Kechoklimji Aphan Arnam Aning Kehang Kopima Lang Pangchingtu
Nang koan ma Arnam aning kehang aling kelang pangchingdun lote, nang kanghor nangji anghor la kethe, lapen nang inghor koan the ma, la ansi nang kepho kachini ason ta keongji. Nang jongsi Arnam aning kehang kopima lang pangching lote, Arnam nang phuthak anghor nangbatpo, lapen Alangli nangphan nangkepek asai aphan nangpachechardakpo. Arnam nangphuthak laso anghor nangkipi ahut, Arnam alam chobom lapen junbom ahut ahok alam an aphuthak nang chini ponbompo. Nang korte lapen ingjir atum akai achethe alam mate asai pen apot nang phuthak anghor dokok lepute, Arnam nangphuthak nang kepek anghor lo pule nang mathanon, lapen nang kardom aphongtin along ta laso anghor nang inghorpon non. Arnam nang phuthak kopi si nang kebat ma, lapen nang jongsi Arnam aning kehang aling klempo pulote; Arnam anghor nang ke’endun asonsi plangpo. Laso ahut ke, Arnam alam chobom lapen junbom ahut sita, lahai alam aphuthak si nang mathaketpo, lapen lahai alam pen apot ne kopi si keklempo? Koson si ne korte lapen ne ingjir atum aphan kejokvan vanpi si karjong amo anat ning arong kachipi thek poma? Lahai alam si nang kaike ta munthiji. Armu pen kachingrum ahut sita lahai alam koson si kepateppoma pu nang mathaji, lapen Arnam alam chobom lapen junbom ahut sita, lahai alam si kecho lapen kijun pusi nang matha rongji. Alang lam kecho lapen kijun ahut nang phuthak anghor dokokpo. Arnam akenangji kopima nang chini peme lote, kopunat atovar si nang kedam nangji ma nang chini muchotpo. Lake nang inghor pen ajok nang phuthak Karjong Kangthir si nang patheanglo lapen kachini un ajakong nangpilo lapen lake Arnam nang phuthak tovar nang kejalo. Kopi si ne laso alam ningjelo? Nang phuthak jongsi anghor ave te, Arnam alam chobom junbom ahut nang matha pememe detji; lapen anghor pen jongsi Arnam alam cholo junlo pulote, akarsik alam chiniji, tovar chiri si, Arnam aning kehang kopima lang pemeji. Lasi, nang Arnam kardombom ahut, nang phuthak anghor nang kepabatji lapen sai kethe nang kepaklemtoiji le Arnam aphan choardom non; lason pen lote mo nang phrang kacharliji atovar ongchetpo; lapen Arnam alam kecho lapen kijun pen ale chethek long’opo; lapen Alangli lam akarsikkrung nang nepdun thekpo; anlote Karjong Kangthir nang phuthak sai keklem nang denglongpo.
Arnam alam kecho kijun, Arnam kardom kacharli, Arnam anghor kedeng, Alangli nang phuthak nang kipi asai kedengdun – lahei asai ke mo nangphan tovar doji mene pu aphanlo. Arnam nang phuthak nang kebat anghor ardi koan si kardik ma, la an si Arnam nang phuthak nang kepachoklimji asai keklem joikepo. Ajahak atum ke Arnam asai keklem along cherap rappet pen sai keklemji aning hanghe, alangtum aphan jonghe le hang pon sitame; lahei atum ke kaselet atumlo lapen rengmesen pen kedo kangtung atumlo. Bang pen sai keklem rappetji aphan koan ma nangphan nang ketoi, la ansi nang thek lapen chinipo. Nanglong kethek lapen anghor dokokpo apot si, nang phuthak nang kepachoklim asai keklemji aphan apor longdunpo. Lasi, ahokpet pen Arnam aphan sai klempi lote, Arnam anghor pen apot nang matha’epo; lasonthot si nang phuthak nang kepachoklimji aphan abatai do’opo. Non amat ke kijumpik amonit aphai atum aphuthak si Arnam kepachoklim asai klem longchotlang. Nang phuthak Karjong Kangthir batai koan si nang inghu loma, la ansi Arnam nang kipi anghor aphan kamatha’eji aphan nang chehodaipo. Lapen la ansi Arnam nangphan nang pachoklimpo, la ansi Alangli nanglong pen ale nanglongpo – mo, kijut ahut ke, Arnam sai ke’en abangphu cheplangpo. Non mamat ke, mondoli anghor inghorhepin atum ajahak dolang. Lahei amonit atum ke mathakrang lapen amo kevangve atumlo, lapen amena a’ok aphan chematha chotlo. Lahei amonit atum ke amena aphan chemathalok chadi, lapen amek ta checharche. Nang jongsi lahei apot chechar pameme pulote, nang anghor inghor un’edetji. Nang koan si Arnam aning kehang kopi ma pu kamatha’e, la ansi nang phuthak anghor kethe nang hodaipo. Amena aphan chemathalokchot atum ke lason akisung chechak ingtungte; latum anam tu ingtungte, lapen, mo kijut ke, Arnam latum aphuthak kepachoklim asai klem longledetpo. Lason ke amethang atum aphuthak hirjuno kachevanlo kalima? Nang jongsi Arnam aning kehang ason kopima la mathathip abanglo pulote, mondoli anghor kapatheji si nang klemji. Lake, mondoli anghor si nang kanghorlo pupedet si, nang methang achethe apharman si laso anghor kanghorlo pusi pudetpo, kopima mondoli anghor kethe nang kapaplang ke Arnam nang phuthak kechoklimji asai nang kapaklem longji aphanlo. Lasi, komat si mondoli anghor kanghor kethenei ma, komat si chethe anat kilutji anghor kanghor ma – latum ke Arnam kepachoklim amonit atumlo pusi pudetji. Nang la chini pemelo ma? Nang mondoli jongsi sangti ason ben pratphunlo, bonta nang ke matha sungse lapen pherere pulote, lapen nang korte lapen ingjir atum Arnam alam cho pameme lapen jun pameme angbong ta nang ke ketheklongle asonthot si kacheplang pulote, nang ke ajat anghor ta kanghor abang kalilo. Lason amonit atum aphuthak Arnam aning arongre. Arnam aning karong ke Arnam aning kehang ason kamatha’e lapen Alangli akeme pen apot Alangliphan kangchir lapen kang’it atum aphan. Lasi, Arnam anghor aphuthak nang matha’e nangji, dak amat lapen non amat; Arnam anghor aphan kamatha’eji aphan komentu si Alangli akeme a’ot adur nang chepaklangpo ma puke nang inghong nangnelo. Hala kanghong anke der ongchetlo pupo kalima? Arnam nangphan pinchong kimi nang kapeplangji ke non ahut helo apor kemelo. Nang jongsi laso apor lit dunphlot pulote, nang kai dingpi nang nangning che’oipo, Moses le Cannan havar keme akai angbong kilut longledet ason, alang aning ke’oi pensi thilo. Arnam jongsi monit aphan Alangli akeme a’ot adur chepeklangdak lote, nang ning kache’oi pensi plengsetji. Arnam jongsi nang phuthak ado nangpipe sita, nang methang nang ning kachiduk pensi nang mena aphan ado chipipo. Ajahak atum ke laso alam ahoklo pu tin ingtungte, bonta nang jongsi kroi ingtungte lo pulote, inghongding non lapen chelangnon. Ajahak amonit atum ke laso alam kapeplengji si matha’elo. Lahei alam pen apot nang nangmethang aphan charkli detji ma?
Nang phuthak Arnam nang kepachoklimji aphan nang jongsi apor chori dunde te, lapen kechoklimji aphan aphrang anat dam bor’i’e te, mo kijut ke nang ning kache’oilok anchotji. Kachepachoklimji aphan apor kemenei ke non anvetlo; non henlo apor kemeneilo. Nang jongsi Arnam aphan nang kapachoklimji aphan bor’i’e te, mo Alangli sai jut lote, hala an ke der’ongpo – lapen nang apor lit dunphlotpo. Nang kemangdam koan ma ingtui sita, Arnam jongsi sai keklem ingtonkok lote, nang jonghe le bor’i sita, kechoklimji aphan ke komentune ta longlelo. Karjong Kangthir sai kethe keklembom ahut si nang kacheto dunji le apor cho’en bor’i nangji. Nang jongsi laso apor keme litphlot lote, mo apor kaprek nangphan nangpipelo, jonghe le nang bor’i sitame. Ajahak atum ke, “Arnam, Nang inghor kanghorji aphan ne matha’elo, lapen Nang ning kehang kopima ne keklemji nening hanglo!” pusi kachiru pen pupo. Bonta, kacharli’iji atovar nanglong avedetlo, lasi nang inghor ke malomso pen virdetpo. Nang phrang jongsi tovar do pulote, nang sai keklem aphongtin ason ason chini ponbompo, lapen nang kepho kachetong ason anta kedo nangji ateng si dovetpo. Isi anghor jongsi plengdet lote, akaprek anghor nang phuthak nangpithupo. Laso angbong kepho kachetong ason aphuthak kachini arnukbom lote, nang inghor ta, thepon bompo. Ajahak amonit atum ke Karjong Kangthir alangtum aphuthak sai keklem ahut si anghor inghorchot titi; lapen penang apor an lit lote, latum kacharli’iji atovar avedetpo, anlote ajat anghor ta kanghorji ingtonkokpo. Nang Arnam alam kecho kijun pen chot ke anghor kopi ma semar thekthe. Ahok alam ake’ongpi kachini ajakong kedo pen, kangvai thek ajakong nang longpo, ahok aphan cheparideng ra kisung an chesong non, lapen Arnam alam lapen Arnam aning kehang ason an angton pen kachiniji le bor’i non. Lahei nang cheparideng lote, nang kanghorji aphan anghor dopo, anlote nang sai klem peme thekpo. Nang jongsi nang inghor dolo bonta ahok aphan kachini un ajakong avedet pulote, lason ke chokchedetpo, la anchot kalisi; Arnam alam chini peme nangji lapen kosonsi asai keklem nangji ma nang methang amat si klem nangji. Nang mena amat koson ma pho chetong lote bang aphan ta pedor thekpo, japon thekpo, lapen Arnam pen kapachoklim abang plangpo.
“Laso Akrong… (4)” pu along ketok, nangtum ke recho adet amonitlo, kai suri suri aphrang pen kangvaitang atumlo, lapen lake nang rideng pen majok ta pon un’elo. Lapen ketoktang ateng si Arnam ke kadokave atum aphan ta kepachoklimji lapen sai ke’enme apun kepaplangji aning hanglo, lapen Arnam arat pusi arjap nangji pusi Alangli aning hanglo, lapen Arnam amonit plangdet ansi Arnam aning kehang ason pepleng unji. Halaso apor ahut, nangtum laso aphuthak chingrumlo, monit atum koson apun achak pen si Arnam arat amonit keplang unji ma aphuthak nangtum chingkilo. Lasi, halaso ahut Karjong Kangthir ke monit atum aning kamatha kahingno an kepabarji lapen akeme akamatha anat kejaji si sai klemlo. Halaso ahut ke, Arnam amonit pu pen ajok Arnam alam kachini longji si Karjong Kangthir jasemet monit aphan langcharilo, lapen nangtum an ke Arnam amonitlo pu anuttin aphan ta kachiniji aphan apor nangpilo, lapen lake hako pensi ketok tanglo, lapen Sobar ta nangphan nangpon un’elo. Lasi, “Arnam! Ne ta nang monit man ingtungduk, pima hako pen ta netum aphan ke Nang tok mek’etlo, lapen hako pensi Nang monit kemanji a’ot nang netum aphuthak nangpilo. Laso ateng pensi netum Nangphan ning nang kapangsamji aphan ning hanglo,” pusi nangtum ardomlo. Nang jongsi lason ardomlo pulote, Karjong Kangthir nang phuthak vangpo; Karjong Kangthir sai keklem pu angthek ke lason henlo. Lason apor ahut ke, Arnam ardom nangji lapen Arnam angno nang ning kedothingji si charli nangji, lapen ajok chethe lapen Arnam arat anat kilutlongji aphan bor’i longpo. Lahenlo kechengsi angkung ke. Non amat ke, kadokave aphan ta kechok atovar anat kevanji, karjong kereng achethe kemesen lapen ahokpet akeklem kedam, Karjong Kangthir nang phuthak sai keklem, lapen – laso kecheng atiri pen ajok – Arnam asai kachodeng, lahei henlo Arnam keklem asai ke. Arnam arat kilut dun longji aphan aseke ke’en nangkok athe ke nangtum alamthetin, asaitin, keklem kedam amotin, ning kamatha lapen bidi sore anta Arnam alam anat kachetevar’etji aphan; Arnam pen ansose kachetebokji aphan lapen ansose Alangphaan kanghon aning kabocheji aphan; lapen Arnam aning kehang alinglo pu arpu kache’enthipji aphan, lapen ajok kadokave ta Arnam kapinchong apun kechoklim atovar anat kedoji aphan, lapen kadokave ta kengset pen kedoji aphan. Nang jongsi Arnam pen apun kapachoklimji atovar anat si dolo pulo tangte, kedo nangji atovar along si nang dolo. Nang ning kamatha lapen bidi sore, lapen nang ning kamatha kahingno an, chepachoklimdet lote, lapen ok aning aning kehang aling kamatha’e pen puthot Arnam aning kehang aling kamatha’ethu, lapen ning kamatha kahingno ning arlo vanglet ahut cheberthip unlo pulote, laso alar Arnam aning kehang aling si klemrong pulote – nang jongsi lason kamatha chepharlo thek pulote, kai achethe kereng along nang kechoklim atovar along si dolo. Nang kardom kardi an ta kechok anat si dolo pulote, nang kardom adihutin Karjong Kangthir nangphuthak vangji. Nang kardom ahuttin, Arnam athengno ingsamri pen nang do thekpo. Arnam alam angkung kecho lapen kijut abataitin, nang jongsi non Alangli keklembom asai apot nang nepdun thek lote lapen Alangphaan kardom, Alangli pen kacherap, lapen kilutdun avarsai kelong lote, hala an si Arnam alam kecho lapen kijun ale longpo. Arnam alam pen ajok, nang jongsi kilut dunji atovar chelongloklo lapen non ahut Arnam asai keklem ajakong kethe nang pangthek unlo tangte, lapen Karjong Kangthir asai keklem atovar chini dunlote, kechoklim atovar anat si kedamlo pu chini nangji. Nang jongsi Arnam alam kecho lapen kijun ahut kenangsot alam an nep thekthedet, lapen, laso aphi, sai keklem nangji aphan tovar chelong thekthe pulote, nang Arnam alam kecho lapen kejun thek pamemelang pusi nang peklanglo, lapen koson si keklem nangji ma aron heihui nang chini peme kalilang pu aphanlo nang jongsi non Arnam keklembom asai kopi ma chini dun pememe pulote, Alangli nang phuthak nang kipiji asai ta nang deng dun un’e pu aphanlo. Non Arnam keklemvoi asai lake monit atum arlo alam kachini pemeji aphan lutchok si non kosonsi pirthe kedobom ma chinivek nangji. Nangtum lahei alam chini peme loma?
Nang jongsi Arnam alam kecho kijun pen ale chepalong thekserlo pulote, nang karjong kereng achethe mesenpo, lapen – ajat asat le nang pho sita, ajat ason le nang chetong sita, ajat aok akeso ason le nang phonang sita, nang korte muti atum an le nang koi’et lapen hem along sonsuri akisung le pho sita – Arnam alam kechoji lapen kijunji aphan nang ning hangji, Arnam ardom thekji, lapen mondoli along rengdun peme thekji, lapen ajok nang ahok atovar along si karjaplo pu angthek dopo. Ajahak amonit atum ke ingdukvok lapen kachechak un ajakong ave. Kisung ason bihek le chetong sitame, latum chiru si ajakong avedetji. Ahok aphi kihungdun ke kachechak un ajakong lapen kemangthip dovek nangji. Nang jongsi non ahut Arnam aning kehang kopima paplengpi thekthedet te, nang methang aphan chehijim si, non ephrang adihu kichundetji le nang ning arlo mathathip non. Jongsi, non adihu, Arnam anghor aphan nang mathathip kali pulote, non ephrang lason thakthak akisung kepho ahut, ok aphan kachesongdutji si nang mathathip nangji, lapen Arnam aning kehang kepaplengji si matha nangji. Lason klemdet ansi kero meme atheng nang man unji. Ajahak amonit atum ke amena aning kamatha lapen abidi sore choklim ma kali ma, la anta chechinine, lahei amonit atum ke kilu atumlo! Nang jongsi nang ning aphan chekhangji lapen nang ok aphan chesongji pulote, nang keklemji asai choklo ma chokche ma aphrangsi nang chechini peme nangji; ansi nang ning aphan chekhang unji. Nang jongsi nang keklemji asai kopima chechinine pulote, nang ning aphan chekhangthip si nang methang aok aphan chesongdut thekji puhe? Nang chesong ra jonghe pu sita, choklim pen nang klemthekthedetji. Nang kemangdam kechokche aphan chesongthek nangji; lapen la keklem ke ok aphan kachesongthek henlo. Nang kemangdam ason, nang ning kamatha lapen nang bidi sore anta chokche pu nang chechinidet lote, nang keklembom asai kopima chelar serak si kechoklim atovar anat dam nangji. Nang kechokche apot chepakeng dettha, lapen laso ahin kilut longji le charlitha, kopima nang kemangdam son choklim ma kalima ke nang si chechinichot. Nang kemang ason kechokche apot chepakengdet pen Arnam apharman si la manlo pulote, nang ning kacheber un amo ke kepleng asonlo.
Non amat nang keklem nangji akenangsotnei ke Arnam lapen Alangli sai aphuthak kachinidun henlo. Laso aphuthak Karjong Kangthir koson si monit akhei angbong sai kekem ma lata nang chinidunvek nangji; lahei ke kechoklim atovar anat kilutji aphan kenangsotnei asailo. Kenangsotnei ason jongsi nang nepdun theklo pulote nangphan joi muchotpo. Nang ke Arnam aphan kekroi abanglo, lapen kachini abanglo, laso ateng pulote nang ke Arnam aphan kekroi peme abanglo pu cheklangdaklo. Nang jongsi keklem pen chinibomlo, bonta ha kijut ke Arnam aphan chininedet pulote, nang ke Arnam aphan kedeng kangtungte abanglo. Jisu Khrist aphan ke kroilo bonta non akai along Arnam monit ason kacheparjan aphuthak kekroikre atum aphan ke pinrem tanglo. Lahei amonit atum ke non malom aPharisee atum asonlo, pima latum ta kai kimi a’Arnam aphan kedengde atumlo; lapen latum Arnam abe thurlo. Jonghe le kekroi pen latum Jisu aphan ardom sita, thangnat ta ale avedetji; Arnam latum keklem pen apot rore detji. Arnam aphan si kekroilo pu tarpangthek along tok pen chepaklang sita, aning arlo Arnam agian kapaklong longle atum ke, kachobei atumlo.
Arnam nang phuthak kepachoklimji si kiri abang ke, Alangli kepachoklim asai kosonsi keklem ma, lapen kechoklim keplangji aphan kopi klem nangji ma, lahei anta chini peme nangji. Matne abang jongsi lahei alam pen apot chini pemelo lepute, kacharli’iji aphan tovar chiri nangpo. Komatne abang jongsi chepachoklimji pulote, apun-achak chok nangji. Keongdung amonit atum ke apun-achak kechoklim kali, laso pen ajok anam tu nangkokji lapen keklem chepaduk nangkokpo. Nanglong koan si apun achak kechokche ma, la ansi nang natthu pen chepaduk nangpo. Arnam alam koan si nang kachini ajakong kedoma lapen koan si sai keklem kacharli’i ma, la an si kechoklimji aphan kengkam kachejor keprapji. Arnam kardom pen, Arnam kardom avaikang along nangphan nangpachoklimpo, lapen Arnam alam kecho kijun, arlo alam kenepdun, lapen laso ateng pen kedo kethak pen ajok ta apun choklim plang un. Jopadap Arnam alam kachini un ajakong kelong pen, nang methang along kopi ason si kechokche keplengple an chechini nangpo; lapen laso aphuthak, nanglong kedo kapherememe akechokche lapen kaprek akahingno ason chechini nangji, lapen Arnam aphan choningri pen choardom nangji. Lason klemlo pulo tangte, pejo pen nangphan nang pachoklimji. Kechoklimji atovar ke: Arnam kardom; Arnam alam kecho kijun; Arnam alam angkur kachini peme; Arnam alam kachinithu muchotji aphan tovar kelong; nang methang along kechokche kelele ason kachechini; Arnam asai aphan kachehodai; Arnam anghor pen apot kamatha’e lapen Arnam aphan kachinghon pen ajok nang ok aphan kachihijim; lapen ansose kachiniji aphan nang korte ingjir atum pen kachingrum raprap henlo. Rat pen kereng achethe kalite nang mena jongjung kereng achethe pu sita, keongdung armu akachingrum kalite armu jumhek pu sita, lahei pen ajok ansose chinipo lapen ansose seke longpo, lapen ajok nang ning ta dojoipo lapen Arnam anat chetevarpo. Lahei ke kechoklimji aphan asai angdeng lapen aron-atanglo. Athak ketoktang ason si, Arnam alam kachini puke, laso alam aphan kachomat peme lapen laso ateng pen nang mena kerengji aphan apor nangkipi henlo, laso pen ajok Arnam aphan ansose kekroi thirpo lapen chinghonpo. Laso ateng pulote, pejo pen nang kachobei ativi, sobar a’ot-adur pen chepajokpo, amo kevangve aning kachethe ason pen chepahelopo; lapen apun-achak kechoklim amonit ason si rengpo. Arnam aphan kethedung akanghon nang ning arlo dolo – pudamlo pulote, Arnam nang phuthak nang kepachoklim anat si dambomlo – lapen la an si Sobar kachobei angkang pen jokbomlo. Nang keklemvoi asai pen ajok, pejo pen kechoklim anat si nang kengkam chejor ponpo. Lasi, nang jongsi kechoklim abang man ingtung pulote, Arnam aning kehang kopima kamatha’e lapen Alangli lam kachini nangji lake akenangsot binonglo.
