Baibel Alam Aphuthak (1)

Koson si Arnam aphan kekroi along Baibel aphan kelangdam nangpo? Lake kekroi aron-atang aphuthak si akarjulo. Kopi apot si itum laso akarju alam kachethanlo? Athema mohut along ke birta keme kapachethang lapen Khristo Arat Kepangri Akai asai kapangdangpon nang klempo, lapen lake pini arni Arnam asai alam kethan thekchot ke chokchedetji. Alangli sai angkang kapatheji aphan, lake ansose akenangsotlang pima nang monit atum abarim dhorom akamathadam lapen abarim akekroi adichi an kethan kethakvetthek lapen latum aphan kapakroithek – lapen laso alamthe along kapaledamji aphan ke Baibel akacherap dolo. Penang an aningkan pen, monit atum abarim akekroi ke (pima Christian atum an, pirthe adang along kethenei adhorom kethom angbong pen isi) Baibel kaporhipon henlo; Baibel pen kachepahelo pulote Hemphu aphan akekroi ta kali pulo, Baibel pen kisuilo pulote kithirthip aban akekroi aron pen kachekaklo lapen kacheprek ason pulo, lapen monit atum akaprek alo porhilo pulote, lahei alo anujokpi ke Baibel pen kethan kapajirmi dovek nangpo. Lake pudamlo pulote, jongsi nang le Hemphu aphan kekroilo, tangte nang ke Baibel porhivek nangpo, lapen Baibel pen angtan ke nang ajat alo tame Baibel pen kacherap kavedet aphan anke archo longlelo. Jongsi nang klemdetlo, tangte nang ke Arnam aphan si chongthuidetlo. Baibel nangdolo pu akai ahut pen an, monit atum Hemphu aphan akekroi ke Baibel along akekroi henlo. Hemphu aphan monit atum akekroi pu kaningje alar ke, latum Baibel along si kroilo pule pudet sita henonelo; latum Baibel kaporhi kepangchenglo kipudam alar ke, latum Baibel aphan si kekroi cheng tanglo pule pudet ta choklo; lapen latum Hemphu adung patebok tanglo pu kaningje alar ke, latum Baibel adung si pale tanglo pule pudet ta choklo. Lason pen si, monit atum Baibel aphan ke jasemet lake Arnam atenglo pusi archobomlo, lake athe alangtum chethe avibong ason thakthaklo, lapen laso kachepangbolo pulote alangtum akai-achethe si kangbodet ason pen isinat pulo. Monit atum Baibel aphan koanma Arnam akangtui ateng si theklonglo, lapen ajahak atum ke kopima Arnam pen anpar akangtui pusi ketheklong atum ta dolo. Jongsi monit atum Karjong Kangthir asai penpe pulote, jongsi latum Arnam aphan matha thekthe, latum mena si rengbomthek – bonta latum Baibel le kachepangbo pen lote, mate Baibel along kethan alam lapen nongchethangklong angdeng kepangbo lote, lake latum alangtum akai si kachepangbodet thakthaklo. Lapen lasi, monit atum Hemphu aphan kekroi penlo pulote latum Baibel kaporhi pangchengphitpo, lapen Baibel angdeng aningchibipo, lapen koanma latum Baibel angdeng aning kachibi’un, lapuan sose si pima latum Hemphu aphan chinghonlo lapen thedung akekroi dolo pusi cheklanglo. Komatmatma Baibel porhi longtanglo lapen laso aputhak anut kaprek aphan ningje theklo pu atum anke kadokave ta mesen akortemar lapen ingjirmarlo. Athe la kedamtang aningkan doan, monit atum Hemphu aphan akekroi lapen kachepabihek ke alangtum Baibel aphuthak akachinidam koan heloma laso ateng pen si alakha enponlo. Akeongpi amonit atum ke kopi apot si latum Arnam aphan kekroidun nangji pu anta jasemetpet chichinine, mate koson si Arnam aphan kekroidun nangji, lapen thangnat ta klemkle si bonta Baibel angdeng mek kavedet ason si kachiniji aphan kiri tirlappo. Monit atum Karjong Kangthir asai akeja akrong ahin ridundepinlang; puan arjikiding pen, latum thangnat ta klemkle bonta Baibel si chepaningdingpik pen charlilo lapen ingsir-ingchaplo, lapen inutnat tame Baibel pen angtan si Karjong Kangthir akimi asai kelongdam avelo. Inutnat tame Baibel pen chekakdak avelang, mate latum lason keklemji haihedetlo. Monit atum la kedamtang doan aningkan ke Baibel si charlilo, latum penang an akethan kepajirmidam alam dolo, lapen ongdung asai along jokdunlo; latum along penang an kaprekjam Baibel aphuthak alam doreplo, atheke latum jutjepin pen lam chedan-chehilisai dolo, lason si pima pini arni asong suri hini sose nangsenglo. Latum kadokave ta ajahak prekjek akethan kapajirmi akenangji si rilo, mate ansose akeong muchot chepatujoi alam Baibel along rilo, latum kiri kakurukji ninghanglo, lapen Israel along Jehovah asai keklem alammo kiriji aphanlo, mate Judea along Jisu asai keklem alammo kiriji pulo, mate ansose kachepatujoi alam pima inutnat ta kachininedet apot kiriji pulo. Monit atum Baibel aphan kelangdam ke akar’ipik lapen akekroi pen apot henlo, lapen inutnat tame Baibel kenangsot atiri mate arlo atomo aphuthak ke angton pen klardak longlelo. Lasi, pini arni monit atum nonpu ta Baibel alam chethanlo pulote kapajirmithei ki’un’edet kemanghumeme ason si dokokverlo, lapen latum ke ansose si akar’ipik dolo, lapen ansose akekroidam si dokoklo. Pini arni, anuttin tame Baibel along kijutsi arni ahut asai kethanmek alam si kiriji ninghanglo, latum kopi si kijut arni ahut Arnam asai keklemjima pu ketarlipji ninghanglo, lapen kijutsi arni aphan kopi angthek si cheklangjima pusi chiniji kangtunglo. Lason pen si, alangtum Baibel aphan akarcho tame ansose arsikjik manlo, lapen kijutsi arni koanma katebok nangkele, lapuan si latum ke Baibel along kethanmek apot ahokhe kapadengji pibomlo, jasemetpet halahei kijutsi arni ahut aphuthak. Lapuson Baibel along mekve akekroi pen, lapuson si Baibel aphan akachiki pen, latum ke Karjong Kangthir asai kiriji aphan akar’idam ta avelo. Monit atum kamathathap along, latum mathalo pima Baibel anchot si Karjong Kangthir asai vanthekpo pulo; Baibel along anchot si latum Arnam akengbot longdampo pulo; Baibel along anchot si Arnam kemanghumeme asai chepatujoi do pulo; Baibel anchot si – akaprek alo mate amonit atum kali – Alangli sai angton pen lapen Arnam aphuthak asontin tame paklardak theklo pulo; Baibel ke siningrengme asai pirthe along vanthek pulo; lapen Baibel ke akai doan tame pangchengthek lapen pajut theklo pulo. Lahei akamathathap pen, monit atum ke Karjong Kangthir asai kiridunji aphan thangnat kachibedun avedetlo. Lasi, kedamtang ahut monit atum aphan kopuanma Baibel akerap pajirlo pu langdamdepin pen, lake non Arnam akimitet asai aphan kebeng-kephan si chemanlo. Baibel penpe tame, monit atum nahok ta Arnam akengbot aphan kiridam thekji, tebonta pini arni, Alangli kengbot anke Baibel along pen si dotheilo, lapen Alangli non akimitet asai kapangdangji ke phantni an akesung chemandetlo, lapen kachepeduk chitingkrup nangkoklo. Lake kadokave athema Baibel along pen nong chethangklong angdeng lapen kethan apotlo, lason thakthak si Baibel along keprekjam kethanmek apotlo. Baibel ke monit atum aning-angthin along isi akumlin mantanglo, lake alangtum aphutarlok along kachingvuinok si chemanlo, lapen latum anke pima Baibel pen angtan tame Arnam asai klemthek puke jasemet kroidun thekthelo, latum anke pima monit atum Arnam aphan Baibel pen angtan ta longdam unji pu chekroidun thekthelo, latum anke pima kepajut asai ahut ke Baibel pen chekakdak ta Arnam sai klemthek lapen akimi pinchongthek puke chekroidunde ongchotlo. Lake monit atum aphan mathadam un’epinlo; latum kroi amat si kroikrelo, lapen latum ke matha ta mathadamdelo. Baibel si monit atum aphan non Arnam akimi asai kapadengdunji along thedung akebeng-kephan chemandetlo, lapen laso akimi asai Arnam kapangdangji along akesung dokoklo. Lasi, jongsi nangtum Baibel along arlo atomo chininedetlo pulote, nangtum birta keme kapachethangji puke pachun un’edetpo, mate nang ke akimi asai ahakhi chechak un’edetpo. Pini arni, nangtum Baibel porhihelo puvoiphit tame, nangtum anke nonpu ta laso along si arsikjik pen chemedunsenlo, atheke pudammelo, nangtum arideng along Baibel le avedetlo tahai meme, bonta penang an nangtum akamathadam ke hadak pen si vanglo. Nangtum Baibel nangkeplang alam mate Arnam asai kedamtang angdeng hini aphuthak arlo atomo chinidamdelo. Nangtum kaike amat Baibel porhihelo puvoiphit tame, nangtum Baibel aphan chinidamvek nangji, nang Baibel aphuthak alam akechoklim kachinidam longvek nangji, lapen lason pen anchot si nangtum kopima Arnam ningkan suri throk kisik-kedang akemangdam alam angton aphuthak tame chini unpo. Nang lahei ahormu enpon si monit atum aphan chepahai’ipo, latum aphan pima laso aroi henlo ahok atovarlo pu pachinipo, latum aphan pima pini arni nang kedambom atovar ke ahok atovarlo pu pachinipo, pima lake Karjong Kangthir pen si chejaponlo, lapen pima lake madu amonit le kepangcheng tekang kalilo.

Arnam Aron Akai ahut asai klem patangdet pen aphi, Abarim aron Alo nangklanglo, lapen laso pen aphi ke pima monit atum Baibel kaporhi pangchenglo. Jisu vangdet pen aphi, Alangli Kanghon-Kangjinso Akai ahut asai klemponlo, lapen Alangli risangho atum Kachejok Akimi Alo toklo. Lasi Baibel along lahei Kachejok Abarim lapen Akimi Alo klanglo, lapen pini arni antame, komatma Arnam aphan kekroi atum anke Baibel si porhibomlo. Baibel lake epak phurkimo alo. Ahoklo, ladak ke ajahak kethanmekthek atum kethan alam dolo, lapen lason kethanmek alam ke phurkimo kalilo. Baibel along penang an aphar ke – kethanmek alam anchot kali, mate Jehovah asai anchot ta kalilo, mate Paul ketok alo alam ansi dochot ta kalilo. Nang chinidamvek nangji son koan aphar si Baibel along kedo; Kachejok Abarim Alo along ke Kecheng, Kebar…, lapen kethanmekthek atum ketok tekang alo heihui anta dolo. Kepajut ke, Abarim aron Alo kepajut ke Malaki Alo pen henlo. Lake Aron Akai ahut asai alam ansi tokponlo, atheke Jehovah kachejapon an; ha Kecheng pen Malaki Alo anlo, lake Aron Akai ahut asai angton kadokave alam kapajirmi peme pen si tokponlo. Atheke pudammelo, Abarim aron Alo ke pima kadokave Aron Akai along Jehovah kaparepon amonit atum an kachomatlong alammo si tokponlo. Aron Akai Kachejok Abarim Alo ahut, kethanmekthek akeongpi atum aphan ingthurlo athe Jehovah Amethang aphan kethanmek alam ningjelo, latum prekjam akhei lapen adet aphan hokum heihui pilo, lapen mohut Jehovah keklemji asai alam thanmeklo. Lahei amonit atum komatma kithurtang an ke Jehovah ahin pen kethanmek Akarjong si piponlo: Latum anke Jehovah along pen kelangdammek patheklonglo, lapen Alangli se arjulonglo, lapen lasi latum anke Alanglihin pen si ningrunglo lapen kethanmek alam toklo. Latum keklem asai anke Jehovah kethanpon ase apot saidelo, Jehovah kethanmek alam apot saidelo, lapen Jehovah asai laso apor ahut ke Karjong akerap pen monit atum aphan kachejapon anchot; Alangli ok chemanmelo, lapen Alangli arje monit atum thangnat ta theklonglelo. Lasi, Alangli penang an kethanmekthek atum aphan ingthurlo Alangli sai kapaklemji aphan, lapen latum aphan kethanmekthek ajakong pilo pima latum akheitin lapen Israel along akurtin aphan paledamlo. Alangtum asai ke kethanmek alam kaningje henlo, lapen ajahak atum ke Jehovah latum aphan ketoi alam si toklo atheke anut kaprek atum aphan kapaklangji aphan. Jehovah si lahei amonit atum aphan ingthurlo atheke kepathanmekji aphan, mohut keklemji asai alam pathanmeklo mate halaso apor ahut nonpu keklemponji asai doan, laso ajok monit atum Jehovah akemanghumemepik lapen akethek-kere kapatheklongji aphanlo. Lahei kethanmek alo anke Baibel along akaprek alo amokha pen kacheprek dolang; lahei anke komatma kethanmekthek Akarjong kipipontang atum alamthe si ningjelo mate toklo – komatma Jehovah along pen ase mate kelangdammek kelongduntang atum anlo. Kethanmek alo pen akaprek an, Abarim aron Alo along asontin anke Jehovah Alangli sai keklme patangdet aphi monit atum kabirti tekang apot saidelo. Lahei alo ke Jehovah ahin pen kangthur tekang kethanmekthek atum kaningje tekang alam apharman arjappi un’elo, Kecheng lapen Kebar alo le Isaiah Alo lapen Daniel Alo pen kapangbar un’edet asonthotlo. Kethanmek alam an kaningjepon ke asai klem ponpe aphrang saidelo; akaprek alo anke, chenam ta, asai keklem patangdet aphi ansi toklo, atheke pima monit atum keklem ki’un ateng penlo. Halaso apor ahut kethanmekthek atum anke Jehovah pen si aningrunglo lapen ajahak kethanmek alam ningjelo, latum penang an alamthe ningjelo, lapen latum Kanghon-Kangjinso Akai alam antame thanmeklo, lasonthot si kijutsi arni ahut pirthe kephalangnoji pu alam antalo – laso asai ke pima Jehovah ahin pen kithiktanglo. Ahin kedolang alo anke kadokave Jehovah asai Israel along keklemtang an si tokponlo. Lasi, nang Baibel kaporhilo pulote, nang ke jasemetpet kopima Israel along Jehovah keklempon aphuthak si porhidamlo; Kachejok Abarim Alo aBaibel along akeongpi ke Israel asor aphan Jehovah kejapon asai si tokponlo, Alangli Moses akerap enpon si Egypt along pen Israel aso atum aphan kachejapon, komatma latum aphan Pharaoh akangnangthip pen pajoklo, lapen latum aphan kajejangtang ajo ponlo, laso aphi atheke latum Canaan adet lutdamlo lapen laso aphi asontin kephodam anke Canaan along alangtum akai kereng alamlo. La kadokave pen akaprek anke Israel adang the-bi Jehovah asai keklempon alammo si tokponlo. Kachejok Abarim Alo along asontin ketokpon anke Israel along Jehovah asai keklem apotlo, lake labangso alongri along Jehovah asai keklem apotlo atheke Alangli Adam lapen Eve aphan pinchonglo. Arnam le ahok-ahak Noah aphi pirthe athak amonit atum doan aphan kejapon kecheng ahut pen, kadokave pima Kachejok Abarim Alo along ketokpon anke Israel along asai saidelo. Lapen kopi apot si tangte Israel pen angtan asai alam toktedetlo? Athema Israel alongri ke monit akhei nangkeplang adimlo. Kecheng ahut, Israel pen anpar ke akaprek adet avelo, lapen Jehovah tame akaprek nahok adim along ke sai klemklelo. Lason pen si, kopima Baibel along Kachejok Abarim Alo along ketokpon anke ahokpet Arnam asai halaso apor ahut Israel along keklem apot saidelo. Kethanmekthek atum kaningje alam an, Isaiah, Daniel, Jeremiah, lapen Ezekial atum kaningjepon…. alangtum kethanmek alam anke pirthe along Alangli akaprek asai apotlo, latum Jehovah Arnam Amethang asai alam thanmeklo. La kadokave ke Arnam pen si vanglo, lake Karjong Kangthir asailo, lapen lahei kethanmek alo pen anpar tame, akaprek asontin anke halaso apor ahut Jehovah keklem asai monit atum kachomatdunlong alam saidelo.

Monit akhei ave aphrang si kapinchong asai ke pangchengponlo, bonta Kecheng Alo ke monit akhei nangplangdet aphi si dolo; lake Aron Akai ahut Moses ketokpon alo. Lake pini arni nangtum angbong kemanbom ason-amung asonlo: Lahei chemandet pen aphi, nangtum mohut along monit atum aphan kapaklangji si tokponlo, lapen mohut amonit atum apharmanlo, kopima nang ketokpontang anke pima kedamtang ahut kephotang alam saidelo – lahei anke phurkimo pen anpar kaprek kalilo. Kachejok Abarim Alo along ketokpon alam doan ke Israel along Jehovah sai keklem apot saidelo, lapen pima atheke Kachejok Akimi Alo along anke Kanghon-Kangjinso Akai ahut Jisu sai keklem alam saidelo; latum ke keprekjam akai hini along Arnam sai keklempon alam ansi tokponlo. Kachejok Abarim Alo along ke Aron Akai ahut Arnam sai keklempon alam si toklo, lapen lasi Kachejok Abarim Alo aphan ke phurkimo alo pulo, tebonta Kachejok Akimi Alo abang ke Kanghon-Kangjinso Akai ahut asai keklempon doan athe saidelo. Akimi asai kepangcheng ahut, Akimi aron Alo tame aban chemandetlo – lapen lasi, Kachejok Akimi Alo tame phurkimo alo si chemanronglo. Ahoklo, Akimi aron Alo ke hala Kachejok Abarim Alo asonthot bivetvet kalidet, mate penang an alam ladak ke tokponpelo. Kedoan alamthe Jehovah kaningje antame Baibel along Kachejok Abarim Alo along si tokpontheilo, lasonsi ajahak Jisu kaningje alamthe anke Sonphli Birta Keme Alo along si tokponlo. Ahoklo, Jisu ke ongdung asai klemponlo, bonta lake angton pajirmidam peme pen tokponpedetlo. Kachejok Akimi Alo along ketokpon jumheklo athema koanma Jisu sai keklemtang ateng kalilo; pirthe athak Alangli ningkan kethom ra ebeng an ahut sai koanma keklem lapen arisangho atum keklempon doan tame Jehovah asai keklem along kephodunji aphan helovinglang. Lapen lasi, Akimi aron Alo along ke Kachejok Abarim Alo pen ketokpon alo jumhekmulo.

Baibel ke kopuson ajat alo? Kachejok Abarim Alo ke Aron Akai ahut Arnam sai keklem apotlo. Kachejok Abarim Alo Baibel along ke kadokave Aron Akai ahut Jehovah sai keklem apot doan si toklo lapen Alangli kapinchong asai jokjaklo. Kadokave Jehovah keklempontang alam ansi tokponlo, lapen kepadusi ke Malaki Alo pen Jehovah asai keklempon ingtondamlo. Kachejok Abarim Alo along Arnam sonni asai amo keklempontang alam tokpon do: Isi ke kapinchong asai dolo, lapen isi ke aron ahukum kipipon henlo. La sonni tame Jehovah ahin pen si klemponlo. Aron Akai ke Jehovah Arnam amen apharman asai si cheklangponlo; ladak ke jasemetpet Jehovah amen pen angton asai keklem alam ansi dolo. Lasi, Abarim aron Alo ke Jehovah asai alam si tokponlo, lapen Kachejok Akimi Alo ke Jisu keklempon asai alam si dolo, laso asai atheke jasemetpet Jisu amen pen si klemponlo. Jisu amen lapen Alangli keklempon asai ale ke lahenlo akeongpi Kachejok Akimi Alo along si tokponlo. Aron Akai ahut Kachejok Abarim Alo along, Jehovah Israel along kardomhem kimlo lapen dovan builo, Alangli pirthe athak Israel aso atum akai-achethe chejaponlo, angthek paklanglo pima latum anke Alangli kangvaitang amonit saidelo, kechengsi adilung amonit atum pima pirthe athak Alangli kangvaipon lapen Alangli mena aning atum anke, kechengsi adilung atumlo pima Alangli salajong si chejaponlo. Israel aso khei krehini atum anke Jehovah kechengsi kangvaitang amonit atumlo, lapen lasi Alangli kaiketa latum along sai klemlo, Aron Akai kepajut ahut an Jehovah asai cheklemponlo. Adunthu angdeng asai ke Kachejok Akimi Alo along Kanghon-Kangjinso Akai ahut asailo, lapen lake Jihudi amonit atum angbong si klemponlo, Israel aso khei krehini angbong pen isi atumlo. Laso asai angkang ke bihek athema Jisu ke Arnam ok nangchemanlo. Judea alongri angkang anchot si sai klemponlo, lapen ningkan kethom ra ebeng ansi sai klemponchotlo; lasi, kopima Kachejok Akimi Alo along ketokpon doan ke Kachejok Abarim Alo along ketokpontang doan asai aphant aphan kilitplotji puke helopiklang. Kanghon-Kangjinso Akai ahut Jisu asai keklempon an jasemet ke Sonphli Birta Keme alo along si tokponlo. Monit atum Kanghon-Kangjinso Akai ahut kedam atovar ke pima alangtum akai-achethe akun along athak kachelarprui anchot, atheke kido alo along si akeongpi ke tokponlo. Bangso akido alo ke koson si halaso apor ahut Karjong Kangthir sai keklem loma cheklanglo. (Ahoklo, Paul aphan le ado kipi mate kopai kelangno pen papholo puvoiphit sitame, alang keklempon asai along ke alangphan Karjong Kangthir si toilo, alang ke komatne halaso apor ahut Karjong Kangthir ke’enpon abanglo; Pitor aphan tame Karjong Kangthir si enponlo, bonta alang ke Paul asonthot anke asai klemklelo. Paul keklem asai along ke monit akangthirthe pen plengsetlo puvoiphit tame, kido alo along Paul ketokpon pen thekdam longji koson si Karjong Kangthir halaso apor ahut sai keklem loma. Paul kachejapon kedam atovar ke akechok abanglo, lake chokpetlo, lapen lake Karjong Kangthir atovar henlo.)

Jongsi nang Aron Akai ahut asai, lapen koson si Israel aso atum Jehovah kachejapon atovar along kidun loma pu kelangji ninghang do pulote, nang Kachejok Abarim Alo porhivek nangpo; jongsi nang Kanghon-Kangjinso Akai ahut asai aphuthak kachiniji pulote nang Kachejok Akimi Alo porhivek nangpo. Bonta koson si nang kijutsi arni ahut asai ketheklongpo? Nang pini arni Arnam kejaponthek amo dengdunvek nangpo, lapen pini arni asai arlo lutdun nangpo, athe lahenlo akimi asailo, lapen inutnat tame Baibel along aphrang tokponpepinlang. Pini arni, Arnam ke ok nangchemanlo lapen China along si akaprek kangvaitang atum aphan ingvailo. Arnam lahei amonit atum along si sai klemlo, Alangli pirthe athak Alangli sai keklem chingtontepinlo, lapen Kanghon-Kangjinso Akai ahut pen asai angthun vanbomlo. Pini arni asai ke pima monit kedamdepinlang atovarlo lapen pima inutnat tame ketheklonglepinlang akronglo. Laso asai ke pima kedamtang ahut klemponpepinlang – lake pirthe athak Arnam akimitet asailo. Lasi, laso asai ke pima phurkimo along kedamtang ahut klemklepinlang, athema non ke nonlo, lapen lake aban kedamtang si chemandappo. Monit atum chinine pima Arnam ke thedung asai, akimitet asai pirthe athak, lapen Israel pen angtan si klemlo puke, pima lake Israel angkang pen athakpik si dam’et tanglo, lapen kethanmekthek atum pen kaningje alam aphan anta palitplotlo, pima lake kethanmektang alam heihui doan pen angtan kedo akimi lapen kemanghumeme asailo, lapen Israel pen angtan akimitet asailo, lapen pima monit atum ketheklongledet mate kamathadamdedet asailo. Koson si Baibel along lason ketok kapajirmi peme asai ketokpon kedopo? Komat along si pini arni asai asontin tame ketokponthei kedopo, kangthan-kapadar avepin pen, phophe aphrangjong? Komat si laso jakongkethepik, kereset asai pima kedotang aron-atang kedengdedet jasemet hala angru kechoang aban alo along ketokpo? Pini arni asai ke phurkimo kalilo, lapen lason si, jongsi nang pini arni akimi atovar along kengkam chejorji ninghang pulote, nang ke Baibel along ketok kethanmek alo mate aphurkimo abat si damvek nangpo. Lason pen anchot si nang mesen pen akimi atovar along damthekji, lapen laso aphi anchot si nang akimi alongri lapen akimi asai along lutdun thekji. Nang kopi apotma pu chinidamvek nangji, pini arni, nangphan kopi apot si Baibel porhirinon pulo, kopi apot si pima Baibel along pen akacheprek asai akaprek kedokoklo, kopi apot si Arnam ke Baibel along keklempon kapajirmi peme kedotang asai aphan langledetlo, lapen kopi apot si Baibel pen angtan adular jakongthepik asai dokoklo. Lahei doan henlo nangtum kopima kachinidam nangji. Nang akimi lapen aban asai angbong akacheprek chinidamvek nangji, lapen nang Baibel le porhihedet puvoiphit sitame, nang la thekvet thekvek nangji; jongsi thekthedet pulote, nang nonpu tame Baibel aphan si archobompo, lapen lake nangphan akimi asai arlo kilutdunji lapen akimi akachelar kemanji aphan sungkrungpo. Lake kangtuiving akrong si dokok apot, kopi athe si kangdeihek alam, mate abarim akeban alam charli nangpo? Akimi akethan kaningje alam, lapen akimi asai amo dotangdetlo apot, kopi athe si kebantang phurkimo ketok alam angbong kedo nangjilang? Nangphan la akimi kaningje alam si padorpo, atheke pima lahenlo akimi asai pu angthek dolo; abantang ketok alam anke nangphan padorplupplelo, mate nang nonjong akenangji pador thekthelo, atheke pima lahei anke phurkimo saide pu angtheklo, lapen nonjong ladak lapen non kedobom asai kalidetlo. Laso kangtuiving akrong henlo akimitet asailo, lapen laso akimi asai pen, koanma ingtuiving kedamtang ahut akrong pu sitame, lake nonpu ta monit atum kamathadam parsik aphurkimolo, lapen laso kejong’idam ardi dolo pu sitame, lake nonpu aban akronglo. Lake “kangthir alo” along si toktheilo puvoiphit tame, laso aban akrong ke phurkimolo; “kangthir alo” along ketokpon avedet puvoiphit sitame, la akimi akrong ke nonjong ladak lapen non kedobom henlo. Laso akrong pen si nangphan pajokpo, lapen laso akrong ke nangphan larphunpo, athe laso asai ke Karjong Kangthir amatlo.

Nangtum Baibel aphuthak chinidamvek nangji – laso asai ke jasemetpet akenangsotneilo! Pini arni, nang Baibel porhihedet ta choklo, athe laso along thangnat ta akimi avelo; lake kadokave ta abanlo. Baibel ke phurkimo alo pulo, lapen jongsi nang Kachejok Abarim Alo le Kanghon-Kangjinso Akai ahut chodet lapen jundetlo pu tame – jongsi nang le Kachejok Abarim Alo apor ahut Kanghon-Kangjinso Akai ateng akenangji doan si kopima asai klemponlo pu tame – Jisu ke nangphan nnagdengdedetji, lapen nangphan pinrempo; jongsi nang le Jisu asai aphan Kachejok Abarim Alo ateng asai enponlo pu tame, nangphan ke Pharisi pusi pupo. Jongsi, pini arni, nang Kachejok Abarim lapen Akimi Alo pangvui rappet si cholo lapen junlo, lapen laso ateng klemlo pulote, pini arni a’Arnam nangphan pinremdetpo; nang ke pini arni Karjong Kangthir asai anung si klorongpo! Jongsi nang Kachejok Abarim Alo lapen Kachejok Akimi Alo cholo lapen junlo tangte, nang ke Karjong Kangthir aroi pen angtan si dokoklo! Jisu kedobom apor ahut, Jisu ke Jihudi lapen kadokave komatma Alangli phiphi kidun atheke Alanglilong halaso apor ahut Karjong Kangthir asai keklempon ateng atum doan aphan chejaponlo. Alangli keklempon ke kopima doan ta Baibel ateng pen le ke’enpon kalilo, bonta Alangli sai ateng pen si ningjelo; Alangli ke Baibel along kopi si kaningje doma ardi pipelo, mate Alangli phiphi kidun atum doan aphan kachejaponji atovar Alangli Baibel along rirelo. Alangli sai keklem kapangchenglo pupen ahut, Alangli kadiya akrong si pachethanglo – laso alamthe ke chenam si Kachejok Abarim Alo along kethanmek alam ketokpon avepinlo. Alangli ke Baibel ateng pen keklem kalidet anchot ta kalilang, bonta Alangli ke akimi atovar si japonlo, lapen akimi asai si klemlo. Alangli kethanbom ahut ke Alangli Baibel pen lang pangbar damdelo. Aron Akai ahut, inutnat tame Alangli kemanghumeme asai atheke keso kepame lapen hi’i kiplung asai klempon thekthelo. Lasi, Alangli sai, Alangli kethan-kemum alam, lapen Alangli lamthe kachepahemphu lapen ajakong anta Aron Akai along madu amonit pen abat si dolo. Jisu ke jasemet Alangli akimi asai si klemlo, lapen penang an amonit atum Alangliphan Baibel akerap pen pinremlo puvoiphit tame – lapen Alangliphan Kachejok Abarim Alo akerap pen thengparpan athak saklo tame – Alangli sai ke Kachejok Abarim Alo aphan palitplotlo; jongsi lason kalidet pu asonte, kopi apot si monit atum Alangliphan thengparpan athak ingsu saklo? Tangte lake athema Kachejok Abarim Alo along Alangli kethan-kemum alam thangnat ta kaningje avema, lapen Alangli keso kapame lapen hi’i kiplung ajakong avedet pu apotma? Alangli sai keklem ke akimi atovar kachejaponji aphan, lake Baibel abirudhe thur si chenam ta kachedan’iji aphan kali, mate Kachejok Abarim Alo pen chenam si kachepajokplotji aphan kalilo. Alangli ke chenam ta Alangli birta keme asai keklemji aphan si vanglo, komatma Alangliphan kar’idam lapen kiri atum aphan akimi asai si vanpilo. Alangli kevang ke Kachejok Abarim Alo kethanji aphan mate laso asai kapathirji aphan kalilo. Alangli sai ke Aron Akai aphan kapachingthurbomji aphan le keklempon kalilo, athe Alangli sai ke Baibel ateng angkur do-ave pen si keklem kedengpon lapu kalilo; Jisu ke jasemet pima Alangli keklemvek nangji asai ateng keklemji si vanglo. Lasi, Alangli ke Kachejok Abarim Alo along kethanmektang alam pajirmimelo, mate Aron Akai ahut Kachejok Abarim Alo along alamthe ateng pen le Alangli sai keklem kalilo. Alangli ke kopima Kachejok Abarim Alo kaningje anke langplotlo, Alangli ke Alangli sai pen chekroima-chekroikrema pu mathathepinlo, lapen anut kaprek atum Alangli sai aphuthak chini-chinine pu mathathelo, mate koson si latum kapinrem loma pu langlelo. Alangli ke jasemet asai cheklembomlo pima Alangli keklem nangji ateng pen, penang an amonit atum Alangliphan Kachejok Abarim Alo along kethanmekthek atum kaningje alam akerap en si pinremlo puvoiphit tame. Monit atum aphan, laso kacheklang ke Alangli sai thangnat angkur kave asonlo, lapen pima Kachejok Abarim Alo along ketokpon ateng pen kachetonte dopik pu asonlo. Tangte lake monit akechokche apot kalima? Keklem aron-atang ke Arnam asai along jokdunji aphan akenang doma? Lapen Arnam asai ke kethanmekthek atum kaningje alam ateng pen nangji puloma? Ajat punon, kolo si akethemulo: Arnam mate Baibel? Kopi apot si Arnam le Baibel ateng sai keklemvek nangpo? Tangte lake pima Baibel aphan abat palitplot ke Arnam ajakong ave puloma? Tangte Arnam ke Baibel pen chehekjok si akaprek asai klem longle puloma? Kopi apot si Jisu lapen Alangli risangho atum an Sabbath arni rimredetlo? Jongsi Alangli le Sabbath arni chibiji lapen Kachejok Abarim Alo ahukum ateng pen asai klemji pulote, kopi apot si Jisu Alangli vangdet pen aphi Sabbath arni rimredetlo, bonta alar ke akeng chamlo, aphu chikurkilo, him benglo, lapen drakha alang junlo? Tangte lake kadokave ta Kachejok Abarim Alo ahukum along pen ave’etma? Jongsi Jisu le Kachejok Abarim Alo man-peng pilo pute, kopi athe si Alangli lahei aron-atang pen ingdilo? Nang koloso aphrangsi kevangma chinidam nangji, Arnam mate Baibel! Sabbath arni aHemphu putangdetlo apot, tangte Alangli ke Baibel aHemphu tame cheman un’edetji puhe?

Jisu le Kachejok Akimi Alo apor ahut keklemtang asai anke akimi asai kapangchenglo: Alangli ke Kachejok Abarim Alo asai ateng pen klemponpelo, mate Alangli ke Kachejok Abarim Alo along Jehovah kaningje alamthe ateng tame enponpelo. Alangli ke Alangli mena asai si klemlo, lapen Alangli akimi asai si klemlo, lapen laso asai ke pima aron pen akangtui muchotlo. Lasi, Alangli pulo: “Aron ban lapen montri atum kethan alam kepavirji si ne vanglo pura nangtum mathari. Ne la kepavirji aphan le kevang kali, bonta la kepachokpetji aphan si vanglo.” Lasi, Alangli kepachunpon kopima laso ateng pen, aron-atang aban anke kangdi si keonglo. Sabbath arni tame Alangli risangho atum aphan sok katiki arit ajo ponlo, latum sok abu benglo lapen amu cholo; Alangli Sabbath arni rimredetlo lapen pulo “pima monit aSopo ke Sabbath arni ahemphulo.” Laso apor ahut, Israel aso atum aron ateng pulote, madu tame Sabbath arni kirimredet atum anke arlong pen varboppo. Jisu, tebontame, kardomhem tame lutdamdelo mate Sabbath arni ta rimrelo, lapen Alangli sai ason ke Jehovah ta Kachejok Abarim Alo apor ahut klemponpepinlang. Lasi, Jisu asai keklempon anke Kachejok Abarim Alo ahut aron aphan palitplotlo, lake laso pen ingtui muchotlo, lapen lake laso atengthot lapu kalilo. Kanghon-Kangjinso Akai ahut, Jisu ke Kachejok Abarim Alo aron ateng pen le sai keklem kalilo, lapen ke halahei aronban pen ingdi’etlo. Bonta Israel aso atum anke Baibel ateng pen si arsikjik pen rimthiplang lapen Jisu aphan pinremlo – lake tangte Jisu asai aphan kapatek kalima? Pini arni, dhorom plengset apirthe along tame Baibel aphan si arsikjik pen rimthiplo, lapen ajahak amonit atum pulo, “Baibel ke kangthirpet alo, lapen lake porhivek nangji.” Ajahak amonit atum pulo, “Arnam asai ke kai apar kai tame ingthurver nangji, Abarim aron Alo ke Arnam pen Israel aso atum angbong alamdonlo, lapen lake patepek un’elo, lapen Sabbath arni sitame kaiketa rimvek nangpo!” Tangte latum anke kajoklu kalilangma? Kopi apot si Jisu Sabbath arni rimredetlo? Tangte Alangli pap keklem puloma? Komat si lason alam pajirmidam peme pen chini unji? Koanma monit atum Baibel porhilo sitame, lake alangtum kachinidam’un ajakong akerap che’en pen Arnam asai aphan kachinidamji un’elo. Latum Arnam aphuthak ahokpet akachini kelongledet anchot ta kali, bonta alangtum kamathathap doan tame ansose si henothu muchot manpo, lason si latum ke Arnam aphan khamkhepo. Jongsi lake pini arni Arnam ok nangcheparje aphan kalidet pu asonte, monit atum alangtum mena akamathathap alam pen si virdetpo, lapen latum ke Arnam ado kipi angbong si thilotpo.