Komatma Ok pen Kedo Atum Anke Inutnat ta Ningkithi Arni pen Chepajok Un’e

Pini arni, nangtum kerengji aphan Ne nangthanlang, Ne sai mesen pen kichunji aphan, laso ajok Ne keklem pangcheng asai pirthe adang anta keklemlong pame lapen kichun pameji aphan, lapen ajok Ne lam, jakong, man lapen kangsai adettin lapen ahavartin amonit aphuthak kevanji aphan. Nangtum angbong Ne keklem asai lake pirthe adang keklemji asailo. Nonke kijut apor nang kelelo sita, chini iknon la “kijut arni” puke isi akai kijut aphanlo; Aron Akai, Kanghon-Kangjinso Akai pu ason thakthak, isi akai aphan si pudamlo, lapen lake isi akai ingthimlim aphan si pudamlo, bonta penang an aningkan mate achiklo pu aphan kali. Bonta, non kijut apor ke Kanghon-Kangjinso Akai lapen Aron Akai arni ason kali. Kijut apor ahut ke Israel pen le keklemji kali, bonta kekroikre atum angbong si klemji; lake Ne inghoi Israel adet pen anpar ahavartin lapen akheitin along cheraire aphrang, Ne nong pirthe somindar adang anta kachethanji aphan. Lake pirthe adang Ne nong kachethangplupji aphanlo, lapen ajok kereng api doan ta Ne nong adettin, aove ove anta kedambomji aphan, lapen pirthe athak lapen sining athak kereng api doan ta Ne pirthe cherai tanglo pu ketheklongji aphan. Kijut apor ahut keklem asai ke kacherai mate kachepahai asailo. Lake pirthe athak achethe lapen monit atum an akerap pen kali, bonta pirthe athak monit akhei atum akijut un’e akisung, ningkan suri suri an ajak kiding akisung kijutpo. Laso ajoine, kijut apor ahut asai ke kedamtang apor ahut Israel ahavar along ningkan suri suri keklem asai ason kali, lapen Judea ahavar along ningkan hini kethom sai keklem pen ajok batai hini aphong Arnam monit ason kacheparjan abang kevangthu ahut an ningkan suri suri sai keklem lapu ta kali. Kijut apor ahut monit atum kachetongji lake pap pen kepajok abang monit ason nang kacheklangthu henlo, lapen Arnam asai lapen alam latum arju longpo. Ningkan suri hini jutdet ansi kijut apor nangleji lapu kali; lake ajak thihek, Judea ahavar Kanghon-Kangjinso Akai ahut Jisu sai keklem ahut asonthotpo. Kopima kijut apor ahut lake isi akai si amo kirippo. Lake Arnam ningkan suri throk angbong sai keklem amo kangtonlo, lapen lake monit akhei atum kisung kachechak pen kepajokpo. Latum monit akhei aphan kai kimi along ponsi monit achethe kimi padobomji lapu kali; lake Ne kemang asai angkung lapen monit atum kerengji cheprekdakpo. Monit akhei atum jongsi lapu si dambomlo pulote, keder keprap pen pu sita latum aphan hi’i cheraidetpo, lapen Nelong kedotang akarjong anta laso arideng pensi panahoklappo. Ne sai ke pima ningkan suri throk an ajak dinglo, lapen Ne lammchak pilo lake Sobar monit akhei doan aphuthak kachepahemphulong ta ningkan suri throk pen akele ke avedetpo. Lasi, non ke apor chok tanglo. Ne chechengthuthelo mate apor paderdelo: Kijut arni ahut Ne Sobar aphan paremdetpo, Ne nongthe an Ne che’en thudetpo, lapen pirthe athak monit atum akarjong Ne pharman anke Ne cheraithuji laso ajok latum kijut un’e kisung atalo pen kejok longji mene, lapen ajok pirthe athak Ne sai angkung Ne pajutpo. Pini pen ephrang, anparke Ne puthot pirthe along monit ason nang cheparjan thuthelo, lapen Ne kacheraidet aKarjong anparke pirthe athak puthot sai klemthuthelo. Ne bonta pirthe along eson asai klempo: Ne monit akhei pinchongthupo, lake kangthirjir amonit akhei lapen lake pirthe athak Ne lamm kekroi arongsopi plangpo. Bonta chininon Ne kadokave pirthe adang an aphan phangnone, mate Ne kadokave pirthe athak amonit akhei an aphan pavirve. Kedolang phant thom aphan ke Ne padoji – la phant thom lake Nephan nang kanghon atum lapen Ne kachepahai longtang pame atumlo, lapen la phant thom atum aphan ke athe papathe’o po lapen pirthe adang pachanripo lake Israel atum le aron arlo along keklem ason thakthak’lo, ke’ongdung biresak lapen chainong ahur atum aphan pisi pirthe athak akeplang-kiphi an latum aphan pipo. Laso amonit akhei atum ke jut un’epin an Nelong doverpo, bonta pini arni amonit atum ason keter pen plengsetji kali, bonta Ne kacheparidengtang amonit akhei atum si chingrumpo. Lason amonit akhei atum aphan ke Sobar ta panahok, pasiksak lapen ajat akaheno ason ta klemklelo, lapen Sobar aphan Ne haidet aphi kedolang amonit akhei ansi pirthe athak dochotpo. Lahei amonit atum ke Ne kehaitang lapen kacheparidengtang amonit lapen Ne kechaktang ateng pen kedenglong atum saidelo. Lapensi, kijut apor ahut Ne kachepahai longtang amonit atum ke kejok long si kijut un’e ahirjume longji. Sobar aphan Ne keparem, lapen Sobar pen ron kachedan along isi angthek lapen ale kelong ke la’an chotlo. Lahei ron kachedan ale ke Sobar arideng pen monit aphan Ne kepajok, lapen ningkan suri throk a kisik-kedang kemangdam angbong Ne sai keklem angkung pen athe kelonglo. Latum ke adettin lapen adhoromtin, ahavartin lapen sining pirthe adang pensi vanglo. Latum ke prekjam akhei atumlo, alamm aki prekjam dolo, anim-rokom lapen areng alir, lapen latum adettin lapen adhoromtin alongta rikthiplo, lapen pirthe adang atok-ano anta dothip’lo. Kijutke, latum vang rappet pen isi kangthimlim amonit akhei pinchongpo, laso isi kachingrum amonit atum aphan Sobar asong atum ta le dam un’edetji. Ne kachepahai longle lapen kepajok longle amonit atum ke talo akarnuk along inglimchok si, kijut un’epin kekhang un’epin ame chodetpo. Lahei keterkloi, arta kedotang amonit atum aphan Ne pavirkoiji, Egypt adet along biresak aok kecho, lapen avi kijun atum an, lapen inghap angho along biresak avi kivit a’Israel akhei atum aphan si pajokchot bonta Egypt adet along sonu-sokleng aphan apran karmut’et ason thakthak. Tangte la Ne kehailongtang lapen kacheparideng longtang atum ke Ne hem amonitlo lapen Biresak aok kecho lapen kijun atumlo, lapen la Biresak ke Ne henlo, lapen Ne si latum aphan pap pen kepajoklo lapen Nephan si nang kangduklo kalima? Tangte lahei amonit atum aphan kaike ta Ne dak Ne tur si dunkrilo kalima? Tangte la Biresak ke Ne henlo lapen Ne ok kechoche atum ke karnuknei atalo along inglimjoilo kalima? Pini arni nangtum Nephan nang kroimolo, lapen pini arni Ne lam ke Jehovah le Israel akhei along Alangli somar lapen sumar aphan kethan alam asonlo. Bonta nangtum aning kangtang pen ajok Ne ning kithi ason ongbomlo, nangtum aphuthak kisung batbomlo, nangtum apap aphuthak kangsai inglumbomlo, lapen nang kaheno ajok Ne ning kithi nangtum aphuthak bat bomlo. Pini arni jongsi nangtum Ne phuthak lason nang klem lote, mo Ne ning kithi ahut komat si jok unpo? Komat kaheno amonit si Ne mek angden pen ado kepho chepajok unpo? Komat apap si Ne, jakong kethe aBang aripak pen kachepajok unpo? Koson si lam karjuje atum anke Ne, Jakong Kethe aBang akangsai chepajok unpo? Ne, Jehovah, si nangtum aphan nangpulo, kekroikrelang atum ahemtun, lapen Ne nangtum aphan nang kethan alam anke Aron Akai lapen Kanghon-Kangjinso Akai anta lit’etlo, bonta nangtum ke Egypt adet amonit atum anpar lam chingkinomulo. Ne ingsamjin pen sai cheklembom ahut Ne ning nang kithi an ason nangtum pangrumlo kalima? Koson si Ne, Jakong Kethe aBang arni nangtum sungsepin pen kachepajok thekpo?

Ne lason si nangtum angbong lam ta ningjelo lapen sai ta klemlo, Ne jakong chepadampiklo lapen bor’ipiklo, bonta komentu si nangtum Ne nangkethan alam nangno kachedenlo? Konat si nangtum Ne, Jakong Kethe aBang aphan nang kangduklo? Kopi apot si nangtum Nephan lason nangvi loma? Nangtum keklem lapen kaningje ason an ta kopi apot si Ne ning thi meme ason saidema? Kopi apot si nangtum aning ingtang’ur loma? Nangtum Nephan ning nang kepa’oi lapen kamatha nang kepasung pen anpar ajat ta thektheloma? Ne Jehovah nangtum aphuthak Ne ning kethi nang kepale kangtungma? Nangtum Ne lam karjuje pen ajok Nephan ning ne kepathi apot nangtum aphuthak nang kepaleji si nang kanghonglangma? Ne keklem ason an ta nangtum apharman le keklem kalima? Bonta nangtum ke Ne, Jehovah aphan lason si ning ne pa’oilo: Ne pharman karkli ajaton kachonghu, Ne dovan along pen dan do’an ensi sirung angthor pon si asomar, asomar lapen asomar atum aphan pangkranglo; monit atum chebohongsailo, Ne, Jakong Kethe aBang alam pen phuthak lam chedanlo, chir, nok pen lapen ning kithi pen chelangdinglo, lapen keterpik abarpi ason thakthak varchorlo. Nangtum ahok kedo konatlo? Monit aot pen ajok nangtum henodak tanglo! Nangtum aning ajak dingklui pen arlong ason cheplang tanglo. Ne ning kithi arni nangle lote Nangtum pini arni Ne phuthak keklem akaheno ason an pen apot Ne, Jakong Kethe aBang nang ingsaiji pu nangtum chini loma? Nephan lason nang kachongthui, Ne lam nang arjuje pen varchorlo – lapen Ne nang kelang dunde ahut nangtum keklemthap pen apot Ne ning kithi nangtum chepajok unji pusi kamathama? Nephan karkli athok nangkipi ason nangtum kachonghu lapen Ne hormu doan nangtum nang kithi ke, Ne Jehovah Ne mek pen nangthek dunlong pu nangtum chininema? Nephan karkli athok nangtum kachonghu ahut dovan pensi nang ponlo pu nang chininema? Nephan nang kachongthui asai ke reset pensi klemlo pu nang koson si kachitinhailo? Nang keklem kahenodak apap pen apot koson si Ne ning kithi nang phuthak kepavethekpoma? Koson si Ne ning kithi ahir nangtum keklem kaheno aputhak kepalom pondetpo? Nangtum pini arni lahei kaheno asai keklem pen penang an ason jok’iji, bonta penap kangsai arni aphan nang pap anghor kachepardiklo; Ne, Jakong Kethe aBang nangtum aphuthak ansose kangsai van ingtunglo. Koson si nangtum kaheno asai keklem lapen kaheno alam kaningje ke Ne nang aphan koson si kangsai kevanvedetpo? Nangtum akardom koson si Ne no nang karjupo? Nangtum akaheno pen ajok koson si Ne tovar nang kethopipo? Nangtum Nephan nang kachedan lapen sai kaheno keklem koson si Ne katengne unpo? Koson si nangtum ade pherui ade ason ben bikar keplengset Ne rotredet unpo? Nangtum akeme pen ajok le Ne long nangtum kevang kali, bonta nangtum akaheno a’ot pen ajok nangtum aphuthak Ne ning kithi plengset tanglo. Koson si Ne nangtum aphan nang diya unpo? Ne, Jakong Kethe aBang amek angden ke, nangtum alam lapen asai anta kaheno saidelo. Ne, Jakong Kethe aBang amek pen nangtum kaheno asai keklem anta nang chechardunlaplo. Ne nangtum aputhak kevan ado lapen kangsai nangtum aphuthak pen koson si kedamjui thekpo? Nangtum Ne phuthak lason klemdetlo, lapen ning nang pa’oi lapen ning nang pathilo apot si, mo Ne, Jehovah pen nang ado nang kipi lapen nang kangtonji arni nangle lote, koson si nangtum Ne ripak pen kachepajok longpo? Nangtum lam kaheno kaningje an ta Ne no nang arju longlaplo pu nangtum chininema? Nangtum kaheno asai keklem pen apot Ne kangthir’et lapen kechoklim ape ri aphan paterlo pu nangtum chininema? Nangtum lam karjuje pen apot Ne ning nang kithi aphai batpiklo pu nangtum chininedetma? Ajir dingklui pen nangtum Ne ning kiding asat nanglanglo lapen Nephan ning nang pakanglo pu nangtum chininema? Ne ok aphan nangtum phangnodak si, rakthang anlo pu nangtum chininema? Non an Ne chechaksen pen dolo, non ke Ne ning kithi chekhangkhelo, lapen nang chechakchelo. Nangtum kaheno asai keklem an Ne mek angden nang cheklanglaplo, lapen Ne kachiru Ne Po ano an le tanglo pu nangtum chininema? Ne phuthak nangtum lason nang keklem kosonsi Ne po nang kekroi dunpo? Ne nangtum angbong sai keklem anta nangtum apharman si klemlo kalima? Tangte, Ne, Jehovah keklem asai nangtum angbong ning kedok, ning kangsam abang komat si kedo? Ne jakong ave lapen Ne kisung chechak nanglo pu aling si Ne Po alam lapen aning kehang aling Ne kroikredetpoma? Ne ning alam nangtum nang chininema? Jehovah keklem ateng si Ne nangtum aphan lam nangchingkilo; nangtum ajoine ake’ongdung ason Ne che’o nanglo kalima? Ne Po asai ajoine pen ajok lahei akisung an ta Ne kachechakji aphan ninghanglo sita, koson si Ne kisung kepho ajoine nangtum aphuthak ado nang kipiji nangtum chepajok unpo? Ne pen ajok nangtum ning cheparong longpiklo kalima? Pini arni, Ne Po ke Nephan nangtum arideng nang hodaidetlo; lapen Ne lam kaningje pen anpar nangtum aning cheparonglo kalima? Nangtum aning arong pen kedoji aphan si Ne chethe nangchelardetlo pu nangtum chininedet loma? Ne chethe pen ajok si Sobar pen ron kachedanji aphan ajaton enlo, lapen nangtum aphan Ne chethe nangpidetlo, lapen ajok nangtum phant pharo an denglonglo lapen ke’ongdung asat pen joklo pu nangtum chininema? Ne sai pen ajok si nangtum ke’ongdung asat pen lapen Nelong pen kevang ado kipi asai an pen nangtum joklo pu nangtum chininema? Non an nangtum ning kacheparong longbom ke Ne pen ajok si Po nangtum aphan apor nangpi bomlo pu nangtum chininema? Koson si nangtum pini arni anta nangtum aning along ok reng kebangthip ason nangtum aning ingtangkoi lapen dothing bomlangma? Koson si pini arni nangtum kaheno asai keklem pen apot Ne ning kithi lapen Ne laso apirthe pen kache’o ahut nangtum kachepajok unpo? Koson si kangtang’ur lapen kedothing atum aphan Jehovah aning kithi arideng pen kejokji si Ne kekroipo?

Kedamtang apot chemathadamtha: Nangtum aphuthak komentu si Ne ning kithi kachepaklang, Ne lam kangtang pu kedolo? Komentu si nangtum pen Ne angbong chebohongdut kedolo? Komentu si Ne nangtum aphan ason avepin pen apot nang kangchek kedolo? Nang mek angden along komentu si Ne nang kangcheklo? Ne keklem asai ajoine si nangtum aphan asat kelang pen kejokverji le Po arideng Ne kachoningri kalima? Kopi apot si nangtum Nephan lason nang kanghoilo? Ne jakong pen ajok nangtum a’ok aphan aduk nanginghoi loma? Kopi apot si nangtum Nephan lason pen alar nangtuloma? Ne phuthak kangsamhek lapen kesodak ason nangtum nangbakdet pen aphi, nangtum ke sodak ta kali ingsamhek ta kali planglo, lapen lam kedok pen nang kebaiji, lapen ke’ongdung ason Ne mek angden pen kepatuji aphan bor’ilo, lapen nangtum angho ke kaheno angthe pensi plengsetlo. Nangtum ade pen ajok Ne Karjong aphan nangchongthui unji pusi nangtum kamathama? Nangtum ade kaheno Ne ning kithi pen chepajok unji pusi kamathama? Nangtum ade kaheno pen apot kangsai pho jokplotji lapen Ne, Jehovah aphan nangtum aning kehang aling inghoime pusi kemathama? Tangte Ne ke monit atum aning kehang aling kangsai kevanme a’Arnam ma? Thangbakbe aingki avosok aphan Ne phuthak kachobei alam pavan longjima? Koson si lason lam karjuje asopomar aphan koson si kijut un’e ahirjume angbong kedodunpo? Nang sai lapen nang lam kaningje pen ajok aphrang pen cheklangdak si nang pinrem tanglo. Sining lapen pirthe kapinchong ahut, kaprek-kaprek api ahur atum aphan aninghang aling paklem longle, Ne sai lapen Ne kemang ajaimek along nang kapasiksak lapen aninghang aling keklemlong ke aphi alamlo. Ajat ahormu lapen monit aphan ta Ne chechakdingde; tangte Nephan nang kahijim lapen nang kelangselet atum aphan koson si Ne kepajokpo? Ne lam aphan kachedan atum an aphan koson si ne kadiyapo? Ne lam karjuje atum aphan koson si Ne kepajokpo? Monit atum achethe kachecharmek ajakong Ne, Jakong Kethe aBang along le kedo kalima? Tangte, koson si nangtum akangthirthe lapen lam karjuje ke kangthir asailo pu kipu unpo? Ne akangthir’et aphan koson si nangtum apap kepater unpo? Kangthirthe lapen kaheno pen apot Ne terlo lapu kali, lapen kangthirthe atum kahodai adan ta kedeng Ne ning arongre. Nangtum jongsi Ne, Jehovah aphan nangkroi pame pulote, Ne dovan athak kebattang athok-ajir nangtum kacheraidet hailo? Bikar pen keplengset ade pen ajok Ne men kangthir aphan nang chongthuidet haijima? Ne lam aphan nang lason chedandut haijima? Sobar, kahenopik abang aphan Ne nong lapen Ne men kangthir ke ajaton ason ke’enji aphanma? Ne chethe ke kangthir’et amonit atum aning arong kachipi’iji aphan chotlo. Nangtum aphan koson si Ne chethe pen ajok ninghang aling kijui’i longpo, lapen nangtum angbong kachebohong’i ason kemanpo? Nangtum koson si la an kamatha kanglang lapen Nephan nang cheme ingtungtedetlo? Nangtum akai along keklem kaheno ason an ta Ne toklap pu nangtum chininedetma? Egypt adet aphan Ne ado kipi ahut nangtum koson si Ne ningkithi pen kachepajok unpo? Koson si nangtum abatai batai, non ason Nephan nang kachedan lapen nang kachesongji aphan Ne nangkekroi dunver thekpo? Ne nangtum aphan nangpulang, mo arni nangle lote, nangtum aphuthak ado nangkipiji ke Egypt pen anpar litjetji! Ne ning kithi arni nangtum chepajok unjima? Ne nangtum aphan chenam si nangpulang: Ne ning kiding lake nangtum keklem kaheno lapen mo nangtum aphan ado nangkipiji arni aphan si boche chotlo. Tangte, mo Ne ning kiding arni jut lote, Ne ning kithi pen nangtum aphuthak kangsai kevang ahut nangtum le kisungji kalima? Ajat ason ta Ne, Jakong Kethe aBang arideng le kedo kalima? Tangte, ladak sining arum along nangtum Ne lam karkanji aphan koson si Ne nangkekroi dunthekpo? Nangtum akai achethe ke sungpikpo, kopima nangtum ke Kepajok Abang aphan chetong’etlo, Alangli chevangthuji pulo bonta non anta vangvedetlo. Nangtum ke Alangli hoturlo kalima? Jisu ke nangtum ajirpo si planglo, bonta nangtum ke Kepajok Abang ahotur cheplanglo. Nangtum jongsi Jisu ajirpolo sita, nang kaheno asai keklem pen ajok kahijim meme atum atelong along aphai kepabat dunlo kalima? Nangtum Jehovah pen chemepiklo sita, nangtum lam kaheno kaningje Jehovah ano angden along le tanglo lapen aning pakang tanglo pu nangtum chininema? Tangte, Alangli nangtum pen koson si kacheme thekpo, lapen koson si nangtum atelong, kaheno pen keplengset aphi me nangthorpipedetpo? Koson si Alangli nangtum ahotur cheplangpledetpo?