Arnam Monit Nangcheparje Abang Birtame Pachethang Asai Lapen Monit Adeng Angbong Kacheprek

Nangtum Arnam asai kelangdammek chinidunvek nangji lapen Aalngli sai kadokave aphan kejapon ahin otdunthipthek nangji. Lake kemesen kilutdunlo. Kelangdammek ahok aphuthak nang ephong le choklim pen kachinidun pemelo pulote, nang kilutdun ke phere athai avelo; kopuan Arnam asai chelarlo pu tame, nang ning along nang ke thirklong si dopo, kelangdammek aphuthak ta klardakpo, lapen nang kilutdun lapen nang kiri chepeduk ta kijut akemang dolo. Lason pen si, kadokave nanglong kephotang lapen kachinitang doan arnuk muchotpo lapen ansose pangtak’i chemanpo. La angton pen thedung arjan langdun peme ephong le nang kethek lote, nang kai along kerem chechak jokplotpo, mate nang kechok akrong pen cheprekdamdelo. Jongsi nang le laheihui asai angdeng chinidundedetlo, angdengtin along ta nang ke kerem si chechak nangpo, lapen lake penang an apor abat nangkokpo asontin kachelarponji aphan, mate rui koan lone aphi tame nang ke kechok akrong along kengkam chejordun thekthedetpo. Tangte lake nangpanglendunthamji kalima? Nangtum kachepathekvek nangji pima kemesen kilutdun lapen keklem-kedam nangji dopiklang. Arnam asai kelangdammek aphan ke, nang la aber kepaklang alam ningchibivek nangji: Alangli kachepahemphupon asai akenangsot, mohut atovar aphan kepachoklim kepaman, kopisi asat kelang lapen kesung kepho pen ajok kelongdamvek nangji, kangsai akenangsot alam lapen ado kipi, Karjong Kangthir asai keklem kachepathikpon alam, lapen kepachoklim lapen kachepahemphu keklem kachepethikpon alam. Laheihui kadokave ta kelangdammek ahok along si dopetlo. Akaprek anke Aron Akai, Kanghon-Kangjinso Akai, lapen Khristo Kepangri Arat Akai along pasonthom asai angdeng henlo, lason thakthak si mohut ahakhi henlo. Lahei, sonthot si, kelangdammek ahoklo, lapen lahei doan ke koanma akenangsotpiknei asonthot si ansose karsikjikneklo. Non ahut, pima nangtum kilutdun lapen keklem-kedam nangji akeongpi dolo, lapen lake non ansose pacheklamlo lapen ansose than pajirmi pemelo. Jongsi nang le lahei ahok aphuthak thangnat kachini ave, laso kipudam ke pima nang kilutdun non si kelongjilang. Akeongpi apor ke, monit atum ahok aphan kachinidam ke arsiksedet ongchotlo, latum doan ke keklemvek nangji ahok ateng klem-dam thekthedetlo lapen masapsap alam tame kosonsi kapachok nangji chininedetlo. Laso athe ke pima monit atum ahok ateng keklem-kedam un’edet athema alangtum akun ke chedandong pinak, lapen athema alangtum kachinidam pini arni asai tame pachobei lapen ihin anat anvet ongchot apotlo. Lasi, lake monit atum aphan kapachoklimji puke kejoike asai kalidetlo. Nang ke chedandong ta abatpiklo, lapen nang ke nang mena aban ason aphan si kachepalong abatpik anlo; nang ke ahok ahin anatthu karjapdunji ta un’edetlo, lapen nang ke kachinidunlor ahok apot ta keklem-kedamji thekthedetlo. Lason amonit atum ke jokjelo lapen komatmat aphan si chepahemphudet atum kalidetlo. Jongsi nang kilutdun ke angton pen kali mate akemang ta ave pulote, nanglong kachingthur kevang ta inglenhuipo. Jongsi nang kilutdun along masapsonat ta ahokpet avedetlo pulote, nang kiri chepedukdun tame thangnat ale avedetpo. Jongsi nang ahok atiri aphuthak chinidundedetlo pulote, nang ke chelarledet si doverpo. Monit akai along kachingthur lapen alang akun akachelar doan ke ahokpet along kiliutdun pen si longji lapen, anpartame, angton kephopon along kilutdun pen ajoklo. Jongsi nang le penang an klardak kephopon nang kilutdun along dolo, lapen nang le choklim kachinidam lapen kilutdun do pemelo, nang kun ke prapjin pen chelarpo. Jongsi, non ahut, nang ke keklem-kedam aphuthak klardak angton pen chininelang pu tame, nang akijumnei tame Arnam asai kelangdammek aphuthak ke klardak pen chinivek nangpo. Jongsi kalidet, nang ke kilutdunji aphan un’edetpo; nang ahok aphuthak ephong chinidet aphi ansi kilutdun longchotji. Jongsi Karjong Kangthir nangphan nang kephopon along patheangdet aphi anchot si nang ahok aphuthak arnukkrung kachinidam longji, lapen arnukkrung kilutdun doji. Nangtum ke Arnam asai kachinidun aphan vangvek nangji.

Kecheng ahut, monit akhei aphan pinchongdet aphi, Israel aso atum si komatma Arnam asai apharman keklempidunlo. Israel adet angton pen pirthe along Jehovah asai pangcheng adimlo. Jehovah asai ke aron kepathiktang ateng pen monit aphan jasemetpet kejapon lapen kivipon henlo, laso pen ajok monit ke choklim akai kedodun longji aphan lapen pirthe along choklim pen Jehovah aphan karcho thekji pulo. Aron Akai along Arnam aphan ke monit atum theklongle lapen papho ta longle. Athema kadokave Alangli keklem anke Sobar kaphangnopon kechengsi amonit atum aphan kejapon anchotlo, latum aphan kethan-kemum lapen kivipon, Alangli lamthe ke thangnat ta ave bonta aron-atang lapen monit aot-adur kedo-kethak nangji ahukum anchotlo, lapen latum aphan chethe ahok alam ke padordedetlo. Israel aso atum Alangli kejabang keman aber ke Sobar thedung kaphangno avelo. Alangli aron asai keklem ke kepajok asai kechengsi angdeng along anchotlo, kepajok asai kepangchengponlo, lapen monit akai along akun kachelar pen ke thangnat ta keklem-kedam kacherap avelo. Laso apot si, kepajok asai kecheng ahut ke Alangliphan akenang avedetlo Israel along Alangli sai aphan ok aphan kepangthek alam. Laso apot si Alangli isi akrong – isi ajaton nangkoklo – laso pen ajok monit pen kachelangrappetji aphan. Lasi, komatmatma Jehovah apharman kaningje lapen keklempi pinchongtang api atum an angbong ke ingthurlo, atheke lason si monit asopo atum lapen mohut alam kethanthek atum monit angbong sai keklemji vanglo. Monit asopo ke monit angbong Jehovah apharman si sai nangklemlo. Jehovah pen “Monit asopo” pusi hangdetlo pima lason amonit atum Jehovah apharman si aron nangpinchong pangchengponlo. Latum doan ke kurusar saidelo Israel amonit atum angbong, Jehovah pen kelangbom lapen keraibom akurusar atum saidelo, lapen latum along si Jehovah Akarjong klemdunbomlo; latum doan ke kejabang saidelo monit atum angbong lapen Jehovah aphanthot si ru-thailo. Mohut alam kethanmekthek atum, ahin kaprek ke, kaningjeji si chehodaiderlo, Jehovah adular, monit atum aphan kadokave alongri lapen akheitin. Latum ke Jehovah mohut asai keklemji apot ta thanmeklo. Latum le monit asopo mate mohut alam kethanthek atumlo pu sitame, Jehovah Amethang Akarjong pen si kadokave aphan tame lame-lahonlo lapen latum along si Jehovah asai tame dolo. Monit atum angbong, latum doan ke komatma Jehovah apharman kacheklang atum saidelo; latum ke alangtum asai keklempon ke athema latum aphan Jehovah si lanalo apot anchot lapen athema latum doan ke oklo atheke Karjong Kangthir Amethang si nangkachepharlo pu apot kali. Laso apot si, latum doan le Arnam adular kaningje lapen keklem isinatlo puvoiphit tame, Aron Akai along halahei monit asopo lapen mohut alam kethanmekthek atum anke Arnam monit nangcheparje aok kalilo. Arnam asai Kanghon-Kangjinso Akai along lapen kijutsi angdeng along ke klardak pen cheprekdaklo, athe kepajok asai lapen monit aphan kangsaipon sonni tame Arnam ok chepharlotang abang Amethang si klemji, lapen lasi Alangli dular non aphong monit asopo lapen mohut alam kethanmekthek atum aphan kangthurthuji chenam si akenang amat avelo. Monit amek angden along, alangtum asai atiri lapen adichi angbong thangnat ta akenangsot kacheprek avelo. Lapen laso athe apot si pima monit atum doan ke Arnam ok chepharlo abang pen pima halahei mohut alam kethanthek lapen mohit asopo atum angbong asai keklem kaiketa manghudunverlo. Arnam ok chepharlo abang arje kacheklang ke pima hala mohut alam kethanthek lapen monit asopo atum pen chenam si cheprekprelo. Lapen Arnam ok chepharlo abang ke mohut alam kethanmekthek atum pen anpar ansose si jongjong lapen ansose si ahokpetlo. Lasi, monit ke latum angbong akacheprekdam longledetlo. Monit ke salajong arje cheklang aphan si ardi pichotlo, pima angton pen chininepin, la hini tame keklem lapen kaningje along ke isinatlo puvoiphit tame, latum angbong kenangsotnei akacheprek dolo. Athema monit hormu angbong kethakthek akethek ke boipiklang, alang ke kejoike alam angbong tame thakvet un’elo, ansose kisungkrung alam puke thekthe ongchotlo. Mohut alam kethanmekthek lapen halahei amonit atum Karjong Kangthir le enpon si kaningje lapen sai keklem lote, lake monit adeng doan kapacheklemji aphanlo, lake pinchongtang api keklem nangji kapachunji aphanlo, lapen lake kopine pima monit keklemvek nangpo. Tebontame, Arnam ok chepharlo abang alamthe lapen asai ke Alangli kapachethang asai cheklemponji aphan. Alangli athak cheklang arpum ke pima hala pinchongtang api asonlo puvoiphit tame, Alangli sai ke Alangli function keklemji aphan kali bonta Alangli birtame pachethangji aphan. Kapinchongtang api atum aphan si “adeng” pu alamthe ke pudamlo, tebonta “birtame pachethang sai” pu alamthe ke Arnam ok chepharlotang abang aphan si jongdamlo. Latum banghini angbong kenangsot akacheprek dolo; latum ke lahinhin isinat kalilo. Monit asai ke alang deng kacheklem nangji anchotlo, tebontame Arnam asai ke kisik-kedang henlo, lapen Alangli birtame asai pachethang keklem henlo. Laso apot si, penang an pachethang asai keklem atum Karjong Kangthir enponlo lapen penang an mohut alam kethanthek atum aphan Alangli pen padorpluplo puvoiphit tame, alangtum asai lapen alamthe ke pinchongtang api adeng ateng alangtum kacheklempon anchotlo. Alangtum kethandammek alam anke Arnam ok chepharlo abang kaningjepon akai-achethe akrong pen kilitpik tahailo, lapen alangtum monit atheng ke pima Arnam ok chepharlo abang aphan abat damjuilo tahai memelo, bonta latum doan ke nonputa alangtum adeng si cheklembomlang, lapen kapachethang asai le kapaplengpon kali. Monit adeng pu kejongdam ke monit function pu aphanlo; lahenlo kopima monit kelongdam unji. Tebontame, laso kapachethang asai Arnam ok chepharlo abang keklempon ke Alangli kisik-kedang aphan si jongdamlo, lapen lake monit atum longdun un’elo. Arnam ok chepharlo abang le ningje, klem, mate manghumeme ason paklang tame, Alangli ke Alangli kisik-kedang angbong thedung asai si klemponlo, lapen lason asai ke Alangli adular monit ke klempon un’edetji. Monit asai ke alang adeng kapinchongtang api ateng Arnam asai kisik-kedang angdeng along keklemji aphan anchotlo. Arnam kisik-kedangdam ave pulote, lake pima, jongsi laso Arnam ok chepharlo abang pachethang asai ke ingbodet nangji, tangte pinchongtang api adeng lethot tame ingbodetpo. Arnam asai Alangli pachethang asai keklempon along ke monit aphan sik-danglo, tebonta monit akeklempon alang adeng ke Kapinchong Abang akehang ateng pen pachunji aphan alang adeng kachepaplengpon henlo, lapen aling pen tame inut kapachethang asai keklemlo puke la hokdam un’e. Arnam along kedolor akedoivet ason – Alangli Karjong aphan – Arnam asai ke Alangli kisik-kedang henlo, bonta Arnam monit cheparje aphan abang ke, komatma athak arpum pinchongtang api ateng chepindeng henlo, Alangli sai ke Alangli pachethang asai kacheklempon henlo. Alangli ajat asai le keklem tame Alangli pachethang asai si klemlo; kadokave pima monit keklem’un ke alang akemenei kachipi henlo Arnam kisik-kedang angkang lapen Alangli akejapon along.

Monit alang adeng kacheklempon puke, ahokpet ke, kadokave pima monit along kedolor kapapengpon henlo, lake pudam lote, pima atheke monit aphan unlo. Lake tangte pima alang adeng ke chunponlo. Monit along akechokchedet alang adeng keklempon ahut ke pajo pen avebompo kepaphrangbom chomatlong lapen alang kangsai amo kachetongbom pen ajoklo; lahei ke monit adeng aphan kekhangdun mate pasiksakdundelo. Komatmatma keklemji mate kiriji kangton lapen aphi kachiruijui kaphere apot pu atum anke pima alangtum adeng keklem along kahenonei do tahaipo atheke kadokave pen aphon ketannei atumlo. Jongsi monit atum kopima latum kachethan nangji alam adeng keklem ahut chethan thekthedet mate kopisi latum along kedolor ki’undetji ason longledetlo, lapen alar ke ludetlo lapen abe kedo aling si dunbomlo, latum ke pinchongtang api along kedo nangji pima function chepangbo tanglo. Lason amonit atum anke kopima “keplangplenei atumlo” pusi hoklo; latum doan ke thangbakbe ningkehanghe atumlo. Kosonsi lason amonit atum le choklim pen pinchongtang api atumlo pu kipupo? Tangte latum doan ke kahenotang api pima athak ke mesen bonta arlo ke kithutang atumlo kalima? Jongsi monit amethang Arnam pu chipulo tebonta kangthirpetnei abang alam chethan thekthedetlo, Arnam Amethang asai klemkledetlo, mate Arnam apharman cheklangkledetlo tangte, alang ke chenam-chenum si Arnam kaliveklo, athe alanglong ke Arnam akedoivet avedetlo, lapen pima atheke Arnam along kedolor kelongdam ke alanglong ke avedetlo. Jongsi monit le alang kedolor kelong nangji chepangbodetlo pulote, alangphan ke anpar monit pu hok un’edetpo, lapen alang ke pinchongtang api ason karjapji mate Arnam angno kevangji lapen Alangliphan ru-thaiji atheng kalidetpo. Anpartame, alang ke Arnam akangjinso kelongdunji mate keraikom, kelana, lapen Arnam pen kapachoklim kelongji atheng kalidetpo. Penang an komatma Arnam aphan kekroi chepangbo atum anke Arnam akangjinso tame chepangbodundetlo. Alangtum kechokchedet apot latum kachongthuidet anchot ta kali, bonta latum therakrepin si pima Arnam kedam akrong ke chokche pu alam pachethangponlo, lapen chedandong atum ante Arnam do pu alam anta kroidundelo. Kosonsi lason amonit atum, komatma lason kachedandong aot cheparideng atum anke, Arnam akangjinso kelongdunji pu atheng kemanpo? Komatmatma alangtum adeng cheklemkledet atum anke Arnam abirudhe kithur chedandonglo, lapen Alangliphan kachitu nangji apreng dopiklo, tebonta latum chetevarphitlo lapen pima Arnam ke chokche pusi sodak pen jongdunlo. Kosonsi lason amonit abang le kepachoklim kemanji atheng kedopo? Tangte lake kivirdet lapen ado kipi kepho nangji abang kepaphrang abang kalilangma? Monit atum komatma alangtum adeng Arnam angno cheklemkledet atum anke kechokchepik asai keklemdet adai do’etlo, atheke kithi tame ado kipi kepho nangji dordechotlang, tebonta latum ke Arnam pen lam chedanji ane the’oilang lapen Alangli pen si amethang aphan chepangbardamlo. Kopilo lason amonit atum aphan kepachoklim ale kedoji? Monit atum le alangtum adeng keklemji remdetlo, latum ke adai kedo lapen apreng kedopik si chematha nangji; latum ke alangtum akeboidet lapen ale kavedet doan apot chelangseletpik nangvekji, alangtum kachedandong lapen kahenodak apot, lapen anpartame, alangtum akai Arnam aphan si chipidetvek nangji. Laso pen anchot si latum ke pinchongtang api komatma Arnam aphan ahokpet kanghon, lapen lason amonit atum anchot si Arnam ahirjume lape akechak doan ta longdunji athenglo, lapen Alanglihin pen kechoklim kemandunji atumlo. Lapen kopilo nangtum akeongpi atum ke? Kosonsi nangtum komatma nangtum angbong kedo Arnam aphan ru-thailo? Kosonsi nangtum Alangli thengno nangtum adeng cheklemponlo? Nang tangte kadokave kapaklemtoi doan ason klempetloma, nang mena akai chipidet an pu tame? Kopilo nangtum athok-ajir kachipidet do? Nangtum ke tangte Nelong pen akeongpi longlelangma? Nangtum chepangthek thekjima? Koan si nangtum Nephan athikpet dolo? Kosonsi nang Nephan ru-thailo? Lapen kopilo kadokave pima Ne nangtum aphan kipitang doan lapen nangtum aphan keklemtang doan apot ke? Nangtum la kadokave chelakhatheiloma? Nangtum la kadokave ingsailoma lapen laso pen nanglong kedo masapso keme-kaheno kethakthek kachini nangtum chepangbarloma? Komatlo nangtum alamthe lapen asai amo pen ale kelongdunji? Lake tangte pima lason nangtum masapsonat chehodaidet ke kadokave Ne nangtum aphan kipitang doan angbong pen atheng chokloma? Ne ke akaprek chongvai athai avelo lapen nangtum aphan si ning aklong’et pen chipidetlo, tebonta nangtum ke kahenodak kemathadam si chebirtilo lapen Nephan pabenghoi aning pen si dolo. Lahenlo nangtum adeng ajak keledam, nangtum keklem asai puanchotlo. Tangte lake lason kalima? Nangtum chininema pima nangtum ke pinchongtang api ateng adeng kacheklempon remdet pemelo? Kosonsi nangtum aphan le pinchongtang api pu kehok unpo? Tangte lake nangtum aphan kopima lake nangtum kacehthan lapen kerengponbom klardak kalilangma? Nangtum ke nang deng chepaplengji un’edetlo, bonta nang ke Arnam kachechak’un lapen keongpik akangjinso kelongji si ridunlo. Lason akangjinso ke thangbakma ale kavedet lapen kangdeihek nangtum ason aphan le kachisikpon kalidet, bonta komatmatma jat ta hangdunde lapen ningarongcheng pen kachipidet atum aphan anchotlo. Monit atum lason nangtum ason, puan keplangpledet atum anke, sining athak akangjinso kelongdunji chenam si apun-achak kalipinlo. Kisung-keboi lapen kijutjepin ado kepho nangtum kijut arni anta kedover si longchotpo! Jongsi nangtum le Nephan kekroi thirklong kalidet, nangtum alekha ke kisungnei si chemanpo. Jongsi nang le Ne lamthe lapen Ne sai aphan adai che’en’edet pulote, nangtum mo kephoji ke ado kipi si chetongpo. Kadokave kangjinso, hirjume, lapen kemepik akai Arnam kepangri arat alongri along ke nangtum aphan thangnat ta kalidetpo. Lake nangtum aphan kijutlo kachetong nangji lapen nang mena kachepinchong apot kephodam nangkokji! Komatmatma kamathadunkrang lapen ane kachepatheoi atum alangtum kabor’ipon chitingkrupkredet aphan anchot kali, mate alangtum adeng kacheklemkledet, latum ke alangtum ari kangjinso aphan otdun longlelo, atheke kopima latum kehang ke apun-achak aphanvek asonlo. Lapen jongsi latum kopima kehang ateng longdun un’edetlo pulote, latum ke kekroi thirklong ansose durethudet si manpo. Kosonsi lason amonit atum le kemathathek atum pu kehokdam’ipo? Nangtum doan ke ajakong boidetlo lapen kemathathek pen duredetlo, nangtum kepaplengvek nangji kisik-kedang asai ahut adeng chepaplengdun angton pen un’edetlo. Nangtum ardi ke aber sunlap man’etlo. Nangtum Nephan kachituji ki’un’edet athe nangtum lason akangjinso kepaklangpon ke kachedandong kilitpik arjanlo cheman’etlo, nangtum aphan kapinremji dorphluplo lapen nangtum angthin kethethedet, keklem pachun thekthedet, kahenodak aot-adur, lapen apun-achak kalidet pusi cheklang tanglo. Kopilo nangtum aphan ajakong nangkipi ke nang ri kapachejotlong? Pima nangtum ke Ne sai aphan masapsobak akerap ta avepinlo, kachingkimesen ta kalipinlo, lapen Nepharman hakhi karjappiji ta un’elo pu atum anke nangtum keklem chokchelo lapen keremdamlo, tebonta nangtum ke alar Nephan si tengkhenglo, Ne phuthak thanthap-thanphrulo, lapen pima Ne ke ingthirpetpedet pusi lam hoilo. Tangte lake kopima nangtum kachingkimepik pu apun loma? Tangte lake kopima nangtum akanghon pusi puloma? Kosonsi nangtum kadokave asai pima keklempontang doan along kacherapdunlo? Kopuan si nang kachepadamdunlo? Ne ke thedung kachechak’un chepaklang’etlo nangtum aphan akoi pipepin pen, tebonta nangtum ke nonpu ta therakrepin pen Nephan pachobaibomlang lapen joijoi pen Ne phuthak lamhoibomlang. Nangtum masapso anbak ta monit akhei kopi-konat an pu kangthumdam doma? Monit adeng ke monit aphu tarlok lapen alang kamunthidamthap alam pen si paterbunglo puvoiphit tame, nang ke nang deng si cheklemvet nangpo lapen nang kachingkime si paklang nangpo. Monit asai keklem along aketer doan ke alang apharan alamlo, tebonta, jongsi monit le alang deng cheklemkledet lote, laso kacheklang ke alang kachedandong aotlo. Monit adeng lapen alang hirjume longlo mate hirjuno si longronglo pu angbong ke thangnat ta kachephodam avepin. Adeng puke monit atum kopima kapaplengvek nangji apotlo; lake alangphan sining pen nangketoi asailo, lapen kepho adular kipi, ahukum ateng nangji lapen athe do nangji pu aphan ke chiki nangnelo. Lason henlo si alang adeng keklemlo pu alangphan puji. Hirjume kelongtang puke komatne aphan pachoklimdet aphilo lapen Arnam ahirjume kedenglong puke kangsai chetongdet aphilo. Hirjuno kelong puke komatne abang akun chelarlelo latum ado kipipon lapen kangsai chechakdet aphi tamelo, lake latum kepachoklim chomatdun longlelo bontame adai-areng ke’en si phonangrong ahutlo. Bonta latum doan hirjume mate hirjuno si longlo mate longle pu tame, pinchongtang api doan ke alangtum adeng chepapleng nangji, kopima latum keklemvek nangji ateng pen, lapen latum kopima keklemthek keklem pen; lahenlo kijumnei lason abangphu, komatma Arnam aphan kiridun abangphu, keklem nangji. Nang deng keklem ke hirjume kelongji aphan anchot si nang keklem kalidet nangji, lapen nang hirjuno kelonglokji pu kaphere ajoine si kachekroidunde putame kalidet nangji. Nangtum aphan Ne eson alam nangthanlang: Monit alang adeng kacheklempon ke kopima alang keklemvek nangji atenglo, lapen jongsi alang le alang deng cheklem thekthedetlo tangte, lake alang kachedandong aot dokok apotlo. Lake alang adeng keklemponbom ateng pen ajok si pima monit ke pajo pen chelarji, lapen lake laso keklemponbom pen henlo pima alang athikpet alang chepaklangponji. Lason ke, koanma nang deng nang kacheklemponthek, lapuan si nang ahok longponpo, lapen lapuan si nang ahok kachethanpon chemanponpo. Komatmatma alangtum adeng kacheklemponbom ahut kachingbedun nangji aling si dunlo lapen ahok aphan ke riredetlo puan atum ke kijut ahut virdetvekpo, athe lason amonit atum ke alangtum adeng ahok ateng pen keklem-kedam kalidetlo, lapen alangtum adeng kapachunpon along ahok ateng keklem-kedam avelo. Latum doan ke komatmatma kachelarledet lapen ke hirjuno kelongji atumlo. Alangtum kachethanpon le keterbung anchot ta kali, bonta asontin latum kaningje antame kahenodak saidelo.

Kanghon-Kangjinso Akai along, Jisu tame penang an alamthe ningjelo lapen asai penang klemlo. Kosonsi Alangli Isaiah pen akachepreklo? Kopusonsi Alangli Daniel pen kachepreklo? Alangli ke mohut alam kethanmekthek abangma? Kopi apot si pima Alangliphan Khristo pu kipulo? Kopipi akacheprek latum angbong dolo? Latum doan ke kadokave ta monit saide komatma lamthe kaningje, lapen alangtum alamthe ke monit ason thakthak si keong mate kijum tame cheklanglo. Latum kadokave lamthe ningjelo lapen asai klemlo. Kachejok Alo Abarim ahut mohut alam kethanmekthek atum mohut kevangji alam si pachethanglo, lapen lasonthot si, Jisu tame lapulo. Kopi apot si lasonlo? Laso akacheprek ladak ke asai keklem asema ateng si langdamlo. Laso aphuthak kachinidamji aphan, nang ok asema aphan ke langdamdedet nangji, mate alangtum alamthe kaningje akarnuk mate abai kedo ason chobeibei aphan ke hokhedet nangji. Kaiketa nang aphrangsi ke alangtu asai lapen alangtum keklem asai apot angthek monit along kelong si pangthekdun nangji. Mohut alam kethanmekthek atum kapachethang alam laso apor ahut ke monit aphan chethe le kapador kali, lapen halahei Isaiah lapen Daniel atum ningkirungpon kelong tame lason si mohut kephoji alam thanmek puchotlo, lapen chethe atovar kalidet. Jongsi Jehovah kepaklang alam kapachiniphitji aphan kali pulote, lason asai madu tame klem thekthedetji, atheke monit atum aphan ke la un’edetji. Jisu, lasonthotlo, penang an alam ningjelo, bonta lason alamthe doan ke chethe atovarlo atheke monit keklem-kedamji akrong laso pen longdampo. Lake pudam lote, kechengsi, Alangli monit achethe kipi padorlo, athe Jisu henlo chethe; adunthu, Alangli monit kedam akrong pachelarphit unlo; kethom, Alangli sai ke pima Jehovah aphan haidetlo atheke akai along keklemponji aphan; phli, Alangli monit angbong akenangji Alangli neptheklo lapen kopima monit akadure chinidamlo; pho, Alangli akimi akai along pajirpon unlo lapen aban ke pajutkoklo. Lake laso apot si Alangliphan ke Arnam lapen Khristo pulo; Alangli ke Isaiah pen anchot kalilo bonta kadokave mohut alam kethanmekthek atum pen anta chepreklo. Isaiah aphan langnon mohut alam kethanmekthek atum asai keklempon kapachingbar aphan. Kechengsi, alang monit aphan chethe pador thekthelo; adunthu, alang ke akimi akai along pajir thekthelo. Alang ke Jehovah akejapon aber si sai klemlo lapen akimi akai along kapajirji aphan kali. Kethom, alang kaningjetang alamthe anke alang pen abat saidelo. Arnam Akarjong pen si alang ke kepaklang alam longponphitphitlo, lapen akaprek atum ke thangnat chinidundelo, latum arjudunlongdet aphi antalo. Laheihui ajahak ahormu pen anta dorlo pima alang lamthe anke mohut kephoji alam si kethanchot puke cheklang pemelo, Jehovah adular si asai keklemponchot aphar pen anpar ke kalidetlo. Alang ke un’e, bontame, Jehovah apharman angton pen kacheklangji aphan. Alang ke Jehovah abanlo, Jehovah asai keklem’iji aphan ajatonlo. Alang ke Aron Akai angbong lapen Jehovah asai angkang angbong si sai klemponchotlo; alang ke Aron Akai pen abat anke klemkledetlo. Bonta laso adular, Jisu asai keklem ke cheprekdaklo. Alangli ke Jehovah asai angkang aphan palitplotlo; Alangli ke Arnam ok chepharlo si sai klemlo lapen kadokave monit akhei aphan pap pen kapajokji pusi thengparpan athak thinanglo. Lake pudam pulote, Alangli akimi asai klemlo Jehovah keklemtang asai angtan. Kebatdunthu, Alangli ke pima atheke monit kelong un’edet alam si kaningje theklo. Alangli sai ke Arnam kisik-kedang angbong si klemlo lapen angton monit akhei aphan parloponlo. Alangli ke ajahak amonit atum along anchot le keklempon kali, mate Alangli sai ke kepathikvet amonit aphai atum aphan anchot le kipudam kalilo. Kosonsi Arnam le monit ason nangkacheparje loma, kosonsi halaso apor ahut Karjong kepaklang piloma, lapen kosonsi monit aphuthak sai keklemji aphan Karjong nangsunloma – lahei doan aphuthak pima monit ke theklongle mate papho longle. Laheihui ahok doan ke pima Alangli henlo Arnam monit nangcheparje abanglo pu angthek kehokdamji puke chenam si un’edet. Lasonsi, kethakji aphan ke Arnam asai lapen alamthe angbong anvetlo, atheke monit aphan kapatheklonglor doan. La anchotlo ahok. Lake athema Karjong aphuthak apot anke nangphan patheklongledetji lapen ke Arnam Amethang anchot si klardak pen chiniji, lapen Arnam ok chepharlo abang tame kadokave chini’et’elo; nang Alangli ke Arnam kalima kalangma pu kapangthekdunji ke Alangli sai keklemtang pen anchotlo. Alangli sai pen, lake pima thekdam longji, kechengsi, Alangli ke akimi akai ingpupon unlo; adunthu, Alangli ke monit achethe kipi pajir unlo lapen kidun nangji atovar paklangponlo. Alangli henlo Arnam Amethang amatlo pu angthek ke pima lapu anta dorlo. Akijumenei, Alangli keklem asai ke Arnam Akarjong apharman si angton pen cheklang pemelo, lapen lason asai pen lake thekdam longlo pima Alanglilong Arnam Akarjong chedodunlo. Arnam ok chepharlo abang keklempon asai ke jasemet akimi akai along kipidunji aphanlo, akimi asai kejapon, lapen akimi ahavar kangpupon, laheihui pen anchot tame pima Alangli henlo Arnam Amethang amatlo pu angthek dorplup paklang unlo. Lake lasi Isaiah, Daniel lapen akaprek thedung mohut alam kethanmekthek atum pen Alangli kacheprekdamlo. Isaiah, Daniel lapen kaprek atum anke kadokave ta kethekserser lapen kemesen kachini peme amonit atum saide; latum doan ke Jehovah kejapon along kadokave pen anpar kethekpik amonit atumlo. Arnam monit nangcheparje aok lethot tame kethek-kere peme lapen kachinidamdedet puke kadure avelo, bonta Alangli monit atheng ke mesen puchotlo. Alangli ke jongjong amonitlo, lapen Alangli phuthak thangnat tame keprekjek monit atheng puke la mek hini pen thekdam longlelo mate pima akaprek atum pen Alangliphan monit jongjong atheng along pangthekdam movelo. Alangli ke mekbin ason mate keprekpik abang amat si kalipinlo, lapen Alanglilong ke thangnat akangtuiving toklang amo, kethek-kere, mate lam kapinchongthek pu avelo. Alangli kaningje achethe aphuthak lapen Alangli kachejapon atovar anke alam kapinchong pen, kethek-kere pen, kai kachetongponlong pen, mate hemtun along kethe-kiding pen ajok si kelong kalipinlo. Bontame, lahei doan ke Karjong asai keklemponphit apotlo, atheke ok kachepharlotang abang asailo. Lake athema monit along ke Arnam aphuthak thedung kamunthidamthap dolo, lapen jongdamvet pen athema lahei kamunthidamthap alam anke penang an keklardakdedet lapen mekbin ason chobeibei amung kapinchong penlo pima, monit amek angden along ke, monit akeboidet ason si jongjong a’Arnam lo, komatma angthek lapen manghumeme asai klem thekthelo, lake chenam-chenum si Arnam kali pulo. Tangte lahei ke monit along kechokchepik kamunthidamthap kalilangma? Jongsi Arnam monit nangcheparje abang aok le monit jongjong ason kalidet, tangte koson si Alangliphan ke ok nangcheman tanglo pu kipudammepo? Ok nangkachemandet pen kedo puke jongjong, mesen amonit asonlo; jongsi Alangli le monit jongjong pen abatpik abang ason pulote, Alangli ke ok abang amat si kalidetpo. Laso angthek ke pima Alangli ok along amatlo, Arnam monit nangcheparje abang jongjong aok ason si cheparideng nangpo. Lake monit nangkacheparje asai akenangsot kapaplengji aphan anchot ajoinelo. Bontame, lake mohut alam kethanmekthek lapen monit asopo atum aphan alam kalidet. Latum doan ke Karjong Kangthir asai aphan ke’enpon kangvaitang amonit atum; monit amek angden along, alangtum monit atheng ke jongdamvet pen thedunglo, lapen latum penang an asai pima jongjong monit atheng pen abatpik tame klemponlo. Laso athe si, monit ke latum aphan Arnam pusi hoklo. Non nangtum kadokave ta laso alam klardak chinivek nangji, athe laso aphuthak ke kedamtang ahut akaitin along tame monit atum kamanghudun kejoinei alamlo. Kebatdunthu oen, monit nangcheparje henlo kadokave ason doan pen kemanghumemeneilo, lapen Arnam ok nangkachepharlo henlo monit aphan ke kedengdunji akesungneilo. Kopisi Ne kipudam ke nangtum keklem asai lapen nangtum kachinidam ok kachepharlo abang kachepatujoi alam angthek kelongji paplengdam’ilo. Lahei kadokave ta Arnam kisik-kedang along si cherappetlo, kelangdammek along saidelo. Nangtum kachinidam laso aningkehang tame kelangdammek apot kethek-kere kelongdam aphan ansose ale dolo, lake pima, Arnam kisik-kedang asailo. Lason pen si, nangtum ansose kachinidam adeng aphuthak pima prekjam amonit atum keklemvek nangji apot longdamthupo. Lahei alamthe ke nangtum aphan menmen atovar paklangkledet ta thek puvoiphit tame, lahei doan ke nonputa nangtum kilutdun aphan thedung akerap dolo, athe nangtum akai-achethe nonjong ke kelangdammek along durepik anlo, lapen lake nangtum kilutdun along kekhangji aphan kenangsotnei akatora si chemanpo. Jongsi nangtum lahei aphuthak thangnat ta chinidundelo, tangte nangtum kilutdunji aphan thangnat aningkirung tame kepon avedetpo. Lapen koson si lason akiri chepedukdun ke nang deng nang kemesen pen chepaplengpon unpo?