Monit Nangcheparje a’Arnam lapen Arnam Asai Ke’en Amonit Angbong Kenangsot Kacheprek

Penang aningkan dolo lale Arnam Akarjong Alangli pirthe along sai klembom ahut kiripon, lapen pirthe along Alangli sai kacheklemji aphan Arnam asai ke’enpon ta penang dolo. Sitame lapuan apor aphan, Arnam Akarjong ke kesangji aphan apun-achak adim longledet, lahenlo si Arnam ta anut-anut amonit along cheterekvoi nangkokji. Kadokave kethantang ateng si, lake monit atum pen ajok si Alangli sai kapachun. Ladak kipuji puke, lapuan aningkan angbong, Arnam asai mantune ta ingtontelang, bonta lake monit atum along aphrang keponbomji aphan angthun kachimitme, puan ajak pen vangsi pini an. Arnam le lapuan ongdung alamthe ningjelo lapen lapuan ongdung asai klemlo pusitame, monit atum Arnam aphan chininelang, laso atheke Arnam monit athengno cheklangklelang lapen atheke Alangliphan kepaphome arpum ave. Lapen lasi Arnam labangso asai van nangkok – sai keklem ahut sai keklemvoi a’Arnam kenangsot pu monit atum aphan kapachini asai – kijut along an. Labang kijut kapalongji aphan, Arnam Alangli Karjong monit akhei atum kapapho’un ateng chepaklang nangpo lapen alangtum anglum Alangli sai cheklem nangpo. Ladak kipu ke, Arnam Akarjong kepha’un abang cheparjandet, ok-vi lapen arepi chepindeng, lapen monit anglum cheklangdak pen akeng damdun, alangtum akai along ari dodun, Methang aphan ahut pen chepaklang ahut pen chepatu, lason aphi ansi monit atum Alangliphan kachini ansose kaharnuk along an ledam unji. Jongsi Arnam ok-vi along ansi dochot, Alangli lapuson ke Alanglisai amutpi pen papleng un’edetji. Lapen ok-vi along chelonchit apor an sai klemdet aphi, ok-vi ahin pen kachethang nangji alam doan paplengdet si, Arnam ok-vi pen chelojuipo lapen ok-vi araje ensi karjong angkang along sai klempo, Jisu le monit akhei ateng dodet pen lapen Alangli kapachun nangji asai doan pachun tekangdet aphi keklem asonsi. Nangtum “Laso Akrong … (5)” along pen angkung ning dolang tahai: “Ne po Nephan nangkipu Nening dolang, ‘Pirthe along, Nang po akemang lapen Alangli nangpinkhat ason kapaplengji aphan le bor’ichotnoi. Kaprek ajat ason Nangphan nangtangte.’” Labangso angkung along nang kopilo ketheklong? Arnam pirthe along kevang ahut, Alangli pirthe adang anvet si lam pachetakchot, prekjam ason akerap lapen prekjam ahin pen kelangdam pensi Alanglilamthe aphan ase kachipiji aphan. Alangli ke monit aphan kenangji ason kipidun lapen monit aphan kethandun si Alangli ardi kapathenei akemang lapen sai keklem aron pu kehok lapen Alangli methang aphan monit hejan angbong kachepho mate monit atum akai alam angton pen kachiniji puke chechophodundopde. Alang si kethenei asai ke Karjong apharman kaningjepi. Lake, Arnam Akarjong ok-vi along paphomedet nangcheklang lote, Alangli monit achethe aphan anvet si kenangsot ason kipidun lapen ahokpet aphan kapatet. Akangli ke Methang aphan monit asai along chingvui dunde, ladak kipuji puke, Alangli monit akhei asai along arpu endunde. Monit akhei atum ke siningrengme asai klemthekthe, lapen Arnam ke monit asai along arpu cho’endunde. Arnam lapuan aningkan pirthe along Alangli sai kacheklemji aphan kevang pen, Alangli monit atum ajok pensi keklem. Lahei amonit atum, bonsitame, aphan ke monit nangcheparje a’Arnam pu hokno – Arnam asai ke’en atum pu anvetji. Pini arni a’Arnam ke, lapuson ahut si, siningrengme ahin kelangdam pen ningjephitthek, Karjong asai aphan aphrang pacheklang lapen Karjong apharman sai keklempi. Lapuan akai along Arnam asai ke’entang amonit atum doan ke, lasonsi, Arnam Akarjong ok-vi arpum along sai keklem pusi kapaklangdam – tangte kopipot si alangtum aphan Arnam pu hoknodak? Bonta a’Arnam ke Arnam Akarjong ok-vi along sai keklemphit abanglo, lapen Jisu tame ok-vi along sai keklem Arnam Akarjonglo; latum banghini aphan ta Arnam pusi kipu. Tangte kopilo kacheprek? Lapuan akai angbong Arnam asai ke’en atum ke bang ateng kamatha lapen chok-chokche kephlakthek atumlo. Latum kadokave ta monit atum kedo-kethak aron kachini atumlo. Alangtum along monit jongjong along kedo nangji abidi ke dolo, lapen monit jongjong along kedo nangji ason doan ke dopetlo. Latum angbong ongdung atum ke bang pen pangbardam pute prekjek kethek ason lapen ning aklong pen kachini ajakong ta do. Lahei amonit along sai keklem ahut, Arnam Akarjong alangtum kethek ason cheparidengpo, lahei alangtum aphan Arnam kipi anong’elo. Arnam Akarjong alangtum kethek ason aphan asai along pavangpo, alangtum ajakong Arnam aphan sai keklempi along enponpo. Sitame Arnam atiri ke bidi lapen kamatha duredet, monit atum ale aphan kamatha pen terte, lapen monit jongjong atum kacheparideng ason-amung ta duredet. Ladak kipuji puke, Alangli ke monit atum kedo-kethak aron penta kachepachini peme kalilang. Lapuson henlo pini a’Arnam pirthe along vang lote. Alangli sai lapen Alangli lamthe doan ta monit atum ale aphan kemang lapen monit atum kamatha ason pen terbung kalilang, lahei ke Karjong akemang ason doan aphan angthek kapaklang, lapen Alangli ke Arnam apharman si sai klempiphit. Laso alamjor ke Karjong ningjephitpo, lake, siningrengme akangthirvet si asai klemphitpo, echet anbak ta monit akemang pen chingvuivepin pensi. Kaprek ahin pen pudam lote, monit nangcheparje a’Arnam siningrengme akangthir si chepa’okphitji, monit kamatha lapen abidi parloponpe, lapen monit akhei kedo-kethak aron kachinidam ave. Jongsi siningrengme akangthir si sai keklemchot (atheke jongsi Arnam Amethang le sai keklemchot), pirthe along Arnam asai kedengji aphan atovar amat si avedetji. Lasi Arnam pirthe along kevang ahut, Alangli monit akhei angbong Arnam le siningrengme akangthir pen pacherop si keklem ateng asai along ke’en ponji aphan asapbak monit aphai do nangji. Kaprek alamthe penke, monit asai enpen si Alangli saikangthir aphan kaparjap. Jongsi kali, monit atum kangthirjir asai along kachethodunji aphan atovar amat si avedetji. Lake Jisu lapen arisangho atum along ta lasonlo. Alang pirthe along kedo apor ahut, Jisu ke akeban aron pavirsi akimi kapinkhat alamthe som tekanglo. Alangli lamthe kimi ta ningjelo. Alangli ongdung alamthe ta ningjelo. Lahei kadokave asai ta kangthirjir pensi keklem. Kaprek atum, lasonsi Peter, Paul lapen John, kadokave ta Jisu alamthe along atiri pinching si alangtum asai angthun pathirlo. La kipudamji puke, halaso angdeng along si Arnam Alangli sai kechengdunlo, Kanghon-Kangjinso Akai kecheng along japon si; lake, Alangli kai kimi along si japonlo, akeban abang pavir si, lapen, “Arnam henlo Kecheng lapen Kijut” pu alamthe paplengsi. Kaprek alamthe penke, monit atum monit a’ot asai kangthirjir asai atiri along si klempon nangji. Jisu kaningje nangji ason doan ephong ningjethai lapen pirthe along Alangli sai chepatangdet aphi, Alangli monit aphan obuplo. Laso aphi, kadokave amonit, sai keklem along, Alangli lamthe along kapaklang aron ateng pensi klemlo, lapen Alangli kaningje ahokpet ason ateng si klem-damlo. Lahei kedoan amonit atum ta Jisu aphan si sai keklempi. Jongsi Jisu anutvet si sai keklem pu asonte, Alangli jonghe lamthe kaningje do pusitame, monit atum Alangli lamthe along kachejudunji atovar chelongledetji, atheke Alangli ke siningrengme akangthir along si sai keklem lapen siningrengme akangthir alamthe anvet si ningje thekchot, lapen Alangli ke ajat ason ta monit jongjong atum Alangli lamthe kachini joike unji angdeng anke kethan pangdaidam thekthedet. Lapen laso apot si Alangli kacharlidun atum lapen kethanmek atum aphan chiri nangkoklo lale Alanglisai angdeng kapaphrang ponji aphan Alangliphi vanglo. Lahenlo monit nangcheparje a’Arnam Alangli sai kacheklem aron – kacheparje a’ok-vi enpen kangthirjir asai kapaplengji aphan kaningje lapen sai keklem, lapen laso aphi latum angbong pen ajahak Arnam aning apok’et aphi kidun amonit, mate ongchot tahai, atumphan sai enpen Alanglisai angthun kepadengpon. Lake, Arnam ke Alangli ning aphi kidun amonit atum asai enpen si monit akhei aphan kivi lapen lang kechor asai keklem atheke kadokave amonit tame ahokpet aphan chepalongji mene pu aphan.

Jongsi, Alangli ok-vi along kevang ahut, kangthirvet asai ansi Arnam keklemchot, lapen Alangli pen pachetondunthek si sai keklemji Alangli ning aphi kidun atum ave, tangte monit atum ke Arnam akemang chinidun un’edetji mate Arnam along chelangdun thekthedetji. Alanglining aphi kidun amonit jongjong atum asai ensi Arnam labangso asai pachun nangji, mondoli aphan kelang-chari lapen kivipon, atheke monit atum ajat ason tame kachini’un angdeng, alangphu tarlok, kamathadam’un ason an kepalong unji aphan. Kaprek alamthe penke, Arnam ke Alanglining aphi kidun asapso aphai amonit aphan asai ensi Alangli keklem Alangli kangthirjir angkang asai “alamlar” kapaklem, atheke bangso ason kapachingpudangji – siningrengme alam kangthir monit alam kapacheman, atheke monit atum laso ason aphan ripdunthek lapen chinidun thekji aphan. Jongsi Arnam lapuson klemkledet, majok ta Arnam alam kangthir chini thekthelo, atheke Arnam aning aphi kidun amonit atum ke, ajatle punon, aphai jumdet akheiso, lapen monit atum alamjor kiripdun ajakong ingtangkring kali. Lahenlo si Arnam ta monit nangcheparje a’ok-vi along sai keklem ahut anvet si labangso atovar kangvailo. Jongsi akangthir asai ansi dochot pu asonte, monit atum Arnam aphan kachini lapen sai keklemdunrapji aphan atovar amat si avedetji, atheke monit atum Arnam kaningje alam chinine. Monit atum lahei alam kachini ke Arnam aning aphi kidun amonit atum pen ajok, lale Alangli lamthe kapaklar atum. Sitame, jongsi lapuson amonit, lale monit jongjong akai ateng kedodun atum anvet si monit akhei anglum sai keklem pulote; lake monit akun pachekirla thekthe. Arnam asai akimi kechengji angdeng avedetpo; kai ateng alun barim ansi dochotpo, kaike karjudor alamban si dothotpo. Arnam monit nangcheparje atum pen ajok anchot si, lale Alangli nangcheparje apor ahut kenangji alam an kaningje lapen kenangji asai doan keklem, laso aphi le monit atum Alangli lamthe atengsi klem lapen kachetongpon, lason pen anchot si alangtum akun along kachekirla vang unji, lapen laso aphi ansi alangtum apor ateng paphrangdun thekji. Komatma kangthirjir angkang arlo sai keklem abang ke Arnam aphan kacheparjanpi abanglo, lasonsi komatma monit a’ot angkang arlo sai keklem atum doan ke Arnam asai ke’enpon atumlo. Ladak kipuji puke, monit nangcheparje a’Arnam ke atiri pen Arnam asai ke’enpon amonit atum pen cheprekdak. Monit nangcheparje a’Arnam ke kangthirjir asai ta klemthekdet, sitame Arnam asai ke’enpon amonit atum ke thekthe. Akaitin kecheng ahut, Arnam Akarjong amethang si ningjeji lapen monit atum aphan akimi kecheng along kevanji aphan akimi akai ingpupo. Laso aphi, monit atum Arnam asai ke’enpon atum akeja aphi dunsi methang akai along ason-son kachetong along lutdunpo. Laso angthek pen amatsi, lake Arnam monit aphan akimi akai along kevan lapen monit atum akimi kachechengthuji adim kachelong angdenglo – laso apor along Arnam ok-vi along asai ingtonpo.

Arnam pirthe along kevang ke Alangli methang along monit a’ot kachepachoklimji aphan kali, mate monit jongjong asai keklemji aphan kali. Alangli ke siningrengme asai kangthirjir monit a’ot pen keklemji aphansi kevang. Arnam le monit jongjong aphuthak kaningje ke monit atum kamatha ateng kali. Monit atum ke “monit a’ot jongjong” aphan kapajirmi ke apiso kedo, mate apenan kedo, lapen asopo lapen asopi kedo, lale inut amonit bang ateng pu angthek kapaklang; Arnam ke, bonsitame, lapuson le kelangdam kali. Alangli ke monit a’ot jongjong puke bang-bang amonit ateng kamatha kedo, bang ateng akai, lapen monit jongjong pensi kahache. Bonta alang Alangli jongjong bang ateng pu kipudam ke amonit atum kaningje ason ra apiso kedo, mate apenan kedo, asomar kedo pule kipudam kali. Lake, monit aphan, jongjong monit a’ot pu Arnam kaningjedam ke kopima monit atum monit a’ot kave pu kehokdam ason, ningduk-ningke’oi avedetpo ateng lapen ok-vi akar’i theklongledet an, Jisu ateng, lale athak pensi monit jongjong arpum lapen monit jongjong araje ke’enchot, bonta atiri penke ingthimlim penle inut monit jongjong along kedo nangji ason kedo’et kali. Ladak pensi theklonglo monit nangcheparje a’Arnam ke amutpi penle bang ateng monit jongjong a’ot kacheparlopon kali, bonta monit atum along kedo nangji ason an angbong pen ephar anvet, lata monit jongjong akai ateng kedo-kethakji lapen monit jongjong ateng kamatha ajakong kachepadoji aphan anchot. Bonta lahei ahormu ke monit atum le monit a’ot pu kachehok ason pen thangnat kachepho ave. Lahei ke monit nangcheparje a’Arnam along kedo nangji ason-amunglo. Ajahak kekroithip atum do, bonsitame, lale monit nangcheparje a’Arnam ke monit jongjong a’ot pensi kedo pu kachipuji aphan Alangli apiso, asopi, asopo, ahemtun donangji; lahei avedet pulote, alangtum kipu ke, Alangli ke monit jongjong apun kalilo. Tangte Ne nangphan nang arjulang, “Arnam ke apiso doma? Arnam ta apenan do unji puhe? Arnam ta asomar dojima?” Lahei ke kekroithap kalima? Sitame monit nangcheparje a’Arnam ke longtar kachinghang along pen nangtet thekthe mate sining angsong pen nangklo thekthe. Alangli ke monit jongjong binong ahemtun pensi mahang nangthek thekchot. Lahenlo Alangli api-apo lapen angjirmar dokok. Lahei henlo monit nangcheparje a’Arnam along kedo nangji monit a’ot ke. Lapuson henlo Jisu akai along ta; Jisu apei lapen apo, angjir lapen akorte do, lapen lahei kadokave ta bang atenglo. Bonta jongsi Alangli apiso lapen asopo lapne asopi dokok, pulotangte Alangli ot ke Arnam le monit nangcheparje a’Arnam along kapado kangtung monit jongjong a’ot kalidetpo. Jongsi alam lapuson pulote, Alangli siningrengme akangthir along sai klem thekthedetji apotlo. Lake jongdak pen Alangli apiso mate asomar kavedet apot, lapen sitame monit jongjong ahemtun along si mahang nangkethek, lasi Alangli kangthirjir asai klem thekdet. Laso alam ansose paklardakji aphan, Arnam monit jongjong pu kehokdam ke thangbakbe ahemtun jongjong along mahang kethek abang aphan. Lapuson amonit anvet si kangthirjir asai keklemji apun. Jongsi, kaprek ahin ke, apiso, asomar, mate apenan kedo amonit, halabangso amonit ke bang ateng monit jongjong along kenangji a’ot ke dopo bonta Arnam kenangji a’ot keme kalidetpo. Hala lale Arnam kamathatang ason, lapen monit atum kachini, ason ke ongdung apor kacheprek thepik dokok, adet-adet kachehelolang. Labangso Arnam asai angdeng along ke monit kamatha ason pen ongdung kachekhamkhe lapen thedung kachetonte ason do. Majok tame pudet un labangso Arnam asai angdeng along ke ingthimlim pensi kangthirjir asai klemphlut pen kapaklang, bangso along monit a’ot tame kacherapdun arpu dengdunlo. Atheke Arnam Alangli sai kacheklemji aphan pura Amethang amat si pirthe along kevang, monit atum aphan bangso along ari kapachejokdun alar, Alangli Amethang aphan ok-vi along cheparjedetlo (isi apun keplenglimle, monit jongjong along) Alangli sai kacheklemji aphan. Alangli bangso kacheparje aphan asai enpen si monit akhei aphan kai kimi paklanglo, monit akhei aphan Alangli keklemji asai puthot angdeng alam akethan, lapen monit aphan Alangli lamthe along kepaklangpon atovar ateng si keklemji aphan pu ketoi. Lasonsi ok-vi along Arnam asai ingtonkoklo; Alangli ke monit akhei pen chepahelo kai-kailo, monit jongjong a’ot along anpar dodelo, bonta monit along pen chepahelo si Alangli sai kaprek angthun along kedamthu. Laso aphi, Alanglining aphi kidun amonit atum aphan asai enpen, Alangli pirthe monit anglum along Alangli sai aphrang anat padambom, bonta alangtum monit a’ot pen.

Monit nangcherparje a’Arnam kaike aphan ke monit along dodunver thekthe atheke Arnam keklemji asai dopiklang. Alangli ok-vi pen kekhanver dothekthe; Alangli ok-vi aphan che’o tekang si Alangli keklemji asai dengji, Alangli halaso asai ok-vi araje penle klem pusitame. Arnam pirthe along kevang ahut, Alangli monit jongjong atum thithe aphrang koso apun ansi kele nangjima lake chonghongji lapen haso aphi si monit akhei aphan o’tekangji. Ok-vi jonghele arta do pusitame, Alangli sai ketang ahut lote, Alangli dampo lapen monit aphan o’tekangpo. Alangliphan lapuson arta thangnat ave, Alangli ke monit atum akai ajak ateng penle ajo-arni kachelakha kali; alar ke, Alanglisai angdeng pen kapacheton ateng si ok-vi along Alangli kai kachepajut. Lapuson kamatha atum ta do tahai, Arnam le ok-vi along kevang ke, isi angdeng an arta chepado nangji, apun-achak ariso arta an chepale nangji, kesar arta an le nangji, lapen abang arpum ajakong duredetlo pu ansi o’tekang nangji. Lake monit atum kaheman asonlo; Arnam ke lapuson le keklem kali. Alangli ok-vi along kevang ke Alangli keklem nangji asai keklemji aphan anchot, lapen monit jongjong akai ason ra kerengdun api-apo atum along mahang kethek, kethe-kidingdun, hemtun kachoboche lapen kerengji avarsai aphan sai kachoklem kecheng, osomar kapado lapen kalana, mate kai along kangtui lapen kangdai ason kachetongdun – kadokave monit jongjong asai keklemji aphan kali. Arnam pirthe along kevang ahut, lake Arnam Akarjong ok-vi kachepindeng, ok-vi along kevang, bonta Arnam inut monit jongjong abangphu akai le kedodun kali. Alangli kevang ke Alangli kelangchari sik-dang asai ephar kapachunji aphan anchot. Halaso aphi ke Alangli monit akhei aphan o’tekangpo. Alangli ok-vi along kevang ahut, Arnam Akarjong hala ok-vi along monit a’ot aphan kechoklim an pinchongche. Alar ke, Arnam le aphrang kesikmek’et apor ahut, kangthirjir si asai along damphitpo. Laso aphi, Alangli keklem nangji ason doan klemdet lapen Alangli kapachetak nangji asai ingthimlim pen patangdet anlote, labangso angdeng along Arnam Akarjong asai ke kijutlo, halaso akai angdeng along si monit nangcheperja a’Arnam achethe tame jutpo, Alangli ok-vi arpu koan ajak kiding kerengdun lone puke langdamde mate lakha ponpe. Ladak kipuji puke, ok-vi kedo arpum ajat arta mate angdeng le ledam tame, pirthe along koan ajak aphan le dodunlo pusitame, kadokave ta Karjong asai pensi cheparaiji. Lake monit atum kopisi monit jongjong a’ot pu kehokma penke thangnat kachepho ave. Jisu aphan le langdetnoi. Alangli ok-vi along ningkan thomkep-ra-kethom ra achitim aphan pirthe along dolo. Monit akai ajak ahin pen pulote, Alangli halaso arta ahut ke thithedet nangjilang, lapen Alangli che’o tekangkedet nanglang. Bonta lahei ke Arnam Akarjong kamatha alam kali. Alangli sai ketanglo apotsi, halaso apor ahut halaso abang arpum aphan ke pondetlo, Karjong penpen prai rappet. Lahenlo Arnam monit a’ok-vi along sai keklem aron. Lapen lasi, pangtangkring pen ningjelote, monit cheparje a’Arnam along ke monit jongjong a’ot duredet. Kiruithuvoi aphan, Alangli ke pirthe along monit jongjong akai ateng kedodunji aphan le kevang kali. Alangli aphrangsi ke bang ateng monit jongjong akai chepathirdun lapen sai keklem chengji lapuson kali. Alar ke, Alangli monit jongjong ahemtun along amahang nangthektik ahut ke, Alangli kangthirjir asai keklem ajakong dolo, lasi ale monit atum kemangdam pen kechoklim, lale ok-vi pen keplengthup kali, lale hamphang a’ot aphan kekroidun kali mate monit atum kamatha lapen kamatha pen kangsaidun aphan kaparloponpe, lapen, anparta, lale monit atum kai along kerengji aphan pu kethekdam mate kejongdam ajutang alam pen kachepho kave. Lahenlo monit nangcheparje a’Arnam keklem kangtung asai, lapen lake Alangli monit nangcheparje along asai keklemvoi akenangsot asonlo. Arnam ok-vi along kevang ke aphrangsi ardi kipi ason ke ok-vi pen keklem nangji asai isi angdeng nangkacheklem, kaprek asoso-sasa angdeng phoponpepin pen, lapen, monit jongjong atum kachetong alam aphuthak abang ke, Alanglilong halahei avedet. Monit nangcheparje a’Arnam a’ok-vi arpum keklem nangji asai ke monit jongjong atum kachetong nangji ason parlo ponpe. Lasi Arnam ok-vi along kevang ke Alangli ok-vi along amat kapatang nangji asai nangkeklemji aphan. Kaprek ason doan ke Alangliphan thangta chophodop ave; Alangli keongdung asoso-sasa angdeng ke phoponpe. Ephong Alanglisai ketanglo pulote, Alangli monit nangkacheparje akenang ta kijutlo. Labangso angdeng kijut pulote lake Alangli ok-vi along keklem nangji asai ta kangtonlo, lapen Alangli ok-vi ahin pen kapachetak nangji asai ta ketanglo. Bonta Alangli ok-vi along jutjepin pensi sai klem aretji puke thekthe. Alangli kaprek adim along aphrang damthu nangji, ok-vi pen angtan adim. Laso aphi ansi Alangli sai ingthimlim pen klem patang unji, lapen angthek kethedung aphi paphrangji. Arnam ke Alangli kisik-kedang binong ateng si sai keklem. Alangli kopi asai klem nangji lapen Alangli kopi asai si kangtontang, Alangli ripak achikip ateng klardak pen chini pame. Arnam ke anuttin amonit aphan Alangli kisikmek atovar along kapadamji pusi aning kehang. Majok ta laso pen chepajok thekthe. Hala Arnam Akarjong keja ateng keklemdunthek atum ansi kesang along kilutdun thekji. Lake lason tahai, aphi asai along, lake Arnam le ok-vi along pen ningje ra monit akai kejapon kalidet tahai, bonta isi kacheklangdak arpum pen Karjong monit akai kejapon. Lason aphi ansi monit atum Arnam aphan ari pen papho unji, Arnam aphan cholang thekji, lapen Arnam kenangji ahokpet ason along lutdun thekji, lasi lake sai keklemvoi Arnam arideng choklim kacheman longji aphan. Lahenlo Arnam kapachunji aningkehang asai, lapen Alangli ajirdingklui pen kisik-kedang ason. Ladak pensi, nangtum kirim nangji atovar chelangpon nangpo!