“Kai Suri Khristo Kepangri Alongri Nangle Tanglo” pu Aphuthak Masapso Kachethan

Kopilo nang Kaisuri Khristo Kepangri Alongri kelangdammek aphuthak kemathadam? Ajahak amonit atum laso aphuthak mathadam dopik: “Kaisuri Khristo Kepangri Alongri ke pirthe along ningkan suri sose si dopo, lasi jongsi mondoli along abarim abangphu atum chepangrirelang pulote, latum tangte kachepangriji akenang doma? Ne don-rap ke tangka ave, tangte Ne tangka kapangrum cheng nangpoma? …” Kopilo Kaisuri Khristo Kepangri Alongri puke? Nangtum la chinima? Monit atum ke amek checharrimlo lapen thedung arjidingklui memedet si chechaknanglo. Ahokpet ta, Khrist recho arat akai Alongri ke tebonta non si nangkelejilang. Monit atum aphan kapachoklim keklempon angdeng ahut, Khrist recho arat akai Alongri ke bonta apor choklimledetlang; Arnam kaningje Kaisuri Khristo Kepangri Alongri pu apor ahut anke, monit aphan pachoklim’etpo. Kedamtang ahut, lake pulo pima monit atum ke ingthirpet lapen Sinim alongle along karjap thirkluk ason. Monit atum aphan pachoklimdet aphi anchot si – latum Arnam kaningjetang ingthirpet atum chemanlo – lapuan si Kaisuri Khristo Kepangri Alongri ke nanglepo. Arnam monit atum aphan kapachoklim ahut, Alangli latum aphan pangthirlo, lapen latum aphan koanma Arnam kapachoklim lapuan si latum ingthirpet manlo. Kangthirthe, kachedandong, kekhamkhedun, lapen ok keplengset ason doan nang aklong pen kevarchor ahut, nangphan le kecham pangthirpon, tangte nangphan ke Arnam chinghon pemelo (kaprek ahin pen pulote, nang ke ingthirpet abang si chemanpo); nangphan le Arnam kapachoklim ahut lapen ingthirpet abang chemandet pen, nang ke Kaisuri Khristo Kepangri Alongri along si dopo. Nonke Khristo Kepangri Alongri Akai pulo. Kaisuri Khristo Kepangri Alongri Akai along ke monit atum kerengji aphan ke Arnam alam aphan si chiki nangpo, lapen kadokave adettin tame Arnam amen arum si vangpetpo, lapen kadokave tame Arnam alam kaporhiji si vangpo. Laso apor ahut, ajahak atum aphan ke telephone pen si hangpo, ajahak aphan ke fax pen … latum doan Arnam alam kachinidunji aphan ke ajat akrong pen tame klempo, lapen nangtum, lethot ta, Arnam alam arum si vangpo. Kadokave la kopima keman ke monit atum aphan pachoklimdet aphilo. Pini arni, monit atum aphan pachoklimlo, pacharkle’etlo, patheanglo, lapen lamthe pen ajok chejaponlo; lake Khristo Kepangri Alongri Akai henlo, laso angdeng ke monit atum aphan pachoklimpo, lapen lake Kaisuri Khristo Kepangri Alongri Akai pen thangnat ta kachepho ave. Kaisuri Khristo Kepangri Alongri Akai ahut, monit atum aphan ke pachoklim tang’etpo lapen latum along kedo kahenodak akun antame pangthir’etpo. Laso apor ahut, Arnam kaningjetang alam doan ke monit atum aphan akengkamtin jadunpo, lapen kadokave Arnam asai kemanghumeme ha kikim-kerang kecheng apor ahut pen pini arni doan paklangtheipo, lapen Alangli lamthe ke monit atum aphan Arnam keklem amo asontin akai lapen arnivang thanponpo, kosonsi Alangli monit atum aphan aklong pen kejapon loma, Alangli karjong keplengset adim along kosonsi asai keklem loma, lapen latum aphan thanpo karjong keplengset adim along prekjek angkangpi alam. Laso aphi anchot si lake ahokpet Lam Akai pupo; non lake apor choklimledetlang angdeng si dobomlang. Jongsi monit atum aphan le pachoklimle lapen pangthirthedetlo, latum ke pirthe along ningkan suri kerengdunji akrong avedetpo, lapen alangtum aok ke theklor si ingjirruppo; jongsi monit atum le arlo pen ingthirpetlo, lapen latum doan ke Sobar lapen ok apharman anpar ke kalilo, tangte latum doan ke pirthe along rengver si dopo. Laso angdeng along nang ke nonpu mek checharrimlang, lapen doan pima nangtum kechomatlong ke Arnam akanghon lapen Alangli hakhi pirthe along arnivang tame athe ke karjap apotlo.

“Kaisuri Khristo Kepangri Alongri Nangle Tanglo” puke isi kethanmek alam, lake mohut kephoji aphuthak kapachetondam pen kethanmek abang kaningje alamlo, atheke kopima mohut arni kachemanji pu Arnam kethandammek alam apotlo. Laso alam pima Arnam kaningje mohut lapen Alangli pini arni laso alam kaningjepon ke isinat kali: Mohut alam anke kai si chejaponpo, tebontame Alangli pini arni kaningjepon alam anke monit atum aphan pachoklimpo, latum aphan pacharkletheipo, lapen latum aphan si langcharipo. Lam Akai mohut ke pini arni Lam Akai pen akachepreklo. Pini arni, Arnam kaningjetang kadokave alam – Alangli ajat abidi penle ningjedam pu sitame – doan ta monit aphan kapachoklimji aphan ajoinelo, pima latum aklong’et aketer doan cham pangthirji aphanlo, latum aphan kangthir kepamanji pulo, lapen latum aphan Arnam angno ingthirpet pachemanji pulo. Pini arni kaningjepon alam, lapen mohut kaningjeji alam doan, sonni ta cheprekjam. Khristo Kepangri Alongri Akai ahut kaningjepon alam doan ke monit atum asontin aseke along kepalutdunji aphan, monit atum aphan kechok akrong along asontin tame kevanpetji aphan, latum along pen kangthirthe doan pima kepadar’etji aphan. Lason henlo kopima laso akai along Arnam keklempon. Alangli isi kecheng anujok Alangli lamthe anuttin abangphu along pemanlo, Alangli lamthe pen anuttin abangphu aphan chethe si Alangli pinchonglo, lapen Alangli lamthe pen latum aphan kapathevangver lapen aklong kachejapon si Alangli klemlo. Lapen latum doan le Arnam akar’idam ateng ningdo’e kalidetlo, Arnam alamthe ke latum aklong’et along pachekroidundedetpo lapen latum aphan pakengpo. Pini arni alamthe doan ke monit achethe aphanlo; latum chenam si kadokave pima monit akenangji ateng padorlo, kadokave pima nang aklong pen kadure an athe Arnam alamthe si padorpo, lapen kadokave komatmatma Arnam alam kedeng atum aphan anke Alangli lam kecho lapen kejun pen patheangpo. Arnam mohut alam kaningje along ke angton somindar adangpi amonit atum aphan japonpo; pini arni, laheihui alamthe doan ke China aphan anchot si ningjelo, lapen latum ke komatmatma angton somindar adangpi an kaningjepon aphan ke apharman cheklang un’e. Arnam kaningjeji ke angton somindar adangpi aphan mo Kaisuri Khristo Kepangri Alongri nangkele ahut anlo. Chininon pima Arnam pini arni laso alamthe kaningje doan ke kadokave monit atum aphan pachoklimji pulo; Arnam laso angdeng along kaningjepon alamthe anke monit atum akenangji ateng kapadorji pu ajoinelo, Arnam kachepatujoi ason kachiniji mate kemanghumeme ason theklongji pu aphan ajoine kali. Pima Alangli kaningjepon penang an ahin penlo atheke monit atum akenangji an kapadorji pu ajoinelo. Kaisuri Khristo Kepangri Alongri Akai ke non si nangkelejilang – Kaisuri Khristo Kepangri Alongri Akai kaningjepontang ke pima Arnam anongthe arni aphan henlo. Jisu asai Judea along patangdet pen aphi, Arnam Alangli sai China ahavarpi along si tereklo lapen akaprek akemangdam pinchonglo. Alangli sai nangtum along Alangli akaprek aphar klemthulo, Alangli lamthe pen ajok si monit atum aphan kapachoklim kepaman klemponlo, lapen Alangli lamthe akerap pen si monit atum aphan ongdung akeso pachechak nanglo lason thakthak si ongdung Arnam akangjinso tame palongponlo. Laso angdeng asai ke kachechak pen kehaidet adilung pinchongpo, lapen Alangli laso kachechak pen kehaidet adilung pinchongdet aphi, latum ke Alangli sai amo asat chepaklang thekpo, latum ke ahok ateng pen rengdun ta thekpo, lapen latum ke chenam si Alangliphan ningpangsampo lapen mo kithi ahut anta Alangliphan athikpetpo, lapen lason pen si Arnam ke anong-athang thepo. Arnam anong-athang le kethe lote – pima lake – Alangli laso adilung amonit atum aphan pachoklimdet pen – pima Kaisuri Khristo Kepangri Alongri Akai pupo.

Jisu pirthe along ningkan thomkep ra kethom lapen ebeng an dolo, Alangli thengparpan athak pran kachipiji asai aphan si vanglo, lapen laso apran kachipi pen ajok Arnam Alangli ningthe isi aphar anke longlo. Arnam le ok kachemanpon ahut, Alangli chepabiheklo lapen chepatujoi theklo, lapen akeongdung akesung tame chechak unlo. Alangli ke Arnam Amethanglo puvoiphit tame, Alangli ke asontin kapatherak lapen asontin kangton-kangthi doan tame chechakruplo, lapen Alangli thedung akeso thengparpan along ingchin kesak pen ajok pap kadiya asai kapaplengpon ahut tame chechaklunlo. Laso asai angdeng patangdet pen aphi, monit atum pima Arnam ke thedung anongthe long tanglo pu theklonglo puvoiphit tame, lake Alangli angton pen anongthe kalidetlang; lake Alangli anongthe ephar anchotlang, la pima Jisu pen si longdamlo. Jisu le asontin akesuk-kesung chechak undetlo puvoiphit tame, chepabiheklo lapen chepatujoilo tame, Arnam apharman apran damnanglo, Arnam ke Alangli nongthe ephar ansi longchotlang, lapen Alangli nongthe ke Israel along ansi longlo. Arnam nonputa akaprek anongthe aphar dolang: pirthe along kevang pen asai ateng keklempon lapen isi adilung amonit atum aphan kapachoklim. Jisu asai angdeng keklem ahut, Alangli ajahak manghumeme ahormu klemponlo, bonta laso asai angdeng ke aling pen tame manghumeme lapen angthek kepaklangji aphan le keklempon kali. Lake jasemetpet kepaklang pima Jisu kesung chechak’un, lapen Arnam ajoine apran chipi’un, pima Jisu ke ongdung akeso-kesung chechak unlo athema Alangli Arnam aphan chinghon lapen pima, Arnam Alangliphan odunbup puvoiphit tame, Alangli ke nonpu ta Alangli chethe Arnam akar’idam ajoine chehodaidetji ninghang dolang. Arnam Alangli sai Israel along patangdet lapen Jisu aphan thengparpan athak sakdet pen aphi, Arnam anong-athang dolo, lapen Arnam ke Sobar athengno hakhi mesen nangplang’ilo. Nangtum la chinine mate kosonsi Arnam China along ok nangkacheman loma theklongle, lasi kosonsi nangtum Arnam anong-athang do tanglo pu pima ketheklongpo? Nangtum aphan kachepahaiji si akeongpi asai Arnam keklempik ahut, lapen nangtum karjap pathirlo, tangte laso Arnam asai angdeng ke chun pemepo, lapen lake Arnam anongthe aphar manpo. Nangtum la anchot si theklonglo, lapen nangtum ke non si Arnam pen kapachoklim nangkeklemjilang, non si tebonta nnag ning angton pen Arnam aphan kachipijilang. Nangtum ke tebonta non si laso anongthe angton pen theklongjilang; nang ketheklong ke pima Arnam nangtum aning chepahemphu’etlo puchotlo, pima nangtum ke Alangliphan che’o un’elo, lapen mo kijut anta Arnam aphiphi si dunbompo lapen nnag ning ke chelar un’elo, lapen pima lahenlo Arnam anongthelo. Tangte kopi along si Arnam anongthe nang ketheklongpo? Alangli sai monit atum along angthek kepho pen ajoklo. Monit atum theklonglo pima Arnam aphan ke inghonmeme, latum Arnam aphan alangtum aning arlo dolo, lapen ke Alangliphan kache’obupji aninghanghelo, lapen lahenlo Arnam anongthelo. Mondoli along korte lapen ingjir atum ajakong thebomlo tangte, lapen latum Arnam aphan alangtum aning arlo pen inghon theklo, Arnam kangtuiving ajakong keklempontang asai theklong lote, Alangli lamthe kepangbar un’edet aboi alam, latum le pima Alangli lamthe ke kachepahemphu si dolo pu theklonglo lapen pima Alangli ke Alangli lamthe pen kangsamri China ahavarpi arongsopi along sai keklemji vanglo, monit atum doan le aboi avedetlo puvoiphit tame, alangtum aning ke Arnam angno aber ingkupdipo lapen latum doan ke Arnam alamthe kedengji aphan ninghangpo, lapen latum doan ke aboi jumdetlo lapen ale kavelo puvoiphit tame, latum doan ke pima Arnam alamthe doan ke inghonmeme pu patheklongpo, lapen alangtum kachehokmeme atheng si manpo, tangte lahenlo Arnam anongthelo. Arnam le monit atum aphan athe ke kapachoklim arni nanglelo tangte, lapen ke Alangli ingno chehodaidamdetji unlo, lapen Arnam alam angton pen karjuji unlo, lapen alangtum mohut kephoji alam lapen alekha Arnam arideng si chipithei unlo, tangte adunthu Arnam anongthe aphar ke angton pen kelong pemelo pusi pupo. Atheke pudamlo te, asai ateng keklem a’Arnam angton pen keklempon kepatang ahut, Alangli sai China ahavarpi along tame kepajutlo. Kaprek ahin pen pulote, komatmatma kecheng pen pathikmek lapen Arnam si kangvaitang atum an aphan kapachoklimlo tangte, Arnam ke anong-athang thepo. Arnam pulo pima Alangli adunthu aphar Alangli nongthe Nihang ahin chevanlo, tebonta lake lapu mek renglor ke theklonglelo. Arnam ke Alangli sai Nihang ahin chevan tanglo: Alangli ke Nihang ahin vang’et tanglo, lapen lahenlo Arnam anongthelo. Pini arni, Alangli sai le tebonta non si keplengjilang puvoiphit tame, atheke Arnam keklemji chepathik tanglo apot, lake chenam si pachunvekpo. Arnam chepathik tanglo apot Alangli laso China along paplengvekpo, lapen Alangli nangtum aphan pachoklimvekpo pusi chisiklo. Lasi, Alangli nangphan akaprek akrong pipedetlo – Alangli ke nang ning nangchepahemphu’et tanglo, lapen nang ke nang ninghang mate hanghe tame damvek nangpo, lapen nangtum doan aphan le Arnam long tanglo pulote, Arnam ke anong-athang thepo. Pini arni, Arnam ke tebonta non si anong-athang angton pen dojilang, athema nangtum aphan non si tebonta kapachoklim pamanjilang, lapen nang ning le Arnam ahin chiruithu’etlo puvoiphit tame, nonputa penang akeboidet nang ok along dobomlang, nang ke Arnam aphan ningpangsamji un’edetlang, nang ke Arnam akar’idam ateng arsikjik matha thekthelang, lapen nang ke tebonta penang akeheno ason rimbomlang pima la nangtum methang che’ovek nangjilang.