Qhov Nrhiav Qhov Tseeb Yog Dab Tsi (4)

Cia peb pib los ntawm qhov rov qab hais txog yam uas peb tau kawm txog nyob rau hauv peb qhov kev sib txoos ua ke tag los ntawd. (Nyob rau hauv peb qhov kev sib txoos ua ke tag los ntawd, mas peb tau kawm txog lub ncauj lus uas hais tias “Qhov Nrhiav Qhov Tseeb Yog Dab Tsi.” Peb xub mob siab rau lo lus nug no uas hais tias: “Vim tej uas tib neeg suav hais tias zoo thiab yog ntawd tsis yog qhov tseeb, yog li ntawd vim li cas tib neeg thiaj li tseem tuav rawv tej ntawd cuag nkaus li tej ntawd yog qhov tseeb thiab xav hais tias qhov ua li ntawd yog lawv tab tom caum qhov tseeb lawm?” Nej tau hais peb yam txog qhov no. Feem ntau nej tham txog thawj yam ntawm peb yam ntawd, uas yeej yog kiag li tej uas tib neeg suav hais tias zoo thiab yog nyob rau hauv lawv tej kev xav phem.) Nyob rau hauv peb qhov kev sib txoos ua ke tag los ntawd, feem ntau peb kawm txog thawj yam xwb. Peb hais txog tej uas tib neeg suav hais tias zoo thiab yog nyob rau hauv lawv tej kev xav phem, thiab peb muab tej ntawd faib ua ob qho dav dav xws li: qhov ib yog ua tus neeg coj “cov cwj pwm zoo,” qhov ob yog ua tus neeg “coj zoo.” Cov piv txwv uas Kuv tau hais txog thawj yam ntawm “cov cwj pwm zoo” ntawd tag nrho yog rau qhov piv txwv xws li: ua tus neeg muaj kev kawm siab thiab paub qab paub hau, ua tus neeg paub tab thiab paub cai, ua tus neeg paub kev paub cai, hwm cov laus thiab saib xyuas cov hluas, ua tus neeg siab dawb siab zoo, thiab ua tus neeg nyias ua phooj ywg. Peb tseem tsis tau kawm txog qhov ob uas yog, “coj zoo” ntawd. Muaj qee qhov teeb meem uas peb yuav tsum tau rov qab tshuaj xyuas me ntsis tom qab kawm txog tej teeb meem ntawd lawm, ua kom paub thiab cais tau qhov tseeb thiab tej hauv paus ntsiab lus ntawm qhov kev kawm ntawd kom zoo, ua kom txhua yam ntsiab thiab meej. Ua li no yuav ua rau nej to taub qhov tseeb yooj yim dua. Qhov peb kawm tag los ntawd mas hais txog qee yam dav dav, nrog rau qee yam ncaj ncaj thiab. Saib zoo li ntau heev, tiam sis tseeb tiag, peb tsuas kawm txog qee yam ncaj ncaj uas nyob rau hauv tej yam dav dav ntawd, thiab peb muab tej uas ncaj ncaj ntawd hais kom luv zog, kom qhov kev kawm ntawd thiaj li yuav meej thiab tseeb me ntsis tuaj xwb. Peb tau hais rau qhov piv txwv txog cov cwj pwm zoo, tiam sis peb tsis tau kawm kom ntxaws ntxaws txog txhua txhua tus cwj pwm ntawd ib tug zuj zus. Nyob rau hauv cov piv txwv uas ua tus neeg muaj kev kawm siab thiab paub qab paub hau ntawd yog ib qho uas qhia txog yam uas tib neeg suav hais tias yog thiab zoo nyob rau hauv lawv tej kev xav phem. Peb kawm me ntsis ntxiv txog qhov piv txwv no. Lwm qhov tsuas zoo ib yam li qhov piv txwv no xwb; nej siv lub tswv yim uas zoo ib yam li ntawd los tshuaj xyuas thiab cais tej ntawd los tau.

Hnub no, ua ntej peb mus rau lub ncauj lus ntawm peb qhov kev kawm, kuv yuav qhia ob zaj lus luv luv rau nej tso. Nej puas nyiam mloog tej zaj lus thiab? (Nyiam.) Qhov mloog tej zaj lus ntawd mas tsis sab li, thiab tsis tas yuav ua tib zoo mloog los tau. Muab hais tiag tiag ces nws tsis nyuaj li, thiab kuj zoo mloog heev thiab. Yog li ntawd, ua tib zoo mloog, thiab thaum nej mloog lub ntsiab ntawm ob zaj lus ntawd, kuj yuav tau xav hais tias vim li cas kuv thiaj li hais ob zaj lus ntawd thiab—nyob rau hauv ob zaj lus ntawd muaj tej tswv yim uas tseem ceeb dab tsi kiag, los sis lwm lo lus mas hais tias, yam muaj dab hau uas tib neeg tau txais los ntawm qhov mloog tej zaj lus ntawd yog dab tsi. Yog li ntawd—cia peb pib peb ob zaj lus ntawd. Ob zaj lus no ib zaj yog hais txog Xausxaus hos ib zaj yog hais txog Xaustsib.

Zaj Lus uas hais txog Xausxaus thiab Zaj Lus uas hais txog Xaustsib

Xausxaus tau mob nws ob lub qhov muag tau li ib ntus, ua rau pom kev plooj plooj, saib tsis tau qhov ci, kua muag los thaum raug cua, nws xav hais tias muaj qee yam nyob rau hauv nws ob lub qhov muag, thiab lwm yam xws li tej uas yuav ua rau muaj mob. Nws mos ob lub qhov muag, tiam sis pab tsis tau dab tsi ntau. Xausxaus tsis paub tias yog ua li cas rau nws lawm. Nws xav hais tias, “Kuv ob lub qhov muag yeej tsis txeev muaj teeb meem dua li, thiab kuv yeej pom kev. Yog ua li cas lawm?” Thaum nws muab iav los saib, nws ob lub qhov muag yeej tseem zoo li qub—tsuas yog liab me ntsis, thiab qee zaum muaj ntshav nce me ntsis xwb. Qhov no ua rau Xausxaus tsis paub tias yog vim li cas, thiab tsis tshua kaj siab. Thaum qhov mob ntawd nyuam qhuav pib mas nws tsis tshua mob siab rau qhov mob ntawd, tiam sis thaum tej uas yuav ua rau nws muaj mob ntawd pib nce zuj zus tuaj, nws mam li tiv tsis taus ntxiv li lawm. Nws mam li xav hais tias: “Puas tsim nyog kuv mus ntsib kws kho mob, los sis kuv sim nrhiav kuv kom paub xwb? Qhov nrhiav kom paub txog qhov no mas ntshe yuav yog ib qho nyuaj, thiab tej zaum kuv yuav tshuaj xyuas tsis tau tias qhov teeb meem ntawd yog dab tsi kiag. Kuv cia li mus ntsib kiag kws kho mob xwb ntshe yuav zoo dua; nws thiaj li paub tseeb tias yuav tshuaj xyuas li cas thiaj li paub tus mob.” Yog li ntawd, Xausxaus thiaj li mus ntsib kws kho mob. Tus kws kho mob tau tshuaj xyuas nws thiab pom tias tsis muaj teeb meem loj. Tus kws kho mob thiaj li tau muab qee yam tshuaj rau qhov muag rau Xausxaus thiab hais kom Xausxaus saib xyuas nws ob lub qhov muag kom zoo thiab tsis txhob siv ob lub qhov muag heev dhau. Xausxaus zoo siab heev uas paub hais tias nws ob lub qhov muag tsis muaj teeb meem loj. Tom qab nws rov qab los txog tsev, Xausxaus siv cov tshuaj rau qhov muag ntawd txhua hnub, raws li lub sij hawm thiab ntau npaum li cas raws li tus kws kho mob tau kom nws ua, ces ob peb hnub tom qab, tej uas yuav ua rau nws muaj mob ntawd txawm zoo tuaj lawm. Tshem tau qhov hnyav hnyav hauv Xausxaus lub siab mus lawm: Nws xav hais tias yog tshuaj kho tau qhov mob ntawd, ntshe qhov mob ntawd tsis loj. Tiam sis qhov xav li ntawd kav tsis ntev, ces tsis ntev tom qab ntawd, tej uas yuav ua rau nws muaj mob ntawd rov qab muaj dua lawm. Xausxaus rau nws cov tshuaj rau qhov muag ntawd ntau zog ntxiv, ces nws ob lub qhov muag txawm zoo me ntsis, thiab tej uas yuav ua rau nws muaj mob ntawd cia li zoo lawm. Tiam sis ob peb hnub tom qab, nws ob lub qhov muag rov qab zoo li qub, thiab tej uas yuav ua rau muaj mob ntawd txawm phem dua tuaj thiab muaj tas li li lawm. Xausxaus tsis nkag siab qhov ntawd li, thiab ua rau nws rov qab tsis kaj siab kiag tam sid: “Kuv yuav ua li cas? Cov tshuaj uas kws kho mob muab rau kuv ntawd kho tsis tau lawm. Qhov no puas yog txhais hais tias kuv ob lub qhov muag mob qee yam loj lawm? Kuv cia li tsis quav ntsej qhov no tsis tau.” Zaum no nws txiav txim siab tsis mus ntsib kws kho mob dua los sis mus sab laj rau kws kho mob txog qhov mob ntawm nws ob lub qhov muag lawm. Tiam sis, nws mam li kho nws. Nws mus rau hauv o-lais ces txawm pom txhua yam yeeb kaj duab thiab tej uas hais txog tej uas yuav ua rau nws muaj mob ntawd. Feem ntau lawv hais tias cov mob no yog los ntawm qhov siv yus ob lub qhov muag tsis yog lawm, tias nws yuav tsum tau saib xyuas nws ob lub qhov muag, thiab tias qhov siv nws ob lub qhov muag kom yog ntawd mas haj yam tseem ceeb tshaj. Xausxaus xav hais tias qhov lus qhia no pab tsis tau, thiab tias qhov lus qhia no yuav daws tsis tau nws qhov teeb meem. Yog li ntawd, nws thiaj li pheej nrhiav txuas ntxiv kom paub. Muaj ib hnub, nws tau mus pom ib qho uas hais tias tej uas yuav ua rau nws muaj mob ntawd tej zaum yog cov hlab ntsha uas txuas rau lub ntsiab muag ntawd to lawm, es thiaj li ua rau lub qhov muag dawb tsis pom kev. Tej zaum kuj yog hais tias tej uas yuav ua rau nws muaj mob ntawd ua rau lub qhov muag plooj tsis pom kev tseeb thaum tej uas yuav ua rau muaj mob ntawd loj tuaj thiab. Thaum Xausxaus nyeem cov lus uas hais tias “qhov muaj dawb tsis pom kev” thiab “qhov muag plooj tsis pom kev tseeb,” mas ua rau nws lub taub hau hnov nrov vig voog li. Txhua yam tsaus nti ua rau nws yuav luag tsaus muag, nws lub siab dhia pig poog hauv nws lub hauv siab. “Au, Vajtswv, yog ua li cas lawm? Kuv ob lub qhov muag yeej yuav dawb tsis pom kev thiab plooj tsis pom kev tseeb tiag tiag li lod? Kuv hnov hais tias qhov qhov muag plooj tsis pom kev tseeb ntawd mas yuav tsum tau muab phais, thiab tias yog koj muaj qhov qhov muag dawb tsis pom kev ntawd, mas koj yuav dig muag! Qhov ntawd yuav yog qhov kawg ntawm kuv lawm xwb, tsis yog lod? Kuv tseem hluas—yog kuv dig muag lawm no, kuv yuav ua li cas ua neej mus kom tag kuv lub sim neej? Thaum dig muag lawm kuv yuav muaj kev cia siab rau dab tsi txuas ntxiv? Tsis yog kuv yuav tau ua kuv lub neej nyob rau hauv txoj kev tsaus ntuj xwb lod?” Thaum Xausxaus saib cov lus uas hais tias “qhov muag dawb tsis pom kev” thiab “qhov muag plooj tsis pom kev tseeb” ntawd nyob rau hauv nplooj ntawv, nws pom hais tias nws cia li nyob twj ywm tsis tau ntxiv lawm. Nws nyuaj siab, thiab nws muaj kev ntxhov siab thiab poob siab tuaj. Nws tsis paub tias yuav ua li cas, los sis xyov nws yuav ua li cas rau lub sij hawm tom ntej. Nws tu siab heev thiab txhua yam uas nyob rau ntawm nws hauv ntej cia li ploj tag li lawm. Thaum ntsib qhov teeb meem no, Xausxaus cia li tsis muaj kev cia siab li lawm. Nws tsis muaj siab ua neej, thiab nws tsis muaj zog ua nws tes dej num li. Nws tsis xav rov qab mus ntsib kws kho mob los sis hais qhov mob ntawm nws ob lub qhov muag rau lwm tus tib neeg li. Nws yeej ntshai tsam tib neeg paub hais tias nws ob lub qhov muag yuav dawb tsis pom kev los sis plooj tsis pom kev tseeb. Vim li ntawd, Xausxaus thiaj li ntxhov siab, qaug zog, thiab paub tsis meej ib hnub dhau ib hnub. Nws tsis muaj cuab kav twv ua ntej los sis npaj rau nws lub neej yav tom ntej li, vim nws xav hais tias, lub neej yav tom ntej mas yog ib yam uas tsis zoo, thiab txaus tu siab heev. Nws ua nws lub neej muaj kev ntxhov siab thiab tsis muaj kev cia siab li, muaj lub siab uas ntshai heev. Nws tsis xav thov Vajtswv los sis nyeem Vajtswv cov lus, thiab nws yeej tsis xav nrog lwm tus tib neeg tham li. Cuag nkaus li nws yog dua tus tib neeg li lawm. Tom qab qhov no li ob peb hnub lawm, Xausxaus muaj ib qho kev xav tam sim ntawd hais tias: “Qhov no zoo li yog ib qho kev ntxhov quav niab rau kuv. Vim kuv lub neej yav tom ntej tsis muaj dab tsi thiab Vajtswv tsis yog tiv thaiv kuv hos, cia kuv tau tus kab mob no xwb, yog li ntawd vim li cas kuv thiaj li yuav tsum ua kuv tes dej num kom zoo txuas ntxiv? Txoj sia luv luv xwb; vim li cas kuv ho tsis siv lub hwv tsam no los ua qee yam uas kuv nyiam thiab kho kuv tus kheej thaum kuv tseem pom kev? Vim li cas kuv lub neej ho yuav tsum tau ua kom sab heev? Vim li cas kuv thiaj li ua rau mob kuv tus kheej thiab tsis ua tib zoo kho kuv tus kheej li?” Yog li ntawd, thaum Xausxaus noj tsis qab, pw tsis tsaug zog, los sis tsis ua hauj lwm lawm, nws siv nws lub sij hawm feem ntau rau hauv ees taws nev, kov nkees, saib yeeb yaj duab, saib kev ua yeeb yam, thiab thaum nws tawm mus lawm los, nws haj tseem nqa nws lub xov tooj nrog nws thiab kov nkees tas li li thiab. Nws siv nws lub sij hawm nyob rau hauv ees taws nev xwb. Yog li ntawd, thaum nws ua li ntawd lawm, qhov mob hauv nws ob lub qhov muag mob loj zuj zus tuaj, thiab tej uas yuav ua rau nws muaj mob ntawd loj zuj zus tuaj thiab. Thaum nws tiv tsis taus li lawm, nws siv nws cov tshuaj rau qhov muag ntawd los rau txo tej uas yuav ua rau nws muaj mob ntawd, thiab thaum ob lub qhov muag ntawd zoo me ntsis lawm, nws rov qab mus rau hauv ees taws nev, mus saib tej uas nws nyiam lawm. Nov yog nws txoj hauv kev los txo txoj kev ntshai thiab kev poob siab uas nyob rau hauv nws lub siab, thiab nov yog nws txoj hauv kev los ua kom dhau sij hawm, kom dhau nws lub sij hawm. Thaum twg mob nws ob lub qhov muag thiab tej uas yuav ua rau nws muaj mob ntawd loj tuaj, mas Xausxaus nco ntsoov saib mus rau cov tib neeg uas nyob ib puag ncig nws thiab xav hais tias, “Lwm tus tib neeg siv lawv ob lub qhov muag li kuv thiab. Vim li cas lawv ob lub qhov muag ho tsis liab, thiab los kua muag tas li, thiab zoo li muaj ib yam dab tsi nyob rau hauv lawv ob lub qhov muag? Vim li cas kuv thiaj li yog tus muaj tus kab mob no? Qhov no tsis yog Vajtswv xaiv ntsej muag lod? Kuv tau siv kuv tus kheej ntau heev rau Vajtswv; vim li cas Nws thiaj li tsis tiv thaiv kuv? Vajtswv tsis ncaj ncees hlo li! Vim li cas lwm tus ho muaj hmoo txaus uas tau txais Vajtswv txoj kev tiv thaiv, tiam sis kuv ho tsis tau txais? Vim li cas txhua yam hmoov tsis zoo ntawd pheej los raug rau kuv xwb?” Xausxaus yim xav, ces nws yim npau taws thiab yim meem txom, thiab nws yim npau taws, ua rau nws yim xav siv kev lom zem hauv o-lais thiab lub sij hawm ua si los tshem nws txoj kev iab siab thiab kev npau taws tawm mus xwb. Nws xav muab tus kab mob ntawm nws lub qhov muag tshem tawm mus kom sai li sai tau, tiam sis nws yim xav muab nws txoj kev iab siab thiab kev npau taws tshem tawm mus, ces nws yim tsis muaj kev xyiv fab thiab kev thaj yeeb, thiab nws yim mloog zoo li tsis muaj hmoo li lawm, txawm nws yuav nyob rau hauv ees taws neev npaum li cas los xij. Thiab nyob rau hauv nws lub siab, nws yws hais tias Vajtswv tsis ncaj ncees. Sij hawm dhau mus zoo li no, ib hnub dhau ib hnub. Qhov mob ntawm Xausxaus lub qhov muag ntawd tsis zoo tuaj, thiab nws lub siab xav phem zuj zus. Xausxaus mloog zoo li tsis muaj zog thiab tsis muaj hmoo tawm tsam tus kab mob ntawd li lawm. Xausxaus lub neej mus zoo li no lawm xwb. Tsis muaj leej twg pab tau nws, thiab nws tsis nrhiav kev pab li. Nws cia li ua neej txhua hnub yam po huab niab, ntxhov siab, thiab tsis muaj zog li lawm xwb.

Hais los ntawd yog Xausxaus zaj. Peb hais los tso tseg li ntawd xwb. Txuas ntxiv yog Xaustsib zaj.

Thaum tab tom ua nws tes dej num, Xaustsib ntsib tib qho teeb meem li Xausxaus. Nws pom kev plooj plooj, thiab nws ob lub qhov muag pheej mloog zoo li o thiab mob. Qhov no feem ntau pheej mloog zoo li muaj ib yam dab tsi nyob rau hauv nws ob lub qhov muag, thiab tom qab nws mos ob lub qhov muag ntawd tag los tsis hnov zoo li. Nws xav hais tias, “Yog ua li cas rau ntawm no lawm? Kuv ob lub qhov muag yeej ib txwm zoo heev; Kuv yeej tsis tau mus ntsib kws kho qhov muag dua li. Tsis ntev los no ua li cas rau kuv ob lub qhov muag lawm? Puas yuav muaj teeb meem rau kuv ob lub qhov muag?” Thaum nws ntsia hauv daim iav, nws ob lub qhov muag yeej tsis txawv yav tas los li. Nws tsuas yog hnov kub kub hauv nws ob lub qhov muag xwb, thiab thaum nws siv zog ntsais muag, mas ob lub qhov muag haj yam mob tuaj thiab o, thiab ob lub qhov muag pib los dej. Xaustsib xav hais tias nws ob lub qhov muag muaj ib yam dab tsi lawm xwb, thiab nws xav hais tias, “Kev mob qhov muag mas yog ib qho loj heev. Kuv yuav tsum tsis txhob tsis quav ntsej qhov no. Txawm li ntawd los, kuv tsis tu siab npaum li ntawd, thiab qhov ntawd tsis tau cuam tshuam rau kuv lub neej los sis kuv tes dej num. Tsis ntev los no pawg ntseeg muaj hauj lwm ntau heev, yog li ntawd qhov mus ntsib kws kho mob ntshe yuav muaj kev cuam tshuam rau kuv tes dej num. Kuv mam li nrhiav ntaub ntawv txog qhov ntawd thaum kuv muaj sij hawm xwb.” Tom qab txiav txim siab li no lawm, Xaustsib thiaj li nrhiav cov ntaub ntawv uas hais txog qhov mob qhov muag ntawd thaum nws muaj qee lub sij hawm so tsis ua nws tes dej num, yog li ntawd nws thiaj li kawm paub hais tias nws ob lub qhov muag tsis muaj teeb meem loj—qhov nws tsis kaj siab ntawd twb tsis kaj siab los ntev lawm, vim siv nws ob lub qhov muag ntau dhau lawm. Yog thaum siv lub qhov muag kom zoo, saib xyuas kom tsim nyog, thiab dhia ua si kom haum, ces nws ob lub qhov muag yuav rov qab los zoo li qub. Xaustsib zoo siab heev thaum nws nyeem qhov ntawd. “Nws tsis yog ib qho teeb meem loj, yog li ntawd tsis tas yuav txhawj txog. Qhov no hais tias kuv yuav tsum tau siv kuv ob lub qhov muag kom zoo thiab siv ob lub qhov muag kom yog—yog li ntawd kuv cia li tshawb xyuas qhov tias yuav siv kuv ob lub qhov muag kom zoo li cas thiab kuv yuav tsum ua li cas kom ob lub qhov muag rov qab los zoo li qub xwb.” Ces nws txawm nrhiav cov ntaub ntawv uas hais txog qhov mob qhov muag thiab nws xaiv ob peb lub tswv yim thiab tej kev uas haum rau nws qhov mob los ntawm cov ntaub ntawv ntawd. Txij thaum ntawd los, muaj ib qho ntxiv rau nws lub neej thiab txoj kev ua nws tes dej num li ib txwm ua lawm, Xaustsib muaj ib txoj hauj lwm tshiab uas yog: tes hauj lwm saib xyuas nws ob lub qhov muag. Nws xyaum ua li cov kev kho qhov muag uas nws tau kawm txhua hnub ntawd. Thaum nws sim ua li cov kev kho ntawd lawm, nws xav paub seb cov kev kho ntawd txo puas tau tej uas yuav ua rau nws ob lub qhov muag muaj mob. Tom qab sim cov kev kho ntawd thiab sim ua li cov kev kho ntawd lawm, Xaustsib mloog zoo li qee qhov ntawm cov tswv yim ntawd mas siv tau hauj lwm, hos lwm qhov ces tsuas yog hais tau zoo xwb, siv tsis tau—lwm qhov kho tsis tau nws qhov mob ib qho li. Yog li ntawd, raws li nws tej kev tshawb pom txij thaum pib los ntawd, Xaustsib xaiv ob peb qho tswv yim thiab cov kev kho kom lub qhov muag zoo uas hauv rau nws. Nws xyaum siv lub qhov muag kom zoo thiab saib xyuas lub qhov muag txhua hnub, thaum uas yuav tsis ua rau nws tes dej num qeeb uas los ua li ntawd. Tom qab ntawd ib ntus, Xaustsib ob lub qhov muag yeej zoo zuj zus tuaj lawm tiag tiag; tej uas yuav ua rau nws muaj mob dhau los ntawd uas yog—qhov muag liab, qhov muag mob, qhov hnov kub kub, thiab lwm yam ntawd—maj mam pib ploj mus, thiab tej ntawd tshwm tsawg zuj zus lawm. Xaustsib mloog zoo li muaj hmoo heev. “Ua Vajtswv tsaug rau Nws txoj kev coj. Nov yog Nws txoj hmoov hlub thiab Nws txoj kev coj kev.” Txawm nws ob lub qhov muag tsis tshua muaj mob thiab tej uas yuav ua rau nws muaj mob ntawd tsis tshua loj lawm los xij, Xaustsib yeej tseem xyaum ua raws li cov tswv yim uas saib xyuas qhov muag ntawd thiab siv nws ob lub qhov muag kom yog yam rau siab ntso txuas ntxiv. Ces tom qab ntawd ib ntus, nws ob lub qhov muag rov qab los zoo li qub tag nrho lawm. Los ntawm qhov kev ntsib kev pom no, Xaustsib tau kawm paub txog qee txoj kev uas ua kom nws ob lub qhov muag zoo, thiab nws kuj kawm paub tias yuav siv nws ob lub qhov muag li cas thiab ua neej kom yog li cas thiab. Nws ntxiv qee qhov kev paub uas zoo, thiab kev paub hauv nws tus kheej rau nws txoj kev ua neej. Xaustsib zoo siab heev. Nws xav hais tias txawm nws tau ntsib qhov siab thiab qhov qis thiab tau ntsib tau pom qee yam uas txawv txawv los xij, thaum kawg nws tau txais qee yam kev paub txog lub neej uas muaj nqis los ntawm qhov ntawd. Thaum twg uas muaj cov tib neeg uas nyob ib puag ncig nws hais tias lawv ob lub qhov muag mob, tias lawv ob lub qhov muag o thiab mob, mas Xaustsib qhia lawv ncaj ncaj txog qhov nws tau raug los thiab tej tswv yim thiab cov kev kho uas nws tau siv lawm. Vim Xaustsib txoj kev pab, cov uas muaj tej uas yuav ua rau lawv muaj mob qhov muag ntawd kuj tau kawm paub tej kev kho thiab tej tswv yim los siv lawv ob lub qhov muag kom yog thiab ua kom lawv ob lub qhov muag zoo lawm thiab. Xaustsib zoo siab, thiab nws pab tau cov tib neeg uas nyob ib puag ncig nws heev. Yog li ntawd, lub sij hawm ntawd, Xaustsib thiab lwm tus thiaj li tau txais qee yam kev paub uas tib neeg tsim nyog paub nyob rau hauv lawv lub neej uas yog tib neeg. Txhua tus ua hauj lwm thiab ua lawv tej dej num ua ke yam zoo siab thiab xyiv fab heev. Xaustsib tsis xav phem los sis qaug zog vim nws lub qhov muag muaj mob, thiab nws tsis yws txog nws txoj hmoo phem. Txawm nws pom qee qhov kev ceeb toom thaum nws nrhiav cov ntaub ntawv uas Xausxaus tau ua ntawd los xij, nws tsis tshua quav ntsej txog tej ntawd li. Tiam sis, nws rau siab ntso thiab ua tib zoo kho nws qhov mob xwb. Thaum tib qho mob ntawd tshwm sim rau Xausxaus, mas nws pheej ntxhov siab, qaug zog thiab paub tsis meej. Tiam sis Xaustsib mas, tsis yog tsis muaj kev ntxhov siab thiab kev paub tsis meej xwb, nws kuj tsis muaj kev chim siab rau Vajtswv li thiab—thiab nws haj tseem tau txais txiaj ntsim, kev nquag, thiab tus cwj pwm zoo rau lub neej los ntawm tej xwm txheej no thiab. Nws pab nws tus kheej, thiab nws pab lwm tus.

Ob zaj lus ntawd yog zaj lus uas hais txog Xausxaus thiab zaj lus uas hais txog Xaustsib. Tam sim no nej tau hnov nkawv ob zaj lus lawm. Nej puas to taub ob zaj lus ntawd? Xausxaus thiab Xaustsib nkawv, nej nyiam leej twg? (Xaustsib.) Yog li ntawd, qhov tsis zoo ntawm Xausxaus yog dab tsi? (Thaum muaj ib yam dab tsi los raug rau nws, nws tsis muaj peev xwm fim tej ntawd kom zoo. Nws xav phem thiab tawm tsam.) Qhov xav phem thiab tawm tsam ntawd yog coj kev puas tsuaj los rau yus tus kheej xwb. Thaum muaj ib yam dab tsi los raug rau lwm tus tib neeg, mas lawv nrhiav tau qhov tseeb los daws tej ntawd, tiam sis thaum muaj ib yam dab tsi los raug rau Xausxaus, mas nws tsis muaj peev xwm nrhiav qhov tseeb li, nws xaiv qhov kev xav phem thiab kev tawm tsam. Nws rhuav tshem nws tus kheej xwb. Niaj hnub no tej zaum ntaub ntawv vam meej heev lawm, tiam sis nyob rau hauv lub ntiaj teb uas phem no mas, muaj tej lus dag thiab tej tswv yim dag ntau heev. Lub ntiaj teb mas puv npo tej lus dag thiab tej tswv yim dag xwb. Thaum ntsib ib qho teeb meem dab tsi los sis ib qho ntaub ntawv dab tsi nyob rau hauv lub ntiaj teb uas ntxhov quav niab no, mas tib neeg yuav tsum muaj tswv yim, lawv yuav tsum ntse thiab paub, thiab lawv yuav tsum thoob tsib to nrog. Lawv yuav tsum lim txhua hom ntaub ntawv kom zoo zoo, los ntawm qhov kev xav kom zoo. Tib neeg yuav tsum tsis txhob cia li ntseeg ib lo lus tshaj tawm dab tsi, thiab lawv yuav tsum tsis txhob cia li lees txais txhua yam ntaub ntawv. Nyob rau hauv Ntxwgnyoog lub ntiaj teb no, tib neeg puav leej dag xwb, thiab yeej tsis muaj neeg rau txim rau cov tib neeg dag li. Lawv hais lawv tej lus dag ces tag li ntawd lawm xwb. Nyob rau hauv lub ntiaj teb no tsis muaj leej twg teem txim rau tej lus dag; tsis muaj leej twg teem txim rau lub tswv yim dag li. Tib neeg lub siab mas to taub nyuaj, thiab qhov txhua tus tib neeg dag ntawd, vim muaj ib qho kev npaj siab thiab ib lub hom phiaj. Piv txwv li, koj mus ntsib kws kho mob, es nws hais tias, “Koj tus mob mas yuav tau kho kom sai. Yog peb tsis kho kom sai, tej zaum nws yuav ua rau mob qog noj ntshav!” Yog koj siab me, koj yuav ntshai hais tias: “Au tuag lau! Nws yuav ua rau mob qog noj ntshav! Cia li kho kiag tam sid!” Vim li ntawd, koj yim sim kho tus mob ntawd, ces tus mob ntawd yim mob loj tuaj, thiab koj yim mus pw tsev kho mob xwb. Qhov kws kho mob hais tiag tiag ntawd yog qhov hais tias tej zaum koj tus mob yuav ua rau mob qog noj ntshav, uas txhais hais tias tseem tsis tau yog mob qog noj ntshav, tiam sis koj to taub yuam kev qhov no hais tias yuav tsum tau kho kom sai cuag nkaus li tus mob ntawd yog mob qog noj ntshav lawm. Qhov ua li no tsis yog koj thab kev tuag xwb lod? Yog koj kho tus mob ntawd li tus mob ntawd yog mob qog noj ntshav, ces koj yim sim kho tus mob ntawd, koj yim yuav tuag sai xwb. Yog li, koj puas yuav muaj peev xwm muaj txoj sia nyob ntev? (Tsis muaj.) Tseeb tiag, qhov koj mob ntawd tsis yog mob qog noj ntshav, yog li ntawd vim li cas kws kho mob thiaj li hais rau koj hais tias yog koj tsis kho tus mob ntawd, ces tus mob ntawd yuav ua rau mob qog noj ntshav? Nws hais li no kom dag tau koj cov nyiaj, kom koj kho koj tus mob cuag nkaus li tus mob ntawd yog ib tug mob loj xwb. Yog koj paub hais tias tus mob ntawd yog ib tug mob me me xwb, ces koj yuav tsis kho, thiab nws yuav tsis tau koj cov nyiaj. Thaum cov kws kho mob pom lawv cov neeg mob, mas lawv tuav cov neeg mob ntawd, zoo ib yam li ib tug dab tuav ib tug tib neeg, uas nws tuav ruaj heev thiab tsis tso li. Qhov no yog ib txoj hauv kev uas cov kws kho mob feem coob siv rau lawv cov neeg mob. Lawv pib los ntawm qhov qhia rau koj tias lawv nrov npaum li cas, lawv txawj muab tshuaj npaum li cas, lawv kho tau pes tsawg tus neeg lawm, lawv kho tau cov kab mob dab tsi, thiab lawv xyaum muab tshuaj tau ntev npaum li cas lawm. Lawv ua kom koj tso siab rau lawv, mloog lawv lus thiab cia lawv kho. Ces, lawv qhia koj hais tias koj yuav kis ib tug mob loj, thiab tias yog koj tsis kho, mas koj yuav tuag. Txhua tus puav leej txawj tuag, tiam sis puas yuav yog tus kab mob no tua koj tiag tiag? Yeej tsis yog. Txhua tus txoj sia thiab kev tuag yog nyob rau hauv Vajtswv ob txhais tes. Nws yog tus txiav txim siab rau txoj sia thiab kev tuag, tsis yog cov kws kho mob. Cov kws kho mob pheej siv lub tswv yim no los dag tib neeg. Cov uas siab me thiab ntshai txoj kev tuag mas nrhiav tshuaj rau txhua txhia qhov chaw xwb thiab cia cov kws kho mob txiav txim siab txog lawv txoj kev noj qab haus huv. Yog lawv cov kws kho mob hais tias lawv muaj feem uas yuav muaj mob qog noj ntshav, mas lawv ntseeg cov kws kho mob ntawd, thiab lawv maj nroos cia kws kho mob kho qhov mob ntawd, kom tshem tau qhov lawv yuav tuag vim tus mob qog noj ntshav ntawd tawm mus. Tsis yog lawv ntshai lawv xwb lod? (Yog.) Tam sim no peb yuav tsis hais txog cov kws kho mob lawm es ho los hais txuas ntxiv txog Xausxaus thiab Xaustsib nkawv. Nkawv tej kev pom, tej kev xam pom, thiab tej uas nkawv ua rau txhua yam uas tshwm sim rau nkawv ntawd mas sib txawv deb heev. Xausxaus tsuas xav phem xwb, hos Xaustsib muaj peev xwm daws tej uas los raug rau nws yam zoo heev. Nws muaj qhov tsim nyog thiab txoj kev txiav txim rau txoj kev ua neej thiab nws nquag daws txhua yam. Nws kuj tseem ua nws tes dej num txuas ntxiv thiab. Nkawv ob tug ntawd mas sib txawv deb heev. Thaum muaj ib yam dab tsi los raug rau Xausxaus, mas nws saib qhov ntawd yam li tsis muaj kev cia siab, thiab ua dog ua dig xwb. Nws tsis nrhiav lub tswv yim thiab tej kev uas tsim nyog los daws qhov ntawd, thiab nws kuj tsis thoob tsib to nrog, tsis meej pem, ruam, taub hau npua, thiab tawv ncauj—thiab kuj phem heev li thiab. Thaum nws mob, los sis thaum nws ntsib qee yam kev nyuaj, los sis ib yam dab tsi tsis zoo los raug rau nws, mas nws cia siab tias yuav los raug rau lwm tus thiab. Nws ntxub Vajtswv vim tsis tiv thaiv nws, thiab nws xav qhia nws txoj kev npau taws tawm. Tiam sis nws tsis muaj cuab kav qhia thiab nthuav nws txoj kev npau taws tawm rau lwm tus, yog li ntawd nws thiaj li qhia thiab nthuav nws txoj kev npau taws tawm rau nws tus kheej xwb. Qhov no tsis yog ib tug moj yam lim hiam lod? (Yog.) Qhov tsis txaus siab, ntxub, thiab khib thaum muaj ib yam dab tsi me me uas tsis mus li qhov koj xav—ces qhov ntawd yog kev lim hiam. Thaum muaj ib yam dab tsi los raug rau Xaustsib, mas nws muaj qhov tsim nyog thiab txoj kev txiav txim rau txoj kev ua neej. Nws muaj lub tswv yim thiab nws txiav txim siab li cov tib neeg uas muaj kev ua neej dog dig yuav tsum tau txiav txim siab. Txawm Xaustsib muaj tib tug mob ib yam li Xausxaus los xij, thaum kawg kho tau nws tus mob ntawd lawm, hos Xausxaus tsis muaj peev xwm kho tau nws tus mob li, thiab tus mob ntawd tsis zoo zuj zus thiab loj zuj zus ntxiv xwb. Xausxaus tus mob yog ib tug mob loj, thiab tsis yog tsuas yog ib qho kev mob ntawm lub cev nqaij daim tawv xwb—nws muab tus moj yam uas nyob rau hauv nws nruab siab nthuav tawm tuaj thiab; nws muab nws tus kheej txoj kev tawv ncauj, kev tsis mloog lus, kev ruam, thiab lub siab phem nthuav tawm. Qhov ntawd yog qhov txawv ntawm nkawv ob leeg. Yog nej muaj kev paub thiab kev to taub ntxaws ntxiv txog qhov ob tug tib neeg no ua neej, nrog rau nkawv ob tug cwj pwm thiab tej tswv yim uas los saib xyuas txhua yam no, nej qhia txuas ntxiv txog qhov ntawd tom qab los tau, muab koj tus kheej los piv rau qhov ntawd, thiab kawm los ntawm qhov ntawd. Koj yuav tsum nquag nkag mus rau hauv txhua yam li Xaustsib. Koj yuav tsum ua lub neej kom zoo, thiab siv zog saib tib neeg thiab txhua yam, thiab coj koj tus kheej kom zoo thiab ua raws nraim li Vajtswv cov lus, muab qhov tseeb los ua koj tus qauv, ua li ntawd koj thiaj li yuav dhau los ua ib tug uas caum qhov tseeb. Koj yuav tsum tsis txhob ua zoo li Xausxaus. Tsis yog li ntawd lod? (Yog.) Qhov ntawd yog qhov uas koj yuav tsum caum thiab xyaum ua.

Tam sim no, peb yuav rov qab saib qhov peb tau kawm txog nyob rau hauv peb qhov kev sib txoos ua ke tag los ntawd. Peb tau tham txog thawj yam uas tib neeg suav nyob rau hauv lawv tej kev xav phem tias yog thiab zoo—cov cwj pwm zoo—thiab peb tau teev rau qhov piv txwv txog cov cwj pwm zoo ntawd. Tag nrho tej ntawd puav leej yog tej uas txoj kab lis kev cai txhawb nqa, thiab cov cwj pwm zoo uas tib neeg nyiam nyob rau hauv lawv lub neej tiag tiag. Nej qhia puas tau rau kuv tias tej ntawd yog dab tsi? (Ua tus neeg muaj kev kawm siab thiab paub qab paub hau, ua tus neeg paub tab thiab paub cai, ua tus neeg paub kev paub cai, hwm cov laus thiab saib xyuas cov hluas, ua tus neeg siab dawb siab zoo, thiab ua tus neeg nyiam ua phooj ywg.) Peb tsis tau hais lwm qhov piv txwv. Tej zaum yuav muaj qee qhov uas txawv ntawm rau tug cwj pwm zoo uas cov neeg Suav txoj kab lis kev cai muab coj los sawv cev ntawd nyob rau hauv lwm lub teb chaws tej kab lis kev cai thiab, tiam sis peb yuav tsis teev cov no. Zaum tas los peb kawm thiab tshuaj xyuas txog qee lub ncauj lus ncaj ncaj uas hais txog rau tug cwj pwm zoo no. Muab zuag hais tag nrho hais tias, cov cwj pwm zoo sab nraud no tsis sawv cev rau yam zoo uas nyob rau hauv tib neeg, thiab cov cwj pwm zoo ntawd haj yam tsis sawv cev qhia hais tias tib neeg tus moj yam hloov pauv lawm—cov cwj pwm zoo ntawd yeej ua tsis tau pov thawj qhia hais tias tib neeg to taub qhov tseeb thiab ua neej raws li qhov tseeb qhov muaj tiag li. Cov cwj pwm zoo ntawd tsuas yog cov cwj pwm sab nraud uas tib neeg pom xwb. Muab hais ncaj ncaj hais tias, cov cwj pwm zoo ntawd yog tib neeg tej kev qhia kom pom tseeb nyob rau sab nraud xwb. Tej kev qhia kom pom tseeb nyob rau sab nraud thiab tej kev nthuav tawm no tsuas yog tej kev coj uas tshwm sim thaum tib neeg sib tham, kom ib leeg haum ib leeg, thiab nyob tau ua ke xwb. “Tej kev coj” ntawd hais txog dab tsi? Hais txog yam ntiav tshaj plaws uas ua kom tib neeg kaj siab thaum lawv pom tej kev coj ntawd xwb. Tej kev coj ntawd tsis sawv cev rau ib yam dab tsi ntawm tib neeg lub ntsiab tseeb li, thiab tsis sawv cev rau lawv tej kev xav thiab tej kev xam pom, thiab tsis sawv cev rau tus cwj pwm uas lawv coj rau yam zoo, thiab tej kev coj ntawd haj yam tseem tsis sawv cev rau tus cwj pwm uas tib neeg coj rau qhov tseeb li thiab. Tej kev tim tsum thiab tej qauv ntawm txoj kev ntsuas uas tib neeg ntiaj teb muaj txog cov cwj pwm sab nraud ntawd ces tsuas yog tej kev coj uas tib neeg tuaj yeem nkag siab thiab ua tau xwb. Lawv tsis muaj dab tsi cuam tshuam rau tib neeg lub ntsiab tseeb hlo li. Txawm nyob rau saum daim tawv yuav saib zoo li tib neeg siab dawb siab zoo los sis nyiam ua phooj ywg, thiab txawm lwm tus yuav nyiam, hwm, saib taus, thiab pe hawm cov cwj pwm sab nraud uas lawv coj ntawd npaum li cas los xij, qhov ntawd tsis tau txhais hais tias lawv muaj kev ua neej, thiab qhov ntawd tsis tau txhais hais tias lawv tus yam ntxwv lub ntsiab tseeb zoo, los sis nyiam yam zoo, los sis muaj ib lub siab ncaj ncees lawm, thiab haj yam tsis tau txhais hais tias lawv yog cov tib neeg uas caum tau qhov tseeb. Tag nrho cov cwj pwm zoo uas tib neeg ntiaj teb suav tau los ntawd tsuas yog tej kev qhia kom pom tseeb nyob rau sab nraud thiab tej kev ua neej uas tib neeg ntiaj teb txhawb kom thiaj li cais tau qhov txawv ntawm lawv tus kheej los ntawm lwm tus lub neej xwb. Piv txwv li, ua tus neeg muaj kev kawm siab thiab paub qab paub hau, ua tus neeg paub tab thiab paub cai, thiab ua tus neeg paub kev paub cai—cov cwj pwm zoo no tsuas qhia hais tias tib neeg coj tau zoo heev nyob rau sab nraud, paub cai, muaj kev kawm, thiab paub kab lis kev cai, tsis zoo li tej tsiaj, uas tsis muaj kev cai xwb. Tib neeg xuas lawv ob txhais tes los sis ntaub coj los so lawv lub qhov ncauj tom qab lawv noj mov los sis haus dej tag lawm, ntxuav lawv tus kheej me ntsis. Yog koj sim so tus dev lub qhov ncauj tom qab nws noj mov los sis haus dej tag lawm, mas nws yuav tsis zoo siab rau qhov ntawd. Tsiaj tsis to taub tej yam zoo li no. Yog li, vim li cas tib neeg thiaj li to taub? Vim tib neeg yog “cov tsiaj uas siab dua.” Lawv thiaj li to taub tej no. Yog li ntawd, cov cwj pwm zoo no tsuas yog yam uas tib neeg siv los tswj tus cwj pwm ntawm ib pab pawg uas yog tib neeg ntiaj teb, thiab cov cwj pwm zoo ntawd tsuas cais kom tib neeg ntiaj teb txawv ntawm cov uas muaj txoj sia qis dua xwb. Cov cwj pwm zoo ntawd tsis muaj ib yam dab tsi cuam tshuam rau txoj kev coj kom zoo, los sis txoj kev caum qhov tseeb, los sis txoj kev pe hawm Vajtswv kiag li. Qhov no txhais hais tias txawm koj yuav ua neej tau raws li cov qauv thiab tej kev tim tsum ntawm txoj kev ua tus neeg muaj kev kawm siab thiab paub qab paub hau, ua tus neeg paub tab thiab paub cai, thiab lwm yam uas nyob rau sab nraud, txawm koj yuav muaj cov cwj pwm zoo no los xij, nws tsis tau txhais hais tias koj yog ib tug neeg uas muaj kev ua neej, los sis tus uas muaj qhov tseeb, los sis tus uas ntshai Vajtswv thiab zam kev phem. Tsis tau txhais hais tias yog tej ntawd ib qho kiag li. Tiam sis, qhov ntawd tsuas txhais hais tias tom qab tau kawm txog txoj kev coj tus cwj pwm, thiab tej qauv uas paub tab lawm, ces koj txoj kev hais lus, lub ntsej muag, kev ris, thiab lwm yam yuav dhau los paub cai me ntsis ntxiv xwb. Qhov ntawd qhia hais tias koj zoo dua tej tsiaj thiab muaj qhov zoo nkaus li tib neeg me ntsis—tiam sis qhov ntawd tsis qhia hais tias koj yog tus uas caum qhov tseeb. Tej zaum haj tseem hais tau hais tias qhov ntawd tsis muaj dab tsi cuam tshuam rau txoj kev caum qhov tseeb hlo li thiab. Qhov uas koj muaj cov cwj pwm zoo no tsis tau txhais hais tias koj muaj tej yam ntxwv uas yog txog txoj kev caum qhov tseeb kiag li, thiab haj tseem tsis tau txhais hais tias koj twb nkag tau mus rau hauv qhov tseeb qhov muaj tiag thiab tau txais qhov tseeb lawm. Nws tsis qhia txog tej ntawd kiag li.

Txhua tus uas muab ib tug miv los sis ib tug dev coj los tu yuav paub hais tias muaj ib qho uas ntxim hlub txog cov tsiaj ntawd. Tseeb tiag miv thiab dev yeej muaj qee tus xeeb cem. Thaum miv xav mus rau hauv nws tus tswv chav, mas nws ua lub suab miv ob peb zaug rau ntawm lub qhov rooj ua ntej nkag mus. Nws yuav tsis nkag mus rau hauv yog nws tus tswv tsis hais dab tsi, nws tsuas nkag mus thaum nws tus tswv hais tias: “Nkag los” no xwb. Tab txawm miv los twb txawj xyaum paub tab zoo li no thiab, nws paub thov kev tso cai ua ntej nkag mus rau hauv nws tus tswv chav. Qhov ntawd tsis yog ib tug cwj pwm zoo lod? Yog hais tias tab txawm tsiaj los twb muaj hom cwj pwm zoo no, tib neeg ho yuav muaj cov cwj pwm zoo ntawd ntau tshaj tsiaj npaum li cas? Qhov no yog qib kev xav qis tshaj plaws uas tib neeg yuav tsum muaj—tsis tas yuav qhia li, nws yeej yog yam uas ib txwm muaj lawm. Tej zaum tib neeg yuav xav hais tias hom cwj pwm zoo no mas tsim nyog heev, thiab hom cwj pwm zoo no yuav ua rau lawv kaj siab me ntsis ntxiv tuaj, tiam sis txoj kev ua neej raws li cov cwj pwm zoo no puas sawv cev rau qhov zoo los sis lub ntsiab tseeb ntawm lawv txoj kev ua neej? (Tsis sawv.) Nws tsis sawv. Cov cwj pwm zoo ntawd tsuas yog tej kev cai thiab tej tswv yim uas tib neeg yuav tsum muaj nyob rau hauv lawv tej kev ua xwb—cov cwj pwm zoo ntawd tsis muaj dab tsi cuam tshuam rau qhov zoo thiab lub ntsiab tseeb ntawm tib neeg txoj kev ua neej kiag li. Muab miv thiab dev coj los ua piv txwv saib ma—miv thiab dev muaj dab tsi zoo ib yam? Thaum tib neeg muab ib yam dab tsi rau miv thiab dev noj, mas miv thiab dev txav los ze ze thiab ua tsaug. Miv thiab dev muaj hom kev coj zoo li no, thiab miv thiab dev coj tau hom cwj pwm no. Qhov txawv ntawm miv thiab dev yog qhov hais tias miv mas txawj tom nas, hos dev mas txawj zov tsev. Tej zaum miv yuav ncaim nws tus tswv nyob rau lub sij hawm twg thiab qhov chaw twg los tau; thaum muaj kev lom zem, ces miv hnov qab nws tus tswv thiab tsis quav ntsej txog tus tswv lawm. Hos dev yuav tsis ncaim ntawm nws tus tswv mus li; yog nws paub hais tias koj yog nws tus tswv lawm, ces tab txawm yog nws hloov dua tus tswv los, nws yeej tseem zeem tau koj thiab ua rau koj li yog nws tus tswv. Qhov ntawd yog qhov sib txawv ntawm miv thiab dev, uas hais txog txoj kev zoo ntawm miv thiab dev tus cwj pwm thiab lub ntsiab tseeb. Tam sim no, cia peb tham txog tib neeg. Nyob rau ntawm cov cwj pwm uas tib neeg ntseeg hais tias zoo, xws li ua tus neeg muaj kev kawm siab thiab paub qab paub hau, ua tus neeg paub kev paub cai, ua tus neeg nyiam ua phooj ywg, thiab lwm yam ntawd, mas txawm tias muaj qee yam uas dhau lwm hom cwj pwm lawm los xij—txhais hais tias yam uas tib neeg muaj peev xwm ua tau tshaj lwm qhov peev xwm lawm—tej no tsuas yog cov cwj pwm thiab tej kev cai sab nraud xwb, tej no tsuas yog tej kev uas los tswj tib neeg tus cwj pwm thiab cais kom lawv txawv ntawm lwm txoj sia xwb. Qhov muaj cov cwj pwm zoo no tej zaum yuav ua rau tib neeg xav hais tias lawv txawv los sis zoo dua lwm txoj sia, tiam sis qhov tseeb yog qhov hais tias nyob rau hauv qee kis mas, tib neeg coj phem dua tsiaj. Muab qhov hwm cov laus thiab saib xyuas cov hluas ntawd los ua piv txwv. Nyob rau ntawm cov tsiaj lub nceeg vaj mas, hma ua tau qhov no zoo dua tib neeg. Nyob rau hauv ib pab hma mas, cov hma loj saib xyuas tus me nyuam hma, txawm tus me nyuam hma ntawd yuav yog tus twg tus los xij. Cov hma loj ntawd yuav tsis thab tus me nyuam hma los sis ua rau tus me nyuam hma ntawd raug kev puas tsuaj. Qhov no, tib neeg ua tsis tau, thiab qhov ua li no, mas tib neeg ntiaj teb ua tau phem dua pab hma. Hom kev hwm cov laus thiab saib xyuas cov hluas uas tib neeg ntiaj teb muaj ntawd yog dab tsi? Tib neeg puas muaj peev xwm ua tau qhov no tiag tiag? Tib neeg feem coob tsis muaj peev xwm “saib xyuas cov hluas,” tib neeg tsis muaj hom cwj pwm zoo ntawd, uas txhais tau hais tias lawv tsis muaj hom kev ua neej zoo li ntawd. Piv txwv li: Thaum ib tug me nyuam nrog nws niam nws txiv, mas tib neeg ua siab dawb siab zoo thiab nyiam ua phooj ywg thaum hais lus rau tus me nyuam ntawd—tiam sis thaum tus me nyuam ntawd niam thiab txiv tsis nyob ntawd lawm, mas sab phem ntawm tib neeg mam li tawm tuaj. Yog tus me nyuam ntawd hais lus rau lawv, lawv yuav tsis quav ntsej tus me nyuam ntawd, los sis haj tseem saib tus me nyuam ntawd tsis khuab qhov muag thiab ua phem rau tus me nyuam ntawd thiab. Lawv phem npaum li cas! Nyob rau hauv ntau lub teb chaws hauv ntiaj teb no, mas kev ua lag luam me nyuam yaus yeej muaj—nws yog ib qho teeb meem thoob ntiaj teb. Yog tib neeg twb tsis muaj tus cwj pwm zoo uas hwm cov laus thiab saib xyuas cov hluas, thiab lawv tsis muaj lub siab uas txawj xav thaum lawv thab me nyuam yaus li no, qhia Kuv seb, hom tib neeg ntawd yog hom tib neeg dab tsi? Lawv tseem ua txuj hwm cov laus thiab saib xyuas cov hluas, tiam sis qhov no tsuas yog ib qho kev dag xwb. Vim li cas kuv thiaj li hais qhov piv txwv no? Vim hais tias tab txawm tib neeg ntiaj teb tau muab cov cwj pwm zoo no coj los coj thiab thov kom tib neeg coj tus cwj pwm raws li tej kev tim tsum thiab tej qauv no los xij, tib neeg lub ntsiab tseeb uas qias vuab tsuab ntawd yeej yuav hloov tsis tau li, txawm tib neeg yuav muaj peev xwm ua tau raws li tej ntawd, los sis lawv muaj cov cwj pwm zoo ntawd ntau npaum li cas los xij. Tus qauv uas tib neeg saib tib neeg thiab txhua yam, thiab lawv txoj kev coj kom zoo thiab tej kev ua ntawd, yog tawm los ntawm cov tib neeg ntiaj teb uas qias vuab tsuab tej kev xav thiab tej kev xam pom tag nrho xwb, thiab tej ntawd yog txiav txim siab los ntawm tej moj yam qias vuab tsuab. Txawm tej kev tim tsum thiab tej qauv uas tib neeg ntiaj teb tau muab coj los siv ntawd tib neeg suav hais tias zoo thiab yog tej qauv siab los xij, tib neeg puas muaj peev xwm ua tau raws li tej ntawd? (Tsis muaj.) Qhov ntawd yog ib qho teeb meem. Tab txawm tib neeg ua tau zoo me ntsis nyob rau sab nraud, thiab tau txais txiaj ntsim thiab muaj neeg lees paub los xij, qhov ntawd kuj yog lam ua txuj thiab dag xwb, vim txhua tus yeej paub lawm hais tias, qhov ua zoo me ntsis ntawd mas yooj yim—qhov nyuaj yog qhov ua zoo kom tag ib sim neej xwb. Yog lawv yeej yog ib tug tib neeg zoo tiag tiag no, vim li cas qhov lawv ua yam zoo ntawd ho yuav nyuaj ua luaj li? Yog li ntawd, tsis muaj ib tug tib neeg uas yuav ua tau li qhov tib neeg ntiaj teb hu ua “zoo” thiab tej qauv uas tib neeg lees paub li. Txhua yam ntawd yog kev khav theeb, kev dag ntxias, thiab dab neeg uas tsis ntawv tseeb xwb. Tab txawm yog tib neeg ua tau ob peb tug qauv no nyob rau sab nraud thiab muaj tus cwj pwm zoo me ntsis—xws li ua tus neeg muaj kev kawm siab thiab paub qab paub hau, ua tus neeg paub tab thiab paub cai, ua tus neeg paub kev paub cai, hwm cov laus thiab saib xyuas cov hluas, ua tus neeg siab dawb siab zoo, thiab ua tus neeg nyiam ua phooj ywg—txawm tib neeg ua tau thiab muaj ob peb yam no los xij, tej no tsuas ua tau tsis ntev, ib ntus, los sis ua tau nyob rau hauv qee cheeb tsam uas dhau mus xwb. Lawv tsuas ua li tej no qhia kom pom tseeb thaum lawv tim tsum xwb. Kiag thaum ib yam dab tsi cuam tshuam rau lawv lub meej mom, txoj kev khav txiv, kev muaj txiag nplua nuj, tej kev ntshaw, los sis haj tseem cuam tshuam rau lawv txoj hmoo thiab lawv tej kev cia siab thiab, mas lawv tus kheej tus yam ntxwv uas phem ntawd yuav tawm tuaj. Lawv yuav tsis muaj kev kawm siab thiab paub qab paub hau, paub tab thiab paub cai, paub kev paub cai, hwm cov laus thiab saib xyuas cov hluas, siab dawb siab zoo, los sis nyiam ua phooj ywg ntxiv lawm. Tiam sis, lawv yuav tawm tsam thiab ib leeg dag ib leeg, ib leeg yuav ua kom yeej ib leeg, sib iab liam thiab sib tua. Tej yam zoo li no mas tshwm sim tas li li—vim yog lawv tej kev ntshaw, lawv lub meej mom, los sis lawv lub hwj chim, es tej phooj ywg, tej txheeb ze, thiab tab txawm txiv thiab tub los ib leeg yuav tua ib leeg kom txog rau thaum tsuas tshuav ib leeg lawm xwb. Yeej pom tau tseeb txog qhov kev nyuaj siab uas muaj nyob rau ntawm tib neeg ntawd. Vim li ntawd qhov ua tus neeg muaj kev kawm siab thiab paub qab paub hau, ua tus neeg paub tab thiab paub cai, ua tus neeg paub kev paub cai, hwm cov laus thiab saib xyuas cov hluas, ua tus neeg siab dawb siab zoo, thiab ua tus neeg nyiam ua phooj ywg ntawd tsuas hu tau ua cov khoom uas dhau mus xwb. Tsis muaj leej twg ua tau tej ntawd—tab txawm cov neeg txawj ntse thiab cov neeg zoo uas cov neeg Suav pe hawm ntawd los twb tsis muaj peev xwm ua tau tej no. Yog li ntawd, tej kev qhia thiab tej kev xav no puav leej tsis muaj tseeb. Tej ntawd puav leej tsis muaj qab hau dab tsi li. Cov tib neeg uas caum qhov tseeb muaj peev xwm daws tau tej teeb meem uas cuam tshuam rau lawv tus kheej tej kev ntshaw raws li Vajtswv cov lus, thiab muaj qhov tseeb ua lawv tus qauv, thiab lawv muaj peev xwm xyaum ua raws li qhov tseeb thiab ua raws li Vajtswv hais. Qhov ua li no mas, qhov tseeb qhov muaj tiag uas lawv muaj ntawd loj tshaj tej qauv rau tus cwj pwm zoo uas tib neeg ntiaj teb lees paub ntawd lawm. Cov uas tsis caum qhov tseeb yuav tsoo tsis dhau qhov teeb meem ntawm lawv tus kheej tej kev ntshaw, xws li, lawv muab tsis tau qhov tseeb coj los xyaum ua. Lawv twb ua tsis tau tej kev cai uas zoo li cov cwj pwm zoo ntawd. Yog li, lub hauv paus thiab tus qauv uas lawv saib tib neeg thiab txhua yam, thiab lawv txoj kev coj kom zoo thiab tej kev ua ntawd yog dab tsi? Lub hauv paus thiab tus qauv ntawd tsuas yog tej kev cai thiab tej kev qhuab qhia xwb, tej ntawd yog Ntxwgnyoog tej tswv yim thiab tej kev cai xwb, tsis yog qhov tseeb uas nyob rau hauv Vajtswv cov lus. Qhov no yog vim cov tib neeg ntawd tsis lees txais qhov tseeb, thiab lawv tsuas yog tsom kwm lawv tus kheej tej kev ntshaw xwb, yog li ntawd, lawv thiaj li muab tsis tau qhov tseeb coj los xyaum ua. Lawv twb ua tsis tau raws li cov cwj pwm zoo ntawd—lawv lam ua txuj xwb, tiam sis lawv npog tsis tau qhov lawv zais. Nyob rau hauv qhov no, lawv nthuav lawv tus kheej tiag tiag tawm. Vim yog lawv tus kheej tej kev ntshaw, lawv thiaj li yuav siv zog, txeeb, thiab nyiag, lawv yuav npaj ua phem, dag, thiab siv tswv yim dag, lawv yuav rau txim rau lwm tus, thiab haj tseem tua qee tus neeg thiab. Lawv tuaj yeem ua txhua yam uas lim hiam no—lawv tus yam ntxwv tsis tshwm nyob rau hauv qhov ntawd lod? Thiab thaum lawv tus yam ntxwv nthuav tawm lawm, lwm tus tuaj yeem pom tej kev npaj siab thiab lub hauv paus ntawm lawv cov lus thiab tej kev ua tau yam yooj yim heev; lwm tus tuaj yeem qhia tau hais tias cov tib neeg ntawd ua neej raws li Ntxwgnyoog tej tswv yim nkaus xwb, tias lub hauv paus uas lawv saib tib neeg thiab txhua yam, thiab lawv txoj kev coj kom zoo thiab tej kev ua ntawd, yog Ntxwgnyoog tej tswv yim xwb. Piv txwv li: “Txhua tus tib neeg ua rau nws tus kheej thiab tus dab phem muab tus tom qab kawg,” “Nyiaj txiag ua rau lub ntiaj teb kiv,” “Qhov twg muaj txoj sia ces qhov ntawd muaj kev cia siab,” “Lub siab me ua tsis tau txiv neej yawg, ib tug txiv neej yawg lawm yeej muaj qhov phem,” “Yog koj siab tsis zoo, kuv yuav tsis ua ncaj ncees,” “Nyuam qhuav ntxim,” thiab lwm yam—cov lus phem thiab tej kev cai no nyob rau hauv tib neeg lawm. Thaum tib neeg ua neej raws li tej no, uas yog cov cwj pwm zoo xws li ua tus neeg muaj kev kawm siab thiab paub qab paub hau, ua tus neeg paub tab thiab paub cai, ua tus neeg paub kev paub cai, hwm cov laus thiab saib xyuas cov hluas, thiab lwm yam lawm ces tej ntawd dhau los ua cov ntaub npog ntsej muag uas tib neeg siv los zais lawv tus kheej, thiab lawv dag lawm xwb. Vim li cas lawv thiaj li dag? Vim lub hauv paus thiab tej kev cai uas tib neeg ua neej raws tiag tiag ntawd yog tej uas Ntxwgnyoog muab cog rau hauv tib neeg xwb, tsis yog qhov tseeb. Yog li ntawd, tib neeg lub siab uas txawj xav tshaj plaws thiab txoj kev paub cais qhov zoo qhov phem ntawd thiaj li ua tsis tau li cas rau tus tib neeg uas tsis nyiam qhov tseeb li. Thaum muaj ib yam dab tsi tshwm sim uas txuas rau lawv tej kev ntshaw lawm, lawv tus kheej tiag tiag yuav tshwm tuaj, mas lub sij hawm ntawd tib neeg yuav pom lawv lub ntsej muag tiag tiag. Tib neeg yuav hais yam ceeb tag hais tias, “Tiam sis tsis yog lawv yeej ib txwm paub tab, paub kev paub cai, thiab coj zoo heev lod? Vim li cas es thaum muaj ib yam dab tsi los raug rau lawv, zoo li lawv hloov mus ua ib tug tib neeg txawv hlo li lawm?” Tseeb tiag, tus tib neeg ntawd tsis tau hloov; tsuas yog hais tias los txog rau lub sij hawm ntawd lawv tus kheej tiag tiag mam li tawm tuaj xwb. Thaum txhua yam tsis cuam tshuam rau lawv tej kev ntshaw thiab ua ntej ntawd mas, txhua yam uas lawv ua ces yog dag thiab zais nkaus xwb. Tej kev cai thiab lub hauv paus ntawm lawv txoj kev ua neej nyob uas lawv nthuav tawm thaum muaj ib yam dab tsi los cuam tshuam los sis rhuav tshem lawv tej kev ntshaw, thiab thaum lawv tsis zais lawv tus kheej lawm ntawd, yog lawv tus yam ntxwv, lawv lub ntsiab tseeb, thiab qhov lawv yog leej twg tiag tiag ntag. Yog li ntawd, txawm tib neeg yuav muaj hom cwj pwm zoo li cas—txawm lwm tus yuav saib zoo li lawv tus cwj pwm sab nraud mas zoo heev los xij—qhov ntawd tsis tau txhais hais tias lawv yog cov uas caum qhov tseeb thiab nyiam yam zoo. Yam tsawg kawg, qhov ntawd tsis tau txhais hais tias lawv muaj kev ua neej, thiab haj yam tsis tau txhais hais tias tso siab tau rau lawv los sis tsim nyog nrog lawv sib tham.

Nyob rau hauv cov cwj pwm zoo ntawd, peb tau hais cov piv txwv txog qhov ua tus neeg muaj kev kawm siab thiab paub qab paub hau, ua tus neeg paub tab thiab paub cai, ua tus neeg paub kev paub cai, hwm cov laus thiab saib xyuas cov hluas, ua tus neeg siab dawb siab zoo, thiab ua tus neeg nyiam ua phooj ywg. Tam sim no peb yuav muab qhov hwm cov laus thiab saib xyuas cov hluas ntawd coj los ua ib qho piv txwv, thiab kawm txog qhov ntawd kom ntxawv ntxaws. Qhov kev hwm cov laus thiab kev saib xyuas cov hluas ntawd yog ib qho uas yeej ib txwm tshwm sim nyob rau hauv tib neeg lub neej. Yog twb tshwm sim nyob rau hauv tej tsiaj txhu, mas haj yam tshwm sim nyob rau hauv tib neeg cov uas muaj lub siab uas txawj xav thiab qhov tsim nyog xwb. Tib neeg yuav tsum coj tau tus cwj pwm no zoo dua, khov dua, thiab muaj qab hau dua li lwm yam tsiaj, tsis yog tsuas khawb saum daim tawv xwb. Tib neeg yuav tsum coj tau zoo dua lwm yam tsiaj hais txog tus cwj pwm zoo uas hwm cov laus thiab saib xyuas cov hluas no, vim tib neeg muaj lub siab uas txawj xav thiab qhov tsim nyog, uas lwm yam tsiaj tsis muaj. Tib neeg tsim nyog muaj peev xwm qhia hais tias lawv txoj kev ua neej mas loj dua lub ntsiab tseeb ntawm lwm yam tsiaj, tias nws txawv nyob rau hauv lawv txoj kev coj tus cwj pwm zoo no. Tiam sis tib neeg puas ua li no tiag tiag? (Tsis ua.) Cov tib neeg uas muaj kev kawm thiab kev paub puas ua li no? (Lawv kuj tsis ua thiab.) Cia peb muab cov pej xeem dog dig tso tseg es tham txog tej hauj lwm ntawm cov tib neeg qib siab, thiab tej hauj lwm ntawm txoj kev cai. Tam sim no, ntau lub teb chaws tab tom tsim ntau zaj yeeb yaj kiab sib hlub hauv vaj loog, nthuav tawm ntau zaj dab neeg uas paub tsis meej txog tsev neeg huab tais. Tsev neeg hauv vaj loog thiab cov pej xeem dog dig mas zoo ib yam nkaus xwb yog li ntawd ob pab neeg no thiaj li muab cov laus uas nyob muaj qib saib ua qhov tseem ceeb. Cov uas nyob rau hauv tsev neeg huab tais mas muaj ib qho kev kawm txog tus cwj pwm zoo ntawm qhov kev hwm cov laus thiab saib xyuas cov hluas ntawd tob dua li cov pej xeem dog dig, thiab cov hluas uas nyob rau hauv tsev neeg huab tais ntawd mas txawj muab lawv cov txwj laug saib rau lub sam xeeb thiab txawj hwm cov txwj laug ntawd dua li cov pej xeem dog dig—muaj kev paub tab ntau heev. Thaum hais txog qhov kev hwm cov laus thiab saib xyuas cov hluas ntawd, mas cov uas nyob rau hauv tsev neeg huab tais muaj tej kev tim tsum siab heev txog hom cwj pwm zoo no, uas yog qhov lawv yuav tsum tau ua raws nraim li qhov kom lawv ua. Nyob rau saum daim tawv mas, zoo li lawv ua raws li txoj kab li kev cai txoj kev tim tsum kom hwm cov laus thiab saib xyuas cov hluas, li cov tib neeg dog dig ua—tiam sis, txawm lawv yuav ua tau zoo los sis ua tau haum npaum li cas, txawm yuav zoo li lawv zoo thiab thuam tsis tau npaum li cas los xij, qhov nyob tom qab ntawm tus cwj pwm uas thuam tsis tau no lub ntsej muag mas muaj txhua yam kev hloov lub hwj chim thiab kev sib tw kom tau lub hwj chim zais nyob rau hauv. Nyob rau ntawm tub thiab txiv, xeeb ntxwv thiab poj yawm, tub qhe thiab tus tswv, thawj tswj thiab huab tais—nyob rau saum daim tawv mas, zoo li lawv txhua tus puav leej coj raws li tus qauv uas tseem ceeb ntawd txog tus cwj pwm xws li: hwm cov laus thiab saib xyuas cov hluas. Tiam sis vim txoj kev muaj huab tais tswj kav thiab lwm lub hwj chim sib xyaw pes daws, tus cwj pwm sab nraud no thiaj li siv tsis tau hauj lwm kiag li. Tus cwj pwm sab nraud ntawd tsis muaj peev xwm cuam tshuam rau yam uas thaum kawg los ntawm txoj kev hloov lub hwj chim huab tais thiab txoj kev sib tw kom tau lub hwj chim ntawd los hlo li. Raws li ib txwm lawm, tus cwj pwm zoo no yeej tsis muaj peev xwm txwv tau tus tib neeg uas ntshaw lub zwm txwv los sis muaj tej kev ntshaw lub hwj chim lawm. Qhov cov pej xeem dog dig ua raws li txoj kev cai uas hwm cov laus thiab saib xyuas cov hluas ntawd, yog vim lawv cov poj koob yawm txwv yeej ib txwm ua los. Lawv los ua neej raws li txoj kev cai no ib yam nkaus thiab. Txawm yuav muaj ntau txoj kev ntshaw los cuam tshuam, los sis yuav muaj teeb meem dab tsi tshwm tuaj cuam tshuam rau tej kev ntshaw ntawd los xij, cov pej xeem dog dig yeej tseem muaj peev xwm nyob tau ua ke tom qab ntawd. Tiam sis txhua yam txawv nyob rau hauv tsev neeg huab tais, vim lawv tej kev ntshaw thiab tej kev sib cov nyom txog lub hwj chim ntawd tseem ceeb dua. Lawv sib txeeb, ces thaum kawg yog qhov hais tias cov yeej tau los ua vajntxwv hos cov swb ces yog cov neeg phem—yog pab no tsis tuag, ces pab tod kawg tuag xwb. Cov yeej thiab cov swb puav leej ua raws li txoj kev cai uas hwm cov laus thiab saib xyuas cov hluas no ib yam nkaus, tiam sis vim nyias siv nyias lub hwj chim thiab nyias muaj nyias tej kev ntshaw thiab tej hom phiaj, los sis vim yog nyias muaj nyias lub zog uas tsis zoo ib yam, es thaug kawg ib txhia thiaj li tseem ciaj, hos ib txhia raug rhuav tshem lawm. Dab tsi txiav txim rau qhov no? Qhov no puas yog txiav txim los ntawm txoj kev cai uas hwm cov laus thiab saib xyuas cov hluas ntawd? (Tsis yog.) Yog li ntawd, dab tsi txiav txim rau qhov ntawd? (Tib neeg tus yam ntxwv phem.) Txhua yam no yog kuv txhais li cas? Kuv txhais hais tias tej kev cai no, qhov qub ntawm tib neeg ntiaj teb uas hu ua cov cwj pwm zoo ntawd, txiav txim tsis tau dab tsi kiag li. Txoj kev uas tib neeg taug ntawd tsis yog txiav txim siab los ntawm qhov seb lawv puas muaj kev kawm siab thiab paub qab paub hau, paub kev paub cai, los sis hwm cov laus thiab saib xyuas cov hluas ib qho me me nyob rau hauv lawv tus cwj pwm sab nraud li, qhov ntawd yog txiav txim los ntawm tib neeg tus yam ntxwv xwb. Muab hais luv luv hais tias, Vajtswv lub tsev tsis txhawb nqa cov nqe lus uas hais txog tus cwj pwm zoo uas tau tshwm sim nyob rau hauv tib neeg ntiaj teb ntawd. Cov cwj pwm uas tib neeg pom hais tias zoo no tsuas yog ib hom cwj pwm zoo thiab txoj kev qhia kom pom tseeb xwb; cov cwj pwm zoo ntawd tsis sawv cev rau qhov tseeb, thiab yog leej twg muaj cov cwj pwm zoo thiab tej kev qhia kom pom tseeb no, qhov ntawd tsis tau txhais hais tias lawv tab tom xyaum ua raws li qhov tseeb, thiab haj yam tsis tau txhais hais tias lawv tseem tab tom caum qhov tseeb.

Vim cov cwj pwm uas tib neeg suav hais tias zoo no, tsis yog los ntawm Vajtswv los, thiab Nws lub tsev tsis txhawb nqa cov cwj pwm no, thiab cov cwj pwm no twb tsis mus raws li Nws lub siab nyiam, thiab vim cov cwj pwm no tsis haum rau Vajtswv cov lus thiab tej kev tim tsum uas Nws hais tawm, Vajtswv kuj muaj ib co kev tim tsum txog tib neeg ntiaj teb tus cwj pwm thiab lod? (Muaj.) Vajtswv los kuj tau hais qee nqe lus tawm txog tus cwj pwm ntawm cov ntseeg uas raws Nws qab thiab. Cov nqe lus ntawd txawv tej kev tim tsum uas Vajtswv tau tim tsum ntawm tib neeg txog qhov tseeb, thiab cov nqe lus ntawd yooj yim dua, tiam sis cov nqe lus ntawd muaj qee yam ncaj ncaj. Tej kev tim tsum uas Vajtswv tim tsum ntawm cov uas raws Nws qab ntawd yog dab tsi? Yog qhov muaj lub siab dawb huv tiag tiag—qhov ntawd tsis yog ib qho kev tim tsum ntawm tib neeg tus cwj pwm lod? (Yog.) Kuj muaj qhov tsis txhob ua tus neeg siab phem, ua tus neeg txwv, tsis txhob hnav tej khaub ncaws txawv txawv, tsis txhob haus luam yeeb los sis haus dej haus cawv, tsis txhob ntaus neeg los sis hais lus phem rau lwm tus, nrog rau qhov tsis txhob pe mlom, hwm niam hwm txiv, thiab lwm yam. Tej no puav leej yog tej kev tim tsum txog txoj kev coj tus cwj pwm uas Vajtswv tau hais tawm rau cov raws Nws qab. Tej no yog tej kev tim tsum uas yooj yim tshaj plaws yog li ntawd yuav tsum tsis txhob tsis quav ntsej tej no. Vajtswv muaj tej kev tim tsum ncaj ncaj txog cov uas raws Nws qab tus cwj pwm, thiab tej kev tim tswm ntawd txawv cov cwj pwm zoo uas cov tsis ntseeg hais tawm. Cov cwj pwm zoo uas cov tsis ntseeg coj ntawd tsuas ua kom tib neeg zoo dua tej tsiaj, ua kom pom tias lawv txawv ntawm cov tsiaj uas qis dua xwb. Hos, tej kev tim tsum uas Vajtswv tim tsum ntawm cov uas raws Nws qab ntawd mas, yog ua kom pom tias lawv txawv ntawm cov tsis ntseeg, txawv ntawm cov tib neeg uas tsis ntseeg Vajtswv ntag. Tsis yog ua kom lawv txawv ntawm tej tsiaj xwb. Yav dhau los, kuj muaj qhov tham txog “kev ntxuav kom dawb huv” thiab. Qhov no yog ib txoj kev uas muab hais tau tshaj dhau, thiab tsis yog lawm, tiam sis Vajtswv tau hais qee yam kev tim tsum rau cov uas raws Nws qab txog lawv tus cwj pwm. Qhia Kuv seb, tej kev tim tsum ntawd yog dab tsi? (Yog kom muaj lub siab dawb huv tiag tiag, tsis txhob ua tus neeg siab phem, txwv, tsis txhob hnav tej khaub ncaws txawv txawv, tsis txhob haus luam yeeb los sis haus dej haus cawv, tsis txhob ntaus neeg los sis hais lus phem rau lwm tus, tsis txhob pe mlom, thiab hwm yus niam yus txiv.) Dhau ntawm cov ntawd lawm, muaj dab tsi ntxiv? (Tsis txhob muab lwm tus tej khoom mus siv yam tsis tsim nyog, tsis txhob ua tub sab tub nyiag, tsis txhob ua tim khawv tsis tseeb, tsis txhob deev luag poj luag txiv.) Muaj cov ntawd thiab. Tej ntawd yog ib feem ntawm txoj kev cai, tej ntawd yog qee yam kev tim tsum uas Vajtswv tau hais tawm txog tib neeg ntiaj teb tus cwj pwm puag thaum chiv keeb lawm, thiab tej ntawd yeej tseem muaj tseeb thiab muaj qab hau txog niaj hnub no. Vajtswv siv tej kev tim tsum no los tswj cov uas raws Nws qab tus cwj pwm, uas txhais tau hais tias cov cwj pwm sab nraud no yog lub cim ntawm cov uas raws Vajtswv qab. Yog koj muaj cov cwj pwm thiab tej kev qhia kom pom tseeb no, xws li thaum lwm tus saib koj, mas lawv paub hais tias koj yog ib tug ntseeg Vajtswv, ces yam tsawg kawg lawv yuav nyiam koj thiab qhuas koj. Lawv yuav hais tias koj muaj lub siab dawb huv tiag tiag, tias koj zoo li ib tug ntseeg Vajtswv, thiab tsis zoo li ib tug tsis ntseeg. Qee tus tib neeg uas los ntseeg Vajtswv mas yeej tseem zoo ib yam li cov tsis ntseeg, pheej haus luam yeeb, haus dej haus cawv, ntaus neeg, thiab sib cav sib ceg. Haj tseem muaj qee tus uas deev luag poj luag txiv thiab ua tub sab tub nyiag thiab. Tab txawm lawv tus cwj pwm los twb tswj tsis tau, thiab tsis ua raws li Vajtswv cov lus, thiab thaum ib tug tsis ntseeg pom lawv, mas tus tsis ntseeg ntawd hais tias, “Lawv puas yog ib tug ntseeg Vajtswv tiag tiag? Vim li cas lawv tsuas zoo li cov tib neeg uas tsis ntseeg Vajtswv xwb?” Lwm tus tsis qhuas tus tib neeg ntawd los sis tso siab rau tus tib neeg ntawd, yog li ntawd thaum tus tib neeg ntawd sim tshaj tawm txoj moo zoo, tib neeg yuav tsis lees txais txoj moo zoo. Yog leej twg ua tau li yam uas Vajtswv tim tsum ntawm tib neeg, ces tus tib neeg ntawd yog ib tug uas nyiam yam zoo, tus tib neeg ntawd lub siab zoo, thiab tus tib neeg ntawd muaj txoj kev ua neej. Ib tug tib neeg uas zoo li no tuaj yeem muab tau Vajtswv cov lus coj los xyaum ua kiag tom qab hnov cov lus ntawd lawm, thiab qhov lawv xyaum ua ntawd tsis muaj qhov ua txuj li, vim yam tsawg kawg, lawv tau ua raws li lawv lub siab uas txawj xav thiab qhov tsim nyog lawm. Vajtswv tej kev tim tsum ntawm tib neeg uas ncaj ncaj ntawd txawv cov cwj pwm zoo uas tib neeg ntiaj teb txhawb nqa ntawd li cas? (Vajtswv tej kev tim tsum ntawm tib neeg ntawd mas muaj qab hau heev, tej kev tim tsum ntawd ua rau tib neeg ua neej tau li ib txwm ua, hos txoj kab lis kev cai mas tsuas tim tsum qee tus cwj pwm zoo kom luag pom xwb, uas tsis muaj qhov ua tau tiag tiag.) Qhov ko yog lawm. Cov cwj pwm zoo uas txoj kab lis kev cai tim tsum ntawm tib neeg ntawd puav leej cuav thiab cov cwj pwm zoo ntawd puav leej zais li zais xwb. Cov cwj pwm zoo ntawd yog ib txoj kev ua txuj xwb. Tej zaum cov uas coj raws li cov cwj pwm zoo ntawd yuav hais tej lus zoo zoo, tiam sis nyob rau sab hauv mas, txhua yam txawv deb heev. Cov cwj pwm zoo no yog ib daim ntaub npog ntsej muag, yog ib txoj kev dag xwb. Cov cwj pwm zoo ntawd tsis yog yam uas tawm hauv lub ntsiab tseeb ntawm tib neeg txoj kev ua neej tuaj, cov cwj pwm zoo ntawd yog daim looj ntsej muag uas tib neeg looj txhawm rau lawv txoj kev khav txiv, txhawm rau lawv lub koob lub npe thiab lub meej mom xwb. Cov cwj pwm zoo ntawd yog ib qho ua kom luag pom, yog ib qho ntsej muag ncaj siab nkhaus, yog ib yam uas tib neeg txhob txwm ua kom lwm tus pom. Qee zaum tib neeg tsis paub xyov tus tib neeg ntawd tus cwj pwm yog tseeb los cuav, tiam sis ntev mus, txhua tus mam li pom tus tib neeg ntawd tus kheej tiag tiag. Qhov ntawd tsuas zoo li cov Falixais uas ntsej muag ncaj siab nkhaus, uas muaj cov cwj pwm zoo sab nraud thiab tej kev qhia kom pom tseeb ntau heev txog qhov lawv hu ua kev mob siab rau ntseeg ntawd xwb, tiam sis thaum tus Tswv Yexus los nthuav qhov tseeb tawm thiab ua tes dej num ntawm kev txhim dim, mas lawv teem txim rau Nws thiab muab Nws ntsia rau saum ntoo khaub lig, vim lawv dhuav qhov tseeb thiab ntxub qhov tseeb. Qhov no qhia tau hais tias tib neeg tus cwj pwm zoo thiab tej kev ua sab nraud ntawd tsis sawv cev rau lawv tus yam ntxwv lub ntsiab tseeb. Cov cwj pwm zoo ntawd tsis cuam tshuam rau tib neeg tus yam ntxwv lub ntsiab tseeb. Hos, tej kev cai uas Vajtswv tim tsum kom tib neeg ua ntawd mas tuaj yeem muab coj los xyaum ua thiab ua raws tiag tiag, tsuav tib neeg ntseeg Vajtswv tiag tiag thiab muaj ib lub siab uas txawj xav thiab qhov tsim nyog xwb. Koj yuav tsum ua tej no, tsis hais yuav ua rau lwm tus pom los sis lwm tus tsis pom; txawm koj txoj kev ua neej lub ntsiab tseeb yuav zoo li cas los xij, koj yuav tsum ua kom tau raws li tej kev tim tsum uas Vajtswv tau hais tawm no. Yog koj twb raws Vajtswv qab lawm, koj yuav tsum txwv koj tus kheej thiab xyaum ua raws li Nws cov lus, txawm koj tus moj yam qias vuab tsuab yuav qias npaum li cas los xij. Tom qab ib lub sij hawm uas tau ntsib tau pom zoo li no lawm, koj yuav muaj txoj kev to taub tseeb, thiab koj yuav hloov pauv tiag tiag. Qhov kev hloov pauv tiag tiag ntawd muaj tseeb.

Cia peb muab xaus sai sai hais tias: Hom kev tim tsum uas Vajtswv tim tsum ntawm tib neeg tus cwj pwm ntawd yog dab tsi? Tib neeg yuav tsum coj kom muaj lub hauv paus ntsiab lus thiab tswj lawv tus kheej, thiab lawv yuav tsum ua neej kom muaj meej mom yam tsis muaj ib qho ua txuj li, xws li ua kom lwm tus hwm lawv. Cov no yog Vajtswv tej kev tim tsum txog txoj kev coj tus cwj pwm ntawm tib neeg. Qhov no txhais hais tias, txawm thaum lawv nrog lwm tus thiab tsis nrog, los sis lawv yuav nyob rau cheeb tsam twg, los sis lawv yuav ntsib leej twg los xij, lawv yuav tsum xyaum ua li no thiab muaj qhov muaj tiag no. Cov tib neeg dog dig yuav tsum muaj tej uas muaj tiag no; nws yog ib yam uas tib neeg yuav tsum tau ua hais txog lawv txoj kev coj kom zoo. Muab hais piv txwv hais tias, qee tus neeg mas hais lus nrov heev, tiam sis tus neeg ntawd tsis hais lus phem rau lwm tus los sis siv tej lus qias neeg, thiab yam uas tus neeg ntawd hais mas muaj tseeb thiab yog, thiab tsis tawm tsam lwm tus tib neeg. Tab txawm yog tus tib neeg ntawd hais tias lwm tus tib neeg phem los sis hais tias lwm tus tib neeg tsis zoo los xij, qhov ntawd yeej muaj tseeb. Txawm lawv tej lus thiab tej kev ua sab nraud tsis mus raws li tej kev tim tsum uas ua tus neeg siab dawb siab zoo los sis ua tus neeg paub tab thiab paub cai uas cov tsis ntseeg tau hais tawm ntawd los xij, lub ntsiab ntawm yam uas lawv hais, thiab tej hauv paus ntsiab lus thiab lub hauv paus ntawm lawv tej lus hais ntawd ua rau lawv ua neej muaj lub meej mom thiab muaj kev ncaj ncees. Qhov ntawd yog qhov txhais hais tias ua neej kom muaj lub hauv paus ntsiab lus. Lawv tsis hais lus yam xyiv fab hlo txog tej uas lawv tsis paub, thiab lawv tsis ntsuas cov tib neeg uas lawv tsis paub meej raws li lawv lub siab nyiam. Txawm nyob rau saum daim tawv es zoo li lawv tsis paub tab, thiab lawv ua tsis tau li tus qauv ntawm txoj kev coj tus cwj pwm uas ua tus neeg paub kab lis kev cai thiab ua raws li txoj cai uas cov tsis ntseeg hais txog ntawd los xij, vim lawv muaj lub siab ntshai Vajtswv, thiab lawv tswj tau lo lus hais thiab tej kev ua, qhov lawv ua neej ntawd mas siab tshaj cov cwj pwm uas ua tus neeg muaj kev kawm siab thiab paub qab paub hau, paub tab thiab paub cai, thiab paub kev paub cai, uas tib neeg ntiaj teb hais txog ntawd lawm. Qhov no tsis yog ib txoj kev qhia kom pom tseeb txog qhov tswj yus tus kheej thiab muaj lub hauv paus ntsiab lus lod? (Yog.) Txawm li cas los xij, yog nej ua tib zoo saib tej kev tim tsum ntawm tus cwj pwm zoo uas Vajtswv hais tawm rau cov raws Nws qab ntawd, qhov kev tim tsum twg uas tsis yog ib txoj kev cai tseem ceeb txog yam tib neeg yuav tsum ua neej kom muaj qab hau? Qhov kev tim tsum twg uas kom tib neeg zais lawv tus kheej? Tsis muaj li, puas yog? Yog nej muaj qhov ua xyem xyav, nej hais qhov ua xyem xyav ntawd tawm tuaj los tau. Piv txwv li, ib txhia yuav hais tias, “Thaum Vajtswv hais tias tsis txhob ntaus neeg los sis hais lus phem rau lwm tus tib neeg, mas zoo li tsis tshua yog lawm, vim hais tias tam sim no muaj cov tib neeg uas tej zaum hais lus phem rau lwm tus, uas Vajtswv tsis teem txim rau lawv.” Thaum Vajtswv hais tias tsis txhob hais lus phem rau lwm tus tib neeg, qhov “hais lus phem” ntawd yog hais txog dab tsi? (Thaum tib neeg qhia lawv tej kev xav hauv siab tawm vim lawv tus moj yam qias vuab tsuab.) Qhov qhia yus tej kev xav hauv siab tawm, thiab hais lus tsis zoo—qhov ntawd yog qhov hais lus phem ntag. Yog qhov uas hais txog tus tib neeg ntawd yog qhov tsis txaus siab, tiam sis qhov ntawd yog hais raws li tus tib neeg ntawd lub ntsiab tseeb uas qias vuab tsuab, ces qhov ntawd tsis yog hais lus phem. Piv txwv li, tej zaum muaj qee tus tib neeg tau tab kaum thiab tau cuam tshuam pawg ntseeg tes hauj lwm thiab tau ua ntau yam kev phem, es koj hais rau tus tib neeg ntawd hais tias, “Koj tau ua kev phem ntau heev. Koj yog ib tug neeg phem—koj tsis yog tib neeg!” Qhov ntawd puas suav tias yog hais lus phem? Los sis tias yog ib qho kev nthuav tawm txog ib tug moj yam qias vuab tsuab? Los sis tias yog qhov kev qhia yus tej kev xav hauv siab tawm? Los sis tias tsis yog qhov muaj lub siab dawb huv tiag tiag? (Qhov ntawd yog raws li tej uas muaj tseeb, yog li ntawd tsis suav tias yog hais lus phem.) Qhov ko yog lawm, tsis suav. Qhov ntawd yog raws li tej uas muaj tseeb lawm—cov lus no yog cov lus tseeb, hais tiag tiag, thiab tsis muaj dab tsi npog los sis zais li. Tej zaum qhov ntawd yuav tsis yog raws li qhov ua tus neeg muaj kev kawm siab thiab paub qab paub hau los sis paub tab thiab paub cai, tiam sis qhov ntawd yog raws li tej uas muaj tseeb. Cov tib neeg uas raug cem ntawd yuav muab lawv tus kheej piv rau cov lus ntawd thiab saib lawv tus kheej kom meej, thiab lawv yuav pom hais tias qhov lawv raug cem ntawd yog vim lawv ua qee yam yuam kev thiab tau ua kev phem ntau heev lawm. Lawv yuav ntxub lawv tus kheej, thiab xav hais tias, “Kuv yog ib tug neeg uas tsis muaj txiaj ntsim dab tsi tiag tiag li! Tsuas yog tus tib neeg ruam xwb thiaj li ua li kuv ua—kuv tsis yog tib neeg! Qhov lawv cem kuv li ntawd mas yog thiab zoo lawm!” Tom qab lees txais qhov luag cem ntawd lawm, lawv yuav tau txais kev paub me ntsis txog lawv tus yam ntxwv lub ntsiab tseeb, thiab tom qab raug muab nthuav tawm li ntawd ib ntus lawm, lawv yuav lees txim hloov dua siab tshiab tiag tiag. Nyob rau yav tom ntej, lawv thiaj li yuav paub nrhiav tej hauv paus ntsiab lus thaum ua lawv tes dej num. Qhov raug cem ntawd tsis yog ua rau lawv ras lod? Yog li tsis muaj qhov txawv ntawm qhov cem thiab qhov “hais lus phem” nyob rau hauv Vajtswv txoj kev tim tsum uas kom tib neeg tsis txhob hais lus phem rau lwm tus ntawd lod? (Muaj.) Qhov txawv yog qhov twg? Qhov “hais lus phem” nyob rau hauv Vajtswv txoj kev tim tsum uas kom tib neeg tsis txhob hais lus phem rau lwm tus ntawd yog txhais li cas? Ib qho ntawm qhov no yog qhov hais tias yog lub ntsiab thiab cov lus ntawd phem, ces qhov ntawd tsis zoo. Vajtswv tsis xav hnov ib lo lus qias neeg tawm hauv cov raws Nws qab lub qhov ncauj tuaj li. Nws tsis xav hnov cov lus ntawd. Tiam sis yog siv qee lo lus uas tsis zoo los nthuav tej uas muaj tseeb tawm, ces tej yam uas zoo li no kuj tsis ua li cas thiab. Qhov ntawd tsis yog hais lus phem. Lwm qhov yog qhov hais tias: lub ntsiab tseeb ntawm tus cwj pwm uas hais lus phem ntawd yog dab tsi? Nws tsis yog ib txoj kev nthuav tawm txog txoj kev npau taws sai lod? Yog qhia, qhuab ntuas, thiab sib txuas lus dog dig xwb tuaj yeem piav qhia tau ib qho teeb meem meej meej thiab tseeb tseeb lawm no, vim li cas ho hais lus phem rau tus tib neeg ntawd? Qhov ua li ntawd mas tsis zoo, nws tsis tsim nyog. Yog muab piv rau tej kev ua uas zoo ntawd, mas qhov hais lus phem tsis yog ib qho zoo hais. Qhov ntawd yog qhov kev qhia yus tej kev xav hauv siab tawm thiab kev nthuav yus txoj kev npau taws sai tawm, yog li ntawd Vajtswv thiaj li tsis xav kom tib neeg siv qhov kev qhia lawv tej kev xav hauv siab tawm los sis qhov kev nthuav txoj kev npau taws sai tawm tuaj ntawd los ua ib txoj kev daws txhua yam teeb meem. Thaum tib neeg nthuav txoj kev npau taws sai tawm tuaj thiab qhia lawv tej kev xav hauv siab tawm, mas tus cwj pwm uas lawv pheej coj ntawd yog qhov siv lo lus los hais phem thiab tawm tsam. Lawv yuav hais yam uas tsis txaus siab tshaj plaws, thiab lawv yuav hais yam uas yuav ua rau mob lwm tus lub siab es kom thiaj li txo tau lawv tus kheej txoj kev npau taws. Ces thaum lawv hais tag lawm, tsis yog lawv tsuas yuav rhuav tshem thiab ua rau lwm tus mob siab xwb—lawv kuj yuav rhuav tshem thiab ua rau lawv tus kheej mob siab thiab. Qhov no tsis yog tus cwj pwm los sis lub tswv yim uas cov raws Vajtswv qab tsim nyog muab coj los siv daws txhua yam. Tshaj ntawd ntxiv, cov tib neeg uas qias vuab tsuab yeej ib txwm muaj txoj kev xav ua pauj, xav qhia lawv tej kev xav hauv siab thiab txoj kev tsis txaus siab tawm, xav nthuav lawv txoj kev npau taws sai tawm tuaj. Lawv xav hais lus phem rau lwm tus tas mus li li, thiab thaum muaj ib yam dab tsi tshwm tuaj, tsis hais loj los me, tus cwj pwm uas lawv qhia kom pom tseeb kiag tam sim ntawd ces yog qhov hais lus phem xwb. Tab txawm lawv paub tias tus cwj pwm zoo li no yuav daws tsis tau ib qho teeb meem li los, lawv yeej coj li ntawd li. Qhov ntawd tsis yog ib tug cwj pwm phem lod? Lawv haj tseem yuav coj li ntawd thaum lawv nyob ib leeg hauv lawv tsev, thaum tsis muaj leej twg hnov lawv li thiab. Qhov ntawd tsis yog qhov kev qhia yus tej kev xav hauv siab tawm lod? Qhov ntawd tsis yog qhov kev nthuav yus txoj kev npau taws sai tawm lod? (Yog.) Muab hais dav dav hais tias, qhov kev nthuav yus txoj kev npau taws sai tawm thiab qhov kev qhia yus tej kev xav haus siab tawm ntawd, yog txhais hais tias siv yus txoj kev npau taws sai los ua ib txoj kev kho thiab daws ib yam dab tsi ntag; qhov ntawd txhais hais tias siv tus cwj pwm uas npau taws sai ntawd los daws txhua yam teeb meem xwb, thiab ib tug cwj pwm thiab ib qho kev qhia kom pom tseeb txog qhov ntawd yog qhov hais lus phem ntag. Yog hais tias qhov ntawd yog lub ntsiab tseeb ntawm qhov hais lus phem no, qhov Vajtswv tim tsum kom tib neeg tsis txhob ua li ntawd tsis yog ib qho zoo lod? (Yog.) Qhov Vajtswv tim tsum kom tib neeg tsis txhob hais lus phem rau lwm tus ntawd tsis tsim nyog lod? Qhov ntawd tsis muaj txiaj ntsim rau tib neeg lod? (Muaj.) Thaum kawg, lub hom phiaj ntawm Vajtswv txoj kev tim tsum kom tib neeg tsis txhob ntaus neeg los sis hais lus phem rau lwm tus ntawd yog kom tib neeg xyaum tswj lawv tus kheej, thiab kom lawv thiaj li pheej tsis ua neej raws li lawv tej kev xav hauv siab thiab txoj kev npau taws sai. Txawm lawv yuav hais dab tsi los xij thaum lawv hais lus phem rau ib tug neeg twg lawm, mas yam uas tawm ntawm cov uas ua neej raws li lawv tej kev xav hauv siab thiab txoj kev npau taws sai ntawd tuaj ces yog ib tug moj yam qias vuab tsuab xwb. Tus moj yam qias vuab tsuab ntawd yog tus moj yam qias vuab tsuab dab tsi? Yog tus moj yam lim hiam thiab khav theeb. Qhov nthuav tus moj yam qias vuab tsuab tawm tuaj daws txhua yam teeb meem ntawd puas yog Vajtswv lub siab nyiam? (Tsis yog.) Vajtswv tsis xav kom cov raws Nws qab siv tej tswv yim zoo li no los daws txhua yam uas tshwm sim nyob ib puag ncig lawv, lub ntsiab lus yog qhov hais tias Vajtswv tsis nyiam thaum tib neeg daws txhua yam uas tshwm sim nyob ib puag ncig lawv los ntawm qhov ntaus lwm tus thiab hais lus phem rau lawv. Qhov koj hais lus phem rau tib neeg ntawd yuav daws tsis tau ib qho teeb meem li, thiab qhov ua li ntawd cuam tshuam rau koj lub peev xwm uas los ua raws li tej hauv paus ntsiab lus. Yam tsawg kawg, qhov ntawd tsis yog ib tug cwj pwm zoo, thiab qhov ntawd tsis yog ib tug cwj pwm uas cov neeg muaj kev ua neej yuav tsum muaj. Vim li ntawd Vajtswv thiaj li muab ib txoj kev tim tsum txog cov uas raws Nws qab ntawd hais tawm kom lawv tsis txhob ntaus neeg los sis hais lus phem rau lwm tus. Nyob rau hauv qhov “hais lus phem” ntawd, mas muaj tej kev xav hauv siab thiab qhov kev npau taws sai. “Tej kev xav hauv siab”—qhov ntawd hais txog dab tsi tshwj xeeb? Qhov ntawd hais txog kev ntxub ntxaug thiab lus foom phem, xav kom lwm tus mob, cia siab tias lwm tus yuav tau txais qhov lawv tsim nyog tau txais raws li lawv tej kev xav, thiab kom lwm tus yuav los xaus rau qhov tsis zoo. Tej kev xav hauv siab ntawd muaj tej yam uas tsis zoo li no. Yog li, “qhov kev npau taws sai” ntawd txhais li cas? Nws txhais hais tias qhia yus tej kev xav haus siab tawm los ntawm qhov siv tej tswv yim uas lim hiam tshaj plaws, tsis zoo, thiab phem, thiab xav kom txhua yam thiab cov tib neeg uas yus tsis nyiam ntawd ploj mus, los sis kom raug kev puas tsuaj, kom yus thiaj li tau zoo siab rau lawv txoj hmoo phem, raws li yus xav. Qhov ntawd yog qhov kev npau taws sai. Qhov kev npau taws sai ntawd muaj dab tsi? Kev ntxub ntxaug, kev tsis nyiam, thiab lus foom phem, nrog raug qee lub siab phem—tag nrho tej no yog tej uas qhov kev npau taws sai ntawd muaj. Tej ntawd puas muaj ib qho zoo li? (Tsis muaj.) Tus yam ntxwv uas tib neeg muaj ntawd yog dab tsi thaum lawv ua neej raws li tej kev xav haus siab thiab qhov kev npau taws sai no lawm? Lawv yuav tsis dhau mus ua ib tug dab chim lod? Koj yim hais lus phem rau tib neeg, ces koj yim npau taws, thiab koj yim lim hiam, thiab koj yim xav hais lus phem rau lwm tus xwb, ces thaum kawg, koj yuav xav mus ntaus qee tus neeg. Thiab thaum koj ntaus neeg lawm, koj yuav xav ua kom lawv mob tshuav tuag, xav rho lawv txoj sia xwb, uas txhais hais tias: “Kuv yuav muab koj rhuav tshem! Kuv yuav muab koj tua!” Ib qho kev xav hauv siab me me—ib qho kev xav hauv siab uas phem—yuav ua rau yus muaj qhov kev npau taws sai tuaj, thiab thaum kawg, qhov ntawd yuav ua rau tib neeg xav rhuav tshem txoj sia. Qhov ntawd puas yog ib yam uas cov uas muaj txoj kev ua neej lawm ntawd yuav tsum muaj thiab ua li ntawd? (Tsis yog, qhov ntawd tsis yog.) Lub ntsej muag no yog lub ntsej muag dab tsi? (Nws yog dab lub ntsej muag.) Nws yog dab tab tom ntxeev siab rau dab lub ntsej muag tseeb. Dab muaj tib lub ntsej muag ib yam li ntawd, thaum dab yuav noj tib neeg. Dab tus yam ntxwv phem tshwm tuaj rau saum daim tawv, mas yuav tswj tsis tau. Qhov ntawd yog qhov txhais hais tias yog ib tug dab chim. Yog li ntawd cov tib neeg no chim npaum li cas? Lawv dhau los ua ib tug dab uas xav noj tib neeg cev nqaij daim tawv thiab tus ntsujplig kiag li lawm. Qhov phem tshaj plaws uas tau txais los ntawm qhov hais lus phem ntawd mas yog qhov hais tias nws yuav muab ib qho teeb meem uas yooj yim tig ib puas yim caum dis nkis, thiab ua rau qee tus tib neeg tuag. Muaj ntau qhov teeb meem uas pib los ntawm ib qho kev cov nyom me me ntawm ob tug tib neeg xwb, uas ua rau nkawv ib leeg nthe ib leeg thiab ib leeg hais lus phem rau ib leeg, ces ib leeg ntaus ib leeg, uas muaj qhov xav tua, uas tom qab ntawd dhau los ua ib qho teeb meem—uas nkawv ib tug raug tua, hos ib tug raug txim tua neeg thiab raug txim tuag. Thaum kawg ob leeg puav leej tuag huv si. Qhov no yog qhov tshwm sim thaum kawg. Nkawv tau hais nkawv cov lus phem, nkawv tau qhia nkawv tej kev xav haus siab tawm, nkawv tau nthuav tag nrho nkawv qhov kev npau taws sai tawm, thiab nkawv ob leeg tau mus rau hauv dab teb lawm. Qhov ntawd yog qhov txiaj ntsim thaum kawg. Tej yam zoo li no yog lub txim uas los raug rau tib neeg los ntawm qhov kev qhia lawv tej kev xav hauv siab tawm thiab qhov kev npau taws sai tuaj ntawd. Qhov no tsis yog ib qho txiaj ntsim zoo, nws yog ib qho txiaj ntsim phem. Koj pom hais tias, qhov no yog hom txiaj ntsim uas tib neeg tau txais los ntawm tus cwj pwm uas yog vim ib txoj kev xav hauv siab uas yooj yooj yim, thiab tsis zoo ntawd. Tib neeg tsis xav pom qhov txiaj ntsim zoo li no, thiab lawv tus kheej tsis xav raug, tiam sis vim tib neeg ua neej raws li txhua tus xeeb ceem ntawm tej kev xav hauv siab uas tsis zoo ntawd, thiab vim lawv raug qhov kev npau taws sai ntawd cuam tshuam thiab tswj lawm, uas pheej nthuav dav thiab tawm tuaj, lub txim zoo li no yog qhov tshwm sim thaum kawg. Qhia Kuv seb, qhov hais lus phem ntawd puas yog ib tug cwj pwm yooj yim? Cov lus phem uas tib neeg hais nyob rau hauv lawv lub neej txhua hnub ntawd tej zaum yuav tsis ua rau tau txais qhov txiaj ntsim phem zoo li no—uas yog, qhov txiaj ntsim phem zoo li no yuav tsis yog tshwm los ntawm qhov hais lus phem nkaus xwb. Tiam sis qhov no yog lub ntsiab tseeb ntawm qhov hais lus phem. Nws yog qhov kev qhia yus tej kev xav hauv siab thiab yus txoj kev npau taws sai tuaj ntawd tawm. Yog li ntawd, qhov Vajtswv tim tsum kom tib neeg ntiaj teb tsis txhob hais lus phem rau lwm tus ntawd mas muaj txiaj ntsim rau tib neeg heev—nws muaj txiaj ntsim rau tib neeg txhua txoj kev thiab tsis rhuav tshem tib neeg li—thiab tib lub sij hawm ntawd, qhov no yog ib feem ntawm qhov tseem ceeb ntawm qhov Vajtswv muab qhov kev tim tsum no hais tawm rau tib neeg ntiaj teb thiab. Qhov kev tim tsum kom tsis txhob hais lus phem rau lwm tus ntawd tej zaum yuav mus tsis txog qib uas xyaum ua raws li qhov tseeb los sis caum qhov tseeb, tiam sis qhov kev tim tsum no tib neeg kuj tseem yuav tsum tau coj thiab.

Tib neeg ua puas tau raws li qhov Vajtswv tim tsum kom lawv ib leeg yuav tsum tsis txhob hais lus phem rau ib leeg ntawd los ntawm qhov tswj lawv tus kheej nkaus xwb? Thaum tib neeg npau taws lawm, feem ntau lawv tswj tsis tau lawv tus kheej. Yog li ntawd, tib neeg yuav ua li cas thiaj li ua tau raws li qhov kev tim tsum kom ib leeg tsis txhob hais lus phem rau ib leeg no? Thaum koj tab tom yuav hais lus phem rau ib tug tib neeg twg, tshwj xeeb yog thaum koj tswj tsis tau koj tus kheej ntawd, koj yuav tsum maj nroos los thov Vajtswv. Yog koj thov Vajtswv li ib pliag thiab mob siab thov Vajtswv tiag tiag, ces qhov koj npau taws ntawd yuav ploj mus. Lub sij hawm ntawd, koj yuav tswj tau koj tus kheej, thiab tswj tau koj tej kev xav hauv siab thiab txoj kev npau taws sai yam zoo heev. Piv txwv li, muaj qee zaum tib neeg yuav hais tej yam uas ua rau koj mloog zoo li lawv thuam koj, los sis tej zaum lawv yuav txiav txim rau koj nyob tom koj nraub qaum, los sis tej zaum lawv txhob txwm ua kom koj mob siab los sis tsis paub tias yuav ua rau koj mob siab, los sis tej zaum lawv siv koj kom lawv tau txiaj ntsim me ntsis, nyiag qee yam ntawm koj, los sis haj tseem rhuav tshem koj tej kev ntshaw uas tseem ceeb heev thiab. Thaum tej no los raug rau koj, koj yuav xav hais tais: “Nws ua rau kuv mob siab, yog li ntawd kuv thiaj li ntxub nws, kuv xav qw hais lus phem rau nws, kuv xav ua pauj, kuv haj tseem xav muab nws ntaus thiab. Kuv xav ua ib qho phem phem nyob tom nws nraub qaum los qhia kom nws paub.” Txhua yam no tsis yog los ntawm tej kev xav hauv siab uas tsis zoo ntawd los lod? Qhov tshwm sim los ntawm tej kev xav hauv siab uas tsis zoo ntawd ces yog qhov koj yuav xav ua tej no ntag. Koj yim xav txog qhov ntawd, ces koj yim npau taws, thiab koj yim yuav xav hais tias tus tib neeg no tab tom thab koj, thiab tias koj lub meej mom thiab tus cwj pwm raug thuam lawm. Koj yuav hnov meem txom hauv siab, thiab koj yuav xav ua pauj. Qhov no tsis yog txoj kev lam taus lam npau taws sai uas tej kev xav tsis zoo uas nyob rau hauv koj no ua tawm tuaj lod? (Yog.) Koj txoj kev ntshaw ua pauj no yog tus cwj pwm dab tsi? Tsis yog koj tab tom yuav nthuav txoj kev npau taws sai tawm tuaj lod? Nyob rau lub sij hawm zoo li no, koj tus kheej yuav tsum nyob twj ywm; ua ntej tshaj plaws, koj yuav tsum thov Vajtswv, tswj koj tus kheej, xav thiab nrhiav qhov tseeb, thiab ua yam ntse ntsuav. Qhov ntawd xwb thiaj li yog tib txoj kev uas ua rau koj tsis muaj txoj kev ntxhov siab, kev ntxub ntxaug, tej kev xav hauv siab, thiab txoj kev npau taws sai. Qee tus yuav hais tias: “Yog ob tug tib neeg ua hauj lwm ua ke tag hnub, ces yeej tsis muaj txoj hauv kev uas yuav zam dhau qhov xwm txheej zoo li no li.” Tab txawm yog koj zam tsis dhau qhov xwm txheej no los xij, koj yuav tsum tsis txhob ua pauj, koj yuav tsum tswj koj tus kheej. Koj yuav ua li cas tswj tau koj tus kheej? Ua ntej tshaj plaws, koj yuav tsum xav rau koj tus kheej hais tias: “Yog kuv ua pauj, mas Vajtswv yeej yuav tsis txaus siab li, yog li ntawd kuv ua tsis tau li ntawd. Kev ntxub ntxaug, kev ua pauj, thiab kev tsis nyiam puav leej yog yam uas Vajtswv tsis nyiam.” Vajtswv tsis nyiam tej no, tiam sis koj tseem xav ua tej no, thiab koj tswj tsis tau koj tus kheej. Koj yuav daws qhov no li cas? Raws li ib txwm mas, koj yuav tsum vam khom rau Vajtswv; yog koj tsis thov Vajtswv, koj yuav daws tsis tau qhov no. Tshaj ntawd ntxiv, yog koj siab me dhau lawm, thiab koj npau taws sai heev, thiab koj yeej tswj tsis tau koj tej kev xav hauv siab thiab txoj kev npau taws sai li, thiab koj xav ua pauj xwb, ces koj yuav tsum tsis txhob qhib koj lub qhov ncauj los hais lus phem rau tus tib neeg ntawd kiag li. Koj tawm nyob rau qhov twg los tau, es cia lwm tus los cuam tshuam thiab daws qhov xwm txheej ntawd. Koj yuav tsum thov Vajtswv ntsiag to thiab nyeem Vajtswv cov lus ob peb sob uas hais txog qhov ntawd. Thov Vajtswv li no, es koj txoj kev npau taws sai thiaj li yuav maj mam ploj mus. Koj yuav paub hais tias qhov hais lus phem rau tib neeg ntawd daws tsis tau teeb meem, thiab tias qhov hais lus phem ntawd yuav yog ib qho kev nthuav tawm txog txoj kev qias vuab tsuab, thiab tias qhov hais lus phem ntawd tsuas ua rau Vajtswv txaj muag xwb. Qhov thov Vajtswv li no yuav tsis daws koj qhov teeb meem lod? Koj xav li cas txog qhov kev daws teeb meem no? (Zoo lawm.) Kuv qhov kev qhia txog txoj kev tswj tus cwj pwm uas Vajtswv hais tawm ces tag li no lawm xwb xws li: “Tsis txhob ntaus neeg los sis hais lus phem rau lwm tus.”

Kuv nyuam qhuav qhia txog cov cwj pwm zoo uas Vajtswv kom tib neeg coj, cov cwj pwm zoo ntawd yog dab tsi? (Yog kom muaj lub siab dawb huv tiag tiag, tsis txhob ua tus neeg siab phem, txwv, tsis txhob hnav tej khaub ncaws txawv txawv, tsis txhob ntaus neeg los sis hais lus phem rau lwm tus, tsis txhob haus luam yeeb los sis haus dej haus cawv, tsis txhob pe mlom, hwm yus niam yus txiv, tsis txhob ua tub sab tub nyiag, tsis txhob muab lwm tus tej khoom mus siv yam tsis tsim nyog, tsis txhob deev luag poj luag txiv, thiab tsis txhob ua tim khawv tsis tseeb.) Yog, tag nrho cov no yog lawm. Qhia Kuv seb, tej kev tim tsum uas hais tawm nyob rau hauv txoj kev cai, xws li cov uas hais txog qhov tsis txhob ua tub sab tub nyiag thiab tsis txhob siv lwm tus kom yus tau txiaj ntsim ntawd, puas tseem zoo siv rau tam sim no? Tej ntawd puas tseem siv tau? (Tej ntawd tseem zoo siv thiab siv tau.) Yog li, cov kev cai uas nyob rau Tiam Hmoov Hlub ne? (Cov ntawd los kuj tseem zoo siv thiab.) Yog li ntawd, vim li cas Vajtswv thiaj li hais tawm tej kev tim tsum ncaj ncaj no? Tej kev tim tsum ncaj ncaj no hais txog tib neeg txoj kev xyaum ua kis twg kiag? Yog Vajtswv tsis hais tej kev tim tsum no tawm, tib neeg puas yuav to taub tej no? (Lawv yuav tsis to taub.) Tib neeg yuav tsis to taub tej no. Tseeb tiag, tej kev tim tsum ncaj ncaj uas Vajtswv hais tawm los tswj tib neeg tus cwj pwm no puav leej hais txog txoj kev ua neej ntawm tib neeg xwb. Lub ntsiab ntawm qhov muab tej kev tim tsum ncaj ncaj no hais tawm ntawd yog los ua kom tib neeg paub thiab txheeb xyuas tau yam zoo thiab yam tsis zoo, nrog rau qhov yog thiab qhov tsis yog kom yog; nws yog los qhia tib neeg hais tias kev deev luag poj luag txiv yog ib qho tsis zoo, tias qhov kev deev luag poj luag txiv ntawd yog ib qho kev txaj muag, Vajtswv tsis nyiam, tib neeg saib tsis taus, thiab tias tib neeg yuav tsum tswj lawv tus kheej txog qhov no, tias lawv yuav tsum tsis txhob ua li no, los sis ua yuam kev txog qhov no; nws kuj yog los qhia tib neeg hais tias cov cwj pwm uas nyiam siv lwm tus kom yus tau txiaj ntsim, ua tub sab tub nyiag, thiab lwm yam ntawd puav leej yog yam tsis zoo, thiab tias tib neeg yuav tsum tsis txhob ua tej ntawd thiab. Yog koj nyiam ua tej no, thiab koj tau ua tej no lawm, ces koj tsis yog ib tug tib neeg zoo. Yus yuav ua li cas cais tau qhov sib txawv ntawm tus neeg zoo thiab tus neeg phem, los sis ntawm tus neeg uas xav txog qhov zoo thiab tus neeg uas xav txog qhov tsis zoo? Ua ntej tshaj plaws, koj yuav tsum lees paub qhov no hais tias—tsuas paub tau tib neeg tseeb tseeb los ntawm Vajtswv cov lus nkaus xwb, thiab tsuas cais tau qhov sib txawv ntawm cov neeg uas xav txog qhov zoo thiab cov neeg uas xav txog qhov tsis zoo ntawd los ntawm Vajtswv cov lus nkaus xwb. Tsuas paub thiab pom tau tib neeg tseeb tseeb los ntawm tej kev tim tsum thiab tej qauv uas Vajtswv tau muab hais tawm los tswj tib neeg tus cwj pwm nkaus xwb. Kuv mam li hais ib qho piv txwv xws li: Yog ib tug tib neeg twg khaus tes, es nyiam nyiag lwm tus tib neeg tej khoom, tus tib neeg ntawd txoj kev ua neej zoo li cas? (Tsis zoo.) Kev ua tub sab tub nyiag yog ib txoj kev phem loj, yog li ntawd cov uas nyiag yog cov tib neeg phem. Lwm tus tib neeg puav leej tawm tsam lawv, thiab nyob nrug deb ntawm lawv, thiab saib lawv li yog tub sab. Nyob rau hauv tib neeg lub siab mas, tub sab muaj cov cwj pwm tsis zoo, kev ua tub sab tub nyiag yog ib qho tsis zoo, thiab yog ib tug cwj pwm txhaum. Qhov no tsis muaj tseeb lod? Nov yog lwm qhov piv txwv xws li: Muab hais tias muaj ib tug neeg deev luag poj luag txiv, es ib txhia tib neeg tsis paub xyov qhov ntawd yog ib qho zoo los yog ib qho tsis zoo—raws li Vajtswv cov lus lawm, tib txoj kev uas lawv yuav ntsuas tau qhov no kom yog ces tsuas yog Vajtswv cov lus lawm xwb thiaj li yog qhov tseeb. Txawm tej kev coj ua uas raws kev raws cai thiab txoj kev paub cais qhov zoo qhov phem uas tau tshaj tawm tshiab txog txoj kev deev luag poj luag txiv tam sim no ntawd yuav yog dab tsi los xij, tej ntawd tsis yog qhov tseeb. Cov lus uas Vajtswv hais tias, “tsis txhob deev luag poj luag txiv” ntawd yog qhov tseeb, thiab qhov tseeb yeej yuav tsis ploj mus li. Txij li lub sij hawm uas Vajtswv tau hais qhov kev tim tsum uas hais tias, “Tsis txhob deev luag poj luag txiv” ntawd tawm, txhua tus yuav tsum tau pib tsis lees paub thiab nyob kom deb ntawm cov deev luag poj luag txiv ntawd. Cov tib neeg zoo li ntawd tsis muaj kev ua neej, thiab yam tsawg kawg, yog koj ntsuas lawv raws li qhov kev pom ntawm txoj kev ua neej, mas lawv tsis yog cov tib neeg zoo. Txhua tus tib neeg uas coj hom cwj pwm no, thiab muaj hom kev ua neej no mas txaus txaj muag heev, tib neeg tsis nyiam lawv kiag li, ntau pab pawg saib tsis taus lawv thiab tsis lees paub lawv, thiab tib neeg coob tus tsis kam txais yuav lawv. Raws li Vajtswv cov lus lawm, peb lees paub tau hais tias qhov kev deev luag poj luag txiv ntawd yog ib qho tsis zoo, thiab tias cov tib neeg uas ua li ntawd yog cov neeg uas xav txog qhov tsis zoo xwb. Txawm zej tsoom sawv daws tej kev ua yuav phem npaum li cas los xij, kev deev luag poj luag txiv thiab kev nkauj kev nraug yog yam tsis zoo, thiab cov tib neeg uas ua tej ntawd yog cov neeg uas xav txog qhov tsis zoo. Qhov no yeej muaj tseeb, yog li ntawd koj yuav tsum pom tias qhov no zoo li cas; koj yuav tsum tsis txhob raug zej tsoom sawv daws tej kev phem dag los sis ntxias. Ntxiv rau qhov no, muaj qee yam kev tim tsum ncaj ncaj ntxiv xws li: Vajtswv qhia tib neeg kom tsis txhob pe mlom, hwm yus niam yus txiv, tsis txhob ntaus neeg los sis hais lus phem rau lwm tus, kom muaj lub siab dawb huv tiag taig, thiab lwm yam. Cov kev tim tsum ncaj ncaj no puav leej yog cov qauv uas Vajtswv tswj tib neeg tus cwj pwm. Lwm lo lus mas hais tias, ua ntej Vajtswv muab qhov tseeb rau tib neeg, Nws qhia lawv tej kev ua uas yog thiab zoo, thiab tej kev ua uas tsis yog thiab tsis zoo, Nws qhia lawv tias yuav ua li cas thiaj ua tau ib tug neeg zoo thiab cov cwj pwm zoo uas lawv yuav tsum coj kom thiaj li ua tau ib tug neeg uas muaj txoj kev ua neej ntawd yog cov cwj pwm dab tsi, nrog rau yam uas lawv yuav tsum ua thiab yam uas yuav tsum tsis txhob ua raws li ib tug neeg uas muaj kev ua neej ntawd yog dab tsi, kom lawv thiaj li yuav xaiv tau qhov yog. Tag nrho tej kev tim tsum uas tswj tib neeg tus cwj pwm no puav leej yog tej uas txhua tus tib neeg dog dig yuav tsum tau ua tiag tiag, thiab yog lub hauv paus uas txhua tus tib neeg raug thiab daws txhua yam uas lawv ntsib. Piv txwv li, hais tias koj pom tias lwm tus neeg muaj ib yam dab tsi zoo, es koj xav muab yam ntawd los ua koj tug, tiam sis tom qab ntawd koj xav hais tias: “Vajtswv hais tias qhov nyiag los ntawm lwm tus ntawd mas tsis yog, Nws hais tias peb yuav tsum tsis txhob nyiag los sis siv lwm tus kom peb tau txiaj ntsim, yog li ntawd kuv yuav tsis nyiag los ntawm lawv.” Yog li tus cwj pwm uas nyiag khoom ntawd tsis tau raug txwv lod? Thiab nyob rau tib lub sij hawm uas raug txwv ntawd, koj tus cwj pwm tsis raug tswj lod? Ua ntej Vajtswv muab tej kev tim tsum no hais tawm, thaum tib neeg pom ib yam dab tsi zoo uas lwm tus tib neeg muaj, mas lawv xav muab yam ntawd los ua lawv tug xwb. Lawv tsis xav tias qhov ua li ntawd mas tsis yog los sis txaj muag, los sis tias Vajtswv tsis nyiam kiag li, los sis tias qhov ua li ntawd yog ib qho tsis zoo, los sis tias qhov ua li ntawd yog ib qho kev txhaum; lawv tsis paub tej no, lawv tsis muaj tej kev xav no. Tom qab Vajtswv muab qhov kev tim tsum uas hais tias, “tsis txhob nyiag” ntawd hais tawm lawm, ua rau tib neeg muaj kev xav thaum hais txog qhov ua tej no, thiab los ntawm qhov kev xav no lawv thiaj li kawm paub tias muaj qhov txawv ntawm qhov kev nyiag thiab qhov kev tsis nyiag. Qhov kev nyiag ntawd npaum nkaus li ua ib yam dab tsi tsis zoo, npaum nkaus li ua ib yam dab tsi phem los sis phem heev, thiab ua rau txaj muag xwb. Qhov kev tsis nyiag ntawd yog ua raws li txoj kev paub cais qhov zoo qhov phem ntawm txoj kev ua neej, thiab muaj kev ua neej nyob rau hauv. Vajtswv tej kev tim tsum txog tib neeg tus cwj pwm ntawd tsis yog tsuas kho tau tib neeg cov cwj pwm thiab cov kev ua uas tsis zoo xwb, tib lub sij hawm ntawd, tej kev tim tsum ntawd tswj tib neeg tus cwj pwm, thiab ua rau tib neeg muaj kev ua neej, muaj cov cwj pwm thiab tej kev qhia kom pom tseeb li qub, thiab yam tsawg kawg ua rau lawv zoo li tib neeg, zoo li cov tib neeg dog dig. Qhia Kuv seb, tej kev tim tsum uas Vajtswv tau hais tawm los tswj tib neeg tus cwj pwm no tsis muaj txiaj ntsim heev lod? (Muaj.) Tej kev tim tsum ntawd muaj txiaj ntsim heev. Txawm li cas los xij, tej kev tim tsum ncaj ncaj uas tswj tib neeg tus cwj pwm no tseem nyob deb ntawm qhov tseeb uas Vajtswv tab tom nthuav tawm tam sim no heev, thiab tsis tuaj yeem muab tej kev tim tsum ntawd saib siab ib yam li qhov tseeb. Qhov no yog vim hais tias, puag thaum ub, nyob rau Tiam Muaj Kev Cai ntawd, tej kev tim tsum no tsuas yog tej kev cai uas tswj tib neeg tus cwj pwm xwb, Vajtswv siv cov lus uas yooj yim thiab ncaj tshaj plaws los qhia tib neeg txog yam uas lawv tsim nyog ua thiab tsis tsim nyog ua, thiab tsim qee yam kev cai rau lawv. Nyob rau Tiam Hmoov Hlub, tej kev tim tsum no tsuas yog tej kev cai xwb, thiab nyob rau niaj hnub no, tej zaum tsuas hais tau hais tias tej kev cai ntawd yog cov qauv los ntsuas yus tus kheej tus cwj pwm, thiab ntsuas txhua yam xwb. Txawm tsis tuaj yeem muab cov qauv no saib siab ib yam li qhov tseeb, thiab muaj ib qho nrug deb ntawm cov qauv ntawd thiab qhov tseeb los xij, cov qauv ntawd yog ib qho uas yuav tau ua ua ntej uas tseem ceeb rau tib neeg txoj kev caum qhov tseeb thiab txoj kev xyaum ua qhov tseeb. Thaum tib neeg ua raws li cov kev cai no, ua raws li cov cai thiab cov lus txib no, ua raws li tej kev tim tsum thiab cov qauv coj tus cwj pwm uas Vajtswv tau tsim los tswj tib neeg tus cwj pwm no lawm, ces hais tau hais tias lawv muaj lub hauv paus ua ntej txog txoj kev xyaum ua qhov tseeb thiab txoj kev caum qhov tseeb lawm. Yog tib neeg haus luam yeeb thiab haus dej haus cawv, yog lawv tus cwj pwm phem, thiab lawv deev luag poj luag txiv, thiab siv lwm tus tib neeg kom lawv tau txiaj ntsim, thiab pheej nyiag, es koj ho hais tias, “Tus neeg no nyiam qhov tseeb, thiab nws yeej xyaum ua qhov tseeb thiab tau txais kev cawm dim” no, nqe lus ntawd puas muaj tseeb? (Tsis muaj tseeb.) Vim li cas nqe lus ntawd thiaj tsis muaj tseeb? (Tus neeg ntawd twb tsis muaj peev xwm ua tau Vajtswv tej kev tim tsum qhov uas yooj yim tshaj plaws, nws yeej yuav xyaum ua tsis tau qhov tseeb, yog li ntawd yog yus ho hais tias tus neeg ntawd nyiam qhov tseeb no mas, qhov ntawd yuav yog ib qho kev dag lawm.) Qhov ko yog lawm. Tus neeg no twb tsis muaj kev tswj nws tus kheej ib qho me me li. Lub ntsiab lus ntawm qhov no yog qhov hais tias tus neeg ntawd twb tsis muaj lub siab uas txawj xav thiab qhov tsim nyog uas ib tug tib neeg tsim nyog muaj los ua lub hauv paus ib qho me me li. Lwm lo lus mas hais tias, tus neeg no tsis muaj lub siab uas txawm xav thiab qhov tsim nyog ntawm txoj kev ua neej. Qhov tsis muaj lub siab uas txawj xav thiab qhov tsim nyog ntawd yog txhais li cas? Qhov ntawd txhais hais tias tus neeg no twb hnov cov lus uas Vajtswv tau hais, thiab tej kev tim tsum uas Vajtswv tau hais tawm rau tib neeg, thiab tej kev cai uas Vajtswv tau tsim lawm, tiam sis lawv tsis tau ua raws li tej ntawd kiag li. Vajtswv hais tias qhov kev nyiag los ntawm lwm tus ntawd mas tsis zoo, thiab tias tib neeg yuav tsum tsis txhob nyiag, tiam sis tus neeg no xav paub hais tias: “Vim li cas thiaj li tsis pub tib neeg nyiag? Kuv pluag heev, kuv yuav ua li cas nyob tau yog kuv tsis nyiag? Kuv puas yuav nplua nuj yog kuv tsis nyiag khoom los sis siv lwm tus tib neeg kom kuv tau txiaj ntsim?” Puas yog lawv tsis muaj lub siab uas txawj xav thiab qhov tsim nyog ntawm txoj kev ua neej? (Yog.) Lawv tsis muaj peev xwm ua raws li tej kev tim tsum uas Vajtswv tau tsim los txwv tib neeg tus cwj pwm, yog li ntawd lawv thiaj li tsis yog ib tug tib neeg uas muaj txoj kev ua neej. Yog yus ho hais tias tus neeg uas tsis muaj kev ua neej ntawd nyiam qhov tseeb no, puas yuav tau? (Tsis tau.) Lawv tsis nyiam yam zoo, thiab txawm Vajtswv hais tias tib neeg yuav tsum tsis txhob nyiag los sis deev luag poj luag txiv no los, lawv tsis muaj peev xwm ua raws li tej kev tim tsum no, thiab lawv dhuav Vajtswv cov lus no—yog li ntawd lawv puas yuav nyiam qhov tseeb? Qhov tseeb mas siab dua cov qauv coj tus cwj pwm no—lawv ua puas tau raws li qhov tseeb ntawd? (Tsis tau.) Qhov tseeb tsis yog ib tug qauv coj tus cwj pwm uas yooj yim, qhov tseeb ntawd tsis yog tsuas yog ib qho ntawm tib neeg qhov kev xav txog qhov tseeb thaum lawv ua txhaum los sis lam taus lam ua thiab tsis xyuam xim, es tom qab ntawd mam li txwv, thiab tsis ua txhaum los sis tsis ua ywj siab thiab tsis xyuam xim ntxiv lawm xwb. Qhov tseeb tsis yog tsuas txwv tib neeg tus cwj pwm yam yooj yooj yim xwb—qhov tseeb tuaj yeem dhau los ua tib neeg lub neej, thiab qhov tseeb tuaj yeem tswj kav txhua yam ntawm tib neeg. Thaum tib neeg lees txais qhov tseeb los ua lawv lub neej lawm, ces qhov no yog ua tau los ntawm qhov lawv tau ntsib tau pom Vajtswv tes hauj lwm, los ntawm qhov los paub qhov tseeb, thiab xyaum ua qhov tseeb. Thaum tib neeg lees txais qhov tseeb lawm, ces kev tawm tsam yuav tshwm tuaj rau hauv lawv, thiab ntxim li lawv tej moj yam qias vuab tsuab yuav tawm tuaj. Thaum tib neeg muaj peev xwm siv qhov tseeb los kho lawv tej moj yam qias vuab tsuab lawm, ces qhov tseeb tuaj yeem dhau los ua lawv lub neej, thiab lub hauv paus ntsiab lus uas lawv coj lawv tus kheej kom zoo thiab txoj kev ua neej nyob. Qhov no yog ib yam uas tsuas yog cov tib neeg uas nyiam qhov tseeb thiab muaj txoj kev ua neej xwb thiaj li yuav ua tau. Cov uas tsis nyiam qhov tseeb thiab cov uas tsis muaj txoj kev ua neej ntawd puas nce tau tuaj txog qib no? (Tsis tau.) Qhov ko yog lawm, tab txawm yog lawv xav kom tau los yeej tsis tau.

Yog peb saib tej kev tim tsum uas Vajtswv tau tsim los tswj tib neeg tus cwj pwm no mas, tag nrho cov lus uas Vajtswv tau hais, thiab tag nrho tej kev cai teeb tseg ncaj ncaj uas Nws tau hais tawm ntawd, puas muaj ib qho uas yog rov qab hais dua li? (Tsis muaj.) Tej ntawd puas muaj txiaj ntsim? Tej ntawd puas muaj nuj nqis? (Muaj.) Puas tsim nyog tib neeg ua raws li tej ntawd? (Tsim nyog.) Qhov ko yog lawm, tib neeg tsim nyog ua raws li tej ntawd. Thiab tib lub sij hawm thaum ua raws li tej ntawd, tib neeg yuav tsum muab tej nqe lus uas txoj kab lis kev cai tau qhia lawv, xws li ua tus neeg muaj kev kawm siab thiab paub qab paub hau, ua tus neeg paub tab thiab paub cai, thiab lwm yam ntawd pov tseg. Lawv yuav tsum ua raws li tej kev tim tsum uas Vajtswv tau hais tawm los tswj tib neeg tus cwj pwm ntawd txhua qho, thiab coj lawv tus kheej kom zoo kom nruj raws li Vajtswv cov lus. Lawv yuav tsum ua neej li ib txwm ua los ntawm qhov ua raws li tej kev tim tsum uas Vajtswv tau hais tawm ntawd kom zoo heev, thiab raws li ib txwm lawm, lawv kuj yuav tsum tau soj ntsuam tib neeg thiab txhua yam, coj lawv tus kheej kom zoo thiab ua kom nruj raws li tej kev tim tsum no thiab. Txawm tej kev tim tsum no tsis zoo npaum li cov qauv ntawm qhov tseeb los xij, tej kev tim tsum no puav leej yog Vajtswv cov lus, thiab vim tej kev tim tsum no yog Vajtswv cov lus, tej kev tim tsum no tuaj yeem muaj qhov coj tib neeg kev uas zoo thiab muaj txiaj ntsim. Kuv yuav txhais txoj kev caum qhov tseeb ntawd li cas? Txhais hais tias los saib tib neeg thiab txhua yam, thiab los coj yus tus kheej kom zoo thiab ua rawm nraim li Vajtswv cov lus, uas muaj qhov tseeb ua yus tus qauv. Vajtswv cov lus mas hais txog ntau yam heev. Qee zaus ib sob lus ntawm Nws cov lus ntawd sawv cev rau ib qho ntawm qhov tseeb. Qee zaus nws siv li ob peb sob lus, los sis ib zaj lus los qhia ib qho ntawm qhov tseeb tawm. Qee zaus tag nrho ib tshooj ma thiaj li nthuav tau ib qho ntawm qhov tseeb tawm. Qhov tseeb zoo li yooj yim, tiam sis tseeb tiag, nws tsis yooj yim kiag li. Yog muab qhov tseeb hais kom dav dav ces hais tias, Vajtswv yog qhov tseeb. Tag nrho Vajtswv cov lus puav leej yog qhov tseeb, Vajtswv cov lus mas ntau heev thiab cov lus ntawd muaj ntau lub ntsiab, thiab cov lus ntawd puav leej nthuav tawm txog qhov tseeb xwb. Piv txwv li, tej kev cai thiab cov lus txib uas Vajtswv tau hais tawm, nrog rau tej kev tim tsum txog txoj kev coj tus cwj pwm uas Vajtswv tau hais tawm nyob rau tiam tshiab no ntawd, puav leej yog Vajtswv cov lus xwb. Txawm cov lus no muaj ib co nce mus tsis txog qhov tseeb qib, thiab txawm cov lus no tsis tsim nyog ua qhov tseeb los xij, cov lus no yog yam zoo. Txawm cov lus ntawd tsuas yog cov lus uas txwv tib neeg tus cwj pwm xwb los xij, tib neeg tseem yuav tsum tau ua raws li qhov lus ntawd thiab. Yam tsawg kawg, tib neeg yuav tsum muaj hom cwj pwm no, thiab lawv yuav tsum ua kom tau raws li cov qauv no. Yog li ntawd, tib neeg txoj kev saib tib neeg thiab txhua yam, thiab lawv txoj kev coj kom zoo thiab tej kev ua ntawd yuav tsum yog ua raws li Vajtswv cov lus no xwb. Tib neeg yuav tsum ua raws li cov lus ntawd vim cov lus ntawd yog Vajtswv cov lus; txhua tus yuav tsum saib tib neeg thiab txhua yam, thiab coj lawv tus kheej kom zoo thiab ua raws li Vajtswv cov lus, vim cov lus ntawd yog Vajtswv cov lus. Tsis yog li ntawd lod? (Yog.) Yav dhau los Kuv twb tau hais qee yam zoo li no lawm hais tias: Vajtswv hais li cas Nws yuav li ntawd, thiab Nws cov lus yuav muaj tiav, thiab hais tias Nws cov lus uas muaj tiav lawm yuav nyob mus ib txhis, uas txhais tau hais tias Vajtswv cov lus yuav tsis ploj mus li. Vim li cas cov lus ntawd thiaj li tsis ploj mus? Vim hais tias txawm Vajtswv yuav hais lus ntau npaum li cas, thiab txawm Vajtswv yuav hais cov lus ntawd thaum twg los xij, cov lus ntawd puav leej yog qhov tseeb, thiab cov lus ntawd yuav tsis ploj mus li. Tab txawm thaum lub ntiaj teb no nkag mus rau ib tiam tshiab lawm los xij, Vajtswv cov lus yuav tsis hloov, thiab cov lus ntawd yuav tsis ploj mus. Vim li cas Kuv thiaj li hais tias Vajtswv cov lus yuav tsis ploj mus? Vim hais tias Vajtswv cov lus yog qhov tseeb, thiab yam uas yog qhov tseeb lawm yuav tsis hloov li. Yog li ntawd, tag nrho tej kev cai thiab cov lus txib uas Vajtswv tau hais tawm thiab hais, thiab tag nrho tej kev tim tsum ncaj ncaj uas Nws tau hais tawm txog tib neeg tus cwj pwm ntawd yuav tsis ploj mus li. Txhua qhov kev tim tsum uas nyob rau hauv Vajtswv cov lus ntawd muaj txiaj ntsim rau cov tib neeg ntiaj teb uas raug tsim tawm los, cov lus ntawd puav leej tswj tib neeg tus cwj pwm, thiab cov lus ntawd tab tom qhia thiab muaj nuj nqis rau txoj kev ua neej li ib txwm ua thiab muaj nuj nqis rau qhov tib neeg yuav tsum coj lawv tus kheej kom zoo li cas. Tag nrho cov lus no tuaj yeem hloov tau tib neeg, thiab ua rau lawv ua neej zoo nkaus li tib neeg tiag tiag. Tiam sis, yog tib neeg tsis lees paub Vajtswv cov lus no, thiab tsis lees paub tej kev tim tsum uas Vajtswv tau tim tsum ntawm tib neeg ntiaj teb ntawd, es lawv ho ua raws li cov nqe lus uas hais txog tus cwj pwm zoo uas tib neeg tau hais tawm ntawd, ces lawv nyob rau qhov phom sij heev. Tsis yog tias lawv yuav tsis muaj txoj kev ua neej thiab qhov tsim nyog zuj zus ntxiv xwb, lawv yuav txawj dag thiab ua cuav zuj zus ntxiv, thiab lawv yuav muaj peev xwm siv tswv yim dag zuj zus ntxiv, thiab txoj kev ua neej uas lawv ua ntawd yuav muaj tswv yim dag zuj zus ntxiv thiab. Tsis yog lawv yuav dag lwm tus xwb, lawv kuj yuav sim dag Vajtswv thiab.

Nyob rau ntawm tej kev tim tsum uas Vajtswv tau hais tawm txog tib neeg tus cwj pwm ntawd, mas muaj qhov kev tim tsum uas hais tias: “hwm yus niam yus txiv.” Feem ntau tib neeg tsis muaj ib qho kev xav los sis ib qho kev xav phem txog lwm qhov kev tim tsum li, yog li ntawd nej xav li cas txog qhov kev tim tsum uas hais tias: “hwm yus niam yus txiv” ntawd? Puas muaj ib qho kev cov nyom nyob rau ntawm qhov koj xam pom thiab qhov tseeb lub hauv paus ntsiab lus uas Vajtswv hais? Yog koj muaj peev xwm pom tau qhov no tseeb tseeb, ces qhov ntawd zoo lawm. Cov uas tsis to taub qhov tseeb, cov uas tsuas paub ua raws li kev cai thiab hais lus thiab hais cov lus qhuab qhia xwb ntawd tsis muaj kev thoob tsib to nrog; thaum lawv nyeem Vajtswv cov lus, lawv pheej muaj tib neeg tej kev xav phem, lawv pheej mloog zoo li muaj qee qhov kev cov nyom, thiab lawv tsis tuaj yeem pom Nws cov lus kom tseeb tseeb. Hos cov uas to taub qhov tseeb mas tsis pom muaj ib qho kev cov nyom nyob rau hauv Vajtswv cov lus li, lawv xav hais tias Nws cov lus mas meej heev, vim lawv to taub yam uas nyob sab ntsujplig thiab lawv nkag siab qhov tseeb. Qee zaum, nej tsis tuaj yeem pom Vajtswv cov lus kom tseeb tseeb, thiab nej tsis tuaj yeem nug ib lo lus nug li—yog nej tsis nug ib lo lus nug li, ces qhov ntawd zoo li nej tsis muaj ib qho teeb meem li, tiam sis tseeb tiag, nej muaj teeb meem thiab kev nyuaj ntau heev, nej tsis paub txog qhov no xwb. Qhov no qhia hais tias nej lub siab me dhau lawm. Ua ntej tshaj plaws, cia peb saib Vajtswv qhov kev tim tsum uas tib neeg yuav tsum hwm lawv niam lawv txiv ntawd seb—qhov kev tim tsum no puas yog los tsis yog? Puas tsim nyog tib neeg ua raws li qhov kev tim tsum ntawd los tsis tsim nyog? (Tsim nyog.) Qhov no yeej tsim nyog, thiab tsis lees paub tsis tau; tsis tas yuav ua ob siab los sis xav txog qhov no li, qhov kev tim tsum no yeej yog lawm. Dab tsi yog txog qhov kev tim tsum ntawd? Vim li cas Vajtswv thiaj li muab qhov kev tim tsum no hais tawm? Qhov “kev hwm yus niam yus txiv” uas Vajtswv hais txog ntawd yog hais txog dab tsi? Nej puas paub? Nej tsis paub. Vim li cas nej thiaj li pheej tsis paub? Tsuav muaj ib yam dab tsi cuam tshuam rau qhov tseeb xwb, ces nej cia li tsis paub yam ntawd li lawm, tiam sis nej ho tuaj yeem hais txog cov lus thiab cov lus qhuab qhia yam tsis txawj tag li—qhov teeb meem nyob rau ntawm no yog dab tsi? Yog li, nej yuav xyaum ua raws li Vajtswv cov lus no li cas? Qhov no tsis cuam tshuam rau qhov tseeb lod? (Cuam tshuam.) Thaum koj pom hais tias muaj ib sob lus ntawm Vajtswv cov lus uas hais tias, “Koj yuav tsum hwm koj niam koj txiv,” mas ua rau koj xav hauv koj tus kheej hais tias, “Vajtswv tab tom hais kom kuv hwm kuv niam kuv txiv, yog li ntawd kuv yuav tsum tau hwm nkawv,” ces koj pib ua qhov no. Koj ua li koj niam koj txiv kom koj ua—thaum koj niam koj txiv muaj mob pw saum txaj lawm koj saib xyuas nkawv, muab dej rau nkawv haus, ua zaub ua mob qab qab rau nkawv noj, thiab nyob rau hnub so, koj yuav tej yam khoom uas nkawv nyiam los ua khoom plig rau nkawv. Thaum koj pom tias nkawv sab lawm, koj nias nkawv xub pwg thiab zuaj nkawv nraub qaum, thiab thaum nkawv muaj teeb meem, koj muaj peev xwm daws tau. Vim txhua yam no, koj niam koj txiv txaus siab heev rau koj. Koj hwm koj niam koj txiv, xyaum ua raws li Vajtswv cov lus, thiab ua neej li ib txwm ua, yog li ntawd koj kaj siab, thiab xav hais tias: “Saib ma—kuv niam kuv txiv hais tias kuv hloov pauv txij thaum kuv pib ntseeg Vajtswv los lawm. Nkawv hais tias tam sim no kuv muaj peev xwm hwm nkawv thiab hais tias kuv paub qab paub hau tuaj lawm. Nkawv zoo siab heev, thiab nkawv xav hais tias qhov ntseeg Vajtswv ntawd mas zoo heev, vim cov tub thiab cov ntxhais uas ntseeg Vajtswv tsis yog tsuas hwm lawv niam lawv txiv xwb, lawv kuj taug txoj kev yog nyob rau hauv lub neej thiab ua neej zoo nkaus li tib neeg thiab—lawv zoo tshaj cov tsis ntseeg lawm ntau. Tom qab los ntseeg Vajtswv lawm, kuv tau pib xyaum ua raws li Vajtswv cov lus thiab ua raws li Nws tej kev tim tsum, thiab kuv niam kuv txiv zoo siab heev uas pom qhov kev hloov pauv nyob rau hauv kuv no. Kuv txaus siab heev rau kuv tus kheej. Kuv ua rau Vajtswv tau koob meej—Vajtswv yeej yuav txaus siab rau kuv xwb, thiab Nws yuav hais tias kuv yog ib tug neeg uas hwm nws niam nws txiv thiab muaj lub siab dawb huv tiag tiag.” Muaj ib hnub, pawg ntseeg kom koj mus rau lwm qhov chaw mus tshaj tawm txoj moo zoo, uas tej zaum yuav ntev heev koj mam li rov qab tau los tsev. Koj pom zoo mus, xav hais tias koj yuav cia li muab tes hauj lwm uas Vajtswv txib kom ua ntawd tso tseg mas tsis tau, thiab ntseeg hais tias koj yuav tsum hwm koj niam koj txiv nyob rau hauv tsev thiab ua raws li tes hauj lwm uas Vajtswv txim kom ua ntawd nyob rau sab nraud thiab. Tiam sis thaum koj nrog koj niam koj txiv tham txog qhov ntawd, nkawv npau taws, thiab hais tias: “Tus me nyuam uas tsis mloog lus ko! Wb khwv heev tu koj los, es tam sim no koj yuav cai li khiav mus. Thaum koj mus lawm, es leej twg yuav los saib xyuas ob niag laus zoo li wb no? Yog wb muaj mob los sis yog muaj qee yam tsis zoo no, leej twg yuav coj wb mus rau tsev kho mob?” Nkawv tsis pom zom kom koj ncaim mus, ces koj txawm txhawj hais tias: “Vajtswv qhia peb kom hwm peb niam peb txiv, tiam sis kuv niam kuv txiv yuav tsis cia kuv mus ua kuv tes dej num. Yog kuv mloog nkawv lus, kuv yuav tsum tau muab tes hauj lwm uas Vajtswv txib kom ua ntawd tso tseg, ces Vajtswv yuav tsis nyiam qhov ntawd. Tiam sis yog kuv mloog Vajtswv lus es mus ua kuv tes dej num lawm, kuv niam kuv txiv yuav tsis zoo siab. Kuv yuav ua li cas?” Koj xav mus xav los hais tias: “Vim Vajtswv tau hais kom tib neeg yuav tsum hwm lawv niam lawv txiv ua ntej lawm, kuv yuav ua raws li qhov kev tim tsum ntawd. Kuv tsis tas yuav mus ua kuv tes dej num.” Koj muab koj tes dej num tso tseg thiab xaiv los hwm koj niam koj txiv nyob rau hauv tsev, tiam sis koj tsis kaj siab. Koj mloog zoo li txawm koj twb tau hwm koj niam koj txiv lawm los xij, koj tsis tau ua koj tes dej num kom tiav, thiab koj xav hais tias koj tau ua rau Vajtswv tag kev cia siab lawm. Yuav ua li cas thiaj li daws tau qhov teeb meem no? Koj yuav tsum thov Vajtswv thiab nrhiav qhov tseeb, kom txog hnub uas koj to taub qhov tseeb thiab paub hais tias qhov ua koj tes dej num ntawd mas yog ib qho uas tseem ceeb tshaj plaws. Ces, koj yuav cia li muaj peev xwm tawm hauv tsev mus ua koj tes dej num kom tiav li lawm xwb. Ib txhia tib neeg hais tias: “Vajtswv xav kom kuv ua kuv tes dej num, thiab Nws kuj xav kom kuv hwm kuv niam kuv txiv thiab. Nyob rau ntawm no tsis muaj ib qho kev cov nyom thiab kev sib tawm tsam lod? Kuv yuav ua li cas?” “Kev hwm yus niam yus txiv” yog ib qho kev tim tsum uas Vajtswv hais tawm txog tib neeg tus cwj pwm, tiam sis qhov muab txhua yam tso tseg es los raws Vajtswv qab thiab ua tes hauj lwm uas Vajtswv txib kom ua kom tiav ntawd tsis yog Vajtswv qhov kev tim tsum lod? Qhov ntawd haj yam tsis yog qhov Vajtswv tim tsum lod? Qhov ntawd haj yam tsis yog qhov xyaum ua qhov tseeb lod? (Yog.) Koj yuav ua li cas yog ob qho kev tim tsum no los sib tsoo? Ib txhia tib neeg hais tias: “Yog li ntawd, kuv yuav tsum tau hwm kuv niam kuv txiv thiab ua tes hauj lwm uas Vajtswv txib kom ua ntawd kom tiav, thiab kuv yuav tsum tau ua raws li Vajtswv cov lus thiab xyaum ua qhov tseeb—zoo, qhov ntawd yooj yim. Kuv yuav tau ua txhua yam kom tiav nyob rau hauv tsev tso, npaj txhua yam khoom siv uas kuv niam kuv txiv tim tsum, ntiav ib tug kws saib xyuas neeg mob, ces tom qab ntawd mam li tawm mus ua kuv tes dej num. Kuv mam li los tsev li ib lub lim tiam twg ib zaug, los saib seb kuv niam kuv txiv puas nyob zoo, ces kuv mam li mus; yog muaj qee yam tsis zoo, kuv mam li nyob li ob hnub. Kuv yuav cia li pheej nyob deb nkawv es tsis rov qab los tsev li tsis tau, thiab kuv yuav cia li nyob tsev tas li es tsis tawm mus ua kuv tes dej num kuj tsis tau thiab. Qhov no tsis yog qhov zoo tshaj plaws rau ob sab ntawd lod?” Nej xav li cas rau qhov kev daws teeb meem no? (Qhov ko yuav daws tsis tau.) Nws yog ib qho kev xav hauv nruab siab xwb; nws tsis yog tiag tiag. Yog li ntawd, thaum nej ntsib qhov xwm txheej zoo li no, nej yuav tsum ua li cas kom rawm nraim qhov tseeb kiag? (Thaum hais txog txoj kev ua lub siab ncaj ncees thiab txoj kev mob siab hlub niam thiab txiv ntawd mas yeej tsis muaj hnub uas yuav ua tau ob sab ntawd kom zoo tshaj plaws li—kuv yuav tsum ua kuv tes dej num ua ntej tso.) Vajtswv hais kom tib neeg hwm lawv niam lawv txiv ua ntej, ces tom qab ntawd, Vajtswv tau hais tej kev tim tsum uas siab dua rau tib neeg txog qhov lawv xyaum ua qhov tseeb, qhov ua lawv tej dej num, thiab qhov taug Vajtswv txoj kev ntawd tawm—cov no koj yuav tsum ua raws li qhov twg? (Tej kev tim tsum uas siab dua.) Qhov xyaum ua raws li tej kev tim tsum uas siab dua ntawd puas yog? Qhov tseeb muab faib puas tau ua qhov tseeb uas siab dua thiab qhov tseeb uas qis dua, los sis qhov tseeb uas qub dua thiab qhov tseeb uas tshiab dua? (Tsis tau.) Yog li ntawd, thaum koj xyaum ua qhov tseeb, koj yuav tsum xyaum ua raws li dab tsi? Qhov xyaum ua qhov tseeb ntawd txhais li cas? (Daws teeb meem raws li tej hauv paus ntsiab lus.) Qhov daws teeb meem raws li tej hauv paus ntsiab lus ntawd yog qhov tseem ceeb tshaj plaws. Qhov xyaum ua qhov tseeb ntawd txhais hais tias xyaum ua raws li Vajtswv cov lus nyob rau txhua lub sij hawm, txhua qhov chaw, txhua cheeb tsam, thiab txhua qhov xwm txheej; nws tsis yog siv kev cai rau txhua yam yam tawv ncauj heev, nws yog ua raws li qhov tseeb tej hauv paus ntsiab lus. Qhov ntawd yog qhov txhais hais tias xyaum ua raws li qhov tseeb. Yog li ntawd, yeej tsis muaj kev cov nyom nyob rau ntawm qhov xyaum ua raws li Vajtswv cov lus thiab qhov ua raws li tej kev tim tsum uas Vajtswv tau hais tawm ntawd. Yuav kom meej ntxiv ces hais tias, tsis muaj kev cov nyom nyob rau ntawm qhov kev hwm koj niam koj txiv thiab kev ua tes hauj lwm thiab tes dej num uas Vajtswv tau muab rau koj ua kom tiav ntawd kiag li. Tej no qhov twg yog Vajtswv cov lus thiab tej kev tim tsum tam sim no? Koj yuav tsum xav txog lo lus nug no ua ntej tso. Vajtswv tim tsum kom tib neeg nyias muaj nyias yam; Nws muaj tej kev tim tsum sib txawv txog lawv. Cov uas ua thawj coj thiab cov neeg ua hauj lwm ntawd yog Vajtswv hu, yog li ntawd lawv yuav tsum tau tso lawv niam lawv txiv tseg, thiab lawv nyob tsis tau nrog lawv niam lawv txiv, thiab hwm lawv niam lawv txiv. Lawv yuav tsum lees txais tes hauj lwm uas Vajtswv txib kom ua thiab tso txhua yam tseg es los raws Nws qab. Qhov no yog ib qho. Hos cov raws qab uas dog dig ntawd Vajtswv tsis tau hu, yog li ntawd lawv nrog lawv niam lawv txiv nyob thiab hwm niam thiab txiv los tau. Qhov ua li no yuav tsis tau txais nqi zog, thiab lawv yuav tsis tau txais ib qho koob hmoov li, tiam sis yog lawv tsis muaj txoj kev mob siab hlub niam thiab txiv, ces lawv tsis muaj kev ua neej thiab. Tseeb tiag, kev hwm yus niam yus txiv tsuas yog ib hom luag hauj lwm xwb, thiab nws zoo tsis npaum li qhov kev xyaum ua qhov tseeb. Qhov mloog Vajtswv lus ntawd yog qhov kev xyaum ua qhov tseeb, qhov lees txais tes hauj lwm uas Vajtswv txib kom ua ntawd yog ib txoj kev qhia kom pom tseeb txog txoj kev mloog Vajtswv lus, thiab cov uas tso txhua yam tseg es los ua lawv tej dej num ntawd yog cov uas raws Vajtswv qab. Muab xaus lus hais tias, txoj hauj lwm uas tseem ceeb tshaj plaws uas nyob rau ntawm koj hauv ntej ntawd ces yog los ua koj tes dej num kom zoo xwb. Qhov ntawd yog qhov kev xyaum ua qhov tseeb, thiab nws yog ib txoj kev qhia kom pom tseeb txog txoj kev mloog Vajtswv lus. Yog li ntawd, qhov tseeb uas tib neeg yuav tsum tau xyaum ua tam sim no yog dab tsi? (Ua yus tes dej num.) Qhov ko yog lawm, ua yus tes dej num los ntawm lub siab ncaj ncees yog xyaum ua qhov tseeb ntag. Yog ib tug tib neeg twg tsis ua nws tes dej num tiag tiag, ces tus tib neeg ntawd tsuas lam ua dej num xwb.

Peb nyuam qhuav sib tham txog lo lus nug twg? (Vajtswv xub tim tsum kom tib neeg hwm lawv niam lawv txiv ua ntej, ces tom qab ntawd Nws hais tej kev tim tsum uas siab dua txog qhov lawv xyaum ua qhov tseeb, qhov ua lawv tej dej num, thiab qhov taug Vajtswv txoj kev ntawd tawm, yog li ntawd, tib neeg yuav tsum ua raws li qhov twg ua ntej?) Nej nyuam qhuav hais tias tib neeg yuav tsum xyaum ua raws li tej kev tim tsum uas siab dua. Raws li txoj kev xav mas, nqe lus no yog lawm—vim li cas Kuv thiaj li hais tias raws li txoj kev xav mas yog lawm? Qhov no txhais hais tias yog nej yuav siv kev cai thiab qauv rau qhov no, ces lo lus teb no yuav yog lawm. Tiam sis thaum tib neeg ntsib lub neej tiag tiag lawm, mas nqe lus no pheej siv tsis tau, thiab ua nyuaj. Yog li ntawd, yuav tsum teb lo lus nug no li cas? Ua ntej tshaj plaws, koj yuav tsum saib qhov xwm txheej thiab cheeb tsam uas koj nyob, thiab qhov xwm txheej uas koj nyob rau hauv ntawd. Nyob rau hauv cheeb tsam uas koj nyob thiab qhov xwm txheej uas koj pom hais tias koj tus kheej nyob rau hauv ntawd, yog qhov kev hwm koj niam koj txiv ntawd tsis cov nyom rau qhov koj ua tes hauj lwm uas Vajtswv txib kom ua kom tiav thiab qhov ua koj tes dej num ntawd—los sis, lwm lo lus mas hais tias, yog qhov kev hwm koj niam koj txiv ntawd tsis cuam tshuam rau koj txoj kev ua koj tes dej num los ntawm lub siab ncaj ncees—ces koj xyaum ua ob qho ntawd tib txhij los tau. Koj tsis tas yuav cais tawm ntawm koj niam koj txiv kom raws kev raws cai, thiab koj tsis tas yuav tso nkawv tseg los sis tsis kam txais yuav nkawv kom raws kev raws cai li. Qhov no siv tau rau qhov xwm txheej zoo li cas? (Thaum hwm yus niam yus txiv es tsis cov nyom rau txoj kev ua yus tes dej num.) Qhov ko yog lawm. Lwm lo lus mas hais tias, yog koj niam koj txiv tsis ua txhua yam los thaiv koj txoj kev ntseeg Vajtswv, thiab nkawv kuj yog cov ntseeg thiab, thiab nkawv yeej txhawb nqa thiab txhawb kom koj ua koj tes dej num los ntawm lub siab ncaj ncees thiab ua tes hauj lwm uas Vajtswv txib kom ua kom tiav ntawd tiag tiag, ces koj txoj kev nrog koj niam koj txiv sib raug zoo ntawd tsis yog ib txoj kev sib raug zoo ntawm sab cev nqaij daim tawv uas sib txheeb xwb, txoj kev sib raug zoo ntawd, yog ib txoj kev sib raug zoo ntawm cov kwv tij thiab cov muam ntawm pawg ntseeg ntag. Yog li ntawd, dhau ntawm qhov nrog nkawv sib tham li yog cov kwv tij thiab cov muam ntawm pawg ntseeg lawm, koj kuj yuav tsum tau ua ob peb yam ntawm koj tej luag hauj lwm uas hlub niam hlub txiv ntawd kom tiav rau nkawv thiab. Koj yuav tsum qhia nkawv txog kev txhawj xeeb me ntsis ntxiv. Tsuav qhov ntawd tsis cuam tshuam rau txoj kev ua koj tes dej num, uas yog, tsuav koj lub siab tsis raug nkawv txwv xwb, ces koj yeej hu tau koj niam koj txiv es nug nkawv seb nkawv puas nyob zoo thiab qhia tias koj txhawj txog nkawv me ntsis, koj yeej pab tau nkawv daws ob peb qho kev nyuaj thiab daws qee qhov teeb meem ntawm nkawv lub neej, thiab koj haj tseem pab tau nkawv daws qee qhov kev nyuaj uas nkawv muaj txog lawv txoj kev to taub lub neej txoj sia thiab—koj yeej ua tau txhua yam no. Lwm lo lus mas hais tias, yog koj niam koj txiv tsis thaiv koj txoj kev ntseeg Vajtswv, mas koj yuav tsum tuav txoj kev nrog nkawv sib raug zoo no, thiab koj yuav tsum ua koj tej luag hauj lwm kom tiav rau nkawv. Yog li ntawd vim li cas koj thiaj li yuav tsum tau qhia kev txhawj xeeb rau nkawv, saib xyuas nkawv, thiab nug nkawv seb nkawv puas nyob zoo? Vim koj yog nkawv me nyuam thiab koj muaj qhov kev sib raug zoo no nrog nkawv, koj muaj dua lwm lub luag hauj lwm, thiab vim lub luag hauj lwm no, koj thiaj li yuav tsum tau taug nkawv qab me ntsis ntxiv thiab pab nkawv kom ntau ntxiv. Tsuav qhov ntawd tsis cuam tshuam rau txoj kev ua koj tes dej num, thiab tsuav koj niam koj txiv tsis thaiv los sis cuam tshuam koj txoj kev ntseeg Vajtswv thiab koj txoj kev ua koj tes dej num, thiab nkawv tsis muab koj tuav cia xwb, ces qhov koj ua koj tej luag hauj lwm kom tiav rau nkawv ntawd yeej yog lawm, thiab koj yuav tsum ua qhov no kom txog rau qhov uas koj lub siab uas txawj xav ntawd tsis txhob thuam koj—qhov no yog tus qauv qis tshaj plaws uas koj yuav tsum ua kom tau. Yog koj hwm tsis tau koj niam koj txiv nyob rau hauv tsev vim qhov kev cuam tshuam thiab qhov kev thaiv ntawm koj tej xwm txheej ntawd, ces koj tsis tas ua raws li txoj kev cai no los tau. Koj yuav tsum muab koj tus kheej tso rau ntawm Vajtswv tej kev coj kev qhia txoj kev hlub tshua thiab ua raws li Nws tej kev npaj, thiab koj tsis tas pheej yuav hwm koj niam koj txiv li. Vajtswv puas teem txim rau qhov no? Vajtswv tsis teem txim rau qhov no; Nws tsis yuam kom tib neeg ua qhov no. Tam sim no peb tab tom kawm txog dab tsi? Peb tab tom kawm txog qhov tib neeg yuav tsum xyaum ua li cas thaum qhov kev hwm lawv niam lawv txiv ntawd cov nyom rau txoj kev ua lawv tes dej num; peb tab tom kawm txog tej hauv pauv ntsiab lus ntawm txoj kev xyaum ua thiab qhov tseeb. Koj muaj ib lub luag hauj lwm los hwm koj niam koj txiv, thiab yog tej xwm txheej ntawd tso cai, koj yeej ua tau lub luag hauj lwm no kom tiav, tiam sis koj tej kev xav hauv siab yuav tsum tsis txhob txwv koj. Piv txwv li, yog koj niam koj txiv ib tug muaj mob es yuav tsum tau mus tsev kho mob, thiab tsis muaj leej twg saib xyuas nkawv li, thiab koj ho khwv heev rau koj tes dej num tsis khoom los tsev li thiab no, koj yuav ua li cas? Nyob rau lub sij hawm zoo li no, koj tsis tuaj yeem cia koj tej kev xav hauv siab txwv koj. Koj yuav tsum cia li thov Vajtswv rau qhov teeb meem ntawd, tso siab rau Vajtswv txog qhov teeb meem ntawd, thiab muab qhov teeb meem ntawd tso rau ntawm Vajtswv tej kev coj kev qhia txoj kev hlub tshua. Qhov ntawd yog hom cwj pwm uas koj yuav tsum muaj. Yog Vajtswv xav rho koj niam koj txiv txoj sia, thiab muab nkawv tshem tawm ntawm koj mus, los koj tseem yuav tsum tau yuav li ntawd. Ib txhia tib neeg hais tias: “Txawm kuv twb yuav li ntawd lawm los, kuv yeej tseem nyuaj siab thiab kuv tau quaj txog qhov ntawd tau ntau hnub heev—qhov no tsis yog ib txoj kev xav hauv siab lod?” Qhov no tsis yog ib txoj kev xav hauv siab, nws yog tib neeg lub siab zoo, nws yog muaj kev ua neej xwb, yog li ntawd Vajtswv tsis teem txiv rau qhov no. Koj quaj los tau, tiam sis yog koj quaj ntau hnub es noj tsis qab pw tsis tsaug zog, thiab koj tsis muaj siab ua koj tes dej num, thiab haj tseem xav mus tsev mus xyuas koj niam koj txiv thiab, ces koj yuav ua tsis tau koj tes dej num kom zoo, thiab koj tsis tau muab qhov tseeb coj los xyaum ua, uas txhais tau hais tias koj tsis ua koj tej luag hauj lwm kom tiav los ntawm qhov kev hwm koj niam koj txiv, koj ua neej raws li koj tej kev xav hauv siab xwb. Yog koj hwm koj niam koj txiv tiam sis ho ua neej raws li koj tej kev xav hauv siab, ces tsis yog koj ua koj tej luag hauj lwm kom tiav, thiab tsis yog koj ua raws li Vajtswv cov lus, vim koj tau muab tes hauj lwm uas Vajtswv txib kom ua ntawd tso tseg lawm, thiab koj tsis yog tus uas taug Vajtswv txoj kev. Thaum koj ntsib hom xwm txheej zoo li no, yog qhov xwm txheej zoo li no tsis ua rau koj tes dej num qeeb los sis tsis cuam tshuam rau koj txoj kev ua koj tes dej num los ntawm lub siab ncaj ncees, ces koj ua qee yam uas koj muaj peev xwm ua tau los qhia txoj kev mob siab hlub niam hlub txiv rau koj niam koj txiv los tau, thiab koj ua tej luag hauj lwm uas koj muaj peev xwm ua kom tiav ntawd los tau. Muab xaus lus hais tias, qhov no yog qhov uas tib neeg yuav tsum tau ua thiab yeej muaj peev xwm ua. Yog koj raug koj tej kev xav hauv siab cuab, thiab qhov no tuav txoj kev ua koj tes dej num, ces qhov ntawd txhaum Vajtswv tej kev npaj siab lawm. Vajtswv yeej tsis tau tim tsum kom koj ua li ntawd, Vajtswv tsuas tim tsum kom koj ua koj tej luag hauj lwm rau koj niam koj txiv kom tiav, ces tag li ntawd xwb. Qhov ntawd yog qhov txhais hais tias muaj kev mob siab hlub niam thiab txiv. Thaum Vajtswv hais txog “kev hwm yus niam yus txiv” lawm yeej muaj ib lub ntsiab lus txog qhov ntawd. Koj tsuas yuav tsum tau ua kom tiav ob peb lub luag hauj lwm uas tuaj yeem ua tau nyob rau hauv txhua qhov xwm txheej xwb, ces tag li ntawd lawm. Qhov koj niam koj txiv mob hnyav los sis tuag ntawd, tej no puas yog nyob ntawm koj txiav txim siab? Nkawv txoj sia zoo li cas, thaum twg nkawv tuag, tus kab mob dab tsi tua nkawv, los sis nkawv tuag li cas—tej no puas muaj ib yam dab tsi cuam tshuam rau koj li? (Tsis muaj.) Tej ntawd tsis muaj ib yam dab tsi cuam tshuam rau koj li. Ib txhia tib neeg hais tias: “Kuv yuav tsum ua kuv tej luag hauj lwm kom tiav mas thiaj li yog kuv hwm kuv niam kuv txiv. Kuv yuav tsum ua kom nkawv tsis txhob muaj mob, tshwj xeeb yog kom txhob mob qog noj ntshav los sis qee hom kab mob uas ua rau tuag taus. Kuv yuav tsum ua kom nkawv nyob mus txog 100 xyoo. Tsuas yog thaum ntawd xwb kuv thiaj li yuav ua tau kuv tej luag hauj lwm tiav rau nkawv tiag tiag.” Hom tib neeg no tsis yog hom ruam lod? Qhov no yeej yog tib neeg txoj kev xav hauv nruab siab tiag tiag, nws tsis yog Vajtswv qhov kev tim tsum. Koj twb tsis paub tias xyov koj puas yuav muaj peev xwm nyob mus txog 100 xyoo, tiam sis koj tim tsum kom koj niam koj txiv nyob mus txog rau lub nyub nyoog ntawd—neeg ruam thiaj ua npau suav li ntawd xwb! Thaum Vajtswv hais txog “kev hwm yus niam yus txiv,” Nws tsuas hais kom koj ua koj tej luag hauj lwm uas nyob rau ntawm txoj kev ua neej xwb. Tsuav koj tsis ua phem rau koj niam koj txiv los sis ua ib yam dab tsi uas txhaum rau koj lub siab uas txawj xav thiab txoj kev paub cais qhov zoo qhov phem xwb, ces txaus lawm. Qhov no tsis mus li Vajtswv cov lus lod? (Mus.) Peb kuj nyuam qhuav hais txog qhov uas koj niam koj txiv thaiv koj txoj kev ntseeg Vajtswv, nkawv tus yam ntxwv lub ntsiab tseeb mas yog cov neeg tsis ntseeg thiab cov tsis ntseeg tus yam ntxwv lub ntsiab tseeb, los sis haj tseem yog cov tib neeg phem thiab cov dab phem tus yam ntxwv lub ntsiab tseeb, thiab nkawv tsis nrog koj taug tib txoj kev thiab. Lwm lo lus mas hais tias, nkawv tsis yog tib hom neeg ib yam li koj kiag li, thiab txawm nej nyob rau hauv tib lub tsev tau ntau xyoo lawm los xij, nkawv yeej tsis nrog koj muaj tib qho kev caum los sis tib tug cwj pwm, thiab nkawv yeej tsis nrog koj muaj tib qho kev nyiam los sis tib qho kev ntshaw li. Koj ntseeg Vajtswv, hos nkawv tsis ntseeg Vajtswv kiag li, thiab nkawv haj tseem tawm tsam Vajtswv xwb. Nyob rau hauv tej xwm txheej uas zoo li no yuav tsum ua li cas? (Tsis txhob txais yuav nkawv.) Vajtswv tsis tau qhia koj kom tsis txhob txais yuav nkawv los sis foom tsis zoo rau nkawv nyob rau hauv tej xwm txheej uas zoo li no. Vajtswv tsis tau hais li ntawd. Vajtswv tej kev tim tsum txog “kev hwm yus niam yus txiv” yeej tseem nyob. Qhov no txhais hais tias thaum koj tseem nrog koj niam koj txiv nyob, koj yuav tsum ua raws li qhov kev tim tsum kom hwm koj niam koj txiv no. Tsis muaj kev cov nyom txog qhov no li, puas muaj? (Tsis muaj.) Tsis muaj kev cov nyom txog qhov no kiag li. Lwm lo lus mas hais tias, thaum koj los xyuas tau tsev, koj ua ib pluag mov rau nkawv noj los sis ua dasplees rau nkawv noj los tau, thiab yog tias ua tau, koj yuav qee yam khoom pab kom noj qab haus huv rau nkawv, kom nkawv txaus siab heev rau koj los tau. Yog koj hais txog koj txoj kev ntseeg, es nkawv tsis lees txais txoj kev ntseeg ntawd los sis ntseeg, thiab nkawv haj tseem hais lus phem rau koj thiab, ces koj tsis tas qhia txoj moo zoo rau nkawv. Yog koj mus saib tau nkawv, ces xyaum ua li no; yog mus saib tsis tau, ces kawg zoo li ntawd xwb, thiab qhov ntawd yog Vajtswv txoj kev coj kev qhia, yog li ntawd koj tus kheej yuav tsum maj nroos nyob kom nrug deb ntawm nkawv thiab nyob kom deb ntawm nkawv. Lub hauv paus ntsiab lus rau qhov no yog dab tsi? Yog koj niam koj txiv tsis ntseeg Vajtswv, thiab nkawv tsis nrog koj hais tib hom lus los sis muaj tib txoj kev caum thiab tib lub hom phiaj, thiab nkawv tsis nrog koj taug tib txoj kev, es nkawv haj tseem thaiv thiab tsim txom koj txoj kev ntseeg Vajtswv thiab, ces koj yeej thoob tsib to nrog txog nkawv, pom tias nkawv lub ntsiab tseeb zoo li cas, thiab tsis kam txais yuav nkawv los tau. Yog nkawv hais lus phem rau Vajtswv los sis foom tsis zoo rau koj, koj foom tsis zoo rau nkawv nyob rau hauv koj lub siab los tau. Yog li ntawd, qhov “kev hwm yus niam yus txiv” uas Vajtswv hais txog ntawd yog hais txog dab tsi? Koj yuav tsum xyaum ua qhov ntawd li cas? Qhov ntawd yog, yog hais tias koj ua tau koj tej luag hauj lwm kom tiav, ces ua tej luag hauj lwm ntawd kom tiav me ntsis, hos yog koj tsis muaj lub hwv tsam ntawd, los sis yog qhov kev tsis sib haum uas nyob rau hauv koj tej kev nrog nkawv sib tham ntawd twb loj heev lawm, thiab nej muaj kev cov nyom, thiab nej twb mus txog rau theem uas nej ib leeg tsis xav pom ib leeg ntxiv li lawm, ces koj yuav tsum tau maj nroos muab koj tus kheej cais tawm ntawm nkawv mus. Thaum Vajtswv hais txog qhov kev hwm cov niam thiab txiv no, Nws txhais hais tias koj yuav tsum ua koj tej luag hauj lwm uas hlub niam hlub txiv ntawd kom tiav los ntawm qhov uas koj yog nkawv tus me nyuam, thiab ua yam uas ib tug me nyuam tsim nyog ua. Koj yuav tsum tsis txhob ua phem rau koj niam koj txiv, los sis nrog nkawv sib cav, koj yuav tsum tsis txhob ntaus nkawv los sis qw nrov nrov rau nkawv, koj yuav tsum tsis txhob tsim txom nkawv, thiab koj yuav tsum ua koj tej luag hauj lwm kom tiav rau nkawv kom zoo tshaj plaws ntawm koj lub peev xwm. Tej no yog tej uas tsim nyog ua nyob rau hauv txoj kev ua neej; tej no yog tej hauv paus ntsiab lus uas yus yuav tsum xyaum ua txog “kev hwm yus niam yus txiv.” Tej ntawd tsis yooj yim ua lod? Koj tsis tas yuav nrog koj niam koj txiv sib cav yam npau taws ntsuav hais tias: “Neb ob niag dab phem thiab ob niag tsis ntseeg ntawm ko, Vajtswv foom kom neb poob mus rau hauv lub pas hluav taws thiab leej faj thiab lub qhov ntuj tob tob, Nws yuav muab neb xa mus rau hauv lub ntuj tawg theem kaum yim ntag!” Tsis tim tsum ua li ntawd, koj tsis tas yuav hais lim hiam npaum li no. Yog tej xwm txheej tso cai, thiab yog qhov xwm txheej ntawd tim tsum, ces koj yeej yuav ua tau koj tej luag hauj lwm uas hlub niam hlub txiv ntawd rau koj niam koj txiv xwb. Yog tsis tim tsum ua li no, los sis yog tej xwm txheej tsis tso cai thiab yeej ua tsis tau, ces koj ua raws li qhov no los tau. Yam uas koj yuav tsum tau ua ces yog ua koj tej luag hauj lwm uas hlub niam hlub txiv ntawd kom tiav thaum koj ntsib koj niam koj txiv thiab nrog nkawv sib tham xwb. Thaum koj ua tau li ntawd, ces yog koj ua tau koj tes hauj lwm tiav lawm. Koj xav li cas txog lub hauv paus ntsiab lus no? (Zoo.) Yuav tsum muaj tej hauv paus ntsiab lus txog qhov koj ua li cas rau txhua tus tib neeg, nrog rau koj niam koj txiv huv si. Vim koj niam koj txiv tsim txom koj txoj kev ntseeg xwb es koj yuav cia li ua siab kub kub, thiab koj yuav cia li hais lus phem rau nkawv tsis tau. Nyob rau hauv lub ntiaj teb no muaj ntau tus tib neeg uas tsis ntseeg Vajtswv, muaj ntau tus tsis ntseeg, thiab muaj ntau tus tib neeg uas thuam Vajtswv—koj puas yuav foom tsis zoo thiab qw nrov nrov rau lawv txhua tus? Yog tsis qw, ces koj yuav tsum tsis txhob qw nrov nrov rau koj niam koj txiv thiab. Yog koj qw nrov nrov rau koj niam koj txiv tiam sis tsis qw rau cov tib neeg ntawd, ces yog koj npau taws sai xwb, thiab Vajtswv tsis nyiam qhov no. Tsis txhob xav hais tias Vajtswv yuav txaus siab rau koj yog koj hais lus phem thiab foom tsis zoo rau koj niam koj txiv yam tsis muaj qab hau, hais tias nkawv yog cov dab phem, yog ib tug Ntxwgnyoog uas ua neej nyob, thiab yog Ntxwgnyoog cov qhev, thiab foom kom nkawv poob mus rau hauv ntuj tawg—tsis yog li ntawd. Vajtswv yuav pom hais tias lees txais tsis tau koj los sis hais tias koj muaj kev ua neej vim yog txoj kev kub siab uas tsis muaj tseeb no. Tiam sis, Vajswv yuav hais tias tej kev ua uas koj ua rau nkawv ntawd yog tej kev xav hauv siab thiab txoj kev npau taws sai xwb. Vajtswv yuav tsis nyiam qhov koj ua li no, qhov ntawd lim hiam dhau lawm, thiab qhov ntawd tsis mus li Nws lub siab nyiam. Qhov koj ua rau txhua tus tib neeg, nrog rau koj niam koj txiv ntawd, yuav tsum muaj tej hauv paus ntsiab lus; tsis hais lawv ntseeg Vajtswv los tsis ntseeg, thiab tsis hais lawv yog cov tib neeg phem los tsis yog, koj yuav tsum ua rau lawv raws li tej hauv paus ntsiab lus. Vajtswv twb qhia tib neeg txog lub hauv paus ntsiab lus no lawm hais tias: qhov ntawd tsuas yog hais tias tib neeg muaj ib lub luag hauj lwm ntxiv txog lawv niam lawv txiv xwb. Yam uas koj yuav tsum tau ua ces yog ua lub luag hauj lwm no kom tiav xwb. Tsis hais koj niam koj txiv yog cov ntseeg los tsis yog, tsis hais nkawv caum nkawv txoj kev ntseeg los tsis caum, tsis hais nkawv txoj kev pom txog lub neej thiab nkawv txoj kev ua neej yuav mus raws li koj txoj los tsis mus, koj tsuas yuav tsum tau ua koj lub luag hauj lwm kom tiav rau nkawv xwb. Koj tsis tas yuav txav kom deb ntawm nkawv li—cia li cia txhua yam mus raws li qhov nws xav mus, raws li Vajtswv tej kev coj kev qhia thiab tej kev npaj xwb. Yog nkawv thaiv koj txoj kev ntseeg Vajtswv, los koj tseem yuav tsum tau ua koj tej luag hauj lwm uas hlub niam hlub txiv ntawd kom tiav kom zoo tshaj plaws ntawm koj lub peev xwm, kom yam tsawg kawg koj lub siab uas txawj xav ntawd thiaj li tsis mloog zoo li tshuav nkawv nqi. Yog nkawv tsis thaiv koj, thiab nkawv txhawb koj txoj kev ntseeg Vajtswv, ces koj kuj yuav tsum xyaum ua raws li tej hauv paus ntsiab lus ntawd, ua rau nkawv kom zoo thaum tsim nyog ua. Muab xaus lus hais tias, txawm li cas los xij, Vajtswv tej kev tim tsum ntawm tib neeg ntawd tsis hloov li, thiab qhov tseeb tej hauv paus ntsiab lus uas tib neeg yuav tsum tau xyaum ua ntawd kuj hloov tsis tau li thiab. Nyob rau hauv tej no, koj yuav tsum cia li ua raws li tej hauv paus ntsiab lus, thiab ua tej luag hauj lwm uas koj muaj peev xwm ua tau ntawd kom tiav xwb.

Tam sim no kuv yuav tham txog qhov hais tias vim li cas Vajtswv thiaj li muab ib qho kev tim tsum uas hais txog tib neeg tus cwj pwm xws li “hwm yus niam yus txiv” ntawd hais tawm. Lwm qhov kev tim tsum ntawm Vajtswv ntawd puav leej yog tej kev cai tswj tus cwj pwm uas hais txog tib neeg txoj kev coj kom zoo ntawm txhua tus tib neeg xwb, yog li ntawd vim li cas Vajtswv thiaj li muab lwm hom kev tim tsum uas hais txog qhov teeb meem ntawm txoj kev mob siab hlub niam hlub txiv ntawd hais tawm? Qhia Kuv seb: Yog ib tug tib neeg twg twb hwm tsis tau nws niam nws txiv no, tus tib neeg ntawd tus yam ntxwv lub ntsiab tseeb zoo li cas? (Tsis zoo.) Nws niam nws txiv raug kev txom nyem loj heev thiaj li yug tau nws los thiab tu nws, thiab qhov tu nws kom loj tuaj ntawd mas yeej tsis yooj yim hlo li—thiab tseeb tiag, niam thiab txiv yeej tsis xav hais tias nkawv tus me nyuam yuav coj kev zoo siab los sis kev txaus siab heev los rau nkawv, nkawv tsuas cia siab hais tias tom qab nkawv tus me nyuam loj tuaj lawm, nkawv yuav muaj ib lub neej uas kaj siab, thiab tias nkawv yuav tsis tau txhawj txog tus me nyuam ntawd heev lawm xwb. Tiam sis nkawv tus me nyuam tsis rau siab los sis siv zog ua hauj lwm, yog li ntawd tus me nyuam ntawd thiaj li tsis tau lub neej zoo ua—tus me nyuam ntawd thiaj li tseem vam khom rau nws niam nws txiv los saib xyuas nws xwb, thiab nws tau dhau los ua ib tug peeb, uas tsis yog hais tias tsuas tsis hwm nws niam nws txiv xwb, tiam sis kuj xav thab plaub es yuam nws niam nws txiv tej khoom ntiag tug coj los siv thiab. Yog tus me nyuam ntawd muaj peev xwm coj hom cwj pwm phem zoo li no no, nws yog hom tib neeg zoo li cas? (Ib tug neeg tsis zoo.) Nws ua tsis tau nws tej luag hauj lwm rau cov tib neeg uas yug nws los thiab tu nws loj ntawd ib qho kom tiav li, thiab nws tsis paub tias nws muaj kev txhaum txog qhov ua li ntawd kiag li—yog koj saib nws raws li qhov kev xav no no, nws puas muaj ib lub siab uas txawj xav? (Nws tsis muaj.) Nws yuav ntaus txhua tus thiab hais lus phem rau txhua tus, nrog rau nws niam nws txiv huv si. Nws saib nws niam nws txiv zoo li lwm tus tib neeg xwb—ntaus lawv thiab hais lus phem rau lawv raws li nws siab nyiam. Thaum nws tsis zoo siab, mas nws npau taws rau nws niam nws txiv, tsoo tais tsoo diav, ua kom nkawv ntshai. Ib tug tib neeg uas zoo li no puas muaj qhov tsim nyog? (Tsis muaj.) Yog ib tug tib neeg twg tsis muaj lub siab uas txawj xav los sis qhov tsim nyog, thiab haj tseem muaj peev xwm ua phem rau nws niam nws txiv thiab no, nws puas yog ib tug tib neeg? (Tsis yog.) Yog li, nws yog leej twg? (Ib tug tsiaj nyaum.) Nws yog ib tug tsiaj nyaum. Nqe lus no puas yog? (Yog.) Tseeb tiag, yog ib tug tib neeg twg ua tau nws tej luag hauj lwm tiav rau nws niam nws txiv, thiab saib xyuas nkawv, thiab hlub nkawv tiag tiag no—tej no tsis yog tej uas cov tib neeg uas muaj txoj kev ua neej ntawd yuav tsum muaj raws li txoj kev lod? (Yog.) Yog ib tug tib neeg twg ua phem thiab tsim txom nws niam nws txiv no, nws lub siab uas txawj xav ntawd puas lees txais tau qhov ntawd? Ib tug tib neeg dog dig puas ua tau tej yam zoo li ntawd? Cov tib neeg uas muaj lub siab uas txawj xav thiab qhov tsim nyog ntawd yeej ua tsis tau li no—yog lawv ua rau lawv niam lawv txiv npau taws, mas lawv yuav nyuaj siab ntau hnub. Ib txhia tib neeg mas muaj lub siab kub, thiab tej zaum lawv yuav npau taws rau lawv niam lawv txiv thaum lub sij hawm uas tag kev cia siab, tiam sis tom qab lawv ua li ntawd lawm, lawv lub siab uas txawj xav ntawd yuav cem lawv, ces tab txawm yog lawv tsis thov txim los xij, lawv yuav tsis ua li ntawd ntxiv lawm. Qhov no yog ib yam uas cov tib neeg uas muaj txoj kev ua neej yuav tsum muaj, thiab qhov no yog ib qho kev nthuav tawm txog txoj kev ua neej. Cov uas tsis muaj kev ua neej yeej tsim txom lawv niam lawv txiv yam tsis txawj xav ib qho li, thiab qhov ntawd yog qhov lawv ua. Yog lawv niam lawv txiv ntaus lawv ib zaug thaum lawv tseem yog tug me nyuam yaus, mas lawv yuav nco ntsoov mus tag lawv sim neej, thiab tom qab lawv loj hlob tuaj lawm los, lawv yeej tseem xav tawm tsam lawv niam lawv txiv thiab ntaus nkawv rov qab thiab. Tib neeg feem coob yuav tsis tawm tsam rov qab thaum lawv niam lawv txiv ntaus lawv li ib tug me nyuam yaus; ib txhia tib neeg thaum lawv muaj li 30 xyoo lawm lawv yuav tsis tawm tsam rov qab thaum lawv niam lawv txiv ntaus lawv, thiab lawv yuav tsis hais ib lo lus txog qhov ntawd li, txawm tias mob siab los xij. Qhov no yog qhov cov tib neeg uas muaj txoj kev ua neej ntawd yuav tsum muaj. Vim li cas lawv yuav tsis hais ib lo lus txog qhov ntawd li? Yog lwm tus ntaus lawv no, lawv puas yuav kam thiab cia tus tib neeg ntawd ntaus lawv? (Tsis kam.) Yog hais tias yog lwm tus, ces txawm yuav yog leej twg los xij li, lawv yuav tsis kam tus tib neeg ntawd ntaus lawv—lawv twb tsis pub tus tib neeg ntawd hais ib lo lus phem rau lawv li. Yog li ntawd vim li cas lawv thiaj li tsis tawm tsam rov qab los sis npau taws txawm lawv niam lawv txiv yuav ntaus lawv npaum li cas? Vim li cas lawv thiaj li ua siab ntev rau qhov ntawd? Qhov ntawd tsis yog vim muaj lub siab uas txawj xav thiab qhov tsim nyog nyob rau hauv lawv txoj kev ua neej lod? Lawv xav hauv lawv tus kheej hais tias: “Kuv niam kuv txiv tu kuv loj. Tab txawm qhov nkawv ntaus kuv ntawd tsis yog lawm los xij, kuv yuav tsum tau nyiaj qhov ntawd. Tsis tas li ntawd, kuv yog tus ua rau nkawv npau taws, yog li ntawd kuv tsim nyog raug ntaus lawm. Qhov nkawv ua li ntawd vim kuv tsis mloog nkawv lus thiab ua rau nkawv npau taws xwb. Kuv tsim nyog raug ntaus lawm! Kuv yuav tsis ua li no ntxiv lawm.” Qhov no tsis yog qhov cov tib neeg uas muaj txoj kev ua neej ntawd yuav tsum muaj lod? (Yog.) Nws yog vim txoj kev ua neej no es thiaj li ua rau lawv nyiaj qhov lawv niam lawv txiv ua rau lawv li no ntag. Qhov no yog txoj kev ua neej. Yog li ntawd, cov tib neeg uas nyiaj tsis taus hom kev ua zoo li no, cov uas tawm tsam lawv niam lawv txiv rov qab ntawd, puas muaj txoj kev ua neej no? (Lawv tsis muaj.) Qhov ko yog lawm, lawv tsis muaj. Cov tib neeg uas tsis muaj lub siab uas txawj xav thiab qhov tsim nyog ntawm txoj kev ua neej ntawd haj tseem muaj peev xwm ntaus thiab hais lus phem rau lawv niam lawv txiv thiab, yog li ntawd lawv yuav ua li cas muaj peev xwm ua zoo rau Vajtswv thiab lawv cov kwv tij thiab cov muam hauv pawg ntseeg? Lawv twb muaj peev xwm ua rau cov tib neeg uas yug lawv los thiab tu lawv loj zoo li no, yog li ntawd lawv haj yam yuav tsis quav ntsej txog lwm tus tib neeg uas tsis nrog lawv koom roj koom ntshav lod? (Lawv yuav tsis quav ntsej.) Lawv yuav ua li cas rau Vajtswv, tus uas lawv tsis pom los sis kov tsis tau ntawd? Lawv puas yuav muaj peev xwm ua rau Vajtswv, tus uas lawv tsis pom ntawd los ntawm lub siab uas txawj xav thiab qhov tsim nyog? Lawv puas yuav muaj peev xwm zwm rau txhua qhov xwm txheej uas Vajtswv tau npaj tseg lawm? (Tsis muaj.) Yog Vajtswv qhuab ntuas thiab qhuab qhia lawv, los sis txiav txim thiab rau txim rau lawv no, lawv puas yuav tawm tsawm Nws? (Tawm tsam.) Xav qhov no seb: Tib neeg lub siab uas txawj xav thiab qhov tsim nyog ntawd ua hauj lwm li cas? Tib neeg lub siab uas txawj xav thiab qhov tsim nyog ntawd tuaj yeem txwv thiab tswj tau lawv tus cwj pwm mus txog rau ib qib—qhov ntawd ua rau lawv muaj tus cwj pwm zoo thiab ua rau lawv txiav txim siab yog thaum muaj tej yam tshwm sim rau lawv, thiab thaiv tau txhua yam uas los raug rau lawv los ntawm lawv lub siab uas txawj xav thiab qhov tsim nyog. Feem ntau, qhov ua raws li lub siab uas txawj xav thiab qhov tsim nyog ntawd yuav ua rau tib neeg zam dhau txoj kev phem ntau heev. Cov tib neeg uas caum qhov tseeb yeej muaj peev xwm xaiv los taug txoj kev caum qhov tseeb nyob rau ntawm lub hauv paus no, uas yog nkag mus rau hauv qhov tseeb qhov muaj tiag, thiab ua raws li Vajtswv tej kev coj kev qhia thiab tej kev npaj. Cov uas tsis caum qhov tseeb mas tsis muaj kev ua neej, thiab lawv tsis muaj lub siab uas txawj xav thiab qhov tsim nyog zoo li no—qhov uas yuav tau txais los ntawm qhov no mas phem heev. Lawv muaj peev xwm ua txhua yam rau Vajtswv—ib yam li cov Falixais ua rau Tswv Yexus, lawv muaj peev xwm thuam Vajtswv, ua pauj, tuam mom Vajtswv, los sis haj tseem iab liam thiab ntxeev siab rau Vajtswv thiab. Qhov teeb meem no loj heev—qhov no tsis ua rau muaj teeb meem lod? Cov tib neeg uas tsis muaj qhov tsim nyog ntawm txoj kev ua neej ntawd mas pheej ua pauj los ntawm lawv txoj kev npau taws sai xwb; lawv tsis raug qhov tsim nyog ntawm txoj kev ua neej ntawd txwv, yog li ntawd lawv thiaj li muaj tej kev xav thiab tej kev xam pom uas lim hiam yooj yim, ces tom qab ntawd muaj qee tus cwj pwm uas lim hiam heev, thiab ua ntau yam yam tsis muaj lub siab uas txawj xav thiab qhov tsim nyog li, yog li ntawd thaum kawg, qhov uas tshwm sim los ntawm qhov no thiaj li tswj tsis tau li lawm. Kuv twb qhia txog “txoj kev hwm yus niam yus txiv” thiab txoj kev xyaum ua qhov tseeb tag tsis ntau los tsawg lawm—thaum kawg qhov ntawd los xaus rau txoj kev ua neej xwb. Vim li cas Vajtswv thiaj li muab ib qho kev tim tsum xws li “hwm yus niam yus txiv” ntawd hais tawm kom ua? Vim qhov ntawd cuam tshuam rau tib neeg txoj kev coj kom zoo. Ib qho mas yog, Vajtswv siv qhov kev tim tsum no los tswj tib neeg tus cwj pwm, thiab tib lub sij hawm ntawd, Nws kuj sim thiab txheeb xyuas tib neeg txoj kev ua neej los ntawm qhov kev tim tsum no thiab. Yog tib neeg tsis ua rau lawv niam lawv txiv los ntawm lub siab uas txawj xav thiab qhov tsim nyog, ces lawv yeej tsis muaj txoj kev ua neej. Ib txhia tib neeg hais tias: “Yog lawv niam lawv txiv tsis muaj qhov ua neej zoo, thiab tsis tau ua nkawv tej luag hauj lwm kom tiav rau nkawv tus me nyuam ne—tus tib neeg ntawd puas tseem yuav tsum hlub nkawv?” Yog tus tib neeg ntawd muaj ib lub siab uas txawj xav thiab qhov tsim nyog, ces yog ib tug ntxhais los sis ib tug tub lawm, nws yuav tsis tsim txom nws niam nws txiv. Cov tib neeg uas tsim txom lawv niam lawv txiv ntawd yeej tsis muaj lub siab uas txawj xav thiab qhov tsim nyog hlo li. Yog li ntawd, txawm Vajtswv yuav muab qhov kev tim tsum dab tsi hais tawm kom ua, tsis hais qhov kev tim tsum ntawd yuav hais txog tus cwj pwm uas tib neeg coj rau lawv niam lawv txiv, los sis hais txog txoj kev ua neej uas tib neeg ib txwm ua thiab nthuav tawm, txawm yuav yog qhov twg los xij, yog Vajtswv twb muab tej kev ua uas hais txog cov cwj pwm sab nraud no hais tawm lawm, ces yeej yuav tsum muaj qhov tsim nyog thiab lub hom phiaj rau qhov ua li no xwb. Txawm tej kev tim tsum txog txoj kev coj tus cwj pwm uas Vajtswv tau muab hais tawm kom ua no tseem raug muab tshem tawm ntawm qhov tseeb mus me ntsis lawm los xij, tej kev tim tsum txog txoj kev coj tus cwj pwm no yog cov qauv uas Vajtswv tau tsim los tswj tib neeg tus cwj pwm ntag. Tej kev tim tsum txog txoj kev coj tus cwj pwm ntawd puav leej tseem ceeb thiab tej ntawd yeej tseem siv tau rau niaj hnub no.

Kuv nyuam qhuav qhia txog tej kev sib cuam tshuam thiab qhov sib txawv ntawm cov qauv coj tus cwj pwm uas Vajtswv tau hais tawm kom tib neeg ua thiab qhov tseeb uas Nws tim tsum ntawd. Nyob rau theem no, peb twb kawm tag cov cwj pwm zoo uas yog ib feem ntawm tej uas tib neeg suav hais tias yog thiab zoo nyob rau hauv lawv tej kev xav phem tsis ntau los tsawg lawm tsis yog lod? Tom qab peb qhov kev kawm txog qhov no xaus lawm, peb tau tham txog qee cov qauv thiab cov lus uas Vajtswv tau hais tawm kom ua los tswj tib neeg tus cwj pwm thiab qhov tib neeg ua neej raws ntawd, thiab peb tau teev qee qhov piv txwv tseg, piv txwv li: tsis txhob ntaus neeg los sis hais lus phem rau lwm tus, hwm yus niam yus txiv, tsis txhob haus luam yeeb los sis haus dej haus cawv, tsis txhob ua tub sab tub nyiag, tsis txhob siv lwm tus kom yus tau txiaj ntsim, tsis txhob ua tim khawv tsis tseeb, tsis txhob pe mlom, thiab lwm yam. Cov no tsuas yog cov tseem ceeb xwb, tseem muaj ntau yam ntxaws ntxaws ntxiv uas peb yuav tsis hais txog. Yog li ntawd, tom qab kawm txog tej no lawm, qhov tseeb uas nej yuav tsum tau txais ntawd yog dab tsi? Tej hauv paus ntsiab lus uas nej yuav tsum tau xyaum ua ntawd yog dab tsi? Nej yuav tsum ua li cas? Nej puas yuav tsum tau los hwm cov laus thiab saib xyuas cov hluas? Nej puas yuav tsum tau ua ib tug neeg paub kev paub cai? Nej puas yuav tsum tau ua tus neeg siab dawb siab zoo thiab nyiam ua phooj ywg? Cov poj niam puas yuav tsum tau ua tus neeg paub tab thiab paub cai los sis muaj kev kawm siab thiab paub qab paub hau? Cov txiv neej puas yuav tsum tau ua tus neeg zoo, muaj hom phiaj, thiab ua dab tsi los ua kom tau? Lawv tsis tas ua tus neeg zoo li ntawd. Peb yeej tau kawm ntau heev li lawm. Tej uas txoj kab lis kev cai txhawb nqa no yog Ntxwgnyoog siv los dag tib neeg nkaus xwb. Tej ntawd yog yam uas dag, thiab tej ntawd yog yam uas ntxias tib neeg xwb. Nej yuav tsum saib nej tus kheej kom meej saib seb nej puas tseem muaj tej kev xav thiab tej kev xam pom los sis tej cwj pwm thiab tej kev qhia kom pom tseeb no ib qho li. Yog nej muaj, ces nej yuav tsum maj nroos los nrhiav qhov tseeb los kho tej ntawd, thiab tom qab ntawd nej yuav tsum lees txais qhov tseeb, thiab ua neej raws li Vajtswv cov lus. Ua li ntawd, Vajtswv thiaj li yuav nyiam nej. Nej yuav tsum xav txog qhov uas nej lub siab zoo li cas thaum nej ua neej raws li txoj kab lis kev cai ntawd, thiab nej xav li cas nyob rau hauv nej nruab siab, yam koj tau txais ntawd yog dab tsi, thiab yam uas tshwm sim los ntawd zoo li cas, ces tom qab ntawd saib seb qhov coj koj tus kheej kom zoo raws li cov qauv uas Vajtswv tau tim tsum ntawm tib neeg, xws li ua tus neeg tswj yus tus kheej, muaj lub siab dawb huv tiag tiag, tsis txhob ntaus neeg los sis hais lus phem rau lwm tus, thiab lwm yam ntawd ho zoo li cas. Saib seb cov kev ua neej no txoj twg ua rau koj ua neej yooj yim dua, ywj pheej dua, khov dua, thiab kaj siab dua, thiab ua rau koj muaj kev ua neej ntxiv, thiab seb txoj twg zoo li ua rau koj ua neej npog ntsej muag, thiab ua rau koj lub neej tsis muaj tseeb thiab nyuaj siab heev xwb. Saib seb cov kev ua neej no txoj twg ua rau koj nyob ze Vajtswv tej kev tim tsum zuj zus, thiab ua rau koj txoj kev nrog Vajtswv sib raug zoo zoo li qub zuj zus ntxiv. Thaum koj tau ntsib tau pom qhov no tiag tiag lawm, koj mam li paub. Tsuas yog xyaum ua raws li Vajtswv cov lus thiab qhov tseeb xwb mas thiaj li yuav ua rau koj muaj kev kaj siab thiab kev ywj pheej, thiab ua rau Vajtswv nyiam koj. Muab hais ua piv txwv hais tias, yuav kom lwm tus tib neeg hais tias koj hwm cov laus thiab saib xyuas cov hluas, tias koj ua raws li kev cai, thiab tias koj yog ib tug neeg zoo, mas thaum uas koj ntsib ib tug kwv tij los sis ib tug muam uas hlob koj, koj yuav tsum hu tus ntawd hais tias “tij laug” los sis “niam laus,” tsis txhob hu tus ntawd lub npe, qhov hu tus ntawd lub npe mas yog ib qho txaj muag heev, thiab qhov xav ua li ntawd yuav yog qhov uas tsis paub cai hlo li. Txoj kev xav phem txog qhov kev hwm cov laus thiab saib xyuas cov hluas uas ib txwm muaj nyob no zais nyob rau hauv koj lub siab lawm, yog li ntawd thaum koj pom ib tug neeg laus, mas koj ua zoo li paub tab thiab siab zoo heev, cuag nkaus li koj yog ib tug neeg uas ua raws li kev cai thiab txoj kab lis kev cai yam nruj heev, thiab koj mas khoov cuag dab tsi xwb. Koj ua zoo rau cov tib neeg laus heev—tus tib neeg uas nyob ntawm koj xub ntiag yim laus, ces koj yim ua txuj coj zoo xwb. Qhov kev coj zoo uas zoo li no puas yog ib qho zoo? Nws yog txoj kev ua neej uas tsis muaj tus txha caj qaum thiab tsis muaj lub meej mom. Thaum cov tib neeg zoo li no pom ib tug me nyuam yaus, mas lawv ua zoo li ntxim hlub thiab ua si, zoo li ib tug me nyuam yaus. Thaum lawv pom lawv ib tug phooj ywg, mas lawv sawv ntsug yiag yiag, thiab coj zoo li ib tug neeg loj, kom lwm tus thiaj li tsis muaj cuab kav thuam lawv. Lawv yog hom tib neeg dab tsi? Lawv tsis yog ib tug tib neeg uas muaj ntau lub ntsej muag lod? Lawv hloov sai heev, tsis yog lod? Thaum lawv pom ib tug neeg laus, lawv hu tus neeg laus ntawd ua “yawg laus” los sis “pog laus.” Thaum lawv pom ib tug tib neeg uas hlob lawv me ntsis, mas lawv hu tus tib neeg ntawd ua “txiv ntxawm,” “niam ntxawm,” “tij laug,” los sis “niam laus.” Thaum lawv ntsib qee tus tib neeg uas hluas dua lawv, mas lawv hu tus tib neeg ntawd ua “kwv” los sis “niam hluas.” Lawv hu tib neeg tej npe thiab cov npe ua si raws li cov tib neeg ntawd lub hnub nyoog, thiab lawv siv qhov kev hais lus no tau zoo thiab yog heev. Tej no cog ruaj khov rau hauv lawv cov pob txha lawm, thiab lawv muaj peev xwm siv tau tej no zoo heev. Tshwj xeeb yog tom qab lawv los ntseeg Vajtswv lawm, lawv haj yam ruaj siab hais tias: “Tam sim no kuv yog ib tug ntseeg Vajtswv lawm, kuv yuav tsum ua raws li txoj kev cai thiab txoj kab lis kev cai; kuv yuav tsum ua tus neeg muaj kev kawm siab thiab paub qab paub hau. Kuv ua txhaum tej kev cai los sis ntxeev siab zoo li cov tsis ntseeg, uas tsim teeb meem rau cov hluas ntawd tsis tau—tib neeg yuav tsis nyiam qhov ntawd. Yog kuv xav kom txhua tus nyiam kuv, mas kuv yuav tsum hwm cov laus thiab saib xyuas cov hluas.” Yog li ntawd, lawv haj yam tswj lawv tus cwj pwm kom nruj ntxiv, muab cov tib neeg uas muaj hnub nyoos sib txawv ntawd faib nyias muaj nyias qib, tis npe rau lawv txhua tus, ces tom qab ntawd pheej muab qhov no coj los xyaum ua nyob rau hauv lawv lub neej txhua hnub, ces tom qab ntawd lawv pheej xav hais tias: “Saib kuv ma, kuv hloov lawm tiag tiag tom qab uas los ntseeg Vajtswv lawm. Kuv muaj kev kawm siab, paub qab paub hau, thiab paub kev paub cai, kuv hwm cov laus thiab saib xyuas cov hluas, thiab kuv siab dawb siab zoo. Kuv ua neej zoo nkaus li tib neeg lawm tiag tiag. Kuv paub tias yuav hu txhua tus tib neeg uas kuv ntsib ntawd li cas, txawm lawv yuav laus npaum li cas los xij. Kuv tsis tim tsum kom kuv niam kuv txiv qhia kuv txog qhov no, thiab kuv tsis tim tsum kom cov tib neeg uas nyob ib puag ncig kuv qhia kuv hu, kuv cia li paub hu xwb.” Tom qab xyaum coj cov cwj pwm zoo no lawm, lawv xav hais tias lawv muaj txoj kev ua neej tiag tiag lawm, tias lawv yeej ua raws li txoj kev cai tiag tiag, thiab tias Vajtswv yuav tsum nyiam qhov no xwb—tsis yog lawv tab tom dag lawv tus kheej thiab lwm tus lod? Txij no mus, nej yuav tsum muab tej no tso tseg. Yav dhau los, kuv tau hais ib zaj lus txog Dasmeem thiab Suameem—zaj lus ntawd hais txog kev hwm cov laus thiab saib xyuas cov hluas, tsis yog lod? (Yog.) Thaum qee tus tib neeg pom ib tug neeg laus, mas lawv xav hais tias qhov hu tus tib neeg ntawd ua “tij laug” los sis “niam laus” ntawd mas tsis zoo txaus, thiab tias qhov ntawd yuav tsis ua rau tib neeg xav hais tias lawv paub kab lis kev cai txaus, yog li ntawd lawv thiaj li hu tus tib neeg ntawd ua “yawg laus” los sis “niam ntxawm laus.” Qhov ntawd zoo li koj hwm tus tib neeg ntawd txaus lawm, yog li ntawd vim li cas koj thiaj li hwm tus tib neeg ntawd? Koj tsis muaj lub ntsej muag uas hwm lwm tus. Koj muaj lub ntsej muag uas txaus ntshai thiab phem, khav txiv khav theeb, thiab koj khav theeb txog koj tej kev ua dua li lwm tus tib neeg. Tsis yog koj tsis nrhiav qhov tseeb tej hauv paus ntsiab lus xwb, koj kuj tsis sab laj rau lwm tus li thiab; koj ua raws li koj tus kheej txoj cai xwb, thiab koj tsis muaj txoj kev ua neej ib qho me me li. Koj saib seb leej twg muaj meej mom, ces tom qab ntawd koj hu tus ntawd ua “txiv ntxawm laus” los sis “niam ntxawm laus,” cia siab hais tias tib neeg yuav qhuas txog qhov no xwb—qhov ua txuj zoo li no puas muaj qab hau? Koj puas yuav muaj kev ua neej thiab kev coj ncaj ncees yog koj ua txuj zoo li no? Tiam sis, thaum lwm tus tib neeg pom koj ua li no, mas lawv haj yam qias koj. Thaum muaj tej teeb meem tshwm tuaj uas cuam tshuam rau tej kev ntshaw ntawm Vajtswv lub tsev lawm, koj muaj peev xwm muab tej kev ntshaw ntawm Vajtswv lub tsev ntawd muag tawm tiag tiag. Koj tsuas ua neej kom txaus koj siab xwb, thiab txawm muaj hom kev ua neej zoo li no los, koj tseem hu tib neeg ua “niam ntxawm laus” thiab—qhov no tsis yog ua txuj lod? (Yog.) Koj txawj ua txuj tiag tiag li! Qhiv Kuv seb, cov tib neeg zoo li no tsis qias neeg lod? (Qias.) Cov tib neeg zoo li no mas tas zog muab tej kev ntshaw ntawm Vajtswv lub tsev muag tawm tas li xwb—lawv tsis tiv thaiv tej kev ntshaw ntawd kiag li. Lawv tom txhais tes uas pub mov rau lawv noj, thiab lawv tsis tsim nyog nyob rau hauv Vajtswv lub tsev li. Saib koj tus kheej kom meej, thiab saib tej kev xav, tej kev xam pom, tej cwj pwm, tej kev ua, thiab tej kev ua rau tib neeg uas koj tseem muaj uas yog tej uas tib neeg lees paub hais tias yog cov cwj pwm zoo ntawd seb yog dab tsi, tseeb tiag, tej ntawd yog kiag tej uas Vajtswv tsis nyiam kiag ntag. Nej yuav tsum maj nroos los muab tej uas tsis muaj nuj nqis no tso pov tseg, thiab nej yuav tsum tsis txhob tuav tej no cia. Ib txhia tib neeg hais tias: “Qhov ua li ntawd ho ua li cas?” Yog koj ua li ntawd, Kuv yuav qias koj thiab Kuv yuav tsis nyiam koj kiag li, koj yuav tsum tsis txhob ua li ntawd. Ib txhia tib neeg hais tias: “Qhov Koj qias peb ntawd tsis ua li cas, peb twb tsis nrog Koj nyob.” Koj yuav tsum tsis txhob ua li ntawd thiab, tab txawm peb tsis nyob ua ke los xij. Kuv yuav qias koj vim koj tsis muaj peev xwm lees txais qhov tseeb los sis xyaum ua qhov tseeb, uas txhais tau hais tias koj yuav tsis dim. Yog li ntawd, yog koj muab tej ntawd tso tseg kom sai li sai tau mas ntshe yuav zoo dua. Tsis txhob ua txuj thiab tsis txhob ua neej npog ntsej muag. Kuv xav hais tias cov tib neeg uas nyob rau sab hnub poob yeej ib txwm coj li no. Piv txwv li, nyob rau hauv Amelikas, koj tsuas hu tib neeg raws li lawv lub npe xwb. Koj tsis tas yuav hu tus tib neeg no ua “yawg” thiab tus tib neeg tod ua “pog” yam txom nyem siab ntsuav li, thiab koj tsis tas yuav txhawj txog qhov tib neeg yuav txiav txim rau koj li—koj cia li hu tib neeg raws li lawv lub npe xwb, ces yeej yog hwm lawm, thiab thaum tib neeg hnov koj ua li ntawd, lawv yuav zoo siab heev, tsis hais cov neeg loj thiab cov me nyuam yaus los ib yam nkaus, thiab lawv yuav xav hais tias koj paub cai. Tiam sis, yog koj paub lawv lub npe, es koj tseem hu lawv ua “yawg” los sis “pog,” mas lawv yuav tsis zoo siab, thiab lawv yuav tsis quav ntsej koj, ces koj yuav pom hais tias qhov no mas txawv heev. Txoj kab lis kev cai uas nyob rau sab hnub poob mas txawv cov neeg Suav txoj kab lis kev cai. Cov tib neeg Suav raug txoj kab lis kev cai qhuab qhia thiab haub ntxias lawm, thiab lawv pheej xav sawv nyob rau qhov chaw siab, xav ua tus txwj laug nyob rau hauv pab pawg, thiab ua kom lwm tus tib neeg hwm lawv. Qhov muab lawv hu ua “yawg” los sis “pog” ntawd mas tsis txaus lawv siab li, lawv xav kom tib neeg ntxiv ib qho hu ua “laus” rau tom qab, es hu lawv ua “yawg laus,” “pog laus,” los sis “txiv ntxawm laus no thiab.” Dhau ntawd lawm kuj muaj qhov hu ua “niam ntxawm loj” los sis “txiv ntxawm loj” thiab—yog tsis hu lawv ua “laus,” mas lawv xav kom muab lawv hu ua “loj.” Cov tib neeg zoo li no tsis qias neeg lod? Hom moj yam no yog moj yam dab tsi? Tus moj yam ntawd tsis phem lod? Tus moj yam ntawd qias neeg heev! Cov tib neeg zoo li no tsis yog lwm tus tsis qhuas xwb, lwm tus tib neeg kuj tsis nyiam thiab saib tsis taus cov tib neeg zoo li no kiag li thiab, thiab lawv tus kheej nyob deb ntawm cov tib neeg zoo li no thiab tsis kam txais yuav cov tib neeg zoo li no. Vim li ntawd Vajtswv thiaj li muab tej kis ntawm txoj kab lis kev cai no nthuav tawm thiab ntxub tej no. Vim tej no muaj Ntxwgnyoog tej tswv yim dag thiab nws tus moj yam, thiab tej ntawd tuaj yeem cuam tshuam rau tej tswv yim thiab txoj hauv kev ntawm tib neeg txoj kev coj kom zoo. Tej ntawd kuj tuaj yeem cuam tshuam rau qhov tib neeg saib tib neeg thiab txhua yam thiab, thiab tib lub sij hawm ntawd, tej ntawd kuj ua rau tib neeg dig muag, thiab ua rau lawv tsis muaj peev xwm los xaiv txoj kev yog thiab. Yog li ntawd, tsis tsim nyog tib neeg muab tej no tso tseg lod? (Tsim nyog lawm.)

Cov tib neeg suav tau raug txoj kab lis kev cai haub ntxias tob dhau lawm. Txhua lub teb chaws uas nyob rau hauv lub ntiaj teb no nyias yeej muaj nyias txoj kab lis kev cai, thiab cov kab lis kev cai no tsuas sib txawv me me xwb. Txawm lawv tej kev hais lus muaj ib co txawv cov tib neeg Suav txoj kab lis kev cai txoj kev hais lus los xij, lawv yeej muaj tib tug yam ntxwv xwb. Qhov muaj cov kev hais lus no vim tib neeg muaj tus moj yam qias vuab tsuab thiab tsis muaj txoj kev ua neej, yog li ntawd lawv thiaj li siv qee tus cwj pwm uas txawj dag heev, uas zoo li nyob rau saum daim tawv mas zoo, uas mus raws li tib neeg tej kev xav phem thiab tej kev xav hauv nruab siab, uas yooj yim rau tib neeg ua, los npog lawv tus kheej, kom zoo li lawv paub tab, tsim nyog, thiab tsim nyog hwm heev, thiab kom zoo li lawv muaj meej mom thiab kev ncaj ncees. Tiam sis nws yog tej kis ntawm txoj kab lis kev cai no kiag ntag uas ua rau tib neeg ob lub qhov muag tsis pom kev tseeb thiab dag lawv, thiab nws yog tej no kiag ntag uas thaiv tib neeg tsis pub ua neej kom zoo nkaus li tib neeg tiag tiag. Qhov phem tshaj ntawd yog, Ntxwgnyoog siv tej no los ua rau tib neeg txoj kev ua neej qias vuab tsuab, thiab los coj lawv tawm ntawm txoj kev yog. Tsis yog li ntawd lod? (Yog.) Vajtswv qhia tib neeg kom tsis txhob ua tub sab tub nyiag, tsis txhob deev luag poj luag txiv, thiab lwm yam, hos Ntxwgnyoog qhia tib neeg kom lawv yuav tsum ua tus neeg muaj kev kawm siab thiab paub qab paub hau, paub tab thiab paub cai, paub kev paub cai, thiab lwm yam—tej no tsis txawv tej kev tim tsum uas Vajtswv tau hais tawm hlo li lod? Tej ntawd tsis yog txhob txwm cov nyom Vajtswv tej kev tim tsum lod? Ntxwgnyoog qhia tib neeg tias yuav siv tej tswv yim, tej cwj pwm, thiab qhov lawv ua neej nyob rau sab nraud ntawd los dag lwm tus tib neeg li cas. Vajtswv qhia tib neeg li cas? Qhia tias lawv yuav tsum tsis txhob siv tej cwj pwm sab nraud los dag ntxias kom lwm tus tib neeg ntseeg, tiam sis lawv yuav tsum coj lawv tus kheej kom zoo raws li Nws cov lus thiab qhov tseeb xwb. Ua li ntawd mas lwm tus tib neeg thiaj li yuav ntseeg thiab ruaj siab rau lawv—tsuas yog cov tib neeg zoo li no xwb thiaj li muaj kev ua neej. Tsis muaj qhov txawv nyob rau ntawm no lod? Txawv loj heev. Vajtswv qhia koj tias yuav coj koj tus kheej kom zoo li cas, hos Ntxwgnyoog qhia koj tias yuav ua txuj thiab yuav dag lwm tus tib neeg li cas—qhov ntawd tsis yog ib qho txawv loj heev lod? Yog li ntawd, tam sim no koj puas to taub hais tias tib neeg yuav tsum xaiv dab tsi nyob rau thaum kawg? Ob qho no qhov twg yog txoj kev yog? (Vajtswv cov lus.) Qhov ko yog lawm, Vajtswv cov lus yog txoj kev yog nyob rau hauv lub neej. Txawm Vajtswv cov lus yuav muab hom kev tim tsum dab tsi txog tib neeg tus cwj pwm hais tawm, tab txawm yog qhov ntawd yog ib txoj kev cai, ib lo lus txib, los sis ib txoj cai uas Vajtswv tau hais rau tib neeg los xij, tej ntawd puav leej yog, thiab tib neeg yuav tsum ua raws li tej ntawd. Qhov no yog vim Vajtswv cov lus yeej yuav yog txoj kev yog thiab yam zoo mus li, hos Ntxwgnyoog cov lus mas dag thiab ua rau tib neeg qias vuab tsuab xwb, cov lus ntawd muaj Ntxwgnyoog tej kev dag ntxias, thiab cov lus ntawd tsis yog txoj kev yog, txawm cov lus ntawd yuav mus raws li tib neeg lub siab nyiam los sis tej kev xav phem thiab tej kev xav hauv siab los xij. Koj puas to taub qhov no? (To taub.) Tom qab hnov lub ntsiab ntawm qhov kev kawm hnub no lawm nej xav li cas? Lub ntsiab ntawd puas cuam tshuam rau qhov tseeb? (Cuam tshuam.) Yav tas los, nej puas to taub qhov tseeb no? (To taub tsis tshua meej.) Tam sim no nej puas to taub meej? (To taub meej dua yav tas los.) Muab xaus lus hais tias, qhov kev to taub qhov tseeb no yuav muaj txiaj ntsim rau tib neeg tom qab. Nws yuav muaj txiaj ntsim rau lawv txoj kev caum qhov tseeb nyob rau yav tom ntej, thiab lawv txoj kev ua neej, thiab lub hom phiaj thiab txoj hauv kev ntawm yam uas lawv caum nyob rau hauv lub neej.

Lub Ob Hlis Hnub Tim 26, Xyoo 2022