თავი 73

ჩემი სიტყვები წარმოთქმისთანავე სრულდება; ისინი არასოდეს იცვლება და აბსოლუტურად სწორია. დაიმახსოვრეთ ეს! გულისყურით უნდა გაიაზროთ თითოეული და ყოველი სიტყვა და ფრაზა, რომელიც ჩემი ბაგეებიდან გამოდის. განსაკუთრებით ფრთხილად იყავით, რათა არაფერი დაკარგოთ და საბოლოოდ ჩემი სამსჯავროს, ჩემი რისხვისა და ცეცხლით განადგურების მეტი არაფერი მიიღოთ. ახლა ჩემი საქმე ძალიან სწრაფად მიიწევს წინ, თუმცა იგი დაუხვეწავი არ არის; ის იმდენად ფაქიზად არის დახვეწილი, რომ შეუიარაღებელი თვალისთვის თითქმის უხილავია და მას ადამიანი ხელით ვერ სწვდება. იგი განსაკუთრებით ზედმიწევნით სრულდება. მე არასდროს წარმოვთქვამ ლიტონ სიტყვებს; ყველაფერი, რასაც ვამბობ, ჭეშმარიტია. უნდა გწამდეს, რომ ჩემი ყოველი სიტყვა ნამდვილი და ზუსტია. არავითარ შემთხვევაში არ გახდე დაუდევარი; ეს გადამწყვეტი მომენტია! მიიღებთ კურთხევებს თუ ვაებით დაასრულებთ, სწორედ ამ მომენტში გადაწყდება და მათ შორის ისეთივე სხვაობაა, როგორიც ცასა და მიწას შორის. ზეცაში წახვალ თუ ჰადესში, ეს სრულიად ჩემი კონტროლის ქვეშაა. ისინი, ვინც ჰადესისკენ მიემართებიან, უკანასკნელ სასოწარკვეთილ ბრძოლაში არიან ჩაბმულნი, ხოლო ისინი, ვინც ზეცაში მიდიან, ტანჯვის უკანასკნელ მცირე მონაკვეთს გადიან და უკანასკნელად იხარჯებიან ჩემთვის. მომავალში ყველაფერი, რასაც ისინი გააკეთებენ, სიხარულითა და ქებით იქნება აღსავსე, ყოველგვარი წვრილმანი საზრუნავის გარეშე, რაც ადამიანებს აწუხებს — ქორწინება, სამუშაო, საზრუნავის მომტანი სიმდიდრე, სტატუსი და ასე შემდეგ. თუმცა, რაც შეეხება მათ, ვინც ჰადესისკენ მიდის, მათი ტანჯვა მარადიულია — ეს მათ სულებს, სამშვინველებსა და სხეულებს ეხება; ისინი ვერასდროს დააღწევენ თავს ჩემს დამსჯელ ხელს. ეს ორი მხარე ისევე შეუთავსებელია, როგორც ცეცხლი და წყალი. ისინი ერთმანეთს საერთოდ არ ერევიან: ვინც ვაებას განიცდის, კვლავაც ვაებას განიცდის, ხოლო ვინც კურთხეულია, გულის წადილისამებრ დატკბება სიხარულით.

ყველა მოვლენასა და ყველაფერს მე ვაკონტროლებ, მით უმეტეს, თქვენ — ჩემო ძეები, ჩემო საყვარელნო — მე მეკუთვნით. თქვენ ჩემი ექვსი ათასი წლის მართვის გეგმის კრისტალიზაცია ხართ; თითოეული თქვენგანი ჩემი საგანძურია. ყველა, ვინც მიყვარს, ჩემი თვალისთვის საამოა, რადგან ისინი მე გამომხატავენ; ხოლო ყველა, ვინც მძულს, იმდენად მეზიზღება, რომ მათკენ არც კი ვიხედები, რადგან ისინი სატანის შთამომავლები და სატანისეულნი არიან. დღეს ყველამ უნდა გამოიკვლიოს საკუთარი თავი: თუ შენი განზრახვები მართალია და ნამდვილად გიყვარვარ, მაშინ მე აუცილებლად შეგიყვარებ. ჭეშმარიტად უნდა გიყვარდე და არ უნდა მატყუებდე! მე ვარ ღმერთი, რომელიც ადამიანთა გულის სიღრმეებს ვჭვრეტ! თუ შენი განზრახვები მცდარია და ჩემ მიმართ ცივი და ორგული ხარ, მაშინ აუცილებლად შეგიძულებ; მე არც ამირჩევიხარ და არც წინასწარ განმისაზღვრიხარ. უბრალოდ დაელოდე იმ დროს, როცა ჯოჯოხეთში წახვალ! სხვა ადამიანებმა შეიძლება, ვერ დაინახონ ეს ყველაფერი, მაგრამ ეს მხოლოდ შენ და მე ვიცით — მე, ღმერთმა, რომელიც ადამიანთა გულის სიღრმეებს ვჭვრეტ. ეს ყველაფერი გარკვეულ დროს გამჟღავნდება. გულწრფელებმა არ უნდა იღელვონ, ხოლო არაგულწრფელებს არ უნდა შეეშინდეთ. ეს ყველაფერი ჩემი ბრძნული მოწყობის ნაწილია.

ახლანდელი ამოცანა გადაუდებელი და მეტად მძიმეა და მოითხოვს, რომ უკანასკნელად დაიხარჯოთ ჩემთვის, რათა საბოლოო საქმე აღსრულდეს. ჩემი მოთხოვნები სინამდვილეში არც ისე მკაცრია: მე უბრალოდ მჭირდება, რომ შეძლოთ ჩემთან თანამშრომლობით კარგად გაართვათ თავი საქმეს, რომ ყველაფერში დამაკმაყოფილოთ და მიჰყვეთ იმ ხელმძღვანელობას, რომელსაც მე შიგნიდან გაძლევთ. ნუ იქნებით ბრმები; გქონდეთ მიზანი და ყველა ასპექტში, ყოველ საქმეში ეცადეთ, ამოიცნოთ ჩემი განზრახვები. ეს იმიტომ ხდება, რომ მე თქვენთვის აღარ ვარ დაფარული ღმერთი, და თქვენ ეს ძალიან ნათლად უნდა გესმოდეთ, რათა ჩემი განზრახვების აღქმა შეძლოთ. ძალიან მოკლე დროში თქვენ არა მხოლოდ შეხვდებით უცხოელებს, რომლებიც ჭეშმარიტ გზას ეძებენ, არამედ, რაც უფრო მნიშვნელოვანია, უნდა შეგეძლოთ მათი მწყემსვაც. ეს არის ჩემი გადაუდებელი განზრახვა; თუ ამას ვერ ჩასწვდებით, ასე არ გამოვა. თუმცა, უნდა გწამდეთ ჩემი ყოვლისშემძლეობის. თუკი ადამიანი მართალია, მე მას აუცილებლად გავწვრთნი კარგ ჯარისკაცად. ყველაფერი ჩემ მიერ სათანადოდ არის მოწყობილი. უნდა გქონდეთ მტკიცე გადაწყვეტილება, რომ ჩემთვის იტანჯოთ. ეს საკვანძო მომენტია. არ გამოტოვოთ ეს! მე არ მემახსოვრება ის, რაც წარსულში გაგიკეთებიათ. ხშირად უნდა ილოცოთ და მევედროთ ჩემს წინაშე; მე საკმარის მადლს მოგანიჭებ შენი სიხარულისა და გამოყენებისთვის. მადლი და კურთხევები ერთი და იგივე არ არის. ის, რითაც ახლა ტკბებით, ჩემი მადლია და ჩემს თვალში იგი ხსენების ღირსიც კი არ არის; კურთხევები კი ისაა, რითაც უსასრულოდ დატკბებით მომავალში. ეს ის კურთხევებია, რომლებიც ადამიანებს აზრადაც არ მოსვლიათ და რომელთა წარმოდგენაც არ შეუძლიათ. სწორედ ამიტომ ვამბობ, რომ თქვენ კურთხეულნი ხართ და ეს კურთხევები ადამიანს არასოდეს განუცდია შექმნიდან დღემდე.

მე უკვე გაგიმჟღავნეთ ჩემი ყველაფერი. მხოლოდ იმის იმედი მაქვს, რომ შეძლებთ, გაითვალისწინოთ ჩემი გული, ყოველთვის იფიქროთ ჩემზე, ყველა ასპექტში გულისხმიერება გამოიჩინოთ ჩემ მიმართ, და მე ყოველთვის შემეძლოს თქვენი მოღიმარი სახეების დანახვა. ამიერიდან ისინი, ვინც პირმშო ძეთა სტატუსს მოიპოვებენ, სწორედ ისინი იქნებიან, ვინც ჩემთან ერთად იმეფებენ როგორც მეფეები. მათ არც ერთი ძმა არ დაჩაგრავს და არ შეავიწროებს, არც მე გავკიცხავ მათ და არც გავსხლავ, რადგან ეს არის პრინციპი, რომლის მიხედვითაც ვმოქმედებ: პირმშო ძეთა ჯგუფში არიან ადამიანები, რომლებსაც სხვები ზემოდან უყურებდნენ, ჩაგრავდნენ და ავიწროებდნენ და რომლებმაც ადამიანთა სამყაროს ყველა სიხარული და მწუხარება იგემეს. (ისინი წინასწარ იქნენ ჩემ მიერ გასხლულნი და დამსხვრეულნი და ასევე წინასწარ იქნენ სრულქმნილნი). ეს ადამიანები უკვე წინასწარ დატკბნენ ჩემთან ერთად იმ კურთხევით, რომელიც მათ ეკუთვნით. მე სამართლიანი ვარ და არასდროს ვიჩენ მიკერძოებას ვინმეს მიმართ.