Monit Atum Kangsir Kepho pen Anchot si Ahok Akanghon Long Unji

Monit aphan kangsir ahut koson pen si Ranam aphan chinghon nangji? Kangsir pholo apot si, kachekirla ahut ke, monit atum Ranam aphan ahokpet pen ro-archo lapen alangtum koan si kelele ma chematha titi. Kangsir angdeng koan ingtui ma, la an si nang’ok aphan hijimpo; monit atum koan si kachikirla ma, la an si latum Ranam aphan inghonpo. Nangtum kachini nangji alam la henlo. Kopi apot si monit atum chikirla mate ingsir nangkok? Kopine ale kelongji do ma? Inut amonit kachikirla along Ranam keklem kethedung asai kopilo? Nang jongsi Ranam aphan ri lo tangte, Alang nangkapakirla penang an pholo tangte, mesen pu nang chiniji, lapen lake akenangsotneilo. Koson si kangsir ahut monit atum Ranam aphan chinghon nangpo? Ranam aphan kanghonji lapen Alang nang kelar kedengji pu nang ning arlo kachechak ahut: nangkelar ahut, nang ning arlo nangduk dopik, nokso le nang vibong along nangkichutlut ason, bonta, Ranam aphan aning kapangsamji si nangning cherotkhutlo, Alangphan inghonlo, lapen nang ok aphan kalanaji ninghanghelo. Ranam akanghon avaikang along kedo kacharli puke lason henlo. Nang ning arlo nangduk dopik, lapen nang kisung angdeng ta penang an lelo, bonta nang Ranam angno kevangji aphan nang ning hanglo, lapen pulo: “O Ranam! Ne Nangphan nang’o un’elo. Ne ning arlo kangting dokok pu sitame, ne Nangphan ning nangkapangsamji ninghanglo; Nang ne ning arlo chinipetlo, lapen Nang akanghon ake’ongdung nangpi te pusi ne ning hanglo.” Lake kangsir ahut kacharli asonlo. Ranam akanghon aphan jongsi nang anujokpi cheselam lote, kachikirla pen Ranam adung kapatebokji atovar la henlo, lapen Ranam pen ansose nang chetebokpo. Nang Ranam aphan kroilo apot si, Ranam angno nang ning chipidet nangpo. Nang jongsi chehodaidet pen nang ning Ranam angno bi lote, kangsir ahut Ranam aphan nang chekobirbe puke klemkle, lapen Ranam aphan koike. Lasonsi, nang lapen Ranam angbong ansose chetebokpo lapen ansose ingjangpo, lapen Ranam pen nang angbong kachingki ansose inglum muchotpo. Nang jongsi lason klemver lote, Ranam akathe’ang atur along lapen Alang lam nang kerai angbong si nang ajir dingklui pen dolongpo. Nang’ot nangdur anta chelar’opo, lapen nang akethek ta arnivang si bat ponbompo. Nanglong menmen Ranam akangsai nanglerok pu sita, Ranam adung karjap anchot kali si, Ranam aphan ahakhi nang arjappo. Halaso ahut, nang ke Job, Pitor ason thakthakpo. Ranam aphan hakhi karjappi ajok, nang ansose Alangphan inghon muchotpo, lapen nang ning arongchen pen nang pran Alangphan chipidetpo; Ranam ahakhi nang plangpo, lapen Ranam kanghonnei abang chemanpo, kachikirla pen kelong akanghon ke ingtangpik, la ingdukde. Ranam nangphan asat along nangbikok ahut sita, nang rengji ma mate thiji ma kachisik apor nang chelong, ajat ason Ranam apharman che’o’et si, ning arong pen Ranam apharman chechaksen – lasi nang kanghon ke ingthirjir lapen nang akekroi ke ahokpetlo. Ansi, inut Ranam kachinghon peme abangphu plangji, lapen apun choklim pen Ranam kapeman abangphu manji.

Monit atum jongsi Sobar arideng klo lote, latum aning arlo Ranam akanghon avedetji, lapen alangtum kedamtang akachecharmek, kanghon lapen aseme anta vir’etlo. Monit atum kamatha ke latum Ranam amen pen kisung chechak nangji, bonta pini arni latum kamatha ke therak meme asailo, lapen latum along pen kaiketa ning kangsamse alam jut un’e. Lake Sobar asailo, lake monit atum Sobar arideng klo’etlo pu angtheklo. Nang jongsi lason pho chetong lote Ranam ardomnon, lapen un’an akeprap pen aphrang anat chetevarnon – lason pulote Sobar nangkathengkheng pen jok unpo. Monit atum kachikirla kabor’i ahut henlo Sobar asat arideng keklo kejoinei, lasi lason kachikirla adihu ahut koson pensi nang Ranam aphan kanghon nangpo? Lason ahut ok aning kehang ason, nang ning doan pen Ranam angno chehodaidetnon, nang arni kedoan Alangphan hodainon. Ajat ason pen le nangphan Ranam nang kakirlaji asai klem sita, Ranam aning kapangsamji aphan ahok alam pen apot asai pacheplang nangpo lapen Ranam aphan ri si Ranam pen kacherapji aphan bor’i nangji. Lason adihu ahut, nang koan ma kepangkre, la an si nang ning arlo kaheno plengsetpo lapen aphi anat kachiruiji aphan joi muchotpo. Nang sai kacheklem nangji akenang dokok ahut, nang cheklem pememedet sita, un’an pen nang klemnon, lapen Ranam aphan kachinghon pen apar ajat ta klem nangnelo; bang ajat le nangpu sitame – nang keklem asai mesenlo pule nangpu sita, mate nang keklem asai meparpedetlo pu sita – nang kemang asai ke choklimlo, lapen nang methang aphan chemathalok pu kalilo, pima nang Ranam aning kehang ateng si klemlo. Monit atum nang keklem asai aning dokdedet sita, Ranam angno nang ardom theklo lapen pulo: “O Ranam! Monit atum ne lam arju nangji mate ne phuthak nang mesen nangji pu ne nanghanghe, lapen latum nelam dengde lapen arjuthekthe. Ne ning doan pen Nangphan nangkanghon thekji si ne nangchoardomlo, ne ning arlo ning kangsam kedoji aphan, lapen keklem amo kemesenji aphan. Bang nangro nangji pu ne nanghanghe, lapen angsong nangbatkok nangji pu ne mathathe; ne ning arlo pen Nangphan ning nangkapangsamji si ne rilo; ne ki’un an ason pen ne sai cheklemlo, lapen ne joklupik lapen ne ning reset kalidet, kethekser abang kali lapen ne mek checharche pu sita, ne chini Nang ke doivetpik, lapen ne kedoan ason ta Nangphan nangkachehodaiji ne ninghanglo.” Nang lason kardom un ahut, Ranam aphan kanghon nangning arlo pen nangbarpo, lapen nang ning arlo akarengme chetheklongpo. Ranam akanghon angbong kereng pu ke lason henlo. Nang keklembom ahut, nang sai phongni keklem chunchedet si ephong ansi chun unchotji, kalite phong pho bak chunchedet aphi, phongni bak ansi chunchotji, lason kephobom angbong, sai kichunche ahut si Ranam akadoivet nang theklongji lapen nanglong kopi ason si kadure ma chechiniji. Nang jongsi lason chetongthu pulote, cheremek’et pensi do nangji, nang kengkam chelangtu, lapen Ranam ardomver nangji. Anlote pejo pen lason apor ahut nang kachepehaiji ajakong chelonglokji. Lason manlo pulote, nang kardom ajakong ingtanglo pu aphanlo. Nang jongsi lason ahut kichun chetheklonglo tangte, nang ning arlo nang Ranam aphan choropikji, lapen nang Ranam kardom ahut Ranam nanglong kedo nang chechiniji, lapen Karjong Kangthir nanglong pen damde – ansi nang ning arlo Ranam sai keklem pu nang chinipo. Lason klembom lote ansose kachini ajakong dobompo. Nang jongsi ahok alam apot asai peplangple pulote, nang ning arlo Karjong Kangthir dodedetji. Bonta, nang jongsi asai klemlo pulote, nang ning arlo aduk do sita, Karjong Kangthir nanglong dopo, lapen Ranam nanglong do pu nang chechiniji, Ranam alam kekroi lapen asai keklem ajakong nanglong dokokji, lapen nang korte-ingjir atum pen chelangpet ahut nang ning arlo kardik’ling ason avedetji nang ning ingsamdopji, lapen lason pulote, nang keklem asai cheklangdakpo. Bang ajat le nangpu sita, nang lapen Ranam angbong ke chemesenpo, akaprek atum nangkhangthip un’elo, kadokave aphuthak nang chingthurpo – lapen laso along si, Ranam alam ateng pen sai keklem ale dopik pu rat angno chepeklangdakpo.

Ranam nangphan koan ma nangkangsir, la ansi monit atum aning Ranam aphan chinghon thekchot. Latum aning arlo kiduk-kisung anta alangtum akai aphan alelo, lapen Ranam angno si ning kangsam domuchotpo, Ranam lapen latum angbong chemepik, lapen Ranam akanghon kijut un’e lapen kijut un’e akejok latum chechar pemelo. Pitor tame phong pharo pharo kangsir mate kapekeng chechak nanglo, lapen Job tame asat kepho aphong dopiklo. Nang jongsi Ranam kapinchong kechoklim amonit man ingtung pulote, phong pharo pharo kangsir angthun pho nangji; nang laso aron ateng aphan chikidet ansi Ranam aning kehang ateng papleng unji lapen Ranam kapinchong kechoklim amonit man unji. Monit aphan kapinchong kechoklim kapeplang ke kangsir pen henlo; kangsir lapen ahir kangtangrak asat pensi Ranam ahok akanghon monit aning arlo thap unji. Kisung phophepin lote, monit atum Ranam aphan ahok akanghon avedetji; aning arlo latum aphan asat langbombe te, kangsir ajaton latum aphan pinchong pame kali pulote, latum aning kaike ta angtan anat si patelangphoi chotpo. Penang akarsik angdeng an ingsirlo pulote, nang methang akechokche kelele lapen akisung an chechini bompo, nang kethekthe kachinine lapen kisung kepho ason an kachesong un’e nang chethek longpo, lapen nang lam kapatepek koan ahir ingtang ma chethek longpo. Asat kepho ahut si monit atum amena konat angdeng si doma chechini chotji; asat kepho pen monit aphan kechoklimji aphan pemeponbomji.

Pitor akai kerengbom un ahut, phong pharo pharo kangsir chechak nanglo lapen aphong aphong aduk kedopik asat pholo. Laso akangsir pen ajok alang Ranam aphan kadokave apar kachinghon anujokpi planglo, lapen akai angbong kemenei akepho kachetong planglo. Alang Ranam aphan kadokave apar inghon theklo, lapen ehin pen ke, alang Ranam aphan inghonji pu aning arlo mathathip apotlo; akenangsotnei ke, bonta, alang kangsir lapen kisung kachetong ajoklo. Laso akisung ke alang Ranam aphan kanghonji atovar keja ason planglo, lapen alang ning kedo’e ason manlo. Monit atum jongsi Ranam aphan kanghonji pu ahut kisung lapen kangsir phophe pulote, latum akanghon ke ahokpet kali lapen kangthimlimle pen plengset; lason akanghon ke Sobar abidi pensi plengsetlo, lapen Ranam aning kehang papleng un’eveklo. Ranam aphan kanghonji pu kamatha pen Ranam aphan ahokpet akanghon ke chingbarbe. Alangtum aning arlo Ranam aphan kanghon lapen aning kapangsam alam le matha pu sitame, lapen alangtum kamatha an sita Ranam aphan mathathip lapen monit abidi kalipin pu sitame, alangtum akamatha Ranam angno van lote, Alang lason akamatha aphan rore lapen hirjume pipe. Monit atum ahok alam chini peme pu sita – lapen kedoan alam chinipet sita – lake Ranam aphan kanghon angtheklo pu pu un’e, lapen lahai amonit atum Ranam aphan kanghonlo puke pu un’e. Monit atum ahok alam chinipiklo bonta chingsirse lapen kachelarji aphan klemkle te, monit atum lahai ahok alam pen apot asai klem un’e; monit atum kachingsir ahut si ahok alam kopi ma chini pemeji. Laso apor ahut, latum bor’ibom lote, ahok alam apot asai keklem ta thekmuchotpo, lapen Ranam aning kehang ateng pensi; halaso apor ahut ke, alangtum along kedo monit abidi jumpo, monit aning angthin ing’arpo, lapen monit akamatha ason avedetpo; halaso ahut ansi Ranam akanghon angbong sai keklem angthek klang pemepo. Ranam ahokpet akanghon angthek ke kaningje chot agian lapen ning kehangchot penke long un’e, lapen ahok alam kachini pen chot ta long un’e. Monit atum anam tuvek nangji, lake kachingsir ahut kisung kachechak, ansi latum Ranam aphan kachinghon ingthirjirji lapen Ranam aning aphan hungji. Monit atum Alangphan chinghon nangji pu sita, monit atum Ranam aphan ok pen lapen monit aning pen inghon nangji pu Alang pupe; Alang lam kekroi lapen ahokpet pen Alang sai keklem pen si monit atum Alangphan inghonthek chotji. Bonta monit atum ke ok aning kehang pensi renglo, laso ajok ahokpet pen lapen kroithip pen Ranam asai keklem ajakong ave. Ranam aphan kanghon litthudetji kalite matha thuthedetji; alang Ranam aphan inghon ongchot kalite akele langseletdet tahai. Ok aning kehang pen kereng atum ke la sonni kilit mate ang’ang kilit angbong si renglo, kaiketa ahokpet kave angbong si dolo, bonta kechok si chitin bomlo. Ne abatai batai pubomlo, monit atum arsikjit pen keklem ajakong ave, koan akenangsot ma latum kachini ajakong ave, laso ajok latum amena kachechobei akekroi angbong si renglo, Ranam aphan kachinghon pu kitinthap, ahok kali alam si kroilo. Aove ove atomo anta, monit atum thekbom-rebom lapen kai dambom angbong, monit aphan Ranam akar’i ason ongbomlo, lapen Alangphan si kroithip nangji pusi Alang puthiplo. Bonta Ranam aphan monit atum mathakrang lapen arje tengne bomlo, lapen sonthakthak si Ranam aphan kachinghon ta aju ongbomlo. Monit atum akedo-kethak lapen keklem-kedam anta Ranam aron pen kachingbarbe pen plengsetlo, pima monit atum aphan ke Sobar si panahokdetlo. Laso along Ranam ansose lapen akethedung kejok asai klemlo. Monit atum ke Ranam aphan kirire ajak dingbomlo lapen akenang avebomlo, lapen Ranam aphan kanghon virbomlo. Monit atum lam karjuje, ahok kave, monit aot pen kedode; Ranam aphan kanghonhe anchot kali si, Ranam alam karjuje lapen kachedan pensi plengsetlo. Alangtum Ranam aphan chinghonpiklo pule matha sita, Alang pen kacherap’hetji aphan klemkledetlo, Ranam latum alam arjumolo. Monit atum Alangphan kachinghon koan hijim meme loma Alang chini peme, lapen monit atum ok aning kehang kethe apot Alang monit aphuthak kamatha chelarle, lapen monit akekroi pen Alangphan kacheme apot ta anam tute. Monit ason kali si Ranam ke kolo si ahok ma ahokhe ma plakthek: Alangphan komat si ahokpet kachinghon ma lapen komat si kanghonhe ma Alang chini peme, lapen monit atum ok aning kehang along Alang chejok dunde lapen matha’e kali si, monit atum aphan aot lapen aning-angthin ateng si lanalo. Pima, Ranam, lake ahokpet Ranam chenam, lapen man lapen kamatha ajakong do; monit, lake monitchot, lapen monit akanghon jongsi ahok kali pulote Ranam ta monit akanghon aphan pangnonedetji. Pudamlo pulote, Alang monit atum keklem ateng si latum aphan inghoilo.

Monit atum aot kepho kachetong pen, Ranam sai kimi klemlo, lake monit atum aphan gian lapen Alangphan kekroi ajakong pilo, kanghon lapen hakhi kecho penpen. Lasi, monit atum Ranam alangtum aphan kangsir chechak nangji, lapen Alang kangsai, kolom kipi lapen kangpoi anta chechaksen nangji, kali pulote monit atum Ranam aphan komentu lone ta inghon thekthe. Monit aphan Ranam kangsir ke esonnat ale aphan pu kali, bonta ason ke’ongdung ale aphan. Ahok kiri kangtung atum aphan lason pen anchot si Ranam ingsir ingchapji, lake, apun kechoklim akamathathip lapen akanghon kapaplangji aphan. Ahok kachini kangtung lapen Ranam aphan kar’i atum, laso akangsir asonthot ke, akechoklim, lapen kerap kethedung avelo. Ranam aot lapen aning-angthin ke monit atum joike pen chini un’e, pima Ranam ke, ajat le punon kiripdam alam ke, Ranam chenam. Jonghe sita, Ranam aot lapen aning-angthin ke komentune ta monit aot pen chingbar un’e, laso ajok monit atum Alang ot chini un’e. Monit atum hok aphan cheparidengde, lapen sobar kachongthuitang amonit atum ke kachini un ajakong ta ave; hok ke monit along avepin, lapen hok asai keklemji la thekthe, lapen alangphan jongsi ingsaise lapen alang kisung chechakche pulote, alang kamatha ason komentune ta choklimle. Monit anta, kangsir ke sungpik lapen duk dopik, lapen kedengji aphan sungpik – bonta kangsir ahut si Ranam monit angno Alang ot-adur keme asap chepangdei dunchot, lapen monit aphan Alang akar’i alam chethandakchot, lapen ansose katheang pilo, lapen ansose chok peme pen kangchai lapen kelana; keklangdak lapen ahokpet angbong kapachetondam ateng pen, monit aphan amethang lapen hok aphuthak pachini paongmuchotlo, lapen monit aphan Ranam akar’i ason kachini ajakong kipi paongdunglo, laso ajok Ranam akanghon kechoklim lapen kangthirjir monit atum longdunlo. Ranam kemangdam monit aphan kangsirji puke lason henlo. Monit aphuthak Ranam sai keklem anta akemang lapen ador do peme; ale kave asai Ranam klemkle, lapen monit aphuthak ale kave asai ta Alang klemkle. Kangsir lake monit aphan Ranam angno pen terekchorji lapu kali, lapen latum aphan meherang along pevirdetji lapu ta kali. Bonta, kangsir ahut monit a’ot kelarji aphan, alang kemang ason kelarji, alang kachechar ason abarim an, lapen alang Ranam aphan kachinghon a’ot kelarji lapen alang kai akereng an larphunji. Kangsir lake monit aphan asat binong, lapen seke kipi ason benlo, lapen kangsir ahut anchot si alang kanghon tame la kedothip pen plangji.