დაპირებები მათ, ვინც სრულქმნილნი ხდებიან

რა არის ის გზა, რომლის მეშვეობითაც ღმერთი ადამიანს სრულყოფს? რა ასპექტებს მოიცავს ეს? მზად ხარ, რომ ღმერთმა სრულგყოს? მზად ხარ, მიიღო მისი სამსჯავრო და გაკიცხვა? რა იცი ამ საკითხების შესახებ? თუ არ გაქვს ამაზე სასაუბრო ცოდნა, ეს ამტკიცებს, რომ ჯერ კიდევ არ იცნობ ღვთის საქმეს და საერთოდ არ ყოფილხარ სულიწმიდისგან ნათელმოფენილი. ასეთი ადამიანების სრულყოფა შეუძლებელია. მათ მხოლოდ მცირეოდენი მადლი ეძლევათ, რათა მოკლე დროით ისიამოვნონ და ეს დიდხანს არ გაგრძელდება. ადამიანები ვერ იქნებიან ღვთის მიერ სრულყოფილნი თუ მხოლოდ მისი მადლით ტკბებიან. ზოგი ადამიანი კმაყოფილია, როდესაც მის ხორცს მშვიდობა და სიამოვნება აქვს, როდესაც მისი ცხოვრება ადვილია და მოკლებულია განსაცდელსა და უბედურებას, როდესაც მთელი მისი ოჯახი ჰარმონიაში ცხოვრობს, უთანხმოებისა და დავის გარეშე — და შესაძლოა, მათ ისიც კი სწამდეთ, რომ მხოლოდ ეს არის ღვთის კურთხევა. სინამდვილეში, ეს მხოლოდ ღვთის მადლია. თქვენ არ უნდა დაკმაყოფილდეთ მხოლოდ ღვთის მადლით ტკბობით. ასეთი აზროვნება მეტისმეტად უხამსია. მაშინაც კი, თუ ყოველდღე კითხულობ ღვთის სიტყვებს, ყოველდღე ლოცულობ და შენი სული დიდ სიამოვნებას განიცდის და განსაკუთრებით მშვიდია, თუ საბოლოოდ არაფერი გაქვს სათქმელი ღვთისა და მისი საქმის შეცნობის შესახებ, თუ არაფერი გამოგიცდია, და რამდენიც არ უნდა ჭამო და სვა ღვთის სიტყვები, თუ მხოლოდ სულიერ მშვიდობასა და სიამოვნებას გრძნობ და ფიქრობ, რომ ღვთის სიტყვა შეუდარებლად ტკბილია, თითქოს მისით ვერასოდეს გაძღები, მაგრამ არ გაგაჩნია ღვთის სიტყვების არცერთი პრაქტიკული გამოცდილება და სრულიად მოკლებული ხარ მისი სიტყვების რეალობას, მაშინ რას მოიპოვებ ღვთის ამგვარი რწმენით? თუ არ შეგიძლია ღვთის სიტყვების არსის ცხოვრებაში გატარება, მაშინ შენ მიერ ამ სიტყვების ჭამა და სმა და შენი ლოცვები სხვა არაფერია, თუ არა რელიგიური რწმენა. ასეთი ადამიანები ვერ იქნებიან ღვთის მიერ სრულყოფილნი და ვერც მის მიერ მოპოვებულნი. ღვთის მიერ მოპოვებული ადამიანები არიან ისინი, ვინც ჭეშმარიტებას ესწრაფვიან. ის, რასაც ღმერთი მოიპოვებს, ადამიანის ხორცი კი არ არის და არც ის, რაც მას ეკუთვნის, არამედ მის შიგნით არსებული ის ნაწილი, რომელიც ღმერთს ეკუთვნის. ამიტომ, როდესაც ღმერთი ადამიანებს სრულყოფს, ის მათ ხორცს კი არ სრულყოფს, არამედ მათ გულებს, რითაც უშვებს, რომ მათი გულები ღმერთის მიერ იქნას მოპოვებული; ეს იმას ნიშნავს, რომ ღმერთის მიერ ადამიანის სრულყოფა, თავისი არსით, ადამიანის გულის სრულყოფაა, რათა ეს გული ღმერთისკენ შემობრუნდეს და ის შეიყვაროს.

ადამიანის სხეული ხორცისა და სისხლისგან შედგება. ღვთისთვის აზრს მოკლებულია ადამიანის ხორცის მოპოვება, რადგან ადამიანის ხორცი ისეთი რამ არის, რაც გარდაუვალად გაიხრწნება და ვერ მიიღებს მის მემკვიდრეობას ან კურთხევებს. თუ მხოლოდ ადამიანის ხორცი იქნებოდა მოპოვებული და მხოლოდ ადამიანის ხორცი იქნებოდა ამ ნაკადში, მაშინ, მიუხედავად იმისა, რომ ადამიანი ფორმალურად ამ ნაკადში იქნებოდა, მისი გული სატანას კუთვნილება იქნებოდა. ასეთ შემთხვევაში, ადამიანები არა მხოლოდ ვერ გახდებოდნენ ღვთის გამოვლინება, არამედ მის ტვირთადაც იქცეოდნენ და, ამგვარად, ღვთის მიერ ადამიანების არჩევა აზრს დაკარგავდა. ვისი სრულყოფაც ღმერთს განუზრახავს, ყველანი მიიღებენ მის კურთხევებსა და მის მემკვიდრეობას. ეს ნიშნავს, რომ ისინი იღებენ იმას, რაც ღმერთს აქვს და რაც იგი არის, რათა ეს იქცეს იმად, რაც მათ შიგნით აქვთ; მათშია ჩაქსოვილი ღვთის ყველა სიტყვა; რაც უნდა იყოს ღმერთი, მათ შეუძლიათ, ზუსტად ისე მიიღონ ყველაფერი, როგორიც არის. ამგვარად ისინი ცხოვრებაში გამოავლენენ ჭეშმარიტებას. ეს არის ისეთი ადამიანი, რომელიც ღვთის მიერ არის სრულყოფილი და ღვთის მიერაა მოპოვებული. მხოლოდ ასეთი ადამიანია ღირსი, დაიმკვიდროს ღვთის მიერ ბოძებული კურთხევები:

1. ღვთის სრული სიყვარულის მოპოვება.

2. ყველაფერში ღვთის განზრახვების შესაბამისად მოქმედება.

3. ღვთის გზამკვლევობის მოპოვება, ღვთის განათებაში ცხოვრება და ღვთის გაცისკროვნების მოპოვება.

4. დედამიწაზე იმ ხატის გამოვლენა, რომელიც ღმერთს უყვარს; პეტრეს მსგავსად ყოფნა, რომელსაც ჭეშმარიტად უყვარდა ღმერთი, რომელიც ღმერთისთვის ჯვარს აცვეს და რომელიც ღირსი იყო, ღმერთისთვის მომკვდარიყო; პეტრესნაირი დიდების ქონა.

5. დედამიწაზე ყველასთვის საყვარლად, პატივდებულად და აღფრთოვანების საგნად ყოფნა.

6. სიკვდილისა და ჰადესის მონობის ყველა ასპექტის დაძლევა, სატანისთვის მისი საქმის გასაკეთებლად არავითარი შესაძლებლობის მიცემა, ღვთის მიერ დაკავებული ყოფნა, ახალი და ცოცხალი სულის შიგნით ცხოვრება და თავმობეზრების განცდის არქონა.

7. მთელი ცხოვრების განმავლობაში, ყოველთვის, აუწერელი აღტაცებისა და სიხარულის განცდა, თითქოს ადამიანმა ღვთის დიდების დღის მობრძანება იხილა.

8. ღმერთთან ერთად დიდების მოპოვება და ისეთი სახის ქონა, რომელიც ღვთის საყვარელ წმინდანებს ჰგავს.

9. დედამიწაზე იმად ქცევა, რაც ღმერთს უყვარს, ანუ ღვთის საყვარელ ძედ ყოფნა.

10. ფორმის შეცვლა, ღმერთთან ერთად მესამე ცაზე ამაღლება და ხორცის მიღმა გასვლა.

მხოლოდ ისინი, ვისაც შეუძლია ღვთის კურთხევების დამკვიდრება, არიან ღვთის მიერ სრულყოფილნი და მოპოვებულნი. ამჟამად, რაიმე მოიპოვე? რამდენად სრულგყო ღმერთმა? ღმერთი ადამიანს შემთხვევით არ სრულყოფს; ადამიანის სრულყოფა პირობითია და მას ნათელი, თვალსაჩინო შედეგები აქვს. ეს ისე არ არის, როგორც ადამიანს წარმოუდგენია, თითქოს თუ ღმერთის სწამს, შეუძლია ღვთის მიერ სრულყოფილი და მოპოვებული გახდეს და დედამიწაზე მიიღოს ღვთის კურთხევები და მემკვიდრეობა. ასეთი რამეები უკიდურესად რთულია, რომ აღარაფერი ვთქვათ ადამიანთა ფორმის შეცვლაზე. ამჟამად, თქვენ, უპირველესად, უნდა ესწრაფვოდეთ იმას, რომ ყველა საკითხში ღვთის მიერ სრულყოფილნი გახდეთ, რომ ყველა იმ ადამიანის, მოვლენისა და საგნის მეშვეობით სრულყოფილნი გახდეთ, რომელთაც პირისპირ აწყდებით, და რომ მეტი განხორციელდეს თქვენში იმისა, რაც ღმერთი არის. თქვენ პირველ რიგში დედამიწაზე უნდა მიიღოთ ღვთის მემკვიდრეობა; მხოლოდ ამის შემდეგ გახდებით უფლებამოსილნი, რომ ღვთისგან უფრო მეტი და უფრო დიდი კურთხევები დაიმკვიდროთ. ეს ყველაფერი ისაა, რასაც უნდა ესწრაფვოდეთ და რაც, უპირველეს ყოვლისა, უნდა გესმოდეთ. რაც უფრო მეტად ესწრაფვით ღვთის მიერ სრულყოფას ყველაფერში, მით უფრო მეტად შეძლებთ ყოველივეში ღვთის ხელის დანახვას, რის შედეგადაც სხვადასხვა პერსპექტივიდან და სხვადასხვა საკითხში აქტიურად დაიწყებთ სწრაფვას ღვთის სიტყვის არსებაში შესასვლელად და მისი სიტყვის რეალობაში შესასვლელად. თქვენ ვერ დაკმაყოფილდებით ისეთი ნეგატიური მდგომარეობებით, როგორიცაა მხოლოდ ის, რომ ცოდვებს არ სჩადიხართ, ან რომ არ გაქვთ წარმოდგენები, ამქვეყნიური ურთიერთობის ფილოსოფია და ადამიანური ნება. ღმერთი ადამიანს მრავალგვარი გზით სრულყოფს; არსებობს შესაძლებლობა, რომ ყველა საკითხში სრულყოფილი გახდე, და მას შეუძლია შენი სრულყოფა არა მხოლოდ დადებითი, არამედ უარყოფითი გაგებითაც, რათა ის, რასაც მოიპოვებ, უფრო უხვი გახდეს. ყოველდღე არსებობს სრულყოფის შესაძლებლობები და ღვთის მიერ მოპოვების გარემოებები. ამგვარად, გარკვეული დროის განმავლობაში გამოცდილების მიღების შემდეგ, დიდად შეიცვლები და ბუნებრივად ნათლად დაინახავ მრავალ რამეს, რაც ადრე არ გესმოდა. სხვების დარიგება აღარ დაგჭირდება; შენთვის შეუმჩნევლად, ღმერთი ნათელს მოგფენს, რათა ყოველივეში მიიღო გაცისკროვნება და შენი გამოცდილებების ყველა დეტალში შეხვიდე. ღმერთი აუცილებლად გაგიკვალავს გზას, რათა არც მარცხნივ გადაუხვიო და არც მარჯვნივ, და ამგვარად დაადგები მის მიერ სრულყოფის გზას.

ღვთის მიერ სრულყოფა არ შეიძლება შემოიფარგლოს მხოლოდ ღვთის სიტყვის ჭამა-სმით მიღწეული სრულყოფით. ამგვარი გზით გამოცდილების მიღება მეტისმეტად ცალმხრივი და მცირედის მომცველი იქნება და ადამიანებს მხოლოდ ძალიან ვიწრო ფარგლებში მოაქცევს. ამ შემთხვევაში ადამიანებს დააკლდებოდათ სულიერი საზრდოს დიდი ნაწილი, რომელიც მათ სჭირდებათ. თუ თქვენ გსურთ, რომ ღვთის მიერ სრულყოფილნი გახდეთ, უნდა ისწავლოთ როგორ მიიღოთ გამოცდილება ყოველგვარ საკითხში და შეძლოთ გაცისკროვნება ყოველივე იქიდან, რაც თქვენ გადაგხდებათ. კარგი იქნება ეს თუ ცუდი, ამან სარგებელი უნდა მოგიტანოს და არ გაგხადოს ნეგატიური. ნებისმიერ შემთხვევაში, უნდა შეგეძლოს საგნების დანახვა ღვთის მხარეს დგომით და არ დაიწყო მათი ანალიზი ან შესწავლა ადამიანის პერსპექტივიდან (ეს შენს გამოცდილებაში გადახრა იქნებოდა). თუ ამგვარად გამოსცდი ყველაფერს, მაშინ შენი გული ცხოვრების ტვირთებით იქნება სავსე; შენ მუდმივად იცხოვრებ ღვთის სახის სინათლეში და შენს პრაქტიკაში ნაკლებად გექნება გადახრები. ასეთ ადამიანებს ნათელი მომავალი ელით. ღვთის მიერ სრულყოფის უამრავი შესაძლებლობა არსებობს. ეს ყველაფერი იმაზეა დამოკიდებული, ხართ თუ არა თქვენ ისინი, ვისაც ჭეშმარიტად უყვარს ღმერთი და გადაწყვიტეთ თუ არა, იყოთ სრულყოფილნი ღვთის მიერ, მოპოვებულნი ღვთის მიერ და მიიღოთ მისი კურთხევები და მემკვიდრეობა. მხოლოდ გადაწყვეტილება არ არის საკმარისი; თქვენ უნდა გქონდეთ დიდი ცოდნა, წინააღმდეგ შემთხვევაში, ყოველთვის გექნებათ გადახრები თქვენს პრაქტიკაში. ღმერთს სურს თითოეული თქვენგანის სრულყოფა. ახლანდელი გადმოსახედით, მიუხედავად იმისა, რომ ადამიანთა უმრავლესობამ უკვე ძალიან დიდი ხანია მიიღო ღვთის საქმე, ისინი მხოლოდ ღვთის მადლით ტკბობას დასჯერდნენ და მხოლოდ იმაზე არიან თანახმა, რომ ღმერთმა მცირედი ხორციელი ნუგეში სცეს, მაგრამ არ სურთ, მიიღონ უფრო მეტი და უფრო მაღალი გაცხადებები. ეს აჩვენებს, რომ ადამიანის გული ჯერ კიდევ ყოველთვის გარეთაა. მიუხედავად იმისა, რომ ადამიანის საქმე, მისი მსახურება და მისი ღვთისმოყვარე გული ნაკლებ უწმინდურობებს შეიცავს, მისი შინაგანი სუბსტანციისა და უკუღმართი აზროვნების გათვალისწინებით, ადამიანი მაინც მუდმივად მშვიდობასა და ხორციელ სიამოვნებას ეძებს და საერთოდ არ ზრუნავს იმაზე, თუ რა პირობები და მიზნები აქვს ღმერთს ადამიანის სრულყოფისთვის. ამიტომ, ადამიანთა უმრავლესობის ცხოვრება ჯერ კიდევ უხამსი და გახრწნილია. მათი ცხოვრება ოდნავადაც არ შეცვლილა; ისინი უბრალოდ ღვთის რწმენას მნიშვნელოვან საქმედ არ მიიჩნევენ, თითქოს რწმენა მხოლოდ სხვების დასანახად აქვთ, ფორმალურად მოქმედებენ, როგორც გამოვა ისე მიათრევენ ცხოვრებას და უღირს არსებობას აგრძელებენ. ცოტაა ისეთი ადამიანი, რომელთაც შეუძლიათ, ყოველივეში ეძებონ ღვთის სიტყვაში შესვლა, მოიპოვონ მეტი და უფრო მდიდარი რამეები, დღეს ღვთის სახლში უფრო მდიდარი ადამიანები გახდნენ და ღვთის მეტი კურთხევა მიიღონ. თუ ცდილობ, რომ ყველაფერში ღვთის მიერ სრულყოფილი გახდე, და შეგიძლია მიიღო ის, რაც ღმერთმა დედამიწაზე აღგითქვა, თუ ცდილობ, რომ ყველაფერში ღვთის მიერ გაცისკროვნებული იყო და წლებს უქმად გასვლის უფლებას არ აძლევ, მაშინ ეს არის საუკეთესო გზა აქტიურად შესასვლელად. მხოლოდ ამგვარად გახდები კვალიფიციური და ღირსი ღვთის მიერ სრულყოფისა. ნამდვილად ხარ ადამიანი, რომელიც ღვთის მიერ სრულყოფას ეძებს? ნამდვილად ხარ ადამიანი, რომელიც ყველაფერში გულწრფელია? გაქვს ღმერთისადმი სიყვარულის იგივე სული, რაც პეტრეს ჰქონდა? გაქვს ღმერთის სიყვარულის ისეთივე მტკიცე გადაწყვეტილება, როგორიც იესოს ჰქონდა? მრავალი წელია იესოსი გწამს; გინახავს, როგორ უყვარდა იესოს ღმერთი? ნამდვილად იესოა ის, ვისიც გწამს? შენ დღევანდელობის პრაქტიკული ღმერთის გწამს; გინახავს, როგორ უყვარს ხორცშესხმულ პრაქტიკულ ღმერთს ზეციერი ღმერთი? შენ გწამს უფალი იესო ქრისტესი, რადგან იესოს ჯვარცმა კაცობრიობის გამოსასყიდად და მის მიერ მოხდენილი სასწაულები საყოველთაოდ აღიარებული ფაქტებია. თუმცა ადამიანის რწმენა იესო ქრისტეს ცოდნიდან და ჭეშმარიტი გაგებიდან არ მომდინარეობს. შენ მხოლოდ იესოს სახელის გწამს, მაგრამ არ გწამს მისი სულის, რადგან საერთოდ არ აქცევ ყურადღებას იმას, თუ როგორ უყვარდა იესოს ღმერთი. შენი ღვთისადმი რწმენა მეტისმეტად გულუბრყვილოა. მიუხედავად იმისა, რომ მრავალი წელია იესოსი გწამს, არ იცი, როგორ უნდა გიყვარდეს ღმერთი. განა ეს არ გაქცევს ამქვეყნად ყველაზე დიდ სულელად? ეს ამტკიცებს, რომ წლების განმავლობაში ამაოდ ჭამდი „უფალ იესო ქრისტეს საკვებს“. მე არა მხოლოდ არ მომწონს ასეთი ადამიანები, არამედ დარწმუნებული ვარ, რომ უფალ იესო ქრისტესაც — რომელსაც შენ ეთაყვანები — არ მოეწონებოდა ისინი. როგორ შეიძლება ასეთი ადამიანები სრულყოფილნი გახდნენ? უხერხულობისგან სახე არ გიწითლდება? სირცხვილს არ გრძნობ? კიდევ გაქვს გამბედაობა, რომ წარდგე შენი უფალი იესო ქრისტეს წინაშე? ყველას გესმით ჩემი ნათქვამის მნიშვნელობა?