Kapeklang angthek 3: Arnam Kisik-Kedang pen Angbong Anchot si Monit Jok Unji

Anuttin amonit amek angden along, Arnam akisik-kedang ke kachinidamdedet ahormu ason athe ke latum along pen Alangli kisik-kedang ke chepaprei’etlo pusi monit atum chemathalo. Arnam kisik-kedang ke Alangli jongjung asai pusi monit atum kamathadam lapen lake Alangliphan anchot alamlo – lapen lasi monit akhei ke Alangli kisik-kedang along chepeprekdunvilo. Lapuson pen si, monit akhei akejokji ke puthekthe lapen klardakde si mandetlo, lapen nonke ajat ta kali bonta kangtheidang ajor kave alamlo. Monit atum Arnam aphiphi kidun ke kejok kelongji aphan pulo lapen kemesen kemang adim kelutdun longji aphan pulo bontame alang ke Arnam kopuson si Alangli sai keklempon loma mathadunletle. Monit atum Arnam kopi si kemangdam doma lake mathadunkrang, mate alang kejok longji aphan kacheklem nangji tame mena klemkle. Lake chenam ta ningdukmemelo. Monit atum kejokji aphan ke Arnam akisik-kedang pen che’odet un’e mate Alangli kemangdam pen chekakdundak un’e. Tebonta monit atum Arnam akisik-kedang aphan thangnat ta mathathepin, lapen laso apot si Alangli pen kachehelo ajak nangbatbomlo. Laso pen ajok kejokji alam along kacherapklok akenangjivek aphuthak thangnat ta kachininepin amonit aphai si nangkebatbom manlo – lason ke kopi kapinchonglo, Arnam aphan kopi akekroilo, Kopuson si Arnam aphan karchopo, lapen do’olang – Alangli phiphi kidun thedung angdeng cherapdunji aphan. Lasi, itum non pen ke Arnam kisik-kedang alam chethan-chemum nangpo laso ajok Alangli phiphi kidun atum an Alangliphan kekroi lapen aphiphi kidun kopuson ma pu klardak kachini pemeji aphanlo. Lason keklem pen ajok anuttin abangphu tame latum kedam nangji atovar ansose kangvai kechoklim thekji aphan kerap longpo, pima hirjume kelongji aphan Arnam aphiphi kidun, mate kisungpik pen kejokji aphan, mate bang atum angbong karjapdongji alar.

Arnam kisik-kedang ke thedung puvoiphit tame, lake monit atum kachinidam ki’un’edetji lapu kali. Lake pipotma pulote Arnam asai kedoan ta Alangli kisik-kedang lapen Alangli monit akhei aphan kapajokji pen si cherapplang, lapen chethe, kereng, lapen monit akhei atum kijutdam adim aphan kamathadam do. Monit aphan lapen monit atum angbong Arnam asai keklempon, lake lason le pu tame, thekprong lapen ajor do peme. Monit atum lake theklong lapen chomatlongji, lapen lake kamathadamchot ason pen chehelovinglang. Monit jongsi Arnam keklempon asai kedoan dengdun thekthedetlo tangte, Alangli sai keklem ale ke kopi dolang? Lapen kopuson si lason akisik-kedang pen le monit aphan kapajokponpo? Keongdung Arnam aphiphi kidun pu atum ke koson si hirjume kelongjima lapen kisungpik pen kejokjima si chemathachot. Arnam asai lapen kisik-kedang alam le keklang lote, latum ke doklippo lapen angton aning kehang duredetpo. Latum kamathadam ke lason kanglentham aphuthak kachinidam ke alangtum akai chingthurji aphan akerap longlelo mate thangnat ale ta avelo nangkipiji. Laso apot si, latum Arnam akisik-kedang arjulonglo puvoitphit tame, latum masapso si arjudunchotlo. Kopine anam kesodak ra kedengmeme ason pu lake latum langledetlo, alangtum akai along lata esonlo pu latum kachodeng jumthu muchetlang. Lason amonit atum Arnam aphiphi kidun ke joike pen kemangdam isinat, lapen halaso akemang ke hirjume kachodengji aphan. Lason amonit atum ke laso akemang pen kacherap’lok kave ason doan aphan ke ardi kipiji anta mathadamletlelo. Latum aphan ke, ahirjume kelongji aphan pura Arnam aphan kekroidun pen anpar ke akaprek akemangdam kechoklim avelo – lake alangtum akekroi ardi amat si lahenlo. Laso akemang along jongsi ajat tame cherapdun ave te, latum laso pen kachelar kavedet si dopo. Lapuson henlo ongdung amonit atum pini arni Arnam aphan matmat si akekroi kedoma. Alangtum akemang lapen kamathadam choklim tahai asonji, athema latum Arnam aphan kroi, latum Arnam aphan apor chipiji, Arnam aphan si mena chehodaidetji, lapen alangtum adeng cheklemji. Latum ke alangtum ariso aphan che’obupji, hemtun lapen kacharli amo che’oji, lapen mena aphan apor chepasikjik si hem pen angtan kahelo aningkan anbak padamjuiji. Kapadusi akemang adim kapaledamji aphan, latum ke alangtum mena ningkehang, alangtum chethe aphan kelangdam, lapen ke latum kiri akrong antame chelarji; tebonta alangtum Arnam aphan akekroi kemangdam ke latum chelar un’e. Alangtum mena jongjung akethek aphan akisik-kedang si latum klemponlo; jonghe le atovar helopik pu tame mathathelo, lapen koan ma kisung lapen kechaknap jonghe le do pu tame la tovar ajak dingpi, latum sangse si dambomji lapen kithi aphan phererepin. Labangso atovar along latum aphan kopi ajakong pen ajok si amena le sangsepin apor kachipilo? Alangtum keme-kaheno kamathathek apot ma? Alangtum kethedung lapen kechoklim asema apot ma? Alangtum mo kepajut anta hi-i ajakong aphan kachedanji aning kachepaningdingthek apot ma? Alangtum akekroi pen anong’e rirepin si Arnam apharman ahakhi kechothek apotlo ma? Alangtum athikdut pen ajok Arnam aninghang kapaplengpiji aphan ajat tame mena kachehodaidetji pu kedo apot ma? Mate alangtum karjong kangduk-kardom pen kaike ta methang akenangji aphan ke tangka kapadamthapthe si chehaiunbom apot ma? Komat ma Arnam kisik-kedang asai aphuthak kachininepin kedo abang puan kachipi pulo tangte, kejoike pen ke, manghumemelo! Nonmat ke, laheihui amonit atum kopuan si kachipi ma chingvai damdedet lonang. Alangtum aot-adur, chenam si, itum kangsirdam pen ke ingtuiving ador kedolang. Latum pen puan chetebokhet kacheraplok ale heihui pen anpar ta, esonbak athe dojilang ma kopi apot si Arnam aphan kachininepin amonit atum le lapuan Alangliphan kachipi ke? Laso along, kedamtang ahut kapangthek thekthedet akisung si netum longlo: Monit atum Arnam apen akachepho kedo ke thangnat ta kali thekdak mena ale aphan isinatchot. Laso akachepho ke kachodeng abang lapen hirjume kipi abang angbongchotlo. Athak langprui pen bilo te, lake saikhi lapen sai kipi abang angbong akachepho pen cheprekprelo. Saikhi abang kachongdatdun ke sai kipi abang kithikpi anong’e kachodengji aphan anchotlo. Lapuson akachepho along ke kachinghon amat si ave, lake kejor-kenam puchotlo. Lason along ke kachinghon ave lapen kanghon longji puta kali, kerapdun lapen kangjinso puchotlo. Lason along ke kachinidam ave, keberthipji pu aningkithi lapen kachongthui puchotlo. Lason along ke kachemesen avelo, lahinhin angbong kachetonte ahoi kilit un’e puchotlo. Nonke haahei ahormu laso angdeng along an nangleroklo, komat si lason akrong kelarphit unjilang? Lapen bang koan amonit atum si laso kachepho koan aketerlo kacheman pu ahokpet kachinidam kedo? Ne kroidamlo pima monit atum le hirjume kelong apot ningkacheparong along si mena lut’it anlo tangte, madu tame koan katherakmeme lapen aketer loma lapuson Arnam pen akachepho ke chemathadam un’e.

Monit akhei atum Arnam aphan akekroi ningdukmemenei ason ke monit atum Arnam keklem asai angbong si amena kisik-kedang aphan si chepatherong lapen anpar ta Arnam kisik-kedang aphan masap ta ardi pidundedet. Monit atum kethenei kechokche kedo ke kosonlo, ephongvet pen si Arnam aphan kachehodaidetji akar’i lapen Alangliphan karchoji henlo, monit atum ke mena kemesen kemang adim keleji aphan kacheselam lapen kopuson si thedung ahirjume kelongji lapen kemenei kemang adim keleji aphan joijoi pen kachisikdam. Latum aphan koan akangjinsomeme, kroimeme kalidet, lapen ningoimeme pule chinidet puvoiphit tame, bang koan atum si alangtum kamathadam kechok lapen ningkethe kache’obupji aphan chisiktang dopo? Lapen komatmat atum si alangtum mena akengkam pasangkok unji lapen mena aphan kachemathachot pen chekhang unji? Arnam ke Alangli kisik-kedang kapatangji aphan Alanglilong kajalangdun peme atum aphan si kenangpo. Alangli kisik-kedang asai keklem along alangtum aphu lapen abang kedoan kangduk-kardom pen Alangliphan kachipidet atum aphan si Alangli ke kenangpo. Alangliphan arnivang ta alangtum ari hongni pacherop pen kachohangver titi amonit atum aphan anke Alangli akenang avelo, komat ma masapso si kipichot atum lapen nong’e kelongji si kachonghongding atum aphan akenang aveongchotlang. Arnam ke masapso kacherapdunchot lapen ke alangtum anong kacharjuji si chonghongprong atum doan aphan langseletpik. Alangli kisik-kedang asai along aningkehodun keresakjak amonit lapen sining hemrengme kidunji lapen hirjume kelongji aphan kaningjechot titi atum doan aphan Alangli langseletpik. Monit akhei aphan kapajokji pu Alangli asai keklem kapaklangbom avarsai kipi along komatmat ma ale kacho’endun atum doan aphan Alangli aningkedokde theneilo. Athema laheihui amonit atum ke kopima Arnam kepalongji pu akar’idam lapen Alangli kisik-kedang asai pen kapachunji pu along chelanadundepinlang. Latum kachinidam ke kopuson pen si hirjume kelongdunji aphan Arnam keklem asai avarsai kipi pen kacho’endun thekjima pu anchotlo. Latum ke Arnam aning aphan mathaletle, alangtum mena mohut kopi chemanji ma lapen alekha aphan si angton pen chipidundetlo. Arnam kisik-kedang asai along matmat si aningkehodun lapen kopuson si Arnam monit akhei aphan kapajokma pu masapsonat ta ningkehangdun kave lapen Alangli ninghang aphan ke alang mena kopima ningkapangsam keklem pu langdam lote Arnam kisik-kedang asai pen che’obup tanglo. Alangtum aot-adur ke ningchibibedetji lapen ke Arnam dengdedetji – lake ningingsamjet pen Arnam kelangji puke durepiklang.

Somindar adang ajam kethepik along, kalakha un’e api do’an ta rengbom lapen aso phibom, kai ke kartingvoi kongtolong adang ason aron ateng si dambomlo, lapen laso aron isinat along si thirthip pen dolo. Komatmatma kithi atum do’an ke kereng ahut atomo latum cheponlinlo, lapen matmat si kerenglang atum do’an ke hala komatmat si kithitang atum do’an ningdukmeme aphurkimo kepho ateng si chemandun lethotlo. Lapen lasi, monit akhei ke cherap thekthe bonta mena aphan kacharju: Kopi athe si itum kerenglo? Lapen kopi apot si itum kithi nangkok’lo? Komat si bangso apirthe aphan chejalo? Lapen komat si monit akhei aphan kapinchonglo? Monit akhei aphan chenam ta pirthe epi varmon pen si pinchongma? Monit akhei atum mena alekha che’otthip binong ma? … Laheihui akarju henlo monit akhei atum sangsepin pen aningkan suri pen karjupon. Kopai kelangno, monit koan ma laheihui akarju pen kachephoklok kedo, lapu an si alang sonthan aphan kang’it chemanbom tanglo. Sonthan ke masapso akedome piji lapen alomsonat ok aphan ningrong piji, bonta inutvet kedoji ninghang, jirpo-jirpi kavepin pen monit aphan kapajokji pu kedorphlup ke helovinglang lapen kahurisei ke un’an ke dipjoilo lapen keboidet ke alang akarjong aklong si dolo. Monit akhei atum sonthan abidi ke’enpon ke alang mena amek renglor pen kethek’long lapen alang aphutarlok pen kachinidam apot masapso aning kaparengmeji aphan anchot. Tebonta lason sonthan abidi kethek pen ke monit akhei atum kamanghumeme amung kiriji khang un’e. Monit akhei atum la somindar adang along kedo’an ahormu Kacheja abang komatma, anparta monit akhei kecheng lapen mohut aphan kachinine duremulang. Monit akhei ke pusi rengdunlo, akenang ateng, laso aron angbong dolo. Madu tame chepajok un’e lapen madu tame kelarji un’e, pima kadokave ahormu pen lapen sining hemrengme along bonta Inut si chepahemphu ponlo asontin aphan non pen jutjepin kai apar kai do’an. Alangli henlo Inut abang monit atum nonpu ta kethek’longlelang, monit akhei atum kachinine abang la Inut henlo, monit akhei atum kerengbom along kekroikredet – tebonta Alangli Inut henlo monit akhei atum aphusar-phisar aphan chethe kivut lapen monit akhei aphan chethe pilo. Alangli Inut henlo monit akhei aphan kapador lapen kelanapon, alangphaan kaparengdunlong; lapen Alangli Inut henlo monit akhei aphan non pini arni an nangkejapon. Anpar tame, Alangli lapen Alangli Inut aphan henlo monit akhei atum kerengdun unji pu kachikidam. Kadokave ahormu tame Alangli si chepahemphu ponlo lapen somindar adang kedo’an kereng api aphan langcharilo. Alangli si son phli abotor aphan toilo, lapen apor ahut tomon, ar’e, herai, lapen arve Alangli si phaponlo. Alangli si monit akhei aphan arni atur pilo lapen ajo kejapon manlo. Alangli si sining lapen longle pinchong tanglo, inglong, langbi, lapen langroi do’an pen monit aphan padorlo lapen laso along kereng ahormu kedo’an pajirlo. AAlangli sai amo ke nahok ta do, Alangli jakong ke nahok ta do, Alangli akethek-kere nahok ta do’et, lapen Alangli kachepahemphu nahok tame do. Laheihui aron lapen atang do’an tame Alangli sai amo pen abidi saidelo, lapen asontin tame Alangli kethek-kere lapen akachejapon cheklang peme. Komat si amethang aphan Alangli kacheja pen chepajok unji? Lapen komat si amethang aphan Alangli kaselamtang angbong pen che’o thekji? Asontin ahormu tame Alangli kelang pangching aber si do’etlo, lapen anparta, kadokave ahormu tame Alangli kachejapon arum si dolo. Alangli sai amo lapen Alangli jakong pen monit akhei aphan ke ahokpet Alangli chenam ta do lapen angton ahormu tame chepahemphupon pu kapachoroji si padokok’lo. Alangli pen anpar ke madu tame bangso somindar aphan chotoi un’e, monit akhei aphan jutjepin kapador ki’un abang ave muchotlang. Nang le Arnam asai amo chinidun chinidunde tame, lapen nang le Arnam along si kerengdun pu akekroi do ta ave tame, Arnam si nang lekha ke kithiktanglo pu thek’lorlo, lapen kadokave ahormu do’an aphan Arnam si kaiketa chepahemphuji pu tame chini pemelo. Alangli kedo lapen kachepahemphupon ke latum pangthek lapen monit atum kachinidam peme-pememe apot pen le kipudam kali. Alangli anchotsi monit atum chuhut, nonhut lapen mohut kachini, lapen Alangli anchotsi monit akhei alekha thanthekji. Nang le bangso ahok alamm deng unji-un’e pu tame, lake monit akhei atum alang mena amek pen lahei kadokave kethek’longji arjidingdelo, lapen lahenlo ahokpet lake Arnam prapjin pen kapaplengponji. Monit akhei atum Arnam amek aber si renglo lapen thilo. Arnam kisik-kedang apharman si monit renglo, lapen alang mek kapadusi apor ahut selok’lo tangte, laso kisik-kedang aphan ajoine latum amek selok nanglo. Monit atum vanglo lapen dambom lapen dambomlo, vangle-chiruilelo. Akaprek kalipinlo, Arnam akachejapon lapen Alangli kaselamtang ateng si dolo. Arnam kisik-kedang ke jut un’e; lake sangsepin si paphrangbomlo. Alangli do pu monit akhei aphan Alangli ningpachibiji, Alangli kachejapon alamm pakroiji, Alangli sai amo pathek’longji, lapen Alangli chepahemphu arat along pachedamthuji. Lake Alangli kemanglo, lapen ningkan suri sose pen laso asai Alangli kisik-kedangponbomlo.

Arnam kisik-kedang asai kepangcheng ke pirthe kapinchong ahut penlo, lapen monit ke bangso asai along atiri along si dolo. Arnam kadokave ahormu kapinchong ke, lake lason le ningje tame, monit apharman ajoinelo. Athema Alangli kisik-kedang asai ningkan suri sose padamlo lapen laso kapachun ke minute mate second apor angbong kali, mate emek sirip pen puta kali, mate ningkan isi mate hini kali, Alangli monit akhei kerengji aphan kenangsot ke’ongpi ahormu kapinchongnang, lahei ke arni, chiklo, kedo’an kereng’et api, kecho ason, lapen kerengmejir avarmon. Lake Arnam kisik-kedang kapangcheng ponlo.

Laso aphi, Arnam monit akhei aphan Sobar arideng hodaidetlo, lapen monit atum Sobar kacheparideng angkang si dodun nangkok’lo, laso pen si Arnam asai kecheng akai pajo pen manlo: Aron Akai ahut atomo… Aron Akai ahut ningkan suri suri sose kedo pen, monit akhei atum Aron Akai ahut akethan-kepare si ningchibithiplo lapen laso kechok pu kroithiplo. Pajo pen, monit atum Arnam akelana che’obomlo. Lapen lasi, aron kekroi unbom ahut, latum kumlin aphan archolo lapen kahenodak asai amo klempondetlo. Latum ke Jehovah akerai pen kalidetlo, lapen kardomhem adovan along kerengchot akai si alangtum dolo. Ahokpet ke, Arnam asai latum along pen ke’o arjiding’olo, lapen Israel aso bangso aron along si nonpu dobomlang tame, lapen Jehovah amen ningjelo tame, lapen latum anchotsi Jehovah amonit atum saidelo pu ningtheklong pen kroidam tame lapen Jehovah kangvaitang atum lo pu, Arnam anongthe ke latum along pen che’ojoilo.

Arnam le Alangli sai klemlote, Alangli kaiketa joijoi pen elong adim che’osi ingsamjin pen akaprek akimi sai pangchengponji. Alangli akaprek adim nangpangchengji. Lake monit atum kekroidam un’edet ason si manlo, matmat si kamathadam thekthe atumlo. Monit atum kaiketa aban an chebirtivet lapen akimi si dengdun, kachini pememe ahormu aphan ke kelang un’elo mate aningkedokderem pen si laphan langji. Lasi, ajat le Arnam akimi asai dengpon sita, ha kecheng pen mo kejut an tame, monit henlo kejutsi kedo’an ahormu angbong pen, kachiniji.

Lason si kaiketa chemanbomlo, Aront Akai ahut Jehovah asai klemdet pen aphi ke, Arnam Alangli akimi asai adunthu angdeng along pangchenglo: ok aphan langpon si – ningkan kep-ingkoi an monit ason nangcheparje si vanglo – lapen thanbomlo lapen Alangli sai kekroi amuluk angbong klembomlo. Tebonta kapadar avepin pen, madu tame chinine, lapen kijumhek amonit atum si Hemphu Jisu aphan thengparpan athak sakdet lapen kithi pen thurthudet aphi si ok nangcheparje Arnam lo pu chinidamchot. Kesung alam abang ke, Paul pu inut nangklanglo, Arnam aphan kelang un’e si amena chemanlo. Alangphaan paphoset lapen arisangho pamandet aphi antame, Paul ke alang aban aot-adur chelarledetlo, lapen alang Arnam pen kachedanji atovar si kaike dambomlo. Alang keklembom halaso apor ahut, Paul penang an alo tokponlo; kopai kelangnolo, aphithu aove atum ke alang ketok alo aphan si Arnam alam saidelo pu dengronglo, lapen lahei doan ke Kejok Alo Kimi along anta thappon’etlo lapen Arnam kaningje alam pen pamanghu’etlo. Labangso ketok alo nangkeklang pen ke kadokave katherakmemenei si chemanlo! Lapen laso kechokche keklemdet ke monit atum akilu ta kilitnei apotloma? Masapso anchot si latum chini pima, Kangjinso Akai ahut Arnam asai keklem alam ketok, lo ketok mate monit aphan karjong alam ketok ke chenam si laso asai lapen Arnam alam heihui aphan kachongthui pen kalidet nangji. Bonta lake kachethanbom alam pen akapreklo, lasi itum ahokpet athepi along le chevangthu lonang. Arnam asai adunthu angdeng patangdet pen aphijong – thengparpan athak pathidet aphi – monit aphan pap pen kapajokpon Arnam asai (lake pudam lote, Sobar arideng pen monit aphan kapajokponlo) pachunlong pemelo. Lasi, halaso apor ahut pen tangte, monit akhei atum ke Hemphu Jisu aphan si Kapejok abang pu dengpon nanglo, lapen alang pap do’an tame kadiya longpo. Amen penle ningjedamlo pulote, monit aphan heihui ke alang kejok kehai lapen Arnam angno kevangji aphan akekhangthip ave tanglo, lapen Sobar le monit aphan amutpi ke’otthip along pen tame do jokplotlo. Lake athema Arnam amethang si ahok asai pachunlo, pap pen keplengset ok asonthot lapen kethanmek chemandetlo, lapen Arnam amethang amat si pap athok ajirlo. Lason pen si, thengparpan pen monit nangsunlo, lapen pajokponlo lapen Arnam ok kacheparje pen si jok’lo – laso pap plengset a’ok asonthot penlo. Lapen lasi, Sobar along kachingnangdet pen aphi, monit atum Alangli akejok Arnam angno kedengji aphan kengkam isi anke vang si patebok’lo. Chenam ta, laso angdeng ke arnukkrung lapen Aront Akai ahut Arnam kisik-kedang pen anpar pinchong memulo.

Lahenlo Arnam akisik-kedangdamlo: Sobar arideng monit akhei aphan kapajir – Arnam kopima pu kachininepin amonit akhei atum, Kapinchong abang kopusonlo, Arnam aphan kopu si karchopo, mate kopi athe si Arnam along kachehodaidampo – lapen alangphaan Sobar kaphangnoji si pek’lo. Isi pen isi, Sobar arideng pen monit aphan Arnam nangchepajokthulo, monit atum Arnam aphan archodet lapen Sobar aphan panungdet aphi an. Lahenlo Arnam kisik-kedanglo. Lake isi thansera atomo ason nangnak tahai meme, lapen lake manghudetji meme ason. Monit atum laso thansera atomo aphan kamatha ke athema monit aphan kopuan si kedamtang koan lone aningkan ahut kecheplangma lahei masapso ta latum chinidamde, laso somindar adang kethe along kopuan lone atomo nangkeplang latum kachinine jum muchotlang. Lapen lason apot si, athe ke pima hormu-hortar apirthe pen anpar angtan koan lone kamanghumeme, koan lone kapherememe apirthe dolang pu latum chorodam thekthedetlo, bonta alangtum kereng’ak amek si latum aphan pathek’longledetlo. Laso pen monit aphan kapachinidam un’edet si pachemathalo athema monit ke Arnam monit aphan kapajok akenangsot alamm mate Alangli kisik-kedang asai akenangsot heihui monit atum chinidundedetlo, lapen kopuson si Arnam monit akhei aphan kapajut si ke aningkehang doma chinidam pememedetlo. Tangte lake Adam lapen Eve atum ason, Sobar kaphangnonepin puloma? Kali! Arnam kisik-kedang akemangdam ke mat si Arnam aphan karcho lapen Alangliphan kachipidetthek isi asanchom amonit atum aphan si kenangji. Laheihui amonit atum aphan Sobar le phangnotangdetlo tame, latum Sobar aphan alangtum apo pu chelanglelo; latum Sobar aphan aningkedokde arje si pangthek’lo lapen langseletdetlo, lapen latum Arnam angno vang si Arnam akangsai lapen ado kipi denglo. Latum kopi si aketer ma pu nangchinilo lapen kopuson si hala akangthir pen kacheprek doma chinilo, lapen Arnam akethedung aphuthak lapen Sobar akehenopik alamm pangthek longlo. Lason amonit akhei atum ke lake Sobar apharman sai klempipelo, mate Sobar aphan archochelo, mate Sobar aphan man-peng along bibelo. Lake athema latum aphan ahokpet pen Arnam kedengpontang isi asanchom amonit atum saidelo. Lahenlo monit akhei aphan Arnam kisik-kedangdam akenangsot alamm. Arnam kisik-kedang asai keklembom halaso apor ahut, monit akhei atum Sobar kaphangno lapen Arnam kapajok along ahormulo, lapen monit ke athe Arnam lapen Sobar atum kachedan-kachithiver ahormulo. Arnam le Alangli sai cheklembom ahut, Alangli monit aphan tame pajo sita Sobar arideng pen nangpajokponbomlo, lapen lasi monit atum Arnam adung kevang nangtebok longlo …

Lapen laso aphi ke Arnam Arat Akai vanglo, lake tangte ansose si keklem keklangbom angdenglo, lapen tebonta lahenlo monit aphan kedengji kisungneilo. Lake athema koan ma monit atum Arnam along kapatebok, lapu ansi monit along Arnam angchin nanglepo, lapen ansose si Arnam arje klardak pen monit aphan cheklangponpo. Monit akhei aphan pap pen kapajok aphi pen ke, monit atum ahokpet pen Arnam ahemtun isi along chelepo. Monit atum kamatha pima non henlo ningkarong kachipi nangji aporlo, tebonta alang ke Arnam along pen abang athengno arengkeso kephoji abanglo, madu tame kelangdammek ki’un’det asonthot si chemanpo: Laso cheklang lote, lake langkaparbiplo athe ke Arnam amonit atum “ningkarong” kachipi nangji. Lapuson kelangdam ateng pen, monit atum akaprek atovar avelo bonta sangkok si lapen mena aphan kachemathaji, “Ne ke hala penang an aningkan pen kangbodet abiresak Arnam le kenamthuji pu apor kachepadam abanglo, lasi kopi apot si Arnam nephan lason le nangviloma? Lason pen henloma nephan Arnam nangkangnek, lapen nephan nangkepaklang loma? …” Aningkan damtangdet aphi, monit ke ruhup si chemanlo, kapaklar lapen ado kipi akisung tame chechaklonglo. Monit atum kedamtang apor ahut “anongthe” lapen “ningrong kachehok” chepangbodetlo tame, alanglong, chininepin pen, monit atum akamathadam alamm kapinchong chinidam longlo, lapen Arnam aningkan koan pen monit akhei aphan kapajokji pu kangduk-kardom apot chorodun thek’lo. Monit atum pajo pen alang methang kahenodak aot-adur aphan chelangseletlo. Alang koan si ahir kedojot ma alang chelangseletlo, kado’kave alang Arnam aphuthak kachindamthap kedo’an tame, lapen Alangliphan thakbakbe alang kehangthap do’an apot ningchedokdelo. Apor aphan kea phi nangpachiruithu un’elo. Kedamtang alammo do’an ke monit atum ning pen chepatemodam anchotlo, lapen ke Arnam alamm lapen akanghon pen ajok monit akimi akai aphan kepaphrangji ajakong chelongpo. Monit amek arni pen arni meponbomlo, alang ajakong chelongthulo, lapen alang thurphlut si lapen Jakongthepar arje aphan langlo… Alangli nehin si kaiketa dolo pu kapangthekdam aphanchot, lapen pima Alangli akangnekhing lapen Alangli kemepik arje pen apot nonpu anta nangpaprangset. Alangli kapinchongvek amonit akhei aphan Alangli ning nonpu ta do’everlang, lapen ha kecheng ahut pen atengthot si Alangli ri hongni tame nonpu ta ingduk’op lapen ingtangkringverlang. Lake pulote pima monit atum Eden abiri along kachedamthu asonlo, tebonta non aphong ke monit atum kapamanghuthekdet aphurui alamm arjujelo lapen Jehovah arje aphan anpar ke panungkukkedetpo. Monit atum Arnam angno kengphu pangtongruilo, Arnam kangnekhing arje aphan si angsong langlo, lapen alang anam kesonei athok-ajir si chipilo – Oh! Ne Hemphu, Ne Arnam!

Arnam akanghon lapen akangjinso si Alangli kisik-kedang asai along asontin alam doan tame pachethanglo, lapen Arnam kemesen akamathadam aphuthak monit atum chini-chinine pu tame, Alangli ke chepedukkrup si Alangli kapapleng pemeji aphan ke sai klembomlo. Arnam kisik-kedang aphuthak kopuan si monit atum kachini-kachinine dolo pu tame, kerap lapen ale heihui monit apharman Arnam asai pen ajok kevanpi doan ke kadokave ta choro nangkok. Athema, labangso arni, Arnam pen kipi akanghon lapen achethe asontin tame nang chemathathedetlo, bonta nang Arnam aphan che’obupbetik lapen nang ahok aphan kiri kachepaningding along kelak avetik ke, lapuson arni nangleji pima Arnam akangnekhing nangphan nangpachini longji. Pima Arnam kisik-kedang asai akemangdam ke monit aphan Sobar kachepahemphu along kedo pen kapajokji pu henlo, Arnam aphan kachedan lapen Sobar pen kaphangnotang amonit atum doan aphan kache’obupji kali.

Chiti 23, 2005