Nang Jisu Akarjong Arpum Ketheklong Apor Anke, Arnam Siningrengme Lapen Pirthe Akimi Pinchongthu’etlo

Nang Jisu aphan lang ingtungma? Jisu pen dorap ingtungma? Jisu kaningje alam arju ingtungma? Jongsi lasonlo, pulote nang kosonsi Jisu kachevangthu ahut kangthum-karneji? Chisik peme loma? Koson a’ot pensi Jisu kachevangthu ahut kangthum-karneji? Ne kamatha ke Jisu aphan kekroi akorte-ingjir doan atum ta Alangliphan mesen pen ingthum-arne ingtungji. Bonta nangtum laso alam mathaloma: Jisu nangkachirui ahut nang Alangliphan pangthek thekjima? Nang Alangli kaningje alam doan ahokpet pen chinidunjima? Nangtum ahokpet pen dengjima, thangnat kachechak pavepin pen, Alangli keklem asai doan? Baibel kaporhi atum doan ke Jisu nangkachirui alam chini, lapen Baibel kaporhi atum doan ke Alangli nangkachiruiji aphan chonghongdinglo. Nangtum ke halabangso apor nangkeleji aphan si ning angsip dohetlo, lapen nangtum kemangsip a’ot ke choromeme, nangtum akekroi ke chopatinmeme, bonta nangtum chemathaloma nangtum isi thedung kechokche klemdetlo pu? Kopuson a’ot pensi Jisu kachiruipo? Jisu inghun kelok athak pensi nangchiruiji pu nangtum kroima, bonta Ne nangtum aphan nang’arjupo: Kopi aphan si bangso inghun kelok kipudam? Lapuan keongdung amonit Jisu aphan kekroi atum Alangli nangkachirui kachonghongphrong, koloso amonit atum along si Alangli nangkisunpo? Jongsi Jisu nangkisuncheng amonit atum angbong pen nangtum ta kalanglo, kaprek atum laso aphan chokchepik pule kelangdam kalidetjima? Ne chinilo nangtum ke Jisu ahin kemangsip lapen ning ingthirjir pen si kekroi, bonta nangtum mantune Jisu pen chetonglo puhe? Nangtum Alangli kun chinima? Nangtum Alangli pen dorap longloma? Koanbak si nangtum Alangli phuthak abinong’et pen kachini? Ajahak atum puji lahei alamthe alangtum aphan therakmeme akasiksak along bidamkoklo pu. Alangtum pupo, “Ne Baibel aphan abang pen abang an aphong-aphong porhi’etlo. Kosonsi ne Jisu aphan kachininedetpo? Jisu akun alam mathadam nangnelo – ne ke Alangli chepindeng kangtung ape-ri alir anta chini. Ne Alangliphan chinine pu nang kipu ke nephan neman nangkepabi kalima?” Nang lahei alamki chihili nangne pusi Ne nangpuji; kememu ke ning chepadojoira la kejon ponji akarju ason aphuthak kachingrum kedo: Aphrangsi, nang chinima abinong’et kopi, lapen kejongdam alam aphuthak kopi? Hini ason abang ke, nang chinima jongjong kamathathap kopi, lapen ahokpet kopi? Kethom abang ke, nang nang chinima kapahancha kopi, lapen abinong kopi?

Ajahak atum ke alangtum Jisu aphan chinine pu ahokpet alam dengde. Lapen sitame Ne puji nangtum Alangliphan ing’arpler anta chinine, lapen Jisu alamthe ethebak ta chininedun thekthe. Laso atheke nangtum pen anuttin ta Alangliphan kekroi ke Baibel along kethandam apotchot, bang kopisi kipuma ajoine. Nangtum mantune ta Jisu aphan theklonglepinlang, ansose kavelang Alangli pen kerengrap, lapen malomso apor aphan ta Alangli risangho dodundelang. Lason apot si, nang Jisu aphan kachinidam ke thangnat kali bonta kejongdam alam aphuthak kalima? Ladak abinong’et ason kaduredet kalima? Ajahak amonit atum ke Jisu amohor theklonglo mene, mate ajahak atum ke jongjung si Jisu ahem humridamlo. Ajahak atum ke Jisu apindeng papholonglo tahai. Sitame nang Alangliphan kachinidamde ke alam pen anchot lapen asai keklem pen keklangme kali, nang jongjung amat si Jisu kecho a’an chomatlonglo pusitame. Alam ajatnoi, nang mantune ta Jisu aphan theklonglelang, lapen Alangli ok-vi arpum pen kedo ahut ari dodun longlelang, lapen lasi nang Jisu aphan kachini ke kaiketa kangthaidang kejongdam alam chot si doverpo abinong’et ke avepinji. Nang ke Nelamthe arju ingtung’o’edet tahai, bonta Ne nangphan la nang arjulang: nangning kehangnei atokbang ketok penang asai nang porhi longlo pusitame, nang mantune alang pen apor padamrap longlepin pen alangliphan chini pame thekjima? Alangli jongjung a’ot kosonlo chinima nang? Alangli koson akai si kedodom chinima nang? Alangli ning kamatha aphuthak asapbak chinima nang? Nang ke ningkehang amonit aphuthak ningke plenglim pen chini thekthe, pulote kosonsi nang Jisu aphan kachinipo? Nang Jisu aphan kachinidam kedo anta kapahancha lapen kamathathap pensi plengthiplo lapen ahokpet mate abinong’et ason avepin. Kosonsi lapuson kachinidam le nangphan Jisu nangkachirui kachonghongdun a’ot nangkipipo? Ok-vi ason pahancha lapen kamathathap pen keplengset amonit atumphan ke Jisu deng thekthe. Kosonsi Jisu aphan kachinine atum le Alangliphan kekroi abang kacheman’un apun kedopo?

Kopi apot si Pharisee atum Jisu aphan kekhankhema pu alam angkur chini ingtung ma nangtum? Nangtum Pharisee atum atiri chini ingtungma? Alangtum ke Messiah aphuthak kapahancha alam pensi plengthup atumlo. Lapen abat kopilo, alangtum kekroi ke Messiah vangji pu anchot, sitame kai along ahokpet ason ke ridamdedet. Lapen lasi, pini anta latum ke Messiah aphan chonghongbomlang, atheke latum kai along kedoji atovar kachini ave, lapen ahokpet ahin atovar kopima chinine. Kosonsi, pulonang nangtum, lapuan kiluthek, kachingkino lapen kachinine amonit le Arnam ahirjume kelongpo? Kosonsi alangtum Messiah aphan ketheklongpo? Alangtum Karjong Kangthir asai kedam atovar chinidundedet amat si Jisu aphan kekhamkhe, atheke alangtum Jisu kaningje ahokpet adichi chinidundedet, lapen, anpartame, atheke alangtum Messiah aphan chininedet. Lapen alangtum mantune ta Messiah pen chetongte, alangtum mantune ta Messiah pen dorap longle tangdet apotsi, alangtum Messiah amen along kiripling bonta thek an ason pen Messiah atiri aphan kekhamkhebom ackechokche klemdetlo. Atiri penke Pharisee atum chingkinopik, haipik, lapen ahokpet alam ateng klemkle. Alangtum Arnam aphan kekroi aron ke lapuhenlo: Nang kapachethang jonghe plenglim tame, Nang tirijung jonghe ingtui tame, Nangphan Messiah pu nanghanghetik anke Nang Khristo kali. Lahei kamthadam ke kroimorem lapen ingnekmeme kalima? Ne nangtum aphan nangarjuthupo: Kechengsi apor aPharisee atum akechokche ason kachomatha ke nangtum aphan kejoike kalima, nangtum ke Jisu aphan kang’arpler anta kachinidam kave tangdetlo ke? Nang ahokpet aphan atovar pangthek thekloma? Nang Khristo aphan khamkhekhe pu ahokpet chechakhaima? Nang Karjong Kangthir asai aphi dunthek loma? Jongsi nang Khristo aphan khamkheji-khamkhekhe chipu thekthe, pulo tangte Ne pudetji nang ke kithi akun si dobom tanglo. Messiah aphan kachinidunde atum doan ke Jisu aphan kekhamkhe’un, Jisu aphan kedengde, Alangliphan kapatherakthek atum saidelo. Jisu aphan kachinine amonit doan atum ke Alangliphan kedengde lapen Alangliphan kapatherak thekji atum saide. Lapen anparta, alangtum ke Jisu nangkachirui aphan Sobar kachongthui pu ateng kelangdam atumlo, lapen ongdung amonit atum ke Jisu puthot monit a’ok-vi along nangpachirui te pusi pinremdunpo. Lahei kadokave nangtum aphan nangpaphererema? Monit atum kopima kachetong lake Karjong Kangthir aphan kapatheraklo, girja ahem aphan Karjong Kangthir kipi alamthe aphan kapangraidun, lapen Jisu kapangdak ason doan aphan ningkekang pen kedengdelo. Jongsi nangtum lapuan kamatha paklar thekthe pulote Jisu along pen kopilo kelongdunthekpo? Kosonsi Jisu asai kachinidunthekji mo Alangli inghun kelok athak ardon pen ok-vi along chevangthulo tangte, jongsi nangtum ingthin chepathebui pensi kechokche ason chedengdebom pulote? Ne nangtum aphan la nangthanlo: Ahokpet ason kedengde amonit atum, jonghe amek checharche pen Jisu nangkele aphan chonghong sitame, Karjong Kangthir aphan chenam-chenum si katherakpo, lapen latum ke kevirdet nangji asanchomlo. Nangtum ke Jisu akanghon aphan kar’i puchot, lapen siningrengme along akarengme kachomatji puchot, sitame mantune ta Jisu kaningje alamthe ateng klemklepinlang, lapen Jisu ok-vi along nangchirui ahut mantune ta Alangli kapaklang ahokpet ason aphan dengdundepinlang. Jisu inghun kelok athak ardon pen nangkachirui alam pen kachelarji aphan nangtum kopilo kapaklangji? Lake hala nangtum aphong-aphong pap keklem’idet akemangvet a’ot loma, lale aphi ke methang kachikubir alam ningjepo, abatai-batai. Jisu inghun kelok athak ardon pen nangkachirui along nang kopilo dan kachipi dunji? Lake hala nangtum methang aphan man kachepathe aningkan-ningkan asai loma? Nangkachiruithu aJisu nangtum aphan ningpachetheji aphan nangtum kopilo kapaklangji? Lake nangtum along kachepahainer a’ot loma, lale ajat ahokpet alam ta kekroikre?

Nangtum ningkangthir pen kekroi puke alamthechot, nangtum kachinidam ke abidi lapen alamjor anchot, nangtum kachepaduk ke siningrengme ahirjume kachepalongji pu aphan anchot, lapen lasi nangtum akekroi ke kopuson jilang? Pini anta, nangtum ahokpet alamthetin aphan kangthong ano si chedendunbomlang. Nangtum ke Arnam kopima chinine, nangtum ke Khristo kopiloma chinine, nangtum ke Jehovah aphan kosonsi man pi nangjima chinine, nangtum ke kosonsi Karjong Kangthir asai along kilut nangji puta chinine, lapen nangtum Arnam Amethang keklem asai lapen monit kachongthui angbong thakdam thekthe. Nangtum Arnam pen kapaklang ahokpet alam ethebak nang kamatha pen kachetonte anta kapinrem henlo kethek. Konatlo nanglong kachepabi a’ot ke? Konatlo nanglong ahokpet aphan kiri akar’i ke? Konatlo nanglong Arnam aphan man kipi ke? Ne nangtum aphan nangthanpo, angthek ajoine si Arnam aphan kekroi atum aphan ke chenam-chenum mo pavirdetji. Jisu matma puthot ok-vi along puthot nangchiruithu abang alamthe kedeng thekthe atum doan ke chenam-chenum ta meherang asolo, tekela akehoi asomarlo, kijut un’epin aphan kanahok kepho nangji asanchomlo. Ongdung amonit atum ke ne kopisi kipudam loma pu ardi pipedet tahai, bonta Ne kadokave thek-kere kangthir kachekrong atum doan aphan kethan kangtung ke lahenlo, mo Jisu aphan inghun kelok athak ardon si siningrengme pen nangkisun nangmethang amek pen theklong lote, lake hokpet binong aSamphri rat athengno kacheklangpo. Chenam ta nangphan lake ningkarkar thepik aporpo, sitame nang chini nangji mo Jisu siningrengme pen nangkisun ketheklonglo apor ke nang meherang along adai-areng kepho aphan kisun nangji aporlo pulo. Hala ke Arnam langchari kisik-kedang kijut aporpo lapen hala ke Arnam akeme aphan nong’e kipi lapen a’ot kaheno aphan adai ke’en aporpo. Atheke monit atum angthek theklongle aphrangsi Arnam akangsai ke jut’etpo, halaso ahut ke ahokpet kapaklang anchotpo. Ahokpet aphan kiri lapen angthek kirire atum, lapen lasonsi kapangthirtang, latum anke Arnam anghoi athengno chirui’etpo lapen Kapinchong Abang kapangrom arideng lut’etpo. Hala “Inghun kelok athak kevekphoi kali aJisu ke kapachobaichot aJisu lo” pu kekroi cheparengtengbom atum ansi kijut un’e adai-areng kepho chetongnangpo, atheke alangtum angthek kapaklang aJisu aphan si kekroichot, bonta ahir kangtangrak akangsai alamthe kapachetak lapen chethe ahin ahokpet atovar kangpu aJisu aphan ke kachoro-kedeng ave. Lapen lasi lake Jisu alangtum penke Alangli inghun kelok pen klangdak nangkachirui ahut ansi alangtum along sai klemthekpo. Alangtum angthin theongchot, methang aphan ning chethe ongchot, hainer ongchot. Kosonsi lapuanpin arum keklotang atum aphan le Jisu nong’e kipipo? Jisu nangkachirui ke hala ahokpet aphan kedengthek atum aphan thedung akejokvanlo, bonta ahokpet kedeng thekthe atum aphan ke kapinrem thepik angtheklo. Nangtum methang atovar chongvai nangpo, lapen Karjong Kangthir aphan patherak nangne lapen ahokpet aphan patepek nangne. Nang kachininepik lapen hainer abang cheman nangne, bonta inut Karjong Kangthir kapinkhat ateng kekroi abang lapen ahokpet aphan kiri abang si man nangpo; lapuson pen anvet si nangphan ale kedoji. Ne nangtum aphan Arnam aphan kekroi atovar along kedam cherepiktu pusi nangpinkhatji. Kijut angdeng an chonkrak nangne; lapen anpar kopilo, Arnam aphan kekroi along aot chepavesi lapen matha parsikse puke cheplang nangne. Nangtum chini nangji, ajat ahin kijumnai along ta, Arnam aphan kekroi atum ke chepabithek nangji lapen man pithek nangji. Ahokpet alam karjulongtang atum bonta chererepin pen kijut angdeng an kechonkrak atum mate laphan pinremrong atum ke kehainer pensi inglimdetpo. Jisu aphan kekroi atum angbong ke abangphutin ta anut kaprek aphan hirjuno kipi mate kapinremji apun ave. Nangtum kadokave ta kamatha ajakong kedo lapen ahokpet aphan kedengthek atum saide nangji. Chenam ta, ahokpet atovar alam karjulong tangdet lapen chethe alamthe kaporhilong tangdet aphi ta, nangtum kamatha ke lahei alamthe 10,000 angbong pen isi ansi nang kamatha lapen Baibel ateng aren nangchingbardun, lapen laso aphi nang lahei alamthe angbong pen 10,000 angdeng alamthe aphan ripo. Ne nangphan chepabi’otu pusi nangpareji, methang aphan apar ning chethe nangne, lapen methang anong kachepangtui aret nangne. Nangning ningke Arnam aphan lapuan kaduredet aman si kirimchot, nang kethe muchot akatheang deng longji. Jongsi nang lahei alamthe aphan ingsaidam peme lapen kamatha ruilemdet pulote, nang chinipo lahei ahokpet kalima kalang, lapen lahei chethe loma kalima. Chenam ta, lamseng jumhek ansi kaporhichot pensi, ajahak amonit atum ke mek selokdip pensi lahei alamthe aphan kapinrem, kipuji, “Ladak Karjong Kangthir ajahak kapatheang pen anpar ke thangnat ave,” mate, “Lake ahokhe aKhristo monit aphan kachongthuiji pusi kevang.” Lapuson kaningje atum ke kachinine pensi amek chebanglaplo. Nang Arnam asai lapen kachini ason aphuthak kachinidun jumhek ongchotlo, lapen Ne nangphan puthot kangthaidang pensi kechengthuji aphan nangpareji! Nangtum langpememepin pen Arnam kapangdak alamthe aphan pinrem nangne hala kijut arni malom ahokhe aKhristo nangkeklang’o pu ajoine pen anchot ke, lapen nang ludundetna pu kaphere penke Karjong Kangthir aphan kapatherak abang inut cheman nangne. Hala ke isi jinsomeme ason kalijima? Jongsi, lapuan kangsir-kangchap aphi ta, nang lahei alamthe ahok kali, atovar kali, lapen Arnam kapangdak ason kali pusi kroirong, pulo tangte nang ta paduke adai pho nangpo, lapen nanglong hirjume avelo. Jongsi nang lapuan neilim pen kaningje ahok alam le deng thektheset, pulote nang ke Arnam arideng kejokvan kelongji aphan apun kalidetdema? Nang ke Arnam anghoi athengno kachiruiji aphan hirjume kelong dorlim kalidetlang abang kalima? Laso aphuthak mathatha! Chere thekthe aret lapen tonghe nangne, lapen Arnam aphan kekroi ke kepathu ateng pinchongdetri. Nang kijutsi keleji adim apharman, nang kevangji arni kelongji ason apharman, nang chethe apharman chemathanoi, lapen methang apahan chejuiri. Nang lahei alamthe dengthekjima?