Arnam Lapen Monit Kesangrappetji Aphan Lutpo

Kecheng ahut, Arnam ke kesanglok. Halaso apor ahut ke pirthe along monit lapen thangnat ahormu ta avepinlang, lapen Arnam amat ta thangnat asai ta klemklelang. Alangli kisik-kedang asai kepangcheng tame monit akhei nangplangdet lapen monit akhei hingnodet pen aphilo; laso ahut pen anke, Alangli sangsepinlo, bonta monit akhei angbong si Amethang aphan apor kachipidetji pangchenglo. Lake pudam lote monit akhei atum akechokche apot si Arnam Alang kesang che’o nangkoklo, lapen ke pherangke akethe kekhamkhe apotlo. Jongsi Arnam le Sobar aphan paremre lapen kahingnodak monit akhei aphan pajokje pulote, Alangli puthot kesangji aphan lutdamthu un’edetpo. Athema monit le sanglongle te, sonsi Arnam ta sanglongledetpo, lapen Alangli puthot sangthu lote, monit atum ta sanglongpo. Kesang along kedodun pu kepudam ke ron kavepin akai aphanlo, kasa-ur kavepin, lapen thangnat akechokche kavepin. Laso kepudam ke, Sobar kapasiksakdun kavepin akai (ladak “Sobar” pu kejongdam ke hotur atum anlo) lapen Sobar kapahingnodun ke avepinlo, lapen Arnam aphan kekhamkhe atum do’an tame lutdam un’e lo; laso akai ke asontinta amena ateng si aphiphi dunlo lapen kapinchong abang Hemphu aphan archo thekpo, lapen sining pen pirthe tame angton pen ingsamjinpo – lake kopima lammthe pen kepudam ke “monit akhei kesanglong peme akai” pu aphanlo. Arnam kesang ahut, kechokchedet atum anparke pirthe athak avedetpo, mate hotur atum masap ta lutdam un’edetpo, lapen monit akhei atum akimi apirthe along lutpo – anparke Sobar pen monit akhei aphan pahingno un’e detpo, bonta Sobar pen monit akhei aphan pahingnodet aphi tame kejok longlo. Monit akhei atum kesang arni ke Arnam ta kesang arni lo. Arnam Alang kesang longledet atheke monit akhei atum kesang along kilutdun un’edet ajoinelo, athema Alangli abinong’et ke kesang un’edetji pu kali. Kesang along kilutdunlo pu kepudam ke asontin ta sangkokpo mate kachingthur sangkokpo, mate Arnam sai keklem kangton mate monit atum kedo-kethak chingtonkok’lo lapu kali. Sobar aphan pavirdet ahut ansi kesang along kilutdun angthek dopo, komatmat ma kahingno amonit atum kahingnodak keklem along kedodun atum aphan kepasung ahut lapen pavirdet, lapen Arnam aphan kekhamkhe atum kedo’an phanta pejutkokpo. Arnam kesang along kilutlo pu kipudam ke, Alangli anpar ke monit akhei aphan Alangli kapejokji asai ke klemklelo. Monit akhei atum kesang along kilutdunlo pu kipudam ke kadokave monit akhei’an Arnam akatheang lapen Alangli ahirjume angbong si rengdunpo, Sobar kapahingno kavepin, lapen anparke kechokchedet do’anta klangthuthedetpo. Arnam akalana angbong si, monit akhei pirthe athak mesen pen dolongpo. Arnam lapen monit akhei atum kesangrappetji along kelut ahut, laso kipudam ke monit akhei aphan pejok tanglo lapen Sobar aphan pavir’etlo pu, atheke Arnam asai monit akhei along angton pen plenglimlo. Monit akhei atum along anpar ke Arnam sai klemklelo, lapen latum anpar ke Sobar kepangri angbong do nangnelo. Lapuson si, Arnam anpar ke sikjitjelo, lapen monit akhei tame anpar ke klemdamver nangnelo; Arnam lapen monit akhei kesangrappetji aphan lutdam rappetpo. Arnam ke Alangli abinong’et adim cheledamthupo, lapen anuttin amonit tame alangtum mena adim si chelepo. Laheihui ke Arnam angton kisik-kedang chun peme lote Arnam lapen monit atum kemang adim kacheledamlo. Arnam ta Arnam akemang adim dolo, lapen monit akhei tame monit akhei akemang adim dolo. Kesangbom ahut, pirthe athak kadokave amonit akhei aphan alangtum akai along Arnam si chejadunbompo, lapen Alangli akathe’ang along si, latum siningrengme along inut ahokpet a’Arnam aphan si archopo. Arnam anpar ke monit akhei angbong dodundelo, mate Alangli kemang along monit atum tame anpar ke Arnam pen dorappet un’elo. Arnam lapen monit akhei elongvet apirthe along dorappet un’e lo; alar ke, alangtum tame mena-mena kedo-kethak nangji doreplo. Kedo’an amonit akhei aphanta inut komatma kejapon abang ke Arnam henlo, lapen kedo’an amonit akhei ke Arnam kisik-kedang asai along kapacharkletang atumlo. Monit akhei aphanta ephong komatma kejatanglo, lapen Arnam ateng akedoivet pen ke isinat kalidetlo. “Kesang” pu kipudam ke madunoi mena abinong’et adim kacheledam aphanlo. Lasi, Arnam kesang along kilutdam ahut, laso kipudam ke Alangli abinong’et adim along chelethutanglo. Pirthe athak anpar ke Alangli dodelo mate latum angbong alangtum ningkarong lapen kisung chepachoi rappetji kalilo. Monit atum le kesang along kilutlo pulote, laso kipudam ke latum ahokpet kapinchong ahormu cheman tanglo; latum ke pirthe athak Arnam aphan archopo, lapen mesen monit akai achethe rengdunlongpo. Monit atum anpar ke Arnam aphan patepekpedetpo mate Alangliphan khamkhe-khelo, lapen abinong’et Adam lapen Eva akai asonthotsi cheruidamthupo. Arnam lapen monit atum kesang adim lutdet aphi alangtum mena-mena kedo-kethak akemang akai ke lasonpo. Arnam lapen Sobar angbong aron alongke Sobar kerem kephovek nangji lo. Lapuson si, Alangli kisik-kedang asai peplenglim aphi Arnam kesang along lutdampo lapen monit akhei aphan kapejok ke plenglimpo lapen kesang along si lutdampo. Monit akhei atum kesangji adim ke pirthe athak, lapen Arnam kesangji adim ke sining hemrengme arlo. Monit atum Arnam kesang ahut tame archopo, latum pirthe athak si dopo, lapen kedolang monit akhei do’an ke Arnam pensi kesang adim japonpo, Alangli sining hemrengme pen si nangchejapo, pirthe athak pen kali. Arnam ke Karjongpo, lapen monit atum ke ok pensi dobompo. Arnam lapen monit atum prekjam adim si sangpo. Arnam kesang ahut ke, Alangli monit atum angbong vang pen cheklangji; monit atum kesang ahut ke, latum aphan sining hemrengme kapahumridamji aphan Arnam si chejaji, lason si hadak kai ningcheparongji. Arnam lapen monit akhei atum kesang along lutdet aphi lote, Sobar anpar ke avedetpo; lasonthot si, matmat ma kahingnodak amonit atum tame avedetpo. Arnam lapen monit akhei sangse aphrang, komatmat ma pirthe along Arnam aphan aduk kanghoitang kehingnodak amonit atum, lason thakthak si ahotur komatma Alangliphan kekroikredet, halaso ahut anke pevir’et si chamanpo; kijutsi arni ahut kethedung ahir-asang pen latum do’an aphan ke pavirtheipo. Komatmat ma kahingno amonit atum do’an aphan pavirkoi aphi lote, pirthe along momo ta Sobar pen ajok akasiksak avedetpo. Ansi monit akhei atum choklim kejok longpo, lapen Arnam asai tame laso ahut plenglim pen chunponpo. Lahei henlo Arnam lapen monit akhei atum kesang along kilutji aphan kenangsotnei asonlo.

Kadokave ahormu do’an ta kijut anat kedambom pu kejongdam ke Arnam asai kepatanglo pu aphan, lason thakthak si monit akhei kachingthur tame kapajutlo. Lake monit atum, Sobar kaphangnotang, ke kachingthur ahin alangtum kapadusi angdeng si lelo, lapen Adam pen Eva aso-asu atum kechan-kejar plenglimlo ingtonkok’lo. Lake lason ta pudamme, Sobar kephangnotang amonit akhei atum ke kachingthurji ta un’elo. Ha kecheng ahut Adam pen Eva atum aphan ke Sobar phalangno-nelang, bonta Eden abiri along pen nangkeplungjui a’Adam lapen Eva si Sobar phalangnolotang atumlo. Arnam lapen monit atum kesangrappetji aphan kelut ahut, Adam lapen Eva – Eden abiri along pen nangkiphlungtang atum – lapen alangtum aso-asu do’an ke kijut andeng lepo. Mohut akai amonit akhei tame Adam lapen Eva aso-asu atum si dobompo, bontame lahei amonit atum ke Sobar arideng kedo atum kalidetpo. Alar ke, do’an amonit ke kejoktang lapen kapangthirtang atum saidepo. Lake kangsaitang, kangchektang, lapen kangthirtang amonit akhei atum saidepo. Laheihui amonit atum ke abinong’et ateng amonit akhei ason kalidetpo; ha kecheng ahut Adam lapen Eva ason pen angton pen kacheprekdak amonit akhei si latum chemanpo. Laheihui amonit atum do’an aphan ke kadokave hala komatmat si Sobar kaphangnotang atum angbong pen si ingvaiponpo, lapen latum ke hala matmat si Arnam akangsai lapen ado kipi ahut kijut anta thirthip pen karjap atumlo; kehenotang amonit akhei angbong pen latum do’an ke kapadusi kedoji ahamphang amonit atumlo. Laheihui amonit atum anchot si Arnam pen kijutsi ahut kesang along lutdun longchotji. Komatmat ma Arnam kangsai lapen ado kipi asai keklembom ahut kijutsi arni antame thirthip pen karjap atum do’an – lake, kijutsi kapangthir asai keklemvoi ahutsi – Arnam adung kijutsi akesang along kilutdun longji atumlo; lasonthot si, matmat ma kadokave tame kesang along kilutdun atum do’an ke Sobar akebai alamm pen chepajok pemelo lapen Arnam si nangdengdunlo Alangli kapadusi kapangthir asai keklemtang aphilo. Laheihui amonit atum, kapadusi ke Arnam si dengdunpo, kijutsi akesang along lutdun longpo. Arnam ado kipi lapen akangsai asai keklem nangkok atheke monit akhei akedoivet along kapangthir pen kejutsi kesang longji aphan ajok’lo; lapuson kapangthir avete, madu amonit akhei tame cheprekjam pu ateng pen prekjam akethakvet avelo, mate kesang lutdun longlelo. Laso asai anchotsi monit akhei kesang along kilutdunji atovarlo. Arnam kapangthir asai pen anchotsi monit atum aphan alangtum kechokche kangthirthe do’an pangthir unji, lapen Alangli ado kipi lapen akangsai pen anchotsi monit akhei atum along halahei kachingkinodak ason do’an pathek’longpo, laso pen si komatmat ma ke kejokjedetji angbong pen matmat si kejokji, lapen komatmat ma kedo longledetji angbong pen matmat si kedo longji thakvetpo. Asai pajutdet aphi lote, komatmat ma kedo longji atum do’an aphan ke kadokave ta pangthir’etpo lapen monit akhei atum isi kangtuiving angdeng an lutdunlong si latum ansose kemepik adunthu monit achethe bangso apirthe along chodeng longpo; kaprek ahin pen pulote, latum alangtum monit atum kesang arni pu pachetakpo, lapen Arnam pen si dorappetpo. Laso aphi komatmat ma kedo longledetji pu atum do’an aphan ke ado padoji lapen ingsaiji, alangtum ahokpet alir ke angton pen si paklangdakpo, laso aphi anke latum kadokave aphan tame pavirdetpo lapen, Sobar ason, pirthe along kerengdun longji ahukum anpar ke pipedetpo. Mohut amonit akhei atum along ke lapuson amonit atum ason do’an anpar ke thapponpedetpo; lason amonit atum ke kapadusi kesangji ahavar along’an kilutdunji aphan choklimle, mate Arnam lapen monit akhei atum kesang rappetji arni antame latum kidunji choklimlelang, pima latum do’an ke ado kephovek nangji saidelo lapen do’an ta kechokche, kangthirthe amonit atum. Latum aphan ephong ke pajok longlo, lapen latum aphan kangsai lapen ado tame pi longlo; latum ephong ke Arnam apharman tame sai klempidun longlo. Tebontame, kijut arni nangkele ahut ke, latum do’an aphan chenam si varchorji lapen pavirdetji athe ke alangtum akechokchepik apot lapen alangtum kachingkinodak lapen kapajok un’edetji apotlo; mohut akai apirthe along latum kevangthu longji ke chenam ta un’edetpo, lapen mohut monit akhei atum angbong kedodunji ta anpar ke longledetpo. Latum do’an kithitang akarjong pu tame mate ok pen kerengbomlang amonit atum tame, kahingno keklem atum’an lapen komatmat ma kejok dundelang atum’an aphan ke pavirdetheipo ephong jongsi monit akhei atum angbong ingthir lote kesangji along lutpo. Laheihui kahingno klempet akarjong lapen amonit atum anke, mate kangthirpet akarjong amonit atum an lapen komatmat ma kechokpet keklem atum, kopi akai ahut si latum do’an kedoma pu langdamdepin pen, kadokave komatmat ma kahingno keklem atum do’an aphan ke padusi ke pavirvekpo, lapen kadokave komatmat ma kangthirpet atum do’an si reng unchotpo. Bangso amonit mate akarjong kejok longjima longle puke kijutsi akai ahut asai keklem ahut ateng pen si la angton pen ingvaiponji; anparta, lake latum do’an Arnam aphan kekhamkhe mate chingkinodak kali ma kalangma pu ateng si langdam pemeji. Kedamtang akai ahut monit atum komatmat si kahingno klemdet lapen kejok kelongdundedet atum do’an, honthe movelo, akesung phovekpo, lapen komatmat ma non kedobom akai ahut kahingno keklemdet lapen kejok un’edet atum do’an tame akesung phovekpo. Monit atum aphan kethakpon ke keme lapen kahingno atenglo, tebonta latum koloso akai along si kedobom ateng kali. Ephong le lapuson thakdet lote, latum do’an aphan menmen ado mate anong’e pipelo; alar ke, Arnam Alangli sai kahingno aphan kapesung lapen akeme aphan nong’e kipi keklemji ke mo Alangli kejutsi arni kachepehai sai petangdet aphi anchotlo. Abinong’et ke, Alangli monit atum aphan keme lapen kahingno thakponbomlo Alangli kepajokvan asai keklem kepangcheng ahut penta. Lake Alangli keme atum aphan anong’e kipi lapen kahingno atum aphan kepasung anchotlo Alangli sai jutdet aphi anke; lake Alangli sai kepatanglo tangte latum aphan Alangli keme-kahingno ateng thakvetpo lapen laso aphi menmen amat si kahingno aphan ado kipi lapen keme aphan anong’e kipi lapu aphan kali. Alarke, laso asai amo ketangji ke mo Alangli asai angton pen tangdet anchot lo. Angton pen Arnam kapadusi keklem asai atheke kahingno aphan ado kipi lapen keme aphan anong’e kipi ke kedo’an amonit akhei aphan kapangthirlo pima laso pen ajok Alangli choklim kangthir’et amonit akhei atum kai apar kai akesang along kevan thekji aphanlo. Laso asai Alangli keklem angdeng henlo akenangsotnei; lake Alangli kisik-kedang asai angton pen kapadusi angdenglo. Jongsi Arnam le kahingnodak atum aphan pavirvedet, bonta alar ke kedolongji aphan pekdet, tangte anuttin amonit tame kesangji along lutdun longledetpo, lapen Arnam kedo’an amonit akhei aphan kemenei apirthe along kevangji un’edetpo. Lapuson asai ke plengpledetpo. Alangli sai kejut ahut, kedo’an monit akhei atum ta angton ingthir’etpo; lason akrong pen anchotsi Arnam tame ingsamjin pen sang longpo.

Monit atum nonpu ta ok ahormu ason do’an che’o un’elang; latum ok aningkehang che’o un’elang, pirthe amar, tangka, mate alangtum kahingnodak akun heihui do’an. Ongdung amonit atum kihungdun ke alangtum aningkehang binong ateng pen kalidetpo. Abinong’et ke, lahei amonit atum ke alangtum aning arlo Arnam aphan pethirthedetlo; lapen ta hingno muchotlang, latum ke Arnam aphan phereredetlo. Latum aning arlo ke Arnam ave, lasi latum ke Arnam keklem asontin ta dengdundelo, lapen kijumnei ke latum Alangli kaningje alamm do’an tame kroi dundedetlo. Lason amonit atum ke ok aningkehang pen si plengsetlo; latum akechokche arnukkrunglo lapen ahok puke ajat ahin tame jumdetlo. Kopima akethe dolang, latum Arnam ke Sumsi nangchemanthek pu kroidamdedetlo. Madu tame Arnam Sumsi nang kacheparjan kekroidundedet atum do’an ke – halake, madunoi ketheklong a’Arnam mate Alangli sai lapen alammthe aphan kekroidunde atum lo, lapen alar ke sining hemrengme along kedo ketheklongledet Arnam aphan si archo ronglo – lake alangtum aning arlo Arnam kavedet amonit atumlo. Lason amonit atum do’an ke kachedandong lapen Arnam aphan kekhang atumlo. Latum along ke monit pu aning-angthin lapen kamunthithek avelo, ahok ajat ta ningje thekthelo. Anparta, pima laheihui amonit atum, ketheklongprong lapen ahok keklardak a’Arnam aphan ke masap ta kroikredet si, tebonta latum ke ketheklongledet lapen ahok keklardakdedet a’Arnam aphan si akechoknei lapen ningparongtheknei pusi hokthuronglo. Kopima latum kiri ke ahokpet kechok aphan kali mate kai-chethe along kenangsotnei ahok ason aphan kali; Arnam aninghang aphan la ar’i’e muchotlang. Alar ke, latum kachehokjok si rilo. Kopi ahormu pen si latum aphan alangtum mena aningkehangdam ason kapaplengthek loma, klangdaklo, kopima latum kekroidam lapen kopima latum kachoridun. Latum Arnam aphan akekroi ke alangtum mena ninghang kapapleng aphanchotlo, bonta ahok aphan kiri kali. Tangte lason amonit atum kahingnodak kalilang puhe? Latum do’an ke mena ane kachepathe litchetlo, lapen latum ke sining hemrengme kedo Arnam lason mena aphan “keme amonit atum” pu kachekrong do’an ke pavirdetji pu kroikredet chenamlo. Alar ke, latum akekroidam ke Arnam latum aphan pado longji lapen, anparta, Arnam apharman penang an asai klempilo lapen Alanglilong “athikdut” pen cheklanglo pu apot latum aphan mesen anong’e nangpiji. Latum jongsi ketheklongprong a’Arnam aphan le rilo tangte, alangtum aninghang ason le kichunchedet pulote menmen amat si, latum Arnam aphan prapjin pen akoi piphitji mate aningkithi tirlapji. Latum amena aphan kememedet amethan’so bang pelangselet’ri atum si cheklanglo pima kaike ta alangtum mena aning kar’i keplengji aphan anchot si chorilo; latum do’an ke ahok kiri along athikdut amonit atum kalidetlo. Lason amonit atum ke kahingnodak Khristo aphiphi kidun atum pusi pupo. Lahei amonit atum komatmat si ahokpet kiri-dunde atum ke chenam si ahok aphan kroidun thekthelo, lapen ke mohut monit akhei atum kephoji alamm chininedet khangjanglo, pima latum ke ketheklong a’Arnam ajat asai lapen alammthe tame kroidundedetlo – lapen laso along ke mohut monit akhei atum aphan kisikpi adim keledamji aphan tame kroidun un’edetlo. Laso apot si, latum ke jongsi ketheklong a’Arnam aphiphi le dun sitame, latum nonpu ta kahingno klembomlang lapen ahok aphan chenam si rire, mate Ne halso kenangji ahok ateng latum klemkle. Laheihui amonit atum aphan pevirdetji puke kroikre, bonta, latum aphan henlo kapavirdetvekji ke. Latum amena aphan thek-reset pusi kachitin, lapen alangtum henlo ahok asai keklembom atumlo pusi chematha lo. Latum alangtum kahingno a’ot aphan si akechok pu hok’lo lapen laso pensi ningchepa’rong i-lo. Lason kahingnodak amonit atum ke kaike ta methang aphan si ningchethelo; latum ahok aphan ke kethan aronchot pu si enlo lapen alangtum akahingno ason do’anke ahok pusi denglo, bonta mo kijut ahut ke, latum kopisi katiki ma laso ateng si athe cholongpo. Monit atum ko’an ma methang aphan ningkachethe la’anlo ane kachepathe, lapu’an sose si latum ke ahok longdun un’edetpo; ko’an ma siningrengme arlo a’Arnam aphan monit atum kekroi, lapuan sose si latum Arnam aphan dengdelo. Laheihui amonit atum anke ado kephovek nangji atumlo. Monit akhei atum kesang along lutle aphrangjong, anuttin abangphu tame ado mate anong’e pho phophe lake latum ahok aphan kiri longdun ma longdunde ma, latum Arnam aphan chini ma chinine, lapen latum ketheklong a’Arnam aphan chehodai unji ma un’e ateng pen si langponji. Komatmat ma ketheklongprong a’Arnam apharman sai keklempilong atum, tebonta Alangliphan chininedet mate Alangliphan chipidet kalidet atum ke, ahok kachini duredetlo. Lason amonit atum do’an ke kahingno keklem atumlo, lapen kahingno keklem atum anke ado phoveknangpo; anpar tame, latum ke alangtum akahingno a’ot ateng si ado phovekpo. Arnam ke monit atum kekroiji apharmanlo, lapen Alangli ke alangtum athikdut aphan ardi pi peme. Komatmat ma keklardakdedet lapen ketheklongledet a’Arnam aphan anchot si kekroi atum do’an ke Arnam aphan kekroikredet lapen ke Arnam aphan chehodai un’edet atumlo. Jongsi lahei amonit atum ketheklong a’Arnam lapen Alangli sai aphan keklem kapejut apor anta kekroidunji chithik thekthelang pulote, lapen ok along ketheklong a’Arnam aphan khangbomlang lapen chingkinobomlang pulote, tangte, laheihui “keklardakde atum” ke, chenam si, kivirdet nangji ahormu chemanpo. Lake ejehak nangtum angbong pen asonthotlo – madu tame alamm pen anchot si Arnam Monit kachepharlotang aphan kachinichot, tebonta ahokpet pen Arnam Monit kachepharlotang aphan kachipidetji ke klemkledet pulote, kevarchorji lapen kivirdet nangji ahormu si padusi ke chemanpo. Anparta, madu tame alamm pen chotsi ketheklong a’Arnam aphan kachinidunchot, Alangli pen kaningje ahok alamm cho-junbom ahut si keklardakde lapen ketheklongledet a’Arnam aphan tame ribom lote, kevirji ajaton si plangdetpo. Arnam asai patangdet aphi lahei amonit atum ke inutnat tame kesangji apor ahut dodun longledetpo, mate inutbak amonit tame lasonthot amonit atum ke kesangji apor ahut do longledetpo. Sobar ason amonit atum do’an ke ahok keklemkledet atumlo; alangtum aot-adur ke Arnam aphan kekhang lapen kachinkinodak henlo, lapen masapsonat tame Alangliphan kachehodaidetji puke latum mathathelo. Lason amonit atum do’an aphan ke pavirdetpo. Nanglong ahok le donoi lapen Arnam aphan kekhang le donoi lake nang ot-dur alinglo, nang kacheklang mate koson si ahut pen lamm kaningje ma mate nangmethang aphan kachejaponlo ma laso ateng kali. Inut abangphu virji mate virve ke alang mena aot-adur pen apot si chevanpo, lake alang inut aot-adur keme-kahingno keklem kacheklang lapen ahok aphan akenangji alang kosonma laso ateng pen si ingvaipo. Monit atum angbong matmat ma lahinhin tame latum keklem along chingbarpetlo, lapen matmat si isinat aphai ke’ong sai keklem chingbarlo, komatmat ma monit atum aot-adur kemesen lapen matmat si ahok kelongloma la do’an amonit atum henlo kedo longji, tebonta komatmat ma monit aot-adur kahingnodak lapen ketheklong a’Arnam aphan alamm karjujedet atum do’an ke kivirdetvek nangji ahormulo. Arnam asai lapen alamm do’an ke monit atum aphan anuttin jongjung a’ot-adur ateng si mo kejutsi kadokave monit akhei kemang adim pen kachingbar langponpo; masapsonat akechokche tame klangklelo, lapen isibak kechokche tame pavedetpo. Lake lasonji mo monit atum le sai klem pen monit aning mate ajor kachingvui rappet si lutpo. Arnam keklem asai ke choklimvekji; ajat api aphan tame Alangli chenam si kechokche akoi kipiji puke vanve. Penang an amonit atum non apor ahut monit akhei mohut kijut kemang adim aphan kachini dunde dopik’lang lapen Ne kaningje alamm tame kekroikre atum dolang. Kadokave matmat ma kekroikredet do’an, lapenthu ahok ateng keklemkledet do’an atum ke, hi’i saidelo!

Non malom ke, komatmat ma kiri lapen matmat si kirire atum pasonni angton pen kacheprekdak amonit asonlo, pima kijut kemangdam adim ta cheprekjamlo. Komatmat ma ahok aphan kachiniji pura kiri lapen ahok ateng keklem atum do’an henlo Arnam kejok kevanpiji atumlo. Komatmat ma ahok akrong kachininedet atum do’an ke hi’i lapen hotur saidelo; latum do’an ke tekela kethe aso-asu saidelo lapen kivirdet nangji ahormulo. Komatmat ma keklardakde a’Arnam aphan kekroithip pen kedo atum do’an – latum ke tangte hi’i kalilang puhe? Monit atum matmat si keme-kahingno kamathathek ajakong dolo bonta ahokpet akrong dengdun thekthe atum do’an ke hi’i saidelo; alangtum a’ot-adur pensi Arnam aphan kekhangverlo. Komatmat ma ahok akrong kedengdun thekthe atum do’an ke Arnam aphan kekhang atumlo, lapen jongsi laso amonit atum penang’an akisung chechak sitame, latum ke chenam si virdetvekpo. Komatmat ma pirthe aphan kache’odetji aningkehanghedet atum do’an, alangtum api-apo pen kachechak un’edet atum, lapen alangtum mena ok aning aningkehang kache’o un’edet atum ke Arnam aphan kachingkinodak atumlo, lapen kadokave tame kivirdet nangji ahormulo. Madu tame mat si Arnam Monit kachepharlotang aphan kekroikredet atum ke hi’i aninglo lapen, anpar tame, virvekpo. Komatmat ma kekroi ke dolo bontame ahok ateng ke klemkle, komatmat ma Arnam Monit kachepharlotang aphan kekroikre atum, lapen komatma Arnam do pu kekroikredet atum anke kivirvek nangji ahormulo. Komatmat amonit atum si kedo longjima ke keduk-kisung chechak pen kapacharkletang lapen karjap thirthip pen kedo atum anchotji; lahei amonit atum henlo ahokpet pen asat do’an kachechakthip atum lo. Madu tame Arnam aphan kapangthekthedet atum do’an ke hoturlo; lake tangte, madu tame Arnam Monit kachepharlotang aphan kapangthekthe atum – aling pen tame latum doa’n ke arlo pen mate athak penta laso aroi lo – lake Khristo ahotur atumlo! Komatlo Sobar ke, komatlo hi’i ke, lapen komatmatlo Arnam ahotur ke jongsi kekhang atum kali Arnam aphan le kroikredet tame? Tangte latum ke komatmat ma Arnam aphan kachingkinodak atum kalilang ma? Tangte latum ke komatmat ma hirjume kelongji aphan ansi richotlo tebonta Arnam apharman ke hakhi chipi thekthedet atum kalilang ma? Pini arni nangke nonpu tame halahei ahi’i atum pen si chelangbomlang lapen keme-kahingno thakthekthe lapen latum aphan si chinghonlo, bonta laso along ke nang tangte Sobar aphan kemesen akemang pen si chejotlo kali puhe? Tangte nang hi-i atum pen chelang rappet kalilang puhe? Jongsi monit atum laheihui arni do’an keme lapen kahingno nonpu ta thak thekthedetlang, lapen kamanghu pensi Arnam aningkehang ateng kiriji akamatha avepin pen inghonbom lapen diyaponbom mate ajat ahin akrong pen tame alangtum methang si Arnam akamathadam alamm chepaklong thekbom, tangte alangtum kijut ahut anke ke’ongdung akivir si plangrongpo. Madu tame Arnam Monit along kacheklang aphan kekroikredet atum do’an ke Arnam ahotur atum saidelo. Nang jongsi keme-kahingno kethakthekthe lapen hotur aphan si inghonrong, tangte nang ke akeme kamathathek akaduredet abang kalilangma? Nang jongsi Ne ningkedokdenei lapen ke Ne kelangsetlet atum pen si kedo rappet pulote, lapen latum aphan si kachinghon mate jongjung aning-angthin nonpu chipibom tangte, nang ke athikdut abang jilang puhe? Tangte nang ke chinilor pen Arnam aphan kekhang kalilang puhe? Tangte lason amonit ahok dolo ma? Jongsi monit atum le hotur aphan aning cherengno’rong, hi’i aphan chinghon’rong, lapen Sobar aphan le kangjinso dorong, tangte latum ke chinilor pen Arnam asai kekhangdun kali ma? Komatmat ma monit atum Jisu aphan ansi kroichot lapen kijut arni Arnam Monit kachepharlotang aphan ke kroikre lepute, anpar tame komatmat ma alamm pen ke Arnam Monit kachepharlotang aphan kekroi pu chipu bonta kahingno klembom, atum anke Khristo ahotur lo, latum anke sunglorlepin pen Arnam aphan kekroikre atum saidelo. Laheihui amonit atum kadokave tame kivirdetji ahormulo. Monit atum akaprek amonit atum aphan kangsai angdeng ke alangtum aot-adur ateng pen si klemlo; komatmat ma keklem mesen lote choklimlo, tebonta komatmat ma keklem ingthirthe lote akechokchelo. Arnam akangsai angdeng monit atum aphan kelangdam ke alangtum aot-adur Alangliphan chipidet kalima kalang; komatma Arnam aphan kachipidet abang ke choklimlo, tebonta komatma chipipedetde abang ke hoturlo lapen ke kechokchenei abanglo, laso amonit aot-adur mesen mate henodak lapen alangtum kaningje alamm chok mate chokche pu ateng pen kalipinlo. Ajahak amonit atum ke keme asai amo klem pen kemesen mohut kijut kemang adim keledun thekji aphan aninghang, lapen ajahak amonit atum ke jumesen alamm kaningje pen kemesen kijut kemang adim keledunji aphan ninghang pen klem. Anuttin tame kachinine pen si kroilo pima Arnam ke monit atum kephoji kopima ke alangtum aot-adur langdet pen lapen alangtum kaningje alamm arjulongdet pen aphiji; penang an amonit atum laso pen apot ninghang Arnam aphan si kachongthuiji pu ale kacho’en lake latum tangka ahin kelongdunji aphan. Mohut ke, monit atum mat si kesang angdeng along’an kerengdunlo ma kadokave tame kangsaiji arni ke chechak nangvekpo lapen Arnam apharman tame hakhi chepidun pemepo; latum ke kadokave ta alangtum adeng kapetang peme atumlo lapen Arnam aphan kachehodaitang atum chenamlo. Komatmat ma ahok ateng keklemkledetji aphan pura thangbakbe adeng kacheklemji aphan avarsai kiri akamathadam kedo atum do’an ke do longledetji. Arnam along ke kechoklim angdeng anuttin abangphu apharman kephoji aphan kithikdam do; Alangli thangbakbe ke laheihui kapathikdam inut abang alamm lapen a’ot ateng pen apot kali, mate Alangli latum aphan isi akai apor ahut kopuson si keklem ma laso ateng kali. Kedamtang ahut Alangliphan sai klempilo pusitame, hala keklem kechokche apot Alangli chenam si kangjinsoji pu avedetji, mate Arnam apharman ephongnat kachipi pen anchot ke Alangli inutnat aphan tame kithi pen pejok’jedetji. Inutnat ta alangtum kechokchedet apot ado kephophedetji puke un’e, lapen inutnat tame alangtum kahingno aning apot kidipthipji pu un’e lapen ke kapherememe kivirdetji pen chepajok ta un’e. Jongsi monit atum alangtum amena asai ahokpet pachun theklote, latum do’an ke Arnam aphan kai apar kai kekroithip atumlo lapen nong’e riredetpo, latum hirjume le long mate kopai kelangno le pho puvoiphit tame. Monit atum jongsi latum hirjume kethek’long ahut Arnam aphan kroithiplo, bonta ajat ahirjume tame longledet lote alangtum akekroi tame ingbodet titi, lapen jongsi, kijut ahut anta, latum Arnam apharman hakhi chipi un’elang mate latum asai keklemvek nangji adeng aphuthak pachunchelang pulote, latum ke kivirdetvek nnagji ahormu si chemanvekpo alangtum aphrang le Arnam aphan asai keklempi athikdut pusi tame. Thihek pen, kai apar kai anke kahingnodak amonit atum ke rengdun un’elo, mate kesang along tame latum lutdun longle; kesang along ahemphu ke kechoklim atum anchotji. Monit akhei atum le choklim akrong along lo pulote, monit atum mena monit akai ingsamjin pen dopo. Latum ke kadokave ta alangtum mena adeng ateng cheklempo lapen Arnam aphan kekroithip pen si chenam dopo. Latum ke alangtum kachingkinodak lapen alangtum kahingnodak akun heihui do’an che’o’etpo, lapen latum ke Arnam apharman lapen Arnam pen si rengpo, kachingkinodak lapen kekhang aning hini ta pavepinpo. Latum kadokave tame Arnam aphan si angton pen chehodaidet unpo. Lake tangte Arnam lapen monit akhei achethelo; lake Arnam kapangri arat achethe si manpo, lapen lake kesang akai si chemanpo.

Komatmat ma alangtum kekroikrelang a’osomar lapen adon-arap atum aphan mondoli along kevan bor’i atum anke angthin kelangno atumlo, lapen latum ke kangjinso kachepaklangchotlo. Lahei amonit atum ke kanghon anat si ardi pichot lo, latum kroi mate kroikre ke langlelo lapen lake Arnam aningkehang atenglo pu tame matha damdelo. Ajahak atum ke alangtum apiso aphan Arnam angno vanlo, mate alangtum api-apo aphan Arnam angno van bor’ilo, lapen laso aphan Karjong Kangthir kroi ma kroikre mate latum along si la klemloma, latum chininepin pen si Arnam apharman “kethekser amonit atum aphan kebipon” klembomlo. Kopi ale si chenam ta kelong memepo laheihui kekroikrelang atum aphan kangjinso kachepaklangdun pen? Jongsi latum le, Karjong Kangthir kavepin pen atum doan, Arnam aphiphi kidun sungji, latum ke jok un’edetji pusi kekroidam dokok tahaiji meme. Komatmat ma kejok kelongdunji atum do’an tame lapu’an kejoikeji ke kali. Monit atum mat ma Karjong Kangthir asai lapen akangsai phophepinlang, lapen Arnam Monit kachepharlotang abang pachoklimlelang, atum do’an ke choklim un’elang. Laso apot si, latum Arnam aphan kedengdun arni pen matmat si, laheihui monit atum along Karjong Kangthir kedo duredetlo. Alangtum kedo-kedam lapen ahokpet kopuson angdeng si do pu kachinidam pen, latum aphan joike pen pachoklim keklemji un’elang. Lapuson ke, Karjong Kangthir latum along ajakong lapu’an kachipiji aphan paraire lo, mate latum aphan the’ang adak-atur mate kejapon ajat pen tame puke Alangli pipelo; Alangli latum aphan aphiphi nangdunnoi pu’an si pekchotpo, lapen alangtum akephoji do’an kapejut ke paklangdakpo – lake lapu anta chok’lo. Monit akhei ningkirungphom lapen kamathadam do’an ke Sobar pen si vanglo, lapen nahok akrong pen tame laheihui ahormu ke Karjong Kangthir asai petang un’e. Monit atum ajatle punon, latum along Karjong Kangthir asai ke nangvekpo. Monit atum monit aphan pachoklim unji ma? Kopi apot si apenan le alang piso aphan kachinghon athelo? Kopi apot si apiso tame alang penan aphan kanghonlo? Kopi apot si osomar atum alangtum api-apo alamm ateng kekroikroilo? Kopi apot si api-apo atum asomar aphan kanghon kilitpik? Kopuson akamathadam si monit atum chenam ta kapangrum titilo? Alangtum kamathadam ke alangtum mena kar’idam lapen mena ale aphanchot ninghang heihui keplengji aphan kalima? Latum chenam si ahokpet pen Arnam kisik-kedang kemangdam apharman keklempiji pu aphan puhe? Alangtum kamathadam ke kapinchongtang api adeng kachepachunji aphan puhe? Komatmat ma, latum Arnam aphan kekroilo pu kecheng apor ahut pen ke, Karjong Kangthir kedo longdundedetlo, Karjong Kangthir keklem asai longdundedetlo; lahei amonit atumke kivirdet nangji ajatton paraidet lo. Latum aphan koanma kanghon le do puvoiphit tame, lake Karjong Kangthir keklem asai adular cheman un’elo. Monit atum ningkirungphom lapen akanghon monit aningkamathadam cheklangdak, bonta Arnam kemathadam ke paklangdak thekthe, lapen latum Arnam asai adular kemanji ta un’e. Jongsi inut abang mat si amenchot Arnam aphan akekroi kedo lapen Alangli phiphi kidunlo pu kapathechot tebonta ahokpet pen Arnam aphan kekroi ke kopi lone pu kachininepin atum aphan thedung ki’un’an akanghon alin chipi mate kangjinso leheihui amonit atum aphan chepaklang tame, latum ke Arnam akangjinso chenam si longledetjilang, mate latum Karjong Kangthir keklem asai tame longdundelang. Jongsi monit atum matma Arnam aphiphi kidun athikdut pen tame ajakong bopdetlang lapen ongdung ahok alamm chini pememelang, latum ke jatnon ahut pen Karjong Kangthir asai keklem longdunjilang; tebonta, komatmatma aboi kemesen kethekser atum do’an, bonta athikdut pen kroidun thekthe, joike pen Karjong Kangthir kedo longdundedetji. Lason amonit atum aphan ke chenam ta kejokji aphan nahok pen ta ave. Jongsi latum Arnam alamm porhi mate ahut adak pen Arnam alamm arjudunbom, mate Arnam aphan kero alun tame lundunlo meme, latum ke mo kapadusi kesangji apor ahut anke rengdun un’edetji. Monit atum arsikjik pen kiri ke bang atum latum aphan kopuson pen si kangsaidun ma pu ateng kalilo mate kopuson si latum tebok-terai amonit atum kelangdunma, bonta Karjong Kangthir asai latum along keklem lapen latum Karjong Kangthir kedo longdun loma longle ma pu pen si langdamji. Anparta, penang apor ahut Karjong Kangthir asai keklembom aphi alangtum akun heihui kachelar lapen latum Arnam aphan jat tame kachinidam kelong pen ateng si langdamji. Jongsi Karjong Kangthir asai monit along klem lote, laso amonit akun do’an pajo pen chelarponpo, lapen alangtum Arnam aphan akekroi kamathadam tame pajo pen ingthir’et chemanpo. Arnam aphiphi monit atum ko’an ajir keding dun loma pu langdamdepin pen, latum chelardet ahut an, lake Karjong Kangthir latum along sai klembomlo. Latum jongsi chelarle tangte, lake Karjong Kangthir latum along sai klemkledetlo. Laheihui amonit atum jongsi ajahak asai klemlo tame, latum lason keklem ke ahirjume chodenglongji aphansi ar-i lo. Ahut adak pen sai amo keklem penchot ke alangtum akun heihui kachelarji aphan masap ta palar un’e. Kapadusi ke, latum aphan ke pavirdetpo, pima Khrist recho arat akai along sai keklem atum akenang avedetpo, mate halahei amonit atum ke pachoklim tanglo lapen Arnam aphan kekroithip atum aphan sai paklempiji puke akun kachelarledetlang atum aphan ke akenang avedetpo. Halahei alamm do’an hako ahut ningje tanglo, “Hemphu aphan le madu tame kekroi lote, alang ahemtun isi along angton pen kemesen ason-amung longponpo” lake Kangjinso Akai ahut aphan si melo, bonta monit akhei kijut kemang adim keleji pen ke cherap’lok-lelo. Lahei kachoklim ke Kangjinso Akai angdeng ahut aphan chotlo. Laheihui alammthe ajor kenangsotnei ke ingsamjin pen si jalo lapen monit atum hormu-hortar ahirjume pen si aningkarong chipilo; latum kipudam ke pima angton hemtun isi si inut Hemphu aphan kekroidunchot pen ke kejokji pu kali, mate latum kipudam ke pima inut ahirjume chodenglong ahut, inut ahemtun angton pen kesang along van-etpo lapu kali. Inut abang aot-adur pen ateng si alang inut ahirjume longji mate kopai kelangno phoji ma lake langdamji, inut aot-adur pen bang kaprek atum pen chepachoirap isinat aot-adur pu ateng pen kalidetji. Halason alamm kaningjepon mate akejapon ke joike pen Khrist recho arat akai along adim avedetji. Inut amonit jongsi kejut’an rengdun undet pulo tangte, lake athema latum Arnam akenangji do’an chetonglonglo, lapen latum jongsi kesangji apor ahut anta kedodun un’edet tangte, lake athema latum Arnam aphan chingkinodaklo lapen Arnam akenangji do’an paplengdundedetlo. Anuttin aphan tame kijut kemangdam adim keleji doveklo. Laheihui kijut kemang adim do’an ke anuttin abangphu aot-adur ateng pen si langpo, lapen anut kaprek aphan pen kapangbardamji thangnat ta ave. Inut a’oso kahingnodak asema kedo ke alangtum api-apo aphan pudam un’e, mate inut aoso kangthirthe apot ke alangtum api-apo pen chepachoidam un’e. Api-apo atum kahingnodak asema apot ke alangtum asomar along pondet un’e, mate api-apo kangthirthe apot ke alangtum asomar pen chepachoi un’edetji. Anuttin tame alangtum mena-mena apap chedoreplo, lapen abangphutin tame alangtum mena-mena ahirjume pensi ningcheparong lo. Anut kaprek apharman ke madu tame adular larpi un’elo; lake ahokpetlo. Monit ahin penle langdam tame, jongsi api-apo ahirjume chodenglong lote, tangte alangtum asomar tame kelongvek nangji dolo, lapen jongsi asomar atum le kechokche klemdet, tangte alangtum api-apo atum tame halaso apap paplengdun nangji. Lake monit atum ahin pen kelangdamlo lapen monit atum keklemklem akronglo; lake Arnam ahin pen kelangdam kali. Anuttin kephoji kelangdam ke alangtum keklem aot-adur pen kevang ateng penji, lapen lake kaiketa choklim pen si langdamvekji. Anut kaprek apap madu tame dengdun un’e; anpar tame, madu ta anut kaprek adular ado dengdun longle. Lake chenam-chenumlo. Api-apo atum asomar aphan akele kanghonpik ke latum alangtum asomar adular akeme klemlo pu kali, mate inut a’oso api-apo aphan mesen pen sai keklempi ke alangtum api-apo adular si keklem pilo puta kali. Lake kopima ahokpet ke laso alammthe pen si pulo, “Halabangso ahut banghini atum rit si doji, inut abang aphan ke pondetji lapen inut abang aphan ke o’tekangbupji; banghini arloso atum arlong pen him koi rappetji, inut aphan ke pondetji lapen inut aphan ke o’tekangbupji.” Monit atum alangtum keheno keklemdet asomar aphan alangtum kachinghon karnukkrung kedo pen apot ke kesang along pon longledetji, mate madu tame alangtum keme-kechok keklem pen apot ke alangtum apiso (mate apenan) aphan kesang along pon longledetji. Lake kacharipon aronlo; ladak madu aphan tame kephoponpe avelo. Kijut ahut ke, kangthir keklem atum do’an ke kangthir keklem atumlo, lapen kahingnodak keklem atum do’an ke kahingnodak atumlo. Kangthir keklem atum do’an ke kapajut ahut kerengdun longji aphan pekpo, lapen ke kahingno atum do’an aphan ke pavirdetpo. Kangthir atum do’an ke kangthirlo; latum ke aketer kalidetlo. Keter atum do’an ke keter atumlo, lapen latum along epharnat ta kangthir avedetlo. Kivirdetji pu amonit atum do’an ke kadokave ta kechokche atum saidelo, lapen kerengdun longji atum do’an ke kadokave tame kechok atumlo – jongsi kahingnodak a’osomar atum le akechok asai amo klem, lapen jongsi kechokpet api-apo atum le kahingno asai klemdet tame. Kekroi apenan lapen kekroikrelang apiso angbong akacherappet thangnat ta ave, lapen kekroi osomar lapen kekroikredet api-apo atum angbong ta thangnat kacherappet ave; laheihui hini ason amonit atum do’an ta angton pen si kacheprekdak dolo. Kesangji aphan lutdamde aphrangjong, ok-abang kachepho adon-arap dolo, bonta kesang along kilutdun aphi lote, madu tame anpar ke ok-bang kachepho adon-arap kachethanji avedetpo. Komatmat ma alangtum adeng kacheklem atum do’an ke hala keklemkledet atum hoturlo; komatmat ma Arnam aphan kachinghon lapen komatmat si Alangliphan kelangsetlet atum angbong ke cheprekjam si dolo. Komatmat ma kesang along kilutdunji lapen komatmat si kivir along kephoji atum hini angbong ke kapinchongtang api si chemanlo. Alangtum adeng kacheklem undet api atum do’an ke rengdunpo, lapen ke matmat si alangtum adeng kachepachun un’edet atum do’an ke kivirdet nangji ahormulo; anpar tame, lake mo kai apar kai anta dobompo. Tangte nang penan aphan nang chinghon ma kapinchongtang api ateng pen nangdeng kapachunji aphan? Tangte nang piso aphan nang chinghon ma kapinchongtang api ateng pen nang deng kapachunji aphan? Tangte nang kekroikrelang api-apo aphan nang alamm kroi peme ma kapinchongtang api pu ateng pen nang deng kapachunji aphan? La tangte monit atum Arnam aphan kekroidam kelang chokma chokchema? Kopi apot si nang Arnam aphan kekroilo? Kopi si nang ale kelongji ninghanglo? Kopuson si nang Arnam aphan inghonlo? Kapinchongtang ateng pen alangtum asai komatmatma kachepachun un’edet atum anke, lapen komatmatma si kachitikrup thekthedet atum anke, kivirdet nangji ajatton si chemanpo. Non malom amonit atum along ok-bang kachepapho akachelang si dobomlo, lapen anparta avi kachepachoi ta dolo, bonta mohut ke, laheihui kadokave tame phangnotheipo. Kekroi atum pen kekroikre atum chingbarbedetpo; tebonta, latum doan chekhamkhe seroipo. Komatmat ma kesanglongbom atum ke Arnam do pusi kroipo lapen Arnam aphan si chipidetpo, tebonta komatmat ma Arnam aphan kachingkinodak atum an aphan ke pavirdet chenampo. Hemtun atum pirthe along anpar ke avedetpo; kopuson si api-apo mate osomar mate penan-piso akachelang’rap kedojilang? Kekroi lapen kekroikre akacheprekdak si lason ok-bang kachepho akachelangrap ke chenam pavedet khangjangpo.

Monit akhei angbong lason hemtun heihui abinong’et ke ave; inut apinso lapen inut arloso ansi dochot – hini ta kacheprekdak amonit. Det heihui ta aphrang ke ave, hemtun heihui ke aphi alammlo, bonta monit akhei atum kahingnodak pen ajok si la nangdolo, kadokave monit ajat atum alangtum chepathik pen prekjam anutnut akur chethak’lo, aphithu det lapen longri heihui nangchemanlo. Laheihui adet lapen alongri along bihek-hek anutnut ahemtun nangdolo, lapen lason thakthak si, do’an ajat amonit atum akhei ateng pen si prekjam alamm lapen ahoi nangchethakjamlo. Chenam ta, pirthe along ko’an ma akhei dolo puvoiphit tame, monit akhei atum aphusar ke inutvet. Ha kecheng ahut, monit ajat hini ansi dochotlo, lapen la hini ajat ke pinso lapen arloso helo. Tebonta, Arnam asai nangkedobom pen ajoine, phurkimo kedambom, lapen adui-ahoi heihui chelarlo, kachelarbom angdeng pen la hini ajat amonit atum ongdung prekjam amonit aphai nangdokoklo. Aklong’et ke, monit akhei atum kopu’an ma akhei nangchepinchong tame, kadokave monit akhei ke Arnam si kapinchong pinak. Ajat akhei le monit atum do pu tame, latum kadokave ta Alangli pinchong api saide; latum kadokave ta Adam lapen Eva aso-asu atumlo. Latum aphan le Arnam ari hongni pen pinchongvekve puvoiphit tame, latum ke Adam lapen Eva aso-asulo, Arnam si methang pinchongvek atum. Kopi ajat amonit along si dolo puvoiphit tame, latum kadokave ta Alangli pinchong api saide; athe ke latum monit akhei along pen si vanglo, pima lake Arnam si pinchongtanglo, alangtum kijut kemang adim ke pima monit akhei keleji adimlo, lapen latum aphan ke monit atum aphan kepathik aron ateng pen si thakponvetlo. Lake pulo tangte, kadokave kahingno keklem atum an lapen kadokave kechokpet atum do’an, ajatnon, api saidelo. Kahingno keklemdet api do’an aphan ke padusi pavirdetvekpo, lapen keme-kechok asai-amo keklem api do’an atum ke rengdun longpo. La hini ajat api aphan ke kemenei akithikpi chenam lahenlo. Kahingnokeklem atum un’e, athema alangtum kachingkinodak apot, Arnam si latum aphan pinchongvek’lo tame kroikredetlo, latum aphan ke Sobar si bengchek’lo, lapen laso apot si kejok longledetpo. Amethang aphan keklem choklimlo pu kachipi api do’an ta un’e, latum kerengdunji pu abinong’et le langdam lote, Arnam si kapinchong pu latum chekroikredetlo lapen tebonta Sobar phangnodet aphi tame kejok longdunlo. Kahingnokeklem atum ke Arnam aphan kachingkinodak api atumlo; latum ke kejok un’edetji api saidelo lapen Sobar si arsikjik pen bengthiptang pemelo. Kahingnokeklemdet amonit atum tame monitlo; latum ta monit atumlo tame kahingno litpik anlo, lapen latum jok un’elo. Latum tame kadokave ta api saidelo apot si, kechok keklem amonit atum do’an aphan tame phangnolo, bonta latum do’an ke alangtum kahingnodak akun pen kache’odetji si ninghang amonit atumlo lapen Arnam aphan kachipidetji tame un pemelo. Kechokpet keklem amonit atum ke laso kangthirpet pen pangbakbe; tebonta, latum ke kejok long tanglo lapen alangtum kahingnodak akun heihui pen chepajok pemelo. Kijut ahut antame latum ke karjap chatjinpo, lake pima latum aphan aphrang Sobar phangnonepinlang lapu le kipudam kali. Arnam asai pajutdet pen aphi, Alangli pinchong api do’an angbong, komatmat ma do’an aphan ke pavirdetpo lapen komatmat ma do’an atum ke jokponpo. Lake Alangli kisik-kedang asai along keklemponvekji asonlo; madu tame lake kroikre un’elo. Kahingnokeklem atum do’an ke kerengji aphan longdundelo; komatmat ma chipidet lapen Arnam aphiphi kijut’an dun lote chenam rengdun longpo. Laso asai ke monit akhei aphan kisik-kedang apotlo, mat nene ke dolongpo lapen komatne atum aphan ke varchorpo. Laheihui ke prekjam akephoji saidelo prekjam ajat amonit atum aphan, lapen latum do’an aphan kemenei Arnam pinchong api atum aphan kithikpilo. Arnam jasemetpet monit akhei aphan kithikdam ke latum angbong hemtun kapachethak, longri kaphangno lapen det adui-ahoi do’an ta kapavir henlo athema hemtun heihui mate longri adui-ahoi kavepin pen kithikpon along, monit atum do’an ke, ajatnon, inut aphusar pen aso-asu lapen Arnam si pinchong saidelo. Thihek pen, kahingno keklem api do’an atum ke virdetpo, lapen Arnam alamm kekroidun api do’an ke reng longpo. Lason pen si, hemtun heihui ta avedetpo, det avedetpo, lapen mohut kesang along ke longri heihui jasemet avedetpo; lason ajat amonit akhei atum henlo kangthirnei ajat amonit akhei atum chemanpo. Adam lapen Eva aphan abinong’et kapinchong ke pima monit akhei atum kadokave pirthe along ahormu do’an kapalang thekji aphan; monit atum si abinong’et ke kadokave ahormu ta ahemphulo. Jehovah monit aphan pinchong pen kemathadam ke latum aphan pirthe along pado long si kadokave ahormu hadak kedo’an kepalana pemeji aphanlo, pima monit akhei aphan abinong’et ke phangnonelang lapen kahingno keklemdetji un’elang. Tebonta, monit atum henodak aphi ke, latum anpar ke kadokave ahormu kelana atum kalidetlo. Arnam kepajok akemangdam ke lahei monit akhei atum akeklem-kedam kepamethuji aphanlo, monit akhei atum abinong’et ateng lapen abinong’et kachingkime kapadothuji aphan; monit akhei atum kesang along ke Arnam aningkethe pen Alangli kepajok asai keklem ateng pen kacheklangji angthek chenampo. Lake hala Eden abiri along kedo ahut ason akai anpar ke kalidetpo tebonta, alangtum aot-adur ke isinatpo; monit akhei atum anpar ke kedamtang ahut alangtum kahingnodak abang ason ke kalidetpo, bonta kaphangnodak amonit akhei si manpo lapen aphithu kejok chodengdun longlo. Laheihui kejok kelongtang amonit atum do’an ke padusi ke (lake, Arnam asai patangdet aphi) kesang along lutdunpo. Lasonthot si, kijut ahut anke komatmat ma ado kephodet atum do’an apot ta angton pen kephoji alamm pangdakdetpo lapen latum aphan ke Arnam asai keklem patangdet aphi ansi pavirji. Akaprek alamthe pen, Alangli sai patangdet aphi an, komatmat ma kahingno keklem atum do’an lapen komatmat ma kejok kelong atum antame paklangdakpo, pima kadokave ajat amonit atum aphan kapangdakji asai ke (latum kahingno keklem atum mate komatmat si kejoklong atum do’an pu tame) anuttin tame anut pen anut aphan si klemponpo. Kahingno keklem atum aphan anke pavedetpo, lapen komatmat ma kedodun longji aphan anke anut pen anut pangdakponpo. Laso apot si, kadokave ajat amonit atum kephoji do’an tame ephongnat apor ahut si pangdakpo. Arnam ke isi asanchom amonit atum aphan pajokdet pen aphi kesang along aphrangjong ke vanvedetji pima kahingno keklem atum aphan akaprek bibetik lapen ingsaidet mate ado latum aphan masap ephongnat pipetik, lapu lote lake abinong’et keklem nangji akrong kalidetpo. Kahingno keklem atum aphan pavirdet lapen komatmat ma kesang along kerengdunlong do’an, Arnam asai somindar angkangpi along keklem patangpo. Komatmat ma hirjume kelongdun lapen komatmat kopai kelangno kephodun atum angbong pen athaksi kibipon puke avedetpo; komatmat hirjume kelong atum do’an kai apar kai rengpo, tebonta komatmat si kopai kelong kisung kepho atum anke kai apar kai aphan si pavedetpo. La sonni asai angdeng ke angthun angthun patang pemepo. Lake klardak penlo athe ke kachingkinodak amonit atum kedobom ajoine hala kangthir keklem atum kachipidet alamm pangdak nangkokpo, lapen lake klardak pen athema komatmat si hirjume kelongtang atum do’an ajoine hala kopai kelangno kisung kepho kahingno keklem atum alangtum kechokche asema apot pangdakdetpo. Jongsi Arnam le kahingno keklem atum aphan pangdakdedet lote, ahokpet pen Arnam aphan kachipidet amonit atum do’an ke arni theklongledetpo; jongsi Arnam le komatmat ma Alangliphan kachipidet atum do’an aphan kemesen kijut kemang adim an ponpedet lote, hala Arnam aphan kachingkinodak atum do’an aphan tame alangtum kephovek nangji ado longledetpo. Lake Arnam asai keklem aronlo. Alangli jongsi kahingno atum aphan ado kipi lapen keme atum aphan nong’e kipi asai klemkledet lote, Alangli pinchong api do’an alangtum kijut kemang adim keledam nangji tame lutdun longledetpo. Monit akhei atum le kesang along kilutdun longlo te, kahingno keklem atum anke virdetpo lapen kadokave monit akhei atum kechoklim akrong si dopetpo; kadokave ajat amonit atum tame alangtum keklem-kedambom nangji ateng pen si latum dobom si dopo. La anchot si monit akhei atum kesangji arnipo, lake monit akhei atum aphan kachingthur nangji kechokvek asaipo, lapen monit akhei atum le kesang along lutdun lote Arnam thedung lapen padusi kapejut kechoklim plengponpo; lake kijutsi Alangli sai angdenglo. Laso asai lapen Kangthirthe monit akhei atum akai jutpo, lason si kahingnodak amonit akhei akai ta lo. Monit atum laso aphi pen ke akimi kapangri adim along si lutpo. Kadokave amonit atum ok along si renglo tame, keme aot-adur akai lapen kahingnodak monit akhei akai angbong kenangsotnei akacheprek dolang. Kenangsotnei kerengdun lapen kahingnodak monit akhei atum akerengbom angbong tame chepreklang. Lake inut kacheprekjek amonit ason akai le kachemandetji pu aphan kali puvoiphit tame, lake kejok kelongtang amonit akhei atum akai pule pudet mepo, lasonthot si monit ateng lapen akenang do’an akai si chelongthupo. Laheihui do’an amonit atum ke aphrang Arnam angno chingkinodaklo, Arnam si pangrithudetlo lapen aphi Alangli pen si pejoklo; laheihui amonit atum do’an ke Arnam aphan patheraknanglo lapen aphithu ke Alangli pharman hakhi chipilo. Alangtum kerengbom, Alangli asat kelang kachechak lapen kejokdunlong aphi ke, ardi kedonei kerengdun longlo; latum do’an amonit atum Sobar angno si Arnam apharman hakhi chipilo, lapen kerengdun longvek nangji amonit atum si chemanlo. Komatmat ma kivirdetji atum do’an henlo Arnam apharman hakhi kachipi karjap un’edetji lapen kerengdun longji aphan tame chokchedetji. Alangtum kivirdet nangji angthek ke alangtum kahingnodak asema apotlo, lapen lason akivirklung henlo latum aphan kijut kemang keleji adimlo. Mohut akai ke, monit akhei atum kelangmesen kepangri adim lutlo te, penan lapen piso angbong thangnat akachepho avedetpo, mate apei lapen asopo angbong tame monit atum kamunthidam ateng latum longledetpo. Halaso apor ahut, anuttin amonit tame alangtum mena ateng pen si dopo, lapen hemtun heihui laso ahut anke pavelappo. Kerem par’eprat ajoine, Sobar anpar ke monit akhei aphan pasiksakselo, lapen monit atum anpar ke kahingnodak hi’i akun heihui avedetpo. Komatmat ma kachingkinodak amonit atum’an aphan ke pavir’etpo, lapen kachehodaidet amonit atum anchotsi do longpo. Lason ke, kijumhek ahemtun heihui atum si thirthip pen rengpo; kopuson si ok-bang kachepho le kedobomjilang? Monit akhei atum kedamtang ahut ok akai anke chenam si pavedetpo; kopuson si ok-bang kachepho le tangte monit atum angbong kedojilang? Kahingnodak hi’i akun heihui avete, monit akai anpar ke kedamtang ahut abarim akai kalidetpo, bonta akimi akai si manpo. Api-apo atum asomar che’o’etpo, lapen asomar atum api-apo aphan che’opo. Apenan atum apiso aphan che’o’etpo, lapen apiso atum apenan aphan che’opo. Ok-bang kachepho nonmat ke monit atum angbong dobomlang, bonta latum anuttin tame kesang along kilut lote avedetpo. Lapuson amonit akhei atum anchot si kangthirpet lapen kechoklim longji; lason amonit atum anchot si Arnam aphan archo longji.

Arnam monit aphan pinchonglo lapen pirthe athak latum aphan pedolo, lapen Alangli latum aphan lason pen si japonlo. Alangli latum aphan pejok’lo lapen monit akhei apharman apap athok-ajir chemandetlo. Kejut ahut ke, Alangli chenam si monit akhei aphan pangri nangkokpo, monit atum aphan angton pen pejoknangpo, lapen latum aphan alangtum abinong’et atengthot pedothupo. Ha kecheng ahut pen tame laso asai henlo Alangli ke apor kachipidet – monit akhei aphan alangtum abinong’et arje lapen abang ateng kapadothu. Arnam Alangli methang kapangri arat cheselampo lapen abinong’et ateng kedo amonit atum do’an aphan si padopo, pima lake Arnam Alangli kechari pirthe athak lapen kadokave pinchongtang angbong puthot dothupo. Monit akhei atum Arnam aphan kaphere aning chepangbodetlo lasonthot si Sobar phangnodet aphi Arnam pinchong api atum keklem nangji adeng anta lo, laso pen Arnam angno chingkinodak ahotur si chemanlo. Monit akhei atum Sobar arideng si dolo lapen Sobar ketoi aling si kroidun nanglo; lasi, Arnam tame Alangli pinchong api angbong sai keklemji atovar avedetlo, lapen alangtum kapherememe aman-peng kipi aphan kehai un’edetji ason si cheman ronglo. Monit aphan Arnam si pinchonglo, lapen Arnam aphan ingduk-ardom nangkok’lo, bonta latum ke chenam si anung pen Alangliphan puthap’ronglo lapen alar ke Sobar aphan archo ronglo. Alangtum aning along Sobar si kumlin ason manlo. Lasi, alangtum aning along Arnam karjapji tame Alangli chepangbodetlo, lake pulo tangte pima Alangli kapinchongvek amonit akhei athepi ajor Alangli chepangbodetlo. Laso apot si, laso Alangli kapinchongvek monit akhei athepi kevanthuji aphan, Alangli alangtum aphan abinong’et ateng vanthuvek nangkokpo lapen alangtum kahingnodak akun heihui pen pache’o nangpo. Sobar along pen monit atum aphan kevanji ke, Alangli latum aphan pap pen pajok nangkokpo. Laso pen si Arnam pejo pen tame alangtum abinong’et atengthot lapen kedo-kedam chevanthu unpo, lapen kapadusi ke, Alangli kepangri arat chevan longpo. Monit atum kemesen akai pen kedo longji lapen pirthe athak Arnam aphan kangduk kardom pemeji aphan kachingkinodak asomar atum aphan padusi ke pevir nangkokpo. Athema Arnam si monit aphan pinchonglo, Alangli latum aphan Alangliphan parchovekpo; athema Alangli monit akhei aphan abinong’et akedo-kedam ateng kevanji ninghang, Alangli angton pen si chevan pemeji lapen akechokche pavepinpo. Alangli kachejapon kepadothu puke Alangliphan monit atum kaparcho lapen Alanglilong si kachipidet henlo; lake pima Arnam monit aphan Alangliphan ajoine si athe ke parengpo lapen Alangli kepangri angthek ajok Alangli hotur do’an aphan ke pevirlap si manpo. La kepudam lake Arnam asontin ta alangphaan monit atum angbong kepaklemji aphan pemanpo badu along penta kekhamkhe avepin pen. Khrist recho arat akai along Arnam kapinchong kangtung ke Alangli mena kapangri arat henlo. Alangli kar’i ke Alangliphan monit akhei kaparchoverji henlo, Alangliphan angton pen kachehodaidet atum lapen Alangli dak-atur kapethethek henlo. Jongsi Arnam le kahingnodak amonit akhei aphan pajokjedet asonte, Alangli monit akhei aphan kapinchong athepi ke ingbodetpo; Alangli anpar ke monit atum aphan kapangriji un’edetpo, lapen pirthe athak Alangli kapangri arat anpar ke kedoji avedetpo. Jongsi Arnam le halahei Alangliphan kachingkinodak ahotur do’an aphan pavirvedet asonte, Alangli choklim adak-atur Alangli chelongledetji, mate Alangli kapangri arat bangso pirthe athak Alangli pinchong un’edetpo. Laheihui angthek pen lote Alangli sai keklem kapatangponlo lapen Alangli thedung keplengdam lo: komatmat ma Alangliphan kachingkinodak amonit atum angbong chenam si pavirdetpo, lapen komatmat si kapachoklimtang atum do’an aphan ke kesang along chevanpo. Monit atum le alangtum abinong’et atengthot chelong lote, lapen latum le alangtum adeng atengthot cheklem thek’lo te, alangtum aphan kedodam nangji adim si bipo lapen Arnam kithik along si kadokave ta chipidun’etpo, Arnam tame Alangliphan karchover pirthe along isi asanchom amonit atum aphan longponpo, lapen Alangliphan karchover pirthe athak Alangli kapangri arat tame pinchong longpo. Pirthe athak Alangli kai apar kai kehaidong longpo, lapen kadokave komatmat ma Alangliphan kekhamkhe atum do’an ke kai par kai kivirdet si plangpo. Lalo pulote Alangli monit akhei aphan kapinchong abinong’et kemathadam chelongthupo; lake Alangli kedo’an ahormu kapinchong athe kemathadam tame chelongpo, lapen lake pirthe athak Alangli kepangri tame chelongpo, kadokave ahormu angbong, lapen Alangli hotur do’an angbong. Laheihui angthek keklang ke Alangli angton pen kehai ponlo. Laso apot si, monit akhei atum kesang along lutpo lapen kechok peme akrong akai pangcheng ponpo. Arnam tame kaike apharman akesang along lutpo monit akhei penpen, lapen Alangli methang lapen monit atum penpen si kai apar kai kedorappetji pangchengpo. Pirthe along aketer lapen kachingkinodak do’an ke virlappo, lapen kedo’an kachiru-charnap ke ave’etpo, lapen asontin bangso apirthe along Arnam aphan kekhamkhe do’an ke kerengji chington’etpo. Arnam lapen halahei amonit Alangli kejok kepalongtang atum anchotsi rengdun longpo; Alangli kapinchong ason ansi dochotpo.