Alangli Akangsai Lapen Ado Kipi Along Arnam Arje Kacheklang Ketheklong
Apharo pharo lapen asuri suri arat Jisu Kristo aphi kidun atum ason thakthak si, itum ta Baibel along ketok aron-atang ateng kroilo, Hemphu Jisu Kristo akangjinso longlo, lapen Hemphu Jisu Kristo amen pen chingrumlo, ardomlo, kero pi longlo, lapen ru-thai longlo – lapen lahei asai an ke itum aHemphu akanghon lapen nang kerai angbong si ili klem longlo. Keongdung apor itum aboi lapen jakong bopdet titi, bonta akeongdung apor ahut itum ajakong thepiklo. Ili keklem ason an ta itum aHemphu nang kethan ateng si ili klemlo pusi kroilo. Lasi, Sining athak kedo itum aPo aning kehang atovar anat si ili dambomlo pule pudet seta henone. Hemphu Jisu kachevangthuji aphan, Alangli man pen nang kisunji lapen Alangli rat nang kacheklangji aphan chingtunglo, pima lahei ke Kepaklang Alo along tok mek etlo: Hemphu nangle tanglo, Alangli kisung vanlo, Alangli keme atum aphan nong’e pilo lapen kahingno atum aphan ado pilo, lapen Alangliphan kekroi atum an aphan pon si Alangli kachevangthu ahut ha angsong Alangliphan chetongpo. Laso apot ili mathadam lote, ining dukde un’e lapen ning chingdukde un’e kopima ili ke kijut apor ahut si hache dunlo lapen Hemphu kachevangthu kethekdun abaha kelong apot. Itum kisung chechaklo tema, bonta “kilitpik lapen kijut un’epin anongnam” si ili longlo. Hirjume chenam! Lahai akachingtung lapen Hemphu nang kipi akangjinso pen ajok kaike ta mek phrangchen si kachingrumpetji aphan chepaduk bomlo. Moning tahai, mate penap tahai, kalite malomsovet apor angbong tahai, Hemphu pirthe nangsun si, Alangliphan ning kiding pen kachonghongding amonit atum angbong cheklanglo. Kadokave atum ta aphrang kat si chepalit seroilo, majok ta aphi do ingtungte, la Hemphu kacheklangcheng amonit asanchom angbong kedodun kangtung ajok, kachehok atum angbong kedodun kangtung. Itum doan ason, ador lakhakhepin pen chipilo laso arni kethek dunlongji aphan; ajahak atum ke asai che’olo, ajahak atum ke ahem-arit che’o tekanglo, ajahak atum ke chepachormolo, lapen ajahak atum ke alangtum kachobirti atangka an ta ningkeme pen kaprek aphan pi pajirlo. Sai keklem lapen kekroi apun kechok pame! Lason asotdut lapen kekroi kithir ke kedamtang akai ahut amonit kangthir atum aphan ta kilit thulo! Arnam ke Alangli aning kehang aling si kanghon kipi nangji atum aphan Alangli kanghon pilo lapen kangjinso nangji atum aphan Alangli ingjinsolo, lapen itum akekroi lapen kachepa’ik ason an, Alangli nangdeng pamelo pusi ili kroilo. Lasi, itum ining aso pen kachardom akardom Alangli ano nang chedenpo, lapen itum kekroi apot Hemphu anam nangpivekji pusi ning chepathethiplo. La anchot kali si, Arnam pirthe thipthe aphrang pen ta, Alangli ke itum aphan nang inghonlo lapen itum aphan hirjume nang kipitang lapen nang kechaktang ason anke badu ta nangthipon un’elo. Itum ke ephrang kevangji arni aphan si chisikdinglo, lapen laso angbong, kedo an akhi lapen khi-dat anta ning karong lapen Hemphu aphan sining angsong kachetongji aphan si lar’idetlo. Lapen anpar kopi si dolang, itum ke, ning pahinidak kalipin pen, ephrang anghoi along si kangniji aphan chisiklo, recho ason kalite rat-det lapen monit aphan pangriji aphan. Lahei ke kelongtang ajatonlo, lapen ning chethe meme asonlo.
Hemphu Jisu aphan kahijim atum aphan netum ta langseletlo; lapen alangtum akijut ke jutkok chadipo. Kalang, itum ta Hemphu Jisu ason thakthak pirthe athak amonit aphan kanghon-kangjinso ahut dolo, pima latum thangnat ta chinine, lapen latum aphan kadiya lapen latum akechokche apot kelangding ke keklem nangji asailo. Ajat ason le ili klem seta Baibel along ketok ateng si klemlo, kopima ajat ason ta Baibel along ketokte ason an keklem ke aron kangdi ason mandetlo. Anuttin aning arlo ta laso alam abang chematha’e saidelo. Itum aHemphu Baibel arlo dolo, lapen itum jongsi Baibel pen chepahelole pulote, Hemphu penta itum chepahelolelo; laso ketoktang ateng si ili otthiplo pulote, itum kejok longji. Itum ning chepathe seroilo, lapen charchak seroilo, lapen itum chingrum rappet ahut seta, ajat ason le ili klem lapen ningje seta Hemphu aning kehang ateng si klemlo lapen Hemphu itum keklem asai nangdengji pusi ningthelo. Itum kedo apirthe along hotur atum plengset setame, itum aning kaike ta arongchenlo. Hirjume joike pen kelong alam itum chematha damlo pulote, itum kache’o un’e ason dokok jima? Itum kachekakji kisungkrung ason doma? Lahai alam ke chipupepin pu seta, Arnam ajat ason ta nang chechar dun’et. Itum ke, chikip isivet amonit hi arbi along pen nang kirung atumlo, lapen Hemphu Jisu aphi kidun ke monit jungjungchot, ning arong ning kangsam kelongji aphan, lapen hirjume kelongji aphan ning kachethe atumlo, lapen detpi doan kachari longji aphan si ning chethelo. Itum kachobei lapen keklem kahingno ason anke Arnam amek angden si inglekoklo, lapen itum amek kethe lapen ok aning kehang ason anta Hemphu amek angden along ke kapinremtang asonlo. Bonta, lahai ason anta keman nangji ateng si manlo, lapen khamkhe jokphlotlo, lapen majok ta itum akachingtung ason choklim loma chokchema pu chemathathe detlo, itum kachirip ason choklim loma kalima lapen ahokma kalima pu kachematha ke aphi alamlo. Arnam aning kehang ason komat si chini unpo? Monit atum kedambom atovar ke kopi lapen koson loma, itum kihungdunji lapen kachiniji abidi ta ave; lapen karjutonji aphan anta ining hanghedetlo. Kopima, itum ke kijut un’e akachehok longji mene, hirjume longji mene, sining arat along itum aphan ta adim dojima, lapen chethe kereng alang lapen chethe kereng’i athengpi athe cho longji mene pusi chonghongding thekchotlo. Tangte lahei ason longji mene pu ajok si Hemphu aphan kroilo lapen Alangli sangho keplanglo kalima? Itum apap an diya tanglo, itum ining chiruilo, kehodak adrakha alang itum junlo, lapen itum aphang along thengparpan chebatlo. Itum kitu ason an Hemphu nang dengdelo pu komat si kaningjehai abang kedopo? Kenangji ajangthu itum chisiksedet pu komat si itum aphan nangpupo? Itum ke hala kiluvok animsopimar atum mate hala ke’obup amonit aso man ingtungtelo. La anchot kali si, itum ke Arnam ardomverlo, lapen ahokhe aKhristo kachekrong atum pen nang kapaheloji si kaike ta Hemphu aphan chohangverlo, kopima Baibel along toktanglo: “Halabangso arni jongsi komane abang nangtum aphan ‘Langtha, ladak si Khristo do!’ Kalite, ‘Alangli hadak si do!’ pu pulote la kroiri. Pima kechobai aKhristo atum lapen kechobei amontri atum thurji lapen halatum kangvaitang atum aphan ta unte kepamanghuji si angthek kethepik heihei, lapen kemanghumeme asai kethe heihei ta klemji” (Mathiu 24:23-24). Lahei Baibel along ketoktang alamthe an chini pamelo, lapen ning arlo chibi si puthek’etlo, lapen chethe ason ben, ador keso akhi ason si theklonglo, lapen lake itum jokji ma jokje ma lapen chehok longji ma longle ma pura isi kachechaktang alo ason si planglo …
Kopima ningkan suri suri angbong monit atum thibomlo, lapen alangtum akachingtung lapen kaheman amang anta chepon’etlo, bonta lahei atum sining arat ledamlo ma ledamde ma ke, majok ta ahok alam chinine. Kithi ave nang chiruilo, lapen hako ahut keplangtang atomo anta tengnebuplo, lapen phusar atum kethan alam lapen asai si latum non anta klembomlo. Lason si, ningkan dambomlo lapen arni dambomlo, bonta itum aHemphu Jisu, itum Arnam, itum keklem ason an ahokpet pen nangdeng loma badu ta chini un’e. Kopi si ephrang keplangji lapen emek angden kopi ason si kemanji ma chonghongkok pen anpar ke itum ajat ta klemthekthelo. Bonta Arnam ke la an arni ta dojoi bomlo, kaike ta itum angno nang cheklangklelo, lapen ethenat ta nang chingkikedetlo. Lasi, Baibel aphan kroisi lapen angthek ateng pen si, Arnam aning kehang lapen a’ot-adur kosonma itum langlo. Arnam ase kachibibe pen apot itum ebe dothukok anlo; Arnam ephan akenang kopima tengne si, laso alar itum keklem asai chokma chokchema pu kachelang ta ining kamatha ajakong aphan si ning chethe’ilo lapen emena agian, itum aning kamatha, itum a’ot-adur aphan kachiki ebe dokoklo; Arnam akangjinso angbong kedo ebe dokoklo; lapen keklem-kedam aling Arnam nang kerap, lapen kenangji ason anta Arnam aphan iri chodengham, lapen Arnam aphan ninghang aling kehang abe itum along dokoklo; lapen aron aphan ke’otthip, lapen Karjong Kangthir nang kejaji atovar kidunde; lapen anpar, emethang si emethang ahemphu kachepaman abe itum along dokoklo. Itum kekroi a’Arnam ke, itum mahang chethekphrong pen chetongtepinlang. Bonta, Alangli ot-adur kosonma, Alangli rideng kopi si kedoma, Alangli arje kosonma, mo Alangli vang lote itum Alangliphan chiniji ma pu heihui – lahei le kenangsot kali. Akenangsotnei ke Alangli itum aning arlo si dolo lapen Alangliphan si ili chonghong dinglo, lapen Alangli ke lason, Alangli ke lapu pu kamathalong anta choklo. Itum akekroi amo aphan choro memelo lapen chirimvet nangpo. Ason kaprek aphan ke barpi ason thakthak si theklonglo, lapen ekengpak pen dong si aber bikokpo. Kopima itum ke anong kethe aHemphu aphan kekroi atumlo, lapen tovar ajak koanma ding lapen sung seta, ajat akisung lapen kaphere meme ason ephuthak vang seta, ajat ta itum Hemphu aphi kidun akengkam nang pangtonrok un’elo. “Pherangke neliphan chethe alang alangroi nepaklanglo. Lake loji ason thakthak chethinglorlo lapen Arnam lapen Biresak aSo kangni anghoi pen ingbop si, rongsopi atovarpi angbong chitimchit lilo. Langroi parai harai ta chethe athengpi arong do. Lake chiklo ajontin ta eboiboi athe pathe si ningkan isi angbong batai krehini athe pathelo, lapen arvo ke adet kaprek kaprek atum areng amek kepame’iji aphanlo. Rongsopi angbong Arnam ahirjuno kepho amar isi nat ta avedetji. Arnam lapen Biresak aSo anghoi rongsopi angbong si dopo, lapen aban atum alangliphan ingduk-ardompo, Halatum alangli mahang theklongji lapen alangli men halatum atehang athak tokdetji. Hadak kaita ajo avedetji, lapen halatum melur lapen arni atur nangnedetji, pima Hemphu Arnam si halatum aphan turdangji; lapen kejut un’e akai apar akai anta halatum recho ason thakthak si rat pangriji” (Kapeklang 22:1-5). Aphongtin le itum laso alamthe alun lun seta, itum aning kaike ta ning arong lapen ning kangsam pen plengsetlo, lapen emek pen mekkri nanglilo. Arnam aphan kero pinangji itum aphan nang kangvai apot, lapen Hemphu itum aphan nangkangjinso apot chorovek nangji. Laso akai angbong itum aphuthak phant pharo sose nangpilo lapen kevangji apirthe along itum aphan kijut un’e achethe nangpilo. Itum aphan jongsi non amat thinon pu nangpulo pulote, ajat ta thakdundepin pen klemdetji. Oh Hemphu! Nangli vang serak non! Netum ajat ason ta Nangli pen ajok chehijim tanglo, lapen nangphan nangchingtungpiklo pu matha ra, elomsovet ta paderdepin pen vangnon.
Arnam ke ase chibibe, lapen komentune ta itum angbong nang cheklangkle, bonta Alangli sai keklem kaike ta ingtonte. Alangli pirthe langchari bomlo, lapen ajat ason aphan ta hukum pibomlo, lapen monit keklem lapen kaningje ason anta nanglang dunbomlo. Alangli sai keklem amo asontin ta Alangli kemang ateng si lakhabomlo, lapen ahir chepadosak pen kali si ingsamri pensi klembomlo, bonta Alangli kengkam aphrang dambomlo, isi pen isi, monit akhei along patebok bomlo, lapen Alangli kangsai anghoi pirthe athak sai keklem lake sining kabirlak ason ben praplo, lapen ajok Alangli recho anghoi menmen amat itum angbong nang suntuklo. La koan ahir-asang dolo ma, man kethepik lapen arsem tanpik pensi vanglo! Vothung ason, lapen hingho kangrong ason, Karjong itum angbong nangsunlo. Alangli ke gian, Alangli ke ahokpet lapen aman kethepik Abang, lapen Alangli vangjoi si itum angbong nangsunlo, jakong nang chepherang si kanghon lapen kangjinso pen plengsetlo. Badu ta Alangli kevang thekdunde, badu ta Alangli nang kele deng dunde, lapen anpar, Alangli kopi ason si keklempo ma badu ta chinidunde. Monit akai ke kedamtang arni ason si dambomlo, aning arlo thangnat akeprek avelo, lapen arni ta kai ason si dambomlo. Arnam itum angbong si renglo, monit asonthot si dolo, kekroi atum angbong pen ardi kavenai lapen kekroi jongjong abang ason si dolo. Alangli kihungdun ason dolo, Alangli kemanglor ason; lapen anpar, Alanglilong kekroithip ajakong dolo lapen laso akekroi ke monit along ave. Majok ta alang kekroithip ajakong checharche, lapen badu ta Alangli ok lapen monit aphan pangthek thekthe. Alangli pen itum reng rapraplo, ining rengmesen lapen phererepin pen, kopima itum amek angden ke Alangli ke inut kekroi ardi kave abang ason si emek pen checharlo. Itum keklem ason an Alangli nang langduncharlo, lapen itum ining kamatha lapen bidi sore anta Alangli ingno ke cheklangdaklo. Badu ta Alangli kereng pen ajok chini ingtungte detlo, badu ta Alangli keklem asai mathathedetlo, lapen, laso aphuthak, badu amonit ta Alangli aot-adur aphan matha parsik damdedetlo. Itum kihungdun ason kopima lasi itum ke klembomlo, lapen Alangli itum pen ajok ajat ason ta keklemji ave pu ason si dolo …
Karjong kangthir jongsi “Alangli penpete” pu alamthe pudet lote, lapen manghumeme lo seta, Arnam along pen si laso alam kevanglo pu itum matha si Arnam arideng pen ning arong pen chodeng dunji. Athe ke, lahei alam badu le pu seta, Karjong Kangthir pensi kevang alamlo pulote, itum chini nangji lapen deng momedet nangji. Puthot non ephong kevangji alamthe ke nelong pen ta klangthek, kali te nanglong lapen akaprek along pen ta klangthek. Badu amonit non seta, lahei ka Arnam akangjinsolo. Lasi, majok along penle vang seta, laso amonit aphan ke itum ingdukde, kopima, laso amonit ke Arnam lo pu kali, lapen lason monit jungjung aphan ke Arnam lo pu itum ta hokhe. Itum a’Arnam ke ajakong thepik lapen aman thepik; kosonsi lason apun kechokche abang le Alangli dim karjap thekpo? Lapen anpar kopi si dolang, itum ke komentu si Arnam itum aphan sining arat nang keponji aphan nang kangthumpo ma pusi itum ke chonghong dinglo, tangte, koson si thangnat ta kalidet abangphu lapen apun-achak kechokchepin abangphu le la an anghor kethe lapen kenangsot asai keklem thekpo? Hemphu jongsi chevangthu lote, inghun pensi Alangli vangji, lake monit doan aphan kepathek longji aphanlo. La koan anong the poma! Tangte, kosonsi Alangli monit jungjung atum along kachepatupo ma?
Bonta, la thangbakbe amonit helo, monit angbong kachepatu abang helo, itum aphan nang kepajokji aphan sai kimi keklem abanglo. Alangli thangnat ta itum aphan nang kethan pajirmi avelo, lapen Alangli kopi ajoine si kevang ma lata nangthanthe, bonta Alangli keklemji asai kopima lasi asontin ta pun pame, lakha pame si Alangli ning kehang ateng klemlo. Alangli lamthe lapen lam kaningje ason an ta lapusi inglum bomlo. Monit aphan ning kepathe, kachoningri, kapinpur, lapen kether, kangchek lapen ado kipi; lam kaningje ingsamjin ate’ot pen, ha lam kangtang lapen ardi kethe alamthe an – lahei anta monit aphan kangjinso kepajirlo lapen Alangliphan kaphereji si lahei asai klemlo. Ajat alam le Alangli ningje seta itum aning arlo kepatujoi alam an aphan anta rodamkloklo; Alangli lam itum aning aphan epaso’itlo, ekarjong aphan anta epaso’itlo, lapen itum aphan epatherak memelo lapen kachepatuji adim cholong thekthedetlo. Laso amonit aning arlo kaboche a’Arnam chenam si itum aphan nang inghon pame loma lapen Alangli keklemji asai kopilo pusi itum mathading bomlo. Lahei akisung damdet aphi itum chehok longji pu le ning chepathe nang ma? Itum aphu arlo ke, chelakha bomlo … itum kele damji adim lapen ephrang kopi plangji ma. Seta, aphrang ason thakthak, Arnam ok ason cheplang si itum angbong sai klembomlo pu badu ta kroi abang ave. Alangli itum angbong sai keklem ajir dingpik lo seta, lapen itum angbong nang kedodun ajir dingpiklo, lapen chepathenglongrap pen penang an lam nang chingkilo seta, Alangli ke monitchot pu kamatha ajok non anta Alangli ke non ephrang kevangji itum akai achethe a’Arnam lo pu badu ta kroi abang ave, lapen Laphan ke amo kevangve amonit pu tinsi itum achethe Alangliphan kachehodai detji aphan molo. Alangli pen ajok kijut un’e alang kereng itum jun longverlo, lapen Alangli pen ajok itum Arnam pen chelangphrong pen do-thak longlo. Bonta, itum ke sining angsong aHemphu Jisu akangjinso aphanchot si choro chotlo, bonta la monit ason kacheparjan ahok pen keplengset Abang kopi si kepho kachetong ma, aning alam arju ingtungtedetlo. Bonta, aphrang ason thakthak si, aning arlo alam chelang pame si, monit atum Alangliphan kedengde apot aning oi’edet asonthot do si, lapen monit atum akamatha thekthe lapen kachinine ason an diya pakejoidet si, lapen monit atum Alangliphan kelangselet ason an chechaklun si, ok along chepatujoi si Alangli chepabihek pen sai klembomlo.
Bonta ili chechininepin pen, la monit jongjong pen ajok Arnam asai keklem anatthu kengkam isi pen isi aphrang anat epon bomlo. Itum lakha un’epin asat pholo, ongdung ado nangkipi pholo lapen kithi pen si asat nanglang’ilo. Itum Arnam akeme lapen aman kethepik a’ot-adur charli longlo, Alangli kanghon, akangjinso chomat longlo, Arnam ajakong kethe lapen agian pen apot itum ning ingsampiklo, lapen Arnam akadoivet checharlo, lapen Arnam moit aphan kepajok kangtung itum thekdunlonglo. La monit jongjong alamthe ateng pulote, Arnam aot lapen aning arlo koson ma itum chini longlo, Arnam aning kehang ason chinilo, monit aot lapen aning angthin kosonma itum chinilo, lapen ajok kechoklim lapen kejokji atovar ketheklonglo. Alangli lam pen ajok itum “thinanglo”, laso ajok itum “mahang thekthumi” longlo; Alangli lam pen ajok itum ning ingsamjinlo, bonta itum aphan ning nang pache’oi si epreng kedo ason ben planglo; Alangli lam pen ajok itum ning karong lapen ning kangsam longlo, bonta kijut un’e akeso ason ben ta planglo. Ahut pen lote, itum ke biresak aso le Alangli ri pen nang kethatji asonlo; ahut pen ke, Alangli mek angden along anam kesonei amar ason ben planglo, lapen Alangli akanghon chomat longlo; ahut penke itum ke Alangli hutur asonlo, lapen Alangli aning thi lote theklo ason ben cheplanglo. Itum ke Alangli pen kepajok amonit akhei atumlo, lapen itum ke Alangli mek angden ke kangdukvok ingki avosok asonlo, lapen kangbotang abiresak asomar asonlo, ajo nerlo ta, Alangli itum aphan nangri verlo. Alangli itum aphuthak nang ingjinsolo, nang kelangselet ta dolo, Alangli itum aphan nang rung pangtuilo, ning nangpathe bomlo, nangja ponbomlo, nangthan pachini bomlo, ado nangpilo lapen nang ingchek bomlo, lapen ahut pente nang kangton-kangthi ta dolo. Ajo anarlo ta, Alangli kaike ta itum aphuthak nang kamatha jutjedetlo, lapen nang rai lapen nang lanalo, ajo nerlo, itum adung pen akahelo damdedetlo, bonta aning arlo pen avi chepabu si itum apharman adai nangtu pilo. La monit jongjong angho pen kebar alam an angbong, itum ta Arnam aphan ingthimlim pen Alangli ingno chehok longlo lapen Arnam itum aphan nang kisikpi adet checharlo. La an angbong seta, kacheparoka itum aning arlo nangpasiksak bomlo, lapen ajok non anta laso amonit aphan itum a’Arnam lo pu deng ingtungtelang. Itum aphan keongdung sining manna ahim nangpilo tema, lapen ning karong nangpilo, bonta lahei pen anta Alangliphan itum ining arlo adim pekpedetlo. Alangli akeprekdak angdeng along si dolo seta Alangliphan itum sai jokje pensi kedeng chotlo. Alangli angho chingpupetik ke lapen Alangli ke Arnam lo pu kipujisi itum aphan nangtoite pulote, itum ke komentune ta Alangliphan ke Arnam lo pu chekrongkre detji lapen laso apor nangle bomlo bonta Alangli ke itum angbong ajir dingklui aphrang pen sai klembomlo.
Arnam Alangli lamthe ningjebomlo, lapen kaprek atovar lapen abidi pen itum kopi si klem nangji ma nangthanbomlo, lapen laso angbong, Alangli ning arlo ta mathabomlo. Alangli lamthe ke chethe ajakong dolo, lapen koson si itum kengkam kachejor nangji ma nang paklanglo, lapen ahok pu kopi ason ka kachiniji ajakong nangpilo. Alangli lam pen ajok itum ta Alangli dung petbomlo, Alangli lam kaningje ate’ot lapen aron kelangdun pangchenglo, lapen la monit jongjong aning kamatha karsiknei kopi ason ma pu kachini kangtung ining hanglo. Itum apharman sai keklem ajok Alangli vibong avi angho along plengset anlo, itum ajoine amek janglonglepinlo lapen kangchir-kalang’it chechininedet an klemlo, itum apharman chirulo, aning chepa’oilo, lapen itum ajoine keso ar’em nanglo, itum keleji adim lapen itum kejokji ajoine Alangli katherak kangring phonanglo, lapen itum aning kangtang lapen lam karjuje pen ajok Alangli ning arlo pen mekkri lapen vi nang nanglo. Lason aning angthin kamatha amonit ke monit jongjong atum aning kali, lapen aning kaheno lapen kachobei amonit atum laso aning angthin long un’e, lapen Alangli akanghon aning ason ke kereng api an along ta ave. Alangli pen anpar ke badu ta itum aning kamatha ason chini’un abang ave, lapen itum aot-adur lapen ining kamatha ason an nang cheparidengthip’un abang ave, mate monit akhei atum lam karjuje lapen kachobei along kangsaiji a’ot ave, mate sining athak kedo a’Arnam amen pen itum pen nang kachingkiji lapen itum angbong sai keklemji abang ave. Alangli pen anpar ke badu along ta jakong, gian lapen Arnam adak-atur inghuhe; Arnam aot-adur lapen Arnam arideng kopi si kedoma lapen kedobom ma Alangli pen ajok ingthimlim pen vanlo. Alangli pen anpar badu ta katheang atovar anat nangja thek abang ave. Alangli pen anpar ke badu ta ha pirthe kithip ahut pen pini an Arnam kepaklangklepinlang akamanghumeme ason paklang un’e. Alangli pen anpar ke badu ta Sobar akekok kangnang lapen itum aning kamatha kahingno arideng pen nang pejok un’e. Alangli ke Arnam amen pen kevang Abanglo. Arnam aning arlo kamatha alam an, Arnam kaningje alam, lapen monit akhei aphan Arnam kangsai alamthe an Alangli thanlo. Alangli kai kimi pinchonglo, ove akimi, lapen sining kimi, pirthe kimi lapen sai kimi anat japonlo, lapen itum aphan ning kethe nangpilo, lapen kedamtang itum kamanghu pen kereng achethe nang pajut si itum akai akereng amat nanglangcharilo, lapen khelandak pen kejok atovar anat nangja ponlo. Itum kereng achethe nang larphun si itum aning anta Alangli rideng si dolo. Laso ahut pen amat, itum aning kamatha ajakong chechinilo, lapen itum akarjong chepamirak ason si planglo: laso amo kevangve monit jongjong abang, itum angbong si rengbomlo bonta komentune penta itum kekoitang abang – lake Hemphu Jisu kali langma, lapen itum aning arlo komat si kedolang, itum emang kaheman lapen mekbur keprang ahut, lapen itum ajo narlo ta kachingtung Abanglo kalima? Alangli helo! Alangli veklo! Alangli ke itum a’Arnam lo! Alangli ke ahok, tovar lapen chethelo! Alangli pen ajok itum reng thulonglo lapen itum aning arlo ame kedamthap pen ington tanglo. Arnam ahem anat itum chiruithulo, Alangli Recho Anghoi angno itum chirui tanglo, Alangli pen itum chepathengnoraplo, Alangli aning kiding itum theklonglo, lapen itum aphrang kedo atovar itum checharlo. Lason apor ahut, itum aning doan ke Alangli si cheparidenglo; lapen Alangli komat ma pu itum matha thapthelo, lapen Alangli lam kethan lapen sai keklem itum pasiksak dundelo, lapen Alangli ingno krepsi jotthorlo. Arnam nang kapeklang atovar anat si ekai isi kidunji aphan chisiklo, lapen anpar akaprek ke thangnat ta ar’i’e detlo, Alangli pen ajok nang kepachoklimji, lapen Alangli kangjinso alar kachituji si, lapen Alangli itum aphan nang kanghon ajok alar kachituji si, lapen Arnam nang kisikpi lapen Alangli ning kehang aling kekroiji si, lapen Alangli sai keklem ahin kacherapdunji si, lapen itum aphuthak nang kebat arpu an kepachoklimji si mathathiplo.
Arnam nang kacheparidenglong lake isi kecheteng kapathu kachebai asonlo.
Arnam alamthetin ta monit atum aok asek along si chetengkhengpo, lapen ajok itum tekokjok si kaphere pen plengsetlo. Itum aning kamatha, kemang ason, lapen itum aning arlo kachobei aot-adur an nanghek’aklo. Itum kaningje lapen keklem ason pen danglok, ha ining kamatha asontin anta, itum aot lapen ining arlo ason anta Alangli lam pen ajok cheklangdaklo, lapen ajok kaphere ok klemhur si katherak kachepatuji adim anta cholong thekthedetlo. Isi pen isi, itum keklem ason an nang thanjirlo, itum akemang ason, lapen itum aning arlo kachobei aot-adur doan lapen emena chechininepin ason ta, nanghek’aklo lapen kechokche pen plengsetlo, lapen anpar, Alangli nanghaidetlo. Alangliphan kachedan pen apot itum aphan nang ingsailo, Alangliphan kapinrem lapen kiputot apot ado nangpilo, lapen Alangli mek angden along ke itum ke Sobar kereng’et lapen kejok kelongji a’ot ave pu itum aphan nang pachemathadetlo. Itum aning kamatha anta ingjephunlo, lapen Alangli ingno ajat ason ta hang haihedetlo lapen ningthe haihedetlo, lapen itum kaheman amang anta ningve isi angbong virdetlo. Laso alam ke badu ta matha un’e lapen badu ta deng un’e puke tokdaklo. Malomso apor angbong, itum aning arlo kamatha thirthedetlo lapen ephrang atovar kedambomji aphan mate kekroibomji aphan thekthedetlo. Itum akekroi ke akecheng angdeng adim chiruithujui ason si mandetlo, lapen Hemphu Jisu aphan chetongtepinlang lapen chininepinlang aon si cheplangdetlo. Ajat ason ta emek angden along ke nang pamanghuhaklo lapen kamatha pahinidaklo. Ining’oiruilo, lapen ining ingsamsedetlo, lapen ha ining arlo ke kejon un’epin aning kithi lapen katherak kangring pen plengsetlo. Ning kachepathiji aphan bor’ilo, tovar chorilo, lapen, laso aphuthak, itum aphan nang kapejok Abang Jisu aphan kachonghongji si chisiklo, itum aning arlo alam Alangli ingno kachethan longji aphan. Ahut penke athak kachepaklang ke chok ponbom ason si cheplanglo, cheparoka’o ta kali, chepabihek ta kali, lapen itum aning arlo ke kopine keplengple ason dokok ason si chethek longlo lapen lason ke itum phophepinlang. Ahut pen te athak kachepaklang ke ingsamjin ason tahailo mene, bonta ining arlo ke talopi atomonpi ben ason si kejap ning nangpadonolo. Alangli akangsai lapen ado kipi pen ajok itum aning kethe lapen emang kaheman anta nang pangjephunlo, lapen itum aning kehang ke’ongdung ason nang pajutkok si Alangli henlo Kapejok Abanglo lapen Alangli ke itum aphan nang kepajok’un ajakong do pu kroi ingtungtedetlo. Alangli akangsai lapen ado kipi pen ajok Alangli lapen itum angbong adak kethepik ason dolo, lapen karnuk’ong ke badu ta kap’hai abang avedetlo. Alangli akangsai lapen ado kipi helo itum kisung kepho kachetongchenglo, lapen katherak kephonanglo. Alangli akangsai lapen ado kipi pen ajok Arnam aman lapen monit atum kechokche pen ajok Arnam aning kangsamse aphuthak Arnam aphan ning chingsamlo lapen, pangbardam lote itum ke ingthirthepin lapen ha alingtei along si kedo ason benbanlo. Alangli akangsai lapen ado kipi pen ajok itum koan cheparoka loma lapen emena aphan chemathalok loma pu chematha longlo, lapen lapen monit atum ke komentune ta Arnam pen chingbar un’elo. Alangli akangsai lapen ado kipi pen ajok lason akachobei aot-adur pen ke reng ingtungtelo, lapen lason aning kamatha lapen aot-adur pen kache’oji aphan chematha longlo, lapen Alangli mek angden kaheno lapen hijim meme ason cheplang ingtungtelo. Alangli akangsai lapen ado kipi pen ajok ning arong pen Alangli lam karjuji aphan nang pamathalo, lapen Alangli keklemtang lapen kisiktang ason pen ajok chedandelo. Alangli akangsai lapen ado kipi pen ajok non ephong rengthu ingtung si Alangli ke itum aphan nang kapejok abang lo pu ning arong pen deng ingtunglo…. Ilitum ron kachedan, me herang, lapen kangtingpik lapen karnuknei ajo pensi itum vanglo…. Jakong kethe Arnam itum aphan nang cheparideng longlo! Alangli Sobar aphan hailo lapen Alangli hutur atum aphuthak ron haidetlo!
Itum ke monit jungjungchot asong, lapen sobar aot-adur kachobei aning angthin pen plengset, hako akai pen ta Arnam nang kangvaitang, lapen hi arbi along pen Arnam nang kirung atum, lapen kidukparpik amonit atumlo. Dihu isi ke itum Arnam aphan pinremlo lapen dengmolo, bonta non ke Alangli si itum aphan nang cheparidenglo. Arnam arideng pen itum chethe longlo, lake kijut un’e achethe atovarlo. Pirthe athak itum nahokle do seta, ajat akiduk-kisung lapen asat le phonang seta, Jakong kethe a’Arnam nang kipi akejok pen ke itum chekak un’elo. Kopima, Alangli ke itum aphan nang kapinchong Abanglo, lapen itum aphan nang kapejokji abanglo!
Arnam akanghon lake langsun alang ason si lilo, lapen nangphan, lapen nephan, laphan akaprek atum aphan, lapen komat si ahok aphan kiri lapen Arnam kacheklang apor aphan kachonghongding atum an aphan pilo.
Chiklo le arni aphi kaike ta kihung dunver ason, Arnam asai ke kaike ta jut un’elo, lapen lake nang phuthak, ne phuthak, lapen Arnam kepaklang atovar anat kihungdun lapen Alangli kangsai lapen ado kipi kachechak atum aphuthak si klemlo.
There 23, 2010
