Kekroi Along, Ahok Aphan si Ardi Chipivek Nangji – Dhorom Anim-rokom Along Kedodun Pen ke Kekroi Pupe

Nang son koan dhorom anim-rokom keklempon dolo? Nang batai koan si Arnam alam aphan kachedandun dolo lapen nang mena ateng kedamlo? Nang batai koan si Arnam alam ateng asai keklempon dolo athema nang ke ahokpet Alangli anghor aphan chechak’un lapen Alangli akar’idam ateng ningpangsamji si kiri pulo? Nang Arnam alam chinidamvek nangji lapen asai ateng pen si klem-damvek nangji. Nang keklem-kedam lapen sai amo kadokave tame kekroi aron athikpet nangji, lake aron-atang ke’otthip pu aphan le kipudam kali mate athak kachepaklang’iji aphan kopine keklem bor’ichot puvoiphit tame; bontame, lake ahok ateng keklempon lapen Arnam alam ateng si kerengbom pulo. Lason ateng keklem pen anchot si Arnam aphan ningpangsam unji. Ajat asai amo tame pima Arnam aphan ningkapadokthek puke isi aron kali, bonta lake ahok ateng keklempon pulo. Ajahak amonit atum ke amethang aphan ardi kachipiji pusi akar’idam thepik dolo. Alangtum akortemar lapen angjirmar kedoprong along, latum ningje tahai meme latum ke Arnam aphan choropiklo, bonta alangtum anung pen ke, latum ahokpet ateng sai klemkle lapen angton pen si cheparjan prekdakji. Tangte laheihui doan ke dhoromipet Pharisi atum loma? Komatma ahokpet Arnam aphan kanghon lapen ahok cheparideng abang ke komatma Arnam along athikpet abanglo bonta lasonthot si athakchot ke chepaklangklelo. Lason abangphu ke ahok ateng si ajat ason le kepho ahut tame klemji ninghanglo, lapen pima alangtum keme-kaheno kethakthek abirudhe si kaningjeji mate keklemji puke avelo. Lason amonit abang ke kethek-kere ateng pen si ajat alam ahut tame klempo, lapen ke ajat alam le chetong pu sitame alang asai amo ke aron kekroi chepathik ateng dovetpo. Lason amonit atum si ahokpet ru-thei klem thekji. Ajahak atum komatma ade-angtur pen si alangtum Arnam aphan akachoro kipi thekchot dolo; latum ke alangtum arni doan ta atehang chibireng si kaningri ason dopo, tomon langno pen kesung kephodam asonlo lapen chepajinso meme si cheparjanpo. Kopuan kelangseletmeme loma! Jongsi nang le latum aphan arju lote, “Nang nephan nangthanjima kosonsi nang Arnam aphan kachoro nangkok aphuthak?” tangte latum ke thangnat alam ta ningje thekthepinpo. Jongsi nang le Arnam along athikpetlo, tangte nahokhok dam si laso aphuthak ningje nangnelo; alar ke, Arnam aphan kechoklim ateng pen sai klem ra nang kanghon chepaklangnon, lapen ahok aning pen Alangliphan ardomnon. Komatmatma alam penchot lapen klem nangji pu apot chobeibeichot pen si Arnam aphan chemedun atum anke kadokave tame chongthui abang saidelo! Ajahak atum kardom abataitin tame Arnam aphan kachoro pajirlo pusi latum ningjelo, lapen latum kardom aling ta chirulo pulo, Karjong Kangthir akachejapon avedet pen sitamelo. Lason amonit atum along anke dhorom anim-rokom lapen kamunthidamthap alam plengsetlo; latum ke lason anim-rokom lapen kamunthidamthap alam pen si rengdunlo, kaiketa kroilo pima halahei keklem amo ke Arnam aningdoklo lapen pima Alangli ke chobeibeichot akangthirjir mate ningduk akachiru si chedondun pulo. Kopi akeme si vangpo lason kamatha thekthedet amonit atum along? Kachepabihek kachepaklang’iji aphan pulote, ajahak atum bang kedoprong angno kaningje ahut ke kemepik ason si chekronglo. Ajahak atum ke bang kaprek amonit atum angno lote chinilor si kar’ipik asonji, masapso ta jakong kavedet ameresak aso asonthot si cheparjanlo. Tangte lason pen si Khristo arat alongri along kedo amonit atum atheng loma? Laso alongri along kedo amonit atum anke rengsap lapen jokvan nangji, adai kavepin lapen chingpudang nangji, athikpet lapen inghonmeme nangji, lapen kejokvan angdeng along si kerengver nangji. Latum ke athikdut lapen man-peng kedo nangji lapen latum nahok le dam sitame karjap hakhi chipithek nangji; lason amonit atum anke Arnam lapen monit tame aningdokhurlo. Komatmatma kekroi along kachomatlong akimilang atum anke penang an athak akeklem-kedam dopiklo; latum ke aphrangsi isi angdeng along langchari peme lapen kephanghophun chetongdet nangjilang. Monit atum komatma aklong’et pen Arnam aphan kekroi kedo anke bang kaprek atum pen athak kacheklang kethakme kalilo, bonta alangtum keklem-kedam lapen asai amo anke choromemevek chenamlo. Lason amonit atum anchot si Arnam alam ateng pen kerengdun unji pu kehokponlo. Jongsi nang le arnivang tame prekjam amonit atum aphan kejok along kevanji pu pen ajok chepaduk si latum aphan birta keme pachethanglo, tebonta kijut ahut anke aron-atang lapen kekroi kethan alam ateng si dodunbomlang, tangte nang ke Arnam anongthe van un’elo. Lason amonit atum anke dhoromi athenglo, lason thakthak si kachongthui atumlo. Halahei dhoromipet amonit atum kachingrumlo pulote, latum arjuji tahai, “Ingjir, kosonsi nang laheihui arni kedobomlo?” Labangpi chethakdunji tahai, “Ne chematha ke Ne Arnam aphan preng kachitu nangji dokoklo, lapen pima Ne ke Alangli kar’idam ateng ningpangsam thekthedetlo.” Kaprek abang ningje tahai, “Ne, lethot tame, Arnam along preng dokoklo lapen ke pima Alangliphan ningkapangsamji Ne un’edetlo.” Laheihui alamseng lapen alamthe amokha salajong latum arlo aklong’et along kememedet ason si ningjeponlo; lason alamthe doan ke kelangseletmemeneilo, lapen kedeng un’edetji si abatpik anlo. Lason amonit atum asema ke Arnam aphan kekhamkhedun si dolo. Latumke isinat kechokche alongta keklemdun avedetpo, mate lason aot dode lo mate aning cheparong thapthe lo. Latum ke kaiketa kengsetpo, lapen dhorom aron bibelo. Pinang’an amonit atumke athakchot kachepaklang atum do, kadure ason kachethan ahut. Komatne kelun ahut, latum kekan pangchengpo, atheke alangtum a’an phole ke sekhak lopu chichininepin lo. Lapuson amonit atumke dhoromipet kali mate chingbarbe lo, lapen ardi pithekthe lo. Lahei kedo’an ason ke ahok akadure si cheklang lo. Pinang’an amonit atum karjong akai aphuthak kachethan ahut, latum thangnat alamm ta Arnam aphan Ningjejedet lo, latum aning aklongke Alangliphan ahok kanghon dolo. Nangtum Arnam aphan kachetuji apreng kamathadam ke anutkaprek amonit atumpen thangnat akenang avelo; nang ke Arnam along preng kachetu nangji dokoklo, monit atheng kalidet lo. Kopi alelo nang kaike amat bang aphan kaningjedam ke? Nang ahok along kelutdunji aphansi akenangsot pivek nangji, ajatta athak pen jakong kachepi mate kachepaklang kalidet nangji. Kopi ason si athak chobeibei keme asai amo monit atum chepaklangponlo? Latum ok apharman cheklanglo, lapen athak akeklem-kedam doan akemenei tame chethe apharman cheklangkle; latum chepaklang thekji ke nang mena salajong aot-adur anchotji. Monit akhei atum athak pen akeklem-kedam ke Arnam aningkehang paplengpidam un’e. Nang ningjekonglo nang Arnam along apreng kachituji apot, tebonta nang ke bang kaprek aphan chethe kapadordun mate latum Arnam aphan kapanghonji ningrungdun thekthelang. Tangte nang kroilo pima halahei akeklem-kedam pen nang Arnam aphan ningpangsampoma? Nang chemathalo pima nang keklem-kedam doan ke Arnam kar’idam ateng aren si dolo, lapen pima latum doan ke karjong penlo, bonta ahok penlo, latum doan kadokave tame mathakranglo! Nang kroilo pima nangphan ningpadok aling kopima lapen kopisi nang keklemji ninghang kedo ke Arnam kachehok’iji halahei ason along pen si klardaklo. Tangte nang ningkedokdam pen Arnam apharman cheklang unjima? Tangte nang inut abangphu aot-adur pen Arnam apharman cheklang unjima? Kopima nangphan ningpangsam ke klardaklo pima la athe ke Arnam langseletlo, lapen nang be kedo apot anke halahei Arnam kahijim lapen kepadar asonlo. Jongsi nang chematha preng kituji dokok, tangte damnon lapen Arnam angno ardomdamnon; bang anut kaprek aphan kethandamji akenang amat si avelo. Jongsi nang le Arnam angno ardomdedetlo, lapen alar ke methang aphan si bang kaprek angno ardi kachipi ongmunaklo, tangte lake Arnam akar’idam paplengpi unjima? Jongsi nang keklem-kedam le kaiketa athak kacheklang isinat along si doverlo, tangte laso kipudam ke pima nang ale kave ke henopin anlo. Kopuson amonit pulo komatmatma athak chobeibei akeme asai amo klemchot atum lapen ke ahok pen kaduredet puke? Lason amonit atum anke kachongthuidet Pharisi lapen dhoromipet abangphu atumlo! Jongsi nangtum le athakchot akeklem-kedam doan nang varphitphedetlo lapen kachelarji aphan un’edetlo, tangte nangtum along kedo kachongthuidet titi amung ke ansose si the-dingthupo. Koan kethedung nang kachongthuidet titi amung kedo, lapuan sose si Arnam aphan kedengdedetji kachekhang dopo. Mo kijut ahut, lason amonit atum ke chenam si virdetvekpo!