Ingkung 103

Kangrengkrung asining ason ase cheklangji, somindar adangpi paklemhurpo. Puanpin si ase kethe pamanghuhakji pima monit atum laso apor ahut thangnat cheterek thekthedetji. Ajahak atum thipo, ajahak atum virpo lapen ajahak atum aphan ingsaipo. Lake chenam ta thekprongji, atheke lason thakthak inutnat tame theklonglepinlang. Arjudun pemenon: Sining kangder arki along ke kachiru ase tame dodun rappetlo, lapen laso arki ke kithitang atum kedo angthor pen si vanglo; lake meherang pen si vanglo. Laso kesodak arki ke hala Ne le kangsaitang kachedandong sopo atum saidelo. Hala komatma Ne kopu aling karjujedet atumlo lapen komatma Ne lamthe aphan asai ateng keklemkledet atum anke arsikjik pen ingsailo lapen Ne ningkithi ahirjuno longlo. Ne se ke kangsai lapen ningkithilo; Ne inutnat aphan ta ingdukjin pen langlelo lapen inutnat aphan ta kangjinso paklangklelo, athe Ne ke kangthirjir Arnam Methang amatlo, lapen Ne ke ningkithi cheparidenglo; Nelong me kecho akar dolo, kecham pangthir lapen kepavir dolo. Nelong, thangnat ta chepatutelo mate ningcheparunhup pen kalilo, bonta adular ke, asontin tame chingpudang, ingthirjir lapen pachingbarpetlo. Athema Ne kechengsi mahang kethek asopomar anke Ne inghoi along si dodun’et tanglo, kadokave adettin lapen kadokave amonit atum aphan charibomlo, halahei ahormu lapen amonit atum pima kememedet lapen kangthirthedet atum an nonke kangsaiji si kepangchenglo. Ne latum aphan inut pen inut arju patertokpo, thangnat ta pangbobelo lapen angton pen latum aphan paklangtheipo. Athe Ne akangsai ke plenglim si chepaklanglo lapen angton pen chingpudanglo, lapen Ne ajat tame thangnat anung chibijoijelo; Ne akar’idam ateng pen alamdon chetontedet atum aphan anke pima Ne asontin tame varchorpo, lapen kai apar kai karnuknei aherang along pavirdetpo. Haladak kaike aphan si me pachodet khangjangpo. Lahenlo Ne akangthirjir, lapen lahenlo Ne akechoklim peme. Madu tame lake lar un’elo, lapen kadokave tame Ne hukum aber si dovek nangpo.

Akeongpi amonit atum Ne lam kethan arju ingtungtelo, mathalo pima lahei alamthe anke lamthe champlang lapen pima ahok alam anke ahoklo. Latum anke mekvelo! Latum ke chininelo pima Ne henlo athikpetnei Arnam Amethang amatlo? Ne lamthe lapen ahok anke cheklangpon pachardun rappetlo. Tangte lake chenam ta lason kalilang puhe? Monit atum Ne lamthe aphan pumat si chinidamdelo, lapen hala komatma katheang kelongtang atum anchot si ahokpet chinidamji. Lake ahokpet alamlo. Monit atum Ne lamthe kelang longlo pupen lote, latum ke alangtum akere pen apot chepherepo lapen kemanghu pen apot kachepatuji adim chori pangtarpo. Lake ansose ai chekokpo Ne akangsai nangklo lote. Ne kadokave ahormu kasorjon ahut, Ne pirthe kepavir ahut, lapen Ne angton mahang kethekcheng sopomar atum aphan pinchong kepatang ahut – kadokave laheihui ahormu anke Ne ingho pen kebar alam ethevet pen pachuntheipo. Lake athema Ne lam amat si kachepahemphuponlo; la amat si kangsailo. Lake pudammelo pima laso abangphu pima Ne henlo kangsailo lapen jakongthe abanglo; lake kelar un’edet ahokpet alamlo. Lake Ne kelangcharipon aron angbong eson aphar pulo; lake bonta atheke Ne monit atum aphan kangsai ihin akronglo. Ne mek angden along, asontin tame – kadokave amonit atum, kadokave alam aphuthak, lapen kadokave ahormu antame – Ne rideng si dolo lapen Ne kangsai aberlo. Madu tame lapen thangnat ta ahir chepadojot lapen mena ningkehang ateng pen cheplangkroi longlelo, lapen kadokave tame Ne kaningje alam atengthot pen si paplengponvek nangpo. Monit atum akamathadam angbong pen, anuttin tame pima Ne komat abangphu alam loma puke kroilo. Ne Karjong ase chepado ahut lote, anuttin ta kahonthe dolo. Monit atum masapsonat tame Ne jakong kethepik do pu alam chininelo, lapen latum Ne birudhe thur si akoi pithuronglo. Ne non nangphan nangthanpo, madu sitame Ne lamthe aphan kahonthe, lapen madu tame Ne lamthe aphan kapinrem atum anke, lahei atum henlo komatma kivirdet nangji; latum anke kai apar kai adai kephover nangji asopomar atumlo. Laso along pen lake thekdam longlo pima inut-banghini atum ansi komatma mahang kethekcheng asopomar dochotlo, athema lason henlo Ne sai keklem. Ne aphrang tame kethan tanglo, Ne richimun partingtepin pen si asontin tame pachuntheipo; Ne lamthe akerap pen anchot. Lake, tangte, konatma Ne mahang kedo anlo. Ne lamthe along, inutnat tame kopima Ne kaningje atiri lapen alamjor longdam thekthelo. Monit atum lake longdamdelo, lapen latum ke Ne kejapon ahut aphiphi ansi dunthekchotlo lapen Ne akar’idam ateng pen Ne akangthirjir asonthot asontin tame keklem pachingbardun henlo, Ne hemtun aphan akangthirjir lapen ningkangsam kipi, kai apar kai kedoverji, lapen kai apar kai tame kithirthip lapen kachelarledet kedoverji aphanlo.

Ne kangsai ke anuttin along tame vanglo, Ne kelangcharipon aron anke anuttin aphan ta papholo, lapen Ne lamthe lapen Ne abangphu ke anuttin aphan ta chepaklanglo. Non henlo apor Ne Karjong kethedung asai keklemji aphan (laso apor ahut, hala komatma hirjume kelong lapen hala komatma kopai kelangno kephodun atum anke inut pen inut thakvetpo). Ne lamthe kepabar pen lote, Ne hala komatma hirjume kelong nangji, lason thathak si hala komatma kopai kelangno kepho nangji atum angbong thakvetpo. Lake kadokave keklar chithinglorlo, lapen Ne ke kadokave ta ephong kelang pen theklongtheilo. (Ne laso alam kaningjedam ke Ne monit atheng kelangdam ateng penlo; laso apot si, lahei alamthe anke Ne ha kecheng pen akemang kapathiktang lapen kangvaitang along ke patepekdundelo.) Ne inglong lapen langroi lapen kadokave ahormu angbong juilo, somindar adang kethe-kebi humrilo, alongtin adim tame langlo lapen cham pangthirlo, laso ajok hala keterkluilang adim an lapen hala beisa pen keplengset alongri anke kerengji aphan chingtonkokpo lapen Ne lamthe pen ajok pavirklung si ingtheidangpo. Nephan ke, asontin tame joikelo. Jongsi non henlo Ne kepathiktang ateng pen pirthe kepavirdetji pu aporlo pulote, Ne ethenat alam kaningje pen ajok si angton pachet’iji klem unlo. Tebontame, nonke laso apor kalilang. Kadokave ta chisikding dovek nangji Ne laso asai klemkle aphrangjong laso ajok Ne akemangdam ke siksaksedetji lapen Ne kisik-kedang along kitukkedetji aphan. Ne chini koson si mathadam peme pen keklem nangji: Nelong Ne gian dolo, lapen Nelong Ne mena kisik-kedangdam dolo. Monit atum isinat arichimun tame paklem nangnelo; Ne rideng pen kithithedetji aphan cherenon. Lake Ne kelangcharipon aron along papho’et tanglo. Laso along pen madu tame Ne kelangcharipon aron akarsikjik alam theklonglo, lason thakthak si lahei aron-atang koson si keklemji, atheke pasonni anatthu tame dolo. Ihin anatthu along, Ne kadokave komatma Ne akar’idam ateng aren kedodet lapen komatma Ne kelangcharipon aron kapatepek atum aphan anke pathilotpo; ahin akaprek anatthu abang ke, Ne ningkithit along Ne kadokave komatma Ne kelangcharpipon aron kepatepek atum aphan anke hirjuno pipo. Lahei pasonni aphar ke chekak un’elo, lapen ke akenangsot Ne kelangcharipon along aron-atanglo. Anuttin tame lahei sonni aron-atang ateng pen si langcharilo, ningkirunhup aot pen kalipinlo, koanma laso abangphu athikdut pu sitame langlelo. Lapu antame Ne akangthirjir, Ne ajakong kethe, lapen Ne ningkithi chepaklang dorkroilo, atheke kadokave pirthe ahormu doan ke pavirtheipo, kadokave pirthe ahormu doanlo, lapen kadokave ahormu pima Ne akar’idam ateng aren pen kalidet ason anlo. Ne lamthe along ke kemanghumeme pima kachepatujoi do, lapen Ne lamthe along ke, kachepatujoi alam kethantang antame dolo. Lasi, monit atum akamathadam ateng pen, lapen monit atum aphu along, Ne lamthe anke kaike tame chinidamdak un’elo, lapen Ne ning arlo ke kaike tame mathadamdak un’elo. Lake pima, Ne monit atum aphan alangtum kapahancha lapen akamatha along pen angtan vanvek nangpo. Lahenlo Ne kisik-kedang akemang along akenangsotnei ahormulo. Ne lason ateng pen si klem nangpo atheke Ne mahang kethekcheng asopomar atum aphan kelongji lapen Ne keklemji pu ningkehang ahormu kachepalongji aphan.

Pirthe kephalangnodakji ke arnisi pen si thedung chemanlo, lapen Ne hem along, kapherememe kephalangno ke ansose si ajakong nangthebomlo. Monit atum ahokpet nahok ta chepatu athai avelo, nahok tame amethang aphan chidipjoiji athai avelo. Athema laso akachelar ke non amat si chemanlo, monit atum chininelo konat si latum ke alangtum akaprek akengkam kachejorponji. Lason kachemanji ke Ne kangsai vandet pen aphi chenamlo. Ningchibinon! Lahei anke Ne sai angdeng saidelo, lapen lason pen henlo atheke Ne sai keklem. Ne kadokave Ne mahang kethekcheng asopomar inut pen inut aphan chenomvetpo, lapen latum aphan apor along angdengtin ingthurpo; asai keklem atum aphan anke, Ne kadokave latum aphan anke pavirpo lapen che’odetpo. Lake Ne kisik-kedang akemang ihin apharlo. Kadokave asai keklemchot atum doan aphan cheklangdet pen aphi, Ne mahang kethekcheng asopomar atum anta cheklangdakpo. (Nephan ke, lake akejoipik asailo. Latum Ne lamthe arjulongdet aphi, kadokave hala asai keklemchot atum aphan anke pajo pen kangsai along patebokpo lapen Ne lamthe pen si ingsaipo, lapen Ne mahang kethekcheng asopomar atum anchot si dopo. Lake kopine akejoi pen kipidet kalilo, mate lake kopine pima monit atum kelar undetji ta kalilo; bontame, lake Ne Karjong si abangphutin along sai klemlo.) Lake kacheheloving kephodamji ason kalilo, lapen nangtum penang an angdeng anke laso Ne sai angdeng lapen Ne lamthe pen ajok chinidamvek nangji. Kopi apot si Ne lapuan kaningje, lason thakthak si Ne lam kaningje kachinidammek asema along anke, monit atum chinidamdak un’elo. Ne mahang kethekcheng asopomar atum along kachenomvet, kangjinso lapen kanghon ate’ot pen ningjelo (athema Ne kaiketa lahei amonit atum aphan patheangdanglo, lapen Ne latum aphan che’o’elo, athe latum aphan Ne kecheng pen pathikmek tanglo), lason si Ne mahang kethekcheng asopomar atum pen akaprek amonit atum aphan anke arsikjik akangsai, kether pen lapen kepaphere pen ajok, latum aphan kaiketa alangtum artho asai kepaklemvoi angdeng along si kaphere’it pen bikoklo. Ephong le labangso apor elong angdeng an ledam lote, latum anke laso angdeng pen jokpo (Ne laso apirthe kepavir ahut, lahei amonit atum anke karnuknei aherang arlo si dopo), tebonta latum anke Ne rideng akangsai pen chepajok un’elo mate laso apor kachetong pen jokjedetpo. Lake, tangte, alangtum aphan akangsailo; lake alangtum aphan ado kipilo. Pima halaso arni akaprek amonit atum nangkele ahut, Ne ke lahei amonit atum aphan inut pen inut pangdakpo. Lahei anke Ne sai keklempon angdenglo. Nangtum nonke Ne kedamtang lam kaningjepon halahei alamthe aphuthak akemangdam chiniloma? Ne kachini ateng ke, kopine keplengpledet antame pima kopine keplengdamtheilo, bonta kopine pima keplengdamtang ke chenam ta kopine keplengdamtanglo puvek kalilo. Lake athema Nelong kedo gian lapen Ne sai keklempon akrong an, atheke monit atum kethan pajirmidam un’elo. Ephong Ne le laso angdeng angthek longtanglo pulote (Nephan komatma kepatepek kadokave kahenodak atum doan aphan Ne kepaklangthei ahut), Ne ke akaprek angdeng chengponthupo, athe Ne akar’idam ke chekhangkhelo lapen inutnat tame Ne kisik-kedang akemang kekhamkhedunji haihelo, lapen ajat tame rambeng-ramphan nangbidun un’elo – lahei atum kedoan tame tovar pangtheivangvek nangji! Dragon ke’er thepo aosomar atum, Ne lam arjunon! Ne Zion pen si vanglo lapen pirthe along ok nangchepharlo atheke Ne mahang kethekcheng asopomar atum kelongji aphan, nangtum apo aphan kepatherakji (lahei alamthe anke dragon ke’er thepo along aso-asu atum doan aphan si jongdamlo), Ne mahang kethekcheng asopomar atum aphan kerapdunji, lapen Ne mahang kethekcheng asopomar atum aphan kephalangno apot kepachokthuji aphanlo. Laso apot si, puthot ahir chepalangnorinon; Ne mahang kethekcheng asopomar atum pen nangtum aphan pachephopo. Kedamtang ahut, Ne sopomar atum anke theraknanglo lapen aduk dopiklo, lapen Po ajakong Alangli sopomar atum aphan otthip tangdetlo apot, Ne sopomar atum doan Ne kanghon pen kachenom along chevangpo, anpar ke therakjokplotpo lapen aduk dodedetpo. Ne ke kangthirjirjedet kali; laso kacheklang ke Ne akangthirjirlo, lapen lake ahokpet ta “hala komatma Ne kanghon aphan kachinghon lapen hala komatma Ne kelangselet aphan ningkedokdelo.” Jongsi nang pulo Ne ke kangthirjir abang kali pulote, nangtum prapjin pen thur si damjui nangpo. Ne hemtun along katherakrepin pen lapen kedo pangtar chemanrinon. Nang ke nang methang ahem chedamjui nangpo prapjin pen laso ajok Ne nangphan kelangjokplotji aphanlo. Karnuknei aherang ke nangtum keledam nangji adimlo, lapen pima nangtum hadak si kesangdampo. Jongsi nang le Ne hem along dokok pulote, nangtum aphan ke adim avedetpo, athema nangtum anke anghor kedo amaratlo; nangphan ke Ne akerap enpon chotlo. Ne nangphan thangnat akenang avelo pu ahut lote, Ne nangtum aphan kivirdetji si nangphan me along phrindutpo. Lahenlo Ne kelangcharipon aronlo; Ne lason ateng pen si klemvek nangpo, lapen atheke Ne sai keklem adichi si cheklangponchotlo lapen Ne akangthirjir lapen Ne jakong kethe si cheklanglo. Anpar tame akenangsotnei, lason pen anchot si Ne mahang kethekcheng asopomar atum doan Ne jakong penpen chepahemphupon longji.