Ingkung 29

Halaso arni pima kadokave ahormu tame kithurthu ahut, Ne monit angbong vanglo, lapen alang penpen si Ne ajo lapen anerlo pathonlo. Laso ahut anchot si monit ke Ne kepaledam aphuthak masapso mathadamlo lapen alang Ne pen kachingki-chethan kepadover pen ajok, alang ajahak kopima Nelong kedo lapen komatma theklonglo – laso pen ajok, alang Ne lam aphuthak ajahak longdamlo. Kadokave amonit atum angbong, Ne phu chingthur si langlo, lapen latum kadokave ta Nephan theklonglo. Tebonta pirthe along kivir kevang ahut, latum menmen si manghu-mangramlo, lapen Ne mohor ke alangtum aning arlo pen praidetlo; kivir kephalangno nangkele pen phere’itlo, latum Ne ningkeparung aphan ke ardi pipedetlo. Penang an aningkan Ne monit angbong si damlo, tebonta alang ke kaiketa chininedetlo, lapen Nephan chinine khangjanglo. Pini arni Ne alangphan laso alam Ne mena angho pen si thanlo, lapen kadokave amonit atum aphan Ne thengno kopine Nelong pen kelongji aphan pavanglo, bonta nonputa latum ke alangtum Ne pen chepahelo si dolang, lapen lasi latum ke Nephan chininelo. Ne kengbot somindar adangpi lapen pirthe kijut along anta kacheklohet ahut, lapen kadokave amonit atum Nelong vangpo lapen Ne ingno domkrupji lapen Nephan archopo. Laso arni henlo Ne anong kethe arni chemanpo, Ne kachevangthu arnilo, lapen ke Ne kachedamthuji arnilo. Nonke, Ne sai kadokave monit akhei angbong cheng tanglo, angton somindar adangpi Ne kisik-kedang akemang kepajutsi asai keklemji si chenam bar tanglo. Laso arni pen anpar anke, komatma madu tame cheroktok kalidet atum anke kangjinsosedet ado kipi angbong si klorupvekpo, lapen lake ajat apor ahut tame chemandet tahailo. Lake athema Ne ning matha thekthedet apot kalilo; bontame, lake Ne kisik-kedang akemang angdenglo; kadokave tame Ne akemangdam angdeng ateng pen si dunvek nangpo, lapen madu amonit tame lake larnolo. Ne sai Ne ahokpet kecheng ahut, kadokave amonit atum tame Ne kedam ason si nangdunpo, lason si pima somindar adang monit atum doan ta amethang aphan Ne pen akengkam si chepa’okpo, ladak ke somindar adangpi tame “ningkarongpik chehok” dopo, lapen monit ke Ne pen ajok aphrang chingthurpo. Laso kepho along, dragon ke’er thepo amat tame Ne pen ajok kekhang un’edet lapen kemanghuvong angdeng si menmen dokokpo, lapen lake Ne sai apharmanlo, lapen, ninghanghedet sitame, lake amena aninghang ateng pen abe dun un’elo, bonta thangnat klem thekthe si Ne kepangripon along chehodaidet anchotlo. Ne akemangdam kadokave along, dragon ke’er thepo ke Ne ningkedokde asonlo, Ne hoturlo, lapen ke Ne banlo; lason si, Ne ke Ne “akenangji doan” cheparjangjelo. Laso apot si, Ne ok nangchepharlo kepadusi asai angdeng ke hemtun along amat si pajutkoklo. Lason pen si, dragon ke’er thepo ke ansose si Ne pharman kiru-kethai thek pemepo, atheke laso pen ajok Ne chepahaidetpo lapen Ne akemangdam paplengpo. Ne sai keklem ahut, kadokave atekela doan ta Ne penpen kangvai peme aron along si nangdunlo lapen Ne akar’idam doan kepadusi angdeng along kepachunji si cheparailo, laso ajok monit atum pirthe athak tekela atum ason Ne ingno si chehodaipo lapen ke thangnat ta Ne birudhe kithurji ninghanghelo, lapen pima Nephan kachedandongji pu thangnat ta klemklelo. Lahei anke Ne sai somindar adangpi keklempon prekjam apharlo.

Ne monit angbong kevang alamjor lapen akenangsot athe ke kadokave amonit akhei aphan kepajokji pulo, kadokave monit akhei aphan Ne hemtun isi along kevanthuji aphan, sining pen pirthe kapachetongthuji aphan, lapen monit aphan sining lapen pirthe angbong “angthek” kepathanji aphanlo, athe lason henlo monit along kedolor asai keklempon nangji. Ne monit akhei kasorjonpon apor ahut, Ne kadokave ahormu aphan tame monit akhei apharman si selampitheilo, lapen aphithu, Ne monit akhei aphan pachodeng longji si peklo, Ne akenangji ateng penlo, Ne alangphan keplang-kephi pilo. Lasi, Ne pulo pima lake Ne kapinkhat pen ajok si pima kadokave monit akhei pini arni an nanglelo. Lapen lahenlo kadokave Ne akemangdam. Kadokave monit akhei angbong, lakha un’edet aphai amonit atum anke Ne kanghon pen kerai arum si dolo, lapen lakha un’edet aphai atum anke Ne kelangselet pen ado kipi arum si dolo. Monit atum kadokave Nephan ardomlo puvoiphit tame, nonpu ta latum anke alangtum non kephodom chelar un’elo; latum ephong le ningkethe chepangbodet lote, latum anke methang pen jat ta klem thekthelo lapen Nephan kekroikre ingtonkokpo, athe lahenlo kadokave pima monit kapachundam unji. Monit achethe alam nangle ahut lote, monit ke non si ahok achethe kelongjilang, alang ke nonputa kelangrem, ke’obup, lapen pirthe along keboidetpik kepho ason theklonglepinlang – lapen lasi, lake tangte kephalangno nangkelelo pu aphan kalilangma, ongdung amonit atum nonputa Plangmena Amung aphan chodengbomjilang, lapen nonpu tame “chethe” akachomat along si amethang aphan chethongrutlang. Tangte lake pirthe kephobom ahokpet kalilangma? Tangte lake kejok ase alam pima Ne monit aphan kaningje kalilangma? Kopi apot, monit akhei angbong, madu tame Nephan ahok akanghon abang avedet? Kopi apot si Nephan monit atum ado kipi lapen asat kepho angbong ahut chinghonchotlo, tebonta inutnat tame Ne keraikom arum along kedo ahut Nephan chinghonhedetlo? Ne ke Ne ado kipi penang an aphong monit akhei aphuthak van tanglo. Latum lang ke langlang, bonta anke latum varchor titilo, lapen latum laso apor ahut thangnat ta charlile lapen mathadamdelo, lapen lasi kadokave pima monit aphuthak kevang anke kangjinso avedet akangsailo. Lake Ne sai keklempon eson adichi anchotlang, bonta lake nonputa monit aphan kelar’iji lapen alang Nephan kepanghonji apharmanlo.

Khristo kepangri arat along si Ne chariponlo, lapen, anpartame, Ne ke angton somindar adangpi si chariponlo; Ne henlo Khristo kepangri arat aRecho lapen somindar adangpi aHemphu lo. Laso apor ahut pen anpar ke, Ne kadokave hala komatma kangvaitang kali atum an aphan pangrumpo lapen Ne sai Gentile aso atum angbong pangchengpo, lapen Ne kelangcharipon aron doan angton somindar adangpi pangdakpo, laso ajok Ne sai adunthu angdeng along pachun peme pen kapthupo. Ne sai Gentile aso atum angbong kapachethangji aphan ado kipi akerap enpo, atheke pudam lote, Ne ke kadokave hala komatma Gentile aso atum aphan an aron pasikchetpo. Chenam si, laso asai ke isinat apor ahut si Ne sai kangvaitang atum angbong keklem ahut klemponpinpo. Ne monit atum pirthe athak kecharipon lapen jakong kachepherang ahut, pima halaso arni henlo kadokave amonit atum aphan pirthe athak along chepahai’etpo, lapen anpartame, laso apor ahut henlo Ne kesangji – lapen laso aphi ansi Ne kadokave hala komatma chepahaitang atum aphan cheklangponpo. Ne kangthir kepangri arat aphan cheklanglo, lapen keterbung alongri along pen ke Methang chepatujoilo. Kadokave komatma chepahaitang lapen Ne thengno athikpet chemantang atum anke Ne arje alangtum mena amek pen theklongpo, lapen Ne se alangtum mena ano pen arjulongpo. Lahenlo hala komatma kijutsi arni ahut amahang kethek atum ahirjumelo, lahenlo Ne hin pen kepathikmektang ahirjumelo, lapen lake madu amonit ta kelarji un’elo. Pini arni, Ne sai lason ateng pen si klemlo atheke mohut arni asai ajoinelo. Kadokave Ne sai anke cherapplanglo, kadokave along antalo, kepha lapen kethakdun dolo: Ajat angdeng tame menmen kesangkok avepinlang, lapen ajat angdeng tame salajong si akaprek apharman keklemdet pu tame avepinlang. Lake tangte lason kalima? Tangte hako ahut asai ke pini arni asai atiri along’e kalima? Tangte hako ahut alamthe anke pini arni asai angthun kalima? Tangte hako ahut angdeng anke pini arni angdeng keplang kalilangma? Ne ahokpet lothui kangpu ahut lote, lake pima somindar adang amonit atum doan aphan ado kipi ahutlo, pirthe adang kadokave amonit atum aphan asat kepapho ahutlo, lapen lake Ne sai kijutji angkunglo; kadokave amonit atum katheang avepin pen si pirthe along dolo, lapen kadokave amonit atum alangtum avarmon kepasungdetji ang’ang angbong so dolo. Akaprek ahin pen lote, laso achethe ke pima monit ha kasorjon kecheng pen pini nonjong arni antame chomat longlepinlang, lapen inutnat tame akaitin along lason achethe ke “chehok” longlepinlang, lapen lasi Ne pulo pima Ne sai klem tanglo pima laso asai ke kedamtang ahut klemklepinlang. Lahenlo ahok keklem kepachunpon nangji, lapen lahenlo aklong’et alamjorlo. Athema Ne arni ke kadokave monit akhei aphan tebokhetlo, athema lake akaheloving le cheklangji kalilo bonta monit amek angden si dopo, komat si laso angthek aphan phererepin pen do’unji? Lapen komat si laso along ningkarongchen pen kedodedetji? Keterbung Babylon arongsopi ke kepadusi kijut nangle tanglo; monit ke akimitet apirthe puthot chetong tanglo, lapen sining lapen pirthe tame chelar’etlo lapen akimi si manlo.

Ne kadokave adet lapen kadokave amonit atum aphan kacheklang ahut, inghun kelok sining angsong patelangdirpo lapen Nephan telomvetpo. Lasi, lason thakthaklo, pirthe athak votek-voso doan tame kachehokjok pen Ne pharman lunpo lapen kanpo, pirthe athak atomon larplotpo, lapen lasi pirthe athak kadokave ahormu aphan parengthupo, anpar ke “aber anatthu pajo pen chisunselo”, bonta alar ke pharan thirklong avarmon angbong si rengpo. Ne inghun anglum kedo ahut, monit ke Ne arje lapen Ne mek aphan checharrim si theklonglo, lapen laso apor ahut alang masapso kaphereso nangdolo. Kedamtang ahut, alang ke Ne phuthak thansera along phurkimo ketokpon alam si arjulonglo, lapen laso ajok si alang ke Ne phuthak kekroi kapabenghoi lapen kahonthe ta pabenghoilo. Alang ke Ne konat si kedoma chininelo, mate kopuan akethe Ne arje ke chininelo – lake tala ajam kethe anban doma, mate kilirseng ajaipi apam kethe ason an doma? Inutnat tame lahei alam chininelo. Lake monit Ne arje inghun along pini arni ketheklong ahut anchot si pima monit ke mathalo atheke thansera along kethanthan Ne ke ahokpetlo, lapen lasi alang Nehin anatthu masapso muchot ninghang pen chekroidunlo. Bonta monit nonputa Nephan chininelang, lapen alang ke inghun along Nephan ephar ansi lang longchotlang. Laso aphi anke, Ne vengkong Ne chepalampo lapen monit aphan chepaklangpo. Monit ke manghuhakpo, lapen alang angho athak alang ari chardeppo, Ne rideng pen kepaphoset apot phere’itpo, lapen lasi alang ke masapso man-peng alang aningkedok along chipidunpo. Monit ke alang amek Ne asontin keklem along kelang thirthippo, ongdung phere’itpo pima alangphan ke Ne si paphosetpo atheke alang ardi chipidunde ahut lote – tebonta Nephan ke kekhang ave athema monit aphan si langbom, lapen Ne ke Ne rideng pen sai doan klembompo. Lake kadokave asai amo Ne keklem along anchot si pima monit ke Ne pharman ajahak kachedondun dolo, lapen lasi pajo pen Ne ingno vanglo atheke Ne pen chelangrappetji aphan. Ne le monit aphan Ne angton pen kachepaklang ahut, monit ke Ne arje theklongpo, lape laso ahut pen anpar ke Ne chepatutedetpo mate monit along Nemethang aphan chepapreirim dodelo. Somindar adangpi along, Ne kadokave amonit atum aphan rat angno cheklangpo, lapen kadokave hala komatma ok lapen vi kedo atum anke Ne sai amo theklongtheipo. Kadokave hala komatma karjong pen kedo atum anke chenam si Ne hemtun along ningkangsam pen dolongpo, lapen chenam-chenum si Ne penpen kelangmepik ahirjume long raprappo. Kadokave hala komatma Ne kelame atum anke chenam si ado kipi pen jokplotpo lapen karjong akeso lapen ok aduk kedo pen chenam si jokplotpo. Ne ke kadokave arat angno si cheklangpo lapen chariponpo lapen jakong chepherangpo, laso ajok kithitang arpum akrin anpar ke somindar adang ingdangdedetpo; alar ke, Ne kanemprujin angnim si angton pirthe athak chethanghupo, athema Ne arni ke tebokhet tanglo, monit ke thur tanglo, asontin pirthe athak tame chedovetvetlo, lapen pirthe kerengji arni anpar avedetlo, athe Ne nangle tanglo!

Jangmi 6, 1992