Hukum Doan Kachibi Lapen Laso Ahok Ateng Keklem-kedam

Keklem-kedam along, hukum doan kachibi ke laso ahok keklem-kedam along kibi pen pacherapvek nangji. Hukum doan kachibibom ahut, madunoi laso ahok ateng klemvek nangji. Laso ahok ateng keklem ahut, madunoi ta halaso ahukum doan aron-atang patepek nangne, mate hukum doan arkan nangne; Arnam nangphan kopima akenangji laso ateng nang klemnoi. Hukum doan kachibi lapen laso ahok ateng keklem la sonni ke cherappetlo, lahinhin kache’un’e kali. Koan ma nang la ahok ateng keklem, lapuan si hala hukum doan ardi alam nang kachibi thekthupo. Koanma la ahok ateng nang keklem, lapuan si hukum along Arnam kaningje alam doan tame nang ansose chinipo. Laso ahok ateng keklem lapen hukum doan kachibi la sonni ke lahinhin kache’un’e asai kalilo – latum ke cheraphetlo. Kecheng ahut ke, monit atum hukum chibidet aphi ansi alang la ahok ateng klem unji puhe lapen Karjong Kangthir pen theang adak-atur longji puhe, bonta lake Arnam abinong’et kemangdam kali. Arnam akenangji ke nang ning Alangliphan karcho ahut nang kachipidet henlo, ot-dur kemesen apot anchot kali. Tebontame, athak chepaklangpruichot sita nang hukum doan ke chibivek nangji. Pajo pen, kacharlilong pen ajok, Arnam aphuthak klardak pen chinilongdet aphi, monit atum Alangliphan khangkhelo lapen abirudhe thurthelo, lapen Alangli sai aphan thangnat ningkibidun ta anpar ke avelo. Lahenlo akrong ke monit atum bangso ahukum ardi alam kirim pame thekji. Laso apot si, hukum doan kachibi pen anchot, laso ahok ateng ke klemklepin, lake ale avelo, lapen Arnam aphan karcho ahokpet pu cheklangklelo, pima nang ke nonpu anta choklim aman-peng longlelang. Ahok ateng kalipin pen hukum doan kachibi ke aron along kekkepin pen kekroidun pu aphan anchotlo. Lason keklem pen, hokum doan ke nangphan aron chemandetpo, kai along nang kachingthurji aphan akerap avedetji. Laso alar ke, lahei ke nangphan anghor si chemanrongpo, lapen Aron Ban alo ahut aron heihui ason nangphan nangkokhetpo, laso pen ajok Karjong Kangthir akadure nanglong dopo. Laso apot si, la ahok ateng keklem pen anchot si nang pachoklim pen hukum doan chibi thekji, lapen la ahok ateng keklem’iji aphan si nang hukum heihui doan chibilo. Hukum heihui doan kachibibom ahut si, nang ansose si la ahok ateng klemponpo, lapen la ahok ateng keklembom ahut, hukum doan kopi si ajor doma nang aklong’et alam kachini longpo. Arnam akenangji abinong’et athe lapen ajor ke pima monit atum hukum heihui kachibi ke alang aron kekroidun aphan anchot kali, alang lason si matha tahai meme; bontame, lake alang kai kilutdun pen si cheraplok. Nang kai along kachingthur koan keledam kethanji ke nang hukum heihui doan kopuan angdeng ansi kachibi’un pen henlo. Ahoklo hokum doan ke monit atum kachibi nangji aphanlo, monit atum akai along akephopon pen ajok anchot si laso ahukum kedoan ardi tame cheklangji. Ongdung amonit atum kipu ke pima hukum heihui doan chibi peme lote pima latum doan ke “angton pen chisik pemelo, lapen anpar keklem nangji kedolang ke kenepchekji anchotlo.” Lake anta lampar thangbakbe abidi asonlo, lapen Arnam aninghang aren kalipinlo. Komatmat ma lason alam kaningje abang aling ke kachingthur kar’i’e atumlo, lapen latum ke ok aninghang si ar’ilo. Lake kiluneilo! Lake nonlom akai abinong’et pen chingbarbepinlo! La ahok ateng ke klemlo bontame chenam si hukum doan chibibedet puke Arnam aningkehang kali. Komatmat ma lason keklem anke tekok-teki atumlo; latum doan ke akeng kavedet amonit atum asonthotlo. Hukum heihui doan kibichot penlok lapen lahei along kekkepin pen kedovet bontame ahok ateng dengdepin pulote lake Arnam aninghang along chetontelang, lapenthu; komatmat ma amek kavedet atum asonlo, matmat ma lason keklem amonit atum ke, lapuson tekok-teki asonben si sungpo. Lake lason le pudet tame pima nang jongsi hukum heihui doan chibi pemelo lapen Arnam keklem-kedam alam aputhak klardak pen chinidunlo, tangte nang la ahok longpo; kacherapdam pen ningje lote, nang tame kechoklim aman-apeng longdunpo. Nang jongsi la ahok ateng klemlo pima nang klem nangkoklo, nang hukum doan tame chibipo, lapen laheihui sonni ahormu ke kache’un’e lahinhin ave. La ahok ateng keklem lapen hukum heihui doan kachibi pasonni ke prekjam amung, inut akai kephopon along akenangsot angdeng saiselo. Inut akephopon along ke lahinhin kachelang ke dovek nangji, kachekak kali, hukum heihui doan kachibi lapen ahok ateng akeklempon. Tebontame, akacheprek ke lahinhin ta dolo lapen akachepho ta la sonni angbong dolo.

Bangso kai kimi along hukum doan akimi kapangdakpon ke isi kethan kachekok angtheklo pima kadokave amonit atum laso ahin along, komatmat ma kadokave Arnam ase pini arni karjulong atum an, kai kimi along lutdun tanglo. Lake Arnam asai akimi kapangcheng ponlo, lason thakthak si Arnam ningkan suri throk kisik-kedang kemangdam asai kapadusi angdeng keklemji kapangchenglo. Kai kimi along hokum heihui doan angthek keklang ke pima Arnam lapen monit atum akimi asining lapen akimi apirthe angkang lutdun tanglo, lapen pima Arnam, Jehovah le Israel aso atum angbong sai keklem lapen Jisu le Jihudi atum angbong keklem, keklem-kedam ansose paklangpo, lapen lapuan sose lapen ansose si thedung asai pirthe along klempo. Lahei kacheklang angthek ke pima laso asong amonit atum doan ongdung lapen thedung ahukum heihui Arnam pen longpo, lapen ke laso aphan pador’etpo, pacho longpo, cherapdunpo, lanapo, lapen cheraidunpo Alangli si keklem-kedam peme penlo, Alanglihin pen si ansose keklem-kedam kemeji aphan seke pipo, lapen laso atenglo, bengpo, lapen pacharklepo Arnam alam pen. Kai kimi along ahukum heihui doan akenangsot alam ke chenam si ardi doklong. Lahei nangkethan ke pima Arnam pirthe along chenam si nangcheklangpo, hadak pen si Alangli angtong somindar adang ta cheraidetpo, ok along si Alangli nongthe adak-atur kadokave chepaklangdakpo. Lahei akethan ke pima keklem-kedam a’Arnam si pirthe athak ansose keklem-kedam asai klemponpo athema lake Alangli kangvaitang kadokave atum doan kapachoklimji aphanlo. Lasonsi, alam pen ajok Arnam si pirthe athak asontin tame pachunlappo, lapen aron aketoi chepaklangdakpo pima “ok kachepharlotang a’Arnam kangtuinei angdeng an thurpo lapen anong theklongpo, lapen kadokave amonit atum lapen doan adet tame Arnam aphan karchoji si kengphu patongruipo, pima kethedung apot.” Kai kimi along ahukum doan ke monit atum kachibi nangji puvoiphit tame, lapen la keklem nangji ta monit atum adenglo lapen alang aron ateng keklemvek nangpo, laso ajor latum kacheklang ke ardi doklong ongchot ajoine ethe mate thenivet alamthe pen kaningjedam ke un’edet. Kai kimi along ahukum heihui doan ke Aban Aron alo ahukum aphan larplotlo lapen Jehovah lapen Jisu le kapinchongkang Akimi Aron alo ahukum si dolo. Laek karnukkrung akethanlo, monit atum kahemandamthap thangbakbe pu kalidet. Kai kimi along ahukum doan ke keklem-kedam nangji akenangsot ardi alam ladak dokok: Latum ke Kanghon-Kangjinso Akai lapen Rat Kepangri Akai angbong kedon adondon ason si dolo. Kai kimi along ahukum doan kea ban akai ahut akeklem-kedam lapen aron heihui doan tame kadokave kapajutlo, lasonthot si Jisu akai ahut lapen laso aphrang arni angton pen keklem-kedam doan pajutlo. Lahei pen ajok monit aphan ansose keklem-kedam a’Arnam adung vanlo, Alangli pen alangphan jongjung kapachoklimji aphan papangchengtoilo; lahei doan ke kechok pemeji akrong kapangchengponlo. Lasi, kai kimi along ahukum doan aputhak nangtum kechoklim kamunthidam si cheparideng nangji, lapen thang chininepin pen aphiphi dunri mate lahei aphan langropri. Kai kimi along ahukum doan elong adim anke ardikklui ardi kedo dolo: Pima monit atum pini arni keklem-kedam a’Arnam Methang aphan archo nangpo, athe ke hala Karjong ardi kedoklong along ansose si keklem-kedam pen kachehodaidun si dolo. Laso ahukum heihui ke Alangli ke kangthir’et Arni pu chepaklang tangdet pen aphi si Arnam monit aphan kechok mate kangthirthe angbong kangsaiji along tame ahokpet kethan ardi pidunlo. Hukum doan tame kachini ke joike bonta asai keklem-kedam si kesung. Hadak pen si lake theklongji pima jongsi Arnam le monit aphan kapachoklimji ninghang, tangte Alangli amethang alamthe lapen akeja ateng pen si Alangli klem nangkokpo, lapen monit atum alang mena along kedo akethek pen anchot ke kechoklimji aphan long un’edetji. Kai kimi ahukum doan monit atum chibi’etpo mate keklem-kedam a’Arnam aphan alang kethek kachinidam pen kalidetpo. Laso apot si, nang hukum doan chibi’et tame mate mo kaprek arni ahut si kali lake kali pu akarju tame pima akethak longponpo. Lake isi ardi kedo kenangsotnei kacharli nangji alamlo.

Laso ahok ateng keklem-kedam henlo isi monit atum akai kachingthur akronglo. Nangtum jongsi laso ahok ateng klemkledet, tangte nanglong ke thangnat ta avedet si lo along ketok’ang alam si chinichotpo lapen ahokpet akai longdundelo. Ahok ke monit aman-apeng angtheklo, lapen laso ahok ateng nang klem klemkle tame lake nanglong kechok aman-apeng do ave pen cherappetlo. Nang jongsi la ahok ateng klemkledet, kangthirjir pen cheparjanjedet, mate ningduk-ningkarong si nangpondet lapen nang ok aphan si chelanachot, tangte nang ke hukum heihui doan kachibiji ke helopik alamlo. Lahenlo ardi kenangsotnei akethan alamlo. Ajat akai ahut tame, penang an laso ahokpet do pima monit atum kilutvek nangji lapen kachinidun nangji, bonta alongtin akai along ta, kacheprekjam ahukum heihui si dolo pima halahei ahokpet along si chelangdunlo. Laso ahok pima monit atum keklem-kedam kachepho ke isi jongdamvet akai along, lapen lasi latum lason ateng si hukum tame chibilo. Ajat akai along ta amena ahokpet do keklem-kedam nangji lapen ahukum heihui kachibi nangji. Tebontame, Arnam kapinchogntang keprekjam ahukum heihui langdam pen – pima lake, prekjam akai pen ta langdamlo – akemangdam lapen monit atum ahok ateng pen keklem-kedam kelong angthek doan aphant kacheprekjam do. Lake lason le pudet ta melo pima hukum heihui si ahok aphan lanalo, lapen laso ahok do si hukum doan aphan langponlo. Jongsi la ahok anchot si do, tangte Arnam asai kachethanji aphan thangnat avarsai ta avelo. Tebontame, hukum heihui doan pen jongdam si, monit atum Karjong Kangthir asai keklem kachethang alam koan kele doma pangthek unji, lapen monit atum koloso akai ahut si Arnam asai keklem puta chiniji. Dhorom along, penang an amonit atum do ahok ateng keklem-kedamthek pima lason ke Aron Akai ahut tame monit atum klempontanglo. Tebontame, latum ke akimi akai ahukum heihui longledetlang, mate latum la chibi thekthelang. Latum ke nonpu ta aban ateng si langbomlang lapen hakoko amonit atum asonsi dobomlang. Latum doan ke non akimi adichi pen keklem asai chinidundelang lapen kai kimi ahut ahukum doan theklonglelang. Lason ke, latum along Arnam asai avedetlo. Lake latum along voti arei saide anchot si dolo; jongsi arlo le voso ave pulote, akarjong tame avelo. Klardak pen paklangji aphan, lake latum chethe longlelang pu aphanlo. Lason amonit atum ke kai kimi arlo lutdun longledetlang lapen penang an akengkam ke aphi si dolang. Laso apot si, hako akai ahut pen ahok kedotanglo bonta kai kimi ahut ahukum heihui ave pulote ale avelo. Penang an nangtum laso ahok ateng klemlo pini arni bonta ahukum doan ke chibibedetlo. Nang thangnat ta longlelo, lapen laso ahok ateng nang keklem ke ardi avelo lapen ajor ta avelo lapen Arnam nnagphan chororelo. Karjong Kangthir nonjong keklembom adichi angkang arlo an si laso ahok ateng keklem-kedam ke dovek nangji; lake pini arni keklem-kedamvoi a’Arnam ase ateng pen si pachunponvek nangji. Laso ateng kalidet, ajat tame ardi kave tanglo, chek alangpong pen lang kepangpenji pu asonthakthak si klemlo. Lake isi kai kimi along ahukum heihui doan kapinchong pu keklem-kedam ajor esonlo. Nang jongsi nonjong apor ahut Karjong Kangthir keklem asai aputhak paklongsap pen chinidamlo, lapen nang jongsi pini arni asai keklem adichi arlo lutdunlo, tangte nang ke hukum heihui doan kachibiji aphan siksaksepin pen si klardak pen kachinidam longponpo. Jongsi laso arni nangle lote athe nang le kai kimi along ahukum doan ardi acho alam theklong pemelo lapen nang laso ahukum doan chibi theklo, tangte nangphan ke pachoklimvekpo. Lake laso ahok ateng keklempon akenangsot akeklem-kedamlo lapen hukum doan kachibilo. Nang ahok ateng kelm-dam thek thekthe pu kelangdam ke nang koan si kai kimi along ahukum heihui doan acho alam kelonglo. Karjong Kangthir keklem asai ke monit along chingtontedet si cheklangbompo, lapen Arnam tame monit aphan lapuan sose si akenang dopo. Laso apot si, laso ahok jasemetpet monit atum keklem-kedam along ke’enpon ke aphai keong pen kampo, lapen thedung plangpo, lapen lahei ahukum doan kachibi pen ajok angthek ansose si akeme klangpo. Laso apot si, nangtum ephongvet apor pen la ahok ateng klem-dam nangvekpo lapen ahukum doan chibivet nangpo. Laso aphuthak madu tame langklangri; akimi ahok lapen akimi ahukum doan laso kai kimi along le ephongvet apor padonang.