Komatma Arnam Lapen Alangli Sai Aphan Kachini Atum Anchot si Arnam Aphan Ningpangsam Unji

Arnam ok kachepharlotang abang keklem asai ke sonni aphar do. Alangli kechengsi aphong aphan ok kacheplang ahut, monit atum Alangliphan kroikre lapen Alangliphan chinine, lapen Jisu aphan thengparpan along saklo. Lapen ke, Alangli adunthu aphong ok kacheplang ahut, monit atum laso ahut ta Alangliphan kroidundedetlo, Alangliphan kachini ta durepiklo, lapen puthot Jisu aphan thengparpan athak sakthulo. Tangte monit ke Arnam ahotur kalilo? Jongsi monit le Alangliphan chinine pulote, koson si Arnam pen monit atum kachetebokhet kethekpo? Kopuson si alang ke tangte Arnam aphan hakhi karjappiji kechokdunpo? Arnam aphan chinghon, Arnam aphan kiru-kethai, Arnam aphan anong kepathedun heihui doan kachepaklang ke kachongthui kalilangma? Jongsi nang le nang kai laheihui abinong’et kalidet, kalili-kalanglang ahormu aphan si chipidetlo tangte, nang ke kachepeduknakji kalima? Kosonsi nang ke Arnam pen chetebokhet thekpo nang le komat ma Arnam ke chininelang pulote? Tangte lason kiridam ke keklardak kalidet lapen kechoklimle kalilangma? Tangte lake kachongthui kalima? Kosonsi Arnam pen kachetebokhet abang kemandunpo? Kopusonlo Arnam pen kachetebokhetji aphan asai keklem pen akenangsot ale kedo? Nang Arnam aKarjong pen chetebokhet unjima? Koan kethe lapen aman kangtui laso aKarjong ke nang theklong loma? Laso ketheklongledet abang pen kachetebokhetji aphan, kepapho un’edet a’Arnam – lake pima keklardakdedet lapen kechoklimledet kalilangma? Kopusonlo lason kiri chepeduk keklem-kedam asai akenangsot ale kedo? Tangte kadokave lahei ke kachingthui chobei kalilangma? Kopima nang kiridam ke Arnam pen chetebokhetji si kemanji aphan, tebonta ahokpet nang ke Sobar ketoi aling keklem pinak, athe nang ke Arnam aphan chinine, lapen nang kiridam ke kereng’ak kalidet “kadokave ahormu a’Arnam aphan,” ketheklongledet abang, kepapho un’edet, lapen nang methang jongjung pen kamunthidam ahormu. Klardakde pen ningje lote, laso “a’Arnam” ke Sobarlo, lapen keklem-kedam pen ningje lote, lake nang methang amatlo. Nang si nang methang pen chetebokhetji rironglo, tebonta nang nonpu ningjelo Arnam pen si chetebokhetji aphan pulo – lake pima nongno kejothap kalilangma? Kopilo lason kiri kachepaduk ale kedo ke? Jongsi Arnam aKarjong le ok chemanmedet pu asonte, Arnam akenangsotnei ke kacheklangkledetchot, kepapho un’edet aKarjong chethe along, kithipvet abang ave lapen pinchongvet arjan ave, hormu-hortar ason kalidet, menmen keledam un’edet lapen klardak kachini un’edet pinak monit atum. Kosonsi monit atum kacheklangsaksedet, kemanghumeme kethedung, angton kachinidam un’edet lason aKarjong pen kachetebokhet kethekpo? Lake kapachelai kalilangma? Lason ajor kavedet kamathadam ke abanlo lapen klem ta un’elo. Monit atum, kapinchongtang api saidelo, Arnam aKarjong pen ke ahokpet si akacheprekdam do, lasi koson si latum hini angbong le kachetebokhet kechokpo? Jongsi Arnam aKarjong le ok along chichininedet pulote, jongsi Arnam le ok chemanmedet pulote lapen eson api kacheman si Methang aphan chepabi pulote, kapinchongtang amonit atum ke longdundelo lapen Alangli pen kachetebokhetji puke un’elo, lapen halahei kangthirjir kekroidam atum komatma alangtum akarjong sining hemrengme lutdun longlo si Arnam pen chetebokhet avarsai kelongji pu atum pen anpar tame, ongdung amonit atum ke Arnam aKarjong pen kachetebokhetji aphan chemandun un’edetji. Lapen jongsi monit atum sining hemrengme along Arnam ok kachepharlotang abang akethan ateng pen Arnam pen chetebokhetji aphan ninghang pu sitame, latum doan ke kamanghuhak kilu monit kalidet atum kalilangma? Monit atum kacheklangkledet Arnam aphan “kekroi thirklong” ridun jongjongchot, lapen pima ketheklongprong a’Arnam aphan ke masapsonat tame ardi chipidunde, athe lake ketheklongledet Arnam aphan lapuan kiri kejoi pulo. Monit atum latum ninghang aling si jat tame klemlo, bonta ketheklonglok Arnam aphan kiri chepaduk ke puan kejoike kalidet. Inut abangphu pima keklardakdedet Arnam aphan kiri puke chenam ta Arnam aphan long un’elo, athe keklardakdedet lapen kechoklimledet ahormu doan ke kadokave monit atum si kamathadam puchot, lapen monit atum la kelongdunji puke un’eveklo. Jongsi nangtum angbong kevang a’Arnam ke pima kangtuiving lapen man kethedung a’Arnam komatma nangtum kepaphodun un’edet abang pulo tangte, kosonsi nang Alangli ningkehang keotdun thekpo? Lapen kosonsi nang Alangliphan kachiniji lapen klardak longji? Jongsi Alangli ke Alangli methang asai si cheklemchot, lapen monit pen kemesen kachetongpon avedet, mate monit akhei jongjong atum longdam un’edet lapen monit atum kachetongdam un’edet, pulote, jongsi Alangli nangtum aphan akeongpi asai klemlo pu tame bonta nangtum ke Alangli pen chetong longledetlo, lapen Alangliphan theklongledetlo, kosonsi nangtum Alangliphan kachinipo? Jongsi lake jongjong amonit akhei atum laso ok kelongji aphan kalidet pu asonte, monit ke Arnam aphan kachiniji atovar si avedetji, lake athema Arnam ok kachepharlotang abang si pima monit aphan bangso ok along laso Arnam pen kachetebokhetji kepalongponchot. Monit atum Arnam pen chetebokhet kelong ke athema latum Alangli pen chetong longlo, athema latum Alangli pen dorappet longlo lapen Alangliphan chibi longlo, lapen lasi pajo pen ke Alangliphan chini longlo. Jongsi lake lason kalidet pu asonte, monit atum akiridam ke ale kavedetji kalima? Lake lason le pudet ta melo, lake kadokave athema Arnam asai ajoklo atheke monit ke Arnam pen chetebokhetji aphan longlo, bonta athema lake Arnam ok kachepharlotang ahokpet lapen kemesen apotlo. Lake athema Arnam ok chemandet ajoklo pima monit atum alangtum adeng kacheklem avarsai longlo, lapen ahokpet Arnam aphan karcho avarsai longlo. Tangte lake kechoklimnei lapen asai ateng keklem ahok kalilangma? Nonke, nang nonputa ninghanglangma sining hemrengme along Arnam pen chetebokhetji aphan? Arnam Amethang elong angdeng along chepabihek pu pen anchot si, lake lason le pu tamelo, Arnam ok chemandet pen anchot si, monit ke Alangli pen chephosap lapen chepatujoi alam anta kachinidun’et abang chemanji. Arnam ke Karjong pinak: Kosonsi monit atum doan laso aKarjong pen kachetebokhetji aphan kelongpo, komatma lake man kangtui lapen angton pen kachinidam un’edet abang? Arnam aKarjong ok along nangchemandet aphi anchot si, lapen monit abang ason thakthak kachingbar eson api chemandet lote, monit atum chini unpo Alangli ningkehang lapen chenam si Alangliphan longdunpo. Alangli ok along si ningjelo lapen klemlo, ningkarong, ningkeoi, lapen monit akhei atum kesung-keboi anta chepachoilo, monit akhei atum kedo apirthe along si dodun rappetlo, monit akhei aphan raikomlo, lapen latum aphan chejalo, lapen laso pen ajok si monit atum aphan Alangli cham pangthirlo lapen latum aphan Alangli akejok lapen Alangli ahirjume kelongji aphan peklo. Laheihui ahormu longdundet aphi, monit atum ahokpet Arnam ninghang chinidamlo, lapen laso pen si latum Arnam pen chetebokhet tame longchotlo. Lake asai ateng keklem-kedam pulo. Jongsi Arnam le monit atum ketheklongledet lapen kepaphodam un’edet abang pu asonte, kosonsi monit atum Alangli pen chephosap abang kemanpo? Lake tangte kangtheidang kethan-kemum alam kalilangma?

Pini arni alangtum Arnam aphan kekroidam along, penang an amonit atum ke nonputa keklardakdedet lapen kechoklimledet si pima ribomlang. Latum ke Arnam ahokpet keklangdak asai keklem pini arni longdundepinlang, lapen nonputa ahi pen ketok alo lapen kethan aron alam along si rengdunbomlo. Anpartame, ongdung atum ke tebonta akimi alamthe along kilutdunji aphan anchotlang lasonsi “komatma Arnam aphan kanghon along akimi aove,” “Arnam pen kachephosap,” “Arnam akanghon kepaklang’i atum lapen arjan,” lapen “Pitor keklem adichi ason”; alar ke, alangtum kiridam ke nonputa klardakde lapen choklim kalidet, latum ke nonputa kethan aron alam angkang along ansi otdunbomlang, lapen latum along ke laheihui ahok alam kachinidamji aphan avedetlo. Arnam aKarjong ok kachemanlo pulote, ok along si nang theklongpo lapen Alangli sai papho longpo. Tebonta jongsi nang le nonputa Alangli pen chephosap abang chemandun thekthelang, jongsi nang le nonputa Alangli chepatujoi alam kachinidun abang chemandun thekthelang, tangte kosonsi nang ke Arnam aKarjong chepatujoi alam kachinidun abang kachemandun thekpo? Jongsi nang le pini arni a’Arnam aphan chininelang, kosonsi nang le komatma Arnam aphan non akimi aove ahut kanghon abang inut kachemandun unpo? Laheihui doan ke tangte kangtheidang ahi pen ketok alo lapen kethan aron alam kalilangma? Tangte nang Karjong aphan theklonglo lapen Alangli ninghang ateng neptheklo? Laheihui alam ke tangte kangtheidang kalilangma? Nangphan non anta laheihui alamthe lapen amek kaningjedam jongjong dordelangma, lapen mate nang Arnam aningkangsam ke lamrai kedengpon pen anchot ta longdamji puloma. Nang ke laheihui alam kaningjedam anchot si ningchepangsam’ilo, lapen nang mena jongjung akar’idam si ningchepangsamlo, nang mena jongjung ahokhedet kekroidam alam si ningchepangsamlo, lapen nang mena jongjung kachinidam lapen kamathadam alam si ningchepangsamlo. Jongsi nang le pini arni a’Arnam aphan chinine, tangte kopima nang klem-dam pu sitame, nang ke Arnam aning kehang ke ningpangsam thektheveklo. Kopilo tangte Arnam chepatujoi alam ta kachinidun abang pu kejongdam ke? Nang non anta laso alam chininelangma? Arnam pen kachetebokhet ke monit anchot, lasi Arnam amat ta monitlo. Lake pima, Arnam tame ok cheplanglo, lapen monit si chemanlo. Komatma lason thakthak kachemandun atum anchot si lahinhin aphan chepatujoi alam anta chepachoirap ari pupo, latum aphan laso pen ajok si kachephosaplo pupo. Jongsi Arnam ke Karjong puchot tangte, kopusonsi kapinchongtang amonit ke Alangli pen kachetebokhet abang keman unji?

Nang Arnam aphan akekroi, nang ahok aphan kiridun, lapen nang methang aphan nang akrong kachepon doan tame kadokave ahokpet ateng pen saide nangji: Asontin nang keklem-kedam ke cheklangdak nangji, lapen nang pima hala ketheklongrim lapen alon kemechot ahormu aphan anke ridundedet nangji. Lapuson akrong along kachepaklangchot pen ke ladak thangnat ta ale ave, lapen, anpartame, lason akai ke akenangsot si ave. Athema nang kiridam lapen chethe hini ke kapachobai lapen kachongthui pen anpar angbong si apor padam’ilo, lapen athema nang ke pima ale kedo lapen akenangsotnei ahormu aphan ke ridundedetlo, nang kelongdam ke pima ahok kalipin ason kechokchedet kamathadam lapen kethan aron alam heihui anchotlo. Lason ahormu ke nang kereng achethe along akenangsot ajor lapen ale pu thangnat kacherapdun avelo, lapen nangphan kangkokvang angthor along si ponthekchotlo. Lason ateng pen, nang kai dingpi ke thangnat ale lapen akenangsot ajor kave pen si pathon nangpo – lapen jongsi nang kenangsot ajor kedo akai rire tangte, nang ke ningkan pharo rengdun tahaiji lapen lake kadokave ale kave aphan saidepo. Kosonsi lason aphan ke monit akai pu kipupo? Tangte lake chenam si marat achethe ason kalilangma? Lason thakthak, jongsi nangtum le Arnam aphan kekroidun akrong si aphiphi kidun bor’ilo, tebonta ketheklonglok Arnam aphan ke pima kiri chepedukdedet lapen alar ke ketheklongledet lapen kepapho longdedet a’Arnam aphan si archorong, tangte lason ke akiridam ke anpar ale kavenei kalilangma? Mo kijut ahut, nang kiridam ke kivirdet abui si cheamndetpo. Nangphan lason akiridam ke kopi ale dopo? Monit along kethenei akesung ke lahenlo pima alang ketheklongledet lapen kepapho longledet ahormu aphan anchot si inghonlo, kangtuiving kemanghumeme ason lapen kethedung asai ason aphan, lapen monit atum kamathadam un’edet lapen lapu jongjung amonit atum ke kelongdun un’edet ason aphan ke riredet. Koanma laheihui ahokhedet ahormu, lapuan si latum doan ke monit atum ingsirdunlo, lapen monit atum lahei kadokave aphan mathakrang pen si chiridunthulo, lapen lahei kelongji si bor’ilo. Koanma ahokhedet latum keman, lapuan sose si lahei aphan monit atum ingsir lapen ingchaplo, alangtum mena along akeongpik abidi pen si lahei aphuthak pinchong pen abat an mathadam’ilo. Laso adular ke, koanma ahokpet ahormu doan, lapuan si monit atum lahei ahin aphan ardi kipidunde dopo; latum lahei aphan alangtun anokan aber si langrongpo, lapen ke lahei aphan aningdokdedetpo. Tangte lake la ahokpet asai pini arni Ne keklem aphuthak nangtum kelangdam alam ateng klardak kalilangma? Koanma ahokpet lason ahormu ke, lapuan sose si nangtum ke lahei aphan kechokche pu hokdunpo. Nang ke lahei aphan kangsirji apor amat si chipipedetlo, bonta lahei aphan langkranglo; nang laheihui ahokpet, kethan kejoike akenang alam ason aphan anke nang nokan aber pen si langlo, lapen komatma ahok binong laso a’Arnam aphan anta keprekjam kamunthidam ason si pangrumthuplo, lapen Alangli ahokpet lapen kemesen aphan ke kedengdunji un’edet chenamlo. Lason pen ke, nangtum keklardakdedet angbong kekroidun kalima? Nangtum ke keklardakdedet a’Arnam aphan si kapaklem un’edet akekroi dolo kedamtang ahut, lapen la ahok binong pini arni a’Arnam aphan ke aninghangletlelo. Lake tangte athema patumi a’Arnam lapen pini arni a’Arnam atum ke cheprekjam akai apot pulo kalima? Tangte lake lason loma athe ke patumi a’Arnam ke sining hemrengme along kedo a’Arnam aphan si nongpethelo, tebontame pini arni a’Arnam ke pirthe along kibihek amonit apot kalima? Tangte kalima, anpartame, athe ke monit atum karchotang Arnam ke alang kamunthidam alam pen si kapinchong, tebonta pini arni Arnam ke ok abinong’et, pirthe along kapinchong? Kadokave than’et lapen patang’et aphi, lake athema pini arni Arnam ke pima ahokpet thuong amat monit atum Alangliphan kiriredet lapu kalima? Athe kopima pini arni Arnam kehang monit atum aphan paklardak ke lapuhenlo pima monit atum aningkehanghenei ason kapaklemtoi, lapen latum aphan katherak’imeme ason henlo. Tangte lake monit atum aphan kapasungthu le pinchong kalima? Lake monit atum amek angpran aphan kapatu kalima? Lason pen si, penang an atum komatmat ma ahokpet aphan kiridundedet anke Arnam ok kachepharlotang ahotur si chemanlo, Arnam aphan kekroikredet atum si chemanlo. Lake tangte thekdak ahok alam kalilangma? Kedamtang ahut, Arnam le ok kachemanpo pubom ahut, nang ke dhorom pen kacherap abanglo tahai meme, mate inut kekroidun thirklong abang. Arnam ok cheplangdet aphi, penang an lason kekroidun thirklong atum ke Arnam abirudhe kithur atum si chemanlo. Nang chinima kopi si ladak kemanbom loma? Nang Arnam aphan akekroidun along, nang ke ahokpet aphan ke matha parsikdundelo mate laso ahok tame rirelo, bonta alar ke kapachobei along si abat ardi chipidunlo – lake tangte Arnam ok kachepharlotang ahotur kacheman keklardak atiri kalilangma? Arnam ok kachepharlotang abang ke Khristo lo, lasi kadokave komatmat ma Arnam ok kachepharlotang aphan kekroikre atum anke abirudhe kithur atum kalilangma? Lasi, tangte nang kekroidam lapen ahokpet akanghon abang ke laso a’Arnam ok kemantang aphan inutpet henloma? Lake tangte ahokpet laso kerengver, chethe kedo Arnam kopima ahok’et klangdak lapen anpar kemepik abanglo kalima? Kopilo, chenam ta, nang kiridam athe ke? Lake tangte sining hemrengme loma mate pirthe alonglo? Lake tangte kamunthidam alam puchotma mate lake ahokpet alamlo? Lake tangte Arnam loma mate lake kopine mekbin ason keman amonit chotlo? Chenam ta, ahokpet ke kethandak chethe kedengme abinong’etlo, lapen lason kethandak chethe kedengme kadokave monit akhei angbong ke akangtuineilo. Athema lake akenang dolo pima Arnam si monit pinchonglo, lapen lake Arnam methang jongjung si asai klemlo, lasi laphan ke “kethandak chethe kedengme” pulo. Lake kopine along pen si ke’enpondet kethandak chethe kedengme kalilo, mate lake inut nongnam theklong abang ketoktang along pen apot kalilo; alar ke, lake monit akhei aphan sining lapen pirthe lapen kadokave ahormu aHemphu kaningje alamlo; lake ajahak alam monit le kapinchong kalilo, bonta Arnam along kedolor achethelo. Lapen lasi laphan ke “kethandak chethe kedengme angbong pen akangtuinei” pusi pulo. Monit atum akiridam alng ahok ateng asai keklem-kedam ke alangtum adeng ateng pen kacheklempon henlo – lake pima lapule putame, lake Arnam akenangji aphan ningkapangsamji akiridamlo. Laso akenangji acho alam ke kadokave ahok pen abinong’et abanglo, lapen lake monit atum kelong un’edet kangtheidang kethan aron alam kalilo. Jongsi nang kiridam le jat ta kalidet bonta kethan aron alam lapen ladak thangnat ahok kavedet pulote, nang laso ahok aphan kachedandong kalilangma? Tangte nang ke komatne ahok aphan ketengkheng abang kalima? Kosonsi lason abangphu ke Arnam aphan kanghonji kiridunpo? Monit atum komatma ahok ateng kalidet anke komatma laso ahok aphan chongthuilo, lapen latum doan along ke kadokave ta kedolor kachedandong dolo!

Nang koson si kiridam ma puke langdamde, nang ke, kadokave pen anpar, pini arni Arnam asai keklem pima chinidun nangji, lapen nang ke laso asai akenangsot ajor chinidunvek nangji. Kopi asai si Arnam keklempon loma Alangli kejut arni kevang ahutlo pulote nang chinidun lapen klardak pen pangthekthek nangji, kopi akun si Alangli kevan loma, lapen kopi si monit aphan kepachoklim kepamanpoma. Jongsi nang laso asai aphan pima Alangli ok ahut si keklemji kevang ahut chinine mate klardak pen nepdun thekthe pulote, kopuson si nang Alangli ningkehang ason kelongdun thekpo, lapen kosonsi Alangli pen chetebokhet abang kemandun unpo? Chenam ta, Arnam pen kachephosap abang keman puke kamanghuji athai ave, bonta lake kejoike puta kalidet. Jongsi monit atum la theklonglo, tangte latum kepachunji ta thekpo, lapen lasi lake kasiksakpikji kali; jongsi monit atum le theklongledet, tangte lake akesungpik si manpo, lapen, anpartame, latum ke keklardakdedet angbong si kiridun nangji phovek nangkokpo. Jongsi, Arnam aphan kiridun along, monit atum alangtum mena angdeng kacharjapji aphan avedet, lapen kopi ahok si latum kacheparideng loma pu chininedet, tangte lake pima latum along kecheng atiri avedetlo, lapen lasi lake latum aphan karjap pathirji joikekelo. Pini arni, komatma penang an atum do laso ahok aphan kachininedet, komatma akeme lapen akeheno mate kopilo kanghon mate kelangselet pu kethak thekthedet do. Lason amonit atum ke karjap kapathir sungpik. Arnam aphan kekroi pu akrong ke ahok ateng asai keklemponthek henlo, Arnam aninghang ason kelanadunthek, monit along Arnam asai keklem alam kachinidun Alangli ok along kevang ahut lapen Alangli kaningje alam heihui kemesen kapathikvet akethan. Mulukpi atum along ke abe dundetri. Nang kopima kilutdunji aphan ke nanglong kemesen kapathikvet alam dovek nangji, lapen nang lahei cheotthipvek nangji. Halahei ahormu nanglong kedoan keotthip kethek puke pima Arnam akatheang adak-atur pen si vanlo lapen nangphan la nangrappo. Jongsi nang le un’edet, pini arni nang ke isi atovar pen cheterek ponpo, penap ke puthot si atovar pen cheterekthupo, lapen nang ke ahokpet ajat ta longlelo. Lason kacheman puke nang methang akai along ale amat si avelo. Komatmat ma ahok aphan kachininedet atum doan ke kaiketa bang alam si arjulo: Jongsi monit atum pulo pima laso Karjong Kangthir si asai keklem, tangte nang, tame, lake Karjong Kangthir si asai keklemlo pu punon; jongsi monit atum pulo lake karjong langno si asai keklem, pulote nang, sitame, ningkibidam ke dokokpo, mate lake karjong langno si asai keklemlo pu punon. Nang kaiketa bang kaningjetang alam si ruidunlo, lapen nang methang pen ke asontin ta kethakdunvet thekthedetlo, mate nang methang aphan amat ta chemathadam thekthedetlo. Lason ke komatne karjapthip angdeng kave abanglo, komatma keme-kaheno kethakvet thekthedet abanglo – lason amonit ke kivirkoi ale kavenei abanglo! Nang ke kaiketa bang kaningje alam si ruidunlo: Pini arni lasonsi pulo pima lake Karjong Kangthir keklem asai, bonta pima mantune arni ke komatne ke ningjedamdet tahaiji meme lake Karjong Kangthir le keklem asai kali, lapen pima chenam ta lake jat ta kali monit si keklem amo anchot – tebonta nang ke la theklongledetlo, lapen lason bang kaningje mo nang arjudunlong ahut lote, nang tame lasonthot si ningjedunpo. Ahokpet ke lake Karjong Kangthir keklem asai binonglo, bonta nang ke pulo lake monit si keklem asai pulo; nang tangte komatmat ma hala Karjong Kangthir keklem asai abirudhe thur si nongno kejothap abang kacheman kalima? Laso along ke, tangte nang kethakvet thekthedet apot athe ke Arnam aphan kekhamkhe kalima? Chenam ta mo arnisi ajahak kiludet atum nangklangji latum ningjeji pima “lake hi-i akarjong si keklempon asai pupo,” lapen nang laheihui alasm arjudunlonglo te nang ke kangbothei si dopo, lapen puthot nang ke bang alam ateng kachekroidun nangkok si dolipo. Aphongtin tame bang anut kaprek kasiksak vanlo tangte, nang ke nang mena karjap angdeng along charjapdun thekthedet, lapen lake kadokave athema nang laso ahok cheparideng longledet apotlo. Arnam aphan kekroi along lapen Arnam aphuthak kachiniji kiridun along ke kejoike alam kali. Laheihui ason ke kachingrum rappet lapen lam kethan karjudunchot pen ke longdamdedetji, lapen nang jongjung ningkehang’e pen ajoine ke pachoklim un’e. Nang la phoponvek nangji, lapen chini nangji, lapen ke nang keklem along chepathikvek alam dovek nangji, lapen Karjong Kangthir keklem asai longdunpo. Nang le kephopon kachetong dopiklo pu ahut lote, nang ke penang ason ta kethakvetvet thekpo – nang ke akeme lapen akeheno angbong kethakvet ta thekpo, kangthir lapen kangthirthedet angbong, kopi si ok lapen vi lapen kopisi ahokpet angbong. Nang ke kadokave ahormu angbong kethakdunvetvet thekvek nangji, lapen laso keklem along, ajat akesung le phopon tame, nang ke ingbodet un’elo. La anchot henlo nang ahokpet karjap angdeng.

Arnam asai keklem aphuthak kachinidun ke kejoipik alamm kalidet. Nanglong kemesen angdeng lapen nang kiridam along akemangdam dovek nangji, nang kosonsi ahok atovar kiridunjima chinivek nangji, kosonsi lake ahok atovar kalima kalangma pu kilinthek dovek nangji, lapen lake Arnam keklem asai kalima kalangma pu chini nangji. Kopilo kechengsi kachepathikvek nangji alamm ke ahok atovar kiridun along? Nang kelang nangji ke laso ateng pen Karjong Kangthir keklem asai doloma mate avema pulo, laheihui alammthe doan ke ahok akethan kalima mate kalang loma, komat si hakhi chepaklanglo, lapen nangphan la kopi van thekpo. Ahokpet atovar lapen kechokche atovar angbong kethakvet puke laso aphuthak kachinidamvek nangji kenangsot alamm heihui chini nangji, laso along Karjong Kangthir keklem asai doloma mate aveloma pu kenangsotnei alamm kethandam. Arnam aphan monit atum kekroidam akenangsotnei alamm ke Arnam aKarjong aphan kekroidam henlo, lapen alangtum Arnam monit kachepharlotang abang aphan akekroi puke athema laso amonit ke Arnam aKarjong along cheklangdak asonlo, athe ke laphan pima lason akekroi ke nonputa Karjong aphan si kroilo. Karjong lapen ok angbong kacheprek do’o, bonta athema laso amonit ke Karjong pen si vanglo apot, lapen laso Lammthe si Monit chemanlo, lasi kopima monit kekroidam along ke nonputa Arnam along kedolor kenangsotneilo. Lasi, lahenlo ahok atovar kalima kalangma pu kethakpon along, kadokave pen athaksi ke laso along Karjong Kangthir keklem asai doloma avema pusi nang langvek nangji, laso pen aphi si laso atovar along ahokpet kedoma kavema pu nang langvek nangji. Laso ahok ke jongjung monit akhei atum chethe akunlo, lapule pudet tame, lake pima monit akhei atum kenangjiveklo Arnam monit akhei aphan kapinchong kecheng ahut pen, lake athe, jongjung monit akhei atum angton pen (monit atum angtan ahormu kachinidamthek ason, aklong’et pen kachinidamthek aboi, kethek-kere, lapen monit ke kopusonlo pu kenangsot alamm kachinidam). Pima lake, nang laso atovar pen ajok monit atum aphan jongjung monit atheng akai ponthekma thekthedetjima langdam nangji, laso pima kaningjetang ahok alamm ke jongjung monit atheng ahokpet kephodam ateng pen kalima kalangma, laso ahok ke keklemvoi lapen ahokpet kalima mate kalangma, lapen lake apor ateng si cheton pemelo pu kalima kalangma. Jongsi la ahok dolo, tangte lake monit atum aphan kemesen lapen choklim kephopon longvekpo; monit atum, anpartame, ansose si choklim chemanpo, alangtum ok akai lapen karjong akai tame ansose si chokvetpo, lapen alangtum ning aduk antame kemesen si ansose manpo. Lake adunthu kekroidam kachithikvet alammlo. Akaprek isi kekroidam kachithikvet alamm dothulang, lake monit atum Arnam aphuthak kachinidam batbom loma mate batbema, lapen lason asai lapen ahok keklemponlong pen ajok latum along Arnam aphan pachinghonji ningrungloma lapen Arnam adung si ansose patebok longloma longlema. Laso along lake ahok atovar kalima mate kalangma pu lindamme. Akenangsotnei alamm ke laso atovar ke ahokpet loma mate lake mekbin kemanghumeme ason loma, lapen lake monit aphan chethe piloma pipe loma. Jongsi lake laheihui kekroidam kachithikvet alamm ateng pen chetonlo pulote, kepajutdam ke longdampo pima laso atovar ke ahok atovar binonglo. Ne pulo laheihui alamm ke nangtum mohut akai ahut nang akaprek akrong chetongdamdetji pule padengji aphan kalilo, mate kelangdammek pen pima mohut akai ahut akaprek akimi akai asai doji pu kalilo. Ne pulo latum aphan pima laso pen ajok nangtum chinidakji athe ke pini arni laso atovar henlo ahok atovarlo, laso pen ajok nangtum ephar anchot le nang akekroi along kedochotji kalilo pini arni asai aphuthak lapen aklong’et alamm tame longdundedetpo. Penang an atum komatma dolo, chinilor aphi sitame, nonputa kamanghu pen si dobomlang; lason kachinilor puke kekroidam chithikvet alamm avedetlo, lapen latum ke prapjin kalite derchet pu sitame virvekpo. Komatma alangtum aphiphi kidun along aningrungset atum doan jasemet ke kethom aphar ahokpet do lapen son pho aphar ke ahokhe do, lake cheklanglo pima latum kecheng atiri ave. Athema nangtum ajakong ke boidet lapen nang kecheng atiri ke arnuknedetlo, nangtum ke kethakthekvetvet akachinidam ta avedetlo. Arnam ke Alangli sai pachiruithuthelo, Alangli ke pima ahokhedet asai ke klemklelo, Alangli ke monit atum abat akenangji aphan ke pemanmelo, lapen Alangli ke pima monit atum angtan ahormu kachinidamthek ason an asai abat ke klemklelo. Kadokave asai Alangli keklem an ke monit atum mesen angtan ason kachinidamthek angkang ansi dochotlo, lapen kemesen monit atheng angtan ason kachinidamthek pen abat ke damdedetlo, lapen Alangli sai ke monit jongjung mesen akenangji ateng ansi klemponlo. Jongsi laso asai ke Karjong Kangthir si klemlo, monit atum ke ansose si kemesen manpo, lapen alangtum monit atheng tame ansose si kemesen chemanpo. Monit atum ke alangtum Sobar kahenodak akun aphan si abat kachinidam longponlo, lapen monit atum aot-adur, lapen latum ke ahok aphan thedung akar’idam si ansose longdamthulo. Pima lake lasonlo, monit atum akai ke chanbom lapen chanbomlo, lapen monit along kedo kahenodak akun tame ansose si kachelarponbom dothubomlo – kadokave laso ajok Arnam pu alamm ajor ke monit akai asonsi chemanbomlo. Jongsi laso atovar ke halahei ahormu pima monit aot-adur alamm paklangdak thekthedet, lapen, anpar sitame, monit atum aphan Arnam angno van thekthedet mate latum aphan Arnam aphuthak ahokpet pachinidam thekthedet, lapen alangtum monit atheng tame ansose si ardi pavethudet si peman lapen alangtum angtan ahormu kachinidamthek ason ta aphu plengple, tangte laso atovar ke ahok atovar kaliveklo, lapen lake karjong langno keklem asai tahaipo, mate abarim ateng akronglo. Pathihek pen, lake nonjong Karjong Kangthir keklem asai kali binonglo. Nangtum ke laheihui kadokave aningkan pen Arnam aphan kroidamlo, tebonta nang ke ahok atovar lapen ahokhedet atovar kethakthek kekroidam chithikvet masapso ta kachinidam avedet, mate ahok atovar kiriji aphan. Ongdung amonit atum ke laheihui aphuthak anta aninghangdunde; latum ke akeongpi atum konatma kedam si dunthaplo, lapen kopima akeongpi atum kaningje si ruidunlo. Kosonsi lason ke komatne abang ahok atovar kiri pulo? Lapen kosonsi lason amonit atum ke ahok atovar kelongdunpo? Jongsi nangtum laheihui kenangsot kekroidam chithikvet alamm penang an longdunthek’lo, tangte ajat le pho sitame, nangtum aphan ke chongthui un’elo. Pini arni, lake pima monit atum aphan arsikjiklo kethak thekvetji aphan; lake kopima kemesen amonit atheng kelongvek nangpo, lapen lake kopima monit atum alangtum kephopon along kelongvek nangpo. Jongsi, pini arni antame, monit atum nonputa la keklembom along thangnat ta kethakponvet avelang, lapen jongsi monit atum kilu lit’ongchot, lapen alangtum akiridam ke chokchepin lapen suipenglo. Pini arni nang kiridam along ke masapsonat ta kethak thekvet puke avedetlo, lapen lake ahok’lo athe ke, nang si pulo, pima nang ke ahok atovar thek’longlo, tangte nang longdun loma? Tangte nang asontin tame kethak thekvet doloma? Kopilo ahok atovar akenangsot alamm ke? Ahok atovar along ke, nang ahok atovar longdundedetlang; nang ke laso ahok aphuthak ajat tame longlepinlang. Lake lason henlo, nang ke ajat ta longlelang pima nangphan Arnam kenangji ateng pen, lapen lasi nang akahenodak along thangnat ta kachelar avedetlo. Jongsi nang le laso ateng pen si ridunbomlang, nangphan padusi ke pavirdetpo. Laso arni an nangledundet aphi, nang ke chinivek nangji pima nang keponbom atovar ke ahok atovarlo, lapen anpar ke kamanghuhedet si nangpo. Penang an amonit atum ke kaiketa chinidakdedet lapen ahok aphan kiridun ingtonkok athema ajahak masapsap alamm ajoine. Lason amonit atum doan ke komatmat ma Arnam keklem asai aphuthak kachinidam kave apot; latum doan ke komatma kamanghu pen si Arnam aphan kroidunlo. Monit atum komatma Arnam asai aphan kachininedet anke Alangli pen kacheraphetji tame cheman un’edelo, mate Alangli pharman hakhi karjappiji ta thekthelo. Ne nangparelo komatmatma hirjume kirichot lapen pima keklardakde lapen kechok’limle aphan kiridunchot anke un’an akeprap pen ahok le ridunnon, laso pen ajok alangtum achethe akenangsot ardi longdunji aphan. Anpar ke nang methang aphan chepaludetrinon!