yuav ua tau raws li Vajtswv tej kev cheem tsum rau koj feem ntau lawm. Koj tau txais Vajtswv txoj kev pom zoo lawm, tsis yog koj yuav muaj kev cia siab lawm lod? (Yog.) Qhov no puas nyuaj kom ua tau? (Tsis nyuaj.) Txawm tib neeg los kuj xav nrhiav ib tug neeg uas ntseeg siab tau los ua txoj hauj lwm thiab nrog sib raug zoo, yog li ntawd, qhov uas Vajtswv thov kom tib neeg ua lawv tej dej num kom zoo, thiab qhov uas Nws muaj kev cheem tsum me me no rau lawv, puas yog ib qho uas dhau heev lawm? (Tsis dhau.) Qhov ntawd yeej tsis dhau hlo li. Qhov no tsis yog ua kom nyuaj rau tib neeg, tiam sis nws yeej tsim nyog heev. Tsuas yog hais tias tib neeg tsis muaj lub siab los ua qhov no xwb, lawv tsis xav txog Vajtswv tej kev xav los sis to taub txog Vajtswv tej kev npaj siab. Txhua yam uas lawv ua tau ces yog pheej thov Vajtswv tsis tu ncua, hais tias, “Koj yuav tsum foom koob hmoov rau kuv! Koj yuav tsum qhia tawm Koj txoj hmoov hlub rau kuv! Koj yuav tsum coj kuv kev!” Yog li ntawd, yam uas koj tab tom ua yog dab tsi? Koj puas ua tau koj tes dej num kom tiav raws li koj lub siab txawj xav thiab laj thawj tiag tiag? Koj puas muaj peev xwm nquag, ris lub luag hauj lwm, thiab ua siab ncaj tiag tiag? Qhov no yog yam tsawg tshaj plaws uas koj yuav tsum ua tau kom Vajtswv thiaj li yuav nyiam koj. Qhov no tsis yog txoj xub ke uas tib neeg yuav tsum siv zog ua hauj lwm mus rau lod? Vim koj ntseeg Vajtswv, koj yuav tsum siv zog mus rau qhov tseeb thiab Vajtswv tej kev cheem tsum—qhov no yog txoj xub ke uas tib neeg yuav tsum siv zog mus rau. Tib neeg yuav tsum siv zog nyob rau hauv txoj xub ke uas yog. Ua li ntawd, lawv txoj kev caum los ua kom Vajtswv txaus siab yuav tsis yog qhov khoob ntxiv lawm.

Nyob rau hauv lawv lub siab, cov thawj coj cuav puas muaj ib lub tswv yim txog qhov ua kom Vajtswv txaus siab nyob rau hauv lawv txoj kev ntseeg Nws? Lawv puas muaj ib tug cwj pwm twg? Pom tau meej tias lawv tsis muaj. Lawv tsuas muaj ib tug cwj pwm uas lam ua kom dhau nyob hauv lub ntiaj teb xwb, thiab lawv coj rau Vajtswv ib yam nkaus li ntawd thiab, uas yog tsis hwm thiab saib tsis taus kiag li. Hom cwj pwm zoo li no ua rau Vajtswv poob ntsej muag thiab tuam mom Vajtswv hnyav heev, thiab Vajtswv ntxub qhov ntawd. Vajtswv muab txoj sia thiab txhua yam uas ib tug neeg muaj rau lawv, thiab txawm li ntawd los lawv tus cwj pwm rau txhua yam uas Vajtswv tau muab rau lawv, rau tej kev npaj uas Vajtswv tau ua rau lawv lub neej, rau Vajtswv cov lus txib thiab tes hauj lwm, thiab rau lawv tus kheej tej dej num, yog ib tug cwj pwm uas thuam thiab saib tsis taus. Lo lus “saib tsis taus” txhais li cas? Qhov ntawd txhais hais tias xav lam ua neej nyob kom dhau hnub thiab tsis ua tiag tiag rau ib yam dab tsi kiag li. Vajtswv ntxub lawv tus cwj pwm no tshaj plaws, thiab vim li ntawd Nws yeej yuav tsis cawm cov neeg zoo li no kiag li. Yam uas nej yuav tsum to taub nyob ntawm no yog dab tsi? Qhov ntawd yog qhov uas nej yuav tsum tsis txhob ua hom neeg zoo li no kiag li. Txawm koj yuav yog ib tug thawj coj los tsis yog los xij, los sis txawm koj yuav muaj kev xav ua thiab kev ntshaw los ua ib tug thawj coj los tsis muaj los xij, koj yuav tsum xub kawm kom paub tias yuav coj koj tus kheej li cas, es tsis txhob ua ib tug neeg nyob dawb, ib tug neeg uas nkim sij hawm, los sis ib tug neeg qias. Nyob hauv koj txoj kev coj tus kheej, koj yuav tsum muaj ib tug cwj pwm uas ncaj ncees, muaj meej mom, thiab muaj lub siab ris lub luag hauj lwm—qhov no yog qhov tsawg tshaj plaws. Tsuas yog raws li lub hauv paus no xwb mas tib neeg thiaj li muaj peev xwm ua tau raws li Vajtswv tej kev cheem tsum thiab ua kom tiav li Nws cov lus txib. Yog lub hauv paus me me no xwb los koj twb tsis muaj li, ces yeej tsis muaj dab tsi yuav hais ntxiv lawm.

Lub Plaub Hlis Ntuj Hnub Tim 3, Xyoo 2021