Koson si Pirthe Along Arnam Aphan Kachinipo

Nangtum ke Arnam athengno nong’e longlo lapen Arnam pen nangpangvai ingtung; anuttin ta Arnam aphan kekroi cheng lote laheihui ason aphan si kemang atheke anuttin ta ansose kangtui ason akemang pensi aning chepaplengtir, lapen majok ta anut kaprek aphi dodun ingtungte. Lapu henlo monit atum kosonma pulote. Jongthip pen laso ajoine si, nangtum angbong ongdung atum ke siningrengme along kedo a’Arnam nangkepalangji aphan si kaiketa kabor’ilok, sitame ahokpet ke, nangtum Arnam aphan ning klarsap pen kanghon lapen prangset pen kacheklang a’ot ke nangmethang aphan ning klarsap pen kanghon lapen prangset pen kacheklang pen jumpik anlang. Ne kopisi lason kaningje? Athe ke Ne asapbak ta nangtum Arnam aphan ningklarsap pen kanghon puke nangkroidunde lapen, anparta, atheke nangtum aning along Arnam do pu Ne kroikre. Ladak kipu damji puke, nangtum kardom a’Arnam, nangtum keroklang keklardakde a’Arnam ke, ave amatsi ave. Ne labangso alam lapuan kejongdak pen kiputhekdet atheke nangtum ahokpet Arnam pen apar helojetlang. Nangtum ningklarsap pen kanghon ke nangtum aning arlo kedo akumlin ajoine; Nephan pulote, lasonthot si, nangtum thethe mate bibe pu kethekdamlong a’Arnam, nangtum lamthe pensi kerochot. Nangtum ke Arnam pen heloving pu Ne kaningje ahut, Ne kipudamji puke nangtum hokpet a’Arnam pen kedo adak thetanlang, halapu keklardakde a’Arnam abang ke ri pen chejotrai anpin katebok si ketheklong. Ne le, “thethe” pu kipu ahut, lake pini arni nangtum kekroi a’Arnam thangbakbe kethek ason do’o abangphu, inut la anset kethe parpik abangphu kalidet pen pachingbardam si kipudam. Nele “bibe” pu kipu ahut, ladak kipudamji puke, labangso amonit tomon pha thekthe lapen arve aphan pinkhat un’e pusitame, voiphit sitame Alangli siningrengme lapen pirthe kapaklem’un asai keklemji aphan Arnam Akarjong pha thek, monit aphan pamanghuprong si padokok anpin an. Athak penke, nangtum pirthe along Khristo aphan alam arju’o ason si cheklang, sitame aklong penke, nangtum Alangliphan kekroi ave, mate Alangliphan kanghon ave. Ladak kipuji puke, nangtum ahokpet pen kekroi abang ke nangtum methang kamathadam pen kepaman hala keklardakde a’Arnam lo, lapen nangtum ahokpet pen kanghon abang ke nangtum jo-pedap kiri a’Arnam lo, sitame abang kereng ketheklonglepinlang. Labangso Khristo ahin, nangtum akekroi ke bonta kethak dopik, lapen nangtum akanghon ke thangnat kali. Kekroi puke lamthe kedengdun lapen ning kachethe; kanghon puke ning arlo thirklong aman kipi lapen kero kedo, mantune ta chekakke. Sitame pini arni nangtum Khristo aphan akekroi lapen akanghon ke lahei along an ledamdedet. Kekroi alamle chethanlote, kosonsi nangtum Alangliphan kekroilo? Kanghon alam le nangle lote, nangtum Alangliphan kosonsi kanghonlo? Nangtum pu amat Alangli kun aphan kachini avepin anloma, anparta ansose si nangtum Alangli tiri kachinine, lasi kosonsi nangtum Alangliphan kekroironglo? Nangtum Alangliphan kekroi along hokpet ason konatlo? Kosonsi nangtum Alangliphan kanghon? Nangtum Alangliphan kanghon along ahokpet ason konatlo?

Ongdung atum ke thangnat kakhinde avepin pen Nelong pini arni an nangdunlo. Lasi, la tamelo, nangtum kedamtang lapuan aningkan along nangtum kelak phonanglo. Nangtum anuttin along aklong a’ot lapen abe Ne chingthinglor keklardak pen parisim longlo; nangtum angbong anuttin pen kachingki asai ke kasiksak thepik an, Ne le nangtum aphuthak kiripdam dopiklo pusitame, nangtum Ne phuthak kachini thangta ave. Monit atum kipu nangtum ke kamanghu ahut bang nangkachongthui along kroidundet puke kamatha meme alam kalipin. Chenam ta, nangtum ke Ne kun aphuthak thangnat kachini ave, la ansose si nangtum kachini thekthelang Nening arlo kedo alam. Pini, nangtum Ne phuthak kachinidam kechokche ke herai athan kachingrumbom ason si kekam prap’ong onglo, lapen nangtum Nelong kekroi ke kamanghu akekroilo. Nelong nangtum kekroi do pu kipuji alar ke, nangtum Ne pen kachemesenji lapen Nelong nangpatebokji aphan kacheparjanthap pusi kipu te akechok muchotji. Nangtum akemang ke bipikpik: Nephan nong’e nangkipithek abang aphi si ne dunji, lapen nephan thedung akanahok pen nangpajoklong abang aphan si ne alam kekroiji, alang Arnam lo punoi mate isibak jongket a’Arnam lo putame. Laheihui alam ke nephan thangnat nangchophophelo. Nangtum angbong lapuson amonit dopik, lapen laso angdeng ke arsikpiklo. Jongsi, arnisi, nangtum angbong bang koan si Khristo along Alangli tiri alam kachini pen kekroi abanglo pu asatlang do, tangte nangtum angbong pen inutbak ta Ne thengno kechokchedam avedetjima pusi Neke kapheredam dokok. Lasi nangtum angbong anuttin ta lahei akarju alam kamathadam ke thangnat amek nangpadovakveji: Nangtum kekroi a’Arnam ke Ne pen kacheprek thetan khangjang, lapen lake lapu tangdet apotsi, nangtum Arnam aphan kekroi atiri ke kopilo? Nangtum nangmena amen kehanglok a’Arnam aphan koanma kekroi, hala an kahelo si nangtum Nelong pen dambompo. Kopilo, tangte, labangso alam atiri ke? Nangtum angbong majok ta laso akarju aphan mathadamdelang puke ahokpetlo, bonta labangso along akangsip nangtum ta pholongloma? Nangtum lapuson kamatha pensi dodunbom pulote kepho nangji angthek chematha damloma nangtum?

Pini, nangtum penang alam phonanglo, lapen nangtum angbong inutbak ta kisung-kesai abidi thekser abang ave. Labangso angdeng jongsi dambomlang, komatne jongsi kangbo dunji abang do pulote lake nangtum amatlo. Ne nangtum aphan kisung kapangthek along nangrap dunji, bonta kesai nangji ke nangtum apharman.

Bang aphan kahonthe aning kave atum aphan si Nening karong, lapen hokpet ason kedengji aphan kaike chisikdin atum aphan si Nening kedok; la jatni amonit atum ahin ke Ne kanghon-kamatha chepaklangji, athe Nemek along alangtum ke ningklarsap amonitlo. Jongsi nang ke kachongthui a’ot do, tangte nang ke bang anut kaprek lapen ajat alam along ta cheredunju lapen kahonthedun a’ot si chepaklangpo, lapen nang Nephan nangkekroi ta kahonthe atiri pensi kimpo. Ne mantune ta lapuson akekroi aphan dengde. Hokpet akekroi kaduredet, nang ke ansosesi hokpet akanghon ta kadurelang. Lapen jongsi nang Arnam aphan le kahonthe lapen Alangli phuthak kamatha-tarlip, tangte nang ke, thangnat akarju alam avepin si, monit angbong kachongthui a’ot kethenei abanglo. Arnam ta monit ason manthek ma thekthema pusi nang kamatha-tarlipdam: diya un’epin an pap kedo, a’ot amo chepavangve abang, hokpet alam kangsai lapen kechok-chokche kachini ajakong kave, kangsaithek ajakong kadure, kehainer abidi along si kachetodun, kachongthui lapen kapanahokji mon’e a’ot, sai langno lapen kangting pensi ning karong, lapen sonsi do’olang. Lahei ke monit atum Arnam aphuthak masapsobak amui ta kachinidam kavedet ajok kalima? Lapuson akekroi ke pap pen thangnat kachingbarbe avelo! Nephan ning nangpangsam atum ke jongvet pen kebaithek lapen kengpak-kanglek atumlo, lapen komatma laso a’ot adichi kadure atum ke Arnam ahemlo dengponpe lapen hadak adim chepangbodundetpo pu kekroi atum ta ajahak do. Lapuan aningkan angbong nangtum kachepalong’un kachini ason ke la anvetloma? La anvetoma nangtum kelong? Nang Nephan nangkachini ason nangphan lahei kechokche kamatha pen nangkhangdundema; lapen ansose kaheno ke nangtum Arnam Akarjong aphuthak anong kepajuno lapen Siningrengme aphan kapinrem. Laso ajoine si Ne kipulo lapuson akekroi pen ajok nangtum Nelong pen kahelo muchot damjuipo lapen Ne pen ansose akethe kachedandong a’ot along si dopo. Lapuan aningkan arjon Nesai along, nangtum ongdung ahokpet theklongle, bonta nangtum chinima Neno arjulong etlo pu? Nangtum angbong bang koan si ahokpet aphan kedeng kangtunglo? Nangtum kadokave ta nangtum ahokpet anam kituji ninghang pusi kekroi, bonta nangtum angbong bang koan si ahokpet apharman kisung chechaklo? Lake thangnat kali bonta nangtum aning along hokpet binongne kedo apotlo, lale nangtum aphan anuttin ta, alang majok tame, kachongthuiji ninghang lapen kekekveng a’ot chingbarchitlo pu nangpamatha abang – monit nangcheparje a’Arnam abangta, monit jongjong atengsi, ningkeme kave mate lapen kapalorlopik akanghon kave abang pu pamathadet angdeng an. Halaso pen anparta, nangtum kekroi ke angthikjot a’ot lapen kangjinsothek, kanghon kalorlo a’ot ke siningrengme along kedo Arnam along anvet si dochot. Nangtum kekroi ke lapuson amonit kangthir ke ave, pirthe along ke kangting lapen kun langno anvet si chari unji, lapuson si Arnam ke monit atum methang akechok lapen akeme ason kar’i kepapleng arpu kipi, alangtum methang amat kithip isi phurkimo along arjan. Nangtum aphu along, siningrengme along kedo Arnam ke kengpik, hokpet binong’o, lapen jakong the’o, kardom lapen kero apun; la pirthe along a’Arnam, lapuson ahut si, lake bonta kapachelar aphan, siningrengme kedo Arnam, apharman isi arisim. Labangso a’Arnam ke siningrengme kedo a’Arnam pen chingbar un’e pusi nangtum kekroi, ansose si Alangliphan kaparno ahut ta chethe kachipi kejum nanglang. Arnam ajakong kethe lapen aman pen alam vang lote, lahei ke siningrengme a’Arnam anongkethe apharman, bonta monit a’ot lapen otlangno alam vanglote, lahai ke pirthe along kedo a’Arnam aphan kapanongpi ason saide. Siningrengme along a’Arnam ke jut un’epin aphan si adim kangtui, halapu pirthe along a’Arnam ke kijut un’epin apor aphan si amo kevangve, jakong kave, lapen kaningjoino. Siningrengme a’Arnam ke ning arlo kepho ason aphan penle kaparopon kali, hokpet binong anvet, halapu pirthe a’Arnam along ke angthin kelangno akemang do lapen thangnat kechok a’ot lapen kamathathek ajakong ave. Siningrengme a’Arnam along ke asapbak ta ning kekek ave lapen kijut un’e apor aphan kroithip, halapu pirthe along a’Arnam ke kaiketa ning kachetheno aphar dokok. Siningrengme a’Arnam ke monit aphan kanghon palorlopik, halapu pirthe along a’Arnam ke monit aphan kenangsot akanghon chepaklangkle, alangphan amutpi si langledet titi khangjang. Labangso kechokche akachini nangtum aning arlo penang ajir kiding aphan bilo lapen mohut arni ta angthek nangklangbom tahai. Nangtum Khristo asai doan aphan ahokpet binong kali atiri pen langdam si kamatha lapen Alangli sai doan aphan kipun, lapen te Alangli angthek lapen atiri aphan ta, hala ot kememe kelang ahin pen. Nangtum ahir kangtangrak akachechokche klemdetlo lapen nangtum pen aphrang kevang atum keklemklepin asonsi klemdetlo. Lake, nangtum hala siningrengme along kangtuiphom a’Arnam lale Alangli phu along ser aphutup kachekup abang aphan si sai keklempi, lapen mantune ta hala nangtum le lapuanpin ardi kave pu kehoklo Alangli nangtum athengno cheklangkledet an a’Arnam aphan ke langdunraire. Lake nangtum apap kalima? Lake nangtum Arnam akun aphuthak kithirklong kekhamkhelo pu animona kalima? Nangtum siningrengme kedo a’Arnam aphan si kardom. Nangtum kangtuiving araje aphan si kanghon-palorlo lapen halahei alangtum keprangset pen ajok kethaktang atum aphan si man kipi. Nangphan ke hala nangripak keplang-kiphi ason nangpaplengset a’Arnam si nangpinkhatdetlo, lapen kar’idun ta nang kemang asontin ta nangpaplengpithek abang aphanchot. Nang kardomde inutvet Abang ke laso kangtuiving kedode a’Arnam henlo; nang ningkedokde isivet ason lake bangso monit atum man kipi pathethe a’Arnam pen kachetebok henlo. Nang keklem kangtungte isivet ason lake la nangphan noya isi nangpajirlokle a’Arnam aphan sai keklempi henlo, lapen hala nangtum aphan nangpachiri ingtung nangkapinchong thekthe Abang ke la kanghon kave a’Arnam henlo. Lapuson a’Arnam ke nangtum kamatha angkang pathe longle, nangtum kopine anam kesodak ahormu longloklo asonsi nangpachethek, ansose si kijumlang nang kemang ason kepapleng ke. Kopisi, tangte, nang Alangliphi dunbom? Nang lapuson alam aphan kamatha doloma? Nang kopima keklem ke Khristo aphan le kekhamkhe pu anchot kali; ansose akenangsot ke, lake siningrengme a’Arnam aphan ta khamkhedet. Lake, Ne kamatha ke, nangtum Arnam aphan kekroi’i akemang kaliji!

Nangtum Arnam aphan kelong kangtung ke methang along ning cheparong aphan, sitame monit atum ke Arnam pen cheheloving. Ladak kasiksak ke kopilo? Nangtum Alangli lamthe si kedeng chot, bonta Alangli kachesong mate Alangli kapakeng kali, ansose si kijumlang nangtum Alangli kisik-kedang ason kedeng’un ke, Alangliphan ingthimlim pen kekroithek puke. Kopilo, tangte, ladak alam ke? Kijutsi kelang-kangchap along, nangtum akekroi ke kangthaidang voti a’oplo, lale mangtune ta aso vang thekthe abang. Athe ke nangtum akekroi ke nangtum aphan hokpet alam nangvanpipe mate chethe ta nangpipe, bonta alar ke isi kereng aphan ason lapen ning chethe mekpalokai pen kepathekdam. Bangso kereng aphan ason lapen ning chethe kapathekdam along lake nangtum Arnam aphan kekroi pen akemang, hokpet lapen chethe kali. Lasi Ne kipulo nangtum Arnam aphan kekroi atovar ke kaprek kali bonta sai keklempi kangtungpik pu a’ot lapen katherak thekthe pensi Arnam pen kerap kachepalongji aphan, lapen ajat abidi penta hokpet akekroi puno. Kosonsi lapuson akekroi penle vo aso kevang thekpo? Kaprek ahin pen pudam lote, lapuson akekroi ke kopisi kapachun thekpo? Nangtum Arnam aphan kekroi ke Alangliphan nangtum methang akemang asai kachepachun’iji aphan. Lake Arnam akun aphan kekhamkhe kethe parpik kalima? Nangtum siningrengme along si Arnam do puke kroi lapen pirthe along kedo aphan ke dengde, sitame Ne nangtum aning alam pangthek thekthedet; Neke hala longle athak akeng kachibi lapen pirthe along a’Arnam aphan sai keklempi atum aphan kapinkhat, bonta hala pirthe along kevang Khristo aphan kedengde atum aphan ke mantune ta kali. Halapuson amonit atum siningrengme kedo a’Arnam aphan jonghe aning klarsap pen sai klempinoi, kijut ahut ke alangtum otlangno atumphan adai ke’en la Neri pen jok un’e. Lahei amonit atum ke otlangnolo; latum ke kapahi’i pen Arnam aphan kekhamkhe lapen mantune ta Khristo alam karjuje atumlo. Chenam ta, alangtum aphai along kaparlopon ke hala kadokave kachinine, anparta, Khristo aphan kedengde atum anlo. Nangtum chinima nangtum siningrengme a’Arnam aphan alam arjutik Khristo aphuthak nangning hang aling ot chepaklangme pu alam? Chokche! Nang Khristo aphan kachinine lake siningrengme a’Arnam aphan ta kachininelo. Nang siningrengme a’Arnam aphan jonghe ning klarsap pen sai klempi punoi, lake thangbakbe lam pajoi lapen kacheparjan anchot, atheke pirthe along kedo a’Arnam pen ajok anvet si monit atum ahokpet kedeng longji lapen ansose keplenglim ason kachiniji, bonta lapen abat abang ke monit aphan kapinrem lapen aphithu hokpet alam chikipdam pen otlangno atumphan adai ke’en along ta asai kevang abanglo. Nangtum ladak ale kevang lapen angthek kaheno ason pangthekdunloma? Nangtum lahei chetong longloma? Nangtum labangso ahokpet alam arnisi prapjin pen chinipo pusi Ne kar’ilo: Arnam aphan kachini, nangtum siningrengme kedo a’Arnam aphan anchot le kachini nangji kali bonta, ansose akenangsotnei ke, pirthe along a’Arnam. Nangtum ardi kipi paphrang nangji ason-amung nangtum aphan nangpamamghulong ri mate adunthu ardi kedo ason abang aphrang aphan palitlongdetri. Lapuson pen anvet si nang ahokpet pensi Arnam pen mesen kachepho kim longji, Arnam pen ansose chetebok longji, lapen nangning Arnam adung tebokchet an van thekji. Jongsi nang ongdung aningkan penta kekroi along si do lapen Ne pen kachepho mesen ajir dingkluilo, sitame nang Nepen kaheno si dobom, tangte Ne punangkokpo nang Arnam akun kekhamkhe aphong do’o, lapen nang kosonsi kijutjima lake kamatha sungkrungji. Jongsi Ne pen ongdung aningkan kachepho ta nangphan inut monit a’ot kedo lapen ahokpet kedo abangphu ativi nangkirla un’edetlo, bonta, anparta, nang kapahi’i a’ot aphan ansose patherong, lapen nang aphrang pen pangbar lote phantni anvet si kehainer, bonta nang Nephan kachinidam kechokche ta nangkamdetlo, nang Nephan thangnat ardi kavepin bang along asapso sai kacherapdun abang pusi nanghokdet, tangte Ne pudetpo nang kepado amek ke areng anvet le kaharnukbom kalilo bonta ha areppi anta ledam etlo. Anpar ke nang kachonghong nangji ke nangpharman tipit along nangkipipdam akisik-kedang anvetlo. Nang Nephan nang Arnam kachemanji aphan nangchoningri nangnelo anpar ke, atheke nang kithi kachetong nangji apap asai si keklemdetlo, kadiya un’e apap. Jonghe Ne le nangphan nangjinso’un pusitame, siningrengme along kedo a’Arnam si nangpran ke’enji aphan nangputhipji, atheke Arnam akun aphan nang kekhamkhe lake lamkiso kali, bonta isi kethedung a’ot alamlo. Mo apor nangle lote, nangphan aphrang pen nangthanmekmedet pu Nephan akoi nangpiri. Lake kadokave ta laso along si nangchiruithulapji: Nang Khristo – pirthe along a’Arnam – monit jongjong ateng kedo abang pen chelanglote, ladak kipuji puke, nang Arnam ke thangnat ta kali bonta inut amonit pu kroi lote, lake nang kivirpo pulo. Lake nangtum aphan Nehin pen ingtangkring pen nangketherlo.