Qhov Nrhiav Qhov Tseeb Yog Dab Tsi (3)

Niaj hnub no, cov uas ua dej num khwv zuj zus li lawm. Lawv mloog zoo li lub sij hawm dhau mus ceev heev, mloog zoo li tsis muaj sij hawm txaus li. Vim li cas zoo li ntawd? Qhov tseeb yog qhov hais tias vim tam sim no lawv to taub qhov tseeb thiab muaj kev paub tob txog ntau yam lawm. Lawv thiaj li tau lub nra hnyav zuj zus ntxiv, thiab lawv haj yam siv zog ua lawv tej dej num dua tuaj, ua hauj lwm kom ntxaws dua tuaj. Yog li ntawd, lawv thiaj li mloog zoo li tej dej num uas lawv yuav tsum tau ua ntawd muaj ntau zuj zus ntxiv. Vim li ntawd lawv thiaj li khwv heev rau lawv tej dej num. Thiab tsis tas li ntawd xwb, txhua hnub mas, cov uas ua dej num ntawd feem coob kuj yuav tsum tau nyeem Vajtswv cov lus thiab qhia txog qhov tseeb thiab. Lawv yuav tsum xav txog lawv tus kheej, thiab thaum muaj teeb meem los raug rau lawv, lawv yuav tsum nrhiav qhov tseeb los daws qhov teeb meem ntawd. Lawv kuj yuav tsum tau kawm qee yam kev txawj qib siab thiab. Lawv pheej mloog zoo li tsis muaj sij hawm txaus li, mloog zoo li ib hnub mas sai heev. Thaum tsaus ntuj, lawv xav txog yam uas lawv tau ua nyob rau hnub ntawd, lawv pom hais tias yam uas lawv tau ua ntawd tsis muaj nuj nqis ntau li, pom tias tsis muaj dab tsi zoo los ntawm qhov ntawd li. Ua rau lawv me siab thiab mloog zoo li tsis zoo txaus, thiab ua rau lawv xav kom loj hlob sai sai. Lawv ib txhia hais tias, “Thaum twg es txoj kev khwv rau tes hauj lwm no mam li tag? Thaum twg es kuv thiaj li tsis nyuaj siab thiab nyeem tau Vajtswv cov lus kom zoo, thiab npaj kuv tus kheej kom muaj qhov tseeb kom zoo? Yam uas kuv tau txais los ntawm ib los sis ob qho kev sib txoos ua ke uas nyob rau hauv ib lub lim tiam ntawd mas tsawg heev. Peb yuav tsum sib txoos ua ke kom ntau thiab mloog lus qhuab qhia kom ntau ntxiv—ua li ntawd xwb thiaj li yog tib txoj kev los to taub qhov tseeb.” Yog li ntawd lawv thiaj li tos thiab xav tau, ces tib ntsais muag xwb, peb, plaub, tsib xyoos twb dhau mus lawm, thiab lawv mloog zoo li lub sij hawm dhau mus sai heev. Tab txawm twb ntseeg tau kaum xyoo lawm los ib txhia tib neeg yeej tseem hais tsis tau cov lus tim khawv uas hais txog txoj kev ntsib kev pom kom ntau li. Lawv tsis so li, ntshai tsam lawv raug muab tso tseg, yog li ntawd lawv thiaj li maj nroos los npaj lawv tus kheej kom muaj qhov tseeb ntxiv. Vim li ntawd lawv thiaj li mloog zoo li lub sij hawm dhau mus sai heev. Muaj ntau tus uas xav li no. Txhua tus uas ris lub nra uas ua ib tes dej num thiab tus uas caum qhov tseeb ntawd mas mloog zoo li lub sij hawm dhau mus sai heev. Cov uas tsis nyiam qhov tseeb, cov uas ntshaw kev tau zoo thiab kev xyiv fab, mas tsis paub tias lub sij hawm dhau mus sai li; lawv ib txhia haj tseem yws hais tias, “Thaum twg es Vajtswv hnub mam li los txog? Lawv tas zog hais tias Nws tes hauj lwm twb yuav txog qhov kawg lawm—vim li cas thiaj li tseem tsis tau kawg thiab? Thaum twg Vajtswv tes hauj lwm mam li nthuav dav mus thoob plaws lub qab ntuj khwb?” Cov tib neeg uas hais tej yam zoo li no mas xav hais tias lub sij hawm mus qeeb heev. Nyob rau hauv lub siab, lawv yeej tsis nyiam qhov tseeb; lawv pheej xav rov qab mus rau hauv lub ntiaj teb thiab mus ua lawv lub neej uas tsis tseem ceeb tas li xwb. Lawv tus yam ntxwv no yeej txawv cov tib neeg uas caum qhov tseeb tus yam ntxwv. Txawm cov tib neeg uas caum qhov tseeb yuav khwv npaum li cas rau lawv tej dej num los xij, lawv yeej tseem nrhiav tau qhov tseeb los daws tej teeb meem uas los raug rau lawv, thiab nrhiav tau kev kawm txog tej uas lawv paub tsis meej nyob rau hauv tej lus qhuab qhia uas lawv tau hnov, thiab ua siab txias txias xav txog qhov lawv ua hauj lwm li cas txhua hnub ntawd, ces tom qab ntawd mam li xav txog Vajtswv cov lus thiab saib tej yeeb yaj duab uas tham txog cov lus tim khawv uas hais txog txoj kev ntsib kev pom. Lawv tau txais tej yam los ntawm qhov no. Txawm lawv yuav khwv npaum li cas rau lawv tej dej num los xij, qhov kev khwv ntawd tsis cuam tshuam rau lawv txoj kev to taub lub neej txoj sia kiag li, thiab tsis ua rau to taub lub neej txoj sia qeeb. Cov tib neeg uas nyiam qhov tseeb yeej ua li no. Cov tib neeg uas tsis nyiam qhov tseeb yeej tsis nrhiav qhov tseeb thiab tsis kam nyob twj ywm rau ntawm Vajtswv lub xub ntiag los thim xav txog lawv tus kheej kom paub lawv tus kheej, tsis hais lawv yuav khwv rau lawv tes dej num thiab yuav muaj teeb meem dab tsi los raug rau lawv li. Yog li ntawd, txawm lawv yuav khwv los sis nyob dawb xwb los xij, lawv yeej tsis caum qhov tseeb. Qhov tseeb yog qhov hais tias yog ib tug tib neeg twg muaj ib lub siab los caum qhov tseeb, thiab xav tau qhov tseeb, thiab ris lub nra uas mus tau txoj sia thiab muaj kev hloov pauv tus moj yam lawm, ces lawv yuav txav ze zuj zus rau ntawm Vajtswv hauv lub siab thiab los thov Nws, txawm lawv yuav khwv txog lawv tes dej num npaum li cas los xij. Lawv paub tseeb tias yuav tau txais qee qhov kev qhuab qhia thiab lub tswv yim ntawm Vajntsujplig Dawb Huv xwb, thiab lawv lub neej yuav loj hlob yam tsis muaj hnub kawg li. Yog ib tug tib neeg twg tsis nyiam qhov tseeb thiab tsis ris ib lub nra uas mus tau txoj sia los sis tsis muaj kev hloov pauv tus moj yam, los sis yog lawv tsis nyiam tej no li, ces lawv yeej yuav tsis tau txais ib yam dab tsi li. Qhov kev thim xav txog yam uas nthuav tawm tuaj uas yus muaj txog txoj kev qias vuab tsuab ntawd yog ib yam uas yuav tsum tau xav nyob rau txhua qhov chaw, thiab txhua lub sij hawm. Piv txwv li, yog tib neeg tau nthuav txoj kev qias vuab tsuab tawm tuaj thaum tab tom ua lawv tes dej num, mas hauv lawv lub siab, lawv yuav tsum thov Vajtswv, thiab thim xav txog lawv tus kheej, thiab paub lawv tus moj yam qias vuab tsuab, thiab nrhiav qhov tseeb los kho tus moj yam qias vuab tsuab ntawd. Qhov no yog ib qho ntawm lub siab; nws tsis cuam tshuam rau tes hauj lwm ntawm tes. Qhov no ua puas yooj yim? Qhov ntawd yog nyob ntawm seb koj puas yog ib tug neeg uas caum qhov tseeb xwb. Cov tib neeg uas tsis nyiam qhov tseeb yeej tsis nyiam tej kev loj hlob hauv lub neej. Lawv tsis xav txog tej yam zoo li no. Tsuas yog cov tib neeg uas caum qhov tseeb xwb thiaj li txaus siab hlo siv lawv tus kheej kom loj hlob rau hauv lub neej; tsuas yog lawv xwb thiaj li pheej xav txog tej teeb meem uas muaj nyob tiag tiag, thiab yuav nrhiav qhov tseeb los daws tej teeb meem ntawd li cas. Qhov tseeb tiag, tus txheej txheem ntawm txoj kev daws teeb meem thiab txoj kev caum qhov tseeb ntawd yog tib tug xwb. Yog tib neeg mob siab rau txoj kev nrhiav qhov tseeb los daws teeb meem thaum ua lawv tes dej num tas li, thiab daws tau ob peb qho teeb meem thaum xyaum ua li no tau ntau xyoo lawm, ces lawv txoj kev ua lawv tes dej num yeej yuav mus txog rau tus qauv xwb xwb li. Cov tib neeg zoo li no tsis tshua muaj txoj kev qias vuab tsuab nthuav tawm tuaj, thiab lawv tau txais txoj kev ntsib kev pom tiag tiag ntau heev nyob rau hauv txoj kev ua lawv tej dej num. Yog li ntawd lawv thiaj li muaj peev xwm ua tim khawv rau Vajtswv. Cov tib neeg zoo li no muaj kev paub tau li cas nyob rau thaum pib thaum lawv xub xub ua lawv tes dej num, mus txog rau thaum lawv muaj peev xwm ua tim khawv rau Vajtswv? Lawv muaj kev paub los ntawm qhov kev vam khom rau txoj kev nrhiav qhov tseeb los daws teeb meem. Vim li ntawd txawm cov tib neeg uas caum qhov tseeb yuav khwv npaum li cas rau lawv tej dej num los xij, lawv yuav nrhiav qhov tseeb los daws teeb meem thiab ua lawv tej dej num kom tiav raws li tej hauv paus ntsiab lus, thiab lawv muaj peev xwm xyaum ua raws li qhov tseeb thiab zwm rau Vajtswv. Qhov no yog tus txheej txheem ntawm txoj kev mus tau txoj sia, thiab nws kuj yog tus txheej txheem ntawm txoj kev nkag mus rau hauv qhov tseeb qhov muaj tiag thiab. Ib txhia tib neeg mas pheej hais tias lawv khwv heev rau lawv tej dej num es lawv tsis muaj sij hawm los caum qhov tseeb li. Qhov no tsis muaj tseeb. Tus tib neeg uas caum qhov tseeb mas, txawm lawv yuav ua tes hauj lwm dab tsi los xij, kiag thaum lawv pom ib qho teeb meem lawm, lawv nrhiav qhov tseeb los daws qhov teeb meem ntawd, thiab to taub thiab tau txais qhov tseeb ntawd. Qhov ntawd yog qhov muaj tseeb. Muaj ntau tus uas xav hais tias qhov tseeb ntawd tsuas tuaj yeem to taub los ntawm qhov kev sib txoos ua ke txhua hnub xwb. Qhov no tsis yog lawm. Qhov tseeb tsis yog ib yam uas yuav cia li to taub los ntawm qhov kev sib txoos ua ke thiab kev mloog lus qhuab qhia nkaus xwb; tib neeg kuj yuav tsum tau xyaum ua thiab paub Vajtswv cov lus, thiab lawv kuj yuav tsum tau tim tsum qhov txheej txheem uas los tshawb nrhiav thiab los daws teeb meem thiab. Qhov tseem ceeb yog qhov hais tias lawv yuav tsum xyaum los nrhiav qhov tseeb. Cov uas tsis nyiam qhov tseeb yeej tsis nrhiav qhov tseeb, txawm yuav muaj teeb meem dab tsi los raug rau lawv los xij; cov uas nyiam qhov tseeb yeej nrhiav qhov tseeb, txawm lawv yuav khwv npaum li cas rau lawv tej dej num los xij. Yog li ntawd, peb yeej hais tau hais tias cov tib neeg uas pheej yws hais tias lawv khwv heev rau lawv tej dej num tias lawv tsis muaj sij hawm sib txoos ua ke, es lawv thiaj li tsis caum qhov tseeb ntawd, yog cov uas tsis nyiam qhov tseeb. Lawv yog cov tib neeg uas nkag siab nyuaj uas tsis to taub sab ntsujplig. Thaum lawv nyeem Vajtswv cov lus los sis mloog lus qhuab qhia ntawd, vim li cas lawv thiaj li tsis xyaum ua los sis siv tej ntawd rau hauv lawv txoj kev ua lawv tej dej num? Vim li cas lawv thiaj li tsis siv Vajtswv cov lus rau lawv lub neej tiag tiag? Qhov no xwb qhia tau txaus lawm hais tias lawv tsis nyiam qhov tseeb, vim li ntawd txawm lawv yuav ntsib kev nyuaj dab tsi nyob rau hauv txoj kev ua lawv tej dej num los xij, lawv thiaj li tsis nrhiav qhov tseeb los sis xyaum ua raws li qhov tseeb. Paub meej meej lawm hais tias, cov tib neeg no yog cov neeg ua Vajtswv tes dej num xwb. Tej zaum ib txhia tib neeg yuav xav los caum qhov tseeb, tiam sis lawv tsis muaj peev xwm. Lawv twb npaj tsis tau lawv tus kheej lub neej kom zoo; thaum lawv muaj ob peb yam uas yuav tau ua, lawv tsis paub xyov yuav ua qhov twg ua ntej thiab ua ua qhov twg tom qab. Yog muaj ob peb qho teeb meem los raug rau lawv, lawv tsis pauv xyov yuav daws tej teeb meem ntawd li cas. Lawv xam ub xam no xwb. Cov tib neeg zoo li no puas mus txog qhov tseeb? Lawv puas yuav nrhiav tau qhov tseeb los daws teeb meem? Tsis tau, vim lawv tsis muaj peev xwm. Ntau tus tib neeg txaus siab hlo los caum qhov tseeb, tiam sis thaum ntseeg Vajtswv tau kaum los sis nees nkaum xyoo lawm, lawv yeej tsis muaj peev xwm hais tau ib zaj lus tim khawv uas hais txog kev ntsib kev pom, thiab lawv yeej tsis tau tau txais qhov tseeb kiag li. Qhov no yog vim hais tias lawv tsis muaj peev xwm. Qhov tib neeg puas caum qhov tseeb ntawd tsis yog nyob ntawm seb lawv khwv npaum li cas rau lawv tes dej num los sis seb lawv muaj sij hawm ntau npaum li cas; nws yog nyob ntawm seb lawv puas nyiam qhov tseeb nyob rau hauv nruab siab xwb. Qhov tseeb yog qhov hais tias txhua tus puav leej muaj sij hawm ntau ib yam nkaus; qhov txawv yog qhov seb nyias siv nyias lub sij hawm rau dab tsi xwb. Cov uas hais tias lawv tsis muaj sij hawm los caum qhov tseeb ntawd siv lawv lub sij hawm rau tej kev xyiv fab ntawm sab cev nqaij daim tawv lawm, los sis tias lawv khwv rau qee yam sab nraud lawm. Lawv tsis siv lub sij hawm ntawd mus nrhiav qhov tseeb los daws teeb meem. Cov tib neeg uas tsis quav ntsej lawv txoj kev caum yeej zoo li no. Qhov no ua rau lawv mus tau txoj sia qeeb.

Nyob rau hauv peb ob qho kev sib txoos ua ke tag los ntawd, peb tau kawm txog lub ncauj lus uas hais tias “Qhov Nrhiav Qhov Tseeb Yog Dab Tsi,” thiab qee qhov tshwj xeeb uas lub ncauj lus ntawd muaj. Cia peb pib los ntawm qhov rov qab hais txog yam uas peb tau kawm txog nyob rau hauv peb qhov kev sib txoos ua ke tag los ntawd. Peb nrhiav tau ib lo lus txhais uas yog txog “Qhov Nrhiav Qhov Tseeb Yog Dab Tsi,” ces tom qab ntawd tau mus kawm txog qee yam teeb meem uas tshwj xeeb thiab qee txoj kev tshwj xeeb uas tib neeg coj uas cuam tshuam rau qhov nrhiav qhov tseeb yog dab tsi ntawd. Qhov kawg ntawm peb txoj kev kawm nyob rau hauv peb qhov kev sib txoos ua ke tag los ntawd yog dab tsi? (Vajtswv nug ib lo lus nug hais tias: Muab hais tias yam uas tib neeg pom hais tias zoo thiab yog ntawd tsis yog qhov tseeb, vim li cas lawv thiaj li tseem caum tej ntawd cuag nkaus li tej ntawd yog qhov tseeb?) Muab hais tias tej uas tib neeg pom hais tias zoo thiab yog ntawd tsis yog qhov tseeb, vim li cas lawv thiaj li tseem txhawb tej ntawd cuag nkaus li tej ntawd yog qhov tseeb, thiab xav hais tias lawv tus kheej tab tom caum qhov tseeb ntawd? Zaum tag los no peb kawm txog peb yam uas hais txog lo lus nug no. Yam ib yog: Tej uas tib neeg caum no tsis yog qhov tseeb, yog li ntawd vim li cas lawv thiaj li tseem xyaum ua raws li tej ntawd cuag nkaus li tej ntawd yog qhov tseeb? Vim hais tias nyob li ntawm tib neeg mas, yam uas lawv pom hais tias yog thiab zoo ntawd mas zoo li tej ntawd yog qhov tseeb, yog li ntawd tib neeg thiaj li caum tej uas lawv xav hais tias zoo thiab yog ntawd cuag nkaus li tej ntawd yog qhov tseeb. Hais li ntawd tsis meej lod? (Meej.) Yog li ntawd, lo lus teb uas yog rau lo lus nug no yog lo twg? Tib neeg txhawb tej uas lawv xav hais tias yog thiab zoo cuag nkaus li tej ntawd yog qhov tseeb, yog li ntawd thaum lawv ua li ntawd lawm, lawv thiaj li xav hais tias yog lawv tab tom caum qhov tseeb ntag. Qhov ntawd tsis yog lo lus teb tag nrho lod? (Yog.) Yam ob yog: Vim li cas tej uas lawv txhawb ntawd lawv thiaj li xav hais tias zoo thiab yog cuag nkaus li tej ntawd yog qhov tseeb, puas yog tib neeg xav hais tias lawv tab tom caum qhov tseeb? Tej zaum qhov no yuav teb tau: Vim tib neeg muaj ib txoj kev ntshaw koob hmoov. Tib neeg caum tej uas lawv suav hais tias yog thiab zoo no los ntawm txoj kev ntshaw thiab lub hom phiaj, thiab xav hais tias lawv tab tom xyaum ua raws li qhov tseeb thiab caum qhov tseeb. Lub ntsiab tseeb tiag, qhov no yog los nrog Vajtswv sib kom nqi xwb. Yam peb yog: Yog ib tug tib neeg twg muaj lub siab uas txawj xav thiab qhov tsim nyog li ib txwm muaj, ces thaum uas lawv tsis to taub qhov tseeb, lawv yuav cia li xaiv los ua raws li lawv lub siab uas txawj xav thiab qhov tsim nyog, ua raws li tej kev cai tswj kav, tej kev cai lij choj, tej kev cai, thiab lwm yam xwb. Tej zaum peb yuav hais tias tib neeg txhawb tej uas lawv xav hauv lawv lub siab uas txawj xav hais tias yog qhov zoo, tsim nyog, thiab mus raws li txoj kev ua neej ntawd, cuag nkaus li tej ntawd yog qhov tseeb. Tib neeg lub siab uas txawj xav thiab qhov tsim nyog yeej ua tau qhov no. Muaj ntau tus uas tuaj yeem muab lawv lub zog ua hauj lwm rau hauv Vajtswv lub tsev li ib txwm ua; lawv txaus siab hlo ua dej num thiab ua raws li tej kev npaj ntawm Vajtswv lub tsev vim lawv muaj lub siab uas txawj xav thiab qhov tsim nyog li ib txwm muaj. Vim txhawm rau kom tau txais koob hmoov, lawv haj tseem yuav raug kev txom nyem thiab tiv txhua yam kev txom nyem thiab. Yog li ntawd, tib neeg kuj muab yam uas lawv muaj peev xwm ua nyob rau hauv lawv lub siab uas txawj xav thiab qhov tsim nyog ntawd coj los ua qhov kev xyaum ua thiab txoj kev caum qhov tseeb thiab. Cov no yog peb qho tseem ceeb uas los teb rau lo lus nug ntawd. Zaum tas los no, peb kawm txog peb qho no yam dav dav xwb; hnub no, peb yuav ua tib zoo kawm kom ntxaws ntxaws txog tej teeb meem uas peb qho no tau tseg cia, thiab tshuaj xyuas tej teeb meem uas muaj nyob rau hauv txhua qhov ntawd, nrog rau txhua qhov uas sib txawv, los sis cov nyom rau txoj kev caum qhov tseeb, kom koj thiaj li paub meej ntxiv tias qhov los caum qhov tseeb ntawd yog dab tsi thiab yuav xyaum ua txoj kev caum ntawd li cas kiag. Qhov ua li ntawd yuav ua rau tib neeg muaj zog los xyaum ua thiab caum qhov tseeb nyob rau hauv lawv lub neej txhua hnub tau zoo dua.

Peb yuav pib los ntawm qhov kawm txog thawj thawj qhov. Muab hais yooj yooj yim hais tias, qhov peb kawm txog thawj thawj qhov ntawd yuav hais txog tej uas tib neeg suav nyob rau hauv lawv tej kev xav phem tias yog thiab zoo. Vim li cas peb thiaj li yuav tsum tau kawm txog lub ntsiab lus ntawd? Lub ntsiab lus ntawd muaj teeb meem dab tsi? Xav txog qhov ntawd kom ntxaws ntxaws ua ntej tso. Nej puas yuav muaj peev xwm paub tseeb txog qhov ntawd yog peb tsis kawm txog qhov ntawd kom zoo zoo nyob rau hauv tej kev sib txoos ua ke? Yog peb tsis muaj ib qho kev kawm tshwj xeeb txog qhov ntawd, thiab nej tsuas lam mus raws li nej qhov kev xav txog qhov ntawd xwb, los sis yog nej siv sij hawm kom tau ntsib tau pom qhov ntawd thiab kom paub qhov ntawd no. Nej puas yuav paub hais tias lub ntsiab lus no yog hais txog dab tsi? Nej puas yuav muaj peev xwm xav tau tej ntawd? (Tsis muaj.) Peb yuav pib los ntawm qhov kev xav txog cov lus ncaj ncaj ntawm sob lus uas hais tias “tej uas tib neeg suav nyob rau hauv lawv tej kev xav phem tias yog thiab zoo” thiab saib seb nej paub txog qhov ntawd deb npaum li cas. Qhov ib, ntu tseem ceem ntawm sob lus uas peb yuav kawm txog no hais txog dab tsi? Nej qhia tsis tau lod? Nws puas yog ib sob lus dav dav? Nws puas muaj ib lo lus zais li? (Nws hais txog tej kev xav phem thiab tej kev xav hauv nruab siab uas nyob rau hauv tib neeg.) Qhov ntawd yog ib txoj kev uas muab qhov ntawd hais dav dav xwb; piv txwv li tias. (Tib neeg ntseeg hauv lawv tej kev xav phem tias tsuav lawv tso tau lawv tus kheej tseg, siv lawv tus kheej, raug txom nyem, thiab tiv kev txom nyem xwb, ces lawv yuav ua tau raws li qhov Vajtswv pom zoo. Kuj muaj qee yam kab lis kev cai thiab—tej yam xws li kev hlub niam hlub txiv thiab cov poj niam hlub lawv cov txiv thiab tu lawv cov me nyuam. Tib neeg kuj saib tej no ua yam zoo thiab.) Nej muaj tej ntawd ob peb yam. Nej ntes puas tau lub ntsiab? Muaj ntu dab tsi uas cuam tshuam rau peb lub ncauj lus? (Kev tso txhua yam tseg, kev siv txhua yam, kev raug txom nyem, thiab kev tiv kev txom nyem.) (kev hlub niam hlub txiv thiab cov poj niam hlub lawv cov txiv thiab tu lawv cov me nyuam.) Yog lawm. Puas muaj ntxiv lawm? (Kev qhia txog kev mob siab ntseeg, kev ua siab ntev, thiab kev ua siab dav, zoo li cov Falixais.) Kev tsis khav theeb, kev ua siab ntev, kev ua siab dav—nws cuam tshuam rau ob peb qho kev coj tus cwj pwm thiab kev hais lus. Yog peb twb yuav mus kawm txog lub ntsiab lus uas zoo li no no, peb yuav tsum kawm kom ncaj ncaj, siv qee lo lus hais kom ncaj ncaj ntshe yuav zoo dua. Tib neeg yuav muaj ib txoj kev to taub uas yog thiab zoo dua yog peb ua li ntawd rau lo lus nug. Tam sim no, nej tsis paub xyov yuav pib ua ntej li cas, yog li ntawd Kuv mam li pib qhia ua ntej, puas tau? (Tau kawg.) Txoj kab lis kev cai tsib txhiab xyoo ntawm lub Teb Chaws Suav mas “loj dav thiab tob heev,” muaj txhua yam kev hais lus thiab paj lug uas nrov koob nrov npe puv npo xwb. Nws kuj muaj “cov neeg ntse thaum ub” thiab, xws li Khoov Txwm, Meev Txwm, thiab lwm tus uas zoo li no. Lawv tau tsim cov neeg Suav tej kev qhia uas hais txog Txoj Kev Ntseeg Khoov Txwm, uas yog qhov tseem ceeb ntawm cov neeg Suav txoj kab lis kev cai. Muaj ntau hom lus, ntau lo lus, thiab ntau qhov kev hais lus nyob rau hauv cov neeg Suav txoj kab lis kev cai uas ntau tiam neeg tau khaws tseg. Tej ntawd ib txhia hais txog puag thaum ub, hos ib txhia tsis hais; tej ntawd ib txhia yog los ntawm cov tib neeg dog dig los, hos ib txhia yog los ntawm cov tib neeg muaj koob nrov npe los. Tej zaum nej tsis tshua nyiam kab lis kev cai pes tsawg, los sis nej muab nej tus kheej tshem tawm ntawm lub hauv paus, kab lis kev cai mus lawm, los sis nej tseem hluas tseem tsis tau kawm los sis tshawb fawb kom tob txog lub Teb Chaws Suav txoj kab lis kev cai uas “loj dav thiab tob heev,” vim li ntawd nej thiaj li tseem tsis tau paub txog txoj kab lis kev cai ntawd los sis to taub tej yam zoo li no. Qhov ntawd yeej yog ib qho zoo. Txawm tib neeg yuav tsis to taub los xij, lawv txoj kev xav thiab tej kev xav phem ntawd raug txhua yam ntawm txoj kab lis kev cai qhia thiab cuam tshuam yam zais ntshis lawm. Thaum kawg lawv ua neej raws li tej ntawd yam lawv tsis paub li. Qhov ntawd yog yam uas poj ua tseg yawm ua cia, txhais hais tias txoj kab lis kev cai ntawd yog tib neeg cov poj koob yawm txwv ib tiam ua dhau ib tiam los, qhia txhua yam txog qhov tib neeg yuav tsum hais lus li cas, ua li cas, thiab coj lawv tus kheej kom zoo li cas. Yog li ntawd txawm tib neeg yuav muaj kev to taub thiab tej kev xam pom sib txawv txog txoj kab lis kev cai ntawd tej nqe lus los xij, lawv yeej ua thiab paub tseeb txog tej yam uas zoo li no nyob rau ntawm txoj kab lis kev cai ntawd. Los ntawm qhov kev soj ntsuam no, peb pom tau hais tias lub hauv paus uas hloov tib neeg ntiaj teb lub neej thiab txoj kev ua neej nyob, hloov nws txoj kev xam pom txog tib neeg thiab txhua yam, thiab hloov nws txoj kev coj kom zoo thiab txoj kev ua ntawd puav leej yog txhua yam ntawm txoj kab lis kev cai xwb. Tab txawm txhua hom tib neeg ntiaj teb nyias muaj nyias lus hais txog tus qauv uas ncaj ncees thiab txoj kev ntsuas uas ncaj ncees los xij, lub tswv yim dav dav ces zoo ib yam nkaus xwb. Hnub no, peb yuav kawm thiab tshuaj xyuas txog ob peb qho ntawm cov tswv yim ntawd kom ntxaws ntxaws. Txawm peb yuav tsis muaj peev xwm hais thiab tshuaj xyuas txhua yam uas tib neeg suav hais tias yog thiab zoo los xij, tej ntawd lub ntsiab dav dav ces tsuas yog ob qho uas hais txog cov lus txhais ntawm txoj kev caum qhov tseeb xwb xws li: qhov yus xam pom tib neeg thiab txhua yam, thiab qhov yus coj yus tus kheej kom zoo thiab ua li cas xwb. Ib qho yog qhov kev xam pom, hos lwm qhov yog tus cwj pwm. Qhov no txhais hais tias tib neeg saib tej tib neeg thiab tej xwm txheej ntawm lub ntiaj teb los ntawm txhua yam uas lawv suav nyob rau hauv lawv tej kev xav phem tias yog thiab zoo ntawd, thiab lawv muab tej ntawd los ua qhov kev txhawb, ua lub hauv paus, thiab ua tus qauv uas lawv coj lawv tus kheej kom zoo thiab ua. Yog li ntawd, tej uas zoo thiab yog no yog dab tsi kiag? Muab hais kom dav dav ces hais tias, tej uas tib neeg suav nyob rau hauv lawv tej kev xav phem tias yog thiab zoo ntawd tsuas yog tej kev tim tsum kom tib neeg coj kom zoo thiab kom lawv muaj txoj kev ncaj ncees thiab tus cwj pwm zoo xwb. Nws yog ob yam ntawd xwb. Xav seb: Tsis yog ob yam ntawd xwb lod? (Yog.) Ib qho yog tus cwj pwm zoo; hos lwm qhov yog tib neeg tus cwj pwm thiab txoj kev ncaj ncees xwb. Tseeb tiag tib neeg ntiaj teb muaj ob qho ua tus qauv uas los ntsuas txoj kev ua neej uas tib neeg ua neej thiab qhov lawv coj lawv tus kheej kom zoo xws li: Qhov ib yog qhov kev tim tsum kom tib neeg coj kom zoo nyob rau sab nraud, hos lwm qhov yog kom lawv coj lawv tus kheej kom ncaj ncees. Lawv siv ob qho no los ntsuas tib neeg txoj kev zoo. Vim lawv siv ob qho no los ntsuas tib neeg txoj kev zoo, tej qauv uas los txiav txim rau tib neeg tus cwj pwm thiab txoj kev ncaj ncees ntawd thiaj li xaus li ntawd lawm, thiab thaum lawv ua li ntawd, tib neeg cia li pib hnov txhua yam lus uas hais txog tib neeg txoj kev coj kom ncaj ncees los sis lawv tus cwj pwm lawm. Hais li cas kiag? Nej puas paub? Qee yam yooj yooj yim xwb, piv txwv li: Tej qauv thiab tej lus hais uas los ntsuas tib neeg tus cwj pwm ntawd muaj dab tsi? Ua tus neeg muaj kev kawm siab thiab paub qab paub hau, ua tus neeg paub tab thiab paub cai—tej no cuam tshuam rau tus cwj pwm uas coj nyob rau sab nraud. Puas yog qhov ua tus neeg paub kev paub cai? (Yog.) Dua li cov ces zoo ib yam tsis ntau los tsawg lawm, thiab yog muab sib piv mas, nej yuav paub hais tias cov lus thiab nqe lus twg yog tus qauv ntsuas tib neeg tus cwj pwm, thiab nqe lus twg yog tus qauv ntsuas lawv txoj kev ncaj ncees. Tam sim no, “Tus poj niam yuav tsum tsim txiaj, siab zoo, paub tab, thiab ncaj ncees”—qhov ntawd yog ib tug qauv rau txoj kev coj tus cwj pwm nyob rau sab nraud los yog rau txoj kev ncaj ncees? (Qhov ntawd yog ua txog txoj kev ncaj ncees thiab txoj kev coj ncaj ncees.) Yog li txoj kev ua siab dav ne? (Qhov ntawd kuj yog ua txog txoj kev ncaj ncees thiab.) Qhov ko yog lawm. Tej no cuam tshuam rau txoj kev ncaj ncees, cuam tshuam rau tib neeg tus cwj pwm ncaj ncees. Cov nqe lus tseem ceeb uas cuam tshuam rau tib neeg tus cwj pwm yog cov xws li ua tus neeg paub kev paub cai, ua tus neeg paub tab thiab paub cai, thiab muaj kev kawm siab thiab paub qab paub hau. Tej no yog txhua yam uas tib neeg suav nyob rau hauv lawv tej kev xav phem tias yog thiab zoo; tej no yog tej uas lawv ntseeg tias yog qhov zoo, raws li qhov txoj kab lis kev cai hais, los sis yam tsawg kawg mus raws li lub siab uas txawj xav thiab qhov tsim nyog, tsis yog yam tsis zoo. Tej uas peb tab tom tham txog nyob rau ntawm no yog tej uas tib neeg feem coob lees paub tias yog thiab zoo. Yog li ntawd, dhau ntawm peb qho uas kuv nyuam qhuav hais no lawm, lwm nqe lus uas hais txog tib neeg tus cwj pwm zoo ntawd muaj dab tsi? (Hwm cov laus thiab saib xyuas cov hluas.) Hwm cov laus thiab saib xyuas cov hluas, ua tus neeg siab dawb siab zoo, ua tus neeg nyiam ua phooj ywg—tej no yog txhua yam uas tib neeg paub me ntsis thiab to taub. Ua tus neeg muaj kev kawm siab thiab paub qab paub hau, ua tus neeg paub tab thiab paub cai, ua tus neeg paub kev paub cai, hwm cov laus thiab saib xyuas cov hluas, ua tus neeg siab dawb siab zoo, ua tus neeg nyiam ua phooj ywg—nyob rau hauv tib neeg lub siab mas, txhua tus uas muaj cov cwj pwm no ces lawv ntseeg tias yog ib tug neeg zoo, ib tug neeg siab zoo, ib tug neeg uas muaj kev ua neej lawm. Txhua tus puav leej ntsuas lwm tus raws li lwm tus tus cwj pwm; lawv txiav txim rau lwm tus txoj kev zoo raws li tus cwj pwm uas lwm tus coj nyob rau sab nraud. Tib neeg txiav txim, txiav txim siab, thiab ntsuas seb tib neeg puas raug cob qhia thiab muaj kev ua neej, seb puas tsim nyog nrog tus tib neeg ntawd tham thiab tso siab rau, raws li tej kev xav thiab tej tswv yim ntawm txoj kab lis kev cai thiab tej cwj pwm ntawm tus tib neeg uas lawv pom ntawd xwb. Tib neeg puas muaj peev xwm nkag siab txog lub ntiaj teb? Tsis muaj ib qho me me li. Tib neeg tsuas tuaj yeem txiav txim thiab cais seb ib tug tib neeg twg zoo los sis tsis zoo, los sis seb tus tib neeg ntawd yog hom tib neeg twg raws li tus tib neeg ntawd tus cwj pwm xwb; tsuas yog sib tham, tham, thiab nrog tus tib neeg ntawd koom tes xwb tib neeg twb tuaj yeem soj ntsuam thiab txiav txim siab tau rau tej ntawd lawm. Txawm koj yuav siv cov nqe lus xws li “Ua tus neeg muaj kev kawm siab thiab paub qab paub hau,” “Ua tus neeg siab dawb siab zoo,” thiab “Hwm cov laus thiab saib xyuas cov hluas” nyob rau hauv koj tej kev ntsuas los xij, tej qauv ntawm koj tej kev ntsuas ntawd yeej tsis tshaj cov nqe lus no li. Thaum ib tug tib neeg twg tsis pom mus rau hauv lwm tus lub siab, ces tus tib neeg ntawd ntsuas seb lawv zoo los tsis zoo, ncaj ncees los tsis ncaj ncees, raws li qhov soj ntsum lawv tus cwj pwm thiab tej kev ua thiab siv cov qauv no rau tus cwj pwm xwb. Tej no yog txhua yam tseem ceeb uas lawv siv. Tsis yog li ntawd lod? (Yog.) Raws li cov nqe lus uas nyuam qhuav hais tawm ntawd, cov qauv rau txoj kev ntsuas uas tib neeg ntiaj teb muaj ntawd yog dab tsi? Tej uas tib neeg ntiaj teb suav tias zoo thiab yog nyob rau hauv lawv tej kev xav phem ntawd yog dab tsi? Yog peb tsis pib txog txoj kev coj kom ncaj ncees no, cia peb pib peb txoj kev kawm thiab tshuaj xyuas yam uas zoo, yog, thiab yog qhov zoo uas tib neeg nthuav tawm tuaj thiab qhia nyob rau hauv lawv tus cwj pwm ntawd. Cia peb saib seb cov no puas yog yam zoo tiag tiag. Yog li ntawd, puas muaj ib qho nyob rau hauv cov nqe lus uas peb nyuam qhuav teev ntawd uas hais txog qhov tseeb li? Cov nqe lus ntawd lub ntsiab puas muaj ib qho mus raws li qhov tseeb li? (Tsis muaj.) Yog tib neeg txoj kev caum yog kom tau los ua ib tug neeg zoo li no, tus tib neeg uas muaj tus cwj pwm zoo li no thiab yog ib tug zoo rau sab nraud no, puas yog tus tib neeg ntawd tab tom caum qhov tseeb? Yam uas lawv caum ntawd puas cuam tshuam rau txoj kev caum qhov tseeb? Tus tib neeg uas muaj cov cwj pwm no puas xyaum ua raws li qhov tseeb thiab caum qhov tseeb? Tus tib neeg uas muaj cov cwj pwm thiab tej kev nthuav tawm no puas yog ib tug neeg zoo, puas yog tus tseem ceeb tiag tiag? Lo lus teb ces hais tias tsis yog—tus tib neeg ntawd tsis yog. Qhov no pom tau yooj yim.

Cia peb saib rau ntawm nqe lus uas hais tias yus yuav tau ua tus neeg muaj kev kawm siab thiab paub qab paub hau. Tham seb nqe lus uas hais tias “Ua tus neeg muaj kev kawm siab thiab paub qab paub hau” ntawd yog txhais li cas. (Nqe lus ntawd piav qhia txog tus uas paub cai coj ncaj ncees thiab coj tus xeeb ceem zoo.) Qhov hais tias “paub cai” ntawd txhais li cas? (Qhov ntawd txhais hais tias coj raws li qee yam kev cai tswj kav xwb.) Yog lawm. Ib tug tib neeg zoo li no ua raws li tej kev cai tswj kav dab tsi? Koj yim teb ncaj ncaj, ces koj yim to taub txog qhov no thiab nws lub ntsiab tseeb zoo xwb. Yog li ntawd, qhov coj raws li txoj kev cai tswj kav ntawd yog txhais li cas? Nov yog ib qho piv txwv. Thaum noj mov, cov hluas yuav tsum tsis txhob zaum kom txog rau thaum cov laus zaum tso, thiab lawv yuav tsum nyob twj ywm thaum cov laus tsis hais lus. Cov zaub mov uas tseg rau cov laus mas, yog cov laus tsis hais kom noj mas tsis txhob noj li. Dhau ntawd, tsis txhob tham lus thaum noj mov, los sis npau taws, los sis luag nrov nrov, los sis noj mov ua qhov ncauj nrov nrov, los sis ua tais diav nrov nrov. Thaum cov laus noj tag lawm, cov hluas yuav tsum tsis txhob noj tam sim ntawd thiab sawv ntsug. Thaum cov hluas pom cov laus sawv mus lawm lawv mam li noj txuas ntxiv xwb. Qhov no tsis yog kev ua raws li tej kev cai tswj kav lod? (Yog.) Tej kev cai tswj kav no tsis muaj ntau los tsawg nyob rau hauv txhua lub tsev thiab txhua tsev neeg, nyob rau hauv txhua xeem thiab txhua caj ces li. Txhua tus tib neeg puav leej ua raws li tej kev cai tswj kav no tsis tau los tsawg, thiab thaum lawv ua raws li tej kev cai tswj kav ntawd, tej kev cai tswj kav ntawd txwv lawv. Txhua tsev neeg nyias muaj nyias tej kev cai tswj kav—yog li ntawd leej twg yog tus tsim tej kev cai tswj kav ntawd? Tsev neeg ntawd cov pog koob yawg koob thiab cov laus uas luag hwm uas nyob rau ntau tiam yav dhau los ntawd tsim tej kev cai tswj kav ntawd. Lawv coj qhov tseem ceeb uas tshwj xeeb thaum ua kev zoo siab rau hnub so thiab lub sij hawm ua kev cai nco txog uas tseem ceeb; yog li ntawd txhua tus yuav tsum ua raws li lawv hais, yam tsis muaj kev zam rau leej twg li. Yog leej twg tsis ua raws li tej kev cai tswj kav los sis ua txhaum tej kev cai tswj kav ntawd, mas tus ntawd raug nws tsev neeg tej kev cai muab rau txim hnyav heev. Ib txhia haj tseem yuav tsum tau txhos caug thov kev zam txim ntawm nws tsev neeg lub thaj thiab. Qhov ntawd yog tej kev cai tswj kav. Qhov uas peb tab tom tham txog tam sim no tsuas yog qee qhov kev cai tswj kav uas siv rau hauv yim neeg los sis tsev neeg uas hais txog ntawd xwb. Tej kev cai tswj kav zoo li no tsis yog ib feem ntawm qhov txhais hais tias “paub cai” lod? (Yog.) Yus tuaj yeem qhia tau tias tus tib neeg ntawd puas paub cai los ntawm qhov saib nws noj mov xwb. Yog hais tias lawv ua qhov ncauj nrov nrov thaum lawv noj mov, los sis tsis xav noj mov, los sis pheej faib zaub mov me me rau lwm tus, thiab tham lus thaum noj mov, thiab luag nrov nrov, thiab qee zaus haj tseem muab lawv ob tug tsawg taw mus rau tus uas lawv tab tom nrog tham thiab, ces txhua yam no yog, lawv tab tom qhia tias lawv tsis paub cai. Qhov hais tias ib tug tib neeg tsis paub cai ntawd qhia hais tias lwm tus ntuas, nug, thiab thuam tus tib neeg ntawd txog tus tib neeg ntawd tus cwj pwm. Hos cov uas paub cai, lawv tsis hais lus thaum noj mov, los sis luag ntshuj ntshis, thiab lawv tsis xaiv zaub mov los sis tsis faib zaub mov me me rau lwm tus. Lawv coj tau zoo heev. Lwm tus pom lawv tus cwj pwm thiab txoj kev ua mas lwm tus hais tias nov yog ib tug neeg paub cai. Yog li ntawv vim lawv txoj kev paub cai no, lwm tus thiaj li hwm thiab qhuas lawv, thiab lawv txoj kev hlub. Qhov no yog ib feem ntawm yam uas txhawb txoj kev paub cai. Yog li ntawd, txoj kev paub cai yog dab tsi tiag tiag? Peb nyuam qhuav hais tias: “Kev paub cai” tsuas yog los ntawm tib neeg tus cwj pwm xwb. Nyob rau hauv cov piv txwv kawg no, muab hais tias, thaum noj mov mas tau kom zaum raws li qib tib neeg. Txhua tus yuav tsum tso lawv lub rooj zaum raws li tej kev cai tswj kav; lawv yuav tsum tsis txhob zaum tsis yog chaw. Cov laus thiab cov hluas los ib yam nkaus yuav tau ua raws li tsev neeg ntawd tej kev cai tswj kav, uas tej zaum yuav tsis muaj leej twg ua txhaum, thiab zoo li lawv coj tau zoo heev, ua tau zoo heev, ua tau tsim nyog heev, thiab muaj meej mom heev—tiam sis txawm lawv yuav zoo li ntawd npaum li cas los xij, txhua yam ntawd rov qab los rau ntawm tus cwj pwm zoo sab nraud xwb. Qhov no puas cuam tshuam rau tus moj yam qias vuab tsuab? Tsis cuam tshuam; nws tsuas yog ib tug qauv uas los ntsuas tib neeg tus cwj pwm sab nraud xwb. Tus cwj pwm dab tsi? Feem ntau yog lawv txoj kev hais lus thiab tej kev ua. Piv txwv li, yus yuav tsum tsis txhob tham lus thaum noj mov los sis ua qhov ncauj nrov nrov thaum tab tom zom ntawm qhov ncauj. Thaum zaum noj mov, muaj raws qib hais tias leej twg zaum ua ntej tso. Feem ntau yeej muaj tej kev sawv thiab zaum kom tsim nyog. Tag nrho tej no tsuas yog tus cwj pwm, tus cwj pwm coj rau sab nraud, txhua yam ntawd xwb. Yog li ntawd, tib neeg puas kam ua raws li tej kev cai tswj kav no tiag tiag? Tib neeg xav li cas rau lawv tus kheej txog qhov teeb meem ntawd? Lawv xav li cas txog qhov teeb meem ntawd? Qhov ua raws li tej kev cai tswj kav uas ruam ruam no puas muaj txiaj ntsim rau tib neeg? Tej kev cai tswj kav ntawd muab puas tau kev nce qib nyob rau hauv lub neej rau lawv? Qhov teeb meem ntawm txoj kev ua raws li tej kev cai tswj kav uas ruam ruam no yog dab tsi? Nws puas cuam tshuam rau qhov teeb meem uas hais tias seb puas muaj ib qho kev hloov pauv nyob rau hauv tib neeg txoj kev pom txog txhua yam thiab lub neej txoj sia tus moj yam? Tsis cuam tshuam kiag li. Nws tsuas yog cuam tshuam rau tib neeg tus cwj pwm xwb. Nws tsuas yog tim tsum ob peb yam ntawm tib neeg tus cwj pwm, uas hais txog tej kev cai tswj kav uas tib neeg yuav ua tau thiab ua raws xwb. Txawm leej twg yuav xav li cas txog tej kev cai tswj kav no, thiab tab txawm yog lawv ntxub thiab thuam tej kev cai tswj kav no los xij, lawv yeej tsis muaj lwm txoj kev xaiv lawm kawg ua raws li tej kev cai tswj kav no xwb vim yog lawv tsev neeg thiab cov pog koob yawg koob, thiab vim lawv txoj kev cai hauv tsev. Txawm li ntawd los tsis muaj leej twg los tshawb xyuas seb tib neeg muaj kev xav li cas txog tej kev cai tswj kav no kiag, los sis seb tib neeg xam pom thiab saib tej kev cai tswj kav zoo no li cas nyob rau hauv lawv txoj kev xav, los sis qhov lawv pom thiab tus cwj pwm uas lawv coj rau tej kev cai tswj kav no zoo li cas. Qhov ua li no yuav txaus rau koj los qhia txog tus cwj pwm zoo thiab qhov ua raws li tej kev cai no. Cov uas ua li ntawd yog cov tib neeg paub cai. Qhov hais tias “ua tus neeg muaj kev kawm siab thiab paub qab paub hau” ntawd tsuas xav tau tib neeg tus cwj pwm nkaus xwb. Tsuas siv qhov ntawd los txiav txim rau tib neeg tus cwj pwm, tus cwj pwm uas tswj qhov tib neeg coj thaum zaum thiab sawv, qhov lawv lub cev txav, tej uas qhia txog lawv lub cev, lawv lub qhov muag yuav saib li cas, lawv lub qhov ncauj yuav txav li cas, lawv lub taub hau yuav tig li cas, thiab lwm yam. Qhov ntawd ua rau tib neeg muaj ib tug cwj pwm coj rau sab nraud, yam tsis quav ntsej txog tias lawv lub siab, tus moj yam, thiab lub ntsiab tseeb ntawm lawv txoj kev ua neej zoo li cas li. Tej yam zoo li no yog tus qauv ntawm txoj kev ua tus neeg muaj kev kawm siab thiab paub qab paub hau. Yog koj ua tau raws li tus qauv no, ces koj yog ib tug tib neeg uas muaj kev kawm siab thiab paub qab paub hau, thiab yog koj muaj tus cwj pwm zoo ces qhov ntawd yog muaj kev kawm siab thiab paub qab paub hau, ces lwm tus yuam pom hais tias, koj yog ib tug uas luag qhuas thiab hwm. Qhov ntawd tsis yog li ntawd lod? (Yog.) Yog li ntawd, nqe lus no puas yog hais txog tib neeg tus cwj pwm nkaus xwb? (Yog.) Tus qauv ntawm tus cwj pwm no muaj txiaj ntsim dab tsi tiag tiag? Feem ntau, qhov txiaj ntsim yog los ntsuas seb tib neeg puas paub cai thiab muaj kev kawm siab, seb lwm tus puas hwm thiab qhuas lawv thaum lwm tus saib xyuas lawv, thiab seb puas tsim nyog qhuas lawv. Txoj kev ntsuas tib neeg li no mas tsis mus raws li qhov tseeb tej hauv paus ntsiab lus kiag li. Nws tsis tseem ceeb.

Qhov peb kawm tam sim no feem ntau tsuas yog hais txog txoj kev cob qhia tib neeg, uas yog ib qho ntawm tej kev tim tsum uas nqe lus ntawd muab coj los siv xwb xws li, “Ua tus neeg muaj kev kawm siab thiab paub qab paub hau.” Qhov hais tias “ua tus neeg paub qab paub hau” ntawd yog hais txog dab tsi? (Hais txog ib txoj kev to taub txog cov xeeb ceem thiab kev paub tab.) Qhov ntawd ntiav me ntsis, tiam sis nws yog ib feem ntawm qhov ntawd. Qhov “ua tus neeg paub qab paub hau” ntawd tsis txhais hais tias muaj qhov paub qhov tsim nyog, thiab txaus siab hlo pom zoo lod? Cia peb mus kom deb rau qhov ntawd puas tau? (Tau kawg.) Kom thiaj li pom ib txoj kev to taub txog cov xeeb ceem thiab qhov kev paub tab, thiab kom muaj qhov paub qhov tsim nyog. Yog li ntawd, muab sau zog los ua ke, yog ib tug tib neeg twg muaj tej cwj pwm uas muaj nyob rau hauv qhov “ua tus neeg muaj kev kawm siab thiab paub qab paub hau” ntawd no, lawv qhia kom pom qhov ntawd li cas kiag? Nej puas tau pom ib tug tib neeg uas muaj kev kawm siab thiab paub qab paub hau li? Nej cov txwj laug thiab cov txheeb ze, los sis nej cov phooj ywg puas muaj ib tug tib neeg uas muaj kev kawm siab thiab paub qab paub hau li? Qhov txawv ntawm lawv yog dab tsi? Lawv ua raws li tej kev cai tswj kav uas zoo tshaj plaws. Lawv ua tib zoo hais lus, kom tsis txhob yog lus ntxhib, lus lim hiam, thiab tsis ua rau lwm tus mob siab. Thaum lawv zaum, lawv tus kheej zaum kom zoo; thaum lawv sawv, lawv sawv kom zoo. Nyob rau hauv txhua fab txhua feem mas, zoo li lawv coj tus cwj pwm paub cai thiab zoo rau lwm tus, uas ua rau lwm tus pom txoj kev hlub thiab khib thaum pom lawv. Thaum lawv ntsib tib neeg, lawv txo lawv lub taub hau kom qis me ntsis thiab nyo lawv lub cev, thiab lawv nyo hau thiab txhos caug hawm. Lawv hais lus yam paub tab heev, ua raws li tej kev cai ntawm cov pej xeem zoo thiab cov lus txib yam nruj heev, tsis muaj tus yam ntxwv los sis tus cwj pwm phem ntawm cov neeg muaj meej mom qis li. Muab hais tag nrho ces, tus cwj pwm uas lawv coj nyob rau sab nraud ntawd yog ua kom cov uas pom zoo siab thiab qhuas xwb. Txawm li ntawd los yeej muaj ib qho teeb meem txog qhov no xws li: Nyob li ntawm lawv mas muaj kev cai tswj kav txog txhua yam li. Thaum noj mov nws muaj nws kev cai tswj kav; thaum pw nws muaj nws kev cai tswj kav; thaum mus kev nws muaj nws kev cai tswj kav; tab txawm thaum tawm hauv tsev mus thiab rov qab los los muaj kev cai tswj kav thiab. Tib neeg mloog zoo li raug txwv nruj heev thiab tsis kaj siab li thaum lawv nrog ib tug tib neeg zoo li no. Koj tsis paub tias thaum twg lawv yuav cia li rub txoj kev cai tswj kav tuaj li, thiab yog koj ua txhaum txoj kev cai tswj kav ntawd yam tsis xyuam xim, mas zoo li koj tsis quav ntsej thiab tsis paub dab tsi li, hos lawv mas zoo li paub cai heev. Lawv paub cai heev tab txawm lawv luag ntxhi, uas tsis ntxi hniav li, thiab lawv quaj, uas lawv yeej tsis quaj rau lwm tus pom li, tiam sis quaj kauv pam thaum tsaus ntuj, thaum lwm tus tsaug zog lawm xwb. Txhua yam uas lawv ua, puav leej yog ua raws li txoj kev cai tswj kav xwb. Qhov ntawd yog qhov hu ua “kev tu me nyuam.” Cov tib neeg zoo li no nyob rau hauv daim av uas paub tab, nyob rau hauv ib tsev neeg loj; lawv muaj ntau txoj kev cai tswj kav thiab muaj ntau txoj kev tu me nyuam. Txawm koj yuav ua li cas los, tus cwj pwm zoo uas muaj nyob rau hauv qhov ua tus neeg muaj kev kawm siab thiab paub qab paub hau ntawd yog tus cwj pwm xwb—tus cwj pwm zoo nyob rau sab nraud ntawd muaj nyob rau hauv tus tib neeg ntawd raws li cheeb tsam uas tu lawv loj hlob tuaj, ces cov qauv siab thiab tej kev tim tsum nruj uas lawv muab coj los kho lawv tus kheej tus cwj pwm ntawd mam li maj mam nkag rau hauv tus tib neeg ntawd. Yam uas hloov tej cwj pwm zoo li no yuav tshwm tuaj rau hauv tib neeg, tej ntawd tsuas hais txog tib neeg tus cwj pwm sab nraud xwb, thiab txawm tib neeg yuav suav hais tias tej cwj pwm nyob rau sab nraud uas zoo li no yog tej cwj pwm zoo, yog tej cwj pwm uas tib neeg siv zog rau thiab pom zoo los xij, tej ntawd yog ib yam uas txawv ntawm tib neeg tus moj yam. Txawm tib neeg tus cwj pwm sab nraud yuav zoo npaum li cas los xij, tus cwj pwm ntawd yeej npog tsis tau lawv tus moj yam qias vuab tsuab; txawm tib neeg tus cwj pwm sab nraud yuav zoo npaum li cas los xij, tus cwj pwm ntawd yeej sawv cev tsis tau rau ib txoj kev hloov pauv lawv tus moj yam qias vuab tsuab. Txawm tus tib neeg uas muaj kev kawm siab thiab paub qab paub hau tus cwj pwm yuav coj tau zoo heev, ua rau lwm tus hwm thiab qhuas me ntsis los xij, thaum lawv tus moj yam qias vuab tsuab tawm tuaj lawm, lawv tus cwj pwm zoo ntawd tsis muaj txiaj ntsim kiag li. Txawm lawv tus cwj pwm yuav zoo thiab paub tab npaum li cas los xij, thaum qee yam uas hais txog qhov tseeb tej hauv paus ntsiab lus los raug rau lawv lawm, ces lawv tus cwj pwm zoo ntawd tsis muaj txiaj ntsim kiag li, thiab tus cwj pwm zoo ntawd tsis ua rau lawv to taub qhov tseeb kiag tam sim ntawd—tiam sis, vim lawv ntseeg lawv tej kev xav phem uas xav hais tias qhov ua tus neeg muaj kev kawm siab thiab paub qab paub hau ntawd yog ib yam zoo, lawv thiaj li mus muab yam ntawd los ua qhov tseeb lawm, uas ua rau lawv ntsuas thiab nug cov lus uas Vajtswv hais. Lawv ntsuas lawv tus kheej cov lus hais thiab tej kev ua raws li nqe lus ntawd, thiab qhov ntsuas lwm tus los yog lawv tus qauv thiab. Tam sim no saib cov lus txhais txog qhov hais tias “Qhov Nrhiav Qhov Tseeb Yog Dab Tsi”—los saib tib neeg thiab txhua yam, thiab los coj tib neeg tus kheej thiab txoj kev ua kom zoo, raws li Vajtswv cov lus nkaus xwb uas muaj qhov tseeb ua lawv tus qauv. Tam sim no, tus qauv rau tus cwj pwm sab nraud uas kom ua tus neeg muaj kev kawm siab thiab paub qab paub hau ntawd puas muaj ib yam dab tsi cuam tshuam rau Vajtswv cov lus thiab qhov tseeb kiag li? (Tsis muaj.) Tej ntawd tsis yog tsis cuam tshuam xwb—tej ntawd cov nyom ntag. Qhov cov nyom ntawd nyob rau qhov twg? (Tej lus hais zoo li no tsuas yuav ua rau tib neeg mob siab rau tus cwj pwm zoo sab nraud xwb hos tsis quav ntsej tus moj yam uas npaj siab thiab qias vuab tsuab uas nyob rau hauv lawv li. Lawv ua li ntawd kom tib neeg raug cov cwj pwm zoo no dag thiab tsis thim xav txog yam uas nyob rau hauv lawv tus kheej tej kev xav thiab tej tswv yim, thiab kom lawv thiaj li tsis muaj peev xwm pom txog lawv tus moj yam qias vuab tsuab, thiab haj tseem khib thiab pe hawm lwm tus raws li lwm tus tus cwj pwm yam dig muag ntsuav thiab.) Tej no yog tej uas yuav tshwm sim los ntawm qhov lees txais cov nqe lus ntawm txoj kab lis kev cai ntawd ntag. Yog li ntawd, thaum tib neeg pom qhov cov cwj pwm zoo no ua, mas lawv yuav saib cov cwj pwm ntawd muaj nqis heev. Lawv pib ntseeg hais tias cov cwj pwm no yog yam zoo thiab yog qhov zoo, yog li ntawd thaum cov cwj pwm ntawd yog yam zoo lawm, lawv yuav saib cov cwj pwm ntawd cuag nkaus li cov cwj pwm ntawd yog qhov tseeb ntag. Ces lawv siv qhov no ua tus qauv uas lawv txwv lawv tus kheej thiab ntsuas lwm tus; lawv muab qhov ntawd coj los ua lub hauv paus rau lawv saib tib neeg thiab txhua yam, thiab thaum lawv ua li ntawd, lawv kuj muab qhov ntawd coj los ua lub hauv paus rau lawv txoj kev coj kom zoo thiab tej kev ua thiab. Yog li qhov no tsis cov nyom rau qhov tseeb lod? (Cov.) Tam sim no peb yuav tau muab qhov seb nqe lus uas hais tias tib neeg yuav tau muaj kev kawm siab thiab paub qab paub hau ntawd puas dag tib neeg tso tseg es hais txog nqe lus ntawd kiag ntag. Qhov hais tias “ua tus neeg muaj kev kawm siab thiab paub qab paub hau” ntawd—yog ib sob lus zoo, thiab tsim nyog. Txhua tus puav leej nyiam nqe lus no, thiab tib neeg siv nqe lus no los ntsuas lwm tus thiab los saib tib neeg thiab txhua yam, raws li qhov kev xav hais tias qhov ntawd yog, zoo, thiab yog ib tug qauv. Yog li ntawd thaum lawv ua li ntawd lawm, lawv kuj muab qhov ntawd coj los ua lub hauv paus rau lawv txoj kev coj kom zoo thiab tej kev ua thiab. Piv txwv li, tib neeg tsis muab lawv txoj kev ntsuas txog lwm tus txoj kev zoo raws li Vajtswv cov lus. Lawv ntsuas raws li dab tsi xwb? “Tus tib neeg no puas muaj kev kawm siab thiab paub qab paub hau? Lawv tus cwj pwm sab nraud puas raug cob qhia? Lawv coj puas tau raws li txoj kev cai tswj kav zoo? Lwm tus puas hwm lawv? Lawv puas muaj xeeb ceem? LawvLawv puas coj tus cwj pwm uas txo hwj chim thaum nrog lwm tus tham? Lawv puas muaj tus cwj pwm zoo ib yam li Koos Loos muaj uas tsis yuav cov txiv loj?^[a] Lawv puas yog hom tib neeg ntawd?” Vim li cas lawv thiaj li muaj cov lus nug thiab cov kev xam pom no? Nws yog vim tus qauv uas ua tus neeg muaj kev kawm siab thiab paub qab paub hau ua ntej xwb. Qhov lawv muab qhov ntawd coj los ua lawv tus qauv ntawd puas yog? (Tsis yog.) Vim li cas ho tsis yog? Yog ib lo lus teb uas yooj yim heev, tiam sis nej twb xav tsis tawm li. Vim qhov ntawd tsis yog qhov Vajtswv ntsuas, thiab Nws yuav tsis kom tib neeg ua li ntawd. Yog tib neeg ua li ntawd, ces lawv ua yuam kev lawm. Yog ib tug tib neeg twg yuav ntsuas ib tug tib neeg los sis ib qho xwm txheej li no, yog lawv siv qhov ntawd los ua ib tug qauv los saib tib neeg thiab txhua yam, ces yog lawv tab tom ua txhaum qhov tseeb thiab Vajtswv cov lus ntag. Qhov ntawd yog qhov kev cov nyom ntawm tej kev xav phem uas ib txwm muaj thiab qhov tseeb. Tsis yog li ntawd lod? (Yog.) Vajtswv kom tib neeg ntsuas lwm tus raws li dab tsi? Yam uas Nws kom tib neeg saib tib neeg thiab txhua yam ntawd yog saib raws li dab tsi? (Nws cov lus.) Nws kom tib neeg saib tib neeg raws li Nws cov lus. Tshwj xeeb yog, qhov no txhais hais tias ntsuas seb tus tib neeg ntawd puas muaj kev ua neej raws li Nws cov lus. Ntawd yog ib feem ntawm qhov kev ntsuas ntawd. Dhau ntawd lawm, qhov kev ntsuas ntawd yog ntsuas seb tus tib neeg ntawd puas nyiam qhov tseeb, seb lawv puas muaj ib lub siab hlub Vajtswv, thiab seb lawv puas tuaj yeem ua raws li qhov tseeb. Tej no tsis yog tej uas tshwj xeeb ntawm qhov kev ntsuas ntawd lod? (Yog.) Yog li ntawd, tib neeg ntsuas lwm tus txoj kev zoo raws li dab tsi? Raws li qhov seb lawv puas raug cob qhia thiab coj tau raws li txoj kev cai tswj kav zoo, raws li qhov seb lawv puas noj mov ua qhov ncauj nrov nrov los sis txhob txwm nrhiav zaub mov tsawg tsawg thaum lawv noj, raws li qhov seb lawv puas tos kom cov laus zaum ua ntej lawv tus kheej zaum ntawm tsum mov. Lawv siv tej yam zoo li no los ntsuas lwm tus. Qhov siv tej no tsis yog qhov siv tus qauv rau tus cwj pwm uas hais tias ua tus neeg muaj kev kawm siab thiab paub qab paub hau lod? (Yog.) Tej kev ntsuas zoo li no puas yog? Tej kev ntsuas ntawd puas mus raws li qhov tseeb? (Tej kev ntsuas ntawd tsis mus.) Qhov ntawd yeej meej meej lawm hais tias tej kev ntsuas ntawd tsis mus raws li qhov tseeb. Yog li thaum kawg yam uas tshwm sim los ntawm txoj kev ntsuas zoo li no yog dab tsi? Tus ntsuas ntawd ntseeg hais tias txhua tus uas muaj kev kawm siab thiab paub qab paub hau ntawd yog ib tug neeg zoo, thiab yog koj kom cov ntsuas ntawd kawm txog qhov tseeb, mas lawv yuav qhia tib neeg txog cov kev cai hauv tsev thiab tej kev qhia, thiab cov cwj pwm zoo ntawd tas li li. Yog li ntawd yam uas thaum kawg tshwm sim los ntawm lawv txoj kev qhia tej no rau tib neeg ntawd ces yog qhov hais tias lawv yuav ua rau tib neeg coj tus cwj pwm zoo, tiam sis cov tib neeg ntawd lub ntsiab tseeb uas qias vuab tsuab yuav tsis hloov pauv kiag li. Txoj kev ua li no mas nrug deb ntawm qhov tseeb thiab Vajtswv cov lus heev. Cov tib neeg zoo li no tsuas muaj ob peb tug cwj pwm zoo xwb. Yog li ntawd, tej moj yam qias vuab tsuab uas nyob rau hauv lawv ntawd hloov pauv puas tau vim tus cwj pwm zoo? Lawv zwm puas tau rau Vajtswv thiab muaj lub siab ncaj ncees rau Vajtswv? Yeej tsis tau li. Cov tib neeg no tau hloov mus ua leej twg lawm? Mus ua cov Falixais, uas tsuas muaj tus cwj pwm zoo sab nraud xwb, tiam sis yeej tsis to taub qhov tseeb li, thiab cov uas zwm tsis tau rau Vajtswv. Tsis yog li ntawd lod? (Yog.) Saib cov Falixais mas—raws li lawv lub ntsej muag, lawv tsis zoo lod? Lawv ceev hnub Xanpataus; nyob rau hnub Xanpataus mas, lawv tsis ua dab tsi li. Lawv hais lus zoo, coj tau raws li txoj kev cai tswj kav zoo heev thiab ua raws li kev cai, raug cob qhia zoo heev, coj zoo thiab kawm tau zoo heev. Vim lawv txawj zais thiab tsis ntshai Vajtswv kiag li, tiam sis txiav txim rau Nws thiab teem txim rau Nws, yog li ntawd thaum kawg lawv thiaj li raug Nws foom tsis zoo. Vajtswv hais tias lawv yog cov Falixais uas ntsej muag ncaj saib nkhaus, uas puav leej yog cov neeg ua phem nkaus xwb. Ib yam nkaus li ntawd, cov tib neeg uas siv tus cwj pwm zoo uas ua tus neeg muaj kev kawm siab thiab paub qab paub hau los ua tus qauv rau lawv txoj kev coj kom zoo thiab txoj kev ua ntawd yeej tsis yog cov tib neeg uas caum qhov tseeb li. Thaum lawv siv txoj cai no los ntsuas lwm tus, thiab los coj lawv tus kheej thiab ua kom zoo, ces yeej tsis yog lawv caum qhov tseeb lawm; thiab thaum lawv txiav txim rau ib tug tib neeg twg los sis ib yam dab tsi, tus qauv thiab qhov txhawb txoj kev txiav txim ntawd tsis mus raws li qhov tseeb li, tiam sis txhaum qhov tseeb xwb. Yam uas lawv tsom ntsoov rau ces yog tib neeg tus cwj pwm, thiab lawv tej kev xwb, tsis yog lawv tus moj yam thiab lub ntsiab tseeb li. Lawv tsis ua raws li Vajtswv cov lus, tsis ua raws li qhov tseeb; tiam sis, lawv tej kev ntsuas ces yog ntsuas raws li tus qauv rau tus cwj pwm hauv txoj kab lis kev cai uas yog ua tus neeg muaj kev kawm siab thiab paub qab paub hau no xwb. Qhov kawg ntawm txoj kev ntsuas zoo li no ces yog qhov hais tias, tsuav tus tib neeg ntawd muaj cov cwj pwm zoo sab nraud zoo li no uas yog ua tus neeg muaj kev kawm siab thiab paub qab paub hau xwb ces lawv pom hais tias tus tib neeg ntawd zoo thiab mus raws li Vajtswv lub siab nyiam lawm. Thaum tib neeg muab cais zoo li no lawm, ces lawv tau tawm tsam kiag qhov tseeb thiab Vajtswv cov lus lawm. Thiab lawv yim siv tus qauv cwj pwm no los saib tib neeg thiab txhua yam, thiab los coj lawv tus kheej thiab ua kom zoo, ces yam uas tshwm sim los ntawm qhov ntawd yog ua rau lawv txav deb ntawm Vajtswv cov lus thiab qhov tseeb xwb. Tab txawm tom qab ntawd los, lawv xyiv fab rau yam uas lawv tab tom ua thiab ntseeg hais tias lawv tab tom caum qhov tseeb xwb. Qhov txhawb ob peb nqe lus zoo ntawm txoj kab lis kev cai ntawd, lawv ntseeg hais tias yog lawv txhawb qhov tseeb thiab txoj kev tseeb ntag. Txawm li cas los xij lawv ua raws li tej ntawd, lawv pheej ua raws li tej ntawd, thaum kawg lawv yuav tsis muaj ib qho kev ntsib kev pom los sis kev paub txog Vajtswv cov lus, qhov tseeb, thiab lawv yuav tsis zwm rau Vajtswv ib qho me me li. Thiab qhov no haj yam tsis ua rau lawv muaj kev ntshai Vajtswv tiag tiag. Qhov ntawd yog qhov tshwm sim thaum tib neeg txhawb txhua tus cwj pwm zoo uas yog ua tus neeg muaj kev kawm siab thiab paub qab paub hau zoo li no. Tib neeg yim mob siab rau tus cwj pwm zoo, mob siab rau ua neej raws li tus cwj pwm zoo ntawd, mob siab rau caum tus cwj pwm zoo ntawd, ces lawv yim txav deb ntawm Vajtswv cov lus xwb—thiab tib neeg yim txav deb ntawm Vajtswv cov lus, ces lawv yim tsis muaj peev xwm to taub qhov tseeb xwb. Tsuas yog xav tias yuav zoo li no xwb. Yog ib tug tib neeg twg tus cwj pwm zoo tuaj, qhov ntawd puas txhais hais tias tus tib neeg ntawd tus moj yam hloov pauv lawm? Nej puas muaj kev ntsib kev pom txog qhov no? Nej puas txeev cia li nrhiav los ua cov tib neeg uas muaj kev kawm siab, thiab paub qab paub hau yam ras tsis txog li? (Txeev.) Qhov ntawd yog vim txhua tus to taub hais tias qhov ua ib tug neeg muaj kev kawm siab, thiab paub qab paub hau ntawd, lwm tus yuav pom zoo li yus tsim nyog hwm thiab muaj meej mom. Lwm tus saib lawv rau lub sam xeeb. Yog li ntawd, puas yog? (Yog.) Yog li ntawd, qhov muaj cov cwj pwm zoo no yuav tsum tsis yog ib qho phem. Tiam sis qhov muaj cov cwj pwm zoo no, cov kev nthuav tawm uas zoo no, puas daws tau tib neeg tus moj yam qias vuab tsuab? Qhov ntawd puas ua tau kom tib neeg tsis txhob ua yam phem? Yog ua tsis tau no, cov cwj pwm zoo uas zoo li no muaj txiaj ntsim dab tsi? Nws tsuas zoo saib xwb; nws yeej tsis muaj txiaj ntsim. Cov tib neeg uas muaj tus cwj pwm zoo uas zoo li no puas zwm tau rau Vajtswv? Lawv puas kam lees txais qhov tseeb thiab xyaum ua raws li qhov tseeb? Yeej tsis kam. Tus cwj pwm zoo yeej hloov tsis tau tib neeg txoj kev xyaum ua raws li qhov tseeb. Qhov ntawd tsuas zoo ib yam li cov Falixais xwb. Lawv tus cwj pwm mas zoo heev, thiab lawv coj txoj kev ntseeg nruj, tiam sis lawv ua li cas rau tus Tswv Yexus? Yeej tsis muaj leej twg xav tias lawv yuav muab tib neeg ntiaj teb tus Cawm Seej ntsia rau saum ntoo khaub lig li. Yog li ntawd, cov uas tsuas muaj cov cwj pwm zoo sab nraud xwb tiam sis tsis tau txais qhov tseeb ntawd nyob rau qhov phom sij lawm. Lawv yuav ua li qhov lawv tau tawm tsam thiab ntxeev siab rau Vajtswv mus li. Yog koj tsis pom tias qhov no zoo li cas, ces tej zaum koj tseem raug cov tib neeg uas muaj tus cwj pwm zoo ntawd dag li qub.

Qhov ua tus neeg muaj kev kawm siab thiab paub qab paub hau ntawd yog tib neeg ib txoj kev xav phem uas ib txwm muaj. Qhov ntawd yeej tsis mus raws li qhov tseeb kiag li. Muab hais tias qhov ntawd cov nyom qhov tseeb, yog li ntawd tib neeg yuav tsum muaj dab tsi kiag yog lawv yuav muab qhov tseeb coj los xyaum ua? Qhov muaj tiag yog dab tsi kiag uas thaum ua neej kom raws li qhov tseeb thiab Vajtswv tej kev tim tsum ntawd? Koj puas paub? Los ntawm qhov kev qhia zoo li no, ib txhia yuav hais tias, “Koj hais tias qhov ua tus neeg muaj kev kawm siab thiab paub qab paub hau ntawd mas tsis mus raws li qhov tseeb lawm, qhov ntawd tsuas yog ib tug cwj pwm zoo sab nraud xwb. Yog li ntawd, peb cia li tsis txhob ua cov tib neeg uas muaj kev kawm siab, thiab paub qab paub hau ntxiv lawm. Es lub neej thiaj li yuav tsis muaj kev txhawj ntxiv, tsis muaj ib qho kev txwv, tsis raug ib txoj kev cai twg txwv lawm. Peb yuav ua tau yam peb xav tau, ua neej li qhov peb xav tau. Ntshe peb yuav tsis txhawj li! Tam sim no peb muaj kev ywj pheej tuaj lawm, vim hais tias tib neeg tus cwj pwm zoo tsis cuam tshuam rau qhov lawv ua tau los. Peb tsis tas yuav txhawj txog txoj kev cob qhia peb tus kheej, tej kev cai, los sis ib yam dab tsi zoo li ntawd li.” Vim qhov no es cia li ua li ntawd no puas yog? (Tsis yog.) Qhov ntawd yog ib txoj kev nkag siab uas ruam heev; lawv ua yuam kev loj dhau lawm. Yog li ntawd, puas muaj leej twg uas yuav ua yuam kev zoo li no? Yog li ntawd, puas muaj leej twg uas yuav ua yuam kev zoo li no? Tej zaum yuav muaj ib txhia hais tias, “Yog cov tib neeg uas raug cob qhia tseem tawm tsam thiab ntxeev siab rau Vajtswv lawm thiab no, ces kuv yuav cia li tsis txhob ua ib tug neeg uas raug cob qhia xwb. Kuv pib saib tsis taus cov tib neeg uas raug cob qhia lawm. Kuv thuam cov uas muaj kev kawm siab thiab paub qab paub hau, paub tab thiab paub cai, paub kev paub cai, cov uas hwm cov laus thiab saib xyuas cov hluas, cov uas muaj lub siab dawb siab zoo ntawd. Kuv saib tsis taus txhua tus uas kuv pom ua tej no, thiab tab meeg cem lawv hais tias: ‘Koj tus cwj pwm yog cov Falixais tus cwj pwm. Uas yog los dag lwm tus xwb. Tsis yog caum qhov tseeb, thiab haj yam tsis yog xyaum ua raws li qhov tseeb. Tsis txhob sim dag peb—peb yuav tsis raug koj dag los sis qaug rau koj tej tswv yim dag ko!’” Nej puas yuav ua li ntawd? (Tsis ua.) Qhov nej tsis ua ntawd yog lawm. Yog nej tseem ua tej yam uas tsis muaj qab hau thiab mas nej ruam heev. Ib txhia tib neeg uas muaj txoj kev to taub ruam mas tsis muaj txoj kev nkag siab zoo txog qhov tseeb li—lawv tsis muaj qhov peev xwm nkag siab. Yam uas lawv ua tau ces yog ua raws li kev cai xwb, yog li ntawd qhov ntawd yog qhov lawv ua. Yog li ntawd, vim li cas peb thiaj li kawm thiab tshuaj xyuas txog qhov teeb meem no? Qhov tseem ceeb, yog kom tib neeg to taub tias qhov los caum qhov tseeb ntawd tsis yog los caum tus cwj pwm zoo sab nraud, thiab tsis yog los ua kom koj yog ib tug tib neeg uas coj zoo, coj tau raws li txoj kev cai tswj kav zoo, thiab raug cob qhia. Tiam sis, yog los ua kom koj to taub qhov tseeb, xyaum ua raws li qhov tseeb, thiab muaj peev xwm ua raws li qhov tseeb, uas txhais hais tias txhua yam uas koj ua ntawd muaj lub hauv paus nyob rau hauv Vajtswv cov lus, tias txhua yam puav leej mus raws li qhov tseeb. Cov cwj pwm uas ua raws li qhov tseeb thiab muaj Vajtswv cov lus ua cov cwj pwm ntawd lub hauv paus mas tsis zoo ib yam li qhov ua tus neeg muaj kev kawm siab thiab paub qab paub hau, thiab cov cwj pwm ntawd tsis zoo ib yam li cov qauv uas txoj kab lis kev cai thiab txoj kev paub cais qhov zoo qhov phem uas ib txwm muaj ntawd kom tib neeg ua. Ob yam ntawd mas sib txawv. Vajtswv cov lus yog qhov tseeb, thiab cov lus ntawd nkaus xwb thiaj li yog tus qauv uas ntsuas tib neeg qhov zoo thiab qhov phem, qhov yog thiab qhov tsis yog. Txoj kab lis kev cai tus qauv uas ua tus neeg muaj kev kawm siab thiab paub qab paub hau ntawd, yeej zoo tsis npaum tus qauv ntawm qhov tseeb tej hauv paus ntsiab lus li. Thaum twg, nyob rau theem hauj lwm twg, uas Vajtswv qhia koj hais tias koj yuav tsum ua ib tug neeg uas muaj kev kawm siab, thiab paub qab paub hau, ua ib tug tib neeg uas raug cob qhia, thiab muaj meej mom yam tsis muaj ib qho kev xav txog koj li? Vajtswv puas tau hais ib qho zoo li no li? (Tsis tau.) Nws tsis tau hais. Yog li ntawd, Vajtswv hais nqe lus twg thiab qhov kev tim tsum twg uas ntsig txog tib neeg tus cwj pwm? Coj nej tus kheej kom zoo thiab ua raws nraim li Vajtswv cov lus, uas muab qhov tseeb los ua nej tus qauv nkaus xwb. Yog li, lub hauv paus ntawm Vajtswv cov lus ntawd yog dab tsi? Qhov ntawd yog, qhov tseeb twg uas koj yuav tsum siv los ua koj tus qauv, thiab koj yuav tsum ua lub neej zoo li cas es thiaj li yog koj caum qhov tseeb thiab xyaum ua raws li qhov tseeb? Qhov no tsis yog ib yam uas yuav tsum tau to taub lod? (Yog.) Yog li ntawd, cov qauv uas Vajtswv cov lus tim tsum kom tib neeg coj tus cwj pwm ntawd yog dab tsi? Nej nrhiav puas tau Nws cov lus uas hais meej txog qhov no? (Vajtswv cov lus hais tias, “Kuv muaj kev cia siab ntau heev. Kuv cia siab tias nej tuaj yeem coj nej tus kheej kom zoo thiab tus cwj pwm-zoo, ncaj ncees ua kom tiav nej lub luag hauj lwm, muaj qhov tseeb thiab kev ua neeg, yog cov tib neeg tuaj yeem tso txhua yam uas lawv muaj tseg thiab lawv lub neej rau Vajtswv, thiab lwm yam ntxiv. Tag nrho cov kev cia siab no yog los ntawm nej cov kev tsis muaj txaus thiab nej txoj kev coj tsis ncaj thiab kev tsis mloog lus“ (Txoj Lus, Phau 1. Qhov Kev Tshwm Sim thiab Tes Hauj Lwm ntawm Vajtswv. Kev Txhaum Yuav Coj Tib Neeg mus rau Dab Teb). Tag nrho cov lus ntawd yog tej hauv paus ntsiab lus thiab tej kev tim tsum txog tib neeg txoj kev coj kom zoo. Yog li ntawd, Vajtswv lwm cov lus uas ntsig txog txoj kev xyaum ua kiag ntawd yog dab tsi? (Muaj lwm zaj lus uas hais tias, “Koj lub siab yuav tsum nyob tus tus, thiab thaum muaj ib yam dab tsi los raug rau koj, koj yuav tsum tsis txhob maj maj, ntxub ntxaug, tawv ncauj, ua phem, dag, los sis ua cuav, kom koj thiaj li muaj cai. Qhov no yog qhov qhia kom pom tseeb txog txoj kev ua neej” (Txoj Lus, Phau 3. Tej Kev Sib Tham ntawm Khetos ntawm Tiam Kawg. Txoj Kev Daws ib Tug Moj Yam Qias Vuab Tsuab). Qhov ntawd yog ib txoj kev xyaum ua uas ncaj me ntsis. Tej ntawd yog tej kev qhia thiab tej kev tim tsum uas tshwj xeeb txog tib neeg tus cwj pwm sab nraud thiab tej kev ua. Tej ntawd suav puas tau ua lub hauv paus ntawm Vajtswv cov lus? Tej ntawd puas hais ncaj txaus? (Ncaj txaus.) Rov nyeem tej ntawd dua. (“Koj lub siab yuav tsum nyob tus tus, thiab thaum muaj ib yam dab tsi los raug rau koj, koj yuav tsum tsis txhob maj maj, ntxub ntxaug, tawv ncauj, ua phem, dag, los sis ua cuav, kom koj thiaj li muaj cai. Qhov no yog qhov qhia kom pom tseeb txog txoj kev ua neej.”) Muab tej ntawd sau cia; tej ntawd yog tej hauv paus ntsiab lus uas nej yuav tsum tuav thaum nej nqis tes ua nyob rau yav tom ntej. Tej ntawd qhia tib neeg tias lawv yuav tsum xyaum daws txhua yam kom tsim nyog nyob rau hauv lawv txoj kev coj kom zoo thiab tej kev ua, thiab tias lawv yuav tsum muaj peev xwm nrhiav qhov tseeb tej hauv paus ntsiab lus los ntawm lub hauv paus uas ua los ntawm lub siab uas txawj xav thiab qhov tsim nyog ntxiv. Coj koj tus kheej kom zoo thiab ua li no, ces yuav muaj tej hauv paus ntsiab lus, nrog rau txoj kev ua.

Ob peb yam uas peb nyuam qhuav hais txog uas hais tias: “thaum muaj ib yam dab tsi los raug rau koj, koj yuav tsum tsis txhob maj maj, ntxub ntxaug, tawv ncauj, ua phem, dag, los sis ua cuav, kom koj thiaj li muaj cai” ntawd—tej ntawd puas yog tej uas yooj yim ua? Tsuas yog xyaum ua li ib ntus lawm xwb mas thiaj li ua tau tej ntawd tiav. Yog muaj qee tus uas yeej ua tsis tau tej ntawd tiag tiag no, yuav ua li cas? Tsuav koj ua ib yam xwb ces yeej tau lawm, txhais tau hais tias thaum koj raug ib qho teeb meem los sis nrog lwm tus sib tham, muaj ib yam uas yam tsawg kawg yuav tau ua xws li: Koj yuav tsum coj koj tus kheej kom zoo thiab ua qhov uas yuav txhim kho tau lwm tus. Qhov no yog qhov tseem ceeb tshaj plaws. Yog koj xyaum thiab ua li no, ces qhov ua raws li qhov no thiab qhov muab qhov no coj los ua koj tus qauv ntawd, koj yuav tsis ua rau muaj ib qho kev puas tsuaj loj rau lwm tus, thiab koj yuav tsis ua rau muaj ib qho kev puas tsuaj loj rau koj tus kheej li. Qhov coj koj tus kheej kom zoo thiab ua qhov uas yuav txhim kho tau lwm tus ntawd—puas muaj qhov hais kom ntxaws txog qhov ntawd? (Muaj.) Tsis txhob txaus siab thaum lwm tus tej kev ntshaw raug rhuav tshem; tsis txhob zoo siab thiab xyiv fab thaum lwm tus raug kev txom nyem. Qhov ntawd yog qhov txhais hais tias txhim kho. Qhov uas yuav to taub txoj kev txhim kho zoo li no kom yooj yim tshaj plaws ntawd yog dab tsi? Qhov ntawd txhais hais tias koj tus cwj pwm yuav tsum ua siab ntev rau lwm tus, raws li ntsuas los ntawm tib neeg lub siab uas txawj xav thiab qhov tsim nyog; qhov ntawd yuav tsum mus raws li tib neeg lub siab uas txawj xav thiab qhov tsim nyog. Qhov ntawd tsis yog li ntawd kom txhua tus uas muaj txoj kev ua neej thiaj li ua tau neej raws li qhov no lod? (Yog.) Muab hais tias ib tug tib neeg tab tom so nyob rau hauv ib chav, es koj mus rau hauv, tsis quav ntsej txhua yam uas nyob ib puag ncig koj li, es cia li pib hu nkauj thiab tso nkauj. Qhov ntawd puas tsim nyog? (Tsis tsim nyog.) Qhov ntawd tsis yog ua kom koj muaj kev lom zem thiab kev zoo siab thaum lwm tus raug kev txom nyem xwb lod? (Yog.) Yog ib tug tib neeg twg tab tom nyeem Vajtswv cov lus los sis kawm txog qhov tseeb, es koj cia li tham txog koj tus kheej tej teeb meem rau tus tib neeg ntawd no, qhov ntawd puas yog hwm tus tib neeg ntawd? Qhov ntawd tsis yog tsis txhim kho tus tib neeg ntawd lod? (Yog.) Qhov tsis txhim kho lwm tus ntawd txhais li cas? Yam tsawg kawg, qhov ntawd txhais hais tias koj tsis hwm lwm tus. Koj yuav tsum tsis txhob cuam tshuam lwm tus tej lus hais los sis tej kev ua. Qhov ntawd tsis yog ib yam uas cov tib neeg dog dig ua tau lod? Yog koj twb ua tsis tau qhov ntawd, ces koj yeej tsis muaj lub siab uas txawj xav los sis qhov tsim nyog li. Cov uas tsis muaj lub siab uas txawj xav los sis qhov tsim nyog ntawd nkag puas tau mus rau hauv qhov tseeb? (Lawv yeej nkag tsis tau.) Qhov kev xyaum ua raws li qhov tseeb ntawd yog ib qho uas tsuas yog cov uas muaj lub siab uas txawj xav thiab qhov tsim nyog xwb thiaj li ua tau, thiab yog hais tias koj yuav caum qhov tseeb, mas yam tsawg kawg koj yuav tsum ua raws li tus qauv ntawm lub siab uas txawj xav thiab qhov tsim nyog nyob rau hauv koj tej lus hais thiab tej kev ua; koj yuav tsum muaj cov neeg uas nyob ib puag ncig koj pom tias koj ua tau siab ntev, thiab ua tau raws li txhua tus lub siab nyiam. Qhov ntawd yog yam uas peb nyuam qhuav hais tias: Yam tsawg kawg cia lwm tus pom hais tias koj tej kev ua mas zoo thiab txhim kho tau lawv. Qhov ua tus txhim kho ntawd puas zoo ib yam li qhov ua tus muaj txiaj ntsim rau lwm tus? Tsis zoo ib yam, tseeb tiag—qhov ua tus txhim kho ntawd yog ua tus paub hwm lwm tus qhov chaw, thiab tsis txhob tab kaum, cuam tshuam, los sis thab lawv xwb; qhov ntawd yog tsis txhob cia lawv raug kev puas tsuaj los sis txom nyem siab ntsws vim koj tus cwj pwm. Qhov ntawd yog qhov txhais hais tias ua tus txhim kho. Nej to taub qhov ntawd li cas? Qhov ua tus txhim kho ntawd tsis yog qhov koj muaj txiaj ntsim rau lwm tus npaum li cas; qhov ntawd yog qhov uas lawv muaj peev xwm siv tau tej uas lawv tus kheej ntshaw thiab muaj cai uas yeej yog lawv li, yam tsis muaj koj txoj kev txhob txwm thiab koj tus cwj pwm uas tsis zoo ntawd los cuam tshuam siv lawv thiab ua rau lawv poob. Tsis yog li ntawd lod? (Yog.) Tam sim no nej paub Vajtswv cov lus ob peb qho uas cuam tshuam rau Nws tej kev tim tsum txog tib neeg txoj kev coj kom zoo thiab tej kev ua lawm, tiam sis Kuv yeej tseem yuav tau qhia nej hais tias, yam uas tseem ceeb tshaj plaws yog qhov hais tias koj yuav tsum ua tus txhim kho lwm tus nyob rau hauv koj txoj kev coj kom zoo thiab tej kev ua. Qhov ntawd yog lub hauv paus ntsiab lus rau txoj kev ua. Koj twb to taub hais tias qhov ua tus neeg txhim kho ntawd yog dab tsi lawm lod? (To taub lawm.) Muaj ib txhia mas tsis xav txog seb lawv tej lus hais thiab txoj kev ua ntawd puas txhim kho tau lwm tus li, tiam sis lawv hais tias lawv yog cov tib neeg uas muaj kev kawm siab, thiab paub qab paub hau. Qhov ntawd tsis yog kev dag ntxias lod? Qhov ua tus txhim kho lwm tus nyob rau hauv txoj kev coj kom zoo thiab txoj kev ua ntawd—tsis muaj ib qho kev kawm uas yuav tau kawm los ntawm qhov ntawd lod? Tej zaum qhov ntawd yog ib qho kev qhia txog kev coj cwj pwm, tiam sis qhov ntawd puas yooj yim ua tau? Yog tib neeg to taub qhov tseeb me ntsis, mas lawv yuav paub tias yuav ua li cas es thiaj li mus raws li tej hauv paus ntsiab lus, yuav ua li cas es thiaj li txhim kho tau lwm tus, thiab yuav ua li cas es thiaj li muaj txiaj ntsim rau lwm tus. Yog tib neeg tsis to taub qhov tseeb, ces lawv yuav tsis paub tias yuav ua li cas; lawv tsuas ua tau raws li lawv tej kev xav phem thiab tej kev xav hauv nruab siab xwb. Ib txhia tib neeg mas yeej tsis nrhiav qhov tseeb nyob rau hauv lawv lub neej txhua hnub li, txawm yuav muaj dab tsi los raug rau lawv los xij. Lawv tsuas ua raws li lawv nyiam xwb, yam tsis quav ntsej tias qhov lawv ua ntawd yuav ua rau lwm tus xav li cas li. Puas muaj tej hauv paus ntsiab lus rau txoj kev ua uas zoo li no? Nej yuav tsum muaj peev xwm pom tias puas muaj, tsis yog lod? Nej txhua tus puav leej tuaj sib sau ua ke nyeem Vajtswv cov lus tas li; yog nej yeej muaj peev xwm to taub qhov tseeb me ntsis tiag tiag, mas nej yuav muaj peev xwm xyaum ua thiab ua tau qee yam hauj lwm raws li qhov tseeb tej hauv paus ntsiab lus. Qhov kev xyaum ua uas zoo li no ua rau koj xav li cas? Qhov kev xyaum ua uas zoo li no ua rau lwm tus xav li cas? Yog koj ua tib zoo xav, koj yuav paub hais tias hom kev xyaum ua twg uas txhim kho tau lwm tus. Feem ntau mas, thaum muaj ib yam dab tsi los raug rau nej, txawm yuav yog dab tsi los xij li, nej yeej tsis xav txog tej teeb meem tiag tiag tias yuav ua li cas es thiaj li mus raws li txoj kev ua neej los sis txoj kev xyaum ua qhov tseeb li. Yog li ntawd, thaum muaj ib yam dab tsi los raug rau nej, yog tib neeg nug nej hais tias hom kev xyaum ua twg los sis txoj kev ua twg es thiaj li yuav txhim kho tau lwm tus no mas, nej teb nyuaj heev, cuag nkaus li tsis muaj txoj hauv kev meej li. Txhua yam uas Kuv qhia txog nyob rau hauv tej kev sib txoos ua ke ntawd puav leej yog tej teeb meem uas nyob rau hauv lub neej tiag tiag no xwb, tiam sis thaum nej raug tej ntawd, nej yeej tsis muaj peev xwm ua raws li qhov Kuv qhia thiab nej pheej tsis muaj laj lim tswv yim li. Tsis muaj qhov txawv nyob rau ntawd lod? (Muaj.) Yog li, nej tau txais dab tsi los ntawm nej txoj kev ntseeg Vajtswv? Ob peb qho kev qhuab qhia, ob peb lo lus hais xwb. Cas nej yuav pluag thiab txaus hlub ua luaj!

Nyob rau hauv ib qho ntawm tej uas peb tau tham txog ntawd mas yog qee yam uas tib neeg suav nyob rau hauv lawv tej kev xav phem tias yog thiab zoo—qhov ua tus neeg muaj kev kawm siab thiab paub qab paub hau ntawd mas—muaj qee yam ntawm tib neeg tej kev xav phem thiab tej kev xav hauv nruab siab uas tshwj xeeb, nrog rau qee txoj kab lig kev cai uas tib neeg muaj txog txoj kev to taub tus cwj pwm no. Muab hais luv luv hais tias, tam sim no saib qhov kev coj tus cwj pwm no mas, peb pom hais tias qhov kev coj tus cwj pwm li no tsis muaj kev sib raug zoo nrog qhov tseeb los sis nrog cov tib neeg tiag tiag li. Qhov no yog vim tus cwj pwm ntawd ua tsis tau raws li qhov tseeb thiab tsis zoo li qhov tseeb, dhau ntawd, tus cwj pwm uas zoo li no yeej tsis raws li tus qauv ntawm Vajtswv tej kev tim tsum kom tib neeg saib tib neeg thiab txhua yam, nrog rau lawv txoj kev coj kom zoo thiab txoj kev ua li, uas tus cwj pwm ntawd yeej tsis muaj qhov kev sib haum thiab tsis muaj kev sib raug zoo li. Qhov ntawd tsuas yog tib neeg tus cwj pwm xwb. Txawm tib neeg yuav coj tus cwj pwm uas zoo li no zoo npaum li cas, thiab txawm lawv yuav xyaum coj tus cwj pwm ntawd kom txaus los xij, qhov ntawd tsuas yog ib qho kev coj tus cwj pwm xwb. Qhov ntawd twb tsis tsim nyog ua tus tib neeg dog dig tiag tiag. Nqe lus uas hais tias yus yuav tsum ua tus neeg muaj kev kawm siab thiab paub qab paub hau ntawd tsuas yog ib qho los ua kom tib neeg tus cwj pwm sab nraud zoo xwb. Qhov yuav ua kom lawv tus kheej zoo tiav log thiab ua rau lawv tus kheej zoo mas, tib neeg yuav tsum tau siv zog los ua ib tug neeg uas muaj kev kawm siab thiab paub qab paub hau, ua li ntawd mas lwm tus thiaj li qhuas thiab hwm lawv, thiab txhawb lawv qhov chaw thiab saib lawv pab pawg muaj nqis. Tiam sis qhov tseeb yog qhov hais tias tus cwj pwm uas zoo li no twb mus tsis txog qib ntawm txoj kev paub cais qhov zoo qhov phem, kev ncaj ncees, thiab lub meej mom uas ib tug neeg tiag tiag tsim nyog muaj li. Qhov ua tus neeg muaj kev kawm siab thiab paub qab paub hau ntawd yog ib nqe lus uas los ntawm txoj kab lis kev cai los, thiab nws yog ib qho kev coj tus cwj pwm uas cov tib neeg ntiaj teb uas qias vuab tsuab ntawd teeb tsa rau lawv tus kheej ua ib qho uas lawv ntseeg hais tias yuav tsum tau ua xwb. Cov kev coj tus cwj pwm no yog coj los txhawb qhov tib neeg sawv cev nyob rau hauv lawv pab pawg thiab kom lawv tsim nyog ntxiv, kom lwm tus thiaj li qhuas lawv thiab kom yog tus khov tshaj plaws ntawm txhua tus, kom tib neeg thiaj li yuav thuam tsis tau los sis thab tsis tau lawv pab pawg xwb. Tus cwj pwm sab nraud no yeej tsis muaj dab tsi cuam tshuam rau txoj kev paub cais qhov zoo qhov phem los sis qhov zoo ntawm txoj kev ua neej li, tiam sis tib neeg muab tus cwj pwm sab nraud ntawd saib siab heev thiab muab ntaus nqi hnyav heev. Nej tus kheej mam li saib seb nyob rau qhov ntawd muaj txoj kev dag ntxias ntau npaum li cas! Yog li ntawd, yog hais tias qhov koj tab tom caum tam sim no yog los ua ib tug neeg uas muaj kev kawm siab, paub qab paub hau, thiab koj tab tom tswj koj tus cwj pwm, siv zog rau koj txoj kev caum thiab xyaum ua mus rau lub hom phiaj uas ua tus neeg muaj kev kawm siab thiab paub qab paub hau ntawd xwb, ces Kuv thov kom koj tsum kiag tam sim no. Cov cwj pwm thiab cov tswv yim no tsuas ua rau koj zais koj tus kheej zuj zus ntxiv thiab ua rau koj ntsej muag ncaj siab nkhaus zuj zus ntxiv xwb, yog li ntawd thaum qhov ntawd tshwm sim lawm, koj yuav txav deb ntawm qhov ua ib tug neeg coj ncaj, ib tug neeg yooj yim, thiab qib siab lawm. Koj yim siv zog ua ib tug neeg uas muaj kev kawm siab, thiab paub qab paub hau, ces koj yim zais koj tus kheej xwb, thiab koj yim zais koj tus kheej—koj yim zais tob, ces lwm tus yim ntsuas los sis to taub koj nyuaj, thiab koj tus moj yam qias vuab tsuab yim yuav zais tob xwb. Ua li ntawd, mas qhov yuav tau txais qhov tseeb thiab txoj kev cawm dim ntawd nyuaj heev. Yog li ntawd, thaum xav txog tej no, txoj kev caum ua ib tug neeg uas muaj kev kawm siab, thiab paub qab paub hau ntawd puas zoo ib yam li txoj kev caum qhov tseeb? Qhov kev caum ntawd puas yog txoj kev caum uas tsim nyog? (Tsis yog.) Tsis muaj kev dag ntxias lwm tus thiab yus tus kheej nyob tom qab tus cwj pwm uas ua tus neeg muaj kev kawm siab thiab paub qab paub hau, uas nrug deb ntawm tus cwj pwm ntawd lub tseem ntsiab uas tsis zoo thiab tus cwj pwm ntawd tej txiaj ntsim uas tsis zoo lod? (Muaj.) Tus tib neeg uas muaj kev kawm siab thiab paub qab paub hau ntawd mas zais ntau yam kev zais uas hais tsis tau rau tom qab lawv tus kheej, thiab ntau tshaj tej ntawd yog, lawv zais txhua tus xeeb ceem ntawm tej kev xav uas yuam kev, tej kev xav phem, tej kev xam pom, tej cwj pwm, thiab tej tswv yim uas lwm tus tsis paub, uas tsis zoo, lwj liam, phem, thiab lwm tus yuav pom tias ntxim ntxub. Nyob tom qab ntawm tus tib neeg uas muaj kev kawm siab thiab paub qab paub hau ntawd tus cwj pwm zoo mas muaj lawv tus moj yam qias vuab tsuab zais nyob rau ntawd. Tus tib neeg uas zoo li no mas, dhau ntawm tus cwj pwm ntawd lawm, tsis muaj lub siab tawv los fim lawv tus moj yam qias vuab tsuab li, thiab lawv tsis muaj cuab kav los lees lawv tus moj yam qias vuab tsuab li. Thiab lawv yeej tseem tsis muaj lub siab tawv thiab cuab kav los qhia txog lawv tus moj yam qias vuab tsuab, txog lawv txoj kev paub uas ruam ruam, txog lawv tej kev xav, tej kev npaj siab, thiab tej hom phiaj uas phem—los sis haj tseem tsis kam qhia txog lawv tej kev xav uas muaj tshuaj lom, thiab lim hiam li thiab. Lawv muaj ntau yam zais nyob tom qab lawv nraub qaum, thiab tsis muaj leej twg pom tej ntawd li; yam uas tib neeg pom ces yog qhov hu ua “tus neeg zoo,” uas muaj tus cwj pwm zoo uas ua tus neeg muaj kev kawm siab thiab paub qab paub hau xwb. Qhov no tsis yog qhov dag ntxias lod? (Yog.) Tag nrho tus tib neeg ntawd tus cwj pwm, kev ua, kev caum, thiab lub ntsiab tseeb ces yog kev dag ntxias xwb. Lawv tab tom dag lwm tus, thiab lawv tab tom dag lawv tus kheej. Qhov kawg ntawm tus tib neeg uas zoo li no yuav zoo li cas? Qhov ua ib tug neeg uas muaj kev kawm siab, thiab paub qab paub hau ntawd, ua rau lawv tso Vajtswv tseg, tig lawv lub nraub qaum rau txoj kev tseeb, thiab raug Vajtswv ntxub thiab tsis kam txais yuav. Nyob rau hauv txhua lub ces kaum zais uas nyob tom qab tus neeg uas muaj kev kawm siab thiab paub qab paub hau ntawd tus cwj pwm zoo mas, tib neeg zais lawv tej txuj ci thiab tej cwj pwm uas zais thiab dag ntxias xwb, thiab thaum lawv ua li ntawd, lawv zais lawv tej moj yam uas khav theeb, phem, dhuav qhov tseeb, lim hiam, thiab tawv ncauj. Yog li ntawd, tib neeg yim muaj kev kawm siab thiab paub qab paub hau, ces lawv yim dag ntxias, thiab tib neeg yim siv zog los ua ib tug neeg uas muaj kev kawm siab thiab paub qab paub hau, ces lawv yim tsis nyiam qhov tseeb, thiab lawv yim yog tus uas dhuav qhov tseeb thiab Vajtswv cov lus xwb. Qhia Kuv seb, qhov ntawd tsis yog li ntawd lod? (Yog.) Tam sim no, cia peb xaus qhov peb kawm txog tus cwj pwm zoo ntawm tus neeg uas muaj kev kawm siab thiab paub qab paub hau rau ntawm no tso.

Nyuam qhuav no, peb kawm txog ib nqe lus uas hais txog tus cwj pwm zoo nyob rau hauv txoj kab lis kev cai uas hais tias: ua tus neeg muaj kev kawm siab thiab paub qab paub hau. Peb yuav tsis kawm ib leeg txog lwm yam. Yog ib pab pawg lawm, txhua nqe lus uas hais txog tus cwj pwm zoo ntawd tsuas yog ib txoj kev los ua kom tib neeg tus cwj pwm thiab tus yam ntxwv zoo tiav log xwb. “Ua kom zoo tiav log" yog ib sob lus hais los phim tus cwj pwm ntawd kom zoo; yog muab hais kom tseeb tseeb ces, qhov ntawd yog ib qho kev zais, yog ib txoj kev siv lub ntsej muag cuav los dag lwm tus kom muaj tej kev xav zoo txog yus tus kheej, yog dag lawv kom saib yus tus kheej mus rau qhov zoo, yog dag lawv kom hwm yus tus kheej xwb, hos sab tsaus nti ntawm yus lub siab, yus tej moj yam qias vuab tsuab, thiab yus lub ntsej muag tiag tiag mas muab zais thiab npog tag nrho zoo heev li. Tej zaum peb kuj ua li no thiab xws li: Yam uas zais nyob rau hauv qab qhov dawb huv ntawm cov cwj pwm zoo no mas yog cov ntsej muag tseeb uas qias vuab tsuab ntawm txhua tus tib neeg uas qias vuab tsuab ntag. Yam uas zais ntshis ntawd yog txhua tus tib neeg phem tus moj yam khav theeb, tus moj yam uas txawj dag, tus moj yam lim hiam, thiab tus moj yam uas dhuav qhov tseeb xwb. Yog tib neeg tus cwj pwm sab nraud yog qhov muaj kev kawm siab thiab paub qab paub hau, los sis paub tab thiab paub cai, thiab lawv siab dawb siab zoo, nyiam ua phooj ywg, hwm cov laus thiab saib xyuas cov hluas, los sis ua ib yam dab tsi uas zoo li no xwb, ces nws tsis tseem ceeb—txawm lawv yuav ua tej no qhov twg los xij, qhov ntawd tsuas yog ib tug cwj pwm sab nraud uas lwm tus pom xwb. Tus cwj pwm zoo ntawd yeej coj tsis tau lawv kom paub txog lawv tus yam ntxwv lub ntsiab tseeb li. Txawm tej cwj pwm sab nraud uas ua tus neeg muaj kev kawm siab thiab paub qab paub hau, paub tab thiab paub cai, nyiam ua phooj ywg, thiab siab dawb siab zoo ntawd ua rau saib zoo li tib neeg zoo, xws li tag nrho ntiaj teb tib neeg puav leej nyiam lawv los xij, yam uas tsis lees paub tsis tau ntawd yog qhov hais tias tib neeg tej moj yam qias vuab tsuab yeej raug cov cwj pwm zoo no muab npog lawm tiag tiag li. Tib neeg txoj kev dhuav qhov tseeb, lawv txoj kev tawm tsam thiab kev ntxeev siab rau Vajtswv, lawv tus yam ntxwv lub ntsiab tseeb uas dhuav cov lus hais los ntawm tus Tswv Tsim, thiab tawm tsam tus Tswv Tsim—tej no yeej muaj nyob ntawd tiag tiag. Yeej tsis muaj ib qho cuav txog qhov ntawd li. Txawm tib neeg yuav ua cuav npaum li cas, txawm lawv cov cwj pwm yuav siv tau los sis tsim nyog npaum li cas, txawm lawv yuav npog lawv tus kheej zoo los sis zoo nkauj npaum li cas, los sis lawv yuav txawj dag npaum li cas los xij, yam uas tsis lees paub tsis tau ntawd yog qhov hais tias txhua tus tib neeg uas qias vuab tsuab puav leej muaj tus moj yam phem. Nyob rau hauv qab daim ntaub npog cov cwj pwm sab nraud no mas, lawv tseem tawm tsam thiab ntxeev siab rau Vajtswv, tawm tsam thiab ntxeev siab rau tus Tswv Tsim thiab. Vim muaj cov cwj pwm zoo no ua lawv lub tsho hnav thiab ua qhov npog lawv, tib neeg ntiaj teb thiaj li nthuav tej moj yam qias vuab tsuab tawm txhua hnub, txhua teev thiab txhua sij hawm, txhua feeb thiab txhua lub sij hawm, nyob rau hauv txhua txoj hauj lwm, thaum lawv ua neej nrog tej moj yam qias vuab tsuab thiab txoj kev txhaum ntawd. Qhov no yog ib qho tseeb. Tab txawm tib neeg muaj tej cwj pwm uas siv tau, cov lus zoo, thiab tej kev ua cuav sab nraud los xij, lawv tus moj yam qias vuab tsuab yeej tsis tau txo qi me ntsis li, thiab tus moj yam qias vuab tsuab ntawd tsis tau hloov pauv kiag li vim lawv cov cwj pwm sab nraud ntawd. Tiam sis, nws yog vim lawv muaj qhov npog cov cwj pwm zoo sab nraud no es lawv tus moj yam qias vuab tsuab thiaj li nthuav tawm tuaj tas li, thiab lawv yeej tsis tseg lawv tej kev mus rau txoj kev ua phem thiab kev tawm tsam Vajtswv li—yog li ntawd thaum raug lawv tej moj yam lim hiam thiab phem ntawd tswj kav lawm, lawv tej hom phiaj, tej kev ntshaw, thiab tej kev tim tsum uas ntau heev ntawd thiaj li nthuav dav thiab loj zuj zus tuaj. Qhia Kuv seb, tus tib neeg uas paub kev paub cai, siab dawb saib zoo, nyiam ua phooj ywg uas nws ua neej raws li tus yam ntxwv thiab nws lub hauv paus rau nws txoj kev coj kom zoo thiab tej kev ua ntawd mas yog qhov zoo thiab mus raws li Vajtswv cov lus, thiab qhov tseeb ntawd dua twg lawm? Tus tib neeg uas muaj kev kawm siab, paub qab paub hau, paub tab, thiab paub cai uas nyiam qhov tseeb, uas txaus siab hlo los nrhiav txoj hauv kev thiab lub hom phiaj ntawm lawv lub neej nyob rau hauv Vajtswv cov lus, uas tau pab txoj kev cawm tib neeg ntiaj teb ntawd dua twg lawm? Koj nrhiav puas tau ib tug neeg zoo li no? (Tsis tau.) Qhov tseeb yog qhov hais tias nyob rau ntawm tib neeg ntiaj teb mas, tib neeg yim muaj kev paub; ces lawv yim muaj kev kawm xwb; thiab lawv yim muaj tswv yim, meej mom, thiab muaj koob muaj npe—ces qhov lawv sau ntawv tawm ntawd yim dag tib neeg, thiab lawv yim ua kev phem, thiab lawv txoj kev tawm tsam Vajtswv yim loj xwb—txawm tib neeg yuav hu lawv ua tus neeg uas muaj kev kawm siab thiab paub qab paub hau, siab dawb siab zoo, thiab nyiam ua phooj ywg los xij. Cov uas yim muaj koob muaj npe thiab meej mom loj ces yim dag lwm tus loj, thiab yog cov uas yim phem txog lawv txoj kev tawm tsam Vajtswv xwb. Saib thoob plaws mus rau cov tib neeg uas nrov koob nrov npe, cov tib neeg zoo, cov xav, cov qhia, cov sau ntaub sau ntawv, cov hloov pauv, cov muaj kev txawj kev ntse, los sis cov uas lwm tus qhuas zoo li no—lawv cov ntawd leej twg thiaj li tsis muaj kev kawm siab thiab paub qab paub hau, nyiam ua phooj ywg, thiab siab dawb siab zoo? Lawv cov ntawd leej twg thiaj li tsis coj tus cwj pwm nyob rau sab nraud kom lwm tus qhuas thiab kom tsim nyog lwm tus hwm? Txawm li ntawd los xij, qhov tseeb tiag lawm, yam uas lawv tau pab tib neeg ntiaj teb ntawd yog dab tsi? Lawv puas tau coj tib neeg ntiaj teb mus rau txoj kev yog, los yog lawv coj tib neeg ntiaj teb mus yuam kev xwb? (Mus yuam kev xwb.) Lawv puas tau coj tib neeg ntiaj teb nyob rau hauv tus Tswv Tsim txoj kev tswj fwm, los yog lawv coj tib neeg ntiaj teb nyob rau hauv qab Ntxwgnyoog xib taws xwb? (Nyob rau hauv qab Ntxwgnyoog xib taws xwb.) Lawv puas tau cia tib neeg ntiaj teb muaj feem tau txais lub hwj chim kav, kev pab cuam, thiab kev coj qhia ntawm tus Tswv Tsim, los yog lawv cia tib neeg ntiaj teb raug Ntxwgnyoog tsuj, ua lim hiam, thiab ua phem rau xwb? Tag nrho cov tib neeg tseem ceeb uas muaj peev xwm, nrov koob nrov npe, zoo, nyob rau qib siab, zoo tshaj plaws, thiab muaj hwj chim tso cai rau lwm tus ntawm keeb kwm ntawd, yam twg ntawm lawv lub hwj chim thiab lub meej mom uas tsis yog tau los ntawm qhov tua tib neeg pua pua txhiab leej xwb? Yam twg ntawm lawv lub koob lub npe uas tsis yog tau txais los ntawm lawv txoj kev coj tsis ncaj, kev dag, thiab kev ntxias tib neeg ntiaj teb? Nyob rau sab nraud mas, zoo li lawv nyiam ua phooj ywg nrog cov tib neeg uas lawv ntsib txhua hnub, thiab nyiam yooj yim, muab lawv tus kheej saib vaj huam sib luag li lwm tus thiab hais lus mos lus muag xwb—tiam sis yam lawv ua uas tsis muaj neeg pom mas txawv tag nrho li. Lawv ib txhia mas npaj cuab lwm tus; ib txhia siv tswv yim dag kom tab kaum thiab rhuav tshem tau lwm tus; hos lwm tus nrhiav lub hwv tsam los ua pauj xwb. Cov muaj kev txawj kev ntse feem coob mas lim hiam thiab rhuav tshem tib neeg yam suav tsis txheeb li. Lawv tau lawv lub meej mom thiab lub hwj chim los ntawm qhov lawv ob txhais ko taw tsuj khov kho rau saum tib neeg lub taub hau thiab tib neeg cov ntshav yam suav tsis txheeb li, tiam sis nyob rau sab nraud mas, yam uas tib neeg pom yog lawv tus xeeb ceem uas nyiam ua phooj ywg thiab tus cwj pwm siab dawb siab zoo xwb. Yam uas tib neeg pom ces yog qhov paub tab thiab paub cai, muaj kev kawm siab thiab paub qab paub hau, thiab tus neeg tseem ceeb uas lawv nthuav tawm xwb. Nyob rau sab nraud mas, lawv paub kev paub cai thiab paub tab thiab paub cai, tiam sis nyob tom qab qhov ntawd mas, lawv tua tib neeg yam suav tsis txheeb, txeeb tib neeg tej cuam tiam yam suav tsis txheeb, tswj kav thiab muab tib neeg siv ua si yam suav tsis txheeb li. Lawv hais txhua lo lus zoo hos ua txhua yam phem, thiab lawv nyob ntawm lawv qhov chaw qhuab ntuas, qhia lwm tus tias yuav ua cov tib neeg uas nyiam ua phooj ywg, muaj kev kawm siab thiab paub qab paub hau li cas, yuav ua cov tib neeg uas pab lub teb lub chaw thiab tib neeg ntiaj teb li cas, yuav ua dej num rau tib neeg thiab ua cov tib neeg ua dej num rau cov pej xeem li cas, yuav muab lawv tus kheej ua dej num rau haiv neeg li cas yam tsis paub txaj muag li. Qhov ntawd tsis yog qhov tsis txaj muag lod? Muaj qhov muaj cuab kav, thiab ua phem tsis txaus ntawd ntau heev! Muab hais luv luv hais tias, qhov ua ib tug neeg uas muaj tus cwj pwm zoo uas ua raws li tej kev xav phem ntawm txoj kev paub cais qhov zoo qhov phem uas ib txwm muaj ntawd mas tsis yog los caum qhov tseeb; qhov ntawd tsis yog txoj kev los ua ib tug neeg uas raug tsim tawm los tiag tiag. Tiam sis, ntau yam kev zais uas tsaus ntuj nti thiab hais tsis tau ntawd zais nyob rau tom qab txoj kev caum cov cwj pwm zoo no. Txawm tib neeg yuav caum hom cwj pwm zoo twg los xij, lub hom phiaj uas nyob tom qab qhov kev caum ntawd ces yog kom tib neeg hlub thiab hwm, kom lawv muaj meej mom tuaj, thiab ua kom tib neeg xav hais tias yuav tau hwm lawv thiab tsim nyog tso siab rau lawv thiab tes hauj lwm uas lawv ua xwb. Yog koj caum qhov ua ib tug neeg uas coj zoo zoo li no xwb, ces qhov no tsis zoo ib yam li cov uas nrov koob nrov npe thiab zoo ntawd lod? Yog koj tsuas yog ib tug tib neeg uas coj zoo xwb, tiam sis tsis nyiam Vajtswv txoj lus thiab tsis lees txais qhov tseeb, ces koj zoo ib yam nkaus li lawv ntag. Yog li ntawd qhov tshwm sim thaum kawg yog dab tsi? Qhov uas koj tau muab tso tseg ntawd yog qhov tseeb; qhov uas koj tau muab ua plam lawm ntawd yog koj lub hwv tsam uas los tau txoj kev cawm dim. Tus cwj pwm no yog tus cwj pwm uas ruam tshaj plaws—nws yog ib tug tib neeg ruam txoj kev xaiv thiab txoj kev caum xwb. Nej puas txeev xav kom nej yog tus tib neeg zoo, nrov koob nrov npe, tus luag nyiam tshaj plaws nyob rau saum sam thiaj, uas nej qhuas los ntev lawm? Tus tib neeg uas siab dawb siab zoo thiab nyiam ua phooj ywg ntawd lod? Tus tib neeg uas paub kev paub cai, paub tab thiab paub cai, muaj kev kawm siab thiab paub qab paub hau ntawd lod? Tus tib neeg uas nyob rau sab nraud mas zoo li nyiam ua phooj ywg thiab ntxim hlub ntawd los? Nej puas tau tsis raws qab thiab pe hawm cov tib neeg zoo li no dua li? (Tau.) Yog tam sim no koj tseem raws cov tib neeg zoo li no qab, tseem nyiam cov tib neeg zoo li no, ces cia Kuv qhia koj hais tias: Koj twb ze kev tuag lawm, vim cov tib neeg uas koj nyiam ntawd yog cov tib neeg phem uas ua txuj ua zoo xwb. Vajtswv yuav tsis cawm cov tib neeg phem. Yog koj nyiam cov tib neeg phem thiab tsis lees txais qhov tseeb, ces thaum kawg koj yuav raug rhuav tshem ib yam nkaus thiab.

Lub ntsiab tseeb uas nyob tom qab tus cwj pwm zoo xws li ua tus neeg nyiam ua phooj ywg thiab siab dawb siab zoo ntawd tuaj yeem muab hais tau ua ib lo lus hais tias: ua txuj. Tus cwj pwm zoo uas zoo li no tsis yog tawm los ntawm Vajtswv cov lus los, thiab tsis yog ib qho txiaj ntsim ntawm txoj kev xyaum ua raws li qhov tseeb los sis txoj kev ua raws li lub hauv paus ntsiab lus. Yog li ntawd dab tsi ua rau muaj tus cwj pwm ntawd? Tus cwj pwm ntawd los ntawm tib neeg tej kev muaj siab, kev dag ntxias, ntawm qhov lawv ua txuj, lam ua, thiab ua tus neeg txawj dag los. Thaum tib neeg ua raws li cov cwj pwm zoo no lawm, lub hom phiaj ces yog kom tau tej uas lawv xav tau xwb; yog tsis li ntawd, lawv yeej yuav tsis ua rau lawv tus kheej li no, thiab tsis ua neej raws li lawv tus kheej tej kev ntshaw li. Qhov tsis ua neej raws li lawv tus kheej tej kev ntshaw ntawd, txhais li cas? Qhov ntawd txhais hais tias lawv tus yam ntxwv tseeb tsis coj zoo, tsis muaj kev txhaum, paub tab, siab zoo, thiab tsim txiaj li tib neeg xav. Lawv tsis ua neej raws li lub siab uas txawj xav thiab qhov kev paub; tiam sis, lawv ua neej kom tau raws li qee lub hom phiaj los sis qhov kev tim tsum xwb. Tib neeg tus yam ntxwv tseeb yog dab tsi? Nws yog tsis meej pem thiab tsis paub dab tsi li xwb. Yog tsis muaj cov kev cai thiab cov lus txib uas Vajtswv tau muab los, ces ntshe tib neeg yuav tsis paub tias kev txhaum yog dab tsi li. Qhov no tsis yog qhov uas tib neeg ntiaj teb txeev zoo li no lod? Tsuas yog thaum Vajtswv tsim cov kev cai thiab cov lus txib ntawd lawm xwb tib neeg thiaj li muaj qee qhov kev paub txog kev txhaum. Tiam sis lawv yeej tseem tsis muaj kev paub txog qhov yog thiab qhov tsis yog, los sis qhov zoo thiab qhov tsis zoo. Yog li ntawd, thaum zoo li no lawm, lawv yuav ua li cas paub txog tej hauv paus ntsiab lus uas yog rau txoj kev hais lus thiab kev ua? Lawv puas paub tias txoj kev ua twg, cov cwj pwm zoo twg, uas yuav pom nyob rau hauv txoj kev ua neej? Lawv puas paub tias dab tsi ua rau muaj tus cwj pwm zoo tiag tiag, hom kev twg uas lawv yuav tsum tau ua los ua neej kom zoo nkaus li tib neeg? Lawv tsis paub. Vim tib neeg tus yam ntxwv phem, vim lawv tej kev xav, lawv thiaj li tsuas tuaj yeem ua txuj thiab lam ua neej kom tsim nyog, thiab muaj meej mom xwb—uas yog qhov uas ua rau muaj tej kev dag ntxias xws li ua tus neeg muaj kev kawm siab thiab paub qab paub hau, paub tab thiab paub cai, paub kev paub cai, hwm cov laus thiab saib xyuas cov hluas, thiab ua tus neeg siab dawb siab zoo thiab nyiam ua phooj ywg ntawd; yog li ntawd tej kev dag ntxias thiab tej tswv yim dag no thiaj li tshwm tuaj. Thiab thaum tej ntawd tshwm tuaj lawm, tib neeg cia li xaiv ua raws li ib qho los sis ntau qhov ntawm tej kev dag ntxias no lawm. Ib txhia xaiv los ua tus neeg siab dawb siab zoo thiab nyiam ua phooj ywg, ib txhia xaiv los ua tus neeg uas muaj kev kawm siab thiab paub qab paub hau, paub tab thiab paub cai, ib txhia xaiv los ua tus neeg paub kev paub cai, hwm cov laus thiab saib xyuas cov hluas, hos ib txhia xaiv los ua tag nrho tej no. Txawm li ntawd los Kuv muab cov tib neeg uas muaj cov cwj pwm zoo no ua tib lo hais xwb. Lo ntawd hais li cas? “Cov pob zeb du lug.” Cov pob zeb du lug ntawd yog dab tsi? Nws yog cov pob zeb du lug uas nyob rau hauv dej uas raug dej ntws los muab txhuam thiab muab txhij ua kom ntse los tau ntev xyoo lawm. Yog li ntawd txawm lawv yuav tsis raug mob thaum tsuj cov pob zeb ntawd los xij, yog tsis ceev faj tib neeg tuaj yeem npleem ko taw rau ntawm cov pob zeb ntawd. Cov pob zeb no mas zoo nkauj heev, tiam sis thaum koj muab cov pob zeb no nqa los tsev lawm, cov pob zeb no siv tsis tshua tau dab tsi li. Koj tsis kam muab cov pob zeb ntawd pov tseg, tiam sis qhov muab cov pob zeb ntawd khaws cia kuj tsis zoo dab tsi li thiab—qhov ntawd yog “lub pob zeb uas du lug.” Nyob li ntawm Kuv mas, cov tib neeg uas muaj cov cwj pwm zoo no yog cov sov sem so xwb. Lawv ua txuj ua zoo nyob rau sab nraud, tiam sis tsis lees txais qhov tseeb kiag li, lawv hais tej yam zoo zoo, tiam sis tsis ua ib yam dab tsi tiag tiag li. Lawv tsuas yog cov pob zeb du lug xwb. Yog koj qhia qhov tseeb thiab tej hauv paus ntsiab lus rau lawv, mas lawv tham txog qhov ua tus neeg paub tab thiab paub cai, thiab paub kev paub cai rau koj xwb. Yog koj hais rau lawv txog kev thoob tsib to nrog txog cov Khetos cuav, mas lawv tham txog kev hwm cov laus thiab kev saib xyuas cov hluas, thiab qhov ua tus neeg muaj kev kawm siab thiab paub qab paub hau rau koj xwb. Yog koj qhia lawv hais tias yuav tsum muaj tej hauv paus ntsiab lus rau lawv txoj kev coj kom zoo, tias lawv yuav tsum nrhiav tej hauv paus ntsiab lus uas nyob rau hauv lawv tes dej num es tsis txhob txhob txwm ua no, lawv tus cwj pwm yuav zoo li cas? Lawv yuav hais tias, “Qhov ua raws li qhov tseeb tej hauv paus ntsiab lus ntawd yog dua ib qho lawm. Kuv tsuas xav ua tus neeg muaj kev kawm siab thiab paub qab paub hau, thiab kom lwm tus nyiam kuv tej kev ua xwb. Tsuav kuv hwm cov laus thiab saib xyuas cov hluas, thiab lwm tus tib neeg nyiam xwb, ces txaus lawm.” Lawv tsuas quav ntsej txog cov cwj pwm zoo xwb, lawv tsis mob siab rau qhov tseeb li. Feem ntau lawv yeej hwm cov neeg laus, lawv cov txwj laug, cov uas muaj qhov tsim nyog, cov uas muaj lub meej mom thiab lub koob lub npe zoo nyob rau hauv lawv pab pawg, thiab kuj saib xyuas zoo, hlub tshua txog tsoom tub ntxhais hluas thiab cov neeg uas tsis muaj zog thiab. Lawv ua raws li txoj kev cai ntawm zej tsoom sawv daws uas hwm cov laus thiab saib xyuas cov hluas yam nruj heev kom qhia tau tias lawv tus kheej yog cov neeg qib siab. Qhov uas tsis lees paub tsis tau ntawd yog qhov hais tias thaum lawv tej kev ntshaw thiab txoj kev cai ntawd los sib cov nyom lawm, mas lawv muab txoj kev cai ntawd tso tseg thiab mus lawm, maj nroos yam tsis pub leej twg txwv lawv tej kev ntshaw li. Txawm lawv tus cwj pwm zoo ua rau txhua tus uas lawv ntsib, lawv swm, los sis lawv paub ntawd nyiam los xij, qhov uas tsis lees paub tsis tau ntawd yog qhov hais tias tab txawm thaum lawv coj cov cwj pwm zoo no es ua rau lwm tus qhuas los xij, lawv yeej tsis cia lawv tus kheej tej kev ntshaw ib qho me me plam mus li, thiab lawv ua txhua yam kom tau raws li lawv tej kev ntshaw yam tsis pub leej twg txwv li. Qhov lawv hwm cov laus thiab saib xyuas cov hluas ntawd tsuas yog ib tug cwj pwm uas nyob ib ntus, uas ua los ntawm qhov tsis cuam tshuam rau lawv tus kheej tej kev ntshaw xwb. Tus yam ntxwv ntawd ua muaj ciaj ciam. Lawv ua tau li ntawd nyob rau qhov uas tsis kov txog los sis tsis tawm tsam txog lawv tej kev ntshaw kiag li xwb, tiam sis thaum lawv tej kev ntshaw yog qhov tseem ceeb lawm, ces tej kev ntshaw ntawd yog tej uas lawv yuav ua kom tau nyob rau thaum kawg ntag. Yog li ntawd, qhov tseeb tiag, qhov lawv hwm cov laus thiab saib xyuas cov hluas ntawd tsis cuam tshuam rau lawv txoj kev caum lawv tej kev ntshaw, thiab tsis txwv txoj kev caum ntawd li. Tus cwj pwm uas hwm cov laus thiab saib xyuas cov hluas ntawd yog ib tug cwj pwm zoo uas tib neeg tsuas coj nyob rau qee lub sij hawm, qee qhov xwm txheej uas tsis cuam tshuam rau lawv tej kev ntshaw xwb. Qhov ntawd tsis yog ib yam uas tawm hauv tib neeg lub neej, thiab hauv lawv cov pob txha tuaj. Txawm tib neeg yuav coj tau tus cwj pwm zoo li no npaum li cas, txawm lawv yuav coj tau tus cwj pwm no ntev npaum li cas los xij, qhov ntawd hloov tsis tau tej moj yam qias vuab tsuab uas tib neeg vam khom los ua neej li. Qhov no txhais hais tias txawm qee tus tib neeg yuav tsis muaj tus cwj pwm zoo no los xij, lawv puav leej nthuav tej moj yam qias vuab tsuab ntawd tawm tuaj ib yam nkaus—tiam sis thaum lawv coj tau tus cwj pwm zoo no lawm, lawv tej moj yam qias vuab tsuab yeej tsis zoo tuaj los sis hloov pauv ib qho me me li. Tiam sis, lawv muab tej moj yam qias vuab tsuab ntawd zais tob zuj zus xwb. Tej no yog tej tseem ceeb uas zais nyob tom qab ntawm cov cwj pwm zoo no.

Qhov peb kawm thiab tshuaj xyuas txog cov cwj pwm zoo ntawm txoj kab lis kev cai uas ua tus neeg paub tab thiab paub cai, paub kev paub cai, hwm cov laus thiab saib xyuas cov hluas, siab dawb siab zoo, thiab nyiam ua phooj ywg ntawd ces tag li no xwb. Tej ntawd zoo li qhov ua tus neeg muaj kev kawm siab thiab paub qab paub hau xwb, thiab yog tib lub ntsiab tseeb tsis ntau los tsawg. Tej ntawd tsis tseem ceeb li. Tib neeg yuav tsum muab cov cwj pwm zoo no tso tseg. Yam uas tib neeg yuav tsum siv zog ua kom tiav tshaj plaws ntawd yog muab Vajtswv cov lus los ua lawv lub hauv pauv, thiab muab qhov tseeb ua lawv tus qauv; tsuas yog thaum ntawd xwb lawv thiaj li ua tau neej nyob rau hauv txoj kev kaj thiab ua neej zoo li ib tug tib neeg dog dig. Yog koj xav ua neej nyob rau hauv txoj kev kaj, koj yuav tsum ua raws li qhov tseeb; koj yuav tsum ua ib tug tib neeg coj ncaj uas hais lus ncaj thiab ua txhua yam kom ncaj. Qhov uas tseem ceeb yog muaj qhov tseeb tej hauv paus ntsiab lus nyob rau hauv yus txoj kev coj kom zoo; thaum tib neeg tsis muaj qhov tseeb tej hauv paus ntsiab lus, thiab tsuas mob siab rau tus cwj pwm zoo lawm xwb, ces qhov no yeej yuav ua rau muaj txoj kev dag thiab kev ua txuj. Yog tsis muaj lub hauv paus ntsiab lus rau tib neeg txoj kev coj kom zoo, ces txawm lawv tus cwj pwm yuav zoo npaum li cas los xij, lawv yog cov neeg ntsej muag ncaj siab nkhaus xwb; tej zaum lawv yuav muaj peev xwm dag tau lwm tus li ib lub sij hawm, tiam sis yeej yuav tsis muaj leej twg tso siab rau lawv li. Tsuas yog thaum tib neeg ua thiab coj lawv tus kheej kom zoo raws li Vajtswv cov lus lawm xwb mas lawv thiaj li muaj ib lub hauv paus tiag tiag. Yog lawv tsis coj lawv tus kheej kom zoo raws li Vajtswv cov lus, thiab tsuas yog mob siab rau txoj kev ua txuj coj kom zoo xwb no, lawv puas tuaj yeem ua tau cov tib neeg zoo? Yeej tsis tau li. Tej kev qhuab qhia uas zoo thiab tus cwj pwm zoo yeej hloov tsis tau tib neeg tej moj yam qias vuab tsuab, thiab tej ntawd yeej hloov tsis tau lawv lub ntsiab tseeb li. Tsuas yog qhov tseeb thiab Vajtswv cov lus xwb thiaj li hloov tau tib neeg tej moj yam qias vuab tsuab, tej kev xav, thiab tej kev xam pom, thiab dhau los ua lawv lub neej. Tej cwj pwm zoo nyob rau hauv lawv txoj kab lis kev cai thiab lawv tej kev xav phem uas tib neeg suav hais tias zoo, xws li ua tus neeg muaj kev kawm siab thiab paub qab paub hau, paub tab thiab paub cai, paub kev paub cai, hwm cov laus thiab saib xyuas cov hluas, ua tus neeg siab dawb siab zoo, ua tus neeg nyiam ua phooj ywg ntawd, tsuas yog cov cwj pwm xwb. Tej ntawd tsis yog txoj sia, thiab haj yam tsis yog qhov tseeb. Txoj kab lis kev cai tsis yog qhov tseeb, thiab tej cwj pwm zoo uas txoj kab lis kev cai ntawd txhawb nqa los yeej tsis yog li thiab. Txawm tib neeg yuav to taub txoj kab lis kev cai ntau npaum li cas thiab txawm lawv yuav coj tau cov cwj pwm zoo ntawd ntau npaum li cas nyob rau hauv lawv lub neej los xij, qhov ntawd yeej hloov tsis tau lawv tej moj yam qias vuab tsuab li. Yog li ntawd, tib neeg ntiaj teb raug txoj kab lis kev cai ntawd cob qhia tau ntau txhiab xyoo lawm, es lawv tus moj yam qias vuab tsuab thiaj li tsis tau hloov pauv kiag li; tiam sis, lawv txoj kev qias vuab tsuab mas tob dua tuaj, thiab lub ntiaj teb tsaus ntuj dua tuaj thiab phem dua tuaj xwb. Qhov no yog cuam tshuam ncaj qha rau txoj kab lis kev cai ntawd txoj kev qhia ntag. Tsuas yog muab Vajtswv cov lus los ua lawv txoj sia xwb mas tib neeg thiaj li yuav ua tau lawv lub neej li cov tib neeg tiag tiag. Qhov no yeej muaj tseeb. Yog li ntawd, hom qauv thiab hom kev tim tsum twg uas Vajtswv cov lus teeb tseg rau tib neeg tus cwj pwm? Dhau ntawm yam uas tau tsim nyob rau hauv cov kev cai thiab cov lus txib lawm, kuj muaj tus Tswv Yexus tej kev tim tsum txog tib neeg tus cwj pwm thiab, tshwj xeeb yog tej kev tim tsum thiab cov kev cai rau tib neeg coj uas nyob rau hauv Vajtswv txoj kev txiav txim ntawm tiam kawg. Raws li tib neeg ntiaj teb paub mas, cov lus no yog cov lus uas muaj nuj nqis tshaj plaws, thiab cov lus no yog tej hauv paus ntsiab lus uas tseem ceeb tshaj plaws rau tib neeg ntiaj teb coj kom zoo. Nej yuav tsum nrhiav tus qauv coj tus cwj pwm uas tseem ceeb tshaj plaws rau nej txoj kev coj kom zoo thiab txoj kev ua nyob rau hauv Vajtswv cov lus. Thaum nej ua li ntawd, nej yuav muaj peev xwm muab nej tus kheej tshem tawm ntawm cov neeg Suav txoj kab lis kev cai cov cwj pwm zoo txoj kev coj mus yuam kev thiab lub tswv yim dag. Ces tom qab ntawd nej yuav nrhiav tau txoj hauv kev thiab tej hauv paus ntsiab lus txog txoj kev coj kom zoo thiab txoj kev ua, uas kuj txhais tau hais tias nej yuav nrhiav tau txoj hauv kev thiab tej hauv paus ntsiab lus ntawm txoj kev cawm dim thiab. Yog nej muab Vajtswv cov lus tam sim no los ua nej lub hauv paus thiab qhov tseeb, es siv cov lus ntawd los hloov cov qauv rau tus cwj pwm zoo ntawd, uas yog tib neeg ntiaj teb lawm, nyob rau hauv lawv tej kev xav phem, yeej yuav ua li ntawd, ces koj yog ib tug uas tab tom caum qhov tseeb ntag. Vajtswv tej kev tim tsum txog tib neeg mas puav leej yog qhov seb lawv tsim nyog ua hom tib neeg twg thiab txoj kev twg uas lawv tsim nyog taug. Nws yeej tsis tim tsum kom tib neeg yuav tsum muaj qee tus cwj pwm nkaus xwb. Nws tim tsum kom tib neeg ua cov tib neeg coj ncaj, tsis txhob ua cov tib neeg dag; Nws tim tsum kom tib neeg lees txais qhov tseeb thiab caum qhov tseeb, thiab ua siab ncaj ncees rau Nws, thiab mloog lus, thiab ua tim khawv rau Nws. Nws yeej tsis tau tim tsum kom tib neeg tsuas muaj ob peb tug cwj pwm xwb, ces qhov ntawd zoo lawm. Tiam sis lub teb chaws Suav txoj kab lis kev cai mas kom tib neeg mob siab rau tus cwj pwm zoo, thiab mob siab rau qhov coj zoo nyob rau sab nraud nkaus xwb. Txoj kab lis kev cai ntawd tsis ua ib yam dab tsi los qhia kom pom tias tib neeg tej moj yam qias vuab tsuab ntawd yog dab tsi los sis lawv txoj kev qias vuab tsuab ntawd pib nyob rau qhov twg li, thiab txoj kab lis kev cai ntawd haj yam tsis muaj peev xwm qhia tau txoj hauv kev uas lawv tej moj yam qias vuab tsuab muab tso pov tseg lawm. Yog li ntawd, txawm txoj kab lis kev cai yuav txhawb kom tib neeg yuav tsum muaj cov cwj pwm zoo twg los xij, thaum hais txog qhov tib neeg ntiaj teb muab lawv tej moj yam qias vuab tsuab tso pov tseg thiab ua lawv lub neej kom zoo li cov tib neeg tiag tiag mas, qhov ntawd tsis muaj txiaj ntsim li. Txawm txoj kab lis kev cai cov nqe lus uas hais txog txoj kev paub cais qhov zoo qhov phem ntawd yuav siab los sis ua rau tib neeg nyiam npaum li cas los xij, txoj kab lis kev cai ntawd yeej ua tsis tau ib yam dab tsi los hloov tib neeg ntiaj teb lub ntsiab tseeb uas qias vuab tsuab li. Vim txoj kab lis kev cai ntawd txoj kev qhia thiab kev ntxias mas, es thiaj li muaj ntau yam hauv nruab siab nruab ntsws tau tshwm sim nyob rau hauv cov tib neeg ntiaj teb uas qias vuab tsuab ntawd. Qhov hais tias “nruab siab nruab ntsws” ntawd txhais li cas nyob rau ntawm no? Qhov ntawd txhais hais tias thaum tib neeg raug txoj kab lis kev cais qhia thiab cuam tshuam me ntsis, uas ua rau tsis muaj ib lo lus tseeb, ib nqe lus, ib txoj kev cai, los sis ib qho kev paub tias yuav ua li cas es thiaj li tsim nyog lawm, ces lawv cia li xyaum ua thiab ua raws li tib neeg feem coob tej tswv yim thiab tej kev ua lawm xwb. Thaum ua neej nyob rau cov xwm txheej zoo li no, nyob rau qhov zoo li no lawm, ces lawv cia li xav hauv lawv nruab siab nruab ntsws hais tias, “Qhov ua tus neeg muaj kev kawm siab thiab paub qab paub hau ntawd mas zoo heev—qhov ntawd yog qhov zoo, thiab qhov ntawd mus raws li qhov tseeb; qhov ua tus neeg paub tab thiab paub cai ntawd mas zoo heev—qhov ntawd yog qhov uas tib neeg yuav tsum ua, Vajtswv nyiam qhov ntawd, thiab qhov ntawd mus raws li qhov tseeb; qhov ua tus neeg paub kev paub cai, hwm cov laus thiab saib xyuas cov hluas, siab dawb siab zoo, thiab nyiam ua phooj ywg ntawd puav leej yog ua los ntawm cov tib neeg dog dig—tej ntawd mus raws li Vajtswv cov lus thiab qhov tseeb.” Txawm nrhiav tsis tau ib lub hauv paus meej nyob rau hauv Vajtswv cov lus li los xij, lawv xav hauv lawv lub siab hais tias Vajtswv cov lus thiab tej kev tim tsum ntawm tib neeg thiab tej qauv uas txoj kab lis kev cai tim tsum ntawd mas zoo ib yam nkaus xwb, tsis muaj ib qho loj tshaj ib qho li. Qhov no tsis yog ib qho kev ntxeev ntxias thiab kev txhab txhais cuav txog Vajtswv cov lus lod? Vajtswv cov lus puas hais tej yam zoo li no? Cov lus ntawd tsis hais, thiab cov lus ntawd tsis yog cov uas Nws yuav hais; tej ntawd yog tib neeg tej kev ntxeev ntxias thiab tej kev txhab txhais cuav txog Vajtswv cov lus xwb. Vajtswv cov lus yeej tsis hais tej no li, yog li ntawd yam uas nej yuav tsum tau ua ces yog tsis txhob xav txog tej ntawd xwb. Nej yuav tsum nyeem Vajtswv cov lus kom ntxaws ntxaws thiab nrhiav seb tej kev tim tsum txog qhov coj tus cwj pwm uas Nws cov lus tim tsum ntawm tib neeg ntawd yog qhov twg kiag, ces tom qab ntawd nrhiav Nws cov lus ob peb zaj los sib sau ua ke, ces thov Vajtswv thiab nyeem thiab kawm txog cov lus ntawd sib txuas ua ke. Thaum nej paub txog cov lus ntawd lawm, ces thaum ntawd yog thaum nej muab cov lus ntawd coj lus xyaum ua thiab ua. Qhov no coj Vajtswv cov lus los rau hauv nej lub neej tiag tiag, uas cov lus ntawd dhau los ua lub hauv paus rau nej tej kev xam pom txog tib neeg thiab txhua yam, nrog rau nej txoj kev coj kom zoo thiab tej kev ua. Lub hauv paus ntawm tib neeg txoj kev hais lus thiab tej kev ua ntawd yuav tsum yog dab tsi? Yog Vajtswv cov lus. Yog li ntawd, tej kev tim tsum thiab tej qauv uas Vajtswv muaj rau tib neeg txoj kev hais lus thiab tej kev ua ntawd yog dab tsi? (Yog kom lawv ua cov tsim kho tib neeg.) Qhov ko yog lawm. Qhov tseem ceeb tshaj plaws, koj yuav tsum qhia qhov tseeb, hais lus kom ncaj, thiab pab lwm tus. Yam tsawg kawg, koj cov lus hais yuav tsum txhim kho tib neeg, es tsis txhob yog ntxias, dag, tso dag tso luag, thab plaub, saib tsis taus, thuam, nias lawv, muab qhov lawv ua tsis tau zoo nthuav tawm, los sis ua rau lawv mob siab. Qhov no yog qhov kev nthuav tawm ntawm cov tib neeg dog dig. Nws yog tib neeg txoj kev tsim txiaj. Vajtswv puas tau qhia koj hais tias yuav hais lus nrov npaum li cas? Nws puas tau tim tsum kom koj siv cov lus muaj qauv? Nws puas tau tim tsum kom koj siv cov qauv hais lus uas ncauj qab zib nplaig qab ntsev los sis khav khav theeb, thiab paub cai? (Tsis tau.) Tsis muaj tej uas ntiav ntiav, ntsej muag ncaj siab nkhaus, cuav, thiab tsis muaj nuj nqis ntawd ib qho me me li. Tag nrho Vajtswv tej kev tim tsum yog tej uas cov tib neeg dog dig tsim nyog muaj xwb, xws li tej qauv thiab tej hauv paus ntsiab lus rau tib neeg cov lus thiab tus cwj pwm. Qhov tib neeg yug los nyob rau qhov twg los sis lawv hais yam lus twg ntawd tsis tseem ceeb. Txawm li cas los xij, cov lus uas koj hais—qhov kev hais cov lus ntawd thiab lub ntsiab—yuav tsum yog txhim kho lwm tus xwb. Qhov hais tias txhim kho lwm tus ntawd yog txhais li cas? Qhov ntawd txhais hais tias thaum lwm tus hnov cov lus ntawd lawm, lawv paub tias cov lus ntawd muaj tseeb, thiab tau txais kev txhawb nqa thiab kev pab los ntawm cov lus ntawd, thiab tuaj yeem to taub qhov tseeb, thiab tsis muaj qhov paub tsis meej, los sis tsis muaj qhov kev dag lwm tus ntxiv lawm. Yog li ntawd, Vajtswv tim tsum kom tib neeg qhia qhov tseeb, hais li lawv xav, es tsis txhob yog ntxias, dag, tso dag tso luag, thab plaub, saib tsis taus, thuam, los sis nias lwm tus, los sis muab qhov lwm tus ua tsis tau zoo nthuav tawm, los sis ua rau lwm tus mob siab. Tej no tsis yog tej hauv paus ntsiab lus ntawm txoj kev hais lus lod? Qhov hais tias yus yuav tsum tsis txhob muab tej uas tib neeg ua tsis tau zoo nthuav tawm ntawd yog txhais li cas? Qhov ntawd txhais hais tias tsis txhob nrhiav yam tsis zoo ntawm lwm tus tib neeg. Tsis txhob tuav rawv tej uas lawv ua yuam kev los sis tej uas lawv ua tsis tau zoo yav tag los los txiav txim los sis teem txim rau lawv. Yam tsawg kawg koj yuav tsum ua qhov no. Hos qhov zoo ne, cov lus hais uas tsim kho ntawd yog hais li cas? Feem ntau yog kev txhawb zog, kev taw qhia, kev coj qhia, kev ntuas, kev to taub, thiab kev nplij siab. Thiab, nyob rau qee qhov xwm txheej uas tshwj xeeb mas, yuav tsum tau muab tej uas lwm tus tib neeg ua yuam kev ntawd nthuav tawm ncaj qha ntag thiab qhuab qhia thiab qhuab ntuas lawv, kom lawv thiaj li muaj kev paub txog qhov tseeb thiab xav los lees txim hloov dua siab tshiab. Tsuas yog thaum ntawd xwb thiaj li ua tau tiav raws li siab xav. Txoj kev ua li no mas muaj txiaj ntsim loj heev rau tib neeg. Nws yog ib txoj kev pab lawv tiag tiag, thiab nws tsim kho lawv, tsis yog lod? Muab hais ua piv txwv hais tias, koj mas txhob txwm thiab khav theeb heev. Koj yeej tsis txeev paub txog qhov no li, tiam sis qee tus neeg uas paub koj zoo cia li tawm kiag tuaj qhia koj txog qhov teeb meem ntawd. Koj xav hauv koj tus kheej hais tias, “Kuv puas txhob txwm ne? Kuv puas khav theeb ne? Tsis muaj leej twg muaj cuab kav qhia kuv li, tiam sis nws to taub kuv. Es nws thiaj li hais ib qho zoo li no uas qhia hais tias qhov ntawd yeej muaj tseeb tiag tiag. Kuv yuav tsum siv qee lub sij hawm los xav txog qhov no.” Tom qab ntawd koj hais rau tus tib neeg ntawd hais tias, “Lwm tus tib neeg tsuas hais tej yam zoo rau kuv, lawv qhuas kuv xwb, tsis muaj leej twg hais kiag rau kuv, tsis muaj leej twg txeev muab tej uas ua tsis tau zoo thiab tej teeb meem uas nyob rau hauv kuv no qhia tawm li. Tsuas yog koj xwb thiaj li muaj peev xwm qhia kuv, hais kiag rau kuv. Nws zoo heev, yog ib qho uas pab tau kuv loj heev.” Qhov no yog ib qho sib qhia siab, tsis yog lod? Ces lwm tus tib neeg mam li maj mam qhia rau koj txog yam uas nyob rau hauv lawv lub siab lub ntsws, lawv tej kev xav txog koj, thiab tej uas lawv tau ntsib tau pom txog qhov lawv muaj tej kev xav phem, tej kev xav hauv nruab siab, txoj kev tsis zoo thiab qhov ua tsis tau zoo txog qhov teeb meem no, thiab muaj peev xwm khiav tawm ntawm qhov teeb meem ntawd los ntawm txoj kev nrhiav qhov tseeb lawm. Qhov no yog kev sib qhia siab; nws yog ib qho kev koom siab koom ntsws. Yog li ntawd muab xaus lus hais tias, lub hauv paus ntsiab lus uas txhawb qhov kev hais lus ntawd yog dab tsi? Nws yog qhov no xws li: Hais yam uas nyob rau hauv koj lub siab, thiab hais txog koj tej kev ntsib kev pom tiag tiag thiab qhov koj xav tiag tiag. Cov lus no yog cov muaj txiaj ntsim tshaj plaws rau tib neeg, cov lus no pab cuam tib neeg, cov lus no pab lawv, cov lus no yog cov lus zoo. Qhov tsis kam hais cov lus cuav, cov lus uas tsis muaj txiaj ntsim los sis tsis txhim kho tib neeg ntawd; qhov no yuav tsis rhuav tshem lawv los sis ua rau lawv ua yuam kev, tsis ua rau lawv poob rau qhov tsis zoo, thiab muaj qhov tsis zoo. Koj yuav tsum hais yam zoo. Koj yuav tsum siv zog pab tib neeg kom ntau npaum li koj pab tau, kom muaj txiaj ntsim rau lawv, kom pab cuam tau lawv, kom ua rau lawv muaj txoj kev ntseeg Vajtswv tseeb; thiab koj yuav tsum ua kom tib neeg tau txais kev pab, thiab tau txais ntau yam, los ntawm koj tej kev ntsib kev pom txog Vajtswv cov lus thiab txoj kev uas koj daws teeb meem, thiab kom muaj peev xwm to taub txoj hauv kev uas tau ntsib tau pom Vajtswv tes hauj lwm thiab nkag tau mus rau hauv qhov tseeb qhov muaj tiag, ua kom lawv muaj qhov mus tau txoj sia thiab ua kom lawv lub neej loj hlob—uas puav leej yog qhov txiaj ntsim ntawm qhov koj cov lus muaj tej hauv paus ntsiab lus, thiab txhim kho tib neeg xwb. Dhau ntawm qhov no lawm, thaum tib neeg tuaj sib sau ua ke hais luag plig thiab luag ntshuj ntshis, mas qhov ntawd tsis muaj lub hauv paus ntsiab lus. Txhua yam uas lawv nthuav tawm tuaj ces yog lawv tej moj yam qias vuab tsuab xwb. Qhov ntawd tsis yog raws li Vajtswv cov lus, thiab lawv tsis ua raws li qhov tseeb tej hauv paus ntsiab lus. Txhua yam ntawd yog tib neeg tej tswv yim rau kev ua neej xwb—lawv ua neej raws li qhov lawv tej moj yam qias vuab tsuab tswj lawv kom ua.

Vajtswv tim tsum tib neeg kom hais lus muaj hauv paus ntsiab lus thiab txhim kho tau lwm tus. Qhov no puas muaj ib yam dab tsi cuam tshuam rau tib neeg cov cwj pwm zoo uas nyob rau sab nraud ntawd? (Tsis muaj.) Qhov no yeej tsis muaj dab tsi cuam tshuam rau cov cwj pwm zoo uas nyob rau sab nraud ntawd kiag li. Muab hais tias koj tsis hais lus yuam lwm tus los sis hais lus cuav thiab hais lus dag, tiam sis koj kuj muaj peev xwm txhawb lwm tus lub zog, coj qhia lwm tus, thiab nplij lwm tus lub siab thiab. Yog koj muaj peev xwm ua ob qho no no, koj puas tas yuav ua ob qho no los ntawm ib tug cwj pwm uas nyiam ua phooj ywg? Koj puas yuav tsum ua kom tau qhov kev nyiam ua phooj ywg ntawd? Koj tsuas ua tau ob qho ntawd los ntawm ib tug cwj pwm uas ua tus neeg paub kev paub cai, paub tab, thiab paub cai nyob rau sab nraud zoo li no xwb lod? Tsis tas ua li. Qhov uas yuav tau paub ua ntej txog koj cov lus hais kom txhim kho tau lwm tus ntawd mas yog qhov hais tias cov lus hais ntawd yog hais raws li Vajtswv cov lus thiab Nws tej kev tim tsum—tias cov lus hais ntawd yog hais raws li qhov tseeb, tsis yog raws li cov cwj pwm zoo uas tsim los ntawm txoj kab lis kev cai. Thaum koj cov lus hais muaj hauv paus ntsiab lus thiab txhim kho tau lwm tus lawm, koj yuav zaum hais los yog sawv hais los tau; koj yuav hais nrov nrov hais yau yau los tau; koj yuav hais cov lus paub tab, cov lus hnyav los tau. Tsuav qhov tshwm sim thaum kawg yog qhov zoo, es koj ua tau koj lub luag hauj lwm tiav thiab lwm tus tau txais txiaj ntsim xwb, ces qhov ntawd mus raws li qhov tseeb tej hauv paus ntsiab lus lawm. Yog hais tias yam uas koj caum yog qhov tseeb, thiab yam uas koj xyaum ua yog qhov tseeb, thiab lub hauv paus ntawm koj cov lus hais thiab tej kev ua yog Vajtswv cov lus, yog qhov tseeb tej hauv paus ntsiab lus, thiab yog hais tias lwm tus tau txais txiaj ntsim thiab tau txais los ntawm koj no, qhov ntawd yuav tsis muaj txiaj ntsim rau neb ob leeg lod? Yog neb txoj kev ua neej raug txoj kab lis kev cai ntawd txoj kev xav txwv, koj ua txuj es lwm tus ua ib yam nkaus, thiab koj coj tej kev zoo uas paub cai hos lwm tus nyo hau hawm, koj ua txuj ua rau kuv kuv ua txuj ua rau koj xwb, ces neb ob tug ko yeej tsis muaj ib tug zoo li. Koj thiab lawv nyo hau hawm thiab ua tej kev zoo tag hnub, yam tsis muaj ib lo lus tseeb li, ua lub neej tsuas yog coj tus cwj pwm zoo raws li qhov txoj kab lis kev cai txhawb nqa xwb. Txawm tus cwj pwm zoo li no yuav pom tias zoo nyob rau sab nraud los xij, tus cwj pwm ntawd yog ntsej muag ncaj siab nkhaus, yog tus cwj pwm uas dag thiab ntxias lwm tus, yog tus cwj pwm uas coj tib neeg los dag, yam tsis hnov ib lo lus tseeb li xwb. Yog koj ua phooj ywg nrog ib tug tib neeg zoo li no, ces thaum kawg koj yeej yuav raug dag xwb. Tsis muaj ib yam dab tsi uas yuav txhim kho tau koj uas koj tau txais los ntawm lawv tus cwj pwm zoo li. Txhua yam uas tus cwj pwm zoo ntawd qhia koj ces yog kev cuav thiab kev dag xwb: Koj dag lawv, lawv dag koj xwb. Thaum kawg, qhov uas koj yuav paub ces yog ib txoj kev txo koj txoj kev ncaj ncees thiab lub meej mom loj tshaj plaws, uas koj yuav tau nyiaj xwb. Koj tseem yuav tau coj koj tus kheej kom paub tab paub cai, li tus uas muaj kev kawm siab thiab paub qab paub hau, yam tsis txhob nrog lwm tus sib cav los sis tim tsum ntawm lawv ntau dhau lawm. Koj tseem yuav tau ua siab ntev thiab ua siab dav, ua siab txias txias thiab ua siab loj siab dav nrog lub ntsej muag luag ntxhi thiab. Yuav tsum tau siv zog ua pes tsawg xyoo es thiaj li ua tau li no! Yog koj tim tsum koj tus kheej hais tias koj yuav ua neej li no rau lwm tus, koj lub neej yuav tsis ua rau koj sab lod? Qhov ua txuj muaj txoj kev hlub ntau heev, tiam sis paub zoo tias koj tsis muaj—lub ntsej muag ncaj siab nkhaus uas zoo li no tsis yog ib qho yooj yim! Yog ib tug neeg lawm koj yuav hnov sab heev txog txoj kev coj koj tus kheej kom zoo li no; koj yuav yeem yug los ua nyuj ua nees, ua dev ua npua nyob rau tiam tom ntej dua li yug los ua neeg. Koj yuav pom hais tias tej ntawd mas cuav thiab phem heev. Vim li cas tib neeg thiaj li ua lub neej uas ua rau lawv sab ua luaj? Vim lawv ua neej raws li tej kev xav phem uas ib txwm muaj, uas txwv thiab khi lawv. Thaum tso siab rau lawv tus moj yam qias vuab tsuab lawm, ces lawv ua nyeej nyob rau hauv txoj kev txhaum xwb, uas lawv yeej pab tsis tau lawv tus kheej kom dim li. Nws tsis muaj txoj hauv kev tawm. Qhov lawv ua neej ntawd tsis zoo ib yam li tus tib neeg tiag tiag. Nyob rau ntawm tib neeg mas, ib tug yeej tsis hnov los sis tau txais ib lo lus tiag tiag li, tab txawm ntawm tus txiv thiab tus poj niam, niam thiab ntxhais, txiv thiab tub, cov tib neeg uas sib ze tshaj plaws li—tsis muaj ib lo lus zoo mloog, tsis muaj ib lo lus sov siab los sis ib lo lus uas yuav nplij tau lwm tus lub siab li. Yog li ntawd, cov cwj pwm zoo sab nraud no ua txoj hauj lwm dab tsi? Cov cwj pwm zoo sab nraud no ua txoj hauj lwm uas tuav txoj kev sib nrug thiab kev sib raug zoo ntawm tib neeg uas nyob ib ntus xwb. Tiam sis nyob tom qab cov cwj pwm zoo no mas, tsis muaj leej twg muaj cuab kav mob siab rau lwm tus li, uas thaum kawg tib neeg ntiaj teb xaus rau hauv ib sob lus uas hais tias: “Kev ncua deb ua rau muaj qhov zoo nkauj.” Qhov no nthuav tib neeg ntiaj teb tus yam ntxwv tseeb tawm, tsis yog lod? Kev ncua deb ua rau muaj qhov zoo nkauj tau li cas? Nyob rau hauv ib lub neej uas cuav thiab phem tiag tiag zoo li no mas, tib neeg ua neej nyob muaj kev kho siab, kev ntshaus siab, kev nyuaj siab, kev npau taws, thiab kev tsis txaus siab, yam tsis muaj ib txoj hauv kev mus rau tom ntej li. Nov yog qhov muaj tseeb ntawm cov tsis ntseeg. Txawm li cas los xij, hnub no koj ntseeg Vajtswv lawm. Koj twb los rau hauv Vajtswv lub tsev thiab lees txais txoj kev pab cuam ntawm Nws cov lus, thiab koj twb mloog lus qhuab qhia tas li lawm. Nyob rau hauv koj lub siab, txoj kev xav, mas koj tseem nyiam cov cwj pwm zoo uas txoj kab lis kev cai ntawd txhawb nqa. Qhov no ua tau pov thawj qhia hais tias: Koj tsis to taub qhov tseeb thiab tsis muaj qhov muaj tiag. Vim li cas nyob rau hauv koj lub neej tam sim no, koj tseem nyuaj siab heev, kho siab heev, txaus hlub heev, tsis muaj kev ruaj siab rau koj tus kheej li? Qhov no yog vim tib qho uas koj tsis lees txais qhov tseeb thiab tsis hloov pauv kiag li xwb. Lwm lo lus mas hais tias, koj tsis saib tib neeg thiab txhua yam, thiab coj koj tus kheej kom zoo thiab ua raws li Vajtswv cov lus, thiab tsis muab qhov tseeb los ua koj tus qauv. Koj tseem ua neej tso saib rau tej moj yam qias vuab tsuab thiab tej kev xav phem uas ib txwm muaj ntawd. Vim li ntawd koj lub neej thiaj li tseem kho siab heev. Koj tsis muaj phooj ywg, tsis muaj leej twg uas tso siab tau rau. Koj yuav tsis tau txais kev txhawb zog, kev coj qhia, kev pab, los sis kev txhim kho uas koj tsim nyog tau txais los ntawm lwm tus li, thiab koj yuav muab tsis tau kev txhawb zog, kev coj qhia, los sis kev pab rau lwm tus li thiab. Tab txawm nyob rau hauv tej no los, qhov tsawg tshaj plaws ntawm cov cwj pwm ntawd, koj twb tsis muab Vajtswv cov lus los ua koj lub hauv paus thiab muab qhov tseeb los ua koj tus qauv li, yog li ntawd haj yam tsis tas yuav hais txog koj tej kev saib tib neeg thiab txhua yam los sis koj txoj kev coj kom zoo thiab txoj kev ua—tej ntawd mas nyob nrug deb ntawm qhov tseeb, thiab Vajtswv cov lus puas txhiab mais xwb!

Peb nyuam qhuav kawm txog tias tej kev tim tsum uas Vajtswv tim tsum txog tib neeg tus cwj pwm ntawd yog dab tsi xws li: Nws tim tsum tib neeg kom hais lus thiab ua muaj hauv paus ntsiab lus thiab txhim kho lwm tus. Yog li, raws li qhov ntawd, tam sim no puas muaj leej twg paub tias cov cwj pwm zoo uas tib neeg coj ntawd muaj ib qho nuj nqis li—tias tsim nyog saib cov cwj pwm zoo ntawd muaj nqis? (Tsis tsim nyog saib cov cwj pwm zoo ntawd muaj nqis.) Yog li ntawd, nej yuav tsum ua li cas, yog nej tsis ntseeg hais tias tsim nyog saib cov cwj pwm zoo ntawd muaj nqis? (Muab cov cwj pwm zoo ntawd tso pov tseg.) Yug yuav muab cov cwj pwm zoo ntawd tso pov tseg li cas? Yuav kom tso tau cov cwj pwm zoo ntawd pov tseg mas, tib neeg yuav tsum muaj ib txoj hauv kev thiab cov kauj ruam uas tshwj xeeb txog lawv txoj kev xyaum ua. Ua ntej tshaj plaws, tib neeg yuav tsum saib lawv tus kheej kom meej seb lawv puas muaj qhov coj tus cwj pwm uas ua tus neeg muaj kev kawm siab thiab paub qab paub hau thiab ua tus neeg paub tab thiab paub cai, raws li txoj kab lis kev cai txhawb nqa. Yuav saib kom meej li cas, thiab yuav saib dab tsi? Cov uas yuav tau saib ntawd yog saib koj tus kheej seb koj saib tib neeg thiab txhua yam raws li lub hauv paus dab tsi, nrog rau koj txoj kev coj kom zoo thiab txoj kev ua, thiab saib seb Ntxwgnyoog tau muab dab tsi cog tob rau hauv koj lub siab thiab muab tsaus rau hauv koj cov ntshav thiab cov pob txha lawm. Piv txwv li, muab hais tias muaj qee tus tib neeg uas raug saib xyuas zoo heev txij thaum me los, uas tsis paub ntau txog txoj kev tswj lawv tus kheej, tiam sis lawv txoj kev ua neej tsis phem. Lawv yog ib tug ntseeg tseeb, thiab lawv ntseeg Vajtswv thiab ua lawv tes dej num tiag tiag, thiab lawv tuaj yeem raug kev txom nyem thiab tiv kev txom nyem. Tsuas muaj tib qho uas lawv ua yuam kev xwb uas yog: Thaum lawv noj nov, lawv nyiam noj tsawg tsawg thiab noj ua qhov ncauj nrov nrov. Thaum hnov qhov ntawd ua rau meem txom koj heev es koj nqos tsis taus koj cov zaub mov li. Koj txeev muaj ib txoj kev ntxub cov tib neeg uas zoo li no heev. Koj xav hais tias lawv tsis muaj qhov zoo thiab tsis paub tias yuav tswj lawv tus kheej li cas, tias lawv tsis muaj kev kawm siab los sis tsis paub qab paub hau. Nyob rau hauv koj lub siab mas, koj thuam lawv, ntseeg hais tias cov tib neeg zoo li no mas meej mom qis thiab tsis tsim nyog, tias yeej tsis muaj hnub uas lawv yog cov tib neeg uas Vajtswv xaiv li, thiab haj yam tsis yog cov uas Nws hlub. Vim li cas koj thiaj li ntseeg li ntawd? Koj puas tau pom tias lawv lub ntsiab tseeb zoo li cas? Puas yog koj ntsuas lawv raws li lawv lub ntsiab tseeb? Koj ntsuas raws li lub hauv paus dab tsi? Koj ntsuas tib neeg raws li tej nqe lus ntawm cov tib neeg Suav txoj kab lis kev cai xwb. Yog li ntawd, thaum koj los kawm txog qhov teeb meem no lawm, koj yuav tsum xav li cas, raws li qhov tseeb uas peb tau kawm txog nyob rau hnub no? “Ntuj e, kuv txeev saib tsis taus lawv. Kuv yeej tsis txeev txaus siab hlo mloog lawv tej lus qhia li. Thaum twg uas lawv hais lus los sis ua ib yam dab tsi, txawm lawv yuav ua yam ntawd yog npaum li cas los sis lawv cov lus qhia muaj qab hau npaum li cas los xij, kiag thaum kuv xav txog qhov lawv noj mov ua qhov ncauj nrov nrov thiab yos zaub mov noj nyob rau ntawm tsum mov, ces kuv tsis xav hnov lawv tham lus li lawm. Kuv ib txwm suav tias lawv yog ib tug neeg tsis paub cai uas tsis muaj peev xwm. Tam sim no, vim txoj kev qhia los ntawm Vajtswv uas zoo li no, kuv thiaj li pom hais tias qhov kuv saib tib neeg ntawd tsis yog saib raws li Vajtswv cov lus, tiam sis, kuv saib cov yam ntxwv thiab cov cwj pwm uas tib neeg coj nyob rau hauv lawv lub neej xwb—tej uas lawv tsis muaj qhov zoo los sis qhov tsim nyog xwb—cuag nkaus li lawv muab lawv txoj kev ua neej lub ntsiab tseeb nthuav tawm los. Tam sim no, ntsuas raws li Vajtswv cov lus mas, tag nrho tej ntawd yog tej uas ua yuam kev me me uas tsis cuam tshuam rau lawv txoj kev ua neej lub ntsiab tseeb li. Tej ntawd tsis nyob ze tej teeb meem ntawm lub hauv paus ntsiab lus.” Qhov no tsis yog kev saib yus tus kheej kom meej lod? (Yog.) Cov uas lees txais Vajtswv cov lus thiab to taub qhov tseeb yeej pom tej no tseeb tseeb. Yog li ntawd, txij ntawd mus yuav ua li cas? Puas muaj ib txoj hauv kev? (Muaj.) Yog koj tim tsum kom lawv muab cov yam ntxwv tsis zoo no tso tseg kiag tam sid no puas tau? (Tsis tau.) Tej uas tsis zoo me me uas zoo li no mas cog ruaj thiab hloov nyuaj. Tej ntawd yog ib yam uas ib hnub ob hnub xwb es yus txawv siv hloov tau lawm. Tej teeb meem ntawm tus cwj pwm mas daws tsis nyuaj, tiam sis tej uas tsis zoo uas nyob rau hauv yus lub neej tej yam ntxwv, mas yus yuav tau siv sij hawm thiaj li yuav tshem tau tej uas tsis zoo ntawd tawm mus. Tej uas tsis zoo ntawd tsis cuam tshuam rau qhov zoo ntawm tib neeg txoj kev ua neej, kev xav, los sis lawv txoj kev ua neej lub ntsiab tseeb, yog li ntawd tsis txhob saib tej uas tsis zoo ntawd muaj nqis dhau lawm los sis tsis kam muab tej uas tsis zoo ntawd tso tseg. Txhua tus nyias muaj nyias tus kheej tus yam ntxwv thiab txoj hauv kev nyob rau hauv lub neej. Tsis muaj leej twg uas yuav zoo ib yam li. Txhua tus puav leej muaj ob peb yam uas tsis zoo, yog li ntawd txawm lawv yuav zoo li cas los xij, yog lawv cuam tshuam rau lwm tus, mas yuav tsum tau kho lawv. Qhov ntawd yog qhov ua kom muaj tej kev sib tham uas haum xeeb. Txawm li cas los xij, qhov ua ib tug qauv rau txhua yam ntawd mas yeej yuav ua tsis tau. Tib neeg nyias nyob nyias ib qho chaw, thiab lawv tej yam ntxwv uas nyob rau hauv lub neej puav leej sib txawv, yog li ntawd lawv yuav tsum ib leeg ua siab ntev rau ib leeg. Qhov no yog ib yam uas cov tib neeg dog dig yuav tsum muaj. Tsis txhob khaws tej teeb meem me me rau hauv siab. Xyaum ua siab ntev. Qhov uas ua rau lwm tus li ntawd yog qhov tsim nyog tshaj plaws. Qhov no yog lub hauv paus ntsiab lus ntawm txoj kev ua siab ntev, yog lub hauv paus ntsiab lus thiab txoj kev los daws tej teeb meem zoo li no. Tsis txhob sim txiav txim siab rau tib neeg lub ntsiab tseeb thiab txoj kev ua neej raws li tej uas tsis zoo me ntsis ntawm lawv ntawd. Qhov ua li ntawd tsis mus raws li tej hauv paus ntsiab lus li, vim txawm tib neeg yuav muaj tej uas tsis zoo los sis tej uas ua tsis tau zoo dab tsi los xij, lawv tsis hais txog tus tib neeg ntawd lub ntsiab tseeb, thiab lawv tsis tau txhais hais tias tus tib neeg ntawd tsis yog ib tug ntseeg Vajtswv tiag tiag, thiab haj yam tsis yog ib tug uas tsis caum qhov tseeb. Peb yuav tsum saib tej uas tib neeg ua tau zoo thiab saib tib neeg raws li Vajtswv cov lus thiab Nws tej kev tim tsum ntawm tib neeg. Qhov ntawd yog txoj kev coj rau tib neeg yam ncaj ncees. Tus tib neeg uas caum qhov tseeb ntawd yuav tsum saib tib neeg li cas? Qhov lawv saib tib neeg thiab txhua yam, thiab lawv txoj kev coj kom zoo thiab tej kev ua ntawd, mas yuav tsum yog saib raws li Vajtswv cov lus, uas muaj qhov tseeb ua lawv tus qauv xwb. Yog li ntawd, koj yuav saib txhua tus tib neeg raws li Vajtswv cov lus li cas? Saib seb lawv puas muaj lub siab uas txawj xav thiab qhov tsim nyog, seb lawv yog ib tug neeg zoo los ib tug neeg phem. Thaum koj nrog lawv tham, koj yuav pom hais tias txawm lawv muaj tej uas tsis zoo thiab tej kev tu ncua me ntsis los xij, lawv ua neej zoo heev. Lawv ua siab dav thiab siab ntev nrog lwm tus tib neeg sib tham, thiab thaum ib tug tib neeg twg ua tsis tau zoo thiab tsis muaj peev xwm, mas lawv hlub tus tib neeg ntawd thiab tuaj yeem pab cuam tus tib neeg ntawd thiab pab tus tib neeg ntawd. Qhov ntawd yog tus cwj pwm uas lawv coj rau lwm tus. Yog li ntawd, tus cwj pwm uas lawv coj rau Vajtswv yog tus zoo li cas? Nyob rau hauv tus cwj pwm uas lawv coj rau Vajtswv ntawd mas, haj yam ntsuas tau tias lawv muaj kev ua neej los tsis muaj. Tej zaum yuav yog qhov hais tias vim txhua yam uas Vajtswv ua, es lawv thiaj li mloog lus, thiab nrhiav, thiab ntshaw, thiab nyob rau hauv txoj kev ua lawv tes dej num thiab kev nrog lwm tus sib tham ntawd—thaum lawv nqis tes ua—lawv thiaj li muaj ib lub siab uas ntshai Vajtswv. Nws tsis yog hais tias lawv yog cov tib neeg ua qhov phoj sij, ua phem heev, thiab tsis yog hais tias lawv ua txhua yam thiab hais txhua yam. Thaum muaj ib yam dab tsi tshwm sim uas cuam tshuam rau Vajtswv los sis rau Nws tes hauj lwm, mas lawv ceev faj heev. Thaum koj paub tseeb hais tias lawv coj li no lawm, raws li tej uas tawm ntawm lawv txoj kev ua neej tuaj ntawd, koj yuav ntsuas li cas es thiaj li paub tias tus tib neeg ntawd zoo los phem? Ntsuas qhov ntawd raws li Vajtswv cov lus, thiab ntsuas qhov ntawd raws li qhov seb lawv puas muaj ib lub siab uas txawj xav thiab qhov tsim nyog, thiab raws li tus cwj pwm uas lawv coj rau qhov tseeb thiab rau Vajtswv. Thaum ntsuas lawv raws li ob qho no lawm, koj yuav pom hais tias txawm muaj ob peb qho teeb meem thiab tej uas tsis zoo nyob rau hauv lawv tus cwj pwm los xij, lawv yeej tseem ua tus tib neeg uas muaj lub siab uas txawj xav thiab tsim nyog, tus uas muaj lub siab zwm rau Vajtswv thiab ntshai Vajtswv thiab muaj tus cwj pwm uas muaj kev hlub thiab kev lees txais qhov tseeb. Yog hais tias zoo li ntawd, ces raws li Vajtswv pom mas, lawv yog cov uas yuav dim, cov uas Nws hlub. Yog li ntawd yog Vajtswv pom hais tias, lawv yog cov uas yuav dim thiab cov uas Nws hlub no, koj yuav tsum ua li cas rau lawv? Koj yuav tsum saib tib neeg thiab txhua yam raws li Vajtswv cov lus thiab ntsuas raws li Nws cov lus. Lawv yog ib co kwv tij thiab nkauj muam tiag tiag, thiab koj yuav tsum ua rau lawv kom yog yam tsis muaj kev ntxub ntxaug. Tsis txhob ua rau lawv yam tsis ncaj ncees los sis ntsuas lawv raws li txoj kab lis kev cai tej nqe lus—tiam sis ntsuas lawv los ntawm Vajtswv cov lus. Hos hais txog tej uas tsis zoo ntawm lawv tus cwj pwm ntawd, yog tias koj lub siab zoo, koj yuav tsum pab lawv. Cia kom lawv paub tias yuav ua li cas thiaj tsim nyog. Koj yuav ua li cas yog lawv lees txais tau qhov ntawd tiam sis tso tsis tau tej uas tsis zoo ntawm lawv tus cwj pwm kiag tam sim ntawd? Koj yuav tsum tau rov qab ua siab ntev. Yog koj tsis ua siab ntev, ces qhov ntawd txhais hais tias koj tsis muaj lub siab zoo, thiab koj yuav tsum nrhiav qhov tseeb nyob rau hauv tus cwj pwm uas koj coj rau lawv, thiab thim xav kom paub tej uas koj tus kheej tu ncua. Ua li ntawd mas koj thiaj li yuav ua tau rau tib neeg yam yog heev. Tiam sis, yog koj hais tias, “Tus tib neeg ntawd muaj tej uas tsis zoo ntau dhau lawm. Nws tsis paub cai, nws tsis paub tias yuav tswj nws tus kheej li cas, nws tsis paub txog qhov kev hwm lwm tus, thiab nws tsis paub nws tus xeeb ceem. Yog li, nws yog ib tug tsis ntseeg. Kuv tsis xav koom nrog nws ua ke, kuv tsis xav pom nws, thiab kuv tsis xav hnov tej uas nws hais, txawm qhov uas nws hais ntawd yuav yog npaum li cas los xij. Leej twg yuav ntseeg hais tias nws ntshai Vajtswv thiab ua raws li Vajtswv hais? Nws ua puas tau li ntawd? Nws puas muaj lub peev xwm?” no tus cwj pwm ntawd yog tus cwj pwm dab tsi? Qhov ua rau lwm tus li ntawd, puas yog kev pab? Qhov ua li ntawd puas mus raws li qhov tseeb tej hauv paus ntsiab lus? Qhov koj ua rau lwm tus zoo li no puas yog ib txoj kev to taub txog qhov tseeb thiab kev xyaum ua raws li qhov tseeb? Qhov ua li ntawd puas yog kev hlub? Hauv koj lub siab koj puas ntshai Vajtswv? Yog ib tug tib neeg twg ntseeg Vajtswv es tsis muaj lub siab zoo no, tus tib neeg uas zoo li no puas muaj qhov tseeb qhov muaj tiag? Yog koj pheej tuav rawv koj tej kev xav phem, thiab koj tej kev saib tib neeg thiab txhua yam raws li koj tus kheej tej kev xav, tej uas raug koj siab, tej uas koj nyiam, thiab tej kev xav phem xwb, ces qhov ntawd ua pov thawj qhia txaus lawm hais tias koj tsis to taub qhov tseeb ib qho me me li thiab tseem ua neej raws li tej tswv yim phem xwb. Qhov ntawd ua pov thawj qhia txaus lawm hais tias koj tsis yog ib tug uas nyiam qhov tseeb los sis tus uas caum qhov tseeb ntawd. Ib txhia tib neeg mas qhuas tias yus tus kheej coj ncaj heev. Txawm koj yuav qhia lawv li cas los xij, lawv yeej tseem tuav rawv lawv tus kheej tej kev xam pom xws li: “Kuv yog ib tug neeg paub kev paub cai uas hwm cov laus thiab saib xyuas cov hluas—tej no tsis tseem ceeb lod? Yam tsawg kawg, kuv yog ib tug tib neeg zoo. Yam dab tsi uas tsis zoo txog qhov kuv coj kuv tus kheej? Yam tsawg kawg, txhua tus hwm kuv.” Kuv tsis tawm tsam qhov koj yog ib tug tib neeg zoo, tiam sis yog koj pheej ua txuj li koj ua ko, koj puas yuav tau txais qhov tseeb thiab txoj sia? Qhov ua ib tug tib neeg zoo li koj ua ko tej zaum yuav tsis txhaum koj txoj kev ncaj ncees los sis tawm tsam lub hom phiaj thiab txoj hauv kev ntawm koj txoj kev coj kom zoo, tiam sis muaj ib yam uas koj yuav tsum to taub: Yog pheej ua li ko, ces koj yuav tsis to taub qhov tseeb los sis yuav nkag tsis tau mus rau hauv qhov tseeb qhov muaj tiag, thiab thaum kawg, koj yuav tsis tau txais qhov tseeb thiab txoj sia, los sis Vajtswv txoj kev cawm dim. Kawg tshwm sim zoo li ntawd xwb.

Kuv nyuam qhuav qhia txog qhov yuav saib cov cwj pwm zoo ntawm tib neeg tej kev xav phem li cas, thiab yuav txheeb xyuas cov cwj pwm zoo ntawd li cas xws li tus uas caum qhov tseeb. Tam sim no nej puas muaj ib txoj hauv kev? (Muaj.) Nej yuav tsum ua li cas? (Ua ntej tshaj plaws, yus tus kheej xav seb yus puas muaj cov cwj pwm ntawd. Ces tom qab ntawd, xav seb lub hauv paus thiab tus qauv uas yus pheej siv los saib tib neeg thiab txhua yam ntawd yog dab tsi.) Qhov ko yog lawm. Koj yuav tsum pib los ntawm qhov saib kom meej seb puas muaj ib yam dab tsi uas yav tag los koj saib tib neeg thiab txhua yam, los sis nyob rau hauv koj txoj kev coj kom zoo thiab tej kev ua, es cov nyom rau yam uas kuv tau qhia txog nyob rau hnub no, los sis tawm tsam qhov tau qhia nyob rau hnub no ntawd. Xav seb qhov uas ua rau muaj qhov kev xav thiab qhov kev xam pom uas koj siv thaum koj saib tib neeg thiab txhua yam ntawd yog dab tsi, seb qhov uas txhawb koj ntawd puas yog tej qauv ntawm txoj kab lis kev cai los sis tej lus hais ntawm qee tus neeg uas zoo thiab nrov koob nrov npe, los sis seb qhov txhawb koj ntawd puas yog Vajtswv cov lus, thiab qhov tseeb. Pib ntawm qhov ntawd, xav txuas ntxiv seb tej kev xav thiab tej kev xam pom ntawm txoj kab lis kev cai thiab cov tib neeg uas zoo, thiab nrov koob nrov npe ntawd puas mus raws li qhov tseeb, seb tej ntawd puas yog los cov nyom qhov tseeb, seb tej ntawd yuam kev nyob rau qhov twg kiag. Cov no yog cov tshwj xeeb ntawm txoj kev thim xav txog yus tus kheej theem ob. Tam sim no, hais txog theem peb. Thaum koj pom hais tias tej kev xam pom, tej hauv kev, lub hauv paus, thiab tus qauv uas koj siv los saib tib neeg thiab txhua yam, nrog rau koj txoj kev coj kom zoo thiab txoj kev ua ntawd, yog los ntawm tib neeg lub siab nyiam los, los ntawm zej tsoom sawv daws tej kev phem thiab txoj kab lis kev cai los, thiab pom hais tias tej ntawd tawm tsam qhov tseeb xwb no, koj yuav tsum ua li cas? Koj puas yuav tsum nrhiav Vajtswv cov lus uas hais txog tej ntawd es muab Vajtswv cov lus ntawd los ua koj lub hauv paus? (Yuav tsum nrhiav.) Nrhiav qhov tseeb tej hauv paus ntsiab lus hauv Vajtswv cov lus uas hais txog qhov saib tib neeg thiab txhua yam, nrog rau txoj kev coj kom zoo thiab txoj kev ua. Koj yuav tsum ua raws li qhov Vajtswv cov lus hais, los sis muab hais kom yog yog mas hais tias, ua raws li qhov tseeb tej hauv paus ntsiab lus ntawm Vajtswv cov lus. Qhov tseeb tej hauv paus ntsiab lus ntawd yuav tsum ua lub hauv paus thiab tus qauv rau koj txoj kev saib tib neeg thiab txhua yam, thiab koj txoj kev coj kom zoo thiab tej kev ua. Qhov no yog qhov uas ua tau nyuaj tshaj plaws. Tib neeg yuav tsum xub tsis lees paub lawv tus kheej tej kev xam pom, tej kev xav phem, tej kev xav, thiab tej cwj pwm ua ntej tso. Qhov no cuam tshuam rau tib neeg tej kev xam pom uas tsis yog, thiab yuam kev. Tib neeg yuav tsum nthuav tej kev xam pom ntawd tawm, kom paub tej kev xam pom ntawd, thiab muab tej kev xam pom ntawd soj ntsuam kom zoo zoo. Lwm feem ntawm tej ntawd yog qhov hais tias thaum tib neeg nrhiav tau nqe lus tsim nyog nyob rau hauv Vajtswv cov lus uas hais txog tej ntawd lawm, lawv yuav tsum ua tib zoo xav txog tej ntawd thiab kawm txog tej ntawd, thiab thaum lawv paub tseeb hais tias qhov tseeb tej hauv paus ntsiab lus yog dab tsi lawm, ces kiag tam sim ntawd nws dhau los ua ib lo lus nug hais tias lawv yuav lees txais qhov tseeb thiab xyaum ua raws li qhov tseeb li cas. Qhia Kuv seb, thaum tib neeg to taub qhov tseeb tej hauv paus ntsiab lus lawm, lawv puas muaj peev xwm lees txais thiab ua raws li qhov tseeb tej hauv paus ntsiab lus ntawd sai? (Tsis muaj.) Tib neeg txoj kev ntxeev siab thiab tej moj yam qias vuab tsuab ntawd kho tsis tau tam sim ntawd. Tib neeg muaj tej moj yam qias vuab tsuab, yog li ntawd txawm lawv yuav paub tias Vajtswv cov lus txhais li cas los xij, lawv muab tsis tau cov lus ntawd coj los xyaum ua kiag tam sim ntawd. Qhov muab qhov tseeb coj los xyaum ua ntawd mas txhua zaus puas leej yog ib qho kev sib ntaus sib tua rau lawv xwb. Tib neeg muaj ib tug moj yam uas ntxeev siab. Lawv muab tsis tau lawv txoj kev ntxub ntxaug, kev hloov hloov siab, kev tawv ncauj, kev muaj plhus, kev qhuas tias yus tus kheej coj ncaj, los sis kev qhuas tias yus tus kheej tseem ceeb, thiab lawv tej kev daws li ub li no thiab tej kev hais ub hais no, thiab qhov lawv tus kheej tsim nyog, lub meej mom, lub koob lub npe, los sis kev khav theeb ntawd tso tseg li. Yog li ntawd, thaum koj muab ib yam dab tsi uas koj suav nyob rau hauv koj tej kev xav phem tias zoo ntawd tso tseg, yam uas koj yuav tsum muab tso pov tseg yog koj tej kev ntshaw thiab tej uas koj saib muaj nqis no. Thaum koj muab tau tag nrho tej no tso pov tseg thiab tso tseg lawm, ces thaum ntawd yog thaum koj yuav muaj kev cia siab los sis muaj ib lub hwv tsam los xyaum ua raws li Vajtswv cov lus, thiab raws li qhov tseeb tej hauv paus ntsiab lus. Qhov muab koj tus kheej tso tseg thiab tsis lees paub koj tus kheej ntawd mas—qhov no yog ntu uas hla dhau nyuaj tshaj plaws. Kiag thaum koj hla dhau ntu ntawd, ces yuav tsis tshuav tej kev nyuaj loj nyob rau hauv koj lub siab lawm. Thaum koj to taub qhov tseeb thiab muaj peev xwm nkag siab txog lub ntsiab tseeb ntawm cov cwj pwm zoo ntawd lawm, ces koj tej kev saib tib neeg thiab txhua yam ntawd yuav hloov, thiab thaum ntawd koj yuav maj mam muaj peev xwm tso tau tej uas los ntawm txoj kab lis kev cai los uas zoo li no tseg. Yog li ntawd, qhov yuav hloov tib neeg tej kev saib tib neeg thiab txhua yam uas yuam kev, thiab tej hauv kev thiab tej xeeb ceem ntawm lawv tej kev ua, thiab lub hauv paus thiab tej kev txhawb siab uas txhawb lawv tej kev ua ntawd mas—qhov no tsis yog ib qho yooj yim ua. Qhov hloov nyuaj tshaj plaws yog qhov tib neeg muaj tej moj yam qias vuab tsuab. Tib neeg tej kev saib txhua yam thiab lawv txoj kev ua neej ces yog tswm sim los ntawm lawv tej moj yam qias vuab tsuab xwb. Tej moj yam qias vuab tsuab ntawd ua rau koj khav theeb, qhuas tias koj tus kheej coj ncaj, thiab txhob txwm; tej moj yam qias vuab tsuab ntawd ua rau koj saib tsis taus lwm tus, pheej mob siab rau txoj kev txhawb koj lub npe thiab lub meej mom, seb lwm tus puas hwm koj thiab saib koj tseem ceeb xwb, pheej xav txog koj tej kev cia siab thiab txoj hmoo yav tom ntej, thiab lwm yam xwb. Tag nrho tej no yog tej uas tawm los ntawm koj tus moj yam qias vuab tsuab thiab koj tej kev ntshaw los xwb. Thaum koj muab tej no los nthuav tawm, pom tias tej no zoo li cas, thiab tsis lees paub tej no lawm, ces koj yuav muaj peev xwm muab tej no tso pov tseg. Thiab thaum koj muab tej ntawd tso tseg lawm xwb, mas koj thiaj li yuav maj mam muaj peev xwm muab Vajtswv cov lus los ua koj lub hauv paus thiab muab qhov tseeb los ua koj tus qauv txog koj tej kev saib tib neeg thiab txhua yam, txog koj txoj kev coj kom zoo thiab tej kev ua.

Muab Vajtswv cov lus los ua koj lub hauv paus txog koj tej kev saib tib neeg thiab txhua yam, thiab txog koj txoj kev coj kom zoo thiab tej kev ua—txhua tus puav leej to taub cov lus no. Cov lus no nkag siab yooj yim. Raws li lawv txoj kev paub tias dab tsi yog qhov tsim nyog thiab lawv tej kev xav, lawv lub siab nyiam thiab tej qauv mas, tib neeg muaj peev xwm nkag siab cov lus no thiab txaus siab hlo ua raws li cov lus no. Yog li ntawd yuav tsum tsis muaj tej kev nyuaj nyob rau ntawd. Tiam sis qhov tseeb tiag, tib neeg ua raws li cov lus ntawd nyuaj thaum lawv xyaum ua raws li qhov tseeb, thiab tej kev cuam tshuam thiab tej teeb meem uas nyob rau hauv txoj kev ua li ntawd tsis yog tsuas ua nyuaj los ntawm lawv qhov xwm txheej sab nraud xwb. Qhov tseem ceeb yog lawv tus moj yam qias vuab tsuab. Tib neeg tus moj yam qias vuab tsuab yog lub hauv paus ntawm lawv tej teeb meem. Thaum daws tau lub hauv paus ntawd lawm, tag nrho tib neeg tej teeb meem thiab tej kev nyuaj yuav tsis yog ib qho teeb meem loj ntxiv lawm. Yog li, tag nrho tib neeg tej kev nyuaj uas nyob rau hauv txoj kev xyaum ua raws li qhov tseeb ntawd ces yog vim lawv tus moj yam qias vuab tsuab xwb. Yog li ntawd, thaum koj xyaum ua raws li Vajtswv cov lus no, thiab nkag mus rau hauv qhov muaj tiag ntawm txoj kev xyaum ua raws li qhov tseeb ntawd, koj yuav paub ntau ntxiv txog qhov no hais tias: “Kuv muaj ib tug moj yam qias vuab tsuab. Kuv yog 'tus tib neeg ntiaj teb qias vuab tsuab' uas Vajtswv hais txog ntawd, Ntxwgnyoog ua rau kuv qias vuab tsuab ti nkaus txha, tus uas ua neej raws li tej moj yam qias vuab tsuab.” Qhov ntawd tsis yog qhov tshwm sim lod? (Yog.) Yog li ntawd, yog tib neeg yuav caum qhov tseeb thiab nkag mus rau hauv qhov tseeb qhov muaj tiag, mas qhov paub thiab qhov pom tias tej tsis zoo zoo li cas ntawd tsuas yog thawj kauj ruam ntawm txoj kev to taub lub neej txoj sia, thiab yog kauj ruam pib xwb. Yog li ntawd, vim li cas muaj coob tus tib neeg to taub ob peb qho tseeb tiam sis hos tsis tuaj yeem muab ob peb qho tseeb ntawd coj los xyaum ua li? Vim li cas lawv txhua tus tuaj yeem tshaj tawm ntau lo lus thiab tej kev qhuab qhia uas zoo heev, tiam sis tsis muaj peev xwm nkag mus rau hauv qhov tseeb qhov muaj tiag li? Puas yog hais tias lawv tsis to taub txog qhov tseeb li? Tsis yog—nws tsis yog li ntawd. Lawv qib lus thiab sob lus raws li txoj kev xav uas to taub txog qhov tseeb ntawd yeej txog li ntawd xwb. Lawv tus nplaig haj tseem hais yuam kev thaum lawv hais cov lus ntawd thiab. Lawv yeej muaj ib qho kev npaj siab, thiab lawv muaj ib lub siab uas txawj xav thiab tej kev ntshaw; lawv txhua tus puav leej txaus siab hlo siv zog rau qhov tseeb. Txawm li ntawd los vim li cas lawv thiaj li tsis tuaj yeem muab qhov tseeb coj los xyaum ua, tiam sis pheej tsis muaj peev xwm nkag mus rau hauv qhov tseeb qhov muaj tiag xwb? Qhov ntawd yog vim cov lus thiab cov ntawv thiab cov kev xav uas lawv to taub ntawd yeej tseem ua tsis tau kom pom tseeb nyob rau hauv lawv lub neej tiag tiag. Yog li, qhov teeb meem no los qhov twg los? Qhov teeb meem no lub hauv paus yog nyob rau hauv nruab nrab ntawm lawv tus moj yam qias vuab tsuab ntawd, thaiv txhua yam. Vim li ntawd thiaj li muaj ib txhia tib neeg uas tsis muaj kev to taub sab ntsujplig thiab tsis to taub hais tias qhov los caum qhov tseeb ntawd yog dab tsi, cov uas cog lus thiab tshaj tawm qhov lawv lub siab nyiam txhua zaus uas lawv ua tsis tiav los sis ntog los sis tsis tuaj yeem muab qhov tseeb coj los xyaum ua ntawd. Lawv cog lus thiab tshaj tawm zoo li no ntau heev, tiam sis tseem daws tsis tau qhov teeb meem ntawd thiab. Lawv pheej nres nyob rau ntawm theem uas kho qhov lawv lub siab nyiam thiab cog lus ntawd. Lawv tseem daig nyob rau ntawd. Muaj ntau tus tib neeg uas thaum lawv xyaum ua raws li qhov tseeb mas pheej ua raws li lawv lub siab nyiam thiab cog lus hais tias lawv yuav tau siv zog. Txhua hnub, lawv txhawb lawv tus kheej. Siv zog tau peb, plaub, tsib xyoos—es thaum kawg zoo li cas xwb? Ua tsis tau ib yam dab tsi tiav li, thiab txhua yam puav leej ua tsis tiav. Txoj kev qhuab qhia uas lawv to taub me ntsis ntawd siv tsis tau rau qhov twg li. Thaum muaj ib yam dab tsi los raug rau lawv, lawv tsis paub tias yuav saib qhov ntawd li cas thiab tsis pom tias qhov ntawd zoo li cas li. Lawv nrhiav tsis tau Vajtswv cov lus los ua lawv lub hauv paus; lawv tsis paub tias yuav saib txhua yam raws li Vajtswv cov lus li cas, thiab lawv tsis paub tias qhov tseeb twg hauv Vajtswv cov lus uas siv tau rau qhov teeb meem uas los raug rau lawv ntawd. Ces lawv thiaj li muaj kev ntxhov siab loj heev, thiab lawv ntxub lawv tus kheej, thiab lawv thov Vajtswv, thov kom Vajtswv muab lub zog thiab txoj kev ntseeg rau lawv ntxiv, tiam sis thaum kawg tseem txhawb lawv tus kheej xwb. Qhov ntawd tsis yog ib tug tib neeg ruam lod? (Yog.) Lawv tsuas zoo li cov me nyuam yaus xwb. Tseeb tiag, qhov tib neeg ua txhua hnub rau txoj kev caum qhov tseeb ntawd tsis mos liab li no lod? Tib neeg yeej ib txwm xav txhawb lawv tus kheej lub zog los caum qhov tseeb los ntawm qhov kev txiav txim siab raws li lawv lub siab nyiam thiab cog lus, los ntawm qhov kev txwv lawv tus kheej thiab kev txhawb lawv tus kheej, tiam sis qhov kev xyaum ua raws li qhov tseeb thiab nkag mus rau hauv qhov tseeb ntawd tsis yog los ntawm tib neeg txoj kev txhawb lawv tus kheej lub zog los. Tiam sis, koj yuav tsum nkag mus thiab xyaum ua raws li txoj kev thiab tej kauj ruam uas Kuv qhia koj, los ntawm qhov mus ib kauj ruam zuj zus yam khov khwb kho. Tsuas yog ua li no xwb mas koj thiaj li yuav pom txiaj ntsim; tsuas yog ua li no xwb mas thiaj li yuav yog koj xyaum ua raws li qhov tseeb thiab muaj peev xwm nkag mus rau hauv qhov tseeb qhov muaj tiag. Tsis muaj txoj kev txiav kom zam dhau qhov no li. Qhov no tsis tau txhais hais tias tsuav muaj siab me ntsis, muaj ib txoj kev ntshaw los siv koj tus kheej me ntsis, ib txoj kev npaj siab loj, thiab ib lub hom phiaj loj xwb, ces qhov tseeb yuav dhau los ua koj qhov muaj tiag lawm, tiam sis tus tib neeg ntawd yuav tsum kawm tej kev qhia uas tseem ceeb txog txoj kev nrhiav, kev nkag mus, kev xyaum ua, thiab kev zwm rau nyob rau hauv tus tib neeg ntawd lub neej tiag tiag, nyob rau hauv tib neeg, tej xwm txheej, thiab txhua yam. Tsuas yog tom qab kawm tej kev qhia no lawm xwb mas tib neeg thiaj li yuav kov raug qhov tseeb thiab Vajtswv cov lus, los sis tau ntsib tau pom qhov tseeb thiab Vajtswv cov lus, los sis paub qhov tseeb thiab Vajtswv cov lus ntawd. Yog ua tsis tau li ntawd, ces yam uas tib neeg yuav tau txais ces yog me ntsis ntawm txoj kev qhuab qhia los hliv rau hauv lawv lub siab uas tsis muaj dab tsi xwb, txawm lawv yuav txhawb lawv tus kheej lub siab, txhawb lawv tus kheej lub zog, thiab txhawb lawv tus kheej tau pes tsawg xyoo los xij. Lawv tsuas yog hnov txaus siab me ntsis ntawm sab ntsujplig uas nyob ib pliag xwb, tiam sis lawv yuav tsis tau txais ib yam dab tsi ntawm lub ntsiab tseem ceeb uas tseeb li. Qhov tsis tau txais ib yam dab tsi ntawm lub ntsiab tseem ceeb uas tseeb ntawd yog txhais li cas? Qhov ntawd txhais hais tias lub hauv paus ntawm koj tej kev saib tib neeg thiab txhua yam, thiab ntawm koj txoj kev coj kom zoo thiab tej kev ua ntawd, tsis yog Vajtswv cov lus. Tsis pom muaj Vajtswv ib lo lus ua lub hauv paus rau koj tej kev saib tib neeg thiab txhua yam los sis rau koj txoj kev pom txog txoj kev coj kom zoo thiab tej kev ua li. Koj ua ib lub neej tsis meej pem, ib lub neej uas tsis muaj kev pab, thiab koj yim raug teeb meem, qhov teeb meem uas tim tsum kom koj muab koj tej kev xam pom, koj tej hauv paus ntsiab lus thiab tus qauv ntawd nthuav tawm, ces yim paub koj txoj kev tsis paub dab tsi, kev ruam, kev tsis muaj dab tsi, thiab kev tsis muaj kev pab xwb. Raws li ib txwm mas, koj muaj peev xwm hais tau qee qhov kev qhuab qhia thiab qee sob lus uas yog yam yooj yim heev, cuag nkaus li koj to taub txhua yam. Tiam sis thaum muaj ib qho teeb meem tshwm tuaj, es muaj qee tus neeg tuaj nug koj tiag tiag seb koj yuav ua li cas thiab seb koj xav li cas, mas koj xav tsis tawm ib los li. Ib txhia yuav hais tias, “Tsis muaj lus hais lod? Tsis yog li ntawd—tsis yog hais tias kuv yuav tsis muaj cuab kav hais cov lus ntawd.” Yog li, vim li cas koj ho tsis hais? Qhov ntawd qhia hais tias koj tsis paub tseeb tias qhov koj ua ntawd xyov puas yog. Vim li cas koj thiaj li tsis paub tseeb txog qhov ntawd? Vim thaum koj tab tom ua yam ntawd, koj yeej tsis lees paub tias qhov txhawb yam uas koj tab tom ua ntawd yog dab tsi, thiab qhov koj ua li ntawd lub hauv paus ntsiab lus yog dab tsi, thiab koj haj yam tsis saib thiab ua qhov ntawd raws li Vajtswv cov lus, uas muaj qhov tseeb los ua koj tus qauv. Yog li ntawd, thaum muaj ib qho teeb meem tshwm tuaj, mas zoo li koj cia li tsis txawj dab tsi thiab qog qeb heev li. Ib txhia tib neeg mas tsis ntseeg. Lawv hais tias, “Kuv tsis zoo li ntawd. Kuv tau mus kawm ntawv nyob rau tsev kawm ntawv qib siab. Kuv kawm tiav qib mav xas tawj,” los sis “Kuv yog ib tug neeg txawj xav, ib tug xib fwb qib siab, ib tug neeg txawj ntse qib siab,” los sis “Kuv yog ib tus neeg paub kab lis kev cai. Koj muab yam uas kuv hais coj mus luam tawm los tau,” los sis “Kuv yog ib tug kws tshaj lij sau ntawv,” los sis “Kuv yog ib tug muaj peev xwm.” Qhov muab tej no hais tawm puas muaj txiaj ntsim rau koj? Qhov koj ua li ntawd tsis zoo. Feem ntau, tej no txhais hais tias koj muaj kev paub me ntsis xwb. Qhov yuav muab txoj kev paub ntawd siv rau hauv Vajtswv lub tsev ntawd mas hais tau nyuaj, tiam sis yam tsawg kawg paub tseeb hais tias koj txoj kev paub ntawd tsis zoo ib yam li qhov tseeb, thiab txoj kev paub ntawd tsis ua rau pom txog koj tus yeeb yam. Qhov hais tias koj txoj kev paub tsis ua rau pom txog koj tus yeeb yam ntawd txhais li cas? Tej yam zoo li no tsis yog koj lub neej; tej no yog tej uas nyob sab nraum koj lub cev xwb. Yog li, koj lub neej yog dab tsi? Koj lub neej yog ib lub neej uas lub hauv paus thiab tus qauv ntawd yog Ntxwgnyoog txoj hauv kev thiab lub tswv yim xwb, thiab tab txawm koj lub hlwb muaj kev paub, paub kab lis kev cai los xij, koj txwv tsis tau tej no thiab tswj tsis tau tej no li. Yog li ntawd, thaum muaj ib qho teeb meem tshwm tuaj, mas koj lub peev xwm thiab kev txawj ntse thiab koj txoj kev paub ntau yam ntawd yuav siv tsis tau kiag li—los sis tej zaum yuav yog qhov hais tias thaum koj tus moj yam qias vuab tsuab muaj ib qho tawm tuaj, mas koj txoj kev ua siab ntev, kev coj tus xeeb ceem zoo, kev paub, thiab tag nrho tej no yuav siv tsis tau ib qho li. Ces koj yuav hnov tias tsis muaj kev pab. Tag nrho tej no yog tej kev nyuaj uas tsis caum qhov tseeb thiab tsis muaj kev nkag mus rau hauv qhov tseeb qhov muaj tiag uas pom tseeb nyob rau hauv tib neeg. Qhov nkag mus rau hauv qhov tseeb ntawd puas yooj yim? Puas muaj ib qho muaj li? Nyob rau qhov twg? Tsis muaj qhov nyuaj, yog koj nug Kuv. Tsis txhob mob siab rau qhov kev txiav txim siab raws li koj lub siab nyiam los sis kev cog lus. Tej ntawd tsis muaj nuj nqis. Thaum koj muaj sij hawm los txiav txim siab raws li koj lub siab nyiam thiab cog lus ntawd, muab lub sij hawm ntawd los siv zog rau Vajtswv cov lus. Xav txog tej uas lawv hais, seb tej uas lawv hais ntawd qhov twg raug koj tus yam ntxwv tam sim no. Qhov npaj ua raws li koj lub siab nyiam ntawd mas tsis muaj nuj nqis. Txawm koj yuav ua rau koj lub taub hau to es cia ntshav ntws los, npaj ua raws li koj lub siab nyiam, los yeej tseem tsis muaj nuj nqis li. Qhov ntawd daws tsis tau teeb meem. Koj dag tib neeg thiab dab li ntawd tau, tiam sis koj dag tsis tau Vajtswv. Vajtswv tsis txaus siab rau qhov uas koj lub siab nyiam ntawd. Koj npaj ua raws li koj lub siab nyiam pes tsawg zaus lawm? Koj cog lus, ces tom qab ntawd koj tsis ua raws li cov lus cog tseg ntawd, ces thaum tsis ua raws li cov lus cog tseg ntawd lawm, rov cog lus dua, thiab rov qab tsis ua raws li cov lus cog tseg ntawd dua. Qhov ntawd ua rau koj yog hom tib neeg dab tsi? Thaum twg koj mam li ua raws li koj lo lus? Qhov koj puas ua raws li koj lo lus, los sis qhov koj puas npaj ua raws li koj lub siab nyiam ntawd, nws tsis tseem ceeb. Qhov koj puas cog lus ntawd los kuj tsis tseem ceeb ib yam nkaus thiab. Qhov tseem ceeb ntawd yog dab tsi? Nws yog qhov hais tias koj muab qhov tseeb uas koj to taub ntawd coj los xyaum ua kiag tam sim no. Tab txawm hais tias qhov ntawd yog qhov tseeb uas pom tau tseeb tshaj plaws, yog qhov tseeb uas raug lwm tus lub qhov muag tsawg tshaj plaws thiab koj tus kheej mob siab rau tsawg tshaj plaws los xij, xyaum ua raws li qhov tseeb ntawd kiag tam sid—nkag mus rau hauv qhov tseeb ntawd kiag tam sid. Yog koj ua li ntawd, koj yuav nkag mus rau hauv qhov tseeb qhov muaj tiag kiag tam sid, thiab kiag tam sim ntawd, koj yuav pib taug txoj kev caum qhov tseeb. Koj yuav nyob rau ntawm qhov dhau los ua ib tug uas caum qhov tseeb lawm. Nyob rau lub hauv paus ntawd, koj yuav muaj peev xwm dhau los ua ib tug tib neeg uas saib tib neeg thiab txhua yam, thiab tus uas coj lawv tus kheej kom zoo thiab ua raws li Vajtswv cov lus, uas muaj qhov tseeb ua lawv tus qauv ntawd sai. Ntshe yuav zoo heev—muaj nuj nqis heev!

Tom qab kawm txog tej lus hais txog tus cwj pwm zoo uas nyob rau hauv txoj kab lis kev cai lawm, nej puas muaj ib qho kev to taub txog tej ntawd li? Nej yuav tsum ua li cas rau hom cwj pwm zoo no? Tej zaum ib txhia tib neeg yuav hais tias, “Txij hnub no mus, kuv yuav tsis ua ib tug neeg uas muaj kev kawm siab thiab paub qab paub hau, paub tab thiab paub cai, los sis paub kev paub cai lawm. Kuv yuav tsis ua ib tug tib neeg uas hu ua tus neeg 'zoo' lawm; kuv yuav tsis ua tus uas hwm cov laus los sis saib xyuas cov hluas lawm; kuv yuav tsis ua ib tug tib neeg uas siab dawb siab zoo, thiab nyiam ua phooj ywg lawm. Tej ntawd tsis muaj ib qho yog txoj kev nthuav tawm li ib txwm nthuav tawm ntawm txoj kev ua neej li; qhov ntawd yog tus cwj pwm dag ntxias uas cuav thiab tsis muaj tseeb xwb, thiab qhov ntawd mus tsis txog qib xyaum ua raws li qhov tseeb. Kuv yuav ua hom tib neeg twg? Kuv yuav ua ib tug tib neeg coj ncaj; kuv yuav pib los ntawm qhov ua ib tug tib neeg coj ncaj. Nyob rau hauv kuv cov lus hais, tej zaum kuv tsis muaj kev kawm, tsis to taub kev cai, tsis muaj kev paub, thiab lwm tus saib tsis taus, tiam sis kuv yuav hais kom ncaj, los ntawm lub siab dawb paug, yam tsis muaj qhov cuav li. Yog ib tug tib neeg lawm yog li ntawd nyob rau hauv kuv tej kev ua, kuv yuav tsis ua cuav thiab yuav tsis ua txuj. Txhua zaus uas kuv hais lus, ces yog hais tawm hauv lub siab tuaj—kuv yuav hais li kuv xav hauv siab. Yog kuv ntxub ntxaug leej twg, kuv yuav saib kuv tus kheej kom meej thiab yuav tsis ua ib yam dab tsi uas ua rau lawv mob siab; kuv yuav ua tej uas zoo nkaus xwb. Thaum kuv hais lus, kuv yuav tsis xav txog kuv tus kheej qhov txiaj ntsim, thiab kuv yuav tsis ntshai tsam kuv poob koob poob npe los sis poob ntsej muag. Tshaj ntawd ntxiv, kuv yuav tsis muaj qhov kev npaj siab los ua kom tib neeg muab kuv saib rau lub sam xeeb. Kuv tsuas yog muab qhov seb Vajtswv puas zoo siab ua qhov tseem ceeb xwb. Qhov tsis ua rau tib neeg mob siab ntawd yuav yog kuv txoj kab kem. Yam kuv ua yuav ua raws li Vajtswv tej kev tim tsum; kuv yuav tsis ua tej uas rhuav tshem lwm tus, thiab kuv yuav tsis ua tej uas rhuav tshem tej kev ntshaw ntawm Vajtswv lub tsev. Kuv tsuas ua tej uas muaj txiaj ntsim rau lwm tus, tsuas ua tus tib neeg coj ncaj, thiab tus tib neeg uas ua rau Vajtswv zoo siab xwb.” Qhov no tsis yog ib tug neeg hloov pauv lod? Yog lawv yeej xyaum ua raws li cov lus no tiag tiag, ces lawv yeej yuav hloov pauv tau tiag tiag. Lawv lub neej yav tom ntej thiab txoj hmoo yuav hloov mus rau qhov zoo dua. Tsis ntev lawv yuav pib taug txoj kev caum qhov tseeb, tsis ntev yuav tau nkag mus rau hauv qhov muaj tiag ntawm qhov tseeb, thiab tsis ntev yuav dhau los ua ib tug tib neeg uas muaj kev cia siab tias yuav dim. Qhov no yog ib qho zoo, yog yam zoo. Qhov ntawd puas tim tsum kom koj npaj ua raws li koj lub siab nyiam los sis cog lus? Qhov ntawd tsis tim tsum dab tsi li: Kuj tsis tim tsum kom koj npaj ua raws li koj lub siab nyiam rau Vajtswv; thiab tsis kom koj maj nroos muab koj tej kev ua txhaum, tej kev ua yuam kev, thiab txoj kev ntxeev siab yav tas los los lees txim rau Vajtswv thiab thov kom Nws zam txim li thiab. Tsis tas yuav ua qhov kom ncaj nruab nrab zoo li no. Cia li hais yam uas tseeb tawm hauv lub siab tuaj kiag tam sim no, thiab ua yam uas ruaj khov, yam tsis muaj tej lus dag los sis lub tswv yim dag xwb. Ces koj yuav ua tau qee yam tiav, thiab thiaj li muaj kev cia siab tias koj yuav dhau los ua ib tug tib neeg coj ncaj. Thaum ib tug tib neeg twg dhau los ua ib tug neeg coj ncaj lawm, lawv tau txais qhov tseeb qhov muaj tiag thiab pib ua neej li ib tug tib neeg lawm. Cov tib neeg zoo li no yog cov uas Vajtswv nyiam. Qhov no, yeej muaj tseeb.

Lub Ob Hlis 5, 2022

Lus taw qhia:

a. Koos Loos yog ib zaj dab neeg uas cov neeg Suav paub zoo, uas ib txwm siv los qhia me nyuam yaus txog qhov muaj nuj nqis ntawm txoj kev paub tab paub cai thiab txoj kev hlub kwv hlub tij. Zaj dab neeg ntawd qhia txog qhov nws tsev neeg tau txais ib tawb txiv, es tus me tub Koos Loos uas muab plaub xyoos ntawd tau muab cov txiv loj zog rau nws cov tij laug hlob hos muab cov me tshaj plaws rau nws tus kheej li cas, thiab thaum twg.