Pitor Akai Alam Aphuthak

Pitor ke monit akhei apharman Arnam aningkedok kachiki abanglo, kadokave ta kachinipet ningkachethedam meme abang. Kopi athe si inut kachini-kethek kavepin abang aphan Arnam kejongponlo lapen non aphi aove doan tame chehokjok pen kachorolo? Lake lasonsi ningje tamelo athe pima lake Arnam aphan kanghon alang kaningje alam pen chekak un’elo lapen Arnam aphan kanghonji si chisiklo. Athe pima Pitor aning Arnam aphan akanghon kachepaklanglo, lapen alang kai keklempontang amo chenam kopi-kosonlo, itum Kanghon-Kangjinso Akai an aphi chiruithu si halaso apor ahut aron-atang amokha chelangthuvoi nangkokpo lapen halaso akai aPitor aphan lang nangpo.

Pitor ke kachotikichot pen kereng edon Jihudi ahemtun along si amahang theklo. Alang pi-po atum chotiki-chophejo penlok si hem angton chelanalo, korte lapen ingjir bang phli do. Lake, chenam ta, lahenlo kenangsotnei atomo angdeng kali; ladak ke Pitor henlo akenangsotnei abang. Alang arta ningkan pho kepleng ahut, Pitor api-apo atum alangphan lo pacharli than pangchenglo. Halaso apor ahut, Jewish amonit atum ke thek-resetsat, lapen ke jasemetpet chotiki-chophejo, korkhana, lapen choki-chokam amo ahin theksersar do. Alangtum hamphang avarmon ajoine pen angthek, Pitor api-apo banghini tame ingtuiving toklang angdeng chepalongponlo. Rong atok pen puvoiphit sitame. Latum ke kethek peme lapen nonlom charlihemthepi along kethekpikpe aosomar atum pen chingbarkri do. Cheklangdaklo, lason kemesen ahamphang angbong Pitor amahang kethek longlok ke ahirjumelo. Reset lapen non kelongbom ason pen ale cho’enthek, alang akimi abidi kachepalong prapjinlo. Alang locharli pangchengdet aphi, angdeng heihui kacharli tame pajoike pen asontin ta alang palonglok titilo. Alang api-apo tame lason kethekser asopo kachelong ke aman thelonlo, lapen charlihem along alangphan ajat abidi pen tame kapadun bor’ilo, ningthelo pima alang amena aphan chepathekdunserpo lapen hamphang along kopine avoreng chepalongdunpo pulo. Lapuson chemathathepin pen, Pitor ke Arnam aphan si aninghangronglo, laso angthek ke, ningkan krephli ahut, alang akangtui charlihem along dunbom ahut, alang abarimnei Greek atum ajutang-jubat alam kacharlinang kaselet nangdo tanglo, jasemetpet kapahanchathap amonit atum lapen abarimnei Greek aphurkimo along kapinchongthap alam heihui. Laso pendet aphi anke, Pitor – alang kapariso anglokchit apor ahut kilut anvetlang – monit akai lapen adang kethepik apirthe aputhak ansose kachiniji aphan kiri bor’i pangchenglo. Alang keme-kaheno kepharthek akamatha apot abang alang api-apo atum kachepedukkrup alar kachituji alangphan pakroikredetlo, athema alang klardak pen theklongle pima monit atum kadokave tame chokche pu chinilor si mena aphan kechoklo pu saide kedo, latum ke kadokave tame ale kavepin akai si rengbomlo, alangtum tangka-maha lapen aman-peng aphan kachepeduk along alangtum mena akai chepavir’ilo. Alang kedobom ahamphang avarmon along thedung asai keklemji si alang aklong’et akamatha dolo. Koan ma monit atum kethek-kere kedo, lapuan si alangtum monit hejan angbong kachepho lapen akarnuk alam along kachingvuinok nangdopo, lapen laso apot si latum ansose pen cheraphethe dolo. Laheihui akepho angbong, Pitor ke alang apor kejoike aling kahumridam angkang chepathelo, dhorom asai keklem atum along si paonglo. Alang aning along, kachinidamdedet akamunthidam dolo pima dhorom si monit atum apirthe along kethan un’edet ason doan ta thanthekpo pulo, lapen lasi alang katebokhet synagogue [Jihudi atum kardom-kardi ahem] along kachingrum amei ahut pen dodunbomlo. Laso apot alang api-apo atum chinidunde, lapen aphrang ahut aPitor, kaike tame aot-adur kemesen lapen kethek-reset abang si, charlihem kidunji langselet tanglo. Alangli api-apo kethan-kepare ateng pen, bor‘i-bor’a akangtui angdeng an kacharli patanglo. Kethek-kere atalopi pen vekpon parai an kapkrak amat, alang arjidinglen achethe che’enlo; halaso pendet anke, madu ta pacharliledetlo mate anpar ke alangphan kekhangji avedetlo.

Charlihem patangdet pen aphi, alang kadokave prekjam alo heihui porhi pangchenglo, bonta ningkan kre throksi arta ahut, alang nonpu tame ajam kethedung apirthe aputhak kachinine dokpiklang. Charlihem pen angdeng un’edet aphi, alang amena kachelang aphan tiki-inghoilo lasonsi alang lo kaporhi aphan si ongdung apor chipilo lapen dhorom amei dunbomlo. Alangli api-apo atum, alangphan koan lone ningkethepik kedo, alangtum “chesongbang asopo,” apot Sining hemrengme aphan ahirjuno pilo, bonta alang kangthir’et aphan kangchir lapen kang’it akrong kedam lake khangdun un’edetlo. Pitor tame alang akeklem-kedam along kisung-keboi kachechaknang kijumhek kali, bonta alang ke kar’ipik aning pinak, lapen alang ke arve jangdet pen abap ason si thurlo. Aphrang ahut, alang “kopai” do si dhorom apirthe along ajahak aban amonit atum pen chetong longlo, lapen athema alang akar’i ke ingtangpik, latum pen alang kachelangdun aphi’ong batbomlo, alang apor kedoan pu atenglo kepajut ke latum along si chepadamdunlo. Ning ingsamjin akachehokpik ansi chepaklonglo, alang menmen chemathathulo pima, ongdung laheihui amonit atum ke alangtum angtur pen si kroichot, lapen latum ke alangtum aning alangtum akekroi along chipipe. Kopuson si Pitor le, inut athikpet lapen kangthirjir akarjong abang, menmen lason atomon kejap chekhang unji? Alangli chinilo pima alang kacherapdun amonit atum kedoan tame monit apindeng kachingthang amarat saidelo – latum doan ke monit arje kacheparjanchot amarat saidelo. Halaso apor ahut, Pitor ke kethek-kachinipik kalidetlang, lasi penang an amei ahuthut ke alang aning pen si latum aphan chongduklo. Bonta kosonsi laheihui ale aphanlokchot, keresakjak dhorom asai keklem atum laso ningaklong’et pen ariso amonit chepabihek akachoningri alam chenam si karjupo? Halaso apor ahut henlo lake pima monit akai along ahokpet kangtheidang Pitor chemathalo: Kai angdeng kechengsi ahut along, alang remdetlo… Ningkan isi aphi, alang synagogue along pen cheterekjuilo lapen salajong inutvet si kedodam pangchenglo.

Laso akisung pen ajok ningkan kre nerkep aPitor aphan ansose si pachinilo lapen pirthe alam pathekdun muchot pemandetlo. Alang kapariso ahut kethekthe-kachinine doan ta anpar ke avedet khangjanglo; angthikdut lapen kachepebihek ariso aphan alang kachechaknang akisung si kangjinso avepin pen binthiplo, lapen alang ok kiri abang akai si pangchenglo. Laso pendet aphi ke, monit atum alangphan amena atelong along birta keme kethan si theklonglo. Alang kereng ok kiri pen si alang pinchonglo, alang kedam aling tame alang birta pachetak ponlo, lapen kadokave alang kethan anta alang lam heihui aning ingsamdunlo, athe kopima alang kethan anke monit atum aning along si ari parodamklok titilo, lapen latum ke alang kachingkime apot kadokave ta kroidunlo. Alang kaiketa bang aphan kelang nangning pen nangji pusi monit atum aphan thanlo, sining lapen pirthe lapen kadokave ahormu Kachepahemphu aphan chehangver nangji, lapen alangtum keme-kaheno kamatha heihui kelangkrang lapen katherakmeme asai klem nangne, kadokave laheihui ason alangtum aning pen latum kanghon a’Arnam aphan si ningpangsamlo… Monit atum ke kaiketa alang kethan alam heihui karjudunlong pen ningrungdun pemelo; latum kadokave ta alang joine ningthelo lapen ke amekkri jangprup titi ahut pen dolo. Halaso apor ahut, alang phiphi kidun atum kadokave tame alangphan si thedung kroilo, kadokave ta keboidet lapen lason atum, kosonsi hamphang along halaso apor ahut kipilo, aphai masapsonatchot. Pitor aphan amat ta halaso apor ahut hamphang along dhorom amung pen aduk inghoilo. Kadokave laso angthek ke pima, ningkan hini an, alang elong pen along adim an cheterek nanglo lapen salajong inutvet akai si dolo. Laheihui ningkan hini keprekjekjek kachomatlong ahut, alang penang an aklong alam longlo lapen alang aphrang ahut kachininedet ahirmu aphuthak antame thedung kachinidam do’ilo, lason si alang ningkan krephli arta abang pen kacheprekdak chemanlo, hala pen nonke alang kachingbar avepin asonlo. Laheihui ningkan hini angbong kadokave prekjam amenit atum pen alang chetong longlo lapen hamphang along kadokave asontin ahok alam ta theklonglo, laso pen angthek ke alang pajo pen alang mena aphan dhorom apirthe along kadokave ason aron-atang pen chepahelo pangchenglo. Halaso ahut Karjong Kangthir asai keklem kachingthur pen ajok alangphan keongdung pen phoponlo; lason ahut si, penang aningkan pen Jisu ke sai klembomlo, lasi halaso apor ahut Pitor keklem asai doan tame Karjong Kangthir asai kachejadun dolo, Jisu aphan chetong longlelang puvoiphit tame. Laso angthek apot si, Pitor le birta kapachetakbom ahut, kedamtang aove akurusar atum kelongle ahormu anta alang ke longlo. Ahoklo, halaso apor ahut ke, alang masapsonat ansi Jisu aphan chinichotlang, bonta alang nonpu tame Alangphaan chepathengnono ke kachetongji avarsai longlepinlang. Alang aningkachethe lapen kelangji akar’i ke pima siningrengme abang Karjong Kangthir amahang nangtheklo.

Kangtingkuk arnisi arnikangsam ahut, Pitor abang alang telong pen ok ribom (halaso ahut kachethangklong Galilee atalo akung malom). Alanglong ok kiri akaibong alang rideng dolo, bonta alang phu along akaprek ahormu tame dopik. Arni kachilut pen ajok lang athak along tame vi keplengchen atalo ason si paklarchenlo. Laso atur kedojoi lapen kangsamjin tebonta kangdukjin Pitor amahang along si chedatlo; alang kamathadam parnukkrung ason si dolo. Halasonbom ahut, tomonso nangjaplo, lapen alang menmen si alang kai inutvet pu chemathaphitlo, laso pen tongsekot si alangphan keopthulu ason pachemathalo. Talo along alang tarthui atur pen apot turri-turbong si, lake klardaklo pima alang ok kiriji ninghanghepinlo. Alang kamunthidam along si ingbochoklo, alang menmen si alangphan anung pen pusi komatne kehang arjulonglo, “Simon Barjona Jihudi abang, nang kai along arni heihui ke inutvetlo. Nang Ne phiphi nangdunjima?” Thirikjoklo, Pitor jasemet si alang keotbom ok kiri akaibong paklophitlo, menmen amat klobup si talo aklong an inglimchoklo. Pitor tongsekot pen alang telong along inut karjaplun amonit aphan hinhin talo anat langlo. Alangphaan aber lapen angsong tame langlo: Laso amonit achu, Alang phang along kejangling ke, arni atur along ke’etse ason si do, Alang ke’ethe alir si chepindeng, ajon kidingpik ta kali, lapen Jihudi amonit atum ason si aphu pen akengchimun an chingthanglep. Atur kavebom ahut ke, laso amonit ke’ethe alir apindeng tame masapso aki’ik ason si theklonglo, lapen Alang arje tame masap kiturring ason si dolo. Penang apor ke, Jisu aphan Pitor chetonglonglo pulo, bonta chun un’elang. Halaso apor ahut ke, alang karjong aklong’et, alang aning pen Pitor kroilo pima laso amonit ke kangthir abangveklo pulo, lapen lasi alang mena aphan ok kiri atelong along aber domkruplo lapen ningjelo, “Sining arat along birta keme kethan kapachethang si kevang aHemphu abang pima Nang kalilang ma? Nang keklem-kedam alam ne arjulonglo, bonta ne Nangphan nangtheklonglepinlang. Ne Nang phiphi nangkidunji pulo, bonta Ne Nangphan nanglongledetlo.” Lason ahut anke, telong akut along an Jisu ke dam’etlo, hadak Alang ingnidamjoi si dolo: “Thurnon lapen Nedung le nang ingninon!” Alang pulo. “Ne ladak kevang ke komatmat ma Nephan ahokpet pen kanghon atum aphan si kiri. Sining arat abirta keme alam kapachethangji si jasemetpet Ne kevang, lapen Ne pen komatmat ma isinat aphu atum aphan Ne alongritin tame kiridamji si barji. Nang ninghang doma?” Pitor thakdunlo: “Ne ke komatma sining athak kedo aPo ketoi abang aphiphi dunpo. Karjong Kangthir pen komat aphan si kangvai ma ne ke choro nangvekpo. Ne ke sining athak kedo Po aphan chinghon apot, kosonsi Nangphan kekroiji ne ninghanghedetpo?” Pitor alamthe le dhorom akamathadam heihui pen plengset puvoiphit tame, Jisu ingnekhinglo lapen Alang ningkangsam pen angphun paklemlo. Halason apor ahut, Alanglong pen ajok po akanghon ason si Pitor aphan pachemathalo.

Pitor Jisu aphiphi penang an aningkan dunlo lapen kaprek amonit atum along kavepin ason Alanglong ongdung theklonglo. Alanglong aphiphi kidun aningkan litdet aphi, bang krehini arisangho angbong pen Pitor aphan tame Jisu ingvailo. (Ahoklo, laso apot ase kethe pen Jisu ningjeje, lapen kaprek atum doan tame angton pen chinidunde.) Kai along, asontin Jisu keklem aling si Pitor alang mena aphan chelakhalo. Kachethangnei ke, Jisu kethan alam anke alang aning along tokherlo. Alang ke chenam ta Jisu aphan chipidet lapen chingkimesenlo, lapen Alangphaan ajat tame kapasilurtur pen alang ningjeje. Laso pen angthek, alang ke Jisu nahokhok Alang kedam aling ahut angthikdut pen kachelangponrap ari si chemandetlo. Jisu akethan-kemum heihui Pitor langdunlo, Alang kemesen alamthe an, Alang kecho ason Alang ke’en kopima doan, Alang kachepindeng ape-ri, Alangli kedo-kethak kaboha adim, lapen koson si Alang kedamdam loma. Asontin along tame Jisu ason si alang pachingbardunlo. Alang aphrang ke mena kangthirjir kali, bonta aban ason doan ke chepadartheilo, Jisu alam lapen asai keklem atengthot si charlidunlo. Laso ahut si pima sining lapen pirthe lapen kedoan ahormu tame Jakongthepar arideng si do’et pu Pitor chemathalo lapen pima, laso ajoine pen si, alang ke methang aninghang kalipinlo. Jisu along kedoan asontin tame Pitor ta endun’etlo lapen angthek laso pen chepaklang’ilo. Jisu akai kachepaklang ke Alang kopima keklemtang doan along Alang mena kechoklim pu chipupe; Methang aphan kacheparoka alar ke, Alang kanghon pen si monit atum aphan paklanglo. Ongdung prekjam ahormu pen ajok kopima Jisu ke, lapen laso angthek, Pitor ke Alanglong kadokave ason pachingbardunpetlo. Jisu aphan kanghon meme akamathadam ke Pitor akeklem-kedam pen apot alangphan kebatbom si pilo, lapen alang lason si ningjelo, “somindar adangpi angkang Jakongthepar aphan ne ripiklo, lapen sining lapen pirthe lapen ke kadokave ahormu kemanghumeme ta ne ke theklonglo, lapen lasi ne ke Jakongthepar akanghon meme ason ta thedung chemathadam long’etlo. Tebonta, ne mena jongjung aning along choklim akanghon longdundelang, lapen ne mena jongjung amek pen Jakongthepar akanghon meme ason thekdun longlelang. Pini arni, Jakongthepar amek angden along, Alang akelana ateng pen si nephan nanglanglo, lapen ne kijutsi ke Arnam akanghon meme chematha longlo. Ne kijutsi ke longlo pima lake kadokave ahormu monit akhei Alangphaan kapanghonji aphan le Arnam kapinchongchot lapu kalidet; ne arnivang kereng akai along, Alangli kepangrom un’e akanghon meme ne longlo. Non kopima ketheklong pen koson si lake lapu anchotlo pu kipu unji?” Apor kedambom ateng, koan ma akanghon meme doan Pitor along ta dolo. Jisu aphan alang chepabihek si dodunlo, lapen ahoklo, alang kisung-keboi ajahak chechak nanglo. Prekjam adim along Jisu alangphan kethanji le kepon ahut, Pitor alang methang aphan chepabiheklo lapen Jisu kethan lam heihui arjudunlo. Jisu aphan aningkan dopiklo aphiphi kidun apot si alang mena ale aphan keklemdetji pu ave. Alangli ladak kevang athe ke thengparpan athak pran kachipiji aphan pima Alangli sai Alangli kapachunji aphan pu Jisu chethan tangdet pen aphi ke, ahut pen ke Pitor aning alang chepaduk’it dolo lapen ke joijoi pen kachiru tame dolo. Tebontame, pima “kopai kelangno” arni padusi ke nangleroklo. Jisu aphan nep pondet aphi, Pitor alang ok kiri atelong along inutvet si chirulo lapen laso apor penang an kardom pen ningjelo. Bonta alang ning along, alang chinilo pima lake Po Arnam aning kehanglo, lapen pima madu ta kelar unji aboi avelo. Alang ningkedono’it lapen amekkri kejangring amek kedo athe ke alang kanghon apot. Lake monit atum akeboidamlo, ahoklo. Lasi, Jisu aphan thengparpan athak sakpo pu alang chinidet aphi, alang Jisu aphan arjulo, “Nang nang’odet aphi, Nang puthot netum angbong chevangjilang ma lapen netum aphan nanglangjilangma? Netum Nangphan nangthekthu longbomjilangma?” Laheihui alamthe ke ardi kavepin lapen monit atum akamathadam si plengsetlo puvoiphit tame, Jisu chinilo Pitor akiduk-kisungpik alam, lasi Alang akanghon pen Alang Pitor akeboi langpemelo: “Pitor, Ne nangphan nang inghonlo. Nang chichiniloma? Nang kaningje alam thangnat athe ta ave puvoiphit tame, Po ke lamchak pitanglo pima Ne kithi pen kithurthu aphi lote, Ne monit atum along ni phlikep an dojilang. Nangtum kadokave along Ne Karjong ke kaike tame kangjinso nangpibomji pu nang kroikredetloma?” Pitor laso alam pen masap anke ning ingsamlo pu tame, alang non anta esonbak kavedet asonsi chemathabomlang, lapen lasi, kithi pen thurthudet aphi, kechengsi aphong alangphan si Jisu cheklangdaklo. Pitor aphan alang akamathdam along kedotthipver pen kekhangdunji aphan pulo, bontame, Alangphaan Pitor kithikpi ahan-an Jisu chochedetlo, lapen meksirip pen si chepavedetlo. Halaso apor ahut pen ke, Hemphu Jisu aphuthak Pitor padusi ke karnukkrung akachinidam dolo lapen ansose si Alangphaan inghon muchotlo. Alang kithi pen thurthudet aphi, Pitor along kaiketa Jisu cheklanglo. Pitor aphan ni phlikep litdet aphi tame Alang batai kethom anbak cheklangthulang lapen Alang sining angsong chedamthulo. Aphongtin kacheklang ta choklim la Karjong Kangthir asai keklem keplengji ahut anke lapen akimi asai kepangchengthuji si chisiklo.

Alang akai dingpi, Pitor ke kerengji aphan ok rilo bonta, lapen anpar tame, alang birta keme kethan si renglo. Alang aphithu aningkan an, alang kecheng lapen adunthu Pitor alo tokponlo, lasonthot si halaso apor ahut Philadelphia akardomhem aphan penang an akido toklo. Laso akai ahut amonit atum doan ke alangphan ongdung pen dengdun peme. Alang mena akethek pen monit atum aphan lam kethan aret alar, latum aphan kai along kenangjivek ason alang pajirponlo. Alangli damde aphrang alang Jisu kethan alam chetengnene, lapen alang kai dingpi latum pen ningrungponlo. Jisu aphiphi kidunbom ahut, alang kithi pen si Hemphu akanghon apreng chitupo pusi alang chepathiklo lapen kadokave ahormu along tame Alangli kethan ateng si aphiphi dunpo. Laso along Jisu chedondunlo, lasi Pitor arta ningkan phokep ra pho ahut an (Jisu damdet pen ningkan ingkoi anbak sose aphi), alang akemang kichunji aphan Jisu alangphan cheklang si rapdunlo. Laso pen ningkan throksi dambom si, alang mena aphan kachichiniji si Pitor alang kai apor chepadamlo. Arnisi ke, laso ningkan throksi kijut ahut anke, alang parlinphak si apran chipidetlo, laso pen alang kemepik akai ke akejut si chevanlo.