Arnam Akun Kachini’un Akenangsot Thepik

Nangphan palongnang pu ne kemang ason do’o, bonta nangsai nangkai along kadokave amat le, Ne nangkehang ason kapapleng un’et kali, lasi nelong kaprek kachongvai ason ave si athepi along vang pen nangphan Ne kemang ason nangchethan nangkoklo. Nanglong kangsai ajakong ta meme lapen nanglong kachorothek a’ot ta lasonthot si kaningjoino pu theklor si nangke Ne kun lapen kenangsit athepi aphan kachinidamthek ning’oi meme – lapen lasi bangso aphuthak nangphan nangkethan nangji ke non amat tongsekotpik asai. Nang kedamtang ahut jonghe le chinidam tame nang lahei aphuthak chini ingtungnoi ingtungtenoi, Ne nangphan angton pen nangthanplir nangji. Lahei alam nangphan akimirak ke kali, bonta nang penang kachinidam lapen penang kamunthi kapaledamthek duretik arlo kedojoi alomjar aphan Nangtum angbong penang an ke kemep’ri ame asonsi kachinidam lahei alam, ephar anvet lapen keplenglimle. Nangtum ansose mesen pen hokpet asai kekelemji aphan – Nelamthe ansose mesen pen kedengji aphan – Ne kamatha ke lahei alam henlo aphrangsi lapen kechengsi nangtum kachini nangji. Kali pulote, nang kekroidam klardakde si doverpo, thek’o kachekrong, lapen dhorom ahin pen ekebeng’i ason pen plengthippo. Nang jongsi Arnam a’ot chinine, pulo tangte nang Alangliphan sai keklempiji ke asap ta un’elo. Nang jongsi Arnam athepi chinine, pulote nang Alangliphan man ta pithekthe lapen phere ta thekthelo; alar ke jongthekthepin pen kapasai’o/kadaipoi lapen kapachobai atum si dochotpo, lapen anparta, kachelar un’e man kachipi thekthe a’ot. Arnam akun kachini ke akenangsot pusitame, lapen Arnam athepi aphan langpangkre heno pusitame, komatne inutbak ta bangso alam aphuthak plenglim pen langpangthek lapen aklong an kelangdam avepinlang. Ne kapinchong kachari aron aphan nangtum kadokave ta ingthan’etlo puke chechardaklo. Jongsi nangtum Arnam akun kachinidam ave pulote Alangli kun aphan kapasiksak asaike klemvekpo pu angring thepik. Alangli kun aphan kapasiksak pulote Arnam aphan aningkapathi pen chingbarchitlo, halabangso alamki kijut angthek ke nangsai abang kachari aron karkan si manpo. Nang jongsi Arnam athepi chini lote Alangli kun ta chini unlo pu non nang chematha kirla nangpo – lapen Alangki kun jongsi kachini lote nang kachari aron doan ta chini unpo. Ningje teng’ai nangne, keongdung kachari aron along kedo alam ke Arnam akun along phodam’etlo, bonsitame Alangli kun doan ke kachari aron alon kapaklang’et lapu kali; lahenlo si, nang Arnam akun kachiniji aphan kengkam isi aphrang damchet nangji.

Ne pini nangpen thangbakbe kachingki-chethan ason le nangkachingki kali, lasi nang Ne aphuthak cherepeme pensi langdam nangji lapen, anparta arsikjit pen akaharnuk munthidam nangji. Ne labangso pen kipudam athe ke nang le Ne kaningje alamthe apharman kakirsan jum’ongchetlang pulote. Nang la ansose si Arnam akun kamunthidam kijum; mantune si komatne inutbak ta kakirsanchot. Labangso ajoine si Ne pulo nangkekroi ke kapakamthap alam pen asap ta jumje. Non amat ta, nangtum angbong inutbak ta nangmethang along kethekdun akechokche kachepakengji aphan chepadukde. Ne nangtum apharman koan lone akeso chechakdet aphi ta nangtum Nephan ning nangparunhup. Manghumeme ason kali nangtum Arnam aphan manpeng ave lapen nangtum kaike ahokpet ason avedet khangjang. Koson si lapuson amonit atumphan kuru pu kehokpo? Sining aron lapuson asai chakche! Nangtum laso aphuthak kachini masapsovet tangdet apot si, Ne ansose chethe kepadingthu pen anpar kaprek abidi longledetlo.

Arnam akun kadokave aphan ta isi kethekdamde athepi ason nangnak lapen, anparta isi majok ta kekroi sungkrung ason athe Alangli akun ke monit a’ot-adur pen cheprekdak. Arnam, tame, Alangli ning ke’oi, ningkarong, ningkithi, ning keduk adirda do, bonta lahei monit along kedo adirda pen cheprekdak. Arnam ke Alangli kopima hala henlo lapen Alangli ke Alanglilong kopima kedo henlo. Alangli kapangdak lapen kapaklang ason an ke Alangli athepi lapen Alangli angthek apharman karjaplo. Alangli kopima lapen Alangliong kopima kedo, lapen te Alangli athepi lapen angthek doan ason ke majok monit pen kelar un’e saide. Alangli kun kaparlopon ke monit akhei aphan kanghon, monit akhei aphan kaparengme, monit akhei aphan aning keso, lapen anparta do’olang, monit akhei aphan angton pen kachini. Monit a’ot ke, bonsitame, kerem aning kave tahai, rengsap, kalite dirda kave. Arnam akun ke hormu lapen kereng’et ason Kachari abang apharman, lapen kadokave kasorjon Ahemphu apharman. Alangli akun kacheparjan ke manpeng, jakong, kemesen a’ot, kemepik, lapen kadokave pen anpar, kethenei ajakong. Alangli kun ke thirthip kachari angthek, kedoan akechoklim ason angthek, kedoan kelangmesen lapen kemesen ason angthek. Lapen anpar, lake komat aphan si kangting lapen hotur ajakong pen keparem un’e lapen katengkheng un’e, Alangli angthek, lasonthot si majok kasorjon amonit pen kapanahok un’e (lapen Alangli kanahok chechakjoije) Abang angthek. Alangli kun ke kethenei ajakong angthek. Majok abangphu mate abangphi atum sitame Alangli kun lapen Alangli sai aphan pasiksakji chomatha un’e. Bonta monit a’ot ke marat pen asap mechet pu angthek pen asap kijum ave. Monit amena along lapen amethang apharman ke thangnat kachechari ajakong ave, kejokvan ave, lapen methang aphan kachelarji akethek ta ave, bonta amena athepi along ke inut bang akangjinso, kopine asonbak ghotona mate akepho lapen hormu athengno kedomdun abang. Arnam aningkerengme atheke kechoklim lapen katheang kedo lapen nangkeklangbom, kangting lapen kun-langno kivir ajoine. Alangli ning arong halabangso katheang lapen kemesen akai monit akhei along kevan pen; Alangli ningkarengme ke kechoklim aningkerengme, kaiketa keme-kechok ason doan aphan isi angthek lapen, anparta, isi kemepik lapen kachetonpik apor angthek. Arnam aning kithi atheke Alangli kasorjon amonit akhei along kangsai kachingbarbe kedo lapen kekhamkhe ajok akanahok, kun-langno lapen kangting kedokok ajoine, ahokpet aphan kephlungjuiver ason kedokok ajoine, lapen anparta, kemesen lapen kelangmesen doan pen kachetonte ason kedokok apot. Alangli aningkithi ke akaheno ason an anpar ke avelo pu angthek, halapen anparta, lake Alangli kangthir’et angthek. Alangli ningduk ke monit akhei ajoine, Alangli kemang kedo’o nonke akangting along kejang’et atum, atheke Alangli monit along keklem asai doan Alangli kemang ateng chemanmedet, lapen Alangli kachinghon amonit doan ke katheang along dopet thekthedet. Thangnat adai kave amonit atum apharman Alangli aning dukpik, sotpet bonta kachinine amonit atum apharman, lapen kemesen bonta amena kamatha ason kaduredet atum apharman. Alangli aning kiduk ke Alangli keme lapen Alangli kangjinso angtheklo, ningkeme lapen kelangme angthek. Alangli aning karong, lake theklor, kevang ke Alangli hotur aphan kaperem lapen monit along pen aningchethe kelong pen. Lapen anparta, la kebat ke hotur along kacherapdun ajakong kedoan kephlung’et lapen kivir’et, lapen monit akhei monsam akai kelong ajoine. Arnam aningkarong ke monit aning karengme ason kali; alar ke, lake kemesen athe kapangrum adirda, ningkarengme penta akememu adirda. Alangli ningkarong ke non pen anpar ke monit akhei atum kisung-keboi pen kejok angthek, lapen monit akhei katheang apirbi kilut angthek. Monit akhei adirda, jongsi ihin anat langdam lote, doan kevang ta methang ale kelong pen saide, kaike kechoklim aphan, katheang, mate kopima kelangme, lapen ajat le punoi Sining rengme pen hirjume kipitang ason aphan kali. Monit akhei adirda ke angthin kelangno lapen akangting apirthe pen kacheraplok. Lahei ke Arnam aningkehang, akemang ajoine le kedo kali, lasi monit lapen Arnam aphan mantune ta chethe isivet along ningjeno. Laso atheke Arnam ke kaiketa amat jut ingtontepin si Amethang aphan monit akhei aphan kachipi lapen kachepajir; monit ke, bonsitame, kaiketa methang aphanlok si kedeng lapen kakirsan. Arnam ke kaiketa monit akhei kerengverji aphan pura kisung-keboi an endunbom, antame monit ke mantune ta katheang apharman mate kechoklim apharman thangnat ta klempidunde. Jongsi klemdunji aphan ahut pen bor’idun pusitame, la an si jakong kavelo ejai kepapho anta charchak un’e, athe ke monit kabor’i ke methang apharman anchot lapen bang aphan kali. Monit ke kaiketa angthin kelangno, Arnam ke bonta jongjung aphan kali. Arnam ke kopima akechok, akeme lapen akelangme kangpangbob adim, bonta monit ke kelangno lapen kun langno kachodengdun lapen kapachan abang. Arnam ke komantune ke kechoklim lapen abolon kedo athepi pen cheterekre, bonta monit ke thekpik chenam, ajat apor ajat ahut along ta, kechoklim aphan kachongthui lapen a’Arnam pen heloving kesui ke.

Ne kaningje alamseng doan along Arnam akun do. Nangtum matha parsik pamepo Nelamthe aphan, lapen bangso ajok nangtum ale dopikji. Arnam athepi ke keripdamchekji sungkrung, bonta Ne ningchethe nangtum Arnam akun aphuthak asapbak ke chinidampo. Ne ningchethe, laso aphi, nangtum Nephan nangpaklangpo lapen Arnam akun aphan kapanahokhe asai ansose dengponpo pu. La an lote ne puthot ningthirthippo. Animona ke, Arnam aphan kaike ajat apor ahut tame nangning along chibinon. Nangtum kopine klem lote, Arnam alamthe ateng le klemnon. Ajat ason along pen ta Alang kopisi kar’i lone ritarlipnon, lapen Arnam aphan manpeng kipipe lapen aning kepaduk asai pen chingrainon. Kevangji arni nangning akangthaidang aphan kapaplengji pura nang kamatha aphi Arnam aphan kibipon ansose pajum nangpo. Nangtum lason klem lote, nangtum Arnam akun aphan kapanahokpo. Puthot, nangtum jongsi nangkai arjon Arnam aphan angkur kave alam pen lamhoi pipe lapen lamthe pupe, lapen puthot, nangtum jongsi Alang nangkepek arpu mesen pen chepachunlong, lapen nangtum nangkai Alangli lamthe ateng kekroi unlo, anlote nangtum kachari aron karkan pen chepajok unlo. Pudam lonang, nangtum jongsi komantune, “Kopisi ne Alang ke Arnam lo pu mathathedet?” “Lahei alamthe ke Karjong Kangthir kevang akapatheang pen an abat thangnat ta kali pusi ne kamatha,” “Ne atengte, kadokave Arnam keklem asai anke chok’etvek nangpo pu kali,” “Arnam kapinchong amonit a’ot ta ne pen anpar le keme kali,” “Arnam alamthe ke lapu amat kroi meme kali chenam,” mate lapuson thakthak kangsaidun alam, tangte Ne nangtumphan ansose nangpap chekobir lapen kachingdukji aphan nangtoipo. Kali pulote, nangtum mantune ta dia kelongji avarsai longlelo, athe nangtum inut monit aphan le kepasung kali, bonta Arnam Alangli mena aphan. Nangtum kachintin ke inut monit aphan si kangsaidun, bonta Arnam Akarjong ke lapuson mathathe. Nangtum Alangli ok-vi aphan aman kipipe ke Alanglipahn man kipipe atenglo. Lake lapuson tangdet apot si, nangtum Arnam akun aphan kapanahok kalilang ma? Nangtum ning chibi nangji, Arnam Akarjong kopima keklem ke Alangli ok-vi along keklem asai keraikomji aphan, lapen labangso asai mesen pen kichun unji aphan. Nangtum jongsi laphan chomathakrang lote, Ne pudetpo nangtum ta Arnam aphan kekroiji pu asai komantune ta kepachun un’eji abanglo. Athe nangtum Arnam aningkithi aphan chopathurvurlo, lapen Alangli nangtumphan nangkepekengji aphan chelonchit adai nang’enpo.

Arnam athepi kachini along an kevang ke ing’arpler asai kali. Nangtum Alangli kun aphan chini nangji. Laso atovar pensi, nangtum pajo lapen chiputhekthepin pen, Arnam akun chinidetpo. Mo nangtum labangso agian along lutchok lote, nangtum nangmethang aphan kangtuichet lapen ansose kelangme adim along kengkam kachibi chetheklongji. Kapajut ahut, nangtum nangmethang hala kachepatulok akarjong aphan chetherakpo, lapen, anparta, nangmena kachepatherak pen kachepatuji adim nahokta ave pu adirda vangpo. Halabangso apor ahut nang ot-dur along Arnam akun aphan kapanahok ason jum’o lapen jumpik si chemanpo, nangtum aning Arnam along kapatebok lapen adunghet si lerokpo, lapen Alangli pharman nangtum aning along kanghon ansose si batbompo. Lake monit akhei kelangmepik adim along kilut angtheklo. Bonta non amat, nangtum lason longlelang. Nangtum nangmethang alekha ajoine kaiketa ketong, komatsi Arnam athepi aphan kachini kangtung kedo? Lapuson si dambom nangpoma la, nangtum chiputhekthepin pensi kachari aron arkan’etpo, athe nangtum Arnam akun kachini jumparpik ongchot. Tangte nangtum non keklembom ke Arnam akun kapanahok aphan anujok kesombom kalima? Ne nangtum aphan Arnam akun nangkapachinitoi ke Nesai pen kachepaheno kali. Athe nangtum jongsi kachari aron aphan arkan lemdet pulote, nangtum angbong pen komat si adai pen kejokjilang? Halason ahut ke Nesai thangnat ale kevangve kalidetjima? Lasi, nonta Ne nangpu thuji, nangmethang ot-dur aphan kachingsai pen anparta, nangtum kengkam kachejor cherepiktu. Lahenlo Ne nangtumpen kangtui muchot nangkehang ke, lapen ne ningchethe nangtum laphan ningklarsap pen dengpo. Mo nangtum asai Ne ningkithi ang-ang aphan akele alum an nangpabatdet arni nanglerok na, pulote angthek ke nangtum anchot si kachematha nangji, lapen nangpen anpar nanglar adai nangkedengpiji aphan majok ta avedetji.