Kapeklang angthek 2: Kedo’an Monit Akhei Alekha Arnam si Kachari

Monit akhei along inut abangphu lapen inut kekroithip aKhristian lo apot, ilitum arpulo lapen ilitum kedengvek nangji asailo ilitum ining lapen ebang Arnam kapaklemtoi asai along kachipidun ke, atheke ilitum akhei do’an ta Arnam pen si kevang, lapen kedodunbom lake akero pinangji Arnam ajakong aphan. Jongsi ilitum abang lapen aning le Arnam kapaklemtoi asai apharman kali lapen monit akhei kaike kechoklim aphan le kali, pulote ilitum akarjong ke Arnam kapaklemtoi asai apharman apran kedamnang atum apharman a’ot kali, lapen ansose si Arnam, itum aphan kadokave ason nangkipi abang apharman kemanji a’ot kali.

Arnam si bangso apirthe kasorjon, Alangli si bangso monit akhei aphan kasorjon lapen, anparta Alangli henlo kebanpik Greek ajutang lapen monit atum akedo-kedam ahamphang kereng lapen nangkechan kethip abang. Arnam anutvet si bangso monit akhei aphan aningkapangsam, lapen Arnam anutvet si bangso monit akhei aphan ajo-anarlo ta kalana. Monit akhei nangkeplang lapen Arnam ajakong aphan pachekak un’e, lapen monit akhei aphurkimo lapen kevangjilang arni alammo anta Arnam kaselam pen angtan kalipinji. Nang jongsi ahokpet aKhristian, tangte nang kroivekji isi adet mate alongri keplang lapen kivir keman ke Arnam akaselam atenglo. Arnam anutvet si isi adet mate alongri alekha kachini, lapen Arnam anutvet si monit akhei kedam akrong kachari. Jongsi monit akhei le kemesen alekha ar’i, jongsi isi adet le kemesen alekha ar’i, pulote monit atum Arnam athengno ingkup si ardom nangpo, chekubir lapen chingduk nangpo Arnam athengno, kalite monit akhei alekha lapen keleji adim ke kejok un’e thedung kanahok’lo.

Noah telongthepi kekim apor ahut an aphi chelangtha: Monit akhei aning keter arnukkrungpik, monit atum Arnam ahirjume pen cheterekjuilo, Arnam ta anpar ke lananedetlo, lapen Arnam aseme anta chepangbotheilo. Alangtum akangting along si dolo, Arnam akatheang avepinpen. Anpar ke alangtum a’ot-adur kememe nangmandet amat amethang si kachepatu pen kelangrem along che’odamkok’lo. Lason amonit atum anpar ke Arnam aseme dengdun longlelo; alangtum Arnam araje kelangji aphan a’ot kalidetlo, mate Arnam ase karjuji aphan, atheke alangtum Arnam aphan o’etlo, Alangli alangtum aphan kepajir ason do’an saivetlo, lapen Arnam kethan-pare alamm do’an tengne’etlo. Alangtum aning Arnam pen akahelo anat si dambom-dambomlo, lapen lason chemanlo, alangtum do’an ahokpet ason lapen monit a’ot pen apar kelang pangkre chemanlo, lapen kebatbom kapahi’i si chemanlo. Anpar ke alangtum dambom si kithi along patebok damlo lapen Arnam akangsai adai lapen aningkithi angkang along jangdamchok’lo. Noah anutvet si Arnam aphan kardom lapen hi’i aphan kedengde, lapen laso ajoine si alang ke Arnam ase lapen Alangli kepinkhat alamm arju longlo. Alangli Arnam kapinkhat alamm ateng si telongthepi kimlo, lapen hadak kereng’et api do’an pangrumlo. Lapen laso ateng si, ephong kadokave sik-dang ketang pen, Arnam monit apirthe along nangtoilo Alangli kaphalangno ajakong. Noah lapen alangli hemtun bang-throksi ansi halabangso kaphalangno ajakong pen jokdun chotlo, atheke Noah ke Jehovah aphan ardom lapen hi-i aphan dengde.

Nonke nonhut akai aphan langtha: Noah ason ahokpet abangphu, Arnam aphan ardom lapen hi-i aphan kedengde abang, pirthe along kedo ingtonkok’lo. Sitame Arnam ke labangso monit akhei aphan chinghonpik lapen non an kijut akai ahut ta alangtum aphan pangromponbom. Arnam ke Alangli kacheklang aphan kachonghong atum aphan kirilok. Alangli ke komatsi Alangli se akarjulong abang atum aphan kirilok, komat si Alangli kepaklemtoi ase katengnene lapen aning lapen abang Alangliphan kaike chingpuding. Alangli kiri komat si Alangli thengno oso thi’i ateng lamm kekroi, lapen Alangliphan chesongse. Jongsi nangle nangmethang aphan Arnam arideng chepek, thangnat ajakong lapen atoi pen kechaknap avepinpen, tangte Arnam nangphan ale nangpado pen nanglang ponpo, lapen nangphan Alangli hirjume nangchipipo. Jongsi nangle inut ingtuiving kedo abang, man-peng thedung abang, thek-reset lapen kachini ason do’o abang, kacheparengme aphan dopik ason ahemphu, lapen ongdung amonit nang archakdun, sitame lahei ason nangphan Arnam athengno vangpen Alangli se karjudun lapen Alangli nangkepaklemtoi asai lapen Alangli nangpen kenangji asai kedengdun pen nangpachingrai un’e, pulote nang keklem ason do’an ke pirthe along apun kechoknei asaipo lapen monit akhei pen ahokpetnei asai angdengpo. Jongsi nangle nangmethang anghoi lapen methang akemang apharman Arnam aphan dengde, nang keklem ason do’an along Arnam ahirjuno longpo nangpen nangdengdundelo. Nang inut meiphu kethe tahai, inut sonthankuru, inut pastor, mate inut akleng abang, bonta nang saihem anghoi jonghe ingtui tame, jongsi nangsai angdeng along nangmethang kachini lapen kethek aphan si chikilok, pulote nang kaiketa kerem abang lokji, lapen kaike ta Arnam ahirjume pen angtan si doverji, atheke Arnam nang keklem ason do’an nangdengdunde, lapen Alangli nangsai angdeng aphan ahokpet pu hok’he, mate nang monit akhei ale aphan si keklem pu. Alangli kipuji ke nang keklem asai do’an ta monit abidi lapen ajakong enpen monit aphan Arnam akeraikom pen kapatet aphan, lapen Arnam ahirjume kapalongle aphan. Alangli kipuji ke nang monit akhei aphan kejapon ke akangting anat, kithi anat, lapen monit atum Arnam lapen Alangli hirjume kachepangbo pen angdeng-ahoi kave kedodun adim kecheng anat.

Monit atum hamphang asonthan kedocheng pu ahut pen, monit aphu ke sonthan lapen kethek’kere pensi plengsetlo. Sonthan lapen kethek’kere si monit atumphan kachariji arisim mandetlo, lapen hadak Arnam aphan kardomji aphan dorchit adim anta avedetlo, lapen Arnam kardomji aphan kemesen apor ta avedetlo. Monit aning along Arnam adim kai penta aber si runthulo. Aning along Arnam kavedet pen, monit aning arlo apirthe ke kangting saidelo, ningkethe kave lapen ingthaidang. Lason ahut si ke’ongdung hamphang asonthankuru, phurkimo katarlip atum, lapen ratchari asongja atum athengno an vang si hamphang asonthan alamm pachetak’lo, monit akhei nangkeplang alammo, lapen kaprekjam Arnam si monit aphan kasorjon pu pen kachetonte alammo, monit akhei aning lapen aphu along pachethapji aphan. Lapen lapuhenlo, komatsi Arnam si kadokave ta kasorjon pu kekroi atum ke kai pente ansose si aphai nangjumlo, lapen komatsi kachekirla pensi keplang pu alammo kekroi ma atum aphai kai pente ansose si nangbatlo. Ansose amonit atum Arnam keklem asai angthek do’an lapen Abarim Alo akai ahut Alangli lammthe do’an aphan tomobarim lapen thansere pusi hokronglo. Alangtum aning along, monit atum Arnam ajakong lapen manpeng aphan kepangkre dokok’lo, Arnam do lapen do’an ason aphan ta chepahemphu pu alamm aphan. Monit akhei kereng nangji lapen det lapen longri alekha ke alangtumphan akenangsot kalilo, lapen monit kedobom ke kakhurungvang apirthe along kachematha ke kecho, kejun, lapen akerengme kiri. … Jumhek amonit atum si amethang aphan amat cheparpulo Arnam pini konatsi Alangli asai kacheklem ma pu kiri, mate kosonsi Alangli monit kedam nangji adim chari lapen sik-dang ma. Lapen ajoinelo, monit atum chechininepin pen, monit akhei nangkeplang ke jumbom-jumbom si monit atum akar’i ingthan thekthe tanglo, lapen ansose ake’ong amonit atum ke bangso alamm adirda si longdunde, lapuson apirthe along kedo ke, alangtum aphan mute kachevoitang atum aning karong ongmu. Kachingthur’o adet atum anta bangso aningkepho alamm chepaklangset-set. Atheke Arnam nangthan-paredun avete, monit akhei keraikomji aphan kachari atum lapen hamphang along bidi kangcho atum jonghele aphu chepanghang tame, lake thangta ale ave. Majok ta monit aning along akangthai papleng thekthe, atheke majok ta monit achethe cheman thekthe, lapen ajat hamphang kakirla abidi ta monit aphan alang kachechaknangbom akangthaidang pen pajok un’e. Lahei ason pen tame, monit atum chekhan un’epin pen pap klemji lapen hamphang along kechokche ason aphuthak ning chepaoi dunji. Lahei ason monit aphan aning akimi ason kachini aphan kehang lapen akar’i pen khang un’e. Lason kacheman atheke Arnam si monit aphan kaselam lapen laso monit aron avepin pen dan kachipi lapen akimi ason kiri pen kelongji ke ansose aning kephophe henlo, lapen laso ajoine pen monit atum kedoji ke kaike ta isivet kaphere pen, monit akhei amohut aphan kosonsi kachepathengnoji ma pu kachinine, mate kosonsi aphrang kedo atovar aphan kachepathengno poma. Monit atum sonthan lapen kethek’kere aphan ta pheresetji, lapen ansose alang mena aning along akangthaidang aphan ta phereji. Bangso apirthe along, nang jokvan adet along si doma mate isi monit atum kelong nangji aron kavepin adim si doma pu langdamdepin sitame, nang jatsemet ke monit akhei alekha pen chepajok un’e. Nang si kachari abang mate nangphan bang le nangchari, nang jasemet ke monit akhei alekha, kachepatujoi alamm lapen kedamji adim kachini kangtung akar’i pen chepajok un’e, ansose si nang ki’un’elang hala kepadingbom akangthai pen kachepajok. Lason kachemandet ke, monit akhei along isinat, aphan hamphang along bidi kangcho atumke hamphang kacheman pusi kipu, sitame majok thedung amonit ta laso akisung kapaveji abidi van thekthelang. Monit, ajat non, ke monit pinak, lapen Arnam adim lapen akai ke monit palardun un’e. Monit akhei along ke kadokave ta cho-junlong lapen jokvan lapen chingbarkre pen kemesen ahamphang anvet le akenang kali; alangtum kenangji ke Arnam akepajok lapen alangtumphan Alangli pen kisikpi chethe aphan kenangji ason. Arnam pen kisikpi chethe aphan kenangji ason lapen Alangli kepajok longdet ansi halahei kar’i ason, akimi ason katarlip akar’i, lapen karjong akangthaidang monit akai along jut unji. Jongsi isi adet mate isi alongri arat Arnam akepajok lapen kalana longdun thekthe, pulote halason adet mate longri kengkam kachejordunji ke kevir atovar, kangting anat, lapen Arnam si pevirdetpo.

Nang adet non amat ke plangbom tahai, bonta nang jongsi nangrat aphan Arnam pen kachehelo longlok, pulote hala amethang aphan chetheklongpo kebatbom Arnam pen thangnat kanghon lapen ahirjume kelongle. Nangdet komentune pen nangkeplang aphurkimo ke aphi’ong kengpak arum lerdunbompo, lapen der’o’e phrang si monit atum Arnam pen kachedanji aphan thurpo lapen Sining rengme aphan ahirjuno pipo. Lapen lasonsi, monit atum thangnat chinidundepin, isi adet alekha ke kivir along an vandetpo. Arnam si jakong kethetan adet atum aphan hala Arnam ahirjuno kipitang adet pen kapachedanji aphan pathurpo, lapen alangtum aphan pirthe along pen papraidak tahai. Isi adet mate isi alongri angsong karlu lapen arum keklo asangtar ke haladak kachari abang Arnam ardom ma ardomde, lapen alangtum rat aphan Arnam adung an kepon mate kejapon pen Alangphan kapardom asai dengma dengde. Lapen sitame, non kijut akai along ke, atheke komatsi ahokpet pen Arnam aphan kiri lapen kardom abang ke kilitbom si ing’ardang, konat adet along si Kristian adhorom aphan det adhorom pu kehok ma Arnam alangtumphan kangjang muchot ajakong pilo. Alangli halahei atumphan pangrum si pirthe along ahokpet muchot aterang selamlo, lasonsi Arnam kekroikre adet mate hokpet a’Arnam kardomde adet hala ahopet adet ahotur manpo. Lasonsi, Arnam monit angbong Alangli sai kacheklemji aphan adim kedo anchot kali, bonta det akangthim an sitame cheraisi hokpet kachari pachethangji, Alangliphan kekroikre adet aphan kebeng-kephan lapen kekhamkhe padoji aphan. Lapuson puvoiphit sitame, aphrang vangsi Arnam aphan kardom amonit aphai batbe, atheke monit atum Alanglipen kedam chehelopik’lo, lapen monit atum Arnam aphan kachetengne ajak dingpik anlo. Pirthe along kedobomji adet ke hokpet pen sai kedeng lapen ahokpet kali aphan kekhamkhe atum anvetpo. Bonta lake Arnam aningkehang pen chehelopik’lang, atheke nahok adet kachari abang ta alang rat aphan kachari ajakong Arnam arideng pipe, majok ratchari asong ta Arnam kardom aphan monit pangrumre; Arnam si do’an adet, alongri, kachari asong, lapen abangphutin aning along pen Alangli aron-ateng kelong nangji adim chepangbodetlo. Pirthe along hokpet ajakong dobomlang pusitame, lake isi kangduk’lai kachari asonben si monit atum aning along Arnam asapbak adim ta longdunde. Arnam ahirjume avete, kachari-kapangri ahongjai kachetonte-kachingrire along damjuipo, lapen katengkheng pen kachepajok unji ajakong duredetpo. Monit akhei aphan ke, Arnam ahirjume avepin pen kedo ke arni atur avepinpen kedo atenglo. Jonghele kachari atum dukkrup pen arat aphan sai keklempi sitame, hokpet apharman monit akhei chingrumpet pen meipi jonghe le pado sitame, lahei angbong pen isibak ta ahormu partingphit un’e mate monit akhei alekha larphit un’e. Monit atum kekroike ke konat adet si along si monit atum cho-junlong lapen chepindeng long, konat si alangtum ingsamjin pen dorappet ma, hala ke kemesen adetlo, lapen kachari abang mesen kedo adetlo. Bonta Arnam ke lapuson mathathe. Alangli kekroi ke isi adet jongsi Alangliphan kardom abang kave adetlo pulo hala ke Alangli kaphalangnoji adetlo. Monit akamatha ke Arnam akamatha pen apar chetonte ongchet. Lasi, jongsi isi adet akehoi le Arnam aphan ardomde pulote, halabangso adet alekha ke ningduk memeji abang po, lapen halabangso adet keleji adim avedetpo.

Arnam ke monit atum kachari-chalom along chijudunde, sitame isi adet mate longri alekha ke Arnam si cheparideng. Arnam si bangso apirthe lapen mindarsong kangthim aphan ta kachari. Monit alekha lapen Arnam kelangmek asai ke chepholok chenam, lapen majok amonit ta, det mate longri ta Arnam kachari ajakong pen jokje. Jongsi monit le alekha chechiniji aninghang, pulote alang Arnam athengno vang nangpo. Alangli thengno kevang an aphan Arnam paplang-kachingthurpo, lapen Alangliphan kekhamkhe lapen kedengde atum an aphan ke kapajut lapen kapavir si vanpipo.

Mathadamtha hala Baibel along angdeng lale Arnam Sodom aphan kaphalangno lapen mathatha kosonsi Lot apiso ke ingti anujok kacheman. Mathadamtha kosonsi Nineveh arat atum thoila apindeng lapen mepun pen pap pen ningcheruilo lapen mathathutha Jews atum kopi chemanlo ningkan 2,000 aphrang Jisu aphan thengparpan along sakdet aphi. Jews atumphan Israel pen plungjuilo lapen alangtum pirthe adang along-along adet along kat nanglo. Ongdung atum thilo, lapen Jews adet kangthim pen amat si lakha un’epin kanahok chingtangnanglo. Alangtum Arnam aphan si thengparpan along sakdetlo – isi ahir kangtangrak apap klemdetlo – lapen Arnam akun aphan kachongkhenlo. Alangtum Arnam aphan pinremlo, khindelo, lapen lasi alangtum kelongji alekha ke isinatlo: Arnam arideng adai. Lake kachari abang adet mate longri aphan kevanpi isi kahenopik angthek lapen akanahok’lo.

Pini, Arnam asai kacheklemji aphan Pirthe along nangcheruithu’etlo. Alangli kechengsi kesang adim ke inutvet abangphu kachari aron kachepamei adim: China, dhorom kerimre anujok kangtang. Arnam isi monit apeng aphan Alangli ajakong lapen bidi pen longdunlo. Lapuson ahut malom, Alangliphan China kacharibom asong atum kenepji aphan-kiri tarliplo lapen penang kachenek chechak nanglo, kesang aphan Alangli aphu chepuhuilok nang adim ave lapen kedoji adim ta cholong thekthe. Lapuson pu voiphit sita, Alangli kemang asai Arnam cheklembom: Alangli Alangli lamthe chethabom lapen birta keme pachethangbom. Majok ta pundam un’e Arnam koan ajakongthepi ma pu. China along, Arnam aphan ahotur pu kachekam isi adet, Arnam mantune ta Alangli sai ingtonte. Alar ke, ansose amonit atum Alangli sai lapen lamthe denglo, monit akhei along do’an abangphu aphan keraiji aphan Arnam ajat ta klemji. Itum ningchethe pirthe nahok adet mate ajat ajakong ta Arnam akemang kachepapleng along arjapdunthip un’e. Komat si Arnam asai along kapasiksakdun, Arnam alamthe kedengde lapen Arnam kemang asai kaphalangnodun atumphan kijut ahut ke Arnam si adai enpo. Komatsi Arnam asai kakhinde abang ma aphan ke me-herang alongsi toipo; konat adet si Arnam asai kakhinde ma aphan Arnam si phalangnodetpo; konat alongri si Arnam asai kekhamkheji aphan kithurma ke pirthe along pen si papraidakpo lapen kedodun ingtonkokpo. Ne choningriji det, longri, lapen korkhana along amonit do’an aphan anta Arnam ase karjudun aphan, Arnam asai aphan kapethe lapen monit akhei alekha aphan apor kipi, lasonsi Arnam aphan kangthirnei, kangtuinei, man kethenei, lapen monit akhei angbong isivet kardom ason kapaman, lapen monit akhei kangthim aphan Arnam ahirjume arlo kedolongji aphan varsai ketho, Abraham asomar le Jehovah aseme arlo kedo ason, lapen Adam pen Eve ason, Arnam ahokpet kaselam atum, Eden Abari along kedo ason.

Kethepik lang angdung asonsi Arnam asai ta aphrang dambom. Majok ta Alangliphan benghet un’e, lapen majok ta Alangli kepaphrangbom along khandun un’e. Komat si Alangli lamthe karjudun peme, lapen komat si Alangliphan kiri lapen kachepalang’it si, Alangli kengbot ingthumdun thekchotji lapen Alangli seme dengdun unji. Komat si lason keklemkle atum an ke angkang thedung kanahok lapen chelonchit adai phopo.