Sining Pirthe Adang’an aphan Arnam Alammthe – Ingkung 5

Ne Karjong ase lake Ne ot-adur do’an kachepaklang lo. Nangtum la chini dam loma? Laso angkung kachinine lake Nephan chenamsi nangkakhinde atenglo. Ladak kedo labangso kenangsot ason nangtum chenamsi theklonglo ma? Nangtum along Ne koansi kabor’i lapen kopu’an ajakongsi kachepedam, nangtum la chini binong loma? Ne ingno nangtum keklemtang asai lapen a’kedo kethak ahokpet pen chepaklanghai ma? Lapen nangtumke Ne rat aso lo pupen kecheng Ne arje lo pu’anta nangtum methang aphan chepuhai – nangtum katherak ave, masapta kematha avepin! Prapjinpen kalite derjon aphi seta lason amonit aphanke Ne hemtun pen sorphlotji! Ne pharman nang thirklong ahakhi karjapji pu kekroidam pen, kesar’ru a’sepahi ason Nelong vangnangne! Ladak kopine monit keklem’un ajakong doma? Nang ning kehang lapen kemang jongsi thangnat avepin aphita nang akaprek atovar kedamjisi chesik bomlang. Monit aning arlo kopu’ansi ke’otthip’un lone Ne chinine pusi nang kamatha ma? Non pen anpar ke, asontin along seta, nang asai kedo abinong ahin si lutdamvek nangji, kedamtang ahut nang keklemtang ason, thangnat athe ave ke’ongpi lam jongjong kaningje, nonke nangphan nahokta nang palele lo. Kedamtang ahut nangtum angbong ongdung atumke Nehem arum along akejoijepi si chejok dunlo; ahokpet ke pini an nang karjapthekbom ke Ne lam kethirklong parpik ajoine pen anchot. Ne kaningje jongjong lapen lake thangnat athe ave putong nang kematha ma? Lason kali! Ne akangtui adim pensi kadokave ason aphanta arum nanglanglo, lapen kangtuiving adim pensi asontin aphuthak kachari ajakong cheharjak lo. Lason thotsi, Ne methang mamat Pirthe kejok kelongji aphanta chepidet lo. Monit atum kacheterek aphongtin, kaningje lapen keklem doanta haladak maduta kachinine Ne kedo adim pen Ne nangkelangle apor amatsi ave. Monit atumke Nephan kepurdak alo ason: Ne anuttin lapen kadokave aphan nemek pen langbom lapen chini, baduta kachinine labangso adim ke Ne kedo adim lo lapen sining avaikang do’an ke Ne kebe apahong lo. Sobar ajakong heihei Nephan nangpho un’eh, atheke Ne henlo kangbakri ahir-asang, dhoromipet lapen kangsai abang. Chethan un’ehpin kemanghumeme ke Nelam alongsi do. Ne kaningjebom ahut, nangtum ke hala vo atum aphanle lang along kevarchok asonsi cheplanglo, nangtum manghu-mangram’et, kalite hala oso thi’i le thangnat chinine kapheretap ason, athe nangtum akarjong ke kamatha kethirthe angdeng alongsi klodam tanglo. Kopi athe si madu kachinine laso adim ke Ne kedo adim pu ne kaningje lo? Nang akarsik muchot Nelam athe chini loma? Monit akhei angbong komatlo Nephan kachini un? Komatlo monit angbong Nephan amethang api apo aphan kachechini ason kachini ajakong kedo? Ne kedo Adim sangbom pensi lang pangthek dunlo: Pirthe athak monit atum kacharting, “pirthe adangpi kedam” puthot cherui chelen, lahei ke alangtum akopai lapen a’mononphi aphan. Inut bakta Ne rat kikim ponji aphan ajakong kachepi abang ave, achethe kevangji aphan lapu anset ajakong kenangji ave. Ne monit pinchonglo, lapen ongdung apor kesung pen pajok dunlo: bonseta lahei amonit atum chehokthekthe saise. Inutnat ta latum angbong Ne kapejok ko’anlo pu lakha che-en’eh. Lapu an aningkan-lapu an apharo aningkan-ha pirthe kethip pen nonpu’an; Ne ongdung manghumeme lapen Ne bidi akeongpi apor pakklanglo, lapen anparta, monit atumke aphu kahingno keso asonsi chinithekthe lapen thiklak, lapen ahut penke nampi ajo kekrungchen ingnam api asonsi, Ne ning kehang ason aphan lapen Ne pen kachelangji aphan ardi pipepin si kedo. Monit atum aphan Ne ke’ongpi aphong kithi adai pitanglo lapen kithiji aphansi pinrem lo, bonta Ne kesik kedang akemang ke baduta nang lardun un’e. Lapen apotsi, monit atum kopisi aban ason-amung ke’otthip ma Ne ripak athak, paklangbom lang. Ne keklem asai angthun alongpen, Ne nangtum aphan hala, kaheno ahin kapatebokbom, ning kapaheno, keter lapen hijimmeme ahemtum kethedung along mahang kethektang pen puthot nang pejokdunlo.

Ne kemang akam ke chingtonte pinsi aphrang dambom lo. Hala Krist Recho arat akai patebokbom, lapen Neli recho arat along nangtum aphan Ne rat aso asonsi nang ponlo, Ne nangtum aphan kapinchongji aphan akaprek kenangji dolang, halake, Ne nangtum angno pensi hala kevangji akai Ne kachariji aron kepachethang pangcheng ponlo:

Nangtum aphan Ne rat aso pusi hok tanglo ke, nangtum Nemen aphan nongpethe un nangpo; halake asat angbong karjapthip un ahakhi lo. Jongsi komane abang Nephan kepachobeiji kabor’i lapen Ne long pen ahok alam dipthip, kalite ahokhe alam Nephi anat kachingki, lason atum aphanke, dengdedet si arplungphitpo lapen Ne pen kachingki aphan kachonghongji si Nehem pen papraidet po. Kedamtang apor Nephan kithirklongkle lapen ahok kave abang lapen pini anta arjap thusi Nephan kangsai ponbom – latum aphan sita Nehem pen arplung phitji. Ne rat atum an Ne inghor aphuthak kamatha chepaklangver, lasonthotsi Nelam heihei kachiniji aphan ri nangji. Lapuson arat aphansi Ne pachinidakji, lapen latum ke ahokpet Ne kethanpare lapen Ne kapachinidak angkang alongsi dovek po, mentune seta kapinrem chetong nangne lo. Ne inghor aphan kamatha chepaklangdam thekthe atumke, alangtum methang jongjung aphrang apharman kemangsi ardi kachepi – halake, Ne ning keplengji aphan asai heihei pen kemang dam ave, bonta keronji aphansi keri atum ke – lahei kachorek abang – marat asonsi Ne asai ke’enji aphan khinde vekpo, athe lahei atum amahang kethek ahut penta, Ne inghor heihei aphuthak kamathadam pu kopi aphansi kejong dam loma latum thangta chinine. Lahei atumke jongjung kachini un ajakong anta kave atum; lason atumke atarlok kaheno akeso chechakbom atumlo, lapen “kephin pangkrang” ji aphan hem dam nangpo, lason arat Nephan amo vangve. Ne rat angbong, Nephan akachini ke amethang keklemvek nangji akam kachechini ason kejut anta ketheklong abang, lake kecho, kachingthang, lapen mek kejang, lapen inut abang isi apor masapta katengnene ason thakthak, halalo tangte akejut ahut anke, Ne phan kachini ke kechobom asonthotpo – kopine abe kachinghoitang ari asonsi joike pen klem thekpo. Ne kaningjetang alam an, anuttin aning arlo pen kroipame si chematha pame nangji; haladak ajongjong klem pememe ke un’e lo. Badu tame ajongjong chotsi Nelam karju atumke Nephan kakhinde abang pusi hok detji; Ne lam kechoche lapen kachiniji aphan kirire abangke Ne phan karjuje abanglo, lason atum aphanke Nehem anghap pen angtan ahinthu arkokphitji. Athe lake, kedamtang ahut Ne kaningjetang asonsi, Ne phan ke’ongdung arat le kenang kali, bonta apun kechoklim nangji. Bang pharo arat angbong, jongsi inut vetsi Ne lam heihei pen ajok Ne phan nangchini unchot pulote, la inut aphan atur kepibomji lapen kapachinidakji aphan ardi kechepiji ajoine hala akaprek kadokave aphanke Ne ning rengmesen pensi varkoiji, Ladak si nang theklongpo lake aphai ke’ongdung pen anchotsi Nephan chini unchotji lapen Ne phuthak kamatha ateng si kechok’lo pu lale ahok lapu kali. Ne kenangji lake tipli (acho ingthimlim kalidet sitame), nonthe kali (ningdok meme’an acho ingthimlim pusitame). Kiriji aphan masapta ardi kachepipe, alarke kasevoitoi aot ason kedo atumke, alangtum jongjung alamdon pen che’o nangji; Ne latum aphan anparke theklong ingtungte tanglo, lason kalite latumke Ne men aphan patherak bom jilang. Ne monit along pen kopima Ne akenangji aphuthak, non aphanke Ne lahei kethanmek ingtonpo, ansose kapachedon thekji aphan Ne inghongji, apor kosonsi nangkachelar jima labangso alongsi charchungpo.

Kedamtang arni an, ke-ongdung arat atum kematha ke Ne henlo Methang thekreset a’Arnam, Ne henlo, chenam labangso a Arnam monit aning arlo karsik anta ketheklong’et abang pusi; setame lake kachingki jongjong alamchot. Jongsi monit atum ahok Nephan chini asonte, latum kejutkok anathu kechonji aphan keklemji mathathe lo, bonta la alarke Nelam pen latum Nephan kachini aphan bor’i bomji apotlo. Ne keklemtang asai heihei ketheklong binong angdeng an latum nangkele ahut ansi Ne phan thekreset lapen manghumeme pu kehangji a’ot do binongpo. Nangtum Ne phuthak akachinidam ke kopu’an akangdei. Akai dotik an, ongdung atumke ke’ongpi aningkan Ne kam klemtanglo lapen, Ne keklemtang akam anta theklongsi, chenam Ne phuthak chini pon longlo. Laso apotsi latum aning chepangdeisi Ne hin anat’thu pangno lo, Ne phan kachedanji aning kematha sita haihe detlo, athe Ne kengbot keri pen kepalongji kopu an akesung. Ne akepare jongsi latum along avete, latum akam ta klem dut haihe lo. La apotsi, keongdung aningkan kachinitang pen kerenglong aphi, latum pejo pejo pen Ne kethek-kere ajahak longponsi Ne phan thekreset, manghumeme lapen kangsai ajakong kedo abang pusi Ne hang lo, hala Ne lam ke hini angso kedo anokjir ason, hala Ne keklem akam ke thedung, thirikjokmeme lapen manghumeme, hala Ne ahir-asang chepindeng ahut, Ne bidi lake sining apar akangtui ta ledam, lapen kaprek kachini’un ajakong aphanta ingtuimulang. Pini, bonta nangtum Ne phuthak a’kachini ke halatum kesom along-e alongpen anchot lang, lasi nangtum ongdung atumke – vokek le bang angho pen kebar alam kaningje dun ason. Lake Ne anchot kachini nangtum atovar ke ko’an kangdei lapen kopu’an akejum nangtum “kacharli” la Ne alakha do, lasi Ne nangtum aphan ke’ongpi adai nangkepi nangji pen pajokpong lo. La’an aphita, nangtum ke’ongpi atum nonputa nang methang methang chechininelang, kalite nangtum keklemtang heihei ke Ne kar’i atengsi mangthip tanglo pusi matha damlo, laso ajoinesi kangsai pen katjui lo, kalite Ne ok arje plangdet aphike, monit keklembom akrong Ne chepangbo det khangjang lo pusi matha damlo, laso ajoinesi adai kepiji penta katjui lo; kalite Arnam aphan nang kekroi ke somindar angkang kethe alongke ave pusi matha damlo, laso apotsi nang Arnam aphan kachini ke pangdei piksi nang ning aklong pen nang methang keklem kepapleng nangvekji akam ason klemklesi apor kejoi kedo alingsi klem chotlo, Arnam aphan kekroi ke kelangmeme’me atovar ason apor paman nangji kalite kaselet pen apor padamjuiji. Jongsi Ne nangtum apun achak keplengple, athe kave lapen arsikjit kachinidam kave aphuthak kangjinso ave pu asonte, nangtum kadokave ta Ne adai ke’en along si virdunkoiji lapen ketheklongji aphanta avedetji. Bonsitame, Ne kam Pirthe athak keklem amo plengpletik ke, monit akhei aphan ning chepading bomjilang. Lahelo, nangtum kado-kave ta kachinivek nangji, akeme lapen kaheno aphuthak manghubom nangne lo.

Thangthang 25, 1992