Koson Pen si Nang Mohut Akemang Adim Kepaledam Thekpo?

Arnam “akun mate aot-adur akai” pen jasemet labangso akai akenangsot ardi alam nangkethanpon nang chetong longdunloma? Arnam akun aphuthak nang Arnam keklem asai pen kachinidamlong apot angton pen kethan pajirmi thekloma? Kejongvet lapen pachoklim pen kopuson si nang kethan pajirmi thekjima? Laheihui pen ajoine si, akaprek atum nangchinidun longpo nang kosonsi keklemlongma. Hala kangthir aphan kangchir pen kalang’it lapen nangphan nangkapavitoiji aphan kachonghongprong kedo kangjinsomeme, kidukdet lapen ahokpet dhorom kekroi atum aphan kosonsi nang ketheklongtang lapen kachinipontang apot kethan thekpo? Kopuson amonit atum si nangphan nangkapavitoiji aphan kachonghongprong kedolo? Nang matha unjima? Nangphang anghor akardik, nang akejapon lapen nang arpu alam chichini loma chininelang? Konatlo nang phurkimo kemanji akemangdam alam kamathadam? Non kevangji puthot akai along koson si nang kachikimeme ahemphu kachemanpo? Ahemphu kacheman pen kethan unji ajakong nang kamatha doloma? Koson si nang la kadokave ahormu doan ta ahemphu lo pu kethan thekji? Kereng’et api doan lapen pirthe along kedoan amar ta ahemphu binonglo ma? Kopipi akemang dolo nang la puthot asai angdeng along kapachingthur muchot keklemji aphan? Bang koan amonit atum nangphan si nangkapavitoiji pu chonghongprong kedolo? Nang keklem asai ardikhup asonma? Latum ke dukvok, jinsomeme, checharche, lapen kaduredet angbong atum saise, kangtingkuk angbong ningkebopdet si kedo – kopunatlo atovar ke? Kopuson si latum katheang aphan kar’ilo, chiklolongso ason, kangtingkuk aphan menmen nangcheklang amat kepapraithudet ason athe la koan aningkan pen lone monit aphan aduk inghoipiklo. Komatlo latum ningkethepik aphuthak angton pen kachiniji abang, lapen laso aphan koan lone latum ajo-narlo tame akar’i kedo? Halabangso arni jongsi kedamtang apot atur kepaklang anta, lahei karnukkrung kesodet amonit atum kejokji aphan ningkethe avepin pen kangtingkuk herang aphatek along si donangbomlang; komentu pen si latum akesung kejok longpo? Kesang anta kelongledet khangjang labangso kahenodak joike akarjong atum akopai langnopik chenamlo, lapen latum arjidingklui aphi anta laso kangjinso kelongledet akacherap lapen kangsamklak aphurkimo along si saijokje donangbomlo. Lapen komat si alangtum ningduk ase karjulong abang dolo? Komat si alangtum kangjinsomeme angdeng kedo along kelangdam abang dolo? Nang ephongbak ke mathadam loma koan lone Arnam aningduk lapen aning kedojoi thekthe? Adai kavedet monit akhei atum aphan, Alangli rideng pen Alangli kapinchongvek aphan lapuson akesungdet ahut koson si Alangli chechakding pen kelang unji? Monit atum, ajatnon, kahenodak abikar kephovek nangji atumlo. Lapen pini arni monit atum reng longbom pu tame, monit akhei aphan aphrang pen si hi’i atum bikar nangkipitang puke komat si chini abang dolo? Nang ke chetengnedetlo puhe nang ta kephodunvek abanglo? Arnam aphan akachinghon pen, nang la kerengbomlang atum doan aphan keklemji ar’i’elo puhe? Nanglong ajakong kedoan pen Arnam aphan kachituji ar’i’elo puhe – Alangli monit akhei aphan Alangli methang a’ok lapen avi ason si nangchinghonlo? Kadokave kethan lapen keklemtang alam tangte, Arnam pen ajok nang keprekjek keongmuchot akai kerengdunlong apot koson si kethanji? Nang kai dingpi ardi kedojot pen kangthirjir, Arnam aphan kachehodai abangphu ason kerengdun longji aphan cheparaitang lapen ningtheklong pen chenam ta doloma?