Ingkung 4

Nelong nangkeklem dun Ne monit atum an kedamtang alam chemathadam nangji: Nang Nephan kanghon kangthirthe pensi terbangloma? Nang Nephan ningkethe ingthir’et lapen ning do’an pen loma? Ne phuthak nang kachinidam ahokpet loma? Ko ansi Ne nangning arlo adim kacherai lo? Ne nangning nang paplenglim loma? Ko ansi Ne lam nangphan nang papleng longlo? Nephan kelu pu nanghok detri! Lahai alam Nephanke klardakchenam! Pini arni, Ne kejok alam palamsovoi lo asonsi, nang Nephan nangkanghon nangbat loma? Nang Nephan kekroi pen ingthir loma? Nang nephuthak kachini ajakong arnuk loma? Kedamtang apor nang Nephan nang kero nang karcho ajok pini arni nang kethek kachini along’e thir loma? Ne Karjong koan adimsi nang long kacherai lo? Nanglong Ne arje koan adimsi kedolo? Ne kepalamso alam nangtum ahemtun phan nangro loma? Nang katherak ason nahokta kepatu adim ave pu nangtum ahokpet pen matha loma? Nang Ne monit kacheplangji aphan apun achak chokche pu ahokpet pen kroi loma? Jongsi athak karju alam heihei nang mathathepin pulote, lake nangtum lang keter along ok kaparhibom asonthot lo, aphai kapabatji aphan anchotsi nang kedo, lapen Ne kangvaimek kepadoji apor ahut abangke, nangphan nangvarchor vekpo lapen adunthu aphan aklong kave aherang alongsi nangjokthotpo. Lahai henlo kacheremek aphan Ne lamthe lo, komatne laso aphuthak kamatha panglangpang atumke Ne kangsai pensi pachingthanglokji, lapen kebat apor ahut abangke, akesung si chetong nangpo. La’anta chokchelang ma? Nangphan kaprek alam pen pangbarthusi nangthan nanglang ma? Ne nangtum kekroiji aphan joike pen pangbarvek nanglang ma? Kasorjon arni pen pini an, keongdung amonit atum Ne lam heihei kroikre, lapen laso apotsi Ne kachiri ahut varponchor lapen ingvaivedet lo, latum abang arpum ta kevir lo lapen akarjong meherang alongsi varchorpo, lapen pini arni anta sungpik akangsai si irlo. Keongdung amonit atum Ne lam heihei atengsi damlo, seta latum Ne kapathe’ang lapen Nedak-netur aphan kakhinde atovar si damrong lo, Sobar avaikang along klodunsi hala Nephan kekhamkhe atum asonsi cheplanglo. (Pini cheklangdak pen nangkekhamkhe atum anke manghumeme asai heihei Ne keklem aphansi arju chot, bonta Ne lam ke arjuje.) Aphrang Ne kaningje alam heihei karju jongjongchot atumta do’o, doji, latumke kedamtang apor aban asonsi pinchinglo lapen latum pini arni birti pameme detlo. Lason amonit atum aphan Sobar bengchek anchot kalibonta, kai apar akai apap kedo abangsi cheplanglo lapen Ne hotursi latum manlo lapen latum Nephan cheklangdaksi nangkhamkhe lo. Lason amonit atum Nening kasedeng thektik pen Ne kangsaiji ajatonlo pangtheklokji, lapen pini anta latumke checharche bomlang, kangting ajo alongsi dobom lang (lason amonit atum phan kepuji ke, ingthan kecho, Nang kethitang abang arpum Sobar atumsi nang cheraipo: atheke halatum amek Nesi binthip lo, Ne pupo latum ke amek kave atum). Nangphan pangbar pen nangthan lote mesen po, anlote nang ladak pen charli thekpo:

Pol aphan kaparno dam ahut, nangtum alangli phurkimo alamsi matha damji, lapen alangli phuthak ejahak atomo ke abinong ateng kali lapen abajar saide. Alangli phan bihek ahut pensi apei apo atum than pare lo, lapen Nephan deng longlo, lapen angthek ke Nepen kapethiktang atengsi alanglong Ne kenangji apun achak dolo. Alang arta ningkan 19 ahut pensi monit akai alam aputhak prekjam alo charli pon longlo: laso ajok koson lo pu aphuthak Ne kepaklar damji akenang ave, pima alang apun choklim pen ajoklo, lapen Nedak-netur lapen kapeklangdak ajoine, karjong ason heihei penang kachini pame pen kethanthek anchot, bonta Ne ningkehang alamta cheparideng dam longlo. Ladak arlo lapen angtan kepangvui alam kangthan pon ave. Alang isi kechoklimle puke alang akethekpen ajok, alang ahut penke kero pharcho thekpik lapen kacheparoka pen lam ningjedet. Laso angthek asonsi, alang lam karjuje ajoine ejahak ke tekala kethe si alar arjaplo, Ne kechengsi aphan Ok arje kacheplang ahut alang Nephan un’an ke kepahijimji bor’i lo. Alangta ahut isi ke Nelam kachinine abang inut lo lapen Nephan aning arlo along dim avedet anpinlo. Lason amonit atum Nephan jasemet si nangchedan lo, seta Ne parem detlo, akejutke domkrup lo lapen amethang apap kachekobir anvetlo. Haladak penke, alang kangtang ahin Ne sai endet aphi – la kepudamke penang an apor Ne sai nang keklempi aphi – alangli puthot tovar barim along cheklo damthu lang, bonta Nelam nanghili haihe pusita, Ne kapereso alam lapen kapaklang ason aphanke dengdedet lo, lapen laso ajok alangli kedamtang ahut keklem do’an thangnat ale ave detlo; akaprek alamthe pen pudam lote alang kepuver nong kethe aphutup ke lam jongjong si cheplanglo, alang kamatha’tap pen kapaklang atheke pini arni anta Ne kangsaiji (akangsai adak) alamthe kepon alamdon asonlo.

Athak kepangbar alam pen thekdam longlo, komat ma Nephan kachedan abang aling (Ne ok aphanle kachedan chot lapu kali akenang muchot ke, Nelam lapen Nekarjong helo – la kepudam ke, Ne Arnam alam), Ne kangsai latum a’ok aphanta papho dampo. Ne karjong nangtum pen che’o bup lote nangphan ha kivir anatsi nangpon det khangjang po, seta nang Pirthe abang arpum ke aphu kahingno akeso ason cheplangpo; nang ahokpet aphan chepangbo detlo, lapen tongsekot si lake kethitang arpum ason plangdet po, lasi nang prapjin pen ne’ok aphan pavirdet non pusi Nephan nang choningripo. Ongdung atum la karjong kedolang atumke lahai aphuthak arsikjit ning arongsi chethek longpo, lapu an kepaklarji aphan Ne dam nangnelo. Kedamtang Ne monit ason sai keklembom ahut pensi, ongdung amuluk atum Nening kithi lapen ning kiding alam pun rintilo, lapen Ne kethek-kere lapen Ne ot’adur aphuthak majerso chini dam tanglo. Pini Ne ahok Arnam a’ot pen ningjesi asai klemlo, lasi non anta ejahak atum ke amek pen Ne ning kithi lapen Ne kangsai theklong dakpo; la aparta, Ne keklem chenam hini angdeng kangsai bom aningkan malom Ne monit atum ok pen mamatsi Ne keklemtang akam theklongji, lapen nangtum kado kaveta Ne kapeklangji aphanle chesik hurnon. Ne ok pen arje cheplangple ako pen seta nangtum ajakong kaveke Nechini, Ne ning kethe ke lahelo nangtum achethe, karjong lapen bang arpum aphan kopine kejui amar ason pinchong chedet nangji. Monthithepin pen nangtum Sobar aphan chehodai detri, la aparte nang kedo’an asonta nangkhi kebirti ason keklem memu, nang lahei amar pen nangkopai pu mathara kejui’i akam klemri. Nangtum Nelam athe chini pame loma? Ne kematha alam nangtum kachini ajakong do poma?

Nangtum Ne hirjume pirthe athakta kelongji ninghang ma, hirjume ke sining athak kedo atum pensi tebokchot puma? Nangtum Nelam kachininiji aphan kachebirti ninghang lapen Nelam aphan ning cheparongthek ma, lapen Ne kethek-kere ke nangtum akai dingpi aphan ador kedonei lapen choklim pu kedengji ninghang ma? Nangmethang aphan chemathathepin pen Nephan chepidet haiji ma? Nangtum ahokpet pen kithi anta, Nephi kedun aMeresak ason chepidet unji ma? Lapuson nangtum angbong lahai pen kehai pon bomji ajakong doma? Neliphan kedeng lapen Nelamchak kelongpon abangke ahirjume kelongpon thedung doji pu nang matha ma? Nang lahai alamthe pen chini pame loma? Jongsi Ne nangtum aphan asat enlote, nangtum Ne kangjinso angbong ahokpet chepidet haiji lapen labangso asat angbong, Nening kehang ason aphan keri lapen theklongji ma? Ne nangphan ningroklok alam kethanthek lapen ongdung arjumeme atomo kethanji ninghanghe, bonta Ne akar’i ke Nephan mesen ahakhi nang kachepidunji aphan, lapen laso pen ajok nang ahok akarsik akai along nangpon unpo. Nangphan jongklok pen nangpupepin seta nang kadokaveta nangdung nangrei kedo ason che’o unjima lapen Ne asai nangke’en thekji aphan nangchepi jima? Lason helo kalima ahokpet Nephan akenangji? Ahok Nelam aphan deng pame thek abang komatlo? Ne nangtum aphan than tanglo kali ma, nangtum kepi akelet pen ajoine nangphan ardi pajum longri, nang Ne acho alam aphanle mathathip pen klembom lote nang Nelam nang kachinine lapen akelet pen nang pangreipo lapen alamthe kachinithekthe anta, lapen Ne kachari aron karkan penta pangreipo. Ne ning ketheke lahelo nangtum Nelam pen ajok nangtum aphan Nening kehang ason dengthekpopu nangmethang ale aphan mathachot nangne lo lapen nangtum Ne thengno keklemji lamrai doanta Arnam aphanle doan asonta chehodai non. Ne hemtun arlo kedoan madutame alanglitum thek’an pen klem nangji; Nanglong kedo akemenei pensipirthe athak Ne sai kejut angkung anta keklemji aphan chepi nangji. Lahei ason ahokpet pennang abe kachepadoji ninghang loma?

Thangthang 23, 1992