Kopuson si Arnam Akar’i Ateng Ingsamjin pen Sai Klempi Thekpo?

Inut Arnam aphan kekroi ahut, kosonsi, chenam-et, alangliphan inut keklempi nangpo? Kopipi ateng pen si kepapleng un’poma lapen kopi ahok si kachini nangji komatma Arnam aphan sai klempi atum do’an? Lapen nangtum keklembom asai along pen nang kopunat atovar si kisuirongjima pu tahailo? Nangtum lahei ason chethak thekvek nangpo. Laheihui alamm ke Arnam aphan nangtum kopuson akekroi loma pu ropon’etlo, lapen Karjong Kangthir kejapon atovar kopuson si nang kengkam kachejordunlo lapen Arnam kaselampon kithiktang ateng asontin along tame chipidundetlo, laso apot si nangtum aphan Arnam asai heihui akengkamtin ta kapachiniji aphan si nangtum aphan avarsai tholo. Halabangso angdeng’an nang le lote, Arnam aphan akekroi kopima pu nangtum kachoro padopo, kopuson si Arnam aphan choklim pen kekroi nangjima, lapen Arnam akar’i ateng ingsamjin pen nang kopi si keklem nangjima chinipo. Lason lote nangtum aphan choklim lapen chenam si Arnam asai along athikdut pen chemanpo; kejongdun puta nang thangnat avelo lapen nang kangsaidun ta klemklelo, mate kangdirdun, Arnam asai aphan kiritarlip ke pajum muchetpo. Lasonsi, nangtum do’an tame mo kithi ahut anta Arnam aphan si kekroivetji un pemepo, nangphan nangkepajaji si Arnam aphan avarsai thopilo lapen biresak aphan ason nangphan athok-ajir pemanlo, laso ateng pen si nangtum do’an tame 1990 ahut aPitor atum ason chemandun unpo, lapen thengparpan along kedo ahut antame Arnam aphan si chinghonthipverpo, masapso ta kejongdun kavepin pen. Lapu’an si 1990 ahut aPitor atum ason nang dodun thekji.

Anuttin ta komatma kacheparaitang atum do’an ke Arnam aphan klempi’thekpo – bonta Arnam aningkehang ateng aphan kachematha muchot atum apharman anchotji lapen Arnam aningkehang ateng kachinidun atum si Arnam aphan sai keklempi apun-achak lapen hokponji. Lason Ne nangtum angbong pen nanglong tanglo: Ongdung amonit atum akekroidam kedo ke ninghangtik pen Arnam abirta keme pachethangbom lote, Arnam aphan pusi tovar an kevang, methang aphan do’an apor chepadam lapen asontin tame Arnam aphan pusi chepi’etlo, lapen do’olang, tangte lahenlo Arnam aphan sai klempilo. Sonsi penang’an dhoromi amonit atum kekroidam ke alangtum arideng Baibel che’otdong pen kedolin mate kejuilin henlo Arnam aphan sai klempilo, sining hemrengme arat kachepahemphu longji aphuthak birta keme kapachetak klemlo lapen monit atum aphan mena kechokche apot ning pacherui si pachekobirtoilo. Penang’an dhorom kacheja asaiphu atum do, latum kachitindam ke akangtui angdeng kacharlidamtang lapen dhorom alamm kacharli adim pen seke ke’unduntang pu ajoine kachingrum along lamm kethan lapen monit atum aphan Baibel angdeng puponjir si thanpon henlo Arnam aphan sai keklempilo pu. Lapen anpar ta, penang an amonit atum keboidet ahavar along Arnam aphan sai klempi pu kekroidam ke alangtum akorte lapen ingjir atum angbong keso kepame lapen hi-i kiphlung henlo lapenthu latum aphan kardompi, mate kelanadun henlo. Nangtum angbong, penang’an atum do latum kekroidam ke Arnam alamm kecho lapen kejun henlo Arnam aphan sai klempilo, arnivang Arnam aphan kardom, lasonthakthak si nahok tame kardomhem along kahumridam lapen sai keklempi henlo pu. Ahajak akorte lapen ingjir atum abang ke kachepangriredet lapen hemtun kabochechedet pen methang abang arpum angton pen Arnam aphan kachehodaidet henlo Arnam aphan sai klempilo pu si kroidamlo. Tebonta Arnam aphan ahokpet sai klempi ke kopima pu kachinidam amonit ke ing’arpik. Sining angsong along ko’an achiklolongso kedoma lapuan thakthak si Arnam aphan sai klempi amonit ta dolo puvoiphit ta, komatmatma keklemphit thek atum aphai, lapen komatma Arnam aningkehang ateng pen keklempi atum, ke ing’arpik – masapsovet. Kopi apotsi Ne la kepulo? Ne la kepu ke athema nangtum “Arnam aphan keklempi” pu alammthe aklong alamm chini pememedet, lapen nangtum Arnam aningkehang ateng pen kopuson si keklempi nangjima pu kachini akele jumpik’lang. Monit atum chenam-et ta prapjin pen kachini nangji akenangsot do kopi asai si Arnam along Alangli ningkehang ateng pen pachetondun thekpo.

Nangtum jongsi Arnam akar’i ateng pen sai klempiji ninghang do pulote, aphrangsi ke kopuson amonit atum si Arnam aphan aningpangsam unji pu nang chinidet nanglang, kopuson amonit atum aphan si Arnam kelangseletneilo, kopuson amonit atum aphan si Arnam kapachoklim keklemlo, lapen kopuson amonit atum si Arnam aphan sai klem unji apun-achak kechoklo. Akejumnei sita, nangtum labangso alam akachinidam ke chibikok nangvekji. Anparta, Arnam asai-amo akemangdam nangtum chinidun nangji, lapen Arnam bangso asai ladak amat lapen nonmat keklemdetji antalo. Lahei alam chinidun aphi ke, lapen Arnam alam akethan ateng pen, nangtum aphrangsi ke kelutdunlong aphan henlo, lapen Arnam ahukum kechengsi longjilang. Ephongle nangtum Arnam alam doan chok peme pen chomatlong tanglo pulote, lapen ahokpet pen Arnam asai chinilo tangte, nangtum doan ke Arnam aphan sai klempiji apun chokpo. Lapen lason kemanji ke nangtum Alangliphan sai klempi pen nangtum aphan karjong amek Arnam nangpatheklongpo lapen Alangli sai aphuthak thedung akachinidamji aphan avarsai nangthopipo lapen klardak pen si theklongpo. Laso keklangdak along lutdunlong lote, nang akachomatlong tame thedungpo lapen ahokpetpo, lapen lapuson kachomatlongtang atum kedoan ke kardomhem heihui along ta kengkam chejordun unpo lapen nang korte lapen ingjir atum aphan ale kedo alam thandun thekpo, laso pen si nangtum lahinhin angbong ajakong pacherappet longpo anke nangtum akeledamde ason doan tame chepekeng longpo, lapen nangtum akarjong along ansose ongdung akachinidam dopo. Lapuson longdundet aphi ansi nangtum Arnam akar’i ateng pen sai klempi unpo lapen la nangtum keklembom esek Arnam nangpachoklimpo.

Komatmatma Arnam aphan keklempi atum anke Arnam pen kachephoklok atum henlo, latum Arnam aphan aningpangsamthek nangji, lapen Arnam angno angthikdut pen si dodunthekpo. Inutvet ahut mate armu ke’ongpi along tame nang ke, Arnam angno Arnam pen kelong aningkarong nang longdunvekpo, Arnam angno nang arjapkluk pen si do’unpo, lapen bang monit atum ajat le nangphan nangvi tame, nang kedam nangji atovar si nang ke kaike dambompo, lapen Arnam anghor do’an asontin ta lana pemepo. Lason amonit ansi Arnam pen kachephoklok atumlo. Lapen la Arnam pen kachephoklok atum henlo Alangliphan sai keklempi thekji athema latum aphan ke Arnam kethedung ahukum lapen Arnam anghor si pidetlo, latum ke Arnam aning si alangtum mena pachemandetlo, lapen Arnam anghor do’an ta alangtum mena si chehok’lo, lapen mohut akai apharman kephoji latum ajat tame non pen chithikvan si dolo: Jongsi ajat tame latum kephoji ave, lapen latum ale kelongji ta ave tame, latum ke Arnam aphan si kaike kachinghon aning pen kroithipji. Lapen sonsi, lason amonit henlo Arnam pen kachephoklok atumlo. Arnam pen kachephoklok atum anke Alangli aklong alamm anta kachinidun’et abanglo, Arnam aningkethe atumsi Alangli kesangsedet’un along jalangdun unji, lapen Alangli kamatha, lapen alangtum ok le sodet lapen lakdet tame, latum laso akeso chechak unpo lapen mathaplot si Arnam aphan ningkapangsamji si latum keklem ninghangpo. Arnam lason amonit atum aphan anghor kipi pa’ongchet, lapen Arnam kopima keklemji aningkehang ke lapuson amonit ajok pensi hakhi plangpo. Laso apot si, laheihui amonit atum anke Arnam aphan ningpangsamlo, latum anke Alangli mena aning aphi kidun Arnam achakri atumlo, lapen lasonson amonit atum anchot si Arnam penpen chari rappetpo. Mo Nang le ahokpet Arnam pen kachephoklok abang cheman lote nangke mo Arnam pen chari rappetpo.

Jisu aphan Arnam kepek ahukum pachun unlo – monit akhei aphan pap pen kapajok asai – atheke Alangli Arnam akar’i aphan kenangji an kamatha chipilo, Amethang aphan thangnat kachisik mate kelangdammek avepin pen. Lasi, lapen te, Alangli ke Arnam pen chetebokpik – lake nangtum kadokave ta chinipeme alamlo. (Ahokpet ke Arnam pen asat ke’en a’Arnam amatlo Alangli ke. Ne bangso alam ladak kaparno athe ke Jisu aphan bangso alam aphuthak animona ke’en’iji aphan.) Alangli ke Arnam kisikmek asai aphan si ardi pi peme, lapen kaike ta sining angsong kedo Epo aphan chardom lapen sining angsong kedo Epo akar’i kaiketa arjupon. Alangli chardom si pupo: “Arnam kadokave Apo! Paplengnon kopima Nangli kar’i, lapen Ne kemang ateng ke klemri bonta Nangli kisikmek asai ateng. Monit jakong duredet tahai, bonta Nangli alangphan kopilo matha nangji? Kosonsi monit le nangkamatha nangset apun kedopo, monit matma Nangrideng along ke miso alonrekchot? Nening arlo, Ne kemang ke Nangli kar’i asai kapachun anchot, lapen Ne keklemji kopima Nangli nelilong Nangli ning kehang ateng keklem asai.” Jerusalem kedam atovar along, Jisu kisung phodetlo, Alanglining along tari le kachinghum aret ateng, bonta Alangli masapbak ta Alanglilam pen aphi kachiruiji aphan kamatha ave; kaiketa isi kangtangkring ajakong ha Alangliphan thengparpan along apran ke’enji adim an Alangliphan patebok ponbom. Kapajut ahut, Alangliphan thengparpan along sak’lo lapen pap kedo abang atum ason chemandunlo, monit akhei aphan pap pen kapajok asai pachun si. Alangli karli lapen Hades aphamri pen chepajokphunlo. Alangli thengno, kithi, me-herang, lapen Hades atum jakong duredetlo, lapen Alangli rideng remdun’etlo. Alangli ningkan thomkep ra kethom rengdunlo, laso ahut esek Alangli halabang si apor ahut Arnam akar’i asai kapachunji aphan arsikjit pen klemlo, mantune ta methang ale lapen kanahok aphan chemathathepin, lapen kaiketa Arnam Epo akar’i alam si kamatha. Lasi, Alangli baptisma endet aphi, Arnam pulo: “Lake Ne kachinghonnei ne Sopo lo, komat along si Ne ning chingsam peme.” Arnam athengno Alangli sai kolosi Arnam aning kehang pen kacheton ajoine, Arnam ta monit akhei aphan pap pen pajok asai thepo Alangli phang along batlo lapen papechuntoilo, lapen Alangli ke apun-achak ta do lapen hovang ta kelongtang labangso asai kepachunji aphan. Alangli kai arjon, Alangli pundam un’epin an akeso Arnam apharman chechaklo, lapen Alangphan lakha un’epin aphong Hi-i ta bai-chongthuilo, bonta Alangli mantune ta aning runre. Arnam Alangliphan lapuson asai kipi atheke Arnam Alangliphan ningchethe, lapen Alangliphan chinghon, lapen lasi Arnam jongjung ningjelo: “Lake Ne kachinghonnei ne Sopo lo, komat along si Ne ning chingsam peme.” Halaso apor ahut, Jisu anvet si labangso kepek asai pachun unchot, lapen lake isi keklem nangvek ahinlo Kanghon Kangjinso Akai along Arnam Alangli monit akhei aphan pap pen kepajok asai kapachunji aphan.

Jongsi, Jisu ason, nangtum Arnam arpu aphuthak kenangji’an kamathadamthek, lapen nang’ok aphan chepanungkuk pulote, Arnam nangtum along Alangli kenangsot asai nangpek ponpo, atheke nangtum ta Arnam aphan keklempi nangji ateng kachetong longji aphanlo. Lapuson anchotsi nangtum Arnam aningkehang ateng keklem lapen Alangli kepek arpu kapaplengdunlo, lapen anchotsi nangtum ahokpet Arnam aphan keklempi pu pudam unji. Bisar alamm Jisu pen pangbardam lote, nang Arnam pen kachepho’klok pu pudamji ma? Nang Arnam aningkehang ateng si keklem pu pudamji ma? Nang Arnam aphan ahokpet keklempi pu pudam unji ma? Pini, nang Arnam aphankosonsi keklempi chininelang, nang Arnam pen chephoklok pudamji ma? Jongsi nang Arnam aphan klempi pulote, nang Alangliphan nongno kejo kali ma? Laso aphuthak mathatha: Nang Arnam aphan si klempi ma, mate nangmethang aphanlo? Nang Hi-i aphan si keklempilo, sitame nangke Arnam aphan si keklempi pusi pudam lemdetlo – laso along, nang Arnam aphan nongnokejo kalilang ma? Ongdung ne phi kedo amonit atum along arpu-angdeng ahirjume do, latum kecho ason along si chethokdunrut, latum mek kejangji aninghang lapen a’ok kachelanaji aphansi pathelo, kaiketa kaphere atheke a’ok aphan thangnat atovar avelo. Latum mondoli along asai cheklem pememe, bonta mondoli pen ale kacho’endun, kalite Ne lammthe pen korte lapen ingjir atum aphan therpo, alangtum methang aphan arpu lapen akaprek atum aphan jakong pen chepahemphu’iji aphanlo. Lahei amonit atum ningjekong titi alangtum ke Arnam kar’i asai si keklempi pu lapen kaiketa ningje Arnam pen chetebok’het pu – ingnekmeme kali ma la? Jongsi nanglong kemang kechoklim do, bonta Arnam akar’i ateng sai klempi thekthe, tangte nang ke kachepalulo; bonta jongsi nang kemang le kechoklim kali, lapen nang Arnam aphan sai klempi pu ningjebom, tangte nangke inut Arnam aphan kekhamkhe abanglo, lapen nang ke Arnam arideng adai kephoji apunlo! Ne lapuson amonit aphan kangjinso ave! Arnam ahem along, latum sai chepajok, kaiketa a’ok aphan akerengme do, lapen Arnam aningkehang ason aphan kamunthidam ave. Latum ke kaiketa alangtum aphan kopisi keme ma si rirok, lapen Arnam akar’i aphan masapbak ta mathadamde. Latum ke Arnam Akarjong alangtum keklem asai doan ingsirdunbom pu alam deng ingtunte. Latum ke kaiketa akorte-ingjir atum aphan si kapakan lapen kachongthui, arje pahini si cheman, drakha akrap along akethoi ason, kaiketa drakha kachonghu lapen akrap kephalangno. Lason an monit atum Arnam chephoklok unji puhe? Arnam ahirjume kedengji aphan nang apun choklim loma? Nangmethang akai lapen modoli apharman ke ardi che’en’e, nang Arnam kepek asai kedeng dunji apun loma? Komat si nang ason-son aphan ningchethe haipo? Lason si asai keklembom, pulotangte Arnam nangphan arpu kethe nangpek haijima? Lake asai aphan panglendundeji ma?

Ne nangtum aphan lapuson nangkipu atheke nangtum chininon Arnam akar’i pen pachetonji pulote apun pachok nangji. Nangtum jongsi Arnam aphan ning chepipe, nangtum jongsi Jisu ateng Arnam akar’i aphuthak kenangji kamathadam chepadode, tangte nangtum aphan Arnam ning nangchethethe, lapen kijut ke Arnam pen nang ingsai rongpo. Ahokpet abang ke pini ke, nang Arnam aphan sai keklempi along, nang kaiketa Arnam aphan kachongthuiji akemang si chepado lapen kaiketa Alangliphan klempi pememe detlo. Thihek pen, ajatta langdamdepin sitame, nang jongsi Arnam aphan chongthui lote, kangjinso kavepin akangsai si nanglong nanglepo. Nangtum Arnam aphan nangning chipi pen Arnam aphan sai keklempi akechok atovar anat kidun apot ale cho’en nangji, kekroi kethak avepin pen. Arnam athengno si doma mate kaprek amonit athengno si doma pu langdamdepin pen, nangning ke kaiketa Arnam anat si pangno nangji, Jisu keklem asonsi Arnam aphan kanghonji pu cheparaithip nangji. Lasonsi, Arnam nangphan kechoklim nangselampo, nang Arnam achakri cheman pen Alangli ning aphi kidunkriji aphan. Jongsi nang ahokpet pen Arnam arideng kechoklim cheman ingtung, lapen nang keklem asai Alangli kar’i pen pachetonji, tangte nang kedamtang arni ahut Arnam aphan kekroidam ason an chelar nangpo, lapen chelar nangpo kedamtang arni ahut Arnam aphan kosonsi sai keklempi, lake nanglong ansose Arnam nangpachokji adim kachelongji aphan. Lasonsi, Arnam nangphan nang’o’elo, lapen, Pitor asonsi, nang ta Arnam aphan aning kedok atum an aphan kerai abangpo. Jongsi nang chekubir lapen chekirla thekthe si dokok pulote Juda asonthot si virpo. Laso alamm Arnam aphan kekroi atum do’an chini nangji.