Baibel Alam Aphuthak (2)
Baibel aphan ke Kachejok Abarim Alo lapen Kachejok Akimi Alo pu tame pulo. Kopi aphan si “kachejok” pu kipudamlo nangtum chinima? Kachejok Abarim Alo along “kachejok” puke Jehovah le Israel along amonit atum pen alamdonlo atheke Alangli Egypt asor aphan pathitheilo lapen Israel aso aphan Pharaoh arideng pen pajoklo. Ahoklo, laso alamdon angthek ke biresak avi inghap angsong kivit henlo, laso pen atheke Arnam lapen monit angbong alamdon chibilo, isi ke lason si pulo pima kadokave komatma biresak avi inghap angsong lapen arei along kihipon atum anke Israel asolo, latum anke Arnam kangvaitang amonit atumlo, lapen latum kadokave aphan anke Jehovah pajoktheipo (athe Jehovah halaso ahut ke Egypt along aphrangsi sopinso lapen aphrangsi biresak aso lapen cahinong aso aphan anke kapathipo pulo). Laso alamdon along ke alamjor angdeng pasonni dolo. Egypt along inutnat amonit atum mate kachopangreng api doan aphan Jehovah pajokjedetpo; Alangli kadokave aphrangsi asopinso lapen aphrangsi biresak lapen chainong aso anke pathitheipo. Lasi, penang an kethanmek alo along ke lason si aphrang pen thanmek dolo pima Jehovah pen alamdon kedo angthek apot Egypt asor anke arsikkrung ado kipi phoji pulo. Lake kechengsi angdeng alamdon kibi alamjorlo. Egypt along aphrangsi asopinso lapen kadokave hem chopangreng api aphrangsi aso anke Jehovah pathitheilo, lapen Alangli kadokave Israel aso aphan anke pajok’etlo, atheke pudamlo te pima kadokave komatma Israel alongri along kedo atum anke Jehovah si chehok’ilo, lapen kadokave aphan tame pajoktheipo; Alangli latum along arjidingklui aphan sai klemji ninghanglo, lapen biresak avi pen ajok latum pen isi alamdon pinchonglo. Laso aphi pen ke, Jehovah ke Israel aso aphan pathithelo, lapen pulo pima latum ke kai apar kai antame Alangli kangvaitang atum si manpo. Israel aso khei krehini angbong, Alangli sai aphan Aron Akai dingpi an Alangli keklem pajutvenpo, Alangli aron doan Israel aso atum aphan pachetaktheipo, lapen latum angbong pen kethanmekthek lapen kangsai atum ingvaipo, lapen latum ke Alangli sai angbong chitim si dopo. Jehovah latum pen alamdon peman’etlo: Akai chelarletik anke, Alangli kangvaitang atum angbong si sai klemponpo. Jehovah alamdon ke chelar un’elo, athe lake vi pen si pemanlo, lapen Alangli kangvaitang amonit atum pen si pinchonglo. Ansose akenangsotnei, Alangli sai angton laso akai along atheke sai keklemponji doan aphan kechokvet angkang lapen kepathikpon ingvai’etlo, lapen lasi monit atum laso alamdon aphan ke jasemet akenangsot pu theklonglo. Lahenlo laso alamdon adunthu angdeng alamjorlo. Kecheng aphan kapave pen, atheke lamdon pemanme aphrang ahut ke, Abarim aron Alo along kadokave akaprek alo anke Israel aso atum angbong lamdon pinchongdet pen aphi Arnam asai keklem an aphuthak si tokponlo. Ahoklo, ladak ke Gentile aso atum alam tame ajahak dolo, bonta angton ke, Abarim aron Alo ketok ke Israel along Arnam asai apot anlo. Athema lake Israel aso pen Jehovah angbong alamdon apotlo, Aron Akai ahut ketokpon alo aphan anke Kachejok Abarim Alo pusi pulo. Lahei anke Jehovah le Israel aso pen alamdon pemandet aphi si amen irlo.
Kachejok Akimi Alo ke Jisu thengparpan along avi chepabudet lapen kadokave hala komatma Alangliphan kekroi atum pen Alangli alamdon pinchongdet pen si amen irlo. Jisu alamdon ke lahenlo: Monit atum alangtum apap kadiya kelongji aphan Alangliphan kroi nangpo athema Alangli kachepabu avi ajoklo, lapen lasi latum anke kejok longpo, lapen Alangli pen ajok mahang thekmipo, lapen anpar ke pappi pu hokhelo; monit atum Alangli akangjinso kelongji aphan Alangliphan kroi nangpo, lapen latum thilot aphi meherang along akesung chechak jokplotpo. Kanghon-Kangjinso Akai along ketok kedoan alo ke laso alamdon aphi si vanglo, lapen lahei ketokpon anke asai keklem lapen laso along kaningje alam an si plenglimlo. Lahei anke Hemphu Jisu thengparpan athak kesak pen akejok mate alamdon pen angtan ke avelo; lahei anke kadokave ta Hemphu along komatma kachomatdunlongtang akortemar atum ahin pen si tokponlo. Lasi, lahei alo anke lamdon pemandet aphi ansi amen irlo: Lahei anke Kachejok Akimi Alo pusi pulo. Lahei sonni kachejok alo along ke Aron Akai lapen Kanghon-Kangjinso Akai ansi dochotlo, lapen kepadusi akai pen ke thangnat kacherap avelo. Lasi, pini arni amonit atum kijutsi arni along Baibel ke thangnat thedung akenang ale avelo. Anpartame, lake isi angthek kejongdam’ime aphan si asai vangchotlo, bonta lake jasemet thangnat ale avelo. Tebonta dhorom amonit atum nonpu tame laphan akhi ason chebirtivetlang. Latum ke Baibel aphan chininelo; latum ke Baibel aphuthak koson si kethan pajirmi nangji ansi chinichotlo, lapen ke laso keplang atiri alam ke athepi ke chininelo. Alangtum Baibel aphuthak akamathadam ke: Baibel along asontin tame akechok pulo, ladak kedoan ke akechokche mate ketokthap avelo pulo. Athema latum ke aphrangsi pima Baibel ke chokpet lapen kechokche avelo pu hokdetlo, latum charlilo lapen aninghang peme pen si ingsir-ingchaplo. Pini arni asai angdeng ke Baibel along kethanmek avelo. Kadokave adim akangtingkuk along kachepahei asai keklemji pu nahok ta ketokpon avelo, athe lake akimitet asailo. Athema laso akai along asai ke cheprekchet, Jisu Amethang amat ta chichinine pima laso asai angdeng ke kijutsi arni ahut si keklemponji puke – lapen lasi kijutsi arni ahut amonit atum le koson si laso asai angdeng Baibel along kangsir-kangchapdam pen kelongpo?
Akeongpi komatma Baibel aphuthak kethan kapajirmidam atum anke kemathadam akechok ateng pen si klemponlo, lapen ahokpet ke laso atiri avelo. Latum ke penang an ahormu aphan kamathadam akechok ateng si klemlo. Athe aningkan aphi aningkan tame, inutnat tame Baibel aphan thakdakji pu haihelang, mate Baibel aphan “nangne” pu ningjehaihelang, athema laso alo ke “kangthir alo” pinaklo, lapen monit atum Arnam ason si archo’ilo. Kedamtang koan lone aningkan ke lason si damtanglo. Arnam ke laphan ardi pipelo, lapen inutnat tame Baibel along arlo atomo alam ridam pangthekthelo. Itum pulo pima Baibel aphan khi kabirti ke kumlin karcholo, tebonta inutnat tame halahei kachipidet kekroi atum lason ateng pen laphan langhaihelang, lapen latum nangphan pupo: “Korte! Lason ke ningjerinon, lake manghumemepik! Kopuson si nang Arnam abirudhe nongno kejothap unpo?” Puthot latum ningduk’it alam kaningje pen pupo: “Oh kadiyathek aJisu, pap kepajokthek aHemphu, Ne Nangliphan ingduklo alang pap kadiya longji aphan, athe Nang ke Hemphu pima monit aphan inghonlo, lapen netum anke pap klem tanglo, netum aohan thedung akangjinso peklangtha, lasonthot le peplangnang.” Lason henlo koan “dhoromipet” latum doan; koson si latum aphan ke puan akejoiji ahok kedengji aphan? Nang akaningje ke pima latum aphan kapapherethap asonpo. Inutnat tame mathaji haihelo pima Baibel ke monit atum abidi lapen monit atum akamathathap pen paludet tahailo puke, lapen inutnat tame laso akadure ke theklonglelo. Baibel along ajahak alam anke salajong amonit atum kachomatlong lapen kachinidam heihui apot saide, ajahak anke Karjong Kangthir pen kapatheang apot saidelo, lapen ke monit atum akethek-kere lapen kamunthidam ardi kapave antame dolo. Arnam ke lahei ahormu along thangnat ta chejokdundelo, bonta isi ang-ang do: Lahei alam ke jongjung amonit atum akamatha pen abat dam un’elo, lapen jongsi lasondet tame, lahei anke Arnam asai along kachejokdun lapen kapasiksakdunlo. Atheke pima jongjung amonit atum akamatha pen abatlo lake Sobar asailo, athe amonit atum aphan alangtum adeng pen hekjoklo, lake Sobar asai keklemlo, lapen Sobar ahin pen si paklemtoilo, lapen laso apor ahut Karjong Kangthir ke nangphan lasonthot ateng pen nangpaklem longlelo. Ahut pen, ajahak akortemar lapen ingjirmar atum arjulo: “Lason ninghang ateng pen asai keklem nephan chokjima?” Ne alangtum aman angdeng lang si pulo: “Chokji!” Ajahak amonit atum ke lason si pulo: “Jongsi Ne lason ninghang aling ateng pen sai klemlo te, tangte ne kedo angdeng mesenma?” Lapen Ne pulo: “Kalang! Lake thangthelo, chenam ta thangthe!” Akaprek atum pulo: “Tangte nephan lason ateng pen sai klemlo te chokjima?” Lapen Ne pulo: “Chokche!” Latum pulo: “Kopi apot si alangphan ke chok lapen nephan ke chokche?” Lapen Ne pulo: “Athema kopima nang keklem anke Sobar pen si vanglo, lake kebeng-kephanlo, lapen nang ningkirung’ipon atiri ke akechokche klemrong.” Lason apor ahut ta do pima asai keklem akehelo abat damdedet titi, lapen kortemar lapen ingjirmar atum laso aphuthak chininelo. Ajahak atum Nephan arjulo jongsi laso asai keklem chokji lason ateng pen, lapen Ne alangtum asai keklem amo pima theklong lote mohut asai aphan pasiksakdundelo, Ne pulo pima lake mesen thangthelo. Karjong Kangthir asai ke monit atum aphan angkangpi pilo; monit atum Karjong Kangthir aninghang ateng pen asonthot ke aphiphi dundedet ta chok, athe monit atum ke jongjong akamatha lapen akeboi si cheparidenglo, lapen latum along ajahak ok aninghang dolo, latum along ahok akisung dolo, lapen alangtum aphutarlok along anke pima latum jasemet kachepahemphuji aphan akamathadam avelo. Asontin Ne monit atum aphan karju anta isi ang-ang dolo. Ajahak atum Ne lamthe ke alamjor klardakdedet pusi kroilo, pima Ne latum aphan atheke ajat tame aninghang ateng paklemji si thanlo – athema lake nang chininedetlo pima Ne akenangji aphan kechokvet angkang dolo. Jongsi lake nang kahemandam ateng pulote – jongsi Ne kadokave amonit atum aphan kapadar avepin pen isinat akehang si padolo lapen latum aphan kadokave aman angdeng kapalongji si akenang dolo pulote – lason ke chunchedetji. Lake kichun un’edetji ason si kehanglo, lapen lake monit atum keklem aron-atanglo, lake Arnam asai keklem aron-atang kalilo. Arnam asai ke monit atum ahokpet kephobom ateng pen si klemlo lapen ke alangtum along kedolor kethek aboi ateng penlo. La sitame birta keme kapachethangpon aron-atanglo: Nang pajo pen si kengkam chejor nangji, amethang methang si pacheklem nangji; nang le ahok alam anut kaprek aphan kethan paklardak ansi latum chinidam unchotji, lapen laso apor ahut ansi latum Baibel aphan ke arep chibikok unji. Jongsi Arnam le laso asai angdeng klemkledetlo pulote, komat si laso kedotang aron kangdi unpo? Komat si akimi asai keklem unpo? Komat si Baibel pen angtan akimi atovar kelongdam unpo? Athema monit atum abarim akamatha lapen kache’o’edet kirimver ajutang aban anke henopinlo, latum anke lahei ahormu amethang pen si kapadar’etji puke thekthelo, mate latum ke keklemdutji ta haihelo. Pima lake pudammelo pini arni amonit atum aphan koanma Baibel along isi-hini kithitang alamthe pen neplap pu un’elo, laso alamthe atheke alangtum aning along adim-aklong kedotang an. Koson si latum Baibel aphan kache’odetji aningkehangpo? Koson si latum jaoike pen pima Baibel pen angtan akrong aphan kedengdunpo? Lake pima nang Baibel along arlo atomo klardak pen lapen Karjong Kangthir asai aron-atang ateng than thekthetik anke, laso ajok kadokave amonit atum tame kekroidunpetji aphan – atheke lahenlo akenangsotneilo. Lake athema anuttin tame dhorom arlo kedoan atum ke Baibel aphan man-peng chipi peme, lapen Arnam ateng si archolo, latum ke Baibel arlo ansi Arnam aphan bikokji bor’ilo, lapen lake lason tame dolo pima latum Arnam aphan puthot ephong thengparpan athak sakdet aphi ansi alangtum akemang chundamji pulo.
