Qhov Nrhiav Qhov Tseeb Yog Dab Tsi (5)

Zaum peb sib txoos ua ke tag los no peb kawm txog dab tsi? (Vajtswv xub qhia txog zaj lus uas hais txog Xausxaus thiab Xaustsib. Tom qab ntawd, Koj qhia txog cov cwj pwm uas tib neeg pom tias zoo ntawd sawv cev rau dab tsi, Koj kuj tau tham txog qee qhov kev tim tsum uas Vajtswv muaj rau tib neeg, thiab kuj tau tham txog ib qho uas tseem ceeb txog qhov tseeb tej hauv paus ntsiab lus uas peb yuav tsum to taub txog qhov kev hwm yus niam yus txiv thiab. Zaum tag los no, peb kawm txog ib lub ncauj lus uas hais txog txoj kev caum qhov tseeb uas haum rau tib neeg tej kev xav phem tshaj plaws. Lub ncauj lus ntawd kuj yog ib lub ncauj lus uas tsis zoo thiab, xws li cov cwj pwm uas tib neeg suav hais tias yog thiab zoo raws li tib neeg tej kev xav phem. Peb tau hais qee yam piv txwv uas hais txog lub ncauj lus no, thiab tom qab ntawd peb tau hais ob peb qho piv txwv ntxiv txog tej kev cheem tsum uas Vajtswv tau muab hais tawm kom ua los tswj tib neeg tus cwj pwm thiab. Tej no yog tej uas peb kawm txog tsis ntau los yeej tsawg lawm. Tsis muaj ntau qhov loj txog qhov kev kawm no, tiam sis peb tau tham ntau yam ntxaws ntxaws txog tib neeg txoj kev paub, txoj kev xyaum ua, thiab lawv txoj kev to taub txog qhov tseeb. Hnub no, peb yuav rov qab saib ceev ceev txog tej no. Muab hais dav dav hais tias, dab tsi uas tib neeg suav hais tias yog cov cwj pwm zoo? Tsis tsim nyog peb muab qhov no xaus los sis muab txhais ua ib lo lus dav dav txog qhov no lod? Nej puas tau txiav txim siab? Nej puas tau kawm txog tej no nyob rau ntawm tej kev sib txoos ua ke? (Peb kawm lawm. Tom qab Vajtswv qhia peb ntau zaus lawm, peb pom tau hais tias cov cwj pwm zoo uas tib neeg suav hais tias yog ntawd tsuas yog ib hom cwj pwm xwb. Cov cwj pwm ntawd tsis sawv cev rau qhov tseeb, cov cwj pwm ntawd tsuas yog tej kev rau tib neeg zais lawv tus kheej xwb.) Raws li qee nqe lus uas tib neeg ntiaj teb tau hais txog cov cwj pwm sab nraud ntawd—lub ntsiab tseeb ntawm cov cwj pwm no yog dab tsi kiag? Ntawm tib neeg lub ntsiab tseeb thiab tib neeg ntiaj teb cov cwj pwm zoo uas tshwm nyob sab nraud ntawd puas muaj tej qho sib txuas ua ke thiab? Cov cwj pwm zoo sab nraud no ua rau zoo li tib neeg coj zoo thiab muaj meej mom heev; cov uas muaj cov cwj pwm no mas lwm tus hwm thiab qhuas heev, lwm tus hwm thiab lwm tus nyiam lawv heev li. Qhov kev nyiam no puas mus raws li lub ntsiab tseeb ntawm tib neeg tus moj yam qias vuab tsuab? (Tsis mus, qhov no tsis mus.) Yog li ntawd, los ntawm qhov kev xam pom no, tus yam ntxwv ntawm tib neeg cov cwj pwm zoo ntawd yog dab tsi? Cov cwj pwm zoo ntawd tsis yog tej kev zoo sab nraud thiab kev zoo nkauj sab nraud xwb lod? (Yog, tsuas zoo sab nraud xwb.) Tej kev zoo sab nraud thiab kev zoo nkauj sab nraud no puas yog tej kev qhia kom pom tseeb txog txoj kev ua neej? (Tsis yog, tej no tsis yog.) Vim li ntawd cov cwj pwm uas tib neeg suav hais tias yog thiab zoo hauv lawv tej kev xav phem ntawd thiaj li tsuas yog tib neeg ntiaj teb tej kev zoo sab nraud thiab kev zoo nkauj sab nraud nkaus xwb. Qhov ntawd yog tus yam ntxwv ntawm cov cwj pwm ntawd. Cov cwj pwm ntawd tsis ua neej li txoj kev ua neej, thiab cov cwj pwm ntawd tsis ua raws li txoj kev ua neej; cov cwj pwm ntawd tsuas yog tej kev ua sab nraud xwb. Tej kev ua no npog tib neeg tus moj yam qias vuab tsuab, tej kev ua no npog tib neeg tus yam ntxwv lub ntsiab tseeb uas phem, thiab tej kev ua no dag lwm tus tib neeg. Tib neeg xyaum coj cov cwj pwm zoo no kom lwm tus thiaj li nyiam, qhuas, thiab hwm xwb—cov cwj pwm zoo li no pab tsis tau tib neeg kom ib leeg ua siab ncaj rau ib leeg, los sis ib leeg hais rau ib leeg los ntawm lub siab dawb paug, yog li ntawd tsis tas yuav hais txog qhov ua neej kom zoo nkaus li tib neeg li. Cov cwj pwm zoo no tsis yog tej kev ua uas yeej nyob rau hauv lub siab uas ncaj ncees lawm, thiab cov cwj pwm zoo no tsis yog cia li tawm ntawm txoj kev ua neej los. Txawm li cas los xij, cov cwj pwm zoo no tsis sawv cev rau tib neeg lub ntsiab tseeb; cov cwj pwm zoo no tsuas yog ib lub ntsej muag dag thiab ntsej muag cuav uas tib neeg looj xwb—cov cwj pwm zoo no yog cov tib neeg ntiaj teb uas qias vuab tsuab tej kev ua kom zoo nkauj xwb. Cov cwj pwm zoo no npog tib neeg ntiaj teb lub ntsiab tseeb uas phem. Qhov ntawd yog lub ntsiab tseeb ntawm tib neeg cov cwj pwm zoo, qhov ntawd yog qhov tseeb uas nyob tom qab cov cwj pwm zoo ntawd. Yog li ntawd, lub ntsiab tseeb ntawm cov cwj pwm uas Vajtswv tim tsum ntawm tib neeg ntawd yog dab tsi? Ob zaug uas peb kawm dhau los ntawd, peb hais txog qee qhov kev ua uas Vajtswv tim tsum thiab yam uas Nws cheem tsum ntawm lawv tus cwj pwm kom tib neeg coj. Tej ntawd hais txog dab tsi? (Tib neeg yuav tsum tsis txhob haus luam yeeb, los sis haus dej haus cawv, thiab lawv yuav tsum tsis txhob ntaus neeg los sis hais lus phem rau lwm tus. Lawv yuav tsum hwm lawv niam lawv txiv, thiab coj zoo tiag tiag. Lawv yuav tsum tsis txhob pe mlom, deev luag poj luag txiv, nyiag, siv lwm tus tej khoom yam tsis tsim nyog, los sis ua tim khawv cuav, thiab lwm yam.) Lub ntsiab tseeb ntawm tej kev tim tsum no yog dab tsi? Lwm lo lus mas hais tias, vim dab tsi es Vajtswv thiaj li tim tsum li no? Tej kev tim tsum no yog tim tsum raws li qhov xwm txheej dab tsi? Tej kev tim tsum no tsis yog tim tsum raws li lub ntsiab thiab raws li qhov tseeb uas tib neeg ntiaj teb raug Ntxwgnyoog muab ua qias vuab tsuab thiab qhov tib neeg muaj tus yam ntxwv txhaum ntawd lod? Thiab tej kev tim tsum no tsis yog nyob rau ntawm txoj kev ua neej xwb lod? Tej kev tim tsum no tsis yog tej uas cov uas muaj txoj kev ua neej tuaj yeem ua tau lod? (Yog, tej kev tim tsum no yog.) Tej kev tim tsum no yog tim tsum raws li qhov xwm txheej tseem ceeb uas tus tib neeg uas muaj txoj kev ua neej ntawd tuaj yeem ua tau nkaus xwb. Yog li ntawd no, lub ntsiab tseeb ntawm cov cwj pwm uas Vajtswv tim tsum ntawm tib neeg ntawd yog dab tsi? Peb puas tuaj yeem hais tau tias qhov ntawd yog qhov tseeb uas zoo nkaus li cov tib neeg dog dig txoj kev ua neej nyob, thiab yog qhov tsawg kawg nkaus uas cov tib neeg dog dig ntawd yuav tsum muaj? Cov piv txwv uas peb tau hais lawm xws li: tias tib neeg yuav tsum coj zoo tiag tiag, thiab tswj lawv tus kheej, thiab tsis txhob ua ywj siab, tias lawv yuav tsum tsis txhob ntaus neeg los sis hais lus phem rau lwm tus, los sis haus luam yeeb, haus cawv, deev luag poj luag txiv, nyiag, los sis pe mlom, thiab tias lawv yuav tsum hwm lawv niam lawv txiv, thiab nyob rau Tiam Hmoov Hlub, kuj tau qhia tib neeg kom ua siab ntev, ua siab dav, thiab lwm yam thiab—tej kev tim tsum uas Vajtswv tau hais tawm kom ua no puas yog kom ua zoo xwb? Tsis yog, Vajtswv tau tsim tus qauv tias tib neeg yuav tsum ua neej li txoj kev ua neej li cas. Qhov Kuv hais tias “tus qauv” yog hais txog dab tsi? Kuv hais txog tej qauv ntawm Vajtswv tej kev cheem tsum. Yog ib tug tib neeg lawm, koj yuav tsum ua neej li cas es thiaj li yuav muaj txoj kev ua neej? Koj yuav tsum ua kom tiav tej kev cheem tsum uas Vajtswv tau hais tawm kom ua ntawd. Peb tsuas sau ib feem ntawm tej kev tim tsum uas Vajtswv tau tim tsum ntawm tib neeg xwb. Tej kev tim tsum xws li tsis txhob ntaus neeg los sis hais lus phem rau lwm tus, haus luam yeeb, haus cawv, deev luag poj luag txiv, los sis nyiag, thiab lwm yam ntawd, yog tej uas cov uas muaj txoj kev ua neej yeej ua tau. Txawm tej no me dua qhov tseeb thiab tsis zoo npaum qhov tseeb los xij, tej no yog tej qauv uas tseem ceeb rau txoj kev ntsuas seb tib neeg muaj txoj kev ua neej los tsis muaj.

Lub ntsiab tseeb ntawm cov cwj pwm uas Vajtswv tim tsum ntawm tib neeg uas peb nyuam qhuav hais txog ntawd yog dab tsi? Ua neej li txoj kev ua neej. Yog ib tug tib neeg twg ua tau lub neej los sis coj tau raws li Vajtswv tej kev tim tsum, ces Vajtswv pom hais tias tus tib neeg no muaj txoj kev ua neej. Qhov muaj txoj kev ua neej ntawd txhais li cas? Qhov ntawd txhais hais tias tus tib neeg ntawd twb muaj tus qauv coj tus cwj pwm uas Vajtswv tim tsum, thiab ua tau raws li tus qauv ntawm txoj kev ua neej, ntawm lawv tus cwj pwm, tej kev ua, thiab qhov lawv ua neej ntawd lawm, vim lawv nthuav tawm thiab ua neej li txoj kev ua neej raws li txoj kev uas Vajtswv tim tsum. Hais puas tau li ntawd? (Tau.) Txawm tib neeg ntseeg Vajtswv thiab tsis ntseeg, txawm lawv muaj txoj kev ntseeg teeb thiab tsis muaj los xij, yog lawv nyiag los ntawm lwm tus tib neeg, dag lwm tus tib neeg, los sis siv lwm tus tib neeg kom yus tau txiaj ntsim; los sis yog lawv pheej siv tej lus qias neeg; los sis yog lawv ntaus neeg thiab ua rau lwm tus tib neeg mob siab thaum lawv tus kheej lub koob lub npe, lub meej mom, lub ntsej muag, los sis lwm yam kev ntshaw ntawd nyob rau qhov kev phom sij, yam tsis muaj qhov ua xyem xyav kiag li lawm; los sis yog lawv haj tseem mus ua txhaum kev deev luag poj luag txiv thiab—yog lawv tseem muaj tej teeb meem no nyob rau hauv txoj kev uas lawv ua neej, tshwj xeeb yog tom qab lawv pib ntseeg Vajtswv lawm no, lawv txoj kev ua neej puas zoo li qub lawm? (Tsis zoo, nws tsis zoo li qub lawm.) Txawm koj yuav ntsuas cov tsis ntseeg los sis cov ntseeg los xij, cov qauv coj tus cwj pwm uas Vajtswv tau tsim tawm los no tsuas yog cov qauv uas qis tshaj plaws thiab tsawg tshaj plaws rau txoj kev ntsuas tib neeg txoj kev ua neej xwb. Muaj ib txhia tib neeg uas, tom qab los ua cov ntseeg lawm, mas tso lawv tus kheej tseg thiab siv lawv tus kheej me ntsis, thiab muaj peev xwm tiv kev txom nyem me ntsis, tiam sis yeej ua tsis tau raws li cov qauv coj tus cwj pwm uas Vajtswv tau tsim tawm los li. Pom tau tseeb hais tias hom tib neeg no tsis ua neej li txoj kev ua neej—lawv twb tsis ua neej kom zoo nkaus li tib neeg kiag li. Nws txhais li cas thaum tib neeg tsis ua neej li txoj kev ua neej? Nws txhais hais tias lawv tsis muaj txoj kev ua neej. Vim lawv twb ua tsis tau raws li cov qauv ntawm tej kev cheem tsum uas Vajtswv muaj rau tib neeg ntiaj teb tus cwj pwm hais txog txoj kev ua neej, lawv txoj kev ua neej mas tsis zoo li, thiab lawv yeej ntsuas tsis zoo xwb. Tus qauv uas tsawg tshaj plaws rau txoj kev ntsuas ib tug tib neeg txoj kev ua neej ces yog saib seb tus tib neeg ntawd tus cwj pwm ua puas tau raws li cov qauv ntawm tej kev cheem tsum uas Vajtswv tau tsim rau tib neeg ntiaj teb tus cwj pwm xwb. Saib seb, tom qab los ntseeg Vajtswv lawm, lawv puas tswj lawv tus kheej; seb lawv puas coj zoo tiag tiag nyob rau hauv yam uas lawv hais thiab ua; seb lawv puas siv lwm tus kom lawv tau txiaj ntsim los sis tsis siv thaum nrog lwm tus sib tham; seb lawv puas ua rau lawv tsev neeg thiab cov kwv tij thiab cov muam hauv pawg ntseeg los ntawm txoj kev hlub, kev ua siab dav, thiab kev ua siab ntev; seb lawv puas ua lawv tej luag hauj lwm kom tiav rau lawv niam lawv txiv kom kawg lawv lub peev xwm; seb lawv puas tseem pe mlom thaum tsis muaj leej twg saib, thiab lwm yam uas zoo li ntawd. Peb tuaj yeem siv tej no los ntsuas tib neeg txoj kev ua neej. Muab qhov seb tib neeg puas nyiam qhov tseeb thiab puas caum qhov tseeb ntawd tso tseg, es xub ntsuas seb lawv puas muaj txoj kev ua neej tso—seb lawv cov lus thiab tus cwj pwm puas ua tau raws li cov qauv coj tus cwj pwm uas Vajtswv tau tsim tseg. Yog lawv ua tsis tau raws li cov qauv coj tus cwj pwm, ces koj ntsuas lawv txoj kev ua neej raws li qhov lawv ua neej los tau, seb yog: nruab nrab, tsis zoo, tsis zoo hlo li, los sis phem heev, raws li qib ntawd—qhov no thiaj li yog. Yog tus ntseeg nyiag khoom thiab nyiag hnab nyiaj thaum lawv mus rau hauv tej khw muag khoom loj los sis tej tshav puam, yog lawv khaus tes no, lawv muaj hom kev ua neej dab tsi? (Kev ua neej tsis zoo.) Muaj ib txhia tib neeg mas qw hais lus phem thiab haj tseem ntaus lwm tus thaum ib yam dab tsi ua rau lawv npau taws thiab. Lawv tej lus thuam mas tsis ncaj ncees txog lwm tus tib neeg lub ntsiab tseeb li, lawv txhob txwm iab liam thiab lawv hais cov lus ruam ruam nkaus xwb. Cov tib neeg zoo li no hais li lawv xav hais kom lawv lub siab thiaj li nqig, tsis zais dab tsi li. Tshwj xeeb yog, ib txhia tib neeg mas hais rau lawv niam lawv txiv, rau lawv cov kwv tij thiab cov muam, rau lawv cov txheeb ze uas yog cov tsis ntseeg, thiab haj tseem hais rau lawv cov phooj ywg uas yog cov tsis ntseeg thiab txog yam uas koj tsis xav hno li, tsam paug koj ob lub pob ntseg. Hom kev ua neej uas hom tib neeg zoo li no muaj yog hom kev ua neej dab tsi? (Kev ua neej tsis zoo.) Koj kuj hais tau hais tias lawv tsis muaj kev ua neej thiab. Tom qab ntawd muaj lwm tus uas lawv ob lub qhov muag mas ntsia ntsoov nyiaj txiag xwb. Thaum cov tib neeg no pom leej twg muaj nyiaj, leej twg noj qab hnav zoo, thiab leej twg muaj ib lub neej nplua nuj, mas lawv xav siv tus tib neeg ntawd kom lawv tau txiaj ntsim tas li xwb. Lawv pheej thov tej yam los ntawm tus tib neeg ntawd ib ub li no, los sis noj tus tib neeg ntawd cov zaub mov thiab siv tus tib neeg ntawd tej khoom, los sis qiv khoom ntawm tus tib neeg ntawd es tsis xa rov qab li. Txawm lawv tsis tau siv lwm tus kom lawv tau txiaj ntsim loj loj, thiab lawv tej kev ua ntawd tsis zoo li yog kev dag ntxias los sis kev noj nyiaj noj txiaj los xij, lawv cov cwj pwm khaus tes no mas qias neeg thiab ntxim ntxub heev, thiab lawv caij tsuj lwm tus. Tshaj ntawd ntxiv, muaj cov uas nyiam qhov zoo nkauj ntawm lwm tus poj niam los sis txiv neej heev. Lawv mas ntsia lwm tus poj niam los sis txiv neej tas li xwb, thiab haj tseem deev luag poj luag txiv, ua txhaum poj niam los sis txiv neej thiab. Cov tib neeg no ib txhia tseem tsis tau muaj cuab muaj yig, hos ib txhia muaj cuab muaj yig lawm—haj tseem muaj ib txhia uas deev luag poj luag txiv thiab txawm lawv twb muaj hnub nyoog lawm. Tshaj ntawd ntxiv, haj tseem muaj ib txhia tib neeg uas poj niam ntxias poj niam txiv neej ntxias txiv neej, es pw ua ke thiab. Qias neeg tiag tiag li. Qhov uas haj yam tsis txaus ntseeg mas yog cov tib neeg uas twb ntseeg Vajtswv tau ntau xyoo lawm, tiam sis tsis ntseeg hais tias qhov tseeb zoo tshaj lwm yam huv si los sis tias Vajtswv cov lus ua tau txhua yam tiav. Cov tib neeg no mas pheej mus ntsib cov saub saib hmoov twj ywm tas li kom qhia lawv txoj hmoo rau lawv, lawv hlawv xyab pe hawm Hauj Sam los sis lwm tus mlom, thiab ib txhia haj tseem siv cov me nyuam roj hmab los foom tsis zoo rau lwm tus tib neeg, los sis nrog cov tuag lawm sib tham, thiab lwm yam uas zoo li ntawd thiab. Txoj kev ua tej khaws koob phem zoo li no mas haj yam yog ib qho teeb meem uas loj tshaj; cov tib neeg zoo li no yog cov tsis ntseeg, thiab lawv tsis txawv cov tsis ntseeg li. Tsis hais tej xwm txheej ntawd yuav loj los me li, thaum tib neeg ua rau pom tseeb li no lawm, ces peb hais tau hais tias lawv ua neej tsis zoo li qub thiab qias neeg lawm, thiab tias lawv cov cwj pwm ib co haj yam yuam kev los sis tsis muaj qab hau lawm—tias cov cwj pwm ntawd yog cov cwj pwm txhaum lawm tiag tiag. Tom qab los ntseeg Vajtswv lawm, ib txhia tib neeg mas hnav khaub ncaws zoo heev, lawv muab qhov saib xev xij ntawd saib tseem ceeb ib yam li cov tsis ntseeg saib thiab, thiab lawv ua raws li tej kev ntawm lub ntiaj teb. Lawv tsis zoo li cov neeg dawb huv kiag li. Ib txhia tib neeg mas hnav khaub ncaws kom ntxim ntxim nyiam thaum lawv mus koom tej kev sib txoos ua ke, tiam sis thaum lawv los txog tsev lawm mas lawv hloov mus hnav cov khaub ncaws uas sawv daws nyiam ntawm cov tsis ntseeg lawm. Los ntawm yam uas lawv hnav ntawd, lawv tsis zoo li cov ntseeg li lawm; lawv thiab cov tsis ntseeg tsis muaj qhov sib txawv li. Lawv luag nyuj nyav thiab tso dag tso luag txog tej yam; lawv ua raws li lawv lub siab nyiam nkaus xwb tsis tswj lawv tus kheej li. Cov tib neeg uas zoo li no puas ua neej li txoj kev ua neej? (Tsis ua, lawv tsis ua.) Lawv caum tej kev ntawm lub ntiaj teb, thiab ua kom xev xij, kom lwm tus nyiam, thiab ua kom tib neeg vwm rau lawv. Lawv tus kheej siv sij hawm tag hnub los hnav khaub ncaws kom zoo zoo, thiab pleev ntsej muag kom ntau ntau, ua kom poj niam los sis txiv neej nyiam. Qhov uas cov tib neeg no ua neej mas tsis zoo hlo li. Lawv twb tswj tsis tau lawv tus kheej txog qhov lawv hnav khaub ncaws, qhov hais lus, thiab qhov coj tus cwj pwm, thiab lawv tsis muaj qhov coj zoo tiag tiag, yog li ntawd thaum peb ntsuas lawv raws li tus qauv coj tus cwj pwm uas Vajtswv tim tsum ntawd, ces yeej pom tau tseeb hais tias txoj kev ua neej uas lawv ua ntawd mas tsis zoo kiag li. Los ntawm cov piv txwv uas muaj tseeb no, peb pom tau hais tias Vajtswv tej kev tim tsum txog tib neeg tus cwj pwm thiab yam uas lawv ua neej ntawd mas mus raws li tej kev tim tsum ntawm txoj kev ua neej tiag tiag—yog li ntawd, cov uas muaj txoj kev ua neej lawm cia li muaj peev xwm ua tau raws li tej kev tim tsum ntawd lawm xwb. Nqe lus no txhais li cas? Nws txhais hais tias koj tsuas muaj qhov zoo nkaus li tib neeg, qhov zoo li ib tug tib neeg dog dig, thiab muaj qib uas tsawg kawg nkaus ntawm txoj kev ua neej yog hais tias qhov no yog qhov uas koj ua xwb. Thaum ua tib zoo saib kom ntxaws ntxaw txog Vajtswv tej kev tim tsum lawm, peb pom tau hais tias qhov ua neej li no mas tsis yog dag, los sis lam ua txuj, los sis ua los dag lwm tus xwb. Tiam sis, nws yog txoj kev uas cov tib neeg dog dig yuav tsum ua, thiab yog qhov tseeb uas yuav tsum muaj. Tsuas yog cov uas ua neej raws li txoj kev ua neej uas tau nthuav tawm no yam tsis dag ib qho me me li xwb mas thiaj li muaj qhov zoo nkaus li tib neeg. Tsuas yog ua neej li txoj kev ua neej no xwb mas lwm tus thiaj li yuav qhuas thiab tau lub meej mom. Thiab tsuas yog ua neej li txoj kev ua neej no thiab muaj qhov coj zoo tiag tiag xwb, mas tej kev uas tib neeg nthuav tawm dog dig ntawd thiaj li yuav ua rau Vajtswv tau koob meej. Vim tom qab ntawd, txhua yam uas koj ua yuav yog yam zoo, thiab yog qhov muaj tiag ntawm yam zoo, thiab yuav tsis yog ib qho uas lam ua txuj xwb. Koj yuav ua neej zoo nkaus li tib neeg raws li Vajtswv tej kev tim tsum.

Lub ntsiab tseeb ntawm tib neeg tus cwj pwm zoo thiab lub ntsiab tseeb ntawm tus cwj pwm uas Vajtswv tim tsum ntawd tau muab piav qhia meej meej thiab tseeb tseeb lawm. Yog li ntawd, tib neeg yuav tsum xyaum ua li cas, thiab lawv yuav tsum ua neej li txoj kev ua neej li cas es thiaj li yuav meej, tsis yog lod? Tib neeg yuav tsis siv zog ua dhau los sis saib tej lus nug txog qhov ua neej li txoj kev ua neej ntawd yam tsis tseem ceeb. Qhov ua neej li txoj kev ua neej ntawd puas muaj feem xyuam rau tej yam tsis tseem ceeb hauv tib neeg lub neej uas tsis muaj dab tsi cuam tshuam rau txoj kev ua neej? Muaj ib txhia tib neeg ruam uas tsis tuaj yeem pom qhov teeb meem no kom tseeb. Lawv hais tias, “Vim Vajtswv qhia tau ntxaws heev, peb kuj yuav tsum tau ua kom ntxaws ntxaws txog txhua kis me me ntawm peb lub neej thiab. Piv txwv li, qos liab muab cub qab dua los muab ci qab dua? Qhov no puas muaj feem xyuam rau qhov ua neej li txoj kev ua neej? Tsis muaj kiag li. Yam uas tib neeg yuav tsum noj thiab qhov lawv yuav tsum noj li cas ntawd tam sim no txhua tus tib neeg yeej paub lawm. Tsuav tsis muaj teeb meem rau qhov noj ib yam dab tsi ntawd xwb, ces koj yeej noj tau yam ntawd li koj xav noj. Yog ib tug tib neeg twg xav hais tias nws yuav tsum tau nrhiav qhov tseeb nyob rau hauv tej yam uas yooj yooj yim zoo li no raws li qhov kev paub, thiab tias nws yuav tsum tau xyaum ua tej yam zoo li no cuag nkaus li tej no yog qhov tseeb no, tus tib neeg ntawd tsis yog ruam thiab tsis paub dab tsi hlo li lod? Tam sim no muaj ib txhia tib neeg uas ua tib zoo ua tej yam zoo li no heev, uas tsis muaj dab tsi cuam tshuam rau qhov tseeb li. Cov tib neeg no xav hais tias lawv tab tom caum qhov tseeb, thiab lawv tshawb xyuas thiab saib tej yam me me ntawd kom meej cuag nkaus li tej yam me me ntawd yog qhov tseeb. Ib txhia haj tseem cav txog tej no ntsej muag liab tag li thiab. Hom teeb meem no yog teeb meem dab tsi? Tsis yog vim tsis muaj kev to taub sab ntsujplig lod? Qhov tseeb uas ib txhia tib neeg nrhiav qhov noj qos liab ntawd, cuag nkaus li qhov ntawd yog qhov tseeb, mas txaus luag thiab meem txom heev. Cov tib neeg zoo li no yog cov tib neeg uas tsis muaj kev cia siab, vim lawv tsis to taub Vajtswv cov lus, thiab lawv tsis paub tias qhov los caum qhov tseeb yog txhais li cas. Lawv tsis tuaj yeem pom tshab plaws txog yam uas nkag siab yooj yim tshaj plaws nyob rau hauv lub neej, thiab lawv daws tsis tau tej teeb meem no—yog li ntawd qhov lawv ua neej nyob los tau npaum li no xyoo ntawd muaj nuj nqis dab tsi? Yog ua cas cov tib neeg no thiaj li muab tej yam uas tsis tseem ceeb zoo li no coj los rau hauv tej kev sib txoos ua ke es tham thiab kawm txog tej no cuag nkaus li tej no yog cov ncauj lus uas lawv tuaj yeem nrhiav tau qhov tseeb? Vim hais tias cov tib neeg no tsis muaj kev nkag siab thiab tsis muaj kev to taub sab ntsujplig. Vim dab tsi lawv thiaj li ua kom ntxaws ntxaws? Vim dab tsi lawv thiaj li ua tib zoo ua? Vim li cas lawv thiaj li muaj tej kev xav thiab tej tswv yim no? Yog ua cas lawv thiaj li tham thiab kawm txog qhov yuav noj qos liab li cas nyob rau hauv tej kev sib txoos ua ke? Puas yog vim tej teeb meem uas Kuv tau qhia txog ntawd tseeb dhau lawm, es qhov no thiaj li ua rau cov tib neeg uas nyiam ntxeev lus thiab saib tsis tseem ceeb ntawd muaj qee qhov kev nkag siab yuam kev? Thaum tej teeb meem thiab tej xwm txheej no tshwm tuaj lawm, Kuv mloog zoo li qhov hais lus rau cov tib neeg no mas me ntsis zoo li saib liab cuag nkaus li cov liab ntawd yog tib neeg. Liab yog cov tsiaj uas nyob rau saum tej toj roob thiab hauv tej hav zoov. Txawm cov liab ntawd zoo li tib neeg, thiab cov liab ntawd cov cwj pwm thiab cov yam ntxwv ntau qhov me ntsis zoo li tib neeg, thiab txawm tias muaj qee lub sij hawm uas tib neeg pom hais tias liab zoo li lawv cov pog koob yawg koob, txawm yuav zoo li cas los xij, liab yeej tseem yog liab. Cov liab ntawd yuav tsum nyob rau hauv hav zoov thiab hauv tej toj roob. Qhov muab cov liab ntawd coj los nyob rau hauv ib lub tsev nrog tib neeg nyob yuav tsis yuam kev lod? Puas tsim nyog peb ua rau liab cuag nkaus li cov liab ntawd yog tib neeg? (Tsis tsim nyog, peb tsis tsim nyog ua li ntawd.”) Yog li ntawd, nej yog liab, los nej yog tib neeg? Yog hais tias nej yog tib neeg, ces txawm Kuv yuav tau tham ntau npaum li cas los sis Kuv yuav tau siv zog ua hauj lwm npaum li cas los xij, qhov Kuv hais tej no rau nej ntawd yeej zoo thiab tsim nyog lawm. Yog hais tias nej yog liab no, puas tsim nyog Kuv ua rau nej li nej yog tib neeg, thiab nkim Kuv txoj pa los tham qhov tseeb thiab Vajtswv tej kev npaj siab rau nej? Puas tsim nyog? (Tsis tsim nyog, nws tsis tsim nyog.) Yog li nej yog tib neeg, los nej yog liab? (Peb yog tib neeg.) Cia siab hais tias, nej yog tib neeg. Nej xav li cas rau qhov kev kawm txog qhov yuav noj qos liab li cas nyob rau ntawm tej kev sib txoos ua ke? Nej puas yuav ua tib zoo kawm txog tej yam zoo li no thiab? Piv txwv li, ib txhia tib neeg nug hais tias: “Kuv yuav hnav khaub ncaws xiav los khaub ncaws dawb? Yog kuv hnav khaub ncaws dawb no, hom dawb li cas? Hom dawb li cas es thiaj li sawv cev rau kev dawb huv, thiab haum rau ib tug neeg dawb huv? Yog xiav haum rau kuv no, hom xiav li cas? Hom xiav li cas es thiaj li haum rau tej kev tim tsum thiab tus qauv uas Vajtswv tim tsum ntawm tib neeg tshaj, thiab ua rau Vajtswv tau koob meej tshaj plaws?” Nej puas tau ua tib zoo ua txog tej no li? Puas muaj leej twg txeev xav hais tias hom qauv plaub hau twg, los sis hom xeeb ceem hais lus twg thiab lub suab twg uas thiaj li haum rau ib tug neeg dawb huv li? Nej puas txeev ua tib zoo ua txog tej no li? Ib txhia tib neeg mas ua tib zoo ua thiab siv zog rau tej no. Muaj ib txhia tib neeg mas txeev nyiam muab lawv cov plaub hau zas kom daj, los sis muab zas kom liab los sis lwm yam kob uas txawv txawv, tiam sis tom qab lawv los ntseeg Vajtswv lawm, lawv pom hais tias cov kwv tij thiab cov muam hauv pawg ntseeg tsis zas lawv cov plaub hau, yog li ntawd lawv thiaj li tsis zas lawm. Tsuas yog tom qab ntau xyoo lawm xwb lawv thiaj li to taub tiag tiag hais tias tej kob los sis tej qauv plaub hau uas yus muaj ntawd tsis tseem ceeb li. Qhov tseem ceeb yog qhov seb yus puas ua neej li txoj kev ua neej, thiab seb yus puas nyiam qhov tseeb xwb. Cov tib neeg uas tau ua tib zoo ua txog tej yam zoo li no uas tsis muaj dab tsi cuam tshuam rau qhov ua neej li txoj kev ua neej ntawd mam li maj mam to taub hais tias qhov siv zog rau tej no mas tsis muaj nuj nqis li, vim tej no tsis muaj feem xyuam rau qhov tseeb kiag li. Tej no tsuas yog ib co teeb meem nyob rau hauv txoj kev ua neej xwb, thiab tej no tsis yog qhov tseeb. Yog txoj kev ua neej uas nej ua ntawd tau raws li Vajtswv tej kev tim tsum thiab tej qauv lawm, ces qhov ntawd txaus lawm. Yav dhau los nej txhua tus tsis ntxhov siab me ntsis txog tej teeb meem no, thiab paub tsis meej txog tej teeb meem no lod? (Ntxhov mas, peb ntxhov siab kawg.) Tab txawm tsis loj npaum li qhov kev sib cav txog qhov yuav noj qos liab li cas nyob rau hauv tej kev sib txoos ua ke los xij, nej kuj ntxhov siab rau tej yam me me uas tsis tseem ceeb ntawm lub neej thiab. Tej no yog tej uas muaj tseeb. Yog li ntawd, tsis tsim nyog muaj ib qho kev txiav txim siab kawg rau tej no lod? Nej puas paub meej tias tej hauv paus ntsiab lus twg uas tib neeg yuav tsum ua raws thaum ua neej li txoj kev ua neej raws li Vajtswv tej kev tim tsum thiab tej qauv? Koj puas paub nrhiav qhov tseeb thaum koj ntsib qee yam xwm txheej nyob rau tom ntej? Ib txhia tib neeg hais tias, “Txawm kuv tsis mus rau qhov loj kawg nkaus, xws li nug tias yuav noj qos liab li cas los xij, yog muaj qee yam teeb meem tshwm sim rau hauv kuv lub neej txhua hnub, mas kuv yeej tseem paub tsis meej li ib pliag thiab.” Yog li ntawd, hais ib qho piv txwv rau Kuv seb—qhov teeb meem dab tsi uas ua rau nej paub tsis meej li ib pliag? Nej puas yuav hais tias qhov cov poj niam pleev ntsej muag ntawd mas tsis yog lawm? Qhov pleev ntsej muag ntawd puas mus raws li Vajtswv tej kev tim tsum kom ua neej li txoj kev ua neej? (Qhov pleev ntsej muag ntawd yeej tsis ua li cas.) Qhov hais tias “tsis ua li cas” ntawd hais txog dab tsi nyob rau ntawm no? (Tsuav yus pleev kom zoo li ib tug neeg dawb huv, es tsis txhob pleev ntau dhau lawm xwb, ces yeej pleev tau.) Tsuav tsis txhob pleev ntau ntau xwb, ces yeej pleev tau. Muaj ib txhia nug hais tias, “Yog qhov pleev ntsej muag ntawd tsuav tsis txhob pleev ntau dhau lawm xwb ces yeej pleev tau, qhov ntawd puas txhais tau hais tias Koj xav kom peb pleev ntsej muag? Kuv puas tau hais li ntawd? (Tsis tau, Koj tsis tau hais.) Qhov pleev ntsej muag ntawd tsis yog ib qho teeb meem, qhov pleev ntsej muag ntawd yeej mus raws li qhov ua neej li txoj kev ua neej. Lub hauv paus ntsiab lus uas txiav txim rau qhov no yog qhov hais tias tsuav qhov pleev ntsej muag ntawd tsis txhob pleev ntau dhau lawm xwb, ces yeej pleev tau. Qhov ntawd yog tus qauv. Yog li ntawd, cov poj niam yuav tsum pleev ntsej muag li cas es thiaj li yuav haum rau qhov ua neej li txoj kev ua neej ntawd? Pleev npaum li cas? Qhov “pleev ntsej muag ntau ntau” ntawd yog pleev li cas Hom pleev li cas es thiaj li hais tias yog pleev ntau ntau? Yog qhia tias pleev txij li cas kom tseeb tseeb, ces tib neeg yeej paub tias yuav ua li cas lawm. Qhov no tsis ntxaws lod? Hais ib qho piv txwv los qhia rau Kuv seb qhov pleev ntsej muag ntau ntau ntawd yog pleev li cas. (Nws yog thaum muab tib neeg lub ntsej muag pleev dawb paug, lawv ob daim di ncauj liab ploog, thiab lawv ob lub qhov muag dub nciab, kom tsis zoo li tib neeg thiab tsis muaj neeg xav saib li.) Thaum tib neeg pom mas ua rau lawv dhia paj paws, zoo li ib tug dab, uas lwm tus tsis pom tus tib neeg ntawd lub cev los sis lub ntsej muag li tib neeg li. Nyob rau qee lub teb chaws thiab qee haiv neeg, nrog rau qee txoj hauj lwm mas, tib neeg pleev ntsej muag ntau heev. Piv txwv li, qhov pleev ntsej muag uas tib neeg pleev nyob rau hauv tej tsev haus dej haus caws thiab tej tsev hmo ntuj ntawd tsis yog ib qho ntawm qhov no lod? Cov tib neeg no puav leej pleev ntsej muag ntau heev, thiab tsis zoo qhov twg tuaj li—lub ntsiab ntawm qhov lawv pleev ntsej muag ntawd ces yog los ntxias lwm tus xwb. Hom pleev ntsej muag li no yog hom pleev ntau ntau. Yog li ntawd, hom pleev ntsej muag li cas es thiaj li yog hom pleev raws li qhov ua neej li txoj kev ua neej? Pleev me me, pleev kom zoo li cov poj niam hauv tej chaw ua hauj lwm, uas zoo li muaj meej mom thiab zoo nkauj xwb. Tsuav koj pleev kom txhob dhau qhov no xwb, ces yeej pleev tau. Nyob rau hauv lub Teb Chaws Suav, mas qhov pleev ntsej muag ntawd cov laus tsis nyiam. Yog ib tug tib neeg dog dig, laus me ntsis uas tsis muaj ib lub meej mom los sis ib txoj hauj lwm nyob rau hauv zej zog li pheej hnav khaub ncaws zoo zoo thiab pleev ntsej muag thaum tawm hauv tsev, mas tib neeg yuav hais tias tus tib neeg ntawd tsis ua raws li nws lub hnub nyoog. Txawm li cas los xij, nyob rau Sab Hnub Poob mas txawv. Yog koj mus ntsib tib neeg los sis mus ua hauj lwm es koj tsis pleev ntsej muag me ntsis thiab tu koj tus kheej me ntsis, mas tib neeg yuav hais tias koj tsis hwm koj txoj hauj lwm, tias koj tsis yog neeg qib siab, thiab tias koj tsis hwm lwm tus tib neeg. Nov yog ib hom kab lis kev cai. Raws li ib txwm mas, nyob rau hauv hom xwm txheej zoo li no, qhov pleev ntsej muag ntawd yuav tsum tau pleev kom txog rau qhov uas zoo li koj muaj meej mom thiab ncaj ncees, thiab zoo li ib tug tib neeg zoo rau lwm tus tib neeg xwb. Muab xaus ua ib kab lus hais tias: Yog koj pleev ntsej muag, mas yuav tsum pleev kom zoo li koj yog ib tug tib neeg zoo, es tsis txhob ua rau tib neeg lub siab muaj qhov xav tau koj—hom pleev ntsej muag zoo li no mas thiaj li zoo. Qhov ntawd yog lub hauv paus ntsiab lus, thiab tsuas yooj yim npaum li ntawd xwb. Ib txhia tib neeg nug hais tias, “Puas ua cas yog kuv tsis pleev ntsej muag thaum kuv tawm hauv tsev? Kuv tsis txeev pleev ntsej muag.” Koj yuav tsum nrhiav hauv Vajtswv cov lus. Vajtswv puas tau hais tias qhov tsis pleev ntsej muag ntawd mas tsis yog lawm? Vajtswv tsis tau hais li no. Vajtswv lub tsev yeej tsis tau kom tib neeg pleev ntsej muag li. Yog koj nyiam pleev ntsej muag, Kuv twb muab tus qauv thiab qhov txwv rau koj, thiab qhia koj tias koj yuav tsum ua li cas es qhov koj pleev ntsej muag ntawd thiaj li yuav zoo lawm. Yog koj tsis nyiam pleev ntsej muag, Vajtswv lub tsev tsis tau kom koj pleev. Txawm li cas los xij, koj yuav tsum nco ntsoov ib qho hais tias: Txawm tsis tau kom koj pleev ntsej muag los xij, koj tsis txhob tawm hauv tsev zoo li niag ntxhov quav niab thiab tsis huv, zoo li ib tug neeg thov khawv. Piv txwv li, thaum koj tawm mus tshaj tawm txoj moo zoo, yog koj tsis tu koj tus kheej kom zoo saib los sis ntxuav koj lub ntsej muag ua ntej tawm hauv tsev mus, thiab hnav khaub ncaws tsis zoo, es ho hais tias, “Tsis ua li cas. Tsuav peb to taub qhov tseeb xwb, qhov peb hnav khaub ncaws li cas ntawd tsis tseem ceeb!” Qhov ntawd puas zoo? Yog ib tug uas ntseeg Vajtswv lawm koj yuav tsum muaj tej hauv paus ntsiab lus rau qhov koj hnav khaub ncaws thiab koj lub ntsej muag thiab. Tus qauv uas tsawg tshaj plaws ntawm lub hauv paus ntsiab lus no yog qhov hais tias koj yuav tsum ua neej li txoj kev ua neej, thiab koj yuav tsum tsis txhob ua ib yam dab tsi uas rhuav Vajtswv ntsej muag, los sis rhuav koj tus kheej tus cwj pwm thiab lub meej mom li. Yam tsawg kawg, koj yuav tsum ua kom lwm tus hwm koj. Tab txawm yog koj tsis mob siab ntseeg los xij, yam tsawg kawg koj yuav tsum muaj peev xwm tswj tau koj tus kheej, thiab ua tus neeg muaj meej mom thiab ncaj ncees, thiab muaj qhov coj zoo tiag tiag. Yog koj tuaj yeem ua tau li no rau tib neeg, ces txaus lawm. Qhov no yog qhov kev cheem tsum uas tseem ceeb tshaj plaws rau qhov ua neej li txoj kev ua neej.

Cov lus nug txog tib neeg cov cwj pwm sab nraud thiab qhov ua neej li txoj kev ua neej no mas yuav tsum tsis yog lub nra los sis tej kev nyuaj rau cov uas ntseeg Vajtswv li, vim cov lus nug no yog yam uas yooj yim tshaj plaws uas yam tsawg kawg ib tug neeg dog dig yuav tsum muaj. Cov teeb meem no tsim nyog to taub yooj yim; cov teeb meem no tsis nyuaj. Yog li ntawd, cov lus nug txog tib neeg cov cwj pwm sab nraud thiab qhov ua neej li txoj kev ua neej no yuav tsum tsis txhob dhau los ua tej teeb meem tseem ceeb uas pheej muab coj los tham tas li nyob rau hauv pawg ntseeg lub neej. Tsuas tham txog cov lus nug no qee zaus xwb ces tsis ua cas, tiam sis yog koj saib cov lus nug no tam li tej ncauj lus uas los nrhiav qhov tseeb, thiab pheej muab cov lus nug no coj los tham, mob siab tham txog cov lus nug no thiab tham tiag tiag, ces koj yuav tsis mob siab rau koj tej dej num zoo lawm. Cov tib neeg twg uas feem ntau yog cov tsis mob siab rau lawv tej dej num zoo? Cov uas muab cov lus nug xws li yuav noj qos liab li cas coj los tham, thiab saib cov lus nug no cuag nkaus li cov lus nug no yog tej ncauj lus uas los nrhiav qhov tseeb, tshawb xyuas thiab kawm txog cov lus nug no nyob rau ntawm tej kev sib txoos ua ke, qee zaus nyob rau ntawm ntau qhov kev sib txoos ua ke thiab, tiam sis cov thawj coj ntawm pawg ntseeg tsis txwv li—tej no tsis yog tej kev qhia kom pom tseeb txog cov tib neeg uas nyiam ntxeev lus thiab cov uas tsis muaj kev to taub sab ntsujplig lod? (Yog, tej no yog.) Cov lus nug dab tsi uas tsim nyog tham ntau tshaj plaws nyob rau hauv tej kev sib txoos ua ke? Cov uas hais txog qhov tseeb thiab tib neeg tus moj yam qias vuab tsuab. Qhov tseeb thiab Vajtswv cov lus yog tej ncauj lus uas tsis hloov pauv nyob rau ntawm pawg ntseeg lub neej; tej uas hais txog lub ncauj lus ntawm cov cwj pwm sab nraud ntawm txoj kev ua neej uas yooj yim tshaj plaws thiab dog dig ntawd yuav tsum tsis yog qhov tseem ceeb ntawm txoj kev kawm nyob rau hauv pawg ntseeg lub neej thiab tej kev sib txoos ua ke. Yog cov kwv tij thiab cov muam sib qhia, sib qhia kom nco, thiab ib leeg qhia ib leeg txog tej no nyob rau sab nraud es tsis yog nyob rau hauv tej kev sib txoos ua ke, ces qhov ntawd txaus los daws tej teeb meem no lawm. Tsis tas yuav siv sij hawm ntau ntau los kawm thiab tham txog cov lus nug ntawd li. Qhov ntawd yuav cuam tshuam rau tib neeg qhov kev sib txoos ua ke li qub thiab qhov noj thiab qhov haus Vajtswv cov lus, thiab yuav muaj ib qho kev cuam tshuam rau lawv txoj kev to taub lub neej txoj sia. Pawg ntseeg lub neej yog ib lub neej uas noj thiab haus Vajtswv cov lus. Qhov tseem ceeb ntawm pawg ntseeg lub neej mas yuav tsum yog kawm txog qhov tseeb thiab daws tej teeb meem uas muaj qab hau xwb, ua li ntawd mas, qhov kev nce qib ntawm yus lub neej thiaj li yuav tsis qeeb. Yog koj muaj kev paub txog txoj kev ua neej, mas koj yuav tsum paub meej tias yuav xyaum ua tej no li cas es thiaj raws li tej hauv paus ntsiab lus. Yog koj pheej mob siab txog tej yam tsis tseem ceeb thiab tej yam uas tsis muaj dab tsi cuam tshuam rau qhov tseeb tej hauv paus ntsiab lus, yog koj pheej ua tej yam uas tsis tsim nyog ua, tiam sis koj xav hais tias koj muaj kev paub thiab muaj kev kawm lawm, yog li ntawd tsis tsim nyog soj ntsuam qhov teeb meem no no lod? Piv txwv li, ib txhia tib neeg saib qhov lawv hnav khaub ncaws ntawd tseem ceeb heev, thiab pheej nug seb cov ntseeg hnav puas tau cov khaub ncaws txawv txawv; ib txhia tib neeg uas nyuam qhuas los ntseeg Vajtswv pheej nug seb cov ntseeg puas tsim nyog haus cawv; ib txhiab tib neeg nyiam ua lag luam, thiab pheej nug seb cov ntseeg puas tsim nyog khwv kom tau nyiaj ntau; thiab ib txhia tib neeg pheej nug hais tias thaum twg Vajtswv hnub mam li los txog. Cov tib neeg no tsis kam nrhiav qhov tseeb hauv tej no kom pom cov lus teb uas yog li. Txawm tsis muaj cov lus hais kom meej meej txog tej no los xij, Vajtswv twb piav qhia tej hauv paus ntsiab lus txog qhov kev daws tej teeb meem no meej meej lawm. Yog tus tib neeg twg tsis rau siab nyeem Vajtswv cov lus, ces tus tib neeg ntawd yuav tsis pom cov lus teb. Tseeb tiag, txhua tus yeej paub lub hom phiaj ntawm txoj kev ntseeg Vajtswv, thiab qhov yuav tau txais los ntawm txoj kev ntseeg Vajtswv ntawd lawm. Tsuas yog hais tias muaj ib txhia tib neeg uas tsis nyiam qhov tseeb, tiam sis tseem xav tau koob hmoov xwb. Qhov ntawd yog qhov kev nyuaj ntawm lawv. Yog li ntawd, qhov uas tseem ceeb tshaj plaws yog qhov seb tus tib neeg ntawd puas tuaj yeem lees txais qhov tseeb xwb. Muaj ib txhia tib neeg mas yeej tsis muab qhov kev noj thiab kev haus Vajtswv cov lus los sis qhov kev kawm txog qhov tseeb ntawd saib tseem ceeb li. Lawv tsuas yog nyiam tej lus nug uas tsis tseem ceeb, thiab lawv pheej xav kawm txog tej lus nug no nyob rau hauv tej kev sib txoos ua ke tas li kom tau cov lus teb meej rau lawv xwb, thiab cov thawj coj thiab cov neeg ua hauj lwm txwv tsis tau lawv li. Hom teeb meem no yog teeb meem dab tsi? Puas yog cov tib neeg no tsis mob siab rau lawv tej dej num zoo? Yog koj tsis xyaum ua qhov tseeb es pheej xav taug txoj kev uas yuam kev xwb, vim li cas koj thiaj li tsis thim xav txog koj tus kheej, kom paub koj tus kheej, thiab soj ntsuam koj tus kheej? Koj ib txwm yog ib tug neeg siab zoo, koj tsis mob siab leg koj tes dej num, koj txhob txwm, koj ua raws li koj txoj cai, raws li lub siab nyiam, thiab ua dog ua dig xwb. Yog ua cas koj tsis paub txog qhov no li? Yog ua cas koj tsis tshawb xyuas thiab soj ntsuam qhov no seb yog ua li cas kiag? Vim li cas koj thiaj li tias tim Vajtswv thiab to taub Vajtswv yuam kev thaum muaj ib yam dab tsi los raug rau koj? Vim li cas koj thiaj li pheej txiav txim siab koj tus kheej, thiab yws hais tias Vajtswv tsis ncaj ncees thiab tias pawg ntseeg coj tsis ncaj? Tej no tsis yog teeb meem lod? Tsis tsim nyog koj kawm thiab soj ntsuam tej teeb meem no nyob rau hauv pawg ntseeg lod? Thaum Vajtswv lub tsev muab pawg ntseeg faib thiab muab tib neeg ntxuav tawm mus ntawd, koj yeej tsis yeem thiab koj yeej tsis txaus siab li, koj muaj tej kev xav phem thiab tshaj tawm txoj kev xav tsis zoo tas li xwb. Qhov no tsis yog ib qho teeb meem lod? Tsis tsim nyog koj tshawb xyuas thiab soj ntsuam qhov teeb meem no lod? Koj pheej caum lub meej mom, thiab khiav kev nom kev tswv, thiab tswj hwm koj lub meej mom tas li xwb. Qhov no tsis yog ib qho teeb meem lod? Tsis tsim nyog koj kawm thiab soj ntsuam tej teeb meem no nyob rau hauv pawg ntseeg lod? Tam sim no pawg ntseeg tab tom ua tes hauj lwm uas yaug kom dawb huv, thiab ib txhia hais tias, “Tsuav tib neeg ua tau lawv tej dej num zoo me ntsis xwb, ces lawv yuav tsis raug muab tshem tawm mus, yog li ntawd yog kuv ua kuv tes dej num kom zoo me ntsis txuas ntxiv thiab tsis raug muab tshem tawm mus xwb, ces qhov ntawd txaus lawm.” Qhov teeb meem nyob rau ntawm no yog dab tsi? Cov tib neeg no tsis yog tawm tsam twj ywm lod? Yog tib neeg nthuav tau hom moj yam uas txawj dag no tawm, tsis tas yuav kho qhov no lod? Tej teeb meem uas cuam tshuam rau tus moj yam qias vuab tsuab thiab tib neeg tus yam ntxwv lub ntsiab tseeb ntawd tsis loj npaum li qhov yuav noj qos liab li cas lod? Tej teeb meem ntawd tsis tsim nyog muab coj los hais, kawm, thiab soj ntsuam nyob rau hauv tej kev sib txoos ua ke thiab hauv pawg ntseeg, kom cov neeg Vajtswv xaiv thiaj li muaj kev thoob tsib to nrog lod? Tej piv txwv txog cov cwj pwm tsis zoo no, tsis zoo lod? Tej teeb meem uas hais txog tus moj yam qias vuab tsuab ntawd mas ntsig txog tib neeg txoj kev hloov pauv tus moj yam ncaj qha xwb, thiab tej teeb meem ntawd cuam tshuam rau tib neeg txoj kev cawm dim. Tej no tsis yog tej teeb meem me me, yog li ntawd vim li cas nej thiaj li tsis kawm txog thiab soj ntsuam tej teeb meem no nyob rau hauv tej kev sib txoos ua ke? Yog nej yeej tsis nrhiav qhov tseeb los daws tej teeb meem uas tseem ceeb zoo li no nyob rau hauv tej kev sib txoos ua ke li, tiam sis nej ho kawm txog tej uas tsis tseem ceeb thiab dhuav dhuav ntawd yam tsis paub xaus li, siv tag nrho qhov kev sib txoos ua ke ntawd los kawm txog ib qho teeb meem me me xwb, tsis muaj peev xwm daws tau tej teeb meem tseem ceeb li, nkim sij hawm thiab—ces tsis yog nej tsis mob siab rau nej tej dej num zoo lod? Yog nej ua li no txuas ntxiv, nej txhua tus yuav dhau los ua cov tib neeg tsis muaj txiaj ntsim uas tsis muaj peev xwm, cov uas tsis meej pem, uas tsis ua lawv tej dej num kom zoo, thiab ua tsis tau raws li qhov tseeb. Nej tsis kawm txog tej uas nej tsim nyog kawm nyob rau hauv tej kev sib txoos ua ke, tiam sis nej ho kawm txog tej uas nej tsis tsim nyog kawm nyob rau hauv tej kev sib txoos ua ke yam tsis paub xaus li. Nej pheej kawm txog tej uas tsis muaj dab tsi cuam tshuam rau qhov tseeb uas yog nej tus kheej tej kev to taub yuam kev thiab tej teeb meem me me ntawm nej tus kheej nyob rau hauv tej kev sib txoos ua ke tas li xwb, ua kom txhua tus nrog nej tshawb xyuas tej ntawd, uas nkim sij hawm yam tsis muaj qab hau dab tsi li. Qhov no tsis yog tsuas cuam tshuam rau cov neeg Vajtswv xaiv txoj kev to taub lub neej txoj sia xwb, qhov no kuj ua rau txoj kev nce qib uas ib txwm nce ntawm pawg ntseeg tes hauj lwm ntawd qeeb thiab. Qhov no tsis yog cuam tshuam thiab tab kaum pawg ntseeg tes hauj lwm lod? Tus cwj pwm zoo li no yuav tau muab suav ua ib qho kev cuam tshuam. Nws yog ib qho kev txhob txwm cuam tshuam, yog li ntawd cov tib neeg uas coj li no yuav tau muab txwv. Yav tom ntej, tej kev sib txoos ua ke yuav tau muab txwv kom los noj thiab haus Vajtswv cov lus, kawm txog qhov tseeb, daws tej teeb meem uas cuam tshuam rau tus moj yam qias vuab tsuab, thiab daws tej kev nyuaj thiab tej teeb meem uas nyob rau hauv tib neeg tej dej num xwb. Tej yam uas me me thiab tsis tseem ceeb los sis tej teeb meem uas txhua hnub yeej paub tias muaj ntawd yuav tsum tsis txhob kawm nyob rau hauv tej kev sib txoos ua ke. Cov kwv tij thiab cov muam yeej daws tau tej teeb meem no los ntawm qhov lawv sib qhia lawv lawm; lawv tsis tas yuav kawm txog nyob rau hauv tej kev sib txoos ua ke.

Yeej ib txwm muaj cov tib neeg uas muaj tej kev to taub yuam kev txog Vajtswv cov lus nyob rau hauv pawg ntseeg uas ua tej yam tsis tsim nyog ua. Thaum Kuv qhia txog tib neeg cov cwj pwm zoo, mas cov tib neeg no siv zog rau lawv tus cwj pwm heev. Lawv tsis paub tias vim li cas peb thiaj li yuav tsum kawm txog tej no li. Qhia Kuv seb, vim li cas peb thiaj li yuav tsum tau kawm txog qhov teeb meem no? Yam uas peb xav tau los ntawm qhov kev kawm txog qhov teeb meem no yog dab tsi? Cia peb xub tham txog tias vim li cas peb thiaj li yuav tsum tau kawm txog qhov teeb meem no tso. Lub ncauj lus uas hais txog tib neeg cov cwj pwm zoo thiab tus qauv rau cov cwj pwm uas Vajtswv tim tsum ntawd yog hais nyob rau thaum twg? Hais nyob rau thaum peb tab tom kawm txog lub ncauj lus uas hais tias “Qhov Los Caum Qhov Tseeb Yog Txhais Li Cas.” Qhov teeb meem no cuam tshuam ncaj qha rau qhov tib neeg yuav tsum caum qhov tseeb li cas. Cov cwj pwm zoo uas tib neeg coj raws li qhov xyaum ua qhov tseeb uas ntsig txog qhov tseeb thiab cuam tshuam rau qhov tseeb ntawd. Txawm tib neeg yuav pom tias tus cwj pwm ntawd zoo npaum li cas los xij, yog tus cwj pwm ntawd tsis muaj feem xyuam rau txoj kev xyaum ua qhov tseeb, ces tus cwj pwm ntawd yog ib yam uas tsis cuam tshuam rau qhov tseeb. Ib txhia tib neeg yuav hais tias, “Qhov ntawd tsis yog! Koj tsis tau hais tias cov cwj pwm zoo ntawd tsis zoo npaum qhov tseeb lod? Kuv tsis to taub li.” Koj piav qhia qhov teeb meem no puas tau? Nyob rau hauv qhov kev kawm txog “Qhov Los Caum Qhov Tseeb Yog Txhais Li Cas” ntawd, Kuv tau soj ntsuam cov cwj pwm uas tib neeg ntseeg hais tias zoo raws li lawv tej kev xav phem ntawd, mas Kuv thuam thiab teem txim rau cov cwj pwm ntawd. Tib lub sij hawm ntawd, Kuv qhia tib neeg txog tus qauv uas Vajtswv tau muab hais tawm txog tib neeg tus cwj pwm, thiab Kuv tau qhia ib txoj kev los ua neej li txoj kev ua neej uas yog rau lawv, yog li ntawd thiaj li ua rau lawv muaj tus qauv los ntsuas qhov kev ua neej li txoj kev ua neej ntawd. Vim qhov no, qhov txiaj ntsim uas thaum kawg Kuv ua tau yog qhia tib neeg hais tias cov cwj pwm uas lawv xav hais tias zoo raws li lawv tej kev xav phem ntawd mas tsis yog tus qauv ntawm qhov tseeb, los sis cov cwj pwm ntawd tsis muaj feem xyuam rau qhov tseeb, thiab cov cwj pwm ntawd tsis cuam tshuam rau qhov tseeb, thiab ua rau tib neeg tsis ntseeg hais tias qhov coj cov cwj pwm zoo no yog txoj kev caum qhov tseeb lawm. Tib lub sij hawm ntawd, Kuv qhia rau tib neeg hais tias tsuas yog thaum lawv ua tau raws li tus qauv coj tus cwj pwm uas Vajtswv tim tsum lawm xwb mas thiaj li yog lawv ua tau raws li cov qauv rau qhov ua neej li txoj kev ua neej. Vim Kuv twb qhia rau tib neeg lawm hais tias tag nrho cov cwj pwm zoo uas tib neeg txhawb ntawd mas dag thiab cuav nkaus xwb, tias cov cwj pwm zoo ntawd puav leej yog ib qho kev ua txuj thiab lam ua rau tib neeg pom xwb, thiab tias cov cwj pwm zoo ntawd puav leej tsis zoo, tias cov cwj pwm zoo ntawd puav leej xyaw nrog Ntxwgnyoog tej kev dag ntxias xwb, tam sim no uas muab tej no tshem tawm mus thiab tsis pub tib neeg coj raws li cov cwj pwm zoo ntawd lawm, lawv tsis paub tias yuav xyaum ua li cas li lawm lod? Lawv xav rau lawv tus kheej hais tias, “Yog li ntawd kuv yuav ua neej li cas? Tus qauv coj tus cwj pwm uas Vajtswv tim tsum ntawd zoo li kiag?” Tej kev tim tsum, tus qauv, thiab cov nqe lus tseem ceeb uas Vajtswv muaj txog tib neeg tus cwj pwm—tsuas yooj yim npaum li ntawd xwb. Tsuav tib neeg ua neej raws li qhov muaj tiag uas Vajtswv tim tsum xwb, ces lawv yuav ua tau raws li cov qauv rau qhov ua neej li txoj kev ua neej lawm. Lawv yuav tsis ua tej yam uas tsis tsim nyog ua, los sis ntxhov siab, los sis paub tsis meej txog qho no lawm. Thaum ib tug tib neeg twg ua tau raws li cov qauv uas cov tib neeg dog dig tsim nyog ua ntawd lawm, tsis yog lawv daws tau qhov teeb meem loj ntawm txoj kev caum qhov tseeb lawm lod? Tsis yog lawv tshem tau qhov teeb meem ntawd tawm mus, thiab daws tau qhov kev cuam tshuam rau qhov ua neej li txoj kev ua neej ntawd lawm lod? Yam tsawg kawg, tam sim no, tej kev ua sab nraud uas tib neeg qhuas, xws li qhov ua ib tug neeg muaj kev kawm siab, thiab paub qab paub hau, siab dawb siab zoo, thiab nyiam ua phooj ywg ntawd, tsis yog tej hom phiaj ntawm tib neeg txoj kev caum ntxiv lawm. Los sis muab hais kom meej meej hais tias, tej ntawd tsis yog lub hom phiaj uas cov tib neeg uas tab tom caum qhov tseeb ntawd siv zog ua neej nyob rau sab nraud, thiab tsis yog tus qauv uas cov tib neeg dog dig tsim nyog ua neej raws ntxiv lawm. Twb muab qhov yuav tsum tswj yus tus kheej, qhov coj zoo tiag tiag, thiab lwm yam los hloov tej ntawd lawm. Vajtswv tej kev tim tsum no yog tus qauv rau tib neeg ua neej li txoj kev ua neej; tej kev tim tsum no yog qhov uas cov tib neeg dog dig yuav tsum ua neej raws. Qhov ua li no, tus yam ntxwv, lub hom phiaj, thiab txoj hauv kev uas yooj yim tshaj plaws rau txoj kev caum qhov tseeb ntawd tsis tau ua tau lod? Qhov uas tseem ceeb thiab yooj yim tshaj plaws ntawd ua tau lawm, uas yog qhov hais tias lub hom phiaj ntawm qhov ua neej li txoj kev ua neej ntawd tsis yog kom tib neeg muaj kev kawm siab thiab paub qab paub hau, paub tab thiab paub cai, siab dawb siab zoo, paub kev paub cai, hwm cov laus thiab saib xyuas cov hluas, thiab lwm yam. Tiam sis, yog kom lawv ua neej li txoj kev ua neej uas Vajtswv tim tsum. Tsis muaj kev dag thiab tsis muaj Ntxwgnyoog tej tswv yim dag ntxias nyob rau hauv qhov no li; tiam sis, qhov no yog txoj kev ua neej, kev nthuav tawm, thiab tus cwj pwm ntawm txoj kev ua neej tiag tiag. Tsis yog li no lod? (Yog, yog li no.) Los ntawm qhov kev xam pom no, thaum peb kawm txog tib neeg cov cwj pwm zoo uas nyob rau hauv lub ncauj lus uas hais txog tej yam uas tib neeg suav hais tias yog thiab zoo hauv lawv tej kev xav phem, thiab qhov kawm txog tus qauv rau tus cwj pwm uas Vajtswv tim tsum ntawd—tej no puas cuam tshuam rau txoj kev caum qhov tseeb? (Cuam tshuam, tej no cuam tshuam.) Yog lawm, tej no yeej cuam tshuam. Qhov no qhia tau meej txog txoj hauv kev thiab lub hom phiaj uas yog lub hauv paus rau tib neeg txoj kev caum qhov tseeb mus rau ib qib lawm. Qhov no txhais hais tias, yam tsawg kawg, koj lub hom phiaj rau qhov ua neej li txoj kev ua neej ntawd twb yog ua ntej koj pib caum qhov tseeb lawm. Lub hom phiaj no tsis yog ib qho uas tib neeg tsim, tsis yog qhov kev zoo nkauj sab nraud, los sis ib qho kev dag. Tiam sis, nws yog txoj kev ua neej li tib neeg ib txwm ua uas Vajtswv tim tsum. Txawm lub ncauj lus no tseem nyob deb ntawm txoj kev caum qhov tseeb tiag tiag los xij, lub ncauj lus no tseem ceeb rau txoj hauv kev uas cuam tshuam rau txoj kev caum qhov tseeb heev. Lub ncauj lus no yog tus qauv uas tsis nyuaj thiab yooj yim tshaj plaws rau tus cwj pwm uas tib neeg yuav tsum to taub. Txawm lub ncauj lus uas peb kawm no yuav nyob deb ntawm txoj kev caum qhov tseeb, thiab nyob deb ntawm tus qauv ntawm qhov tseeb npaum li cas los xij, vim lub ncauj lus no hais txog Vajtswv tej kev tim tsum thiab tus qauv coj tus cwj pwm uas Vajtswv tau muab rau tib neeg lawm, raws li ib txwm mas, lub ncauj lus no kuj hais txog tus qauv ntawm qhov tseeb mus txog rau ib qib thiab. Yog li ntawd, tib neeg yuav tsum to taub tej teeb meem no. Tej kev tim tsum uas Vajtswv tim tsum ntawm tib neeg tus cwj pwm no mas yog tus qauv uas tib neeg yuav tsum ua raws, thiab yuav tsum tsis txhob tsis quav ntsej tej kev tim tsum no. Tom qab to taub tej teeb meem no lawm, yam tsawg kawg tib neeg yuav tsis nrhiav los ua ib hom tib neeg uas muaj kev kawm siab thiab paub qab paub hau, paub tab thiab paub cai, paub kev paub cai, nyiam ua phooj ywg, los sis siab dawb siab zoo nyob rau hauv qhov ua neej li txoj kev ua neej, thiab hauv lawv tej kev ua sab nraud lawm—zoo li cov tib neeg uas nyob rau Sab Hnub Poob, uas tshwj xeeb yog, cov txiv neej yuav tau ua cov txiv neej uas paub tab, qhib qhov rooj rau cov poj niam, rub poj niam lub tog rau poj niam thaum nws yuav zaum, thiab saib poj niam tseem ceeb nyob rau ntawm tej tshav puam—thaum tib neeg muaj kev thoob tsib to nrog txog cov cwj pwm zoo no lawm, yam tsawg kawg lawv yuav tsis muab cov cwj pwm zoo no coj los ua lawv cov qauv thaum lawv siv zog ua neej li txoj kev ua neej, los sis thaum lawv caum cov cwj pwm ntawm txoj kev ua neej ntawd. Tiam sis, lawv yuav muab tej uas nyob rau hauv lawv lub siab lub ntsws no tso pov tseg; lawv yuav tsis raug tej no haub ntxias thiab khi ntxiv lawm. Qhov no yog qee yam uas nej yuav tsum tau ua. Yog muaj qee tus tib neeg uas tseem hais tias, “Tiam sis, tus tib neeg ntawd tsis muaj kev kawm siab thiab tsis paub qab paub hau” no, koj yuav xav li cas? Koj yuav tib laj muag rau tus tib neeg ntawd, thiab qhia rau tus tib neeg ntawd hais tias, “Koj hais tsis yog lawm. Nov yog Vajtswv lub tsev. Qhov koj hais tias ‘muaj kev kawm siab thiab paub qab paub hau’ ntawd yog txhais li cas? Qhov ko tsis yog qhov tseeb, thiab tsis yog qhov zoo nkaus li tib neeg uas peb ua neej.” Ib txhia tib neeg hais tias, “Peb tus thawj coj tsis hwm cov laus thiab tsis saib xyuas cov hluas. Kuv twb muaj hnub nyoog lawm, tiam sis nws tsis hu kuv ua Phauj li, nws tsuas tuav kuv thawj lub npe hu xwb. Tsis tsim nyog nws ua li ntawd. Kuv cov xeeb ntxwv twb laus dua nws lawm! Qhov ua li no tsis yog nws saib tsis taus kuv lod? Nws kuj tsis ua zoo los sis coj zoo rau tib neeg li thiab. Txiav txim los ntawm nws tus cwj pwm mas, zoo li nws tsis phim ua ib tug thawj coj li.” Koj xav li cas rau qhov kev xam pom no? Qhov kev hwm cov laus thiab saib xyuas cov hluas ntawd tsis yog qhov tseeb. Koj yuav tsum tsis txhob ntsuas tib neeg raws li lawv tus cwj pwm sab nraud thiab tej uas pom tau tseeb tseeb xwb, tiam sis yuav tsum ntsuas raws li Vajtswv cov lus, uas muab qhov tseeb los ua koj tus qauv. Tsuas yog tej no xwb thiaj li yog tej hauv paus ntsiab lus rau qhov kev ntsuas tib neeg. Yog li ntawd, peb yuav tsum ntsuas cov thawj coj thiab cov neeg ua hauj lwm li cas? Koj yuav tsum saib seb lawv puas ua tes hauj lwm muaj qab hau, seb lawv puas coj tau cov neeg Vajtswv xaiv los noj thiab haus Vajtswv cov lus kom to taub qhov tseeb, seb lawv puas tuaj yeem siv qhov tseeb los daws tej teeb meem hauv pawg ntseeg thiab ua qee yam hauj lwm uas tseem ceeb kom tiav. Piv txwv li, tes hauj lwm tshaj tawm txoj moo zoo mus zoo li cas lawm? Pawg ntseeg lub neej zoo li cas lawm? Cov neeg Vajtswv xaiv puas ua lawv tej dej num kom zoo? Tag nrho tej hauj lwm tshwj xeeb ntawd nce qib li cas lawm? Puas tau muab cov tsis ntseeg, cov tib neeg phem, thiab cov tawm tsam Khetos rho tawm mus? Tej no yog pawg ntseeg tej hauj lwm uas tseem ceeb. Qhov ntsuas cov thawj coj thiab cov neeg ua hauj lwm ntawd feem ntau yog ntsuas los ntawm qhov saib seb lawv ua tej hauj lwm no zoo npaum li cas xwb. Yog lawv ua tau tej hauj lwm no zoo, ces lawv yog ib tug thawj coj uas muaj peev xwm. Tab txawm yog lawv tus cwj pwm tsis tshua zoo los xij, qhov ntawd tsis yog ib qho teeb meem loj. Qhov tsuas saib cov cwj pwm sab nraud ntawd xwb tsis yog tus qauv rau txoj kev ntsuas seb tus thawj coj los sis tus neeg ua hauj lwm ntawd puas tsim nyog. Yog ib tug tib neeg twg saib qhov no los ntawm tib neeg qhov kev xam pom xwb, ces yuav zoo li tus thawj coj ntawd tsis paub tab vim nws tsis hu tus poj niam laus ntawd ua Phauj los sis pog. Tiam sis yog lawv siv Vajtswv cov lus los ntsuas nws, mas tus thawj coj no yeej ua tau zoo lawm, thiab cov neeg Vajtswv xaiv xaiv tau tus tib neeg yog lawm vim nws ris tau txhua yam ntawm pawg ntseeg tes hauj lwm, nws pab tau thiab muaj txiaj ntsim rau cov neeg Vajtswv xaiv txhua tus txoj kev to taub lub neej txoj sia, thiab nws ua tau tes hauj lwm tshaj tawm txoj moo zoo ntawd zoo. Txhua tus yuav tsum yuav raws li qhov nws coj thiab koom tes rau nws tes hauj lwm. Yog leej twg tsis koom tes rau tus thawj coj no tes hauj lwm, los sis ua kom txhua yam nyuaj rau nws, los sis yog lawv nrhiav kev los ntxias kom lawv thiaj li thuam tau nws vim tus thawj coj no tsis muaj cov cwj pwm zoo sab nraud xws li qhov kev hwm cov laus thiab saib xyuas cov hluas xwb, ces qhov no tsis muaj txiaj ntsim rau pawg ntseeg tes hauj lwm. Qhov no yog ib txoj kev ua uas tsis raws li lub hauv paus ntsiab lus rau tus thawj coj thiab tus neeg ua hauj lwm, thiab qhov no yog ib qho kev qhia kom pom tseeb txog txoj kev tab kaum thiab kev cuam tshuam pawg ntseeg tes hauj lwm xwb. Cov tib neeg zoo li no ua tsis yog lawm; lawv tab tom ua kev phem xwb. Yog koj pom ib tug thawj coj los sis ib tug neeg ua hauj lwm uas tsis hwm nws cov txwj laug, es koj xav hais tias nws tsis yog ib tug tib neeg zoo, thiab koj tsis yuav li qhov nws coj, thiab koj haj tseem thuam nws thiab no, koj ua yuam kev dab tsi? Qhov no yog qhov tsis zoo ntawm txoj kev ntsuas tib neeg uas siv tib neeg cov qauv, raws li tej kev xam pom ntawm txoj kab lis kev cai. Yog txhua tus tuaj yeem ntsuas tib neeg thiab xaiv cov thawj coj thiab cov neeg ua hauj lwm raws li Vajtswv cov lus thiab qhov tseeb, mas qhov ntawd thiaj li yog thiab raws li Vajtswv tej kev npaj siab. Tib neeg ib leeg thiaj li yuav coj ncaj rau ib leeg, thiab ua rau pawg ntseeg tes hauj lwm nce qib li qub. Vajtswv yuav txaus siab, thiab tib neeg yuav txaus siab. Tsis yog li no lod?

Txij thaum Kuv soj ntsuam qhov tib neeg hu ua “cov cwj pwm zoo,” thiab qhia txog cov qauv uas Vajtswv tim tsum ntawm tib neeg tus cwj pwm ntawd lawm, qhov kev xam pom uas tib neeg saib lwm tus, thiab cov qauv uas lawv siv los ntsuas lwm tus ntawd hloov pauv lawm; yog qhov tib neeg pom lwm tus ntawd txawv lawm, ces tej uas tawm los ntawm tib neeg tej kev ntsuas ntawd kuj txawv lawm thiab. Yog tib neeg siv Vajtswv cov lus los ua lub hauv paus ntawm lawv tej kev ntsuas, mas qhov tawm los yeej yuav yog, ncaj ncees, muaj tseeb, thiab txhua tus yeej yuav nyiam xwb. Yog qhov kev xam pom, txoj kev, thiab lub hauv paus ntawm tib neeg tej kev ntsuas ntawd yog tej uas tib neeg xav hais tias yog thiab zoo xwb no, qhov tawm los yuav zoo li cas? Tej zaum qee tus tib neeg yuav cia li iab liam los sis thuam cov tib neeg zoo yam yuam kev ntsuav, los sis tej zaum lawv yuav raug cov neeg ntsej muag ncaj siab nkhaus dag, thiab yuav ntsuas tsis tau tib neeg thiab ua tsis tau kom ncaj ncees rau tib neeg. Yog tib neeg lub hauv paus yuam kev lawm, ces thaum kawg qhov tawm los ntawd yeej yuav yuam kev, tsis ncaj ncees, thiab tsis mus raws li Vajtswv tej kev npaj siab thiab. Yog li ntawd, puas tsim nyog los soj ntsuam thiab kawm txog lub ntsiab tseeb ntawm tib neeg tej kev xav phem txog tus cwj pwm zoo ntawd? Qhov no puas muaj ib qho kev cuam tshuam rau txoj kev caum qhov tseeb li? Tej kev xav phem ntawd cuam tshuam ti heev! Tab txawm lub ncauj lus no tsuas hais txog qhov tib neeg ua neej li txoj kev ua neej, thiab tib neeg tej kev ua thiab tej kev nthuav tawm nyob rau sab nraud xwb los xij, thaum tib neeg muaj tus qauv yog uas Vajtswv tim tsum rau qhov ua neej li txoj kev ua neej ntawd lawm, ces lawv yuav muaj lub hauv paus thiab tus qauv uas yog thiab muaj qauv rau qhov kev ntsuas lwm tus, qhov kev saib tib neeg thiab txhua yam, thiab qhov kev coj lawv tus kheej kom zoo thiab qhov kev ua. Yog li ntawd, nyob rau hauv qhov no, txoj hauv kev, txoj kev, thiab lub hom phiaj ntawm lawv txoj kev caum qhov tseeb ntawd yuav tsis haj yam yog lod? (Yog, haj yuav yam yog.) Qhov ntawd haj yam yuav yog, thiab haj yam muaj qauv. Txawm cov ncauj lus no yooj yim me ntsis los xij, cov ncauj lus no cuam tshuam rau qhov tib neeg saib tib neeg thiab txhua yam, thiab cuam tshuam rau tib neeg txoj kev coj kom zoo thiab tej kev ua uas nyob rau hauv txoj kev uas muaj qab hau, muaj tseeb, thiab ze tshaj plaws ntawd—cov ncauj lus no tsis yog tsis muaj dab tsi kiag li.

Kuv twb hais txog lub ncauj lus uas hais txog tej uas tib neeg suav hais tias yog thiab zoo hauv lawv tej kev xav phem ntawd ntau heev lawm—Kuv Tus Kheej tau hais tag los hais dua kom nej thiaj li to taub hais tias txawm cov ncauj lus no nyob deb ntawm qhov tseeb npaum li cas, thiab cov ncauj lus no tsis mus siab npaum li qhov tseeb los xij, cov ncauj lus no cuam tshuam rau qhov tib neeg saib tib neeg thiab txhua yam, thiab rau tib neeg txoj kev coj kom zoo thiab tej kev ua. Yog li ntawd, tsis txhob saib cov ncauj lus no yam li tsis yog qhov tseeb, los sis yam li yog ib hom kev paub los sis kev xav xwb. Cov ncauj lus no tsis yog tsis muaj dab tsi. Tej yam uas tib neeg suav hais tias yog thiab zoo hauv lawv tej kev xav phem ntawd mas yeej ib txwm nyob rau hauv lawv lub siab, tswj lawv tej kev xav, tswj qhov kev xam pom thiab qhov kev xav uas lawv saib tib neeg thiab txhua yam, thiab qhov lawv coj lawv tus kheej li cas thiab qhov ua li cas ntawd lawm. Yog li ntawd, yuav tsum tau ua tib zoo piav qhia tej no kom meej kom tib neeg thiaj li to taub thiab muaj kev thoob tsib to nrog txog tej no, es tib neeg thiaj li muab tib neeg tej kev xav phem txog tus cwj pwm zoo thiab tej yam uas zoo li no tso tseg, es tsis saib tej no yam li yog qhov zoo, los sis yam li yog tus qauv coj tus cwj pwm rau qhov lawv saib tib neeg thiab txhua yam, thiab rau lawv txoj kev coj kom zoo thiab tej kev ua ntxiv lawm. Tej ntawd yeej tsis yog Vajtswv cov lus kiag li, tsis tas yuav hais tias yog qhov tseeb. Yam uas nej yuav tsum tau ua ces yog kho qhov kev xav thiab tus qauv uas nej saib tib neeg thiab txhua yam, thiab qhov coj nej tus kheej thiab qhov ua ntawd tas li xwb, thiab kuj saib tas li kom meej seb txhua qhov kev xav phem thiab qhov kev xav uas tshwm nyob rau hauv nej lub siab ntawd puas mus raws li qhov tseeb thiab. Nej yuav tsum thim nej tej kev xav phem thiab tej kev xam pom uas tsis yog rov qab tam sid, ces tom qab ntawd ua raws li tus qauv uas yog, thiab saib tib neeg thiab txhua yam, thiab coj nej tus kheej kom zoo thiab ua raws li Vajtswv cov lus, siv tus qauv coj tus cwj pwm uas Vajtswv tim tsum ntawd. Qhov no yog txoj kev xyaum caum qhov tseeb uas tseem ceeb tshaj plaws. Nws kuj yog ib txoj hauv kev thiab ib lub hom phiaj ntawm txoj kev caum uas nej yuav tsum muaj thaum siv zog kom tau txais txoj kev cawm dim thiab kom tau ua neej li txoj kev ua neej ntawd thiab. Ib yam li nej nyuam qhuav mloog cov lus no tag lawm, tej zaum nej yuav tsis to taub txog cov lus no tob los sis zoo, tiam sis tsis txhob txhawj. Tom qab nej paub txog Vajtswv cov lus tob mus ntxiv, thiab tom qab nej soj ntsuam thiab thoob tsib to nrog txog tej uas nej ntseeg hais tias yog nyob rau hauv tej kev xav phem ntawm txoj kab lis kev cai qub ntawd txuas ntxiv lawm, nej yuav muaj peev xwm muab tej uas txoj kab lis kev cai qub hais ntawd tso pov tseg. Nej yuav tsis ntsuas tib neeg tus cwj pwm raws li txoj kab lis kev cai qub ntawd ntxiv lawm; tiam sis, nej yuav ntsuas tib neeg raws li Vajtswv cov lus thiab qhov tseeb lawm xwb. Ua li no, nej thiaj li yuav muab tau txoj kab lis kev cai qub tej kev xav phem rho tawm mus thiab muab tso pov tseg tag nrho. Yog nej tsis to taub qhov tseeb, thiab tsuas to taub tej kev qhuab qhia uas yooj yooj yim xwb, thiab nej paub tias cov cwj pwm uas txoj kab lis kev cai qub tim tsum ntawd mas tsis zoo, ces nej yuav xav hais tias, “Kuv yog ib tug neeg tiam tshiab, tsis zoo li cov tib neeg coob coob ntawm lub ntiaj teb ntawd. Kuv yeej tsis coj raws li yam qub qub thiab kuv yeej tsis nyiam txoj kab lis kev cai qub li, kuv tsis nyiam ua raws li tej kev cai poj ua tseg yawm ua cia thiab tej kev cai uas dhuav dhuav neeg ntawd.” Tiam sis thaum koj saib tib neeg thiab txhua yam, koj yeej tseem siv koj tej kev xav phem yav dhau los los saib thiab ntsuas lawv. Lub sij hawm ntawd, koj mam li paub hais tias txhua yam uas koj hais txog qhov yog ib tug neeg tiam tshiab uas tsis nyiam tej yam qub qub los sis tsis coj raws li tej yam qub qub, thiab yog tus uas tuaj yeem lees txais qhov tseeb ntawd, tseeb tiag yog dag thiab tsis yog lawm, thiab mam li paub tias koj raug koj tus kheej tej kev xav dag lawm. Tsuas yog thaum ntawd xwb koj mam li paub hais tias tej kev xav, tej kev xam pom, thiab tej kev xav phem uas qub qub ntawd twb cog tob rau hauv koj lub siab ntev los lawm, thiab tias tej ntawd tsis ploj mus kiag tam sid thaum koj hloov koj tej kev xav phem los sis muab qee qhov kev xav tso pov tseg ntawd. Qhov hais tias koj yog ib tug tib neeg uas nyob rau tiam tshaib, ib tug neeg tiam tshiab ntawd, tsuas yog ib qho ntiav ntiav xwb; tsuas yog vim koj yug los rau hauv ib tiam txawv thiab lub hnub nyoog txawv xwb, tiam sis txhua yam uas yog yam qub qub thiab tawm tsam Vajtswv, uas txhua tus tib neeg ntiaj teb puav leej paub ntawd yeej nyob rau hauv koj thiab, qhov no yeej muaj tseeb. Tsuav koj tseem yog tib neeg xwb, ces koj yeej yuav muaj tej no nyob rau hauv koj. Yog koj tsis ntseeg qhov no, ces nrhiav kom muaj kev paub ntxiv. Yuav muaj ib hnub uas koj hais “Amees” rau Kuv cov lus no. Cov tib neeg uas tsis muaj kev to taub sab ntsujplig, thiab cov uas khav theeb khav txiv ntawd xav hais tias, “Kuv kawm tiav mav xa tawj thiab dov tawj. Kuv twb ua neej nyob rau hauv lub neej no tau ntau xyoo lawm, thiab kuv twb paub txog txoj kab lis kev cai thiab txoj kev kawm ntawm tiam tshiab lawm, tshwj xeeb yog txoj kev kawm nyob rau Sab Hnub Poob. Yog ua cas kuv thiaj li tseem yuav khaws tej yam qub qub zoo li ntawd? Tej kab lis kev cai yog qhov phem tshaj plaws. Kuv tsis nyiam tej kev cai uas tsis muaj qab hau ntawd kiag li. Thaum kuv tsev neeg los ua ke tham txog tej yam qub qub thiab tej kev cai ntawd, mas kuv tsis xav mloog kiag li.” Tsis txhob maj maj tsis lees. Thaum kawg yeej yuav muaj ib hnub uas koj muab koj tej tswv yim no tso tseg. Koj yuav lees hais tias tsis muaj ib tug tib neeg dog dig uas Ntxwgnyoog muab ua qias vuab tsuab tshaj koj lawm. Txawm koj tsis kam lees txais los sis muab tej kev xav phem qub qub uas nyob rau hauv koj ntawd nthuav tawm los xij, txoj kab lis kev cai qub thiab tib neeg cov poj koob yawm txwv ntawd twb cob thiab qhia koj ntev los lawm. Tej no yeej muaj nyob rau hauv koj tus xeeb ceem, thiab hauv koj tej kev xav thiab tej kev xav phem lawm. Vim li cas zoo li no? Vim txhua kis ntawm txoj kab lis kev cai qub no tsis yog cov nqe lus uas yooj yooj yim, thiab txhua kis no tsis yog tej lus hais thiab tej kev ua uas yooj yooj yim. Tiam sis, txhua kis no yog ib hom kev xav thiab kev tshawb fawb. Txhua kis no muaj qhov cuam tshuam txog qhov dag tib neeg thiab qhov ua rau tib neeg qias vuab tsuab. Tej lus hais thiab tej kev ua no tsis yog los ntawm cov tib neeg qias vuab tsuab los, tej lus hais thiab tej kev ua no yog los ntawm Ntxwgnyoog los. Tsuav koj tseem nyob rau hauv qab Ntxwgnyoog lub hwj chim xwb, ces koj yeej zam tsis dhau qhov raug tej no qhia, dag, thiab ua rau qias vuab tsuab li. Tam sim no uas koj tau hnov Kuv cov lus lawm, koj yuav xav hais tias tej ntawd puav leej muaj tseeb thiab yog qhov tseeb. Thaum koj paub Kuv cov lus no lawm, koj yuav pom hais tias, txawm koj tsis nyiam txoj kab lis kev cai qub, los sis tej kev cai poj ua tseg yawm ua cia thiab tej kev cai uas dhuav dhuav neeg, los sis tej kev cai uas tsis muaj qab hau ntawd los xij, lub hauv paus uas koj saib tib neeg thiab txhua yam, thiab koj txoj kev coj kom zoo thiab tej kev ua ntawd yog los ntawm tib neeg los xwb. Tej ntawd yog qhov tseem ceeb ntawm txoj kab lis kev cai qub, tej ntawd yog tej uas nyob rau hauv txoj kab lis kev cai qub ntag. Qhov koj saib tib neeg thiab txhua yam, thiab koj txoj kev coj kom zoo thiab tej kev ua ntawd tsis yog saib raws li Vajtswv cov lus, uas muab qhov tseeb los ua koj tus qauv. Lub sij hawm ntawd, koj mam li paub, koj mam li muaj peev xwm pom tseeb tseeb hais tias ua ntej tib neeg tau txais qhov tseeb, yog lawv tsis caum qhov tseeb los sis tsis to taub qhov tseeb, mas lawv nqa Ntxwgnyoog cov tshuaj lom, ib feem ntawm Ntxwgnyoog, thiab Ntxwgnyoog tej kev dag ntxias nrog lawv thaum lawv ua neej li txoj kev ua neej uas tseem ceeb tshaj plaws ntawd. Txhua yam uas lawv ua mas tsis zoo, thiab Vajtswv tsis lees paub. Txhua yam ntawd yog sab cev nqaij daim tawv xwb, thiab tsis muaj dab tsi cuam tshuam rau yam zoo uas Vajtswv hais tawm kom ua, thiab nyiam, thiab mus raws li Nws tej kev npaj siab li. Tsis muaj qhov sib tshooj kiag li, tej ntawd tsis muaj qhov zoo sib xws ib qho li. Qhov pom tej teeb meem no kom tseeb tseeb mas tseem ceeb heev, yog tsis li ntawd, tib neeg yuav tsis paub tias qhov los xyaum ua qhov tseeb ntawd yog txhais li cas. Lawv yuav ua raws li cov cwj pwm zoo uas tib neeg ntseeg hais tias yog yam zoo ntawd mus ib txhis li, yog li ntawd lawv tus cwj pwm thiab tej kev qhia kom pom tseeb ntawd yeej yuav ua tsis tau raws li qhov Vajtswv pom zoo li. Yog ib tug tib neeg twg nyiam qhov tseeb, mas tus tib neeg ntawd yuav muaj peev xwm lees txais qhov tseeb thiab caum qhov tseeb. Lawv yuav saib tib neeg thiab txhua yam, thiab coj lawv tus kheej kom zoo thiab ua, kom raws nraim li Vajtswv cov lus, uas muab qhov tseeb los ua lawv tus qauv. Qhov ua li no, lawv yuav muaj peev xwm pib txoj kev ua neej uas Vajtswv tau qhia rau tib neeg lawm. Qhov saib tib neeg thiab txhua yam, thiab qhov coj yus tus kheej kom zoo thiab qhov ua, kom raws nraim li Vajtswv cov lus, uas muab qhov tseeb los ua yus tus qauv ntawd—qhov tseeb lub hauv paus ntsiab lus no mas tseem ceeb thiab tim tsum heev rau tib neeg. Qhov uas yus yuav tsum muaj thaum caum txoj kev cawm dim thiab siv zog ua ib lub neej uas muaj txiaj ntsim ntawd ces yog qhov tseeb lub hauv paus ntsiab lus ntag. Koj yuav tsum lees txais qhov no. Tsis muaj kev xaiv txog qhov no, thiab tsis muaj kev zam rau leej twg li. Yog koj tsis caum qhov tseeb, thiab tsis lees txais qhov tseeb lub hauv paus ntsiab lus no, ces txawm koj laus los hluas, muaj kev paub los tsis muaj, txawm koj yog ib tug tib neeg uas muaj kev ntseeg los yog ib tug tib neeg uas muaj kev ntseeg tsawg, thiab txawm koj yuav nyob rau qib tib neeg twg, los sis koj yuav yog haiv neeg twg los xij, yeej muaj tseeb, uas koj yuav tsis muaj dab tsi cuam tshuam rau tej qauv uas Vajtswv tej tsim ntawd. Yam koj yuav tsum ua yog siv zog saib tib neeg thiab txhua yam, thiab coj koj tus kheej kom zoo thiab ua, kom raws nraim li Vajtswv cov lus, uas muab qhov tseeb los ua koj tus qauv xwb. Qhov no thiaj li yog tib txoj kev uas koj yuav tsum taug xwb. Koj yuav tsum tsis txhob xaiv xaiv, hais tias, “Kuv mam li lees txais tias yam ntawd yog qhov tseeb yog yam ntawd haum rau kuv tej kev xav phem, tiam sis yog yam ntawd tsis haum, kuv yuav tsis kam lees txais yam ntawd. Kuv yuav ua li kuv nyiam, kuv tsis tas yuav caum qhov tseeb. Kuv tsis tas yuav saib tib neeg, teeb meem, thiab txhua yam los ntawm Vajtswv cov lus qhov kev xav; kuv muaj kuv kev xav, thiab tej kev xav ntawd tsim nyog, muaj tseeb, thiab zoo heev. Tej kev xav ntawd tsis txawv ntawm Vajtswv cov lus li, yog li ntawd tej kev xav ntawd yeej hloov tau Vajtswv cov lus thiab qhov tseeb. Kuv tsis tas yuav xyaum ua raws li Vajtswv cov lus txog qhov no, los sis ua raws li cov lus ntawd.” Hom kev xav thiab lub tswv yim ntawm txoj kev caum no tsis yog lawm. Txawm tib neeg tej kev xav yuav zoo thiab yog npaum li cas los xij, tej kev xav ntawd yeej tseem yuam kev. Tej kev xav ntawd yeej hloov tsis tau qhov tseeb li. Yog koj tsis tuaj yeem lees txais qhov tseeb, ces txhua yam uas koj caum ntawd yuav yuam kev. Vim li ntawd Kuv thiaj li hais tias koj tsis muaj kev xaiv txog “qhov saib tib neeg thiab txhua yam, thiab qhov coj koj tus kheej kom zoo thiab qhov ua, kom raws nraim li Vajtswv cov lus, uas muab qhov tseeb los ua koj tus qauv” ntawd li. Yam uas koj ua tau ces yog ua raws li sob lus no, thiab ua kom koj tus kheej paub txog sob lus no, kom maj mam muaj kev paub txog sob lus no, kom paub txog koj tus kheej tus moj yam qias vuab tsuab, thiab kom to taub txog qhov muaj tiag ntawm sob lus no xwb. Tsuas yog thaum ntawd mas lub hom phiaj uas thaum kawg koj ua tau ntawd thiaj li yog lub hom phiaj uas koj yuav tsum ua kom tau los ntawm qhov kev caum qhov tseeb xwb. Yog tsis li ntawd, ces qhov koj siv zog ua hauj lwm, txhua yam uas koj muab tso tseg, thiab txhua qhov kev txom nyem uas koj tau tiv lawm ntawd yuav ploj mus, tej ntawd yuav tsis muaj qab hau dab tsi li. Koj puas to taub?

Qhov los caum qhov tseeb yog txhais li cas? (Los saib tib neeg thiab txhua yam, thiab los coj yus tus kheej kom zoo thiab ua, kom raws nraim li Vajtswv cov lus, uas muab qhov tseeb los ua yus tus qauv.) Qhov ko yog lawm. Xyaum ua raws li cov lus no kom meej pem, ua tiag tiag, thiab ua zoo zoo. Muab sob lus no los ua lub hom phiaj ntawm koj txoj kev caum, thiab qhov muaj tiag ntawm koj lub neej, mas koj thiaj li yuav yog ib tug tib neeg uas caum qhov tseeb. Tsis txhob ua li ub li no, tsis txhob ua raws li tib neeg lub siab nyiam, thiab tsis txhob ntseeg qhov kev xav tias muaj hmoo ntawd ib qho li. Qhov ua li ntawd mas thiaj li yog, thiab koj thiaj li yuav muaj kev cia siab tias yuav tau txais qhov tseeb. Yog li ntawd, puas tsim nyog kawm thiab soj ntsuam txog tib neeg tej kev xav phem txog tus cwj pwm zoo ntawd? (Tsim nyog.) Txoj kev taw qhia thiab txoj kev pab uas zoo uas sob lus no qhia rau nej ntawd yog dab tsi? Cov lus no ua puas tau lub hauv paus thiab tus qauv rau qhov nej siab tib neeg thiab txhua yam, thiab qhov coj nej tus kheej kom zoo thiab qhov ua li cas ntawd? (Tau, cov lus no ua tau.) Yog cov lus no ua tau, ces cia li thov Vajtswv thiab nyeem ob qho kev qhia no kom zoo nyob rau hauv nej tej kev sib txoos ua ke thiab tej kev pe hawm. Thaum koj muaj ib txoj kev to taub zoo txog cov lus no lawm, koj yuav muaj peev xwm saib tib neeg thiab txhua yam, thiab coj koj tus kheej kom zoo thiab ua raws li Vajtswv cov lus tau yam yog heev. Qhov ua li ntawd, koj yuav muaj ib lub hauv paus thiab ib tug qauv rau yam koj hais thiab ua. Koj yuav pom tib neeg tau yam yog heev, thiab qhov kev xam pom thiab tus qauv uas koj saib txhua yam ntawd los kuj yog thiab. Koj yuav tsis saib tib neeg thiab txhua yam raws li koj tej kev xav hauv siab los sis tej kev xav, thiab raws li txoj kab lis kev cai qub los sis tej tswv yim phem ntxiv lawm. Thaum koj muaj lub hauv paus uas yog lawm, ces yam uas tawm los ntawm qhov koj saib tib neeg thiab txhua yam ntawd yeej yuav yog xwb. Tsis yog li no lod? (Yog.) Yog li ntawd, nej tsis tuaj yeem cia li mloog cov lus no los sis muab cov lus no tso tseg. Kuv tsis yog nrog nej sib txoos ua ke thiab qhia txog cov ncauj lus no los laug sij hawm los sis los ua kom Kuv Tus Kheej lom zem xwb vim Kuv laj laj nyob. Kuv ua li no vim tej teeb meem no txhua tus tib neeg puav leej muaj, thiab tej teeb meem no yog tej teeb meem uas tib neeg yuav tsum to taub nyob rau hauv lawv txoj kev caum qhov tseeb thiab txoj kev ua kom tau kev cawm dim. Tiam sis, tib neeg yeej tseem paub tsis meej txog tej teeb meem no. Lawv pheej raug khi thiab daig nyob rau hauv tej teeb meem no. Tej teeb meem no thaiv thiab cuam tshuam lawv. Tib neeg kuj tsis to taub txoj kev uas mus tau txoj kev cawm dim li thiab. Txawm xyov tej teeb meem no yog los ntawm ib qho kev xam pom uas tsis ua hauj lwm los sis ua hauj lwm los, los sis xyov yog los ntawm ib qho kev xam pom uas zoo los sis tsis zoo los los xij, tib neeg yuav tsum ua kom lawv paub tseeb txog tej teeb meem no thiab to taub tej teeb meem no. Ua li no, mas thaum koj ntsib tej teeb meem zoo li no nyob rau hauv lub neej tiag tiag uas yuav tau xaiv, mas koj thiaj li yuav muaj peev xwm nrhiav qhov tseeb; qhov kev xam pom thiab tus qauv uas koj saib qhov teeb meem ntawd thiaj li yuav yog, thiab koj thiaj li yuav muaj peev xwm ua tau raws li tej hauv paus ntsiab lus ntawd. Ua li ntawd, mas koj tej kev txiav txim siab thiab tej kev xaiv thiaj li yuav muaj ib lub hauv paus, thiab mus raws li Vajtswv cov lus. Koj yuav tsis raug tej tswv yim phem thiab tej kev nkag siab yuam kev dag ntxiv lawm; koj yuav tsis ntxhov siab rau Ntxwgnyoog cov tshuaj lom thiab cov lus ruam ruam ntxiv lawm. Ces, thaum hais txog qhov saib tib neeg thiab txhua yam, uas yog qib tseem ceeb tshaj plaws ntawd, koj yuav muaj peev xwm ua raws li qhov muaj tseeb thiab ncaj ncees raws li qhov koj pom ib yam khoom los sis ib tug tib neeg; koj yuav tsis raug koj tej kev xav los sis tej tswv yim phem haub ntxias los sis tswj lawm. Yog li ntawd, txawm qhov paub thiab qhov thoob tsib to nrog txog cov cwj pwm uas tib neeg ntseeg hais tias zoo raws li lawv tej kev xav phem ntawd tsis yog ib qho teeb meem loj nyob rau hauv tus txheej txheem uas caum qhov tseeb los xij, qhov paub thiab qhov thoob tsib to nrog ntawd yeej cuam tshuam rau tib neeg lub neej txhua hnub heev. Lwm lo lus mas hais tias, tib neeg nquag ntsib tej no nyob rau hauv lawv lub neej txhua hnub heev. Piv txwv li hais tias muaj ib yam dab tsi tshwm sim, es koj xav ua li no, tiam sis lwm tus tib neeg xav txawv, ces koj txawm tsis tshua kaj siab rau qhov uas tus tib neeg ntawd coj zoo li ntawd no—koj yuav ua li cas rau tus tib neeg ntawd qhov kev xav? Koj yuav daws qhov no li cas? Yog koj cia li tsis quav ntsej tus tib neeg ntawd ces tsis yog lawm. Vim koj muaj ib qho kev xav los sis ib qho kev ntsuas uas tshwj xeeb txog tus tib neeg ntawd, los sis ib qho kev txiav txim siab uas koj tau txiav txim siab txog tus tib neeg ntawd lawm, tej no yuav cuam tshuam rau koj txoj kev xav thiab txoj kev txiav txim, thiab tej no yuav haub ntxias koj txoj kev txiav txim rau qhov teeb meem no. Vim li ntawd koj yuav tsum ua tib zoo saib tus tib neeg ntawd qhov kev xav uas txawv, kom thoob tsib to nrog txog qhov kev xav ntawd thiab kom pom qhov kev xav ntawd kom tseeb tseeb raws li qhov tseeb. Yog yam uas tus tib neeg ntawd hais mus raws li qhov tseeb tej hauv paus ntsiab lus lawm, mas koj yuav tsum lees txais yam ntawd. Yog koj tsis tuaj yeem pom qhov teeb meem ntawd kom tseeb tseeb, ces thaum koj ntsib ib qho xwm txheej los sis ib tug tib neeg zoo li no dua, koj yuav paub tsis meej, npaj tsis txhij, ntxhov siab, thiab npau taws tas li. Ib txhia tib neeg haj tseem ua tib zoo ntsuas los kho thiab daws qho xwm txheej ntawd thiab, uas qhov tshwm sim thaum kawg tsis muaj leej xav pom li. Yog koj siv cov qauv ntsuas uas Vajtswv tim tsum ntawd los saib tib neeg, mas qhov tshwm sim thaum kawg yeej yuav zoo thiab yog qhov zoo xwb—neb yuav tsis muaj kev cov nyom, thiab neb yuav sib haum xeeb. Txawm li cas los xij, yog koj siv Ntxwgnyoog lub tswv yim thiab cov qauv ntawm tib neeg tej kev xav phem txog tus cwj pwm zoo ntawd los saib tus tib neeg ntawd, ces thaum kawg neb yeej yuav sib tawm tsam thiab sib cav xwb. Qhov tshwm sim yuav yog qhov hais tias neb yuav tsis sib haum, thiab yuav muaj ntau yam tshwm sim tom qab ntawd xws li: Neb ib leeg yuav rhuav tshem ib leeg, ib leeg yuav thuam ib leeg, thiab ib leeg yuav txiav txim rau ib leeg, thaum muaj tej yam loj loj mas neb haj tseem yuav sib ntaus thiab, ces thaum kawg, neb ob leeg raug mob thiab plam txhua yam xwb. Tsis muaj leej twg xav pom qhov ntawd li. Yog li ntawd, tej uas Ntxwgnyoog muab cog rau hauv tib neeg mas yeej pab tsis tau lawv saib ib tug tib neeg twg los sis ib yam khoom twg kom muaj tseeb, kom ncaj ncees, los sis kom tsim nyog li. Tiam sis, thaum tib neeg saib thiab ntsuas ib yam khoom twg los sis ib tug tib neeg twg raws li tus qauv coj tus cwj pwm uas Vajtswv tim tsum thiab tau qhia rau tib neeg lawm, thiab raws li Vajtswv cov lus thiab qhov tseeb, mas qhov tshwm sim thaum kawg yeej yuav muaj tseeb xwb, vim qhov saib thiab ntsuas ntawd tsis muaj qhov tsis xyuam xim, los sis tsis muaj tib neeg tej kev xav hauv siab thiab tej kev xav. Tsuas yog yam zoo tawm ntawm qhov no los xwb. Raws li qhov no, yam uas tib neeg yuav tsum lees txais ntawd yog dab tsi: tib neeg tej kev xav phem txog yam zoo, los sis tus qauv coj tus cwj pwm uas Vajtswv tim tsum? (tus qauv coj tus cwj pwm uas Vajtswv tim tsum.) Nej txhua tus yeej paub lo lus teb txog lo lus nug ntawd lawm, thiab yeej teb tau lo lus nug ntawd yog heev. Yog li ntawd, peb yuav muab qhov peb kawm txog lub ncauj lu no tso tseg rau ntawm no. Yam uas nej yuav tsum tau ua nyob rau tom ntej ces yog xav txog tej no thiab kawm txog tej no txuas ntxiv, muab tej teeb meem no tso kom muaj qib muaj dua, tsim ntau lub hauv paus ntsiab lus txog qhov kev xyaum ua thiab tej kev xyaum ua ntawd, ces tom qab ntawd yeej meem tiv thiab nyiaj tej teeb meem ntawd txuas ntxiv nyob rau hauv koj lub neej txhua hnub, kom to taub txog qhov muaj tiag ntawm cov lus no. Raws li ib txwm lawm, qhov kev to taub txog qhov muaj tiag ntawm cov lus no mas yog thawj qhov tseeb qhov muaj tiag uas tib neeg caum kom to taub. Ua li no mas, vim txoj kev tau ntsib tau pom ntawd, tib neeg thiaj li maj mam hloov txoj kev to taub thiab kev paub txog txhua feem ntawm lub ntsiab ntawm qhov kev kawm no, thiab lawv thiaj li maj mam tau txais los ntawm ntau qhov kev xam pom uas sib txawv ntawd. Koj yim tau txais, ces koj txoj kev paub uas tau ntsib tau pom thiab qhov kev to taub txog cov lus no yim tob xwb. Koj yim to taub thiab tau ntsib tau pom txog cov lus no tob, ces koj txoj kev to taub thiab txoj kev paub uas tau ntsib tau pom txog qhov koj saib tib neeg thiab txhua yam, thiab koj txoj kev coj kom zoo thiab tej kev ua ntawd yim tob xwb. Tiam sis, yog koj tsis to taub txog cov lus no kiag li, es cia li saib thiab to taub cov lus no lub ntsiab lus ncaj ncaj xwb, es tso tseg li ntawd lawm, ua neej li koj ib txwm ua, tsis nrhiav qhov tseeb thaum muaj teeb meem tshwm tuaj, thiab tsis muab tej teeb meem ntawd coj los piv rau Vajtswv cov lus, los sis tsis daws tej teeb meem ntawd raws li Vajtswv cov lus, ces koj yeej yuav tsis muaj hnub to taub txog qhov muaj tiag ntawm Vajtswv cov lus li. Qhov hais tias koj yeej yuav tsis muaj hnub to taub txog qhov tseeb qhov muaj tiag ntawd li yog txhais li cas? Qhov ntawd txhais hais tias koj tsis yog tus tib neeg uas nyiam qhov tseeb, thiab koj yeej yuav tsis xyaum ua qhov tseeb, vim koj yeej yuav tsis saib tib neeg thiab txhua yam, los sis coj koj tus kheej kom zoo thiab ua raws li Vajtswv cov lus, uas muab qhov tseeb los ua koj tus qauv li. Koj hais tias, “Kuv yeej tseem ua neej zoo tab txawm kuv tsis muab Vajtswv cov lus coj los ua kuv lub hauv paus, los sis muab qhov tseeb coj los ua kuv tus qauv.” Qhov koj hais tias “ua neej zoo” ntawd yog txhais li cas? Txhua yam puas mus zoo tsuav koj tsis tuag xwb? Lub hom phiaj uas koj caum ntawd tsis yog kom tau txoj kev cawm dim, thiab koj tsis lees txais qhov tseeb los sis tsis to taub qhov tseeb, tiam sis koj hais tias koj ua neej zoo lawm. Yog hais tias yog li ntawd, koj lub neej tsis zoo kiag li, thiab txoj kev ua neej uas koj ua ntawd mas qis heev. Muab hais yooj yooj yim hais tias, koj zoo li ib tug dab dua zoo li ib tug tib neeg, vim koj tsis noj thiab haus Vajtswv cov lus thiab koj tsis to taub qhov tseeb, koj tseem ua neej raws li tus moj yam phem thiab tej tswv yim phem xwb—koj tsuas yog ib tug ib dab uas hnav tib neeg daim tawv nqaij xwb. Ib tug tib neeg uas zoo li no lub neej muaj qhov zoo thiab muaj qhov muaj nuj nqis dab tsi? Lub neej ntawd tsis muaj txiaj ntsim rau koj los sis rau lwm tus li. Lub neej uas zoo li no mas tsis zoo—nws tsis muaj nuj nqis.

Nej puas paub tias vim li cas Kuv thiaj li qhia thiab soj ntsuam txog tej kev xav phem qub qub thiab txoj kab lis kev cai qub no nyob rau hnub no? Puas yog vim kuv tsis nyiam tej ntawd? (Tsis yog, tsis yog vim li ntawd.) Yog li qhov tseem ceeb ntawm qhov kev qhia txog cov ncauj lus no yog dab tsi? Lub hom phiaj kawg ntawm qhov kev qhia no yog dab tsi? (Qhov kev qhia ntawd pab peb saib kom meej seb cov cwj pwm thiab tej kev qhia kom pom tseeb twg uas peb tseem muaj uas yog tswj los ntawm txoj kab lis kev cai qub, thiab ua neej raws li tej tswv yim phem. Tom qab peb to taub txog qhov tseeb thiab muaj kev thoob tsib to nrog lawm, peb yuav muaj peev xwm ua neej li txoj kev ua neej raws li tej kev tim tsum thiab tus qauv uas Vajtswv tau muab rau peb lawm, thiab taug txoj kev uas caum qhov tseeb.) Qhov no yog lawm, tiam sis yuav tau hais ntau me ntsis. Lo lus teb uas yooj yim thiab ncaj tshaj plaws yog lo twg? Qhov kev qhia txog cov ncauj lus no tsuas muaj tib lub hom phiaj xwb, lub hom phiaj ntawd yog ua kom tib neeg to taub tias qhov tseeb yog dab tsi, thiab qhov kev xyaum ua qhov tseeb ntawd yog dab tsi. Thaum tib neeg paub meej txog ob qho no lawm, lawv yuav muaj kev thoob tsib to nrog txog cov cwj pwm zoo uas txoj kab lis kev cai qub txhawb nqa ntawd. Lawv yuav tsis saib cov cwj pwm zoo ntawd yam li yog cov qauv rau txoj kev xyaum ua qhov tseeb los sis rau txoj kev ua neej kom zoo nkaus li tib neeg ntxiv lawm. Tsuas yog to taub txog qhov tseeb xwb mas tib neeg thiaj li yuav muab tau txoj kab lis kev cai qub ntawd txoj xaw hlau khi daws pov tseg, thiab muab tau lawv tej kev to taub thiab tej kev xam pom txog txoj kev xyaum ua qhov tseeb thiab cov cwj pwm zoo uas yuam kev uas tib neeg muaj ntawd tso pov tseg. Tsuas yog ua li no xwb mas tib neeg thiaj li yuav xyaum ua tau qhov tseeb thiab caum tau qhov tseeb yam yog heev. Yog tib neeg tsis paub tias qhov tseeb yog dab tsi es lawv muab txoj kab lis kev cai qub coj los ua qhov tseeb xwb, ces txoj hauv kev, tej hom phiaj, thiab txoj kev uas lawv caum ntawd yuav yuam kev tag nrho. Lawv yuav ncaim ntawm Vajtswv cov lus, ua txhaum qhov tseeb, thiab yuam kev ntawm txoj kev tseeb mus lawm. Thaum zoo li ntawd lawm, ces lawv taug lawv tus kheej txoj kev thiab mus yuam kev lawm xwb. Yog tib neeg tsis to taub qhov tseeb tsis muaj peev xwm nrhiav qhov tseeb thiab xyaum ua qhov tseeb no, thaum kawg yuav zoo li cas? Lawv yuav tsis tau txais qhov tseeb. Thiab yog lawv tsis tau txais qhov tseeb, ces txawm cov tib neeg ntawd yuav siv zog ntseeg npaum li cas los xij, qhov ntawd yuav tsis muaj qab hau dab tsi li. Yog li ntawd, qhov kev qhia thiab kev soj ntsuam nyob rau hnub no txog tej kev xav phem uas qub qub no thiab tej lus hais txog txoj kab lis kev cai qub no mas yog ib lub ncauj lus uas tseem ceeb thiab muaj nqis heev rau txhua tus ntseeg. Nej ntseeg Vajtswv, tiam sis nej puas to taub tias qhov tseeb yog dab tsi tiag tiag? Koj puas paub tias yuav caum qhov tseeb li cas tiag tiag? Nej puas ruaj siab txog nej tej hom phiaj? Nej puas ruaj siab txog nej txoj kev? Yog koj tsis ruaj siab txog ib yam dab tsi li, koj yuav ua li cas caum tau qhov tseeb? Koj puas yuav caum yam tsis yog? Koj puas yuav yuam kev ntawm txoj kev ntawd? Ntxim li yeej yuav zoo li no xwb. Yog li ntawd, txawm cov lus uas Kuv tab tom qhia nyob rau hnub no zoo li yooj yooj yim nyob rau saum daim tawv, cov lus uas tib neeg to taub kiag tam sim ntawd thaum lawv hnov cov lus ntawd, uas raws li nej qhov kev xam pom mas, zoo li twb tsis tsim nyog hais txog cov lus no li los xij, lub ncauj lus no thiab lub ntsiab no cuam tshuam ncaj qha rau qhov tseeb, thiab rau Vajtswv tej kev tsim tsum ntag. Qhov no yog qhov uas nej feem coob tsis paub txog. Txawm nej to taub tias txoj kab lis kev cai qub thiab tib neeg ntiaj teb tej kev sib raug zoo tsis yog qhov tseeb, thiab tias tej kev cai poj ua tseg yawm ua cia ntawm haiv neeg thiab tej kev xyaum ua ntawd yeej tsis yog qhov tseeb raws li txoj kev qhuab qhia los xij, nej puas pom lub ntsiab tseeb ntawm tej no kom tseeb tiag tiag? Nej twb muab tej uas muab nej khi no daws pov tseg tiag tiag lawm lod? Tsis tas muab li. Vajtswv lub tsev yeej tsis cheem tsum kom tib neeg siv zog kawm txog txoj kab lis kev cai, tej kev cai poj ua tseg yawm ua cia, thiab tej kev xyaum ua ntawm haiv neeg li, thiab Vajtswv lub tsev yeej tsis tau kom tib neeg lees txais ib yam dab tsi los ntawm txoj kab lis kev cai qub ntawd li. Vajtswv lub tsev yeej tsis tau hais txog tej no li. Txawm li cas los xij, lub ncauj lus uas Kuv tab tom qhia txog hnub no mas tseem ceeb heev. Kuv yuav tsum tau hais qhov no kom meej meej kom nej thiaj li to taub. Lub hom phiaj uas Kuv hais tej no yog kom tib neeg to taub qhov tseeb thiab Vajtswv tej kev tej kev npaj siab xwb, tiam sis nej txhua tus puas to taub yam uas Kuv tab tom hais? Yog nej ua tib zoo mloog me ntsis, tiv kev txom nyem me ntsis, thiab siv zog me ntsis rau qhov no, thaum kawg nej yuav tau txiaj ntsim nyob rau hauv qhov no thiab muaj kev to taub txog qhov tseeb no. Thiab los ntawm qhov kev to taub txog qhov tseeb no, thiab tom qab ntawd nrhiav kev los nkag rau hauv qhov tseeb qhov muaj tiag, mas nej yuav tau txais txiaj ntsim yooj yim heev.

Muaj ib yam uas tib neeg suav hais tias yog thiab zoo nyob rau hauv lawv tej kev xav phem uas peb kawm txog yav dhau los ntawd mas yog tib neeg tus cwj pwm zoo. Lwm yam yog dab tsi? (Kev ua zoo thiab qhov zoo ntawm tib neeg txoj kev ua neej.) Muab hais yooj yooj yim ces hais tias, qhov ntawd yog tib neeg txoj kev coj zoo xwb. Txawm cov tib neeg uas qias vuab tsuab puav leej ua neej raws li lawv tus moj yam phem xwb los xij, lawv txawj zais lawv tus kheej heev. Ib qho ntxiv rau cov lus uas cuam tshuam ntawd tshwj xeeb yog tej kev zoo sab nraud thiab cov cwj pwm, lawv kuj tau tsim ntau cov lus thiab tej kev cheem tsum uas hais txog tib neeg txoj kev coj zoo thiab. Cov lus twg uas hais txog txoj kev coj zoo uas hais txog tib neeg? Teev cov uas nej paub thiab paub tsawm tsawv seb, es peb mam li xaiv ob peb lo lus uas sawv daws paub los soj ntsuam thiab kawm txog. (Tsis txhob muab cov nyiaj uas koj khaws ntsaws hnab tsos. Zoo siab thaum pab lwm tus.) (Yog leej twg tau pab koj lawm koj yuav tsum pauj rov qab.) (Tso koj tus kheej tej kev ntshaw tseg txhawm rau lwm tus.) (Ua zoo pauj phem.) (Poj niam yuav tsum tsim txiaj, siab zoo, paub tab, thiab ua zoo.) (Coj nruj rau koj tus kheej hos ua siab ntev rau lwm tus.) Yog lawm, tag nrho cov ko puav leej yog cov piv txwv zoo. Tsis tas li ntawd xwb, muaj qhov hais tias, “Thaum haus cov dej ntawm lub qhov dej, yus yuav tsum tsis txhob hnov qab tus uas khawb lub qhov dej ntawd,” “Yog koj ntaus lwm tus, tsis txhob ntaus lawv lub ntsej muag; yog koj hais txog lwm tus, tsis txhob hais txog lawv qhov tsis zoo,” thiab “Kev txiav caj dab tsuas ua rau taub hau tu xwb; ua siab dawb siab zoo li ua tau.” Tag nrho cov no puav leej yog tej kev cheem tsum uas hais txog tib neeg txoj kev coj zoo xwb. Puas muaj lwm qhov lawm? (Txawm tib neeg pab koj me me xwb los koj yuav tsum pauj rov qab kom ntau.) Qhov no kuj yog ib qho kev cheem tsum uas tib neeg ntiaj teb txoj kab lis kev cai tau muab hais tawm kom ua txog tib neeg txoj kev coj zoo, thiab yog ib tug qauv rau txoj kev ntsuas tib neeg txoj kev coj zoo thiab. Dab tsi ntxiv thiab? (Tsis txhob ua rau lwm tus li koj tus kheej tsis xav kom lawv ua rau koj.) Qhov no yog ib qho yooj yim me ntsis, kuj suav thiab. Kuj muaj qhov hais tias, “Kuv mam li thaiv mos txwv,” “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv,” “Yuav tsum tsis txhob cia kev muaj txiag nplua nuj ua rau koj qias vuab tsuab, tsis txhob cia kev pluag hloov tau koj, los sis tsis txhob cia kev quab yuam yuam tau koj,” thiab “Rau siab ua hauj lwm thiab siv zog ua kom zoo tshaj plaws kom txog hnub koj tuag” thiab. Cov no tsis yog lwm qhov piv txwv lod? (Yog, cov ko yog kawg.) Qhov no thiab uas hais tias, “Cov kab mos ntawm lub caij nplooj ntoos hlav ntawd cab sab mus txog rau thaum cov kab mos ntawd tuag, thiab tswm ciab kub mus txog thaum nws cov roj tag.” Saib seb lawv qhov kev cia siab siab npaum li cas rau tib neeg txoj kev coj thiab txoj kev coj kom zoo! Lawv xav kom tib neeg kub mus tag tib neeg lub sim neej zoo li tus tswm ciab es mus ua tshauv lawm xwb. Tib neeg tsuas xav kom muaj tus cwj pwm zoo thaum lawv coj lawv tus kheej kom zoo li no xwb. Qhov no tsis yog ib qho kev cia siab siab lod? (Yog, qhov ko yog kawg.) Tib neeg raug cov no uas nyob rau ntawm txoj kab lis kev cai qub ntawd haub ntxias thiab khi tau ntau txhiab xyoo lawm, yog li ntawd qhov txiaj ntsim yog dab tsi? Lawv puas ua neej zoo nkaus li tib neeg? Lawv puas ua lub neej uas muaj nuj nqis? Tib neeg ua neej txhawm rau tej uas txoj kab lis kev cai qub tim tsum no xwb, siv lawv lub neej hluas, los sis haj tseem muab tag nrho lawv lub neej siv rau tej no thiab, thiab ntseeg txhua lub sij hawm hais tias lawv lub neej mas txaus siab thiab tau koob meej heev. Thaum kawg, thaum lawv tuag, lawv tsis paub tias lawv tuag rau dab tsi, los sis xyov qhov lawv tuag ntawd puas muaj nuj nqis thiab txiaj ntsim ib qho li, los sis xyov lawv ua puas tau raws li tus Tswv Tsim lawv tej kev tim tsum li. Tib neeg yeej tsis paub dab tsi txog tej no li. Lwm cov lus thiab tej kev cheem tsum dab tsi uas txoj kab lis kev cai qub ntawd tau hais txog tib neeg txoj kev coj zoo? “Txhua tus tib neeg puav leej koom txoj hmoo ntawm lawv lub teb chaws,” thiab “Ua kom zoo tshaj plaws los leg yam uas lwm tus tib neeg tau muab tso rau koj ua lawm kom ncaj ncees,” cov no tsim nyog lawm. Kuj muaj qhov hais tias, “Tus txiv neej uas paub tab lo lus mas yog nws lo lus cog tseg” thiab, qhov no yog ib qho kev cheem tsum uas hais txog tib neeg txoj kev ntseeg siab. Puas muaj lwm qhov ntxiv lawm? (Tawm hauv cov av nkos los tiam sis tsis lo av, da cov dej ntshiab ntshiab tiam sis tsis huv.) Sob lus no tau tshooj lub ncauj lus no qee qhov lawm. Kuv xav hais tias peb teev cov piv txwv no txaus lawm. Cov lus uas peb nyuam qhuav hais txog nrog rau tej kev cheem tsum uas tau hais tawm txog tib neeg txoj kev mob siab, kev hlub teb chaws, kev ntseeg siab, kev tsis ua nkauj ua nraug, nrog rau tej hauv paus ntsiab lus rau qhov nrog lwm tus sib tham, thiab qhov tib neeg yuav tsum ua li cas rau tus uas tau pab lawv lawm, los sis yuav pauj lub siab zoo ntawd li cas, thiab lwm yam. Cov lus no muaj ib co yooj yim me ntsis, hos ib co mas tob me ntsis. Cov yooj yim tshaj plaws yog: “Zoo siab thaum pab lwm tus,” “Tsis txhob muab cov nyiaj uas koj khaws ntsaws hnab tsos,” thiab, “Yuav tsum tsis txhob cia kev muaj txiag nplua nuj ua rau koj qias vuab tsuab, tsis txhob cia kev pluag hloov tau koj, los sis tsis txhob cia kev quab yuam yuam tau koj.” Cov no yog tej kev tim tsum uas hais txog tib neeg txoj kev coj kom zoo. “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv,” yog ib qho kev tim tsum uas ntsig txog tib neeg txoj kev coj ncaj ncees thiab txoj kev tsis ua nkauj ua nraug. Cov no yog nyob rau hauvCov no yeej nyob rau hauv cov kev xav ntawm txoj kev siab dawb siab zoo, kev ncaj ncees, kev tsim nyog, lub tswv yim, thiab kev ntseeg siab ntawm cov neeg Suav txoj kab lis kev cai qub tsis ntau los tsawg lawm. Tam sim no peb nyuam qhuav teev cov lus no pes tsawg cov lus lawm? (Nees nkaus ib cov lus lawm.) Nyeem cov lus hais ntawd rau Kuv seb. (“Tsis txhob muab cov nyiaj uas koj khaws ntsaws hnab tsos,” “Zoo siab thaum pab lwm tus,” “Coj nruj rau koj tus kheej hos ua siab ntev rau lwm tus,” “Ua zoo pauj phem,” “Yog leej twg tau pab koj lawm koj yuav tsum pauj rov qab,” “Tso koj tus kheej tej kev ntshaw tseg txhawm rau lwm tus,” “Poj niam yuav tsum tsim txiaj, siab zoo, paub tab, thiab ua zoo,” “Thaum haus cov dej ntawm lub qhov dej, yus yuav tsum tsis txhob hnov qab tus uas khawb lub qhov dej ntawd,” “Yog koj ntaus lwm tus, tsis txhob ntaus lawv lub ntsej muag; yog koj hais txog lwm tus, tsis txhob hais txog lawv qhov tsis zoo,” “Kev txiav caj dab tsuas ua rau taub hau tu xwb; ua siab dawb siab zoo li ua tau,” “Txawm tib neeg pab koj me me xwb los koj yuav tsum pauj rov qab kom ntau,” “Tsis txhob ua rau lwm tus li koj tus kheej tsis xav kom lawv ua rau koj,” “Kuv mam li thaiv mos txwv,” “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv,” “Yuav tsum tsis txhob cia kev muaj txiag nplua nuj ua rau koj qias vuab tsuab, tsis txhob cia kev pluag hloov tau koj, los sis tsis txhob cia kev quab yuam yuam tau koj,” “Rau siab ua hauj lwm thiab siv zog ua kom zoo tshaj plaws kom txog hnub koj tuag,” “Cov kab mos ntawm lub caij nplooj ntoos hlav ntawd cab sab mus txog rau thaum cov kab mos ntawd tuag, thiab tswm ciab kub mus txog thaum nws cov roj tag,” “Txhua tus tib neeg puav leej koom txoj hmoo ntawm lawv lub teb chaws,” “Ua kom zoo tshaj plaws los leg yam uas lwm tus tib neeg tau muab tso rau koj ua lawm kom ncaj ncees,” “Tus txiv neej uas paub tab lo lus mas yog nws lo lus cog tseg,” thiab “Tawm hauv cov av nkos los tiam sis tsis lo av, da cov dej ntshiab ntshiab tiam sis tsis huv.”) Hnub no, peb yuav kawm kom tob txog txhua yam “zoo” qhov zoo uas tib neeg ntiaj teb tau sau tseg txog txoj kev coj zoo ntawd. Txoj kab lis kev cai qub tej lus hais txog txoj kev coj zoo ntawd tau hais tawm txog tej kev cheem tsum uas sib txawv txog tib neeg txoj kev ua neej thiab txoj kev coj zoo. Ib co cheem tsum kom tib neeg pauj qhov kev zoo uas lawv tau txais lawm, ib co tim tsum kom tib neeg cia li xyiv fab thaum pab lwm tus, ib co yog tej tswv yim los tiv thaiv cov tib neeg uas yus tsis nyiam, hos ib co yog tej tswv yim los tiv thaiv lwm tus tib neeg tej kev tsis zoo thiab qhov tsis zoo, los sis tiv thaiv cov tib neeg uas muaj teeb meem. Nyob rau hauv tej no mas, cov lus hais ntawd txwv tib neeg, thiab muab qee qhov kev tim tsum thiab qee tus qauv hais tawm kom ua. Tag nrho tej no yog tej kev tim tsum thiab cov qauv uas txoj kab lis kev cai qub muaj txog tib neeg txoj kev coj zoo, thiab tej no puav leej yog tej uas nyob rau hauv tib neeg. Txhua tus uas loj hlob nyob rau hauv lub Teb Chaws Suav yeej tau hnov cov lus no tas li, thiab paub cov lus hais no nyob rau hauv siab lawm. Cov lus hais txog txoj kev coj zoo los ntawm txoj kab lis kev cai qub no puav leej nyob rau hauv qhov kev siab dawb siab zoo, kev ncaj ncees, kev tsim nyog, lub tswv yim, thiab kev ntseeg siab tsis ntau los tsawg lawm. Yeej muaj ib co lus hais uas tsis nyob rau hauv qhov no thiab, tiam sis cov lus hais feem ntau puav leej nyob rau hauv qhov no tsis ntau los tsawg lawm. Nej yuav tsum paub kom meej txog qhov no.

Hnub no, peb yuav tsis kawm kom ntxaws ntxaws txog tias qee nqe lus uas hais txog txoj kev coj zoo ntawd yog hais txog dab tsi, thiab peb yuav tsis soj ntsuam kom ntxaws ntxaws tias lub ntsiab tseeb ntawm cov lus ntawd yog dab tsi. Kuv yuav tau kom nej npaj kawm ua ntej me ntsis tso. Saib qhov sib txawv ntawm txoj kab lis kev cai qub cov lus hais txog txoj kev coj zoo, thiab cov qauv uas Vajtswv tim tsum ntawm tib neeg txog qhov ua neej li txoj kev ua neej ntawd seb muaj dab tsi. Cov lus twg uas los ntawm txoj kab lis kev cai qub uas cov nyom rau Vajtswv cov lus thiab qhov tseeb kiag? Yog muab txhais ncaj ncaj ces txhais hais tias, cov lus twg uas zoo li Vajtswv cov lus thiab qhov tseeb, los sis txuas rau Vajtswv cov lus thiab qhov tseeb ntawd me ntsis? Cov lus no cov twg uas koj ntseeg hais tias yog yam zoo, thiab cov lus no cov twg uas koj tus kheej twb coj nruj nruj ib zaug tom qab koj los ntseeg Vajtswv lawm, xyaum ua raws li cov lus no thiab ua raws li cov lus no cuag nkaus li cov lus no yog tus qauv rau koj txoj kev caum qhov tseeb? Piv txwv li, “Tso koj tus kheej tej kev ntshaw tseg txhawm rau lwm tus.” Nej txhua tus puas paub txog cov lus no? Tom qab los ntseeg Vajtswv lawm, nej tsis xav tias nej yuav tsum ua ib tug tib neeg zoo zoo li no lod? Thiab thaum nej tso nej tus kheej tej kev ntshaw tseg txhawm rau lwm tus lawm, nej tsis xav tias nej ua neej zoo heev, thiab tias Vajtswv yeej yuav nyiam nej xwb xwb li lod? Los sis, ua ntej koj ntseeg Vajtswv, tej zaum koj twb ntseeg hais tias cov tib neeg uas muaj qhov zoo ntawm “qhov ua zoo pauj phem” ntawd yog cov tib neeg zoo lawm—tsuas yog koj tsis kam ua li ntawd xwb, koj ua tsis tau li ntawd, thiab tuav tsis tau qhov ntawd, tiam sis tom qab koj los ntseeg Vajtswv lawm, koj tus kheej ua raws li tus qauv ntawd, thiab koj muaj peev xwm ua “qhov zam txim thiab qhov tsis nco qab” txog cov tib neeg uas ua rau koj mob siab yav dhau los, los sis cov uas koj txeev tsis nyiam los sis ntxub ntawd lawm. Tej zaum koj yuav xav hais tias cov lus uas hais txog txoj kev coj zoo ntawd mas haum rau qhov uas thaum tus Tswv Yexus hais kom zam txim rau tib neeg xya zaug xya caum ntawd lawm, yog li ntawd koj tus kheej thiaj li txaus siab hlo ua raws li qhov hais li no. Tej zaum koj haj tseem xyaum ua thiab ua raws li cov lus no cuag nkaus li cov lus no yog qhov tseeb thiab, thiab xav hais tias cov tib neeg uas xyaum ua qhov ua zoo pauj phem ntawd mas yog cov tib neeg uas xyaum ua qhov tseeb thiab taug Vajtswv txoj kev lawm. Nej puas muaj tej kev xav los sis tej kev qhia kom pom tseeb zoo li no? Cov lus twg uas nej tseem xav hais tias me ntsis zoo li qhov tseeb thiab zoo li Vajtswv cov lus nyob rau hauv cov lus ntawd lub ntsiab tseeb, txog rau qhov uas cov lus ntawd haj tseem tuaj yeem hloov tau qhov tseeb thiab, tias qhov los hais tias cov lus ntawd yog qhov tseeb ntawd yuav tsis ntau dhau lawm? Qhov thoob tsib to nrog txog cov lus uas hais tias: “Txhua tus tib neeg puav leej koom txoj hmoo ntawm lawv lub teb chaws” ntawd mas yooj yim heev. Tib neeg feem coob pom tau hais tias cov lus no tsis yog qhov tseeb, thiab tias cov lus no tsuas yog ib qho kev dag, ib lo lus zoo uas nrov nrov xwb. Qhov “Txhua tus tib neeg puav leej koom txoj hmoo ntawm lawv lub teb chaws” ntawd yog ib qho uas hais rau cov tsis ntseeg uas tsis muaj kev ntseeg Vajtswv xwb; cov lus hais no yog ib qho kev cheem tsum uas tus tsoom fwv ntawm lub teb chaws ntawd hais rau lawv cov tib neeg, los qhia tib neeg kom hlub lawv lub teb chaws xwb. Cov lus no tsis mus raws li qhov tseeb, thiab tsis muaj lub hauv paus nyob rau hauv Vajtswv cov lus kiag li. Tuaj yeem hais tau hais tias cov lus no yeej tsis yog qhov tseeb, thiab tias cov lus no hloov tsis tau qhov tseeb li. Cov lus no yog ib qho kev xam pom uas los ntawm Ntxwgnyoog los thiab tawm ntawm Ntxwgnyoog los nkaus xwb, thiab cov lus no zoo rau cov neeg tswj hwm xwb. Cov lus no tsis muaj dab tsi cuam tshuam rau Vajtswv cov lus los sis qhov tseeb kiag li. Vim li ntawd qhov hais tias “Txhua tus tib neeg puav leej koom txoj hmoo ntawm lawv lub teb chaws” ntawd thiaj li tsis yog qhov tseeb kiag li, thiab tsis yog ib yam uas tus neeg uas muaj txoj kev ua neej yuav tsum txhawb nqa. Yog li ntawd, hom tib neeg twg uas yuam kev muab cov lus no ua qhov tseeb? Cov tib neeg uas pheej nrhiav kev kom tau koob tau npe, tau meej mom, thiab tau txiaj ntsim rau lawv tus kheej, thiab cov uas xav ua nom ua tswv xwb. Lawv xyaum cov lus no cuag nkaus li cov lus no yog qhov tseeb los qhuas cov neeg tswj hwm kom tau raws li lawv tus kheej tej hom phiaj. Muaj qee cov lus hais uas tsis yooj yim rau tib neeg thoob tsib to nrog. Txawm tib neeg paub hais tias cov lus no tsis yog qhov tseeb los xij, lawv yeej tseem xav hauv lawv lub siab hais tias cov lus no yog thiab mus raws li txoj kev qhuab qhia lawm. Lawv xav ua neej raws li cov lus no thiab coj lawv tus kheej kom zoo li ntawd kom thiaj li txhim kho tau lawv txoj kev ua zoo, thiab txhawb tau lawv tus kheej qhov kev zoo, thiab tib lub sij hawm ntawd, ua kom lwm tus xav hais tias lawv muaj kev ua neej thiab tias lawv tsis yog tsis yog tib neeg. Cov lus hais twg uas nej thoob tsib to nrog nyuaj? (Kuv xav hais tias qhov “Yog leej twg tau pab koj lawm koj yuav tsum pauj rov qab” ntawd mas thoob tsib to nrog nyuaj heev. Kuv saib qhov hais li ntawd cuag nkaus li qhov hais li ntawd yog ib qho zoo, thiab xav hais tias cov uas pauj rov qab rau tus uas tau pab lawv lawm ntawd mas yog cov tib neeg uas muaj lub siab uas txawj xav. Qhov “Ua kom zoo tshaj plaws los leg yam uas lwm tus tib neeg tau muab tso rau koj ua lawm kom ncaj ncees” ntawd kuj yog ib qho thiab. Qhov ntawd txhais hais tias yog leej twg tau txais ib txoj hauj lwm los ntawm lwm tus lawm, mas tus tau txais ntawd yuav tsum ua txhua yam li nws ua tau kom txoj hauj lwm ntawd tiav zoo. Kuv xav hais tias qhov no yog ib qho zoo, thiab yog ib yam uas tus tib neeg uas muaj lub siab uas txawj xav thiab qhov tsim nyog ntawd yuav tsum ua.) Leej twg ntxiv thiab? (Kuj muaj qhov hais tias, “Txawm tib neeg pab koj me me xwb los koj yuav tsum pauj rov qab kom ntau” thiab. Kuv xav hais tias tus tib neeg uas ua tau li no mas yog tus uas muaj txoj kev ua neej thiab txoj kev ua zoo heev.) Puas muaj dab tsi ntxiv lawm? (“Tus txiv neej uas paub tab lo lus mas yog nws lo lus cog tseg.” Kuv xav hais tias yog leej twg ua li lawv hais thiab tso siab tau, mas qhov ntawd yog txoj kev coj zoo.) Yav dhau los, nej xav hais tias qhov no yog txoj kev coj zoo. Tam sim no nej pom zoo li cas? (Peb yuav tsum tau saib seb tus yam ntxwv ntawm “lo lus” ntawd yog dab tsi—tus yam ntxwv ntawd yog los sis tsis yog? Tus yam ntxwv ntawd zoo los sis tsis zoo? Yog leej twg hais rau cov tib neeg phem thiab cov tawm tsam Khetos hais tias, “Kuv mam li tiv thaiv koj. Tus txiv neej uas paub tab lo lus mas yog nws lo lus cog tseg,” ces tom qab ntawd, thaum Vajtswv lub tsev tshawb nrhiav thiab tshawb xyuas qhov xwm txheej ntawd, pom hais tias tus tib neeg no tiv thaiv cov tib neeg phem thiab cov tawm tsam Khetos ntawd, ces yog tus tib neeg no tab tom ua kev phem thiab tawm tsam Vajtswv xwb.) Qhov kev thoob tsib to nrog no yog lawm. Nej yuav tsum saib tus yam ntxwv ntawm “lo lus” no—seb lo lus no yog lo lus zoo los yog lo lus phem. Yog leej twg ua ib yam dab tsi tsis zoo los sis phem thaum xyaum ua “Tus txiv neej uas paub tab lo lus mas yog nws lo lus cog tseg” ntawd, ces cov kauj ruam ntawm tus tib neeg ntawd txoj kev ua phem mas ceev npaum li cov nees ceev, uas khiav ncaj nraim mus rau hauv ntuj tawg thiab poob mus rau hauv lub qhov ntuj tob tob xwb. Tiam sis yog tus tib neeg ntawd “lo lus” mus raws li qhov tseeb, thiab lo lus ntawd muaj qhov kev ncaj ncees, thiab lo lus ntawd tiv thaiv tes hauj lwm ntawm Vajtswv lub tsev, thiab ua rau Vajtswv txaus siab, ces qhov xyaum ua raws li “Tus txiv neej uas paub tab lo lus mas yog nws lo lus cog tseg” ntawd yog lawm. Los ntawm cov piv txwv no, nej pom tau hais tias nej yuav tsum thoob tsib to nrog txog txoj kab lis kev cai cov lus. Nej yuav tsum thoob tsib to nrog txog qhov txawv ntawm tej xwm txheej thiab tej keeb kwm yav dhau los ntawd, thiab nej siv tsis tau cov lus no yam tsis ua tib zoo cais. Muaj qee lo lus mas yeej tsis yog raws li qhov muaj tiag, thiab yeej tsis yog lawm. Nej yuav tsum ua tib zoo ceev faj thaum hnov cov lus no. Nej yuav tsum saib cov lus no zoo li tej kev ntseeg yuam kev thiab tej kev nkag siab yuam kev. Muaj qee lo lus mas thiaj li yog nyob rau hauv qee lub ntsiab lus thiab qee qhov xwb. Hos nyob rau lwm lub ntsiab lus los sis lwm qhov xwm txheej lawm, ces cov lus ntawd tsis yog lawm; cov lus ntawd tsis yog thiab tsis zoo rau tib neeg. Yog nej tsis thoob tsib to nrog txog cov lus ntawd, ces nej yeej yuav raug cov lus ntawd ntxias thiab rhuav tshem. Txawm txoj kab lis kev cai qub ntawd cov lus yuav yog thiab tsis yog, los sis txawm tib neeg yuav pom hais tias cov lus ntawd muaj tseeb thiab tsis muaj los xij, cov lus ntawd tsis muaj ib lo yog qhov tseeb thiab cov lus ntawd tsis muaj ib lo mus raws li Vajtswv cov lus li. Qhov no muaj tseeb. Tej uas tib neeg xam pom hais tias yog ntawd tsis yog tej uas Vajtswv xam pom hais tias yog. Cov lus uas tib neeg xam pom hais tias zoo ntawd tsis muaj txiaj ntsim rau tib neeg thaum muab cov lus ntawd coj los xyaum ua. Txawm li cas los xij, txawm tib neeg xyaum ua raws li cov lus ntawd thiab tsis xyaum, los sis xyov lawv puas siv cov lus ntawd los xij, tej uas tsis mus raws li qhov tseeb, uas tsis yog qhov tseeb ntawd, puav leej tsis zoo rau tib neeg, yog li ntawd yuav tsum tsis txhob lees txais cov lus ntawd thiab yuav tsum tsis txhob siv cov lus ntawd. Muaj ntau tus tib neeg uas tsis thoob tsib to nrog txog tej no. Lawv saib tej uas tib neeg xam pom hais tias yog, los sis tej uas cov tib neeg ntiaj teb uas qias vuab tsuab sawv daws pom zoo hais tias yog ntawd, yam li qhov tseeb, thiab ua raws li tej ntawd thiab xyaum ua raws li tej ntawd cuag nkaus li tej ntawd yog qhov tseeb. Qhov no puas tsim nyog? Tib neeg puas tuaj yeem tau txais Vajtswv txoj kev pom zoo los ntawm qhov xyaum ua raws li qhov tsis tseeb thiab qhov cuav ntawd? Txhua yam uas tib neeg ntiaj teb sawv daws pom zoo hais tias yog thiab qhov tseeb ntawd yog cuav, yog ib qho kev qog xwb, ces yuav tsum tsis txhob txais yuav mus ib txhis li. Tam sim no, tej uas nej xav hais tias yog thiab zoo ntawd puas yog qhov tseeb tiag tiag? Tib neeg twb lees txais cov lus no tau ntau txhiab xyoo lawm; txhua tus tib neeg puav leej ntseeg hais tias cov lus no yog thiab zoo, tiam sis cov lus no puas tuaj yeem dhau los ua qhov tseeb tiag tiag? (Tsis tuaj yeem.) Yog cov lus no tsis tuaj yeem dhau los ua qhov tseeb no, cov lus no puas yog qhov tseeb? (Tsig yog, cov lus no tsis yog.) Cov lus no tsis yog qhov tseeb. Yog tib neeg saib cov lus no yam li qhov tseeb, thiab muab cov lus no coj los xyaw rau Vajtswv cov lus es xyaum ua raws li ob co lus ntawd ua ke no, cov lus ntawd thiab cov lus hais ntawd puas mus txog qib siab ib yam li qhov tseeb? Cov lus ntawd yeej mus tsis txog. Txawm tib neeg yuav caum los sis tuav rawv tej no npaum li cas los xij, Vajtswv yeej yuav tsis pom zoo rau tej no li, vim Vajtswv dawb huv. Nws yeej tsis pub cov tib neeg uas qias vuab tsuab muab yam phem coj los xyaw rau hauv qhov tseeb, los sis rau hauv Nws cov lus li. Txhua yam uas tawm los ntawm tib neeg tej kev xav thiab tej kev xam pom ntawd yog los ntawm Ntxwgnyoog los xwb—txawm tej ntawd yuav zoo npaum li cas los xij, tej ntawd yeej tseem tsis yog qhov tseeb, thiab dhau tsis tau los ua tib neeg lub neej li.

Txoj kab lis kev cai qub cov lus uas hais txog txoj kev coj zoo ntawd mas yog los ntawm Ntxwgnyoog los xwb. Cov lus ntawd tshwm hauv cov tib neeg uas qias vuab tsuab tuaj, thiab cov lus ntawd tsuas haum rau cov tsis ntseeg thiab cov uas tsis nyiam qhov tseeb xwb. Cov tib neeg uas ntseeg Vajtswv thiab caum qhov tseeb yuav tsum xub thoob tsib to nrog txog tej no, thiab tsis txhob txais yuav tej no, vim cov lus no yuav muaj qee yam kev cuam tshuam tsis zoo rau tib neeg, cov lus no yuav ua rau tib neeg tsis meej pem thiab ua rau tib neeg taug txoj kev yuam kev. Piv txwv li, nyob rau hauv cov piv txwv uas peb nyuam qhuav hais ntawd, muaj ib qho hais tias: “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv.” Cia peb xub tham txog qhov “Tus neeg siab ncaj tiam tsis tau ob tug vajntxwv” tso. Yog tus vajntxwv no yog ib tug vajntxwv ntse, thiab yog tus neeg uas xav mus rau qhov zoo, ces koj txhawb nws, ua raws li nws hais, thiab tiv thaiv nws qhia hais tias koj muaj txoj kev ua neej, kev ua zoo, thiab tus cwj pwm zoo. Tiam sis yog tus vajntxwv no caij tsuj thiab ruam, yog ib tug dab phem xwb, los koj tseem ua raws li nws hais, tiv thaiv nws, thiab tsis tig tawm tsawm nws no, qhov “kev ua siab ncaj ncees” uas koj muaj no yog dab tsi? Nws yog ib qho kev ua siab ncaj ncees uas ruam, thiab dig muag lawm; nws yog ib qho kev dig muag thiab ruam lawm. Thaum zoo li ntawd, ces qhov koj ua siab ncaj ncees ntawd tsis yog thiab qhov ntawd dhau los ua ib qho tsis zoo lawm. Thaum hais txog hom vajntxwv dab thiab tus dab phem zoo li no lawm, koj yuav tsum tsis txhob ua raws li qhov hais tias: “Tus neeg siab ncaj tiam tsis tau ob tug vajntxwv” ntxiv lawm. Koj yuav tsum tso tseg, tsis txhob txais yuav, thiab txav kom deb ntawm tus vajntxwv no—koj yuav tsum muab qhov tsaus ntuj tso pov tseg es los xaiv qhov kaj. Yog koj tseem xaiv los ua siab ncaj ncees rau tus vajntxwv dab no thiab, ces koj yog nws tus tub qhe thiab tus nrog nws khoom siab koom ntsws xwb. Yog li ntawd, nyob rau hauv qee qhov xwm txheej thiab qee lub ntsiab, qee lub tswv yim, los sis qee lub ntiab lus uas zoo thiab qee qhov uas muaj nuj nqis uas cov lus no qhuas txog mas yeej tsis muaj nyob li. Los ntawm qhov no koj tuaj yeem pom tau hais tias txawm cov lus hais no zoo li ncaj ncees thiab zoo heev los xij, tsuas siv tau rau qee qhov xwm txheej thiab qee lub ntsiab xwb; siv tsis tau rau txhua qhov xwm txheej los sis txhua lub ntsiab. Yog tib neeg cia li ua raws li cov lus hais no yam dig muag ntsuav thiab ruam ntsuav, ces lawv kawg plam lawv txoj kev thiab poob mus rau txoj kev uas yuam kev xwb. Tej uas tshwm sim los ntawm qhov no mas xav tsis txog li. Cov lus txuas ntxiv ntawm cov lus no yog: “tus poj niam zoo yuav tsis tau ob tug txiv.” “Tus poj niam zoo” ntawm no yog hais txog dab tsi? Tus poj niam zoo ntawm no hais txog ib tug poj niam uas dawb huv, tus uas ncaj ncees rau tib tug txiv xwb. Nws yuav tsum ncaj ncees rau tus txiv kom mus txog thaum kawg, thiab tsis txhob hloov siab li, txawm tus txiv yuav yog ib tug neeg zoo los phem. Tab txawm nws tus txiv tuag lawm los xij, nws yuav tsum ua poj ntsuam mus kom txog hnub tsis muaj nws. Qhov ntawd hu ua ib tug poj niam uas dawb huv thiab ncaj ncees. Txoj kab lis kev cai qub ntawd cheem tsum kom txhua tus poj niam ua cov poj niam uas dawb huv thiab ncaj ncees. Qhov kom cov poj niam ua li no puas yog ib qho ncaj ncees rau cov poj niam? Vim li cas cov txiv neej thiaj li yuav tau ntau tus poj niam, tiam sis cov poj niam yuav tsis tau tab txawm yog lawv tus txiv twb tuag lawm? Txiv neej thiab poj niam tsis muaj vaj huam sib luag. Yog poj niam raug cov lus uas hais tias, “tus poj niam zoo yuav tsis tau ob tug txiv” ntawd txwv, thiab xaiv los ua ib tug poj niam uas dawb huv thiab ncaj ncees, poj niam tau txais dab tsi? Feem ntau ces, ua ib qho chaw uas nco txog nws txoj kev dawb huv tom qab nws tuag lawm xwb. Qhov no puas muaj qab hau? Nej puas yuav pom zoo hais tias poj niam mas muaj txoj hmoo phem heev nyob rau hauv lub neej? Vim li cas lawv thiaj li tsis muaj cai rov yuav txiv tom qab lawv tus txiv tuag lawm? Qhov no yog qhov kev xam pom uas txoj kab lis kev cai qub qhuas, thiab qhov no yog ib qho kev xav phem uas tib neeg ntiaj teb yeej ib txwm tuav rawv. Yog ib tug poj niam twg tus txiv tuag es tseg ntau tus me nyuam cia tom qab es tus poj niam ntawd saib xyuas tsis tau cov me nyuam ntawd no, nws yuav ua li cas? Nws yuav tsum tau thov zaub mov. Yog nws tsis xav kom nws cov me nyuam raug kev txom nyem thiab nws xav nrhiav ib txoj hauv kev kom nyob taus, mas nws yuav tsum tau rov yuav txiv es ua neej nyob nrog qhov nws lub npe raug tib neeg sawv daws muab hais tsis zoo, thiab thuam, thiab qhov zej tsoom sawv daws thiab cov tib neeg coob coob txav deb thiab saib tsis taus nws. Nws yuav tsum tau lees txais qhov tib neeg saib tsis taus thiab nyiaj zej tsoom sawv daws tej lus thuam kom thiaj li yuav tu tau nws cov me nyuam loj hlob li luag tej. Vim qhov kev xam pom no, txawm nws ua tsis tau li tus qauv uas hais tias, “tus poj niam zoo yuav tsis tau ob tug txiv” los xij, nws tus cwj pwm, tej kev ua, thiab tej kev ua txhua yam ntawd tsis tsim nyog hwm lod? Yam tsawg kawg thaum nws cov me nyuam loj hlob tuaj thiab to taub lawv niam txoj kev hlub lawv lawm, lawv yuav hwm nws, thiab lawv yeej yuav tsis saib tsis taus nws los sis txav deb ntawm nws vim nws tus cwj pwm li. Tiam sis, lawv yuav ua tsaug, thiab xav hais tias ib leej niam uas zoo li lawv niam mas yog ib leej niam zoo heev. Txawm cov tib neeg feem coob yuav tsis pom zoo nrog lawv los xij. Vim qhov kev xam pom ntawm zej tsoom sawv daws txoj kev xav, uas zoo ib yam nkaus li qhov kev xam pom uas hais tias “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv,” uas tib neeg txhawb nqa ntawd, ces txawm koj yuav saib qhov ntawd li cas los, tus leej niam no tsis yog ib tug tib neeg zoo, vim nws ua txhaum txoj kev xav phem uas qub qub ntawm txoj kev ua zoo no lawm. Vim li ntawd, lawv thiaj li suav hais tias nws muaj teeb meem txog txoj kev coj zoo. Yog li ntawd, vim li cas nws cov me nyuam tej kev xav thiab tej kev xam pom txog nws thiaj li txawv txoj kab lis kev cai qub qhov kev xam pom txog nws? Vim nws cov me nyuam saib qhov teeb meem no los ntawm qhov kev xam pom txog qhov ciaj sia. Yog tus poj niam no tsis rov yuav txiv, mas ntshe nws thiab nws cov me nyuam twb tsis muaj txoj sia nyob lawm. Yog nws ua raws li txoj kev xav phem uas qub qub no, mas ntshe nws twb tsis muaj chaw ntsaub li lawm—ntshe nws twb tshaib plab tuag lawm. Nws xaiv los rov yuav txiv los cawm nws cov me nyuam txoj sia thiab nws tus kheej txoj sia. Raws li lub ntsiab no lawm, txoj kab lis kev cai qub txoj kev thuam thiab cov tib neeg feem coob txoj kev thuam txog nws ntawd tsis yuam kev tag nrho lod? Lawv tsis quav ntsej dab tsi txog qhov tib neeg ciaj los tuag li! Yog li ntawd, qhov ua raws li txoj kev xav phem uas qub qub ntawm txoj kev ua zoo no muaj qab hau thiab muaj nuj nqis dab tsi? Tej zaum yuav hais tias tsis muaj nuj nqi kiag li. Qhov ua raws li txoj kev xav phem uas qub qub ntawm txoj kev ua zoo ntawd yog ib yam uas ua rau mob tib neeg thiab rhuav tshem tib neeg xwb. Yog cov tib neeg uas raug txoj kev xav phem no tsim txom lawm, tus poj niam thiab nws cov me nyuam no tau raug qhov muaj tseeb no ua ntej tshaj plaws, tiam sis tsis muaj leej twg mob siab txog lawv los sis khuv leej txog lawv li. Lawv tsuas ua tiag nyiaj lawv txoj kev mob siab xwb. Nej xav li cas, qhov no puas yog txoj txoj kev ncaj ncees ntawm zej tsoom sawv daws? Vim li cas lub neej thiab lub teb chaws uas zoo li no yuav mus phem thiab tsaus ntuj ua luaj li? Vim hais tias txoj kab lis kev cai qub uas Ntxwgnyoog tau muab cog rau hauv tib neeg lawm ntawd tseem tswj tib neeg txoj kev xav thiab tswj hwm cov tib neeg sawv daws txoj kev xav. Los txog niaj hnub no los, tsis muaj leej twg pom qhov teeb meem no kom tseeb tseeb li. Cov tsis ntseeg tseem tuav rawv tej kev xav phem thiab tej kev xam pom ntawm txoj kab lis kev cai qub ntawd, thiab xav hais tias tej ntawd yog lawm. Los txog niaj hnub no los, lawv tseem tsis tau muab tej no tso pov tseg li.

Tam sim no, thaum peb saib cov lus uas hais tias, “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv” ntawd mas, nej pom tau hais tias txawm peb yuav saib qhov ntawd li cas los xij li, qhov ntawd tsis yog ib qho zoo, qhov ntawd yog tib neeg txoj kev xav phem thiab txoj kev xav hauv nruab siab nkaus xwb. Vim li cas Kuv thiaj li hais tias qhov ntawd tsis yog ib qho zoo? (Vim qhov ntawd tsis yog qhov tseeb, qhov ntawd yog tib neeg txoj kev xav phem thiab txoj kev xav hauv nruab siab xwb.) Tseeb tiag, tsawg tus tib neeg thiaj li ua tau yam uas sob lus no hais xwb. Sob lus no tsuas yog ib qho kev xav uas tsis muaj dab tsi thiab yog tib neeg txoj kev xav phem thiab txoj kev xav hauv nruab siab xwb, tiam sis vim sob lus no cog tau rau hauv tib neeg lub siab lawm, sob lus no thiaj li dhau los ua ib qho kev xav ntawm cov tib neeg feem coob lawm, yog li ntawd ntau tus tib neeg thiaj li txiav txim rau tej teeb meem zoo li no raws li sob lus no. Yog li ntawd, lub ntsiab tseeb ntawm qhov kev xam pom thiab tus qauv uas los ntawm qhov cov tib neeg feem coob txiav txim rau hom teeb meem zoo li no ntawd yog dab tsi? Vim li cas cov tib neeg feem coob thiaj li txiav txim rau tus poj niam uas rov yuav txiv dua ntawd hnyav ua luaj li? Vim li cas tib neeg thiaj thuam hom tib neeg zoo li no, thiab txav deb thiab saib tsis taus nws? Yog vim li cas? Nej tsis to taub, puas yog? Nej paub tsis meej thaum hais txog tej uas muaj tseeb; nej tsuas paub hais tias qhov ntawd tsis yog qhov tseeb thiab tias qhov ntawd tsis mus raws li Vajtswv cov lus no xwb. Zoo, Kuv mam li qhia nej, thiab thaum Kuv qhia tag lawm nej yuav pom yam zoo li no tseeb heev. Qhov ntawd yog vim cov tib neeg feem coob txiav txim rau tus poj niam no raws li ib qho thiab ib qho kev ua nkaus xwb—uas yog qhov nws rov yuav txiv dua—thiab tsuas saib qhov zoo ntawm nws txoj kev ua neej raws li tib qho ntawd xwb, tsis yog saib qhov zoo tiag tiag ntawm nws txoj kev ua neej. Qhov ntawd tsis yog tsis ncaj thiab tsis ncaj ncees lod? Feem ntau cov tib neeg feem coob tsis saib seb tus poj niam ntawd txoj kev ua neej zoo li cas—seb nws puas yog ib tug tib neeg phem los sis ib tug tib neeg siab zoo, seb nws puas nyiam yam zoo, seb nws puas tau ua rau lwm tus tib neeg mob siab los sis rhuav tshem lwm tus tib neeg, los sis seb nws puas yog ib tug poj niam xyob txhiaj ua ntej rov yuav txiv. Cov tib neeg hauv zej zog thiab cov tib neeg feem coob puas ntsuas tus poj niam no kom zoo raws li tej no? (Tsis ntsuas, lawv tsis ntsuas li.) Yog li nyob rau lub sij hawm ntawd tib neeg ntsuas raws li dab tsi? Lawv ntsuas raws li qhov hais tias, “tus poj niam zoo yuav tsis tau ob tug txiv.” Txhua tus xav hais tias, “Poj niam yuav tsum yuav txiv ib zaug xwb. Tab txawm yog koj tus txiv tuag lawm los xij, koj yuav tsum ua ib tug poj ntsuam nyob mus kom tag koj sim neej li. Thaum kawg, koj yeej tseem yog ib tug poj niam. Yog koj ncaj ncees rau koj tus txiv es tsis rov yuav txiv dua, peb mam li ua ib qho chaw nco txog koj txoj kev dawb huv—peb ua kaum qhov chaw los yeej tau! Tsis muaj leej twg quav ntsej tias koj raug kev txom nyem npaum li cas, los sis tias qhov koj tus koj cov me nyuam kom loj hlob ntawd nyuaj npaum li cas li. Tsis muaj leej twg yuav quav ntsej tab txawm yog koj yuav tsum tau thov mov ntawm tej ntug kev. Koj tseem yuav tsum ua raws li qhov hais tias: ‘tus poj niam zoo yuav tsis tau ob tug txiv’ ntawd. Tsuas yog ua li no xwb mas koj thiaj li yuav yog ib tug poj niam zoo, thiab muaj txoj kev ua neej thiab tej kev ua zoo. Yog koj rov yuav txiv dua, ces koj yog ib tug poj niam tsis zoo thiab yog ib tug poj niam siab coob xwb.” Qhov no txhais tau hais tias yuav kom poj niam yog ib tug tib neeg uas zoo, dawb huv, thiab ncaj ncees uas muaj txoj kev coj zoo thiab tus cwj pwm uas zoo mas yuav tsum tsis txhob rov yuav txiv dua xwb. Nyob rau hauv txoj kab lis kev cai qub tej kev xav txog kev siab dawb siab zoo, kev ncaj ncees, kev tsim nyog, lub tswv yim, thiab kev ntseeg siab ntawd mas, qhov hais tias, “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv” ntawd, dhau los ua lub hauv paus ntsuas tib neeg lawm. Tib neeg saib cov lus no cuag nkaus li cov lus no yog qhov tseeb, thiab siv cov lus no los ua ib tug qauv ntsuas lwm tus. Qhov ntawd yog lub ntsiab tseeb ntawm qhov teeb meem no. Vim qee tus tib neeg muaj ib hom cwj pwm uas tsis haum rau tej kev cheem tsum thiab tej qauv uas txoj kab lis kev cai qub hais tawm ntawd, tib neeg thiaj li suav hais tias lawv muaj txoj kev ua neej uas qis qis thiab txoj kev coj zoo uas qis qis, tias lawv muaj txoj kev ua neej uas tsis zoo thiab phem heev. Qhov ntawd puas ncaj ncees? (Tsis ncaj ncees.) Yog li, yuav kom ua tau ib tug poj niam zoo no, yuav tsum ua li cas, thiab koj yuav tsum tiv kev txom nyem dab tsi? Yog koj xav ua ib tug poj niam zoo, mas koj yuav tsum ncaj ncees tau tib tug txiv nkaus xwb, thiab yog koj tus txiv tuag lawm los, koj yuav tsum ua poj ntsuam nyob. Koj thiab koj cov me nyuam yuav tsum mus thov khawv rau ntawm tej ntug kev, thiab nyiaj qhov lwm tus saib tsis ntaus, ntaus, nthe, thab, thiab thuam. Qhov ua rau cov poj niam zoo li ntawd puas yog ib qho uas tsim nyog? (Tsis yog, tsis tsim nyog ua li ntawd.) Tiam sis qhov ntawd yog qhov tib neeg ua, lawv yeem cia kom pom koj thov khawv rau ntawm tej ntug kev, tsis muaj tsev nyob, tsis paub tias koj pluas noj tom ntej yuav los qhov twg los, thiab tsis muaj leej twg yuav quav ntsej, khuv leej, los sis mob siab txog koj li. Txawm koj yuav muaj me nyuam pes tsawg leej los sis koj lub neej yuav nyuaj npaum li cas, tab txawm yog koj cov me nyuam tshaib plab tuag kiag los xij, tsis muaj leej twg yuav quav ntsej li. Tiam sis yog koj rov yuav txiv dua, ces koj tsis yog ib tug poj niam zoo. Koj yuav raug cem heev thiab raug luag tsis nyiam kiag li, thiab koj yuav raug tej lus phem thiab tej lus thuam. Koj yuav raug luag hais txhua yam rau koj, thiab tsuas yog koj cov me nyuam thiab qee tus txheeb ze thiab phooj ywg thiaj li yuav hais lus khuv leej thiab txhawb koj xwb. Yog ua cas zoo li no? Qhov no yog vim txoj kab lis kev cai qub txoj kev qhia thiab qhov xwm txheej xwb. Qhov no yog qhov tshwm los ntawm qhov hais tias, “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv,” uas txoj kab lis kev cai qub txhawb nqa ntag. Tib neeg pom dab tsi los ntawm tej no? Yam uas zais nyob rau hauv qhov hais tias: “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv” ntawd yog dab tsi? Tib neeg txoj kev dag, kev ntsej muag ncaj siab nkhaus, thiab kev lim hiam. Tej zaum tus poj niam ntawd twb tsis muaj dab tsi noj, tej zaum nws yuav ua neej nyob tsis tau, thiab twb yuav tuag vim txoj kev tshaib plab lawm xwb, los tsis muaj leej twg yuav khuv leej nws; tiam sis, txhua tus cheem tsum kom nws tuav nws txoj kev dawb huv xwb. Tib neeg yeem cia kom pom nws tshaib plab tuag es mam li ua ib qho chaw nco txog nws dua li cia nws xaiv los ua kom nyob taus. Muaj ib qho mas yog, qhov teeb meem no muab tib neeg ntiaj teb txoj kev tawv ncauj nthuav tawm. Hos lwm qhov yog, qhov teeb meem no muab tib neeg ntiaj teb txoj kev dag thiab txoj kev ua phem nthuav tawm. Tib neeg ntiaj teb tsis muaj kev khuv leej, kev to taub, los sis kev pab cov uas tim tsum kev pab los sis cov uas tsim nyog hlub tshua li. Tshaj ntawd ntxiv, tib neeg ntiaj teb haj tseem siv qhov kev xav thiab txoj kev cai uas ruam ruam uas hais tais, “tus poj niam zoo yuav tsis tau ob tug txiv” ntawd, los thuam tib neeg thiab thawb lawv mus rau txoj kev tuag ntxiv thiab. Qhov ntawd tsis ncaj ncees rau tib neeg. Tsis yog qhov no tsuas tawm tsam Vajtswv cov lus, thiab tej kev tim tsum uas tus Tswv tsim ib puas tsav yam tim tsum ntawm tib neeg ntiaj teb xwb, tib lub sij hawm ntawd, qhov no kuj cov nyom cov qauv ntawm tib neeg lub siab uas txawj xav thiab qhov tsim nyog thiab. Yog li, puas muaj ib qho kev xam pom uas tus poj niam no cov me nyuam pom tias qhov teeb meem no ncaj ncees? Cov me nyuam ntawd tsis tau txais txiaj ntsim los ntawm qhov lawv niam rov yuav txiv dua thiab qhov kev txom nyem uas nws tiv ntawd lod? Raws li qhov tseeb lawm, cov me nyuam yeej hwm thiab txhawb lawv niam, tiam sis qhov kev txhawb ntawd los qhov twg los? Qhov ntawd tsuas yog vim lawv niam txiav txim siab mus yuav txiv dua txhawm rau kom lawv nyob taus, ua rau lawv ua tau neej nyob mus ntxiv, thiab cawm tau lawv txoj sia xwb. Tag li ntawd lawm. Yog lawv niam tsis ua li ntawd los cawm lawv txoj sia, ntshe lawv twb tsis pom zoo los sis txhawb qhov nws txiav txim siab rov mus yuav txiv dua ntawd. Yog li ntawd, yog nws cov me nyuam lawm, qhov lawv xam pom txog qhov lawv niam rov yuav txiv dua ntawd thiaj li tsis ncaj ncees tiag tiag. Txawm li cas los xij, txawm qhov tsis ncaj ncees ntawd yog los ntawm cov tib neeg feem coob qhov kev xam pom los los sis los ntawm nws cov me nyuam qhov kev xam pom los los xij, qhov uas tib neeg ua rau leej niam no thiab cov qauv uas lawv siv los ntsuas nws mas tsis yog ntsuas raws li qhov tseeb ntawm nws txoj kev ua neej. Qhov ntawd yog qhov uas tib neeg ua yuam kev nyob rau hauv qhov lawv ua rau tus poj niam uas rov yuav txiv dua ntawd. Los ntawm qhov no, pom tau tseeb tseeb hais tias cov lus uas txoj kab lis kev cai tau muab hais tawm hais tias, “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv” ntawd, tsis yog los ntawm Vajtswv los, tiam sis yog los ntawm Ntxwgnyoog los xwb, thiab cov lus no tsis muaj dab tsi cuam tshuam rau qhov tseeb kiag li. Tej kev xam pom uas tib neeg saib txhua yam, thiab tej kev uas lawv saib txoj kev ua zoo los sis txoj kev ua tsis zoo ntawm txhua tus tib neeg mas tsis yog saib raws li qhov tseeb los sis raws li Vajtswv cov lus, lawv saib raws li txoj kab lis kev cai qub tej kev xam pom, thiab raws li tib neeg tej kev tim tsum los ntawm txoj kab lis kev cai qub ntawd tej kev xav txog txoj kev ua siab dawb siab zoo, kev ncaj ncees, kev tsim nyog, lub tswv yim, thiab kev ntseeg siab xwb. Txoj kev ua siab dawb siab zoo, kev ncaj ncees, kev tsim nyog, lub tswv yim, thiab kev ntseeg siab ntawd yog dab tsi? Tej kev xav no los qhov twg los? Nyob rau saum daim tawv mas, zoo li tej kev xav no yog los ntawm cov tib neeg laus uas txawj ntse thiab cov tib neeg nrov koob nrov npe los, tiam sis tseeb tiag, tej kev xav no yog los ntawm Ntxwgnyoog los xwb. Tej kev xav no yog cov lus uas Ntxwgnyoog muab hais tawm kom thiaj li yuav tswj tau thiab txwv tau tib neeg tus cwj pwm, thiab tsim tau ib qho piv txwv, ib tug qauv, thiab ib txoj kab rau tib neeg txoj kev coj zoo. Qhov tseeb tiag, cov tib neeg laus uas txawj ntse thiab cov tib neeg nrov koob nrov npe no puav leej muaj tus yam ntxwv phem thiab lawv puav leej ua dej num rau Ntxwgnyoog xwb. Lawv yog cov dab phem uas dag tib neeg. Yog li ntawd, hais tau tseeb tseeb hais tias tej kev xav no yog los ntawm Ntxwgnyoog los xwb.

Thaum tib neeg ntsuas lwm tus tus cwj pwm zoo seb lawv txoj kev ua neej yog zoo los phem ntawd, mas lawv tsuas ntsuas raws li ib co lus uas nrov koob nrov npe los ntawm txoj kab lis kev cai qub xwb; lawv txiav txim thiab txiav txim siab raws li qhov zoo ntawm lwm tus tib neeg txoj kev ua neej raws li qhov lawv saib ib qho teeb meem nkaus xwb. Qhov no yuam kev thiab tsis yog lawm. Yog li ntawd, yuav ua li cas tib neeg thiaj li ntsuas tau tias lwm tus tib neeg txoj kev ua neej zoo los phem kom yog, muaj tseeb, thiab ncaj ncees? Tej hauv paus ntsiab lus thiab cov qauv rau txoj kev ntsuas lawv ntawd yog dab tsi? Yuav kom yog ces, tej hauv paus ntsiab lus thiab cov qauv rau txoj kev ntsuas ntawd yuav tsum yog qhov tseeb xwb. Tsuas yog tus Tswv Tsim cov lus thiaj li yog qhov tseeb xwb, thiab tsuas yog cov lus ntawd thiaj li muaj cai thiab muaj hwj chim xwb. Cov tib neeg ntiaj teb uas qias vuab tsuab cov lus tsis yog qhov tseeb, cov lus ntawd tsis muaj cai, thiab yuav tsum tsis txhob siv cov lus ntawd los ua lub hauv paus los sis ua tej hauv paus ntsiab lus rau txoj kev ntsuas tib neeg. Yog li ntawd, tib txoj kev ntsuas uas yog, muaj tseeb, thiab ncaj ncees txog tib neeg tus cwj pwm zoo thiab seb lawv txoj kev ua neej yog zoo los phem ntawd, ces yog siv tus Tswv Tsim cov lus thiab qhov tseeb los ua yus lub hauv paus xwb. Qhov hais tias “Tus neeg siab ncaj tiam tsis tau ob tug vajntxwv, tus poj niam zoo yuav tsis tau ob tug txiv” ntawd, yog ib co lus uas nrov koob nrov npe nyob rau hauv cov tib neeg uas qias vuab tsuab. Cov lus no lub hauv paus tsis yog lawm, cov lus no yog los ntawm Ntxwgnyoog los. Yog tib neeg ntsuas qhov zoo ntawm lwm tus txoj kev ua neej raws li Ntxwgnyoog cov lus xwb, ces lawv txoj kev txiav txim siab yeej yuav yuam kev thiab tsis ncaj ncees xwb xwb li. Yog li ntawd, yuav ua li cas tib neeg thiaj li ntsuas tau qhov zoo ntawm ib tug tib neeg tej kev ua zoo ntawd kom ncaj ncees thiab yog thiab seb tus tib neeg ntawd txoj kev ua neej yog zoo los phem? Tib neeg yuav tsum ntsuas raws li txoj kev npaj siab, lub hom phiaj, thiab tej uas tshwm sim los ntawm tus tib neeg ntawd tej kev ua, nrog rau lub ntsiab thiab qhov muaj nuj nqis ntawm yam uas tus tib neeg ntawd ua, thiab kuj ntsuas raws li tus tib neeg ntawd tej kev xam pom thiab tej kev xaiv uas nws xaiv hais txog qhov nws saib yam zoo ntawd. Ntsuas li ntawd mas thiaj li yog. Tus tib neeg ntawd tsis tas yuav yog ib tug ntseeg Vajtswv li—koj yeej pom tau hais tias muaj qee tus tsis ntseeg uas, txawm Vajtswv tsis xaiv lawv los xij, lawv muaj txoj kev ua neej uas zoo heev, txog rau qhov uas lawv txoj kev ua neej haj tseem zoo tshaj qee tus uas ntseeg Vajtswv lawm thiab. Tsuas zoo ib yam li ib txhia tib neeg ntseeg, uas twb lees txais Vajtswv tes hauj lwm ntawm tiam kawg, thiab twb ntseeg Vajtswv tau ntau lub xyoo lawm los, pheej xav txog qhov kev thov nyiaj los ntawm pawg ntseeg thaum lawv txais tso cov kwv tij thiab cov muam los so rau hauv lawv tsev, thiab pheej quaj rau cov kwv tij thiab cov muam hais tias lawv mas txom nyem, tiam sis zais txoj kev ntshaw nyiaj thiab txhua yam rau hauv nruab siab xwb. Thaum cov kwv tij thiab cov muam muab nqaij, muab zaub, muab nplej, thiab lwm yam coj los siv thaum lawv so rau hauv cov tib neeg ntawd lub tsev, mas cov tib neeg ntawd khaw tej ntawd twj ywm cia rau cov tib neeg ntawd tsev neeg noj xwb. Hom tib neeg no yog hom neeg dab tsi? Lawv txoj kev ua neej zoo los phem? (Phem.) Cov tib neeg zoo li no yog cov tib neeg siab hlob, lawv nyiam siv tib neeg kom lawv tau txiaj ntsim xwb, thiab lawv muaj tus cwj pwm tsis zoo. Ib txhia tsis ntseeg, uas lees txais Vajtswv tes hauj lwm ntawm tiam kawg ncaj qha lawm, txaus siab hlo cia cov kwv tij thiab cov muam so rau hauv lawv tsev. Lawv siv lawv li nyiaj los tiam cov kwv tij thiab cov muam ntawd, thiab tsis kam txais pawg ntseeg cov nyiaj. Txawm pawg ntseeg yuav muab nyiaj rau lawv ntau npaum li cas los xij, lawv tsis siv ib xees li, thiab lawv tsis ntshaw cov nyiaj ntawd ib qho li—lawv khaw cov nyiaj ntawd tag nrho thiab rov qab muab rau pawg ntseeg tom qab ntawd. Thaum cov kwv tij thiab cov muam yuav khoom rau lawv siv thaum so hauv lawv tsev, mas lawv txuag txuag txhua yam khoom ntawd rau cov kwv tij thiab cov muam uas so hauv lawv tsev ntawd tau siv thiab tau noj. Thaum cov kwv tij thiab cov muam ntawd mus lawm, lawv muab cov khoom no khaws cia, thiab tsuas muab cov khoom no thau coj los siv thaum muaj qee tus kwv tij thiab qee tus muam tuaj so hauv tsev dua lawm xwb. Muaj qhov sib txawv tseeb heev nyob rau hauv lawv lub siab, thiab lawv yeej tsis lam muab pawg ntseeg tej khoom coj mus siv yam tsis tsim nyog li. Leej twg qhia lawv ua li no? Tsis muaj leej twg qhia lawv, yog li ntawd yog ua cas lawv thiaj li paub tias yuav ua li cas? Yog ua cas lawv thiaj li ua tau li ntawd? Tib neeg feem coob ua tsis tau li no, tiam sis lawv ua tau. Qhov teeb meem nyob rau ntawm no yog dab tsi? Tsis yog qhov kev ua neej sib txawv lod? Nws yog qhov sib txawv ntawm qhov zoo ntawm lawv txoj kev ua neej, thiab qhov sib txawv ntawm lawv tej kev ua zoo. Yog muaj ib qho sib txawv nyob rau ntawm tej kev ua zoo ntawm ob hom tib neeg no no, puas muaj ib qho sib txawv nyob rau ntawm tus cwj pwm uas lawv coj rau qhov tseeb thiab rau yam zoo? (Muaj.) Ob hom tib neeg no, hom twg yuav to taub txog qhov tseeb yooj yim dua? Hom twg ntxim yuav caum qhov tseeb dua? Hom tib neeg uas muaj tej kev ua zoo ntxim yuav caum qhov tseeb dua. Nej pom zoo li no lod? Nej tsis pom zoo li no, yam uas nej ua ces yog siv tej kev cai yam dig muag ntsuav, xav hais tias cov tib neeg ntseeg uas paub hais cov lus qhia thiab tej kev qhuab qhia ntawd yuav tsum ua tau li no, thiab tias cov tsis ntseeg uas nyuam qhuav pib ntseeg Vajtswv, uas tseem hais tsis tau tau cov lus qhia thiab tej kev qhuab qhia ntawd, mas ua tsis tau li no xwb. Txawm li cas los xij, qhov tseeb tsis yog li ntawd. Qhov nej saib tib neeg thiab txhua yam li no tsis yog yuam kev thiab ruam lod? Kuv tsis saib txhua yam li no. Thaum Kuv nrog tib neeg sib tham, Kuv ua tib zoo saib tus cwj pwm uas lawv coj rau txhua yam, tshwj xeeb yog saib seb ob hom tib neeg ntawd coj zoo li cas thaum ntsib qhov xwm txheej zoo ib yam, seb lawv txiav txim siab li cas. Qhov no yog ib qho piv txwv uas zoo dua txog qhov seb lawv txoj kev ua neej zoo li cas. Ob qho kev ua no qhov twg ncaj ncees thiab muaj tseeb dua? Qhov ntsuas tib neeg raws li lawv tus yam ntxwv lub ntsiab tseeb, es tsis yog ntsuas lawv tej kev ua sab nraud ntawd mas ncaj ncees dua. Yog tib neeg ntsuas raws li txoj kab lis kev cai qub tej kev xam pom, muab tus tib neeg ntawd tej kev ua txog ib qho xwm txheej coj los nias rau tus tib neeg ntawd es txiav txim thiab txiav txim siab rau tus tib neeg ntawd xwb, ces qhov ntawd tsis yog thiab qhov ntawd tsis ncaj ncees rau tus tib neeg ntawd lawm. Yus yuav tsum ntsuas kom yog raws li qhov zoo ntawm lawv txoj kev ua neej, tag nrho lawv tus cwj pwm, thiab txoj kev uas lawv taug. Tsuas yog qhov no xwb thiaj li ncaj ncees thiab tsim nyog, thiab kuj ncaj ncees rau tus tib neeg ntawd thiab.

Hnub no cov lus uas hais txog txoj kev coj zoo uas peb tau teev tseg rau ntawm no ntawd tsis muaj ib los cuam tshuam rau Vajtswv cov lus li, thiab cov lus ntawd tsis muaj ib los mus raws li qhov tseeb li. Txawm cov lus ntawd yuav raws li txoj kab lis kev cai los sis zoo npaum li cas los xij, cov lus ntawd yeej dhau tsis tau los ua qhov tseeb. Cov lus uas hais txog txoj kev coj zoo uas los ntawm tej uas txoj kab lis kev cai qub qhuas ntawd, mas cov lus ntawd tsis muaj dab tsi cuam tshuam rau qhov tseeb uas Vajtswv cheem tsum kom tib neeg caum li. Txawm tib neeg yuav hais tau cov lus uas hais txog tib neeg txoj kev coj zoo no zoo npaum li cas, los sis txawm tib neeg yuav ua tau raws li cov lus no zoo npaum li cas, los sis tib neeg yuav tuav tau cov lus no ruaj khov npaum li cas los xij, qhov ntawd tsis tau txhais hais tias cov lus no yog qhov tseeb. Tab txawm yog cov tib neeg feem coob hauv lub ntiaj teb tuav rawv tej no thiab ntseeg tej no los xij, tej no yuav tsis dhau los ua qhov tseeb li—tsuas zoo ib yam li lo lus dag xwb, tab txawm yog koj muab qhia ib txhiab zaug los yeej tseem yog lo lus dag. Cov lus dag yeej dhau tsis tau los ua qhov tseeb li. Cov lus dag yog tej kev cuav uas muaj Ntxwgnyoog tej kev dag ntxias, yog li ntawd cov lus dag ntawd thiaj li hloov tsis tau qhov tseeb, tsis tas hais txog qhov yuav dhau los ua qhov tseeb li. Tib yam nkaus li ntawd, tej kev cheem tsum sib txawv uas tib neeg tau hais tawm txog txoj kev coj zoo ntawd yeej dhau tsis tau los ua qhov tseeb. Txawm koj yuav ua tau raws li tej kev cheem tsum ntawd ntau npaum li cas los sis ua tau zoo npaum li cas los xij, yam uas hais tau txog koj ces yog qhov hais tias raws li tib neeg pom mas koj muaj txoj kev coj zoo uas zoo xwb—tiam sis Vajtswv puas pom hais tias koj muaj txoj kev ua neej? Tsis pom. Tiam sis, yog koj ua tau raws li txhua kis thiab txoj kev cai ntawm txoj kab lis kev cai qub tej kev xav txog txoj kev siab dawb saib zoo, kev ncaj ncees, kev tsim nyog, lub tswv yim, thiab kev ntseeg siab ntawd zoo heev, ces ntshe koj yuam kev ntawm qhov tseeb deb dhau lawm. Vim li cas zoo li ntawd? Vim koj yuav saib tib neeg thiab txhua yam, thiab coj koj tus kheej kom zoo thiab ua raws li cov lus uas hais txog txoj kev coj zoo no, thiab siv cov lus no los ua koj tus qauv xwb. Qhov ntawd tsuas zoo li qaij koj lub taub hau saib lub moos xwb—koj qhov kev xam pom yuav tsis yog. Qhov tshwm sim thaum kawg ntawm qhov no yuav yog qhov hais tias qhov koj saib tib neeg thiab txhua yam, thiab qhov koj coj kom zoo thiab tej kev ua ntawd yuav tsis muaj dab tsi cuam tshuam rau qhov tseeb, los sis cuam tshuam rau Vajtswv tej kev tim tsum li, thiab koj yuav nyob deb ntawm Vajtswv txoj kev uas koj tsim nyog taug heev—koj haj tseem taug dua ib txoj kev, thiab ua qhov uas yuav rhuav tshem koj tus kheej tej hom phiaj thiab. Koj yim ua raws thiab txhawb cov lus uas hais txog txoj kev coj zoo no, ces Vajtswv yim tsis nyiam koj, koj yim txav deb ntawm Vajtswv thiab qhov tseeb, ces koj yim tawm tsam Vajtswv xwb. Txawm koj xav hais tias cov lus uas hais txog txoj kev coj zoo no mas muaj ib qho yog heev, los sis koj ua raws li cov lus no ntev npaum li cas lawm los xij, qhov no tsis tau txhais hais tias koj tab tom xyaum ua qhov tseeb. Txawm txoj kab lis kev cai qub cov qauv coj tus cwj pwm twg uas koj xav hais tias yog thiab tsim nyog los xij, qhov ntawd tsis yog qhov muaj tiag ntawm yam zoo; qhov ntawd yeej tsis yog qhov tseeb, thiab qhov ntawd tsis mus raws li qhov tseeb. Kuv xav kom koj maj nroos los xav txog koj tus kheej hais tias: Yam uas koj ua raws no yog los qhov twg los? Qhov siv yam no los ua lub hauv paus ntsiab lus thiab tus qauv rau txoj kev ntsuas thiab ua tej kev tim tsum ntawm tib neeg ntawd puas muaj lub hauv paus nyob rau hauv Vajtswv cov lus? Yam no puas muaj lub hauv paus nyob rau hauv qhov tseeb? Koj paub meej txog yam uas yuav tshwm sim los ntawm qhov koj xyaum ua raws li txoj kab lis kev cai qub qhov kev tim tsum no tias yog dab tsi lawm lod? Qhov no puas muaj ib yam dab tsi cuam tshuam rau qhov tseeb li? Koj yuav tsum thoob tsib to nrog thiab soj ntsuam seb, qhov siv txoj kab lis kev cai qub qhov kev tim tsum no los ua lub hauv paus rau koj tej kev ua, thiab los ua koj tus qauv, thiab qhov pom qhov no yam li yog ib qho zoo ntawd, puas yog koj cov nyom qhov tseeb, tawm tsam Vajtswv, thiab ua txhaum qhov tseeb. Yog koj cia li ua raws li tej kev xam pom thiab cov lus uas txoj kab lis kev cai qub qhuas ntawd yam dig muag ntsuav xwb no, qhov yuav tshwm sim los ntawm qhov ua li ntawd yog dab tsi? Yog koj raug cov lus no dag los sis ntxias lawm, ces koj yeej paub hais tias qhov tshwm sim thiab qhov kawg ntawm koj yuav zoo li cas. Yog koj saib tib neeg thiab txhua yam raws li txoj kab lis kev cai qub qhov kev xam pom, mas yuav nyuaj rau koj lees txais qhov tseeb. Koj yeej yuav tsis muaj peev xwm saib tib neeg thiab txhua yam raws li Vajtswv cov lus thiab qhov tseeb li. Tus tib neeg uas to taub qhov tseeb yuav tsum soj ntsuam txoj kab lis kev cai qub tej lus thiab tej kev tim tsum txog txoj kev coj zoo ntawd. Koj yuav tsum soj ntsuam seb koj pheej txhawb thiab ua raws qhov twg tshaj plaws, uas pheej muab coj los ua lub hauv paus thiab tus qauv rau qhov koj saib tib neeg thiab txhua yam, thiab qhov koj coj koj tus kheej kom zoo thiab qhov koj ua ntawd. Tom qab ntawd, koj yuav tsum muab tej uas koj ua raws li Vajtswv cov lus thiab tej kev cheem tsum ntawd coj los sib piv, saib seb txhua kis ntawm txoj kab lis kev cai qub no puas tawm tsam los sis cov nyom qhov tseeb uas Vajtswv nthuav tawm. Yog koj yeej pom ib qho teeb meem tiag tiag, mas koj yuav tsum soj ntsuam tam sid seb txhua kis ntawm txoj kab lis kev cai qub no yuam kev thiab tsis yog nyob rau qhov twg kiag. Thaum koj paub tej teeb meem no meej lawm, koj mam li paub tias qhov tseeb yog dab tsi thiab qhov kev nkag siab yuam kev yog dab tsi; koj mam li muaj ib txoj kev xyaum ua, thiab koj mam li muaj peev xwm xaiv txoj kev uas koj tsim nyog taug. Nrhiav qhov tseeb li no, mas koj thiaj li yuav kho tau koj txoj kev. Txawm qhov tib neeg ntiaj teb hu ua tej kev cheem tsum thiab cov lus uas hais txog tib neeg tus cwj pwm zoo ntawd yuav muaj qauv zoo npaum li cas, los sis tej ntawd yuav haum rau qhov tib neeg nyiam, haum rau qhov tib neeg xam pom, haum rau qhov tib neeg xav, thiab haj tseem haum rau cov tib neeg feem coob tej kev ntshaw npaum li cas los xij, tej ntawd tsis yog qhov tseeb. Qhov no yog ib yam uas koj yuav tsum to taub. Thiab vim tej ntawd tsis yog qhov tseeb, koj yuav tsum ceev nrooj tsis lees paub tej ntawd thiab muab tej ntawd tso pov tseg. Koj kuj yuav tsum soj ntsuam tej ntawd lub ntsiab tseeb, nrog rau qhov uas tshwm sim los ntawm qhov tib neeg ua neej raws li tej ntawd thiab. Tej ntawd puas tuaj yeem ua rau koj lees txim hloov dua siab tshiab tiag tiag? Tej ntawd puas tuaj yeem pab tau koj paub koj tus kheej tiag tiag? Tej ntawd puas tuaj yeem ua rau koj ua neej zoo nkaus li tib neeg tiag tiag? Tej ntawd ua tsis tau tej no ib qho li. Tej ntawd tsuas ua rau koj ntsej muag ncaj siab nkhaus thiab qhuas tias koj tus kheej coj ncaj no xwb. Tej ntawd yuav ua rau koj txawj ntxias thiab phem tuaj xwb. Muaj ib txhia hais tias, “Yav tas los, thaum peb ua raws li txhua kis ntawm txoj kab lis kev cai qub no, mas peb mloog zoo li peb yog cov tib neeg zoo. Thaum lwm tus tib neeg pom qhov peb coj li cas ntawd, lawv xav hais tias peb yog cov tib neeg zoo thiab. Tiam sis qhov tseeb tiag, peb paub hauv peb lub siab hais tias peb muaj peev xwm ua hom kev phem dab tsi. Qhov ua zoo me ntsis ntawd tsuas yog ua los npog qhov kev phem ntawd xwb. Tiam sis yog peb muab cov cwj pwm zoo uas txoj kab lis kev cai qub tim tsum kom peb ua ntawd tso pov tseg lawm no, peb yuav ua li cas? Cov cwj pwm thiab cov kev qhia kom pom tseeb twg uas yuav ua rau Vajtswv tau koob meej?” Koj xav li cas txog lo lus nug no? Puas yog lawv tseem tsis paub qhov tseeb uas cov ntseeg Vajtswv yuav tsum xyaum ua ntawd? Vajtswv twb nthuav ntau qhov tseeb tawm lawm, thiab muaj ntau qhov tseeb uas tib neeg yuav tsum tau xyaum ua. Yog li ntawd vim li cas koj thiaj li tsis kam xyaum ua qhov tseeb, es pheej ua cov tib neeg cuav thiab cov ntsej muag ncaj siab nkhaus xwb? Vim li cas koj thiaj li ua txuj? Muaj ib txhia hais tias, “Muaj ntau yam zoo nyob rau ntawm txoj kab lis kev cai qub ntawd! Xws li, ‘Txawm tib neeg pab koj me me xwb los koj yuav tsum pauj rov qab kom ntau’—qhov no yog ib lo lus zoo heev! Qhov no yog qhov uas tib neeg yuav tsum xyaum ua. Yog ua cas Koj cia li muab qhov no cuam pov tseg xwb? Thiab qhov hais tias ‘Kuv mam li thaiv mos txwv’ ntawd—ncaj ncees thiab muaj peev xwm npaum li cas! Qhov muaj ib tug phooj ywg zoo li ntawd mas zoo siab heev nyob rau hauv lub neej. Kuj muaj qhov hais tias, ‘Cov kab mos ntawm lub caij nplooj ntoos hlav ntawd cab sab mus txog rau thaum cov kab mos ntawd tuag, thiab tswm ciab kub mus txog thaum nws cov roj tag’ thiab. Cov lus no mas tob heev thiab nyob rau hauv txoj kab lis kev cai ntev heev lawm! Yog Koj tsis cia peb ua neej raws li cov lus no no, peb yuav ua neej raws li dab tsi?” Yog qhov no yog qhov uas koj xav, ces ntau lub xyoo uas koj tau siv los mloog lus qhuab qhia ntawd nkim pov tseg xwb. Koj twb tsis to taub tias tib neeg yuav tsum coj lawv tus kheej kom zoo los ntawm qhov ua neej raws li cov qauv ntawm lub siab uas txawj xav thiab qhov tsim nyog ib qho me me li. Koj twb tsis tau txais qhov tseeb ib qho me me li, thiab koj ua neej nyob tau npaum no lub xyoo yam tsis muaj qab hau li.

Muab hais luv luv hais tias, txawm peb twb teev cov lus uas hais txog txoj kev coj zoo los ntawm txoj kab lis kev cai qub no lawm los xij, lub hom phiaj ntawm qhov no tsis yog los qhia nej hais tias cov lus no yog tib neeg tej kev xav phem thiab tej kev xav hauv nruab siab, thiab tias cov lus no yog los ntawm Ntxwgnyoog los xwb, es tsis muaj dab tsi ntxiv lawm. Lub hom phiaj ntawm qhov no yog los ua kom nej to taub meej meej hais tias lub ntsiab tseeb ntawm tej no yog cuav, zais, thiab dag xwb. Tab txawm yog tib neeg muaj cov cwj pwm no los, qhov ntawd yeej tsis txhais hais tias lawv ua neej li txoj kev ua neej kiag li. Tiam sis, lawv tab tom siv cov cwj pwm cuav no los npog lawv tej kev npaj siab thiab tej hom phiaj, thiab los zais lawv tus moj yam qias vuab tsuab, thiab lawv tus yam ntxwv lub ntsiab tseeb xwb. Vim li ntawd, tib neeg thiaj li txawj ua txuj thiab txawj ntxias lwm tus zuj zus, uas ua rau lawv haj yam qias vuab tsuab thiab phem tuaj. Txoj kab lis kev cai qub cov qauv zoo uas cov tib neeg qias vuab tsuab ua raws ntawd mas tsis haum rau qhov tseeb uas Vajtswv nthuav tawm ntawd, thiab cov qauv zoo ntawd tsis mus raws li cov lus uas Vajtswv qhia rau tib neeg ib qho li, cov qauv zoo ntawd thiab Vajtswv cov lus tsis sib haum kiag li. Yog koj tseem ua raws li txhua kis ntawm txoj kab lis kev cai qub, ces yog koj raug dag thiab raug ntxias lawm. Yog muaj ib yam dab tsi uas koj ua raws li txoj kab lis kev cai qub thiab ua raws li txoj kab lis kev cai qub tej hauv paus ntsiab lus thiab tej kev xam pom, ces yog koj tab tom ntxeev siab rau Vajtswv thiab ua txhaum qhov tseeb, thiab tawm tsam Vajtswv txog yam ntawd ntag. Yog koj tus kheej tuav thiab ua raws li cov lus uas hais txog txoj kev coj zoo no ib qho twg, thiab saib cov lus no yam li yog ib tug qauv los sis ib lub hauv paus rau qhov koj saib tib neeg los sis txhua yam ntawd, ces qhov ntawd yog qhov uas koj ua yuam kev lawm, thiab yog koj txiav txim los sis rhuav tshem tib neeg mus txog rau ib qib twg, ces yog koj ua txhaum lawm. Yog koj pheej ntsuas txhua tus raws li cov qauv zoo ntawm txoj kab lis kev cai qub xwb, ces cov tib neeg uas koj tau thuam yuam kev ntawd yuav ntau zuj zus ntxiv thiab koj yeej yuav thuam thiab tawm tsam Vajtswv xwb, ces tom qab ntawd koj yuav yog ib tug neeg txhaum loj heev. Nej tsis pom hais tias txhua tus tib neeg ntiaj teb tab tom phem zuj zus vim yog txoj kev cob kev qhia ntawm txoj kab lis kev cai qub xwb lod? Lub ntiaj teb tsis tsaus zuj zus lod? Tus twg yim yog Ntxwgnyoog thiab cov dab phem tug, mas tib neeg yim pe hawm tus ntawd; tus twg yim xyaum ua qhov tseeb, ua tim khawv rau Vajtswv, thiab qhuas Vajtswv, mas tib neeg yim muab tus ntawd caij tsuj, cais tawm, thuam, los sis haj tseem muab ntsia rau saum tus ntoo khaub lig kom tuag thiab. Qhov no tsis yog qhov tseeb lod? Txuas ntxiv mus, nej yuav tsum kawm txog yam uas peb tau kawm nyob rau hnub no tas li. Yog muaj tej yam uas nej tsis to taub tom qab kawm txog yam ntawd lawm, ces muab yam ntawd tso tseg rau lub sij hawm ntawd es kawm txog yam uas nej kawm tau kom txog thaum nej to taub yam ntawd. Kawm cov lus no kom txog thaum nej paub cov lus no meej meej thiab nej to taub cov lus no tag nrho lawm, ces nej yuav muaj peev xwm xyaum ua qhov tseeb tau yam yog heev thiab to taub txog qhov muaj tiag. Thaum nej muaj peev xwm thoob tsib to nrog meej meej tias txhua lo lus los sis txhua yam ntawd yog qhov tseeb los tsis yog, los sis yam ntawd yog txoj kab lis kev cai qub thiab tsis yog qhov tseeb lawm, ces nej yuav muaj ntau txoj kev uas to taub txog qhov tseeb qhov muaj tiag. Thaum kawg no, thaum nej to taub txhua qhov tseeb uas nej yuav tsum xyaum ua los ntawm qhov kev kawm, thiab nej sawv daws pom zoo ua ke, thaum nej tej kev xam pom thiab tej kev to taub zoo ib yam, thaum nej paub tias yam twg zoo yam twg phem, yam twg yog los ntawm Vajtswv los, yam twg yog los ntawm Ntxwgnyoog los, thiab nej kawm yam ntawd kom txog thaum nej paub tej no meej meej thiab tseeb tseeb lawm, ces tsuas yog thaum ntawd xwb nej thiaj li yuav to taub qhov tseeb. Tom qab ntawd, xaiv qhov tseeb tej hauv paus ntsiab lus uas nej yuav tsum tau xyaum ua ntawd. Ua li no, mas nej thiaj li yuav ua tau raws li cov qauv coj tus cwj pwm uas Vajtswv tau tsim tawm los ntawd, thiab yam tsawg kawg, nej thiaj li yuav muaj qee qhov uas zoo nkaus li tib neeg. Yog nej to taub qhov tseeb thiab to taub txog qhov muaj tiag, ces nej yuav muaj peev xwm ua tau neej zoo nkaus li tib neeg tag nrho. Tsuas yog thaum ntawd xwb nej thiaj li yuav ua tau raws li Vajtswv tej kev npaj siab tag nrho.

Peb Hlis 5, 2022