Arnam Asai Akiminei Aphan Chinitha Lapen Alangli Kengkam Aphiphi Duntha
Nonke, nangtum Arnam amonit kemanji si ridun nangpo, lapen akechok atovar along ingthimlim kilut cheng nangpo. Arnam amonit keman puke Arnam arat kepangri Akai along kilut aphan. Pini, nang apun-achak pensi halabangso alongri apharman kacheseke along lutlo, lapen kevangji arni nangkai ke aphrang ateng kejokphun lapen kamathapla kedo kangtonlo; halapuson kerengdun pen ke Arnam kenangji a’ot chepapleng un’e. Jongsi nang thangnat ketongsekot ave, tangte ladak keklangji ke nang ansose kachepameji akar’i ave pulo, nang kiridun ke chingvuinok lapen manghu’et, lapen nang Arnam akemang paplengpi thekthe pu. Arnam kepangri alongri apharman kaseke along kilut puke Arnam amonit atum kedo-kethak a’ot kachevan – nang lapuson kacheseke kedengji aphan ar’i loma? Nang tongsekot kamathaji aphan ar’i loma? Nang Arnam nangkepakeng ahukum aber kedoji aphan ninghang loma? Nang Arnam nangkepare-nangpekeng aber kedoji ninghang loma? Nangthak Arnam alamthe vang lapen satlang nang’en lote, nang koson si cheplangji? Lapen doan prekjam ahokpet ason pen chepathengno lote kopilo keklemji? Kedamtang apor, nang ardi kipi ke chethe aphan kali; pini ke nang chethe aphuthak ahokpet ason along nang lut nangpo, lapen nangkun along kachelar chiri nangpo. Lahenlo Arnam kepangri alongri amuluk atum kachepalong nangji ason. Arnam amonit atum anke chethe do’et nangji, alangtum Arnam kepangri alongri along aseke deng nangji, lapen alangtum akai akun kachekirla thekji aphan chelang nangji. Lahenlo Arnam kepangri alongri amuluk atum pen kenangji.
Arnam kepangri alongri amuluk atum pen Arnam kenangji ason ke la aber kipi henlo:
1. Alangtum Arnam kepek asai deng nangji. Ladak kipuji puke, alangtum kijutsi arni malom Arnam asai along kaningje alam doan deng’et nangji.
2. Alangtum longri apharman aseke along lut nangji.
3. Alangtum amethang aning Arnam pen ajok kachekirla kelongji aphan ridun nangji. Nangning Arnam ahin ingthimlim pen chetevarlo, lapen nang mesen karjong akai dolo tangte, nang kejokvan angkang along si dopo, atheke nang Arnam akanghon lapen keraikom arlo si dopo. Nang Arnam akanghon lapen keraikom arlo kedodunlo pu ansi nang Arnam apharman kemanji.
4. Alangtumphan Arnam cheparidengdet nangji.
5. Alangtum pirthe along Arnam anong kethe angthek cheman nangji.
La sonpho henlo ne nangtumphan nangpaklemtoi asailo. Nelamthe doan ta Arnam amonit atumphan si kaningjepi, lapen jongsi nang lahei nangpaklemtoi asai deng ingtungte, Ne nangpasikse – bonta jongsi nang ahokpet pen lahei aphan deng, pulote nang Arnam akemang deng thekpo. Pini, nangtum Arnam nangpaklemtoi asai kedeng pangchengpo, lapen Arnam kepangri alongri amonit kemanji aphan lapen Arnam kepangri alongri amonit kemanji apun-achak kachepaplengji abidi chiridunpo. Lahenlo kechengsi kilutdun aphan akengkamlo. Jongsi nang ingthimlim pen Arnam akemang ateng klem ingtung, tangte nang la sonpho nangpaklemtoi asai deng nangji, lapen jongsi lahei chepalongtheklo, nang Arnam aning aphi dunvekpo lapen Arnam nangphan kemesen asai nang’envekpo. Arnam kepangri alongri kilutdun aseke along karjong akai kachingvui do. Aphrang ke, karjong akai alam kachethan ave, bonta pini ke, nang Arnam kepangri alongri along kilutdun aseke kechenglo tangte, nang aron ateng pensi karjong akai along kilutlo.
Kopuson akailo karjong akai ke? Karjong akai puke nang nangning aphan ingthimlim pen Arnam ahin kachetevartang, lapen Arnam akanghon aphuthak kamathathek akai. Lake nang Arnam alamthe pen kerengthek akai, lapen nangning aphan kaprek ason cheraire, lapen nang Arnam akemang pini ke neptheklo, lapen Karjong Kangthir atur si nangphan nangkeja ponpo pini ke nangmethang arpu kachepaplengji aphan. Lapuson Arnam pen monit angbong akai aphan si karjong akai pulo. Jongsi nang pini atur aphi dun thekthe, tangte nang Arnam pen kachepho angbong angkrak nang do tanglo – lake mitpet si nangman tahai apot – lapen nanglong mesen karjong akai avedetlo. Arnam pen mesen kachepho ke pini Arnam alamthe kekroi along’e pensi kacheman. Nanglong mesen karjong akai doma? Arnam pen nang mesen kachepho doma? Nang inut Karjong Kangthir asai aphi kidunkri abang loma? Jongsi nang pini Karjong Kangthir atur aphi dunkri theklo, lapen Alangli lamthe angbong pen Arnam akemang ripdun theklo, lapen lahei alamthe along lutdun theklo, tangte nangke inut Karjong Kangthir alangroiso aphi kidunkri abanglo. Jongsi nang Karjong Kangthir alangroiso aphi dunkrikre, tangte nang ke honthe nangnepin pen inut ahokpet aphan kiridunde abanglo. Methang aphan kachepame ponbomji aphan ningkehang kave atum along ke Karjong Kangthir ta sai keklemji avarsai ave, lapen laso angthek ke, halapuson amonit atum ke mantune ta mena jakong chehang thekthe, lapen kaiketa thiklaklo. Pini, nang Karjong Kangthir alangroiso kengkeng dunloma? Nang Karjong Kangthir alangroiso along si doloma? Nang kithiklak angdeng pen nangbar’etloma? Arnam alamthe aphan kekroi atum doan, Arnam asai aphan atiri pu kedeng atum, lapen pini Karjong Kangthir atur aphi kidun atum – alangtum ke Karjong Kangthir alangroiso along si dolo. Jongsi nang Arnam alamthe ke klardak pen ahokpet lapen choklim pu kroi, lapen Arnam alamthe Alangli ajat le ningje tame kroidun, tangte nang ke inut Arnam asai along kilutji avarsai kiri abanglo, lapen lapuson si nang Arnam akemang paplengpipo.
Karjong Kangthir alangroiso along kilutji aphan, nang Arnam pen kachepho mesen do nangji, lapen aphrangsi nang mena aphan kithiklak angdeng pen chepakak nangji. Ajahak amonit atum ke kaiketa muluk aphi si kidun, lapen alangtum aning ke Arnam pen akele kahelo cheterekjui titi; lapuson amonit atum ke methang aphan kachepamebomji aphan ningkehang ave, lapen alangtum kihungdun angdeng ke ingdai ongchetlo. Arnam aphan kanghonji lapen Arnam nangcheparideng nangji pu kiri kedo henlo Arnam kemang. Ajahak amonit do alangtum ke Arnam akanghon kachituji aphan si me-heno kangsai ajakong kache’enchot, bonta lake Arnam akemang papleng un’e; nang kiri angdeng koan ma kangtui, hala ansi Arnam akemang pen kachingvui unpo. Komatne kemesen abang, lapen komatne Arnam aphan kanghon abang, longri along kilutdun pen inut Arnam amonit keman kachori abang henlo ahokpet nangphrang akailo, lapen anam kethenei lapen ardi kedonai akai lahenlo; nangtum pen anpar hirjume kelong abang avelo. Ne kopi apot si lason kaningje? Atheke Arnam aphan kekroi atum ke a’ok along si rengbom, lapen alangtum Sobar apharman si kereng, bonta pini ke nang Arnam aphan si kerengpi, lapen Arnam akemang keklempiji aphan. Lasi Ne kipulo nangtum akai ke ardi kedonailo. Laso amonit adilung ansi, Arnam kangvaitang atum, ardi kedonai akai pen kerengthek: pirthe along anut kaprek amonit ke lapuson ardi lapen ajor pen akai pen rengdun thekthe. Athe nangtum ke Arnam pen kangvaitang, lapen Arnam si pathe-pading, lapen, anparta, Arnam nangtumphan nangkanghon ajoine, nangtum ahokpet akai aphan ripdunthek, lapen ardi kedonai akai pen kerengdunji chini. Lake nangtum kiridun me’o apot kali, bonta lake Arnam nangkanghon ajoine; Arnam si nangtum akarjong amek kepaphrang, lapen Arnam aKarjong si nangning kepapho, Alang thengno kevangji aphan apor keme nangkipi. Jongsi Arnam aKarjong le nangtum aphan nangpatheang’e, pulote nangtum along Arnam along kemepik ason theklongji ajakong avedetji. Lake ingthimlim penta Arnam aKarjong monit aning kepapho ajoine si alangtum aning Arnam ahin kachetevar. Ahut pen, nangtum Arnam alamthe along ningcheparong ahut, nangtum akarjong ta chekirla, lapen mathapo nangtum Arnam aphan inghonhete chekhang un’e, lapen nangtum kapanungkuk un’e ason thangnat ave pu. Jongsi nang lason matha, tangte Arnam aKarjong nangphan nangpapho’etlo, lapen nangning ke ingthimlim pen Arnam ahin chetevar’etlo, lapen nang Arnam aphan chardom si ningjepo: “O Arnam! Netum ke ahokpet penta aphrang pensi keleji adim kisikmek lapen Nangli pen nangkangvaimek. Nangli nong kethe nephan nangpacheparoka, lapen Nangli monit angbong inut kachemanlong pen neta nenong chepathe. Nangli kemang ateng keklemji aphan ne ajat ta palardetji lapen chipidetji, lapen nelong ningkan doan, nekai arjon kachepaduk doan, nangpharman chipidetji.” Nang lapuson ardom lote, kijut un’e akanghon lapen Arnam alam ateng keklemverji kamatha nangning along dopo. Nang komantune lapuson kepho doloma? Jongsi monit aphan Arnam aKarjong kepapho dover, tangte alangtum jatsemetpet kachardom ahut mena aphan Arnam aphan kachipiji aning hangpo: “O Arnam! Ne nangnong kethe arni langdun ingtung, lapen ne Nangli pharman si kereng kangtung – Nangli pharman kerengpi pen anpar thangnat ardi kedo mate ajor kedo avelo, lapen ne masapbak ta Sobar lapen nebang arpum apharman kerengji ning kehang ave. Nangpharman kerengji apun nangpinchong pen pini nephan Nangli nang’ingthurtha.” Nang lapuson a’ot pen chardom’etlo pulote, nang chemathapo Arnam apharman rengpipete nang dothekthelo, Arnam aphan chepalong nangji pu, lapen nang rengbom ahut Arnam aphan chepalongle pulote nang kithiji ninghanghe pu. Lapuson kardom ningjedet aphi, nangbang arlo ki’ik un’e ajakong dopo, lapen konat pensi la kevangma nang chichinineji; nangning arlo ahoi kave ajakong dopo, lapen Arnam ke inghonmemepik pu kamatha nanglong dopo, lapen Alangli ke kanghon apun do pu. Lake nangphan Arnam nangpaphodet ahutpo. Lapuson kepho atum an aphan ke Arnam kepapho tanglo. Atheke Arnam kepaphover atum aphan an ke, alangtum akai along kachikirla dovek, alangtum methang alamrai che’enthek lapen ingthimlim pen Arnam aphan kachepalongji aninghang, alangtum aning along Arnam aphan kanghon ingtangthubom, alangtum aning ingthimlim pen Arnam anat chetevar’etlo, alangtum hemtun, pirthe, katherak, mate aphrang akai alam chemathathe, lapen alangtum kai isi kachepaduk Arnam apharman kachehodaidetji aphan ninghang. Arnam aKarjong kepaphotang doan atum henlo ahokpet aphan kiri atum, lapen Arnam arideng kechoklim kachepamanji aningchethe atumlo.
Nang nangning Arnam ahin chetevar etloma? Nangning aphan Arnam aKarjong nangpapho etloma? Jongsi nang komantune ta lapuson kepho avelang, lapen komantune ta lapuson kachardom avelang, tangte lake nangning along Arnam aphan dim ave pusi cheklangpo. Arnam aKarjong kejapon atum doan lapen Arnam aKarjong pen kepaphotang atum doan ke Arnam asai along kedotang atumlo, lake Arnam alamthe lapen Arnam akanghon alangtum along angkur chesak’etlo pusi paklangpo. Ajahak amonit atum ningje: “Ne ke nangson an kardom along arsikse, lapen te neke Arnam nangkepaphotang kali; ahutpen – ne dojoi pen kamatha lapen kardom ahut – Arnam ke inghonmeme pu ne matha, lapen nening ke Arnam kepaphotanglo.” Monit aning pen anpar ardi kedo thangta avelo. Nangningle Arnam anat chetevar’et lote, nangbang kangthim ta Arnam anat chetevarpo, lapen halaso apor ahut nangning aphan Arnam aKarjong papho’etpo. Nangtum angbong ongdung atum ke lapuson kepho dolo – lake nangtum kepho akaharnuk chingbarbe pu aphan anchot. Ajahak amonit atum ningje: “Ne kardom alam ethe ta ningjeje, neke anut kaprek atum lamthe chepachoi arjudunpo lapen nelong jakong thurpo.” Lake arlo pen Arnam nangphan nangpapho etlo pusi paklanglo. Arlo pen Arnam kapaphotang amonit atum an ke anut kaprek atum lamthe kachepachoi karjudun penta aning rungdet; jongsi inut abangphu ning kirung alam karjudunlong ahut amutpi si aning chekirlale dokok, lake klangdakpo Karjong Kangthir asai ke alangtum arlo kali. Alangtum arlo kar’i ave, lake alangtum lamrai ave pu angtheklo, lapen alangtum ke Arnam aKarjong asai longlepin pensi dobom. Inut abangphu jongsi Arnam pen kepaphotang pulote, alangtum Arnam alam karjulong lote alangtum asap kacheprek doji; jongsi alangtum aphan Arnam paphophelang, pulote alangtum Arnam alamthe pen kachetong avepinlang, alangtum halahei pen kachepho ave, lapen alangtum ke Arnam arideng katheang kelongji apun ave. Arnam alamthe arjulong pusitame kachekirla kave atum henlo Arnam kepaphophelang atumlo – latum henlo Arnam aKarjong asai kave amonit atumlo. Hala atur kimi aphan kedengthek atum anke kepaphotang atumlo, lapen Karjong Kangthir asai along kedotanglo.
Nangmena aphan chilintha:
1. Nang non ahut Karjong Kangthir asai anglum si doloma?
2. Nangning Arnam ahin chetevar etloma? Nangphan Arnam nangpapho etloma?
3. Arnam alamthe nanglong arlo pen angkur chesakloma?
4. Nang keklem asai ke Arnam aphan kenangji along’e athak si kikim loma?
5. Nang non Karjong Kangthir atur akeja arum si rengdunbom loma?
6. Nangning kedamtang kamatha ason-amung ateng charibomlang ma, mate pini ke Arnam alamthe ateng si kachari?
Lahei alamthe karjulong pen, nangning arlo kopi kacheplang do? Lapuan aningkan nangkekroibom tangdet, nanglong chethe ason ben Arnam alamthe doloma? Nanglong kedamtang, chongthui-chobai akun along kachelar doloma? Nang, Arnam alamthe pen pacheton si pini, chethe kedo puke kopi aphan pu chiniloma, lapen chethe kave pen kedo puke kopi? La nangtum aphan klardak loma? Arnam aphi kidun along ardi kipinai nangji ke lapuhenlo kadokave ta pini Arnam alamthe ateng nangji: nang chethe along kilutji pule ridun tame mate Arnam asai kepachunpi, ajat ason ta pini Arnam alamthe along si pavaikangchen nangji. Jongsi nang kachepachoi lapen kiridun ason doan pini Arnam alamthe along le kapavaikang kali, tangte nang ke Arnam alamthe along monit kimilo, lapen amutpi amat si Karjong Kangthir asai pen kachehelotang. Arnam aphan kenangji ke Alang kengkam aphi kidun amonit. Kedamtang arni nang kachini ason jonghe le me lapen ingthir tame, lake Arnam aphan nangne, lapen jongsi nangle lahei ason aphan koivet thekthe, tangte halahei ason ke nangphan aphrang akai along kilutji along thedung akebeng-kephan chemanpo. Non ahut Karjong Kangthir atur aphi kidunthek atum anke hirjume kelongtang atumlo. Kedamtang akai-akai amonit atum ta Arnam akengkam aphi dunlo, sitame alangtum pini arni an dunthekthedet; lahenlo kijutsi arni ahut amonit atum kelong ahirjumelo. Non Karjong Kangthir asai aphi kidun atum an, lapen Arnam akengkam aphi kidunthek atum, Arnam alangtum aphan kepon aling ta kidunthek ason – lahei atum henlo Arnam hirjume kipitang atum. Non Karjong Kangthir asai aphi kidunde atum ke Arnam alamthe asai along lutdundelang, lapen alangtum jonghe le sai klem tame, mate alangtum kisung jonghe the tame, mate alangtum jonghe le ahin-hin katthap tame, lahei ajat ason ta Arnam aphan thangnat amo vangve, lapen alangtum aphan Arnam pinkhatkhe. Pini, Arnam alamthe karju atum doan ke Karjong Kangthir alangroiso alongsi dolo; pini Arnam alamthe kachininelang atum anke Karjong Kangthir alangroiso angtan si dolo, lapen lapuson amonit atum aphan ke Arnam pinkhatkhe. Pini Karjong Kangthir kaningje pen kachekak asai doan ke a’ok aphan keklempi asailo, lapen jongjung kamatha aphan, lapen lake Arnam akemang ateng pu kipuji puke un’elo. Jongsi monit atum nim akamatha anglum si rengdun, tangte alangtum Arnam akemang aphan kachelon asai keklem thekthelo, lapen alangtum Arnam aphan sai klempi pusitame, alangtum mena jongjung kapahancha lapen kamatha anglum si keklempi, lapen amutpi si Arnam akemang ateng sai keklem thekthedet khangjanglo. Karjong Kangthir asai aphi kidun thekthe atum doan ke Arnam akemang chini thekthelo, lapen Arnam akemang kachinine atum ke Arnam aphan sai klempi thekthe. Arnam kenangji keklempi asai ke Alanglining ateng nangji; jongjung akamatha lapen a’ok apharman asai ke Alanglining ar’i’e. Jongsi monit atum Karjong Kangthir asai aphi dun thekthe, pulote alangtum jongjung kamatha anglum si dokoklo. Lapuson amonit atum asai ke bengdundet lapen pasiksakdundet, lapen lapuson asai ke Arnam pen kachetonte anat si kedo. Lasi Arnam akengkam aphi kidun thekthe atum ke Arnam aphan sai klempi thekthe; Arnam akengkam aphi kidun thekthe atum ke ketheklorlo Arnam aphan kakhinde, lapen Arnam pen kachemesenji thekthe. “Karjong Kangthir asai aphi kidun” puke pini Arnam asai aphan kachini, Arnam aphan pini kenangji ateng kedo-kethak thek, pini a’Arnam kapinkhat ateng keklem lapen kidunthek, lapen akiminei Arnam kaningje ason ateng kilutdun. Laso abangphu anvetlo Karjong Kangthir asai aphi kidun lapen Karjong Kangthir alangroiso along kedo. Lapuson amonit atum ke Arnam pen akero kelongthek lapen Arnam aphan ketheklongthek anchot kali, bonta akiminei Arnam asai along pen Arnam akun tame chinithek, lapen monit atum jongjung kamatha ason lapen kapatoite, lapen monit a’ot lapen atiri chinithek, Alangli keklem asai akiminai pen; lapen anparta, alangtum sai klembom along methang akun tame pajopon chikirladun thekpo. Lapuson amonit atum anchot si Arnam aphan chepalongthekji, lapen choklim pen ahokpet atovar longlo. Karjong Kangthir asai pen kepaklongtang amonit atum ke Arnam asai kiminei kiripdun thekthe atumlo, lapen Arnam asai aphan kekhamkhe atumlo. Lason amonit atum klangdak pen Arnam aphan kekhamkhe pu atheke Arnam sai kimi klemdet, lapen Arnam araje ke alangtum jongjung kamathadam ateng kalidet – labangso ajoine si, alangtum klangdak pen Arnam aphan khamkhe lapen Arnam aphan pinrem, alar ke Arnam alangtum aphan kelangselet lapen kedengde. Arnam asai akiminai aphuthak gian kachepado ke kejoike alam kali, bonta jongsi monit atum Arnam asai kekroi lapen Arnam asai kiridun aning do, tangte alangtum Arnam aphan ketheklongji avarsai longji, lapen Karjong Kangthir akiminai keja kedengdunji avarsai longji. Chinilor pen Arnam asai kakhamkhe atum Karjong Kangthir pen kapatheang mate Arnam akeja dengdun thekthe. Lasi, monit atum Karjong Kangthir akiminai asai dengdun thek-thekthe lake Arnam aningkeme alam chotlo, lake alangtum kachori, lapen alangtum jongjung kamatha alam pensi patinipo.
Non apor Karjong Kangthir kaningje alam an kekroithek’et atum ke hirjume kelong tanglo. Kedamtang arni alangtum kosonsi kedo, mate kosonsi Karjong Kangthir alangtum along sai keklem loma puke langdamde – Arnam asai kiminai kedengtang atum henlo hirjume kelongnai, lapen akiminai asai kedeng thekthe atum doan aphan ke sorphitpo. Arnam kenangji ke hala akimi atur aphan kedengthek atum, lapen Alangli kenangji ke Alangli sai akiminai aphan kachini lapen kedengthek atum. Kopi apotsi nang ingthirvet ariso mate nimso nangji pu kipudamlo? Inut ingthirvet ariso mate nimso ke Karjong Kangthir asai ridunthek lapen akimi ason chinidunthek, lapen anparta, akeban jongjung kamatha ason koivet thek, lapen pini arni Arnam asai kapinkhat ateng klemthek. Labangso monit asanchom, pini Arnam asai kiminai kedengthek atum ke, akai-akai aphrang pensi Arnam pen kele nangji adim kisikpi, lapen hirjume kelongnai atumlo. Nangtum Arnam ase kechak avepin pen arjulongphit, lapen Arnam kacheklang thekdun, lapen lasi, sining lapen pirthe adang, lapen akai-akai anta, nangtum pen anpar hirjume kelong abang avelang. Lahei kadokave ta Arnam asai ajoinelo, aphrang pen Arnam nangkisik lapen nangkangvaimek ajoine, lapen Arnam aningkeme ajoine; jongsi Arnam amena alamthe palamsose lapen ningjeje asonte, nangtum pini atengsi doji puhe? Lasi, kadokave anong lapen kero Arnam aphan padonang, athe lahei kadokave ta Arnam nangphan nangkirung apot. Lahei ason ning along chibi pen, nang thiklak dobomjilang ma? Nangjakong thur un’ebom langma?
Nang Arnam alamthe along kangsai, kepakeng, kapameji aphan ketheng lapen kapangthir kedengdunthek puke, lapen, anparta, Arnam nangpaklemtoi asai kedengthek, akai-akai aphrang pensi Arnam nangkisikmek, lapen lasi nangphan nangkepakeng ahut nangning chepasiksak aret nangne. Nangtum along keklemtang asai, lapen nanglong kedotang ahirjume majok ta pondet thekthe, lapen majok ta nangtum aphan nangkipitang ason doan pondet thekthe. Nim aphan keklempi amonit atum nangtum along nangchepangbardun heno. Nangtum ke Bible along kethan asonle kethekser abang kali, lapen nim along kethan alam chini aret abang kali, bonta Arnam nangtum along sai nangklemlo apot si, nangtum ke bang akai-akai pen kachepalong pen ansose si kelonglo – lapen lasi lake nangtum kethenai ahirjumelo. Laso ajoine si, ansose Arnam aphan chehodai’un nangji, lapen ansose Arnam aphan ningklarsap pen kroinangpo. Arnam nangkangthur apotsi, nang kachepaduk chitingthu nangpo, lapen Arnam nangkepaklemtoi asai kedengji aphan methang arjon chesik nangpo. Arnam nangphan nangkipi adim along si nang karjap pathirthip nangpo, Arnam amonit angbong inut kemanjisi ridun nangpo, longri aphan kaseke dengdun nangpo, Arnam nangcheparideng nangpo lapen kijutsi ke Arnam aphan anong kemesen angthek cheman nangpo. Nang lahei alamrai kedeng doloma? Jongsi nang lahei alamrai kedeng dolo tangte Arnam nangphan nangcheparidengji theklorlo. Akethenai nangkepaklemtoi ke Arnam nangcheparideng an keledun lapen Arnam apharman anong kemesen angthek kemanpi henlo pu nang chini matik. Lahenlo Arnam akemang.
Pini Karjong Kangthir alamthe ke Karjong Kangthir kerengsap angtheklo, lapen non apor Karjong Kangthir sangsepin pen monit aphan kapatheang ke Karjong Kangthir asai kedambom atovar angtheklo. Lapen pini Karjong Kangthir asai kosonsi kedambom? Pini monit atum kacheja ke Arnam asai along loma, lapen mesen Karjong akai along loma. Mesen karjong akai along kilutji aphan prekjam angdeng do:
1. Kechengsi, nang Arnam alamthe along nangning chedungrut nangji. Kedamtang arni Arnam alamthe nang ri nangne, lapen halahei aphan charlithu nangne mate pini alamthe pen pangbar nangne. Alar ke, nang ingthimlim pen nangning aphan non ahut Arnam alamthe along chethonrut nangji. Jongsi nonputa Arnam alamthe, karjong pen kacherap akitap, mate kaprek kedamtang alam kethan alam kabirti ason kaporhi abang dolang, lapen pini Karjong Kangthir alamthe ke dengde, tangte alangtum ke monit angbong kilunailo; Arnam lason amonit pen chepahelodet. Jongsi pini nang Karjong Kangthir atur kedengji aphan chisikdinglo, tangte ingthimlim pen pini Arnam kaningje alam along chethondunrutnoi. Lahenlo nang kechengsi kachepalong nangji ason.
2. Nang kachardom ta pini Arnam kaningje alamthe athak si athir donangpo, Arnam alamthe along lut nangpo lapen Arnam pen lamthe chepachoi nangpo, lapen Arnam athengno nanglamrai che’en anngpo, nang kopi angdeng kachepaplengji anujok che’e nangpo.
3. Nang pini Karjong Kangthir asai along’e along atiri pinching si ahokpet along harnukkrung lutdam nangji. Kedamtang arni kaningje alam lapen kethan alam aphan ripbom nangnelo.
4. Karjong Kangthir pen nangkepapho ridun nangpo, lapen Arnam alamthe along lutdun nangpo.
5. Pini arni Karjong Kangthir kedam atovar si nang ta ingthumdun nangpo.
Lapen kosonsi nang Karjong Kangthir nangkepapho avarsai kiripo? Karsiknai alam ke nonhut Arnam alamthe along kerengdun, lapen Arnam aphan kenangji atiri ateng kachardom. Lapuson chardomdet aphi lote, Karjong Kangthir nangphan nangpaphovetji. Jongsi pini arni Arnam kaningje alamthe along atiri pinchong pen ridunde, pulote lake athe kapathethe asailo. Nang ardom si, ningje nangji: “O Arnam! Ne Nangliphan nangkhamkhe, lapen ne Nangphan nangchitu nangji dopik; neke lam arju thekthepik, lapen mantune ta Nangphan ning pangsam thekthe. O Arnam, nephan Nangli nangraiji pusi ningkehang, ne mo kijut ahut anta Nangphan sai nangklempiji si ning kehang, ne Nanglipharman si kithiji ninghang. Nangli nephan nang’ingsai lapen adai nang’ennoi, lapen thangnat lamhoi kipiji ave; Ne Nangliphan nangkhamkhelo lapen ne kithi nangji apunlo, atheke kadokave amonit tame ne kithi along Nangli keklem kechoklim akun patheklong lonang.” Nang nangning aklong pen lapuson chardom lote, Arnam nangphan nangse arjupo, lapen nangphan nangja ponpo; jongsi nang pini Karjong Kangthir alamthe along atiri pinching pen chardomde, pulotangte Karjong Kangthir nangphan nangpaphoji puke ang-ang amatsi ave. Jongsi nang Arnam akemang ateng si chardom, lapen Arnam pini kopisi keklem kangtung ateng, nang ningjepo: “O Arnam! Ne Nangli nangkepaklemtoi asai dengji ninghang lapen Nangli nangketoi asai aphan ingthirjir pensi kroiji ninghang, lapen nekai arjon nangnong kethe apharman chipidetji ninghang, atheke ne keklem ason doan tame Arnam amonit along kedo nangji angdeng an kepaliji aphan. Nangli nening aphan nangpaphonang. Nangli Karjong nephan kaiketa nangpatheangji pusi nening kehang, ne keklem ason doan along Sobar nangli patherak’i aphan, kapadu ke nephan Arnam nangparidengdetji aphan.” Jongsi nang lapuson chardom, ihin pen lang lote Arnam akemang along pavaikangchen, tangte Karjong Kangthir nanglong phaphepin tame sai nangdengpo. Nang kardom along koan lamthe do-ave langdamde – amutpi alam ke nang Arnam akemang ripdam loma ripdamde. Nang la aphrang kipi ason pholaplo tahai: Ahut pen, muluk chingsom along kachardom ahut, Karjong Kangthir kerengsap ajakong aphuchong lerok titipo, kadokave ajakong ta thurdet titi. Ajahak amonit atum ke kachardom ahut kachiru junodak lapen mekkri chepabudet, Arnam athengno ningduk aphan chehai un’e si, lapen ajahak amonit atum ke mena alamrai si chepaklang, lapen seme tangji. Lapuson an pachekirla henlo Karjong Kangthir asai pen kepale damji puke. Pini, kadokave amonit tame aning Arnam along kachethokdun nangji karsiknai aporlo. Kedamtang arni kaningje alam along ke ning chibi’e nangnelo; jongsi nang kedamtang kopi kevang ason along ripbomlang, pulote Karjong Kangthir nanglong sai nangklemklelo. La koan kenangsotma theklongloma nang?
Pini arni Karjong Kangthir kedam atovar chinima nang? Athak kejong prekjam angthek ke pini lapen kevangji arni Karjong Kangthir pen kepapleng nangji asailo; lahei ke Karjong Kangthir pen kirim atovarlo, lapen mont atum kiridun nangji kilut adimlo. Nang chethe along kilut ahut, akijumnei ta nang nangning aphan Arnam alamthe along chidungphak nangji, lapen Arnam alamthe akangsai lapen adai ke’en dengthek nangji; nangning Arnam aphan kar’i padikrim nangji, nang ahokpet along harnukkrung an kilutji aphan klemnangji, lapen Arnam aphan kenangji aron-ateng chepalong nangji. Nang jongsi lahei ajakong dolo pulote, lasi paklangpo nangphan Arnam nangpapho’etlo pu, lapen nangning Arnam anat pangno tanglo pulo.
Ingthimlim pen nangning Arnam alamthe along kachethokdun henlo nang chethe along kilutdun kechengsi angdeng, lapen hini angdeng ke Karjong Kangthir nangkepapho kachechak. Karjong Kangthir nangkepapho pen kopi kachekirla si kelong nangji? Lake kechoklim ahokpet ason aphan kar’i padikrim, kachoningri, lapen akimi ason kiridunthek, lapen akeme ahin pensi Arnam pen chingki-chethan kachepame thek. Pini, nang Arnam pen cherap-cheribom, la kipuji puke nang kiridun, nang kardom, lapen nang Arnam pen lamthe kachepachoi along isi akemang dolo, lapen Arnam aphan kenangji ateng si nang mena arpu cheklemlo – la anvetlo Arnam pen cherap-cheri ke puke. Jongsi nang Arnam paklemnang pusi ningje, bonta mena ke thangnat asai dengde, kachardom tame kachoningri tame, laso ahut ke cherap-cheri pu punodakji. Jongsi nanglong cherap-chetoji angthek isibak ta ave, lapen akemang kedo kilutdun aphan aseke longdunde, tangte nang ke kacherapdun kalilo. Ajahak amonit atum ningje: “Ajat ason ta Arnam aphrang pen kisiktang atenglo, kadokave ta Arnam Amethang si keklem; jongsi Arnam le klemkle, tangte kosonsi monit atum kethekpo?” Arnam asai ke prekvi kali, lapen asapbak ta jakong thepo pen kepachun pu kali, lapen lake nangprangset pen kachoningri pensi Karjong Kangthir nanglong sai keklemji, atheke Arnam ke monit aphan toi bor’i’e – nang si Arnam aphan keklem avarsai pinangji, lapen nang ridunde lapen lutdunde, lapen jongsi nangning asapbak anta kar’i ave, tangte Arnam sai keklemji aphan asap ta varsai ave. Bonta nang kopi atovar kirip si Arnam nangphan nangpapholongji? Kachardom pen, lapen Arnam adung kapatebok pen. Bonta akenangsotnei ke, ning chibitha, lake Arnam kaningje alamthe atiri athak nangji. Nangphan Arnam nangpapholemdet lote nang ke nang’ok pen nangkebeng kalilo: Penan, piso, osomar, lapen tangka – lahei ke nangphan nangkebengji ajakong avelo, lapen nang ke ahokpet lapen Arnam athengno kedolongji si ningkehang. Laso apor ahut, nang inut jokvan angkang along kedo abang chemanpo.
