Kosonsi Jisu Aphan Peter Kachinilong

Jisu along Peter kedodun apor ahut, alang Jisu along penang an kanghon meme a’ot theklong, ongdung kacharlidunme ason, lapen ongdung alangphan kapador ason. Jisu along Arnam do pu Peter ketheklong akrong dopik pusitame, lapen ongdung kanghonmeme a’ot theklong pusitame, alang kecheng ahut ke Jisu aphan chinine. Arta ningkan 20 ahut pensi Peter ke Jisu aphi kidun kecheng, lapen alang puthot kevangji ningkan throk aphan aphi dunpo. Halaso apor ahut, alang mantune ta Jisu aphan chini thekthe; Peter ke Jisu aphi kidun ke Alangliphan kachoro pen. Jisu alangphan Galilee Atalo akung along kehangcheng ahut, Alangli arjulo: “Simon Barjona, nang nelong nangdunji ma?” Peter pulo: “Ne ke siningrengme along kedo Apo nangketoi along si dun nangji. Ne ke hala Karjong Kangthir pen kangvaitang abang aphan si kekroi kedeng nangji. Ne Nanglong nangdunji.” Halaso apor ahut, Jisu – prosarok angbong pen aketheknei lapen Arnam kachinghon asopo, pu inut amonit alam Peter arjulong’etlo – lapen Peter ke kaike ta Alangphan kachetongji lapen Alangphan ketheklongji avarsai mathabom (atheke lapuson henlo alangphan Karjong Kangthir kejapon). Peter ke Alangliphan theklonglepinlang lapen bang kachethan alam si arjulongchotlang pusitame, pajo pen alang ning along Jisu aphan kar’i lapen kanghon batlo, lapen alang arnisi ke Jisu aphan theklongji pusi mathaver. Lapen kosonsi Jisu le Peter aphan kephalo? Alangli amat ta Peter pu amonit alam arjulonglo, bonta Alangliphan ke Karjong Kangthir le: “Galilee Atalo along damnoi, hadak inut Simon Barjona do” pu kapinkhat kali. Jisu komatne aphan inut Simon Barjona pu abangphu do pu kaningje arjulong, lapen monit atum alang kethan alam arjulonglo, alang tame sining rengme alongri alam si kethan pu, lapen alangphan karjudunlong amonit atum an ta amekkri buprup an aning cherui pu. Lapuson arjulongdet pen, Jisu halabangso amonit aphan Galilee Atalo an ingthum dunlo; Peter ta Jisu karnepon kroidet pen, Alanglilong dunphitlo.

Alang Jisu aphi dunbom apor ahut, Peter ke Alangli aphuthak penang an kamathadam dolo lapen amethang kamatha ateng si Alangphan ingsailo. Peter le penang angdeng an Karjong aphan kachinidam do pusitame, alang kachinidam ke asapso keklardak kalidet, laso ajoine si alang pulo: “Ne ha Siningrengme along kedo Apo nangketoi abang aphi si dun nangji. Neke hala Karjong Kangthir pen kangvaitang abang aphan si kekroi kedeng nangji. Ne Nanglong nangdunji.” Alang Jisu keklem asai chininedet lapen halahei aphuthak klardak kethekdam avedet. Alanglilong penang an apor dundet aphi, Peter ke Alangli keklem asai lapen kaningje alam aning dokdunlo, lapen Jisu Alangliphan amat. Alang chinilo longlo Jisu ke kanghon lapen man-peng aphan ta inghum un; Alangli pen kacherap lapen Alanglidung kedoji aphan alang aning hanglo, lapen Jisu alamthe karju pen alang pador lapen kerap dolo. Alang Jisu along kidun apor ahut, Peter langdun pangching lapen Alangli kai aphuthak doan aning along cheponlaplo: Alangli sai, lamthe, kedam-kevang, lapen ning alam kachepaklang. Alang harnukkrung kachinidam dolo Jisu ke thangbakbe amonit atum ason kali pu. Alangli monit abang kacheklang ke thangbakbe atum ason alonrek ta ave pusitame, Alangli ke kanghon, ning kiding lapen monit aphan kachechak’un ajakong pen plengchong. Alangli keklem ason lapen kaningje ason doan anut kaprek aphan akerap thepik, lapen Peter ke Jisu along pen alang mantune ta kacheparideng longle lapen ketheklongle ason. Alang theklonglo Jisu ke thepik abang le kedo kali mate monit a’ot keprekvi kedo abang kali sitame, Alangli ahokpet pen kemepik lapen keprekpik ason adung-arei do. Peter le ingthimlim pen pajirmi thekthe pusitame, alang theklonglo Jisu ke anut kaprek amonit atum pen keklem-kedam cheprekpik, athe Alangli keklem asai ke thangbakbe amonit autm pen chingbarbepin an. Alang Jisu pen chetongbom apor ahut, Peter thekthulonglo Alangli ot-dur ke thangbakbe amonit atum pen cheprekpik. Alangli kaike ta klem pajo lapen mantune ta tongte, mantune ta pakam mate pajum pen ningjeje, lapen Alangli methang akai aphan lapuson si selamlo isi a’ot kadokave ateng lapen romeme ason. Kachingki-chethan ahut Jisu ke kaningje paklangset lapen alon kipi pen, kaiketa prangset tame ingsamjin a’ot pen – lapen Alangli mantune ta Amethang asai kacheklem ahut Alangli man-peng chepadamde. Peter theklonglo ahut pen ke Jisu dojoi titi, lapute kaprek apor ahut ke Alangli lam kaningje chingtontepin anset. Ahut pen ke Alangli lapuanpin si ning karonglo Alangli kijui lapen kekan avothung asonsi cheklang, lapen kaprek apor ahut ke Alangli lapuan si aning ke’oi Alangli majok pen ta chingki amat si chingkike, inut kelak lapen jakong kedamtang apei le kisung kanghorthup asonsi cheklang. Ahut pen ke Alangli inut anokbe hotur aphan kapathi damji aphan kangplong asonben aning kithi, ahut pen ke, Alangli kangrong abongkrui asonsi cheparjan. Apor pen ke Alangli ingnekpo; kaprek apor Alangli kachardom lapen kachiru. Jisu ajat le cheparjan sitame, Peter ke Alangliphan ahoi kavepin an kanghon lapen manpeng aning arlo birti bomlo. Jisu akangnek alangphan ning karong paplengset titi, Alangli ning ke’oi alangphan ning padukdet, Alangli ning kithi alangphan paphereduk, halapu Alangli kangjinso, kadiya, lapen Alangli monit along pen kehang pasik ason alangphan ahokpet pen Jisu aphan kanghon lapen manpeng kipi lapen kar’i padolo. Ahoklo tema, lahei alam doan ta Jisu adung penang an aningkan dodundet aphi si Peter kachematha pen kachini.

Peter ke jongjung inut kamatha thekser abang, mena amat kamatha ajakong mesen pensi kahache, bontame alang Jisu along dunbom ahut penang an amo vangve asai klem. Kechengsi ahut, alang Jisu aphuthak penang kamathadam do. Alang arjulo: “Monit atum kipu Nangli ke inut prosarok, lasi Nangli ningkan nerkep arta ahut lapen pirthe ason kachini chengbom ahut, Nangli ke Arnam pu Nangli chechinima? Nangli chechinima Nangliphan ke Karjong Kangthir si nangmatha pu?” Jisu chethakdunlo: “Kali, Ne lasonse. Nangphan Ne anut kaprek amonit atum asonthot kali ma ketheklong? Ne ta anut kaprek atum pen isivetlo. Halaso Epo nangketoi abangphu ke kai atenglo, kadokave pen prekjek abangphu kali. Lapen Ne keklem asai le sining athak kedo Nepo pen chinglit tame, Neraje, Ne bang, lapen Ne ok anta Nepo aphan ingthimlim cheparjan thekthe – Alanglilong pen isi aphar anchot. Ne Karjong pensi kevang pusitame, Ne ke monit a’ot binong, lapen Nepo laso pirthe along Nephan nangketoi ke kadokave amonit ason, bangpen medunchet pu kali.” Peter ta lapuson arjulong ansi asapso anke Jisu aphan chinilonglo. Lapen alang Jisu asai, Alangli kethan, Alangli kivipon, lapen Alangli kachechak aphuthak lakha un’epin an ajak kiding apor chipidet aphi si kaharnuk muchot kachinidam un. Jisu Alangli ningkan 30 ahut, Alangliphan kevangji arni thengparpan along kesakji alam Peter aphan thanlo lapen Alangli ke chatai along cheparjan asai keklem – thengparpan along apran kedam – monit akhei aphan keraiji aphan si kevangchot pura thanlo. Peter aphan Jisu thanthulo, thengparpan along sakdet pen nithom aphi monit asopo puthot thurthuji, lapen ephong thurdet pen, Alangli ni 40 aphan monit athengno cheklangji. Lahei alam karjulong pen, Peter aning oipiklo lapen lahei alamthe aning along chepondetlo; halaso pen aphi, alang ansose Jisu adung tebokthulo. Penang an apor aphan chechakdet aphi, Peter chinilonglo Jisu keklem asai doan ta Arnam a’ot saide, lapen alang Jisu ke matha un’epin ansi kanghon meme pu kamatha ripdetlo. Alang labangso akamatha ripdet aphi ansi Karjong Kangthir alangphan arlo pen katheang pilo. Halaso ahut ansi Jisu ta Alanglilong charlidun atum lapen kaprek kekroi atum anat pangnolo lapen arjulo: “John, nang kipuji ateng ke Ne komatlo?” John thaklo: “Nangli ke Moses.” Alangli Luke anat chetevarlo: “Lapen nang, Luke, nang ateng ke Ne komatlo?” Luke thakdunlo: “Nangli ke prosarok angbong pen aketheneilo.” Laso aphi Alangli inut ingjir aphan arjulo, lapen halabangphi thakdunlo: “Nangli ke kijut un’e pen kijut un’e an alamthe kaningje abang prosarok angbong pen akethenei. Majok asangtar ta Nanglison an akechok ave, mate majok agian ta Nanglilong kedo pen abat kali; Nangli ke inut prosarok.” Laso aphi Jisu abang Peter anat pangnolo lapen arjulo: “Peter, nang kopilo puji Ne komatlo pu?” Peter thaklo: “Nangli ke Khristo, hala kereng’ak Arnam asopo. Nangli ke siningrengme pen si kevang. Nangli ke laso apirthe asor kali. Nangli ke Arnam kasorjon atum pen isivet kali. Netum pirthe along si do lapen Nangli ta non netum along si do, bonta Nangli ke siningrengme asor lapen somindar pen kali, lapen Nangli ke laso pirthe pen kali.” Lake alang kachechakklong ajoine pensi Karjong Kangthir alangphan kapatheang, bangso ajoine pen si alang kachini an pale theklo. Bangso katheang aphi, alang Jisu keklem ason doan ansose choro theklo, Alangliphan ansose si inghon meme pu mathalo, lapen aning arlo ke kaike ta Jisu pen kachekak kangtungtelok. Lasi thengparpan along apran damdet lapen puthot cherengthudet aphi Jisu Peter athengno kacheklang ahut, Peter ke prekjek aning karong pen taramlo: “Hemphu! Nangli thur’etlo.” Laso aphi, chirubom pen, Peter ejon thetan alang’ok nep si tun pen Jisu aphan pacholo. Jisu ingnekhinglo, bonta Alangli thang ta ningjeje. Jisu ke puthot rengthu’etlo pu alang chinidet aphi tame, alang bangso kamanghu meme alam chini pememe. Alang Jisu aphan kapachoji aphan lang’ok kiphi ahut, Jisu ke kroikrekre, bonta Alangli lam ta ningjeje lapen kechoji aphan ta ingnine. Alar ke, Alangli menmen avedet. Lake Peter aphan isi thetan akathiriklo, lapen halaso ahut pen si alang chinilo thidet pen kerengthu aJisu ke aphrang aJisu pen prekdak. Alang bangso alam ephong kachini pen, Peter aning dukpiklo, bonta Hemphu ke Amethang asai chepapleng longlo pu alam pen alang ning karengme ta dolo. Alang chinilo Jisu ke Alangli sai chepachun’etlo, Alangli monit atum pen kedorap apor ke lit’etlo, lapen halaso pen anpar ke monit atum amena si methang akai aloti along chedam nangpo. Jisu alangphan ephong than: “Nang ta Ne kijuntang aharlung keho pen jun nangji (lahenlo Alangli thidet pen kerengthu ahut kaningje alam). Nang ta Ne kengkam kachejortang akrong along dam nangji. Nepharman nang nangkai chipidet nangji.” Non ateng kali si, halaso apor ahut ke sai ta chepathengnono kachingki ason kali. Kanghon kangjinso akai ahut, Karjong Kangthir asai ke jasemetpet chepatujoi, lapen Peter ta bangso akisung pen chechak nanglo. Ahut pen ke, Peter ta: “Arnam! Nelong ke thangnat ta ave bonta laso achethe anchot. Lake Nangthengno la anset anam kedo kali pusitame, ne Nangpharman panongdetji pusi ninghang. Monit atum Nangphan nangkanghonji a’ot kali pusitame, lapen latum akanghon lapen aning ke anam thangnat ave pusitame, ne kroi peme Nangli monit aning akemang chini pu. Lapen monit abang ke Nangli kedengji apun ledamde pusitame, Nangli nening nangdengpo pusi ne ning kehang do” pu ningjedet angdeng an lerok titilo. Lapuson kachardom si alangphan ning perunglo, jatsemet ke alang: “Ne ingthimlim pen Arnam aphan nening kachipiji ninghanglo. Ne Arnam aphan ajat le klempi thekthedet sitame, Ne ning ingthirjir pen Arnam aphan ning papleng lapen Alangphan ning kangthim pen chepidet ingtunglo. Nekroi Arnam nening aphan nanglangbom” pu alang kachardom ahut. Alang pulo: “Ne kai along ajat ta hanghe bonta ne Arnam aphan kanghonji pu kamatha lapen nening akemang ason Arnam deng nangji. Ne Hemphu Jisu along lapuan ajir kidinglo kedodun, bonta ne mantune ta Alangliphan inghonhe; hala henlo nepreng kethenei. Ne Alanglilong dodunlo pusitame, ne Alangliphan chininedet, lapen ne Alanglinung penang kachelonle alamthe ningjedetlo. Lahei alam kamatha pensi neke Hemphu Jisu along nepreng thebomlo.” Alang kaiketa lapuson a’ot pensi chardom. Alang pulo: “Ne ke aduk penta akijumlang. Neke thangnat klem thekthe bonta bangso kangthirjir aning Arnam aphan kachehodai henlo.”

Peter kachinidam along isi aphuchong keledam do, alang abang arjon pen amat si kebopji pu anpin, bonta Jisu alangphan abang arlo ning kirung pidunlo. Lapen ephong ke, Peter athengno Peter cheklanglo. Peter le kisungpik lapen alang ning kanghanglo pu kachematha ahut, Jisu alangphan pinkhatlo: “Ne pirthe kedo ahut nang nelong si do, lapen Ne ta nanglong si dak dodun. Lapen itum siningrengme along dorappetpe aphrang, lake, kapajutsi ke, karjong apirthe apot. Non Ne karjong apirthe along chiruithu’etlo, lapen nang ke pirthe along si do, athe ke Neke pirthe aphan kali, lapen nang ta pirthe aphan kali pusitame, nang ke pirthe along nangdeng chepachunchelang.” Alang Arnam along chedamthu longji pu arjulong pen si Peter aphan aning domepo. Halaso apor ahut, Peter lapuan si aning kiduk alang keso pangjirang an; alang aning kedono pen: “Ne ke nekun si kelangno athe ne Arnam aphan ning pangsam thekthedet” pu kaningjeji angdeng anlo. Jisu alang thengno vanglo lapen pulo: “Peter, lapuson si cheplangloma, nang arnisi Nethengno ketang aseme chetengnedetloma? Nang ahokpet si Ne kaningje alam an tengnelap loma? Nang nephan nangkipi aseme chetengne etloma?” Jisu pu theklong si Peter pahong pen thurlo, lapen Jisu alangphan lapuson si aning pangsamlo: “Neke pirthe aphan kali, Ne nangphan nangkethantanglo – nang chini nangji, bonta Ne kaprek nangkethan ason nang tengne detloma? ‘Nangta pirthe aphan kali, mindar aphan kali.’ Non amat ke nang keklem nangji asai dolang. Nang lapuson ning chepadono longle. Nang lapuson chepasung longle. Arnam pen monit ke isivet apirthe along dorap longle pusitame, Neke nesai do lapen nang ta sai do, lapen arnisi nangsai jut lote, itum isivet adim along dorappet po, lapen Ne nangphan Nelong kijut un’e apor aphan nangkedodun longji aphan nangjapo.” Peter ke bangso alam karjulong pen aning ingsamlo lapen puthot jakong chelongthulo. Alang chini labangso akisung ke alang kachingtang nangji lapen kachetong nangji asonlo, lapen halaso pen aphi ke, alang ning rungpiklo. Jisu alang thengno kenangsot apor doan ahut nangcheklanglo, alangphan bidi kangjang lapen akatheang pibom, lapen Alangli penang an asai klemlo alanglong. Lapen Peter aning che’oinei kopilo? Peter “Nangli ke kereng’ak Arnam asopo” pu pudet pen ajir ding’o’elang, Jisu adunthu akarju alam Peter aphan pi lilo (sitame lake Baibel along lapuson le kethap kali). Jisu alangphan arjulo: “Peter! Nang komantune ta Nephan nangchinghon loma?” Peter chinilo Alangli kopisi kipuji puma, lapen pulo: “Hemphu! Ne ephong ke sining athak kedo Apo aphan inghonlo, bonta ne chekubirlo ne mantune ta Nangphan nangli inghonhelang.” Laso aphi Jisu puthulo: “Jongsi monit atum sining athak kedo Apo inghonhe tangte, koson si alangtum pirthe along kedo Asopo aphan kanghonpo? Lapen jongsi monit atum Arnam-Apo amat nangketoi Asopo aphan inghonhe pulote, kosonsi alangtum sining athak kedo Apo aphan kanghon thekpo? Jongsi monit atum ahokpet pen pirthe along Asopo aphan inghon, tangte latum sining athak kedo Apo aphan ta ahokpet pen inghonlo.” Peter lapuson alam karjulong pen, alang chinilo alang methang kopisi kadurebomlang ma. Alang kaike ta amekkri jangring anpin aning aduk chepado “Ne ephong ke sining athak kedo Apo aphan inghonlo, bonta ne chekubirlo ne mantune ta Nangphan nangli inghonhelang” pu amena alamthe chematha pen. Labangso alamthe aphuthak Jisu thidet pen keburthu lapen sining angsong chedamdet pen ke alang ansose si aning aduk lapen kedono chepabatlo. Damtang alam lapen alang nonhut aklong alam chematha si, alang kachardom along Jisu athengno lerok titi, kaike ta Arnam akemang kapachun thekthe apot ning kiduk lapen preng dokok pu kachematha lapen Arnam a’ot an chepangbardun un’edet apot ning chepadukpo. Lahei alam si alangli kethenei anghor chemandetlo. Alang pulo: “Arnisi nelong kedoan ason lapen ne kopima angton pen Nangpharman chipidetji, lapen ne Nangphan kopima anam kethe ason an nangpipo.” Alang pulo: “Arnam! Nelong kekroi isivet si dochot lapen kanghon isivet. Nekai ke thangnat anam ave, lapen nebang ke thangnat anam ave. Nelong kekroi isivet lapen kanghon isivet si dochot. Netarlok along Nangphan kekroi do lapen nening along Nangphan kanghon; la sonni anvet henlo Nangphan nangkipi aphan nelong kedo, lapen anpar kaprek thangnat ave.” Jisu alamthe pen Peter aning rungpik anlo, athe Jisu aphan thengparpan along apran armutme aphrang, Alangli Peter aphan thanlo: “Neke laso apirthe apharman kali, lapen nang ta laso apirthe apharman kali.” Aphi, Peter isi kisungpik angdeng along kele ahut, Jisu alangphan aning pachepinpurlo: “Peter, nang tengne etloma? Ne ke labangso apirthe apharman kali, lapen lake Nesai ajoine si Ne pangnodapphrangchot. Nang ta laso apirthe apharman kali, nang ahokpet pen ta tengne etloma? Ne nangphan phongnilo nangkethan, nangning avema nang?” Lason arjulong si, Peter pulo: “Ne tengnenelang!” Laso aphi Jisu pulo: “Nang ephong ke siningrengme along Ne pen ningkarong apor lapen Nedung nangkedodun apor chepadamlo. Nang Nephan nangchingtung, lapen Ne ta nangchingtung nangphan. Kasorjon ason le jongsi Nemek athengno amen parno meme a’ot kali pusitame, kosonsi Ne hala inut inghon meme lapen aning klarsap abang aphan kanghonhedetpo? Nang Ne seme tengne etloma? Nang pirthe along Ne kapaklemtoi asai deng nangji; Ne nangkepek asai nang pachun nangji. Mo arnisi Ne nangphan Nedung nangkedodun longji aphan nangjavekji.” Laso alam arjulongdet pen Peter ke ansose si aning runglo lapen ansose si aning kithir ajakong chelonglo, lapuanpinlo alang thengparpan along kedo ahut, alang ningje unlo: “Arnam! Ne Nangphan nangli kanghon pador thekthe! Nangli jongsi nephan nangpathitoi, antame neke Nangliphan nangli kanghon pador thekthe. Nekarjong aphan nahok le Nangli toi tame, Nangli le kedamtang arni Nangli lamchak chepaplengnoi plengplenoi, mo aphi Nangli ajat le klem tame, Ne Nangliphan nangli inghon lapen Nanglong kroi.” Alang kopisi kiriphet ma lake alang kekroi, lapen alang ahokpet akanghon.

Arnisi arnikangsam, penang kacharlidun abangphu, Peter jokjak, atum Jisu pen isi ok kenep atelong along dolo, lapen Peter abang Jisu aphan isi kangdailim alamthe arjulo: “Hemphu! Ne ajir dingklui pen kachibiding eson alam Nangliphan karjuji pu ti.” Jisu pulo: “Tangte arjunoi!” anke Peter arjulo: “Hala Aron Akai ahut keklem asai Nangli keklem asai ma?” Jisu ingnekhinglo, kipuji ason: “Laso oso, kamatha kangdai ta” pu. Alangli manglor pen ingthundunlo: “Hala ke Nesai kali. Halaka Jehovah lapen Moses asai.” Peter lason arjulong pen ningjeserlo: “Oh! Tangte hala ke Nangli keklem asai kali.” Peter ephong lapuson kaningje pen, Jisu thangnat ningjejedetlo. Peter amethang si chemathalo: “Hala ke Nangli le keklem kali, lasi mathathepin pen tame Nangli ke aron kaphalangnoji si kevanglo, athe hala ke Nangli keklem asai kali.” Alang ning ta domesenlo. Aphi an, Jisu chinilo Peter ke kamatha ingdaipik’lang pu, bonta alang halaso ahut ke kachini avedetlang apot si, Jisu kaprek thangnat pupe mate alangphan ingchekche. Ihut isi penang an monit, Peter jokjak kachepangrum ahut synagogue (Jews atum kardom adim) along Jisu Arnam alam thanlo. Alangli Arnam alam kethan along, Jisu pulo: “Kijut un’e pen kijut un’e along an kevang abang si mo Hirjume Akai ahut monit akhei aphan pap pen pajok asai klempo. Alang aron pen tet si Hirjume Akai along lutpo. Alang monit akhei doan aphan pap pen pajokpo. Alang Aron Akai pen aphrang dam si Hirjume Akai an palepo, sitame majok ta Alangphan chinine, Alang Jehovah along pen kevang abang. Moses keklem asai ke Jehovah si kipi; Jehovah keklem asai ajok si Moses ta aron pinchonglo.” Ephong lapuson ningjedet pen, Alangli ingthunponthulo: “Hirjume Akai ahut Hirjume Akai ahukum kapaprai atum kevir chetong nangpo. Alangtum kardom ahem along arjap si Arnam arideng kapahalangno chodeng nangpo, lapen me akar alangtum along vangpo.” Lahei alam arjulong pen Peter aphan asap aning lutlo, lapen alang kacharli apor arjon, Jisu si Peter aphan viponlo lapen archaklo, alang pen ning-pen-ning chingki si, lasi Peter ta Jisu aphan asapso ke memuchet pen Jisu aphan chini longlo. Peter ke Jisu le halabangso ok kenep atelong along kedo arni kaprosar alam lapen alang karjudun alam, Jisu kipi alamthak, lapen Alangli kangnek a’ot heihui chemathadam pen, Peter labangso aphuthak chini unlaplo. Halaso aphi, Karjong Kangthir si Peter aphan akai patheanglo, lapen laso aphi ansi alang Jisu ke Arnam kereng Asopo pu alang chinipinlo. Karju alam kachepaklang, Jisu kaprosar karjudun, laso kangjangdong akachelang Jisu pen kelong lapen Alangli kivipon ajok pensi, Peter ke kachini longlo Jisu ke kereng’et Arnam Asopo pu. Lake ejo angbong kelonglok pu kali; lake isi angthun, lapen lasi alangphan aphrang kachetong ason along akerap manlo. Kopi apot si Jisu kaprek atum along kapachoklimji asai klemkledet, bonta Peter along anchot? Athe ke Peter inutvet si Jisu ke kereng’et Arnam Asopo pu kachini; anut kaprek majok ta chini abang ave. Alanglilong dunbom ahut penang an ason kachinidun kacharli atum do pusitame, alangtum kachini ason ke athak pen anchot. Laso apot si Peter aphan Jisu isi kechoklim kapinchong pu kapaklangji akumlin asonben kangvai. Peter aphan Jisu kethan ke Alangli non monit atumphan kethan atenglo, komat kachini ason lapen akai along kachetong ason Peter ason an le nangji. Lake laso apun lapen tovar pen kapacheton pensi Arnam kadokave aphan ta choklim pamanji. Kopi apot si pini monit atum ahokpet kekroi lapen ahokpet akanghon donangkok? Nangtum ta Peter kachetong ason doan chetong nangji; Peter kacharlidun pen kelong angthek nangtum along cheklang nangji; lapen nangtum tame Peter kepho akeso chingtang nangji. Nangtum kedambom atovar ke Peter kedamtang atovar pen isivetlo. Nangtum kachechak akeso ke Peter kachechak akeso pen isivet. Nangtum kehai kelong ahut lapen nangtum ahokpet akai rengdun lote, nangtum Peter asimbon pen si kerengdunlo. Atovar ke isivet, lapen abangphutin aphan ta bangso along kidun pen si kechoklim pinchonglo. Sitame, nangtum ajakong henlo Peter pen pangbardam lote kaduredun, athe ke apor chelar tanglo, lapen lasonthot si monit atum chongthui-chopanglim angkang ta, lapen athe ke Judea ke isi ajir dingklui pen karjap jutang barim alongri. Lasi, nangtum nangjakong chepabatji aphan kenangji ason an klem nangpo.

Peter ke inut kamatha thekser abangphu, alang ajat keklem ahin ta kangsai thekser, lapen alang aning ingthirpik an. Alang penang aning ke’oi nang ason pho. Alang hamphang pen kachetonglongcheng apor kevang ke alang ningkan 14 arta ahut, alang lo charli ahem kidun lapen kardom ahem along kidun ahut. Alang aning kehang thepik lapen kaike ta mei along kachetongdun aning hangpik. Halaso apor ahut, Jisu ke ahokpet Alangli sai kacheklem chengchelang; lake Hirjume Akai kecheng anvetlang. Peter ke ningkan 14 arta pen si dhorom asai keklem abangphu atum pen kachetonglong; ningkan 18 arta ahut anke alang dhorom ahin akethe-keding abangphu atum pen chichinilo, bonta alang dhorom anung apirthe kithirthe ketheklong si, alang laso along pen aphi chiruijuilo. Lahei amonit atum lapuan kere, ale aphan mathalok lapen kachongthui thek pu theklong pen, alang aning jangjepiklo (lason henlo halaso apor ahut Karjong Kangthir sai keklem, alangphan choklim kapinchongji aphan. Alangli alangphan jatsemet aning palutlo lapen penang an ingjangdong asai klemlo), lapen alang ningkan 18 arta ahut kardom ahem pen cheterekjuilo. Alang pi-po atum alangphan adai enlo lapen alangphan pakroi longle (latum ke hi-i lapen kekroikre atum). Padusi, Peter hem che’o si nahokhok damlo, ningkan hini aphan ok kenep lapen kaprosar, laso apor ahut si alang inut-banghini amonit aphan japonlo. Nonke nangta jongklok pen Peter asai klardak pen theklongpo. Jongsi nang Peter atovar klardak pen theklong, tangte nang pini keklembom asai aphuthak chini peme unpo, lasi nang ningduk alam chepaklangdetlo mate dojoijelo, mate kopine aphan kar’i avelo. Halaso ahut Peter asai’ot kosonloma nang chini nangji: Alang ke ningduk pen kedononang; alang anpar mohut mate anpar ake’ong hirjume aphan chohanghe. Alang ale, ning karong, nongnam, mate pirthe along akeplang-kephi ri damde; alang kiri ke ardi doklong akai kedolongji anvet, lake Arnam akanghong kachitu aphan lapen alang jatsemet anam kethenei pu kehok ason Arnam apharman kachipiji aphan. Laso aphi alang aning along pen kemang plenglimpo. Alang lapuson alamthe pen Jisu aphan ardomver: “Hemphu Jisu Khristo, ne Nangphan ephong nangli inghonlo, bonta Nangphan mantune ta ahokpet nangli inghonhe. Ne Nanglong kekroi do pule pu sitame, ne Nangphan mantune ta ahokpet aning pen nangchinghonhe. Ne Nangphan si nangcholangding, Nangphan nangro, lapen Nangphan nangchingtung, bonta ne Nangphan mantune ta nangchinghonhe mate Nangphan ahokpet kekroi ave.” Alang seme kedengji aphan kaike ta ardomlot, lapen laso along alangphan Jisu alamthe si ning perungdunbom lapen alang halahei pensi ning ajakong chelongbom. Aphi an, penang kachingtang apor aphi, Jisu alangphan asat enlo, alangphan ansose Alangliphan kapar’iji aphan aning chotenglo. Alang pulo: “Hemphu Jisu Khristo! Koan lone ne Nangphan nangchingtung, lapen Nangphan nangkacholang. Ne apar duredet, lapen Nangli kanghon apharman papleng un’e. Ne Nangphan prap’ong pen nangcho ar’emlo nephan nangponnoi. Komentu si Nangli nephan akenang kedopo? Komentu si Nangli nephan nangkeponpo? Komentu si ne puthot Nangli raje kethekthulongpo? Ne laso abang along kerengji aphan, ansose chongthui-chopanglim keman ning hanghe tanglo, mate ne anpar kachedanji ning hanghelo.” Lason henlo alang kachardom, bonta halaso ahut alang chichinine Jisu alanglong kopisi kepachoklimji lone. Alang satlang akedono ahut, Jisu alangphan puthot cheklangthulo lapen pulo: “Peter, Ne nangphan choklim nangpinchongji ninghang, nang thesere achet chemandet ason an, hala le Ne nanglong pachoklim keklem ason chithinglor pen kapacheklang, lapen halale Ne kelang pen ning arong meme. Nang ahokpet Nepharman angthek chepaklang unjima? Ne nangketoi ason klem etloma nang? Ne kaningje alamthe ateng si nang pirthe kedodun loma? Nang ephong ke nephan nang chinghonlo, bonta nang Nephan nangchinghon pusitame, nang Ne nangkipu ateng klem loma? Nang Nephan kopilo nangkeklempi? Nang Ne kanghon kelong a’ot ave pu chichinilo, bonta nang Nephan kopilo nangkeklempi?” Peter chelanglo alang Jisu aphan thangnat klempipelang lapen alang aphrang Arnam aphan akai kachipiji pu aseme chemathadamlo. Lapen lasi, anpar ke alang ningduk alam chepaklangkledetlo, lapen halaso pen aphi ke alang kachardom ansose nangmelo. Alang chardomlo: “Hemphu Jisu Kristo! Ihut isi ne Nangphan nang’olo, lapen Nangli ta nephan ephong nang’olo. Itum cheheloving pen apor padamlo, lapen dorappet penta apor padamlo. Sitame Nangli nephan kaprek ason pen apar nangchinghon. Ne aphong-aphong Nangphuthak kechedan lapen abatai-batai Nangphan ning nangpaduk. Koson si ne halahei alam katengne unpo? Ne kaike ta ning chibi lapen mantune ta tengnene Nangli nelong keklem asai lapen Nangli nephan kopima nangkepek. Nangli nephan nangkeklempi asai apharman kopima kedoan ne klemlaplo. Nangli chinilo ne kopima keklem un, lapen Nangsi chini muchotlo ne kopi arpu deng un. Nangli keja alun along ne chehodaiji ninghang, lapen nelong doan Nangpharman chipidetpo. Ne kopima keklem un lake Nangli anvet kachini, ne kroilo Nangli nephan halahei nangpatepek ason penle ning nangchibi kali, lapen Nephan halahei aphan kelangdam penle nangli kelana kali. Nekai kangthim amat si Nangpharman chipiji nening kehang. Ne thangnat nanghanghe, lapen ne kaprek akemang mate kelangdam ave; neke Nangli kamathamek ateng si sai kepachun lapen Nangli kemang ateng keklem ingtung. Nangharlung keho pen ne junpo, lapen neke Nangli nekapinkhatji apharmanlo.”

Nangtum kedam atovar aphuthak nangtum klardak chini nangji; nangtum mohut arni kedam atovar aphuthak nangtum klardak pen chini nangji, Arnam kopi si choklim pinchongjima, lapen nangtum aphan kopisi nangkepek loma. Arnisi, tahai, nangtum aphan asat nanglangji, mo halaso apor nangle lote, nangtum jongsi Peter kacharlilong along pen ning kirung longdun, lasi paklangpo nangtum ahokpet pen Peter atovar si dambomlo. Peter aphan ke alang ahokpet akanghon lapen ahokpet kekroi lapen Arnam aphan kaike ta ning klarsap apot si Arnam kapinkhatlo. Lapen lake alang ning keklar lapen aning arlo pen Arnam aphan kiri apot si Arnam alangphan choklim kapinchong. Jongsi nangtum Peter ateng ahokpet akanghon lapen kekroi do, tangte Jisu nangtum aphan choklim nangpamanvekpo.