Khristo Atiri ke Sining Athak Kedo Po Kar’idam Aphan Athikpet Henlo

Arnam monit nangcheparje aphan ke Khristo pulo, lapen Khristo ke ok chotlo tame Arnam Akarjong plengsetlo. Laso aok ke pima madu amonit aok pen cheprekdaklo. Laso akacheprek kedo ke athema Khristo ke ok lapen vi anchot kalidet, Alangli ke Karjong si nangchepharlo tanglo. Alangli ke jongjong monit atheng lapen angton choklim kangthirpet sonni tame dolo. Alanglison akangthirpet ke masu amonit along ta avelo. Alangli jongjong monit atheng ke kadokave Alangli ok along jongjong amo keklem along dopetlo, tebonta Alangli kangthirpet ke Arnam Amethang asai si cheklemlo. Alangli monit jongjong atheng mate kangthirpet pu sitame, sonni tame sining athak kedo Po akar’idam along si hodaipetlo. Khristo atiri ke Karjong henlo, lake pima, kangthirpet henlo. Laso apot si, Alangli atiri ke pima Arnam Amethang apotlo; laso atiri ke Alangli mena asai aphan patoradundelo, lapen Alangli mena asai kaphangnodetji ke pima Alangli chenam si thangnat asai ta klem un’edetpo, mate Alangli mena akar’idam aphuthak abirudhe kithur alam ke pima Alangli thangnat ta ningjeji haihelo. Laso apot si, Arnam monit nangcheparje abang ke pima Alangli mena kisik-kedang aphan pasiksakdun asai ke thangnat chenam si klemklelo. Lahenlo kopima kadokave amonit atum tame kachinidun nangji. Karjong Kangthir asai akedoivet ke monit aphan kapajok henlo, lapen lake Arnam amena kisik-kedang aphan ajoinelo. Lasonthot si, Khristo asai tame monit aphan kapajok henlo, lapen lake Arnam akar’idam aphan ajoinelo. Lason apot si pima Arnam ok chemanlo, Alangli chichinilo Alangli atiri Alangli ok along, lason si pima Alangli ok ke Alangli sai keklem’iji aphan dorphlup manlo. Laso apot si, kadokave Arnam Akarjong asai ke monit nangkacheparje apor ahut Khristo asai si adular klemlaplo, lapen la kadokave asai monit nangkacheparje apor ahut keklem abinong’et anke Khristo asai saidelo. Lake akaprek akai ahut asai pen pachingvuikung un’elo. Lapen Arnam ok cheman tangdetlo apot, Alangli ok angthek pen si Alangli sai cheklemlo; Alangli ok cheman tangdetlo apot, Alangli lasi pima Alangli keklemji asai ok along amat si pachunponlo. Arnam Akarjong tame mate Khristo pusi tame, sonni ta Arnam Amethang amatlo, lapen Alangli keklem asai ke pima Alangli ninghang atenglo lapen pima Alangli keklemji ateng pen si birta keme asai klemponlo.

Arnam atiri amat si kachepahemphu ajakong che’otthiplo, bonta Alangli ke pima Alanglilong pen kevang ahukum along angton pen chehodaidet unlo. Karjong asailo pu tame mate ok keklem asai sitame, la pasonni tame lahinhin chedansai avelo. Arnam Akarjong ke kadokave pinchongtang ason doan aphan chepahemphulo. Laso aok Arnam atiri kedo pen tame kachepahemphu ajakong dolo, bonta Arnam ok along abang ke pima sining athak kedo Po akar’idam ateng kekroidun asai ansi pima kadokave klemponlo. Lason ke madu amonit tame longdamdelo mate pinchong ta un’elo. Arnam Amethang amat si chepahemphulo, bonta Alangli ok ke Alangli kachepahemphu along chipidetlo. Lahenlo kopima kejongdam ke pima lasonsi pulo “Khristo ke Po Arnam akar’idam ateng chekroidunlo.” Arnam ke Karjonglo lapen kepajok asai klempon unlo, lasonsi Arnam ke monit ta cheman unlo. Ajat angdeng tame, Arnam Amethang si Alangli mena asai cheklemlo; Alangli pasiksakdunde mate chejokdundelo, Alangli ke pima pacheprekdundak asai amat si keklem dunji puke durepik anlo, athe Karjong lapen ok atum sonni keklempon asai atiri tame isinatlo. Karjong tame mate ok sitame, sonni asai ta isinat akar’idam lapen isinat asai kisik-kedangpon si paplenglo. Karjong lapen ok angbong ke sonni ta cheprekdak apun-achak so puvoiphit tame, alangtum atiri doan ke isinatli; sonni ta Arnam Amethang atiri si dolo, lapen Arnam Amethang angthek si dolo. Arnam Amethang ke thangnat ta athikpetpedet aot-adur ke cheparidengdelo; Alangli atiri ke mesen. Alangli ke kadokave akeme lapen akechokpet kethan alamlo, lason thakthak si kadokave kanghonlo. Ok along lethot tame, Arnam ke pima Po Arnam alar karjujedet asai thangnat ta klemklelo. Alangli kai athok-ajir kachipi nangkok ahut antame, Alangli ke aning aklong’et pen keklemdetji si aninghangponlo, lapen Alangli thangnat ta akaprek akachongvai rirelo. Arnam ke mena akangthirpet apot cheparoka mate mena aphan ardi kachipivong akun avelo, mate halahei ane kachepathe lapen kethek kachekrong pu avelo; Alanglilong ke kaheno kekeng un’edet aot avelo. Asontin pima Arnam alam kapatepek anke Sobar pen si vanglo; Sobar henlo kadokave aketerbung lapen kaheno doan nangketet adimlo. Laso athe ke pima monit ke halehei Sobar ason kachinglit aot-adur dolo athema monit aphan ke Sobar si phangno tanglo lapen Sobar asema dokok lo Khristo aphan ke Sobar phangnonepinlang, lasi Alangli ke Arnam aot-adur doan si chepindengpet chotlo, lapen Sobar aot-adur anke isinat ta avedetlo. Koanma asai kisung do mate ok akeboidet pu sitame, Arnam, Alangli ok along kedobom ahut ke, pima Arnam Amethang asai aphan kapatoradun puke thangnat ta klemkledetpo, Po Arnam akar’idam aphan athikpetpedet si che’obupji puke helopik alamlo. Alangli Po Arnam aningkehang akar’idam aphan kachedanji alar ke ok along aduk kedo si chechakpo; lake Jisu le kardom ahut kaningje asonthotlo, “Po, jongsi unte labangso aharlung Nelong pen pahelotha: Bonta Nening kehang kali, Nangli ning kehang le paplengnang.” Monit atum alangtum mena kachongvai si pemanlo, bonta Khristo ke lason kali. Alanglilong ke Arnam Amethang angthek dolo puvoiphit tame, Alangli ke nonpu Po Arnam akar’idam ateng si ridunlo, lapen kopima Po Arnam Alangliphan kepek ateng si chepaplenglo, ok ahin kelangdam ateng penlo. Lake kopine pima monit ke kelong un’edet asonlo. Pima atheke Sobar pen kevang apot anke Arnam atiri do un’elo; kedoji ke Arnam alam karjuje lapen kachekhang anvetlo. Lake Arnam alam angton pen arju un’elo, Arnam akar’idam sitame kekroi pen keklemji puke durepiklo. Kadokave amonit atum Khristo pen anpar anke pima Arnam aphan kekhang asai si klemji tahai, lapen inutnat amonit tame Arnam kepekpon asai kacheklemdetji puke un’elo; inutnat tame alangtum adenglo Arnam kisik-kedang ateng keklem nangji pu kedeng’un abang avelo. Khristo atiri ke Po Arnam akar’idam along kachehodaidundet henlo; Arnam aphan athikpet kalidet puke Sobar aot-adurlo. Laheihui sonni apun-achak ke chingbarbelo, lapen komatma Sobar apun-achak kedo atum an aphan ke Khristo pu hok un’elo. Laso athe si pima monit ke Arnam asai Alangli dular keklemji pu un’elo athema monit along ke Arnam atiri thangnat ta avelo. Monit Arnam apharman keklem ke monit jongjung aningkehang lapen mohut kephodamji aphan ajoine penlo, bonta Khristo ke Po Arnam akar’idam ateng pen si klem-damlo.

Khristo monit atheng aphan ke Alangli akangthirpet si chariponlo. Alangli ke ok along si dolo puvoiphit tame, Alangli jongjong amonit atheng ke angton pen pima hala monit ok along ason kalidet. Alangli ke Alangli mena keprekjek aot-adur dolo, lapen lathot sitame Alangli kangthirpet abang si langchariponlo. Alangli akangthirpet ke thangnat ta keboidet avelo; Khristo akeboidet pu kejongdam ke pima Alangli monit jongjong atheng aphanlo. Isi pathikvet angdeng an, laso keboidet ajok Alangli kangthirpet khangdunlo, bonta lason ahoi ke isi pathikvet angkang lapen apor anchot si dolo, lapen ahoi-adui kijut avelo. Alangli kangthirpet asai keklemji aphan apor nanglelo pulote, Alangli monit jongjong atheng langdamdepin pen si klemponlo. Khristo monit jongjong atheng ke angton pen Alangli akangthirpetnei si chejaponlo. Alangli monit jongjong atheng kemesen akai pen anpar, kadokave akaprek Alangli monit jongjong atheng asai amo anke Alangli akangthirpetnei si kebaipon, angtheklo, lapen kachejaponlo. Khristo along monit jongjong atheng dolo puvoiphit tame, lake Alangli kangthirpetnei asai along phangnodundelo, lapen lake klardaklo athema Khristo monit jongjong atheng ke Alangli kangthirpetnei si chejaponlo; Alangli monit jongjong atheng ke akaprek pen kosonsi kachephodun nangjima thekthelang puvoiphit tame, lake Alangli kangthirpet kemesen asai keklempon along pasiksakdundelo. Pima Alangli monit jongjong atheng ke henonelang pu Ne kaningjedam ke, Ne kipudam ke pima Khristo monit jongjong atheng aphan ke Alangli akangthirpetnei si kethan-kemumdunphit unlo, lapen pima Alangli ke jongjong amonit pen anpar ke kangtuiving kachinidamthek ason si cheparideng dolo. Alangli monit jongjong atheng kachelonnei ke Alangli sai along kangthirpet pen si kachejapon henlo; Alangli monit atheng ke kangthirpetnei asai alam thanthek pemenei unlo, lapen lason asai along chepidundet ansose si unlo. Arnam ok along sai keklem lote, Alangli ke pima monit ok along kedo ahut kepapleng nangji doan adeng ateng pen chepahelolelo; Alangli ke ahokpet ningarlo pen sining angsong Arnam aphan archo theklo. Alanglilong ke Arnam atiri dolo, lapen Alangli angthek ke pima Arnam Amethang amatlo. Lake pima Alangli pirthe along vanglo lapen kapinchongtang abang nangchemanlo pu anchotlo, athak abang arpum pinchongtang abang penlo lapen, nonke pima Alangli aphrang kavedet monit atheng si cheparidengponlo. Alangli ke sining angsong Arnam aphan archo theklo; lake Arnam Amethang abang amatlo lapen lake monit aphan cheprekjek khangjanglo. Alangli angthek ke Arnam Amethang amatlo. Lake pima ok ahin kelangdam ateng pen si Alangli Arnam aphan archoponlo; laso apot si, laso alamthe “sining angsong Arnam aphan Khristo karcho” puke kechokche kali. Kopima Alangli monit aphan kehang ke keklardak pen Alangli mena abang aphan henlo; Alangli ke kadokave pima Alangli monit aphan lahei ason hanghe aphrang kehang anke chenam si longtheilo. Alangli Amethang amat lahei pen jokjetik ke Alangli akaprek aphan thangnat ta kehangdam avelo, athe la kadokave ta Alangli bang along si dopetlo. Kosonsi Alangli sai Alangli cheklemloma langdamdepin pen, Alangli ke pima Arnam alam karjujedet amo anke klemkledetji. Kopima Alangli monit aphan kehang pu sitame, monit kelong un’edet atheke abat anke pima ajat akehang ta lit un’elo. Kadokave pima Alangli keklem anke athe Arnam akar’idam atenglo lapen ke Alangli kisik-kedangdam aphan ajoinelo. Khristo akangthirpetnei ke kadokave monit atum pen abatlo; laso apot si, Alangli ke kadokave pinchongtang api doan aphan chepahemphu akangtuineilo. Laso kachepahemphu ajakong ke Alangli kangthirpetlo, pima lake, Arnam Amethang akun lapen abang amatlo, atheke Alangli angthek si jongdamlo. Laso apot si, koanma Alangli monit jongjong atheng do pu tame, lake patepek un’elo pima Alanglilong ke Arnam Amethang angthek doveklo; koloso along pen Alangli kaningjedam alam athe do lapen koson pen si Alangli Arnam akar’idam alam arju pu sitame, lake pudam un’elo pima Alangli ke Arnam Amethang amat kali. Kiludet lapen kachinikrang amonit atum si Khristo jongjong monit atheng aphan ke akechokchedet pu kipudam dolo. Koson si Alangli kaningjedam lapen Alangli kangthirpet abang kachepangdak pu sitame, monit ke pima Alangli henlo Khristo pu pangthekdam un’elo. Lapen ansose pima Khristo Alangli athikpet lapen kachepabihek chepaklangpon, lapuan sose si kiludet amonit atum ke Khristo aphan langkrang muchotlo. Komatmatma Alangliphan ke kepatepekdet lapen alam kedengdedet aning-angthin kachibi atum ta dolo, tebonta halahei cheparokadong arje “thedung amonit atum” aphan tarlok si archo’ilo. Monit akachekhang lapen Arnam aphan athikpet kali pu kevang ke ahoklo pima Arnam ok chepharlo abang atiri Arnam akar’idam aphan kachipidundet pen henlo, lason thakthak si Khristo jongjong monit atheng pen apotlo; lahenlo monit akachekhangdun lapen athikpet kalidet Arnam aphan kechengpon. Jongsi Khristo le Alangli monit atheng chepaklangkledet mate kapinchongtang abang ahin kelangdam ateng pen Po Arnam akar’idam aphan ridundedet, bonta kethedungpi monit atheng si cheparidengronglo pu asonte, monit angbong lason athikpetpedet ke avedetji apotlo. Monit ke kaiketa ketheklongledet a’Arnam sining angsong kedo aphan kekroiji ningkehangdam ke athema sining athak Arnam le monit atheng avelo, mate isinat ta pinchongtang abang ateng amung cheparidengdelo. Laso apot si monit ke kaiketa Alangliphan kethenei aman-apeng kipi pen si dolo, bonta Khristo aphan ke kedengdedetji aning-angthin si chibilo.

Khristo pirthe along ke Arnam Amethang adular sai klem unlo puvoiphit tame, Alangli ke kadokave amonit atum aphan Alangli ok along arje kachepaklangji pu aningkehangdam pen kalilo. Alangli kevang ke pima kadokave amonit atum Alangliphan palangnang pu aphan kali; Alangli kevang ke monit aphan Alangli rideng pen kachejapon longji pulo, lapen monit laso pen ajok akimi akai along lutdunpo. Khristo ok along keklem amo doan ke Arnam Amethang asai aphan ajoinelo, lake pima, Arnam monit along asai aphan ajoklo, lapen monit aphan Alangli ok atiri apot angton pachinilapnang pu kalilo. Kosonsi Alangli sai klem-damlo pu tame, monit kelongdam un’edet pen abat atheke Alangli puan ke klemklelo. Kosonma Alangli klem-dam pu sitame, Alangli ok along keklempon ke jongjong monit atheng penlo, lapen monit aphan choklim ahok Arnam arje amohor chepaklangkledetlo. Batdunthu pen, Alangli sai ok along ke monit aphan kepamathadam mekbin ason mate kalakhadam un’edet ke klemkle. Khristo ke Arnam Amethang apharman si monit along cheklanglo lapen Arnam Amethang keklemji ateng pen pima asai inut abangphu ateng si klemlo puvoiphit tame, Alangli ke sining angsong kedover Arnam alamm ke patepekpelo, mate ingtangkring pen si Alangli mena keklem amo anong chepathethelo. Bontame, Alangli ke chepatujoi si dolo, chepabihek, Alangli monit along. Khristo pen anpar, komatmatma Khristo pu kachobei kachekrong atum along anke Alangli amung ason ke avelo. Halahei kachobei aKhristo atum mena aphan ardi kachipi lapen mena anong kachepathe akun abirudhe kibi kachingbardun ahut lote, kopima klangdakpo Khristo ke kopuson amonit loma. Koan latum kachobeipon, lapuan sose si lason kachobei Khristo atum ke amethang si cheklangdakpo, lapen ansose si latum doan ke monit aphan kachongthuidetji angthek lapen manghumeme asai keklemji unthupo. Kachobei aKhristo along ke Arnam asonthot keme amung avelo; Khristo aphan ke thangnat ta kachobeidet aKhristo along kedo amung pen baiponpelang. Arnam monit kacheman ke ok asai keklem kapatangji aphan anchotlo, monit atum Alangliphan pathek’longnang pu kali. Bontame, Alangli sai pen Alangli angthek Alangli chepangdakpon peme, lapen pima atheke Alangli atiri along kacherap ason chepangdakponlo. Alangli tiri ke ajor kavedet kali; Alangli angthek ke Alangli rideng si kithi bor’i kalidet; lake Alangli sai lapen Alangli atiri si chepathikpon pemelo. Alanglilong Arnam Amethang atiri dolo lapen ke Arnam Amethang asai kacheklemponji theklo puvoiphit tame, Alangli ke nonpu, ajatnon, oklo, Karjong ke kalidetlo. Alangli ke Karjong amung kedo a’Arnam kalilo; Alangli ke ok abang-arpum pen kedo Arnam lo. Laso apot si, koanma jongjong lapen koanma Alangli boidet pu sitame, lapen koson si Alangli Po Arnam akar’idam si ridunlo pu tame, Alangli akangthirpetnei ke chevar un’elo. Arnam monit cheparje along ke jongjong monit atheng lapen laso akeboidet heihui le kedochot kalilo; Alangli akangthirpet kemanghumeme lapen kachinidam un’edet an ason tame dolo, lasonthot si kadokave Alangli keklem amo ok alonglo. Laso apot si, monit atheng lapen kangthirpet ke sonni ta Khristo along dolo, sonni ta choklimlo lapen keklem-kedamlo. Lake kopine kangthaidang mate chobeibei mekbin ason puke kijumnei ta kalilo. Alangli pirthe along kevang ke kenangsotnei akemangdam dolo sai keklemji pusi; lake jongjong monit atheng chepindeng si pirthe along sai keklemponji arsikjiklo; kalite, koanma Alangli kangthirpet ajakong kethe pu tame; laso abinong’et keklemji aboi ke kemesen along klemdunnodakji. Alangli monit jongjong ke thedung akenangsot dolo puvoiphit tame, lake Alangli atiri ke kalidet. Alangli atiri ke kangthirpet henlo; laso apot si, pirthe along Alangli birta keme asai Alangli keklem kepangcheng pen ke Alangli akangthirpet abang tame Alangli kachethan kapangchengponlo. Alangli monit jongjong ke Alangli ok dotik kemesen akai pen kerengdunbom thekji aphanchot lo pima laso pen Alangli akangthirpet abang jongjong ok along pen sai keklempon unji aphanlo; lake laso kangthirpetlo pima Alangli sai angton pen kachejapon. Alangli asai kepatangpon ahut, Alangli birta keme pachethang asai tame Alangli patang’etpo. Kopima monit kachinidunvek nangji ke angton pen Alangli sai aphan henlo, lapen lake Alangli sai pen ajok si pima Alangli monit aphan Alangliphan pachinilo. Alangli sai keklembomtik angdeng ahut, Alangli akangthirpet abang apot penang ke angton pen thanlo, atheke monit jongjong akun le kepaterdet kalilo, mate monit aot-adur lapen kamathadam pen le kepaterdet kalilo. Alangli kapachethang asai doan angton pen kepatanglo pu apor le nang kele lote, Alangli kethanjivek akun alam ke pima Alangli pachoklim lapen angton pen than’etpo. Alangli sai ke madu amonit le kethan-kemumdun pen kachejapon kali; Alangli kun aphuthak kachethanpon tame akejokvan, lapen ke aphutarlok le kacheja kali mate kemathadam alam pen le kapinchong ta kali, bonta amethang amat si chepangdakponlo. Lake madu amonit ta kelong un’edet asonlo. Jongsi tebok-terai kekomdir doan sungpik mate adim-aklong tame kememedet pu tame, Alangli ke kechoklim apor pen Alangli kun alam chethan unlo. Komatma Inut Khristo lake Khristo abang arpum alam chethanlo, tebonta komatma kalidet atum anke Khristo akun cheparidengdedetlo. Laso apot si, jongsi kadokave le Alangliphan khanglo mate Alangli phuthak kamunthidamthap alam dolo pu tame, inutnat ta monit kamunthidamthap alam ateng pen ke pima hala Khristo kethan akun alam ke pima Arnam lo pu kroikre un’elo. Kadokave komatmatma ahok aning pen Khristo aphan kiridun mate chinilor pen Arnam aphan kiri atum anke pima Alangli akangthirpet kethandam ateng pen Alangli henlo Khristo pu kroivekpo. Latum ke Khristo aphan patepekpelo pima monit kamunthidamthap alam pen thangnat ta Alangli aphuthak pen kacheton kavedet an pulote. Monit ke jonghe kilu puvoiphit tame, kopima monit akar’idam, lapen kopi si Arnam pen kevang loma chenam si kadokave ta chinilo. Lake pima penang an amonit atum theklor si Khristo aphan khanglo atheke alangtum kemathadam alam pen ajok puchotlo. Jongsi laso apot kali pusonte, inutnat amonit ta Khristo kedobom aphuthak kepatepekji athe si avelo, athe Khristo kachethan akangthirpet alam ke chenam si doveklo, lapen mek renglor si Alangli sai aphan ke patheklong unlo.

Khristo asai lapen kethan alam ke Alangli tiri pen si pangtheklo. Alangli ke ahokpet aning pen si pima Alangliphan kepekpontang ateng papleng peme unlo. Alangli ke sining athak kedo Arnam aphan ahokpet aning pen archo theklo, lapen ahokpet aning pen si Po Arnam akar’idam ateng ridunlo. Lahei kadokave kepangthekdam ke Alangli atiri penlo. Lapen lasi Alangli methang amat kepangdak kepangthekdam sitame Alangli atiri pen ajoklo; Ne Alangli “mena amat kepangdakpon” pu kipudam ke athema Alangli kethan alam ke bang along kacharlidun pen kali, mate monit ahin pen kethan angthek ta kali, mate penang an aningkan katiki-kanghoi monit ahin pen angthek ta kali. Alangli ke la charlilelo mate Amethang aphan laso pen chepindengdelo; alar ke, Alanglilong amat si lake dolo. Monit ke Alangli sai, Alangli kethan alam, Alangli monit jongjong atheng, lapen Alangli jongjong monit atheng pen angton akai aphan patepek tahailo, bonta inutnat tame pima Alangli karcho sining athak kedo Arnam aphan ahok aning penlo puke patepek un’elo; inutnat tame pima Alangli sining angsong kedo Po akar’idam paplengji si kevanglo pu patepek un’elo, lapen inutnat tame atheke Alangli Po Arnam aphan chingkimesen pen kiri puke kroikre un’elo. Alangli mohor ke kelangji aphan ningingsamsedetlo meme, Alangli keklempon ke kadokave pen kemenei atomon cheparidengdedetlo meme, lapen Alangli sai ke pirthe panghangphun mate sining paklemhur ason monit akamathadam ateng pen kalidetlo puvoiphit tame, Alangli ke Khristo chenamlo, komatma sining angsong Po akar’idam ahok aning pen si paplenglo, lapen kithi antame athikpet pen si dolo. Lake athema Alangli atiri ke Khristo atiri apotlo. Laso ahok ke monit aphan kekroi dunji sungkrunglo, bonta lake chenam-chenumlo. Khristo kapachethang asai angton pen plenglimlo pu ahut, monit ke Alangli sai pen pima Alangli kun lapen Alangli abang akun apharman lapen sining angsong Arnam abang kacheklang theklongpo. Laso apor ahut, Alangli sai kadokave thihek pen kapajirmidam ke chokvetpo pima Alangli chenam si oklo atheke Lamthe chemanlo, lapen pima monit aok lapen avi pen ke chingbarbelo. Khristo asai pirthe along angdengtin tame methang akenangsot apharman cheklangrep dolo, bonta monit ke komatma choklim asai angdengtin along kachomatlong ke Alangli sai akenangsot alam abang otdunthip thekthedetlo. Lake jasemet lasonlo athe ongdung asai angdeng Arnam ahin pen keklempon Alangli adunthu ok kachepharlopon ahutlo. Komatmatma Khristo alamthe arjulongchot mate theklongchot keongdung atum anke tebonta komatma Alangliphan ketheklonglepinlang atum anke Alangli sai aphuthak thangnat ta munthidamthap alam avelo; komatmatma Khristo aphan ketheklong lapen Alangli lamthe karjulongtang, lasonthot si Alangli sai ta kachomatlongtang atum anke, Alangli sai kedengdunji sungkrung asonpo. Lake tangte athema Khristo kacheklang arje lapen jongjong monit atheng ke monit aphan pakroi meme kalidetloma? Komatmatma Alangli sai Khristo damdet pen aphi kedengdun atum anke lason akisung avedetpo, athe latum ke Alangli sai dengdun chotlo lapen Khristo jongjong monit atheng pen chetong longlelang. Monit ke Arnam aphan alang kamunthodamthap alam paklo un’elo lapen alar ke arsikjik pen Alangliphan ingsir-ingchaplo; lake pipotma ahokpet ke monit atum ke Alangli kacheklang arje aphan ansi ardi pidamchotlo lapen Alangli sai lapen Alangli lamthe ateng pen Alangli atiri aphan pangthekdam un’edetlo. Jongsi monit le alang mek selokhetlo Khristo kacheklang arje aphan mate Khristo jongjong monit atheng aphuthak kachethanji ninghanghelo, lapen Alangli akangthirpet apot ansi ningjechotlo, thangbakma laso asai lapen alamthe ke madu amonit ta kelong un’edet, tangte monit kamunthidamthap alam achitim an jumdetpo, pima lapuanlo kadokave amonit akisung tame kejokthei angdeng ansi dopo. Arnam monit nangcheparje abang asai keklem ahut, monit ke Alangliphan chechak un’elo lapen ke Alangli phuthak ongdung kamunthidamthap alam si plengchenlo, lapen kekhangdun lapen athikpet kalidet heihui ke keklemver asailo. Monit ke Arnam kedo pu alam ningchepaningding un’elo, Khristo kachepabihek lapen kachepatujoi ason aphan kachechak chepaklangklelo, mate Khristo atiri aphan kadiya un’elo pima la sining athak kedo Po alam arjulo. Laso apot si, Alangli ke monit pen kai apar kai ke Alangli sai Alangli patengdet aphi dorappet thekthelo, athe monit ke Alangliphan latum arep-arei kepadolongji si aninghanghelo. Jongsi monit le Alangliphan kachechak’un Alangli sai keklembom angdeng ahut chepaklang un’elo pulote, kosonsi latum le Alangliphan latum adung-arei Alangli pachethang asai Alangli paplengdet aphi kedodun longji aphan chenam ta kachechak unpo, Alangli latum aphan langbom pen Alangli lamthe kephoponlong pajo dolo? Tangte penang an atum Alangli ajoine pen klokledetjima? Monit ke pirthe along asai paklemji si Alangliphan pekchotlo; lahenlo monit kachepaningding kethenei ajaklo. Jongsi Alangli sai aphan kalidet, monit ke Alangliphan hako pen si pirthe along pen toijui’etpo, lasi kosonsi tangte latum Alangli sai patangdet aphi kachechak’un chepaklangpoma? Tangte monit ke Alangliphan kapathi along kibi kalima mate Alangliphan kepathi an aduk kanghoi kalima? Jongsi Alangliphan le Khristo pu pupedet asonte, Alangli ke monit akhei anglum sai klem thekthedetvekpo; jongsi Alangli le Arnam Amethang angthek pen sai klemkledetlo, lapen alar ke jongjong amonit ason pen si klemponlo, tangte monit ke Alangli kaningje athetin alamseng karjuji chechakchelo, Alangli sai asontin masap tame karjuji puke jumpiklo. Lasi Alangli ke laso angthek Alanglilong pen chepon unchotpo Alangli sai along. Lason pen si, Alangli sai ke ansose jakong dopo jongsi Alangli lason klemkledet pu asonte, athe monit atum doan ke kadokave ta karjapdong lapen kethedung angthek alam karjuji si ninghanglo. Jongsi Alangli le Arnam Amethang angthek cheponkrikredet Alangli sai keklem along mate Arnam Amethang kacheklang ahut pu asonte, Alangli ke angton pen si asai keklemji avarsai amat ta longlelo. Alanglilong ke Arnam atiri lapen Khristo abang dolo pu ahok alam dokoklo pu tame, monit ke lapuan pajoijelo lapen Alangliphan monit akhei angbong sai kapaklemji puan pajoijelo. Alangli Arnam Amethang angthek cheponlo Alangli sai along; lason asai ke pima angthek avepin pen keklempon anpar abatai batai ansose ajakong themulang, monit ke nonputa Alangliphan angton pen athikpet kalipinlang, athe monit ke Alangli karjapding along ansi chehodaidun chotlo lapen Alangli atiri along kali. Jongsi lasonlo, mo arnisi Khristo Alangli anghoi pen nangsunlo pu ahut ke, tangte monit Alangliphan akereng arnisi anbak aphan padolongjima? Arnam ke pirthe along monit pen kedorappetji ninghang athe laso pen Alangli rideng pen pima asai angthek Alangli ketheklongji meme mononphi aningkan ahut an tame. Tebonta, monit ke Alangli kedo arnisi anbak ta chechak un’edetlo, lasi Alangli ke che’obup anchotlo. Lake monit kachechak’un kethenei ajak man’etlo lapen monit angbong Arnam aphan kangjinso si sai paklemlo pima Alangli keklemvek nangji lapen Alangli kapachethang asai paplenglo. Komatmatma salajong Alanglihin pen chepahemphutang atum anke Alangliphan lason akangjinso paklanglo puvoiphit tame, latum nonputa Alangli sai kepatang ahut aphan anchot si Alangliphan kepadolong chotlo, lapen malomso aphan anta abat ke kalilo. Jongsi lasonlo tangte, kopilo halahei Alangli chepahemphu longledet atum anke? Tangte laso apot si pima monit ke lason ateng pen Arnam ok chepharlotang aphan langloma athema Alangli ke Khristo monit jongjong ason athak abang kedo abang? Jongsi Alanglilong akangthirpet ansi dochotlo lapen ke jongjong monit atheng avedetlo pulote, tangte monit aphan si kisungkrungji kalilangma kapachunji aphan thedung akejoike? Monit ke aningkehang pen le Alangli akangthirpet aphan kachoro kali lapen Alangli monit jongjong atheng athak abang along le aningkedok ta kalidet, pima Alangli atiri ke pima Khristo asonthotlo atheke sining athak kedo Po akar’idam ateng si chipidetlo pu ahok alam dolo tamelo. Lason ke, Alangli sai monit angbong kedodun pen latum aningkarong lapen aningkeoi kachepachoidun pavedet unchotpo, athe monit ke Alangli kedodun anpar ke chechakpon un’elo.