Monit Along Kedotang Angthek Lapen Alang Ador: Lahei Chenam ta Kopilo?

Nangtum aphan ke inghan pen nangpachekak’etlo lapen, ajat punon ta, ale kaveneinei, kahijim meme lapen Arnam kelangselettang atum angbong pen kihumpon atum ason chenamveklo. Nang ke Sobar arideng si kedo lapen aphrang ke alang aninghang aling paklemlo lapen nangphangnodetlo. Laso apot si nangphan longle along pen si nangpachekakdaklo pu kipudam athe ke lahenlo, lapen, kangthir pen nangpachehelodetlo, la anchot ta kalilang nangphan ke monit kali ahormu nangpinchongdet si Sobar nangkapamanghu aling aphrang pen ta keklemdun nangkoklo. Lahenlo nangtum aphan kopi-kosonma pu choklim pen kethekdamlong angthek. Nang kachini nangji lahenlo nangtum doan ke ahokpet aketer kedothip alang lapen anghan along si longlo, hala lang’ok lapen chikung kenep memeji ason pen ke kekhangdun pemelo, pima ajat tame ningkarong kipi movedet doan ke nangtum pen si vanglo. Lapu langdamplir pen thanlo pulote, nangtum ke abernei ahamphang along ale kavenei api atumlo, phak lapen methan anpar aberlang. Chethandak pen si ningjelo, nangtum aphan lapuson alamthe pen nangkehang ke lampar mate kaningjethap pu kalilo, tebonta, lake kachethan nangji alam pajoike penlo. Nangtum aphan lapuson alamthe pen nangkehang ke nangphan man nangkipi eson akronglo pule ningjedet ta chokji. Nangtum aklong akamathadam, lamthe kaningje, aot-adur ke monit atumlo, lapen nang kai asontin along tame, nangtum longle along kedo aman-peng antalo, lahei pen antame kepangthekdam dor pemelo nangtum angthek ke “thangbakbe ason ben kali.”