Qhov Nrhiav Qhov Tseeb Yog Dab Tsi (6)

Nej puas nco qab tau lawm tias lub ntsiab lus uas peb kawm nyob rau peb kev koom txoos zaum tag los ntawd yog dab tsi? (Vajtswv xub qhia txog qhov sib txawv ntawm yam uas tib neeg pom hais tias yog cov cwj pwm zoo piv rau qhov ua neej li txoj kev ua neej uas Vajtswv tim tsum, thiab tom qab ntawd qhia txog tib neeg txoj kev coj zoo nyob rau hauv txoj kab lis kev cai qub thiab xaus lus txog nees nkaum ib cov lus uas hais txog tib neeg txoj kev coj zoo.) Hauv peb kev koom txoos zaum tag los, Kuv tau qhia txog ob lub ncauj lus. Lub ncauj lus ib yog, Kuv piav qhia qee yam ntxiv txog tus cwj pwm zoo, thiab tom qab ntawd Kuv tau muab qee yam uas yooj yim ntawm kev pib qhia txog tib neeg tus cwj pwm, kev coj, thiab kev tsim txiaj, yam tsis tau hais kom ntxaws ntxaws. Peb twb tau sib kawm paub ntau zaus txog lub ncauj lus uas hais tias kev nrhiav qhov tseeb yog dab tsi, thiab Kuv twb qhia txog txhua tus cwj pwm zoo uas ntsig txog txoj kev caum qhov tseeb uas yuav tsum tau muab qhia tshwm thiab soj ntsuam ntawd tag lawm. Zaum tas los, Kuv kuj tau piav qhia me ntsis txog qee lub ncauj lus tseem ceeb uas hais txog tib neeg txoj kev coj zoo lawm thiab. Txawm tsis tau nthuav tawm los sis soj ntsuam kom ntxaws ntxaws txog cov nqe lus uas hais txog txoj kev coj zoo no los xij, peb twb tau teev txog ob peb qho piv txwv ntawm cov lus uas hais txog tib neeg txoj kev coj zoo no—li ntawm nees nkaum ib cov lus lawm. Nees nkaum ib qho piv txwv no yog cov nqe lus tseem ceeb uas cov tib neeg Suav txoj kab lis kev cai ib txwm coj los muab cog rau hauv tib neeg, uas muaj tej tswv yim uas hais txog txoj kev siab dawb siab zoo, kev ncaj ncees, kev zoo tsim nyog, kev txawj ntse, thiab kev ntseeg siab. Piv txwv li, peb tau hais ntau yam txog tib neeg txoj kev coj zoo uas ntsig txog txoj kev ua siab ncaj ncees, kev muaj kev ncaj ncees, kev tsim nyog, thiab kev ntseeg siab, nrog rau qhov cov txiv neej, cov poj niam, cov nom tswv, thiab cov me nyuam yuav tsum coj li cas, thiab lwm yam ntxiv. Txawm nees nkaum ib co lus no yuav zoo thiab tsis zoo los xij, cov lus no muaj peev xwm sawv cev tau rau lub ntsiab tseeb ntawm tej kev tim tsum uas cov tib neeg Suav txoj kab lis kev cai ib txwm coj los muab hais tawm txog tib neeg txoj kev coj zoo, los ntawm qhov kev xam pom uas raws li txoj kev xav thiab pom txog tias tseem ceeb. Tom qab peb teev cov piv txwv no los lawm, nej puas ua tib zoo xav tau thiab kawm txog cov piv txwv no thiab? (Peb tau sib qhia txog cov lus no me ntsis nyob rau hauv peb tej kev koom txoos ua kemas pom hais tias cov nqe lus no muaj ib txhia mas yooj yim heev rau txoj kev to taub yuav kev txog qhov tseeb tiag Piv txwv li, qhov hais tias “Kev txiav caj dab tsuas ua rau taub hau tu xwb; ua siab dawb siab zoo li ua tau,” “Kuv mam li thaiv mos txwv,” nrog rau “Ua kom zoo tshaj plaws los leg yam uas lwm tus tib neeg tau muab tso rau koj ua lawm kom ncaj ncees,” rau lwm tus.) Lwm cov lus muaj xws li: “Txawm tib neeg pab koj me me xwb los koj yuav tsum pauj rov qab kom ntau,” “Tus txiv neej uas paub tab lo lus mas yog nws lo lus cog tseg,” “Yog koj ntaus lwm tus, tsis txhob ntaus lawv lub ntsej muag; yog koj hais txog lwm tus, tsis txhob hais txog lawv qhov tsis zoo,” “Coj nruj rau koj tus kheej hos ua siab ntev rau lwm tus,” “Thaum haus cov dej ntawm lub qhov dej, yus yuav tsum tsis txhob hnov qab tus uas khawb lub qhov dej ntawd,” thiab lwm lwm yam ntxiv. Yog ua tib zoo soj ntsuammas, nej yuav pom hais tias tib neeg feem coob coj thiab ntsuas lawv txoj kev coj zoo los ntawm lawv tus kheej nkaus xwb thiab ntsuas lwm tus raws li cov nqe lus uas hais txog txoj kev coj zoo ntawm no. Tej no yeej muaj nyob rau hauv txhua tus tib neeg lub siab tsis ntau los tsawg. Ib qho uas vim li cas thiaj li muaj qhov no mas yog qhov chaw uas tib neeg nyob thiab txoj kev kawm uas lawv tau txais los ntawm lawv tus tsoom fwv, hos lwm qhov mas yog vim qhov kev loj hlob uas lawv tau txais los ntawm lawv tsev neeg thiab tej kab lis kev cai uas poj ua tseg yawm ua cia. Qee tsev neeg mas qhia lawv cov me nyuam kom tsis txhob muab cov nyiaj uas lawv khaws tau ntawd ntsaws rau hnab tshos, hos lwm tsev neeg mas qhia lawv cov me nyuam hais tias lawv yuav tsum hlub lub teb lub chaw thiab hais tias “Txhua tus tib neeg puav leej koom txoj hmoo ntawm lawv lub teb chaws,” vim txhua tsev neeg puav leej vam khom rau lawv lub teb chaws. Qee tsev neeg qhia lawv cov me nyuam hais tias “Yuav tsum tsis txhob cia kev muaj txiag nplua nuj ua rau koj qias vuab tsuab, tsis txhob cia kev pluag hloov tau koj, los sis tsis txhob cia kev quab yuam yuam tau koj,” thiab tias lawv yuav tsum tsis txhob hnov qab lawv lub hauv paus cag li. Ib co niam thiab txiv mas siv cov nqe lus meej meej los qhia lawv cov me nyuam txog txoj kev coj zoo, hos ib co mas nthuav tsis tau lawv tej tswv yim tawm txog txoj kev coj zoo ntawd kom meej meej, tiam sis lawv ua tus qauv rau lawv cov me nyuam xyaum thiab qhia los ntawm kev ua tus piv txwv, txhawb kev hloov pauv thiab qhia ua kev kawm rau tiam tom ntej los ntawm lawv cov lus hais thiab kev nqis tes ua. Cov lus thiab tej kev ua no nyaj muaj xws li, “Txawm tib neeg pab koj me me xwb los koj yuav tsum pauj rov qab kom ntau,” “Zoo siab thaum pab lwm tus,” “Yog leej twg tau pab koj lawm koj yuav tsum pauj rov qab,” thiab ntau nqe lus uas nrov nrov xws li, “Tawm hauv cov av nkos los tiam sis tsis lo av, da cov dej ntshiab ntshiab tiam sis tsis huv.” thiab lwm lwm cov ntxiv. Cov ntsiab lus thiab lub ntsiab tseeb ntawm yam uas cov niam thiab cov txiv qhia lawv cov me nyuam ntawd mas feem ntau puav leej yog cov lus uas hais txog txoj kev coj zoo raws li cov tib neeg Suav tej kab lis kev cai ib txwv coj ua los ntawd tim tsum xwb. Thawj yam uas cov xib fwb qhia ntawv hais rau cov tub ntxhais kawm thaum lawv tuaj txog hauv tsev kawm ntawv mas yog qhov hais tias lawv yuav tsum ua siab zoo rau lwm tus thiab zoo siab thaum pab lwm tus, tias lawv tsis nyog muab cov nyiaj uas lawv khaws tau ntsaws hnab tshos, thiab tias lawv yuav tsum hwm lawv cov xib fwb qhia ntawv thiab lawv tej lus qhia. Thaum cov tub ntxhais kawm kawm txog cov lus Suav puag thaum ub los sis cov keeb kwm uas hais txog cov neeg uas tshaj lij tshaj plaws puag thaum ub ntawd, mas luag qhia hais tias, “Kuv mam li thaiv mos txwv,” “Tus neeg siab ncaj tiam tsis tau ob tug vajntxwv, ib tus poj niam zoo yuav tsis tau ob tug txiv,” “Rau siab ua hauj lwm thiab siv zog ua kom zoo tshaj plaws kom txog hnub koj tuag,” “Txhua tus tib neeg puav leej koom txoj hmoo ntawm lawv lub teb chaws,” “Tsis pub ib tus twg kom los mus khaws tej khoom poob ploj uas lawv lam pom nyob ntawm tej kev,” thiab lwm lwm yam ntxiv. Tej no puav leej yog los ntawm txoj kab lis kev cai ib txwv coj ua los xwb. Ntau haiv neeg kuj tau txhawb thiab tshaj tawm cov tswv yim no thiab. Tseeb tiag, txoj kev kawm ntawm teb chaws tsuas txhawb tib qho li txoj kev kawm ntawm tsev neeg txhawb xwb thiab tsis ntau los yeej tsawg —ob qho kev kawm no puav leej ntsig txog cov tswv yim uas yog los ntawm txoj kab lis kev cai ib txwm coj qhia ua kawm los. Cov tswv yim uas los ntawm txoj kab lis kev cai qub ib txwv ua los ntawd tseeb tiag lawm yeej hais txog txhua qhov kev cheem tsum uas ntsig ntxog tib neeg tus cwj pwm, kev tsim txiaj, kev coj kom zoo, thiab lwm lwm yam . Muaj ib qho mas, lawv tim tsum kom tib neeg coj tus xeeb ceem paub tab nyob rau sab nraud, kom tib neeg ua thiab coj lawv tus kheej kom lwm tus nyiam, thiab kom tib neeg coj cov cwj pwm zoo thiab ua zoo rau lwm tus pom, hos zais sab tsaus cia rau puag hauv lawv lub nruab siab. Hos lwm qhov mas, lawv txhawb tus yam ntxwv, tus cwj pwm, thiab tej kev ua uas ntsig txog qhov tib neeg coj lawv tus kheej li cas, mus ntsib tib neeg li cas, thiab daws teeb meem li cas; kev coj rau ntawm tej phooj ywg thiab tsev neeg li cas; thiab kev mus ntsib ntau hom tib neeg thiab txhua txhua yam li cas, kom mus txog qib kev coj zoo, kom lwm tus thiaj li qhuas thiab hwm. Tej kev tim tsum uas txoj kab lis kev cai qub ib txwv coj ua los uas teev tseg ntawm tib neeg ntawd ces ntsig txog tej no los xwb. Txawm yuav yog tej tswv yim uas tib neeg txhawb rau qhov kev ntsuas uas loj dua, los sis qhov kev ntsuas uas me dua los xij, tej kev xav txog txoj kev coj zoo uas tib neeg txhawb thiab ua nyob rau hauv tsev neeg, thiab tej kev tim tsum uas sawv cev rau tib neeg txog lawv txoj kev coj zoo ntawd—tej no puav leej nyob rau hauv tus ciaj ciam no xwb. Yog li ntawd, nyob rau ntawm tib neeg mas, txawm yuav yog cov tib neeg Suav txoj kab lis kev cai qub, los sis lwm lub teb chaws tej kab lis kev cai qub nrog rau tej kab lis kev cai nyob rau Sab Hnub Poob los xij, cov tswv yim uas hais txog txoj kev coj zoo no puav leej muaj tej uas tib neeg tuaj yeem ua tau thiab xav tawm xwb; tej kab lis kev cai ntawd yog tej uas tib neeg tuaj yeem ua tau raws li lawv lub siab uas txawj xav thiab laj thawj uas muaj ntawm lawv. Yam tsawg kawg, muaj ib txhia tib neeg kuj tuaj yeem ua tau qee yam ntawm txoj kev coj zoo uas kom lawv ua ntawd thiab. Tej kev tim tsum no tsuas txwv nyob ntawm thaj tsam ntawm tib neeg tus cwj pwm coj zoo, lub siab, thiab kev nyiam xwb. Yog koj tsis ntseeg Kuv, Kuv xav kom koj ua tib zoo saib seb cov kev tim tsum no cov twg thiaj ntsig txog tib neeg txoj kev coj zoo uas hais txog lawv tus moj yam qias vuab tsuab. Qhov kev tim tsum no cov twg uas hais txog qhov muaj tseeb uas tib neeg ntxub qhov tseeb, tsis nyiam qhov tseeb, thiab tawm tsam Vajtswv nyob rau hauv lawv lub ntsiab tseeb? Cov kev tim tsum no qhov twg uas muaj ib yam cuam tshuam rau qhov tseeb? Cov kev tim tsum no qhov twg uas tuaj yeem nce mus txog qib uas yog qhov tseeb? (Cov kev tim tsum no tsis muaj ib qho li.) Txawm tib neeg yuav saib cov kev tim tsum no li cas los xij, cov kev tim tsum no tsis muaj ib qho uas tuaj yeem nce mus txog qib uas yog qhov tseeb li. Cov kev tim tsum no tsis muaj ib qho uas muaj ib yam dab tsi cuam tshuam rau qhov tseeb, cov kev tim tsum no tsis muaj ib qho uas muaj ib qho kev cuam tshuam me tshaj plaws txog qhov tseeb li. Los txog rau tam sim no, cov uas twb ntseeg Vajtswv los lawm ntev, cov uas twb muaj qee qhov kev ntsib kev pom, thiab cov uas twb to taub me ntsis txog qhov tseeb lawm ces mam li yuav pib muaj txoj kev to taub tseeb txog qhov teeb meem no xwb; tiam sis tib neeg feem coob yeej tseem tsuas nkag siab tej kev qhuab qhia, thiab pom zoo rau lub tswv yim no raws li qhov kev xav xwb, hos tsis muaj txoj kev to taub qhov tseeb tiag tiag. Vim li cas thiaj zoo li no? Qhov no yog vim tib neeg feem coob tsuas to taub hais tias txhua kis ntawm txoj kab lis kev cai ib txwv uas los no tsis haum rau qhov tseeb thiab tsis cuam tshuam rau qhov tseeb los ntawm kev muab txoj kab lis kev cai qub tej kev cai tswj no piv rau Vajtswv cov lus thiab tej kev tim tsum xwb. Tej zaum lawv yuav lees paub kiag hais tias tej no tsis muaj dab tsi cuam tshuam rau qhov tseeb los ntawm lo lus hais, tiam sis hauv lawv nruab siab, mas qhov lawv xav tau, pom zoo, nyiam, thiab lees txais yooj yooj yim ntawd yog kiag cov tswv yim uas tawm los ntawm tib neeg txoj kab lis kev cai ib txwv ua los no ntag, uas muaj qee yam yog tej uas lawv lub teb chaws tshaj tawm thiab txhawb. Tib neeg saib tej ntawd li yog yam zoo los sis saib tej ntawd zoo li qhov tseeb. Tsis yog li ntawd lod? (Yog.) Raws li koj pom, txhua kis ntawm txoj kab lis kev cai ib txwv ua los no twb cog tob rau hauv tib neeg lub siab lawm, thiab tsis tuaj yeem muab tej no tshem tawm thiab rho tawm mus nyob rau ib lub sij hawm uas luv luv.

Txawm nees nkaus ib qho kev tim tsum ntawm tib neeg txoj kev coj zoo uas peb tau teev tseg ntawd tsuas yog ib feem ntawm cov tib neeg Suav txoj kab lis kev cai qub xwb, mus txog rau ib qib twg xwb los xij, nees nkaus ib qho kev tim tsum ntawd tuaj yeem sawv cev tau tag nrho rau tej kev cheem tsum uas cov tib neeg Suav txoj kab lis kev cai qub tau hais tawm txog tib neeg txoj kev coj zoo ntawd. Txhua qhov ntawm nees nkaum ib qho no mas tib neeg hais tias yog qhov zoo, tsim nyog thiab yog, thiab tib neeg ntseeg hais tias cov lus no ua tau rau lawv ua neej muaj meej mom, thiab tias cov lus no yog ib hom kev coj zoo uas tsim nyog qhuas thiab hwm. Tam sim no peb yuav muab cov lus uas ntiav ntiav xws li tsis txhob muab cov nyiaj uas koj khaws tau ntsaws rau hauv hnab tshos los sis zoo siab thaum pab lwm tus ntawd tso tseg, es los hais txog txoj kev coj zoo uas tib neeg hwm heev thiab ntseeg hais tias tsim nyog. Piv txwv li, qhov hais tias: “Yuav tsum tsis txhob cia kev muaj txiag nplua nuj ua rau yus qias vuab tsuab, tsis txhob cia kev pluag hloov tau yus, los sis tsis txhob cia kev quab yuam yuam tau yus”—lub ntsiab lus uas yooj yim tshaj plaws ntawm nqe lus no ces yog tias kom tib neeg yuav tsum tsis txhob hnov qab lawv lub hauv paus xwb. Yog ib tug tib neeg twg muaj txoj kev coj zoo no, ces txhua tus yuav xav hais tias lawv mas yog ib tug tib neeg uas muaj tus yam ntxwv zoo, thiab tias lawv mas muaj qhov “Tawm hauv cov av nkos los tiam sis tsis lo av, da cov dej ntshiab ntshiab tiam sis tsis huv” kiag li. Tib neeg hwm qhov no heev. Qhov uas tib neeg hwm qhov no heev txhais tau tias lawv nyiam thiab pom zoo rau hom lus zoo li no heev. Thiab tseeb tiag, lawv kuj qhuas cov uas ua tau raws li txoj kev coj zoo no heev thiab. Muaj ntau tus tib neeg uas ntseeg Vajtswv, tiam sis tseem pom zoo rau tej uas txoj kab lis kev cai qub no txhawb nqa thiab, thiab lawv txaus siab hlo muab cov cwj pwm zoo ntawd coj los xyaum ua raws. Cov tib neeg no tsis to taub qhov tseeb: Lawv xav tias txoj kev ntseeg Vajtswv ces txhais tau tias yog kev ua ib tug tib neeg zoo, kev pab lwm tus tib neeg, kev zoo siab los ntawm txoj kev pab lwm tus, tsis txhob dag los sis txhob rhuav tshem lwm tus tib neeg, tsis txhob caum yam uas yog khoom ntiaj teb, thiab tsis txhob ntshaw txoj kev muaj txiag nplua nuj los sis kev lom zem xwb. Nyob rau hauv lawv lub siab, lawv puav leej pom zoo rau nqe lus uas hais tias “Yuav tsum tsis txhob cia kev muaj txiag nplua nuj ua rau yus qias vuab tsuab, tsis txhob cia kev pluag hloov tau yus, los sis tsis txhob cia kev quab yuam yuam tau yus” ntawd hais yog lawm. Ib txhia yuav hais tias: “Ua ntej los ntseeg Vajtswv, yog leej twg twb ua raws li txoj kev coj zoo lawm xws li ‘Yuav tsum tsis txhob cia kev muaj txiag nplua nuj ua rau yus qias vuab tsuab, tsis txhob cia kev pluag hloov tau yus, los sis tsis txhob cia kev quab yuam yuam tau yus’ ntawd, yoglawv yog ib tug tib neeg zoo thiab siab zoo uas tsis hnov qab lawv lub hauv paus, ces tom qab lawv los ntseeg lawm, ces lawv yuav tau txais txoj kev xyiv fab ntawm Vajtswv sai heev. Yuav yooj yim rau cov tib neeg zoo li ntawd nkag mus rau hauv Vajtswv lub nceeg vaj—lawv tuaj yeem tau txais Nws tej koob hmoov.” Thaum ntau tus tib neeg ntsuas thiab saib lwm tus, lawv tsis saib lawv tsis saib rau lawv lub ntsiab tseeb raws li Vajtswv cov lus thiab qhov tseeb; tiam sis lawv ntsuas tshiab saib tus tib neeg ntawd raws li txoj kab lis kev cai qub tej kev tim tsum txog tib neeg txoj kev coj zoo xwb. Los ntawm qhov kev xam pom no, tsis ntxim zoo li cov tib neeg uas tsis to taub qhov tseeb ntawd yuav to taub yuam kev tej uas tib neeg ntseeg hais tias zoo thiab yog ntawd hais tias yog qhov tseeb lod? Tsis ntxim zoo li lawv yuav tsis saib cov tib neeg uas tib neeg ntseeg hais tias zoo ntawd li yog cov uas Vajtswv ntseeg hais tias zoo thiab lod? Tib neeg yeej ib txwm xav yuam kom Vajtswv yuav li lawv tus kheej tej tswv yim xwb—qhov ua li ntawd, tsis yog lawv ua txhaum lub hauv paus ntsiab lus lod? Qhov no tsis txhaum rau Vajtswv tus moj yam lod? (Txhaum.) Qhov no yog ib qho teeb meem loj heev. Yog tib neeg yeej muaj laj thawj tiag tiag, ces lawv yuav tsum nrhiav qhov tseeb hauv tej uas lawv tsis to taub, lawv yuav tsum to taub Vajtswv tej kev npaj siab, thiab lawv yuav tsum tsis txhob lam tau lam hais lus yam tsis muaj qab hau dab tsi. Nyob rau hauv Vajtswv cov qauv thiab tej hauv paus ntsiab lus txog txoj kev ntsuas tib neeg ntawd, puas muaj ib qho uas hais tias: “Cov uas tsis hnov qab lawv lub hauv paus mas yog cov tib neeg zoo thiab lawv muaj tus cwj pwm uas yog ib tug tib neeg zoo”? Vajtswv puas tau keev hais ib yam dab tsi zoo li ntawd? (Tsis tau keev hais.) Nyob rau hauv tej kev tim tsum uas Vajtswv tau hais tawm rau tib neeg ntawd, Nws puas tau keev hais tias, “Yog koj pluag, koj yuav tsum tsis txhob nyiag. Yog koj nplua nuj, koj yuav tsum tsis txhob deev luag poj luag txiv. Thaum koj raug luag hem los sis ua kom koj ntshai koj yuav tsum tsis txhob ntshai kiag li”? Hauv Vajtswv cov lus puas muaj tej kev tim tsum zoo li ntawd li? (Tsis muaj.) Tseeb tiag, Vajtswv cov lus yeej tsis muaj li. Pom tau tseeb lawm tias nqe lus “Yuav tsum tsis txhob cia kev muaj txiag nplua nuj ua rau yus qias vuab tsuab, tsis txhob cia kev pluag hloov tau yus, los sis tsis txhob cia kev quab yuam yuam tau yus” ntawd yog tib neeg hais xwb—nqe lus ntawd tsis mus raws li Vajtswv tej kev tim tsum ntawm tib neeg, nqe lus ntawd tsis haum rau qhov tseeb, thiab tsis zoo ib yam li qhov tseeb. Vajtswv yeej tsis tau tim tsum kom cov neeg uas raug tsim tawm los tsis txhob hnov qab lawv lub hauv paus li. Qhov tsis hnov qab koj lub hauv paus ntawd txhais li cas? Kuv mam li muab ib qho piv txwv rau koj: Yog koj cov poj koob yawm txwv yog neeg ua liaj ua teb, ces koj yuav tsum nco ntsoov lawv mus li. Yog koj cov poj koob yawm txwv tsim khoom xuas tes ua, ces koj yuav tau xyaum tej khoom xuas tes ua ntawd thiab qhia ib tiam mus rau ib tiam. Tab txawm tom qab koj twb pib ntseeg Vajtswv lawm los xij, koj yeej hnov qab tsis tau tej no li—koj hnov qab tsis tau tej lus qhia los sis tej khoom xuas tes ua los sis txhua yam uas los ntawm koj tej poj koob yawm txwv los ntawd. Yog koj cov poj koob yawm txwv yog cov neeg thov khawv, ces koj yuav tau khaws cov pas uas lawv siv ntaus dev. Yog cov poj koob yawm txwv tau noj xua thiab nroj tsuag ib zaug los lawm, ces lawv cov xeeb ntxwv kuj yuav tsum tau sim noj xua thiab nroj tsuag thiab—qhov ntawd yog kev nco txog tej kev tu siab yav dhau los kom muaj kev xyiv fab rau tam sim no, qhov ntawd tsis yog qhov hnov qab yus lub hauv paus. Txawm koj cov poj koob yawm txwv ua dab tsi los xij, koj yuav tsum tau ua raws. Koj tsis tuaj yeem hnov qab koj cov poj koob yawm txwv tsuas yog vim koj muaj kev kawm siab thiab muaj meej mom lawm xwb. Cov tib neeg Suav mas saib tej no muaj nqis heev. Nyob rau hauv lawv lub siab mas, zoo li tsuas yog cov uas tsis hnov qab lawv lub hauv paus xwb thiaj li muaj lub siab uas txawj xav thiab muaj laj thawj, thiab tias tsuas yog cov tib neeg zoo li no xwb thiaj li coj tau tus cwj pwm zoo, thiab ua neej muaj meej mom. Qhov kev xam pom li no puas yog? Puas muaj ib yam dab tsi zoo li no nyob rau hauv Vajtswv cov lus li? (Tsis muaj.) Vajtswv yeej tsis tau hais ib yam dab tsi zoo li no li. Los ntawm qhov piv txwv no los, peb pom tau tias txawm tib neeg yuav hwm thiab qhuas qhov kev tsim txiaj ntawd heev, thiab txawm qhov kev tsim txiaj ntawd yuav zoo li yog ib yam zoo, zoo li qee yam uas tuaj yeem tswj tau tib neeg txoj kev coj zoo, thiab thaiv tau tib neeg kom txhob taug txoj kev phem thiab ua kev phem kev qias, thiab txawm qhov kev tsim txiaj ntawd yuav nyob rau hauv tib neeg thiab lawv txhua tus puav leej lees txais hais tias yog ib yam zoo los xij, yog koj muab qhov kev tsim txiaj ntawd piv rau Vajtswv cov lus thiab qhov tseeb, ces koj yuav pom hais tias cov lus thiab tej kev xav uas los ntawm txoj kab lis kev cai qub no mas ruam tiag tiag li. Koj yuav pom hais tias cov lus thiab tej kev xav no mas twb tsis tsim nyog muab hais txog li, twb tsis muaj kev cuam tshuam rau qhov tseeb ib qho me me li, thiab tej ntawd mas haj yam nyob deb ntawm qhov yog Vajtswv tej kev tim tsum thiab Vajtswv tej kev npaj siab heev. Yuav kom txhawb tau tej tswv yim thiab tej kev xam pom no, thiab muab tau tej nqe lus uas hais txog tib neeg txoj kev coj zoo ntawd hais tawm mas, tib neeg yuav tsum tau siv qee yam uas zoo tshaj tib neeg txoj kev xav los qhia txog qhov qub thiab qhov tshiab, los khav txog lawv tus kheej qhov kev zoo thiab qhov kev yog, thiab los ua kom tib neeg pe hawm lawv. Tsis hais nyob rau Sab Hnub Tuaj los sis Sab Hnub Poob, tib neeg puav leej xav ib yam nkaus li. Cov tswv yim thiab cov ntsiab pib ntawm tej kev tim tsum uas tib neeg txhawb thiab muab hais tawm txog tib neeg txoj kev coj zoo, thiab tej hom phiaj uas lawv xav ua kom tiav los ntawm tej kev tim tsum txog tib neeg txoj kev coj zoo ntawd puav leej zoo ib yam. Tab txawm cov tib neeg uas nyob rau Sab Hnub Poob tsis muaj tej tswv yim thiab tej kev xam pom ncaj ncaj xws li “Ua zoo pauj phem” thiab “Txawm tib neeg pab koj me me xwb los koj yuav tsum pauj rov qab kom ntau” uas cov tib neeg nyob rau Sab Hnub Tuaj saib tseem ceeb, thiab txawm lawv tsis muaj cov lus hais meej meej zoo li cov uas nyob rau ntawm cov tib neeg Suav txoj kab lis kev cai qub los xij, lawv txoj kab lis kev cai qub puav leej muaj tej tswv yim no. Txawm tej uas peb tau sib qhia thiab hais txog ntawd yog nyob rau hauv cov tib neeg Suav txoj kab lis kev cai qub lub ntsiab tseeb xwb los xij, cov lus thiab tej kev tim tsum uas hais txog txoj kev coj zoo no sawv cev rau tag nrho txhua tus tib neeg ntiaj teb uas qias vuab tsuab tej tswv yim mus rau ib qib.

Hnub no, peb tau sib qhia txog hom kev haub ntxias tsis zoo twg uas txoj kab lis kev cai qub tau muab qhia rau tib neeg los ntawm tej ntawd cov lus thiab tej kev tim tsum uas ntsig txog tib neeg txoj kev coj zoo. Tom qab to taub qhov no lawm, qhov tseem ceeb tshaj plaws tom ntej uas tib neeg yuav tsum to taub yog tej kev cheem tsum uas Vajtswv, uas yog tus Tswv tsim ib puas tsav yam, muaj rau tib neeg ntiaj teb tus cwj pwm zoo ntawd yog dab tsi, yam uas Nws hais ncaj ncaj ntawd yog dab tsi, thiab tej kev tim tsum uas Nws tau muab hais tawm ntawd yog dab tsi. Qhov no yog qhov uas tib neeg ntiaj teb yuav tsum to taub. Tam sim no peb pom tau tseeb tseeb lawm tias txoj kab lis kev cai qub tsis ua tim khawv rau yam uas Vajtswv tim tsum ntawm tib neeg tias yog dab tsi los sis rau cov lus uas Nws tau hais ntawd ib qho me me li, thiab tias tib neeg tsis tau nrhiav qhov tseeb txog qhov no li. Yog li ntawd, txoj kab lis kev cai qub yog yam uas tib neeg kawm ua ntej thiab tau tswj lawv lawm, nws tau nkag los rau hauv tib neeg lub siab, thiab nws tau coj qhia txoj kev uas tib neeg ua neej nyob ntawd los tau ntau txhiab xyoo lawm. Qhov no yog qhov loj uas Ntxwgnyoog tau ua rau kom tib neeg ntiaj teb qias vuab tsuab. Thaum paub qhov muaj tseeb no meej lawm, qhov tseem ceeb tshaj plaws uas yuav tsum to taub tam sim no yog tej kev tim tsum uas tus Tswv tsim ib puas tsav yam rau cov tib neeg uas raug tsim tawm los uas hais txog lawv txoj kev ua neej thiab txoj kev ua zoo ntawd tias yog dab tsi—los sis, muab ua lwm l0s hais, cov qauv uas hais txog qhov tseeb no yog dab tsi. Tib lub sij hawm ntawd, tib neeg yuav tsum to taub tias qhov hauv qab no tias qhov twg yog qhov tseeb: tej kev tim tsum uas txoj kab lis kev cai qub muab hais tawm los sis yam uas Vajtswv tim tsum ntawm tib neeg yog dab tsi. Lawv yuav tsum to taub tias ob qho ntawd qhov twg thiaj li ntxuav tau kom tib neeg dawb huv thiab cawm tau tib neeg, thiab coj tau lawv mus rau txoj kev yog hauv lub neej; thiab qhov twg yog txoj kev dag, uas coj tau tib neeg mus yuam kev thiab rhuav tshem tib neeg, thiab coj lawv mus taug txoj kev uas yuam kev, mus rau ib lub neej uas muaj kev txhaum. Thaum tib neeg muaj kev thoob tsib to txog qhov no lawm, lawv paub tau hais tias tus Tswv tsim ib puas tsav yam tej kev tim tsum ntawm tib neeg ntiaj teb ntawd mas yeej zoo li ib txwm thiab ncaj ncees lawm, thiab tias tej kev tim tsum ntawd yog qhov tseeb tej hauv paus ntsiab lus uas tib neeg yuav tsum xyaum ua. Ntawm cov lus uas hais txog txoj kev coj zoo thiab cov qauv ntawm txoj kev ntsuas uas los ntawm txoj kab lis kev cai qub uas cuam tshuam rau tib neeg txoj kev caum qhov tseeb, thiab lawv tej kev saib tib neeg thiab txhua yam, thiab lawv txoj kev coj kom zoo thiab tej kev ua ntawd—yog tib neeg tuaj yeem thoob tsib to txog tej ntawd me ntsis, thiab pom tias tej ntawd zoo li cas thiab paub tias tej ntawd lub ntsiab tseeb mas ruam ruam xwb, thiab muab tej ntawd tshem tawm ntawm lawv lub siab mus, mas yuav daws tau qee yam uas paub tsis meej los sis qee qhov teeb meem uas tib neeg muaj nyob ntawm txoj kev coj zoo ntawd. Kev daws tej no yuav tsis ua rau tej kev cuam tshuam thiab tej kev nyuaj uas tib neeg ntsib nyob rau hauv txoj kev caum qhov tseeb ntawd poob tsawg lod? (Yuav ua rau poob tsawg.) Thaum tib neeg tsis to taub qhov tseeb, ces lawv yeej yuav muab tej tswv yim uas hais txog txoj kev coj zoo ntawd coj los ua qhov tseeb, thiab caum thiab ua rawsnpaum nkaus li tej ntawd yog qhov tseeb xwb. Qhov no cuam tshuam rau tib neeg lub peev xwm uas los to taub qhov tseeb thiab qhov xyaum ua qhov tseeb, thiab tej uas lawv tau txais thaum caum qhov tseeb kom hloov tau tus moj yam ntawd yam loj heev. Qhov no yog ib yam uas nej tsis muaj leej twg xav pom li; kuj yog ib yam uas Vajtswv tsis xav pom li thiab. Yog li ntawd, hais txog cov nqe lus, tej tswv yim, thiab tej kev xam pom txog txoj kev coj zoo uas tib neeg txhawb uas xav tias zoo no mas, tib neeg yuav tsum xub paub thiab thoob tsib txog tej no kom meej meej raws li lub hauv paus ntawm Vajtswv cov lus thiab qhov tseeb, thiab pom tias tej no lub ntsiab tseeb zoo li cas kiag tso, mas hauv lawv nruab siab thiaj li yuav ntsuas tau tej no yog thiab muab tau tej no tso rau qhov chaw yog, tom qab uas lawv thiaj yuaj yeem muab tej no khawb tawm los ib qho zuj zus, thiab muab tej no tshem tawm mus thiab muab tso pov tseg tau. Nyob rau lub neej yav pem suab, txhua zaus uas tib neeg pom cov nqe lus uas xav hais tias zoo uas cov nyom rau qhov tseeb ntawd, mas lawv yuav tsum xaiv qhov tseeb ua ntej tso, es tsis txhob xaiv cov nqe lus uas tib neeg tej kev xav phem xav tias zoo ntawd, vim cov nqe lus uas xav tias zoo no tsuas yog tib neeg tej kev xam pom xwb, thiab tej no tsis yoog raws qhov tseeb. Txawm peb yuav tab tom hais tawm los ntawm lub kaum twg los xij, hnub no peb lub hom phiaj uas tseem ceeb hauv qhov kev sib qhia txog cov ncauj lus no yog kom los tshem tej teeb meem uas tshwm nyob rau hauv tus txheej txheem uas tib neeg caum qhov tseeb tawm mus, tshwj xeeb yog tej kev tsis ruaj siab uas tshwm nyob rau hauv tib neeg lub siab txog Vajtswv cov lus thiab tus qauv ntawm qhov tseeb ntawd ntag. Tej kev tsis ruaj siab no txhais tau tias thaum koj lees txais qhov tseeb thiab xyaum ua qhov tseeb lawm, koj tsis tuaj yeem qhia tau tias cov twg yog cov lus uas hais txog txoj kev coj zoo uas tib neeg txhawb, thiab cov twg yog Vajtswv tej kev cheem tsum ntawm tib neeg ntiaj teb, thiab cov twg yog tej hauv paus ntsiab lus thiab tus qauv tseeb. Tib neeg paub tsis meej txog tej no. Vim li cas thiaj zoo li ntawd? (Vim lawv tsis to taub qhov tseeb.) Muaj ib qho mas, yog vim lawv tsis to taub qhov tseeb. Hos lwm qhov mas, yog vim lawv tsis muaj kev thoob tsib txog cov lus uas hais txog txoj kev coj zoo uas tib neeg txoj kab lis kev cai qub uas tau hais los ntawd thiab lawv tseem tsis tuaj yeem pom tias lub ntsiab tseeb ntawm cov lus no zoo li cas. Nyob rau thaum kawg, thaum paub tsis meej lawm, koj yuav txiav txim siab tias cov uas koj tau kawm ua ntej ntawd, thiab cov uas nyob rau hauv koj lub siab ntawd, yog yam yog lawm; koj yuav txiav txim siab tias cov uas txhua tus tib neeg lees paub hais tias qhov ntawd yog yam yog lawm. Thiab tom qab ntawd koj yuav xaiv tej uas koj nyiam, uas koj ua tau tiav, uas haum rau koj thiab koj tej kev xav phem; thiab koj yuav mus cuag tej no, tuav tej no, thiab ua raws npaum nkaus li tej no yog qhov tseeb. Thiab yam uas tshwm sim los ntawm qhov no ces yog qhov hais tias, tib neeg tus cwj pwm thiab txoj kev coj tus cwj pwm, nrog rau yam uas lawv caum, lawv xaiv, thiab lawv tuav rawv ntawd, yuav tsis ntsig txog qhov tseeb hlo li—tej ntawd yuav puav leej yog tib neeg cov cwj pwm thiab tib neeg txoj kev qhia txog txoj kev ua zoo uas tsis yog qhov tseeb lawm xwb. Tib neeg ua thiab tuav rawv txhua yam ntawm txoj kab lis kev cai qub no npaum nkaus li tej no yog qhov tseeb, hos muab qhov tseeb uas hais txog Vajtswv tej kev tim tsum txog tib neeg tus cwj pwm ntawd thawb ntiag rau ib sab thiab tsis quav ntsej. Txawm tib neeg paub hais tias ib tug tib neeg zoo muaj pes tsawg tus cwj pwm los xij, lawv yeej yuav tsis tau txais kev pom zoo ntawm Vajtswv li. Qhov no yog qhov uas tib neeg nkim dag zog ntau heev rau yam uas tsis yog qhov tseeb. Tshaj ntawd ntxiv, qhov saib tej uas los ntawm tib neeg los thiab tej uas tsis yoog raws qhov tseeb yam nkauj li tias yog qhov tsee, tib neeg twb yuam kev lawm. Tib neeg kawm txhua yam ntawm txoj kab lis kev cai qub no ua ntej, yog li ntawd tib neeg thiaj li raug tej no tswj kav lawm; tej no uas rau muaj txhua hom kev xam pom uas yuav kev tshwj tuaj rau hauv lawv, thiab tej no ua rau muaj tej kev nyuaj thiab tej kev cuam tshuam loj rau tib neeg thaum lawv ua txhua yam kom to taub qhov tseeb thiab xyaum ua qhov tseeb ntawd. Txhua tus tib neeg puav leej ntseeg hais tias lawv muaj cov cwj pwm uas tsim txiaj, mas Vajtswv yuav nyiam lawv, thiab lawv yuav tsim nyog tau txais Nws tej koob hmoov thiab Nws lo lus cog tseg, tiam sis lawv puas lees txais tau Vajtswv txoj kev txiav txim thiab kev rau txim thaum lawv muaj qhov kev xam pom thiab qhov kev xav no? Txoj kev xav zoo li no ua rau muaj teeb meem loj npaum li cas rau txoj kev ntxuav tib neeg kom dawb huv thiab txoj kev cawm tib neeg? Tej kev xav hauv nruab siab thiab tej kev xav phem no yuav tsis coj tib neeg kom to taub Vajtswv yuam kev, ntxeev siab rau Vajtswv, thiab tawm tsam Vajtswv lod? Tej no yuav tsis yog tej uas tshwm sim los lod? (Yog.) Kuv twb nthuav qhov tseem ceeb ntawm qhov kev sib qhia txog lub ncauj lus no tsis ntau los tsawg lawm, qhov no yog lub tswv yim dav dav.

Txuas ntxiv mus, peb yuav soj ntsuam thiab txheeb xyuas cov tib neeg Suav txoj kab lis kev cai qub cov lus uas hais txog txoj kev coj zoo ntawd ib qho zuj zus, es mam li txiav txim siab rau cov lus ntawd. Ua li ntawd, mas txhua tus thiaj li yuav muaj ib qho kev paub tseeb thiab lo lus teb txog cov lus ntawd, thiab yam tsawg kawg txhua tus thiaj li yuav muaj ib txoj kev to taub thiab kev xam pom uas yog txog cov lus no. Cia peb pib los ntawm cov lus uas hais tias: “Tsis txhob muab cov nyiaj uas koj khaws ntsaws hnab tshos.” Dab tsi thiaj li yuav yog ib qho kev piav qhia uas yog txog qhov paj lug no? (Yog koj khaws tau ib yam khoom dab tsi, mas koj yuav tsum tsis txhob nqa yam khoom ntawd mus es hais tias yam khoom ntawd yog koj li. Qhov paj lug no hais txog ib hom kev ua zoo thiab txoj kev cai poj ua tseg yawm ua cia ntawm tib neeg.) Qhov no puas ua tau yooj yim? (Yooj yim heev.) Tib neeg feem coob yeej ua tau yooj yim—yog koj khaws tau ib yam khoom dab tsi, txawm yuav yog dab tsi los xij, koj yuav tsum tsis txhob khaws yam khoom ntawd rau koj tus kheej, vim yam khoom ntawd yog lwm tus li. Koj tsis tsim nyog tau yam khoom ntawd, yog li ntawd koj yuav tsum muab yam khoom ntawd rov qab rau tus tswv. Yog koj nrhiav tsis tau tus tswv ntawm yam khoom ntawd, koj yuav tsum muab yam khoom ntawd rau nom tswv—txawm li cas los xij, koj yuav tsum tsis txhob khaws yam khoom ntawd rau koj tus kheej. Qhov no yog nyob rau qhov hais tias tsis txhob ntshaw lwm tus tib neeg tej phoom thiab tsis txhob siv lwm tus kom yus tau txiaj ntsim. Qhov no yog ib qho kev tim tsum txog tib neeg tus cwj pwm zoo. Lub hom phiaj ntawm qhov kev tim tsum txog tib neeg tus cwj pwm zoo no yog dab tsi? Thaum tib neeg muaj hom kev coj zoo no lawm, mas muaj ib qho kev cuam tshuam uas zoo thiab tsim nyog nyob rau hauv tib neeg tus yam ntxwv. Lub ntsiab ntawm qhov muab tej tswv yim zoo li no qhia rau tib neeg ntawd yog los cheem lawv kom tsis txhob siv lwm tus kom yus tau txiaj ntsim, kom tswj tau lawv tus kheej txoj kev coj zoo. Yog txhua tus tib neeg muaj hom kev coj zoo no lawm, ces tib neeg tus yam ntxwv yuav zoo tuaj, thiab yuav mus txog rau qib uas tsis muaj leej twg muab tej khoom poob uas lawv khaws tau nyob ntawm kev los ua lawv tug, thiab tsis muaj leej twg yuav tsum kaw lawv tej qhov rooj thaum hmo ntuj li. Thaum muaj tib neeg tus yam ntxwv zoo li no lawm, kev tswj hwm pej xeem yuav zoo tuaj, thiab tib neeg yuav nyob tau thaj yeeb tuaj. Yuav tsis tshua muaj tub sab tub nyiag, tsis tshua muaj kev sib ntaus sib tua sib pauj; cov tib neeg uas nyob rau hauv lub neej zoo li no mas yuav muaj kev ruaj ntseg, thiab muaj kev noj qab nyob zoo dua. Qhov hais tias “Tsis txhob muab cov nyiaj uas koj khaws ntsaws hnab tshos” ntawd yog ib qho kev tim tsum txog tib neeg txoj kev coj zoo nyob rau hauv zej zog thiab tej chaw uas tib neeg nyob. Lub hom phiaj ntawm qhov kev tim tsum no yog los tiv thaiv tib neeg tus yam ntxwv thiab tib neeg qhov chaw nyob. Qhov no puas ua tau yooj yim? Txawm tib neeg yuav ua tau qhov no thiab tsis tau los xij, cov uas muab lub tswv yim thiab qhov kev tim tsum txog tib neeg txoj kev coj zoo no hais tawm ntawd lub hom phiaj yog los ua kom tau raws li zej zog txoj kev xav thiab qhov chaw nyob uas tib neeg ntshaw xwb. Qhov hais tias “Tsis txhob muab cov nyiaj uas koj khaws ntsaws hnab tshos” ntawd tsis muaj dab tsi cuam tshuam rau tus qauv uas hais txog tib neeg txoj kev coj zoo li—qhov ntawd tsuas yog ib qho kev tim tsum txog tib neeg txoj kev coj zoo thaum uas lawv khaws ib yam khoom dab tsi xwb. Qhov ntawd cuam tshuam me ntsis rau tib neeg lub ntsiab tseeb. Tib neeg twb muaj qhov kev tim tsum txog tib neeg txoj kev coj zoo no tau ntau txhiab xyoo lawm. Thaum tib neeg ua raws li qhov kev tim tsum no lawm, lub teb chaws los sis lub zej zog yeej yuav ntsib ntu uas tsis tshua muaj kev ua txhaum cai, thiab tej zaum haj tseem mus txog rau qhov uas tib neeg tsis tas yuav kaw lawv tej qhov rooj thaum hmo ntuj, qhov uas tsis muaj leej twg muab tej khoom poob uas lawv khaws tau nyob ntawm kev los ua lawv tug, thiab qhov uas tib neeg feem coob tsis muab cov nyiaj uas lawv khaws ntsaws hnab tshos li thiab. Nyob rau lub sij hawm no mas, tib neeg tus yam ntxwv, kev tswj hwm pej xeem, thiab qhov chaw nyob ntawd yuav nyob ruaj khov thiab sib haum xeeb heev, tiam sis tib neeg tus yam ntxwv thiab qhov chaw nyob no tsuas nyob ib pliag, los sis ib ntus, los sis nyob rau lub sij hawm ntawd xwb. Qhov ntawd hais tau hais tias, tib neeg tsuas ua tau los sis tuav tau hom kev coj zoo no nyob rau hauv qee qhov chaw nyob xwb. Kiag thaum lawv qhov chaw nyob hloov, thiab tib neeg tus yam ntxwv qub siv tsis tau lawm, ces tej kev ua zoo xws li “Tsis txhob muab cov nyiaj uas koj khaws ntsaws hnab tshos” ntawd yeej yuav hloov, nrog rau qhov chaw nyob, tib neeg tus yam ntxwv, thiab tej hauv kev ntawm tib neeg huv si. Saib qhov uas, tom qab tus zaj loj liab ploog los tau lub hwj chim lawm, nws txhawb txhua hom lus los dag tib neeg kom nyob tau ruaj khov rau hauv tib neeg li cas. Nyob rau xyoo 80 tawm ntawd, muaj ib zaj nkauj nrov nrov hais tias: “Kuv khaws tau ib xees nyiaj nyob rau ntawm ntug kev, thiab muab xees nyiaj ntawd rau tub ceev xwm. Ces tub ceev xwm txais xees nyiaj ntawd, thiab ncaws hau rau kuv. Kuv hais yam zoo siab heev hais tias, ‘Sib ntsib dua!’” Tab txawm qhov muab ib xees nyiaj me me ntawd rau tub ceeb xwm xwb los twb tsim nyog hais txog thiab hu nkauj hais txog lawm—mas tib neeg txoj kev ua zoo thiab tus cwj pwm ntawd haj yam “tsim nyog!” Puas yog li ntawd tiag tiag? Tib neeg muaj peev xwm muab ib xees nyiaj uas lawv khaws tau rau tub ceev xwm, tiam sis lawv puas yuav muab ib puas nyiaj yuam los sis ib txhiab nyiaj yuam rau tub ceeb xwm? Qhov no mas hais nyuaj. Yog ib tug tib neeg twg pom ib co kub, ib co nyiaj, los sis tej yam muaj nqis los sis tej yam uas haj yam muaj nqis, mas tus tib neeg ntawd yeej yuav tswj tsis tau nws qhov kev ntshaw li, nws lub siab phem yuav tawm tuaj, thiab nws yuav muaj peev xwm ua rau tib neeg raug mob thiab rhuav tshem tib neeg, hais lus nkaug lwm tus thiab cuab lwm tus—nws yuav muaj peev xwm nyiag lwm tus tib neeg cov nyiaj, thiab haj tseem muaj peev xwm tua tib neeg thiab. Nyob rau lub sij hawm ntawd, yuav tshuav dab tsi txog tib neeg txoj kab lis kev cai qub thiab txoj kev ua zoo qub uas zoo ntawd? Tus qauv zoo uas hais tias “Tsis txhob muab cov nyiaj uas koj khaws ntsaws hnab tshos” ntawd dua twg lawm? Qhov no qhia peb txog dab tsi? Txawm xyov tib neeg puas muaj lub siab thiab txoj kev coj zoo no los xij, qhov kev tim tsum thiab cov lus no tsuas yog qee yam uas tib neeg xav hauv nruab siab, ntshaw, thiab xav kom lawv ua tau thiab ua tiav xwb. Nyob rau hauv lub ntsiab ncaj ncaj ntawm tib neeg, thiab hauv qhov uas tsim nyog lawm, mas cov tib neeg uas muaj lub siab uas txawj xav thiab qhov tsim nyog ntawd tuaj yeem ua tau qhov tsis txhob muab cov nyiaj uas lawv khaws ntsaws hnab tshos ntawd, tiam sis qhov no tsuas yog ib tug cwj pwm zoo uas dhau mus xwb, qhov no dhau tsis tau los ua tus qauv rau lawv txoj kev coj kom zoo, los sis lawv lub neej. Kiag thaum qhov chaw nyob thiab cheeb tsam uas cov tib neeg ntawd nyob hloov lawm, ces txoj kev ntseeg no thiab txoj kev coj zoo uas zoo tshaj plaws raws li tib neeg tej kev xav phem no yuav nyob deb ntawm tib neeg heev. Tej no yuav ua tsis tau raws li lawv tej kev ntshaw thiab tej hom phiaj, thiab, tej no haj yam txwv tsis tau lawv tej kev ua phem. Tej no tsuas yog ib tug cwj pwm zoo uas nyob ib ntus, thiab yog ib qho kev zoo uas tsim nyog raws li tib neeg tej kev xav xwb. Thaum tej no los ntsib qhov muaj tiag thiab txoj kev ntshaw ntawm tib neeg tus kheej, thaum tej no cov nyom rau tib neeg tej kev xav lawm, ces hom kev ua zoo no tswj tsis tau tib neeg tus cwj pwm, los sis coj qhia tsis tau lawv tus cwj pwm thiab tej kev xav lawm. Thaum kawg, tib neeg yuav txiav txim siab tawm tsam tej no, lawv yuav ua txhaum txoj kev ua zoo raws li txoj kev xav phem qub no, thiab xaiv lawv tus kheej tej kev ntshaw. Yog li ntawd, thaum hais txog txoj kev ua zoo uas hais tias “Tsis txhob muab cov nyiaj uas koj khaws ntsaws hnab tshos” ntawd, mas tib neeg yeej muab tau ib xees nyiaj uas lawv khaws rau tub ceev xwm. Tiam sis yog hais tias lawv khaws tau ib txhiab yuam, kaum txhiab yuam, los sis ib lub npib kub no, lawv puas tseem yuav muab qhov lawv khaws tau ntawd rau tub ceev xwm? Lawv yuav tsis muab li. Thaum qhov muab cov nyiaj ntawd los ua yus tug muaj txiaj ntsim tshaj qhov tib neeg ua zoo lawm, ces lawv yuav tsis muab cov nyiaj ntawd rau tub ceev xwm. Lawv yuav ua tsis tau raws li txoj kev ua zoo uas hais tias “Tsis txhob muab cov nyiaj uas koj khaws ntsaws hnab tshos ” ntawd. Yog li ntawd, qhov hais tias “Tsis txhob muab cov nyiaj uas koj khaws ntsaws hnab tshos” ntawd puas sawv cev rau tib neeg txoj kev ua neej lub ntsiab tseeb? Qhov ntawd sawv cev tsis tau rau lawv txoj kev ua neej lub ntsiab tseeb kiag li. Qhov ntawd pom tau tseeb tseeb hais tias qhov kev tim tsum txog tib neeg txoj kev coj zoo no siv tsis tau ua lub hauv paus rau txoj kev ntsuas seb tib neeg puas muaj txoj kev ua neej, thiab pom tias txoj kev coj zoo no ua tsis tau ib tug qauv rau tib neeg txoj kev coj kom zoo.

Qhov xub xub saib seb tib neeg puas muab cov nyiaj uas lawv khaws tau ntsaws hnab tshos ntawd puas yuav yog ib txoj kev yog uas los ntsuas lawv tej kev ua zoo thiab tus cwj pwm? (Tsis yog.) Vim li cas thiaj tsis yog? (Tib neeg yeej tsis muaj peev xwm ua tau raws li qhov kev cheem tsum ntawd tiag tiag. Yog lawv khaws tau ib qho nyiaj me me los sis ib yam khoom uas tsis tshua muaj nqis, ces lawv yeej yuav muab yam khoom ntawd rau tub ceev xwm, tiam sis yog yam khoom ntawd yog ib yam uas muaj nqis, mas lawv yeej yuav tsis muab li. Yog hais tias yam khoom ntawd yog ib yam khoom uas muaj nqis heev, mas lawv haj yam yuav tsis muab rau tub ceev xwm—lawv haj tseem yuav ua txhua yam kom tau tuav yam khoom ntawd thiab.) Koj txhais hais tias qhov “Tsis txhob muab cov nyiaj uas koj khaws ntsaws hnab tshos” ntawd ua tsis tau ib tug qauv rau txoj kev ntsuas tib neeg txoj kev ua neej vim tib neeg ua tsis tau qhov ntawd. Yog li ntawd, yog tib neeg ua tau raws li qhov kev cheem tsum no no, qhov kev cheem tsum no puas yuav suav tau hais tias yog ib tug qauv rau txoj kev ntsuas lawv txoj kev ua neej? (Tsis tau, suav tsis tau.) Vim li cas thiaj li suav tsis tau ua ib tug qauv rau txoj kev ntsuas tib neeg txoj kev ua neej, tab txawm yog tib neeg ua tau raws li qhov kev cheem tsum no? (Tib neeg lub peev xwm uas los ua raws li qhov “Tsis txhob muab cov nyiaj uas koj khaws ntsaws hnab tshos” ntawd tsis ua rau pom txog qhov zoo ntawm lawv txoj kev ua neej tiag tiag. Qhov ntawd tsis muaj dab tsi cuam tshuam rau qhov uas lawv txoj kev ua neej zoo los phem npaum li cas, thiab qhov ntawd tsis yog ib tug qauv rau txoj kev ntsuas tib neeg txoj kev ua neej.) Nov yog ib txoj kev to taub txog qhov teeb meem. Muaj kev cuam tshuam me ntsis ntawm qhov tib neeg tsis txhob muab cov nyiaj uas lawv khaws tau ntawd ntsaws hnab tshos thiab qhov zoo ntawm lawv txoj kev ua neej. Yog li ntawd, yog nej ntsib ib tug tib neeg uas muaj peev xwm tsis muab cov nyiaj uas nws khaws tau ntawd ntsaws hnab tshos tiag tiag no, nej yuav xav li cas rau tus tib neeg ntawd? Nej suav puas tau tias tus tib neeg ntawd yog ib tug tib neeg uas muaj txoj kev ua neej, yog ib tug tib neeg coj ncaj, thiab yog ib tug tib neeg uas zwm rau Vajtswv? Nej cais puas tau qhov tsis muab cov nyiaj uas yus khaws tau ntsaws hnab tshos ntawd ua ib tug qauv rau qhov muaj txoj kev ua neej? Peb yuav tsum kawm txog qhov teeb meem no. Leej twg yuav hais txog qhov teeb meem no? (Qhov tib neeg tsis muab cov nyiaj uas lawv khaws ntsaws hnab tshos ntawd tsis cuam tshuam rau qhov kev ua txhaum rau tus tib neeg ntawd txoj kev ua neej lub ntsiab tseeb. Lawv lub ntsiab tseeb yog ntsuas raws li qhov tseeb.) Dab tsi ntxiv thiab? (Ib txhia tib neeg mas muaj peev xwm tsis muab cov nyiaj uas lawv khaws ntsaws hnab tshos, tab txawm yog nyiaj ntau, los sis lawv ua ntau yam zoo zoo li no los xij, tiam sis lawv muaj lawv tej hom phiaj thiab tej kev npaj siab. Lawv xav kom tau txais nqi zog rau lawv tej kev ua zoo thiab kom tau ib lub koob lub npe zoo, yog li ntawd lawv cov cwj pwm zoo sab nraud txiav txim siab tsis tau rau qhov zoo ntawm lawv txoj kev ua neej.) Puas muaj dab tsi ntxiv lawm? (Muab hais tias muaj qee tus neeg uas muaj peev xwm tsis muab cov nyiaj uas lawv khaws ntsaws hnab tshos, tiam sis lawv muaj ib tug cwj pwm uas tawm tsam qhov tseeb, muaj ib tug cwj pwm uas tsis nyiam qhov tseeb. Yog peb ntsuas lawv raws li Vajtswv cov lus, mas lawv tsis muaj txoj kev ua neej. Yog li ntawd, qhov siv tus qauv no los ntsuas seb tib neeg puas muaj txoj kev ua neej los tsis muaj ntawd mas tsis yog lawm.) Nej ib txhia twb paub lawm hais tias qhov siv qhov “Tsis txhob muab cov nyiaj uas koj khaws ntsaws hnab tshos” ntawd los ntsuas seb tib neeg puas muaj txoj kev ua neej ntawd mas tsis yog lawm—nej tsis pom zoo siv qhov no los ua ib tug qauv rau txoj kev ntsuas seb tib neeg puas muaj txoj kev ua neej. Qhov kev xam pom no yog lawm. Qhov seb tib neeg puas muaj peev xwm tsis muab cov nyiaj uas lawv khaws ntsaws hnab tshos ntawd, qhov no cuam tshuam rau tej hauv paus ntsiab lus ntawm lawv txoj kev coj kom zoo thiab txoj kev uas lawv xaiv me ntsis. Vim li cas Kuv thiaj hais li no? Ua ntej tshaj plaws, thaum tib neeg tsis muab cov nyiaj uas lawv khaws ntsaws hnab tshos ntawd, qhov no tsuas sawv cev rau tus cwj pwm uas nyob ib pliag xwb. Xyov qhov lawv ua li ntawd yog vim yam khoom uas lawv khaws ntawd tsis muaj nqis, los xyov yog vim lwm tus tib neeg tab tom ntsia ntsoov lawv, es lawv xav kom lwm tus tib neeg qhuas lawv thiab hwm lawv xwb. Tab txawm yog qhov lawv ua li ntawd mas zoo heev los xij, qhov ntawd tsuas yog ib hom cwj pwm zoo, thiab qhov ntawd muaj kev cuam tshuam me ntsis rau lawv txoj kev caum thiab txoj kev coj kom zoo xwb. Feem ntau, tsuas hais tau hais tias tus tib neeg no muaj ib tug cwj pwm zoo thiab tus yam ntxwv zoo me ntsis xwb. Txawm hu tsis tau hais tias tus cwj pwm no yog ib yam tsis zoo los xij, kuj cais tsis tau hais tias tus cwj pwm no yog ib yam zoo thiab, thiab yeej hais tsis tau hais tias tus tib neeg no yog ib tug tib neeg zoo vim nws tsis muab cov nyiaj uas nws khaws ntsaws hnab tshos xwb. Qhov no yog vim qhov ntawd tsis muaj kev cuam tshuam rau qhov tseeb, thiab qhov ntawd tsis muaj dab tsi cuam tshuam rau Vajtswv tej kev tim tsum ntawm tib neeg. Ib txhia tib neeg hais tias: “Yog ua cas qhov ntawd thiaj li tsis yog ib qho zoo? Yog ua cas ib tug cwj pwm zoo uas zoo li no thiaj li tsis suav tias yog qhov zoo? Yog ib tug tib neeg twg tsis zoo thiab tsis muaj kev ua neej no, tus tib neeg ntawd puas yuav muaj peev xwm tsis muab cov nyiaj uas nws khaws ntsaws hnab tshos?” Qhov hais li ntawd mas tsis yog lawm. Dab muaj peev xwm ua tau ob peb yam zoo—yog li ntawd koj puas yuav hais tias qhov ntawd tsis yog dab? Ib txhia vajntxwv dab mas ua ib ob yam dej num zoo kom lawv tus kheej muaj koob muaj npe thiab ceev tau lawv qhov chaw nyob rau hauv keeb kwm—yog li ntawd koj puas yuav hu lawv ua cov tib neeg zoo? Koj txiav txim siab tsis tau hais tias xyov tib neeg muaj txoj kev ua neej los tsis muaj, xyov lawv tus cwj pwm zoo los phem, raws li ib qho zoo los sis ib qho phem uas lawv ua xwb. Yuav kom ntsuas tau yog, mas koj yuav tsum ntsuas raws li lawv txoj kev coj tus cwj pwm, thiab ntsuas raws li qhov seb lawv muaj tej tswv yim thiab tej kev xam pom uas yog los tsis muaj. Yog ib tug tib neeg twg muaj peev xwm muab ib yam khoom uas muaj nqis heev uas nws khaws tau rov qab rau tus tswv ntawm yam khoom ntawd, ces qhov no tsuas qhia tau hais tias tus tib neeg ntawd tsis muaj lub siab hlob, thiab tias nws tsis ntshaw lwm tus tib neeg tej khoom xwb. Nws muaj qhov kev coj zoo no, tiam sis qhov no puas muaj ib yam dab tsi cuam tshuam rau nws txoj kev coj kom zoo thiab tus cwj pwm uas nws coj rau yam zoo ntawd? (Tsis muaj.) Ib txhia tib neeg yuav tsis pom zoo rau qhov no, lawv yuav xav hais tias qhov ua li no mas yog ib qho kev xav ntawm yus tus kheej me ntsis xwb thiab tsis yog lawm. Txawm li cas los xij, muab qhov no xav los ntawm lwm qhov kev xam pom hais tias, yog ib tug tib neeg twg ua yam khoom uas muaj txiaj ntsig poob lawm no, tus tib neeg ntawd puas yuav tsis nyuaj siab txog yam khoom ntawd? Yog li ntawd, hais txog tus tib neeg uas khaws tau yam khoom ntawd, txawm nws yuav khaws tau dab tsi los xij, yam khoom ntawd tsis yog nws li, yog li ntawd nws yuav tsum tsis txhob muab yam khoom ntawd khaws cia. Txawm yam khoom ntawd yuav yog ib yam khoom siv los yog nyiaj, txawm yam khoom ntawd yuav muaj nqis thiab tsis muaj los xij, yam khoom ntawd tsis yog nws li—yog li ntawd qhov muab yam khoom rov qab rau tus tswv ntawd tsis yog nws tes dej num lod? Qhov no tsis yog qhov tib neeg yuav tsum ua lod? Qhov ua li no muaj nuj nqis dab tsi? Qhov no tsis yog muab ua tshaj dhau lawm lod? Qhov saib qhov tsis muab cov nyiaj uas yus khaws ntsaws hnab tshos ntawd yam li yog ib hom kev zoo thiab muab qhov ntawd txhawb kom siab, rau sab ntsujplig ntawd mas tsis yog tshaj dhau lawm lod? Qhov no puas yog ib tus cwj pwm zoo uas tsim nyog cov tib neeg zoo hais txog? Muaj ntau tus cwj pwm uas zoo dua thiab siab dua tus cwj pwm no, yog li ntawd tsis tsim nyog hais txog qhov tsis muab cov nyiaj uas yus khaws tau ntsaws hnab tshos ntawd. Txawm li cas los xij, yog koj yuav siv zog tshaj tawm thiab txhawb tus cwj pwm zoo no rau cov tib neeg thov khawv thiab cov tub sab, ces qhov ntawd yeej tsim nyog, thiab siv tau qee yam lawm. Yog ib lub teb chaws twg siv zog txhawb qhov “Tsis txhob muab cov nyiaj uas koj khaws ntsaws hnab tshos” ntawd, ces qhov ntawd qhia tau hais tias cov tib neeg uas nyob rau ntawm lub teb chaws ntawd twb phem heev lawm, tias lub teb chaws ntawd muaj tub sab tub nyiag coob dhau lawm, thiab kov tsis yeej cov tub sab tub nyiag ntawd li lawm. Yog li ntawd, tib qho uas yuav pab tau lawv ces yog los txhawb thiab tshaj tawm hom cwj pwm zoo no los daws qhov teeb meem ntawd xwb. Tseeb tiag, tus cwj pwm no yeej ib txwm yog tib neeg tes dej num. Piv txwv li, yog ib tug tib neeg twg khaws tau tsib caug yuam nyiaj nyob rau ntawm kev es cia li muab qhov nyiaj ntawd rov qab rau tus tswv lawm no, tsis yog tsis tsim nyog hais txog qhov ntawd hlo li lod? Yuav tsum tau qhuas qhov ntawd xwb xwb lod? Puas tsim nyog muab qhov zoo li no saib tseem ceeb dhau lawm, thiab los hu nkauj qhuas tus tib neeg no, thiab haj tseem qhuas tus tib neeg no txog nws txoj kev coj zoo uas tsim nyog thiab muaj nuj nqis thiab, uas tsuas yog vim nws muab cov nyiaj ntawd rov qab rau tus tib neeg uas muab ua poob lawm xwb? Qhov muab cov nyiaj uas poob rov qab rau tus tswv ntawd tsis yog qhov uas ib txwm ua thiab yuav tsum tau ua li ntawd lod? Qhov no tsis yog ib qho uas tus tib neeg uas muaj qhov tsim nyog li ib txwm muaj yuav tsum tau ua lod? Tab txawm ib tug me nyuam yaus uas tsis to taub tej kev ua zoo ntawm tib neeg los twb muaj peev xwm ua tau qhov no, yog li ntawd puas tsim yog muab qhov no ua ib qho loj? Puas tsim nyog txhawb tus cwj pwm no mus rau qib uas yog tib neeg txoj kev ua zoo tiag tiag? Raws li Kuv xav mas, txhawb tsis tau tus cwj pwm no mus rau qib no, thiab tsis tsim nyog qhuas tus cwj pwm no. Tus cwj pwm no tsuas yog ib tug cwj pwm zoo uas nyob ib pliag xwb thiab tus cwj pwm no tsis muaj kev cuam tshuam rau qib uas yog ib tug tib neeg zoo tiag tiag. Qhov tsis txhob muab cov nyiaj uas yus khaws ntsaws hnab tshos ntawd yog ib qho uas tsis tseem ceeb. Qhov ntawd yog ib yam uas txhua tus tib neeg dog dig, thiab txhua tus uas lawv tus kheej hnav tib neeg cev nqaij daim tawv los sis hais lus tib neeg yuav tsum ua tau. Qhov no yog ib yam uas tib neeg tuaj yeem ua tau yog lawv siv zog ua, lawv tsis tas yuav tim tsum ib tug kws qhia los sis ib tug uas txawj xav los qhia lawv ua li. Ib tug me nyuam yaus peb xyoos xwb yeej muaj peev xwm ua tau qhov no lawm, tiam sis, cov uas txawj xav thiab cov kws qhia saib qhov no yam li yog ib qho kev cheem tsum uas tseem ceeb heev txog tib neeg txoj kev coj zoo, yog li ntawd qhov ua li ntawd, lawv muab txhawj xeeb dhau lawm. Txawm qhov hais tias “Tsis txhob muab cov nyiaj uas koj khaws ntsaws hnab tshos” ntawd yog ib nqe lus uas ntsuas tib neeg txoj kev coj zoo los xij, nqe lus ntawd yeej mus tsis txog qib uas ntsuas seb tib neeg puas muaj txoj kev ua neej los sis txoj kev ua zoo uas tsim nyog li. Yog li ntawd, qhov siv qhov uas hais tias “Tsis txhob muab cov nyiaj uas koj khaws ntsaws hnab tshos” ntawd los ntsuas qhov zoo ntawm tib neeg txoj kev ua neej mas tsis yog thiab tsis tsim nyog lawm.

“Tsis txhob muab cov nyiaj uas koj khaws ntsaws hnab tshos” yog txoj kab lis kev cai qub tej kev tim tsum txog txoj kev coj zoo uas ntiav tshaj plaws. Txawm tag nrho tib neeg tej zej zog puav leej tau txhawb nqa thiab qhia lub tswv yim no los xij, vim tib neeg muaj tus moj yam qias vuab tsuab, thiab vim tib neeg ntiaj teb tej kev phem nthuav dav tuaj, tab txawm yog tib neeg ua tau qhov “tsis txhob muab cov nyiaj uas koj khaws ntsaws hnab tshos” los sis muaj hom kev coj zoo no rau qee lub sij hawm los xij, qhov no hloov tsis tau qhov muaj tseeb uas tib neeg tus moj yam qias vuab tsuab tswj lawv tej kev xav thiab cov cwj pwm, thiab kuj tswj thiab kav lawv txoj kev coj kom zoo thiab tej kev caum thiab. Cov qauv uas nyob ib ntus ntawm txoj kev coj zoo no tsis tseem ceeb rau tib neeg txoj kev caum, thiab cov qauv uas nyob ib ntus no yeej hloov tsis tau tib neeg txoj kev cav, kev qhuas, thiab kev raws tej kev phem qab li. Tsis yog li no lod? (Yog.) Yog li ntawd, zaj nkauj uas tib neeg hu yav dhau los uas hais tias, “Kuv khaws tau ib xees nyiaj nyob rau ntawm ntug kev” ntawd, tam sim no tsuas yog ib zaj nkauj ntxias me nyuam lawm xwb. Zaj nkauj ntawd dhau los ua ib qho kev nco txog lawm xwb. Tib neeg twb ua tsis tau raws li tus cwj pwm zoo uas tsis txhob muab cov nyiaj uas lawv khaws ntsaws hnab tshos lawm. Tib neeg xav hloov tib neeg tej kev caum thiab tus moj yam qias vuab tsuab los ntawm qhov txhawb nqa txoj kev coj zoo, thiab lawv ua txhua yam kom tib neeg tsis txhob poob ntsej muag, thiab puas tsuaj ntawm lub neej ib hnub dhau ib hnub, tiam sis thaum kawg lawv ua tsis tau tej hom phiaj no kom tiav. Txoj kev ua zoo uas hais tias “Tsis txhob muab cov nyiaj uas koj khaws ntsaws hnab tshos” ntawd tsuas muaj nyob rau hauv lub ntiaj teb ntawm tib neeg txoj kev xav xwb. Tib neeg saib qhov kev ua zoo no yam li yog ib qho kev xav, ib qho kev ntshaw lub ntiaj teb uas zoo dua. Qhov kev ua zoo no muaj nyob rau hauv tib neeg sab yeeb ceeb xwb. Qhov kev ua zoo no yog ib hom kev cia siab uas tib neeg xav txog lub ntiaj teb yav tom ntej xwb, tiam sis qhov kev ua zoo no tsis mus raws li qhov muaj tiag ntawm tib neeg lub neej thiab tib neeg txoj kev ua neej tiag tiag. Qhov kev ua zoo no tsis mus raws li tib neeg tej hauv paus ntsiab lus ntawm txoj kev coj kom zoo thiab tej kev uas tib neeg taug, nrog rau yam uas lawv caum, thiab yam uas lawv yuav tsum muaj thiab ua kom tiav. Qhov kev ua zoo no tsis mus raws li tej uas ua rau pom tseeb thiab tej uas tawm ntawm txoj kev ua neej los, thiab tsis mus raws li tej hauv paus ntsiab lus ntawm tib neeg tej kev sib raug zoo thiab ntawm txoj kev ua hauj lwm. Yog li ntawd, tus qauv uas txiav txim rau tib neeg ntiaj teb txoj kev coj zoo no yeej ib txwm tsis zoo txij puag thaum ub los txog rau niaj hnub no. Lub tswv yim thiab qhov kev xam pom ntawm qhov “Tsis txhob muab cov nyiaj uas koj khaws ntsaws hnab tshos” uas tib neeg txhawb nqa no yeej tsis muaj qab hau dab tsi li, thiab tib neeg feem coob yeej tsis quav ntsej txog qhov ntawd, vim qhov ntawd hloov tsis tau txoj kev ntawm lawv txoj kev coj kom zoo, los sis lawv tej kev caum, thiab qhov ntawd yeej hloov tsis tau tib neeg txoj kev liam, kev twm xeeb, lawv tus kheej txoj kev ntshaw, los sis lawv txoj kev maj nroos mus ua kev phem li. Qhov kev tim tsum uas ntiav tshaj plaws ntawm qhov “Tsis txhob muab cov nyiaj uas koj khaws ntsaws hnab tshos” no dhau los ua ib qho hais kom lom zem, hais tso dag tso luag lawm xwb. Tam sim no, tab txawm me nyuam yaus los twb tsis xav hu zaj nkauj uas hais tias, “Kuv khaws tau ib xees nyiaj nyob rau ntawm ntug kev” li lawm—zaj nkauj ntawd twb tsis muaj qab hau hlo li lawm. Nyob rau hauv lub ntiaj teb uas muaj cov nom tswv qias vuab tsuab mas, zaj nkauj no yog ib zaj nkauj hu kom zoo luag lawm xwb. Qhov tseeb, uas tib neeg paub zoo, ces yog qhov hais tias tej zaum tib neeg yuav muab ib lub xees nyiaj uas poob lawm rau tub ceev xwm, tiam sis yog lawv khaws tau ib lab nyiaj yuam, los sis kaum lab nyiaj yuam, mas cov nyiaj ntawd kawg nkag lawv lub hnab ris lawm xwb. Los ntawm qhov no, peb pom tau hais tias qhov tib neeg ua txhua yam los txhawb nqa qhov kev tim tsum kom tib neeg ntiaj teb coj zoo ntawd tib neeg ua tsis tau. Qhov no txhais hais tias tib neeg twb tsis muaj peev xwm coj cov cwj pwm zoo uas yooj yooj yim li. Qhov hais tias twb tsis muaj peev xwm coj cov cwj pwm zoo uas yooj yooj yim ntawd yog txhais li cas? Qhov ntawd txhais hais tias tib neeg twb tsis muaj peev xwm ua yam yooj yooj yim uas lawv tsim nyog ua—xws li tsis txhob muab yam khoom uas lawv khaws coj los ua lawv tug yog hais tias yam khoom ntawd yog lwm tus li. Tshaj ntawd ntxiv, thaum tib neeg ua ib yam dab tsi yuam kev lawm, lawv yuav tsis hais ib lo lus kom ncaj ncees txog yam ntawd li, lawv yeem tuag zoo dua li lees hais tias lawv ua yuam kev. Lawv twb tsis ua raws li qhov yooj yooj yim uas tsis txhob dag ntawd, yog li ntawd lawv yeej tsis tsim nyog hais txog txoj kev ua zoo. Lawv twb tsis xav kom muaj lub siab uas txawj xav thiab qhov tsim nyog li, yog li ntawd lawv yuav ua li cas tham tau txog txoj kev ua zoo? Nom tswv thiab cov uas muaj hwj chim mas rau siab xav txog tej kev uas los zuag thiab txeeb txiaj ntsim ntawm lwm tus tib neeg kom ntau ntxiv, thiab txeeb tej uas tsis yog lawv li xwb. Tab txawm txoj cai los ua tsis tau li cas rau lawv li—vim li cas zoo li no? Yog ua cas tib neeg thiaj li los txog rau qib no? Qhov no puav leej yog vim tib neeg tus moj yam phem qias vuab tsuab, thiab txoj kev tswj thiab kev kav uas lawv tus yam ntxwv phem tau tswj kav lawv xwb, es thiaj li ua rau muaj tus xeeb ceem dag, thiab cov cwj pwm uas rhuav tshem. Cov neeg ntsej muag ncaj siab nkhaus no ua ntau yam uas ntxim ntxub thiab tsis paub txaj muag los ntawm qhov dag hais tias “ua dej num rau pej xeem.” Puas yog lawv tsis paub txaj muag hlo li? Niaj hnub no, muaj cov tib neeg uas ntsej muag ncaj siab nkhaus coob heev. Nyob rau hauv lub ntiaj teb uas cov tib neeg phem khiav rau ub rau no hos cov tib neeg zoo raug caij tsuj ntawd mas, los lus qhuab qhias xws li “Tsis txhob muab cov nyiaj uas koj khaws ntsaws hnab tshos” ntawd yeej tswj tsis tau tib neeg tus moj yam qias vuab tsuab, thiab yeej hloov tsis tau lawv tus yam ntxwv lub ntsiab tseeb, los sis txoj kev uas lawv taug li.

Nej puas to taub tej uas Kuv tau hais nyob rau hauv qhov kev qhia txog lub ncauj lus uas hais tias “Tsis txhob muab cov nyiaj uas koj khaws ntsaws hnab tshos” no? Qhov hais li no txhais li cas txog cov tib neeg uas qias vuab tsuab? Seb nej nkag siab qhov kev ua zoo no li cas xwb? (Qhov “Tsis txhob muab cov nyiaj uas koj khaws ntsaws hnab tshos” ntawd tsis muaj kev cuam tshuam rau tib neeg txoj kev coj kom zoo los sis rau txoj kev uas lawv taug li. Qhov ntawd hloov tsis tau txoj kev uas tib neeg taug.) Qhov ko yog lawm, tsis tsim nyog tib neeg ntsuas lwm tus tib neeg raws li qhov hais tias “Tsis txhob muab cov nyiaj uas koj khaws ntsaws hnab tshos” ntawd. Qhov hais li no muab coj los ntsuas tib neeg txoj kev ua neej tsis tau, thiab qhov siv qhov hais li no coj los ntsuas lwm tus tib neeg txoj kev ua zoo los kuj tsis yog thiab. Qhov no tsuas yog tib neeg tus cwj pwm uas nyob ib ntus xwb. Siv tsis tau qhov no los ntsuas tib neeg lub ntsiab tseeb. Cov tib neeg uas tshaj tawm qhov hais txog txoj kev coj zoo uas hais tias, “Tsis txhob muab cov nyiaj uas koj khaws ntsaws hnab tshos”—cov tib neeg uas hu ua cov muaj kev xav thiab cov muaj kev kawm no—yog cov neeg uas ua raws li qhov tsis muaj tiag. Lawv tsis to taub tib neeg txoj kev ua neej los sis lub ntsiab tseeb, thiab lawv tsis nkag siab qib uas tib neeg dhau los ua kev phem kev qias thiab qias vuab tsuab ntawd. Yog li ntawd, qhov hais txog txoj kev coj zoo uas lawv tau hais tawm kom ua no mas tsis muaj dab tsi li, qhov hais li no yeej tsis muaj qab hau dab tsi, thiab tsis haum rau tib neeg tej xwm txheej tiag tiag. Qhov hais txog txoj kev coj zoo no twb tsis muaj ib qho kev cuam tshuam me me rau tib neeg lub ntsiab tseeb los sis rau qhov txawv ntawm tus moj yam qias vuab tsuab uas tib neeg nthuav tawm tuaj, los sis tej kev xav phem, tej kev xam pom, thiab cov cwj pwm uas tej zaum tib neeg yuav muaj thaum raug tus moj yam qias vuab tsuab ntawd tswj li. Qhov no yog ib qho. Hos lwm qhov yog qhov hais tias qhov tsis txhob muab cov nyiaj uas koj khaws ntsaws hnab tshos ntawd tsuas yog ib qho uas ib tug tib neeg dog dig tsim nyog ua xwb. Piv txwv li, koj niam koj txiv yug tau koj thiab tus koj loj hlob, tiam sis thaum koj tseem tsis tau paub dab tsi thiab tsis tau paub tab, yam uas koj ua ces yog thov koj niam koj txiv mov noj thiab khaub ncaws hnav xwb. Txawm li ntawd los xij, thaum koj loj hlob thiab muaj kev to taub txog txhua yam zoo tuaj lawm, koj cia li paub hlub koj niam koj txiv heev lawm xwb, tsis ua rau nkawv txhawj xeeb los sis npau taws, tsis pub nkawv ua hauj lwm ntau los sis raug kev txom nyem li, thiab ua txhua yam li koj tus kheej muaj peev xwm ua tau. Koj cia li to taub tej no thiab tsis tas tim tsum leej twg qhia koj li. Koj yog ib tug tib neeg, koj muaj lub siab uas txawj xav thiab qhov tsim nyog, yog li ntawd koj muaj peev xwm ua thiab tsim nyog ua tej no—tej no twb tsis tsim nyog hais txog ib qho li. Qhov txhawb nqa qhov “Tsis txhob muab cov nyiaj uas koj khaws ntsaws hnab tshos” ntawd mus rau qib tias yog tus cwj pwm ua zoo uas tsim nyog ntawd, mas yog tib neeg lam hais lawm xwb thiab muab hais tshaj dhau lawm; tus cwj pwm no tsis tsim nyog muab saib zoo li ntawd, tsis yog li ntawd lod? (Yog.) Peb kawm tau dab tsi los ntawm qhov no? Qhov ua yam uas tib neeg tsim nyog ua thiab muaj peev xwm ua nyob rau hauv txoj kev ua neej ntawd mas yog ib lub cim ntawm tus tib neeg uas muaj txoj kev ua neej xwb. Qhov no txhais hais tias yog ib tug tib neeg twg muaj qhov tsim nyog li sawv daws muaj, mas tus tib neeg ntawd yeej ua tau tej uas cov tib neeg uas muaj txoj kev ua neej ntawd xav ua thiab paub tias lawv yuav tsum tau ua—qhov no tsis yog ib qho uas sawv daws muaj lod? Yog koj ua ib yam dab tsi uas txhua tus uas muaj txoj kev ua neej puav leej muaj peev xwm ua tau no, qhov ntawd hu puas tau tias yog kev coj zoo tiag tiag? Puas tsim nyog txhawb qhov ntawd? (Tsis tsim nyog.) Qhov no puas suav ua txoj kev ua neej uas tsim nyog tiag tiag? Qhov no puas suav tias muaj txoj kev ua neej? (Tsis suav.) Qhov coj cov cwj pwm zoo li no tsis txhawb nqa tib neeg mus rau qib uas muaj txoj kev ua neej li. Yog koj hais tias tib neeg muaj txoj kev ua neej, ces qhov ntawd txhais hais tias qhov kev xam pom thiab tus qauv uas lawv pom teeb meem ntawd mas yog qhov zoo thiab ua hauj lwm, tias yog lawv tej kev thiab tej tswv yim daws teeb meem. Dab tsi yog lub cim ntawm qhov zoo thiab qhov kev ua hauj lwm? Tus tib neeg ntawd yuav muaj lub siab uas txawj xav thiab lub siab uas paub txaj muag. Lwm lub cim ntawm qhov zoo thiab qhov kev ua hauj lwm ntawd yog lub siab uas paub txoj kev ncaj ncees. Tej zaum tus tib neeg no muaj qee tus cwj pwm tsis zoo xws li mus pw lig lig thiab sawv lig lig, ua tus neeg xaiv zaub xaiv mov noj, los sis nyiam cov zaub mov uas tsw qab heev, tiam sis dhau ntawm cov cwj pwm tsis zoo no lawm, lawv yuav muaj qee yam zoo. Lawv yuav muaj tej hauv paus ntsiab lus thiab qhov ua tau txij li cas thaum hais txog lawv txoj kev coj kom zoo thiab tej kev ua ntawd; lawv yuav muaj lub siab uas paub txaj muag thiab lub siab uas paub txoj kev ncaj ncees; thiab lawv yuav muaj qhov zoo ntau hos qhov tsis zoo tsawg tsawg xwb. Yog lawv tuaj yeem lees txais qhov tseeb thiab xyaum ua qhov tseeb, mas qhov ntawd yuav haj yam zoo thiab qhov ntawd yuav yooj yim rau lawv los pib txoj kev caum qhov tseeb. Tiam sis, yog tib neeg nyiam kev phem; nrhiav lub koob lub npe, txiaj ntsim, thiab lub meej mom; nyiam nyiaj txiag; nyiam ua ib lub neej zoo zoo; thiab nyiam nkim lawv lub sij hawm mus nrhiav kev txaus siab xwb, ces qhov kev xam pom uas lawv pom tib neeg thiab txhua yam, thiab lawv txoj kev xav txog lub neej thiab txoj kev coj ua uas muaj nuj nqis ntawd yuav puav leej yog qhov tsis zoo thiab tsaus ntuj nti, thiab lawv yuav tsis muaj lub siab uas paub txaj muag thiab lub siab uas paub txoj kev ncaj ncees li. Hom tib neeg no yuav tsis muaj txoj kev ua neej, thiab qhov lawv yuav los lees txais qhov tseeb los sis kom tau txais Vajtswv txoj kev cawm dim ntawd mas yuav tsis yooj yim. Qhov no yog ib lub hauv paus ntsiab lus uas yooj yooj yim rau txoj kev ntsuas tib neeg. Txoj kev ntsuas tib neeg txoj kev coj zoo ntawd tsis yog ib tug qauv uas los ntsuas seb lawv puas muaj txoj kev ua neej. Yuav kom ntsuas tau tias tib neeg zoo los phem mas, koj yuav tsum txiav txim rau lawv raws li lawv txoj kev ua neej, tsis yog lawv txoj kev coj zoo. Txoj kev coj zoo tsuas yog ntiav ntiav xwb, thiab txoj kev coj zoo ntawd yog coj raws li tib neeg tus yam ntxwv, keeb kwm, thiab cheeb tsam ntawd xwb. Qee qhov kev coj thiab tej kev qhia kom pom tseeb ntawd mas hloov pauv tas li, yog li ntawd qhov txiav txim rau qhov zoo ntawm tib neeg txoj kev ua neej ntawd yog txiav txim raws li lawv txoj kev coj zoo nkaus xwb mas nyuaj. Piv txwv li, tej zaum tib neeg hwm tej kev ua zoo ntawm sawv daws heev, thiab ua raws li tej kev cai nyob rau txhua qhov chaw uas lawv mus. Tej zaum lawv yuav tswj txhua yam uas lawv ua, ua raws li tsoom fwv tej kev cai, thiab tsis ua rau muaj kev kub ntxhov rau pej xeem los sis ua txhaum rau lwm tus tib neeg tej kev ntshaw. Tej zaum lawv kuj hwm thiab pab, thiab saib xyuas cov hluas thiab cov laus thiab. Qhov tseeb uas tus tib neeg no muaj ntau qhov zoo heev ntawd puas txhais hais tias tus tib neeg no ua neej li txoj kev ua neej thiab tias tus tib neeg no yog ib tug tib neeg zoo? (Tsis txhais li ntawd.) Tej zaum tib neeg yuav xyaum ua qhov “Tsis txhob muab cov nyiaj uas koj khaws ntsaws hnab tshos” ntawd zoo heev, tej zaum lawv yuav ua raws li txoj kev ua zoo uas tib neeg ntiaj teb txhawb nqa thiab cav no, tiam sis lawv txoj kev ua neej zoo li cas? Qhov tseeb uas lawv xyaum tsis muab cov nyiaj uas lawv khaws ntsaws hnab tshos ntawd tsis hais ib yam dab tsi txog lawv txoj kev ua neej li—txoj kev coj zoo no siv tsis tau los ntsuas seb lawv txoj kev ua neej zoo los phem. Tam sim no yuav tsum ntsuas lawv txoj kev ua neej li cas? Nej yuav tsum muab lawv tshem tawm ntawm qhov kev zoo nkauj ntawm txoj kev coj zoo no, thiab muab cov cwj pwm thiab txoj kev coj zoo uas tib neeg pom hais tias zoo, uas yog qhov tsawg tshaj plaws uas txhua tus tib neeg uas muaj txoj kev ua neej puav leej muaj peev xwm ua tau ntawd tshem tawm mus. Tom qab ntawd, saib tej uas lawv ua rau pom tseeb uas tseem ceeb tshaj plaws, xws li tej hauv paus ntsiab lus ntawm lawv txoj kev coj kom zoo, thiab cov kab uas lawv yuav tsis hla nyob rau hauv lawv txoj kev coj kom zoo, nrog rau tus cwj pwm uas lawv coj rau qhov tseeb thiab Vajtswv ntawd. Qhov no xwb thiaj li yog tib txoj kev uas pom lawv txoj kev ua neej lub ntsiab tseeb, thiab lawv tus yam ntxwv sab hauv. Saib tib neeg li no mas thiaj li yog thiab raug. Qhov peb tham txog txoj kev ua zoo uas hais tias: “Tsis txhob muab cov nyiaj uas koj khaws ntsaws hnab tshos” ntawd ces tag li no lawm xwb. Nej sawv daws puav to taub qhov kev qhia no? (To taub.) Kuv pheej txhawj tsam nej tsis to taub qhov Kuv tau hais lawm tiag tiag, tsam nej tsuas nkag siab txoj kev qhuab qhia txog qhov ntawd me ntsis xwb, tiam sis tseem tsis to taub feem uas ntsig txog qhov ntawd lub ntsiab tseeb. Yog li ntawd, yam uas Kuv ua tau ces yog hais kom ntxaws me ntsis ntxiv txog lub tswv yim ntawd. Kuv tsuas kaj siab thaum Kuv paub hais tias nej to taub lawm xwb. Kuv yuav qhia tau li cas tias nej to taub lawm? Thaum Kuv pom qhov kev xyiv fab ntawm nej lub ntsej mug, tej zaum nej to taub qhov Kuv hais lawm. Yog Kuv ua tau rau nej to taub, ces qhov hais txog lub ncauj lus no me ntsis ntxiv ntawd yeej tsim nyog lawm.

Kuv twb tau qhia Kuv cov lus qhuab qhia txog qhov “Tsis txhob muab cov nyiaj uas koj khaws ntsaws hnab tshos” ntawd tag tsis ntau los tsawg lawm. Txawm Kuv tsis tau qhia nej ncaj qha tias qhov kev ua zoo no cov nyom rau qhov tseeb li cas, los sis vim li cas thiaj li txhawb nqa tsis tau qhov kev ua zoo no kom mus txog qib li qhov tseeb, los sis yam uas Vajtswv tim tsum ntawm tib neeg tus cwj pwm thiab txoj kev coj zoo ntawd yog dab tsi los xij, Kuv tsis tau hais txog tag nrho tej no lod? (Koj hais lawm.) Vajtswv lub tsev puas txhawb nqa tej kev ua zoo xws li qhov “Tsis txhob muab cov nyiaj uas koj khaws ntsaws hnab tshos” no? (Tsis txhawb nqa.) Yog li ntawd, Vajtswv lub tsev xav li cas rau qhov hais li no? Nej hais raws li qhov nej to taub los tau. (Qhov “Tsis txhob muab cov nyiaj uas koj khaws ntsaws hnab tshos” ntawd tsuas yog ib qho uas txhua tus uas muaj txoj kev ua neej tsim nyog ua raws thiab ua xwb, yog li ntawd tsis tas yuav txhawb nqa qhov ntawd. Thiab qhov, “Tsis txhob muab cov nyiaj uas koj khaws ntsaws hnab tshos” ntawd tsuas yog ib qho kev qhia kom pom tseeb txog tib neeg txoj kev ua zoo xwb, qhov ntawd tsis cuam tshuam rau tej hauv paus ntsiab lus ntawm tib neeg txoj kev coj kom zoo, tsis cuam tshuam rau tej kev xav uas lawv muaj txog lawv tej kev caum, tsis cuam tshuam rau tej kev uas lawv taug, los sis tsis cuam tshuam rau qhov zoo ntawm lawv txoj kev ua neej li.) Txoj kev coj zoo puas yog ib lub cim ntawm txoj kev ua neej? (Tsis yog ib lub cim ntawm txoj kev ua neej. Qee yam ntawm txoj kev coj zoo ntawd tsuas yog tej uas cov tib neeg uas muaj txoj kev ua neej tsim nyog muaj xwb.) Thaum Vajtswv lub tsev tham txog txoj kev ua neej thiab cov tib neeg uas muaj kev thoob tsib to nrog, mas Vajtswv lub tsev tham txog lub ntsiab tseem ceeb ntawm txoj kev caum qhov tseeb xwb. Muab hais dav dav hais tias, Vajtswv lub tsev yuav tsis ntsuas seb tib neeg txoj kev coj zoo zoo li cas—yam tsawg kawg, Vajtswv lub tsev yuav tsis ntsuas seb tib neeg puas muaj peev xwm ua raws li qhov hais tias: “Tsis txhob muab cov nyiaj uas koj khaws ntsaws hnab tshos” ntawd. Vajtswv lub tsev yuav tsis saib qhov no kom meej. Tiam sis, Vajtswv lub tsev yuav saib qhov zoo ntawm tus tib neeg ntawd txoj kev ua neej kom meej, seb tus tib neeg ntawd puas nyiam yam zoo thiab qhov tseeb, thiab seb hom cwj pwm twg uas tus tib neeg ntawd coj rau qhov tseeb thiab Vajtswv. Tej zaum tib neeg yuav tsis muab cov nyiaj uas lawv khaws ntsaws hnab tshos thaum lawv nyob rau hauv qhov chaw sib sau ua ke ntawm lub ntiaj teb, tiam sis yog lawv tsis tiv thaiv tej kev ntshaw ntawm Vajtswv lub tsev kiag li tom qab los ua ib tug ntseeg lawm—yog lawv muaj peev xwm nyiag, siv nyiaj txiag xuam lug, los sis haj tseem muab tej khoom fij muag tawm thaum muab lub hwv tsam rau lawv saib xyuas tej khoom fij ntawd thiab—yog lawv muaj peev xwm ua tag nrho txhua yam tsis zoo no no, lawv yog leej twg? (Tus neeg phem.) Lawv yeej tsis sawv los tiv thaiv tej kev ntshaw ntawm Vajtswv lub tsev thaum muaj teeb meem li. Tsis muaj cov tib neeg zoo li no lod? (Muaj.) Yog li ntawd, qhov siv qhov hais tias, “Tsis txhob muab cov nyiaj uas koj khaws ntsaws hnab tshos” coj los ntsuas lawv txoj kev ua neej ntawd puas tsim nyog? Qhov ntawd yuav tsis tsim nyog. Ib txhia tib neeg hais tias: “Lawv txeev yog ib tug tib neeg zoo. Lawv muaj tus cwj pwm ua zoo uas tsim nyog thiab txhua tus puav leej nyiam lawv. Yog li ntawd vim li cas lawv thiaj hloov tom qab los rau hauv Vajtswv lub tsev lawm?” Lawv puas hloov tiag tiag? Qhov tseeb yog, lawv tsis hloov. Lawv muaj txoj kev coj zoo thiab tus cwj pwm zoo me ntsis xwb, tiam sis dhau qhov ntawd lawm, qhov no yeej ib txwm yog lawv txoj kev ua neej lub ntsiab tseeb—uas yeej tsis tau hloov kiag li. Txawm lawv mus qhov twg los xij, lawv ib txwm coj lawv tus kheej zoo li no. Tsuas yog hais tias yav dhau los tib neeg siv tus qauv ntawm txoj kev coj zoo los ntsuas lawv xwb, tsis yog siv qhov tseeb los txiav txim rau lawv txoj kev ua neej. Tib neeg xav hais tias lawv twb hloov qee yam lawm, tiam sis qhov tseeb tiag, lawv tsis tau hloov li. Ib txhia hais tias, “Yav dhau los lawv tsis zoo li ntawd.” Yav dhau los lawv tsis zoo li ntawd vim yav dhau los lawv tsis raug cov xwm txheej no thiab lawv tus kheej tsis tau nyob rau hauv qhov xwm txheej zoo li no dua li. Tsis tas li ntawd xwb, tib neeg tsis to taub qhov tseeb, thiab tsis thoob tsib to nrog txog lawv. Qhov tshwm sim thaum kawg ntawm qhov tib neeg saib thiab txiav txim rau lwm tus raws li lawv tus cwj pwm zoo xwb es tsis yog saib thiab txiav txim raws li lawv txoj kev ua neej lub ntsiab tseeb ntawd yog dab tsi? Tsis yog hais tias tib neeg yuav tsis muaj peev xwm pom lwm tus kom tseeb tseeb xwb, lawv kuj yuav raug lwm tus txoj kev coj zoo sab nraud ua rau dig muag thiab raug dag thiab. Thaum tib neeg tsis tuaj yeem pom lwm tus kom tseeb tseeb lawm, ces lawv yuav ntseeg, txhawb nqa, thiab tsa tau cov tib neeg yuam kev ua hauj lwm, thiab lawv yuav raug lwm tus tib neeg dag ntxias. Ib txhia thawj coj thiab cov neeg ua hauj lwm pheej ua yuam kev li no thaum xaiv tib neeg thiab tsa tib neeg ua hauj lwm. Lawv raug cov tib neeg uas muaj qee tus cwj pwm zoo thiab txoj kev coj zoo sab nraud ua rau dig muag, yog li ntawd lawv thiaj li kom cov tib neeg ntawd ua txoj hauj lwm tseem ceeb los sis khaws qee yam khoom tseem ceeb. Yog li ntawd, thaum muaj qee yam yuam kev, thiaj li ua rau Vajtswv lub tsev poob qee yam. Vim li cas thiaj li muaj qee yam yuam kev? Yuam kev vim cov thawj coj thiab cov neeg ua hauj lwm tsis tuaj yeem pom tias cov tib neeg no tus yam ntxwv lub ntsiab tseeb zoo li cas. Vim li cas lawv thiaj li tsis pom tias cov tib neeg no tus yam ntxwv lub ntsiab tseeb zoo li cas? Vim cov thawj coj thiab cov neeg ua hauj lwm no tsis to taub qhov tseeb, thiab lawv tsis muaj peev xwm ntsuas tau tib neeg thiab cais tau tib neeg. Lawv tsis tuaj yeem pom tias tib neeg tus yam ntxwv lub ntsiab tseeb zoo li cas, thiab lawv tsis paub tias tib neeg coj tus cwj pwm zoo li cas rau Vajtswv, rau qhov tseeb, thiab rau tej kev ntshaw ntawm Vajtswv lub tsev. Vim li cas zoo li ntawd? Vim cov thawj coj thiab cov neeg ua hauj lwm no saib tib neeg thiab txhua yam los ntawm qhov kev xam pom uas yuam kev lawm. Lawv tsuas saib tib neeg raws li noob neej tej kev xav phem thiab tej kev xav hauv nruab siab xwb, lawv tsis saib tib neeg lub ntsiab tseeb raws li Vajtswv cov lus thiab qhov tseeb tej hauv paus ntsiab—tiam sis, lawv saib tib neeg raws li tib neeg txoj kev coj zoo thiab cov cwj pwm sab nraud thiab tej uas ua rau pom tseeb ntawd. Nws yog vim qhov lawv saib tib neeg ntawd tsis muaj tej hauv paus ntsiab lus es thiaj li ua rau lawv ntseeg cov tib neeg yuam kev, tsa cov tib neeg yuam kev ua hauj lwm, thiab lawv thiaj li raug cov tib neeg ntawd ua rau dig muag, dag, thiab siv, es thaum kawg tej kev ntshaw ntawm Vajtswv lub tsev thiaj li raug puas tsuaj. Tej no yog tej uas tshwm sim los ntawm qhov tsis paub tib neeg los sis tsis pom tias lawv zoo li cas. Yog li ntawd, thaum ib tug tib neeg twg xav caum qhov tseeb, mas thawj qhov uas tus tib neeg ntawd yuav tsum tau kawm yog yuav cais tib neeg thiab saib tib neeg li cas—qhov no siv sij hawm ntev los kawm, thiab qhov no yog tej kev qhia tseem ceeb uas tib neeg yuav tsum tau kawm. Yog koj xav pom ib tug tib neeg kom tseeb thiab xyaum txheeb xyuas tus tib neeg ntawd, mas koj yuav tsum xub to taub tias cov qauv uas Vajtswv siv los ntsuas tib neeg ntawd yog dab tsi, tej kev xav thiab tej kev xam pom tsis yog uas tswj thiab kav txoj kev uas tib neeg saib thiab ntsuas lwm tus ntawd yog dab tsi, thiab seb tej ntawd puas cov nyom rau cov qauv uas Vajtswv siv los ntsuas tib neeg, thiab seb tej ntawd cov nyom li cas. Tej tswv yim thiab tus qauv uas koj ntsuas tib neeg ntawd puas yog ntsuas raws li Vajtswv tej kev tim tsum? Tej ntawd puas yog raws li Vajtswv cov lus? Tej ntawd puas muaj qhov tseeb txhawb? Yog tsis muaj, es koj vam khom rau koj tej kev ntsib kev pom thiab tej kev xav hauv nruab siab los ntsuas lwm tus nkaus xwb, los sis yog koj haj tseem ntsuas raws li tej kev ua zoo ntawm sawv daws uas sawv daws txhawb nqa, los sis ntsuas raws li qhov koj tus kheej ob lub qhov muag pom ntawd thiab, ces tus tib neeg uas koj tab tom sim cais ntawd koj yuav tsis paub tseeb. Koj yuav tsis muaj peev xwm pom tias lawv zoo li cas. Yog koj tso siab rau lawv thiab muab dej num rau lawv ua, koj yuav nyob rau qib uas phom sij heev, thiab zam tsis dhau, qhov no yuav tuaj yeem ua rau muaj kev puas tsuaj rau tej khoom fij rau Vajtswv, rau pawg ntseeg tes hauj lwm, thiab rau cov neeg Vajtswv xaiv txoj kev to taub lub neej txoj sia. Kev thoob tsib to nrog txog tib neeg yog thawj qhov kev qhia uas koj yuav tsum tau kawm yog koj xav caum qhov tseeb. Qhov kev thoob tsib to nrog txog tib neeg ntawd kuj yog ib qho ntawm cov tseem ceeb tshaj plaws ntawm qhov tseeb uas tib neeg yuav tsum muaj. Qhov kev kawm kom thoob tsib to nrog txog tib neeg ntawd mas yeej cais tsis tau tawm ntawm qhov kev qhia hnub no li. Koj yuav tsum muaj peev xwm cais tib neeg txoj kev coj zoo thiab qhov zoo, thiab tej uas tus tib neeg uas muaj txoj kev ua neej ntawd tsim nyog muaj. Qhov muaj peev xwm cais tau ob yam no mas tseem ceeb heev. Tsuas yog thaum ntawd xwb koj thiaj li yuav paub thiab pom tus tib neeg ntawd lub ntsiab tseeb tau yog heev, thiab thaum kawg txiav txim siab tau tias leej twg muaj txoj kev ua neej thiab leej twg tsis muaj. Tib neeg yuav tsum xub npaj kom muaj dab tsi es thiaj li yuav thoob tsib to nrog txog tej no? Tib neeg yuav tsum to taub Vajtswv cov lus, nrog rau kis no ntawm qhov tseeb, thiab mus txog rau qhov uas lawv saib tib neeg raws li Vajtswv cov lus, uas muab qhov tseeb ua lawv tus qauv. Qhov no tsis yog qhov tseeb lub hauv paus ntsiab lus uas tib neeg yuav tsum xyaum ua thiab muaj thaum caum qhov tseeb lod? (Yog.) Yog li ntawd, qhov no yog ib qho tseem ceeb uas peb yuav tsum tau kawm txog cov ncauj lus no.

Kuv nyuam qhuav qhia txog qhov hais thib ib uas hais tias, “Tsis txhob muab cov nyiaj uas koj khaws ntsaws hnab tshos,” uas yog ib hom kev coj zoo ntawm tib neeg xwb. Qhov ntawd yog ib hom cwj pwm ua zoo thiab tus cwj pwm nyob ib ntus uas ua rau tib neeg nyiam xwb, tiam sis, qhov ntawd ua tsis tau ib tug qauv ntsuas seb tib neeg puas muaj txoj kev ua neej los tsis muaj. Qhov hais thib ob uas hais tias, “Zoo siab thaum pab lwm tus” ntawd, los ib yam nkaus. Raws li cov ntsiab lus ntawm nqe lus ntawd, mas pom tau meej hais tias qhov no yog ib yam uas tib neeg nyiam thiab suav tias yog ib tug cwj pwm zoo xwb. Cov uas coj tus cwj pwm zoo no mas luag hwm hais tias yog cov tib neeg uas muaj txoj kev coj zoo thiab tus cwj pwm uas tsim nyog—muab xaus lus hais tias, luag suav hais tias lawv yog cov tib neeg uas zoo siab thaum pab lwm tus thiab muaj tus cwj pwm ua zoo uas zoo heev. Qhov “Zoo siab thaum pab lwm tus” ntawd muaj qee qhov zoo ib yam li qhov “Tsis txhob muab cov nyiaj uas koj khaws ntsaws hnab tshos.” Qhov ntawd kuj yog ib tug cwj pwm zoo uas tib neeg muaj nyob rau hauv qee cheeb tsam thiab. Lub ntsiab lus ncaj ncaj ntawm qhov “Zoo siab thaum pab lwm tus” ntawd ces yog nrhiav kev zoo siab los ntawm qhov pab lwm tus tib neeg xwb. Nws tsis txhais hais tias qhov pab tib neeg ntawd yog yus tes dej num—cov lus ntawd tsis yog hais tias “Qhov pab lwm tus ntawd yog koj lub luag hauj lwm”—qhov lus ntawd hais tias “Zoo siab thaum pab lwm tus” xwb. Los ntawm qhov no, peb pom tau hais tias dab tsi ua rau tib neeg muaj siab pab lwm tus. Lawv tsis yog pab lwm tus tib neeg, tiam sis yog lawv pab lawv tus kheej xwb. Tib neeg muaj kev txhawj xeeb thiab kev mob siab puv npo xwb, yog li ntawd lawv thiaj li nrhiav lwm tus uas xav tau kev pab thiab pab lwm tus los ntawm lub siab dawb paug thiab kev pab cuam; lawv cev tes mus pab, thiab ua yam zoo uas lawv muaj peev xwm ua tau kom ua rau lawv tus kheej zoo siab, txaus siab, kaj siab, thiab xyiv fab, thiab kom lawv lub sij hawm muaj nuj nqis, kom lawv thiaj li tsis mloog zoo li tsis muaj dab tsi thiab tsis ntxhov siab—lawv txhim kho lawv txoj kev coj zoo kom thiaj li tau raws li lawv lub hom phiaj uas ntxuav lawv lub siab lub ntsws kom dawb huv thiab txhawb lawv lub siab lub ntsws. Hom cwj pwm no yog cwj pwm dab tsi? Yog koj saib cov tib neeg uas zoo siab thaum pab lwm tus raws li qhov kev piav qhia no, mas lawv tsis yog cov tib neeg zoo. Yam tsawg kawg, lawv tsis yog muaj siab ua los ntawm lawv txoj kev ua zoo, lub siab uas txawj xav, los sis txoj kev ua neej uas los ua yam lawv tsim nyog ua, los sis los ua kom tiav lawv tej luag hauj lwm hauv zej zog thiab tsev neeg; tiam sis, lawv pab tib neeg kom tau txais kev zoo siab, kev nplig siab ntawm sab ntsujplig, kev nplig siab, thiab kom tau nyob yam kaj siab lug xwb. Dab tsi ua rau muaj hom kev coj zoo no? Yog nej saib tus yam ntxwv ntawm hom kev coj zoo ntawd mas, hom kev coj zoo ntawd haj tseem phem tshaj qhov “Tsis txhob muab cov nyiaj uas koj khaws ntsaws hnab tshos” lawm thiab. Yam tsawg kawg qhov “Tsis txhob muab cov nyiaj uas koj khaws ntsaws hnab tshos” ntawd tsis muaj qhov twm xeeb. Yog li qhov: “Zoo siab thaum pab lwm tus” ne? Lo lus “zoo siab” ntawd txhais hais tias tus cwj pwm no muaj qhov twm xeeb thiab tej kev npaj siab. Qhov ntawd tsis yog kev pab tib neeg los sis tsis yog ib qho kev pab uas tsis xav txog yus tus kheej, qhov ntawd yog pab kom yus tus kheej zoo siab xwb. Qhov no tsis tsim nyog txhawb nqa li. Piv txwv li, muab hais tias koj pom ib tug tib neeg laus ntog ntawm ib txoj kev loj es koj xav hauv koj tus kheej hais tias: “Ntu no kuv ntxhov siab tas li xwb. Tus tib neeg laus uas ntog no yog ib lub cib fim zoo heev—kuv yuav zoo siab thaum pab lwm tus!” Ces koj txawm mus pab tsa tus tib neeg laus ntawd sawv, ces thaum nws sawv tau lawm, nws qhuas koj hais tias: “Me tub, koj yog ib tug tib neeg zoo tiag tiag li. Thov kom koj muaj kev nyab xeeb thiab zoo siab thiab nyob mus kom laus nkoos nawb!” Nws foom cov lus zoo no rau koj, ces tom qab koj hnov cov lus zoo no, koj tej kev txhawj xeeb ploj tag thiab koj zoo siab lawm. Koj xav hais tias qhov pab tib neeg ntawd mas zoo, yog li ntawd koj thiaj li txiav txim siab mus taug kev thaum koj nyob dawb xwb thiab pab txhua tus uas ntog. Tib neeg coj qee tus cwj pwm zoo vim txoj kev xav zoo li no xwb, thiab tib neeg lub zej zog tau suav qhov zoo siab thaum pab lwm tus no ua txoj kab lis kev cai uas zoo, thiab ua ib tug cwj pwm ua zoo uas tsim nyog uas hla dhau txoj kab lis kev cai loj no lawm. Lub ntsiab lus uas txhawb txog qhov zoo siab thaum pab lwm tus ntawd mas yog qhov hais tias cov uas pab ntawd feem ntau suav hais tias lawv tus kheej mus txog qhov siab tshaj plaws ntawm txoj kev ua zoo lawm. Lawv suav tias lawv tus kheej yog cov neeg siab dawb siab zoo tshaj plaws, thiab tib neeg yim qhuas lawv, mas lawv yim txaus siab hlo pab, pub dawb, thiab pab lwm tus ntau ntxiv xwb. Qhov no tau raws li lawv txoj kev ntshaw los ua ib tug neeg uas tshaj lij tshaj plaws thiab tus cawm seej ntawm txoj kev ua neej, nrog rau lawv txoj kev ntshaw kom muaj kev txaus siab los ntawm qhov lwm tus tim tsum lawv lawm. Tsis yog tib neeg txhua tus puav leej xav kom luag tim tsum yus lod? Thaum tib neeg mloog zoo li lwm tus tim tsum lawv, mas lawv xav hais tias lawv muaj nuj nqis thiab tias lawv lub neej muaj qab hau heev. Qhov no tsis yog ib qho kev ua kom lwm tus quav ntsej yus xwb lod? Qhov ua kom lwm tus quav ntsej yus ntawd thiaj li yog qhov uas ua rau tib neeg muaj kev zoo siab xwb—qhov ntawd yog lawv txoj kev ua neej. Tseeb tiag, txawm peb yuav saib qhov zoo siab thaum pab lwm tus ntawd los ntawm seem twg los xij li, qhov ntawd tsis yog ib tug qauv ntsuas tib neeg tej kev ua zoo. Feem ntau, qhov zoo siab thaum pab lwm tus ntawd tsuas siv dag zog me me xwb. Yog koj txaus siab hlo ua, ces koj yeej yuav ua tau koj lub luag hauj lwm ntawm zej zog ntawd tiav xwb; hos yog koj tsis kam ua, los yeej tsis muaj leej twg yuav kom koj ris, thiab tib neeg sawv daws yuav tsis teem txim rau koj. Thaum hais txog cov cwj pwm zoo uas tib neeg qhuas ntawd, mas koj coj raws cov cwj pwm zoo ntawd los tau, los sis tsis coj los tau, coj thiab tsis coj los tsis ua li cas. Tsis tas yuav muab cov lus no los txwv tib neeg, los sis kom lawv xyaum seb yuav ua li cas es thiaj li muaj kev zoo siab thaum pab lwm tus li, vim qhov no tsuas yog ib tug cwj pwm zoo uas nyob ib ntus xwb. Txawm xyov puas yog vim txoj kev ntshaw ua kom tiav lawv lub luag hauj lwm ntawm zej zog es thiaj li ua rau tib neeg muaj siab ua los sis yog lawv coj tus cwj pwm zoo no los ntawm lub siab uas paub txog kev tsim txiaj los xij, qhov tshwm sim thaum kawg yuav zoo li cas? Lawv tsuas yog ua kom tau raws li lawv txoj kev ntshaw ua ib tug tib neeg zoo thiab ua kom tau li Lais Feej qhov piv txwv xwb; lawv yuav muaj qee qhov kev zoo siab thiab kev nplij siab los ntawm qhov ua li no, thiab qhov ua li ntawd txhawb tau lawv txoj kev xav mus rau ib qib uas siab dua. Tag li ntawd lawm. Qhov no yog lub ntsiab tseeb ntawm qhov lawv ua. Yog li ntawd, nej to taub li cas txog qhov hais tias “Zoo siab thaum pab lwm tus” ntawd ua ntej cov lus qhia no? (Kuv tsis paub txog qhov kev twm xeeb thiab tej kev npaj siab ntxim ntxub uas muaj nyob tom qab qhov ntawd dua li.) Muab xav hais tias koj muaj ib teg dej num los ua qee yam, ib lub luag hauj lwm uas koj yuav tsum tsis txhob muab tso tseg, qee yam nyuaj, thiab koj yuav tsum nyiaj kev txom nyem me ntsis, tso qee yam tseg, thiab tiv kev txom nyem kom thiaj li ua tau qhov ntawd tiav, tiam sis koj yeej muaj peev xwm ua tau lub luag hauj lwm no tiav xwb. Koj yuav tsis zoo siab heev thaum koj ua qhov ntawd, thiab tom qab tiv kev txom nyem thiab ua lub luag hauj lwm no tiav lawm, tej txiaj ntsim ntawm koj lub zog ntawd yuav tsis ua rau koj muaj kev zoo siab los sis nplij tau koj lub siab li, vim qhov ntawd yog koj lub luag hauj lwm thiab tes dej num uas koj yeej yuav tau ua xwb. Yog peb muab qhov no piv rau qhov zoo siab thaum pab lwm tus ntawd, qhov twg qhia txog txoj kev ua neej dua? (Cov tib neeg uas ua lawv tej luag hauj lwm thiab tej dej num tiav muaj kev ua neej dua.) Qhov zoo siab thaum pab lwm tus ntawd tsis yog qhov ua lub luag hauj lwm kom tiav—qhov ntawd tsuas yog ib qho kev cheem tsum txog tib neeg txoj kev coj zoo thiab tej luag hauj lwm ntawm zej zog uas muaj nyob rau hauv qee cheem tsam ntawm zej zog xwb; qhov ntawd los ntawm cov tib neeg feem coob, tej kev ua zoo ntawm zej zog, los sis los ntawm tej kev cai ntawm lub teb chaws los xwb, yog li ntawd thiaj li siv qhov ntawd coj los ntsuas seb tib neeg puas muaj tej kev ua zoo thiab qhov zoo ntawm lawv txoj kev ua neej. Lwm lo lus mas hais tias qhov, “Zoo siab thaum pab lwm tus” ntawd tsuas yog ib lo lus uas txwv tib neeg tus cwj pwm, uas tib neeg zej zog tau muab hais tawm kom txhawb tau tib neeg txoj kev xav xwb. Cov lus no tsuas yog siv los ua kom tib neeg xyaum coj ob peb tug cwj pwm zoo xwb, hos cov qauv uas ntsuas cov cwj pwm zoo ntawd mas yog tib neeg tej kev ua zoo, tib neeg feem coob txoj kev xav, los sis txoj cai. Piv txwv li, yog koj pom ib tug neeg uas tim tsum kev pab nyob rau ntawm tshav puam es koj yog thawj tug tib neeg uas yuav tsum tau mus pab, tiam sis koj tsis mus no, lwm tus yuav xav li cas rau koj? Lawv yuav cem koj rau qhov koj tsis paub tab—qhov ntawd tsis yog qhov peb hais tias ntsuas los ntawm tib neeg feem coob txoj kev xav lod? (Yog.) Yog li tib neeg tej kev ua zoo yog dab tsi? Tej kev ua zoo ntawd yog tej uas zoo thiab tej uas yuav ntsib nyob rau tom ntej thiab tej cwj pwm uas zej zog txhawb nqa thiab txhawb. Raws li ib txwm lawm, tej kev ua zoo ntawd muaj ntau qhov kev cheem tsum ncaj ncaj, piv txwv li: txhawb cov tib neeg tsis muaj zog, cev tes pab thaum lwm tus ntsib kev txom nyem, thiab tsis txhob sawv ntsia xwb es tsis ua dab tsi. Tib neeg tsim nyog xyaum ua hom kev coj zoo no, qhov ntawd yog qhov txhais hais tias muaj tib neeg tej kev ua zoo. Yog koj pom ib tug tib neeg twg raug kev txom nyem es koj ua ntsej lag muag dig tsis pom qhov ntawd, tsis quav ntsej tus tib neeg ntawd, thiab tsis ua dab tsi li, ces koj tsis muaj tib neeg tej kev ua zoo. Yog li ntawd, txoj cai tim tsum dab tsi txog tib neeg txoj kev coj zoo? Lub Teb Chaws Suav yog ib qho uas tshwj xeeb txog qhov no: Suav txoj cai tsis muaj ib qho qhia cais kom meej txog tej luag hauj lwm ntawm zej zog thiab tib neeg tej kev ua zoo li. Tib neeg tsuas kawm me ntsis txog tej no los ntawm qhov lawv tsev neeg tu lawv loj hlob, los ntawm kev kawm ntawv, thiab qhov lawv hnov thiab pom los ntawm zej zog xwb. Tiam sis, nyob rau cov teb chaws Sab Hnub Poob mas tej no muaj nyob rau hauv txoj cai. Piv txwv li, yog koj pom ib tug tib neeg ntog ntawm kev, mas yam tsawg kawg koj yuav tsum mus tsa nws sawv thiab nug hais tias, “Koj puas ua cas? Koj puas tim tsum kev pab?” Yog tus tib neeg ntawd teb hais tias, “Kuv tsis ua cas, ua tsaug,” ces koj mam li tsis pab nws, tsis cheem tsum kom koj ua lub luag hauj lwm ntawd kom tiav. Yog tus tib neeg ntawd hais tias, “Kuv tim tsum kev pab, thov pab kuv,” ces koj yuav tsum tau pab tus tib neeg ntawd. Yog koj tsis pab tus tib neeg ntawd, koj yuav raug txim. Qhov no yog ib qho kev cheem tsum tshwj xeeb uas qee lub teb chaw hais tawm kom ua txog tib neeg txoj kev coj zoo; lawv tim tsum kom tib neeg ua qhov no los ntawm qhov muab qhia cais kom meej rau hauv lawv cov kev cai. Tej kev tim tsum uas tib neeg feem coob txoj kev xav, tib neeg tej kev ua zoo, thiab txoj cai tau tim tsum txog tib neeg txoj kev coj zoo no tsuas yog hais txog tib neeg tus cwj pwm xwb, thiab cov qauv coj tus cwj pwm uas yooj yooj yim no yog cov qauv uas ntsuas tib neeg txoj kev coj zoo ntag. Nyob rau saum daim tawv mas, cov qauv ua zoo no zoo li yog ntsuas tib neeg tus cwj pwm xwb—lwm lo lus mas hais tias, seb tib neeg ua puas tau lawv tej luag hauj lwm ntawm zej zog tiav los tsis tau—tiam sis nyob tau ntawm cov qauv ua zoo no lub ntsiab tseeb mas, cov qauv ua zoo no ntsuas tib neeg qhov zoo sab hauv xwb. Tsis hais tib neeg feem coob txoj kev xav, tib neeg tej kev ua zoo, los sis txoj cai li, tej no tsuas yog ntsuas los sis tim tsum txog tej uas tib neeg ua, thiab tej kev ntsuas thiab tej kev tim tsum no yog txwv tib neeg tus cwj pwm xwb. Tej kev ntsuas thiab tej kev tim tsum no txiav txim rau tib neeg qhov zoo thiab txoj kev coj zoo raws li tus tib neeg ntawd tus cwj pwm—qhov ntawd yog tus ciam ntawm tej ntawd txoj kev ntsuas. Nov yog tus yam ntxwv ntawm nqe lus uas hais tias: “Zoo siab thaum pab lwm tus.” Thaum hais txog qhov zoo siab thaum pab lwm tus ntawd mas, cov teb chaws Sab Hnub Poob tim tsum txog tib neeg los ntawm tej kev cais kom meej ntawm txoj cai, hos nyob rau hauv Lub Teb Chaws Suav mas, yog siv txoj kab lis kev cai qub los cob qhia tib neeg txog tej tswv yim no xwb. Txawm muaj qhov sib txawv no nyob rau ntawm Sab Hnub Tuaj thiab Sab Hnub Poob los xij, ob sab no yog ib tug yam ntxwv xwb—ob sab no puav leej siv lus los txwv thiab tswj tib neeg tus cwj pwm thiab kev ua zoo xwb. Txawm li cas los xij, tsis hais tej kev cai ntawm cov teb chaws Sab Hnub Poob los sis txoj kab lis kev cai qub uas nyob rau Sab Hnub Tuaj li, tej no puav leej yog tej kev tim tsum thiab tej kev cai tswj uas hais txog tib neeg tus cwj pwm thiab txoj kev coj zoo xwb, thiab cov qauv no tsuas yog tswj tib neeg tus cwj pwm thiab txoj kev coj zoo xwb—tiam sis tej no puas muaj ib qho hais ntsia ntsees rau tib neeg txoj kev ua neej li? Siv puas tau tej kev cai tswj uas tsuas qhia tias tib neeg yuav tsum coj tus cwj pwm twg ntawd los ua cov qauv ntsuas lawv txoj kev ua neej? (Tsis tau.) Yog peb saib qhov hais tias “Zoo siab thaum pab lwm tus” ntawd, mas qee tus tib neeg phem muaj peev xwm zoo siab thaum pab lwm tus thiab, tiam sis yog lawv tus kheej tej kev npaj siab thiab tej hom phiaj kom lawv ua li ntawd xwb. Thaum cov dab phem ua qee yam zoo me me, mas lawv haj yam muaj lawv tus kheej tej kev npaj siab thiab tej hom phiaj los ua li ntawd. Nej puas xav hais tias txhua tus uas zoo siab thaum pab lwm tus ntawd yog cov uas nyiam qhov tseeb uas muaj lub siab paub txog txoj kev ncaj ncees? Muab hais tias cov uas zoo siab thaum pab lwm tus uas nyob rau hauv Lub Teb Chaws Suav ntawd, xws li cov tib neeg paub cai, los sis cov tib neeg uas nyiag los ntawm cov tib neeg nplua nuj es muab pub rau cov pluag ntawd, los sis cov uas pheej pab tej pab pawg uas tsis muaj zog thiab cov tib neeg tuag tes tuag taw ntawd, thiab lwm yam—lawv txhua tus puas muaj txoj kev ua neej? Lawv txhua tus puas nyiam yam zoo thiab muaj lub siab paub txog txoj kev ncaj ncees? (Tsis nyiam thiab tsis muaj.) Feem ntau, lawv tsuas yog cov tib neeg uas muaj tus cwj pwm zoo dua xwb. Vim lawv raug qhov zoo siab thaum pab lwm tus no tswj hwm lawm, lawv thiaj li ua ntau yam dej num zoo uas ua rau lawv zoo siab, nplig tau lawv lub siab, thiab ua rau lawv muaj ib txoj kev zoo siab heev, tiam sis qhov coj cov cwj pwm zoo li no tsis tau txhais hais tias lawv muaj txoj kev ua neej lawm, vim lawv txoj kev ntseeg thiab yam uas lawv caum nyob rau sab ntsujplig ntawd paub tsis meej, ob qho ntawd muaj qhov txawv txav uas paub tsis tau. Yog li ntawd, raws li txoj kev coj zoo no suav puas tau tias lawv yog cov tib neeg uas muaj txoj kev ua neej thiab muaj lub siab uas txawj xav? (Tsis tau.) Qee lub koom haum xws li tej hauv paus koom haum thiab tej koom hauv saib xyuas kev noj qab haus huv uas tsim nyog zoo siab thaum pab lwm tus, uas pab cov pab pawg uas tsis muaj zog thiab cov tib neeg tuag tes tuag taw ntawd, yam tsawg kawg, yog cov uas ua tau lawv lub luag hauj lwm ntawm zej zog tiav me ntsis. Lawv ua tej no rau pej xeem pom kom lawv tau ntsej muag tuaj, kom tib neeg pom lawv tuaj, thiab kom tau raws li txoj kev xav ntawm qhov zoo siab thaum pab lwm tus ntawd xwb—qhov no yeej mus tsis txog qib uas qhia tias lawv “muaj txoj kev ua neej” li. Tsis tas li ntawd xwb, cov tib neeg uas lawv zoo siab thaum pab ntawd puas tim tsum kev pab tiag tiag? Qhov zoo siab thaum pab lwm tus thiab tsis pab ntawd puas ncaj ncees? Tsis ncaj ncees. Yog koj tshawb xyuas tag nrho cov xwm txheej loj thiab me uas tshwm sim thoob plaws hauv zej zog kom ntev txaus, mas koj yuav pom hais tias qee qhov xwm txheej ntawd yog ib qho ntawm qhov tib neeg zoo siab thaum pab lwm tus xwb, hos, muaj lwm qhov mas, muaj tej kev zais uas qhia tsis tau thiab tej kis uas tsaus ntuj nti ntawm zej zog ntau heev uas cuam tshuam rau qhov tib neeg zoo siab thaum pab lwm tus ntawd ntau heev. Yog koj tshawb xyuas tag nrho cov xwm txheej loj thiab me uas tshwm sim thoob plaws hauv zej zog kom ntev txaus, mas koj yuav pom hais tias qee qhov xwm txheej ntawd yog ib qho ntawm qhov tib neeg zoo siab thaum pab lwm tus xwb, hos, muaj lwm qhov mas, muaj tej kev zais uas qhia tsis tau thiab tej kis uas tsaus ntuj nti ntawm zej zog ntau heev uas cuam tshuam rau qhov uas tib neeg zoo siab thaum pab lwm tus ntawd. Tsis hais qhov twg los xij li, muaj tej kev npaj siab thiab tej hom phiaj uas txhawb qhov zoo siab thaum pab lwm tus ntawd, seb tej no puas yuav nrov koob nrov npe thiab puas siab tshaj lwm qhov, los sis puas ua tau raws li tib neeg tej kev ua zoo thiab tsis txhaum txoj cai, los sis puas tau txais ib qhov kev ntsuam xyuas uas zoo ntxiv los ntawm zej zog ua qhov loj. Txawm tib neeg yuav saib qhov ntawd li cas los xij, qhov zoo siab thaum pab lwm tus ntawd tsuas yog ib qho ntawm tib neeg cov cwj pwm zoo sab nraud xwb, thiab qhov siab kawg, qhov ntawd tsuas zoo ib yam li ib hom kev coj zoo xwb. Qhov ntawd tsis muaj kev cuam tshuam rau txoj kev ua neej uas Vajtswv tim tsum kiag li. Cov uas muaj peev xwm muaj kev zoo siab thaum pab lwm tus ntawd tej zaum yog cov tib neeg nruab nrab uas tsis muaj ib lub hom phiaj tiag tiag li, los sis tej zaum lawv yog cov tib neeg tseem ceeb nyob rau hauv zej zog; lawv tuaj yeem yog cov tib neeg uas siab zoo heev, tiam sis tej zaum lawv kuj siab phem heev thiab. Lawv tuaj yeem yog leej twg los tau, thiab txhua tus puav leej muaj peev xwm coj tus cwj pwm uas nyob ib ntus no. Yog li ntawd, nqe lus uas hais txog txoj kev coj zoo uas hais tias, “Zoo siab thaum pab lwm tus” ntawd, yeej tsis tsim nyog ua ib tug qauv ntsuas tib neeg txoj kev ua neej li.

“Zoo siab thaum pab lwm tus”–tseeb tiag, cov lus uas hais txog txoj kev coj zoo no tsis qhia txog lub ntsiab tseeb ntawm tib neeg txoj kev ua neej li, thiab cov lus no muaj kev cuam tshuam me ntsis rau tib neeg tus yam ntxwv lub ntsiab tseeb xwb. Yog li ntawd, thiaj li tsis tsim nyog siv cov lus no los ntsuas qhov zoo ntawm tib neeg txoj kev ua neej. Yog li ntawd, dab tsi yog txoj kev uas tsim nyog los ntsuas tib neeg txoj kev ua neej? Yam tsawg kawg, tus tib neeg uas muaj txoj kev ua neej ntawd yuav tsum tsis txhob txiav txim siab raws li qhov seb qhov pab ntawd puas yuav ua rau lawv zoo siab los tsis ua es mam li mus pab tib neeg los sis ua lawv tej luag hauj lwm kom tiav; tiam sis, yuav tsum yog lawv txiav txim siab raws li lawv lub siab uas txawj xav thiab qhov tsim nyog, thiab lawv yuav tsum tsis txhob xav txog yam uas lawv yuav tau txais, los sis qhov kev pab tus tib neeg ntawd yuav muaj dab tsi tshwm sim rau lawv, los sis yuav muaj dab tsi cuam tshuam rau lawv yav tom ntej. Lawv yuav tsum tsis txhob xav txog tej no ib qho li, thiab lawv yuav tsum ua lawv tej luag hauj lwm kom tiav, pab lwm tus, thiab thaiv lwm tus kom sis txhob raug kev txom nyem. Lawv yuav tsum pab tib neeg los ntawm txoj kev dawb huv, yam tsis muaj ib lub hom phiaj uas twm xeeb li—qhov ntawd yog qhov tus tib neeg uas muaj txoj kev ua neej tiag tiag ua. Yog tib neeg lub hom phiaj uas pab lwm tus ntawd yog pab kom lawv tus kheej txaus siab los sis yog tsim ib lub koob lub npe zoo rau lawv tus kheej xwb, ces muaj ib qho kev twm xeeb thiab ib qho tsis zoo rau qhov no—cov uas muaj lub siab uas txawj xav thiab qhov tsim nyog tiag tiag mas yuav tsis ua li no. Cov tib neeg uas muaj txoj kev hlub lwm tus tiag tiag tsis ua ib leeg kom tau raws li lawv txoj kev ntshaw uas lawv xav, tiam sis, lawv ua li ntawd kom ua tau lawv tej luag hauj lwm tiav xwb, thiab ua txhua yam li lawv muaj hwj chim ua tau los pab lwm tus. Lawv tsis yog pab tib neeg kom tau nqi zog, thiab lawv tsis muaj lwm qhov kev npaj siab los sis kev muaj siab li. Tab txawm qhov ua li no yuav nyuaj, thiab txawm tej zaum lawv yuav raug lwm tus txiav txim los sis haj tseem raug kev phom sij me ntsis thiab los xij, lawv paub hais tias qhov no yog ib teg dej num uas tib neeg yuav tsum tau ua, tias qhov no yog tib neeg lub luag hauj lwm, thiab tias yog lawv tsis ua li no, lawv yuav ua tsis tau li qhov lawv tshuav lwm tus nqi thiab tshuav Vajtswv nqi, thiab lawv yuav khuv xim mus tag ib sim neej. Yog li ntawd, lawv thiaj li ua yam tsis muaj qhov ua xyem xyav li, lawv ua kom zoo tshaj plaws, lawv ua raws li Ntuj Ceeb Tsheej lub siab nyiam, thiab lawv ua lawv lub luag hauj lwm kom tiav. Txawm lwm tus yuav txiav txim rau lawv li cas, los sis txawm lwm tus yuav ua lawv tsaug thiab tsis ua, yuav hwm lawv thiab tsis hwm los xij, tsuav lawv pab tau tus tib neeg ntawd ua yam uas nws xav ua, thiab ua tau li ntawd kom kawg lawv lub siab lawm xwb, ces lawv txaus siab lawm. Cov uas muaj peev xwm ua tau li no mas muaj lub siab uas txawj xav thiab qhov tsim nyog, lawv muaj tej kev uas qhia kom pom tseeb txog txoj kev ua neej, thiab tsis yog ib hom cwj pwm uas coj raws li tus cwj pwm ua zoo thiab txoj kev coj zoo xwb. Qhov zoo siab thaum pab lwm tus ntawd tsuas yog ib hom cwj pwm xwb, thiab qee zaus qhov ntawd tsuas yog ib tug cwj pwm uas tshwm nyob rau hauv qee qhov xwm txheej xwb; qhov tib neeg txiav txim siab coj hom cwj pwm uas nyob ib ntus no ntawd yog txiav txim siab raws li qhov lawv zoo siab los chim siab, tej kev xav hauv siab, cheeb tsam ntawm zej zog ntawd, thiab seb qhov coj li ntawd tau txiaj ntsim dab tsi los sis tsis tau xwb. Cov uas muaj txoj kev ua neej tsis xav txog tej no thaum lawv pab tib neeg—lawv txiav txim siab raws li tus qauv ntawm txoj kev txiav txim uas zoo dua, thiab muaj lub siab uas txawj xav thiab qhov tsim nyog ntawm txoj kev ua neej dua. Qee zaus, lawv haj tseem muaj peev xwm ua siab ntev pab tib neeg uas thaum ua li ntawd tsis haum thiab cov nyom rau cov qauv ntawm txoj kev ua zoo thiab. Tus qauv, tej tswv yim, thiab tej kev xam pom ntawm txoj kev ua zoo no tsuas txwv tau tib neeg cov cwj pwm uas nyob ib ntus xwb. Thiab seb qhov cov cwj pwm uas zoo los phem no puas yuav hloov ntawd yog nyob ntawm tus tib neeg ntawd qhov kev zoo siab los chim siab, tej kev xav hauv siab, qhov zoo thiab qhov phem uas nyob rau hauv lawv, thiab lawv tej kev npaj siab uas zoo los phem uas nyob ib ntus ntawd xwb; raws li ib txwm lawm, tib neeg tus yam ntxwv thiab cheeb tsam ntawd kuj yuav muaj ib qho kev cuam tshuam rau qhov no thiab. Muaj ntau yam kev tsis dawb huv nyob rau hauv cov cwj pwm no; cov cwj pwm no puav leej yog cov cwj pwm tiav tiav xwb, thiab tib neeg txiav txim tsis tau tias xyov tus tib neeg ntawd puas muaj txoj kev ua neej los sis tsis siv txoj kev ua neej ntawd. Tiam sis, qhov los txiav txim seb tus tib neeg ntawd puas muaj txoj kev ua neej los sis tsis muaj raws li tus tib neeg ntawd txoj kev ua neej lub ntsiab tseeb, yam lawv caum, lawv txoj kev xav txog lub neej txoj sia thiab qhov lawv muaj nqis, txoj kev uas lawv taug, thiab qhov txhawb lawv txoj kev coj kom zoo thiab tej kev ua ntawd mas yog dua thiab muaj qab hau dua. Qhia Kuv seb, qhov twg mus raws li qhov tseeb xws li: lub hauv paus ntsuas txoj kev ua neej los sis lub hauv paus ntsuas txoj kev coj zoo? Cov qauv uas ntsuas txoj kev coj zoo ntawd puas yog qhov mus raws li qhov tseeb, los sis yog cov qauv uas ntsuas seb tib neeg puas muaj txoj kev ua neej ntawd? Ob co qauv no cov twg thiaj li mus raws li qhov tseeb? Tseeb tiag lawm, cov qauv uas ntsuas seb tib neeg puas muaj txoj kev ua neej ntawd yog cov uas mus raws li qhov tseeb. Qhov no yog ib qho muaj tseeb. Qhov uas vim li cas tej uas siv los ntsuas tib neeg txoj kev coj zoo ntawd thiaj li ua tsis tau tus qauv mas yog vim tej ntawd hloov pauv tas li. Tej ntawd muaj ntau yam kev tsis dawb huv, xws li tib neeg tej kev ua sib pauv, tej kev ntshaw, tej kev nyiam, tej kev caum, tej kev xav hauv siab, tej kev xav phem, tus moj yam qias vuab tsuab, thiab lwm yam. Muaj ntau yam uas yuam kev thiab tsis dawb huv nyob rau hauv tej ntawd dhau lawm—tej ntawd tsis ncaj qha mus rau tom ntej. Yog li ntawd, tej ntawd thiaj li ua tsis tau tus qauv los txiav txim rau tib neeg. Tej ntawd muaj txhua yam uas Ntxwgnyoog muab cog rau hauv tib neeg thiab tej xwm txheej uas tshwm tuaj ntxiv vim tib neeg tus moj yam phem, yog li ntawd, tej ntawd thiaj li tsis yog qhov tseeb. Muab xaus lus hais tias, txawm tib neeg suav hais tias cov qauv ntawm txoj kev coj zoo no mas ua tau yooj yim los sis ua nyuaj, los sis txawm tib neeg suav hais tias cov qauv no muaj nqis siab, qis, los sis nruab nrab, txawm yuav yog qhov twg los xij, cov qauv no tsuas yog cov lus uas txwv thiab tswj tib neeg tus cwj pwm xwb. Cov qauv no tsuas nce mus txog theem ntawm qhov zoo ntawm tib neeg txoj kev ua zoo xwb; cov qauv no tsis muaj kev cuam tshuam rau Vajtswv txoj kev tim tsum kom muab qhov tseeb coj los siv txiav txim rau tib neeg txoj kev ua neej ib qho me me li. Cov qauv no twb tsis muaj cov qauv yooj yim tshaj plaws uas cov neeg uas muaj txoj kev ua neej tsim nyog muaj thiab ua kom tiav li thiab; cov qauv no tsis muaj tej ntawd hlo li. Thaum saib tib neeg, mas tib neeg tsuas tsom ntsoov rau qhov ntsuas lawv txoj kev coj zoo xwb; lawv saib thiab ntsuas tib neeg raws li tej kev tim tsum ntawm txoj kab lis kev cai qub nkaus xwb. Vajtswv tsis saib tib neeg raws li lawv txoj kev coj zoo xwb—Nws tsom ntsoov rau tib neeg txoj kev ua neej lub ntsiab tseeb. Nyob rau hauv tib neeg txoj kev ua neej lub ntsiab tseeb muaj dab tsi? Muaj tej uas lawv nyiam, qhov lawv saib txhua yam, lawv txoj kev xav txog lub neej txoj sia thiab txoj kev coj ua uas muaj nuj nqis, yam lawv caum, seb lawv puas muaj lub siab uas paub txog txoj kev ncaj ncees, seb lawv puas nyiam qhov tseeb thiab yam zoo, lawv lub peev xwm los lees txais qhov tseeb thiab zwm rau qhov tseeb, txoj kev uas lawv xaiv, thiab lwm yam. Txiav txim rau tib neeg txoj kev ua neej lub ntsiab tseeb raws li tej no mas thiaj li yog. Qhov no muaj nyob rau hauv Kuv txoj kev qhia txog qhov zoo siab thaum pab lwm tus ntawd tsis ntau los tsawg lawm. Los ntawm qhov kev qhia txog ob qho kev tim tsum txog txoj kev coj zoo no, tam sim no nej puas to taub txog tej hauv paus ntsiab lus uas yooj yooj yim uas hais txog txoj kev thoob tsib to nrog txog qhov yuav ntsuas txoj kev coj zoo ntawd li cas, thiab qhov txawv ntawm Vajtswv cov qauv uas ntsuas tib neeg thiab txoj kev coj zoo uas tib neeg hais txog ntawd? (To taub.)

Kuv nyuam qhuav qhia txog ob qho kev tim tsum uas hais txog tib neeg txoj kev coj zoo raws li txoj kab lis kev cai qub uas hais tias, “Tsis txhob muab cov nyiaj uas koj khaws ntsaws hnab tshos” thiab “Zoo siab thaum pab lwm tus” ntawd. Nej kawm tau dab tsi los ntawm qhov Kuv qhia txog ob co lus no? (Kuv kawm tau tias tib neeg txoj kev coj zoo tsis cuam tshuam rau lawv txoj kev ua neej lub ntsiab tseeb. Feem ntau, cov tib neeg uas coj hom kev coj zoo no mas muaj qee tus cwj pwm zoo thiab tej uas qhia kom pom tseeb txog qhov zoo ntawm lawv txoj kev ua zoo. Txawm li cas los xij, qhov no tsis tau txhais hais tias lawv muaj txoj kev ua neej los sis tias lawv ua neej zoo nkaus li tib neeg lawm. Kuv muaj kev to taub meej me ntsis txog qhov teeb meem no lawm.) Cov tib neeg uas coj txoj kev coj zoo no tsis tas yuav muaj txoj kev ua neej li—txhua tus yeej paub qhov no lawm, thiab tseeb tiag, txhua yam yeej zoo li no. Txhua tus tib neeg puav leej taug tej kev phem ntawm zej tsoom sawv daws thiab lawv txhua tus puav leej maj mam tsis muaj lub siab uas txawj xav thiab qhov tsim nyog lawm—tsawg tug thiaj li muaj peev xwm ua tau neej zoo nkaus li tib neeg lawm xwb. Txhua tus tib neeg uas muab ib xees nyiaj uas lawv khaws tau nyob ntawm ntug kev rau tub ceev xwm ib zaug lawm ntawd puas dhau los ua ib tug tib neeg zoo? Yeej tsis dhau los ua ib tug tib neeg zoo. Cov uas luag twb qhuas ib zaug lawm hais tias yog cov tib neeg uas tshaj lij tshaj plaws ntawd tom qab ntawd lawv ua tau dab tsi? Nyob rau hauv txhua tus tib neeg lub siab, lawv yeej paub cov lus teb rau cov lus nug no lawm. Cov tib neeg uas ua tau zoo tshaj plaws ntawm tib neeg txoj kev ua zoo thiab cov neeg siab dawb siab zoo tshaj plaws uas pheej zoo siab thaum pab lwm tus, uas tib neeg muab paj liab rau, thiab qhuas ntawd ne zoo li cas lawm? Lawv feem coob dhau los ua cov tib neeg tsis zoo lawm. Lawv tsuas yog txhob txwm ua ob peb teg dej num zoo kom nrov koob nrov npe xwb. Qhov tseeb, lawv tus cwj pwm, lub neej, thiab tus yam ntxwv tiag tiag mas feem ntau tsis zoo npaum li ntawd kiag li. Yam uas lawv txawj tiag tiag ces yog ua txuj qhuas thiab ua txuj cav xwb. Thaum lawv muab lawv cov paj liab thiab txoj kev dag ua ib tug neeg uas ua tau zoo tshaj plaws txog tib neeg txoj kev ua zoo ntawd tshem tawm lawm, ces lawv twb tsis paub tias yuav coj lawv tus kheej kom zoo li cas los sis lawv yuav tsum ua lawv lub neej li cas lawm. Qhov teeb meem uas nyob rau ntawm no yog dab tsi? Tsis yog lawv daig nyob rau ntawm lub kaus mom uas hais tias “tus neeg uas ua tau zoo tshaj plaws txog txoj kev ua zoo” uas zej tsoom sawv daws tau muab rau lawv ntoo lawm lod? Lawv yeej tsis paub tiag tiag tias lawv yog dab tsi li—tib neeg tau ua txuj qhuas lawv tshaj dhau lawm es thiaj li ua rau lawv pib xav hais tias lawv tus kheej mas zoo heev, thiab lawv tsis yog cov tib neeg dog dig ntxiv lawm. Thaum kawg, lawv twb tsis paub xyov yuav ua neej li cas li lawm, qhov lawv nyob ib hnub dhau ib hnub ntawd mas ntxhov quav niab xwb, thiab ib txhia thaum kawg haj tseem quav dej quav cawv, muaj kev nyuaj siab, thiab tua lawv tus kheej lawm thiab. Muaj qee tus tib neeg mas poob mus zoo li no lawm. Lawv mas caum txoj kev xav tas li, xav kom yog cov neeg uas tshaj lij tshaj plaws thiab cov neeg ua tau tus qauv zoo, kom nrov koob nrov npe, los sis kom yog tus neeg uas ua tau zoo tshaj plaws xwb. Lawv yeej tig tsis tau rov qab los rau ntawm lub ntiaj teb tiag tiag li lawm; tej kev tim tsum txhua hnub ntawm lub neej tiag tiag ntawd yog lub hauv paus ntawm txoj kev ntxhov siab thiab kev txom nyem rau lawv tas li xwb. Lawv tsis paub xyov yuav muab lawv tus kheej tshem tawm ntawm qhov kev mob siab no li cas los sis xyov yuav xaiv txoj kev yog nyob rau hauv lub neej li cas li. Yog li ntawd vim qhov tshawb nrhiav txoj kev zoo siab, es ib txhia thiaj li mus haus yeeb haus tshuaj, hos ib txhia thiaj li muab lawv lub neej txoj sia xaus kom dim ntawm tej kev xav uas tsis muaj dab tsi ntawd lawm. Ib txhia uas tsis tua lawv tus kheej ntawd thaum kawg tuag vim txoj kev nyuaj siab xwb. Tsis muaj ntau qhov piv txwv txog qhov no lod? (Muaj.) Qhov no yog hom kev puas tsuaj uas txoj kab lis kev cai qub ua rau tib neeg mob hlwb. Tsis yog txoj kab lis kev cai qub ntawd tsis cia kom tib neeg muaj ib txoj kev to taub yog txog txoj kev ua neej los sis coj lawv mus rau txoj kev yog uas lawv tsim nyog taug xwb—tsis tag li ntawd xwb—txoj kab lis kev cai qub ntawd haj tseem coj lawv mus yuam kev, coj lawv mus rau txoj kev nkag siab yuam kev thiab kev ntshaw thiab. Qhov no ua rau tib neeg puas tsuaj loj heev. Ib txhia yuav hais tias: “Tsis yog li ntawd tag nrho! Peb twb tsis ua li cas, tsis yog lod?” Qhov uas nej tau zoo nyob tam sim no ntawd tsis yog vim Vajtswv txoj kev tiv thaiv lod? Tsuas yog vim Vajtswv xaiv nej xwb es Nws thiaj li tiv thaiv nej uas nej muaj hmoo txaus uas tau los lees txais Nws tes hauj lwm, thiab tau nyeem Nws cov lus, mus koom kev pe hawm, sib qhia, thiab ua nej tes dej num nyob rau ntawm no; tsuas yog vim Nws txoj kev tiv thaiv xwb es nej thiaj li ua tau lub neej li ib tug tib neeg dog dig, thiab muaj qhov tsim nyog li sawv daws muaj los saib xyuas txhua kis ntawm nej lub neej txhua hnub. Txawm li cas los xij, yog tsis lees paub yeej tsis tau hais tias nyob rau hauv nej nruab siab, yeej tseem muaj tej tswv yim thiab tej kev xam pom xws li: “Tsis txhob muab cov nyiaj uas koj khaws ntsaws hnab tshos” thiab “Zoo siab thaum pab lwm tus” ntawd. Thiab nyob rau tib lub sij hawm ntawd, nej tseem raug cov qauv ntawm txoj kev xav thiab txoj kev ua zoo uas los ntawm tib neeg ntiaj teb los ntawd kaw thiab. Vim li cas Kuv thiaj li hais tias nej raug tej ntawd kaw? Vim txoj kev uas nej xaiv taug nyob rau hauv lub neej; tej hauv paus ntsiab lus thiab txoj hauv kev ntawm nej tej kev ua thiab tej kev coj kom zoo; thiab tej hauv paus ntsiab lub, tej kev tswv yim, thiab cov qauv uas nej saib tib neeg thiab txhua yam; thiab lwm yam puav leej tseem raug haub ntxias, los sis haj tseem raug cov qauv ntawm txoj kev xav thiab txoj kev ua zoo ntawd khi thiab tswj khov heev thiab. Hos, Vajtswv cov lus thiab qhov tseeb tseem tsis tau dhau los ua lub hauv paus thiab cov qauv rau nej txoj kev saib tib neeg thiab txhua yam, thiab nej txoj kev coj kom zoo thiab tej kev ua. Txij no mus, nej tsuas yog xaiv txoj hauv kev uas yog nyob rau hauv lub neej lawm xwb, thiab nej muaj lub siab nyiam, lub siab ntshaw, thiab txoj kev cia siab uas los pib taug txoj kev caum qhov tseeb lawm. Tiam sis, qhov tseeb tiag, nej feem coob tseem tsis tau los rau txoj kev no kiag li—lwm lo lus mas hais tias, nej tseem tsis tau tso ko taw rau hauv txoj kev yog uas Vajtswv twb tau npaj rau tib neeg lawm. Ib txhia yuav hais tias: “Yog peb tsis tau tso ko taw rau hauv txoj kev yog no, yog li vim li cas peb thiaj li tseem ua tau peb tej dej num?” Qhov no yog qhov tshwm sim los ntawm tib neeg txoj kev xaiv, kev koom tes, lub siab uas txawj xav, thiab kev txiav txim siab. Tam sim no, koj tab tom ua raws li Vajtswv tej kev tim tsum thiab ua kom zoo tshaj plaws kom zoo tuaj, tiam sis qhov koj ua kom zoo tuaj ntawd, qhov ntawd tsis tau txhais hais tias koj twb tso ko taw rau ntawm txoj kev caum qhov tseeb lawm. Ib qho tias vim li cas rau qhov no yog qhov hais tias nej tseem raug cov tswv yim uas txoj kab lis kev cai qub tau muab qhia rau nej lawm ntawd haub ntxias. Piv txwv li, tej zaum nej yuav muaj ib txoj kev to taub zoo txog lub ntsiab tseeb ntawm ob nqe lus uas hais tias, “Tsis txhob muab cov nyiaj uas koj khaws ntsaws hnab tshos” thiab “Zoo siab thaum pab lwm tus” ntawd, tiam sis ob peb hnub tom qab uas hnov Kuv qhia txog ob nqe lus no thiab muab ob nqe lus no nthuav tawm lawm, tej zaum nej yuav hloov nej lub siab. Tej zaum nej yuav xav hais tias: “Dab tsi tsis zoo txog qhov ‘Tsis txhob muab cov nyiaj uas koj khaws ntsaws hnab tshos’ ntawd? Kuv nyiam cov tib neeg uas tsis txhob muab cov nyiaj uas lawv khaws ntsaws hnab tshos. Yam tsawg kawg lawv tsis siab hlob. Dab tsi tsis zoo txog qhov ‘Zoo siab thaum pab lwm tus’ ntawd? Yam tsawg kawg, thaum koj muaj kev tim tsum, koj thiaj li cia siab tau tias qee tus neeg yuav cev tes pab koj. Qhov no yog ib qho zoo thiab yog ib qho uas txhua tus puav leej xav tau! Tsis tas li ntawd xwb, txawm koj yuav saib qhov ntawd li cas los xij, qhov tib neeg muaj kev zoo siab thaum pab lwm tus ntawd tsuas yog ib qho zoo, thiab yog yam zoo xwb. Qhov ntawd yog peb tes dej num uas tseem ceeb yog li ntawd yuav tsum tsis txhob thuam!” Koj pom hais tias, tom qab luag tsa koj sawv tau ob peb hnub lawm, tsuas yog pw ib hmos xwb twb txaus los hloov koj lawm; qhov koj pw ntawd yuav muab koj xa rov qab mus rau qhov chaw uas koj nyob yav dhau los, thiab rov qab muab koj coj mus kaw rau hauv txoj kab lis kev cai qub dua ib zaug ntxiv. Lwm lo lus mas hais tias, tej uas nyob tob rau hauv koj lub siab no haub ntxias koj tej kev xav thiab tej kev xam pom qee lub sij hawm, nrog rau tej kev uas koj xaiv ntawd. Thiab thaum tej no haub ntxias koj lawm, tej no kuj yuav muab koj tuav cia tas li li thiab, tsis pub koj ua kom tau raws li koj txoj kev ntshaw uas los tso ko taw rau ntawm txoj kev yog uas nyob rau hauv lub neej, los pib taug txoj kev caum qhov tseeb thiab los taug txoj kev hauv lub neej uas Vajtswv cov lus yog koj lub hauv paus, thiab qhov tseeb yog koj tus qauv ntawd. Tab txawm yog koj txaus siab hlo los taug txoj kev no, tab txawm yog koj xav ua li no, thiab ntxhov siab txog txoj kev no, thiab koj siv koj lub sij hawm los xav thiab npaj, txiav txim siab, thiab thov Vajtswv pab rau qhov no los xij, txhua yam yeej tseem yuav tsis mus li qhov koj xav. Qhov no yog vim hais tias txhua kis ntawm txoj kab lis kev cai qub no cog tob dhau rau hauv koj lub siab lawm. Ib txhia yuav hais tias: “Tsis yog li ntawd! Koj hais tias txoj kab lis kev cai qub cog tob dhau rau hauv tib neeg lub siab lawm, tiam sis kuv tsis xav tias qhov ntawd muaj tseeb. Kuv nyuam qhuav muaj nees nkaum tawm xyoo xwb, kuv tsis tau muaj xya caum los sis yim caum tawm xyoo, yog li ntawd tej no twb cog tob rau hauv kuv lub siab lawm tau li cas?” Vim li cas Kuv thiaj li hais tias cov tswv yim no twb cog tob rau hauv koj lub siab lawm? Xav seb: Txij li thaum koj pib xeev xwm los koj puas tsis tau pheej xav ua ib tug tib neeg uas tsim nyog, tab txawm yog koj niam koj txiv tsis tau qhia tej tswv yim uas zoo li no rau koj li? Piv txwv li, tib neeg feem coob nyiam saib yeeb yaj kiab thiab nyeem dab neeg txog cov neeg uas tshaj lij tshaj plaws ntawd, es lawv khuv leej cov tib neeg uas raug tsim txom nyob rau hauv cov dab neeg no, hos ntxub cov neeg phem, thiab cov cwj pwm lim hiam uas ua phem rau lwm tus tib neeg ntawd. Thaum koj nrog hom keeb kwm uas zoo li no loj hlob tuaj lawm, ces koj cia li lees txais tej uas cov tib neeg feem coob pom zoo ua ke yam ras tsis txog li lawm xwb. Yog li ntawd, vim li cas koj thiaj li lees txais tej ntawd? Vim tib neeg yug los yeej tsis muaj qhov tseeb thiab lawv tsis muaj lub peev xwm uas thoob tsib to nrog txog txhua yam txij thaum yug los. Koj tsis muaj qhov kev xav no—qhov kev xav uas tib neeg muaj yog ib qho kev nyiam qee yam uas zoo, yam uas mus rau qhov zoo, thiab yam uas ua hauj lwm uas yeej ib txwm muaj xwb. Tej uas ua hauj lwm thiab mus rau qhov zoo no ua rau koj muaj siab ua kom zoo tuaj, kom dhau los ua ib tug tib neeg uas zoo, uas tshaj lij tshaj plaws, thiab zoo heev. Tej no maj mam pib nyob rau hauv koj lub siab thaum koj los ntsib cov lus uas tawm los ntawm cov tib neeg feem coob txoj kev xav thiab tib neeg tej kev ua zoo los. Thaum cov nqe lus uas los ntawm txoj kab lis kev cai qub txoj kev ua zoo ntawd los nkag rau hauv koj, thiab nkag mus rau hauv koj lub siab lub ntsws lawm, ces cov nqe lus ntawd yuav tuaj cag rau hauv koj lub siab, thiab cov nqe lus ntawd yuav pib tswj koj lub neej. Thaum qhov no tshwm sim lawm, koj tsis thoob tsib to nrog, tawm tsam, los sis tsis kam txais yuav tej no, tiam sis, koj ho xav hais tias koj tim tsum tej no. Thawj qhov uas koj ua ces yog ua raws li cov lus no xwb. Vim li cas zoo li ntawd? Vim hais tias cov lus no mas raug tib neeg lub siab thiab tej kev xav phem heev, cov lus no haum rau tej kev tim tsum ntawm tib neeg sab yeeb ceeb heev. Vim li ntawd, koj thiaj li lees txais cov nqe lus no ua txoj kev yam tsis muaj qhov tawm tsam cov nqe lus no kiag li. Vim txoj kev koj tsev neeg tu koj loj hlob, txoj kev kawm, thiab txoj kev cob kev qhia ntawm zej tsoom sawv daws, nrog rau koj tus kheej tej kev xav hauv nruab siab, thaum kawg koj thiaj li maj mam ntseeg hais tias cov lus no mas yog cov lus zoo. Vim lub sij hawm uas tsim kho kom zoo, yog li ntawd thaum koj laus zuj zus lawm, koj thiaj li siv zog los ua raws li cov lus no txhua lub ntsiab thiab txhua qhov xwm txheej, thiab ua raws li tej uas tib neeg nyiam thiab ntseeg txij thaum yug los tias zoo no. Cov lus no muaj nyob rau hauv koj zuj zus tuaj, thiab nkag los rau hauv koj zuj zus. Tib lub sij hawm ntawd, cov lus no tswj koj txoj kev xam pom txog lub neej thiab tej hom phiaj uas koj caum, thiab cov lus no dhau los ua cov qauv uas koj txiav txim rau tib neeg thiab txhua yam lawm. Thaum cov lus uas los ntawm txoj kab lis kev cai qub los no muaj nyob rau hauv tib neeg lawm, ces lub hauv paus uas coj lawv mus tawm tsam Vajtswv thiab qhov tseeb ntawd npaj txhij ua hauj lwm lawm; qhov ntawd cuag nkaus li tib neeg nrhiav tau qhov lawv tus kheej tsim nyog thiab qhov txhawb lawv tus kheej los ua li ntawd lawm. Yog li ntawd, thaum Vajtswv muab tib neeg tus moj yam qias vuab tsuab thiab lub ntsiab tseeb nthuav tawm, thiab muab txoj kev rau txim thiab kev txiav txim coj los ntxuav lawv ntawd, tib neeg thiaj li muaj txhua hom kev xav phem txog Nws. Lawv xav hais tias: “Tib neeg pheej hais tias, ‘Yog koj ntaus lwm tus, tsis txhob ntaus lawv lub ntsej muag; yog koj hais txog lwm tus, tsis txhob hais txog tej uas lawv ua tsis tau zoo’ thiab ‘Kev txiav caj dab tsuas ua rau taub hau tu xwb; ua siab dawb siab zoo li ua tau,’ yog li ntawd yog ua cas Vajtswv thiaj li hais li ntawd? Puas yog Vajtswv hais li ntawd tiag tiag? Vajtswv yuav tsis hais li ntawd—Nws yuav tsum hais zoo tshaj ntawd, thiab hais lus ua lub suab zoo zoo nrog tib neeg tham xwb, uas yog ua Hauj Sam tus uas cawm txhua tus tib neeg dim ntawm txoj kev txom nyem ntawd lub suab, thiab ua Npodisxavas lub suab. Hais lus zoo li ntawd mas thiaj zoo li Vajtswv—yog ib tug tib neeg uas paub tab thiab zoo heev.” Tej tswv yim, tej kev xam pom, thiab tej kev xav phem no yuav tawm hauv koj lub siab tuaj loj zuj zus txuas ntxiv xwb, ces thaum kawg, koj cia li ris tsis taus tej no ntxiv li lawm thiab koj ua qee yam uas ntxeev siab rau Vajtswv thiab tawm tsam Vajtswv yam koj tus kheej tsis xav ua. Qhov ua li no, koj raug koj tej kev xav phem thiab tej kev xav hauv nruab siab rhuav tshem xwb. Los ntawm qhov no peb pom tau hais tias txawm koj yuav laus npaum li cas los xij, tsuav koj tau txais txoj kev qhia los ntawm txoj kab lis kev cai qub, thiab muaj peev xwm li tus neeg loj lawm xwb, ces koj lub siab yeej yuav muaj txhua kis ntawm txoj kab lis kev cai qub txoj kev ua zoo no, thiab tej no yuav maj mam nkag los rau hauv koj. Tej no twb tswj koj, thiab koj twb ua neej raws li tej no tau ntau xyoo lawm. Koj lub neej thiab koj tus yam ntxwv twb raug txhua kis ntawm txoj kab lis kev cai qub no txoj kev ua zoo tswj kav los ntev lawm. Piv txwv li, txij li tsib los sis rau xyoo ntawd, koj xyaum zoo siab thaum pab lwm tus, thiab tsis txhob muab cov nyiaj uas koj khaws ntsaws hnab tshos. Tej no haub ntxias koj thiab tej no tswj txoj kev uas koj coj tus cwj pwm tag nrho. Tam sim no, thaum yog ib tug tib neeg uas muaj hnub nyoog txog nrab ntawd, koj twb ua neej raws li tej no tau ntau xyoo lawm; qhov no txhais tau hais tias koj nyob deb ntawm cov qauv uas Vajtswv tim tsum ntawm tib neeg ntawd heev. Txij li thaum koj lees txais cov lus uas hais txog txoj kev coj zoo uas txoj kab lis kev cai qub txhawb nqa no lawm, ces koj tau yuam kev ntawm Vajtswv tej kev tim tsum mus deb zuj zus lawm. Qhov sib nrug ntawm koj tus kheej cov qauv uas hais txog txoj kev ua neej thiab cov qauv uas hais txog txoj kev ua neej uas Vajtswv tim tsum ntawd loj zuj zus lawm xwb. Vim li ntawd, koj thiaj li yuam kev ntawm Vajtswv mus deb zuj zus lawm. Tsis yog li no lod? Siv nej lub sij hawm los xav txog cov lus no.

Tam sim no cia peb kawm txog cov lus txuas ntxiv uas hais txog txoj kev coj zoo uas hais tias—“Coj nruj rau koj tus kheej hos ua siab ntev rau lwm tus” ntawd—cov lus no txhais li cas? Nws txhais hais tias koj yuav tsum coj kom nruj rau koj tus kheej hos ua siab dawb siab zoo rau lwm tus tib neeg, kom lawv thiaj li pom tias koj siab zoo thiab siab loj npaum li cas. Yog li, vim li cas tib neeg thiaj li yuav tsum ua qhov no? Yuav ua li cas thiaj li ua tau qhov no? Ua puas tau? Qhov no puas yog ib qho uas ib txwm nthuav tawm ntawm tib neeg txoj kev ua neej? Koj yuav tsum yuam koj tus kheej heev mas thiaj li ua tau li no! Koj yuav tsum tsis muaj tej kev ntshaw thiab tej kev tim tsum, kom koj tus kheej tsis tshua muaj kev xyiv fab, raug kev txom nyem me ntsis ntxiv, tiv kev txom nyem me ntsis ntxiv thiab ua hauj lwm ntau ntxiv kom lwm tus tsis txhob sab. Thiab yog lwm tus tsis txaus siab, yws, los sis ua hauj lwm tsis zoo, koj yuav tsum tsis txhob hais lawv ntau dhau—ntau los tsawg yeej zoo txaus lawm. Tib neeg ntseeg hais tias qhov no yog ib lub cim uas qhia txog tej kev ua zoo uas tsim nyog—tiam sis vim li cas Kuv thiaj li pom tias qhov no yog dag xwb? Qhov no tsis yog dag lod? (Yog.) Raws li ib txwm mas, qhov ib txwm nthuav tawm ntawm ib tug tib neeg dog dig txoj kev ua neej ntawd tsuas yog ua siab ntev rau lawv tus kheej hos coj nruj rau lwm tus xwb. Qhov ntawd yog ib qho uas muaj tseeb. Tib neeg tuaj yeem pom lwm tus tej teeb meem hais tias—“Tus tib neeg no khav theeb! Tus tib neeg ntawd phem! Tus no siab twm xeeb! Tus tod lam ua nws tes dej num xwb! Tus tib neeg no tub nkeeg heev!”—hos lawv tus kheej mas lawv xav hais tias: “Yog kuv tub nkeeg me ntsis los, qhov ntawd tsis ua cas. Kuv muaj peev xwm. Txawm kuv tub nkeeg los, kuv ua tau hauj lwm zoo dua lwm tus!” Lawv pom lwm tus qhov kev txhaum thiab nyiam muab qhov me me hais tawm, tiam sis lawv tus kheej mas lawv ua siab ntev thiab ua zoo li ua tau xwb. Qhov no tsis yog qhov ib txwm nthuav tawm ntawm lawv txoj kev ua neej lod? (Yog.) Yog cia siab tias tib neeg yuav ua neej raws li lub tswv yim uas “Coj nruj rau koj tus kheej hos ua siab ntev rau lwm tus” ntawd no, lawv yuav tsum ua rau lawv tus kheej txom nyem siab ntsws npaum li cas? Lawv nyiaj puas taus qhov kev txom nyem siab ntsws ntawd tiag tiag? Muaj pes tsawg leej thiaj li yuav ua tau li ntawd? (Tsis muaj li.) Vim li cast sis muaj? (Ntuj tsim los tib neeg yeej muaj lub siab twm xeeb lawm. Lawv ua raws li lub hauv paus ntsiab lus uas hais tias “Txhua tus tib neeg nyias tsuas xav txog nyias tus kheej xwb, tsis xav txog lwm tus li.”) Tseeb tiag, tib neeg yug los yeej muaj lub siab twm xeeb lawm, tib neeg yog ib hom tsiaj uas muaj lub siab twm xeeb, thiab ua raws li lub tswv yim phem uas hais tias: “Txhua tus tib neeg nyias tsuas xav txog nyias tus kheej xwb, tsis xav txog lwm tus li” ntawd yam tob heev. Tib neeg xav hais tias qhov tsis ua lub siab twm xeeb thiab saib xyuas lawv tus kheej thaum muaj tej yam los raug rau lawv ntawd mas yuav yog ib qho kev puas tsuaj rau lawv, thiab yuav tsis zoo li sawv daws. Qhov no yog qhov lawv ntseeg thiab qhov lawv ua. Yog cia siab tias tib neeg yuav tsis muaj lub siab twm xeeb, thiab tsis coj lawv tus kheej kom nruj, thiab txaus siab hlo plam txhua yam es tsis siv lwm tus kom yus tau txiaj ntsim no, qhov ntawd puas yog ib qho kev cia siab uas muaj tiag? Thaum ib tug tib neeg twg siv lawv kom nws tau txiaj ntsim, yog tib neeg cia li hais yam zoo siab heev hais tias, “Koj siv kuv kom koj tau txiaj ntsim tiam sis kuv tsis npau taws txog qhov ko. Kuv yog ib tug neeg siab ntev, kuv yuav tsis hais lus phem rau koj los sis ua pauj, thiab yog koj siv kuv kom koj tau txiaj ntsim tseem tsis tau txaus, ces kav tsij siv mus ntxiv”—qhov ntawd puas yog ib qho kev cia siab uas muaj tiag? Muaj pes tsawg leej thiaj li ua tau li no? Cov tib neeg ntiaj teb uas qias vuab tsuab ntawd puas ib txwm coj li no? Yog coj li no mas txawv dhau lawm. Vim li cas thiaj li txawv dhau? Vim cov tib neeg uas muaj tus moj yam qias vuab tsuab no mas muaj lub siab twm xeeb thiab yog cov tib neeg lim hiam heev, ua txhua yam txhawm rau lawv tus kheej tej kev ntshaw xwb, thiab qhov xav txog lwm tus ntawd yuav ua rau lawv tsis txaus siab hlo li. Yog li ntawd, qhov no, thaum nws tshwm sim lawm, mas yog ib qho txawv heev. “Coj nruj rau koj tus kheej hos ua siab ntev rau lwm tus”—qhov hais txog txoj kev coj zoo no tsuas yog ib qho kev tim tsum uas tsis mus raws li tej uas muaj tseeb los sis txoj kev ua neej, uas cov tib neeg ua zoo ntawm zej zog uas tsis to taub txoj kev ua neej ntawd muab coj los qhia rau tib neeg xwb. Qhov ntawd zoo li hais rau nas tias tsis pub khawb qhov los sis hais rau miv tias tsis pub txhom nas xwb. Tim tsum li no puas yog? (Tsis yog. Qhov no txhaum rau txoj cai ntawm txoj kev ua neej.) Qhov kev tim tsum no tsis mus raws li qhov muaj tseeb li, thiab tsis muaj qab hau dab tsi li. Cov uas xav tau qhov kev tim tsum no lawv tus kheej puas muaj peev xwm ua raws li qhov kev tim tsum no? (Tsis muaj.) Lawv xav kom lwm tus ua raws li qhov kev tim tsum uas lawv tus kheej twb ua tsis tau no—qhov teeb meem nyob rau ntawm no yog dab tsi? Qhov no tsis yog tsis tshua mob siab leg lub luag hauj lwm lod? Yam tsawg kawg, tuaj yeem hais tau hais tias lawv tsis tshua mob siab leg lub luag hauj lwm thiab hais lus tsis muaj qab hau. Tam sim no, hais qhov no kom ib kauj ruam deb zog ntxiv tias, tus yam ntxwv ntawm qhov teeb meem no yog dab tsi? (Kev ntsej muag ncaj siab nkhaus.) Yog lawm, qhov no yog ib qho piv txwv txog kev ntsej muag ncaj siab nkhaus. Lawv tus kheej yeej ua tsis tau raws li qhov kev tim tsum no li, tiam sis lawv tseem hais tias lawv tus kheej mas siab ntev heev, siab loj, thiab ua zoo heev—qhov no tsis yog kev ntsej muag ncaj siab nkhaus xwb lod? Txawm koj yuav ntxeev qhov no li cas los xij, qhov no yog ib lo lus qhuav qhuav uas muaj ib qho kev dag xwb, yog li ntawd peb yuav muab qhov no suav ua ib lo lus uas ntsej muag ncaj siab nkhaus. Qhov no me ntsis zoo ib yam li cov lus uas cov Falixais txhawb nqa; uas muaj ib qho kev txhawb siab zais nyob tom qab qhov no, uas yog hais kom muaj plhus, los qhia yus tus kheej tias yog ib tug tib neeg uas muaj txoj kev coj zoo uas tsim nyog, thiab kom lwm tus qhuas yam li yog ib tug neeg ua tau tus qauv zoo thiab yog ib tug qauv ntawm txoj kev coj zoo uas tsim nyog. Yog li ntawd, hom tib neeg twg thiaj li coj tau nruj rau lawv tus kheej hos ua siab ntev rau lwm tus? Cov xib fwb qhia ntawv thiab cov kws kho mob ua puas tau raws li cov lus no? Cov uas hais tias yog tib neeg nrov koob nrov npe, tib neeg zoo, thiab cov tib neeg txawj ntse zoo li Qhoos Tswb, Meebxim thiab Laujtxwj ua puas tau cov lus no? (Tsis tau.) Muab xaus lus hais tias, txawm cov lus uas tib neeg muab hais tawm no yuav zoo npaum li cas, los sis xyov ntseeg puas tau qhov kev tim tsum no los tsis tau los xij, thaum kawg qhov kev tim tsum no tsuas yog ib qho kev tim tsum uas hais txog tib neeg tus yam ntxwv thiab tus cwj pwm ua zoo xwb. Yam tsawg kawg, tib neeg tsis kam ua raws li qhov kev tim tsum no thiab nws tsis yooj yim rau lawv xyaum ua, vim qhov kev tim tsum no cov nyom cov qauv uas tib neeg txoj kev ua neej muaj peev xwm ua tau. Tiam sis, tsis hais qhov twg los xij li, qhov kev tim tsum no tseem yog ib tug qauv thiab ib qho kev tim tsum txog tib neeg txoj kev coj zoo uas txoj kab lis kev cai qub txhawb nqa xwb. Tab txawm qhov “Coj nruj rau koj tus kheej hos ua siab ntev rau lwm tus” ntawd yog ib sob lus qhuav qhuav uas ob peb leeg thiaj li ua tau xwb los xij, sob lus ntawd zoo tib yam nkaus li sob uas hais tias “Tsis txhob muab cov nyiaj uas koj khaws ntsaws hnab tshos” thiab sob “Zoo siab thaum pab lwm tus” ntawd thiab—txawm cov tib neeg uas xyaum ua tej no muaj qhov kev txhawb siab los sis qhov kev npaj siab dab tsi, los sis yog ib tug tib neeg twg haj tseem muaj peev xwm ua tau tej ntawd tag nrho thiab los xij—tsis hais qhov twg los xij li, raws li qhov muaj tseeb uas cov tib neeg uas txhawb nqa qhov kev cheem tsum no mas muab lawv tus kheej tso rau qhov siab tshaj plaws ntawm txoj kev ua zoo xwb, qhov no tsis ua rau lawv khav theeb thiab qhuas tias lawv tus kheej ncaj ncees, thiab muaj qhov tsim nyog uas txawv me ntsis lod? Yog koj nug lawv seb lawv ua puas tau raws li qhov hais tias, “Coj nruj rau koj tus kheej hos ua siab ntev rau lwm tus” ntawd, mas lawv yuav hais tias, “Tau kawg!” Tiam sis, thaum yuam kom lawv ua raws li qhov ntawd tiag tiag lawm, lawv yuav ua tsis tau. Vim li cas lawv thiaj li ua tsis tau? Vim lawv muaj ib tug moj yam uas khav theeb thiab phem. Hais kom lawv ua raws li qhov kev ua zoo no thaum lwm tus nrog lawv sib txeeb lub meej mom, lub hwj chim, lub koob meej, thiab txiaj ntsim, seb lawv ua puas tau. Lawv yeej yuav ua tsis tau li, thiab lawv haj tseem yuav tig ua yeeb ncuab rau koj thiab. Yog koj nug lawv hais tias, “Vim li cas koj thiaj li tseem txhawb nqa cov lus uas koj tus kheej twb ua tsis tau no? Vim li cas koj thiaj li tseem tim tsum kom lwm tus ua raws li cov lus no? Ua li no tsis yog koj ntsej muag ncaj siab nkhaus lod?” Lawv puas lees txais? Yog koj muab lawv nthuav tawm, lawv yuav tsis lees txais—txawm koj yuav muab lawv nthuav tawm li cas los xij, lawv yuav tsis lees txais los sis lees qhov kev txhaum li—qhov no qhia hais tias lawv tsis yog cov tib neeg zoo. Qhov tseeb uas lawv hais lus zoo zoo txawm ua tsis tau raws li lawv tus kheej tej kev tim tsum ntawd los xij mas qhia tau hais tias qhov hu lawv tias yog cov tib neeg uas dag loj heev thiab cov tib neeg ua txuj uas ntsej muag ncaj siab nkhaus ntawd mas yog kawg nkaus lawm.

Qhov “Coj nruj rau koj tus kheej hos ua siab ntev rau lwm tus” nrog rau cov lus uas hais txog qhov “Tsis txhob muab cov nyiaj uas koj khaws ntsaws hnab tshos” thiab “Zoo siab thaum pab lwm tus” ntawd mas yog ib qho ntawm tej kev tim tsum uas txoj kab lis kev cai qub tim tsum txog tib neeg txoj kev coj zoo ntag. Tib yam nkaus li ntawd, txawm tib neeg coj tau los sis ua tau txoj kev coj zoo no los xij, qhov ntawd yeej tseem tsis yog tus qauv los sis txoj kev ntsuas lawv txoj kev ua neej. Tej zaum yuav yog qhov hais tias koj yeej muaj peev xwm coj tau nruj rau koj tus kheej hos ua siab ntev rau lwm tus, thiab tias koj tus kheej ua tau raws li qee tus qauv siab lawm tiag tiag. Tej zaum koj yeej huv si thiab tej zaum koj yeej ib txwm xav txog lwm tus thiab muaj lub siab hlub tshua txog lawv, yam tsis muaj lub siab twm xeeb thiab nrhiav koj tus kheej tej kev ntshaw lawm. Tej zaum zoo li koj siab loj siab dav thiab tsis muaj lub siab twm xeeb, hos muaj lub siab uas leg lub luag hauj lwm ntawm zej zog thiab tej kev ua zoo ntawm tib neeg. Koj tus yam ntxwv thiab tej kev zoo uas tsim nyog ntawd tej zaum cov uas nyob ze koj, thiab cov uas koj ntsib thiab nrog sib tham ntawd yuav pom. Tej zaum koj tus cwj pwm yeej tsis ua rau lwm tus yws tau los sis thuam tau koj li, tiam sis ua rau lawv qhuas thiab haj tseem cav koj xwb. Tej zaum tib neeg yuav saib koj zoo li ib tug tib neeg uas coj nruj rau nws tus kheej hos ua siab ntev rau lwm tus tiag tiag. Txawm li cas los xij, tej no tsuas yog cov cwj pwm sab nraud xwb. Tej kev xav thiab tej kev xav tau hauv koj nruab siab puas zoo ib yam li cov cwj pwm sab nraud no, nrog rau tej kev ua uas koj ua neej nyob rau sab nraud no? Lo lus teb yog tsis zoo ib yam, qhov sab hauv thiab qhov sab nraud ntawd tsis zoo ib yam. Qhov uas koj ua tau li no yog vim hais tias muaj ib qho kev txhawb siab nyob rau tom qab qhov ua li no lawm. Qhov kev txhawb siab ntawd yog dab tsi kiag? Koj qhia puas tau qhov kev txhawb siab ntawd tawm kom sawv daws paub? Yeej qhia tsis tau. Qhov no ua tau pov thawj qhia hais tias qhov kev txhawb siab no yog ib yam uas hais tsis tau, yog ib yam tsaus ntuj thiab phem. Tam sim no, vim li cas qhov kev txhawb siab no thiaj li hais tsis tau thiab phem? Vim hais tias tib neeg txoj kev ua neej yog lawv tus moj yam qias vuab tsuab tswj hwm thiab coj kev xwb. Txawm xyov tib neeg puas muab tej kev xav ntawd hais tawm los sis nthuav tawm los xij, tag nrho tej kev xav ntawm txoj kev ua neej ntawd yog lawv tus moj yam qias vuab tsuab tswj, kav, thiab ua xwb. Vim li ntawd, tib neeg tej kev txhawb siab thiab tej kev npaj siab ntawd thiaj li puav leej tsis zoo thiab phem. Txawm xyov tib neeg puas muaj peev xwm coj nruj rau lawv tus kheej hos ua siab ntev rau lwm tus, los sis lawv nthuav tau qhov kev ua zoo no tawm nyob rau sab nraud yam zoo heev thiab tsis tau los xij, yeej zam tsis dhau kom qhov kev ua zoo no tsis txhob tswj los sis haub ntxias lawv txoj kev ua neej li. Yog li ntawd, dab tsi tswj tib neeg txoj kev ua neej? Nws yog lawv tus moj yam qias vuab tsuab, nws yog lawv txoj kev ua neej lub ntsiab tseeb uas pom tsis tseeb nyob rau hauv qhov kev ua zoo uas “Coj nruj rau koj tus kheej hos ua siab ntev rau lwm tus” ntawd ntag—qhov ntawd yog lawv tus yam ntxwv tseeb. Tib neeg tus yam ntxwv tseeb yog lawv txoj kev ua neej lub ntsiab tseeb. Yog li ntawd lawv txoj kev ua neej lub ntsiab tseeb muaj dab tsi? Feem ntau yog muaj tej uas lawv nyiam, yam lawv caum, qhov lawv xam pom txog lub neej txoj sia thiab lawv txoj kev coj ua uas muaj nuj nqis, nrog rau tus cwj pwm uas lawv coj rau qhov tseeb thiab rau Vajtswv, thiab lwm yam. Tsuas yog tej no xwb thiaj li qhia txog tib neeg txoj kev ua neej lub ntsiab tseeb tiag tiag. Tuaj yeem hais tau tseeb tseeb hais tias cov tib neeg feem coob uas xav kom lawv tus kheej ua tau raws li qhov kev ua zoo “coj nruj rau koj tus kheej hos ua siab ntev rau lwm tus” ntawd, mas ntshaw lub meej mom heev. Thaum lawv tus moj yam qias vuab tsuab coj kev lawm, lawv kawg caum lub koob meej ntawm tib neeg, qhov tseem ceeb ntawm zej zog, thiab lub meej mom tab meeg lwm tus xwb. Tag nrho tej no puav leej muaj feem xyuam rau lawv txoj kev ntshaw lub meej mom, thiab lawv txoj kev coj zoo no yog coj los npog tej no xwb. Yog li ntawd lawv tej kev caum no tshwm sim los li cas? Tej kev caum no tshwm sim los ntawm lawv tus moj yam qias vuab tsuab los thiab lawv tus moj yam qias vuab tsuab coj kev xwb. Yog li ntawd, txawm yuav yog dab tsi los xij, txawm tib neeg ua tau raws li qhov kev ua zoo uas “coj nruj rau koj tus kheej hos ua siab ntev rau lwm tus” ntawd thiab tsis tau, thiab txawm lawv ua tau zoo tshaj plaws thiab tsis tau los xij, qhov no yeej hloov tsis tau lawv txoj kev ua neej lub ntsiab tseeb kiag li. Muab xaus lus hais tias, qhov no txhais hais tias nws yeej hloov tsis tau qhov lawv xam pom txog lub neej txoj sia los sis lawv txoj kev coj ua uas muaj nuj nqis, los sis coj lawv tej cwj pwm thiab tej kev xam pom txog tib neeg txhua tus xeeb ceem, tej xwm txheej, thiab txhua yam li. Tsis yog li ntawd lod? (Yog.) Tib neeg yim muaj peev xwm coj nruj rau lawv tus kheej hos ua siab ntev rau lwm tus, ces lawv yim txawj ua txuj, txawj zais lawv tus kheej, thiab txawj dag lwm tus los ntawm tus cwj pwm zoo thiab cov lus zoo, thiab lawv tus yam ntxwv yim txawj dag thiab phem tuaj xwb. Lawv yim yog hom tib neeg no, ces lawv txoj kev nyiam thiab txoj kev caum lub meej mom thiab lub hwj chim yim tob xwb. Txawm yuav zoo li lawv txoj kev coj zoo sab nraud ntawd mas zoo, muaj koob meej thiab yog npaum li cas, thiab txawm tib neeg yuav pom tias zoo npaum li cas los xij, txoj kev caum uas hais tsis tau uas nyob rau hauv lawv nruab siab, nrog rau lawv tus yam ntxwv lub ntsiab tseeb, thiab tab txawm lawv tej hom phiaj kiag los, yuav tawm ntawm lawv tuaj lub sij hawm twg los tau li. Yog li ntawd, txawm lawv txoj kev coj zoo yuav zoo npaum li cas los xij, txoj kev coj zoo ntawd yeej zais tsis tau lawv txoj kev ua neej lub ntsiab tseeb uas muaj tiag, los sis lawv tej hom phiaj thiab tej kev ntshaw li. Txoj kev coj zoo ntawd yeej zais tsis tau lawv tus yam ntxwv lub ntsiab tseeb uas txaus ntshai uas tsis nyiam yam zoo thiab tsis nyiam qhov tseeb thiab ntxub qhov tseeb ntawd. Raws li tej uas muaj tseeb no mas, qhov hais tias “Coj nruj rau koj tus kheej hos ua siab ntev rau lwm tus” ntawd tsis yog tsis muaj qab hau xwb—qhov ntawd muab hom tib neeg uas muaj hom phiaj uas sim siv cov lus thiab cov cwj pwm uas zoo li no los npog lawv tej hom phiaj thiab tej kev ntshaw uas hais tsis tau ntawd nthuav tawm. Nej muab qhov no piv rau qee tus tawm tsam Khetos thiab cov tib neeg phem uas nyob rau hauv pawg ntseeg los tau. Vim txhawm rau kom tuav tau lawv lub meej mom thiab lub hwj chim nyob ruaj khov rau hauv pawg ntseeg, thiab kom tau txais ib lub koob lub npe uas zoo dua nyob rau ntawm lwm tus tswv cuab, lawv thiaj li muaj peev xwm nyiaj kev txom nyem thiab tiv kev txom nyem thaum ua lawv tej dej num, thiab lawv haj tseem muab lawv txoj hauj lwm thiab tsev neeg tso tseg thiab muab txhua yam uas lawv muaj muag es muab lawv tus kheej fij rau Vajtswv thiab. Muaj qee qhov mas, tej kev txom nyem uas lawv tiv thiab qhov kev txom nyem uas lawv nyiaj uas muab lawv tus kheej fij rau Vajtswv ntawd mas tshaj qhov ib tug tib neeg dog dig ua tau lawm; lawv muaj peev xwm tsis lees paub lawv tus kheej kom tuav tau lawv lub meej mom. Tiam sis, txawm lawv yuav raug kev txom nyem npaum li cas los sis lawv yuav tiv qhov kev txom nyem dab tsi los xij, lawv tsis muaj ib tug tsom kwm Vajtswv cov lus tim khawv los sis tej kev ntshaw ntawm Vajtswv lub tsev, thiab lawv tsis xyaum ua raws li Vajtswv cov lus li. Lub hom phiaj uas lawv caum ces yog kom tau lub meej mom, lub hwj chim, thiab nqi zog ntawm Vajtswv xwb. Tsis muaj ib yam dab tsi uas lawv ua muaj kev cuam tshuam rau qhov tseeb ib qho me me li. Txawm lawv yuav coj nruj rau lawv tus kheej npaum li cas thiab lawv yuav ua siab ntev rau lwm tus npaum li cas los xij, qhov yuav tshwm sim thaum kawg ntawm lawv yog dab tsi? Vajtswv yuav xav li cas rau lawv? Nws puas yuav txiav txim siab rau lawv qhov txiaj ntsim raws li cov cwj pwm zoo sab nraud uas lawv coj? Nws yeej yuav tsis ua li ntawd. Tib neeg saib thiab txiav txim rau lwm tus raws li cov cwj pwm thiab tej uas ua rau pom tseeb no, thiab vim lawv tsis pom tias lwm tus tib neeg lub ntsiab tseeb zoo li cas, lawv thiaj li raug lwm tus tib neeg dag lawm. Txawm li cas los xij, Vajtswv yeej tsis dag tib neeg li. Nws yeej yuav tsis qhuas thiab nco ntsoov tib neeg txoj kev coj zoo vim lawv muaj peev xwm coj nruj rau lawv tus kheej hos ua siab ntev rau lwm tus. Tiam sis, Nws yuav teem txim rau lawv vim lawv tej hom phiaj thiab tej kev uas lawv taug mus caum lub meej mom. Yog li ntawd, cov uas caum qhov tseeb yuav tsum muaj qhov kev thoob tsib to nrog txog tus qauv uas ntsuas tib neeg no. Lawv yuav tsum tsis lees paub thiab muab tus qauv uas tsis muaj qab hau no tso pov tseg, thiab cais tib neeg raws li Vajtswv cov lus thiab qhov tseeb tej hauv paus ntsiab lus. Lawv yuav tsum saib seb tus tib neeg ntawd puas nyiam yam zoo, seb lawv puas muaj peev xwm lees txais qhov tseeb, thiab seb lawv puas zwm tau rau Vajtswv lub hwj chim kav thiab tej kev npaj, nrog rau txoj kev uas lawv xaiv thiab taug, thiab cais seb lawv yog hom tib neeg dab tsi, thiab lawv muaj txoj kev ua neej zoo li cas raws li tej no. Thaum tib neeg txiav txim rau lwm tus raws li tus qauv uas hais tias “Coj nruj rau koj tus kheej hos ua siab ntev rau lwm tus” ntawd mas yuav ua rau muaj qhov tsis ncaj thiab yuam kev yooj yim heev. Yog koj cais yuam kev thiab saib tib neeg raws li tej hauv paus ntsiab lus thiab cov lus uas los ntawm tib neeg los xwb, ces koj yuav ua txhaum qhov tseeb thiab tawm tsam Vajtswv nyob rau hauv qhov ua li ntawd. Vim li cas zoo li no? Vim hais tias qhov koj saib tib neeg ntawd yuav yuam kev, thiab tsis haum rau Vajtswv cov lus thiab qhov tseeb—qhov koj saib ntawd haj tseem tawm tsam thiab cov nyom rau Vajtswv cov lus thiab qhov tseeb thiab. Vajtswv tsis ntsuas tib neeg txoj kev ua neej raws li nqe lus uas hais txog txoj kev coj zoo uas hais tias “Coj nruj rau koj tus kheej hos ua siab ntev rau lwm tus” ntawd, yog li ntawd yog koj tseem pheej txiav txim rau tib neeg txoj kev ua zoo thiab txiav txim siab tias lawv yog hom tib neeg twg raws li tus qauv no, ces koj ua txhaum qhov tseeb tej hauv paus ntsiab lus kiag lawm thiab koj yeej yuav ua yuam kev, thiab ua rau muaj qee yam yuam kev thiab qhov tsis yog xwb. Tsis yog li no lod? (Yog.) Thaum tib neeg nkag siab txog tej no lawm, yam tsawg kawg lawv yuav muaj kev to taub ib qib txog lub hauv paus, tej hauv paus ntsiab lus, thiab tus qauv uas Vajtswv saib tib neeg thiab txhua yam—yam tsawg kawg koj yuav muaj ib qho kev to taub thiab kev ua tsaug rau Vajtswv txoj kev ua tej no. Yog li ntawd, koj xam pom li cas? Yam tsawg kawg koj yuav tsum paub tias qhov saib tib neeg uas yog ntawd yog dab tsi, thiab tus qauv saib tib neeg twg uas mus raws li qhov tseeb thiab tej uas muaj tseeb tiag tiag, thiab yeej yuav tsis muaj qhov yuam kev los sis qhov tsis yog li. Yog koj yeej paub tej no tseeb lawm, koj yuav muaj kev thoob tsib to nrog txog txhua kis ntawm txoj kab lis kev cai qub no, nrog rau tib neeg tej lus, tej kev tshawb fawb, thiab tej kev saib tib neeg, thiab koj yuav muaj peev xwm muab txhua kis ntawm txoj kab lis kev cai qub no, thiab tag nrho cov lus sib txawv thiab tej kev xam pom uas los ntawm tib neeg los ntawd tso pov tseg. Ua li no, mas koj thiaj li yuav saib thiab cais tau tib neeg raws li qhov tseeb tej hauv paus ntsiab lus, thiab koj thiaj li yuav koom tau nrog Vajtswv ua ke mus txog rau ib qib, thiab koj yuav tsis ntxeev siab, tawm tsam, los sis cov nyom Nws. Thaum koj maj mam koom tau nrog Vajtswv ua ke lawm, koj yuav muaj ib qho kev paub tob txog lub ntsiab tseeb ntawm tib neeg thiab txhua yam zuj zus, thiab koj yuav paub qho no nyob rau hauv Vajtswv cov lus. Koj yuav pom hais tias Vajtswv tej lus uas muab tib neeg ntiaj teb nthuav tawm, thiab tej uas Nws qhia thiab txhais txog tib neeg ntiaj teb ntawd mas puav leej yog, thiab tias tej ntawd puav leej yog qhov tseeb xwb. Thaum koj paub txog qhov no lawm, koj yuav muaj kev ntseeg thiab kev paub txog Vajtswv thiab Nws cov lus zuj zus ntxiv, thiab koj yuav paub tseeb zuj zus ntxiv hais tias Vajtswv cov lus yog qhov tseeb thiab yog qhov muaj tiag uas tib neeg yuav tsum ua neej raws. Qhov no tsis yog qhov txheej txheem ntawm txoj kev lees txais thiab kev tau txais qhov tseeb ntawd muaj lod? (Yog.) Qhov no yog tus txheej txheem ntawm kev lees txais thiab kev tau txais qhov tseeb.

Lub hom phiaj ntawm txoj kev caum qhov tseeb ces yog lees txais qhov tseeb los ua yus lub neej txoj sia xwb. Thaum tib neeg muaj peev xwm lees txais qhov tseeb lawm, lawv txoj kev ua neej thiab lub neej sab hauv maj mam pib hloov pauv, ces thaum kawg, qhov kev hloov pauv no yog lawv qhov nqi zog. Yav dhau los, koj saib tib neeg thiab txhua yam raws li txoj kab lis kev cai qub, tiam sis tam sim no koj paub lawm hais tias qhov no tsis yog lawm, yog li ntawd koj yuav tsis saib txhua yam raws li qhov kev xam pom ntawd, los sis saib tib neeg raws li yam uas txoj kab lis kev cai qub ntawd qhia lawm. Yog li ntawd, tam sim no koj yuav saib tib neeg thiab txhua yam raws li dab tsi? Yog koj tsis paub, ces ua tau pov thawj qhia hais tias koj tseem tsis tau lees txais qhov tseeb. Yog koj twb paub hais tias koj yuav tsum saib tib neeg thiab txhua yam raws li qhov tseeb tej hauv paus ntsiab lus twg lawm, yog koj hais koj lub hauv paus, txoj kev, tus qauv, thiab tej hauv paus ntsiab lus tau yog thiab meej heev, thiab yog koj kuj cais tau tib neeg thiab ua rau tib neeg raws li qhov tseeb tej hauv paus ntsiab lus no lawm thiab, ces qhov tseeb twb pib ua hauj lwm nyob rau hauv koj lawm, qhov tseeb ntawd coj koj xav thiab tswj qhov kev xam pom uas koj saib tib neeg thiab txhua yam. Qhov no ua tau pov thawj qhia hais tias qhov tseeb twb tuaj cag rau hauv koj thiab dhau los ua koj lub neej lawm. Yog li ntawd, qhov txiaj ntsim uas qhov tseeb muaj nyob rau hauv koj ntawd thaum kawg yuav pab koj li cas? Qhov tseeb ntawd yuav tsis cuam tshuam rau qhov koj coj koj tus kheej li cas, txoj kev uas koj xaiv, thiab koj txoj hauv kev nyob rau hauv lub neej lod? (Cuam tshuam.) Yog qhov tseeb ntawd muaj peev xwm cuam tshuam rau qhov koj coj koj tus kheej li cas thiab txoj kev uas koj taug no, qhov tseeb ntawd yuav tsis cuam tshuam rau koj txoj kev nrog Vajtswv sib raug zoo lod? (Cuam tshuam.) Qhov txiaj ntsim uas yuav los ntawm qhov tseeb uas cuam tshuam rau koj txoj kev nrog Vajtswv sib raug zoo los ntawd yog dab tsi? Koj yuav nyob ze zog los sis nyob deb ntxiv? (Kuv yuav nyob ze zog rau ntawm Vajtswv.) Koj yeej yuav nyob ze zog rau ntawm Vajtswv xwb xwb li. Thaum koj nyob ze zog rau ntawm Vajtswv lawm, koj puas yuav txaus siab hlo los raws Nws qab thiab pe hawm Nws, los sis koj yuav tsis ntseeg tias muaj Nws thaum koj ua xyem xyav thiab to taub yuam kev? (Kuv yuav txaus siab hlo raws Vajtswv qab thiab pe hawm Nws.) Qhov ko muaj tseeb. Tam sim no, koj yuav ua li cas es thiaj li yuav txaus siab hlo? Koj yuav paub txog Vajtswv cov lus nyob rau hauv koj lub neej tiag tiag; qhov tseeb yuav pib ua hauj lwm nyob rau hauv koj, thiab koj yuav paub txog qhov tseeb ntawd. Nyob rau hauv tus txheej txheem uas muab txhua yam nthuav tawm ntawd, koj yuav paub lub hauv paus uas zais tag nrho tej no thiab koj yuav pom hais tias tej no mas muaj raws nraim li Vajtswv cov lus. Koj yuav paub tseeb hais tias Vajtswv cov lus mas puav leej yog qhov tseeb, thiab qhov no yuav ua rau koj muaj kev ntseeg Vajtswv tuaj. Koj yim muaj kev ntseeg Vajtswv, ces koj txoj kev nrog Nws sib raug zoo ntawd yim zoo dua qub xwb, koj yuav txaus siab hlo ua yam li yog ib tug neeg uas raug tsim tawm los zuj zus, thiab txaus siab hlo muab Vajtswv ua koj lub hwj chim kav, thiab txhua yam ntawm koj uas zwm rau Vajtswv ntawd yuav muaj ntau zuj zus tuaj. Koj xav li cas txog qhov kev txhim kho koj txoj kev sib raug zoo no? Nws zoo heev, tsis yog lod? Qhov no yog qhov txiaj ntsim ntawm txoj kev txhim kho uas zoo thiab mus rau qhov zoo. Yog li, txoj kev txhim kho uas tsis zoo thiab muaj kev phom sij ntawd ne yuav muaj dab tsi tshwm sim? (Qhov kuv ntseeg hais tias muaj Vajtswv ntawd yuav maj mam tsuag, thiab kuv yuav muaj tej kev to taub yuam kev thiab tej kev ua xyem xyav txog Vajtswv.) Yam tsawg kawg, tej no yuav yog tej uas tshwm sim los. Koj yuav tsis tau txais kev paub txog ib yam dab tsi, thiab tsis yog koj yuav tsis tau txais qhov tseeb nyob rau hauv koj txoj kev ntseeg xwb, koj kuj yuav muaj txhua hom kev xav phem thiab—koj yuav to taub yuam kev, thuam, thiab tawm tsam Vajtswv, thiab thaum kawg koj yuav tsis lees paub Nws. Yog koj tsis lees paub Vajtswv nyob rau hauv koj lub siab no, koj puas tseem yuav muaj peev xwm raws Nws qab? (Tsis muaj.) Koj yuav tsis xav raws Nws qab ntxiv lawm. Tom qab ntawd, yuav muaj dab tsi tshwm sim? Koj yuav tsis nyiam yam Vajtswv ua thiab hais lawm. Thaum Vajtswv hais tias, “Twb pom qhov kawg ntawm tib neeg ntiaj teb lawm,” koj yuav teb hais tias, “Kuv tsis pom ib yam dab tsi li!” Koj yuav tsis ntseeg Nws. Thaum Vajtswv hais tias, “Koj yuav tau txais ib qho chaw zoo tom qab caum qhov tseeb lawm,” koj yuav teb hais tias, “Qhov chaw zoo uas Koj hais txog no nyob rau qhov twg? Kuv tsis pom qhov chaw zoo no li!” Koj yuav tsis nyiam. Thaum Vajtswv hais tias, “Koj yuav tsum ua kom zoo li ib tug neeg uas raug tsim tawm los tiag tiag,” koj yuav teb hais tias, “Qhov ua kom zoo li ib tug neeg uas raug tsim tawm los tiag tiag ntawd puas muaj txiaj ntsim dab tsi? Kuv tau koob hmoov ntau npaum li cas los ntawm qhov ua li ntawd? Kuv puas tau koob hmoov los ntawm qhov ua li ntawd tiag tiag? Qhov ua li ntawd puas muaj feem xyuam rau qhov tau txais koob hmoov?” Thaum Vajtswv hais tias, “Koj yuav tsum lees txais thiab zwm rau Vajtswv lub hwj chim kav!” Koj yuav teb hais tias, “Lub hwj chim kav dab tsi? Vim li cas kuv tsis hnov Vajtswv lub hwj chim kav li? Yog Vajtswv yeej muaj lub hwj chim kav tiag tiag, vim li cas Nws thiaj li cia kuv pluag? Vim li cas Nws thiaj li cia kuv mob? Yog Vajtswv muaj lub hwj chim kav, vim li cas txhua yam thiaj li nyuaj rau kuv tas li xwb?” Koj lub siab yuav puv npo tej lus yws, thiab koj yuav tsis ntseeg yam uas Vajtswv hais li. Qhov no yuav qhia tias koj tsis muaj txoj kev ntseeg Vajtswv tseeb. Vim li ntawd, thaum ntsib ntau yam teeb meem lawm, yam uas koj yuav ua ces yog yws xwb, tsis muaj qhov kev zwm rau ib qho me me li. Qhov ntawd yog qhov uas koj yuav mus txog rau ntawm qhov tshwm sim uas phom sij ntag. Ib txhia tib neeg hais tias, “Yog Vajtswv muaj lub hwj chim kav no, Nws yuav tsum pab kho kuv tus mob kom zoo tam sid. Nws yuav tsum pab kuv kom ua tau txhua yam uas kuv xav tau. Vim li cas kuv lub neej tam sim no tsis tau zoo li thiab raug kev txom nyem nkaus nkaus xwb?” Lawv poob lawv txoj kev ntseeg Vajtswv, thiab lawv tsis muaj txoj kev ntseeg uas pom tsis meej uas lawv twb muaj ib zaug los lawm ntawd ib qho me me li lawm—txoj kev ntseeg ntawd ploj tag nrho li lawm. Qhov no yog qhov tshwm sim los uas phom sij thiab yog qhov txiaj ntsim phem ntawm txhua yam no. Nej puas xav kom mus txog theem no? (Tsis xav.) Nej yuav ua li cas es thiaj li tsis mus txog rau qib no? Nej yuav tsum siv zog thaum hais txog qhov tseeb—qhov tseem ceeb thiab txoj kev rau txhua yam no yog nyob rau hauv qhov tseeb thiab hauv Vajtswv cov lus. Yog koj siv zog thaum hais txog Vajtswv cov lus thiab qhov tseeb, ces tos nco xwb, koj yuav pib pom txoj kev uas Vajtswv tau qhia koj thiab coj koj kev kom paub tseeb tuaj, thiab koj yuav pom lub ntsiab tseeb ntawm tib neeg, xwm txheej, thiab txhua yam uas Vajtswv coj qhia ntawd. Thaum tau ntsib tau pom txhua kauj ruam no lawm, koj yuav maj mam pom tej hauv paus ntsiab lus thiab lub hauv paus uas hais txog qhov saib tib neeg thiab txhua yam, thiab hais txog qhov coj tus kheej kom zoo thiab qhov ua nyob rau hauv Vajtswv cov lus. Thaum lees txais thiab to taub qhov tseeb lawm, koj yuav pom tej hauv paus ntsiab lus thiab tej kev xyaum ua nyob rau hauv tib neeg, xwm txheej, thiab txhua yam uas koj ntsib ntawd. Yog koj xyaum ua raws li cov kev no, Vajtswv cov lus yuav nkag los rau hauv koj thiab los ua koj lub neej, ces tos nco xwb, koj yuav pib nyob rau hauv qab Vajtswv lub hwj chim kav thiab tej kev coj kev qhia lawm. Thaum koj nyob rau hauv qab Vajtswv lub hwj chim kav thiab tej kev coj kev qhia lawm, koj yuav kawm paub tias yuav saib tib neeg thiab txhua yam raws li Vajtswv cov lus li cas, thiab koj yuav saib txhua yam raws li tus qauv, qhov kev xam pom, thiab qhov kev xav uas tsim nyog yam ras tsis txog li; tej uas tshwm sim los ntawm qhov koj saib txhua yam ntawd yuav mus raws li Vajtswv cov lus thiab qhov tseeb, thiab tej ntawd yuav ua rau koj txav ze Vajtswv thiab haj yam ntshaw qhov tseeb ntxiv. Txawm li cas los xij, yog koj tsis caum qhov tseeb, los sis siv zog rau qhov tseeb, thiab yog koj tsis nyiam qhov tseeb, ces hais tau nyuaj hais tias xyov koj yuav mus xaus rau qhov twg. Thaum kawg, txawm lawv yuav sim ntseeg Nws npaum li cas los xij, qhov tshwm sim uas phem tshaj plaws ces yog thaum tib neeg tsis pom Vajtswv tej kev ua los sis tsis hnov Nws lub hwj chim kav lawm; nws yog thaum lawv tsis paub Vajtswv qhov hwj huaj uas loj tsis muaj chaw kawg thiab lub tswv yim lawm, txawm lawv yuav ntsib yuav pom ntau yam npaum li cas. Thaum zoo li no lawm, tib neeg thiaj li yuav lees paub hais tias cov lus uas Vajtswv nthuav tawm ntawd mas yog qhov tseeb xwb, tiam sis lawv yuav pom tias tsis muaj kev cia siab hais tias lawv yuav dim li lawm, thiab lawv haj yam yuav tsis pom tias Vajtswv tus moj yam mas ncaj ncees thiab dawb huv, thiab lawv yuav xav tas li hais tias lawv txoj kev ntseeg Vajtswv mas pos huab nti xwb. Qhov no qhia hais tias lawv tsis tau txais qhov tseeb los sis Vajtswv txoj kev cawm dim, thiab qhia hais tias lawv tsis tau txais dab tsi hlo li tom qab ntseeg Vajtswv tau ntau lub xyoo lawm. Qhov Kuv qhia txog cov lus thib peb uas hais tias: “Coj nruj rau koj tus kheej hos ua siab ntev rau lwm tus” ntawd ces xaus li no xwb.

Nqe lus thib plaub uas hais txog txoj kev coj zoo ntawd yog dab tsi? (Ua zoo pauj phem.) Tib neeg puas muaj qee qhov kev npaj siab thaum lawv ua zoo pauj phem? Tsis yog lawv thaub qab ib kauj ruam kom ua tau txhua yam yooj yim zog rau lawv tus kheej lod? Qhov no tsis yog ib txoj kev los daws txhua yam lod? Tib neeg tsis xav kom daig nyob rau hauv lub voj voog uas sib pauj tsis muaj hnub kawg, lawv xav kom txhua yam mus tau zoo kom lawv thiaj li nyob tau kaj siab lug me ntsis ntxiv. Tib neeg txoj sia nyob tsis ntev, yog li ntawd txawm lawv nyob txog ib puas xyoo los sis ntau pua xyoo los xij, lawv pom hais tias lawv lub neej txoj sia mas luv luv xwb. Txhua hnub, lawv tus kheej tsuas muaj tej kev xav txog txoj kev ua pauj thiab kev tua neeg xwb, lawv lub siab mas ntxhov quav niab, thiab lawv ua neej tsis kaj siab li. Yog li ntawd, lawv thiaj li sim nrhiav ib txoj hauv kev los ua ib lub neej kom kaj siab dua, xyiv fab dua, thiab kho lawv tus kheej kom yog—uas yog qhov ua zoo pauj phem. Qhov uas tib neeg ib leeg yuav tawm tsam ib leeg thiab ib leeg yuav dag ib leeg nyob rau hauv lawv lub neej ntawd mas yeej zam tsis dhau li, lawv yeej ib txwm ua rau muaj kev puas tsuaj los ntawm txoj kev pauj kev ntsim siab thiab kev iab siab, yog li lawv thiaj li ua neej txom nyem heev, yog li ntawd, vim tib neeg tus yam ntxwv thiab tib neeg txoj kev ruaj ntseg thiab kev sib koom siab, uas muaj qhov ntawd txhawb lawv siab, cov tib neeg ua zoo thiaj li muab tus qauv ua zoo no qhia rau ntiaj teb. Lawv ceeb toom rau tib neeg kom tsis txhob ua phem pauj phem, thiab tsis pub muaj kev ntxub ntxaug thiab kev tua neeg, tiam sis hais kom tib neeg xyaum ua zoo pauj phem. Lawv hais tias tab txawm yog ib tug tib neeg twg ua rau koj raug mob yav dhau los lawm los, koj yuav tsum tsis txhob ua pauj, tiam sis koj yuav tsum pab tus tib neeg ntawd, hnov qab tej uas tus tib neeg ntawd ua yuam kev yav dhau los, nrog tus tib neeg ntawd sib tham li qub, thiab maj mam hloov tus tib neeg ntawd, txo txoj kev ua yeeb ncuab ntawm neb, thiab ua kom muaj ib txoj kev sib raug zoo uas sib haum xeeb. Qhov no yuav tsis ua rau muaj kev sib haum xeeb nyob rau hauv zej zog tag nrho lod? Lawv hais tias txawm leej twg tau ua txhaum rau koj lawm los xij, tsis hais tsev neeg, phooj ywg, neeg zej zog, los sis cov neeg ua hauj lwm ua ke li, koj yuav tsum ua zoo los pauj lawv txoj kev phem, thiab tsis txhob tuav rawv tej kev tsis txaus siab. Lawv hais tias yog txhua tus muaj peev xwm ua tau li no mas, yuav zoo ib yam li qhov tib neeg hais tias: “Yog txhua tus muaj txoj kev hlub me ntsis, mas lub ntiaj teb yuav yog ib qho chaw uas zoo heev.” Cov lus no tsis yog hais raws li tej kev xav hauv nruab siab xwb lod? Ib qho chaw uas zoo heev? Cuag nkaus li muaj tseeb! Saib seb leej twg yog tus uas khiav lub ntiaj teb no thiab leej twg yog tus uas ua rau tib neeg ntiaj teb qias vuab tsuab. Nqe lus uas hais txog txoj kev coj zoo uas hais tias, “Ua zoo pauj phem” ntawd hloov tau dab tsi tiag tiag? Nqe lus ntawd yeej hloov tsis tau ib yam dab tsi li. Zoo li lwm nqe lus xwb, nqe lus no tim tsum qee yam txog tib neeg txoj kev ua zoo, los sis muab qee txoj kev cai coj los tswj lawv. Nqe lus no cheem tsum kom lawv tsis txhob siv kev ntxub ntxaug thiab kev tua neeg thaum ntsib kev ntxub ntxaug thiab kev tua neeg los ntawm lwm tus tib neeg, thiab kom lawv ua siab txias txias ua zoo rau cov tib neeg uas ua rau lawv raug mob ntawd, tab txawm ua rau lawv npau taws los xij, thiab siv lawv txoj kev coj zoo los txo txoj kev ua yeeb ncuab thiab kev tua neeg ntawd, thiab txo qhov uas ua rau muaj nqaij ntuag ntshav nrog. Cov lus uas hais txog txoj kev coj zoo no muaj txiaj ntsim rau tib neeg mus rau ib qib; cov lus no cheem tau txoj kev ua yeeb ncuab thiab kev tsis txaus siab, thiab txo tau tej kev sib tua pauj kev ntsim siab mus rau ib qib; thiab cov lus no muaj qee yam zoo txog tib neeg tus yam ntxwv, kev nyab xeeb, thiab txoj kev sib haum xeeb ntawm tib neeg, tiam sis muaj dab tsi uas ua rau cov lus no ua tau li ntawd? Muaj qee yam tseem ceeb txog tib neeg lub neej. Ib qho yog qhov kev xav thiab kev txiav txim li qub uas tib neeg muaj. Tib neeg xav hais tias: “Tus tib neeg uas kuv xav pauj kev ntsim siab no muaj hwj chim loj dua kuv los me dua kuv? Yog kuv pauj kev ntsim siab ntawm nws, kuv puas yuav ua tau raws li kuv lub hom phiaj? Yog kuv pauj kuv qhov kev ntsim siab thiab muab nws tua lawm, puas yuav yog kuv thab kev tuag?” Lawv xub ntsuas tej uas yuav rov qab los raug rau lawv ua ntej. Lawv xub ntsuas tej uas yuav rov qab los raug rau lawv ua ntej. Tom qab ua tib zoo xav txog tej no lawm, tib neeg feem coob paub hais tias: “Lawv muaj phooj ywg zoo heev, lawv muaj tib neeg raws lawv qab coob heev, thiab lawv phem thiab lim hiam, yog li ntawd tab txawm lawv tau ua rau kuv raug mob lawm los xij, kuv pauj tsis tau kev ntsim siab ntawm lawv. Kuv yuav tsum nqos qhov kev thuam ntawd twj ywm xwb. Tiam sis yog kuv muaj ib lub hwv tsam los pauj kev ntsim siab ntawm lawv nyob rau hauv lub neej no, mas kuv yuav ua pauj ntag.” Raws li luag hais tias, “Tus uas tsis pauj kev ntsim siab ces tsis yog txiv neej” thiab “Yeej tsis tau lig dhau rau ib tug txiv neej paub tab los pauj nws txoj kev ntsim siab li.” Tib neeg tseem muaj cov tswv yim no los ua neej rau ntawm sab ntiaj teb. Lub tswv yim los ua neej rau ntawm sab ntiaj teb uas ua zoo pauj phem ntawd yog tib neeg lub tswv yim, muaj ib qho mas, vim lub tswv yim ntawd txuas ncaj qha rau tib neeg lub neej thiab tib neeg txoj kev qias vuab tsuab—lub tswv yim ntawd tshwm tuaj vim tib neeg tej kev xav phem thiab tej kev txiav txim ntawm lawv qhov kev xav xwb. Thaum tib neeg feem coob ntsib cov xwm txheej zoo li no lawm, lawv tsuas tau nqos tej kev thuam ntawd, thiab xyaum qhov ua zoo pauj phem, thiab muab lawv txoj kev ntxub ntxaug thiab kev chim siab ntawd tso tseg nyob rau sab nraud twj ywm xwb. Lwm qhov uas vim li cas tib neeg thiaj li tuav rawv lub tswv yim no los ua neej rau ntawm sab ntiaj teb mas yog vim hais tias muaj qee qhov mas ob tog ntawd muaj hwj chim tsis sib luag, yog li ntawd tog uas ua txhaum thiaj li tsis muaj cuab kav pauj kev ntsim siab, thiab lawv thiaj li raug yuam kom ua zoo pauj phem, yam lawv ua tsis tau dab tsi ntxiv li lawm. Yog lawv yuav pauj kev ntsim siab, mas lawv yuav ua rau tag nrho lawv tsev neeg lub neej raug kev phom sij, thiab tej uas yuav rov qab los raug rau lawv los ntawm qhov ua li ntawd mas yeej xav tsis txog li. Thaum zoo li no lawm, tib neeg pom hais tias qhov ua neej nqos txoj kev thuam ntawd mus ntxiv mas yuav zoo dua. Txawm li cas los xij, qhov ua li ntawd, lawv kov puas yeej lawv txoj kev tsis txaus siab? Puas muaj ib tug tib neeg twg uas muaj peev xwm hnov qab ib qho kev tsis txaus siab li? (Tsis muaj.) Tshwj xeeb yog thaum muaj tej kev tsis txaus siab loj heev, piv txwv li thaum ib tug tib neeg twg tau muab koj cov txheeb ze tua thiab rhuav tshem koj tsev neeg, thiab ua rau koj puas koob puas npe, ua rau koj muaj kev ua yeeb ncuab loj rau tus ntawd lawm—mas tsis muaj leej twg tuaj yeem muab ib qho kev tsis txaus siab zoo li ntawd tso tseg li. Qhov no yog ib feem ntawm tib neeg thiab yog qee yam uas tib neeg yeej tso tsis tau tseg li. Tib neeg cia li muaj tej kev ntxub ntxaug txog tej xwm txheej zoo li no xwb—tib neeg yeej ib txwm zoo li no. Txawm tej kev ntxub ntxaug ntawd tshwm tuaj vim yog txoj kev npau taws sai, txoj kev xav, los sis lub siab uas txawj xav, txawm yuav yog qhov twg los xij, tib neeg yeej ib txwm zoo li ntawd. Tab txawm dev los nyiam cov tib neeg uas ua zoo rau dev thiab pub zaub pub mov los sis pab dev tas li, yog li ntawd dev thiaj li pib ntseeg lawv, hos dev ntxub cov uas hais lus phem thiab ua phem rau dev—thiab tsis tag li ntawd xwb, dev haj tseem yuav ntxub cov tib neeg uas tsw los sis ua suab zoo li cov ua phem rau dev thiab. Koj pom hais tias, tab txawm dev los twb muaj qhov kev xav no, mas tsis tas hais txog tib neeg li! Yog li ntawd tib neeg haj yam muaj ntau yam kev xav dua tsiaj, lawv yeej ib txwm muaj qhov npau taws thaum ntsib txoj kev sib tua los sis kev tsis ncaj ncees uas pauj kev ntsim siab ntawd. Txawm li cas los xij, muaj ntau yam thiab vim qee qhov xwm txheej, es tib neeg thiaj li pheej raug yuam kom yeej swb thiab nqos tej kev thuam, thiab nyiaj tej yam uas nyob ib ntus ntawd—tiam sis qhov no tsis tau txhais hais tias lawv ntshaw los sis muaj peev xwm ua tau qhov ua zoo pauj phem. Qhov uas Kuv nyuam qhuav hais ntawd yog hais raws li qhov kev xam pom txog txoj kev ua neej thiab tib neeg tej kev xav ntag. Yog tam sim no peb saib qhov no los ntawm qhov kev xam pom txog tej uas muaj tseeb txog lub neej mas—yog tib neeg tsis ua zoo pauj phem, tiam sis pauj kev ntsim siab thiab tua tib neeg no, qhov uas yuav rov qab los raug rau lawv ntawd yog dab tsi? Lawv yuav tau ris raws txoj cai, lawv yuav raug kaw, raug txiav txim nyob tsev loj cuj, thiab tej zaum haj tseem yuav raug txim tuag thiab. Raws li qhov no, peb tuaj yeem txiav txim siab tau hais tias, tsis hais qhov no los ntawm tib neeg qhov kev xam pom los los sis los ntawm zej zog lub hwj chim txwv thiab txoj cai los li, thaum tib neeg tsis tau kev ncaj ncees thiab kev tua pauj kev ntsim siab, mas tsis muaj ib tug tib neeg twg uas muaj peev xwm tawm tsam txoj kev ntxub ntxaug hauv lawv tej kev xav los sis hauv lawv nruab siab li. Tab txawm thaum raug tsim txom uas ua rau raug mob me ntsis zoo li raug lwm tus hais lus tawm tsam, luag, los sis thuam los xij, tib neeg yeej tseem tsis muaj peev xwm ua zoo pauj phem li. Qhov muaj peev xwm ua zoo pauj phem ntawd puas yog ib qho qhia kom pom tseeb txog txoj kev ua neej? (Tsis yog.) Yog li ntawd, thaum ib tug tib neeg twg raug thab los sis raug rhuav tshem ntawd, yam tsawg kawg qhov uas tus tib neeg ntawd xav tau thiab tim tsum ntawm txoj kev ua neej ntawd yog dab tsi? Puas muaj ib tug tib neeg twg uas txaus siab hlo thiab zoo siab hlo hais tias: “Kav tsij thab kuv! Koj muaj hwj chim thiab phem, koj yeej thab tau kuv li koj xav thab, es kuv mam li ua zoo los pauj koj txoj kev phem. Kuv yuav coj zoo thiab ua zoo rau koj, thiab kuv yeej yuav tsis pauj kev ntsim siab ntawm koj los sis muaj ib qho kev xav txog koj li. Kuv yuav tsis npau taws rau koj—kuv tsuas suav hais tias txhua yam ntawd yog tso dag xwb. Txawm txhua yam uas koj hais yuav thuam kuv tus cwj pwm, rhuav kuv txoj kev khav txiv, los sis rhuav tshem kuv tej kev ntshaw npaum li cas los xij, yeej tsis ua li cas thiab koj hais li koj nyiam los tau.” Puas muaj cov tib neeg zoo li no? (Tsis muaj.) Yeej tsis muaj leej twg muaj peev xwm muab tej uas lawv tsis txaus siab tso tseg li—yog lawv nyob taus li ib ntus es tsis tua lawv tus yeeb ncuab pauj kev ntsim siab lawm ces lawv twb tsis ua li cas lawm. Yog li ntawd, tsis muaj leej twg muaj peev xwm ua zoo pauj phem tiag tiag li, thiab tab txawm yog tib neeg xyaum ua txoj kev coj zoo no los, qhov no yog vim lawv raug yuam kom ua li ntawd vim tej kev txwv ntawm qee qhov xwm txheej nyob rau lub sij hawm ntawd, los sis vim tag nrho cov qauv ntawd yog tsim tawm los xwb thiab tsis muaj tseeb. Raws li ib txwm mas, thaum tib neeg raug kev tsim txom los sis raug ua phem rau loj heev lawm, lawv yuav muaj tej kev tsis txaus siab thiab xav ua pauj. Tib qho uas tej zaum lawv yuav tsis paub los sis tsis ua pauj rau lawv tus kheej txoj kev ntxub ntxaug ntawd mas yog qhov hais tias yog txoj kev ntxub ntxaug ntawd loj dhau, thiab lawv poob siab loj dhau lawm, uas thaum kawg lawv cia li cim xeeb tsis tau los sis puas hlwb lawm. Tiam sis tus tib neeg uas muaj txoj kev ua neej thiab qhov tsim nyog mas yuav tsis xav kom raug thuam, ntxub ntxaug, saib tsis taus, luag, hais lus thuam, thab, rhuav tshem, thiab lwm yam, los sis kom ib tug tib neeg twg caij tsuj thiab ua txhaum rau lawv tus cwj pwm thiab lub meej mom li; tsis muaj leej twg uas yuav zoo siab los pauj cov uas tau tawm tsam los sis rhuav tshem lawv yav dhau los los ntawm txoj kev coj zoo yam tsis pauj tiag tiag li—tsis muaj leej twg muaj peev xwm ua tau li ntawd. Yog li ntawd, qhov uas hais txog txoj kev coj zoo uas hais tias ua zoo pauj phem no mas zoo li tsis muaj zog, mos muag, qhuav qhawv thiab tsis muaj nuj nqis rau cov tib neeg ntiaj teb uas qias vuab tsuab li.

Yog peb saib qhov no raws li qhov kev xam pom ntawm lub siab uas txawj xav thiab qhov tsim nyog ntawm txoj kev ua neej mas, txawm tib neeg yuav qias vuab tsuab npaum li cas, thiab txawm xyov lawv puas yog ib tug tib neeg phem los sis ib tug tib neeg uas muaj txoj kev ua neej uas zoo heev los xij, lawv txhua tus puav leej cia siab tias lwm tus yuav ua zoo rau lawv thiab hwm lawv. Yog ib tug tib neeg twg pib ua txuj qhuas thiab ua txuj ua zoo rau koj yam tsis paub tias vim li cas li no, qhov ntawd puas yuav ua rau koj zoo siab? Koj puas nyiam qhov ntawd? (Tsis nyiam.) Vim li cas koj thiaj li tsis nyiam qhov ntawd? Koj puas xav hais tias cuag nkaus li koj raug dag lawm? Koj yuav xav hais tias: “Koj saib kuv zoo li ib tug me nyuam yaus peb xyoos xwb lod? Yog ua cas kuv thiaj li tsis to taub tias vim li cas koj thiaj li xav hais tej no rau kuv? Kuv puas zoo npaum li koj hais? Kuv puas tau ua tej ntawd ib qho li? Tag nrho tej lus ua txuj qhuas uas ruam ruam no yog qhuas rau dab tsi? Yog ua cas koj tsis qias koj tus kheej li?” Tib neeg tsis xav hnov cov lus ua txuj qhuas, thiab lawv saib cov lus ua txuj qhuas ntawd yog ib qho kev thuam xwb. Dua li ntawm qhov kev hwm ntawd lawm, tib neeg xav kom lwm tus ua rau lawv li cas? (Los ntawm lub siab dawb paug.) Qhov hais kom tib neeg ua rau lwm tus los ntawm lub siab dawb paug ntawd mas yeej tsis muaj hnub li—yog lawv tsis thab lwm tus, ces qhov ntawd twb zoo heev lawm. Qhov hais kom tib neeg tsis txhob ib leeg thab ib leeg ntawd mas yog ib qho kev tim tsum uas tsis zoo. Tib neeg cia siab tias lwm tus yuav hwm lawv, tsis thab lawv, thiab qhov tseem ceeb tshaj plaws yog, ua kom ncaj ncees rau lawv. Lawv cia siab hais tias lwm tus yuav tsis ua rau lawv ntxhov siab thaum lawv qaug zog, los sis muab lawv ntiab tawm mus thaum lawv tej kev txhaum raug muab nthuav tawm, los sis pheej ua txuj qhuas thiab ua txuj mob siab rau lawv. Tib neeg pom hais tias cov cwj pwm zoo li no mas qias neeg heev yog li ntawd lawv tsuas xav kom ua ncaj ncees rau lawv xwb—tsis yog li ntawd lod? Qhov ua ncaj ncees rau lwm tus ntawd yog ib qho kev xav uas zoo heev nyob rau hauv tib neeg lub ntiaj teb thiab hauv tib neeg txoj kev xav. Vim li cas Kuv thiaj li hais li ntawd? Xav seb: Vim li cas tib neeg txhua tus thiaj li nyiam Npauj Zuag? Tib neeg nyiam saib Npauj Zuag tej kev txiav txim plaub ntug tab txawm yog cov plaub ntug no mas tsis muaj tseeb thiab yog tsim tawm los xwb. Vim li cas tib neeg thiaj li tseem nyiam saib tej ntawd? Vim li cas lawv thiaj li tseem kam saib tej ntawd? Vim hais tias, nyob rau hauv lawv txoj kev xav, sab hauv lawv txoj kev xav, thiab hauv lawv nruab siab mas, lawv txhua tus puav leej xav kom tau nyob rau hauv ib lub ntiaj teb uas mus rau qhov zoo thiab zoo dua xwb. Lawv xav kom tib neeg tau nyob rau hauv ib lub neej uas coj ncaj thiab ncaj ncees, hauv ib lub ntiaj teb uas txhua tus yuav tau qhov no. Txoj kev ntawd, mas yam tsawg kawg, thaum lub zog phem ua rau koj ntxhov siab lawm, yuav muaj ib qho chaw uas muaj kev ncaj ncees, qhov chaw uas koj tuaj yeem yws txog koj tej kev tsis txaus siab, qhov chaw uas koj yuav muaj cai yws, thiab thaum kawg, yuav muaj qhov chaw uas qee qhov kev kaj yuav nthuav tawm txog tej kev tsis ncaj ncees uas koj tau raug lawm. Nyob rau hauv lub neej thiab cov tib neeg ntiaj teb no mas, yuav muaj ib qho chaw uas koj tuaj yeem tshem tau koj lub npe tawm, thiab tiv thaiv tau koj tus kheej kom tsis txhob raug rhuav ntsej muag ib qho los sis kom tsis txhob muaj ib qho kev tsis txaus siab hlo li. Qhov no tsis yog tib neeg lub neej hauv txoj kev xav lod? Qhov no tsis yog qhov uas txhua tus tib neeg xav tau lod? (Yog.) Qhov no yog txhua tus txoj kev npau suav ntag. Tib neeg cia siab hais tias lwm tus yuav ua ncaj ncees rau lawv—lawv tsis xav kom lwm tus ua tsis ncaj ncees rau lawv, los sis tsis paub tias yuav mus yws rau qhov twg yog hais tias lwm tus ua tsis ncaj ncees rau lawv, thiab lawv pom hais tias qias neeg heev. Tuaj yeem hais tau hais tias tus qauv thiab qhov kev tim tsum uas tim tsum txog tib neeg txoj kev coj zoo uas hais tias “Ua zoo pauj phem” ntawd mas txawv qhov muaj tiag ntawm tib neeg ntiaj teb txoj kev qias vuab tsuab hauv lub neej tiag tiag lawm. Yog li ntawd, qhov kev tim tsum uas tim tsum txog tib neeg txoj kev coj zoo no mas tsis xav txog tib neeg li, thiab qhov kev tim tsum no mas txawv qhov uas muaj tseeb thiab lub neej tiag tiag lawm. Qhov kev tim tsum no yog ib nqe lus uas hais los ntawm cov neeg uas ua raws li qhov tsis muaj tiag uas tsis muaj kev to taub txog lub siab ntawm cov tib neeg tsis zoo li luag tej uas tau ua yuam kev thiab raug rhuav ntsej muag lawm ntawd xwb—cov neeg uas ua raws li qhov tsis muaj tiag no tsis paub txog qhov uas cov tib neeg no tau ua yuam kev, thiab qhov lawv lub meej mom thiab tus cwj pwm tau raug thuam li, los sis haj tseem tsis paub tias qhov kev nyab xeeb ntawm lawv tus kheej nyob rau qhov kev phom sij npaum li cas li thiab. Lawv tsis to taub tej uas muaj tseeb ntawd, tiam sis lawv tseem tim tsum kom cov tib neeg raug tsim txom no rov ua zoo rau cov uas ntaus lawv thiab tsis txhob pauj kev ntsim siab ntawm cov uas ntaus lawv ntawd thiab, lawv hais tej yam xws li: “Koj yeej yug los kom luag ua tsis zoo rau koj yog li ntawd koj yuav tsum lees txais koj txoj hmoo. Koj yug los rau hauv cov neeg uas qis tshaj plaws ntawm lub neej thiab koj yeej yog los ua qhev xwb. Koj yeej yug los kom lwm tus tswj kav—koj yuav tsum tsis txhob pauj kev ntsim siab ntawm cov uas ua rau koj raug mob, tiam sis koj yuav tsum ua zoo pauj phem. Koj yuav tsum ua koj feem txhawm rau qhov zoo ntawm tib neeg tus yam ntxwv thiab txoj kev sib haum xeeb ntawm zej zog, thiab pab zaj zog los ntawm qhov siv koj lub zog uas zoo thiab koj txoj kev coj zoo uas zoo tshaj plaws.” Qhov no yog hais los daws qhov cov tib neeg qib siab ntawm lub neej thiab cov tib neeg tswj hwm qhov kev caij tsuj cov tib neeg qis, kom cov tib neeg qis muaj kev kaj siab, thiab kom lawv lub siab thiab tej kev xav tias tsis xws li luag tej ntawd nyob twj ywm xwb. Qhov no tsis yog lub hom phiaj ntawm qhov hais tej yam zoo li no lod? (Yog.) Yog txhua lub teb chaws txoj kev cai lij choj thiab tej kev coj ua ntawm zej zog, thiab tej kev coj ua thiab tej kev cai tswj hwm ntawm txhua haiv neeg thiab txhua xeem neeg ntawd caj ncees thiab nruj no, puas tseem yuav tim tsum txhawb nqa cov lus tsis muaj tseeb uas tsis yog raws li tej kev cai ntawm txoj kev ua neej no? Yuav tsis tim tsum li. Cov lus uas hais tias “Ua zoo pauj phem” ntawd tsuas yog muab coj los ua ib txoj kev thiab ib qho kev tau zoo rau cov tib neeg tswj hwm thiab cov tib neeg phem uas muaj cai thiab muaj hwj chim los siv thiab caij tsuj cov uas tsis xws li luag tej xwb. Tib lub sij hawm ntawd, yuav kom ua tau rau cov tib neeg qis uas tsis xws li luag tej ntawd txaus siab thiab thaiv tau lawv kom tsis txhob nrhiav kev pauj kev ntsim siab los sis ua yeeb ncuab rau cov tib neeg nplua nuj, cov tib neeg muaj vaj huam siab, thiab cov tib neeg tswj hwm mas, cov tib neeg uas hais tias yog cov txawj xav thiab muaj kev kawm no muab lawv tus kheej tso rau qhov siab tshaj plaws ntawm lub hwj chim loj, txhawb nqa cov lus no los ntawm qhov ua txuj cheem tsum kom txhua tus xyaum ua txoj kev coj zoo xwb. Qhov no haj yam tsis ua rau muaj kev cov nyom nyob rau hauv zej zog lod? Koj yim caij tsuj tib neeg, ces yim ua pov thawj qhia tau hais tias zej tsoom sawv daws tsis ncaj ncees xwb. Yog zej tsoom sawv daws yeej coj ncaj thiab ncaj ncees tiag tiag no, puas yuav tseem tim tsum los txiav txim rau tib neeg thiab siv cov lus no los tim tsum txog tib neeg txoj kev coj zoo? Qhov no yog vim qhov muaj tseeb uas tsis muaj kev ncaj ncees nyob rau hauv zej tsoom sawv daws los sis hauv tib neeg ntiaj teb xwb. Yog cov neeg ua phem tuaj yeem raug rau txim raws li txoj kev cai, los sis yog cov uas muaj nyiaj thiab muaj hwj chim ntawd kuj ua raws li txoj kev cai thiab, mas cov lus uas hais tias, “Ua zoo pauj phem” ntawd, yuav tsis yog thiab yuav tsis muaj li. Muaj pes tsawg tus tib neeg dog dig uas muaj peev xwm rhuav tshem ib tug nom tswv? Muaj pes tsawg tus tib neeg pluag uas muaj peev xwm rhuav tshem cov tib neeg nplua nuj? Qhov lawv yuav ua tau li ntawd mas nyuaj. Yog li ntawd, cov lus uas hais tias, “Ua zoo pauj phem” ntawd, yog hais ncaj nraim rau cov tib neeg dog dig, cov tib neeg pluag, thiab cov tib neeg qis xwb—cov lus ntawd yog ib co lus uas tsis zoo thiab tsis ncaj ncees. Piv txwv li, yog koj kom ib tug nom tswv ua zoo pauj phem mas, tus nom tswv ntawd yuav hais rau koj hais tias: “Qhov kev phem uas kuv yuav tsum tau pauj ntawd yog dab tsi? Leej twg muaj cuab kav los twv kuv? Leej twg muaj cuab kav los tawm tsam kuv? Leej twg muaj cuab kav hais tias ‘tsis yog’ rau kuv? Kuv yuav muab tus uas hais tias tsis yog rau kuv ntawd tua—kuv yuav rhuav tshem tus ntawd tsev neeg tag nrho thiab tus ntawd cov txheeb ze txhua tus!” Pom lawm lod, tias tsis muaj ib qho kev phem rau cov nom tswv pauj li, yog li ntawd cov lus uas hais tias, “Ua zoo pauj phem” ntawd, mas siv tsis tau rau lawv. Yog koj hais rau lawv hais tias: “Koj yuav tsum xyaum ua txoj kev coj zoo uas ua zoo pauj phem no, koj yuav tsum muaj txoj kev coj zoo no,” mas lawv yuav teb hais tias: “Tau kawg, kuv ua tau kawg.” Qhov no yog ib lo lus dag mus mus los los xwb. Txawm yuav yog qhov twg los xij li, qhov “ua zoo pauj phem” ntawd tsuas yog ib lo lus uas cov tib neeg ua zoo ntawm zej zog hais los ua kom cov tib neeg qis txaus siab xwb, thiab tshaj ntawd ntxiv, qhov ntawd yog ib lo lus uas txhawb nqa los muab cov tib neeg qis ua qhev xwb. Txhawb nqa lo lus ntawd los ua kom cov tib neeg tswj hwm lub hwj chim haj yam ruaj khov ntxiv, kom zoo rau cov tib neeg tswj hwm, thiab kom muab tau cov tib neeg qis ua qhev mus ntxiv, es lawv thiaj li tsis yws tab txawm yog lawv ua qhev tau ntau tiam lawm los xij. Los ntawm qhov no peb tuaj yeem pom tau hais tias, nyob rau hauv lub neej zoo li no mas, tej kev cai thiab tej kev coj ua yeej tsis ncaj ncees li; lub neej zoo li no tsis yog tswj hwm los ntawm qhov tseeb, thiab tsis yog kav los ntawm qhov tseeb, kev coj ncaj los sis kev ncaj ncees. Tiam sis, lub neej zoo li no yog tswj hwm los ntawm tib neeg txoj kev phem thiab lub hwj chim xwb, tsis hais leej twg ua nom ua tswv li. Yog cov tib neeg dog dig ua nom ua tswv, los tsuas zoo ib yam xwb. Nov yog lub ntsiab tseeb ntawm zej tsoom sawv daws txoj kev coj ua no. Qhov “ua zoo pauj phem” ntawd muab qhov uas muaj tseeb no nthuav tawm. Sob lus ntawd yeej muaj qee qhov kev nom kev tswv nyob rau hauv--sob lus ntawd yog ib qho kev tim tsum uas tim tsum txog tib neeg txoj kev coj zoo kom ua tau rau cov tib neeg tswj hwm txoj kev tswj hwm thiab txoj kev muab cov tib neeg qis ua qhev ntawd muaj zog tuaj.

Tsis yog hais tias qhov kev tim tsum uas tib neeg ua zoo pauj phem ntawd tsis yog raws li tib neeg tej kev xav tau los sis tej kev tim tsum, los sis tib neeg tus cwj pwm thiab lub meej mom xwb, raws li ib txwm lawm mas, qhov ntawd haj yam tsis yog ib tug qauv zoo rau txoj kev ntsuas qhov zoo ntawm ib tug tib neeg txoj kev ua neej. Qhov kev tim tsum no txawv ntawm txoj kev ua neej tiag tiag deb heev; tsis yog hais tias ua tsis tau xwb, twb tsis tsim nyog txhawb nqa thaum xub thawj li. Qhov ntawd tsuas yog ib lo lus thiab ib lub tswv yim uas cov tib neeg tswj hwm siv los ua kom lawv txoj kev kav thiab kev tswj hwm cov tib neeg coob coob ntawd kom muaj zog tuaj xwb. Raws li ib txwm lawm, Vajtswv yeej tsis txhawb nqa cov lus zoo li no li, tsis hais nyob rau Tiam Muaj Kev Cai, Tiam Hmoov Hlub, los sis Tiam Lub Nceeg Vaj tam sim no li, thiab Vajtswv yeej tsis tau siv hom tswv yim, hom lus, los sis hom kev tim tsum zoo li no los ua ib lub hauv paus rau txoj kev ntsuas qhov zoo ntawm tib neeg txoj kev ua neej li. Qhov no yog vim hais tias, txawm tib neeg zoo thiab tsis zoo, thiab txawm lawv txoj kev coj zoo yuav zoo thiab phem los xij, Vajtswv tsuas xav txog lawv lub ntsiab tseeb xwb—cov lus uas hais txog txoj kev coj zoo no yeej tsis muaj nyob rau hauv Vajtswv qhov kev xav li. Yog li ntawd, cov lus uas hais txog txoj kev coj zoo uas hais tias, “ua zoo pauj phem” ntawd, mas siv tsis tau rau hauv Vajtswv lub tsev, thiab tsis tsim nyog tsom xam txog. Txawm xyov koj puas ua zoo pauj phem, los sis ua pauj kev phem los xij, yog ua cas cov ntseeg Vajtswv thiaj li yuav tsum saib “qhov ua pauj kev phem” ntawd? Lawv yuav tsum saib thiab ua raws li qhov no los ntawm tus cwj pwm dab tsi thiab los ntawm qhov kev xav dab tsi? Yog ib tug tib neeg twg ua ib qho kev phem nyob rau hauv pawg ntseeg, mas Vajtswv lub tsev nws muaj nws tej kev cai tswj fwm thiab tej hauv paus ntsiab lus txog qhov saib xyuas tus tib neeg ntawd—tib neeg tsis tas yuav pauj kev ntsim siab rau tus tib neeg uas raug tsim txom ntawd los sis tiv thaiv tus tib neeg uas raug tsim txom ntawd txog txoj kev tsis ncaj ncees. Tsis tas yuav ua li ntawd nyob rau hauv Vajtswv lub tsev, thiab pawg ntseeg yuav cia li daws qhov teeb meem ntawd raws li tej hauv paus ntsiab lus lawm xwb. Qhov no yog ib qho muaj tseeb uas tib neeg tuaj yeem pom thiab ntsib. Muab hais kom tseeb tseeb thiab meej meej hais tias: Pawg ntseeg muaj tej hauv paus ntsiab lus uas hais txog qhov saib xyuas tib neeg thiab Vajtswv lub tsev muaj tej kev cai tswj fwm. Yog li Vajtswv ne? Hais txog Vajtswv mas, txhua tus tib neeg uas ua kev phem ntawd yuav raug rau txim raws li lub txim ntawd, thiab Vajtswv yuav qhia tias thaum twg thiab yuav rau txim rau lawv li cas. Vajtswv lub hauv paus ntsiab lus uas hais txog txoj kev rau txim ntawd mas yeej cais tsis tau tawm ntawm Nws tus moj yam thiab lub ntsiab tseeb kiag li. Vajtswv muaj ib tug moj yam uas ncaj ncees thiab tawm tsam tsis tau li, Nws muaj hwj chim thiab kev npau taws, thiab txhua tus uas ua kev phem yuav raug Nws rau txim raws li lub txim ntawd. Qhov no loj dua tib neeg tej kev cai, qhov no loj dua txoj kev ua neej thiab tag nrho tej kev cai ntawm lub ntiaj teb. Tsis yog hais tias ncaj ncees, tsim nyog, thiab raws li tib neeg tej kev ntshaw xwb, qhov no kuj tsis cheem tsum kom txhua tus npuaj teg thiab lees paub li thiab. Qhov no tsis cheem tsum kom koj txiav txim rau teeb meem los ntawm lub hwj chim uas siab tshaj plaws. Thaum Vajtswv ua tej no, Nws muaj Nws tej hauv paus ntsiab lus thiab lub sij hawm. Tej no yuav tsum cia rau Vajtswv ua raws li Nws xav ua, thiab tib neeg yuav tsum tsis txhob cuam tshuam, vim qhov no tsis muaj dab tsi cuam tshuam rau lawv. Vajtswv kom tib neeg ua dab tsi txog “qhov ua pauj kev phem” ntawd? Kom lawv tsis txhob ua los sis pauj kev ntsim siab ntawm lwm tus tib neeg yam tsis xyuam xim. Koj yuav tsum ua li cas yog ib tug tib neeg twg tawm tsam koj, ua rau koj ntxhov siab, los sis haj tseem xav rhuav tshem koj thiab? Puas muaj tej hauv paus ntsiab lus los daws tej yam zoo li no? (Muaj.) Muaj tej kev daws thiab tej hauv paus ntsiab lus rau tej no, thiab muaj qhov txhawb nyob rau hauv Vajtswv cov lus thiab qhov tseeb. Tsis hais lwm yam li, cov lus uas hais txog txoj kev coj zoo uas hais tias, “Ua zoo pauj phem” ntawd, kuj tsis yog ib tug qauv los txiav txim rau qhov zoo ntawm tib neeg txoj kev ua neej li thiab. Feem ntau, yog tib neeg muaj peev xwm ua zoo pauj phem, mas tuaj yeem hais tau hais tias lawv siab ntev, nyiam yooj yim, muaj tus yeeb yam zoo, thiab siab loj siab dav heev, tias lawv siab tsis nqaim, thiab tias lawv muaj txoj kev coj zoo uas siv tau. Txawm li cas los xij, lub hauv paus ntawm cov lus no ntsuas puas tau thiab txiav txim puas tau rau qhov zoo ntawm tus tib neeg no txoj kev ua neej? Tsis tau, yeej tsis tau li. Yus kuj yuav tsum saib seb yam lawv caum ntawd yog dab tsi, txoj kev lawv taug, tus cwj pwm uas lawv coj rau qhov tseeb thiab tej uas zoo, thiab lwm yam. Qhov ntawd xwb thiaj li yog tib txoj kev uas los txiav txim seb lawv muaj txoj kev ua neej los tsis muaj.

Qhov peb kawm hnub no los xaus li no xwb.

Peb Hlis 26, 2022