Pini Komatma Arnam Asai Kachini Abang si Arnam Aban Chemanlong Tahaiji

Arnam ahakhi kechoji aphan lapen thedung aHi-i hang’et ke’er aphan kapatherakji pulote, nanglong isi aron-atang dovek nangji, lapen nangphan ketoi ateng klemvek nangji: Alangtum aning arlo along Arnam aphan kanghon abang nangji lapen Alangli lamthe arlo lutvek nangji. Jongsi nang Arnam alamthe arlo lutledetlo pulote, nanglong ke Sobar aphan kapatherakji atovar avelo. Nang kai kachingthurbom pen ajok, nang thedung aHi-i hang’et ke’er aphan che’olo lapen laso aphuthak angton katherak vanlo; la’anchotlo ahokpet thedung aHi-i hang’et ke’er aphan kapatherak. Nang ko’anma Arnam alamthe ateng pen keklem-kedamji ningkehang, lapu’an sose akethe si nang Arnam aphan akanghon lapen nang thedung aHi-i hang’et ke’er aphan kelangselet angthek dopo; koanma nang Arnam alamthe ateng karju, lapu’an sose akethe si nang ahok aphan akar’i angthek dopo. Monit atum komatma Arnam alamthe heihui akar’idam kavedet atum anke chethe kavedet amonit atumlo. Lason amonit atum anke komatma Arnam alamthe pen angtan si dolo, komatma dhorom along ansi dolo. Monit atum komatma ahokpet Arnam aphan kekroi anke Alangli lamthe kecho lapen kejun pen ajok ansose ake’ongdung Arnam alam kachinidam dolo. Jongsi nang le Arnam alamthe aphan akar’idam avedetlo pulote, nang ke ahokpet Alangli lamthe cho-jun thekthelo, lapen jongsi nang le Arnam alamthe heihui kachinidam avedetlo pulote, nang ke Arnam aphan asat kelangji mate Arnam aphan aningkapangsamji pu tame ale avelo.

Arnam aphan kekroidun along, koson si nang Arnam aphan kachini nangji? Arnam aphan kachiniji pulote pini arni Arnam alamthe lapen asai ateng pen si nang langdam nangji, avive kisuithap mate kekroithap pen kalidet nangji, lapen, la kadokave aphrang, Arnam alamthe nang chinivek nangji. Lahenlo Arnam aphan kachini kechengsi anujokpilo. Lahei kadokave kekroithap pima Arnam alamthe doan akachini along ahokpet kijumdet anke dhorom akamathadam alamlo; lahei anke avive si suironglo lapen akechokchedet akachinidamlo. Dhoromi amonit atum ketheknei ason ke kedamtang ahut Arnam alamthe an kachinitang enponlo lapen pini lahei kachetonte Arnam alamthe pen kalakhapon henlo. Jongsi, pini arni a’Arnam aphan kiru-kethai ahut, nangphan kedamtang ahut Karjong Kangthir kepaklangtang akathe’ang alam si che’otthiplo pulote, nang keklem amo along kasiksak dokokpo, lapen nang akeklem-kedam anke aban chemandetpo, dhorom karcho amei pen anpar thangta kalidetpo. Jongsi nang kroilo pima komatma Arnam aphan kiru-kethai atum ke athak kacheklang chepabihek lapen ningkiding nangvekji, akaprek a’ot-adur angbong pen, lapen jongsi nang lason akachinidam ateng pini arni asai klemlo pulote, lason akachinidam kedo ke dhorom akamatha chotlo; laso ateng keklempon ke athikpet kavenei kachepaklang si chemanlo. “Dhorom akamathadam” pu alamseng kejongdam ke pima kedamtang lapen aban ahormu aphanlo (Arnam hako ahut kaningjetang alamthe lapen Karjong Kangthir ahin pen amat kepaklang akatheang kachinidun antalo), lapen jongsi lahei do’an le pini arni asai klemponlo pulote, lahei ke Arnam asai along kasiksaklo lapen monit aphan thangnat ale ta vanpipelo. Jongsi monit atum halahei ahormu amethang along pen chehekjok un’elo atheke dhorom akamathadam si dolo pulote, lahei ahormu ke alangtum Arnam aphan kiru-kethai along thedung kebeng-kephan si manpo. Monit atum dhorom akamathadam kedo anke Karjong Kangthir asai akengkam ateng pen kidun pemeji aphan un’elo – latum ke kengkam isi aphi si dopo, lapen hini dopo. Lake athema lahei dhorom akamathadam kedo anke monit aphan akechokpetnei lapen ane chepathepik abang si pacheplanglo. Arnam ke kopima Alangli kaningjetang lapen kedamtang ahut keklemtang ason aphan sengkimodam ajat ta chematha avelo; jongsi kopine aban ahormu pulote, Alangli ke la varchorlo. Tangte nang ahokpet nang kamathadamthap alam pen che’o thekthedetloma? Jongsi nang kedamtang ahut Arnam kaningjetang alam ansi pima che’otthiplo pulote, lake pima nang Arnam asai aphan chinidunlo pu angthek pujima? Jongsi nang le pini Karjong Kangthir kepatheang dengdun thekthedetlo, lapen alar ke kedamtang akatheang si otthiplo pulote, laso angthek ke pima nang Arnam akengbot si kidunlo pujima? Nang nonpu ta dhorom akamatha alam pen che’o thekthepinlangma? Jongsi lason alamlo pulote, nang ke komatne Arnam aphan kekhamkhedun abang si chemanpo.

Jongsi monit atum dhorom akamathadam alam che’o thekdetlo pulote, latum ke alangtum aphu tarlok pen le pini Arnam asai keklem lapen kaningje alam kalakhaji kalilo, lapen alar ke jasemet kroidunphitpo. Pini Arnam asai ke pima kedamtang ahut ason kali si cheklangdaklo puvoiphit tame, nang ke tebonta kedamtang ahut kethan alam che’odet theklo lapen pini jasemet pen Arnam asai kroidun theklo. Jongsi nang le pima nang pini Arnam asai aphan adim ningkangsamjin kipivek nangji chinidam thekthelo pulote, nang ke komatne matma alangtum kamathadamthap alam kache’otang abanglo, komatma Arnam alam karju, lapen komatma Arnam alam lapen asai ateng keklem theklo lapen Alangli kengbot humridun theklo. Laso along, nang ke komatma Arnam alam ahokpet kajuthek abang si chemanpo. Nang ke Arnam asai aphan kangsir mate kangchapji akenang avelo; lake pima Alangli aban sai Arnam chetengne’et tanglo pu asonlo, lapen nang ta, lason si, chetengne’et tanglo. Non kedobom ke non kedobomlo, lapen kedamtang anke kedamtang alamlo, lapen pini arni ke, Arnam pima atheke Alangli kedamtang keklemtang anke chibikok tangdetlo apot, nang laso along kedoji nangnelo. Lason abangphu ke komatma angton pen Arnam alam karjuthek lapen alangtum dhorom akamathadam alam angton pen kache’o tanglo.

Athema kaiketa Arnam asai along akimi keklem pachingthurpon dolo, laso asai ke pima akimi asai nangklanglo pulote kilittang lapen aban si chemandet titilo. Lahei ke prekjam ajat asailo, aban lapen akimi, anke lahinhin kachetonte lapu kali, bonta cherap rappetlo; asontin akengkam tame kijut along pen chengdunlo. Athema akimi asai dolo, aban ason anke, ahoklo, pave’etvek nangkokpo. Langpangbar sinang, ajahak hako pen kithirtang keklembom aron-atang lapen monit abe kedo kaningjever alam, penang an aningkan pen monit akachomat lapen kethan pen si cherappetlo, monit aphu tarlok along kadokave prekjam ason selamlo lapen kamathadamthap alam cheman’ilo. Pima Arnam ke Alangli ahok arje lapen kedolor akun monit aphan non si angton pen chepaklangjilang pulo, kangdangtang pen-pen, penang an aningkan damtanglo, abarim aron-atang hakoko akai ahut apot ke ansose si monit aphan lason kamunthidamthap alam kaselamji pajoithukelo. Lake pudammelo tahai pima, Arnam aphan monit akekroidun apor kedambom along, keprekjam kamunthidamthap alam abe kedo pen monit atum along Arnam aphuthak kamatha akachinidam do’an angthun pardunron si selambomlo lapen nangcheklangbomlo, atheke penang an dhoromi amonit atum komatma Arnam aphan kiru-kethai anke Alangli hotur si pachemantheilo. Lasi, kangtang muchot amonit atum dhorom akamathadam alam anke, ansose si latum Arnam aphan khamkhe, lapen ansose si latum anke Arnam ahotur chemanlo. Arnam asai ke kaiketa akimi lapen ban un’elo; lake kethan aron-atang alam pinchongchelo, alar ke angthun do si chelarbomlo lapen adang kethe mate kibi tame akimilep si dolo. Lason ateng pen asai keklem puke Arnam Amethang along kedolor akun kachethanpon pulo. Lake Arnam asai keklem aron kachibi kedolor asonlo, lapen atheke Alangli kisik-kedangpon Arnam kachepachunpon isi akronglo. Jongsi Arnam le lason ateng pen klemkledet lote, monit ke chelarledetpo mate Arnam aphan chininedetpo, lapen Sobar ke remredet khangjangpo. Lasi, Alangli sai along, angthun pardunron kachelar dolo sita kevangji alam ke pu thekthe, bonta atheke adak-adak pen chenam ta klemlo. Arnam aphan monit akekroi ateng pen pulote, bontame, chenam si prekchet. Alang aban ason si che’otthiplo, kachinidunlor kekroi kethan aron-atang lapen laso ateng keklem-kedambom alam, lapen ko’anma lahei kebanbom, lapu’an si lahei ke alangphan padengmemelo. Koson si kiludet amonit aphu tarlok, pima kithorthip arlong ason aphu tarlok abang ke puan kachinidam un’e Arnam akimi asai lapen alamthe aphan kedengdunpo? Monit ke Arnam komatma kaiketa akimiver lapen kebanbedet aphan aningdokdelo; alang aningkedok ke Arnam aban aphan anchotlo, komatma aso kidinglen, achu kelok’et, lapen elongvet adim along kedover aphan. Lasi, athema Arnam lapen monit angbong alangtum mena aningkedok chedorep apot, monit ke Arnam ahotur si chemanronglo. Penang an lahei kachetonte nonpu pini arni anta dokoklo, Arnam le ningkan suri throk lekai an akimi asai keklem kepangcheng apor ahut penlo. Lahei anke, tangte, kepamedetji un’elo. Chenam ta lake athema monit ane kachepatheoi apotlo, mate Arnam kelangchari ahukum madu amonit ta kangdi un’edet apotlo – bonta halahei pinso akurusar lapen nimarli atum anke nonpu tame angru kevangtang aban alothui lapen kot aphar do’an si che’otthiplang, lapu Arnam ke Alangli kepatangtelang kisik-kedang asai pen cheklembomlo, atheke Alangli dung inutnat ta Alangli kavedet asonlo. Lahei kachetontedet pen Arnam lapen monit aphan ahotur pemanlo puvoiphit tame, lapen ke la chepachokvet thekthedetlo tame, latum aphan Arnam ke lang’ut’elo, atheke latum anke non dolo lapen penap ave asonlo. Monit, bontame, nonpu ta alang akekroi lapen kamathadamthap alam si otthiplang, lapen lahei pen che’o’epinlang. Tebonta eson alam ke cheklangdak dolo: Monit le alang karjap adim pen suiselo puvoiphit tame, Arnam akengpak ke kaiketa damvoilo, lapen Alangli ke kaiketa Alangli karjap adim avarmon ateng pen chelarvoilo. Kepajutsi along, lake monit si komatma chedan jokplot pen haidetpo. Arnam, lasonsi, Alangli keparemdet ahotur kedoan angbong pen kethenei ahoturlo, lapen lake monit akhei atum kehaidet abanglo, haidet lapen kehaihedet tamelo. Komatlo Arnam pen chedan unji lapen kachepahaidetji? Monit akamunthidam alam tame Arnam pen si vanglo ason athema penang an latum ke Arnam asai keklembom ahutchit si mahangthekdunlo. Tebontame, Arnam ke laso apot le athema monit aphan kadiya kalilo, mate, anpartame, monit aphan Alangli kero pipelo atheke “Arnam aphan” angdeng pen angdeng ason-amung kaselam apot jasemet Alangli sai keklemchit ahut pima Alangli sai pen angtan saidelo. Alar ke, Alangli monit akamunthidamthap lapen aban, dhorom akekroidam apot aningdokdepik anlo, lapen lahei akamunthidam alam kechengsi keplang arni antame aningkachibiji pu mathaletledetlo. Alangli pima lahei kamunthidamthap alam anke Alangli sai pen si manlo puke kadokave dengdepinlo, athe monit kamunthidamthap alam anke monit pen si pachetaklo; alangtum atiri ke monit akamatha lapen aphu tarlok pen henlo – Arnam pen kali, bonta Sobar penlo. Arnam akemang ke kaiketa Alangli sai akimi lapen rengsap nangji pulo, aban lapen kithitang kalidet, lapen kopima Alanglilong kedo monit kirimdun akai lapen a’ove pen cheprekjamlo, lapen lake kai apar kai kalilo lapen chelar un’elo. Lake athema Alangli ke Arnam lo komatma monit aphan kapareng lapen akimiver kapaman, alar ke komatma monit aphan kapathi lapen aban pemanver abang ahi’i kalilo. Nangtum nonpu ta laso alam chininelangma? Nang Arnam aphuthak kamunthithap dolo lapen ke lahei do’an che’obup un’edetlo athema nang ke isi mathaket abang pinak apotlo. Lake athema Arnam asai along akechok masapsovet lapu kalilo, mate athema Arnam asai ke monit atum akar’idam pen akaprek suirong apot tame kalilo, mate, anpartame, lake athema Arnam ke kaiketa Alangli adeng kacheklem along kamathakrang lapu kalilo. Nang si nang kamunthidamthap alam che’o un’edetlo athema nang ke athikpet along jumpik anlo, lapen athema nang ke kasorjontang abang pu masapso tame aningchedokdedetlo; lake athema Arnam nangphan sungkrung ahormu si selamronglo pu apot kalilo. Nang laso kadokave ta pemanlo, lapen lake Arnam pen ajat tame kacherapdam avelo; kadokave akisung lapen kopai kelangno antame monit si pinchonglo. Arnam akamunthidam anke kaiketa mesenlo: Alangli ke nangphan pamunthidamthapji puke aninghanghelo, bonta nangphan kachelarji lapen arta kedambom along kachepamidunrakji aphan si ninghanglo. Tebonta nang ke nangphan kopima akeme chichininedetlo, lapen ke kaiketa ingsir mate ingchap ronglo. Lake pima Arnam le nangphan kisungkrung ason si selamronglo lapu kali, bonta pima nang ke Arnam aphan kangduk-kardom aman-apeng avedetlo, lapen nang kachingkinodak ke thepik anlo. Kibihek kasorjontang abang, ajahak masapso adeng pima atheke kedamtang ahut Arnam kipitang pen ane chepathe si, anke aphi chetevarlo lapen Arnam aphan si tengkheng’ilo – lake tangte monit akachingkinodak kalilangma? Monit atum, lake pudamdakmelo, Arnam angno alangtum abidi alam kaningjeji apun-achak plengplelo, lapen latum anke alangtum ardi kavedet, kanem’uihak, kithuvok, alam kapajirmithek’o angkang along latum aningkehang pen kachepaklangrenji apun-achak non anta kechokji jumheklang – halahei angru kevangtang kamunthithap alam kaningje ke thangnat ta kalilo. Latum ke tangte ansose si ardi kavelo kalima?

Komatma Arnam aban keman peme abang ke komatma Arnam aning aphiphi si hungdunlo, komatma Arnam ke’en’iji atheng kechok abanglo, lapen komatma dhorom akamatha alam anke kache’othekpet abanglo. Jongsi nang le nang Arnam alam kecho lapen kejunpon ke mesen chokvet nangji pu ninghang lote, nang dhorom akamatha alam anke nang che’ovek nangji. Jongsi nang le Arnam aban cheman ingtunglo pulote, lake ansose si aphrangsi dhorom akamatha alam anke che’ovek nangpo lapen nang asontin akeklem along tame Arnam alam arjuvek nangpo. Lahenlo kopima komatma Arnam aban keman abang kacheparidengvek nangji asonlo. Jongsi nang le laso akachinidam duredetlo pulote, nang aban keman pen amat si, nang ke kasiksak lapen kebeng-kephan dophitpo, lapen jongsi nang kamunthidamthap alam along si nang dothiplo pulote, nangphan ke chenam-chenum si Arnam nangparemdetpoo, anke puthot thur un’edetpo. Non ahut langdamnang, pangbar sinang: Penang an pini arni kaningjepon lapen asai anke Baibel lapen kedamtang ahut Arnam keklem asai ateng pen kachetonte dopiklo, lapen jongsi nang le karjudunji akar’idam avedetlo pulote, nang ke ajat apor ahut tame klovekpo. Jongsi nang Arnam aninghang ateng pen si aban kacheplangji ninghang dolo pulote, nang ke aphrangsi dhorom akamatha alam an che’ovek nangjilang lapen mena abidi alam chepakengvek nangpo. Ko’anma kopi si kaningjedamji anke kopima kedamtang ahut kaningjetang pen kachetonte saidepo, lapen jongsi nang le nonke kekroidunji akar’idam jumdetlo pulote, nang ke pima athengno kedo atovar along kengkam chejordun thekthedetpo. Jongsi nanglong isibak Arnam keklempon adichi le angkur chesaklo lapen nang la che’o’edetlo pulote, laso adichi ke nang dhorom akamatha alam si chemandetpo. Jongsi kopima Arnam nanglong angkur pachesakdetlo pulote, nang ahok longdun tanglo, lapen jongsi Arnam alamthe lapen ahok anke nang chethe kepamanji aphan unlo pulote, nang anpar ke Arnam aphuthak kamunthidamthap alam avelo. Komatma Arnam aphuthak ahok alam kachini atum anke thangnat kamunthithap alam lapen kekroi kethan aron-atang alam rimdundedetpo.

Lahei alam nang methang kacheroktokji aphan charjunon:

1. Nanglong akachinidam pen apot nang Arnam aphan kiru-kethai along kepasiksakdun doma?

2. Kopu’an dhorom asai aron-atang dolo nang arnivang akai along? Jongsi nang le athikpet abang pu kachepaklangchot pulote, laso kipudam ke pima nang kai the-dinglo lapen arta do tanglo puloma?

3. Nangle Arnam alam kecho lapen kejun ahut, tangte nang dhorom akamatha alam che’o’et nang unloma?

4. Nangle kardom ahut, tangte nang dhorom arong-aje karcho amei pen chekakdak unloma?

5. Tangte nang ke komatma Arnam ke’enponji atheng kechok abang loma?

6. Kopu’an nang Arnam aphan kachinidam along dhorom akamatha alam dodunlo?