Nangtum Nangsai Aphuthak Chematha Nangji

Nangtum keklem asitin asai lapen nangkai aklong asaikam pen kacheklang ateng ke nangtum aphan jakong pachevangthuji aphan arnivang ta Nelamthe along pen ingkung isi nangpale nangji, athe nangtum dure ongchet, lapen nangtum kachini lapen kachodengdun ajakong apar kijumhek. Nangtum arnivang akai along, nangtum isi ahokpet lapen kamatha keme kavedet avarmon along si kedo. Nangtum kerengdunji apharman atiri duredet, lapen Nephan lapen ahokpet aphan kachiniji athir ta ave. Nangtum akekroi ke ajat along ta kali bonta keklangrim lapen keklardakde akekroi mate kachekirla thekthe agian lapen dhorom ajutang. Arnivang ta Ne nangtum akengkam nanglangdunkri, nangtum kamatha lapen kechokche angthek nangkangsaidun, lapen mantune ta Ne inutbak ta aphan mantune pen keklemkle Ne dovan ahokpet pen aning lapen akarjong kachebat abang chetongtelang. Lasi Ne ning kehanghe loma lapuson monit akhei aphan Ne kachethan kangtung alam doan kacheho pen apor kachephalangno aphan; Nening arlo pen kamathabomlang ke Ne kapatang thekthe asai lapen hala Ne kerai nangji kedolang amonit akhei anvetlo. Ajatnon, Ne kemang ke Nelong pen kejok lapen hala monit aphan kipi ahokpet ason kelongji aphan Nephi nangkidun atum an aphan ta lo. Ningthelo arnisi mo nangmek kaselok ahut, nang tomon along kanempru kepleng lapen langroi along kereng’et alang kili isi apirthe theklongpo – kangting, kangsam apirthe inghun ki’ik sining kebangthip lapen keso-kasarlang ase kijut un’e apirthe kali.

Arnitin lapen arnivang, anuttin lapen abangphutin kachoklem asai ta halaso Abangphu amek along chechar’et, lapen, laso apor ahut amat si, alangtum along penap aphan kisik-kedang. Lahenlo kereng’et abang doan atum kehat nangvek atovarlo; lahenlo Ne kadokave aphan ta kisikpimek atovar, lapen majok ta laso along pen chepajok un’e mate pejok thekthe. Ne kaningje alam ke aphai ave, lapen Ne keklemtang asai, anparta, ke apun ave. Arnivang ta, abangphutin atum ta alangtum along kedo a’ot ateng amena si klembom lapen alangtum a’ot along kacheplang ateng si dunbom ahut Ne langdunbom. Chininepin pen, ongdung atum ke “kechok aloti” along sakdamlo, lake Ne prekjam amonit ajat aphan kepachingbarji aphan kilim apotlo. La keprekjam amonit ajat Ne arjidingklui pen prekjam avarmon along kibitang lapen, alangtum methang adim along, anuttin ta alangtum methang along kedo ason chepaklanglo. Alangtumphan kebengji abang majok ta ave, majok ta kebaiji abang ave. Alangtum ingthimlim pen amat si jokvan lapen alangtum kachepaklang ason ke amena si kevang. Alangtum aphan esonvet si kekhang’echot: Nelamthe. Lasi ajahak atum ke seletjin pensi Nelamthe kaporhi, mantune ta asai ke klemkle, lapuson keklem ke kithi pen chepajok aphan anchot; kaprek atum, lason ahut si, Nelamthe alangtumphan keja lapen kipi aphan avete arni kethon sungkrung titi, lapen lasi latum ke amena si kaiketa Nelamthe ripthip. Apor dambom asonsi, latum monit akai along kachepatujoi alamthe longbom, monit akhei atum kemang adim chinibom, lapen monit akhei anam chichinibom. Lason henlo monit akhei atum Nelamthe athengno kedo, lapen Ne thangbakbe lam doan amethang ahor pachilibom. Monit atumphan Nelamthe si alangtum kereng atiri pacheman bor’iji aphan Ne ajat asai ta klemkle. Lasi mantune ta me-heno kangsai thek ajakong kavepinlang atum, lapen alangtum kereng thangnat anam kavepinlang atum, angthin chepathe pen Nelamthe varchor titi lapen kosonsi ajat ason chemanbom pu dojoi pen lang si aninghang aling klempo. Latum kecheng ke ahokpet ason lapen Nelong pen kevang ason doan pen aphu chepasopo. Anparta, latum Nehem along kedo pen ta a’ok cheparengnopo. Alangtum kemang adim ajoine, lapen adai pen kachepajokji aphan, lahei amonit atum Nehem along malomso aphan dochotpo, latum asai ke klembom sitame. Sitame latum akemang lapen a’ot ke mantune ta chelarle. Lapen si alangtum along hirjume kelong akar’i nangbatpo, lapen batpo alangtum halaso alongri along kilutdun akar’i ephong lapen kaike kedolong aphan – sining hemrengme along anta kilutdunlong aphan. Latum koan si Ne kevang arni kapaledap aphan kar’i ma hala an si latum mathaji ahokpet ason ke isi akechaknap pu, isi kapatikung pen kapachingkoi alongkleng alangtum atovar along. Alangtum kachonghong un’e’onglo halaso alongri along kilutdun pen kaike aphan sining hemrengme along hijrume kelongji aphan – kadokave ahokpet apharman sai klem nangnepin mate kangsai lapen adai lapen, kadokave pen anpar, Nehem arlo choningri nangnepin pen lapen Ne kapinkhat ateng klem nangnepin pen. Lahei amonit atum Nehem nangkilut ke alangtum ahokpet aphan kiri akar’i kachepakleng aphan kali, mate Ne kaselam asai along nangchetodun aphan kali; latum akemang ke kevangji akai along kevir atum anglum kedodun aphan anchot. Lasi latum aning ke mantune ta ahokpet kopilone pu kachini, lapen kosonsi ahokpet aphan kedeng nangjima pu thekthe. Lahenlo lapuson amonit atum mantune ta ahokpet aphan asai klemkledet atheke mate alangtum koanbak kaharnuk an a’ot kaheno loma chipu thekthe, lapen anta Nehem along “bansot” nangdodunklunglang. Latum “chepaningding si” Ne arni kevangji aphan kanghong lapen latum lakle Ne sai a’ot pen latum aphan kehijuktot ahut ta. Bonta latum kachepaduk jonghe sik lapen kitunang anam jonghe le the tame, majok ta latum ahokpet apharman kisung kachingtang mate Ne joine pen kopine kipi pu mantune ta theklongle. Alangtum aning along, latum ingthakriklo Ne arni keban aphan pajut ketheklongji aphan, anparta, Ne ajakong lapen hukum koan ingtang pu kelangji chonghong un’elo. Latum keklem ketong kavepinlang ke methang aphan kachelar lapen ahokpet aphan kihungdun. Ne ok karengno’i ason ke latum aning kedoklo, lapen Ne ning kedok ason ke latum lang un’e. Ne kelang selet ason si latum ke ar’iji, bonta ne ke’otang ason ke latum kachepangbo ta kaphere. Latum lang seletle pin pen si bangso kahenodak apirthe along kedodun, lapen anta Ne pahenodak na puta pherepik. Alangtum kacharvosai akemang anglum pen, alangtum la Ne ke’otang apirthe aphan si aning kedok, bonta Ne apor en’epin si prapjin pen kapahenodakji aphan ta kar’i, lake alangtum kaphalangno along akisung pen jok si puthot akai arecho ason pachekirlaji mene pu, alangtum ahokpet atovar pen suiphitphe aphrang. Lake athe alangtum ahokpet lapen Nelong pen kevang ason doan aphan aning dokde. Latum hirjume longledet na pu kaphere pen malomso aphan ke “kachingkime” mandet tahai, bonta alangtum hirjume kar’i, lapen kivir kaphere lapen me akar alangbi kejang kaphere, ke mantune ta dip un’e. Ne arni nangtebokbom si, latum akar’i pajopen nang ingtangbomlo. Lapen koan ma akanahok kethe, hala an si alangtum aphan kerap kavepo, Nephan ning nangparong lapen ajir dingklui pen kar’i ahirjume kachepangbojokji aphan konat pensi kecheng nangji ma pu kachinine. Lason amonit atum ke Neri asai kecheng pen aphrang keja adim kacherai si sai kedengji rirok atumlo. Latum kosonsi aphrang kedolongji ma pusi kirichot, athe ke Ne alangtumphan theklongledet na kaphere. Latum alangtum kopisi kechok pu kamatha ma si keklem lapen kaningje, mantune ta chinine alangtum asai ke komantune ta ahopket pen kachingbar ave puke, lapen alangtum asai ke Ne kemang pen chetonte lapen nangkahilidun puke. Alangtum chepadukpiklo tahai, lapen alangtum ahokpet si kisung kachechakji aphan kamatha tahai, bonta alangtum keklem thangnat ta Nepen chetonte, atheke Ne mantune ta mesen aphan kemang pen si alangtum asai kevang pu theklongle, ansose akijum si Ne ketheklong alangtumphan Ne dovan along kopine ason nangkebat. Lahei henlo lapuan aningkan angbong alangtum Nethengno keklem asai.

Abinong’et ke, Ne nangtum aphan ansose ahokpet ason nangpi ingtung, bonta Ne bangso along pen cheserai nangkok athe ke nangtum along ahokpet aphan kedeng a’ot ingsamhe lapen meme ongchot; Ne kachepaduknakji aphan Ne ning hanghe, lapen ning hanghe Neta Nelamthe ripsi Nephan kekhamkhe asai keklem, Nephan sarsar, lapen Nephan kapinrem abangphu atumphan kelang ke. Nangtum kacheplang lapen nangtum monit a’ot ajoine, Ne nangtumphan asapso si nangpichot lapen, nangtum aphan, Nelamthe along kenangsot thepik angkung, monit akhei anglum Nesai asat kachelang ason ben pacheplang si. Non ansi Ne pathirthip pen chini thek lang Ne kacheparai lapen kemang ason nangtum kenangji ason aphan chelonlo puke, anparta, Ne monit akhei atum aphuthak kacheplang ke kechoklo pu. Lapuan akeong aningkan angbong nangtum Nethengno nangchepaklang a’ot si Ne komentune ta kamathathe alamthak nangpilo, lapen laso alamthak aphan akarju alam ke: “Monit atum ahokpet lapen ahokpet Arnam athengno a’ot kopilo?” Ne kachipi ajakong si Ne monit aphan kanghon atiri asakhi pilo, lapen monit atum Nethengno asai doan si alangtum ahokpet aphan kelangselet lapen Nephan kekhamkhe asakhi nangpilo. Ajat apor ahut tame, Nephi nangkidun abang doan aphan ta Ne chematha, bonta mantune apor ahut ta Nephi nangkidun atum ke Nelamthe nangdengdun thekthelang; latum Ne kapinkhat alam deng thekthe. Lahenlo kadokave pen Nephan ning nangpaduknei asonlo. Majok ta Nephan nangchini thekthelang lapen, anparta, thekthelang majok ta Nephan nangkedeng, Ne alangtum aphan chelangkri pusitame, lapen Nelamthe ingdukjin aphi anta. Abangphutin ta Ne kapinkhat asai amethang kamatha ateng si keklemji kiri; latum ne kamatha alam rire, Ne alangtum along pen kopisi nangjima pu karju ke aphi alamlo. Alangtum Nephan honjatpik pen si nangru-thai pusi chipibom, alangtum Nephan nangkhinde pen nangchedanbom ahut ta. Ongdung atum ke ahokpet ke alangtum dengno pusi kroibom mate alangtum keklem un’e ason an ke ahok kali pu. Lapuson amonit along, Nelong kedo ahokpet ason ke kopine kekroino lapen kevarchor ason si chemandet. Laso apor ahut si, monit atum Nephan Arnam pu alam pen nangchini, bonta Neke angtan pensi kevang ahokpet kali, atovar kali, mate achethe kali puta kroithu. Majok ta bangso ahokpet alam chinine: Nelamthe henlo mantune ta kachelar ahokpet alam. Ne henlo monit along chethe kipi lapen monit akhei aphan keja abang. Nelamthe ador lapen ajor ke monit atum chini mate chinine, deng-dengde penle kalakha kali, bonta alamthe atiri pen amat. Bangso apirthe along inutbak le Nelamthe dengde pusitame, Nelamthe anam lapen monit akhei aphan latum kerap ke majok amonit ta pundam un’e. Lasi, Nephan nangkhamkhe, nangchedan mate thangbakbe si kekroikre amonit atum pen chepathengno lote, Ne kipuji ke la anvetlo: Apor lapen ahok alam le Ne long hakhi pedonang lapen Nelamtha ke ahokpetlo, atovarlo, lapen chethelo pu paklangnang. Latum paklangnang Ne kaningje anta ahok saide pu, lahenlo monit atum along kedo nangji pu lapen, anparta, monit atum kedeng nangji pu. Nephi nangkidun atum doan aphan Ne bangso alam pachiniji: Nelamthe ingthimlim pen kedeng un’e atum, Nelamthe asai pen kapaklang thekthe atum, Nelamthe along akemang kiri thekthe atum, lapen Nelamthe pen ajok kejok kachodeng thekthe atum, henlo Nelamthe pen kapinrem kepho atum lapen, anparta, Nelong pen kejok kelongle atum, lapen Ne ingchin akaibong latum along pen suise.

Jangmi 16, 2003