Monit achethe apharman atiri ke Arnam henlo

Bangso apirthe along nang kachiru pen kevang ahut pen ke, nang deng chepachunji si pangchenglo. Arnam akemang ateng nang keklem nangji amo lapen Alangli ingthirjir pen akahodaipon ateng si, nang kai apharman kengkam chejor pangchenglo. Nang kai aphrang ahut ajat tame, lapen non kevangji nangthengno kopi pone, sining athak pen jongsi kithiktang lapen kephovek nangji pulo tangte madu tame la chepajok un’e, lapen madu tame amethang akai kejutdamji kopi-koson pone chipu thekthe, tebonta la kadokave ahormu kacheparideng’et Alangli pen si lapuson asontin asai tame unchotji. Monit atum dolo pu halabangso arni pen ke, Arnam sai cheklembom, somindar langcharibom, asontin ahormu tame akachelar aron chejadunbom lapen kedamji aloti kopusonjima paklangdunbom. Kaprek ahormu asontin asonthot, monit aphan tame ingsamri lapen pachininepin si Arnam pen kelong kedokjin aruve lapen ar’e pen lanabomlo; kaprek ahormu asontin asonthot, monit atum chininepin pen Arnam arideng kepathiktang arum si dobomlo. Monit aning lapen akarjong ke Arnam arideng along si dolo, alang kai along ajat tame Arnam amek angden si chechar’etlo. Nang bangso alamm kroi-kroikre tame, ajat tame lapen do’an ason, kereng lapen kithitang tame, Arnam akamunthidam ateng pen si kedo’an ta cheterekji, chelarji, chepamithuji, lapen avedetji. Lapuson henlo Arnam kadokave ason do’an aputhak ta kachepahemphupon.

Ingsamri pen aningve kemanbom ahut, monit atum chichinine, kosonsi aningve kemanbom loma monit atum aning pen ke puthekthe, mate komantu si kevangma thekdunde. Aningve le ingsamri pen damjoilo tangte, monit atum arni atur theklongpo, bonta komantu si la katheang kevang, lapen kopuson si kangtingkuk aningve aphan kapavedet thekma, monit atum kachini masapsoji, lapen masapso pen ta kachini jumchetjilang. Kaike ta kachelarvoi labangso katheang lapen aningve henlo monit aphan isi apor pen kaprek an kepon, isi phurkimo alammo pen kaprek an, ajat apor ahut tame Arnam sai-amo keklem lapen akaitin along Alangli kemang ateng pen kapachunpon kachinilorji aphanlo. Arnam pen si la kedoan apor ahut monit atum dam rappetlo, tebonta alang chininedetlo pima Arnam si asontin ahormu lapen kereng’et api do’an tame alekha chepahemphu’et, anparta Arnam si kithikmek lapen asontin ahormu aphan tame chejabom pu chininedetlo. Kebanpik hako arni pen pini non ahut an ta monit atum laso alamm ke mathakranglo. Pima pulote, Arnam keklem asai-amo le arsikkrung kachepatujoi apot kali, mate Arnam akemang aphuthak kachinidamtong thekthe apot kali, tebonta monit aning lapen akarjong Arnam pen kedo chehelopik ajoinelo, lason kemandet ke Arnam aphan kroilo sita monit atum hi-i akacheja along si dokoklo – lapen nonpu anta chininedetlo. Arnam adak-atur kacheklang lapen akengbot ke ahokpet pen madu ta ar’i’edetlo, lapen Arnam akelana lapen nangkeraivet along kedoji aphan aninghanghedetlo. Alar ke, latum hi-i akaphalangno along si kachikiji ar’ironglo, kahenonei abang, bangso apirthe along kacheraivetji, lapen kahenodak monit akhei atum kekroibom kereng’iji aron aphanlo. Non labangso apor, monit aning lapen akarjong tame hi-i aphan kepanongpivet si chemandetlo lapen hi-i kechover a’an si planglo. Anchot ta kalilang, monit aning lapen akarjong ke hi-i kedo’un adim lapen mesen pen kapathu aklam si chemandet khangjanglo. La apot si, monit atum chichininepin pen monit pu kosonsi kedo-kethak nangji aot-adur kachichini chepangbolo, lapen monit kerengdun akenang ale lapen alammjor chepangbolo. Arnam aron lapen Arnam pen monit angbong akachekroi tame pajo pen monit aning along avebomlo, lapen Arnam aphan kamatha mate ardi kipi puke kapajutji si dolo. Lapuson apor kedambom ahut, monit aphan kopi athe si Arnam kapinchonglo ma alang chichinine, lapen Arnam angho pen nangkebar alammthe anta chininedetlo, lapen Arnam pen kevang do’an ason anta lo. Monit atum Arnam aron lapen kekroivek nangji aron ta kekhang si pangchenglo, lapen alang aning lapen akarjong ke aboi kave chemandetlo…. Arnam amena kapinchongvek amonit aphan chepangbolo, lapen monit atum kecheng’i atiri chepangbolo: Lahenlo monit akhei atum angbong ningoi memenei. Ahokpet pulote, ha kecheng pen non an, Arnam si monit akhei apharman kesung chechak nangkoklo, pima isi ke monit atum henlo laso along abinong’et abangphulo lapen kephovek nangji abanglo. Lapen madu tame than thekthe komat si labangso kesung kepapho kethan-kasonse abang.

Pirthe kechan-kejar angkang kethe’o angbong, lakha un’eset akachelar dolo, talopi ta alongklam along khanglo, alongklam tame talopi along ingbaklo, aphong aphong. Bangso somindar adang along kedoan ason kachepahemphu Alangli pen anpar ke, madu tame la monit akhei aphan japon thekthe lapen paredun un’e. Monit akhei aphan kachepedukpi lapen kisik-kedangpiji anut kaprek jakongthepar abang ave, la monit akhei aphan katheang adim an kepaleji lapen pirthe along akechokche pen pajokvan thekji aphan ke chenam anpar madu ta japonthek abang avelo. Monit akhei atum mohut akai aphan Arnam ta ningridetlo, Alangli ningdukpiklo monit akhei atum pap along keklonang apot, lapen sodetlo pima monit akhei atum akengkam kedambom ke, isi pen isi, kivirji anatthu lapen laso atovar ke nangkachirui un’edet si manpo. Monit akhei atum Arnam aphan aningpa’oidetlo lapen Alangliphan kroikredet si hi-i aphan chorironglo: Lapuson komatne doma kamatha monit akhei atum kopunat atovar si kapangno nangkokjima? Ahokpet klardak laso ajoine si madu ta athema Arnam aningkithi aphan matha damdedetlo, pipotma Arnam aphan aningkapangsam akrong madu ta riredetlo mate Arnam adung tame patebokji aphan bor’i’edetlo, lapen kopilo kenanglang, kopi apotma madu ta Arnam aningduk lapen ningkeoi kachiniji aphan riredetlo. Arnam ase arjulongdet pen aphi tame, monit atum amena atovar si chedambom, Arnam pen akemang avepin pen si dobomlang, Arnam akangjinso lapen akalana langplotlo, lapen Alangli ke ahok pu arjujedet, Arnam ahotur, Hi-i arideng methang aphan kachejorji si ar’ironglo. Lapen komatne si kamatha doloma – monit atum laso kamatha kechelar un’edet akechokche along si dobom nanglangma – Alangliphan aphi pen anta nangchelangkangletle ke’otekangkok amonit akhei atum aphan koson si Arnam keklemjima? Arnam kopi athe si abatai batai kapachiniji aphan thanver lapen kapaklemji aphan puverlo la madu ta chinine pima Alangli rideng along Alangli aphrang pen kavepin akesungnei si dolo, lake monit a’ok lapen akarjong aphan anta pachechak un’edet ansi manpo. Laso akesungpik ason ke ok aphan kachechak nangchotji kali, tebonta karjong ta phovekpo. Nang laso alam chini nangji: Arnam akemang le dolo te, lapen Alangli kapachiniji aphan kethan lapen kapaklemtoi kipu le karju abang avedet te, kopi kekhang un’edet aningkithi si Alangli cheklangji? Lake kapinchongtang chethe kedo api atum an ta kachinilongledet mate karjulonglepinlang ason si chemanpo. Lasi Ne pulo, laso akesungpik ke apor ateng hothe, lapen mononphi ta dothuthe. Athema Arnam akemang ke monit akhei aphan kapinchong ta ephongnat, lapen kapajokji ta batai isivetpo. Lahenlo kechengsi manpo, lapen kapajutsi ta lalo. Laso apot si, monit akhei aphan non aphong kapajokji ke Arnam kachepedukkrup akamatha lapen akar’ipik aningkethedam alam madu tame chini un’edetji.

Arnam laso apirthe pinchong si monit aphan ta vanlo, isi kereng’et api aphan Alangli chethe pilo, pidetlo. Laso aphi, monit atum api-apo cheman si hemtun chemanlo, lapen anpar ke sampungvet kalidetlo. Hormu-hortar pen keplengset bangso apirthe aphan monit atum amek kachibidun pen ke, alangtum Arnam pen kangthir’et kebak angkang si dovek nangkok’lo. Arnam pen ekipi kevangphunlong achethe tame kereng’et api do’an aphan kesar anta kapathe-pading cherapdunlo. Lapuson kachemanbom ahut, Arnam akalana aber si monit atum thebomlo pu madu ta chemathathe; alar ke, api-apo atum kanghon pen akalana along si monit atum klemlo pusi latum kroironglo, lapen lake alangphaan akai si kethe-keding alamm thandunbomlo pusi chinilo. Lake pipotma monit atum komat si chethe kipima chininedetlo, mate komantu pen si kevang, akai along akemathadam pen kamanghumeme ason kemandam pen ta jumchetlang. Chethe kerengbom aphan ke kecho ason pen henlo akenang pusi chinichotlo, ningkiding pen si alang kai kerengdunlong atirilo, lapen alang akamatha aphu along kekroidam do’an pen henlo adimlo kerengdunthek akenangsot aphan. Arnam akangjinso lapen akechak ke, monit atum chenam si mathakranglo, lapen lasi alangphaan Arnam pen kipi achethe ta chephangno’ilo…. Bangso monit akhei atum angbong inutnat tame Arnam ajo-narlo akalana aphuthak Alangliphan karchoji pu ning amat si ave. Arnam ke monit aphan si sangsepin pen klempibom, adular thangnat kelongji pu Alangli mathadamdepin, lake Alangli kethiktang atenglo. Alangli ningtheklong pen lapuson keklem ke mo arnisi, monit atum amang pen thurthu si chethe ador lapen athe menmen kapachichiniji aphan, Alangli kipitang do’an tame ador ateng Arnam si anam pithailo, lapen Arnam ke komentu si monit atum aphan Alanglilong an chirui vangthujima pu kachonghongding pen akar’i si dolo. Madu ta monit akai aphan kelangchari atiri lapen kerengbomlong kachepatujoi aphuthak langdamdedetlo. Arnam anchotlo, la kadokave kachinidam abang, joijoi si monit atum akechokche apot keso chechakbomlo, Arnam pen kadokave tame longthai abanglo tebonta kachoro ethenat ta avedetlo, Alangliphan pipedetlo. Kai along asontin kevang tame monit atum si ahok chekrongdetlo, lapen, lasonthot si, lake “kamathavek nangji alammlo” athe ke monit atum Arnam aphan chongthuidetlo, monit atum chetengnedetlo, lapen monit atum kechokche pen si denglo. Tangte la Arnam akemang ke ahokpet puan ardi kedo plangjima? Tangte monit atum mate labangso Arnam arideng pen kevang kereng’et api ke ahokpet puan ardi kedo plangjima? Arnam akemangdam ke chenam si ardi kedoklong binonglo; athema, labangso Arnam arideng pen kapinchong kereng’et api tame Alangli akemang ateng si dobom longlo. Lasi, monit akhei aphan kelangset pen puke Arnam tame Alang akemang chephangno’i’e. Lake do’an ta Alangli akemang ateng pen lapenthu Arnam tame keboi do’an ta kachechak pusi Alangli tame achethe che’enlo, monit a’ok aphan kali bonta lake monit akai-achethe aphan. Alangli lapuson keklem ke monit a’ok kache’enthudetji aphan kali bonta Alangli kache’entang achethe akai apharman. Lahenlo Alangli akemangdam.

Labangso apirthe along kahache atum do’an ke kai kereng lapen kithi ke chetongponvekpo, lapen ke’ongdung atum ke kithi lapen puthot amen kachevangthu ta chetongpon’etlo. Non kerengbomlang atum tame prapjin pen thipo, lapen laso akithi prapjin pen chevangthupo. Kereng’et api do’an aphan laheihui kai dingpi along kephopon nangkok ke Arnam si kithikmek’lo. Pima lason kepho nangkok lapen kachirui kevangthu athe ke ahokpet pen Arnam si monit atum aphan kapachichiniji aphan akar’i do: pipotma Arnam monit atum aphan kipi akai ke akejut ave, a’ok-abang kithikvet, apor lapen adim heihui ave. Lahenlo Arnam pen monit atum aphan kipi akai kachepatuijoi alammlo, lapen cheklang pemelo chethe ke Alanglilong pen si vanglo. Chenam ta penang an atum ke Arnam pen si chethe kevang pu kroikredet tahaiji meme, bonta monit atum ke Arnam pen kevang asontin tame khangkhepin pen longbomlo, Alangli do pu kroi-kroikre tame. Tangte mantune arnisi ke Arnam menmen aning chelardet ra lapen pirthe along kedo’an ahormu tame cheponthu’etji akar’i dokok lapen Alangli pen kipi achethe tame cheponthudetji pulote, lalo pulote ajat ason ta ingtheidangpo. Arnam ke Alangli mena achethe pen si asontin tame nanglobomlo, kereng’et lapen kithitang pahini aphan, kadokave ason tame kechoklim pen kibiji aphan Alangli jakong lapen akachari ingthirjir pen padolo. Labangso ahokpet alamm ke badu tame munthidun un’e lapen klardak chininedetji, lapen lahei kachinidun un’edet ahokpet alamm amokha henlo Arnam pen achethe ajakong pu kapaklangpon lapen ekethandak’lo. Non Ne eson kachepatujoi alamm nangthanlang: Arnam akai along kethedung lapen Alangli chethe ajakong heihui ke ajat api tame chinidun’et un’e. Lake nonhut pulo, lapen kedamtang ahut tame, anpar ta mohut kevangji apor anta lasonpo. Puthot adunthu kechepatujoi alamm nangkethanji ke lapulo: Chethe kenangji apharman an atiri ke Arnam pen si vanglo, kadokave kapinchongtang api do’an aphan, tame la asontin ta kethe-kibi ke chingbarpetpedetji. Prekjam kereng’et api do’an tame, Arnam pen kithiktang atovar ke nang damvek nangkokpo. Ajat alamm non, do’an Ne akar’i ke monit atum laso aphuthak kachinipetji aphan: Arnam pen akalana, akerai lapen kithiktang ave pulote, monit atum alang kelong nangji ason do’an longledetji, jonghe le alang bor’i peme lapen chepadukkrup pen chiting tame. Arnam pen ajok chethe nangpipe pulote, monit atum kerengdun ale lapen kerengdun ardi chepangbodetji. Koson si monit aphan Arnam kepekdetlo, Alangli chethe aphuthak mathakrang si ardi pavepin pen kaphangno atum, lapu an arpu kachichinine? Ne aphrang ta ningje longlo: Arnam henlo nang kai along kenangji apharman atiri lo pu chetengnedetri. Jongsi monit atum Arnam pen kepajirpontang do’an ason pen ningcheparong’i thekthe pulote, kecheng ahut pen kopima ekipi ason do’an ta Arnam chepon’et anchot kali, tebonta monit atum along pen adai areng ason chehangthu’etji, Alangli nangkipitang ason do’an pen batai hini abat ador anlo.

Aru 26, 2003