Arnam Aphan Ahokpet Akanghon ke Kimit Ave

Kadokave amonit tame kapangthi angdeng kachetongnang lake Arnam alamthe ajoine. Jongsi Arnam le amen chevangthuthe asonte, monit akhei atum bangso kapangthir pen ajok kisung ahirjume longledetji apotlo. Kaprek ahin pen ningjedam lote, Arnam alamthe asatlang kedeng’un atum doan ke hirjume kelong atumlo. Monit atum apo-apei along pen kachelongdun ajakong, alangtum a’ot, lapen alangtum Arnam aphan kelangdam kosonloma pu langdet pen, alangtum ke bangso kapangthir kelongji apun-achak ave. Atheke alangtum aphan Arnam si athak kirunglo apotsi latum labangso ahirjume kelong. Monit atum alangtum Arnam arje kelang mate ase karjuji apun-achak ave pusi kachipu. Pini ke, lake ingthimlim pen ta Arnam si kirungpon ajoine penlo alangtum labangso kapangthir kelong ke. Lake kijut arni malom kahache anuttin abangphu kelong ahirjumelo – nangtum jongjung lapuson chetong loma? Kopi ahin si monit atum kisung lapen kerem kachetong nangji ma lake Arnam si aphrang pen kisikmek – lake monit atum mena kenangji ateng kali. Anuttin kekroi abang ta Arnam alamthe lapen Alangli lamthe arlo kedo akisung asatlang kedengji ajakong do nangji. Nangtum aphan klardak loma la? Lasi, nangtum kephonang akisung alar, nangtum pini ahirjume longlo; jongsi nang Arnam apharman chepasungse nang Alangli kero longle. Kedamtang apor ahut nang khinde tahailo bonta, nang jonghe le khinde sitame, Arnam nang phuthak halahei ke aning ave. Pini kevanglo, lapen patumi alam aphuthak kelangdam akenang ave.

Ajahak amonit atum kipu ke alangtum Arnam aphan kanghonji aphan bor’i tame thekthedet. Laso aphi, alangtum Arnam kedampo pu arjulong si, alangtum menmen Alangliphan kanghon dokoklo. Ajahak amonit atum kaike ahokpet aphan asai pen klemkle, lapen Arnam ke aningkithi pen kedampo pu arjulong si, alangtum Alangli thengno vang si chardomlo: “Oh Arnam! Kanghon pen choningrilo damri. Nephan ephong varsai nangpitha! Arnam! Ne kedamtang arni Nangphan ning nangpangsam thekthedet; Ne Nangphan nangchorore lapen Nangphan nangkhamkhelo. Pini ke Nangphan ingthimlim ning nangpangsamji lapen Nangphan kanghonji aphan Nemethang abang lapen ning ingthimlim kachipidetji aphan ninghanglo. Ne labangso avarsai mononphi longthuthelo.” Nang lapuson kardom doloma? Inut abangphu lapuson chardom lote, lake alang me-heno kelang ajakong Arnam si kangthur apotlo. Monit atum ke kadokave ta thiklak lapen luvok. Alangtum ke adai kitu lapen kapangthir kephonangkok, bontame alangtum chinine Arnam ke lahei pensi asai kepachunbom pu alam. Jongsi Arnam lapuson le sai klemkle pulote monit atum ke manghuvong si dobompo; majok amonit ta monit aning along karjong pen kepho-kamatha along chejokdun thekthe. Lake Arnam alamthe anvetji, lale monit aphan kangsai lapen kapacheklang, lale mo athe nangpikithekji. Lasi, kadokave ason ta Arnam alamthe pensi kelong lapen keplengji, lapen lake Alangli lamthe pen ajok si monit atum along Arnam aphan kanghon kithurlong. Monit atum me-heno keplak ajakong kelangdam pen Arnam aphan kanghon pen anchot ke kemangdam angthek klangkledetji. Kedamtang arni ahut monit atum methang me-heno keplak ajakong along Arnam aphan kanghon atiri kachemanmelang puhe? Methang aning kehang pen inutbak Arnam aphan kanghon abang doloma? Lake AArnam alamthe pen ningkirun ajoine si monit atum Arnam aphan kanghonchot. Ajahak amonit kipu: “Ne penang an aningkan Arnam aphi dunlo lapen Alangli saikeme penang an thekdunlo, penang an ahirjume dengdunlo. Ne kapangthir lapen kangsai tame chechaklo Alangli lamthe apharman. Lasi ne ongdung ke chinilonglo, lapen ne Arnam akanghon theklonglo. Ne Alangphaan choro nangji, Ne Alangli saikeme apnam chitu nangji. Ne kithi pensi Arnam aphan aning pangsamji, lapen ne Alangli kanghon aphan nemena me-heno keplak ajakong along si atiri pinchongji.” Monit atum jongsi methang me-heno keplak ajakong alam si charjuchot pulote Arnam kopuan keme lake chinidam un’elo. Jongsi alangtum me-heno keplak ajakong along ansi chikichot pulote Arnam aphan alangtum akanghon ke haiduktokpo. Jongsi nang Arnam akanghon lapen saikeme apreng kachitu alam si ningjechot, Alangphaan kanghon along jakong avedetji, nangmena me-heno keplak ajakong aphuthak atiri pacheman si Alangphaan kanghon ke angthek kacheklangkleji asailo. Kopi apotsi lake angthek kacheklangkleji asailo pu kipu? Lake asai keklem alam. Nang Arnam kanghon ke koson akanghonlo? Lake Arnam aphan kachongthui lapen Alanglipharman angdung kili angbong kedam kalima? Penang an amonit atum kekroi ke Arnam aphan kanghon ke anong’e avedet lapen inuttin aphan ta Alangliphan kanghonhe apot isitvet ateng si adai enpo, tangte pangrumpet pen kelang ke, pap keklemkle anta mepik khangjanglang. Lasi Arnam aphan kanghon lapen me-heno keplak ajakong along atiri pinchong pen Alangli kanghon anam kachitu ke kithiklak abidilo, lapen lake aning arlo pen amethang amat nangketetlen ke Arnam aphan kanghon kali. Arnam aphan akanghon ke ning aklongsi pen nangkebar ahokpet alam nangji. Ajahak amonit atum ningje: “Ne mena amat ke Arnam aphan kiri lapen Alangliphi kidunji aphan kroilo. Nonke jongsi Arnam le nephan nang’o ingtung tame, neke Alangliphi dunpo. Alangli nephan akenang do ave, bonta ne ke Alangliphan chinghonbom, lapen kijut ahut ke, ne Alangliphan longvek nangji. Ne Arnam aphan nening chehodailo, lapen Alangli ajat asai le klem tame, ne Alangliphi nekai arjon ta dunbomji. Ajat le cheplang tame, ne Arnam aphan chinghon nangji lapen Alangliphan chepalong nangji; Alangliphan longletik ne sangse.” Nang lapuson alamrai doma?

Arnam aphan kekroi atovar ke Alangliphan kanghon atovar pen isivet lapen chingbarkrilo. Jongsi nang Alangliphan kekroi do pulote nang Alangliphan chinghon nangji; bontame, Alangliphan kanghon puke Alangli kanghon apreng kachitu mate me-heno keplak ajakong along atiri pinching pen Alangliphan kanghon aphan le kipudam anchot kali – lake Arnam aphan kangthirvet akanghon. Ahut pen monit atum me-heno keplak ajakong along atiri pinching pen anchot ke Arnam akanghon chini thekthe. Ne kaiketa kopilo kipuver: “Arnam akarjong nangtum akarjong aphan nangpakirla lonang”? Kopi apotsi ne Arnam kanghonji aphan monit atum along me-heno ajakong aphan kakirla pu pupedetlo? Atheke me-heno keplak ajakong ke Arnam kopu’an kanghonmeme loma pu chini thekthe. Jongsi nang lahei alamthe pen ning ingsamse, nang me-heno keplak ajakong pen Arnam akanghon kachiniji aphan bor’itha. Nang malomso aphan ke jakong chelong tahai, bonta lake malomso pen lote avedetpo. Jongsi nang me-heno keplak ajakong pensi Arnam kopu’an akanghonmeme pu chinichot pulote, nang kachardom ahut jakong chelongji, bonta laso ajakong ke klipdap’oji lapen malomso pen praidakji. Kopi apotlo lake? Jongsi nang me-heno keplak ajakong along ansi asai che’enchot pulote, nangmethang along Arnam aphan kanghon pathur thekthelo; nangning along nang Arnam aphan ahokpet akanghon chichini lote, Alangli nangkarjong aphan kirlapo, lapen lake laso ahut ansi nang me-heno keplak ajakong ta ahokpet asai cheklem ponpo. La kipudamji puke Arnam le monit akarjong aphan kirla lote lapen monit atum gian do lote lapen ningkirung do lote, hala ke, alang kepho ason along charlipon longlote, halaso ahut ansi alang Arnam aphan me-heno keplak ajakong pen ahokpet chinghon thekpo. Nang me-heno keplak ajakong pen Arnam aphan kanghon ke kechokche kali – lake Arnam aphan kanghon along kangdeinei angdenglo. “Arnam asai keme kangsaichot” pen kanghongchot ke monit aphan prangset pen kilutdunji aphan avarsai pipe. Monit atum ajahak Karjong Kangthir asai chepalong lote, hala ke, alangtum asai cheklangdak pen Arnam akanghon theklong lapen chini lote, alangtum asapbak Arnam agian dolote lapen ahokpet si Arnam lapuan monit akanghon kelongji apun kedo lapen Alangli lapuan keme pu chini lote, halaso ahut ansi alangtum Arnam aphan ahokpet pen inghon thekji.

Monit atum aning pen Arnam adung pale lote, alangtum aning ingthimlim pen Alanglihin chetevar lote, lahenlo monit atum Arnam aphan kanghon angdeng kechengsi. Jongsi nang Arnam aphan inghonji ninghang, aphrangsi ke nangning Alanglihin chetevar un nangji. Kopi asonsi nangning Arnam anat nangkatevar? Lake nang doan ason kachiridun ta Arnam akanghon apharman lapen Arnam aphan kepalongji ajoine ahutlo. Ladak pensi cheklanglo nangning ke Arnam anat ingthimlim si chetevar’etlo. Arnam lapen Alangli lamthe batdet, thangnat ta nangning arlo (hemtun, keplang-kephi, penan, piso, osomar, lapen kaprek) avedet ason anlo. Jongsi do pu tame, halapuson ahormu nangning nangcherai un’e, lapen nang kevangji arni keklem-kedam chematha damde bonta Arnam akanghon kirilok. Halapuson apor ahut nang nangning aphan ingthimlim pen Arnam anat chetevar’etpo. Pulonang nang ning arlo nangmethang apharman ason-ason chemathabom do lapen kaike ta methang jongjung aphan ale si kachorilok, kaiketa kamatha: “Komentu si ne Arnam aphan masapso kachoningri longpo? Komentu si nehemtun keplangpo? Kosonsi ne kemesen apindeng-sumpot kelongpo? ….” Jongsi nang halaso angdeng along si dobomlang pulote nangning ke Arnam ahin chetevar peme kalilang. Jongsi nang nangning arlo Arnam alamthe si dochot lapen nang Arnam aphan chardom theklo lapen ajat apor ahut tame Alangli pen chetebok theklo – Alangli nangpen chetebokpik ason, Arnam nangbang arlo si dolo ason lapen nang ta Alangli ok arlo si kedolo ason – jongsi nang lapuson kepho angdeng along si do, lake nangning Arnam athengno si dolo pu angtheklo. Jongsi nang Arnam aphan ardom lapen Alangli lamthe pensi arnivang ta kecho lapen kijun, kaike ta kardomhem along asai aphuthak chematha, lapen jongsi nang Arnam akemang aphuthak kamathadam chepaklang, nangning aphan asai paving pen Alangliphan ahokpet pen chinghonnoi lapen Alanglining pangsamnoi, lason lote nangning Arnam apharman chemanpo. Jongsi nangning ke kaprek aphai ongdung ason si cheraidet, pulote lake Sobar si cheraibomlang lapen lake ahokpet pen Arnam ahin chetevarvelang. Komatne aning jongsi Arnam anat ahokpet chetevar’etlo pulote, alangtum ahokpet, kangchinton kave akanghon Alangliphan dopo lapen Arnam alamthe aphuthak kamatha dopo. Alangtum kilubui lapen thangbakbe ajor kave ason ben apor ta chetongji tahai tame, alangtum Arnam ahem aphan kenangji ason aphuthak kamatha thetan doji, Alangli sai, lapen alangtum methang amat akun along kachelar, lapen alangtum aning kechok adim si dolo. Ajahak amonit atum ke kaiketa alangtum ajat asai le klem ta kardomhem apharman pusi kachipu bonta, ahokpet alam ke, alangtum methang ale aphan si asai keklem. Lapuson amonit atum ke kechokche akemangdam dolo. Latum chongpeng lapen chongthui atum lapen latum keklem ongdung asai ke methang ale aphan saide. Lapuson amonit atum ke Arnam akanghon ridunde; latum aning ke Sobar apharman si dobom lapen Arnam ahin chetevar un’e. Lasi Arnam ta lapuson amonit aphan kepalongji abidi thekdamde.

Jongsi nang Arnam aphan ahokpet pen inghon ingtung lapen Alangli rideng dodun ingtung, kechengsi angdeng ke nangning ingthimlim pen Arnam ahin kachetevar henlo. Nang keklem asontin asai along, methang aphan chirinoi lapen charjunoi: “Ne laso asai keklem ke Arnam aphan kanghon kedo aning atiri penloma? Lahei along ne kopine jongjung akemang ta dodunma? Ne ahokpet kopilo laso along pen kachepalong kangtung?” Jongsi nang Arnam aphan nangning chipi ingtung, aphrangsi ke nangning aphan nang cheber nanglang, nangmethang jongjung akar’i doan che’o nanglang, lapen Arnam apharman si ingthimlim pen kedolo pu angdeng chepale nanglang. La henlo nangning Arnam aphan kachipi kacharli atovar. Methang aning aphan kacheber pu kopi aphan si kimindam? Lake methang a’ok-avi apharman kangtuiving akemang kapadam, karengme mate man-peng kirire. Lake Arnam aning kapangsamji aphan ajat asai tame keklem, lapen methang aning aphan amuttin si Alangli pharman kapaman, methang jongjung aphan kali. Lapuan ta kedorlo.

Arnam aphan ahokpet akanghon ke ning arlo aklong pensi kevang; lake monit atum Arnam aphan kachini atiri aklong kedo akanghon. Komatne aning jongsi Arnam ahin ingthimlim pen chetevarlo, pulote alangtum Arnam aphan kanghon dolo, bonta halabangso akanghon ke ingthirjirji pu pudam un’e lapen plenglimji puta puno. Laso athe ke inut amena aning aphan Arnam ahin ingthimlim kachetevar lapen inut Arnam aphan ahokpet kachini lapen Alangliphan ahokpet ro-archo angbong kachehelo dolang. Monit atum ahokpet Arnam akanghon kachepalong lapen Arnam akun kachinilong abidi ke Arnam ahin aning kachetevar henlo. Monit atum Arnam aphan methang ahokpet aning chipilo, tangte alang akai along kachini angdeng kilut chengpo. Lapusonsi, alang kun tame kachelar chengpo, Arnam aphan alang kanghon thebompo, lapen Arnam aphan alang kachini tame nangbatpo. Lasi, Arnam ahin ning kachetevar lake kai along kachini pen kachetongji akechok atovar along keleji aphan isi kachesikmek. Monit atum Arnam athengno aning chibi lote, alangtum Alangliphan kar’i aning si dochot bonta Alangli kanghon aphan kali, atheke alangtum Alangliphan kachini ave. Lapuson apor along pusitame alangtum Alangliphan asapbak kanghon ke doji tahai pusitame, lake chimitmepin kali lapen ahokpet kali. Laso atheke monit a’ok pen nangketet ajat ason ta ningduk-ningrengno pen ajok lapen ahokpet kachini pen kali. Lake ihutso keklem kangtung ajakong ajoine lapen ajak kiding kero-karcho an angthek pithekthe. Monit atum Arnam aphan kachini ave lote, latum Alangliphan kanghon ke methang kachongvai lapen jongjung kemang ateng; lapuson aphan ke chimit un’e akanghon pu un’e, mate ahokpet akanghon puta puno. Inut amonit aning ahokpet pen Arnam ahin chetevar tahai, lapen Arnam aningkehang ateng si ajat along ta mathadun tahai, bonta jongsi alang Arnam aphan kachini ave, alang chimitmepin akanghon kedoji apun avedetji. Alang keklem thekji lake ajahak kardomhem asai mate achitso amena arpu, bonta alang atiri avepin pensi klempo. Lapuson amonit atum akun ke kelarji sungpik; lapuson amonit atum ke ahokpet aphan ridunde tahai, kalite laso aphan chinidunde. Inut amonit aning aphan Arnam ahin ingthimlim si chetevar pu sitame, lake alangtum Arnam aphan kanghon aning ke ingthir’etlo pule kacheklang kali, atheke aning along Arnam kedo atum an aning along Arnam aphan kanghon doetlo pu puno. Ladak pensi mathadun nangpo komat si Arnam aphan kachiniji kiri mate kirire. Inut amonit ephong le Alangliphan kachini dolote, dak pensi klangpo alangtum aning ke Arnam ahin ingthimlim pensi chetevarlo pu, laso pensi klangpo alangtum aning along Arnam aphan ahokpet akanghon ke kimit ave. Lapuson amonit atum si aning along Arnam aphan kachepado. Methang aning aphan Arnam ahin kachetevar ke Arnam aphan kachiniji pu lapen Arnam akanghon kachepalongji apharman ahokpet atovar along kedamji apharman kachisikmek. Lake inut abangphu Arnam aphan kanghon arpu kijut pu angthek kali, mate Alangliphan ahokpet akanghon kedo angthek puta kali. Inut amonit Arnam aphan ahokpet akanghon kachepadoji abidi ke amethang aning Alanglihin kachetevar anvet henlo, lapen lake Alangli kasorjon ason pupen keklem nangji kechengsi arpu talo. Arnam aphan kanghon atum ke chethe kachiridun atumlo, lake, ahokpet kiridun lapen ahokpet Arnam aphan kar’i atumlo; latum kadokave along ta Karjong Kangthir atur do lapen Alanglihin pen aning kakirla tanglo. Latum kadokave ta Arnam akeja kelongthek atumlo.

Inut abangphu jongsi alang Arnam along preng do pu chichini lote, lake alangphan Karjong si aning kelar apotlo; lapuson kamathathek atum ke kar’i aning lapen chethe along kilutji aphan kiri doji atenglo. Bonta nang jongsi komatne angdeng along sangkok, nang ansose kaharnuk dam un’elo; Sobar aram, along kachingthanlokji kaphere dokokjilang, lapen isi angdeng along Sobar nangphan nangnepchekpo. Arnam kapatheang pen ajok monit atum amena aphan chichini unpo lapen aphi ke alangtum Arnam along preng do puta chichinipo; alangtum Alanglipen kachemeji aninghangpo lapen Alangli ningkangsamse ason doan ke padar’etpo. Lahenlo Arnam asai aron ke. Nangtum kaiketa nang kai lapen Arnam aphan kanghon along kethe-kechanji aphi kidunlok, lasi nang mena aphan kacheplangthap abidi pen chepajok etloma? Jongsi nang mena aphan kacheplangthap abidi chepajok lapen kapasiksak lapen kachepindak a’ot pen chepahelochot bonta Arnam alamthe arlo lutdamde pulote, la kepaklangji ke nang rengsap pen paphrangdundelang. Kacheplangthap abidi a’ot keman angkur kopilo? Nangsai ke nangkai along kethe-kechan dunji apharman loma? Nang ta inut Arnam amonitlo pu kemanlong si kiri loma nang? Nang ajat alongle ning chibiding sitame hala nang nangkai along asai pen kapaklang si kereng-iji ason loma; jongsi nang kacheplangthap a’ot along si ning chibirong, tangte nangning aphan ke aphong-aphong angtan phlungphitpo lapen nang nangkai along along kethe-kechan aphi kidunji atovar avelo. Arnam kenangji ke akun along kachelar, bonta nangke kaiketa angtan ahormu aphi si kekatdun; lapuson amonit atum ke akun chelar thekthelo! Kai along apun-achak kepaleji angthun along, anuttin ta isi atovar rip nangji: Alangtum kangsai, adai ke’en, lapen Arnam alamthe pen kechoklim kepaman deng nangji. Jongsi nanglong Arnam alamthe ave bonta methang ning kachethe lapen kemang aphan si chikichot, nang keklem ason doan ta nangning kehang atiri along si dochotlo. Lake, jongsi nangkai along nang the-chan ingtung pulote cho nangji, jun nangji, lapen ansose Arnam alamthe chini nangji. Alangli lamthe pen kechoklim keman abang doan atum ke halahei aphan asai pen akai along paklangpo; Alangli lamthe pen kapangthir angdeng kephophe atum anke, Alangli sai ke’enji aphan apun kali. Lasi, nangtum kopi angdeng ansi Alangli lamthe methang akai along ke’en? Nang Arnam alamthe kecho lapen kijun thek lapen halahei aphan nangmena akai kedobom angdeng pen chepangbar theklo, lapen Ne kepathe alam aphan asai pen kepaklangji atovar chelonglo pu ansi, nang sai keklem ke akechok lapen Arnam aning kehang pen chetonpo. Lapuson keklem amonit atum ansi Arnam aphan kanghonji aphan ningkehang doji.