Cov Thawj Coj thiab Cov Neeg Ua Hauj Lwm Tej Luag Hauj Lwm (9)

Ob Tug Qauv Ntsuas Uas Los Txiav Txim Seb Cov Thawj Coj thiab Cov Neeg Ua Hauj Lwm Puas Ua Tau Raws Li Tus Qauv

Tam sim no peb twb tau sib qhia txog yim lub luag hauj lwm ntawm cov thawj coj thiab cov neeg ua hauj lwm ntawd tag nrho lawm, thiab hais txog yim lub luag hauj lwm no peb twb tau soj ntsuam ntau yam kev qhia tshwm uas pom tau meej txog cov thawj coj cuav lawm. Qhov kev soj ntsuam lawv li no, tam sim no nej puas muaj kev paub cais txog cov thawj coj cuav ntawd? Yog hais tias koj yog ib tug thawj coj no, koj puas zam tau tej kev ua li cov thawj coj cuav no? Koj puas tuaj yeem nco ntsoov ua hauj lwm thiab ua kom tej luag hauj lwm ntawm cov thawj coj thiab cov neeg ua hauj lwm ntawd tiav raws li tej luag hauj lwm uas peb tau sib qhia lawm? Los ntawm txoj kev sib qhia txog tej luag hauj lwm ntawm cov thawj coj thiab cov neeg ua hauj lwm no, tam sim no nej tsim nyog paub hauv nej lub siab lawm hais tias cov thawj coj thiab cov neeg ua hauj lwm yuav tsum ua lawv tes hauj lwm li cas, qhov ua tes hauj lwm no muaj tej ntxaws ntxaws dab tsi, lawv yuav tsum coj tes hauj lwm mus ua tiag li cas, thiab lawv yuav tsum xyaum ua cov thawj coj thiab cov neeg ua hauj lwm uas ua raws li tus qauv ntawd li cas. Yog ib tug tib neeg twg muaj peev xwm txaus, yog lawv muaj ib qho peev xwm ua hauj lwm, thiab lawv kuj ris ib lub nra thiab, mas lawv yuav tsum muaj peev xwm zam tau tej kev qhia tshwm uas pom tau meej txog cov thawj coj cuav no. Txawm li cas los xij, yog ib tug tib neeg twg muaj peev xwm thiab muaj ib qho peev xwm ua hauj lwm, tiam sis lawv tsis ris ib lub nra no, lawv puas muaj peev xwm ua tau ib tug thawj coj uas ua raws li tus qauv thiab ua tau tej luag hauj lwm ntawm cov thawj coj thiab cov neeg ua hauj lwm ntawd kom tiav? (Tsis tau.) Qhov lawv ua li no mas nyuaj me ntsis. Piv txwv hais tias, ib tug thawj coj ris ib lub nra thiab lawv txoj kev ua neeg tsis phem, tiam sis lawv tsis paub tias yuav ua lawv tes hauj lwm li cas xwb. Txawm yuav sib qhia nrog lawv npaum li cas los xij, lawv yeej tseem tsis paub tias yuav ua tiag thiab koom nrog tes hauj lwm tiag tiag ntawd li cas, thiab lawv nrhiav tsis tau tej hauv paus ntsiab lus los sis txoj hau kev li. Lawv kuj tsis paub tias yuav coj kev ua tej yam hauj lwm qib siab los sis tes hauj lwm kom ntxaws ntxaws li cas thiab. Thaum muaj teeb meem tshwm sim tuaj lawv nrhiav tsis tau lub ntsiab tseeb ntawm tej teeb meem ntawd, thiab lawv tsis paub tias yuav daws tej teeb meem ntawd li cas. Yog li ntawd, thaum ua txhua yam hauj lwm los sis daws txhua yam teeb meem, lawv thiaj li pheej tos thiab qeeb heev. Ib tug tib neeg zoo li no puas ua tau tej luag hauj lwm ntawm cov thawj coj thiab cov neeg ua hauj lwm kom tiav? (Tsis tau.) Qhov no yog hom teeb meem dab tsi? Txawm hais tias hom tib neeg zoo li no kub siab heev, ris ib lub nra, thiab xav ua lawv tes hauj lwm los xij, lawv lub peev xwm tsis zoo kiag li, lawv tsis muaj peev xwm ua hauj lwm thiab ris tsis tau tes hauj lwm, los sis ua ib qho hauj lwm tiag tiag los sis daws ib qho teeb meem tiag tiag li; lawv tsuas ua kom dhau thaum lawv koom nrog ib teg hauj lwm twg xwb, thiab lawv lub hlwb qeeb, loog, thiab tos xwb. Qhov uas tshwm sim los ntawm qhov no ces yog qhov uas muaj ntau yam teeb meem tshwm sim tuaj, tiam sis lawv tsis muaj peev xwm pib daws tej teeb meem ntawd, lawv tsis paub tias tej teeb meem ntawd los qhov twg los, thiab lawv haj yam tsis paub tias yuav sib qhia txog tej teeb meem ntawd thiab daws tej teeb meem ntawd li cas, thiab lawv haj tseem tsis muaj peev xwm muab tej teeb meem ntawd qhia tawm rau tus Nyob Saud thiab nrhiav kev daws los ntawm tus Nyob Saud li thiab. Yog li ntawd, lawv tsis muaj peev xwm ua tau tej luag hauj lwm ntawm cov thawj coj thiab cov neeg ua hauj lwm ntawd kom tiav, thiab tab txawm yog lawv raug xaiv los ua ib tug thawj coj los, lawv tsis yog ib tug thawj coj zoo—lawv yog ib tug thawj coj cuav xwb.

Tam sim no uas peb twb tau sib qhia txog yim lub luag hauj lwm ntawm cov thawj coj thiab cov neeg ua hauj lwm lawm, nej puas muaj peev xwm hais tau ib lub ntsiab uas yooj yooj yim txog ib tug thawj coj cuav? Yus yuav tsum ntsuas li cas es thiaj li paub hais tias tus thawj coj ua tau tej luag hauj lwm ntawm cov thawj coj thiab cov neeg ua hauj lwm ntawd tiav, los sis lawv yog ib tug thawj coj cuav? Qib hauv paus tshaj plaws yog, yus yuav tsum saib seb lawv puas muaj peev xwm ua tau tes hauj lwm tiag tiag, seb lawv muaj lub peev xwm no los tsis muaj. Ces tom qab ntawd, yus yuav tsum saib seb lawv puas muaj lub nra los ua tes hauj lwm no kom zoo. Txawm tej uas lawv hais yuav zoo li zoo heev thiab zoo li lawv to taub tej kev qhuab qhia ntawd ntau heev los tsis txhob quav ntsej, thiab tsis txhob quav ntsej txog qhov lawv txawj ntse thiab muaj khoom pub npaum li cas thaum lawv ua tej yam sab nraud—tej no tsis tseem ceeb. Qhov tseem ceeb tshaj plaws yog seb lawv puas muaj peev xwm ua tau tej hauj lwm hauv paus tshaj plaws ntawm pawg ntseeg kom zoo, seb lawv siv puas tau qhov tseeb los daws tej teeb meem, thiab seb lawv puas coj tau tib neeg nkag mus rau hauv qhov tseeb qhov muaj tiag. Qhov no yog tes hauj lwm uas yog lub hauv paus thiab yog lub ntsiab tseem ceeb tshaj plaws. Yog lawv ua tsis tau tej hauj lwm tiag tiag no, ces txawm lawv yuav muaj lub peev xwm zoo npaum li cas, lawv txawj ntse npaum li cas, los sis lawv tiv taus kev txom nyem thiab them tus nqi npaum li cas los xij, lawv yeej tseem yog ib tug thawj coj cuav. Ib txhia tib neeg hais tias, “Tam sim no tsis txhob xav txog qhov lawv tsis ua ib teg hauj lwm tiag tiag. Lawv muaj lub peev xwm zoo thiab lawv txawj ntse. Yog lawv xyaum li ib ntus, lawv yeej yuav ua tau tes hauj lwm tiag xwb xwb li. Tsis tas li ntawd, lawv twb tsis tau ua ib yam dab tsi phem thiab lawv twb tsis tau ua phem los sis ua rau muaj kev tab kaum los sis kev cuam tshuam li—ua li cas Koj thiaj li hais tias lawv yog ib tug thawj coj cuav?” Peb yuav piav qhia qhov no li cas? Txawm koj txawj ntse npaum li cas, koj muaj peev xwm thiab muaj kev kawm siab npaum li cas, koj txawj qw tej lus qw npaum li cas, los sis koj to taub cov lus thiab cov kev qhuab qhia ntau npaum li cas; txawm ib hnub koj yuav khwv npaum li cas los sis sab npaum li cas, los sis koj mus deb npaum li cas, koj mus ncig pes tsawg pawg ntseeg, los sis koj tiv kev phom sij thiab tiv kev txom nyem ntau npaum li cas los xij—tej no tsis muaj ib qho tseem ceeb li. Qhov tseem ceeb ces yog seb koj puas ua koj tes hauj lwm raws li tej kev npaj tes hauj lwm, seb koj puas coj tej kev npaj tes hauj lwm ntawd mus ua tiag kom yog; seb thaum koj ua thawj coj ntawd, koj puas tau koom ua txhua tes hauj lwm tiag tiag uas koj yog tus saib xyuas ntawd, thiab koj daws tau pes tsawg qhov teeb meem tiag tiag lawm; muaj pes tsawg tus tib neeg to taub qhov tseeb tej hauv paus ntsiab lus vim koj txoj kev ua thawj coj thiab kev coj qhia, thiab pawg ntseeg tes hauj lwm tau nce qib thiab loj hlob npaum li cas lawm—qhov tseem ceeb yog qhov seb koj ua puas tau tej no los tsis tau xwb. Txawm koj yuav muaj feem xyuam rau tes hauj lwm tiag tiag twg los xij, qhov tseem ceeb yog qhov tias seb koj puas taug qab thiab coj qhia tes hauj lwm ntawd tas li es tsis yog ua tus loj nyob siab siab thiab txib lwm tus xwb. Tsis tas li no xwb, qhov tseem ceeb kuj yog qhov seb koj puas muaj kev nkag mus rau hauv lub neej txoj sia thaum ua koj tes dej num los tsis muaj thiab, seb koj puas ua tau tej yam raws li tej hauv paus ntsiab lus, seb koj puas muaj lus tim khawv hais txog qhov muab qhov tseeb coj los xyaum ua, thiab seb koj puas daws thiab saib xyuas tau tej teeb meem tiag tiag uas cov neeg Vajtswv xaiv tseg raug. Tej no thiab lwm yam uas zoo li no puav leej yog tus qauv uas ntsuas seb ib tug thawj coj los sis ib tug neeg ua hauj lwm twg ua tau lawv tej luag hauj lwm tiav los tsis tau. Nej puas hais tias cov qauv ntsuas no mas muaj tiag? Thiab ncaj ncees rau tib neeg? (Ncaj ncees.) Cov qauv ntsuas no ncaj ncees rau txhua tus. Tsis hais koj kawm txog qib dab tsi, tsis hais koj hluas los laus, koj ntseeg Vajtswv tau pes tsawg xyoo, koj laus npaum li cas hauv txoj kev ntseeg, los sis koj twb tau nyeem Vajtswv txoj lus ntau npaum li cas lawm, tej no tsis muaj ib qho tseem ceeb li. Qhov tseem ceeb yog qhov koj ua tau pawg ntseeg tes hauj lwm zoo npaum li cas tom qab raug xaiv los ua ib tug thawj coj, koj ua tau koj tes hauj lwm muaj txiaj ntsig thiab ua tau zoo npaum li cas, thiab seb txhua tes hauj lwm puas nce qib yam muaj kev npaj thiab ua tau zoo, thiab tsis qeeb. Tej no yog tej tseem ceeb uas soj ntsuam thaum ntsuas seb ib tug thawj coj los sis ib tug neeg ua hauj lwm twg ua tau lawv tej luag hauj lwm kom tiav los tsis tau.

Los ntawm txoj kev sib qhia uas peb nyuam qhuav sib qhia no, tam sim no nej muaj ib qho kev to taub thiab kev paub uas meej me ntsis txog tej luag hauj lwm ntawm cov thawj coj thiab cov neeg ua hauj lwm, nrog rau cov lus tshab txhais thiab lub ntsiab tseeb ntawm ib tug thawj coj cuav lawm. Tus qauv ntsuas uas yog lub hauv paus tshaj plaws uas los txiav txim seb tib neeg puas yog ib tug thawj coj cuav ntawd yog saib seb lawv puas muaj peev xwm ua tau tes hauj lwm tiag tiag, ces tom qab ntawd saib seb lawv puas ua tes hauj lwm tiag tiag. Ob qho no yog ob tug qauv ntsuas uas tseem ceeb: Ib qho yog lo lus nug seb lawv muaj peev xwm los tsis muaj, hos ib qho yog lo lus nug seb lawv txaus siab hlo ua los tsis txaus siab. Nej nco puas tau tej no? Ib txhia tib neeg hais tias, “Kuv tsis yog ib tug thawj coj, yog li ntawd vim li cas kuv thiaj li yuav tsum tau nco tej no?” Lo lus no puas yog? (Tsis yog.) Vim li cas thiaj li tsis yog? Vim txoj kev to taub tej qhov tseeb no, ib kis mas ua rau tib neeg paub lawv tus kheej, hos lwm kis mas ua rau lawv muaj peev xwm paub cais lwm tus—tej no yog qhov tseeb uas tib neeg yuav tsum to taub thiab muaj, thiab yog tsis to taub mas tsis tau. Ua ntej tshaj plaws, koj yuav tsum ntsuas seb koj puas muaj lub peev xwm thiab qhov peev xwm los ua ib tug thawj coj raws li tej luag hauj lwm ntawm cov thawj coj thiab cov neeg ua hauj lwm. Yog koj tsis muaj tej no, ces tsis txhob pheej xav ua ib tug thawj coj. Yog koj tsis muaj lub peev xwm los ua ib tug thawj coj los koj tseem xav ua, ces qhov ntawd yog txoj kev ntshaw xwb; kiag thaum koj tau los ua ib tug thawj coj lawm, koj yuav ua tsis tau tes hauj lwm tiag tiag, thiab koj yeej yuav dhau los ua ib tug thawj coj cuav xwb xwb li. Ib txhia tib neeg hais tias, “Kuv muaj peev xwm zoo; nyob rau ntawm txhua tus mas, kuv yog tus tshaj lij tshaj. Kuv muaj qee cov tswv yim zoo, thiab qee cov lus qhia uas ntse thiab zoo tas li. Kuv muaj hau kev ua txhua yam, thiab kuv muaj kev paub, kev to taub tob, thiab kev ntsib kev pom ntau heev. Tag nrho tej no tsis yog txhais hais tias kuv ua tau ib tug thawj coj lod?” Yog li ntawd koj kuj yuav tsum ntsuas koj tus kheej saib seb koj puas yog ib tug tib neeg uas muaj lub siab ris lub luag hauj lwm thiab muaj ib lub nra. Yog hais tias koj tsuas muaj kev xav txog tej yam, thiab tsuas yog xav ua tej yam, thiab pheej muaj tej kev ntshaw loj xwb tiam sis ua tsis tau, thiab koj tsis paub tias yuav siv zog thiab them tus nqi li cas, thiab tsis kam them ib tug nqi li—yog koj pheej xav kom koj lub hlwb thiab lub siab nyob kaj lug xwb, yog koj nyiam nyob ywj siab thiab tsis muaj dab tsi khi, nyiam ib lub neej tau zoo, thiab tsis nyiam txhawj xeeb los sis khwv li, thiab ntshai sab thiab ntshai txom nyem—ces koj tsis tsim nyog ua ib tug thawj coj, thiab koj yuav ris tsis tau los sis ua tsis tau tes hauj lwm ua thawj coj.

Peb nyuam qhuav xaus lus txog ob tug qauv ntsuas uas los txiav txim seb ib tug thawj coj ua puas tau raws li tus qauv ntawd hais tias: Seb lawv puas muaj peev xwm ua tau tes hauj lwm tiag tiag thiab seb lawv puas ua tes hauj lwm tiag tiag. Yog tib neeg to taub ob tug qauv ntsuas no, ces lawv yuav tsum paub meej meej lawm hais tias lawv puas muaj peev xwm ua tau ib tug thawj coj, thiab lawv puas muaj peev xwm ua tau pawg ntseeg tes hauj lwm kom zoo, puas ua tau lawv tej luag hauj lwm kom tiav, thiab puas ua tau ib tug thawj coj uas mus raws li tus qauv tom qab los ua ib tug thawj coj lawm. Cov uas tam sim no ua cov thawj coj thiab cov neeg ua hauj lwm ntawd, tam sim no nej puas muaj qee txoj kev thiab qee lub hauv paus ntsiab lus los ntsuas tias nej puas tau ua qee tes hauj lwm tiag tiag thiab puas tau ua tej luag hauj lwm ntawm cov thawj coj thiab cov neeg ua hauj lwm ntawd tiav lawm? Los ntawm txoj kev sib qhia txog yim lub luag hauj lwm ntawm cov thawj coj thiab cov neeg ua hauj lwm no, nej yuav tsum muaj peev xwm ntsuas tau tias cov thawj coj cuav muaj tej kev qhia tshwm uas pom tau meej dab tsi thiab xaus lus tau tias cov thawj coj thiab cov neeg ua hauj lwm yuav tsum ua lawv tes hauj lwm li cas kiag, thiab nej tes hauj lwm tseem muaj qhov twg ua tsis txaus, ua tsis tau zoo, los sis ua tsis tau ntxaws, thiab nej yuav tsum ua tes hauj lwm ntawd li cas txij tam sim no mus—yam tsawg kawg nej yuav tsum muaj tej kev paub tob no. Yog nej tsis muaj kev xaus lus los sis kev paub tob txog qhov yuav ua ib tug thawj coj los sis ib tug neeg ua hauj lwm li cas los sis yuav ua tej luag hauj lwm ntawm cov thawj coj thiab cov neeg ua hauj lwm ntawd kom tiav li cas, ces qhov ntawd txhais tau hais tias nej lub peev xwm tsis zoo txaus rau txoj hauj lwm ntawd. Tshaj ntawd ntxiv, yog nej paub tsis tseeb tias yuav cais cov thawj coj cuav ntawd li cas, ces qhov no haj yam qhia tau tias nej lub peev xwm tsis zoo. Kuj muaj ib qho xwm txheej uas tshwj xeeb thiab xws li: Txawm twb tau mloog tej kev sib qhia no lawm los xij, muaj qee tus neeg tsis muaj kev txiav txim siab los siv zog rau qhov tseeb los sis ua tej luag hauj lwm ntawm cov thawj coj thiab cov neeg ua hauj lwm kom tiav li, tsis saib qhov no tseem ceeb los sis tsis muab khaws rau hauv nruab siab li. Lawv xav hais tias, “Kuv tsis quav ntsej tias leej twg yog ib tug thawj coj cuav. Txawm li cas los xij, yog kuv tau los ua ib tug thawj coj, kuv yuav ua li tus Nyob Saud hais kom kuv ua xwb. Kuv tsis tas yuav siv zog npaum li ntawd los sis xav ntau npaum li ntawd.” Thaum lawv mloog tej lus qhuab qhia, lawv tsuas lam mloog thiab mloog kom sij hawm txhob ntev ntev xwb, thiab lawv paub me ntsis txog tias zaj lus qhuab qhia ntawd hais ntxaws txog dab tsi, tiam sis lawv nkees los xaus lus seb tej qhov tseeb thiab Vajtswv tej kev cheem tsum ntawm tib neeg uas tab tom sib qhia ntawd yog dab tsi dhau lawm, thiab lawv tsis kam khaws tej no cia rau hauv nruab siab li. Lawv xav hais tias, “Qhov cais tej teeb meem no mas nyuaj dhau lawm. Txawm li cas los xij, kuv tsuas cheem tsum ib yam ntawm kuv tus kheej xwb, uas qhov ntawd yog tsis txhob ua phem, tsis txhob ua rau muaj kev tab kaum thiab kev cuam tshuam, thiab tsis txhob ua tus zoo tshaj cov neeg coob coob xwb, ces txaus lawm. Nws yooj yooj yim xwb! Qhov ua neej li no mas zoo kawg; kuv tsis cheem tsum kuv tus kheej kom ua ntau yam.” Qhov no yog lawv qhov kev xam pom txawm lawv mloog tej lus qhuab qhia li cas los xij, tsis muaj leej twg hloov tau lawv li; txawm koj yuav qhia txog qhov tseeb li cas, koj siv txoj kev twg los qhia, los sis koj qhia txog dab tsi los xij, tej ntawd yeej tsis chwv lawv lub siab li; lawv tsis quav ntsej txog qhov seb lawv puas mloog cov lus no los tsis mloog, nyob li ntawm lawv mas tsis txawv ntau. Hom tib neeg no lam ua neej kom dhau xwb, thiab lawv tsis saib ib yam dab tsi tseem ceeb li. Tsis tas yuav hais txog qhov qhia txog yim lub luag hauj lwm ntawm cov thawj coj thiab cov neeg ua hauj lwm—tab txawm yog peb qhia txog tej ntawd tag nrho los, lawv yeej tseem yuav tsis to taub thiab yuav xaus lus tsis tau ib lub hauv paus ntsiab lus los sis ib txoj kev li. Cov tib neeg zoo li no tsis nyiam yam zoo, lawv tsis nyiam thiab tsis muaj zog hlo li thaum hais txog qhov tseeb los sis ib yam zoo twg, tiam sis lawv nyiam kev noj, kev haus, thiab kev nrhiav kev lom zem. Qhov kev sib qhia txog yim lub luag hauj lwm ntawm cov thawj coj thiab cov neeg ua hauj lwm ntawd, ib qho mas yog, peb tau xaus lus txog qee lub luag hauj lwm ntawm cov thawj coj thiab cov neeg ua hauj lwm, nrog rau qhov ua ib tug thawj coj los sis ib tug neeg ua hauj lwm lawm yuav ua hauj lwm li cas thiab ua yus tej luag hauj lwm kom tiav li cas; hos lwm qhov yog, peb tau xaus lus txog qee qhov kev qhia tshwm uas pom tau meej ntxaws ntxaws los ntawm cov thawj coj cuav. Nyuam qhuav no peb tau muab coj los xaus ua ob lub hauv paus ntsiab lus, ob tug qauv ntsuas, los cais cov thawj coj cuav xws li: Ib qho yog seb tib neeg puas muaj peev xwm ua tau tes hauj lwm tiag tiag, thiab lwm qhov yog seb lawv puas ua tes hauj lwm tiag tiag thaum lawv to taub qhov tseeb tej hauv paus ntsiab lus lawm. Los txog rau tam sim no qhov siv ob tug qauv ntsuas no mas yog txoj kev ntsuas uas yooj yim tshaj plaws thiab tsim nyog tshaj plaws rau txoj kev ntsuas seb tus tib neeg ntawd yog ib tug thawj coj cuav los tsis yog.

Yam Cuaj: Qhia Tawm, Xa Tawm, thiab Coj Tej Kev Npaj Tes Hauj Lwm ntawm Vajtswv Lub Tsev Mus Ua Tiag Kom Yog Raws Li Tej Kev Cheem Tsum ntawm Vajtswv Lub Tsev, Coj Qhia, Saib Xyuas, thiab Txhawb Kom Ua, thiab Tshuaj Xyuas thiab Taug Qab Txog Qhov Xwm Txheej ntawm Qhov Coj Tej Ntawd Mus Ua Tiag Ntawd (Ntu Ib)

Lub Ntsiab Tshab Txhais thiab Tej Yam Ntxaws Ntxaws ntawm Tej Kev Npaj Tes Hauj Lwm

Hnub no, peb yuav sib qhia txog lub luag hauj lwm cuaj ntawm cov thawj coj thiab cov neeg ua hauj lwm uas hais tias: “Qhia tawm, xa tawm, thiab coj tej kev npaj tes hauj lwm ntawm Vajtswv lub tsev mus ua tiag kom yog raws li tej kev cheem tsum ntawm Vajtswv lub tsev, coj qhia, saib xyuas, thiab txhawb kom ua, thiab tshuaj xyuas thiab taug qab txog qhov xwm txheej ntawm qhov coj tej ntawd mus ua tiag ntawd.” Thaum saib tag nrho lub luag hauj lwm no, qhov uas cheem tsum kom cov thawj coj thiab cov neeg ua hauj lwm coj mus ua tiag ntawd yog dab tsi? (Ntau yam kev npaj tes hauj lwm ntawm Vajtswv lub tsev.) Qhov tseem ceeb ntawm lub luag hauj lwm no yog yuav coj tej kev npaj tes hauj lwm ntawm Vajtswv lub tsev mus ua tiag li cas—qhov no yog tes hauj lwm uas tseem ceeb tshaj plaws rau cov thawj coj thiab cov neeg ua hauj lwm. Txawm tus thawj coj los sis tus neeg ua hauj lwm ntawd yuav nyob rau qib dab tsi los xij, ua ib tug thawj coj los sis ib tug neeg ua hauj lwm lawm, yus yuav ntsib tej kev npaj tes hauj lwm nrog rau tes hauj lwm tiag tiag ntawm qhov coj tej kev npaj tes hauj lwm ntawd mus ua tiag. Qhov coj ntau yam kev npaj tes hauj lwm mus ua tiag ntawd mas muaj feem xyuam rau txhua tus thawj coj thiab txhua tus neeg ua hauj lwm tes hauj lwm, thiab qhov no yog ib teg hauj lwm uas tseem ceeb heev, ntxaws heev, thiab yog lub hauv paus heev. Thaum saib qhov no lawm, tsis yog yuav tsum xub sib qhia ntxaws ntxaws seb tej kev npaj tes hauj lwm ntawd yog dab tsi lod? (Yog.) Yog li ntawd, tej kev npaj tes hauj lwm ntawd yog dab tsi? Qhov ciaj ciam thiab lub ntsiab tshab txhais ntawm tej kev npaj tes hauj lwm ntawd yog dab tsi? Ib txhia tib neeg hais tias, “Tsis yog qhov ciaj ciam ntawm tej kev npaj tes hauj lwm ntawd tsuas yog hais txog qee yam hauj lwm thiab qee lub ntsiab lus uas ntsig txog pawg ntseeg tes hauj lwm xwb lod? Thiab tsis yog tej kev npaj tes hauj lwm tsuas yog npaj thiab tshaj tawm tej hauj lwm thiab tej ntsiab lus no xwb lod?” Nej xav li cas rau qhov kev piav qhia no? Tsis yog qhov no puav leej yog cov lus hais thiab cov kev qhuab qhia xwb lod? (Yog.) Thiab “cov lus thiab cov kev qhuab qhia” ntawd txhais li cas? Tej ntawd txhais hais tias, txawm txoj kev piav qhia no tsis muaj ib lo lus uas zoo li tsis yog li los xij, tom qab koj hnov tej no lawm, koj yeej tseem tsis to taub tej no; nws tsuas zoo ib yam nkaus li tsis tau piav qhia hlo li xwb. Cia peb xub tshab txhais ib lo lus txog tej kev npaj tes hauj lwm raws li ib qho kev piav qhia uas muab sau cia, kom tib neeg thiaj li paub txog lub ntsiab txhais hauv paus, thiaj li to taub thiab paub tias tej kev npaj tes hauj lwm ntawd yog dab tsi kiag. Tej kev npaj tes hauj lwm yog tej kev npaj thiab tej kev cheem tsum uas ntxaws ntxaws los ntawm Vajtswv lub tsev rau ib teg hauj lwm twg; cov thawj coj thiab cov neeg ua hauj lwm yuav tsum tau qhia tawm thiab coj tej kev npaj tes hauj lwm ntawd mus ua tiag, thiab tej kev npaj tes hauj lwm ntawd kuj yog tej kev cheem tsum, tej hauj lwm, thiab tej hau kev ntxaws ntxaws uas muab tshaj tawm rau txhua tus tswv cuab hauv pawg ntseeg txog ib teg hauj lwm twg thiab—qhov no yog lub ntsiab tshab txhais txog tej kev npaj tes hauj lwm. Yog li ntawd tej kev npaj tes hauj lwm ntawd muaj tej yam dab tsi? Txhua tus paub lo lus uas hais tias “tej yam” no, tiam sis tsis tsim nyog muaj qee yam ntxaws ntxaws uas npog nyob rau hauv qhov ciaj ciam ntawm tej yam no lod? (Tsim nyog.) Nej paub txog yam dab tsi? (Muaj tes hauj lwm tshaj tawm txoj moo zoo, thiab muaj tes hauj lwm ua yeeb yaj kiab.) Qhov ntawd yog ob yam lawm. (Kuj muaj qee yam kev cheem tsum uas ntsig txog lub neej hauv pawg ntseeg thiab kev tsim tsa pawg ntseeg tej koom haum tswj fwm thiab.) Muaj lwm tes hauj lwm dab tsi ntxiv? (Muaj tes hauj lwm uas yaug pawg ntseeg kom dawb huv, nrog rau qee yam hauj lwm uas ntsig txog pawg ntseeg tej kev tswj hwm.) Yam ntxaws ntxaws ntawm tej kev npaj tes hauj lwm yog li nram qab no xws li: yam ib, pawg ntseeg tes hauj lwm tswj fwm. Qhov no yog tes hauj lwm loj tshaj plaws, thiab yog ua tsis tau tes hauj lwm tswj fwm kom zoo, ces yuav tsis muaj pawg ntseeg tes hauj lwm kiag li. Yam ob, tes hauj lwm txog cov neeg ua hauj lwm. Qhov no yog ib teg hauj lwm loj. Yam peb, tes hauj lwm tshaj tawm txoj moo zoo. Qhov no kuj yog ib teg hauj lwm loj thiab. Yam plaub, ntau yam ntawm tes hauj lwm qib siab. Tus ciaj ciam ntawm tes hauj lwm no mas loj me ntsis, thiab nws muaj kev ua yeeb yaj kiab, tes hauj lwm sau ntawv, kev txhais lus, suab paj nruag, kev ua vis dis aus, kev kos duab, thiab ntau yam ntxiv. Yam tsib, lub neej hauv pawg ntseeg. Yam rau, tes hauj lwm tswj hwm tej khoom muaj nqis. Yam xya, tes hauj lwm kev tshem tawm. Yam yim, tej hauj lwm sab nraud. Yam cuaj, pawg ntseeg txoj kev pab cuam. Piv txwv li, pawg ntseeg daws tej kev nyuaj uas tshwm sim nyob rau hauv cov kwv tij thiab cov muam tej tsev li cas, thiab pawg ntseeg ua dab tsi rau tej ntawd, nrog rau kev mus saib cov kwv tij thiab cov muam uas nyob rau hauv tsev loj cuj thiab saib xyuas lawv tsev neeg li cas, thiab lwm yam—tag nrho tej no yog nyob rau hauv pawg ntseeg txoj kev pab cuam. Yam kaum, tej kev npaj thaum muaj xwm ceev. Qee zaus, pawg ntseeg yuav tshaj tawm qee yam kev daws ceev ceev. Piv txwv li, thaum muaj kab mob sib kis tshwm sim tuaj, pawg ntseeg tau siv ib txoj kev cais kom tsim nyog. Tej kev npaj uas zoo li no puav leej yog nyob rau hauv tes hauj lwm thaum muaj xwm ceev. Tej kev npaj tes hauj lwm mas feem ntau muaj kaum yam no. Lwm yam me me los sis tej xwm txheej tshwj xeeb puav leej nyob rau hauv kaum yam no—feem ntau, pawg ntseeg tes hauj lwm muaj kaum yam hauj lwm loj no. Tej no yog tus ciaj ciam ntawm tej kev npaj tes hauj lwm uas Vajtswv lub tsev tau tshaj tawm, puas yog? (Yog.) Tam sim no uas twb paub tej no tseeb lawm, nej txhua tus tsim nyog to taub tej kev npaj tes hauj lwm ntawm Vajtswv lub tsev me ntsis, thiab paub tias tej no yog tej hauj lwm loj hauv Vajtswv lub tsev. Qhov no yog tus ciaj ciam uas Vajtswv lub tsev cheem tsum cov thawj coj thiab cov neeg ua hauj lwm kom ua nyob rau hauv lawv tej luag hauj lwm. Lub ntsiab ntawm qhov no yog qhov hais tias, ua ib tug thawj coj los sis ib tug neeg ua hauj lwm lawm, tus ciaj ciam ntawm koj tes hauj lwm thiab tej luag hauj lwm uas koj yuav tsum ua kom tiav ntawd mas cais tsis tau tawm ntawm tej yam uas nyob rau hauv tej kev npaj tes hauj lwm no li—tag nrho tej no puav leej tim tsum. Dhau ntawm tej hauj lwm no, ntawm tej yam uas koj txaus siab hlo ua, ua li uas koj ua tau zoo me ntsis, ces Vajtswv lub tsev tsis muaj lwm yam uas cheem tsum ntxiv txog qhov koj ua koj tes dej num li lawm. Yog li ntawd, thaum koj tab tom ua koj tes hauj lwm, koj yuav tsum xav seb yuav ua tej hauj lwm no li cas, tej kev npaj tes hauj lwm uas Vajtswv lub tsev cheem tsum yog dab tsi, koj yuav tsum ua tes hauj lwm ntxaws ntxaws dab tsi, yuav coj mus ua tiag li cas, seb ua puas tau zoo, tam sim no mus txog qib twg lawm, seb koj puas tau taug tes hauj lwm ntawd qab, seb puas muaj ib teg hauj lwm twg uas ua tsis tau zoo los sis muaj qhov yuam kev thiab qhov tsis zoo, thiab seb txhua tus uas ua tes hauj lwm ntawd puas ua hauj lwm tiag tiag—koj yuav tsum xav txog tej no tas li. Tam sim no uas nej twb to taub tej hauj lwm ntxaws ntxaws uas muaj nyob rau hauv tej kev npaj tes hauj lwm lawm, puas tsim nyog Kuv piav qhia kom yooj yooj yim txog txhua yam no? Los sis tej zaum nej tab tom xav hais tias: “Peb twb koom nrog tej hauj lwm no tau ntau xyoo thiab peb to taub tej hauj lwm no tag nrho lawm; tsis tas yuav piav qhia ntxiv los tau—es qhia lwm yam uas tseem ceeb. Lub ncauj lus no tsis tshua tseem ceeb, txawm peb paub txog lub ncauj lus no thiab tsis paub los tsis tseem ceeb, thiab peb tsis xav hnov txog lub ncauj lus no”? Puas tsim nyog piav qhia lub ncauj lus no ntxiv? (Tsim nyog.) Vim nws tsim nyog, cia peb hais cov lus yooj yooj yim tham txog lub ncauj lus no. Kuv yuav xaiv qee yam uas nej tsis tshua paub, uas tsis tshua ntxaws, uas muaj lub ntsiab lus tob me ntsis, es sib qhia txog tej ntawd.

I. Tes Hauj Lwm Tswj Fwm

Cia peb pib sib qhia txog yam ib, uas yog tes hauj lwm tswj fwm. Tes hauj lwm tswj fwm yog qee yam uas muaj lub ntsiab lus tob tob thiab tsis ntxaws txaus, thiab ntau tus tib neeg tsis to taub. Tshwj xeeb yog, cov uas nyuam qhuav ntseeg Vajtswv tsis ntev tsis tshua paub txog kev tsim tsa pawg ntseeg thiab pawg ntseeg tes hauj lwm tswj fwm, thiab lawv tsis paub tias kev tswj fwm yog dab tsi. Txoj kev tswj fwm no tsis zoo ib yam li tej kev cai tswj fwm uas Vajtswv tshaj tawm. Tes hauj lwm tswj fwm no tseem ceeb yog hais txog tej kev cai tswj ntxaws ntxaws ntawm Vajtswv lub tsev uas ntsig txog tes hauj lwm tsim tsa pawg ntseeg. Thiab lub ntsiab ntawm tej kev cai tswj no yog dab tsi kiag? Tej kev cai no muaj qhov faib cov pawg ntseeg li cas, ib pawg ntseeg twg muaj pes tsawg leej neeg, tis npe rau cov pawg ntseeg li cas, thiab lwm yam. Tej no twb tau muab teem tseg rau hauv tej kev npaj tes hauj lwm lawm hais tias cov pawg ntseeg yuav tsum tau muab faib raws li cheeb tsam lawv nyob, uas yog 30 mus rau 50 leej tib neeg uas nyob sib ze ces muab cais ua ib pawg ntseeg. Piv txwv li hais tias cheeb tsam A muaj peb los sis plaub lub zos; yog hais tias cov zos no muaj 50 leej ntseeg, ces tuaj yeem muab lawv cais ua ib pawg ntseeg. Lawv yuav muaj lawv lub sij hawm thiab qhov chaw los sib txoos ua ke, lawv yuav muaj cov thawj coj thiab cov pab dej num hauv pawg ntseeg, nrog rau tes hauj lwm ntxaws ntxaws hauv pawg ntseeg los ua, thiab lawv txhua tus yuav raug pawg ntseeg no saib xyuas ua ke. Qhov no yog txoj kev cai uas hais txog kev faib pawg ntseeg thiab cov tswv cuab hauv pawg ntseeg. Tib lub sij hawm ntawd, pawg ntseeg no yuav nyob rau hauv ib cheeb tsam me twg txoj kev saib xyuas, nyob ntawm seb lub pawg ntseeg no nyob rau lub cheeb tsam twg, ces lub cheeb tsam me ntawd yuav tau saib xyuas tag nrho txhua yam hauj lwm uas nyob rau hauv lub pawg ntseeg ntawd, xws li lub neej hauv pawg ntseeg uas nyob rau qhov chaw ntawd, seb cov thawj coj thiab cov pab dej num puas haum, muab cov phau ntawv ntawm Vajtswv cov lus coj mus faib rau lawv, coj ntau yam kev npaj tes hauj lwm mus ua tiag, thiab qhia tawm tus Nyob Saud tej kev cheem tsum, thiab lwm yam. Vajtswv lub tsev muaj tej kev npaj tes hauj lwm ntxaws ntxaws rau tej yam xws li ib lub cheeb tsam me twg muaj pes tsawg lub pawg ntseeg, thiab ib cheeb tsam loj twg muaj pes tsawg lub cheeb tsam me, thiab cov cheeb tsam loj saib xyuas cov cheeb tsam me, hos cov cheeb tsam me saib xyuas cov pawg ntseeg, cov no yog cov theem tswj fwm. Muab hais yooj yooj yim hais tias, qhov no hu ua tes hauj lwm tswj fwm, thiab nws nyob rau hauv tus ciaj ciam ntawm cov thawj coj thiab cov neeg ua hauj lwm tej luag hauj lwm. Yog li ntawd, tej luag hauj lwm uas cov thawj coj thiab cov neeg ua hauj lwm yuav tsum ua kom tiav ntawd yog dab tsi? Lawv yuav tsum muab cov pawg ntseeg faib raws li thaj chaw thiab xwm txheej uas ib txwm muaj los ntawd kom raws nraim li tej kev npaj tes hauj lwm. Yog cov tib neeg hauv ib pawg ntseeg twg pheej coob zuj zus tuaj, ces pawg ntseeg ntawd yuav tsum tau muab faib dua raws li cov tib neeg seb coob npaum li cas thiab thaj chaw. Piv txwv li, yog ib pawg ntseeg twg loj hlob ntawm 50 mus rau 80 leej tib neeg lawm, ces yuav tsum muab faib ua ob pawg ntseeg; yog tag nrho ob pawg ntseeg no loj hlob ntawm 80 mus rau 150 leej tib neeg lawm, ces yuav tsum tau muab lawv faib ua peb pawg ntseeg. Yog ib pawg ntseeg twg loj hlob mus txog rau 70, 80, los sis 100 leej tib neeg es tseem tsis tau muab faib ua ob pawg ntseeg, ces qhov ntawd tsis yog qhia hais tias cov thawj coj thiab cov neeg ua hauj lwm uas nyob rau hauv pawg ntseeg no tsis to taub tes hauj lwm tswj fwm ntawm Vajtswv lub tsev lod? (Yog.) Thaum zoo li no, cov thawj coj thiab cov neeg ua hauj lwm yuav tsum nyeem tej kev npaj tes hauj lwm uas hais txog lub ncauj lus no—pawg ntseeg phau ntawv me me uas qhia txog tej kev npaj tes hauj lwm ntawd muaj tej kev cai tswj ntxaws ntxaws uas hais txog tej no. Yog ib pawg ntseeg twg raug muab faib ua ob pawg ntseeg tshiab lawm, ces ob pawg ntseeg no nyias yuav tsum xaiv nyias cov thawj coj thiab cov neeg ua hauj lwm uas tsim nyog xws li cov thawj coj, cov pab dej num hauv pawg ntseeg, thiab lwm yam. Yog li ntawd, cov thawj coj thiab cov neeg ua hauj lwm yuav tsum ua dab tsi? Lawv yuav tsum paub thiab tuav tau tias cov tib neeg uas nyob rau hauv pawg ntseeg muaj pes tsawg leej thiab qhov xwm txheej ntawm pawg ntseeg txoj kev tsim tsa. Qhov no yog pawg ntseeg tes hauj lwm tswj fwm, thiab nws yog tes hauj lwm uas loj tshaj plaws. Cov neeg Vajtswv xaiv tseg nyob rau qhov twg yuav tsum muaj ib pawg ntseeg nyob rau qhov ntawd, thiab thaum tsim tsa tau ib pawg ntseeg lawm, cov thawj coj thiab cov neeg ua hauj lwm yuav tsum tau ris txhua tes hauj lwm ntawm pawg ntseeg ntawd, xws li muab cov phau ntawv ntawm Vajtswv cov lus coj mus faib rau lawv, saib xyuas cov tswv cuab hauv pawg ntseeg, coj tej kev npaj tes hauj lwm mus ua tiag kom lawv thiaj li paub tias lub ntsiab ntawm tej kev npaj tes hauj lwm ntawd yog dab tsi. Tes hauj lwm tswj fwm tseem ceeb yog hais txog kev tsim tsa pawg ntseeg, thiab tsim tsa cov koom haum thiab cov neeg ua hauj lwm tswj fwm hauv pawg ntseeg—tag nrho tej no puav leej yog tej hauj lwm ntxaws ntxaws uas nyob rau hauv tes hauj lwm tswj fwm. Cov tib neeg twg uas pheej koom nrog tes hauj lwm no ntau dua? Cov pawg ntseeg uas ntseeg tshiab, cov pab pawg uas tshaj tawm txoj moo zoo, nrog rau cov thawj coj hauv cheeb tsam, cov thawj coj hauv cheeb tsam me, thiab cov thawj coj hauv pawg ntseeg uas nyob rau thaj tsam uas tab tom tshaj tawm txoj moo zoo rau, txhua tus puav leej koom nrog tes hauj lwm no ntau dua. Tshaj ntawd ntxiv, tes hauj lwm tswj fwm kuj muaj ib txoj hauj lwm tshwj xeeb thiab, uas yog muab cov pawg ntseeg ib co faib los ua cov pawg ntseeg uas ua dej num puv sij hawm, cov pawg ntseeg uas ua dej num ib nrab sij hawm, cov pawg ntseeg dog dig, thiab cov pab pawg B, thiab qhov no yog dua ib txoj hauj lwm uas cov thawj coj thiab cov neeg ua hauj lwm yuav tsum ua. Cov thawj coj thiab cov neeg ua hauj lwm yuav tsum nkag siab tias yuav faib cov pawg ntseeg li cas, thiab lub hauv paus ntsiab lus ntawm txoj kev faib cov pawg ntseeg ntawd yog faib tib neeg kom nyias mus nyob nyias ua ib pawg ntseeg raws li nyias tej dej num uas nyias ua, yog cais cov tib neeg uas ua ib teg dej num tawm ntawm cov tib neeg uas tsis ua, thiab cais cov tib neeg uas ua lawv tes dej num puv sij hawm tawm ntawm cov tib neeg uas ua lawv tes dej num ib nrab sij hawm—qhov no yog lwm txoj hauj lwm tswj fwm uas tshwj xeeb thiab ntxaws.

II. Tes Hauj Lwm Txog Cov Neeg Ua Hauj Lwm

Yam ob, tes hauj lwm txog cov neeg ua hauj lwm. Yam no yog hais txog kev xaiv tsa, kev tsa, thiab kev rho tawm cov thawj coj thiab cov neeg ua hauj lwm uas nyob rau txhua qib. Tej kev npaj tes hauj lwm muaj tej kev cai tswj ntxaws ntxaws uas hais txog tej kev xaiv tsa, yuav xaiv hom neeg twg los ua cov thawj coj thiab cov neeg ua hauj lwm, thiab tej hau kev thiab tej kev cheem tsum ntxaws ntxaws rau kev xaiv tsa. Kuj muaj qee yam xwm txheej tshwj xeeb thiab, piv txwv li, yog hais tias cov kwv tij thiab cov muam nyuam qhuav sib paub xwb es ib leeg tsis tshua paub ib leeg zoo, es xaiv tsis tau cov thawj coj thiab cov neeg ua hauj lwm uas tsim nyog nyob rau hauv txoj kev xaiv tsa ntawd yuav ua li cas? Thaum zoo li ntawd lawm, yuav tau txhawb thiab tsa tib neeg los, tshuaj xyuas seb leej twg tsim nyog ua ib tug thawj coj dua me ntsis, ces tom qab ntawd ua kom paub lawv ntxiv, sib qhia, thiab ua tej yam tshuaj xyuas uas yooj yooj yim, ces tom qab ntawd mam li tsa lawv. Tsis tas li ntawd, thaum tus Nyob Saud npaj ib txoj hauj lwm loj los sis tsa ob peb tug neeg los ua cov saib xyuas, mas qhov no yog ib qho kev npaj tes hauj lwm uas tshwj xeeb. Kuj muaj lwm qhov xwm txheej uas tshwj xeeb thiab, qhov ntawd yog thaum ib tug tib neeg twg sau ib tsab ntawv mus qhia tawm rau tus Nyob Saud hais tias tus thawj coj no tus thawj coj tod tsis ua tes hauj lwm tiag tiag thiab taug ib tug tawm tsam khetos txoj kev, es tus Nyob Saud tshaj tawm ib qho kev npaj tes hauj lwm los rho tus thawj coj uas raug muab qhia tawm ntawd tawm ntawm lawv txoj hauj lwm mus tom qab tshawb xyuas qhov no lawm. Qhov no yog lwm qho kev npaj tes hauj lwm uas ntsig txog tes hauj lwm ntawm cov neeg ua hauj lwm. Muab hais luv luv hais tias, tes hauj lwm uas ntsig txog cov neeg ua hauj lwm ntawd yog hais txog kev xaiv tsa, kev tsa, thiab kev rho tawm cov thawj coj thiab cov neeg ua hauj lwm uas nyob rau txhua qib hauv pawg ntseeg. Tes hauj lwm no yooj yim dua me ntsis, thiab yooj yim to taub.

III. Tes Hauj Lwm Tshaj Tawm Txoj Moo Zoo

Yam peb, tes hauj lwm tshaj tawm txoj moo zoo. Tes hauj lwm tshaj tawm txoj moo zoo yog thawj yam hauj lwm loj ntawm tes hauj lwm qib siab ntxaws ntxaws tom qab tes hauj lwm tswj fwm thiab tes hauj lwm txog cov neeg ua hauj lwm uas nyob rau hauv Vajtswv lub tsev. Vajtswv lub tsev tau npaj ntau yam kev npaj tes hauj lwm ua ntu zus rau tes hauj lwm no, npaj tej kev npaj tes hauj lwm ntxaws ntxaws uas hais txog cov neeg uas yuav qhia txoj moo zoo rau, thaj tsam chaw uas yuav tshaj tawm txoj moo zoo, thiab txoj kev thiab hau kev uas yuav siv los tshaj tawm txoj moo zoo. Tib lub sij hawm ntawd, Vajtswv lub tsev kuj muaj qee nqe lus ntxaws ntxaws nyob rau hauv tej kev npaj tes hauj lwm uas hais txog txhua phau ntawv ntawm Vajtswv cov lus, cov yeeb yaj kiab thiab vis dis aus, thiab ntau yam kev ua yeeb yam uas yuav tsum tau ua rau kev tshaj tawm txoj moo zoo, thiab haj tseem muaj tej nqe lus ntxaws ntxaws uas hais txog ntau hom kev xav phem uas sawv daws muaj thiab nquag nug txog ntawm cov neeg uas yuav qhia txoj moo zoo rau ntawd thiab. Tej zaum qee nqe lus tsis tau muab sau ua ntawv kom ntxaws ntxaws, tiam sis cov nqe lus ntawd twb tau sib qhia ntawm ncauj ntau nqe lawm. Tes hauj lwm tshaj tawm txoj moo zoo yeej nce qib thiab huam vam txuas ntxiv mus tas li, thiab thaum tes hauj lwm no nce qib mus, Vajtswv lub tsev tau tsim ib co kev npaj tes hauj lwm ntxaws ntxaws thiab kev cai tswj hais txog tej teeb meem uas pheej tshwm tuaj thiab pheej ntsib, thiab Vajtswv lub tsev kuj tau tshaj tawm qee yam kev cheem tsum ntxaws ntxaws thiab tej hauj lwm rau cov neeg tshaj tawm txoj moo zoo, cov leg num tshaj tawm txoj moo zoo, thiab cov saib xyuas tes hauj lwm tshaj tawm txoj moo zoo thiab. Txawm hais tias nyob rau theem tom qab no Vajtswv lub tsev tsis tau hais ntau txog tej kev npaj rau tes hauj lwm tshaj tawm txoj moo zoo los xij, qhov tseeb no twb tau muab sib qhia nyob rau hauv pawg ntseeg tas li lawm. Tshwj xeeb yog, tom qab txoj moo zoo pib nthuav dav mus rau lwm lub teb chaws lawm, Vajtswv lub tsev thiaj li tau npaj tej kev npaj tes hauj lwm ntxaws ntxaws rau kev txhais lus los ua ntau hom lus. Cov neeg txhais lus thiab cov tshaj tawm txoj moo zoo uas paub ntau hom lus txawv teb chaws ntawd siv zog heev los koom tes ua hom hauj lwm no, thiab Vajtswv lub tsev tau siv ntau tus tib neeg uas zoo li no los koom tes ua tes hauj lwm tshaj tawm txoj moo zoo, thiab qhov no mus raws li Vajtswv lub tsev tej kev npaj tes hauj lwm. Muab hais luv luv hais tias, tus Nyob Saud tus kheej yeej pheej coj kev, nug txog, taug qab, thiab saib xyuas tes hauj lwm tshaj tawm txoj moo zoo tas li. Yog li ntawd, tej luag hauj lwm uas cov thawj coj thiab cov neeg ua hauj lwm yuav tsum ua kom tiav rau tes hauj lwm no yog dab tsi? Qhov muaj ib tug saib xyuas tes hauj lwm tshaj tawm txoj moo zoo ntawd tsis tau txhais hais tias cov thawj coj thiab cov neeg ua hauj lwm cia li tso tes plhuav, tsis cuab pob ntseg mloog tes hauj lwm ntawd ib qho li, tsis nug txog, thiab cia li tsis quav ntsej, thiab xav hais tias, “Cia tes hauj lwm huam vam mus zoo li cas los xij. Yeej tsis muaj dab tsi cuam tshuam rau kuv li. Kuv yog tus saib xyuas lub neej hauv pawg ntseeg thiab ntau yam hauj lwm qib siab. Yog muaj teeb meem rau tes hauj lwm tshaj tawm txoj moo zoo los tsis yog kuv li hauj lwm.” Qhov no puas tau? (Tsis tau.) Qhov no yog kev tso koj lub luag hauj lwm tseg. Tag nrho tej hauj lwm hauv Vajtswv lub tsev, tes hauj lwm uas tseem ceeb tshaj plaws uas cov thawj coj thiab cov neeg ua hauj lwm yuav tsum tsom ntsoov rau yog tes hauj lwm tshaj tawm txoj moo zoo. Tej zaum tsis tau kom koj saib xyuas tes hauj lwm no kiag, tiam sis koj yuav tsum nug seb tes hauj lwm no huam vam mus txog qib twg lawm thiab nws nce qib mus li cas lawm—koj yuav tsum taug qab, paub txog, thiab tuav tau tej no. Tshwj xeeb yog hais txog qee tus neeg tseem ceeb, xws li cov neeg hais lus tim khawv thiab cov ywg dej uas nyob rau hauv cov pab pawg tshaj tawm txoj moo zoo, nrog rau cov saib xyuas tes hauj lwm tshaj tawm txoj moo zoo ntawd, koj yuav tsum tuav tau lawv tej xwm txheej kom ncav sij hawm tas li, thiab yog muaj teeb meem tshwm sim rau cov neeg ua hauj lwm no, koj yuav tsum daws kom tam sid—tsis txhob yog muab tes hauj lwm cob rau lawv tas lawm ces cia li tso tes plhuav tsis quav ntsej li. Tshaj ntawd ntxiv, koj yuav tsum tshuaj xyuas thiab coj qhia txhua tus neeg hais lus tim khawv uas ua tes hauj lwm tshaj tawm txoj moo zoo ntawd tas li, nrog rau cov uas nyob rau hauv pawg ntseeg thiab cov uas tshaj tawm txoj moo zoo ua ntej hauv os lais, nrog rau cov ywg dej uas nyob rau hauv txhua pab pawg. Vajtswv lub tsev tej kev npaj tes hauj lwm twb kom txhua tus neeg hais lus tim khawv thiab cov ywg dej ntawd yuav tsum tau txais kev cob qhia tshwj xeeb los ntev lawm. Kev cob qhia tshwj xeeb txhais li cas? Qhov ntawd txhais hais tias yuav tsum paub tseeb tias cov neeg hais lus tim khwv thiab cov ywg dej to taub meej txog qhov tseeb ntawm tej zeem muag thiab lawv tuaj yeem piav tau tej no kom meej. Yog qhov tseeb ntawm tej zeem muag ntawd muaj ib qho uas lawv paub tsis meej tag nrho, ces yuav tsum tau sib qhia tas li, thiab cov tshaj tawm txoj moo zoo thiab cov ywg dej yim to taub ntxaws, ces yim zoo xwb. Vajtswv lub tsev muaj tej kev npaj tes hauj lwm rau qhov no, puas yog? (Yog.) Tes hauj lwm tshaj tawm txoj moo zoo yog ib teg hauj lwm uas ntxaws thiab nyuaj uas muaj ntau yam hauj lwm sib txawv. Yuav tsum paub tseeb hais tias ua tau txhua tes hauj lwm zoo thiab taug qab tau ti; qhov no yog Vajtswv cov lus txib. Txhua tes hauj lwm yuav tsum ua kom tau zoo, thiab yuav tsum ua kom paub tseeb tias qhov tshwm sim los ntawm txhua tes hauj lwm ntawd mas zoo zuj zus mus—tsuas yog ua li no xwb thiaj li mus raws li Vajtswv tej kev npaj siab. Txhua yam hauj lwm qib siab, xws li kev ua yeeb yaj kiab, tes hauj lwm sau ntawv, suab paj nruag, kos duab, thiab kev txhais lus, puav leej yog los pab txhawb thiab yog lub zog txhawb tes hauj lwm tshaj tawm txoj moo zoo, thiab tes hauj lwm tshaj tawm txoj moo zoo yog tes hauj lwm uas ua ntej tshaj plaws ntawm txhua tes hauj lwm. Yog li ntawd, cov uas ua ntau yam dej num ntawd yuav tsum ua lawv tus kheej tes hauj lwm kom zoo thiab ua kom tau raws li qhov Vajtswv cheem tsum. Ua li no, mas thiaj li yog lawv muaj feem hauv tes hauj lwm tshaj tawm txoj moo zoo. Qhov no yog vim txhua tes hauj lwm qib siab no puav leej yog ua los pab tshaj tawm txoj moo zoo, thiab txhua tes hauj lwm no yuav tsum muab tes hauj lwm tshaj tawm txoj moo zoo ua lub hauv paus thiab muab kev pub tsis tu ncua rau tes hauj lwm tshaj tawm txoj moo zoo. Niaj hnub no, txhua yam ntaub ntawv, yeeb yaj kiab, thiab ntau yam vis dis aus uas tim tsum rau txoj kev tshaj tawm txoj moo zoo ntawd yog tsim los ntawm ntau cov neeg Vajtswv xaiv tseg uas siv zog ua hauj lwm nyob rau tom qab. Txhua yam uas cov tib neeg no ua nyob rau tom qab ntawd mas txhawb tau tes hauj lwm tshaj tawm txoj moo zoo yam muaj zog heev. Yav dhau los, Vajtswv lub tsev tsis muaj ntau hom yeeb yaj kiab, tsis muaj nkauj ntau, thiab tsis muaj cov vis dis aus uas hais lus tim khawv txog txoj kev ntsib kev pom ntau. Tsuas yog vam khom rau cov neeg tshaj tawm txoj moo zoo qhia tas li xwb. Cov neeg tshaj tawm txoj moo zoo tham txog ntua thaum lawv lub qhov ncauj qhuav tag los tsis pom ib qho txiaj ntsig uas tseem ceeb li, thiab qhov coj tau ib tug neeg los ntseeg mas nyuaj. Tom qab uas pawg ntseeg tsim txhua yam yeeb yaj kiab, ces tes hauj lwm ntawm pab pawg tshaj tawm txoj moo zoo ntawd thiaj li sib zog lawm, thiab yooj yim dua li yav tas los, thiab ua tau hauj lwm zoo tuaj lawm. Ib txhia tib neeg mas tawv ncauj thiab xav li qub xwb, thiab thaum koj tshaj tawm txoj moo zoo rau lawv, txawm koj yuav qhia txog qhov tseeb li cas los xij, lawv yeej tsis ntseeg li, thiab lawv tseem muaj lawv tej kev xav phem thiab tsis kam lees txais qhov tseeb ntawd thiab—thaum zoo li ntawd lawm koj yuav ua li cas? Koj kom lawv saib ib ob zaj yeeb yaj kiab uas ua txog cov lus tim khawv uas hais txog txoj moo zoo, ces lawv tej kev xav phem yuav hloov, thiab lawv yuav pib muaj lub siab nyiam txoj hau kev tseeb. Thaum lawv rov los nrhiav dua, yuav tsis muaj tej kev thaiv los sis tej teeb meem loj nyob rau hauv lawv lub siab lawm, thiab thaum koj rov qhia txog qhov tseeb rau lawv dua, lawv yuav lees txais tau yooj yim lawm. Vim li ntawd, qhov txiaj ntsig yeej pom tau tseeb heev hais tias thaum koj muab cov yeeb yaj kiab uas Vajtswv lub tsev ua rau cov neeg uas yuav qhia txoj moo zoo rau ntawd saib, los sis nyeem Vajtswv cov lus rau lawv mloog, los sis muab cov vis dis aus uas hais lus tim khawv txog txoj kev ntsib kev pom rau lawv saib—mas qhov ua li no tau txiaj ntsig dua li qhov koj hais lus ntau ntau rau lawv mloog. Txawm leej twg nrhiav thiab tshawb xyuas txoj hau kev tseeb los xij, xub kom lawv saib qee zaj yeeb yaj kiab ua ntej tso, ces mam li kom lawv nyeem Vajtswv cov lus kom ntau ntxiv, qhov ua li no yog npaj txoj kev rau lawv. Tom qab no, mam li qhia txog qhov tseeb rau lawv los daws lawv tej kev xav phem. Qhov no ua rau txhua yam mus tau zoo dua. Niaj hnub no, cov uas tshawb xyuas txoj hau kev tseeb twb tau saib ntau zaj yeeb yaj kiab thiab cov vis dis aus hais lus tim khawv uas Vajtswv lub tsev ua nyob rau hauv os lais lawm, thiab tshwj xeeb yog, lawv twb tau nyeem Vajtswv cov lus ntau heev lawm; ua ntej lawv los nrhiav thiab tshawb xyuas lawv twb muaj lub siab nyiam txoj hau kev tseeb, thiab feem ntau lawv twb lees paub tias qhov no yog txoj hau kev tseeb lawm. Nej puas pom ib yam dab tsi nyob rau hauv qhov no li? Cov yeeb yaj kiab no, cov vis dis aus uas hais txog Vajtswv cov lus no, cov vis dis aus uas hais lus tim khawv txog txoj kev ntsib kev pom no, cov vis dis aus uas hu nkauj qhuas Vajtswv no, thiab lwm yam uas Vajtswv lub tsev ua no ua tau tim khawv rau Vajtswv zoo heev! Tsis tas yuav siv zog qhia thiab nrog cov neeg uas yuav qhia txoj moo zoo rau ntawd sib cav li; thaum lawv saib cov yeeb yaj kiab no lawm, lawv yeej lees txais tau txoj hau kev tseeb lawm. Qhov no txuag tau cov uas tshaj tawm txoj moo zoo lub sij hawm ntau heev thiab qhia tau hais tias txhua yam kev txhawb nqa txoj kev tshaj tawm txoj moo zoo ntawd mas muaj zog heev! Muaj ntau yam khoom siv nplua mias heev rau kev tshaj tawm txoj moo zoo! Ntau tus neeg uas yuav qhia txoj moo zoo rau mas xav tsis thoob li thaum lawv mus rau hauv os lais mus tshawb xyuas Vajtswv tes hauj lwm, vim tias nyob hauv Vajtswv lub tsev lub vej xaij muaj ntau yam kawg nkaus thiab nplua mias kawg li! Vajtswv cov lus mas nplua mias, ntau hom yeeb yaj kiab thiab vis dis aus los muaj nplua mias, thiab muaj tej lus tim khawv uas hais txog txoj kev ntsib kev pom nplua mias thiab muaj txhua yam uas koj xav tau. Qhov no yog qhov txiaj ntsig los ntawm Vajntsujplig tes hauj lwm thiab txoj kev coj kev tiag tiag li! Txhua yam no yog tawm los ntawm Vajtswv tes hauj lwm tiag tiag li. Txawm tus zaj loj liab ploog thiab lub ntiaj teb ntawm sab kab lis kev cai ntseeg yuav tshaj tawm tej lus xaiv uas tsis muaj tseeb thiab hais lus phem npaum li cas los xij, yeej tsis muaj qab hau dab tsi li. Txawm li cas los xij, tej txiaj ntsig uas tau los, thiab tej tawg paj txi txiv uas tau los ntawd, sawv daws puav leej pom tseeb lawm hais tias yog tau los ntawm Vajtswv lub tsev tej hauj lwm los, thiab tej ntawd yog tej muaj tseeb uas Vajtswv cov lus ua tau tiav.

Nyob rau hauv tes hauj lwm tshaj tawm txoj moo zoo ntawm lub nceeg vaj ntawd, txhua yam hauj lwm hauv Vajtswv lub tsev mas npaj tau muaj txheej txheem zoo heev thiab ua mus raws li txheej txheem. Tes hauj lwm tshaj tawm txoj moo zoo yog ib teg hauj lwm uas tseem ceeb, siv sij hawm ntev, thiab nyuaj thiab hnyav heev. Yog li ntawd, cov uas ua tes hauj lwm tshaj tawm txoj moo zoo ntawd, txawm lawv yog cov saib xyuas los sis cov neeg ua hauj lwm tshaj tawm txoj moo zoo dog dig los xij, yuav tsum paub tseeb txog qhov tseem ceeb ntawm tes hauj lwm no nyob rau hauv lawv lub siab. Txawm hais tias nej ua ntej hlo ua tes hauj lwm tshaj tawm txoj moo zoo thiab ua nej tej dej num los, nyob rau tom nej qub qab, uas hais tau tias, nyob rau qhov tsis muaj neeg pom, mas muaj ntau tus kwv tij thiab nkauj muam uas ua ntau yam hauj lwm txhawb nqa heev, thiab lawv yog lub zog uas txhawb nqa tes hauj lwm tshaj tawm txoj moo zoo ntawd. Qhov Kuv hais li no yog txhais li cas? Txhua tes hauj lwm hauv Vajtswv lub tsev ces yog muab txoj kev tshaj tawm txoj moo zoo ua lub hauv paus, thiab tej dej num uas txhua tus neeg Vajtswv xaiv tseg ua ces yog ua los pab rau txoj kev tshaj tawm txoj moo zoo xwb. Txhua tus kwv tij thiab nkauj muam uas ua ib teg dej num ntawd puav leej muaj feem nrog tes hauj lwm tshaj tawm txoj moo zoo, thiab txhua tes hauj lwm puav leej yog ntsig txog tes hauj lwm tshaj tawm txoj moo zoo yam ti heev thiab ze heev. Muab hais luv luv hais tias, txhua tes hauj lwm, nrog rau tes hauj lwm tshaj tawm txoj moo zoo ntawd, yog ib teg dej num uas yuav tsum tau ua kom zoo los ua tim khawv rau Vajtswv tes hauj lwm, txhua tes hauj lwm puav leej ntsig txog tes hauj lwm uas tseem ceeb tshaj plaws yam ti heev, uas yog ua tim khawv txog Vajtswv. Qhov no yeej yog tshaj plaws. Yog li ntawd, Vajtswv lub tsev thiaj li muab tes hauj lwm tshaj tawm txoj moo zoo no tso rau qhov tseem ceeb tshaj plaws ntawm txhua tes hauj lwm, thiab yog tes hauj lwm zeeg ib ntawm txhua tes hauj lwm hauv Vajtswv lub tsev—qhov no tsim nyog kawg nkaus li lawm. Tes hauj lwm no yog ib teg hauj lwm uas loj, nyuaj thiab hnyav, thiab siv sij hawm ntev heev, thiab txhua tus neeg Vajtswv xaiv tseg, txhua tus neeg uas raws Vajtswv qab, yuav tsum muaj lub zog thev taus, lub siab ntev, thiab txoj kev ntseeg txaus los npaj ua tes hauj lwm no kom zoo, thiab tawm tsam kob tsov rog uas ntev ntev no. Txawm koj yuav tiv li 10 xyoo, 20 xyoo, los sis 30 xyoo los xij, koj yuav tsum ua lub siab ncaj rau Vajtswv, muab koj txoj sia thiab koj ib sim neej fij los ua tes hauj lwm tshaj tawm txoj moo zoo, thiab ua siab ncaj rau Vajtswv mus kom txog thaum kawg. Qhov no yog ib lub luag hauj lwm tseem ceeb uas txhua tus neeg uas raws Vajtswv qab yuav tsum tau ris, tes dej num no yog txhua tus tes dej num, thiab kuj yog cov lus txib uas Vajtswv muab tso rau txhua tus ua thiab.

Los ntawm qhov Kuv qhia no, nej txhua tus puas muaj kev kub siab hauv nej lub siab, thiab nej puas tau pib saib tes hauj lwm tshaj tawm txoj moo zoo tseem ceeb? Yav tas los ib txhia tib neeg hais tias, “Kuv tsis to taub txog tej hauj lwm thev naus laus ntsis, kuv tsis txawj ua yeeb yam thiab ua tsis tau ib tug neeg ua yeeb yam, kuv tsis muaj lub hauv paus ruaj khov txog kev siv lus, yog li ntawd kuv tsis paub sau ntawv, kuv tsis to taub txog suab paj nruag thiab kuv haj yam tsis paub txog kev kos duab. Vim kuv tsis txawj ib yam dab tsi li es thiaj li muab kuv xa mus rau ib pab pawg tshaj tawm txoj moo zoo. Cov pab pawg uas tshaj tawm txoj moo zoo ntawd tsis zoo ib yam li ib qho chaw uas tsis muaj neeg nco qab lawm nyob rau hauv Vajtswv lub tsev lod? Thiab vim kuv raug xa mus rau ib qho chaw uas tsis muaj neeg nco qab lawm, kuv puas tseem muaj kev cia siab tias yuav tau txais kev cawm dim?” Puas yog li no? Yog koj yeej to taub qhov xwm txheej no li ntawd, ces koj nkag siab Vajtswv yuam kev lawm: Kev tshaj tawm txoj moo zoo yog ib lub luag hauj lwm uas txhua tus neeg yuav tsum tau ua. Yog koj tsis txawj dab tsi thiab tsis to taub txog tej hauj lwm thev naus laus ntsis, thiab txhua yam uas koj ua tau tsuas yog tshaj tawm txoj moo zoo xwb, ces yuav kom koj mus ua tes dej num nyob rau hauv ib pab pawg tshaj tawm txoj moo zoo. Qhov no yog koj lub cib fim zaum kawg, thiab qhov ua li no yog kom paub tseeb tias tsis nkim koj ib yam li nkim ib yam khoom siv pov tseg, thiab kom siv tau ntau npaum li ntau tau, kom koj thiaj li ua tau koj txoj hauj lwm li ib tug tib neeg kom zoo tshaj plaws. Koj tsis txawj ua dab tsi thiab koj ua dab tsi los hlwb qeeb, tiam sis koj muaj peev xwm ua tau tes dej num tshaj tawm txoj moo zoo kom zoo, thiab txawm yog hais kom koj mus nrhiav cov neeg uas yuav qhia txoj moo zoo rau los, koj yeej tuaj yeem mus ua tiag tiag, thiab muab cov neeg uas yuav qhia txoj moo zoo rau uas koj nrhiav tau los ntawd rau cov neeg tshaj tawm txoj moo zoo. Nyob rau tib lub sij hawm ntawd koj tuaj yeem maj mam kawm tias yuav tshaj tawm txog Vajtswv cov lus, Vajtswv tes hauj lwm, thiab Vajtswv tej kev npaj siab li cas, thiab coj tib neeg los rau ntawm Vajtswv lub xub ntiag. Qhov no tsis yog koj tes dej num lod? Lwm tus tib neeg ua tau qee yam txiaj ntsig los ntawm kev ua tes hauj lwm sau ntawv, tes hauj lwm ua yeeb yaj kiab, thiab lwm yam hauj lwm, tiam sis koj tsis paub ua tej no, thiab koj tsis muaj peev xwm tshwj xeeb los sis khoom pub dab tsi, tiam sis koj muab koj lub zog fij rau tes hauj lwm tshaj tawm txoj moo zoo, koj siv koj lub zog tag nrho thiab ua koj tes dej num kom tiav, thiab koj ua raws li cov lus uas Vajtswv tau txib kom koj ua lawm, tej no tsis yog kev ua zoo lod? Tej no kuj yog tej kev ua zoo thiab, thiab Vajtswv yuav nco ntsoov. Qhov no muaj tiav raws li cov lus no uas hais tias: Tej dej num uas tib neeg ua ntawd tsis cais tes dej num siab los sis tes dej num qis; qhov tseem ceeb ces yog seb koj puas ua siab ncaj rau koj tes dej num thiab seb koj puas ua tau raws li tus qauv xwb. Vajtswv coj rau txhua tus tib neeg yam ncaj ncees thiab sib txig sib luag; vim koj ua tsis tau dab tsi, thiaj li kom koj mus tshaj tawm txoj moo zoo—qhov ua li no yog kom koj thiaj li ua tau koj tes dej num zaum kawg, nyob rau hauv tej xwm txheej uas koj ua tsis tau lwm tes dej num. Los ntawm qhov no, yog tab tom muab ib lub cib fim thiab ib qho kev cia siab me me rau koj; koj tsis raug tshem tawm ntawm qhov koj muaj cai ua koj tes dej num mus. Vajtswv tseem muaj ib co lus txib rau koj ua thiab Nws tsis ua nkhaus rau koj. Yog li ntawd, cov uas raug xa mus rau cov pab pawg tshaj tawm txoj moo zoo ntawd tsis yog raug xa mus rau ib qho chaw uas tsis muaj neeg nco qab lawm, thiab tsis yog raug muab tso tseg, tiam sis yog lawv ua lawv tes dej num nyob rau lwm qhov chaw lawm xwb. Los ntawm qhov kev qhia txog tej kev npaj tes hauj lwm rau tes hauj lwm tshaj tawm txoj moo zoo ntawd, tam sim no puas yog nej saib tes hauj lwm tshaj tawm txoj moo zoo mus rau qhov zoo thiab tsis muaj kev to taub yuam kev txog tes hauj lwm tshaj tawm txoj moo zoo ntawd lawm? (Yog lawm.) Yog li ntawd nej puas khav theeb txog qhov ntawd? Txawm tib neeg ua tes dej num dab tsi los xij, Vajtswv tej kev cheem tsum ntawm lawv yeej tsis hloov li: Vajtswv xav tau lawv txoj kev ua siab ncaj thiab lub siab dawb paug. Yog koj hais tias, “Kuv tsis ua tus loj, kuv yuav tsis khav theeb, kuv tsuas ua li Vajtswv kom kuv ua xwb,” tiam sis koj tsis muaj lub siab ncaj, tsis muaj lub siab dawb paug, ces qhov ntawd yeej tsis tau. Txawm koj yuav nkag siab tes hauj lwm tshaj tawm txoj moo zoo li cas los xij, txawm li cas los xij, yog koj muaj lub siab ncaj thiab lub siab dawb paug, ces qhov koj ua koj tes dej num yeej yuav ua tau raws li tus qauv lawm. Txawm koj yuav saib tes dej num tshaj tawm txoj moo zoo ntawd zoo npaum li cas los sis koj yuav coj tus cwj pwm zoo npaum li cas rau tes dej num ntawd los xij, yog koj tiv tsis taus kev txom nyem, thiab koj tsis muaj lub zog thev taus thiab tsis muaj lub siab ncaj, ces qhov ntawd los yeej tsis tau li thiab. Yog li ntawd, txawm yuav muab koj tso rau qhov twg, lub sij hawm twg los sis qhov chaw twg, koj nrog leej twg tham thiab koj ua tes dej num dab tsi los yeej tsis tseem ceeb. Vajtswv yeej yuav pom ntsoov koj thiab tshawb xyuas qhov tob tshaj plaws hauv koj lub siab kom meej tas li. Tsis txhob xav tias vim koj yog ib tug tswv cuab ntawm ib pab pawg tshaj tawm txoj moo zoo ces Vajtswv tsis quav ntsej koj lawm los sis Vajtswv tsis pom koj, es koj thiaj li ua tau li koj siab nyiam. Thiab tsis txhob xav tias yog koj raug xa mus rau ib pab pawg tshaj tawm txoj moo zoo lawm, ces koj tsis muaj kev cia siab tias yuav dim lawm, es cia li coj rau qhov ntawd nrog kev xav tsis zoo. Tej kev xav zoo li no puav leej tsis yog. Txawm yuav muab koj tso rau qhov twg los sis kom koj ua tes dej num dab tsi los xij, qhov ntawd yog qhov uas koj yuav tsum tau ua, thiab koj yuav tsum ua yam rau siab ntso thiab yam ris lub luag hauj lwm. Vajtswv tej kev cheem tsum ntawm koj tsis hloov, yog li ntawd koj txoj kev zwm rau Vajtswv tej kev npaj los yuav tsum tsis txhob hloov thiab. Cov neeg ua hauj lwm tshaj tawm txoj moo zoo muaj meej mom sib luag ib yam li cov uas ua lwm yam dej num; qhov ib tug tib neeg muaj nqis ntawd tsis yog ntsuas los ntawm tes dej num lawv ua, tiam sis yog ntsuas los ntawm seb lawv puas caum qhov tseeb thiab puas muaj qhov tseeb qhov muaj tiag xwb. Qhov Kuv yuav qhia txog tes hauj lwm tshaj tawm txoj moo zoo, tes hauj lwm loj thiab ntxaws ntxaws no, ces muaj npaum li no xwb.

IV. Ntau Yam ntawm Tes Hauj Lwm Qib Siab

Yam plaub, ntau yam ntawm tes hauj lwm qib siab. Qhov no muaj kev ua yeeb yaj kiab, tes hauj lwm sau ntawv, suab paj nruag, kos duab, kev txhais lus, thiab lwm yam. Ib txhia tib neeg hais tias, “Peb cov xaws khaub ncaws los kuj muaj feem rau tes hauj lwm ua yeeb yaj kiab thiab. Qhov xaws khaub ncaws ntawd puas suav tias yog ib tes hauj lwm?” Qhov xaws khaub ncaws ntawd muab suav nrog hom hauj lwm ua yeeb yaj kiab thiab suab paj nruag lawm; nws yog ib hom hauj lwm txhawb nqa uas koom nrog cov hauj lwm no. Nyob rau txhua theem, Vajtswv lub tsev muaj tej kev npaj tes hauj lwm ntxaws ntxaws uas hais txog tej kev cheem tsum ntxaws ntxaws ntawm cov hauj lwm qib siab no. Ib txhia yog muab sau ua ntawv qhia tawm, hos ib txhia yog hais lus qhia tawm los ntawm kev sib qhia thaum sib txoos ua ke. Txawm yuav qhia tawm li cas los xij, cov thawj coj thiab cov neeg ua hauj lwm yuav tsum ris lub luag hauj lwm, muab tej kev cheem tsum uas ntxaws ntxaws uas Vajtswv lub tsev tshaj tawm rau tes hauj lwm no sau tseg thiab teeb tsa kom zoo, ces tom qab ntawd qhia ntxaws ntxaws txog tej no thiab ua raws li tej no tiag tiag. Qhov no kuj yog ib tes hauj lwm loj thiab, thiab yog tes hauj lwm ntxaws ntxaws zeeg ob ntawm tes hauj lwm tshaj tawm txoj moo zoo. Hais txog tes hauj lwm ntxaws ntxaws no, Vajtswv lub tsev cheem tsum kom txhua tus neeg uas ua ntau yam hauj lwm qib siab ntawd kawm txoj kev paub qib siab uas ntsig txog lawv tej dej num ntawd txuas ntxiv, thiab tshawb nrhiav kom paub tseeb tias yam twg muaj txiaj ntsig rau Vajtswv lub tsev tes hauj lwm. Nyob rau tib lub sij hawm ntawd, Vajtswv lub tsev yuav qhia txog qhov tseeb tej hauv paus ntsiab lus thiab npaj tej kev npaj uas ntxaws ntxaws rau ntau yam hauj lwm qib siab txuas ntxiv. Qee zaus tej hauj lwm no muab qhia rau cov saib xyuas thiab cov tswv cuab ua ke, thiab qee zaus muab qhia rau cov thawj coj, cov neeg ua hauj lwm, thiab cov saib xyuas uas leg tes hauj lwm ntawd nkaus xwb. Txawm yog yuav qhia tawm thiab sib qhia raws li kev sau ntawv, los sis nyob rau tej kev sib txoos ua ke, li cas los xij, tes hauj lwm no yeej raug kho kom zoo thiab ua kom tau raws li tus qauv tas li, thiab pheej muaj tej kev npaj ntxaws ntxaws kom raws li tej kev tim tsum ntawm tes hauj lwm tshaj tawm txoj moo zoo ntawd tas li. Piv txwv li hais tias Vajtswv lub tsev ua ib zaj yeeb yaj kiab uas muaj ib lub ntsiab lus uas tshiab, thiab zaj yeeb yaj kiab ntawd ua tau zoo heev. Tom qab muab zaj yeeb yaj kiab tso rau hauv os lais lawm, muaj neeg saib coob heev. Thaum zoo li no lawm, Vajtswv lub tsev muaj ib co kev cheem tsum ntxaws ntxaws rau hom hauj lwm no raws li tej lus tawm tswv yim los ntawm cov neeg saib thiab tej kev tim tsum ntawm tes hauj lwm tshaj tawm txoj moo zoo ntawd. Muab hais luv luv hais tias, tes hauj lwm no mas yuav tau muaj kev xaus lus thiab txhim kho kom zoo tas li, thiab tes hauj lwm no kuj loj hlob tas li thiab.

Hais txog ntau yam hauj lwm qib siab ntawd mas, tej kev npaj ntawm Vajtswv lub tsev kom tib neeg kawm ntau ntxiv, thiab nrhiav xib fwb thiab ntau qhov chaw qhia thiab tej ntaub ntawv uas qhia tej ntawd coj los kawm. Piv txwv li kev hu nkauj; nrhiav ib tug xib fwb los qhia thiab kom tus xib fwb ntawd qhia txog kev siv suab kuj yog ib qho kev npaj tes hauj lwm ntxaws ntxaws thiab. Tom qab hnov txog qhov kev npaj no lawm, cov thawj coj thiab cov neeg ua hauj lwm yuav tsum nrhiav ib tug xib fwb uas haum rau tes hauj lwm no raws li tus Nyob Saud tej kev cheem tsum thiab kom tus xib fwb ntawd qhia peb cov neeg hu nkauj, los ntawm qhov pab cov neeg hu nkauj ntawd kawm kom paub txog lub suab paj nruag ntawd kom yog thiab txoj kev hu nkauj kom yog, thiab yuav tsum nrhiav tej qauv nkauj uas zoo los kawm. Txoj kev paub qib siab txog kev sau nkauj thiab kev hu nkauj ntawd mas yuav tsum tau kawm tas li, thiab tej kev npaj tes hauj lwm ntawm Vajtswv lub tsev kom tib neeg kawm txoj kev paub qib siab uas ntsig txog lawv tej dej num tas li, thiab kawm seb yuav siv qee txoj kev ua uas siab dua thiab muaj qab hau li cas, thiab lwm yam. Tej kev npaj tes hauj lwm thiab tej kev cheem tsum no tsis yog muab tshaj tawm ib zaug xwb ces tag li ntawd lawm, tiam sis cov thawj coj thiab cov neeg ua hauj lwm yuav tsum tau nquag sib qhia txog tej kev npaj tes hauj lwm no, coj qhia cov uas ua tes hauj lwm qib siab kom lawv thiaj li kawm tau txuas ntxiv, thiab siv zog kom txhua tes hauj lwm qib siab no loj hlob thiab tob zuj zus mus tas li thiab zoo mus ntxiv, es tsis txhob nyob qhov chaw qub. Ib txhia tib neeg xav hais tias, “Tej kev npaj tes hauj lwm uas tau muab rau peb hnub no, peb tsuas yog xyaum ua raws lub hli no xwb ces tag li ntawd lawm. Yog tus Nyob Saud tsis hais dab tsi txog qhov no rau yav tom ntej, ces tej zaum peb tsis tas yuav xyaum ua raws ntxiv lawm.” Puas yog li no tiag tiag? (Tsis yog.) Cov thawj coj thiab cov neeg ua hauj lwm yuav tsum tsis txhob xav li no kiag li, tiam sis yuav tsum ib ntus es mus nug thiab nug hais tias, “Nej txoj kev kawm txog tes hauj lwm no mus zoo li cas lawm? Nej puas ntsib ib qho kev nyuaj dab tsi li? Puas muaj ib yam dab tsi uas sib cov nyom los sis tawm tsam tej hauv paus ntsiab lus? Leej twg kawm tau zoo tshaj plaws, leej twg txawj tshaj, thiab leej twg nkag siab sai tshaj? Tom qab kawm tej tswv yim no tag lawm, yam uas nej tau kawm es nej xav hais tias zoo siv rau tes hauj lwm ntawm Vajtswv lub tsev ntawd yog dab tsi?” Tshaj ntawd ntxiv, cov thawj coj thiab cov neeg ua hauj lwm yuav tsum nug cov neeg hauv cov pab pawg tshaj tawm txoj moo zoo uas tab tom kawm lwm hom lus ntawd hais tias, “Koj kawm hom lus no tau pes tsawg xyoo lawm? Tsis ntev los no koj kawm mus zoo li cas lawm? Cov lus sib tham txhua hnub ntawd koj hais tau pes tsawg lo? Koj txhais puas tau cov lus uas hais txog sab ntsujplig? Koj siv puas tau hom lus no los tham txog tej qhov tseeb uas ntsig txog txoj kev tshaj tawm txoj moo zoo? Tam sim no koj txawj hais lus dua los koj txawj sau ntawv dua? Koj puas xav tau ib tug xib fwb los pab qhia koj? Puas muaj lwm tus uas tsim nyog dua thiab txawj dua los kawm lwm hom lus? Cov neeg ua hauj lwm uas zoo li no puas tau nce ntxiv? Puas muaj leej twg xav tias kev kawm lwm hom lus mas muaj teeb meem dhau thiab nyuaj dhau, es lawv tsis xav kawm ntxiv lawm, thiab tso tseg nrab ke, thiab xav hloov mus ua lwm tes dej num?” Tej teeb meem ntxaws ntxaws uas ntsig txog hom hauj lwm no yuav tsum tau nug txog thiab saib xyuas ua ntu zus. Vim tus Nyob Saud twb tau npaj tej kev npaj tes hauj lwm lawm, mas cov saib xyuas yuav tsum tau leg lub luag hauj lwm txog tej hauj lwm ntxaws ntxaws no kom mus txog thaum kawg kiag. Tsis txhob tos yam tsis ua dab tsi kom tus Nyob Saud nug; txawm tus Nyob Saud tsis nug li rau lub hli los sis ib xyoos los, koj tseem yuav tsum ua txhua tes hauj lwm kom zoo, kom zoo tshaj plaws li koj ua tau, thiab npaj txhij los lees txais tus Nyob Saud txoj kev tshuaj xyuas thiab kev coj kev txhua lub sij hawm—qhov no yog txoj kev xav uas yog. Qhov no yog vim tej kev npaj tes hauj lwm ntawd twb tau muab tshaj tawm thiab qhia lawm, yog li ntawd koj yog tus uas yuav tau taug tes hauj lwm no qab yam li yog tus saib xyuas tes hauj lwm no, thiab koj yuav tsum ua koj tej luag hauj lwm kom tiav. Txawm li cas los xij, yog koj ua tsis tau koj tej luag hauj lwm kom tiav, ces koj yog ib tug neeg tsis muaj nuj nqis thiab yuav tsum tau muab koj rho tawm mus thiab muab tshem tawm mus. Yog li ntawd, cov thawj coj thiab cov neeg ua hauj lwm yuav tsum ua tib zoo xav thiab sib qhia txog tej kev npaj tes hauj lwm ntxaws ntxaws no los sis tej kev qhia los ntawm tus Nyob Saud tas li, thiab tom qab ntawd coj tej no mus ua tiag thiab taug tes hauj lwm qab raws li qhov xwm txheej. Lawv yuav tsum saib seb tsis ntev los no tes hauj lwm twg uas lawv tsis tau saib xyuas thiab tsis tau tshuaj xyuas los ntev lawm, thiab tes hauj lwm twg uas lawv tus kheej tsis tshua txawj thiab tsis tau nug txog tsis ntev los no, thiab qhov xwm txheej tam sim no uas lawv tsis paub txog, ces tom qab ntawd mus saib tej ntawd. Tshaj ntawd ntxiv, hais txog ntau yam hauj lwm qib siab ntawd mas, Vajtswv lub tsev muaj lwm qhov kev npaj ntxaws ntxaws xws li: Yuav tsum nrhiav, cob qhia, thiab txhawb cov tib neeg uas muaj peev xwm txuas ntxiv. Yog li ntawd, cov thawj coj thiab cov neeg ua hauj lwm yuav tsum ua li cas thaum lawv tau txais qhov kev npaj tes hauj lwm no? Lawv yuav tsum ua tib zoo saib seb puas muaj leej twg tsim nyog ua hom hauj lwm no. Yog qee tus tib neeg tsim nyog ua hom hauj lwm no tiam sis tsis tshua muaj kev to taub txog txoj hauj lwm thev naus laus ntsis ntawd, ces yuav tsum tau cob qhia lawv kom sai thiab npaj kom lawv kawm thiab xyaum ua. Muab hais luv luv hais tias, ntau yam hauj lwm qib siab kuj yog ib teg hauj lwm tseem ceeb thiab. Muaj ntau yam nyob hauv tes hauj lwm no thiab qhov ciaj ciam ntawm tes hauj lwm no kuj loj heev thiab, yog li ntawd Vajtswv lub tsev thiaj li tau ua ntau yam kev npaj tes hauj lwm ntxaws ntxaws rau tes hauj lwm no. Qhov uas cheem tsum rau tes hauj lwm no ces yog kev kawm, kev xaus lus, thiab kev ua kom tob tas li, thiab kuj yuav tsum tau nrhiav tej hauv paus ntsiab lus uas tsim nyog los ua kom tau raws li tus qauv yam tsis tu ncua. Dhau ntawm qhov no lawm, yuav tsum tau cob qhia cov tib neeg uas muaj peev xwm uas tsim nyog ua tej dej num no yam tsis tu ncua. Qhov no yog qhov kev npaj tes hauj lwm rau yam loj ntawm ntau yam hauj lwm qib siab no, thiab kuj yooj yim to taub thiab.

V. Lub Neej Hauv Pawg Ntseeg

Yam tsib, lub neej hauv pawg ntseeg. Vajtswv lub tsev tau npaj tej kev npaj thiab tej kev cai tswj ntxaws ntxaws txog cov ntsiab lus uas noj thiab haus nyob rau hauv lub neej hauv pawg ntseeg, hom ntawm lub neej hauv pawg ntseeg, thiab cov tib neeg coob npaum li cas koom rau lub neej hauv pawg ntseeg. Vajtswv lub tsev kuj muaj tej kev npaj tes hauj lwm uas haum hais txog hom ntawm tej kev sib txoos ua ke thiab cov ntsiab lus ntawm lub neej hauv pawg ntseeg nyob rau hauv tej xwm txheej tshwj xeeb thiab tej xwm ib puag ncig tshwj xeeb. Cov hom kev npaj tes hauj lwm no feem ntau yog tshaj tawm ua ntaub ntawv. Tej kev npaj tes hauj lwm rau lub neej hauv pawg ntseeg ntawm cov neeg tshiab hauv cov teb chaws uas sib txawv—hom thiab pes tsawg zaus ntawm lawv tej kev sib txoos ua ke, thiab cov ntsiab lus uas lawv noj thiab haus hauv tej kev sib txoos ua ke, thiab ntau yam ntxiv—feem ntau mas yeej zoo ib yam li tej kev npaj tes hauj lwm rau lub neej hauv pawg ntseeg ntawm cov neeg Suav, dhau ntawm qee qhov xwm txheej tshwj xeeb xwb. Kuv nyuam qhuav qhia nej txog qhov dav dav ntawm tej kev npaj tes hauj lwm uas ntsig txog tus ciaj ciam rau lub neej hauv pawg ntseeg—qhov ntawd suav nrog cov ntsiab lus ntawm Vajtswv cov lus uas noj thiab haus thiab cov ntsiab lus rau kev sib qhia txog qhov tseeb hauv tej kev sib txoos ua ke rau lub sij hawm tsis ntev los no, thiab hom ntawm kev sib qhia hauv tej kev sib txoos ua ke. Piv txwv li, tsis pub ib tug tib neeg tswj kev hais lus ib leeg thaum sib qhia nyob hauv tej kev sib txoos ua ke, lub sij hawm ntev tshaj plaws uas tso cai rau txhua tus sib qhia, yuav coj thiab daws li cas rau cov tib neeg uas hais lus ntev heev thiab piav tsis meej, thiab lwm yam ntxiv—hauv tej kev npaj tes hauj lwm muaj tej lus qhia meej txog tag nrho tej yam ntxaws ntxaws no uas ntsig txog lub neej hauv pawg ntseeg thiab tej kev sib txoos ua ke. Cov thawj coj thiab cov neeg ua hauj lwm, ib kis mas, yog cov saib xyuas qhov tshaj tawm thiab qhia tawm tej kev npaj tes hauj lwm no, hos lwm kis mas, lawv yog cov saib xyuas kev sib qhia txog tej ntawd kom meej meej rau cov kwv tij thiab cov muam, ua kom tag nrho cov tswv cuab ntawm pawg ntseeg to taub thiab lees txais tej ntawd, tom qab ntawd lawv tsuas yog yuav tsum ua raws thiab tuav rawv tej ntawd kom nruj xwb. Tshwj xeeb tshaj yog cov uas pheej hais lus dhau ntawm lub ntsiab mus lawm, pheej ua rau muaj tej kev tab kaum, hais cov lus thiab cov kev qhuab qhia, thiab qw tej lus qw thaum hais lus hauv tej kev sib txoos ua ke ntawd mas yuav tsum raug txwv, thiab muaj tej kev cai tswj ntxaws ntxaws hais txog hom xwm txheej tshwj xeeb no nyob hauv tej kev npaj tes hauj lwm. Tej kev npaj tes hauj lwm uas hais txog lub neej hauv pawg ntseeg mas tseem ceeb yog muaj feem xyuam txog txhua yam uas ntsig txog tej kev sib txoos ua ke, tej no tsis nyuaj, yooj yim heev, thiab txawm ib tug tib neeg ua tes dej num dab tsi los xij, lawv tsuas yog yuav tsum tuav rawv tej hauv paus ntsiab lus uas nyob hauv tej kev npaj tes hauj lwm no xwb. Piv txwv li, nyob hauv tej kev sib txoos ua ke, cov pab pawg tshaj tawm txoj moo zoo tsuas yog yuav tsum tuav rawv tej hauv paus ntsiab lus hauv tej kev npaj tes hauj lwm uas hais txog lub neej hauv pawg ntseeg xwb—tsis muaj dab tsi tshwj xeeb rau lawv li. Lwm pab pawg los tsuas yog ua tes hauj lwm txawv ntawm lwm tus xwb, txhua yam yeej zoo ib yam thaum hais txog tej yam xws li tej kev sib txoos ua ke, kev sib qhia txog qhov tseeb, kev nyeem thov Vajtswv cov lus, thiab kev sib qhia txog tus kheej tej kev ntsib kev pom—yeej tsis dhau ntawm tus ciaj ciam no. Lawv tsuas yog yuav tsum xyaum ua raws li tej kev cai tswj tam sim no ntawm Vajtswv lub tsev uas hais txog cov ntsiab lus uas noj thiab haus nyob rau hauv lub neej hauv pawg ntseeg, hom kev sib qhia, thiab hom kev sib txoos ua ke xwb. Yog tej xwm txheej zoo, tib neeg tuaj yeem sib txoos ua ke tim ntsej tim muag, yog tsis muaj ces lawv tuaj yeem sib txoos ua ke hauv os lais. Qhov no yuav tsum yog ib yam uas yooj yim heev thiab faib tau meej meej. Ib txhia tswv cuab hauv pawg ntseeg nyob rau cov thaj av loj thiab cov teb chaws uas sib txawv, ib txhia nyob rau Yulauv thiab ib txhia nyob rau Nruab Nrab Teb Sab Hnub Tuaj; nyob rau hauv tej xwm txheej no, kev sib txoos ua ke hauv os lais yog qhov tsim nyog. Qhov ntawd yog nyob ntawm cov pawg ntseeg ntawm qhov chaw ntawd los txiav txim siab lub sij hawm uas lawv sib txoos ua ke thiab pes tsawg zaus ntawm kev sib txoos ua ke; Vajtswv lub tsev tsis npaj tej kev cai tswj ntxaws ntxaws hais txog qhov no, thiab tsis cuam tshuam rau qhov no. Vim li cas Vajtswv lub tsev thiaj li tsis cuam tshuam rau qhov no? Ib txhia tib neeg hauv pawg ntseeg tsis ua lawv tes dej num puv sij hawm; lawv muaj hauj lwm thiab tsev neeg, lawv tus kheej tej xwm txheej mas sib txawv, ntxiv rau qhov cov sij hawm nyob rau cov teb chaws uas sib txawv tsis zoo ib yam, yog li ntawd yuav tsum cia lawv tus kheej txiav txim siab seb ib lub lim tiam lawv yuav sib txoos ua ke pes tsawg zaus thiab txhua zaus sib txoos ua ke yog thaum twg. Vajtswv lub tsev tsis tsim tej kev cai tswj kom ntxaws ntxaws txog qhov no, tiam sis tsuas yog muab ib lub hauv paus ntsiab lus xwb. Vajtswv lub tsev tau teem qhov ciaj ciam txog qhov uas cov ntseeg tshiab yuav tsum sib txoos ua ke pes tsawg zaus hauv ib lub lim tiam, thiab muaj qhov sib txawv ntawm cov uas ua lawv tes dej num thiab cov uas tsis ua hais txog qhov lawv sib txoos ua ke pes tsawg zaus hauv ib lub lim tiam. Puas muaj ib qho kev npaj tes hauj lwm uas cheem tsum kom cov ntseeg tshiab sib txoos ua ke xya zaus hauv ib lub lim tiam? (Tsis muaj.) Yog li ntawd, cov ntseeg tshiab yuav tsum sib txoos ua ke pes tsawg zaus hauv ib lub lim tiam ntawd yog saib raws li dab tsi? (Qhov ntawd yog saib raws li cov ntseeg tshiab lub sij hawm.) Qhov sib txoos ua ke ob los sis peb zaug hauv ib lub lim tiam yog ntau tshaj plaws, thiab tsawg kawg yog ib zaug, ces yeej tsim nyog kawg nkaus lawm. Ib txhia tib neeg hais tias, “Cov tib neeg nyob rau hauv peb cheeb tsam mas khoom heev thaum lub caij ua liaj ua teb so, yog li ntawd txhua tus xav sib txoos ua ke txhua hnub—peb haj tseem kam sib txoos ua ke ib hnub ob zaug thiab. Peb yeej xav sib txoos ua ke tiag tiag.” Cov ntseeg tshiab lub siab kub lug thiab lawv pheej xav to taub qhov tseeb ntau ntxiv. Yog lawv tsev neeg tej xwm txheej tso cai, ces qhov lawv thov koom tej kev sib txoos ua ke kom ntau ntxiv ntawd yog ib qho zoo, tsuav yog tsis cuam tshuam rau lawv lub neej txhua hnub xwb. Qhov tib neeg yuav tsum sib txoos ua ke pes tsawg zaus hauv txhua lub lim tiam ntawd mas yuav tsum txiav txim siab raws li tsev neeg thiab tej hauj lwm ntawm cov neeg Vajtswv xaiv tseg nyob rau txhua cheeb tsam—Vajtswv lub tsev tsis tsim tej kev cai tswj kom ntxaws ntxaws txog qhov no. Cov neeg Vajtswv xaiv tseg uas muaj tej xwm txheej zoo uas ua tau li ntawd mas tuaj yeem sib txoos ua ke ntau dua, ces lawv yuav to taub qhov tseeb ntau dua thiab lawv lub neej txoj sia yuav loj hlob sai dua. Qhov no yog ib qho zoo. Txawm li cas los xij, cov uas tsis muaj tej xwm txheej tsim nyog ntawd yuav tsis haum rau txoj kev sib txoos ua ke li no, thiab yam tsawg kawg yog lawv koom ib los sis ob zaug kev sib txoos ua ke hauv ib lub lim tiam los yeej tau. Cov pawg ntseeg nyob rau cov cheeb tsam uas txawv sib txoos ua ke pes tsawg zaus hauv txhua lub lim tiam ntawd yog nyob ntawm cov neeg Vajtswv xaiv tseg los txiav txim siab, thiab tsis pub leej twg cuam tshuam rau qhov no. Qhov tseem ceeb tshaj plaws ntawm tej kev sib txoos ua ke yog kom tib neeg to taub qhov tseeb, tsis yog rau lwm yam laj thawj. Yog li ntawd, txhua lub pawg ntseeg sib txoos ua ke pes tsawg zaus ntawd yog txiav txim siab raws li tej xwm txheej tiag tiag ntawm pawg ntseeg ntawd. Yog cov neeg Vajtswv xaiv tseg tuaj yeem koom kev sib txoos ua ke ntau ib zaug ntxiv hauv ib lub lim tiam, ces qhov ntawd haj yam muaj txiaj ntsim rau lawv lub neej txoj sia loj hlob. Yog muaj cov tib neeg uas tsis caum qhov tseeb thiab tsis xav koom tej kev sib txoos ua ke ntau ntxiv, ces yuav tsum tsis txhob yuam lawv. Tshwj xeeb tshaj yog rau cov neeg ua hauj lwm noj nyiaj hli uas tsis tshua khoom thiab tsis muaj sij hawm koom tej kev sib txoos ua ke ntau ntxiv, ces yuav tsum tsis txhob cheem tsum kom lawv ua li no. Tsis hais tib neeg puas muaj tej xwm txheej tso cai mus koom tej kev sib txoos ua ke los sis lawv sib txoos ua ke pes tsawg zaus, Vajtswv lub tsev tsis cuam tshuam los sis tsis txwv. Qhov no yog vim hais tias tej xwm txheej thiab keeb kwm ntawm txhua tus ntseeg sib txawv, yog li ntawd yuav tsum tsis txhob yuam lawv. Hais txog cov ntsiab lus uas noj thiab haus nyob rau hauv lub neej hauv pawg ntseeg ntawd, Vajtswv lub tsev muaj tej kev cai tswj uas haum nyob hauv tej kev npaj tes hauj lwm, thiab cov thawj coj txhua qib hauv pawg ntseeg thiab cov kwv tij thiab cov muam yuav tsum to taub tej ntawd kom meej meej. Cov thawj coj thiab cov neeg ua hauj lwm yuav tsum to taub kom meej tias tej hauj lwm thiab tej yam ntxaws ntxaws uas tus Nyob Saud tej kev npaj tes hauj lwm cheem tsum kom ua ntawd yog dab tsi tiag, thiab cov kwv tij thiab cov muam kuj yuav tsum saib xyuas cov thawj coj thiab cov neeg ua hauj lwm seb lawv puas tab tom ua tes hauj lwm no. Thaum hais txog cov ntsiab lus uas noj thiab haus nyob rau hauv lub neej hauv pawg ntseeg, thiab tej kev npaj tes hauj lwm uas muaj feem xyuam txog tej kev sib txoos ua ke uas yuav tsum to taub thiab ua raws, cov thawj coj thiab cov neeg ua hauj lwm yuav tsum muaj kev pom zoo ib yam nrog cov neeg Vajtswv xaiv tseg—yeej tsis pub muaj lwm yam hlo li. Tej kev npaj tes hauj lwm uas hais txog tes hauj lwm ntawm lub neej hauv pawg ntseeg mas yooj yim heev, yooj yim rau tib neeg to taub, thiab muaj tiag.

VI. Kev Tswj Hwm Tej Khoom Muaj Nqis

Yam rau, kev tswj hwm tej khoom muaj nqis. Txawm tias tes hauj lwm tswj hwm tej khoom muaj nqis tsis muaj tej kev npaj tes hauj lwm tshaj tawm tas li zoo ib yam li tes hauj lwm tshaj tawm txoj moo zoo los sis ntau yam ntawm tes hauj lwm qib siab los xij, Vajtswv lub tsev kuj muaj tej kev npaj tes hauj lwm ntxaws ntxaws rau tes hauj lwm ntawd. Kev tswj hwm tej khoom muaj nqis suav nrog dab tsi? Nws suav nrog yuav ceev tej khoom muaj nqis li cas, ceev rau qhov twg, leej twg yog tus tswj hwm, thiab yuav faib, tswj hwm, thiab hloov chaw li cas thaum muaj kev phom sij los sis tej xwm txheej tsis zoo tshwm tuaj, nrog rau lwm yam xwm txheej tshwj xeeb. Tseeb tiag, tej kev npaj tes hauj lwm yeej muaj tej kev cai tswj hais txog tag nrho tej no, thiab thaum hais txog tes hauj lwm no, cov thawj coj thiab cov neeg ua hauj lwm yuav tsum tsis txhob tos kom tus Nyob Saud muab lus txib ncaj qha los sis tshaj tawm tej kev npaj tes hauj lwm, es mam li pib mus tswj hwm tej khoom muaj nqis xwb. Yog tsis muaj tej kev npaj tes hauj lwm tam sim ntawd uas cheem tsum kom koj saib xyuas tej khoom muaj nqis kom ntxaws ntxaws, thiab nyob rau hauv tej xwm txheej tshwj xeeb thaum koj tsis paub yuav saib xyuas tej khoom muaj nqis li cas thiab tus Nyob Saud tsis tau teb kom ncav sij hawm, es koj yuav tsum ua li cas? Kev nyab xeeb yog qhov tseem ceeb tshaj plaws, thiab qhov tiv thaiv Vajtswv lub tsev tej khoom muaj nqis kom zoo yog koj lub luag hauj lwm. Thaum hais txog cov phau ntawv ntawm Vajtswv cov lus uas Vajtswv lub tsev luam tawm, nrog rau txhua hom tshuab, khoom noj, nyiaj txiag, thiab lwm yam khoom muaj nqis zoo li no, cov thawj coj thiab cov neeg ua hauj lwm yuav tsum ceev tag nrho tej no rau hauv tej qhov chaw nyab xeeb raws li tej kev npaj ntawm Vajtswv lub tsev, thiab tsis txhob cia tej no ntub, tuaj pwm, los sis kab noj, thiab haj yam tsis txhob cia cov tib neeg phem los sis tus zaj loj liab ploog muab txeeb mus. Tsis tas li ntawd, dhau ntawm qhov tswj hwm tej khoom muaj nqis ntawm Vajtswv lub tsev no kom zoo lawm, cov thawj coj thiab cov neeg ua hauj lwm kuj yuav tsum ceev kom nruj heev tsis pub leej twg paub; cov tib neeg uas tsis muaj feem xyuam txog tej hauj lwm no yuav tsum tsis pub paub txog tej no kiag li, thiab cov uas paub txog tej no yuav tsum ceev lawv lub qhov ncauj thiab tsis txhob hais tawm yam tsis xyuam xim. Vajtswv lub tsev muaj tej kev npaj tes hauj lwm ntxaws ntxaws hais txog tes hauj lwm no, thiab qee yam ntawm tej ntawd tsis tsim nyog los tshaj tawm los sis qhib lug ua ntaub ntawv. Yog cov thawj coj thiab cov neeg ua hauj lwm nrhiav tau tej hau kev thiab tej kev zoo dua los ua kev tswj hwm tej khoom muaj nqis, ces muaj tseeb tiag, thaum ua raws li lub hauv paus ntsiab lus ntawm txoj kev tswj hwm thiab saib xyuas tej khoom muaj nqis ntawm Vajtswv lub tsev kom zoo los tiv thaiv tej khoom ntawd kom tsis txhob muaj kev puas tsuaj, lawv yeej sib tham tau txog qhov teeb meem no nrog lwm cov thawj coj thiab cov neeg ua hauj lwm thiab txiav txim siab ntawm lawv tus kheej. Qhov no yog ib tes hauj lwm tshwj xeeb, thiab cov uas kaw tsis tau qhov ncauj, cov uas tsis muaj lub siab ris lub luag hauj lwm, cov uas muaj lub siab tsis ncaj, cov uas nyuam qhuav pib ntseeg thiab tsis muaj lub hauv paus rau lawv txoj kev ntseeg, thiab cov uas pheej saib tej khoom muaj nqis ntawm Vajtswv lub tsev yam ntshaw ntshaw, mas yuav tsum tsis pub lawv paub txog qhov no kiag li. Tej no hais tsis tau kom meej meej hauv tej kev npaj tes hauj lwm ntawm Vajtswv lub tsev, tiam sis tsis yog cov thawj coj thiab cov neeg ua hauj lwm thiab cov neeg saib xyuas uas ntseeg siab tau yuav tsum paub txog qhov no lod? (Yog.) Muaj ib qho xwm txheej tshwj xeeb ntawm no. Piv txwv hais tias nyuam qhuav xaiv tau ib tug thawj coj uas los ntseeg Vajtswv tau peb xyoos xwb, lawv muaj peev xwm zoo, kub siab heev, thiab saib sab nraud mas lawv siv tau thiab, tiam sis tsis paub tias lawv tus yam ntxwv zoo li cas, lawv saib tej khoom muaj nqis li cas, los sis lawv puas siab hlob. Tsis paub thiab tsis paub tseeb rau tej no, thiab cov kwv tij thiab cov muam uas ntseeg Vajtswv tau ntev lawm tsis paub tus neeg no zoo, lawv tsis paub tus neeg no kom thoob plaws. Nyob rau hauv qhov xwm txheej zoo li no yuav ua li cas? Thaum txog sij hawm muab tes hauj lwm cob rau lawv, tag nrho lwm yam hauj lwm puav leej muab cob rau lawv lawm—tes hauj lwm tswj hwm tej khoom muaj nqis puas yuav muab cob rau lawv? (Tsis muab.) Vim li cas? Tes hauj lwm tseem ceeb ntawm cov thawj coj thiab cov neeg ua hauj lwm tsis yog tsuas tswj hwm tej khoom muaj nqis xwb; tej khoom muaj nqis tsuas yog ib feem ntawm lawv tes hauj lwm xwb. Yog tias muaj ib tug neeg tsim nyog los tswj hwm tej khoom muaj nqis tiag tiag thiab tus thawj coj tshiab no ntseeg siab tsis tau, ces tsis muab tes hauj lwm no cob rau lawv rau lub sij hawm no los tsis ua cas, vim tseem tsis tau paub tias lawv puas yuav ntseeg Vajtswv tau ntev los sis lawv puas yuav sawv khov kho tau. Yav tas los, muaj ib tug neeg nyuam qhuav raug xaiv los ua ib tug thawj coj pawg ntseeg, tom qab nws los ua hauj lwm lawm, thawj yam uas nws ua yog nug cov neeg Vajtswv xaiv tseg kom muab cov ntawv nyiaj hauv tuam txhab cia nyiaj thiab cov zauv zais rau cov nyiaj uas khaws cov khoom fij. Nws nug seb leej twg muaj cov ntawv nyiaj hauv tuam txhab cia nyiaj thiab cov zauv no, ces nws txhib kom lawv muab tes hauj lwm no cob rau nws tam sim ntawd. Nyob hauv qhov xwm txheej no, puas yuav muab tes hauj lwm no cob rau nws? Nws tsis txhawj los sis tsis quav ntsej txog lwm yam hauj lwm, tiam sis nws mob siab thiab txhawj xeeb tshwj xeeb txog qhov no—nws puas yog ib tug neeg ntseeg siab tau? Tsis txhob xav tias ib tug neeg twg ntseeg siab tau vim lawv yog ib tug thawj coj los sis ib tug neeg ua hauj lwm. Tseeb tiag, tsuas yog cov neeg saib xyuas uas raug xaiv raws li tej hauv paus ntsiab lus tiag tiag thiaj li ntseeg siab tau xwb—lawv muaj peev xwm fij lawv txoj sia los tiv thaiv tej khoom muaj nqis ntawm Vajtswv lub tsev. Cov tib neeg zoo li no mas thiaj li yog cov ntseeg siab tau tshaj plaws. Yog li ntawd, txhua tus thawj coj thiab cov neeg ua hauj lwm puas muaj peev xwm ua tau li no? Tsis paub tseeb. Yav tas los, ib tug thawj coj hauv cheeb tsam raug tus zaj loj liab ploog ntes, thiab nws muab tag nrho tej khoom muaj nqis ntawm pawg ntseeg muag tawm, uas ua rau poob ntau tshaj plaws. Yog nws tsis paub tias pawg ntseeg tej khoom muaj nqis nyob qhov twg, tab txawm tias nws raug ntaus tuag los nws yuav tsis muaj peev xwm qhia tau qhov no tawm, thiab ces Vajtswv lub tsev tej khoom muaj nqis yeej yuav tsis raug kev puas tsuaj, tsis yog lod? Qhov ntawd yog vim nws paub ntau dhau lawm nws thiaj li qhia txhua yam tawm thaum nws thev tsis taus kev tsim txom thiab kev ntaus phem, ces cov nyiaj no thiaj li poob rau hauv tus zaj loj liab ploog txhais tes. Yog tsis pub nws paub tias tej khoom muaj nqis no nyob qhov twg, thiab yog tus uas saib xyuas tej khoom muaj nqis ntawd ntseeg siab tau, es Vajtswv lub tsev cov nyiaj puas yuav raug kev puas tsuaj thiab raug tus zaj loj liab ploog muab txeeb mus? Tsis raug, qhov ntawd yuav tsis zoo li ntawd lawm. Qhov no yog ib zaj kev qhia loj heev. Yog li ntawd, qhov tseem ceeb tshaj plaws thaum hais txog kev npaj tes hauj lwm no mas yog kev nyab xeeb los ua ntej, kev puas tsuaj yuav tsum raug txo kom tsawg tshaj plaws, thiab tes hauj lwm yuav tsum ua raws li txoj kev nyab xeeb. Nrhiav ib tug neeg uas ua siab ncaj rau kev tswj hwm tej khoom muaj nqis ntawm Vajtswv lub tsev los tswj hwm tej khoom muaj nqis ntawd—qhov no yog txoj kev ua uas ntseeg siab tau tshaj plaws. Txawm tias tus neeg no ua tsis tau lwm yam los, lawv yuav ua siab ncaj thiab lawv yeej yuav muaj peev xwm thaum hais txog kev saib xyuas nyiaj txiag, yog li ntawd siv tus neeg no los saib xyuas tej khoom muaj nqis ntawd ces yog lawm. Vim hais tias tes hauj lwm no yog ib tes hauj lwm uas tsuas muaj ib yam ua xwb, ces tej kev npaj rau tes hauj lwm no mas yooj yim heev: Nrhiav cov neeg yog los saib xyuas tej khoom muaj nqis thiab nrhiav ib qho chaw nyab xeeb los ceev tej khoom muaj nqis ntawd. Tsis tas li ntawd, kuj muaj tej kev cai tswj ntxaws ntxaws nyob hauv tej kev npaj tes hauj lwm ntawm Vajtswv lub tsev hais txog kev faib thiab kev siv tej khoom muaj nqis ntawm Vajtswv lub tsev; siv tau cov nyiaj txiag no rau tej uas tsim nyog siv, tej uas tsis tsim nyog siv ces tsis txhob siv. Muaj ib yam ntxiv, uas yog muaj ib txoj kev tswj hwm nruj heev rau tej nqi siv uas ntsig txog tej khoom muaj nqis, thiab Vajtswv lub tsev muaj tej kev cai tswj ntxaws ntxaws rau ntau yam txheej txheem thiab cov kauj ruam, cheem tsum kom muaj ob peb tug neeg kos npe, thiab lwm yam ntxiv. Muaj kev tswj hwm, muaj kev saib xyuas, muaj kev siv nyiaj, thiab kuj muaj kev teev nyiaj thiab—muaj tej kev npaj hauj lwm ntxaws ntxaws rau tej no tag nrho.

VII. Tes Hauj Lwm Kev Tshem Tawm

Yam xya, tes hauj lwm kev tshem tawm. Vajtswv lub tsev kuj tab tom npaj tej kev npaj tes hauj lwm ntxaws ntxaws rau tes hauj lwm no txuas ntxiv. Tej kev npaj tes hauj lwm no, ib kis mas yog, npaj raws li tej kev tim tsum ntawm Vajtswv lub tsev tes hauj lwm, hos lwm kis mas yog, npaj raws li txoj kev faib thiab kev tshab txhais ntawm ntau hom tib neeg, nrog rau kev cais txhua tus raws li lawv hom, raws li tej kev qhia tshwm uas pom tau meej tom qab lawv raug muab nthuav tawm lawm. Vajtswv lub tsev muaj tej hauv paus ntsiab lus rau kev daws txhua hom ntawm cov tawm tsam khetos, cov tib neeg phem, thiab cov tsis ntseeg; ib txhia raug tshem tawm ntawm cov uas ua tej dej num, ib txhia raug tshem tawm ntawm cov pawg ntseeg uas ua dej num puv sij hawm mus rau cov pawg ntseeg uas ua dej num ib nrab sij hawm los sis cov pawg ntseeg dog dig, ib txhia raug tshem tawm ntawm cov pawg ntseeg dog dig mus rau cov pab pawg B, thiab muaj ib txhia uas raug ntsaig tawm mus los sis raug ntiab tawm ncaj qha. Vajtswv lub tsev yeej npaj tej kev npaj tes hauj lwm tas li rau tes hauj lwm uas yaug pawg ntseeg kom dawb huv, thiab kuj muaj tej kev npaj tes hauj lwm ntxaws ntxaws uas hais txog ntau hom tib neeg uas muaj tej yam uas tsim nyog muab tshem tawm. Saib raws li tib neeg tus cwj pwm thiab tej kev yuam cai uas lawv tau ua thaum ua lawv tes dej num, nrog rau lub ntsiab tseeb qias vuab tsuab uas raug nthuav tawm hauv ntau hom tib neeg, thaum kawg Vajtswv lub tsev tsim tej kev npaj ntxaws ntxaws los daws cov tib neeg no. Yog li ntawd, qhov Vajtswv lub tsev daws ntau hom tib neeg phem, cov tsis ntseeg, thiab cov tawm tsam khetos ntawd yog ua raws li Vajtswv cov lus thiab qhov tseeb tej hauv paus ntsiab lus tag nrho, thiab mus raws li Vajtswv tej kev npaj siab tag nrho. Thaum hais txog tej kev npaj tes hauj lwm no, ib kis mas yog yuav tsum qhia txog qhov tseeb tej hauv paus ntsiab lus kom tib neeg to taub thiab kawm paub cais ntau hom tib neeg, hos lwm kis mas, yog qhov yuav tsum tshaj tawm tej kev npaj tes hauj lwm no rau cov pawg ntseeg kom thiaj li sib qhia thiab ua tiag tau. Txawm li cas los xij, tes hauj lwm yaug pawg ntseeg kom dawb huv no mas yuav tsum tau coj mus ua tiag kom sai li sai tau, thiab yeej yuav tsum tsis txhob muab tso tseg kiag li. Tes hauj lwm no yuav tsum txuas ntxiv mus kom txog thaum tsis muaj cov tib neeg phem nyob hauv pawg ntseeg lawm. Qhov ntawd tsis yog hais tias cov thawj coj thiab cov neeg ua hauj lwm tsuas ua tes hauj lwm kev tshem tawm ntawd ib ntus thaum tus Nyob Saud tshaj tawm ib qho kev npaj tes hauj lwm kom yaug pawg ntseeg kom dawb huv xwb, Thiab yog ib ntus tom qab es pom dua tias muaj cov tib neeg phem ua rau muaj kev cuam tshuam, tiam sis tus Nyob Saud tsis tau npaj tej kev npaj tes hauj lwm txog qhov ntawd, ces cov thawj coj thiab cov neeg ua hauj lwm tsis tas yuav quav ntsej txog cov neeg phem ntawd los sis muab lawv tshem tawm—qhov ntawd yeej ua tsis tau li. Tes hauj lwm yaug pawg ntseeg kom dawb huv yuav tsum ua txuas ntxiv kom muaj qib muaj duas; tsuav muaj cov tib neeg uas tsim nyog ntsaig tawm mus los sis raug ntiab tawm mus, ces tes hauj lwm kev tshem tawm no yuav tsum txuas ntxiv mus. Tsis txhob tos twj ywm kom tus Nyob Saud muab lus txib los sis kom cov thawj coj txheej saud tshaj tawm rau koj, thiab tsis txhob tos kom cov kwv tij thiab cov muam ntau ntxiv qhia tawm txog ib tug neeg twg. Kiag thaum cov neeg Vajtswv xaiv tseg qhia tshwm thiab qhia tawm txog ib tug neeg twg, cov thawj coj thiab cov neeg ua hauj lwm yuav tsum pib tshawb xyuas thiab daws qhov teeb meem ntawd. Yog cov thawj coj thiab cov neeg ua hauj lwm tuav tsab ntawv qhia tawm cia thiab tsis daws qhov teeb meem ntawd, lawv yuav tsum raug tshawb xyuas thiab daws, thiab yog pom tias lawv tiv thaiv ib tug tib neeg phem, ces lawv yuav tsum raug ntsaig tawm ntawm pawg ntseeg mus nrog tus tib neeg phem ntawd. Txhua tus thawj coj los sis neeg ua hauj lwm uas tsis ua tes hauj lwm yaug pawg ntseeg kom dawb huv yog ib tug thawj coj los sis ib tug neeg ua hauj lwm cuav thiab yuav tsum raug rho tawm tam sim ntawd. Yog lawv tseem npog thiab tiv thaiv cov tib neeg phem, ces tuaj yeem txiav txim tias lawv yog ib tug tawm tsam khetos thiab raug ntsaig tawm mus thiab muab ntiab tawm ntawm pawg ntseeg mus. Tej no yog tej kev cai tswj ntxaws ntxaws uas Vajtswv lub tsev tsim hais txog tes hauj lwm yaug pawg ntseeg kom dawb huv. Tes hauj lwm yaug pawg ntseeg kom dawb huv ntawd yog ib yam tseem ceeb uas maj ceev thiab muaj lub ntsiab tob heev. Qhia Kuv seb, qhov yaug pawg ntseeg kom dawb huv tsis yog ua los ntxuav pawg ntseeg kom dawb huv lod? Yog pawg ntseeg raug ntxuav kom dawb huv lawm—txhais tau tias, yog tsis muaj cov tib neeg phem ua rau muaj kev cuam tshuam hauv pawg ntseeg thiab tsis muaj cov tsis ntseeg sib xyaws nrog cov tswv cuab hauv pawg ntseeg—ces qhov ntawd thiaj li yuav yog ib lub pawg ntseeg tiag tiag, thiab kuj yuav pom qhov txiaj ntsig zoo tshaj plaws rau lub neej hauv pawg ntseeg. Qhov no tsis yog ib kauj ruam loj ntxiv mus rau qhov kev ua kom Khetos lub nceeg vaj muaj tseeb lod? Ib lub pawg ntseeg uas dawb huv zoo li no mas muaj txiaj ntsim tshaj plaws rau txoj kev tshaj tawm lub nceeg vaj txoj moo zoo, vim txhua tus yuav muaj qhov tseeb qhov muaj tiag, txhua tus yuav muaj peev xwm ua tim khawv rau Vajtswv thiab raug ua kom muaj txhua yam los ua Vajtswv cov neeg, thiab yuav tsis muaj cov tib neeg phem ua rau muaj kev cuam tshuam ntxiv lawm. Muaj tseeb tias ib lub pawg ntseeg zoo li no yuav yog lub uas tau koob hmoov tshaj plaws. Yog li ntawd, tes hauj lwm yaug pawg ntseeg kom dawb huv yog ib teg hauj lwm uas muaj ntsiab lus tshaj plaws thiab qhov ntawd yog ua kom qhov xwm txheej uas cov neeg Vajtswv xaiv tseg ua lawv tej dej num ntawd kom muaj kev thaj yeeb dua, thiab tsis muaj kev cuam tshuam los ntawm cov tib neeg phem. Tsis tas li ntawd, Vajtswv lub tsev tsis yug cov neeg nyob dawb thiab cov neeg tsis muaj txiaj ntsim, thiab tsis yug cov niag cab noj dawb uas ntshaw kev tau zoo thiab noj kom tsau plab xwb. Tag nrho cov uas tsis ua tej dej num hlo li thiab cuam tshuam rau lwm tus ua lawv tej dej num, thiab tag nrho cov uas hais lus tsis xyuam xim, cuam tshuam, thiab tsis ua lawv tes hauj lwm uas tsim nyog hauv pawg ntseeg ntawd, kuj yuav tsum raug tshem tawm thiab. Tam sim no txhua hom tib neeg tau raug nthuav tawm tag nrho lawm, tes hauj lwm yaug pawg ntseeg kom dawb huv yog ib qho yuav tsum tau ua, thiab yuav tsum ua kom tiav thiab kom zoo. Tag nrho cov tib neeg phem, cov tawm tsam khetos, cov tsis ntseeg, cov neeg tsis muaj txiaj ntsim, thiab cov niag cab noj dawb no uas tau raug nthuav tawm yog cov uas Vajtswv ntxub thiab tso tseg, thiab lawv yog cov cawm tsis tau lawm. Yog pawg ntseeg tsis ua tes hauj lwm kev tshem tawm, ces qhov no yuav cuam tshuam rau tes hauj lwm tshaj tawm txoj moo zoo lawm. Yog li ntawd, tes hauj lwm yaug pawg ntseeg kom dawb huv ntawd thiaj li yog ib yam tseem ceeb ntawm tes hauj lwm maj ceev uas yuav tsum tau ua kom zoo nyob rau tam sim no. Tsuas yog cov thawj coj thiab cov neeg ua hauj lwm uas ua tau tes hauj lwm yaug pawg ntseeg kom dawb huv zoo xwb thiaj li tsim nyog cob qhia thiab tuaj yeem ua cov thawj coj thiab cov neeg ua hauj lwm mus ntxiv. Txhua tus thawj coj los sis neeg ua hauj lwm uas thaiv tes hauj lwm yaug pawg ntseeg kom dawb huv yog ib lub pob zeb ua rau neeg ntog thiab ib qho uas thaiv kev, thiab cov neeg Vajtswv xaiv tseg yuav tsum qhia tshwm thiab qhia tawm lawv. Cov thawj coj thiab cov neeg ua hauj lwm nyob rau txhua theem yuav tsum xub muab cov pob zeb ua rau neeg ntog thiab tej uas thaiv kev rau pawg ntseeg tes hauj lwm no tshem tawm thiab daws kom tag nrho—qhov no mus raws li Vajtswv tej kev npaj siab. Tsuas yog qhov no thiaj li pab tau rau ntau yam hauj lwm hauv pawg ntseeg kom mus tau zoo, thiab pab rau pawg ntseeg ua raws li Vajtswv lub siab nyiam kom Vajtswv thiaj li tau txais tag nrho lub yeeb koob.

VIII. Tej Hauj Lwm Sab Nraud

Yam yim, tej hauj lwm sab nraud. Tes hauj lwm ntawm tej hauj lwm sab nraud tsis yog ib teg hauj lwm loj, thiab kuj tsis yog ib teg hauj lwm me, thiab muaj ob peb lub hauv paus ntsiab lus nyob rau hauv tej kev npaj tes hauj lwm ntawm Vajtswv lub tsev hais txog tej hauj lwm sab nraud. Ib qho yog kawm txog cov cai lij choj hauv qhov chaw ntawd thiab tej kev cai tswj ntxaws ntxaws hauv qhov chaw ntawd. Qhov ntawd yog, txawm pawg ntseeg yuav ua dab tsi nyob rau ib qho chaw twg, koj yuav tsum xub kawm txog cov cai lij choj hauv qhov chaw ntawd ua ntej—qhov no yog ib lub hauv paus ntsiab lus. Lwm lub hauv paus ntsiab lus yog, thaum koj ntsib tej teeb meem uas muaj feem xyuam txog tej hauj lwm sab nraud uas koj tsis to taub los sis tsis paub meej, koj yuav tsum nrog ib tug kws lij choj thiab cov paub txog kev cai lij choj zoo uas muaj feem xyuam tham, thiab tsis txhob txiav txim siab yam tsis paub los ntawm koj tus kheej; koj yuav tsum tsim tej kev npaj ntxaws ntxaws los daws tej teeb meem raws li cov teb chaws sib txawv tej xwm txheej uas sib txawv. Yog li ntawd, tej kev npaj no tshwm sim los li cas? Koj yuav tsum ua raws li tus kws lij choj hais thiab cia tus kws lij choj txiav txim siab—tsis txhob txiav txim siab raws siab nyiam los sis txiav txim siab ntawm koj tus kheej. Lub teb chaws tej xwm txheej, tej hau kev tswj hwm, tej kev cai lij choj, thiab tej kev cai tswj mas sib txawv nyob rau txhua lub teb chaws, yog li ntawd tsis txhob ua raws li koj txoj kev xav hauv nruab siab xwb. Piv txwv li, hais tias nyob hauv Teb Chaws Suav koj pom ib tug neeg raug txeeb khoom nyob rau ntawm txoj kev. Cov cai lij choj hauv Teb Chaws Suav hais tias txhua tus neeg uas pom qhov no tuaj yeem ua siab loj nkag mus pab, xub ntes tus tub sab, thiab tom qab ntawd muab lawv cob rau tub ceev xwm. Yog koj ua li no, koj yuav dhau los ua ib tug neeg tshaj lij, koj tsis tas yuav tsum tau ris ib qho txim raws txoj kev txoj cai, thiab tsim nyog qhuas koj. Qhov no yog lub teb chaws qhov xwm txheej thiab txoj kev tswj hwm nyob rau hauv Teb Chaws Suav, thiab nws yog ib hom kab lis kev cai qub nyob rau hauv Teb Chaws Suav—cov neeg Suav piav txog qhov ntawd los ntawm lub npe zoo txog “txoj kev coj ncaj ncees qub.” Txawm li cas los xij, nyob rau sab Hnub Poob, tshwj xeeb tshaj yog nyob rau hauv cov teb chaws xws li Teb Chaws Amelikas thiab Khasnasdas, yog tias thaum pom ib tug tub sab nyiag ib yam khoom dab tsi, es koj ntes lawv tam sim ntawd thiab tos kom tub ceev xwm tuaj ntes lawv, ces qhov ntawd tsis yog lawm, qhov ntawd yog ua txhaum cai. Qhov no yog vim koj tsuas yog ib tug pej xeem dog dig thiab tsis yog ib tug neeg tswj txoj cai, thiab koj tsis muaj cai ntes leej twg; tsuas yog tub ceev xwm thiaj li muaj cai ntes ib tug neeg twg xwb. Thaum koj pom ib tug tub sab nyiag ib yam khoom dab tsi, koj tuaj yeem qhia tawm rau tub ceev xwm, tiam sis koj tsis tuaj yeem ntes tus tub sab ntawd ntawm koj tus kheej. Yog koj lam tau lam ntes ib tug tub sab, ces koj tab tom ua txhaum cai—qhov no yog txoj cai lij choj nyob rau sab Hnub Poob. Kev xyaum ua raws cov neeg Suav “txoj kev coj ncaj ncees qub” nyob rau sab Hnub Poob mas tsis tsim nyog lawm; sab Hnub Poob muaj lawv tus kheej cov cai lij choj. Nyob hauv ib lub teb chaws sab Hnub Poob yog koj pom ib tug neeg ntog nyob rau ntawm txoj kev, txoj cai lij choj hais li cas? Koj yuav tsum mus thiab nug tias, “Koj puas ua li cas? Koj puas xav tau kev pab?” Yog tus neeg ntawd hais tias lawv tsis xav tau kev pab, ces koj mus tau. Yog koj pom ib tug neeg ntog tiam sis koj tsis nug lawv seb lawv puas ua li cas los sis tsis saib lawv li, es cia li taug kev mus lawm, ces koj tab tom ua txhaum cai. Yog koj ntsib qhov xwm txheej zoo li no hauv Teb Chaws Suav, qhov ntawd tej zaum yog ib qho kev dag, thiab tsis muaj dab tsi tshwm sim rau koj yog koj tsis quav ntsej qhov ntawd. Yog koj nug, “Koj puas ua li cas? Koj puas xav tau kev pab?” tej zaum qhov ntawd yuav ua rau koj muaj teeb meem, tus neeg ntawd yuav dag koj, thiab tom qab ntawd koj tsis txhob cia siab tias yuav tau ua ib lub neej zoo ntxiv li lawm. Ob qho no qhia dab tsi rau nej? Txoj kev kawm ntawv nyob rau hauv cov teb chaws uas sib txawv thiab cov haiv neeg uas sib txawv mas yeej txawv tag nrho li, ib yam li cov xwm txheej nyob hauv lub zej zog thiab cov txheej txheem coj nyob hauv zej zog thiab, muaj tseeb tiag, cov cai lij choj thiab cov kev cai tswj los tsis zoo ib yam thiab. Thaum hais txog tes hauj lwm ntawm tej hauj lwm sab nraud, ib kis mas yog, cov tib neeg uas ua tes hauj lwm no yuav tsum tau to taub kom yog yog txog cov cai lij choj, cov kev cai tswj, thiab tej kab cai uas muaj feem xyuam txog pawg ntseeg tes hauj lwm, hos lwm kis mas yog, lawv kuj yuav tsum tshaj tawm txog qee yam kev paub hauv lub neej txhua hnub los sis tej kab cai raws txoj kev txoj cai uas cov kwv tij thiab cov nkauj muam yuav tsum tau paub. Yog li ntawd, Vajtswv lub tsev muaj tej kev npaj tes hauj lwm hais txog tes hauj lwm no uas cheem tsum kom cov uas ua tes hauj lwm no yuav tsum xub mus nug txog cov kev cai lij choj thiab cov cai tswj hauv tsoom fwv uas muaj feem xyuam txog txhua yam uas lawv ua. Tshwj xeeb tshaj yog thaum ntsib tej teeb meem uas nyuaj daws, lawv yuav tsum nrog ib tug kws lij choj tham thiab tsis txhob txiav txim siab yam dig muag ntsuav ntawm lawv tus kheej los sis tsim tej kev daws teeb meem raws li cov neeg Suav txoj kev xav thiab laj thawj—qhov no yog ib txoj kev ua uas ruam thiab tsis paub dab tsi. Thaum koj to taub tej no lawm, koj yuav tsum paub lub ntsiab tseem ceeb ntawm tes hauj lwm sab nraud, qhov txiaj ntsig uas xav kom ua tiav ntawd yog dab tsi, nrog rau qhov tim tsum rau Vajtswv lub tsev los ua tej kev npaj tes hauj lwm no. Tus ciaj ciam ntawm tes hauj lwm no mas tsis loj heev, yog li ntawd nyob rau hauv tej xwm txheej feem ntau mas nws yeej txaus los cia cov neeg ua hauj lwm uas muaj feem cuam tshuam rau tes hauj lwm no los muaj ib qho kev to taub kom meej txog tej kev npaj tes hauj lwm xwb. Yog qhov ntawd yog ib yam uas cov kwv tij thiab cov muam yuav tsum paub, ces pab lawv kom to taub thiab nkag siab. Tes hauj lwm sab nraud mas tseem ceeb heev li thiab, vim yog cov kwv tij thiab cov nkauj muam tsis to taub cov cai lij choj thiab cov kev cai tswj uas muaj feem xyuam txog lawv txoj kev ua neej thiab kev ua hauj lwm nyob txawv teb chaws mas tsis tau li. Vajtswv lub tsev muaj tej kev npaj tes hauj lwm ntxaws ntxaws hais txog qhov uas cheem tsum nyob rau hauv qhov no, thiab tsuas yog yuav tsum coj tej kev npaj tes hauj lwm no mus ua tiag xwb. Yog muaj tej xwm txheej tshwj xeeb tshwm sim, Vajtswv lub tsev yuav tsim qee yam kev daws uas ceev. Yog ib txoj hauj lwm muaj feem xyuam txog tes hauj lwm sab nraud, koj yuav tsum nrog cov neeg ua hauj lwm sab nraud tham thiab saib seb Vajtswv lub tsev muaj tej kev npaj ntxaws ntxaws dab tsi hais txog txoj hauj lwm ntawd, tsis txhob vam khom rau koj txoj kev xav hauv nruab siab yam dig muag thiab ua yam tsis paub. Qhov ua li ntawd yuav ua rau muaj teeb meem, thiab qhov tshwm sim los mas yuav xav tsis txog li. Tes hauj lwm sab nraud kuj yog ib txoj hauj lwm uas tsuas yog ib yam xwb, nws tsis nyuaj, thiab feem ntau koj yeej yuav nrhiav tau tej hauj lwm ntxaws ntxaws nyob hauv tej kev npaj tes hauj lwm. Thaum tib neeg pib ua tej hauj lwm sab nraud nyob txawv teb chaws mas, qhov ntawd yuav zoo li nyuaj me ntsis, tiam sis tom qab ua tau ib ntus, lawv nrhiav tau tej qauv thiab tej hau kev, thiab qhov ntawd zoo li tsis nyuaj lawm. Thaum xub thawj mas, cov neeg Suav uas mus txawv teb chaws raug muab qhia tawm vim pov tej khoom tsis siv lawm rau nraum tej kev, mus pw lig dhau lawm, sawv ntxov dhau lawm, cuam tshuam tib neeg vim lawv tej dev tsem, dai khaub ncaws rau ntawm tej qab khav, thiab nres tsheb tsis raug cai—lawv raug muab qhia tawm rau ntau yam. Thaum kawg, lawv raug muab qhia tawm ntau zaus, tub ceev xwm tuaj khob lawv qhov rooj tas li tuaj qhia lawv, thiab tsuas yog tom qab ib ntus uas ntev heev lawm lawv mam li paub tias lawv nyob txawv teb chaws lawm thiab tsis yog nyob hauv Teb Chaws Suav lawm. Lawv maj mam ceev faj, lawv thiaj li muaj qee qhov kev paub txog txoj kev cai lij choj, thiab lawv to taub qee yam kev cai uas hais txog lub neej, tes hauj lwm, kev tsav tsheb, thiab ntau yam ntxiv. Thaum cov neeg Suav pib mus txawv teb chaws mas, lawv tsuas to taub qee yam kev coj zoo ntawm lub hauv paus txog txoj kev coj lawv tus kheej thiab tsis muaj kev paub txog feem ntau ntawm tej yam raws txoj kev txoj cai; lawv zoo li cov tsiaj qus, tsis muaj ib qho kev paub txog txoj cai lij choj li. Tom qab ob peb xyoos lawm, lawv thiaj li tau txais qee yam kev paub thiab to taub qee yam kev cai, cuag nkaus li lawv tau raug cob qhia, ces lawv thiaj li zoo dua me ntsis tuaj lawm.

IX. Pawg Ntseeg Txoj Kev Pab Cuam

Yam cuaj, pawg ntseeg txoj kev pab cuam. Yav tas los Vajtswv lub tsev tau muaj tej kev npaj tes hauj lwm txog pawg ntseeg txoj kev pab cuam, thiab yog cov uas ua lawv tes dej num puv sij hawm los sis lawv tsev neeg cheem tsum kev pab kom muaj noj muaj haus txaus, cov thawj coj pawg ntseeg yuav tsum daws qhov teeb meem no. Tej kev npaj coj mus ua tiag thiab tej hauv paus ntsiab lus uas ntxaws ntxaws yeej nrhiav tau nyob hauv tej kev npaj tes hauj lwm no, thiab Vajtswv lub tsev muaj cov lus qhia thiab cov kev cai tswj uas ntxaws ntxaws lawm. Hais txog cov kwv tij thiab cov muam uas raug kaw hauv tsev loj cuj vim lawv txoj kev ntseeg Vajtswv, uas ua rau lawv tsev neeg lub neej txhua hnub raug kev txom nyem; cov niam cov txiv uas ua lawv tej dej num nyob deb tsev tau ntev thiab tsis muaj leej twg saib xyuas lawv cov me nyuam; thiab cov kwv tij thiab cov muam uas muaj mob uas ua lawv tej dej num tau ntau xyoo, pawg ntseeg yuav tsum muab kev pab thiab daws tej kev nyuaj no thiab lwm yam kev nyuaj uas zoo li no. Muaj ib qho xwm txheej tshwj xeeb uas ntsig txog tes hauj lwm no, thiab qhov ntawd yog thaum qee tsev neeg muaj tej xwm txheej los txais tos cov kwv tij thiab cov nkauj muam los rau hauv lawv tsev, tiam sis tsis muaj nyiaj txiag—yog li ntawd lawv cov nqi siv rau kev txais tos cov kwv tij thiab cov nkauj muam yuav tsum tau saib xyuas li cas? Qhov no yog nyob hauv pawg ntseeg tes hauj lwm kev pab cuam. Tej kev cai tswj txog qhov no yeej nrhiav tau nyob hauv tej kev npaj tes hauj lwm, los sis cov thawj coj thiab cov neeg ua hauj lwm tuaj yeem muab pawg ntseeg tej nyiaj txiag thiab khoom siv faib kom tsim nyog raws li qhov xwm txheej hauv qhov chaw ntawd kom ua tau tes hauj lwm txais tos—pawg ntseeg muaj tej kev cai tswj uas ntxaws ntxaws rau tag nrho tej yam no. Yog muaj qee qhov xwm txheej tshwj xeeb tshwm sim sab nraud ntawm tus ciaj ciam ntawm tej kev cai tswj uas ntxaws ntxaws no, ces cov thawj coj thiab cov neeg ua hauj lwm tuaj yeem sib qhia thiab sib tham txog qhov teeb meem ntawd, thiab ua tej kev npaj ntxaws ntxaws, tsim nyog raws li tus qauv kev ua neej uas ib txwm muaj nyob hauv qhov chaw ntawd. Txawm hais tias qhov no tsis yog ib tes hauj lwm loj, thiab tsis yog ib txoj num uas tseem ceeb heev los xij, qhov ntawd yog tes hauj lwm uas nyob hauv tus ciaj ciam ntawm cov thawj coj thiab cov neeg ua hauj lwm tej luag hauj lwm, thiab yuav tsum tsis txhob tsis quav ntsej qhov no. Yog tsis muaj leej twg uas tim tsum kev txhawb los sis kev pab ntawm sab nyiaj txiag, ces cov thawj coj thiab cov neeg ua hauj lwm tsis tas yuav mus nrhiav cov neeg uas tim tsum txoj kev pab ntawd li. Yog muaj cov neeg zoo li no, ces cov thawj coj thiab cov neeg ua hauj lwm yuav tsum tsis txhob zam lawv, thiab haj yam yuav tsum tsis txhob tsis quav ntsej lawv, sawv saib xwb, los sis ua txuj tias tsis pom cov neeg ntawd. Lawv yuav tsum ua raws li tej hauv paus ntsiab lus—qhov no yog lawv lub luag hauj lwm.

X. Tej Kev Npaj Thaum Muaj Xwm Ceev

Yam kaum, tej kev npaj thaum muaj xwm ceev. Tej kev npaj thaum muaj xwm ceev yog los daws tej teeb meem tshwj xeeb uas tshwm tuaj nyob hauv txhua feem ntawm Vajtswv lub tsev tes hauj lwm. Tsis hais tej teeb meem uas cheem tsum kev daws ceev ceev ntawd tshwm sim hauv tes hauj lwm tshaj tawm txoj moo zoo, los sis tes hauj lwm tswj fwm, los sis tes hauj lwm qib siab, los sis yog daws ib qho xwm txheej uas muaj feem xyuam txog cov tawm tsam khetos los sis cov thawj coj cuav, los sis yog cais ib qho xwm txheej tshwj xeeb uas tib neeg raug coj mus yuam kev, tag nrho tej no yog nyob hauv tej kev npaj thaum muaj xwm ceev. Piv txwv li, yog muaj neeg ua rau muaj kev tab kaum thiab kev cuam tshuam, los sis yog ib tug tawm tsam khetos tab tom lam tau lam ua thiab kav lwm tus thiab sim los tsim ib lub nceeg vaj rau lawv tus kheej, thiab ntau yam ntxiv, kiag thaum Vajtswv lub tsev pom tias qhov ntawd tsim nyog tsim ib qho kev npaj tes hauj lwm rau kev npaj ntxaws ntxaws txog ib qho ntawm cov xwm txheej no, ces Vajtswv lub tsev yuav tsim ib tsab ntawv qhia tawm kom raws li ntawd. Tej kev npaj thaum muaj xwm ceev ntawd yog ua raws li qee qhov xwm txheej ceev uas tab tom tshwm sim hauv pawg ntseeg thaum lub sij hawm ntawd, thiab tus Nyob Saud tsim tej kev npaj tes hauj lwm uas ntxaws ntxaws raws li qhov hnyav ntawm cov xwm txheej, thiab tom qab ntawd muab qhia tawm thiab tshaj tawm. Txoj kev npaj uas ntxaws ntxaws ntawd tej zaum yuav muaj feem xyuam txog ib yam hauj lwm twg uas cov thawj coj thiab cov neeg ua hauj lwm yuav tsum ua, tsuav yog tus Nyob Saud npaj thiab tus Nyob Saud cheem tsum kom cov thawj coj thiab cov neeg ua hauj lwm muab coj mus ua tiag xwb, ces cov thawj coj thiab cov neeg ua hauj lwm yuav tsum muab xa tawm thiab muab coj mus ua tiag kom mus raws li tus Nyob Saud tej kev npaj tes hauj lwm. Lawv yuav tsum tsis txhob tsis quav ntsej rau tej kev npaj tes hauj lwm no. Thaum tus Nyob Saud ua tej kev npaj tes hauj lwm zoo li no, tej ntawd tsis yog qis dua ib teg hauj lwm tswj fwm twg los sis ib teg hauj lwm qib siab ntxaws ntxaws twg li. Txawm hais tias tej kev npaj tes hauj lwm no tsuas yog ib lub sij hawm xwb los, cov thawj coj thiab cov neeg ua hauj lwm tseem yuav tsum muab xa tawm, qhia tawm, muab coj mus ua tiag, thiab taug qab tej ntawd yam li tej kev npaj tes hauj lwm uas raws kev raws cai, thiab tom qab ntawd muab qhia thiab qhia tawm rau tus Nyob Saud—qhov no yog lub luag hauj lwm ntawm cov thawj coj thiab cov neeg ua hauj lwm. Tej kev npaj thaum muaj xwm ceev tsis yog tsom mus rau ib yam hauj lwm ntxaws ntxaws twg, qhov ntawd yog, thaum twg los xij tus Nyob Saud yuav muab ib txoj num, muab ib qho kev cheem tsum, los sis muab ib qho kev npaj tes hauj lwm rau cov thawj coj ntawm txhua theem hauv txhua cheeb tsam, thiab cov thawj coj thiab cov neeg ua hauj lwm yuav tsum tsis txhob tsis quav ntsej hom hauj lwm no. Vim tej ntawd yog tej kev npaj tes hauj lwm, thiab tej ntawd raug muab qhia tawm rau cov thawj coj ntawm txhua theem thiab rau txhua cheeb tsam, ces tej ntawd yog tes hauj lwm uas nyob hauv tus ciaj ciam ntawm cov thawj coj thiab cov neeg ua hauj lwm tej luag hauj lwm. Cov thawj coj thiab cov neeg ua hauj lwm yuav tsum tsis txhob sawv saib xwb, los sis muab tes hauj lwm cais raws li qhov loj qhov me los sis qhov dav nqaim, los sis raws li qhov seb tes hauj lwm ntawd puas yog lawv tes hauj lwm los tsis yog los sis kwv yees saib tus Nyob Saud lub suab thiab qhov maj ceev nyob rau hauv tej kev npaj tes hauj lwm ntawd los txiav txim siab seb puas yuav muab coj mus ua tiag kom tiav raws sij hawm. Tej yam zoo li no yuav tsum tsis txhob tshwm sim, tiam sis cov thawj coj thiab cov neeg ua hauj lwm yuav tsum ua tes hauj lwm ntawd yam li lawv ua ib teg hauj lwm uas raws kev raws cai, thiab ua kom tiav thaum saib tes hauj lwm ntawd yam li ib txoj num thiab cov lus txib uas tseem ceeb—qhov no yog lub luag hauj lwm ntawm cov thawj coj thiab cov neeg ua hauj lwm. Muaj tej kev npaj uas maj ceev nyob rau hauv tej xwm txheej uas tshwj xeeb, thiab qhov no yog tes hauj lwm uas ua nyob rau hauv tej keeb kwm xwm txheej tshwj xeeb. Thaum muaj qee yam tiag tiag thiab qee yam uas tshwj xeeb tshwm sim, tus Nyob Saud yuav siv tej xwm txheej thiab tej yam no los ua kom cov thawj coj thiab cov neeg ua hauj lwm los sis cov kwv tij thiab cov nkauj muam siv lub cib fim no los kom paub cais tib neeg thiab tej yam uas yog siv qhov tseeb nyob hauv ib txoj hau kev uas siv tau tiag dua, los kawm kom pom tshab txog tib neeg thiab tej yam, thiab ua kom tau txais ib txoj kev to taub txog qhov tseeb kom tob dua. Lub hom phiaj ntawm qhov ua li no yog ua kom tib neeg paub cais cov thawj coj cuav thiab cov tawm tsam khetos. Tsis tas li ntawd xwb, qhov no ua los kom cov kwv tij thiab cov muam muaj ib qho chaw ib puag ncig ntsiag to, tsim nyog, thiab tsis muaj kev cuam tshuam rau lawv lub neej hauv pawg ntseeg. Nyob rau lwm kis, qhov no ua los kom tib neeg kawm tau ntau zaj kev qhia yam raws sij hawm thiab tau txais kev xyaum; tom qab tau xyaum ib zaug li no lawm, tib neeg yuav muaj kev loj hlob loj heev hauv lawv lub neej txoj sia. Qhov no yog ib txoj hau kev uas tus Nyob Saud cob qhia cov thawj coj thiab cov neeg ua hauj lwm ntawm txhua theem thiab cov kwv tij thiab cov muam, tshwj xeeb yog cov kwv tij thiab cov muam uas caum qhov tseeb. Tsis muaj lub siab phem rau qhov no, tus Nyob Saud tsis yog tsim txom tib neeg, los sis muab teeb meem me ua teeb meem loj. Txawm hais tias tej ntawd yog tej kev npaj thaum muaj xwm ceev, uas yog tej kev npaj tes hauj lwm ib lub sij hawm xwb los, tej ntawd tseem ceeb thiab muaj nuj nqis, thiab Kuv cia siab tias cov thawj coj thiab cov neeg ua hauj lwm ntawm txhua theem thiab cov kwv tij thiab cov muam yuav to taub tau qhov no thiab coj rau tej ntawd kom yog.

Peb tau teev tag nrho 10 yam ntawm tej kev npaj tes hauj lwm, thiab tam sim no Kuv tau qhia yuav luag tag ntawm 10 yam no lawm. Kuv tsis qhia txog tej no kom ntxaws heev, tiam sis yam uas Kuv tau qhia ntawd yeej txaus los pab kom nej to taub thiab nkag siab tias tej kev npaj tes hauj lwm yog dab tsi tiag tiag thiab Vajtswv lub tsev ua tes hauj lwm ntxaws ntxaws twg tiag. Nyob rau lwm kis ntxiv, nej tau to taub tias Vajtswv tab tom ua dab tsi tiag tiag nyob hauv pawg ntseeg thiab nyob hauv cov neeg uas Nws tau xaiv ntawd los ntawm tej yam ntxaws ntxaws no. Vajtswv lub tsev tes hauj lwm tsis yog kev ua ib lub tuam txhab, los sis koom nrog kev nom kev tswv, los sis leej tib neeg txoj cai, thiab tsis yog koom nrog tej kev lag luam twg; tej yam hauj lwm uas Vajtswv lub tsev ua yog tej uas muaj nyob hauv tej kev npaj tes hauj lwm. Yog li ntawd, qee cov nom tswv thiab cov koom haum hauv zej zog yeej ib txwm soj qab, tshawb fawb, thiab tshuaj xyuas saib seb muaj dab tsis tshwm sim rau Pawg Ntseeg ntawm Vajtswv Tus Uas Muaj Hwj Chim Loj Kawg Nkaus, thiab tej zaum los ntawm kev tshawb xyuas qhov no—los ntawm kev saib cov yeeb yaj kiab thiab cov vej xaij ntawm Vajtswv lub tsev—lawv tau paub tseeb tias Pawg Ntseeg ntawm Vajtswv Tus Uas Muaj Hwj Chim Loj Kawg Nkaus yog ib txoj kev ntseeg tseeb, thiab tsis koom nrog kev nom kev tswv ntawm ib lub teb chaws twg li. Pawg Ntseeg ntawm Vajtswv Tus Uas Muaj Hwj Chim Loj Kawg Nkaus raug kev tsuj nias thiab kev tawm tsam yam vwm heev los ntawm Tsoom Fwv Koom Tsham Suav tau ntau xyoo los lawm tiam sis tseem tshaj tawm txoj moo zoo thiab ua tim khawv rau Vajtswv txuas ntxiv, thiab tau muab Vajtswv cov lus, qhov tseeb, thiab ntau yam yeeb yaj kiab lus tim khawv tso tawm rau hauv os lais, coj tau txiaj ntsim loj thiab ntau heev los rau noob neej lub zej zog thiab ua pov thawj qhia tag nrho tias Vajtswv yeej ib txwm nthuav qhov tseeb tawm thiab cawm noob neej nyob rau tiam kawg. Lawv pheej tshawb fawb mus tshawb fawb los, thiab lawv tau txais txiaj ntsig dab tsi los ntawm lawv txoj kev tshawb fawb ntawd? Tsis yog lawv tag kev cia siab loj heev lod? Lawv haj tseem xav tias lawv yuav nrhiav tau dab tsi los iab liam peb pawg ntseeg tias yog “kev ntseeg phem”, thiab iab liam pawg ntseeg tias tawm tsam nom tswv thiab tawm tsam lub teb chaws. Tiam sis tam sim no lawv pom tias lawv ua tsis tau li no—saib los ntawm tej kev npaj tes hauj lwm uas pawg ntseeg tau muab tso tawm ntau xyoo los no, lawv yeej tsis muaj hau kev los iab liam pawg ntseeg li, thiab lawv txoj kev tshawb fawb puav leej tsis muaj qab hau dab tsi li. Qhov no yeej zoo ib yam nkaus li thaum cov neeg Yudais tshawb fawb Tswv Yexus nyob rau lub sij hawm ntawd. Cov xib fwb qhia Vajtswv txoj kev cai, cov Falixais, thiab cov thawj nom tswv qib siab tau tshawb fawb seb Tswv Yexus hais thiab ua dab tsi thiab pom tias tsis muaj ib yam dab tsi uas Nws ua ntawd txhaum kev cai lij choj los sis yog kev nom kev tswv, txhua yam uas Tswv Yexus hais thiab ua ntawd puav leej yog, puav leej yog qhov tseeb, thiab mus raws li phau Vajluskub tag nrho, thiab thaum kawg lawv tag kev cia siab lawm. Tam sim no lub ntiaj teb ntawm sab kab lis kev cai ntseeg pom tias Vajtswv lub tsev tab tom tsim cov yeeb yaj kiab thiab cov vis dis aus lus tim khawv uas hais txog txoj kev ntsib kev pom ntau zuj zus, thiab tshwj xeeb yog cov phau ntawv thiab cov lus nyeem Vajtswv cov lus kuj ntau zuj zus thiab, yog li ntawd lawv xav li cas? Yog lawv pom tsis tau tias tag nrho tej no los ntawm Vajtswv los, ces lawv yeej ruam tshaj plaws tiag tiag li! Yam uas los ntawm Vajtswv los yeej yuav tsum vam meej—qhov no yog qhov txiaj ntsig ntawm Vajntsujplig tes hauj lwm, thiab tsis muaj leej twg zais tau qhov no. Tam sim no Vajtswv cov lus twb tshaj tawm mus thoob plaws lub ntiaj teb lawm thiab qhov tseeb uas Nws nthuav tawm ntawd twb tso rau ntawm txhua tus tib neeg ntiaj teb lub xub ntiag lawm; Vajtswv qhov kev tshwm sim thiab tes hauj lwm ntws mus rau tom ntej yam muaj hwj chim loj, tsis muaj ib lub teb chaws los sis ib lub zog twg tawm tsam tau. Tus zaj loj liab ploog twb txaj muag thiab swb tag nrho lawm! Txawm lub ntiaj teb ntawm sab kab lis kev cai ntseeg yuav teem txim li cas los xij, lawv tawm tsam tsis tau Vajtswv tes hauj lwm, thiab thaum kawg, lawv tsuas yuav raug tshem tawm thiab raug dej nyab los ntawm Vajtswv tes hauj lwm cov dej ntws nkaus xwb.

Tam sim no Kuv tau qhia txog tej yam ntawm tej kev npaj tes hauj lwm tag lawm. Yam uas Kuv tau qhia ntawd tsis yog tag nrho tes hauj lwm uas Vajtswv lub tsev ua lod? Tes hauj lwm no yog yam uas nej pom ntawm nej lub qhov muag, yam uas nej hnov ntawm nej lub pob ntseg, thiab yam uas nej tus kheej tau ntsib tau pom thiab paub—tsis muaj ib yam dab tsi zais cia txog qhov no li. Tus zaj loj liab ploog muaj tag nrho pawg ntseeg tej kev npaj tes hauj lwm ntau xyoo los lawm—tej kev npaj tes hauj lwm uas lawv muaj ntawd mas ntau thiab txhij txhua heev. Lawv tshawb fawb tej ntawd txhua hnub, thiab lawv tshawb fawb mus tshawb fawb los txog thaum kawg lawv tau qhov xaus lus li no: “Yog cov neeg no pheej tshaj tawm Vajtswv cov lus thiab ua tim khawv rau Vajtswv tes hauj lwm li no mas, qhov ntawd yuav phem heev! Tag nrho cov neeg no yuav tsum raug muab tua kom tu noob, thiab txawm yog lawv khiav mus rau txawv teb chaws los yuav tsum tsis txhob tso lawv tseg li.” Koj saib seb, cov dab phem tsis zoo ib yam li cov tib neeg qias vuab tsuab dog dig—lawv yuav tawm tsam Vajtswv mus txog thaum kawg. Yog cov tib neeg qias vuab tsuab dog dig pom cov lus tim khawv los ntawm pawg ntseeg, lawv to taub tau tej ntawd, lawv xav tias tej ntawd muaj qab hau, thiab lawv yuav tsis ua kev tsim txom twg li. Tiam sis Ntxwgnyoog thiab cov dab phem tsis yog zoo li no. Thaum lawv pom koj raws Vajtswv qab thiab ua tim khawv rau Vajtswv, lawv ntxub koj, lawv xav muab koj tua, thiab lawv tsis pub koj ua neej nyob. Yog koj tsis ua raws li lawv hais thiab tsis pe hawm lawv, ces lawv yuav tsis muaj hnub tso koj tseg, thiab lawv yuav tsis cia koj ua neej nyob. Lawv yuav caum tua koj txawm koj mus qhov twg los xij; txawm koj mus txog ntua lub qab ntuj kawg los, lawv tseem yuav tsis tso koj tseg. Qhov no yog yam uas tus zaj loj liab ploog ua. Qhov no yog Ntxwgnyoog txoj kev lim hiam, thiab qhov ntawd mas txawv ntawm cov tib neeg qias vuab tsuab dog dig. Nej yuav tsum pom qhov no kom meej.

Yuav Qhia Tawm thiab Coj Tej Kev Npaj Tes Hauj Lwm Mus Ua Tiag Kom Yog Li Cas

I. Yuav Qhia Tawm Tej Kev Npaj Tes Hauj Lwm Li Cas

10 yam ntawm tej kev npaj tes hauj lwm no yog tus ciaj ciam thiab cov ntsiab lus ntawm txhua yam hauj lwm sib txawv uas Vajtswv ua nyob hauv pawg ntseeg thiab nyob hauv cov neeg uas Vajtswv xaiv tseg. Kev to taub cov ntsiab lus thiab tus ciaj ciam ntawm tes hauj lwm no pab cov neeg Vajtswv xaiv tseg los saib xyuas cov thawj coj thiab cov neeg ua hauj lwm kom ua tes hauj lwm no kom zoo. Nyob rau lwm kis, qhov ntawd tseem ceeb pab cov thawj coj thiab cov neeg ua hauj lwm kom to taub thiab nkag siab tus ciaj ciam ntawm lawv tej luag hauj lwm, thiab tes hauj lwm uas lawv yuav tsum ua thiab tej luag hauj lwm uas lawv yuav tsum ua kom tiav, thiab kom muaj ib lub ntsiab tshab txhais uas raug txog lub npe “cov thawj coj thiab cov neeg ua hauj lwm.” Cov thawj coj thiab cov neeg ua hauj lwm tej luag hauj lwm yog dab tsi? Lawv yuav tsum ua neej kom zoo li cas? Lawv puas yuav tsum zoo li cov nom tswv ntawm tsoom fwv hauv ib lub teb chaws? (Tsis zoo li ntawd.) “Cov thawj coj thiab cov neeg ua hauj lwm” tsis yog ib txoj hauj lwm nom tswv los sis ib lub npe. Yuav tsum to taub tias cov thawj coj thiab cov neeg ua hauj lwm yog dab tsi los ntawm tej dej num uas cov thawj coj thiab cov neeg ua hauj lwm ua, thiab los ntawm cov lus txib uas Vajtswv tso rau lawv thiab cov qauv uas Nws cheem tsum ntawm lawv. Ua li no, yuav muaj ib txoj kev to taub uas ntxaws dua me ntsis txog lub npe ntawm “cov thawj coj thiab cov neeg ua hauj lwm,” thiab pom meej dua txog lub ntsiab tshab txhais ntawm cov thawj coj thiab cov neeg ua hauj lwm. Qhov tsawg kawg nkaus ntawm cov thawj coj thiab cov neeg ua hauj lwm tej luag hauj lwm uas yuav tsum ua kom tiav ntawd yog dab tsi? Lawv yuav tsum qhia tawm, xa tawm, thiab coj txhua yam kev npaj tes hauj lwm mus ua tiag kom yog raws li tej kev cheem tsum ntawm Vajtswv lub tsev, raws li tau hais nyob rau hauv yam cuaj. Tsis hais txoj kev npaj tes hauj lwm ntawd ntsig txog sab twg los xij, tsuav yog raug qhia tawm los ntawm cov thawj coj thiab cov neeg ua hauj lwm xwb, ces yam uas lawv yuav tsum ua yog qhia tawm txoj kev npaj tes hauj lwm ntawd rau cov pawg ntseeg yam tsis ncua sij hawm thiab tsis nres, tom qab lawv muaj ib txoj kev to taub uas raug tag nrho txog txoj kev npaj tes hauj lwm ntawd lawm. Hais txog cov uas qhia tawm tej kev npaj tes hauj lwm rau ntawd, yog Vajtswv lub tsev cheem tsum kom qhia tawm tej kev npaj tes hauj lwm ntawd rau cov thawj coj thiab cov neeg ua hauj lwm txhua theem, nrog rau cov tib neeg uas nyob rau theem ntawm cov neeg qhuab qhia, pawg ntseeg cov thawj coj, thiab pawg ntseeg cov tub leg num, ces yuav tsum qhia tej ntawd nqis mus rau cov tib neeg nyob rau theem no, thiab npaum li ntawd xwb; yog yuav tsum qhia tej kev npaj tes hauj lwm ntawd rau txhua tus kwv tij thiab nkauj muam, ces yuav tsum qhia tej ntawd rau txhua tus kwv tij thiab nkauj muam kom nruj raws li Vajtswv lub tsev tej kev cheem tsum. Yog xwm txheej ua rau tsis yooj yim los qhia tawm tej kev npaj tes hauj lwm ntawd ua ntawv, thiab qhov ua li no yuav coj kev pheej hmoo rau sab kev nyab xeeb los sis tej teeb meem uas loj dua los, ces yuav tsum hais qhia cov ntsiab lus uas tseem ceeb thiab yog lub hauv paus ntawm tej kev npaj tes hauj lwm ntawd rau txhua tus neeg kom raug. Yog li ntawd, yuav tsum ua qhov no li cas thiaj li suav tau tias tej kev npaj tes hauj lwm ntawd raug qhia tawm lawm? Yog qhia tawm tej kev npaj tes hauj lwm ntawd ua ntawv, yuav tsum paub tseeb tias txhua tus tau txais tej ntawd lawm, txhua tus paub txog tej ntawd lawm, thiab txhua tus muab tej ntawd saib tseem ceeb; yog qhia tawm tej ntawd los ntawm ncauj, ces thaum qhia tawm lawm, yuav tsum nug tib neeg ntau lwm seb lawv puas to taub tej ntawd meej thiab puas nco tau tej ntawd, thiab haj tseem kom lawv hais tej kev npaj hauj lwm ntawd ib lwm rov qab thiab—tsuas yog ua li no xwb mas thiaj li suav tau tias tej kev npaj tes hauj lwm ntawd raug muab qhia tawm tiag tiag lawm. Yog tib neeg tuaj yeem hais ib lwm rov qab thiab hais meej tias Vajtswv lub tsev tej hauv paus ntsiab lus uas cheem tsum yog dab tsi, thiab cov ntsiab lus ntxaws ntxaws yog dab tsi, ces qhov no ua pov thawj qhia tias tej kev npaj tes hauj lwm ntawd twb raug qhia tawm mus rau hauv lawv lub siab lawm, lawv nco tau lawm, thiab to taub tej ntawd meej lawm. Tsuas yog thaum ntawd xwb mas thiaj li suav tau tias tej kev npaj tes hauj lwm ntawd raug qhia tawm tiag tiag lawm. Yog tej xwm txheej, qhov chaw ib puag ncig, thiab lwm yam zoo li no puav leej tsim nyog muab sau ua ntawv rau txoj kev qhia tawm txog tej kev npaj hauj lwm ntawd, ces yuav tsum muab tej ntawd sau ua ntawv qhia tawm xwb xwb li; yog qhia tej kev npaj tes hauj lwm ntawd ua ntawv tsis tau vim xwm txheej tsis tso cai rau qhov no thiab yuav tsum qhia tawm ntawm ncauj, ces yuav tsum paub tseeb tias yam uas muab qhia tawm ntawm ncauj ntawd yeej zoo ib yam nkaus li tej kev npaj tes hauj lwm, tias tej ntawd tsis raug muab txhais nkhaus, thiab tsis muaj txoj kev to taub ntawm tus kheej ntxiv rau hauv tej ntawd, thiab cov lus tiag tiag uas tau hais yeej muab qhia rau hauv—tsuas yog ua li no xwb mas thiaj li suav tau tias tej kev npaj hauj lwm ntawd raug qhia tawm tiag tiag thiab yog lawm. Yuav tsum qhia tawm tej kev npaj tes hauj lwm ntawd kom tag nrho raws li tej kev npaj tes hauj lwm ntawd cov lus uas ntxaws ntxaws; yuav tsum tsis txhob muab tej ntawd qhia tawm nyob rau hauv ib txoj hau kev uas ua tsis xyuam xim los sis nrog txoj kev txhais nkhaus los sis txhais lus yuam kev raws li tib neeg tus kheej txoj kev to taub thiab tej kev xav hauv nruab siab xwb. Thaum hais txog qhov qhia tawm txog tej ntawd kom yog ntawd, tib neeg yuav tsum to taub theem ntawm qhov kev nruj rau txoj kev tham txog tej kev npaj tes hauj lwm ntawd; qhov ntawd yog, qhov qhia tawm txog tej ntawd mas yuav tsum qhia tawm kom yog. Ib txhia tib neeg hais tias, “Peb puas yuav tsum qhia tawm tej ntawd kom yog kiag?” Tsis tas yuav ua li ntawd. Qhov yog kiag ntawd yog yam uas cheem tsum ntawm cov cuab yeej xwb; yog tib neeg qhia tawm tej ntawd yog lawm xwb, ces lawv twb ua tau zoo heev lawm. Piv txwv li, hais txog lub neej hauv pawg ntseeg, Vajtswv lub tsev tej kev npaj tes hauj lwm cheem tsum kom cov neeg Vajtswv xaiv tseg noj thiab haus Vajtswv cov lus txog kev paub Vajtswv—qhov no puas yooj yim qhia tawm? (Yooj yim.) Tej kev npaj tes hauj lwm muab ib tug ciaj ciam rau tib neeg thiab lawv tuaj yeem nyeem Vajtswv cov lus uas muaj feem xyuam no tag nrho. Txawm li cas los xij, yog muaj neeg txhais tej kev npaj tes hauj lwm ntawd yuam kev, ntxiv lawv tus kheej txoj kev to taub thiab tej kev xav phem thiab kev xav hauv nruab siab thiab qhia tawm qee cov lus ntxiv, qhov no tsis txhais hais tias lawv tau khiav tawm ntawm tej kev npaj tes hauj lwm ntawd lawm lod? Lawv puas qhia tawm tau tej kev npaj tes hauj lwm ntawd yog? (Tsis yog lawm.) Lawv qhia tawm tej kev npaj tes hauj lwm ntawd los ntawm tej uas lawv tus kheej muab ntxiv rau xwb—qhov no mas yog cov lus tsis muaj qab hau kiag li. Yus yuav tsum nyeem txhua txoj kev npaj tes hauj lwm uas los ntawm tus Nyob Saud los ntau zaus thiab paub meej txog lub ntsiab lus uas yog, qhov tseem ceeb ntawm qhov tshaj tawm txoj kev npaj tes hauj lwm no, thiab tej hom phiaj uas xav ua kom tiav yog dab tsi, thiab tom qab ntawd nrhiav txoj hau kev uas yog los xyaum ua raws tej yam hauj lwm ntxaws ntxaws uas tus Nyob Saud npaj, zam qhov ua yuam kev. Qhov qhia tawm txoj kev npaj tes hauj lwm ntawd tom qab sib qhia thiab to taub lawm mas thiaj li yuav raug tag nrho. Yam uas yuav tsum xub ua yog xa tawm tej kev npaj tes hauj lwm los ntawm cov thawj coj thiab cov neeg ua hauj lwm ntawm cov cheeb tsam loj mus rau tag nrho lwm theem ntawm cov thawj coj thiab cov neeg ua hauj lwm, thiab thaum kawg xa tej kev npaj tes hauj lwm ntawd mus rau cov saib xyuas ntawm txhua pab pawg hauv txhua lub pawg ntseeg. Tom qab ntawd yuav tsum sib qhia txog Vajtswv lub tsev tej kev npaj tes hauj lwm ntawd ntau zaus hauv kev sib txoos ua ke kom tag nrho cov neeg Vajtswv xaiv tseg thiaj li to taub tej kev npaj tes hauj lwm ntawd thiab paub tias yuav muab tej kev npaj tes hauj lwm ntawd coj mus xyaum raws ua li cas—tsuas yog thaum ua tau raws li qhov txiaj ntsig no xwb mas thiaj li suav tau tias tej kev npaj tes hauj lwm raug qhia tawm lawm. Yuav tsum qhia tawm tej kev npaj tes hauj lwm ntawd raws li txoj hau kev thiab tus ciaj ciam uas Vajtswv lub tsev cheem tsum. Muaj tseeb tias, cov ntsiab lus uas qhia tawm ntawd yuav tsum raug thiab tsis muaj qhov yuam kev. Cov thawj coj thiab cov neeg ua hauj lwm yuav tsum tsis txhob lam txhais tej kev npaj tes hauj lwm ntawd yuam kev thiab ntxiv lawv tus kheej tej tswv yim rau—qhov ntawd tsis yog qhia tawm tej ntawd kom yog lawm, thiab qhov ntawd yog ib yam li qhov ua tsis tiav lawv tej luag hauj lwm yam li ib tug thawj coj los sis ib tug neeg ua hauj lwm. Qhov no yog qhov uas yuav to taub txog txoj kev qhia tawm thiab kev coj tej kev npaj tes hauj lwm ntawd mus ua tiag kom yog li cas.

Cov thawj coj thiab cov neeg ua hauj lwm yuav tsum ua li cas yog lawv tseem tsis paub tseeb txog qhov yuav qhia tawm tej kev npaj tes hauj lwm kom yog kiag li cas? Muaj ib txoj hau kev uas yooj yim heev rau qhov no. Tom qab cov thawj coj thiab cov neeg ua hauj lwm tau txais tej kev npaj tes hauj lwm lawm, lawv yuav tsum xub sib qhia txog tej kev npaj tes hauj lwm ntawd nrog lwm cov thawj coj thiab cov neeg ua hauj lwm, saib seb tus Nyob Saud cheem tsum pes tsawg yam ntxaws ntxaws rau tej kev npaj tes hauj lwm no, thiab teev tej ntawd tawm ib yam zuj zus. Tom qab ntawd, lawv yuav tsum xav txog qhov xwm txheej tiag tiag ntawm pawg ntseeg hauv qhov chaw ntawd raws li tej kev npaj tes hauj lwm no, xws li qhov xwm txheej ntawm tes hauj lwm tshaj tawm txoj moo zoo, ntau yam tes hauj lwm qib siab, thiab lub neej hauv pawg ntseeg, nrog rau lub peev xwm thiab tsev neeg qhov xwm txheej ntawm txhua hom neeg sib txawv, thiab lwm yam ntxiv, es muab tag nrho tej no koom ua ke kom pom tias yuav coj tej hauj lwm no mus ua tiag li cas. Los ntawm kev sib qhia, tag nrho cov thawj coj thiab cov neeg ua hauj lwm yuav tsum muaj ib txoj kev to taub uas zoo ib yam nkaus thiab raug txog tej kev npaj tes hauj lwm, thiab muaj tej hau kev uas tsim nyog los qhia tawm tej kev npaj tes hauj lwm ntawd—tsuas yog ua li no xwb mas tej kev npaj tes hauj lwm thiaj li yuav raug qhia tawm kom raug. Yog ib tug thawj coj los sis ib tug neeg ua hauj lwm txais tau tej kev npaj tes hauj lwm, es cia li lam tau lam muab cov kwv tij thiab cov muam hu tuaj sib txoos ua ke thiab muab tej kev npaj tes hauj lwm ntawd xa tawm thiab qhia tawm yam tsis paub tias tej kev npaj tes hauj lwm ntawd cheem tsum dab tsi tiag tiag, qhov no puas tsim nyog? Qhov tshwm sim los ntawm qhov no yog ib los sis ob lub hlis tom qab uas qhia tawm tej kev npaj tes hauj lwm lawm, es pom tias nyob hauv txhua lub pawg ntseeg muaj qhov yuam kev ntawm txoj kev coj tej kev npaj tes hauj lwm mus ua tiag ntawd, thiab, tsuas yog thaum tus thawj coj los sis tus neeg ua hauj lwm ua tib zoo saib tej kev npaj tes hauj lwm ntawd, lawv thiaj li pom tias muaj qhov yuam kev hauv txoj kev qhia tawm tej kev npaj tes hauj lwm ntawd lawm. Yog tus thawj coj los sis tus neeg ua hauj lwm ntawd ua tib zoo nyeem thiab sib qhia txog tej kev npaj tes hauj lwm thaum lub sij hawm ntawd, ces yeej yuav zoo lawm, tiam sis vim lawv tub nkeeg thiab ua dog ua dig ib lub sij hawm ntawd, lawv tau ua rau muaj ntau qhov yuam kev thiab qhov tsis raug tshwm sim hauv pawg ntseeg tes hauj lwm, thiab tom qab ntawd, lawv yuav tsum tau kho tej ntawd. Qhov no ntxiv ib kauj ruam uas tsis cheem tsum hlo li thiab nkim sij hawm. Yuav zoo dua yog lawv sib qhia ncaj qha txog tej kev npaj tes hauj lwm kom meej thiab tom qab ntawd qhia tawm thiab coj tej kev npaj tes hauj lwm ntawd mus ua tiag ib yam zuj zus. Thaum ua tes hauj lwm tsis zoo tsis yog ib qho ua yuam kev lod? (Yog.) Yog li ntawd, qhov qhia tawm tej kev npaj tes hauj lwm kom raug mas muaj tej kauj ruam. Cov thawj coj thiab cov neeg ua hauj lwm yuav tsum xub muaj ib txoj kev nkag siab tseeb thiab muaj ib txoj kev to taub uas raug txog cov ntsiab lus ntxaws ntxaws ntawm tej kev npaj tes hauj lwm, thiab tom qab ntawd lawv yuav tsum muaj tej kev npaj uas coj mus ua tiag, tej hau kev uas coj mus ua tiag, thiab cov neeg uas yog lub hom phiaj rau qhov coj mus ua ntawd nyob hauv lawv lub siab—tsuas yog ua li no xwb mas thiaj li yuav qhia tawm tau tej kev npaj tes hauj lwm kom raug. Yog cov thawj coj thiab cov neeg ua hauj lwm cia li xa tawm thiab qhia tawm tej kev npaj tes hauj lwm ntawd yam dig muag ntsuav thaum lawv tsuas muaj ib txoj kev to taub ib nrab txog tej kev npaj tes hauj lwm ntawd, tsuas mloog zoo li to taub, paub tsis meej thiab pom tsis tshab txog tej kev npaj tes hauj lwm ntawd, los sis yeej tsis to taub tej kev cheem tsum thiab cov ntsiab lus ntxaws ntxaws nyob hauv tej kev npaj tes hauj lwm ntawd, qhov no puas tsim nyog? (Tsis tsim nyog.) Cov thawj coj thiab cov neeg ua hauj lwm zoo li no puas ua tau tes hauj lwm kom zoo? Yeej ua tsis tau li. Yog li ntawd, nyob hauv tej xwm txheej uas cov kwv tij thiab cov muam tsis paub tias cov qauv thiab tej hauv paus ntsiab lus ntxaws ntxaws uas cheem tsum nyob rau hauv tej kev npaj tes hauj lwm ntawd yog dab tsi, los sis yuav ua tej kev npaj tes hauj lwm ntawd li cas tiag tiag, cov thawj coj thiab cov neeg ua hauj lwm twb muaj ib txoj kev to taub uas yog txog tej kev npaj tes hauj lwm lawm, nrog rau tej kev npaj uas muaj tiag thiab tej kauj ruam los muab tej ntawd coj mus ua tiag lawm—tsuas yog ua li no xwb mas cov thawj coj thiab cov neeg ua hauj lwm thiaj li ua tau thawj kauj ruam kom tiav, qhov ntawd yog, qhia tawm txog tej kev npaj tes hauj lwm. Thaum tej kev npaj tes hauj lwm raug qhia tawm lawm, thiab cov kwv tij thiab cov muam txhua tus to taub cov ntsiab lus ntawm tej kev npaj tes hauj lwm kom raug, thiab muaj qee txoj kev paub txog lub ntsiab, qhov muaj nqis, thiab cov qauv ntawm Vajtswv lub tsev uas ua tes hauj lwm no lawm, ces cov thawj coj thiab cov neeg ua hauj lwm yuav tsum sib qhia txog qhov yuav faib tib neeg thiab tej yam hauj lwm ntxaws ntxaws li cas tam sim ntawd, thiab txoj kev npaj ntxaws ntxaws rau tus uas yuav muab tes hauj lwm no coj mus ua tiag thiab ua kom tiav—tej no yog tej kauj ruam rau txoj kev ua hauj lwm. Nej xav li cas txog qhov taug qab txog tes hauj lwm li no? Qhov no puas suav tau tias yog taug qab txog tes hauj lwm kom nruj? Qhov no puas yog taug qab txog tes hauj lwm kom raws sij hawm? (Yog.)

II. Yuav Coj Tej Kev Npaj Tes Hauj Lwm Los Ua Tiag Li Cas

Tsis yog hais tias, thaum cov thawj coj thiab cov neeg ua hauj lwm tau txais ib qho kev npaj tes hauj lwm lawm, lawv tsuas qhia tawm thiab xa tawm xwb ces txawm tau lawm. Thaum cov neeg Vajtswv xaiv tseg nyob rau hauv txhua pawg ntseeg paub tias tau xa tawm qhov kev npaj tes hauj lwm ntawd lawm, puas suav tau tias tau coj qhov kev npaj tes hauj lwm ntawd los tiag lawm? Qhov no tsis yog txoj kev ua raws los sis coj qhov kev npaj tes hauj lwm ntawd los ua tiag tiag, qhov no tsis yog qhov ua lawv tej luag hauj lwm kom tiav, thiab tsis yog tus qauv uas Vajtswv cheem tsum thaum kawg. Qhov qhia tawm thiab xa tawm ib qho kev npaj tes hauj lwm ntawd tsis yog lub hom phiaj—qhov coj los ua tiag thiaj li yog lub hom phiaj. Yog li ntawd, yuav coj tej kev npaj tes hauj lwm los ua tiag kom ntxaws ntxaws li cas? Cov thawj coj thiab cov neeg ua hauj lwm yuav tsum hu txhua tus neeg saib xyuas thiab cov kwv tij thiab cov nkauj muam uas muaj feem xyuam los ua ke thiab nrog lawv sib qhia txog qhov seb yuav ua tes hauj lwm ntawd li cas, thiab tib lub sij hawm ntawd xaiv ib tug neeg saib xyuas tseem ceeb thiab cov tswv cuab hauv pab pawg los ua tes hauj lwm ntawd. Thawj yam uas cov thawj coj thiab cov neeg ua hauj lwm yuav tsum ua thaum coj tes hauj lwm los ua tiag yog qhov sib qhia—sib qhia txog qhov seb yuav ua tes hauj lwm ntawd kom mus raws li tej hauv paus ntsiab lus thiab haum rau qhov kev npaj tes hauj lwm no uas los ntawm Vajtswv lub tsev los, thiab yuav ua li cas kom txhais tau tias qhov kev npaj tes hauj lwm uas los ntawm Vajtswv lub tsev los no tau coj mus ua tiag thiab ua kom tiav. Thaum sib qhia, cov kwv tij thiab cov nkauj muam nrog rau cov thawj coj thiab cov neeg ua hauj lwm yuav tsum tawm tswv yim txog ntau yam kev npaj, thiab thaum kawg xaiv ib txoj kev, ib txoj hau kev, thiab tej kauj ruam uas tsim nyog tshaj plaws thiab mus raws li tej hauv paus ntsiab lus tshaj plaws, txiav txim siab seb yuav xub ua dab tsi, thiab yuav ua dab tsi tom qab, kom tes hauj lwm ntawd thiaj li nce qib mus tau raws qib raws duas. Thaum to taub qhov no raws li lub tswv yim lawm, thaum tib neeg tsis muaj tej kev nyuaj los sis tej kev xav hauv nruab siab lawm, thaum lawv tsis muaj kev tawm tsam rau tes hauj lwm no, thiab to taub txog qhov tseem ceeb thiab lub hom phiaj ntawm qhov kev npaj tes hauj lwm ntawm Vajtswv lub tsev no lawm, tes hauj lwm ntawd tseem suav tsis tau tias tau ua tiav lawm. Kuj yuav tsum tau txiav txim siab seb leej twg thiaj li haum tshaj plaws thiab txawj ua tes hauj lwm no tshaj plaws, leej twg thiaj li ris tau lub luag hauj lwm ntawm tes hauj lwm no, thiab leej twg thiaj li muaj peev xwm ua tes hauj lwm no kom tiav. Yuav tsum xaiv cov tib neeg uas yuav los ris tes hauj lwm no tawm los, yuav tsum teem txoj kev npaj ua raws thiab lub sij hawm uas yuav tsum ua kom tiav, thiab yuav tsum npaj kom txhij thiab piav kom meej txog tej ntaub ntawv, tej khoom siv, thiab lwm yam uas tim tsum rau kev ua tes hauj lwm ntawd kom tiav—tsuas yog ua li no xwb thiaj li suav tau tias tes hauj lwm ntawd tau muab coj los ua tiag lawm. Muaj tseeb tiag, ua ntej coj tes hauj lwm no mus ua tiag, kuj yuav tsum sib tham ib leeg zuj zus nrog cov tib neeg uas ris lub luag hauj lwm rau tes hauj lwm no, thiab sib pauv tswv yim kom ntxaws, nug seb lawv puas tau ua tes hauj lwm no dua thiab lawv muaj kev xav thiab tswv yim li cas txog tes hauj lwm ntawd. Yog lawv qhia tau qee yam kev npaj thiab tswv yim uas mus raws li tej hauv paus ntsiab lus, ces yeej muab tej ntawd coj los siv tau. Tsis tas li ntawd xwb, thaum coj txhua tes hauj lwm los ua tiag ntawd, kuj yuav tsum tau ua tib zoo saib kom pom seb muaj pes tsawg yam teeb meem tshwm sim tiag tiag—kauj ruam no yuav tsum tsis txhob tsis quav ntsej. Tom qab pom tej teeb meem lawm, yuav tsum nrhiav hau kev los daws tej teeb meem ntawd kom ncav sij hawm, thiab tsuas yog tom qab daws txhua yam teeb meem uas muaj ntawd kom tag huv tib si lawm xwb mas qhov kev npaj tes hauj lwm ntawd thiaj li raug ua tiag tiag. Tsis tas li ntawd, seb yuav ua tes hauj lwm no li cas kom thiaj li mus raws li tej hauv paus ntsiab lus uas Vajtswv lub tsev cheem tsum, qhov no puas yog yam uas koj yuav tsum nrhiav? Tsis tas li ntawd xwb, seb Vajtswv lub tsev puas muaj tej kev cheem tsum txog lub sij hawm rau tes hauj lwm no, yuav tsum ua kom tiav nyob rau hauv lub sij hawm ntev npaum li cas, seb puas muaj tej kev cai ntxaws ntxaws txog tej kev txawj ntawm tes hauj lwm, thiab lwm yam ntxiv, puav leej yog tej ncauj lus uas cov thawj coj thiab cov neeg ua hauj lwm nrog cov neeg saib xyuas uas muaj feem xyuam ntawd yuav tsum sib qhia. Qhov no yog txoj kev coj mus ua tiag. Txoj kev coj mus ua tiag ntawd tsis yog xaus rau qhov hais ntawm ncauj los sis ntawm lub tswv yim xwb, tiam sis qhov ntawd ntsig txog txoj kev nce qib tiag tiag ntawm tes hauj lwm uas muaj feem xyuam ntawd, nrog rau qee yam teeb meem ntxaws ntxaws thiab kev nyuaj uas tim tsum tau daws. Tej no puav leej yog tej yam uas cov thawj coj thiab cov neeg ua hauj lwm yuav tsum xav txog thaum lawv nrog cov neeg saib xyuas ua qhov kev npaj tes hauj lwm ntawd. Qhov ntawd yog hais tias, ua ntej yuav ua tes hauj lwm ntxaws ntxaws no, cov thawj coj thiab cov neeg ua hauj lwm yuav tsum muaj txoj kev sib qhia, kev soj ntsuam, thiab kev sib tham zoo li no nrog cov neeg saib xyuas—qhov no yog txoj kev coj mus ua tiag. Txoj kev coj mus ua tiag no yog cov thawj coj thiab cov neeg ua hauj lwm lub luag hauj lwm, thiab qhov ntawd yog yam uas cov thawj coj thiab cov neeg ua hauj lwm yuav tsum ua kom tau. Qhov xyaum ua raws li no yog qhov ua tes hauj lwm tiag tiag. Yog ib tug thawj coj hais tias, “Tam sim no, kuv kuj tsis paub yuav ua tes hauj lwm no li cas thiab. Txawm li cas los xij, kuv twb muab cob rau koj lawm. Kuv kuj twb qhia tawm thiab xa tawm qhov kev npaj tes hauj lwm no rau koj lawm, thiab kuv twb qhia rau koj txog txhua yam uas muaj feem xyuam lawm. Hais txog qhov tias koj puas paub ua los sis tsis paub, koj yuav ua li cas, seb koj ua tau zoo los sis phem, thiab koj yuav siv sij hawm ntev npaum li cas ntawd, txhua yam nyob ntawm koj lawm. Tej no tsis muaj feem xyuam nrog kuv li. Qhov uas kuv ua hauj lwm npaum li no ntawd, kuv twb ua kuv lub luag hauj lwm tiav lawm.” Qhov no puas yog tej lus uas cov thawj coj thiab cov neeg ua hauj lwm tsim nyog hais? (Tsis yog.) Yog ib tug thawj coj hais li no, lawv yog hom neeg zoo li cas? Lawv yog ib tug thawj coj cuav. Thaum twg tus Nyob Saud muaj tej kev cheem tsum thiab tim tsum kom ua tes hauj lwm raws li tej kev npaj tes hauj lwm, hom neeg zoo li no yeej muab tso plhuav rau lwm tus, thiab hais tias, “Koj ua xwb, kuv tsis paub ua. Txawm li cas los koj yeej to taub txhua yam lawm. Koj yog tus uas txawj, kuv yog tus uas tsis paub dab tsi.” Qhov no yog ib “lo lus nto moo” uas cov thawj coj cuav nquag hais; lawv nrhiav ib qho laj thawj ces cia li khiav twj ywm lawm.

Muab hais luv luv mas, cov thawj coj cuav tsis ris lawv lub luag hauj lwm hauv lawv tes hauj lwm li. Txawm lawv lub peev xwm yuav zoo los sis tsis zoo, los sis seb lawv puas ua tau tes hauj lwm ntawd los xij, qhov tseem ceeb yog lawv tsis muab siab rau ua thiab lawv tsis muab lawv lub siab npuab rau tes hauj lwm ntawd, thiab lawv pheej ua dog ua dig. Tej no yog tej kev qhia tshwm uas pom tau meej ntawm qhov tsis ris lub luag hauj lwm. Piv txwv tias ib tug thawj coj los sis ib tug neeg ua hauj lwm tsis tshua muaj peev xwm thiab tsis tshua muaj kev ntsib kev pom tob, tiam sis lawv tuaj yeem muab siab rau ua hauj lwm thiab muab lub siab npuab rau lawv tes hauj lwm. Txawm tias tej txiaj ntsig uas lawv ua tau hauv lawv tes hauj lwm yuav tsis zoo npaum li cas los, yam tsawg kawg, lawv yog ib tug neeg uas ris lawv lub luag hauj lwm, lawv muab tag nrho lawv lub siab npuab rau lawv tes hauj lwm, thiab lawv ua tag nrho lawv lub zog lawm. Tsuas yog vim lawv tsis tshua muaj peev xwm thiab lawv lub siab ntseeg tseem me es thiaj li ua tsis tau tes hauj lwm ntawd kom zoo xwb. Yog lawv yuav muaj peev xwm ua tau lawv tes hauj lwm kom zoo tiav log tom qab lawv xyaum ua tau ib ntus lawm, ces yuav tsum txuas ntxiv cob qhia hom thawj coj zoo li no. Yog ib tug thawj coj tsis muaj lub siab txawj xav los sis laj thawj me me li, thiab lawv tsuas tuav lub meej mom thiab xyiv fab rau tej txiaj ntsim ntawm lub meej mom xwb, tiam sis tsis ua ib qho hauj lwm tiag tiag li, ces lawv yog ib tug thawj coj cuav tseem tseem thiab yuav tsum tau muab lawv rho tawm tam sim ntawd, thiab yuav tsis pub txhawb los sis siv lawv dua li lawm. Ib tug thawj coj tiag tiag, ib tug thawj coj uas muaj lub siab ris lawv lub luag hauj lwm, yeej muab tag nrho lawv lub zog rau lawv tes hauj lwm—lawv muab lawv lub siab tsom ntsoov rau lawv tes hauj lwm, lawv nrhiav txhua txoj kev los ua Vajtswv cov lus txib kom tiav, thiab lawv ua tag nrho lawv lub zog npaum li qhov lawv ua tau—qhov no yog lawv ua tau lawv tej luag hauj lwm kom tiav. Thaum coj tej kev npaj tes hauj lwm ntawm Vajtswv lub tsev mus ua tiag ntawd, cov thawj coj uas muaj lub siab ris lawv lub luag hauj lwm ntawd kuj yuav soj ntsuam thiab taug qab txog qhov xwm txheej ntawm txoj kev coj mus ua tiag ntawd. Thaum muaj ib qho xwm txheej ceev tshwm sim, lawv yuav muaj peev xwm nrhiav tau kev los teb rov qab thiab tej hau kev los daws es tsis yog khiav twj ywm thiab qaim tes tsis quav ntsej txog tej ntawd li. Qhov coj tes hauj lwm mus ua tiag zoo li no thiaj li hu ua qhov ris lub luag hauj lwm. Thaum xa tawm ib qho kev npaj tes hauj lwm, cov thawj coj thiab cov neeg ua hauj lwm yuav tsum saib tes hauj lwm ntawd ua tes hauj lwm uas tseem ceeb tshaj plaws tam sim no thiab ris lub luag hauj lwm rau qhov ntawd; lawv tus kheej yuav tsum taug qab txog qhov ntawd, ris lub luag hauj lwm rau qhov ntawd txij thaum pib mus txog thaum kawg, thiab tsuas tso tes tau thaum tes hauj lwm ntawd mus tau rau txoj kev uas yog thiab cov coj ntawm txhua pab pawg paub tias yuav ua tes hauj lwm ntawd li cas lawm xwb. Tiam sis tom qab tso tes lawm, cov thawj coj thiab cov neeg ua hauj lwm tseem yuav tsum tau to taub thiab tshuaj xyuas txog qhov xwm txheej ntawm tes hauj lwm ntawd ua ntu zus, tsuas yog ua li no xwb thiaj li paub tseeb tias tes hauj lwm ntawd tau raug ua kom zoo lawm. Qhov uas cov thawj coj thiab cov neeg ua hauj lwm tsis tawm ntawm lawv qhov chaw ua hauj lwm mus, tuav rawv txij thaum pib mus txog thaum kawg, ua kom tes hauj lwm ntawd mus tau rau txoj kev uas yog lawm—qhov no thiaj li hu ua qhov ua tes hauj lwm tiag tiag. Nyob rau lub sij hawm no, cov thawj coj thiab cov neeg ua hauj lwm kuj yuav tsum tau saib xyuas thiab tshuaj xyuas txog txoj kev nce qib ntawm lwm yam hauj lwm thiab. Txawm yuav muaj kev nyuaj los sis teeb meem dab tsi tshwm tuaj hauv tes hauj lwm los xij, cov thawj coj thiab cov neeg ua hauj lwm yuav tsum mus rau ntawm qhov chaw ua hauj lwm kom sai txhawm rau taw qhia thiab daws. Tus thawj coj tseem ceeb yuav tsum tuav rawv tes hauj lwm uas tseem ceeb tshaj plaws, thiab tib lub sij hawm ntawd, lawv kuj yuav tsum taug qab, to taub, tshuaj xyuas, thiab txhawb kom ua lwm yam hauj lwm ntawm pawg ntseeg thiab xyuas kom paub tseeb tias txhua yam nce qib mus tau li ib txwm. Thaum hais txog tes hauj lwm uas tseem ceeb tshaj plaws, tus thawj coj tseem ceeb yuav tsum nyob ua hauj lwm rau ntawm qhov chaw thiab taw qhia tes hauj lwm no kiag ntawm lawv tus kheej, thiab tshwj xeeb tshaj yog thaum hais txog tej ntu tseem ceeb ntawm tes hauj lwm, lawv yeej yuav tsum tsis txhob tawm ntawm qhov chaw ua hauj lwm mus. Yog ib tug neeg tsis txaus, yuav tsum npaj lwm tus neeg los nrog lawv sib koom tes thiab taw qhia tes hauj lwm ntawd—qhov no yog qhov ua tag nrho lub zog thiab muaj ib lub siab ib lub ntsws los ua tes hauj lwm tseem ceeb ntawd kom zoo. Vim Vajtswv lub tsev muaj ib teg hauj lwm uas tseem ceeb tshaj plaws nyob rau txhua ntu thiab txhua ntu sij hawm, yog tus thawj coj tseem ceeb ua tsis tau tes hauj lwm tseem ceeb ntawd kom zoo, ces yog lawv lub peev xwm muaj teeb meem lawm thiab yuav tsum tau muab lawv rho tawm. Tus thawj coj tseem ceeb yuav tsum ris lub luag hauj lwm rau tes hauj lwm uas tseem ceeb tshaj plaws hos lwm cov thawj coj ris lub luag hauj lwm rau cov hauj lwm dog dig; cov thawj coj thiab cov neeg ua hauj lwm yuav tsum kawm paub seb yuav muab tes hauj lwm twg tso ua ntej raws li qhov tseem ceeb thiab qhov ceev, thiab seb yuav ntsuas qhov zoo thiab qhov phem li cas. Yog cov thawj coj thiab cov neeg ua hauj lwm muaj peev xwm tuav tau tej hauv paus ntsiab lus no, ces lawv thiaj li yog cov thawj coj thiab cov neeg ua hauj lwm uas mus raws li tus qauv.

Feem coob ntawm cov thawj coj thiab cov neeg ua hauj lwm hauv Vajtswv lub tsev yog cov hluas, lawv yog cov nyuam qhuav pib tshiab, thiab lawv tab tom xyaum ua tes hauj lwm, yog li ntawd qhov tseem ceeb tshaj plaws yog lawv yuav tsum kawm kom tuav tau tej hauv paus ntsiab lus. Tej zaum ib txhia yuav hais tias, “Tej kev cheem tsum uas Vajtswv lub tsev muaj rau cov thawj coj thiab cov neeg ua hauj lwm puas yog siab dhau lawm?” Qhov tseeb tiag, yeej tsis siab me ntsis li. Qhov cheem tsum kom tib neeg tuav tau tej hauv paus ntsiab lus yuav ua li cas yog ib qho kev cheem tsum uas siab tau? Yog ib tug neeg tuav tsis tau tej hauv paus ntsiab lus, lawv yuav ua pawg ntseeg tes hauj lwm kom zoo tau li cas? Yog ib tug neeg ua tej yam tsis muaj tej hauv paus ntsiab lus, lawv yuav ua ib tug thawj coj los sis ib tug neeg ua hauj lwm tau li cas? Qhov tuav tau tej hauv paus ntsiab lus yog ib qho kev cheem tsum rau cov thawj coj thiab cov neeg ua hauj lwm, tsis yog rau cov tib neeg dog dig; yog ib tug neeg tuav tsis tau tej hauv paus ntsiab lus, ces lawv yeej yuav ua tsis tau tes hauj lwm ntawd kom zoo. Cov tib neeg uas lub peev xwm tsis zoo kiag li ntawd yeej ncav tsis cuag tej hauv paus ntsiab lus, Vajtswv lub tsev yuav tsis cob qhia lawv, thiab lawv kuj tsis tsim nyog ua cov thawj coj thiab. Ib txhia tib neeg pheej xav tias qhov ua ib tug thawj coj ntawd mas nyuaj, qhov no muaj ob qho laj thawj: Ib qho mas yog lawv tsis to taub qhov tseeb me me li thiab tsis muaj peev xwm siv qhov tseeb los daws tej teeb meem; lwm lub laj thawj mas yog lawv lub peev xwm tsis zoo, lawv tsis paub tias qhov ua tes hauj lwm ntawd yog dab tsi, lawv piav tsis tau tej hauv paus ntsiab lus thiab txoj kev xyaum ua raws rau tes hauj lwm ntawd kom meej, thiab txawm yog cov kev qhuab qhia xwb los lawv twb hais tsis tau kom meej thiab. Cov tib neeg zoo li no tsis haum ua cov thawj coj. Yog tias ib tug neeg lub peev xwm tsis zoo kiag li, lawv tsis paub ua tes hauj lwm, thiab lawv ua lawv tes dej num tsis muaj qhov ceev me me li—qhov ntawd yog, lawv siv sij hawm ntau hnub los ua ib qho hauj lwm uas tsuas siv ib hnub ua xwb, thiab siv rau lub hli los ua ib qho hauj lwm uas tsuas siv ib hlis ua xwb—cov tib neeg zoo li no siv tsis tau dab tsi, lawv yog cov neeg noj dawb xwb. Cov tib neeg uas lawv lub peev xwm tsis zoo kiag li ntawd yeej ua tsis tau ib teg dej num twg kom zoo li. Qhov uas Kuv muaj tej kev cheem tsum no rau tib neeg yog qhov ncaj ncees thiab tsim nyog, thiab tej no yog yam uas cov thawj coj thiab cov neeg ua hauj lwm ua tau. Ib txhia tib neeg xav tias Vajtswv lub tsev tej kev cheem tsum ntawd siab dhau lawm—qhov no qhia tau tias lawv lub peev xwm tsis zoo kiag li, lawv tsis tsim nyog ua cov thawj coj thiab cov neeg ua hauj lwm, thiab lawv yuav tsum lees qhov txhaum thiab tawm hauj lwm. Koj tsis muaj peev xwm ris tau tej luag hauj lwm ntawm ib tug thawj coj los sis ib tug neeg ua hauj lwm, thiab koj tsis haum ua ib tug thawj coj los sis ib tug neeg ua hauj lwm, yog li ntawd txawm tias koj ua ib tug thawj coj los, koj yeej yog ib tug thawj coj cuav xwb. Yog koj twb ua tsis tau ib teg hauj lwm kom zoo, koj yuav saib xyuas lwm yam hauj lwm thooj txhij tau li cas? Cov tib neeg uas lawv lub peev xwm tsis zoo kiag li puas tsim nyog ua cov thawj coj thiab cov neeg ua hauj lwm? Yog lawv twb piv tsis tau ib tug dev zov tsev, ces lawv yeej tsis tsim nyog raug hu tias yog neeg. Thaum ib tug dev zov tsev, tsis yog nws tsuas zov lub tshav puam pem hauv ntej, lub tshav puam nraum qaum tsev, thiab lub vaj zaub xwb, tiam sis nws tseem zov tau cov qaib, cov os nab, thiab cov yaj hauv tsev thiab. Thaum nws pom ib tug neeg txawv ntsej muag los ze, nws txawm tsem—nws yuav tsis pub leej twg nkag los rau hauv lub vaj loog thiab nws paub ceeb toom rau nws tus tswv tias muaj neeg txawv ntsej muag tuaj lawm. Txawm yog ib tug dev lub hlwb los yeej tsis yooj yim. Yog ib tug neeg lub peev xwm tsis zoo kiag li thiab twb piv tsis tau rau ib tug dev, ces hom neeg zoo li ntawd puas yog tus neeg siv tsis tau dab tsi li? Ib txhia tib neeg nyiam kev tau zoo thiab ntxub kev ua hauj lwm, nyiam noj haus thiab tub nkeeg, thiab lawv xav noj dawb nyob dawb hauv Vajtswv lub tsev yam tsis ua dab tsi li—lawv tsis yog cov niag cab lod? Vajtswv lub tsev cheem tsum kom cov thawj coj thiab cov neeg ua hauj lwm saib xyuas tej yam raws li tej hauv paus ntsiab lus, qhov no yog tab tom cob qhia thiab qhia lawv kom muaj peev xwm xyaum ua raws qhov tseeb thiab nkag mus rau hauv qhov muaj tiag nyob rau hauv txoj kev ua lawv tej dej num. Qee cov thawj coj thiab cov neeg ua hauj lwm muaj peev xwm caum qhov tseeb thiab zwm rau tej kev npaj ntawm Vajtswv lub tsev—cov tib neeg no puav leej tau txais Vajtswv cov koob hmoov. Cov uas nyiam kev tau zoo thiab ntxub kev ua hauj lwm thiab cov uas tsis ua ib yam dab tsi tiag tiag ntawd yuav tsum raug muab tshem tawm. Txhua tus neeg siv tsis tau uas ntshaw kev tau zoo, uas ntshai kev txom nyem thiab kev sab, uas pheej yws txog tej kev txom nyem thiab tej kev nyuaj thiab tiv tsis taus kev txom nyem me me li yuav tsum raug muab tshem tawm—tsis tseg ib tug nyob li! Yog tias, thaum cov thawj coj thiab cov neeg ua hauj lwm pib ua lawv tes hauj lwm, lawv ntsib ntau yam kev nyuaj, lawv yuav tsum nrhiav lub hauv paus ntawm qhov teeb meem ntawd, thiab tom qab ntawd muab cov neeg tsim teeb meem uas tab kaum thiab tsis muaj laj thawj—cov uas ua chaw dawm taw thiab ua kev thaiv ntawd tshem tawm mus. Thaum cov uas tshuav nyob ntawd puav leej yog cov tib neeg uas lees txais tau qhov tseeb, mloog hais, thiab zwm rau xwb, ces qhov ntawd yuav yooj yim los coj ntau lawm. Thaum cov thawj coj thiab cov neeg ua hauj lwm ua lawv tes hauj lwm ntawd, lawv yuav tsum xub qhia qhov tseeb kom meej kom tib neeg thiaj li muaj ib txoj kev taug tom qab mloog lawm. Lawv yuav tsum tsis txhob hais cov kev qhuab qhia, qw tej lus hais, thiab haj yam tsis txhob yuam kom tib neeg mloog raws thiab zwm rau thiab xyaum ua raws. Yog cov thawj coj thiab cov neeg ua hauj lwm qhia qhov tseeb kom meej lawm, ces tib neeg feem coob yeej yuav txaus siab hlo muab coj los xyaum ua raws. Tsuas txhawj tias cov thawj coj thiab cov neeg ua hauj lwm tsis piav tej yam kom meej los sis kom to taub tiam sis tseem hais kom cov kwv tij thiab cov nkauj muam xyaum ua raws, thiab cov kwv tij thiab cov nkauj muam tsis paub tias yuav xyaum ua raws li cas thiab nrhiav tsis tau txoj kev xyaum ua raws—qhov no yuav cuam tshuam rau tej txiaj ntsig ntawm tes hauj lwm. Tsuav yog cov thawj coj thiab cov neeg ua hauj lwm muaj peev xwm piav kom to taub thiab qhia kom meej txog qhov tseeb tej hauv paus ntsiab lus uas muaj feem xyuam nyob rau hauv txhua hom hauj lwm ntxaws ntxaws, ces tib neeg feem coob yeej yuav to taub thiab muaj laj thawj, thiab lawv yuav txaus siab hlo koom tes. Txhua tus yeej txaus siab mloog ib tug neeg twg yog tias yam uas lawv hais ntawd yog lawm, mus raws li qhov tseeb, thiab muaj txiaj ntsim rau pawg ntseeg tes hauj lwm thiab rau cov kwv tij thiab cov nkauj muam txoj kev nkag mus rau hauv lub neej txoj sia. Txawm li cas los xij, muaj ib qho xwm txheej uas qee cov thawj coj thiab cov neeg ua hauj lwm tsuas hais cov lus thiab cov kev qhuab qhia xwb, thiab thaum muaj neeg nug lawv txog txoj kev xyaum ua raws tiag tiag, lawv piav tsis tau, thiab lawv hloov mus hais qee cov kev qhuab qhia loj loj thiab qw qee cov lus hais, thiab tom qab ntawd muab tus neeg ntawd xa mus lawm. Tus neeg ntawd tsis txaus siab, thiab xav tias, “Koj hais kom kuv muab qhov no coj los xyaum ua raws tiam sis koj twb tsis tau piav qhov no kom meej—es kuv yuav xyaum ua raws li cas? Kuv tsis muaj txoj kev taug li! Kuv nug koj vim kuv tsis to taub, tiam sis qhov tseeb tiag koj kuj tsis to taub thiab, thiab tsuas paub hais cov kev qhuab qhia thiab qw tej lus hais xwb. Koj tsis zoo tshaj kuv li. Ua li cas kuv thiaj li yuav tsum mloog koj lus? Kuv zwm rau qhov tseeb, tsis yog zwm rau koj uas hais cov kev qhuab qhia thiab qw tej lus hais!” Hom xwm txheej zoo li no yeej tshwm sim. Yog cov thawj coj thiab cov neeg ua hauj lwm zam tau qhov hais cov kev qhuab qhia uas khoob lug, es hais cov lus tiag tiag, thiab qhia kom meej txog tej hauv paus ntsiab lus thiab txoj kev xyaum ua raws, ces tib neeg feem coob yeej yuav muaj peev xwm mloog lus. Yog li ntawd, pawg ntseeg tes hauj lwm qhov tseeb tiag yeej yooj yim ua; tsuav yog cov thawj coj thiab cov neeg ua hauj lwm muaj peev xwm ua tib zoo coj tej kev npaj tes hauj lwm mus ua tiag, nyob rawv rau lawv qhov chaw ua hauj lwm, thiab koom tes ua tej hauj lwm tiag tiag, ces lawv yeej yuav muaj peev xwm ua tau tes hauj lwm ntawd kom zoo xwb xwb. Qhov txhawj ces yog tias, yog cov thawj coj, cov neeg ua hauj lwm, thiab cov neeg saib xyuas tsis ris lawv lub luag hauj lwm thiab ua tus nyob siab siab, tsuas paub hais cov kev qhuab qhia thiab qw tej lus hais xwb, thiab tsis koom tes ua tej hauj lwm tiag tiag nyob rau ntawm qhov chaw ua hauj lwm—ces yeej yuav muaj teeb meem hauv tes hauj lwm xwb xwb li. Qhov no yog vim cov neeg nyob hauv qab pom tsis tshab txog tej yam zoo li no, lawv cheem tsum ib tug neeg los qhia kev rau lawv, lawv cheem tsum ib tug ntaus thawj, lawv cheem tsum ib tug neeg los coj lawv kiag thiab qhia lawv seb yuav ua li cas, lawv cheem tsum ib tug neeg los saib xyuas thiab tshuaj xyuas, yog tsis li ntawd tes hauj lwm yuav tsis raug coj mus ua tiag li. Yog koj cia siab tias koj tsuas qw ob peb lo lus qhuab qhia thiab tej lus hais nyob saum lub meej mom xwb, ces tom qab ntawd cov neeg nyob hauv qab yuav nqis tes ua thiab ua raws li koj hais, qhov no ces ua npau suav xwb. Cov neeg nyob hauv qab zoo li cov tshuab: Yog tsis muaj neeg qhib, ces cov tshuab yuav tsis ua hauj lwm. Yog cov uas ua cov thawj coj thiab cov neeg ua hauj lwm twb pom tsis tshab txog qhov no, ces lawv yeej tsis muaj kev paub kev pom me ntsis li! Thaum cov thawj coj cuav ua hauj lwm, lawv pom tsis tshab txog dab tsi li. Lawv tsis paub tias tes hauj lwm twg yog qhov tseem ceeb thiab tes hauj lwm twg yog tes hauj lwm dav dav, thiab lawv kuj tsis muaj peev xwm muab tes hauj lwm twg tso ua ntej raws li qhov tseem ceeb thiab qhov ceev. Txawm lawv yuav ua dab tsi los xij, lawv tsis muaj tej hauv paus ntsiab lus, lawv piav tsis tau kom meej txog txoj kev xyaum ua raws, thiab lawv tsuas hais cov kev qhuab qhia thiab qw tej lus hais, hais qee yam uas tsis muaj tiag xwb. Yog li ntawd, lawv yuav ua tsis tau ib teg hauj lwm twg li thiab tsuas yuav raug muab tshem tawm xwb. Cov thawj coj thiab cov neeg ua hauj lwm yuav tsum paub npaj thiab coj tes hauj lwm mus ua tiag, thiab lawv yuav tsum paub tshuaj xyuas thiab taw qhia tes hauj lwm, thiab lawv tus kheej yuav tsum daws tej teeb meem uas tshwm tuaj. Tsuas yog cov thawj coj thiab cov neeg ua hauj lwm zoo li no xwb mas thiaj li ua tau tes hauj lwm tiag tiag thiab ua rau tib neeg ntseeg tag siab. Yog ib tug thawj coj tsis tuaj yeem taw qhia tes hauj lwm los sis pom tsis tau thiab daws tsis tau cov teeb meem, yog lawv tsuas ib lub zog qhuab qhia thiab ntuas lwm tus, thiab lawv yws rau lwm tus thaum lawv tus kheej ua rau tej yam liam sim, ces qhov no yog kev ua ib tug thawj coj uas tsis muaj peev xwm. Ib tug thawj coj zoo li no yog ib tug neeg siv tsis tau, lawv yog ib tug thawj coj cuav, thiab yuav tsum tau muab lawv tshem tawm. Yog koj tsis paub ua tes hauj lwm tiag tiag, yam tsawg kawg koj yuav tsum nrhiav ob tug neeg uas tsim nyog los ua koj ob tug pab, los pab koj ua tes hauj lwm tiag tiag no kom zoo, thiab yam tsawg kawg koj yuav tsum xub daws thiab muab cov neeg ua chaw dawm taw uas tsim tej kev cuam tshuam ntawd ntsaig tawm mus. Qhov no tsis yog qhov tsim tej xwm txheej uas zoo rau qhov ua tes hauj lwm no kom zoo lod? Yog tias, thaum koj pom cov neeg uas muaj peev xwm ua tau tej yam tiag tiag, koj txawm txhawb lawv tam sim ntawd, thiab yog koj daws thiab muab cov neeg uas tsim tej kev cuam tshuam thiab kev tab kaum ntawd ntsaig tawm mus tam sim ntawd, ces thaum koj ua tes hauj lwm no txuas ntxiv mus, yuav tsis tshua muaj kev nyuaj npaum li cas lawm. Cov thawj coj uas lawv lub peev xwm tsis zoo kiag li ntawd yeej ua tsis tau hauj lwm zoo li no. Lawv ntshai tsam ua rau lwm tus chim, thiab thaum lawv pom ib tug tib neeg phem pheej tsim tej kev cuam tshuam thiab kev tab kaum, lawv tsis daws cov neeg ntawd. Lawv kuj saib tsis tawm tias leej twg muaj peev xwm ua tau tej yam tiag tiag, thiab lawv tsis paub tias leej twg thiaj li tsim nyog txhawb kom los ris lub luag hauj lwm rau tes hauj lwm ntawd. Cov thawj coj zoo li no yog neeg dig muag thiab lawv tsis muaj peev xwm ua tau lawv tes hauj lwm. Yog cov thawj coj thiab cov neeg ua hauj lwm tsis to taub qhov tseeb los sis tej kev txawj ntawm tes hauj lwm, lawv yuav ua tsis tau lawv tes hauj lwm kom zoo, yog li ntawd cov thawj coj thiab cov neeg ua hauj lwm yuav tsum nquag xyaum ua tes hauj lwm tiag tiag. Tsuav yog lawv tuav tau tej hauv paus ntsiab lus, paub muab tes hauj lwm twg tso ua ntej raws li qhov tseem ceeb thiab qhov ceev, thiab paub ntsuas qhov zoo thiab qhov phem, ces lawv thiaj li ua tau lawv tes hauj lwm kom zoo thiab dhau los ua cov thawj coj thiab cov neeg ua hauj lwm uas mus raws li tus qauv.

Tam sim no uas Kuv twb tau qhia txog cov ntsiab lus ntawm qhov qhia tawm, xa tawm, thiab coj tej kev npaj tes hauj lwm mus ua tiag kom yog raws li tej kev cheem tsum ntawm Vajtswv lub tsev lawm, nej uas yog cov thawj coj thiab cov neeg ua hauj lwm puas tau muaj kev to taub theem pib txog qhov seb yuav coj rau thiab coj tej kev npaj tes hauj lwm ntawd mus ua tiag li cas lawm? Thiab tam sim no nej puas tau muaj kev to taub ntxaws ntxaws txog tej luag hauj lwm thiab tej num uas nej yuav tsum ua kom tiav thaum coj tej kev npaj tes hauj lwm ntawd mus ua tiag lawm? (Muaj lawm.) Tam sim no uas nej muaj cov kev to taub ntxaws ntxaws no lawm, koj yuav tsum ntsuas seb koj tsim nyog ua dab tsi thiab koj muaj peev xwm ua tau txog theem twg, thiab tom qab ntawd koj yuav tsum muaj peev xwm txiav txim tau tias seb koj puas muaj lub peev xwm los ua ib tug thawj coj los sis ib tug neeg ua hauj lwm, thiab seb koj puas tsim nyog ua thawj coj tes hauj lwm. Hais txog qee cov thawj coj thiab cov neeg ua hauj lwm uas lawv lub peev xwm tsis zoo thiab tsis ua tes hauj lwm tiag tiag—qhov ntawd yog, cov uas peb hu ua cov thawj coj cuav—thaum lawv to taub txog cov ntsiab lus ntxaws ntxaws ntawm lub luag hauj lwm cuaj ntawm cov thawj coj thiab cov neeg ua hauj lwm lawm, lawv yuav tsum ua dab tsi? Ib txhia hais tias, “Yav tas los kuv tsis tshua to taub txog cov thawj coj thiab cov neeg ua hauj lwm tej luag hauj lwm, thiab tom qab kuv ua ib tug thawj coj lawm, kuv tsuas vam khom kuv tej kev xav phem thiab tej kev xav hauv nruab siab los ua qee tes hauj lwm rau sab nraud xwb, thiab kuv xav tias vim kuv muaj lub siab kub lug thiab txaus siab hlo tiv kev txom nyem, ces kuv tsim nyog yog ib tug thawj coj thiab ib tug neeg ua hauj lwm uas mus raws li tus qauv lawm. Kuv ruam tag tom qab hnov Vajtswv qhia zoo li no. Qhov tseeb tiag kuv yog ib tug thawj coj cuav, kuv lub peev xwm tsis zoo kiag li, thiab kuv ua tsis tau tes hauj lwm tiag tiag. Kuv twb tsis muaj peev xwm coj ib qho kev npaj tes hauj lwm ntxaws ntxaws ntawm Vajtswv lub tsev mus ua tiag li. Kuv xav dua tias qhov nyeem ib qho kev npaj tes hauj lwm ob peb zaug, muab xa mus rau txhua tus, thiab tom qab ntawd txhawb kom ua thiab saib xyuas cov neeg nyob hauv qab thaum lawv ua tes hauj lwm ntawd, ces txhais tau tias kuv tab tom coj qhov kev npaj tes hauj lwm ntawd mus ua tiag lawm. Tom qab ib ntus, kuv pom tias tes hauj lwm ntawd tsis tau raug ua kom zoo thiab ntau tes hauj lwm ntxaws ntxaws tau raug tsis quav ntsej, thiab tsuas yog thaum ntawd kuv thiaj li paub tias kuv lub peev xwm tsis zoo tiag tiag, thiab kuv tsis tsim nyog ua thawj coj.” Yog li ntawd, ib tug neeg zoo li no yuav tsum ua li cas? Yog lawv tso lawv tes hauj lwm tseg puas tau? (Tsis tau.) Yog li ntawd puas muaj hau kev los daws qhov teeb meem no? Los sis puas yog qhov teeb meem no daws tsis tau lawm? (Tsis yog daws tsis tau. Cov tib neeg ntawd yuav tsum sib zog ua kom zoo dua raws li Vajtswv tej kev cheem tsum.) Qhov no yog ib qho kev xam pom uas zoo thiab kub siab; qhov kev xam pom no zoo heev. Lawv yuav tsum sib zog ua kom zoo dua raws li Vajtswv tej kev cheem tsum, muaj kev ntseeg thiab vam khom Vajtswv, thiab tsis txhob xav tsis zoo, los sis tso lawv tes hauj lwm tseg—qhov no yog ib txoj kev daws. Qhov no puas yog ib txoj kev daws uas zoo? (Yog.) Tiam sis qhov no puas yog tib txoj kev daws xwb? (Tsis yog. Yog lawv lub peev xwm tsis zoo kiag li thiab lawv yeej ua tsis tau ib teg hauj lwm tiag tiag li, ces lawv yeej tuaj yeem lees qhov ua tsis tau ntawd thiab tawm ntawm lawv txoj hauj lwm.) Qhov no yog txoj kev daws ob. Yog lawv twb sim dua lawm, thiab lawv xav tias lawv ua tsis tau tes hauj lwm ua thawj coj—qhov ntawd yog, yog tes hauj lwm no nyuaj thiab sab heev rau lawv, thiab lawv xav tias ntxhov siab heev txog tes hauj lwm ntawd thiab pw tsis tsaug zog, thiab txhua hnub lawv hnov zoo li muaj ib lub roob loj loj tsuam lawv cia es lawv thiaj li tsa tsis taus taub hau los sis ua tsis taus pa, thiab lawv hnov tias lawv ob txhais ceg hnyav heev thaum lawv mus kev—thiab tom qab hnov tej kev cheem tsum ntxaws ntxaws no lawv haj yam xav tias lawv lub peev xwm tsis zoo kiag li thiab lawv yeej ua tsis tau tes hauj lwm ntawd li, lawv yuav tsum ua li cas? Muaj ib yam uas lawv ua tau, thiab qhov ntawd yog qhov tawm hauj lwm tam sim ntawd. Yog lawv ua tsis tau tes hauj lwm tiag, ces lawv yuav tsum tsis txhob cuam tshuam rau Vajtswv lub tsev tes hauj lwm—qhov no yog lub laj thawj uas lawv yuav tsum muaj. Lawv yuav tsum tsis txhob yuam lawv tus kheej kom dhau lawv lub peev xwm yam dig muag ntsuav, tawv ncauj sim ua tej yam uas dhau lawv lub peev xwm, los sis ua tej yam ruam. Tsuas yog cov uas zam qhov ua tej yam no xwb thiaj li muaj laj thawj. Cov tib neeg uas muaj laj thawj yeej muaj kev paub txog lawv tus kheej; lawv paub meej txog lawv lub peev xwm, thiab lawv paub txog lawv tej kev muaj tsis txaus. Tsuas yog thaum tib neeg paub meej txog lawv lub peev xwm tiag tiag xwb lawv thiaj li to taub tau raug tias lawv muaj peev xwm ua tau dab tsi, lawv ua tsis tau dab tsi, thiab lawv haum ua dab tsi tshaj plaws. Ua cas tib neeg thiaj li yuav tsum paub txog lawv lub peev xwm? Qhov no pab kom lawv paub tseeb txog tes dej num uas lawv yuav tsum ua, thiab qhov ntawd kuj pab kom lawv ua tau lawv tes dej num ntawd kom zoo thiab. Yog koj twb tshuaj xyuas koj tus kheej lawm thiab pom tias koj lub peev xwm tsuas muaj li no xwb thiab paub tias koj ua tsis tau tes hauj lwm ua thawj coj, ces koj tsis tas tshuaj xyuas koj tus kheej dua thiab ua pov thawj dua lawm. Koj yuav tsum tawm hauj lwm tam sim ntawd—tsis txhob tuav rawv koj lub meej mom thiab tsis kam nqis los; tsis txhob cuam tshuam thiab ua rau lwm tus qeeb thaum koj ua tsis tau tes hauj lwm ntxaws ntxaws ntawd. Qhov no puas yog ib txoj kev thiab? Ob txoj kev no muab tso rau ntawm koj xub ntiag, thiab koj tuaj yeem xaiv; tsis yog koj tsis muaj kev taug mus tom ntej, thiab tsis yog tsuas muaj ib txoj kev xwb. Koj tuaj yeem txiav txim kom muaj tiag thiab yog txog koj qhov xwm txheej tiag tiag raws li koj txoj kev to taub txog koj tus kheej, nrog rau raws li tej kev ntsuas txog koj los ntawm cov kwv tij thiab cov nkauj muam uas nyob ib puag ncig koj uas paub koj, thiab tom qab ntawd xaiv kom yog. Vajtswv lub tsev yuav tsis ua nyuaj rau koj. Nej xav li cas txog qhov no? (Zoo.) Ib txhia hais tias, “Kuv xav sim dua thiab sib zog ua kom zoo dua. Kuv xav tias kuv ua tau. Kuv tsuas yog tsis tshua tsom ntsoov rau qhov caum qhov tseeb nyob rau cov xyoo ntawd xwb, thiab tom qab kuv ua ib tug thawj coj lawm, kuv tseem tsis paub nrhiav qhov tseeb thiab ua hauj lwm yam feeb tsis meej. Yav tas los kuv xav tias qhov ua thawj coj pawg ntseeg ntawd mas yooj yim heev, qhov ntawd tsuas yog npaj thiab coj kom tib neeg tuaj koom kev sib txoos ua ke, ua tus coj hauv qhov kev sib qhia txog qhov tseeb, daws teeb meem kom ncav sij hawm thaum muaj teeb meem tshwm tuaj, thiab coj txhua txoj kev npaj uas los ntawm tus Nyob Saud los ntawd mus ua tiag tam sim ntawd, thiab tag li ntawd xwb. Kuv yeej xav tsis txog tias, tom qab ua ib tug thawj coj tau ib ntus lawm, kuv yuav pom tias muaj ntau yam teeb meem uas kuv daws tsis tau, tias thaum tus Nyob Saud nug txog tes hauj lwm, kuv tsis paub teb li cas, thiab thaum qee cov neeg Vajtswv xaiv tseg nug txog tej teeb meem tiag tiag, kuv tsis muaj peev xwm teb tau. Nyob rau ntau xyoo no uas cov kwv tij thiab cov nkauj muam tau ntseeg Vajtswv los, lawv txhua tus tau nyeem Vajtswv cov lus thiab mloog cov lus qhuab qhia tas li. Lawv txhua tus yeej to taub qee qhov tseeb thiab muaj qee qhov kev paub cais. Yog tsis muaj qhov tseeb qhov muaj tiag, kuv yeej ywg dej tsis tau los sis yug tsis tau rau lawv li.” Tam sim no pom meej lawm tias qhov ua hom hauj lwm tiag tiag twg hauv Vajtswv lub tsev kom zoo ntawd tsis yooj yim li ntawd. Ib kis mas, cheem tsum tib neeg muaj lub peev xwm, hos lwm kis mas, cheem tsum lawv ris ib lub nra, nrog rau to taub qhov tseeb—txhua yam no puav leej yog yam uas tsis muaj tsis tau. Yuav tsis tau yog ib tug neeg twg tsis caum qhov tseeb los sis lub peev xwm tsis zoo, thiab kuj yuav tsis tau yog ib tug neeg twg tsis tshua muaj kev ua neeg thiab tsis ris ib lub nra thiab. Tes hauj lwm tiag tiag cheem tsum kom muaj txoj kev coj rau tiag tiag, thiab qhov no tsis yog ib yam uas yooj yim li ntawd. Txawm li cas los xij, ib txhia tib neeg tseem tsis zeem. Lawv tseem xav sim dua, thiab lawv thov kom muab lwm lub cib fim rau lawv—puas tsim nyog muab lwm lub cib fim rau cov neeg zoo li no? Yog lawv lub peev xwm ua hauj lwm thiab lub peev xwm dog dig xwb, tiam sis lawv tuaj yeem ua tau qee tes hauj lwm tiag tiag, lawv tsis ua dog ua dig thiab tsom ntsoov rau qhov daws tej teeb meem kom ua tau txiaj ntsig nyob rau hauv lawv tes hauj lwm, thiab tuaj yeem mloog hais thiab zwm rau txhua txoj kev npaj uas tus Nyob Saud npaj, thiab feem ntau coj tes hauj lwm mus ua tiag raws li tej kev npaj tes hauj lwm thiab tej hauv paus ntsiab lus uas Vajtswv lub tsev cheem tsum, thiab txawm tias yav tas los lawv ua tsis tau lawv tes hauj lwm kom zoo vim lawv tseem hluas, tsis to taub qhov tseeb, thiab muaj lub hauv paus ntiav los, lawv yog cov neeg uas yog, ces yuav tsum muab lwm lub cib fim rau lawv xyaum txuas ntxiv—tsis txhob muab lawv rho tawm yam dig muag ntsuav. Qhov ua ib tug thawj coj los sis ib tug neeg ua hauj lwm tsis yooj yim npaum li ntawd, thiab qhov xaiv ib tug thawj coj los sis ib tug neeg ua hauj lwm los kuj tsis yooj yim npaum li ntawd thiab. Tam sim no, feem coob ntawm cov thawj coj thiab cov neeg ua hauj lwm muaj kev to taub qee yam txog lawv tej luag hauj lwm lawm, thiab yam tsawg kawg lawv yuav ua tau lawv tes hauj lwm zoo dua li yav tas los me ntsis—qhov no yog qhov muaj tseeb.

Tam sim no uas Kuv tau qhia tas txog qhov tseeb tej hauv paus ntsiab lus uas ntsig txog lub luag hauj lwm cuaj ntawm cov thawj coj thiab cov neeg ua hauj lwm—qhia tawm, xa tawm, thiab coj tej kev npaj tes hauj lwm ntawm Vajtswv lub tsev mus ua tiag kom yog raws li tej kev cheem tsum ntawm Vajtswv lub tsev, coj qhia, saib xyuas, thiab txhawb kom ua, thiab tshuaj xyuas thiab taug qab txog qhov xwm txheej ntawm qhov coj tej ntawd mus ua tiag ntawd—nej lub siab puav leej kaj lug, thiab nej muaj ib txoj kev xyaum ua raws lawm. Tam sim no nej tsis yog tsuas muaj peev xwm ua nej tes dej num kom tiav thiab muaj kev nkag mus rau hauv lub neej txoj sia xwb, tiam sis nej kuj tsim nyog muaj kev paub los sis kev paub cais txog cov thawj coj thiab cov neeg ua hauj lwm thiab, thiab yam tsawg kawg nkaus tau txais kev pom meej thiab kev to taub txog tej luag hauj lwm uas cov thawj coj thiab cov neeg ua hauj lwm yuav tsum ua kom tiav thiab tes hauj lwm uas lawv yuav tsum ua. Muab hais kom luv luv mas, qhov paub seb cov thawj coj thiab cov neeg ua hauj lwm puas ua tes hauj lwm tiag tiag los sis tsis ua ntawd yog qhov pab tau thiab muaj txiaj ntsim rau txhua tus ntawm cov neeg Vajtswv xaiv tseg, thiab ua li no lawv txoj kev to taub txog cov thawj coj thiab cov neeg ua hauj lwm tej luag hauj lwm yuav tsis yog qhov khoob lug lawm, tiam sis yuav dhau los ua qhov muaj tiag dua.

Lub Plaub Hlis Hnub Tim 10, Xyoo 2021