Komatmat Amonit Atum si Akun Kachelartang Doan Halahei Atum ke Arnam Alam Ateng Ahokpet Along Lutdun Tanglo

Karjong Kangthir akrong monit along kechengsi akengkam ke, ajat cheplangple aphrangjong, monit aning monit atum along pen, jaimek heihui, hormu-hortar pen kesanponji aphan lapen Arnam alam along keponji aphan, monit aning aphan kapakroidam pima kadokave ningkibidam doan pen ta Arnam alam ke helopik si dolang, lapen angton pen ahokpet. Nang jongsi Arnam aphan kroilo, Alangli lam heihui tame nang kroivek nangji; jongsi, penang an aningkan Arnam aphan kroilo, Karjong Kangthir keponbom akrong nang chinine si do, tangte nang ke chenam ta kekroi abang ma? Arnam pen ajok kemesen abang achethe lapen kemesen amonit akai kelongji aphan ke, nang aphrangsi Alangli lam aphan kroivek nangji. Nang jongsi monit atum along Karjong Kangthir keklem asai kechengsi akengkam longdundelang, tangte nang ke kecheng atiri avelo. Jongsi nangphan apar kethan-kemum alam masap nanglitplot anta, kopuson si laso akrong along kedambom thekpo? Arnam monit aphan kapachoklim pen kengpak ahok akrong along si kachibilo puke Karjong Kangthir nonjong keklem asai ahokpet akrong along si kilutdun pulo; lake Karjong Kangthir ke’en akrong along si kengpak kachibidun pulo. Non amat, Karjong Kangthir laso akrong ke’enpon ke Arnam nonjong kaningje alamlo. Lason pen, jongsi monit atum doan Karjong Kangthir ke’enpon akrong along si kengkap chibidunlo, latum kroivek nangpo, lapen cho lapen jun nangpo, Arnam ok kachepharlotang nonjong kaningje alam. Alangli laso asai keklem ke lamthe pen keklem asailo; Alangli lam pen si ajat ta chengponlo, lapen kadokave asontin tame Alangli lam pen si chemanlo, Alangli nonjong ningje alam aphuthak. Arnam ok kachepharlotang aphuthak chinilor, mate Arnam ok kachepharlotang aphan kachini pu tame, asontin ta Alangli lam along ansose apor chipi nanglang. Jongsi kali, monit atum ke thangnat ta longlelo lapen thangnat ta kibipi avedetpo. Arnam alam kecho lapen kejun kecheng atiri kikim pen anchot si, lapen lason pen ajok Alangliphan kachini lapen Alangliphan ningpangsam, monit atum pajo pen ke Arnam pen kemesen akachepho pinchong unpo. Monit aphan ke, Alangli lam heihui kecho lapen kejun lapen lahei keklem-kedam along kibipon pen anpar ke ajat ta kemepik Arnam pen kacheraphet avelo. Lason keklem pen ajok latum doan ke Arnam amonit atum alangtum kepho alammo kachethan along arjapkluk thekpo. Monit atum chinidunlo lapen nonjong Arnam alam acho heihui kroidun theklo, latum ke Karjong Kangthir kejapontang akrong along si rengdunpo, lapen Arnam monit aphan kapachoklim along akechok akrong along si kengpak chibidunpo. Aphrang ke, monit atum Arnam akangjinso kiri pen Arnam asai lapu longdun theklo, mate ningkangsam lapen ningkarong kiri pen, bonta non ke ajat ta chelartheilo. Arnam ok kachepharlotang kaningje alam penpete, Alangli alamthe heihui ateng ahokpet kalite, monit atum Arnam akedengpon longlelo lapen Arnam si kadokave aphan ta pavirtheipo. Karjong keplengset kemesen akai kelongji aphan, monit atum aphrangsi Arnam alam cho lapen jun nanglang lapen laso ateng si keklem-kedam nangji, lapen tangte, laso kecheng atiri pen ajok, Arnam pen kemesen akachepho peman unpo. Kosonsi nang kachelangdunpo? Kepho alammo kosonsi Arnam amonit atum along kachethan karjapkluk nang kethekpo? Kopuson si nang Arnam pen kemesen akachepho pinchong thekpo?

Kosonsi nang Arnam pen kemesen akachepho nang arnivang akai along jongsi dolo pu kachetheklongji:

1. Tangte Arnam amethang ahakhi kachipi nang kroima?

2. Tangte nangning along pima Arnam alam ke ahokpet lapen kechokche avepin pu nang kroima?

3. Tangte nang ke Alangli lam doan ateng keklem abang inutlo ma?

4. Alangli aketoi alam nang dengdun peme loma? Kopilo nang keklem ke Alangli ketoi alam along athikdutji aphan?

5. Tangte la pima nang keklem doan tame Arnam aphan ningkapangsam lapen Alangli ingno athikdut si doloma?

La athak kepaklangtang ason kedoan pen, nonjong angdeng along Arnam pen kemesen akachepho nang doma avema pu nang pangrumme tahailo.

Nang jongsi Arnam aketoi alam dengdun theklo, Alangli aseme dengdunlo, lapen Karjong Kangthir keja akrong dun theklo, tangte Arnam aninghang ateng si nang ke dunbomlo. Arlo, ke nang Karjong Kangthir keja akrong klardak pen chinilo? Nonjong amat, tangte nang Karjong Kangthir kejapon akrong atengthot si cheparjanloma? Tangte nang Karjong Kangthir la akimitet akatheang along kedun kapaprapji ningkehang doloma? Arnam nangphan kelongji aphan tangte nang ninghangma? Tangte pirthe along Arnam anongthe adak-atur nang pen ajok kachepaklangji aphan ninghang doma? Tangte nanglong kopima Arnam nangphan akenangji ateng pen kelongji aphan kachepathik doloma? Jongsi, Arnam alam le kaningjetang lote, ladak ke, nanglong amat, kachepathik tame cherapdunpo, lapen laso kachepathik ke Arnam aphan si ningpangsam – jongsi lake nangphu arlo lutthiplo – lake pima Arnam alam nangning arlo athe pathe tanglo pulo. Jongsi nang le lason kachepathik duredet, nang jongsi pima thangnat akemangdam ta ave, lake pima Arnam nangning aphan chejaponpelang pulo.

Monit atum ephong le Arnam akapangri arat arlo aseke lutdunlong pemelo, akenangji doan pima Arnam latum aphan ingtuiving angdeng an ingthurdetpo. Kopuson pen si laheihui kangtuiving akenangji doan ketheklongji? Aphrang ke, lason si pulo pima monit atum along chethe ave. Pini arni, latum chethe rilo, latum Arnam amonit kemanji aphan rilo, Arnam kepadengji aphan chisiklo, Arnam kapachoklimji aphan chisiklo. Lake tangte kangtuiving angdeng kalilangma? Ahokpet ke, Arnam monit atum aphan akenangji doan ke latum kamathadam pen pajoikelang. Monit atum doan sai keklembom nangne, mate kithiji aphan – kadokave pima kenangji ke latum Arnam amonit kemandun henlo. Tangte lake kejoipik kalilangma? Kadokave nang keklem nangji ke nangning Arnam aphan kachipi lapen Alangli akethan-kemum ateng chipidundet, lapen asontin tame kichundam si dopo. Kopi apot si nang la kisungkrung pu mathalo? Chethe along kilutdun pini arni kaningje ke aphrang pen si paklardaklo; hako ahut, monit atum manghu-mangram, lapen chethe ahokpet kopiloma pu thangnat chinine. Kadokave matmat ma latum Arnam alam arjulongdet pen kachini, matmat doan Karjong Kangthir katheang lapen atur keklar kelongtang, matmat ma Arnam kapachoklim kelongtang lapen Arnam athengno kedo pen akun doan kachelartang atum – laheihui doan amonit atum ke chethe dolo. Arnam kenangji ke kereng’et atum, kithitang ahormu kali; nang jongsi kithitang, nanglong chethe ave, lapen Arnam nangphan jat ta chingkikelo, Alangli amonit angbong inutlo puke Alangli nangphan kirungji durethuchetpo. (Arnam si nangphan rung pangtui tangdetlo apot, lapen Alanglilong pen thedung ahirjume tame longdunlo, lake cheklanglo pima nangtum doan ke chethe kedo amonit atumlo, lapen Arnam pen si chethe kedo amonit atum ke vanglo.)

Inut akai along akun kachelarji aphan kiribom ahut, keklem-kedam akrong ke joike. Nang jongsi Karjong Kangthir nonjong kethanbom alam heihui arjudunthek nang keklem-kedam kacharli along, tangte nang kun doan ke kachelarji aphan unpo. Nang jongsi Karjong Kangthir kopima kethan aling si kroidun, lapen Karjong Kangthir kopima kipu lasi ridun, tangte nang ke Alangli lam ateng kekroi abang inutlo, lapen ladak si nang kun doan kachelar dopo. Monit atum akun heihui ke Karjong Kangthir nonjong kipu alam doan pen chelarponji; nang jongsi abarim akeklem-kedam ateng along lapen hako aron-atang ateng si nang dothipver, tangte nang kun doan chelar un’elo. Jongsi Karjong Kangthir alam pini arni karju lote pima monit atum doan ta kemesen amonit achethe along si lutdunlo bonta nang angtan ahormu along si cheraphet dokoklang, lapen la ahok kacheklang aphuthak manghulang lapen laphan arsikjik pen mathathe, tangte nang ke pima inut Karjong Kangthir keklem asai pen kachibidun thekthedetlo, Karjong Kangthir kejapon akrong along lutdundedet abang inutlo. Nang kun doan chelar loma chelarle ma pu kachiniji ke Karjong Kangthir nonjong kethan alam ateng chibi thekma thekthe lapen laso aphuthak ahokpet chini chinine ateng pen si langji. Lake nangtum aphrang kamathadam ason pen cheprekdak. Nang kun doan kachelar puke pima nang aphrang kachinidam ke athema nang, kangsaidun prappik, Arnam athikpet pen kethan ajok mathadamkrang alam kaningje ke ingtonkoklo; bonta lake ehin anatthu aphar akachelar anchotlang. Non amat, isi akenangsotnei ke angdeng ke Karjong Kangthir kejapon ateng kekroidun henlo: Arnam kopima kipu aphiphi dunnon, lapen Alangli kopima kaningje kroinon. Monit atum amena ke alangtum akun chelar un’e; latum kangsai lapen ado kipi phoponvek nangkok, lapen kesung kachechak lapen kapaklar nangkok, Arnam alam pen ajok, mate laso ateng pen keklem, athikpet akethan-kemum, lapen Alangli lam pen kangsirdam. Laso pen anchot si latum Arnam aphan kekroi thirklong lapen kachingkimesen longji, lapen anpar ke Alangliphan ninghang kalipin pen ke dodelo. Lake Arnam alam pen ajok kapacharkle arlo si dolo pima monit atum akun doan kachelarji aphan. Lason akeklem pen, kangsaidam, athikpet akethan-kemum, lapen Alangli lam pen kelangpon anchot si latum anpar ke kamathadamkrang titi ke do haihelo bonta alar ke kithirvet lapen kangsamjin si manpo. Kenangsotnei alam abang ke lahenlo pima latum doan Arnam nonjong kaningje alam along chehodaidun theklo, lapen Alangli keklem asai along, jongsi lake monit atum kamunthidam aren pen le kalidet, latum doan ke laheihui kamunthidam ahin kaprek chibi theklo lapen ninghang ateng si chehodailo. Kedamtang ahut, mena aphan kache’obup theklo pulote akun tame kachelardunlo pusi kachethan pen jongdam dolo, ok aphan kachepasung henlo pulo, inut abang arjon athikpet kepadothek, lapen ok akar’i doan pen kachepajokthek henlo pulo – lake akun heihui angbong eson kachelardamlo. Pini arni, madu tame chinilo pima ahokpet akun kachelar pu kethan ke Arnam alam nonjong kaningje kekroidun lapen Alangli akimi asai keklem ahok kachinidun henlo. Lason pen ajok si, monit atum Arnam aphuthak aphrangphrang akamunthidam kachini ke pavedet chenamlo, lapen latum ahokpet si Arnam aphan kachini lapen athikdut longpo. Laso pen anchot henlo kechoklim akun kachelar pu kethandam.

Monit atum chethe along kilutdun pu akiripon ke Arnam alam ateng pen anchot henlo. Kedamtang ahut, lake lasonsi pulo pima ajat tame Alangli lam ateng si pachunponlo, bonta laso cheklangdong inutnat ta theklongle. Nang jongsi nongjong akengkam along kilutdun pen chomat longlo, angton pen nang klardak longpo, lapen mohut apharman akephoji nang kemesen kecheng atiri kim-rang si chisikpo. Kopima Arnam kaningje, Alangli lam arlo kilutdunji aphan anle ardi pichotnon. Arnam le Alangli monit atum aphan ado kipiji pu kapangchenglo pu ningje lote, Alangli akangchek mate ado kipi dengnon. Arnam le monit atum aphan thinon pu toilo te, halaso asatlang dengdunnon. Nang jongsi Alangli akimitet alamthe kaningje heihui arlo si kaiketa rengdunlo tangte, mo kijut ahut anke Arnam alam pen si nangphan pachoklimpo. Arnam alam arlo koan si kilutdun loma, lapuan si akeprap pen nangphan pachoklimpo. Kopi apotlo, kachingrum aphi kachingrum, nangtum aphan Ne nangarju ma Arnam alam arlo kilutji lapen kachiniji aphan? Arnam alam along nang kacharli lapen kiripon lote, lapen Alangli lamthe ahokpet arlo lutdun lote, tangte Karjong Kangthir nanglong sai keklemji aphan avarsai dolangma. Laso apot si, nangtum kadokave doan ta Arnam asai along ajat ahin abidi pen keklem along chetongdunlo, lapen kopuan ma aphant nang kesung kachechak, mo kijut ahut ke kadokave nang “lokimo” longpo. Nangtum kapajutsi kechoklim kelongdamji aphan ke, nangtum kadokave tame Arnam alam arlo lutvek nangji. Karjong Kangthir monit atum aphan kapachoklimji ke angton aphanlo; Alangli monit atum akacherapdun nangji, Alanglilong anuttin ta munthi peme pen kapacherapdunji aphan Alangli nangji. Kopima Arnam kaningje, Alangli lam arlo kilutdunji aphan anchot le ardi pinon – lake nangtum akai aphan ansose ale kedo si manpo. Asontin tame nangtum akun kapachelar kelongji aphan ajoine si kelmbomlo. Nang le Arnam alam arlo lutdun lote, Alangli si nangning aphan chejaponpo, lapen nang asontin tame chinidun’etpi pima Arnam Alangli sai laso akengkam pen ajok kepalongji pu ninghang doan, lapen nang tame kechepathik dopo kichunji aphan. Ado kipi mate kangchek apor ahut, ajahak ladak kekroitang atum do pima lake lason henlo kepachunji asai, lapen Arnam alam aphan kroikredetlo. Laso angthek ke, latum kacharkle angdeng klemponpedetlo, lapen ado kipi apor ahut pen thangnat ta longdunde lapen chininepin si nangkapkraklo. Ladak ajahak atum komatmat lone dolo laheihui alam doan ningkibidam avepin si ahokpet kilutdun, pulo pima Arnam alam doan ke ahokpet kapachobei avepin lapen pima monit akhei atum kangchek mate ado phovek nangji. Latum chepedukpiklo laso apor ahut ke, alangtum mohut lapen alangtum kemang keledam nangji adim apharman che’olaplo, lapen latum nangpladet aphi, alangtum akun doan ke ardi kedojot pen si chelar tanglo, lapen latum Arnam aphuthak arnukkrung akachinidam tame longlo. Komatmat ma ado kipi pen nangkeplattang atum doan ke Arnam akanghon meme alam chinilo lapen ningdolo pima laso asai akengkam along ke Arnam kethedung akanghon cheraphet si latum along paklolo, pima lake Arnam akanghon kachepahai lapen akejoklo. Latum lason si pulo pima Arnam akamathadam ke kaiketa mesen, lapen pima asontin tame Arnam monit along keklem ke kanghon pen si vanglo, kelangselet kali. Komatmat ma Arnam alam kekroikredet atum doan, Alangli lam aphan kelangledet doan, ado kipi ahut kapacharkle angdeng phoponpedetlo, lapen laso angthek ke, Karjong Kangthir latum along avedetlo, lapen latum thangnat ta longledetlo. Athe komatmat ma ado kipi apor ahut kilutdun atum anke, latum le kacharkle angdeng phopondet pu tame, latum along arlo pen Karjong Kangthir sai klembomlo, lapen alangtum akai akun doan ke laso ajok chelarphunlo. Ajahak atum mathalo, kadokave la athak kachepaklang doan, kemesen asonthot, arnivang ta ningarongset pen mesen ason si plenglim, bonta latum Arnam alam pen kapacharkle angdeng along lutdundelang lapen lasi angton pen kachelar ta avedetlo, laso kemandet ke Arnam alam aphan kekroidun pememedet angtheklo. Nang jongsi Arnam alam kroidundedet tangte, Karjong Kangthir nanglong sai klemkledetpo. Arnam kacheklang ke komatmat ma Alangli lam kekroidun, lapen komatmat ma Alangli lam heihui kekroi lapen kedengdun atum doan ke Alangli kanghon longdun thekpo.

Arnam along along kejongpon angdeng along le lutdunnon, kemesen kilutdun aphan le ardi pinon, lapen laso ateng keklem-kedamji aphan le kopima rinon – lason pen anchot si nang kun along kachelarpo, laso akrong pen anchot si Arnam nangphan pachoklimpo, lapen komat amonit atum aphan si Arnam pachoklimlo ma laso pen anchot si Alangli ninghang areng along dopo. Akimi atur kelongji aphan, Alangli lam arlo si nang dovek nangji. Karjong Kangthir akejapon ke dolo bonta ephongnat apor pen anchot ke angton chok’et’e – nang akarnukkrung an dam nangji. Komatmat ma kejapon kelongtang atum kedoan bonta aphrang ke, alangtum ningarlo pen akar’i thur nangjilang, lapen latum kiriji aphan ninghang nanglang, bonta lake arji kiding an dode; latum aphan Karjong Kangthir chejaponbom nanglang. Kedamtang ahut penang an apor, Ne paklanglo Ne ningkethe pima Arnam aKarjong ke monit atum akarjong aphan cheja tahai, lasi pima latum ke alangtum akai akun heihui chelarji aphan ri tahailo, lapen Arnam akejapon kelongji kiribom ahut, pima latum alangtum mena keledamde doan chichini tahailo, lapen Alangli lam kacharliponbom ahut si alangtum along kedo aketer doan katponbomlo tahai (mena aphan kangthir kachipu, ane kachepathe, chokchok chokcheche kamunthidam, lapen do’olang). Akimi atur kelong pen ajok kachepangtangkring puchot ta choklo puke mathadetri – nanglong kedoan akechokche angton pen padartheivek nangji. Ihin anatthu lake, nangtum kemesen ason pen si lutdun nangji, lapen ihin anatthu lake, akechokche ason along kedoan aketer angton pen nang methang si nang pima che’othei nangji. Nang kaiketa nang mena aphan asat chelangbom nangji kopipi aketer si nanglong kedobomlang ma. Monit akhei dhorom akamunthidam, keklemji kar’i, ningkethe, mena aphan kangthir kachipu, lapen ane chepathe doan angton tame keterbung ason saidelo. Nang methang aphan chelang pemetha, lapen asontin tame arei chibi ponbomnon kadokave Arnam alam kepaklang ateng, kopi dhorom akamunthidam si nanglong kedoma kelangji aphan. Lahei nang chenam si pangthekthekdet aphi an si lahei nang padar thekji. Ajahak amonit atum pulo: “Karjong Kangthir nonjong keklem asai atur aphiphi kidunthek pen anchot tame lake nonke choklo. Akaprek thangnat ta mathadun nangnelo pulo.” Bonta tangte, nang dhorom akamunthidam thurthu lote, koson si lahei pen nang kachepajokpo? Tangte nang Arnam alam ateng kekroidun ke joike tinkok loma? Nang ahokpet akai along, dhorom ahormu pen ajok si akasiksak ke thurthudet tahai, lapen laheihui ahormu vang lote, nang akimi ahormu kedengdun’un pen lahei pasiksakdundetji. Laheihui doan ke ahokpet akesunglo. Nang jongsi Karjong Kangthir nonjong kethan alam aphan anchot si ridunlo, Arnam aninghang ateng nang pachun un’e. Lason keklembom’un ahut Karjong Kangthir nonjong atur nang kiribom, kopuson chokchok chokcheche akamunthidam lapen keklemji kar’i si kabirti loma nang chepangthek nangji, lapen kopi monit atum mena aphan kangthir kachipu si nanglong kedoloma, lapen kopuson aot-adur doan si Arnam angno athikdut kalima. Lapen laheihui asontin ahormu nang chepangtheklap aphi ke, lahei doan nang padartheivek nangpo. Nang kedamtang ahut akeklem lapen aot-adur doan nang kache’odet ke pini arni Karjong Kangthir kethan alam pima nang aphiphi angton pen kidun unji apharmanveklo. Kun doan akachelar, ihin anatthu lake, Arnam alam pen ajok si chunlo, lapen ahin kaprek anatthu ke, monit akhei atum tame kajalangdun ta nangji. Arnam asai keklem dolo lapen monit atum laso ateng keklemdun ta dolo, lapen la sonni ke akenangsotneilo.

Nang mohut keklem-kedam akrong along, koson pen si Arnam aninghang ateng kapachunpo? Eson kasiksaknei angdeng ke chethe along kilutdun aphan kiri, kun doan kachelarji aphan kiri, lapen ahokpet along arnukkrung kilutdun aphan kiri henlo – laso akrong lake kechoklim kichunji aphan lapen Arnam nangkelongji aphan. Nangtum doan kadokave tame Arnam ketoi alam kelong atumlo, bonta kopuson ahukum si ketoilo? Laso kejongdam ke adunthu angdeng asai alonglo; adunthu angdeng asai lake kethedung asai pima lake somindar adangpi si klempon’etji, lasi pini, nangtum nang mena akai along akun doan kachelarji aphan ri nangpo, pima mohut ke nang ahokpet pen Arnam kelong anongthe adak-atur angthek cheman tahailo Alangli sai pen ajok, nangtum doan aphan Alangli mohut asai keklem angthek pemanpo. Pini keklembom angton pen lake mohut asai kecheng atiri anujok ke’eji apharmanlo, laso pen ajok nangphan Arnam ke’enlongji lapen Alangli pharman hakhi chipi unji. Nang jongsi laso akemang keklemdam le peman lote, nang Karjong Kangthir keplengchen kelongji aphan unpo. Kopuan ma nang keklemdam akemang kepaledamji kachisik, lapuan sose si nang choklimpo. Koan ma nang ahok aphan kiri, lapuan si Karjong Kangthir asai klempo. Koan ma nang jakong laso akiri along chipi, lapuan si nang ale longpo. Karjong Kangthir tame monit atum aphan alangtum aklong’et angdeng ateng pen si pachoklimji. Ajahak amonit atum pulo pima latum doan ke Arnam kapa’enlongji aphan lapen Alangli kapachoklimji aphan ninghanghe, pima latum kealangtum aok kedomesen lapen ajat kisung mate kopai langno pen kejokplotji aphan si ar’ilo. Ajahak amonit atum ke ninghanghepin pen ta Arnam kapangri arat along lutdunlo tebonta karnuknei adong arlo kejanglapji ke ninghangdunlo. Lasonlo pulote, Arnam nang kar’i tame paplengpiji. Ajat le nang kiri, Arnam la nangpachunpipo. Lasi kopilo nang nonjong apor ahut kiri ke? Tangte la nangpachoklim loma? Tangte nang nonjong ahut akeklem-kedam lapen aot-adur doan ke Arnam kapachoklimji lapen Alangli ale kelongji apharmanvek loma? Nang arnivang kereng akai along nang kaiketa nangmena aphan chelakhabom nangji. Nang jongsi kadokave nang ning laso isinat akemang along chipibomlo pulote, Arnam chenam si nangphan pachoklimvekpo. Lason henlo Karjong Kangthir akrong. Karjong Kangthir monit atum aphan kejapon akrong ke alangtum akiridam ateng pen kepaplengpiji aphanlo. Koan ma nang Arnam kepachoklimji lapen kelongji aphan akang’it kedoma, lapuan si nanglong Karjong Kangthir asai cheklempo. Koan ma nang kiri katikuk, lapen lapuan sose si akechokche lapen aphi kachiruithu nang manpo, koan ma nang Karjong Kangthir asai keklem avarsai pen chepahelo; apor ke dambom along, Karjong Kangthir ta nangphan che’opo. Tangte nangphan Arnam kepachoklimji ninghang loma? Tangte nangphan Arnam ale kelongji ninghang ma? Tangte nangphan Arnam sai paklemji ninghang ma? Nangtum asontin keklem along kiri tame kepachoklim, ale kelong lapen Arnam aai ke’enji apharman nangji, laso pen ajok somindar along kadokave ahormu ta Arnam asai amo nangtum pen cheklang si patheklongpo. Nangtum doan ke kadokave ahormu akuru saidelo, lapen la kedoan ason angbong pima, nang pen ajok Arnam ahakhi chehok longpo lapen nangtum pen ajok anongthe adak-atur dopo – lake ahoklo pima nangtum doan ke kadokave akai angbong pen hirjume keongneilo!