Kosonsi Kechoklim Angdeng Arlo Kilutdun Unji?
Koan si monit atum Arnam alamthe kedeng, hala ansi alangtum katheang atur longpo, lapen hala an si alangtum Arnam aphan kiri chepangchir lapen chepalang’itpo. Komatma Arnam alam kekroi atum ansi ansose kangcholim lapen kangthimlim ason pho longji, lapen alangtum akai anvet henlo nempo angphar ason kaike kapangpharbomji. Komatsi chethe kiri atum doan bangso aphan si apor kangthim asai pu chehok nangji; alangtum chematha nangji “Arnam avete, ne reng un’e; Arnam ave te; ne ajat asai ta pachun un’e; Arnam ave te, kadokave ingthaidang.” Lasi, sonthot, alangtum cheparaithip nangji “Karjong Kangthir jongsi ave, ne ajat ta klemkle, lapen jongsi Arnam alamthe kaporhi pen thangnat ale ave tangte ne ajat asai keklem ta ning chibidunde.” Methang aphan chejokdun nangne. Ekai along pen kachini ason doan ta Arnam kapatheang atur lapen keja pensi kevang, lapen lahei ke nang ason chepado pen kabor’i doan aphan kapaklarlo. Nang methang pen kachehang nangji ke lahenlo: “Jongsi ekai along pen kepho alam vang lote, ne methang aphan kilutji alo joike pi thekthe.”
Ahut pen, apor kememe ahut, nang Arnam do pu chetengnedet, lapen kachardom ahut ta Arnam do pu chini thekthedet titi. Halason apor ahut kaphere ke thang alam ave. Tongsekot pen kachiri cheng nangpo. Jongsi nang lasonse, Arnam ke nang pen chehelobompo, lapen Karjong Kangthir avepin pen do nangkokpo – lapen, anparta, Karjong Kangthir asai – arnisi, nini, chiklo ejon mate chiklo jonni aphan tahai mene. Lason apor ahut, nang ning oimeme anpi jakong kave manpo lapen puthot ephong Hi-i arideng chingnanglipo, meme-henono asai sitame keklem undet angdeng an. Keplang-kephi ar’ipo, korte-ingjir aphan chongthuipo, lamarjan ason doan langpo, mahjong pathupo, lapen duma ta mongpo lapen hor ta aron ateng kalipin pen junpo. Nangning ke Arnam ke heloving chekakdunlo, nang chepatujoi pen methang atovar si damjuilo, lapen nang Arnam asai aphuthak chok-chok chokcheche kangsaidun alam ningje etlo. Ajahak alamki along ke, monit atum lapuan si arum keklolo alangtum beisa a’ot ason-son apap keklem ta therak thekthelo. Lapuson amonit ke Karjong Kangthir ta ke’otanglo; ahokpet ke, lapuson abangphu along Karjong Kangthir asai ke komantune pensi dure’etlo. Majok tame theklongji alangtum ansose chongthui-chopanglim akaharnuk along kejangbom athe hi-i ari kachejot paphrangpik anlo. Kapajut ke, alangtum ahok atovar do puke kroikrelo, lapen alangtum pap klembom ahut Hi-i arideng chingnangpo. Jongsi nang Karjong Kangthir do puke theklonglo, bonta Karjong Kangthir asai duredundet pulote, lake pherememe adim si kedotanglo. Nang Karjong Kangthir do puta chini thekthe lote, nang kithipo dok-dok along si dolo. Jongsi nang ningcheruire, tangte nang Hi-i along si puthot ingthimlim pen lerokpo, lapen keplungtang atum anglum si dodunpo. Lasi, nang jongsi Karjong Kangthir aphan rithekchotlo pu angdeng anlo (nang pap asai keklem, nangmethang aphan chelangdunkri, lapen Arnam aning kedokde ason ajat ta klemkle) bonta Karjong Kangthir asai ke duredet (chardom sitame ningchelar ave, Arnam alamthe cho lapen jun sitame thangnat katheang mate atur longle, Arnam alamthe kecho lapen kijunji aphan mathadunde, nangkai along ajat ahin kachingthurdun ave, lapen kethedung akatheang atur pen kachekak ajirdingklui penlo) – halapuson apor ahut, nang ansose chere nangpo. Nangmethang aphan chejokthap nangnelo, methang a’ot aphan ari pajokvanbom nangnelo. Karjong Kangthir ajat apor ta avedet tahai. Lahenlo lapuson apor kapherememe ke. Nang jongsi methang aphan lapuson adim chelong, nang koan ma kepaprap’un doan ason ta pachekirlaji aphan bor’inoi. Aphrangsi, chardom pen kechokche chekubirnoi lapen Arnam aphan non ephong Alangli kanghon nangpapiji aphan choningrinoi. Ansose padikrim pen chardom ra choningrinoi, ansose Arnam alamthe kechoji lapen kijunji aphan nangning aphan chepadojoinoi. bangso atiri pen, nang kachardom aphan ansose apor chipi nangpo; puthot phanni ajakong kilun, kachardom, Arnam alamthe kecho lapen kijunji, lapen methang adeng kacheklemji aphan chipinoi. Nang jakong kavenei ahut, nangning aphan Hi-i kacheparideng kejoineilo. Lason cheman lote, nangning ke Arnam along pen ponsi Hi-i along pachiruijuilo, konat penma nang Karjong Kangthir kave adim an. Lapuson apor ahut, lake phanni akisung lilo Karjong Kangthir asai aphan puthot kachepalongthuke. Karjong Kangthir asai kiri kememu ke Alang nanglong nangdodunbom ahut henlo, lasonsi Arnam nangphan Alangli ansose akatheang atur nangpapipo lapen Alangphaan nangphan nangpa’o longlelo. Kachardom, karcho alun kilun, nangsai kacheklem, lapen Arnam alamthe kecho lapen kijun – lahei kadokave keklem ke Hi-i aphan alang sai kacheklem avarsai kipipedetji, lapen Karjong Kangthir nanglong sai pacheklemji aphan. Lason jongsi nang Karjong Kangthir asai chepalong thuthe, jongsi nang lapu amat chonghong, tangte Karjong Kangthir asai kachepalongthu kejoikeji kali mo nang jongsi Karjong Kangthir kedo chepangbolo te, Karjong Kangthir nangphan jongjung nangpachekirla pu anbak, mate nangphan jatsemet nangpatheang lapen atur nangpi. Lapuan aphi tame, nang kachepapleng thuji aphan arnisi mate nini ta nangne; ahut pen ajat cheplengthuthepin ta chiklo jonthrok damjui tahai. Lahei atheke monit atum amethang aphan chepajoi ongchot, ajat ason ta mesen atovar pen kachini’idam thekthe lapen lasi Karjong Kangthir penta otekangpo. Nang jongsi Karjong Kangthir asai chepalong thulo putame, non dobom Arnam asai nang chinidun pememedet tahai, athe nang ke nangkai along kachinidam ason along kedo aphi helovinglo, nang ke mile suri kep anbak aphi nang otekangbup ason. La kahenodak ason kalilang ma? Ne halason amonit aphan than sitame, nonta kachelarji aphan keder’o kalilang, bonta isi alam do: Nang ansose klem chepaduk nangpo, lapen kaselet along chejokdunri. Jongsi kaprek amonit atum arnisi along batai pho chardom, nangke batai kep chardom nangpo; jongsi kaprek atum arnisi along ghonta hini Arnam alam lapen jun lote, nangke ghonta kalite ghonta throk klem nangpo, jongsi bang le karcho alun ghonta hini arju, nangke akijumnei ta arni ebeng arjudet nangpo. Arnam athengno kaiketa monsam penle donoi lapen Arnam akanghon alam mathanoi, nang chelarletik an, nangning Arnam along cheruiretik, lapen nang Arnam along pen kat haihedet an – halaso ahut ansi nangkacharli ta athe klangpo; halaso ahut ansi nang chelongthupo nang kedamtang, kemesen angdeng.
Ajahak amonit atum methang kiri ason apharman kar’idam ahir chipipo lapen bonta ahok atovar along lut haihelo. Lahei atheke alangtum mathathe ongchet lapen karjong alam aphuthak ardi pipe. Arnam alamthe kosonsi kachiniji abidi latum asap ta chinine, lapen chinine Karjong Kangthir kedo lapen asai kopipi ma. Lapuson amonit atum aning hangpik sitame luvok; alangtum akai le kachiridun kali. Laso atheke Karjong aphuthak asapbak ta kachini kave, alangtum asap chinine Karjong Kangthir keklembom asai koan chingthur lone, lapen alangtum chinine alangtum along kedo akarjong kopi-koson lone. Lapuson amonit atum akekroi ke kajok’lu akekroi kalima? Lapuson amonit atum kakirsan ke mo kijut thang ale ta vanvelo. Inut amonit Arnam aphan kekroi pen methang akai along kechan-kejar chepalongji aphan achabi ke Arnam nangkepho ason along kopisi klem loma pu kachini, Arnam along akanghonmeme aphan kedeng, Arnam kisik-kedang ateng pen kedodun, Arnam alamthe nanglong kachesomhet pen lahei si nangkai kapeman, lasonpen si Arnam aphan aning kapangsam. Nang kekroi jongsi jok’lu akekroi, jongsi nangkarjong alam lapen nangkai a’ot aphan ardi chipipe, jongsi nang ahokpet anat asap ta jakong chipidunde, nang Arnam akemang ripdunthekji ma? Jongsi nang Arnam kopisi nangkehang ma munthi thekthe, tangte nang ke kachiniji ajakong avelo, lapen sonsi kacharliji aphan atovar avelo. Nang Arnam alamthe along dobom ahut kachelangpon nangji ke halahei nanglong kopi angthek si kevan ma, nang Alangli lamthe pensi Arnam aphan kachiniji aphan. Jongsi nang Arnam alam porhi thekchot, bonta dobomlo pu chipu thekthe, lake nang karjong aphuthak thangnat kachinidunde kalima? Non amat, ongdung amonit atum ke Arnam alamthe aphan dobomlo pu chipu thekthe, lapen lasonsi alangtum Arnam asai ta chinine. Lake alangtum asai kacheklem thekthe kalima? Jongsi alangtum lasonle klembom, kopi apor ahut ansi alangtum doan ason ta plenglim dobomlo pu chipu thekpo lapen akai along kechan-kejar chepalong dunpo? Lake ajor kave kachingki ateng anvet kali puhe? Nangtum angbong penang an amonit kelindamchot alam aphan ardi kipi atum do, latum karjong aphuthak thangnat chinine, lapen sitame Arnam ahin pen thedung asai kepekji lapen Arnam pen hirjume kelongji si kemangdun. Lake angton pen amatsi ahok kalidet! Lasi, nangtum labangso kachepaplengple asai ington nangpo, kadokave ta karjong akai ahin kechok atovar kilut dunji aphan, hokpet kachini longlo pu chipu thek nangpo, lapen ahokpet ta Arnam alamthe keklangdak along lutdun nangpo.
