Kardom pen Kedoverji Aphuthak Ardi Kipi

Nangtum arnivang kerengbom akai along kardom aphan ardi pipepin si nang dolo. Monit atum kardom aphan pulote kelangseletlo. Kardom aphan kaita ninghang chepeduk pen klemkle, muthe Arnam angno klem nangjitang pusi monit atum lapu keklemchot. Madu amonit ta Arnam angno aning chingpudang pen chehodaidelang lapen Arnam aphan kardom ahokpet klemklelang. Monit atum Arnam aphan akardom ke kesung kevang ahut anchot. Lapen anpar ke, nang Arnam aphan kardom ahokpet pen doloma? Arnam angno ningduk amekkri bu’prup kachiru pen lason apor enpon longloma? Alangli ingno nang methang aphan kachichinilong lapuson apor doloma? Nangning pen Arnam aning kacheraplok an akardom deng longloma? Kardom kedoji kaike keklemponver henlo: Nang jongsi hem along kardomdepin abang pulote, kardomhem along tame kardomji atovar si avedetji, lapen nang jongsi masapsovet akangchingrum along tame ardom dunde lepute, mo keongdung akachingrum along ta kardom thekthedetji. Jongsi nang Arnam angno kaike amat patebokbe mate Arnam alam doan matha’e’e pulote, kardom ahut ke nang thangnat alamthe ta pabar thekthedetpo, lapen ardomchit sita, thangbakbe nang ingtur kepaklem anchotpo; lake ahokpet akardom kalilo.

Ahok akardom ke kopilo? Lake Arnam aphan nangning along kopisi kedoma kethanlo, Alangli aninghang ateng pen ke’otthip ajok Arnam pen karjong akacheraplo, Alangli lamthe doan Arnam penpen kachingkivoi henlo, Arnam nedunghet si dolo pu adirda, Alang nethengno si dolo pu kachitinpon, lapen Alangliphan nang kopine kethanji do pu kekroidam. Nangning along ketheang si plengsetlo pu adirda lapen Arnam ke koan akanghon kedo abang ma pu kamathadam. Keprekchet pen nangning rung tanglo pu kachematha, lapen nangphan nangkarjudunlong pen nang korte lapen ingjir atum aphan ningkarong vanpilo. Latum aning arlo kedo alam si nang kaningjepilo pusi latum ke chemathadampo, latum kaningje kangtung alamthe heihui, alangtum apharman nang lamthe ke adular le plang sitame. Lahenlo ahok akardom pu kipudam ke. Nang jongsi ahok akardom pen do’etlo pulote, nangning kangsam longvekpo lapen ningkarong tame chinipo. Arnam aphan kangchinghonji ajakong ansose ingtui muchot tahailo, lapen nang chichinipo Arnam aphan kachinghon pen anpar kaprek kethedung ale lapen akenangsot kai along ke avelo. Lahei kadokave ke nang kardom heihui keme angtheklo. Lapuson thakthak nang kardom klem longloma?

Lapen tangte kardom ahut kopipi akenangji dolo? Nang akardom ke angdeng pen angdeng si klem nangji, nangning along ahokpet aren pen kibipon atengthot nangpo lapen Karjong Kangthir asai pen; Arnam pen karjong akacherap kedoji ke Alangli aninghang ateng pen keklem lapen Alangli monit aphan kopisi akenang ateng pen henlo. Nang jongsi kardom kepadoverji aphan pangcheng lote, kechengsi ke Arnam aphan nangning chipi nanglang. Arnam aninghang ateng keotdunthipji puke keklemji bor’iri – nangning arlo pen kopima Arnam aphan kaningje kangtung la’an ta choklo. Arnam angno nang kedo ahut lote lason le ningjenon: “Oh Arnam, pini ansi ne chichinipinlo ne Nangliphan patepekpon puke. Ne ke kahingnodak lapen kelangselet meme abang binonglo Ne ke nekai kachepadamthap’lok anchotlo. Pini pen anpar ke ne Nang pharman si rengpo. Ajor kedo akai si ne dopo lapen Nang ninghang ateng pensi paplengpo. Nang karjong kaike nelong sai paklembomnang, jutjepin akatheang lapen adak-atur pen nephan papinang. Nang ingno ingtangkring lapen akechokche avepin pen kai alammo pacheman longnang. Hi’i tame Nang nongthe adak-atur, Nang kai hokpet alammo, lapen Nang kethedung kehai angthek, netum along pen patheklongnon.” Lason ateng pen nang jongsi ardom lote, nangning ke chenam si akejokvan long pemepo. Lason ateng pen ardom tangdet aphi ke, Arnam along si nangning aketebok dopo, lapen laso ateng le kaike nang ardombomlo tangte, kekhang kavepin pen Karjong Kangthir nanglong sai klempo. Arnam aphan jongsi lapuson nang kehang doverlo te, lapen Alangli ingno nangkacheparai chepaklangpon lote, nang kacheparaipon alam doan ta Arnam pen kedengpon arni ta mantune ke nanglevekpo, nangning lapen nangbang arjon doan ta Arnam ale kelong planglote, lapen kijutsi ke Alangli nangphan kechoklim pachemanpo. Nangtum aphan, kardom ke kenangsotnei binonglo. Nang jongsi ardom pen lapen nang Karjong Kangthir asai longponlo pulote, Arnam si nangning ke nangcheponpo, lapen haladak pen amat si Arnam aphan akanghon ajakong longphitpo. Nangning pen jongsi nang ardomde lepute, Arnam pen karjong akacherap aphan nangning jongsi chingpupe pulote, Arnam tame nanglong sai keklemji aphan atovar avelo. Jongsi, kardom padodet lapen nangning alam ningje chepaklangdet tame, Arnam aKarjong Alangli sai cheklem chengchelang, lapen nang ningkerung longledet pulote, lake nangning athikpet avedetlang pusi cheklanglo, nanglam doan ta pachobei, lapen non anta ingthirthe. Jongsi, ardomdet tame, nang ningkarong kelong ason chemathalong pulote, nang kardom doan tame Arnam dengponlo lapen Arnam aKarjong nanglong sai klembomlo. Arnam angno sai keklempi abang puke kardom penpe te chokchedetji. Jongsi nang Arnam pen karjong akajalang ahokpet ketheklongdam ale do lapen ajor kedo ason pulote, nang kardom che’obup unji puhe? Arnam aKarjong pen akajalang avete madu ta un’edetji. Kardom penpete, ok aninghang ateng si dolo nang, Hi’i akangnangchek along si dolo; ahok akardom avete, nang ke kangting akejapon arum si dodunlo. Ne ningthelo nangtum korte lapen ingjir doan tame arnivang ta ahokpet akardom pen si dolo. Lake aron heihui ateng pen keklem anchot lapu kali, bonta kopine angthek kelongji aphanlo. Lomso amek kejang che’ora chehokjok pen thurdapprang si adap akardom lapen Arnam alam heihui pen ningcheparong’i ason keklemji nang ninghangma? Keklar’et aning pen nang jongsi ardomlo tangte lapen lason si Arnam alam heihui cho lapen junlo pulote, nang ke Alangli kedengmeme abang si chemanpo. Jongsi nang adapvang ta lapuson klemlo te, nang jongsi arnivang tame Arnam aphan nangning kachepidet klemver, kachingki-chethanvoi lapen Alangli pen kacheraphet dolo te, Arnam aphan ansose kachini muchot si batpo, lapen Arnam aninghang ateng kopima mesen pen nang otdunthip thekpo. Nang pulo: “Oh Arnam! Ne nemethang arpu kechepeplengji aphan ninghanglo. Nangliphan anchot si ne bang arpum doan nangchipidetnon ma, jasemet Nang nongthe adak-atur netum along kedoji aphan, labangso netum ahamphang pen ajok Nang kai hokpet alammo chehokjok pen kacheklang longji aphan. Netum along sai klemtha pusi Nangliphan choningri padikrimlo, jasemet pen ne Nangliphan ahok kachinghon thekji lapen Nangpliphan ningpangsam thekji lapen Nangliphan kedeng thekji le akemang peman longnon.” Laso anghor le nang chinghorpon lote, Arnam nangphan kechoklim abang pinchongpo. Nang kardom nangji ke nang mena ale aphan anchot kalidet nangji, Arnam aninghang ateng kapaplengji lapen Alangliphan kachinghonji aphan le nang ardomponbom nangji. Lahenlo ahokpet pen akardom puke. Arnam aninghang ateng pen keklemdunji aphan si kardomchot abang ma nang?

Kedamtang arni, nangtum kosonsi kardom nangji ma thekthedetlo, lapen kardomji akenang aphuthak langseletlo. Nonke, nang seke en peme si kardom thekji aphan charli nangpo. Jongsi Arnam aphan kachinghonji nanglong aklong pen ajakong chepatir un’elang lepute, kosonlo nang kardomji ke? Nang putha: “Oh Arnam, ne ning Nangliphan ahokpet kanghonji thekthedetlo. Ne Nangliphan nangchinghon ingtunglo, bonta nelong jakong avedetlo. Kopilo ne keklem nangpo? Nang nephan karjong amek nangingpudettha lapen Nang karjong penle nening pachejalongtha. Lason pemandet ra, mo ne Nang thengno kevang ahut ke, nelong akeheno doan chevar tekanglap pen, monit madunon, aphuthak, mate hormu tame kekhang kapathithip, lapen Nang thengno le nening angton pen pachehodaidet peplangnon, lapen Nang thengno nebang arpum kedoan tame kachipidet le pemandetnon. Tebonsita Nang nephan asat nanglangme, ne ke chisikding si dolo. Nonke, nekai mohut kachemanji aphan ajat tame ne kamathadam avepinlo, mate kithi nangkesanthorji along le kedo ta kalilo. Nangliphan kanghon pen kedo aning, kai kereng aloti si ne kiri ar’ilo. Ajat le punon, doan ahut tame – Nang rideng si dopetlo; ne kephoji ang’ang ke Nang rideng si dolo lapen nekai amat ta Nang rideng si dolo. Non, Nangliphan kachinghonji si ne rilo, lapen Nang le nephan nangpachinghonlong tame mate Hi’i le jonghe nangkhamkhedun tame, Nangliphan kachinghonji si nephan ke pathik tanglo.” Labangso alam kephodam dolote, lason le ardomnon. Lapuson le arnivang ardom lote, Arnam aphan kachinghonji ajakong pajo pen batbompo.

Kopuson pen si nang ahok akardom along kilutji?

Kardombom ahut, Arnam angno kedojoi’un aning si nang do nangji, lapen nangning athikdut pen do nangji. Nang Arnam akarjong pen ahokpet akacherappet lapen kardombom – nang nangse kijume alamthe pen Arnam aphan bai’i nangne. Kardom pulote Arnam kopisi nonjong amat kapachundetji kar’i kedo aphuthak si ardom nangji. Kethedung adak-atur akatheang lapen keklardang kelongji le Arnam aphan chohangnon, nang kardom ahut nang akenangsot alam lapen nang akesung heihui doan le Alangli ingno jainon, laso along Arnam angno nang kacheparaipon alam ta paklangnon. Kardom puke kithiktang angdeng ateng kekroidam pu aphan kali; lake Arnam aphan athikpet aning pen kiridam henlo. Nangning Arnam keparaikomji le hangnon, jasemet nangning Alangli ningno kaike kedojoiji aphan; Alangli pen nangphan kibipon avarmon angkang kedo longji aphan, nang mena aphan kachiniji, kechokchepik abang pu mena aphan kachichini, lapen mena aphan kache’o’un, lason lote Arnam pen kemesen akachepho avarsai si nang kachipilo lapen Arnam aphan kachinghonthek binong abang si manpo.

Kardom akenangsotnei ale ke kopilo?

Monit atum Arnam pen kachingri rappet thekji aphan kardom ke isi aloti chenamlo, lake isi monit atum Arnam aphan kachohang angdenglo, lapen lake isi Arnam aKarjong pen ajok monit aphan akejapon asailo. Kardom pen kedodedet amonit atum ke kithitang si akarjong kavedet atenglo pule pudet ta choklo, lake Arnam kejaponji aphan ke’un’edet angdeng ason si latum angthek cheklanglo. Kardom penpete, karjong pen keplengset akai ahokpet pen cheja thekthedetji, Karjong Kangthir asai tame akejumdet keklem si manpo. Kardom pen kedodedet pulote Arnam pen akachepho si kachekak chemanpo, lapen Arnam akero kelongji aphan lake hai un’edetpo. Arnam aphan kekroi atum an ke, koan ma kardompon, anlote, Arnam ta ansose si laphan kacheja batchetpo, koanma lamrai chedeng pen kedo plengset lapen kepamesenthek atum ke Arnam pen katheang adak-atur akimi longthupo. Chenam si angthek ke, lapuson amonit atum aphan keprapjin pen Karjong Kangthir si pachoklim pamanpo.

Kopi angthek pen si kardom kepachun unji?

Monit atum kardomver nangji ke undet tahaiji lapen kardom akenangsot ale alam ta chini unji tahai, tebonta laso akardom angthek kepalong’iji aphan ke kejoike kali. Kardom puke angdi along kachingbedun anchot ta kali, angdeng kekroichot puta kali, mate Arnam alam si kesoichot puta kali. Lapu ta pume, kardom ke ajahak alamthe heihui kesoikler anchot lapen bang along kacharli pen keklemdun pu aphan kaliveklo. Kardom along ke, nangning elong angdeng an pale si Arnam aphan kachipidet’un do nangji, Arnam akejapon kelongji aphan nangning kachingpudak pen bipon nangji. Kardom jongsi angthek long nangji pulote, Arnam alam heihui kipujir atengthot si cheman nangji. Arnam alam heihui aklong pen akardom kedothek abang si thedung katheang adak-atur lapen keklardang longdunchotji. Ahokpet akardom keklangdak angthek heihui ke: Arnam kopisi nangkehang ma halahei aphan kar’idun aning henlo, lapen Alangli kopisi akemang doan ta kepaplengpidun heihui henlo; Arnam aninghanghe ason anke ningkehanghedun lapen anpar ta, lason atiri anujok along kikimdun si, masap kachinidunji aphan kelongpon, lapen ajahak agyan kelongpon lapen Arnam ahokpet alam akethan along klardak pen kelongdun. Konatma kacheparai, kekroi, gyan, lapen kardom pen kedover aloti dolo te, lapu an aphan si ahok akardom pu hokji, lapen lason akardom anchot si angthek keme doji. Chenam ta kardom ke Arnam alam heihui ningkarong pen kikimpon do nangji, Alangli lam pen ajok Arnam akarjong pen akajalang atiri anujok along si kim-rangdun nangji, lapen Arnam aphan kirithek aning si nangpo lapen Alangli ingno kedojoi pen kedothek cheman nangpo. Lapuson akardom kedo anke Arnam akarjong pen akajalang angdeng tame chenam si lutdun long’etlo.

Kardom aphan kachinivek nangji alam:

1. Kopima nang kamatha along kevang alam aling ke ningjethap aret nangne. Nangning along anghor dovekji, lalo, nang kardom ahut nang akemangdamvet do nangji.

2. Arnam alam heihui pen plengset si kardom pado nangji; Arnam alam atiri anujok pen si paplang nangji.

3. Kardombom ahut, kelittang alam ke hothu nangnelo mate kedamtang ale kave alam ke vanthu nangnelo. Nang mena aphan Karjong Kangthir pen keplengset non kaningje nangji alam heihui kaningjeji le seke chipinon; lapuson pen sin nag Arnam pen akacherap abang un pemepo.

4. Adilung pen akardom ke isi angkang along si do nangji, lake, kenangsotnei, Karjong Kangthir non keklemvoi asai.

5. Doan amonit atum ta kopima kenangji apharman kardomji theklo. Nang nonke kopi apharman si kardompon ma halabangso athe Arnam alam heihui along pen si ri nangpo, lapen anghor cheponkrivernon lapen kaike ta paplutplepin pen laso aphuthak ardomvernon. Lapuson tame Arnam aningkehang ateng pen kekroidun kachepaklangponlo.

Inut amonit akai along kardompon aphuthak ke kardom akenangsot ale alam heihui kachini lapen kardom kopusonma pu masap kachinidunthek agyan kelong henlo. Arnivang kerengbom akai along, nang mena kephoji ason heihui apharman kaike ardomvernon, nangkai along aot-adur mate akun kemesen akachelarji aphan ardomnon, lapen Arnam alam heihui kachini ateng pen nang ardomnon. Kardom pen kedo akai si anuttin amonit tame mena aphan chepinchong nangji, Arnam alam heihui kachiniji aphan si latum ardom nangji, lapen Arnam asai kachinidunji aphan kiri pen si latum ardom nangji. Arnam angno nang mena akai along akepho ason heihui chehodainon lapen nang akardom ahut akalile alam suisepin pen ahokpet nangji, lapen akenangsotnei ke Arnam alam doan ahokpet akachini kelongji aphan, lapen kachomatlong pemeji aphan henlo. Inut amonit karjong akai kilundunji aphan akachisik dotanglo pute prekjam pen kardom heihui ta thek nangji. Kangsamri akardom, Arnam alam heihui aklong pen kamathapon, Arnam asai kachinipon – kemesen karjong akai kilutdun kelongji aphan karjong akachingrum athe kedo asai-amo ke kejongdam leheihui henlo, Arnam angno mena aphan nang chepachokponbom lote lapen kai along kethedung kepaphrangpon nang ansose ingdoipon longpo. Thihek pen, ajat asai le nang klem, Arnam alam doan akecho lapen akejun punon tame, mate kangsamri pen akardom, mate ase kethe pen, Arnam alam doan nang klardak pen ketheklongji aphan chenamlo, Alangli sai, lapen lahenlo nanglong akechun kenangji Alangli akar’i. Kenangsotnei ke, la nang kadokave keklem kapachunpon athe ke Arnam akenangji ateng angdeng an kepaledunji aphan lapen nang kai akimi kangtui angdeng an kachebat dunji aphanlo. Arnam pen masapso anbak monit atum aphan aningkehang kenangji ke monit atum Alangliphan ning kachingpudunthek henlo. Jongsi monit atum le Arnam aphan ahokpet aning chipi lote lapen aning arlo kopisi kedo lale ningjechot pulote, Arnam ke alanglong sai keklemji ninghanglo. Arnam aningkehang ke monit atum kapahinidak aning aphan kali, tebonta ingthirjir lapen athikduk aning henlo. Arnam aphan jongsi monit atum aningarlo pen le kaningje kali pute, Arnam tame alang aning jalanglelo lapen alanglong sai klem’i’elo. Laso apotsi, kardom akenangsotnei ke nang ning aklong pen Arnam aphan kachingki henlo, Alangliphan nang kai along akephoji lapen kachedandundong titi akun aphuthak kachethan, klarsap pen nang mena aphan Alangli ingno kachehodaidet; lapu an klem si nang kardom along tame Arnam aning nanghangdunpo, kalite nanglong pen Alangli ke araje kachepatujoi si dopo. Kardom ahut masapso akenangji ke lahenlo nangning aphan Arnam angno kepadojoi pen kibithek, lapen lake Arnam pen kacheheloledet si nangji. Chenam si lason tahai, laso keklembom ahut, karnukkrung akarsikjik lapen akimi ason nang longledetlang meme, bonta nang kardom ke kaike atengthot pen si padobom nangpo – aphrang ason ke nang dodedet nangpo. Akijumnei lahenlo nang kachepa’unvek nangji. Lapu anvet ta nang jongsi pachun un’e pulote, nang karjong akai ke kemesen aloti le kedambom kali pu angthek cheklanglo. Laso angthek ke, aphrang nang kemathadam alam asonthot ke nang che’otthip thekthelo, Arnam aphan akekroi nang jumdetpo, lapen nang kacheparai alam anke lapu praibom si manpo. Nang karjong akai along lutdun loma mate kalima pu eson kapangthekdam ke nang akardom kemesen aloti dam ma damde lahenlo. Laso non kedobom ahut si monit atum doan tame lutdun nangpo; latum kardom along si matha peme pen seke kachipiji aphan sai cheklem nangpo, kedojoi pen ke inghong nangnelo, bonta Karjong Kangthir akajalang kenangji aphan matha peme nangkokpo. Lason amonit atum si Arnam aphan ahokpet kiri pu hokji.

Kardom jongsi nang pangcheng lote, nangmena aphan akehelo an padamdet’ri lapen aphongnat akeklo keprap pen si asontin long’et nangji pu ningtheri. Akele abat kehang aretji puke nang klem nangne, nang ingho kachingpu penke Karjong Kangthir akajalang si dopo pu apot ningchethe, mate nang katheang adak-atur lapen kakhelandang longpo, mate Arnam nangphan akangjinso plengsetpo pu laheihui alam mathadam nangne. Lapuson chenam ta chemanmedetji; Arnam ke menmen kekroi morem kamanghumeme asai klemkle. Arnam ke Alangli mena kapathiktang apor ateng si monit atum akardom paplengpiji, lapen ahut pen ke nang Alangliphan koan akekroi doma pu asat nang’en si Alangli ingno nang kachepebihek kalima kalangma pu nanglangji. Jongsi nang ardom lote kekroidam, kachepaningding, lapen lamrai kedengpon ta dovek nangji. Ongdung amonit atum, seke ke’en kechenglang ahut, Karjong Kangthir akajalang longdundedet pu ningchepadihek titi dokok. Lason ke chokchelo! Nang chepaningding nangpo; Karjong Kangthir si nangcharibomlo pu adirda pen nang matha’e nangpo lapen ribom nangpo pen ke kachiniji le dambom nangpo. Ahut pen ahut, nang kacharlibom aloti ke chokchedet tahai, lapen ahut pen ke, nang jongjung akar’idam lapen kamathdam heihui Arnam angno keprappredet do tahailo, lapen lasi Arnam aKarjong nangphan jalang thekthedetlo. Kaprek apor ahut, nang koan chepabihek thekma pu Arnam nanglangji. Thihek pen, seke enbom ahut, anam kethedung nang chipi nangji. Nang kacharlibom aloti nang jongsi menmen kacheprekdak ason chethekdamlonglok lepute, nang akardom amo chelardet ta chokji. Nang ning mesen pen lapen kelongji akar’i pen dobomtik ke, non kedobom kacheklangdak akai along chenam si Karjong Kangthir nangphan nangponji. Ahut pen ke nang ning mesen pen ardombomlo sita nangphan kajalang kavedet ason si chematha tahailo. Lason ahutlo lepute nang kekroi le chepathirnon, nang akardom an tame Arnam nanglangdundinglo pu chikinon; nang akardom along nang ningkiding ta dovek nangji.

Kachepabithek abangphu chemannon; nangning aphan kapamanghudet ason pen kachepahelo thekji le Arnam aphan ardomnon. Kaike tame kardom pen ajok nang mena aphan chepangthir’etnon, kardom pen apot Arnam aKarjong le nangpajalongnon, lapen nang kun amokha pajo-pajo pen kachelar dopo. Karjong pen keplengset akai ke kardom pen kedover akai henlo – labangso akai ke Karjong Kangthir akajalang si dolo. Karjong Kangthir akajalang kedo pu akeklem-kedam asai ke monit akun heihui kelarponbom henlo. Karjong Kangthir akajalang kavedet akai ke karjong pen keplengset akai kali, bonta dhorom aron-atang kekroidun akai pu anchot. Kaike Karjong Kangthir akajalang pen kedover, lapen Karjong Kangthir pen ajok katheang adak-atur lapen kakhelandang kelongdun atum an si, karjong akai arlo lutdun longlo. Monit atum akun mate aot-adur doan tame alang kardom do lote chelarponbompo, lapuan sose si alang keklem prang muchotpo lapen kemesen abang chemanpo. Lasi, chenam, alang aning pajo-pajo pen ingthirponbompo, lapen alang akun doan tame pajo pen chelardunbompo. Lapuson henlo ahokpet kardom ajakong angthek.