Komat ma Alangli Mena Aning Ateng Kedo Atum Aphan Arnam Pachoklimlo

Arnam nonke ajahak adilung amonit atum aphan si akenang kedolo, laso adilung along ke komatmat ma Alangli pen kajalang rappetji si kachisikpon, matmat ma Alangli keklem asai kekroidun, matmat ma Arnam kaningje alam ke ahokpetlo pu kekroidun, lapen matmat ma Arnam akenangji ateng pen keklem-kedamponthek; komatmat ma latum doan ke alangtum aning arlo ahokpet kachinidam do’etlo, latum doan aphan henlo pima kapachoklim unji, latum ke kepachoklim akrong ahin siksaksepin pen kedam thekji atumlo. Komatmat ma kepachoklim un’edet doan amonit atum ke Arnam asai aphuthak klardak kachinidam avedetlo, komatmat ma Arnam alam choche lapen junje atumlo, Alangli lam along ardi kipidundedet atumlo, lapen pima alangtum aning along Arnam aphan kanghon kavedet atumlo. Laheihui amonit atum ke pima Sobar saiselo, komatmat ma Alangliphan ok along jongdun si Arnam aphan khanglo, Alangli phuthak kamanghu pen kedobomlang atum, Alangli lam doan arsikjik pen amat si mathadamde, lapen Alangliphan kaiketa chongthuilo. Lason amonit atum aphan kapachoklimji puke atovar si avelo.

Nang jongsi kechoklimji ninghang tangte, nang ke Arnam aphan aningpadokdet nangjilang, athe Alangli ke komatmat ma Alangli ningkedok lapen Alangli ning ateng kedo atum aphan si pachoklimlo. Nang jongsi Arnam mena aning aphiphi si doji ninghang, tangte nanglong tame pima Alangli sai abe kidun aning dovek nangjilang, Nang laso ahokpet aphan kiri chepedukvek nangji, lapen Arnam kadokave asontin kelangchari nang dengvek nangji. Tangte kadokave pima nang Arnam akangsai phopon etloma? Nang kamunthidam chokloma? Jongsi nang kamunthidam le choklo, tangte Arnam nangphan hodaipo; jongsi nang kamunthidam le chokchedet, laso kacheklang ke athe pima nang ning akanghon ke Arnam kalidetlo, bonta ok lapen Sobar aphanlo. Laso apot si, nang Arnam akangsai kadokave asontin along kedengpon puke kardom akerap penvek nangpo. Nang le ardom lote, Ne le monit abang arpum ateng nangdung arjaplunledet puvoiphit tame, Karjong Kangthir ke nanglong dolo, lapen lake Ne methang lapen laso Arnam aKarjong komat aphan si nangkardom ma hini ta kalanglo. Kopi athe si laso ok aphan nang kekroilo? Nang kekroi athe ke Alanglilong Arnam aKarjong dolo. Tangte nang laso amonit jongsi Alangli ke Arnam aKarjong avedetlo pulote kroijima? Nang le laso amonit aphan kekroi lote, nang Arnam aKarjong aphan tame kroilo. Nang le laso amonit aphan pherelo, nang Arnam aKarjong aphan tame pherelo. Arnam aKarjong aphan kekroi puke laso amonit aphan ta kekroilo, lapen laso amonit aphan kekroi puke Arnam aKarjong aphan tame kekroilo. Nang le ardom lote, nang chemathaji Arnam aKarjong ta nanglong si dolo lapen pima Arnam nangthengno si dolo, lapen laso apot si nang Alangli Karjong aphan ardomlo. Pini arni, ongdung amonit atum ke alangtum akeklem-kedam Arnam angno kevanji pherepik; pipotma nang Alangli ok aphan pachobaidet tahai, bonta Alangli Karjong aphan chongthui un’e. Ajat alam tame pima Arnam akangsai chechakkluk un’e pulote lake ahokpet pen akesunglo, lapen arep terekvek si kenangpo; laso klemkle pulo tangte lake Arnam abirudhe pap si keklemlo. Lasi, ajat apor ahut tame Arnam athengno nang nangning chehodaivek nangpo, nang le ardom lote, nang le ningje lote lapen nang kortemar lapen ingjirmar doan pen chingrum lote, lapen nang le nang mena adeng cheklem lote lapen nang mena chokam amo klem lote. Nang le nang mena apuru chethap lote, Arnam ta nanglong si dolo, lapen nang kamunthidam kechok kopuan ma arji kiding lapen lake Arnam ahem along aphan asailo, Alangli pima kadokave nang keklem dengponji; nang angthikdut pen nang methang apuru kachethap le apor chipinon. Nang le ardom lote, jongsi nang le nangning along Arnam aphan kanghon do lapen Arnam akelangna, akerai lapen akangsai chori, jongsi laheihui ason doan ke nang kamunthidamlo, nang kardomdam ke mepik chenampo. Langdam sinang, nang le mei ahut kardom lote, jongsi nang le nangning chingpudang lapen Arnam aphan ardom lapen Alangliphan kopima nangning arlo kedo alam thanlo kapachobai alam kavepin pen, tangte nag kardom ke chenam si choklimvekpo. Jongsi nangning along nang Arnam aphan kanghon do peme, tangte Arnam aphan seme chipinon: “Arnam, pima sining athak lapen pirthe along lapen kadokave ahormu angbong kedo abang, Ne seme denglo Nangphan: Nangli Karjong kadokave pima Ne keklem palangnang lapen palananang lapen ajat apor ahut tame nephan parainang, lapen Nangli thengno Ne karjapji aphan kadokave tame pachokthei lonang. Nangphan kanghon jongsi ne ning che’obup arni pulote mate Nangphan chongthuidet arni ke, tangte ado nangpinon lapen hirjuno nephan kipi pasodaknon. Bangso apirthe mate mo kevangjilang pu tame nephan kadiya nangpipedetnon!” Nang lason aseme dengdut haijima? Jongsi nang dengdedet, laso kacheklang ke nang pherejulo, lapen athe ken nag nonpu ta mena aphan si chinghonlo. Laso kachechak nangtum dolangma? Jongsi lahenlo nang ahokpet akchechak, nang laso aseme dengvek nangpo. Jongsi nang lason aseme kedengji aphan kachechak dolo pute, Arnam nang kachechak paplengpipo. Nang le Arnam aphan seme kedenglo tangte, Alangli arjulo. Arnam kapangthek nang pap klemloma mate ingthirjir ma puke nang akardom lapen nang keklem-kedam alakha pen si langji. Laso nonjong ke nangtum aphan kapachoklim akeklemponlo, lapen jongsi nangphan ahokpet pen kapachoklimlo pu kroilo, tangte nang kadokave kopima nang Arnam angno keklempon doan chevan’etpo lapen Alangli akangsai dengdunpo; jongsi nang le kopine pamanghuhak chedandong pen klemdetlo mate jongsi nang Arnam aphan chongthuidetlo, tangte Alangli nang seme kedeng apot pachichiniponpo, lapen lasi nanglong ajat le cheplang pu tame, kai apar kai akesung mate ado kipi pu tame, lake nang methang keklem apotlo. Nang si seme dengponlo, lasi nang laso ateng klemvek nangpo. Jongsi nang seme denglo, bonta laso ateng klemkledet lepute, nang ke kai apar kai akesung chechak nangpo. Pima nang henlo asemelo, Arnam nang seme kedengtang apot athe pemanpo. Ajahak atum ke pherelo latum ardomdet aphi, lapen ningchiduklo, “Kadokave ta jut’etlo! Ne ot langno keklem longji apot doan damtanglo; ne kahenodak ason keklem longji apot doan damtanglo; ne pirthe akhi aphan kihungdun keklemji doan ta damtanglo!” Laheihui amonit atum nonpu ta pirthe ahormu-hortar lapen pap aphan si inghonlo, lapen latum doan ke chenam si kai apar kai akesung chechakvek nangpo.

Arnam aphan kekroi abang pu kachemanji puke pima kadokave Alangli thengno nang keklem doan ta kachevan henlo lapen Alangli kapangsai longji aphan kepaman henlo. Jongsi nang kopima keklem doan Arnam aKarjong athengno vanlap lote bonta Arnam a’ok angno kalidet nangji, laso kacheklang ke pima nang Alangli Karjong pen akangsai aber vangvedetlang. Arnam aKarjong puke komatlo? Komat amonit apharman si Arnam ahakhi kecholo? Tangte Latum ke isinat kalilangma? Ongdung atum ke Latum aphan cheprekjam si theklonglo, Arnam aKarjong ke Alangli inutpetlo pusi kroidamlo, lapen Arnam hakhi kechobom amonit ke inut monit jongjungchot pusi tindamlo. Bonta nang chokchedet kalilangma? Komat apharman si laso amonit keklempilo? Komatmat ma Arnam ok kachepharlotang aphan kachinine dolang anke karjong plengset akachinidam ta avedetlo. Arnam aKarjong lapen Alangli ok kachepharlotang abang ke isinatlo, athema Arnam aKarjong ke ok along si chepaokdundetlo. Jongsi laso amonit ke nangphan chingkimesensedet, tangte Arnam aKarjong tame mesenjima? Tangte nang manghudet kalilangma? Pini arni, kadokave mat ma Arnam akangsai kedeng dundedet atum anke Alangli akechak tame longdundelo, lapen komatmat ma Arnam ok kachepharlotang aphan kachininelang atum an aphan ke pachoklim un’elo. Nang keklem kadokave tame chelangpontha, lapen langtha jongsi lake Arnam athengno vanme ma. Jongsi nang keklem kedoan tame Arnam angno chevanno lepute, laso kacheklang ke pima nang ke keheno keklemdet abanglo. Tangte kaheno keklem atum aphan pachoklim unjima? Kopima nang keklem kedoan, asontin asai, asontin akamathadam, lapen asontin kacheparjan tame Arnam angno chevanvek nangji. Nang arnivang karjong akai tamelo – nang kardom doan, nang Arnam pen kachetebok, koson si nang Arnam alam kecho lapen kejun, nang kortemar lapen ingjirmar atum pen nang kachingrumrap, nang kardomhem along akai, lapen kajalang rappet pen nang sai keklem – Alangli kangsaiji aphan Arnam angno vangthei nangpo. Lake lasonlo keklem nangji pima kai kachingthurji along nangphan akerap thepikpo. Arnam akangsai asai kedengdun puke kapangthir asai kedengdunlo. Kopuan ma Arnam akangsai nang kedengdun, lapuan sose si nang ingthir’etpo lapen lapuan sose si Arnam aninghang ateng pen nang kachephosap dopo, lake pima nang ok aninghang asai ahin chingbedundedetpo, lapen nang ning ke Alangli thengno si dodunverpo. Koan ma Alangli kangsai kedengdun, lapuan sose thedung si Sobar ke therak nangkokpo lapen nang tame ok aninghang ke che’odet thekpo. Lasi, Arnam akangsai kedengdun puke monit atum keklem-kedamvek nangji akronglo. Nang ajat ason le klem-dam tame, nang kortemar lapen ingjirmar doan pen chethan-chemumraprap ahut tame, nang sai doan Arnam angno nang chevanme lapen Alangli akangsai rime lapen Arnam Methang abe kidun aphan kemangdunme; lake pima nangphan ansose si kechoklim keklem-kedam pemanpo. Jongsi nang keklem kedoan ason Arnam angno kevan lapen Arnam akangsai kedengdun pen anchot si nang ke komat ma Arnam athengno kerengdun abanglo pu hokpo.

Komatmat ma Arnam aphuthak kachinidamdepin atum anke angton pen amat si Arnam abe dundedetji. Lason amonit atum ke kekroi thekthedet asomar saidelo. Latum doan ke aningkehang parpiklo, lapen latum along ke kachedandong ong’ongchetlo, lasi latum ke amethang aphan Arnam pen kachehelo dokoklo lapen ke Alangli akangsaipon dengdun ingtungtedetlo. Lason amonit atum ke joike pen pachoklim un’elo. Ajahak amonit atum ke chongvaijailo athe latum Arnam alam kecho lapen kejun along lapen alangtum lahei kedungdun along. Latum ajahak Arnam alam ansi dengdun chotlo lake alangtum kamunthidam heihui pen kachetondam an lapen chetonte anke dengdedetlo. Tangte lake kacheklangdak pen kachedan lapen Arnam aphan kekhang chenam kalilangma? Jongsi komatne Arnam aphan kroilo penang an aningkanlo bontame Alangli phuthak masapso ansi chinidamchotlo, tangte latum doan ke kekroikrelang atum saidelo. Komatmat ma Arnam akangsai kedengdun ninghang atum anke komatmat ma Alangli phuthak tame kachiniji kiri atumlo, komat ma Alangli lam kedengdunji kar’i atumlo. Latum doan ke komat ma Arnam akhi-adat lapen hirjume kachodenglongji atumlo, lapen latum anke hirjume keplsengsetnai atumlo. Arnam ke komatmat ma alangtum aning along Alangliphan adim kepek aphan anke hirjuno pilo, lapen Alangli ado pilo lapen lason amonit aphan ke che’odunbuplo. Jongsi nang le Arnam aphan chinghonhe tangte Alangli ta nangphan che’obuppo, lapen jongsi nang le Ne kopima kaningje alam arjujedet, tangte Ne lamchak pilo pima Arnam aKarjong tame nangphan che’obuppo. Bor’itha jongsi nang la kroikre te! Pini arni Ne paklardaklo nangphan laso keklem-kedam akrong aphuthak, bonta la klem-dam along enpon-enponpe ke nang rideng si dolo. Jongsi nang ke kekroi ave, jongsi nang ke laso ateng klem-damdedet, nang methang aphan nang chetheklongpo nanglong Karjong Kangthir sai klem loma klemklema! Jongsi nang le Arnam aphuthak kachinidamji aphan riredet, tangte nanglong Karjong Kangthir tame asai klemkledetpo. Arnam sai keklem ke komatmat ma Alangli lam heihui kachori lapen kabirtipon atum along henlo. Koan ma nang Arnam alam kachibirtithek, lapuan sose si nanglong Alangli Karjong tame sai klemponpo. Inut amonit kopuan ma Arnam alamthe kachobirti, alangphan Arnam kapachoklimji thedung avarsai dopo. Arnam kapachoklim ke komatmat ma Alangliphan kanghon atum, lapen Alangli thengno komatmat aning si ningkangsam kedothek atum anke Alangli pachoklimlo. Arnam asai doan kabirtidun puke, Arnam akatheang doan kabirtidun, Arnam athengno kedo kabirtidun, Arnam akalana lapen akerai kabirtidun, nang ahokpet kosonsi Arnam alam heihui keman loma pu kabirtidun lapen nang chethe aphan kapadorpon ke – lahei kadokave kachedon kemenei ke Arnam aning pen henlo. Jongsi nang le Arnam asai kabirti, lake pima, jongsi nang kadokave nang phuthak Alangli sai keklempon doan kabirtipon, pulote Alangli nangphan hirjume pipo lapen nanglong kopima kedoan along ansose abat pinchongpo. Nang jongsi Arnam alam birtidunde tangte, nanglong Alangli sai klemkledetpo, bonta nang kekroi apot Alangli nangphan masapsobak akangjinso si pajirchotpo, mate do’ichit akhi pen si nangphan pahirjumepo lapen nang hemtun isi aphan dor’ichit akerai si piponpo. Nang ke Arnam alam doan nang ahokpet aphan si kiri bor’ipon nangji, lapen Alangliphan ningpangsam thek nangji lapen Alangli mena aning abe si dun nangji; Alangli akangjinso kelongchotji aphan ke nang choridun nangne. Arnam asai kedengdun pen anpar ke kekroitang atum doan aphan ke thangnat akenangsot avelo, kechoklim ale kelongdun, lapen Arnam aninghang ateng keklempi atum kemandun. Lahenlo nang kijut akemangdam aphan kachepeduk nangji.

Kadokave pima monit atum Kanghon-Kangjinso Akai ahut keklem doan nonke aban cheman tanglo, athema nonjong kiribom ke akangtui angdeng an si dokoklo; kopima kiridam ke ingtuiving lapen ansose si keklem-kedam nangji, kopima kiridam ke kopisi monit atum aklong pen akenangji doma ningpangsamji mesenpo. Kedamtang akai ahut ke, Alangli pini arni keklem ason ke Arnam monit atum aphuthak sai klemkledet; latum aphan Arnam thangnat alam ta ningjeje pini arni Alangli koanma ateng kalidet, lapen aphrang ahut ke Alangli akenangji lahei atum aphan pini arni Alangli akenangji akangtui ateng kalidet. Laheihui alam nangtum aphan Arnam kaningjepon nonjong kacheklang ke pima Arnam kapadusi ninghang ke nangphan si jongvetlo, labangso adilung amonit atum aphan. Jongsi nang ahokpet Arnam nangkapachoklimji ninghang do, tangte la nang kenangsotnei akemang pule rinon. Nang le ajat ahin tame kekatdunbom pu sitame, methang aphan apor chipibom, isi arpu cheklembom, mate nang le Arnam ketoi ahukum longdun longdunde tame, akemangdam ke kaiketa kechoklimji aphan lapen Arnam aninghang ateng ningkapangsam nangpo, laheihui akemang kelongji aphanlo. Jongsi komatne ningjelo latum ke Arnam kepachoklimji aphan mate chethe along kilutji aphan riredet, bonta ok ninghang ateng ningkarong lapen ningkangsam si rironglo, tangte latum doan ke monit atum angbong ke kachecharchedetnei atumlo. Komatmat ma chethe ahokpet aphan riredet, bonta kai apar kai achethe mo kevangjilang apirthe lapen non kedobom apirthe kejokvan si richotlo, monit atum angbong ke kachecharchedetnei atumlo. Lasi, nang kadokave keklempon doan ke Arnam kepachoklimji lapen ale kelongji aphan akemang pen si klem nangji.

Arnam monit atum along sai keklempon ke alangtum prekjam akenangji ateng pen si latum aphan padorlo. Koan ma inut amonit akai kethebom, lapuan sose si latum kenang dolo lapen latum lapuan sose si rilo. Jongsi laso angdeng ahut nang le thangnat kiridun ave, lake cheklangdaklo Karjong Kangthir nangphan che’o tanglo. Komatmat chethe kiri atum doan aphan ke Karjong Kangthir chenam si che’odundedetji; lason amonit atum kaiketa rilo lapen kaiketa alangtum aning along kirivung dolo. Lason amonit atum doan ke latum nonjong kedobom ahut ahormu-hortar pen ning ingsamsedetji. Aphongtin angdeng Karjong Kangthir sai keklempon akemang ke nanglong pen angthek kelongji aphan, bonta jongsi nang le mena jongjung ale aphan ningchepangsamrong, jongsi nang le Karjong Kangthir asai anpar ke dengdundedet tanglo, tangte nangphan Alangli che’ovekpo. Monit atum arnivang si Arnam akangsai nangji, latum arnivang si Arnam pen ketoi ahukum akeongpi kenangji. Tangte monit atum arnivang Arnam alam choche lapen junje tame chekroidun thekjima? Jongsi komatne le kaiketa latum Arnam alam kecho lapen kejun dorpluplo pu chematha lote, jongsi latum kaiketa riverlo lapen ingchirlo lapen laphan ing’itlo, latum along kaiekta Karjong Kangthir sai klemlo. Koan ma komatne abang rivunglo, lapuan si alangtum kachingrum along keklem-kedam ason vang’ipo. Koan ma komatne abang arsikjik pen ahok aphan rilo, lapuan sose si alangtum achethe along latum kachingthur longdun prappo, kephopon along latum aphan pangcho’opo lapen Arnam ahemtun along kangchoklong amonit atum plangpo.