Arnam Angno Chepadojoi pen Nangning Kedo

Alangli ingno chepadojoi pen nangning kedo pen anpar ta Arnam alam arlo kilutdun henlo ajat akengkam angbong ta kesungnei. Lake isi bidi kethan damlo kadokave monit atum prapjin pen labangso non kedobom ahut kilutdunji aphan. Arnam angno chepadojoi pen nangning kedoji aphan kilutji akrong ke laheihui henlo:

1. Hong angtan asai doan pen nangning chepajoknon. Arnam angno ingsamjin nangji, lapen Arnam aphan kardom ahut prekjam akethak kavepin aning le nangchipinon.

2. Ingsamjin aning penle Arnam angno donon, kecho, kijun, lapen Arnam alam le ningcheparongnon.

3. Arnam akanghon apot le ingduknon lapen chematha pemenon lapen ke nangning along Arnam asai apot arsikjik pen matha’enon.

Aphrangsi, arnam kardom amo pen si pangcheng nangpo. Prekjam akethak kavepin aning penle arnam ardom non lapen kaiketa isi kithikvet apor. Apor kadurepik angbong tame, sai kachingkhanpik ahut tame, mate kopine chemandet tame, kai ateng le ardombomnon, lapen kai asonthot le Arnam alam cho-junvernon. Koan ma nang Arnam alam kecho-kejun, nangrep-nangrei ajat le cheplang tame, karjong pen nang thedung ningarong doji, lapen monit, kepho meme ason, mate nangtebok-terei ajat pen tame nangphan pasiksak un’edetji. Arnam aphan jongsi nang ning along mesen pen chematha peme pulote, hong angtan kopima kacheman nang mathadunkrangji. Lake lahenlo isi angdeng keman’un pu kehokdamlo. Kachoardom penle pangchengnon: Arnam angno kedojoi pen kachoardom henlo akemenei. Laso aphi, Arnam alam chonon lapen junnon, arsikjik pen matha’e ra Arnam alam along katheang rinon, keklemji le aloti rinon, Alangli lam kaningje along Arnam akemang chininon, lapen kithirthip pen lahei alam chini pemenon. Kejoike tahaiji, nang ning along Arnam aphan kapateboklong ke nangphan thang siksak avedetji, Arnam akanghon kachemathadam peme lapen Arnam alam arsikjik pen kamathadam, hong angtan ason nangpasiksak dundepin pen. Nang ning jongsi ningkangsam penang an angdeng longlo pute, joijoi pen nang nangning matha parnuk unpo lapen, nangmethang along amatlo, Arnam akanghon chemathadam peme lapen Alangli dungme ahokpet pen patebok unpo, nangdung-nangrei ajat le cheplang tame, nang jongsi kepajut isi angdeng lelo pulote nangning along mesen kachorothek si doverpo, lapen lake kardom pen anpar ta memulang. Tangte nang isi man-peng angdeng long unpo. Athak kepaklangpontang heihui alam doan le nang chodenglonglo pulote, Arnam angno nangning kangsam ahokpet si dolo pu cheklangdakpo. Lahenlo kecheng si kacharli nangji akethanlo. Monit atum jongsi Arnam angno ningkangsam pen dolonglo pute laso aphi si latum aphan Karjong Kangthir papho unjima, lapen Karjong Kangthir adak-atur pen patheangjima, lapen laso aphi si Arnam along ahokpet pen dolong rappet longjima, Arnam aningkehang chinidun thekpoma anpar ta Karjong Kangthir akeja longdunpoma. Tangte latum karjong akai-achethe along choklim akrong si lutdunlonglo. Arnam angno kesomdunlong aseke jongsi isi angdeng akarnuk an lelo pute, lapen latum amena aphan chitidet unlo pulote, amena aphan ne thangta kali pu chichinilo te, lapen Arnam alam along kedodun pulote, latum aning tangte ahokpet ningkangsam Arnam angno dolo. Mena aphan ardi chepavedet unlo, ahirjuno chipi unlo, lapen chitidet unlo pulote lake Arnam asai keklem kechunponlo, lapen monit atum methang jongjung ke kelm un’e. Apotsi, Arnam angno chepadojoi pen nangning kedo kacharlivek nangji akethanlo lapen la prapjin pen lutdun nangpo. Ajahak amonit atum ke, Arnam angno kejoike pen ningkangsam kedoji kethekthedet anchot kali tebonta kardom ahut tame Arnam angno aning chepadojoi thekthe. Lake Arnam akamathadam pen aber si dokoklo! Arnam angno nangning jongsi ningkangsam ave lote, Karjong Kangthir akeja longjima? Nang jongsi inut Arnam angno ningkangsam pen kave abang pulote, komatne le nanghatput tame langdundetpo, mate bang atum le chingkivoi lote arjudundetpo, lapen bang atum le kopine klembom lote nang ta chingbedundetpo, lalo pulote nang Arnam akereng along rengdundelang. Arnam angno jongsi nangning ahokpet ningkangsam dolo pulote, hong angtan apirthe kopi-kosonma nangphan nangpasiksak un’edetji, mate monit, kepho meme ason lapen ason-amung le plengset tame. Labangso along jongsi lut etlo pute, kamatha akeheno lapen kememedet ason-amung – jasemet monit atum kamunthidam alam, kai kerengdun kopi-kosonma pu heihui, monit angbong kaike kachetonte, lapen bidi-sore doan, lapen do’olang – laheihui ke amena amat si kak’etpo. Pipotma pulote nang ke kaike Arnam alam si arsikjik pen matha’elo, lapen nangning ke Arnam adungme si patebokverlo lapen arnivang kedobom Arnam alam pen si chepaplengsetlo, nang chichininepin si halahei akeheno ason-amung doan ke prai’etpo. Jongsi akeme lapen akimi ason-amung le nang paplengset lote, aban akeheno ahormu anke adim chelongdundelo, lasi akeheno ahormu aphan ke mathadunletledet nangpo. Nang mena si lahei kachelana unji aphan chithikthek nangpo. Arnam angno ningkangsam pen kedoji le mathanon, Arnam alam cho-jun ra ningcheparongnon nang thek’an pen, thek’an pen ke Arnam aphan kero alun le lunnon, lapen Arnam aphan nanglong sai kapaklemji avarsai thopinon, athema Arnam nonke monit akhei aphan choklim si kenangji, lapen Alangli nangning aphan si kar’i kedo; Alangli karjong si nangning aphan japonlo lapen jongsi Karjong Kangthir akerap pen klemlo pulote, Arnam akerengbom along rengdunlo, Arnam aphan nang ningpangsamlo monit akai si paman kangtung. Alangli ke kemesen asengvesi kenangji; alangli akarjong ke nangtum aning aphan tovar than ingtung lapen Karjong Kangthir koson laso abidi aputhak si than-pare ningkehang, Arnam along doduntha nang Arnam aphan aning kehang ateng paplengtha. Jongsi nang Arnam kedo kethak atengpen rengdunji ninghang pulote lapen Arnam koan ma kethan laso atengpen hokpet atovar dunbom pulotangte arnisi ketheang lapen Karjong Kangthir akerap dopo. Arnam alam along jongsi nang kerengdun ardi chipilo te lapen Karjong Kangthir adak-atur akatheang ahokpet pen kelongdunji aphan si kachingrum along apor chipidun lote, halahei dhorom akethanthap alam lapen mena aphan kechoklim abnag pu kachipu lapen mena aphan si ale kachepadochot doan ke prailappo, lapen kopuson si Arnam apharman nang kachepangdangpi thekpoma, kosonsi Arnam aphan kanghon thekji, lapen kosonsi Arnam aphan ningpangsam thekjima pu chinipo. Lapen anpar ke nang chichininepin si, halahei Arnam aphan ale kave ason-amung doan ke nangphu tarlok pen amat si angton pen pavelappo.

Alangli arnivang kedobom alam akecho-kejunbom ahut Arnam alam arsikjik pen kamatha’e lapen kachoardom pon henlo Arnam angno ningkangsam kedoji kechengsi akengkamlo. Nang jongsi Arnam angno ahokpet pen ningkangsam dotheklo pute, tangte Karjong Kangthir adak-atur akatheang kajalang nanglong kaike dopo. Kadokave kangthir’et karjong akai ke Arnam athengno ningkangsam pen kedo si kelong. Arnam aphan chardom ahut, nang ningkangsam pen si do nangji, lapen si karjong kangthir nangphan pajok ponpo. Nang jongsi Arnam athengno ningkangsam pen Arnam alam kecho lapen kejunlo tangte, la ansi nang ketheang lapen khelandang dopo, lapen ahokpet klardak Arnam alamthe chini’unpo. Nang kaike keklembom asai-amo Arnam aphan kachematha lapen kajalang lapen Arnam aphan nangning along kapachetebok lote, Arnam athengno nang ningkangsam longpo, nang kemesen ahokpet Arnam pen chetebok muchotpo, kechoklim ahokpet Arnam akanghon lapen Alangli sai chiniponpo, lapen ahokpet kamathadam karsik lapen Arnam akemang aphuthak kachinghondun cheklang pemepo. Nang koan ma Arnam athengno ningchingsamthek, la ansose nangphan pakhelandang si nang kahenodak akun nangmena pachichini thekpo, kopima nang kadure, kopima nang kilutdun nangji, kopi asai ma nang keklempi nangji, lapen konatsi nang kechokche kedo. La kadokave tame ning ingsamjin pen Arnam athengno si longponpo. Jongsi nang ahokpet ning aklong pen Arnam athengno ningkangsam do lote, kamanghumeme karjong asai nang chodeng longpo, non ahut Arnam kopima nangphan aningkehang la kachiniji aphan, Arnam alam akarnukrung kachini pemeji aphan, Arnam alam acho-arak kachiniji aphan, kenangsot Arnam alam kelongji aphan, Arnam alam angkangpi, lapen nang keklem kacharliji aloti mesen lapen klardak pen si thekpon longpo. Jongsi nang dorlim ningkangsam nang karjong aphan papleng thekthe pulote, nangphan masapso si karjong kangthir nangpon chotpo; nang methang aphan arlo pen jakong the’olo pu chemathapo lapen penang an ningkarong lapen ningchingsam dolo pusi mathapo, bonta nang thangnat akarnukkrung pen deng longledetpo. Ne pulo aphrang ta: Jongsi monit atum methang ajakong masapso ta sai klem’i’e pulote, alangtum Neli lamthe karjulongji lapen Neli arje ketheklongji aphan akesung doji. Lake Arnam athengno matne ningkangsam arnukkrung pen kelong aphan si kipudamlo, lapen kachepaklangthap asai pen kalidet nangji. Komatne abangphu hokpet pen Arnam athengno ningkangsam pen dothekserlo pulote pirthe pen kacherap’lok ason doan pen amethang chepajok thekpo, lapen Arnam amar chepahemphu longpo. Arnam athengno ahokpet pen ningchepangsam kethekthe atum an ke mena aphan kekhang kavepin pen ningchepangsam si thekchotpo. Arnam athengno madu tame ningchepangsamthek atum anke Arnam angno ingthirjir atumlo lapen Arnam aphan kar’ithek atumlo. Komat ma Arnam athengno ningkangsamthek lote chethe aphan ardi pithek, karjong akajalang ardi kepithek, Arnam alam heihui kang’it, lapen ahokpet tovar kedam. Komat ma Arnam angno ningkangsam thekthe lapen ningkangsamji aphan ta charlile pulote thangta kali mandetji lapen athak pen chotpo, pirthe aphan si ardi pipo lapen chethe aphan kalidetji; jongsi latum Arnam aphan kroi pu tame latum lake athak lam champlang anchotlo. Alangli thengno ningkachepangsamthek amonit atum anke Arnam angton kapachoklim lapen kapamesen pen kibi atum henlo. Laso apot si, Arnam athengno ningkangsam pen kedo atum ke kangjinso longsi thedung ahirjume longlo. Monit atum Arnam alam arnisi angbong kecho-kujunji apor kachipipe anke, latum ke angtan ason-amung pen si sai chepachingkin’ilo lapen kai kilutdunji aphan ke ardi piparpe – lapuson atum ke aning kaheno atum saidelo lapen mohut kechan-kejar aphan mathadammek avelo. Arnam amonit atum si Arnam athengno ningkangsam pen dothekji lapen ahokpet Arnam pen karjong kajalangthek doji.

Arnam athengno vang pen Alangli lamthe nangkai along kedeng, nang aphrangsi ke Arnam athengno ningkangsam do nanglang. Arnam angno ningkangsam dodet aphi si Arnam nangphan patheangji lapen kethek-kachini ajakong nangpiji. Arnam angno koan ma monit atum ningchepangsamthek, lapu ansi Arnam akatheang lapen kapakhelan ason longdunpo. Lahei kelongji aphan monit atum ingthir’et lapen kekroi thirklong nangji; lason pen si choklim cheman unji. Karjong akai along kelutdunji aphan kenangsotnei ke Arnam athengno ningkangsam pen kedo henlo. Nang jongsi Arnam athengno ningkangsam pen kedothek henlo nangphan karjong aseke kipi mesenpo. Nang ning jongsi Arnam angno ningkangsam do thekthe pulote, nang ke Karjong Kangthir keklem asai longlelo. Nang ning jongsi Arnam athengno ningkangsam pen dothek pulote ajat asai le nang klem tame, nang ke Arnam along si kedo abanglo. Nang ning jongsi Arnam angno ningkangsam pen dolo lapen ajat asai le klem tame Arnam pen si katebok dolo te, lake nang Arnam angno si ningkangsam pen kedothek abang pusi hokpo. Jongsi, nang le bang pen lam chingkibom lapen dambom ahut, nang lasonsi ningjelo, “Ne ning ke Arnam pen si chetebokhet, lapen angtan ason-amung aphan mathadunde, lapen Ne Arnam angno ningkangsam pen dothek,” pulote nang ke Arnam angno ningkangsam pen kedothek abanglo. Nang ning aphan angtan ason-amung ahin kapachingbe dundetji asai pen ke chepahelonon, mate nangtum aning Arnam pen pacheheloji amonit atum pen ke chelangrinon. Ajat ason tame Arnam adung nangtum kapatebokji pen kekhamkhe doan aphan ke, achar bikoknon, mate kedo chepahelovingnon. Lake nangphan kethedung ale si manpo. Nonke Karjong Kangthir thedung asai keklemji aphan apor chokvetlo, nonke Arnam amena si monit aphan kapakeng pemeji aporlo. Jongsi, non laso apor ahut, nang Arnam angno ningkangsam pen do thekthelang pulote, tangte nang ke Arnam recho anghoi adung keledunthekji abang kalilo. Nang jongsi Arnam pen anpar kaprek ahormu si rilo pute, Arnam nangphan kapachok pemeji kaprek atovar avedetpo. Komat ma laheihui Arnam pen nangkebar alam karjulong lapen Alangli ingno ningkangsam pen do thekthedetlang pu atum doan ke nonpu ahok aphan kanghonhe lapen Arnam aphan kachinghonhe atum chenamlo. Nang jongsi nonjong le nang mena aphan chipidetdelang pulote, kopilo nang kanghonglang? Nang mena aphan kachehodaidetji pulote Arnam angno kedojoi pen nangning kedo henlo. Lalo pulote kechoklim kepajir binonglo. Madu tame Arnam aphan aning kachipi peme atum ke Arnam pen akechokpet longdun pemepo. Ajat tame, kopi-koson tame, la nangphan pasiksak un’e; nang le ningdokdedet mate chetong nangvek sitame, mate ningoipik lapen kerem le chetong nangkok tame, nang ning ke Arnam angno ningkangsam pen do nangji. Ajat le nangphrang phopon tame – ingsu-arhang, keduk-kesung, langret-lang’ei heihui le dothip tame, mate prekjam asat le pho tame – nang ning ke Arnam angno kaike ta ningkangsam pen do nangji; lason henlo kechoklim atovar kacheman’iji. Nang jongsi Arnam angno ningkangsam pen dolo theklo te non Arnam kethanbom alam heihui nang klardak longdunpo. Laso aphi nang ansose keklem-charlilong chok muchotpo lapen akachelar avepin pen Karjong Kangthir akatheang lapen adak-atur longpo, Arnam akamathadam alam thedung klarsap pen dengdun peme pen nang keklem-kedam atovar klardak longponpo, Karjong Kangthir akethan-kemum lapen akeja dengdun pemenon, lapen Karjong Kangthir akethan-kemum ateng le kedoji aphan chenam chisikvetnon. Laheihei henlo Arnam angno ningkangsam pen kedothek binong pu angtheklo. Monit atum Arnam alam amokha klardak longlelang pulote, kecharliji atovar avelo, Arnam akamathadam alam longdundelo, mate kopusonsi kacharli nangji ta chininelo, lalo pulote latum aning Arnam angnong ningkangsam pen dodelang. Arnam angno ningkangsam pen kedo pu akemangdam ke angthikdut lapen choklim pen keklem-kedam aphan, kemesen aphan kiri lapen Arnam alam klardak pen kelong, lapen kejutsi ke ahok pu aphuthak kachiniji lapen Arnam aphan kachiniji aphanlo.

Jongsi nangning Arnam angno ningkangsam pen dodelang pulote, Arnam nangphan apun-achak pachoklim un’edetji. Ning kangsam kave lepute ning kave atenglo, lapen ning kave amonit ke Arnam athengno ning kangsam do un’e; lapuson amonit chinine detji koan ma Arnam sai keklem, mate koan ma Alangli kethan kaningje, mate halatum chinine detji kosonsi keklem nangji. Tangte la aning kavedet abangphu kalima? Aning kave abangphu Arnam athengo ning kangsam do unjima? Arnam monit atum aphan pakeng-pachok un’e jongsi aning ave pute – latum ke anghor kedo amarat pen thang kacheprek avelo. Arnam klardak lapen pachinidak pen ningjelo, tebonta nangning elongvet dothip, lapen nang Arnam athengno ning kangsam pen do thekthelang. Nang lam kaningje thekthe marat ma? Ajahak amonit atum akeheno abe chinghoi si Arnam angno ningkangsam do pu klem. Ketun-kedang apor ahut, halatum tun-dangde, lapen arnivang hem asai keklem nangji apor, halatum klemkle, sita halatum chardom-chardi pensi apor padamji. Arnam athengno ning kangsam kedo pule tun-dangdedet mate hem asai klemkledet nangji kali, mate kai bochechedetji puta kali; tebonta, ajat kangsamjin apor ahut tame Arnam angno chepadojoi pen nangning kedothek pu aphan, lapen ning arlo along kaike ta Arnam aphan dim-klong kepek henlo. Nang Arnam aphan chardom lote, nang kengphu petong peme penle Arnam thengno chardom nangji, nang hem asai klembom mate tun-dang bom, Arnam athengno dojoi pen nangning do nangji, Arnam alam heihui ningarlo matha’enon, mate Arnam aphan kero alun lunnon. Nang kopi-koson le chetongnang tame, nang methang si abe kachinghoi atovar do nangji, nang un’an pen bor’i nangji nangning Arnam along chepatebokhetji aphan, lapen nang jakong doan pen si Arnam athengno chepadojoi pen nangning kedoji aphan. Jongsi saijokje phonangkok lote, inutvet tame chardomnon; jongsi kepho nangne pulote, nangning Arnam pen chepatebok non nang sai klembom ahut tame. Nang Arnam alamt kecho-kejun theklo te, chonon lapen junnon Alangli lamthe; nang jongsi chardom theklo te, chardom non; nang Arnam aphan arsikjit pen matha theklo te, Alangliphan matha pemenon. Kaprek pen langdam lote, kilutdun longji aphan avarmon kejoike aling un’an nang methang aphan seke chipinon. Penang an amonit atum Arnam athengno ning kangsam pen dothek tahai thangnat phophepin ahut, sita kopine phodet lepute, latum aning pherpharlarpo. Halason ke ahokpet Arnam athengno ningkangsam kedo kali. Ahokpet atovar kachiniji te lahenlo: Ajat kesung-keboi le kepho do tame ning ke Arnam aphan che’o’edet nangji, mate angtan amonit atum, kepho ason, ason-amung heihui pen pasiksakse un’edet nangji, lapen la an lote halaso amonit henlo ahokpet Arnam athengno ning kangsam dothek abanglo. Penang an amonit atum pulo, latum jongsi chingrum adim along chardom lote, latum aning Arnam athengno ningkangsam dothek pulo, bonta bang atum pen armu kachetong along pulote latum Arnam athengno ningkangsam long un’e pulo, lapen halatum kematha prekdamdakpo. Lake Arnam athengno ningkangsam kedo kali. Pini, penang an amonit atum laso angdeng si dolo, alangtum kaike ta Arnam athengno ningkangsam pen kedo ave detlo. Lasi, nangtum un’an pen ke laso adim along keklemji aphan ansose bor’ipon nangji, angdeng-pen-angdeng keklempon, kai dingpi akacharlipon kechoklim atovar aphan, lapen Arnam pen kepachoklim kedodun longji aphan atovar kedam pangchengnon.