Arnam Aphan Kachini Henlo Arnam Aphan Kaphere Lapen Kaheno Kache’o Atovarlo

Nangtum anuttin tame akimi lang pangching nangpo koson si nang kai dingpi along nang Arnam aphan kekroidun loma, laso ajok nang theklongji meme, Arnam aphiphi kidunbom ahut along, nang ahokpet chinidamlo, ahokpet thekdam longlo, lapen Arnam aphan ahokpet chinidamlo, nang ahokpet kopuson akamatha pen si Arnam prekjam amonit ajat atum aphan kedolo pu chini-chininema, lapen nang ahokpet pima Arnam nang aphuthak asai kepachunbom alam lapen koson si nang asontin keklem along nangkipudun chini-chininemalo. Laso a’Arnam, komatma nangrep-nangrei kedo abang, nang kachingthur akrong nangjadunlo, nang kijut keledam nangji adim baklo, lapen nang akenangji an padorlo – kopuan si nang Arnam aphan kachinilo, kadokave thanthei lapen klemthei ahut an. Kopuan si nang chenam ta laso a’Arnam aphan kachinilo? Nang chinima kopi asai si nang phuthak arnivang tame Alangli kepachunlo? Nang chinima atheke kopuson aron-atang lapen akemang pen si Alangli asontin asai amo Alangli chiki’ilo? Nang chinima koson si nangphan Alangli japonlo? Nang chinima nangphan kopuson akrong pen si Alangli padorbomlo? Nang chinima kopuson adichi pen si nangphan Alangli chejaponlo? Nang chinima kopima Alangli nanglong pen kelongji akar’idam lapen kopi si nanglong Alangli kepalongji ninghang kedoma? Nang chinima atheke nang aot-adur keprekjam akrong aphuthak kopuson akamatha si Alangli cheparidenglo? Nang chinima nang ke Alangli kachinghon abang inutlo pu kalima kalanglo? Nang chinima Alangli ningkarong, ningkithi, ningkiduk, lapen kachehok, lahei ahin akamathadam lapen abidi heihui, lapen Alangli akedoivet nangkeplang adim? Nang chinima, kepadusi, kopuson ajat a’Arnam lo laso a’Arnam ke pima nang kekroidun? Tangte lahei lapen akaprek akarju alam anke kopine pima nang kachinidamdepinlang mate kamathathepinlang aphuthak asonma? Nang Ranma aphan kekroi kachepalongdunji pu along, nang tangte, abinong’et akachoro lapen Arnam alamthe kachomatlong pen ajok, Alangli phuthak nang avive kachinidamrong apot pavedetloma? Tangte nang, Arnam kepakeng lapen ado kipi longdundet pen aphi, kechok peme athikpet aot lapen kelamethek longloma? Tangte nang, Arnam ado kipi lapen akangsai angbong along, monit atum kachedandong lapen kapahi’i asema chinidam loma lapen Arnam akangthirpet aphuthak masap ardi dojot akachinidam longloma? Tangte nang, Arnam alamthe pen akejapon lapen kapatheang arum, chethe along akimi kapinchongthu amohor chengloma? Tangte nang, Arnam ahin pen asat kelang nangketoi angbong along, Alangli monit apharman adai kachechakpon lasonthot si kopima Alangli nangphan akenangji lapen koson si nangphan Alangli nangkepajokpon alam mathaloma? Jongsi nang le kopuson si Arnam aphan avive kachinidamrong, mate laso avive kachinidamkrang koson si kache’oji chichinine tangte, pima nang ke ahokpet Arnam pen akajalng along lutdundelang lapen Arnam aphan chininedetlang pusi labangso amonit ningjemelo, mate nang ke Alangli alam kachinidamji si ninghanghedetlo pu tame ningjedammelo. Jongsi nang le kopima Arnam nangkepakeng lapen ado kipi alam chinidunde pulote, nang ke chenam si kopima athikpet lapen kelanathek tame chininelo, mate akijumnei ta nang ke ahokpet kroidunde mate Arnam aphan lamemelo. Jongsi nang le Arnam ado kipi lapen akangsai chomat longlepinlang pulote, nang ke chenam ta kopisi Alangli akangthirpetnei tame chininelo, lapen nang ke lason si kopima monit akachedandong tame keklardakji jumpikpo. Jongsi nang le chethe along akechok arjan ahokpet longdundelang, mate akechok kai along akemang ave, bonta nonpu ta nang kai along mohut atovar aphan kamanghu chingvuinok lapen chongvai thekthelang, kapaphrangdunji aphan anta kaselet-ka’ainihak angdeng along si dolang pulote, lake ahok-ahaklo pima nang ke Arnam akatheang lapen akeparepon longdundelang; pima nangphan ke ahokpet Arnam alamthe pen kepador lapen kapangpen avepinlang pule ningjedet ta unlo. Jongsi nang le Arnam asat kelang phophepinlang pulote, lake pima nang chenam si kopima Arnam kachepaningding un’e monit akechokche adai ajoine pu chininelang, mate nang kopima Arnam kepadusi nangphan akenangji alam chinidundelang, lapen anpar akijum ke pima, kepadusi, Alangli sai pen monit aphan kisik-kedang lapen kepajok alam chininelang pu ningjeje jokjelo. Arnam along akekroidun penang an aningkan bangso abangphu dolo pu sitame, jongsi latum le Arnam alamthe along thangnat ta chomatlongle mate thekdamlonglelang pulote, latum anke pap pen kejokji atovar le kedambom kali pu theklorlo, alangtum Arnam along akekroidun ke akechok athepi ave pu theklorlo, alangtum Arnam aphan akachinidam tame phaive pu theklorlo, lapen lake pima latum along thangnat abidi ta ave atheke kopima Arnam aphan karcho aman kipiji pu ningjeje jokjelo.

Arnam chepahemphu akhi lapen abang arpum, Arnam akedoivet, Arnam akun – kadokave tame monit akhei aphan Alangli lamthe pen si pachini’etlo. Arnam alamthe alang kachomat ahut, monit ke laso asai ateng keklemji pu ke’enpon along Arnam kaningje alamthe akemangdam alam tame chinidamlo, lapen Arnam alamthe kangbop atiri lapen kecheng adim kachinidamji aphan, lapen Arnam alamthe kachinidam lapen kejongdamlor angthek aphan kachoroji pulo. Monit akhei aphan, lahei anke kadokave ta pima monit kachomatdam, che’otthip, lapen ahok lapen chethe kelongdunji aphan chepalongvek nangji ahormulo, Arnam akemang an cheparidengdun, alang akun along kachekirlaphun keman, lapen Arnam ajakongtheparpik lapen akisik-kedangpon along kachekroidunthek keman henlo. Lason apor ahutthot pima monit kachomatdam, keotthip, lapen lahei ahormu kelong an, alang pajo pen tame Arnam aphuthak kachinidam dopo, lapen laso apor along alang tame Alangli phuthak kachinidam aphant keprekjam longdampo. Laso kachinidam lapen kethek ke kopine monit kahemandam mate kabonda pen le kevang kalilo, bonta kopime alang kachorodun, kachomatlong, kamatha, lapen amethang along kachepathik ateng penlo. Lahei ahormu aphan kachorodun, kachomatdun, kamathadun, lapen kachepathikdun pen aphi anchot si monit Arnam aphan kachini athepi longlo; laso akethek pen anchot si pima monit ke laso apor ahut chokpetlo, abinonglo, lapen kenglep longlo, lapen laso asai – akechokpet akachinidam kelongdun lapen Arnam aphuthak kachini kachorodun, kachomatdun, kamathadun, lapen Alangli lamthe kachekroidun pen ajok – laso anpar ke thangnat ta Arnam lapen monit angbong ahok akajalang avelo. Lason ajat akajalang rappet angbong along, monit ke Arnam akemang an ahokpet chinidamlo lapen pangthektheklo, Arnam cheparideng akhi lapen abang arpum alam ahokpet longdamlo lapen chinidamlo, Arnam akedoivet tame ahokpet longdamlo lapen chinidamlo, Arnam akun doan ta pajo pen longdamlo lapen chinidunlo, laso aphuthak abinong’et ledamji adim lelo, lapen ahok-ahak Arnam si kadokave sorjontang ahormu an kapangripon pu choklim kapajirmipon alam longlo, lapen ardi doklong cheparidengpon lapen Arnam angthek lapen adim-aklong alam kachinidun longlo. Lason ajat akajalang rappet angbong along, monit ke chelarlo, angdeng pen angdeng, alang Arnam aphuthak kachinidam ke, Alangliphan kahemandam anpar ke tomonso pen angtanlo, mate Alangli phuthak alang mena kahonthe alam aphan jakong pilo, mate Alangliphan avive kachinidamkrong, mate Alangliphan kapinrem, mate Alangliphan si kangsaidam, mate Alangliphan si kahonthedam. Lasi, monit ke Arnam pen masapso kachihilisai dolo, alang ke Arnam pen masapso kachedansai ta dolo, lapen ke penang apor ahut atheke Arnam abirudhe tame monit thurham dopo. Laso adular, monit Arnam aphan akelamedam lapen athikpet aot ke the-dingthupo, lapen alang Arnam aphan karcho aman kipi ke ansose si ahok lapen ansose ingdangpik chemanpo. Lason akajalang angbong along, monit ke ahok aketoi ahukum lapen kai along kachingthurdunthek kelongdun anchot kali, bonta alang ke lasonthot si Arnam aphuthak ahok kachinidam ta longpo. Lason akajalang angbong along, monit ke alang akun along kachekirlaphun lapen pap akejok kelong anchot ta kali, bonta alang ke lasonthot si sorjontanga api pen ahok karcho aman kipi lapen kero-karchodam Arnam aphan birtipo. Lason ajat akajalang longlok pen, monit Arnam aphan akekroi anpar ke ketoktepinlang kot alo achet ason kalidetpo, mate ade-angtur pen kethan alam aseme kipichot kalilo, mate mekve akiridam lapen kumlin kapinchong ason kalidetpo; lason ajat akajalang pen anchot si monit akai ke arni pen arni kedambom along chingthurdunbompo, lapen ansi alang akun pajo-pajo pen kachekirlaphun manpo, lapen alang akekroi Arnam akar’idam along, angdeng pen angdeng, keklardakde lapen kichimek’et’e akekroi pen kechoklim athikpet aot lapen kelamedam si dopo, anke abinong’et karcho aman kipi, lapen monit ke, Arnam aphiphi kidunbom ahut along, pajo pen kithiklak alar keprangset angdeng si chingthurdunpo, kahenodak pen kemesen si manpo; lason ajat akajalang pen anchot si monit ke ahokpet Arnam aphan kachinidam lapen kepangthekdam adim ledampo, ahokpet Arnam aphuthak kachinidam along. Athema ongdung aphai amonit atum ke Arnam pen ahok akajalang along lutdun longlepinlang, alangtum Arnam aphan kachini ke kapinchong alamthepi angdeng along ansi sangkoklo, ahi pen ketok alam lapen kekroi kethan aron alam angdeng ansi chingtonkoklo. Lake pudamlo te, ongdung aphai amonit atum anke, koanma latum Arnam along akekroidun aningkan do’olo pu sitame, latum Arnam aphan kachinidun alam le langdamlo pulote nonputa latum kecheng konatma hadak adim si doverlang, abarim amung aphan aman kipi kecheng angdeng along ansi chingthangkreilang, alangtum abarim akekroidamthap lapen abarim akamathadam alir kavedet pen si cheraphetlang. Pima monit Arnam aphuthak kachinidam ha kecheng adim along ansi parjap nangji puke lake pima asai ateng pen keklemji kavedet alamlo. Arnam adim-aklong lapen angthek aphan monit kehokdam pen anpar tame, monit Arnam along akekroi ke nonputa keklardakdedet thang puthekthe angdeng along si dobomlang. Lason ajoine pen, koan si ahok karcho aman Arnam apharman kipiji monit cheotthip kedopo?

Arnam kedo along nang koanma thirthip pen kroidunlo pu sitame, lake nang Arnam aphan kachini, mate Arnam aphan nang karcho aman kipi pen larplot un’elo. Nang koanma Alangli hirjume lapen Alangli akangjinso chehok’ilonglo pu sitame, lake nang Arnam aphuthak kachini pen larplot un’elo. Koanma nang kadokave nang kahodai’etji ninghanglo lapen nang kadokave Alangli pharman si chipidetji ar’ilo pu sitame, lake nang Arnam aphan kachini pen larplot un’elo. Chenam si nang ke Arnam kaningjetang alamthe doan chiniduntheilo, mate nang ning pen si lahei chinidunlo lapen lahei ningje aret unlo, bonta lake nang Arnam aphan kachini pen larplot un’elo. Bontame Arnam aphiphi kidun koanma monit kekhansip pu tahai meme, jongsi alang le Arnam pen kemsen akajalang avedetlang mate Arnam alamthe kemesen pen chomatlonglelang pulote, alang Arnam aphuthak kachini anke thangnat ta kalidet kangtheidang asonpo, mate kijut un’edet narlo amang asonpo; athe kadokave pima nang Arnam pen kedambom ahut “apor chipidunlonglo” tahai meme, mate Alangliphan chepathengnono chetong longlo tame, nang Arnam aphuthak kachini ke nonputa phaivelang, lapen nang Arnam aphan karcho aman kipi ke kangtheidang athepi mate mepik pu kacheklang’i pen anpar thangta kalilo.

Penang an amonit atum arnivang tame Arnam alam porhiverlo, lason ta dolo kadokave abarim ardi doklong angdeng doan tame alangtum anam kesonei akhi-adat ason si arsikjik pen aning kachibi chethap’elo, lapen anpartame nahok sita Arnam alamthe pachetakdamlo, Arnam alamthe pen anut kaprek atum aphan kadorlo lapen cherapdunlo. Latum mathalo pima lason keklem ke Arnam ahakhi kecholo, Alangli lamthe apharman hakhi kecholo, pima lason keklem ke Arnam keja atovar si kidunlo; latum mathalo pima lason keklem ke Arnam alamthe pen si kerenglo, pima lason keklem ke Alangli lamthe an alangtum abinong’et akai along vanlo, pima lason keklem ke latum aphan Arnam akedengpon palongdunpo pulo, lapen kejok lapen ke kechoklim longpo pulo. Bonta, latum le Arnam alamthe pachetakdam pu tame, latum Arnam alamthe ateng pen asai ke klemkledetlo, mate kopima Arnam alamthe along kepaklangpon an amethang atum pen kapachekenglepji si van bor’ilo. Alar, latum ke Arnam alamthe akerap pen chongthui si anut kaprek atum anong kipi lapen kachiki chepalonglo, alangtum mena akisik-kedang along si lutlo, lapen Arnam anongthe jui’ithaplo lapen inghulo. Latum ningkethe ke ale kavelo, Arnam alam kapachetak avarsai kelong pen ajok paphangno ronglo atheke Arnam asai keklem lapen Alangli kedengpon kelongji aphanlo. Koan lone aningkan damtanglo, bonta lahei amonit atum Arnam alam kapachetakdam pen ajok Arnam akedengpon kelongji aphan un’edet anchot ta kali, lapen latum tovar kepangthek pima latum Arnam alam ahakhi kechobom ahut kidunvek nangji le ki’un’edet anchot ta kali, lapen latum ke Arnam alamthe pen anut kaprek atum aphan kerapji lapen kepadorji pu ahut amethang aphan si cherap’ilo lapen kachepador anchot kali, lapen latum ke Arnam aphuthak kachinidamdedet anchot ta kali, mate Arnam apharman karcho aman kipi tame amethang along mesen pen ingthur thekthelang, lahei kadokave keklembom ahut along; bonta lahei adurlar ke, alangtum Arnam aphuthak avive kachinidamrong si arnuk muchot planglo, alangtum Alangliphan ahokhe kachikidam si arnuk muchotlo, lapen alangtum Alangli phuthak kahemandam alam si ansose kapachanthulo. Arnam alamthe aphuthak alangtum kapinchong alam pen padorlo lapen chejapon si latum ke alangtum aninghang ateng angton pen klemlo, atheke alangtum akethek apot anagsepin pen keklem pu asonlo, atheke alangtum akai akemang latum longdam’etlo pu asonlo, lapen atheke latum akimi achethe hai’etlo lapen joktanglo pu atenglo, atheke, Arnam alamthe pen ajok alangtum ade kapaklerpon aling pajirmipon asonlo, latum ahok aphan kelongtang atenglo, Arnam akemangdam otdunthip asonlo, lapen Arnam aphan kachini atovar pangthek’et asonlo, atheke, Arnam alam pachetakbom ahut along, latum Arnam pen kaiketa chepathengnono longlo. Anparta, latum anke kaiketa kachiru aning chepaduk’it titi dolo, lapen, kaiketa Arnam alamthe along “Arnam” aphan si chejalo, latum ke chingtontepin pen Alangli arsikjik akelame lapen kemesen akamatha si cheotdunthip si cheklanglo, lapen lason ahut si monit aphan pap pen Arnam kapajok lapen Alangli kisik-kedang si otdunthip thakthaklo, Alangli akedoivet chinidun tanglo pulo, lapen Alangli kangthirpet akun chinidunlo pusonlo. Laso kecheng anujok pen langdam si, latum Arnam akedobom along ansose thirthip pen kekroidun asonlo, Alangli akangtui angdeng aphan ansose cheroktok pulo, lapen Alangli ahir-asang lapen kemanghumemepik aphan ansose si arnukkrung pen mathadun asonlo. Arnam alamthe athak kachinidamprui along lutsip pen, laso kacheklang ke pima alangtum akekroi chan’olo, alangtum kachechakji akisung antame kachepathik ingtangraklo, lapen alangtum Arnam aphuthak kachini tame arnukkrunglo pu tahailo. Latum masapso si chinidamchotlo pima latum ahokpet Arnam alamthe chomatlonglo te, kadokave alangtum Arnam aphuthak kachini lapen Alangli phuthak alangtum kemathadam doan ke alangtum mena akar’idam pen kaheman lapen kejongdam alam pen si vanglo. Alangtum akekroi ke Arnam ahin pen ajat asat kelang aber tame dothip un’elo, alangtum laso akarjong kangthir lapen aman angdeng tame Arnam asat kelang lapen karju patertok arum dothip un’elo, alangtum alamrai ke sangtimili ajo ahem kikimpon asonlo, lapen alangtum laso Arnam aphan kachinidam puke ahok kachitin amang kahemandam pen anpar thangta kalilo. Ahokpet ta, lahei amonit atum, komatma, lason ateng pen anke, Arnam alamthe along aboi chipipiklo, tame kopi si ahok akekroi, kopi si ahok athikpet puloma, kopi aphan si ahok kelana, mate kopi aphan si ahok Arnam aphuthak kachinidam loma puke chemathadamdepinlo. Latum ke kapinchong alam, kahemandam alam, kethek-kere, nong’e, aron-atang, kekroidunthap, lapen anparta monit akhei keme-kaheno kethakvetthek enponlo, lapen lahei pen “chepangcho’ilo” lapen “risim” pinchonng’ilo atheke Arnam aphan kekroi lapen Alangli phiphi kidun along, lahei aphan alangtum Arnam aphan kekroi lapen alangtum Alanglilong kidun kecheng anujok peman’ilo. Lason ahutthot si, latum ke laso kachepangcho lapen arisim amokha enponlo lapen lahei ke latum Arnam aphan kachini pen ajok mekbin ajaton paman’ilo, athe Arnam karju patertok, asat kelang, ado kipi, lapen kangsai anta kachetongji lapen kelang’iji aphan. Kpeadusi ahut, kopima latum kabirti ke nonputa Arnam aphuthak kepajutdam pima dhorom akamathadam ateng kilutsip, abarim kekroithap alam, lapen kadokave pima ahok alar mang along kedo, keterbung, lapen kachinidam un’edet pen anpar thangnat ta kalilo. Alangtum Arnam aphan kachini lapen kapajirmidam akrong ke pima hala monit atum komatma Siningrengme Angsong, mate Sining Lapen Sarbura aphan kekroichot ateng along si chesakhetlo, tebonta Arnam abinong’et, Alangli akedoivet, Alangli kun doan, Alangli cheparideng akhi lapen abang, lapen do’olang – kadokave tame abinong’et Arnam Amethang pen si jongdamlo – lahei ahormu anke pima alangtum akethek ke otdunthip peme un’edetlo, laso atheke alangtum akethek anke angton pen chekakdaklo, lapen anparta nitur lapen nirep kedo anbak akachehelo dokoklo. Lason pen si, lahei amonit atum Arnam alamthe ketoi ahukum lapen kelang-kelana arum si rengdunlo puvoiphit tame, latum anke tebonta Arnam aphan kaphere lapen kaheno kache’o atovar ahokpet pen kengkam chejor un’edetlo. Laso ahok athe lason keman ke pima latum Arnam pen chichini peme longlelang, latum ke Alangli pen choklim kachetong lapen jalang rappet longlelang, lapen lasi lake latum aphan Arnam pen lahinhin kachichini kachemesen angdeng an paledam sungkrunglo, mate amethang along choklim akekroi tame ingthur un’edetlo, Arnam aphiphi kidun mate kero-karcho antalo. Pima latum ke lasi Arnam alamthe dengvek nangpo, pima latum ke lasi Arnam aphan dengvek nangpo – laso akrong pen lapen akamathadam ke latum aphan alangtum keklem-kedam pen ari angse akivirdet si phopo, latum ke angton kai apar kai along Arnam aphan kaphere lapen kaheno an kache’oji atovar akengkam kachejorji kelongledet akivir si phopo. Latum atheke kemangdam doan, lapen atheke latum kedambom ahin an, pima latum anke Arnam ahotur si kai apar kai anta jongdamlo, lapen pima laso kai apar kai pen ajok latum ke pap akejok longdun thekthedetpo.

Jongsi, inut abangphu komatma Arnam aphiphi penang an aningkan pen dunlo lapen penang an aningkan pen Alangli lamthe ateng aketoi alam klem’ilo pu along, alangtum Arnam komatma pu kipudam ke komatne hala amethang aphan kumlin angno kardom tongdik abang pen si chingbarchitlo pulote, laso kejongdam ke pima bangso abangphu Arnam alamthe ahokpet longdamdedetlang. Lake athema latum ahokpet Arnam alamthe along lutdundelang, lapen laso athe si kachemanbom alam, ahokpet, kemangdam, lapen monit atum aphuthak akehang antame, atheke Arnam alamthe along kedopet sita, halaso abangphu pen thangnat ta cheraprelo. Lake pudam lote, koanma lason abangphu Arnam alamthe alamjor pen athak ke sai keklem chiting sitame, kadokave ta ale kavelo: Athema kopima latum kiribom anke lam champlanglo, kopima latum kelongji antame lam champlang chot si plangpo. Arnam kaningje alamthe ke ingdeiplang mate ingchoklonglo athak kacheklang ke pu sitame, lahei anke ahoklo athe monit pen chekak un’elo pima alang chethe along kilutdun lote; lahei anke monit akarjong lapen aok kerengdunji aphan kerengver alang kangboplo. Lahei ke kopima monit kerengdunji aphan akenangji an padorlo; alang arnivang achethe kemesen pen dambomji aphan kepathikpon aron lapen atanglo; tovarlo, kijut akemanglo, lapen laso akrong pen ajok atheke alang pap pen kejokji aphan dam nangpo; asontin ahok tame pima alang Arnam angno kasorjontang api ateng si do nangpo; lapen asontin ahok koson si monit Arnam alam karju lapen kero-karcho aphuthaklo. Lahei anke pima monit kerengbomji aphan ketengkhut pachikime alamlo, lahei anke monit arnivang kereng ahimlo, lapen lahei anke pima monit kangtangrakji lapen karjapthipji aphan thirthip archak chemanlo. Lahei anke ahok kacheklang alam along ingchoklonglo jongjung amonit aphan athe lake kasorjontang monit akhei atum si reng’ilo, monit akhei kahenodak pen chepajokvan lapen Sobar apham pen kachipripon ahok alam along inchoklonglo, lakledet akethan, ningperung alam, ningkapethepon, lapen ningkapangsam pima sorjontang amonit akhei aphan Kapinchong Abang kipi ingchoklonglo. Lahei anke pima kejapon aturlo lapen monit atum aphan kadokave pima akeme ason an kapachinipon akatheanglo, atheke pima lake monit atum kereng’ibom lapen kacheparidenglong akhi pima kadokave akangthirjir lapen akemesen an kechakklong alamlo, atheke kadokave monit atum aphan, kepho ason, lapen ajaton an kelakha’idam ason-amunglo, lapen lake monit atum aphan pap pen kapajok lapen katheang atovar ahin pima kejapon eson kejong akaibonglo. Arnam alamthe asai pen chomatlongdet ansi monit aphan ke ahok lapen chethe pen padorlim unchotji; lason pen anchot si monit ke kopima jongjung amonit atheng, kopima alamjor kedo achethe, kopima akechokvet sorjontang api, kopima Arnam aphan thikpet pu alam chinidam unji; lason pen anchot si monit ke koson si alang Arnam aphan chelame nangjima, kosonsi sorjontang api ateng adeng chepachun nangjima, lapen koson si abinong’et amonit asonthot kedo nangjima pu chinidam unji; lason pen anchot si monit ke kopi aphan si choklim akekroi lapen choklim akero-karcho loma pu chinidam unji; lason pen anchot si monit ke komat si sining lapen pirthe lapen kadokave ahormu doan Kepangri Abang loma pu chinidam unji; lason pen anchot si monit ke atheke komatma kadokave sorjontang ahormu an aHemphu Inut Abang kepangri, kacheja, lapen lahei aphan kapador pu chinidam unji; lapen laso pen anchot si monit kea the Inut komatma kadokave sorjontang ahormu doan kedobom, kapacheklangpon, lapen asai kapaklem aHemphu alam chinidunji lapen longdun unji. Arnam alamthe ahok akachomatlong pen kachekaklo te, monit ke Arnam alam lapen ahok aphuthak aklong’et longlelo lapen ahok akachinidam ta avelo. Lason amonit ke kahenonei kedobom kithitang arpumlo, kepadusi aoplo, lapen kadokave Kapinchong Abang ahin akethek kachinidam doan ke alangphan pen ajat tame chephophelo. Arnam amek along, lason amonit ke Alangliphan mantune ta kroikrelang, mate Alangli phiphi mantune ta alang dundepinlang, lapen lasi alangphan Arnam kepangthekdam ke Alangliphan kekroi abang ta kali mate Alangli phiphi kidun ta kali pulo, anpartame kechokvet sorjontang api puke durechetlang.

Akechokvet sorjontang api ke komatma Kapinchong Abang pu chinivek nangji, kopi aphan si monit aphan kasorjon athelo, kosonsi sorjontang api atum adeng ateng kacheklemponjima, lapen koson si Hemphu aphan kadokave pinchong ahormu tame karchojima, chinidamvek nangji, longdun nangji, pangthek nangji lapen Kapinchong Abang akemang, akar’idam lapen akehang aphan chemathadun nangji, lapen ke Kapinchong Abang kepon atovar atengthot pen si cheparjandunvek nangji – lake Arnam aphan kaphere lapen kaheno an kache’o.

Kopilo Arnam aphan kaphere puke? Lapen koson si inut abangphu kaheno che’o unji?

“Arnam aphan kaphere” puke amen kavedet aphan kaphere mate kathirikthap pu kali, mate chepahaidetji, mate kachehelo adak kibiji pu kali, mate kumlin kepaman mate kekroidamthap lapu ta kalilo. Alar, lake ningkehang, man-peng, kachiki, kachini seroi, chelame seroi, athikpet, kedeng, kanghon, lasonthot si ahoi lapen akoi pipepin pen karcho, kachitu, lapen kachehodai henlo. Arnam aphuthak choklim pen kachini avete, monit akhei ke choklim aningkehangdun, choklim kachiki, choklim kachinidam, choklim kelame mate athikpet avedetpo, bonta kaphere lapen kedosojo anchotpo, ningkibi anchotlo, avive kachinidamrong, kachepongrei lapen kapatepek anchotlo; Arnam aphuthak choklim kachini avete, monit akhei ke choklim kedeng lapen kachitu avedetpo; Arnam aphuthak choklim kachini avete, monit akhei ke choklim karcho lapen kachehodai avedetpo, kumlin kapinchong lapen kekroidunthap ansi dochotpo; Arnam aphuthak choklim kachini avete, monit akhei ke Arnam kethan atovar atengthot pen chenam si klemdun un’elo, mate Arnam aphan phererelo mate kaheno che’o’elo. Laso adular ke, asontin akeklem-kedam lapen aot-adur along atheke monit ke chedandong lapen kekhamkhe si paplengsetlo, Alangliphan meme-henono nongno kejothap lapen arsikjik pen kapinrempon si dolo, lapen ahok lapen Arnam alamthe ahok alamjor alar ke kapahi’idet asai si klemponlo.

Monit akhei ephong le Arnam aphan akekroi choklim dolo te, latum Alangli phiphi kidun lapen Alangliphan kachikidam tame choklimpo; monit akhei Arnam aphan ahok akekroi lapen kacharchung kedo pen anchot si choklim akachinidam lapen kepangtheklong dopo; laso ahok Arnam aphan kepangthekthek pen si Alangliphan ahok kelame ta dodunpo, laso choklim akelame Arnam aphan along si choklim monit akhei atum athikpet ta dopo; choklim athikpet Arnam aphan kedo pen anchot si monit akhei atum choklim kedeng ta dopo; choklim pen Arnam aphan kedeng ansi monit akhei atum choklim kachitu dopo pima lake ahoi lapen akoi avepin penlo; choklim kekroi lapen kacharchung, choklim kachinidam lapen kelana, choklim athikpet, choklim kedeng lapen kachitu dolo pu anchot si, monit akhei atum ahokpet Arnam akun lapen akedoivet chinidampo, lapen Kapinchong Abang angthek tame chinipo; latum Kapinchong Abang aphan ahokpet chinidamdetlo puan si monit akhei ke amethang along choklim karcho lapen kachehodai chingthurpo; latum le abinong’et karcho lapen Kapinchong Abang aphan kachehodai dolo pu ansi monit akhei ke ahokpet alangtum kahenodak asai che’oji, lake pudam lote, kaheno an kache’o pulo.

Laso along angton pen “Arnam aphan kaphere lapen kaheno an kache’o” asai si dopetlo, lapen laso athepi along angton pen Arnam aphan kaphere lapen kaheno an kache’o si plenglimlo. Lahenlo atovar pima Arnam aphan kaphere lapen kaheno an kache’othekji aphan kedunvek nangji.

“Arnam aphan kaphere lapen kaheno an kache’o” lapen Arnam aphan kachini anke akeongpi ahonjeng pen kethak un’edet si kokrappetlo, lapen lahei angbong akachepho anke theklongpronglo. Jongsi komatne abang kaheno che’oji pu ar’ilo, labangso abang aphrangsi ke ahok Arnam aphan kaphere do nanglang; jongsi komatne le ahok Arnam aphan kaphere kelongji ar’ilo te, labangso abang Arnam aphuthak ahok kachini dodet nanglang; jongsi komatne abang Arnam aphuthak kachini kelongji ar’ilo te, labangso abang Arnam alamthe aphrangsi chomatdundet nanglang, Arnam alamthe ahok kacheklang along lutdun nanglang, Arnam ado kipi lapen kethan-kepare chomat nanglang, Alangli ado kipi lapen akangsai; jongsi komatne abang Arnam alamthe chomatji ar’ilo te, labangso abang Arnam alamthe pen chepathengnono nanglang, Arnam pen si chepathengnono nanglang, lapen Arnam aphan Arnam alamthe kachomatdun kadokave asontin avarmon along monit atum aphan kachejokpon, kepho ason, lapen ajaton doan kepador avarsai kipiji si chohang nanglang; jongsi komatne abang Arnam pen lapen Arnam alamthe pen chepathengnonoji ar’ilo te, labangso abang aphrangsi ke mesen lapen athikdut aning cheparideng nanglang, ahok alam kedengdunphitji chisikmek nanglang, kesung kachechakji akar’idam do nanglang, kaheno an kache’o alamrai lapen ningtheklong do nanglang, lapen kasorjontang api kechoklim kemanji aningkehang do nanglang…. Lason pen si, angdengtin kedam paphrangbomlo, nang Arnam adung si ansose patebokpo, nang ning tame ansose si ingthirjirpo, lapen nang chethe lapen kerengbom akai ardi tame nang Arnam aphuthak kachinidam penpen, ansose si alamjor plengsetpo lapen ansose si keklarbor chemanpo. Arnisi arni an, nang chemathapo pima Kapinchong Abang anpar ke tomopatar kalilo pima Kapinchong Abang ke nanglong pen chenam si chepatutelo, pima Kapinchong Abang ke Alangli mohor nanglong pen chidipjoijelo, pima Kapinchong Abang ke nanglong pen kedo chehelopikpelo, pima Kapinchong Abang anpar ke hala Inut pima nang kaiketa nang akamatha along kiriver kalilo bonta pima nang akamathadam pen kapale un’edet, pima Alangli ke chenam ahokpet nang ar’e lapen arvi keraikom arjapkluklo, nang chethe aphan padorbomlo, lapen nang kijut keledamji adim chepahemphuponlo. Alangli ke atok adim along ke kedo kalilo, mate Alangli ke Amethang aphan angsong inghun athak along chepatudamjoi kalilo. Alangli ke nang rep-arei si dolo, nangphan angton pen pangrilo, Alangli ke asontin pima nanglong kedoanlo, lapen Alangli ke nanglong kopima isivet ason kedo anta kalanglo. Lason si nangphan Arnam nangpeklo Alangliphan kapanghonji aning aklong pen, Alanglilong kachikiji, Alangliphan ke’ot patebokhetji, Alangliphan ningkehangji, Alangliphan che’odetna pu kaphere, lapen anpar ke Alangliphan kache’odetji pu ningkehanghe, anparke Alangli lam karjuje pupe, mate anpar ke Alangliphan chepajokplotji mate Alangliphan akahelo kibikokji ar’ielo. Kadokave nang akenangji ke Alangliphan kachematha, Alangli lam karju, kadokave pima Alangli nangphan kipi dona kachitu, lapen Alangli kepangri along kachehodaidun henlo. Nang anpar ke kejapon alam, kepadorpon, nangkelangchari, lapen Alanglihin pen nangkibivet patepekpelo, anpar ke kopima Alangli ketoi alam lapen nangphan kehok anta patepekpelo. Kadokave nang akenangji ke Alangli phiphi kidun, Alangli arep-arei kengkam chejorrap henlo, kadokave nang kenangji ke Alangliphan nang chethe la isivet anchotlo pu kedengdun, Alangliphan atheke nang inut lapen la anchotlo Hemphu, nang inut lapen la anchot a’Arnam lo pu kedengdun henlo.

Paipai 18, 2014