Kangjuitang Arvo le Alangtum Angkur Along Chele lote, Kadokave Nang Kaheno Keklemtang Doan Apot Nang Ningcheoipo

Nangtum angbong Ne keklemtang doan tame nangtum kadokave nang mena amek pen theklonglo, Ne kaningjetang alam heihui doan tame nangtum methang si arjulongpetlo, nangtum aphan pulote Ne ning kopusonma puke nangtum chinipetlo, lasi nangtum along laso asai Ne kopi apot si keklem loma pu nangtum chini nangji. Kadokave ahokpet pen Ne nangtum aphan ningjelang, nangtum doan ke mo kijut arni Ne kehaidongji asai kapachunji amung pen akaprek thangnat ta kalilo, Gentile adet angbong Ne sai kapangdangji aphan kapachunji asonsirik saidelo. Nangtum kangthirthedet, keterbung, kekhangthip, lapen kachedandong pen si Ne ningjelo Ne sai kapangdang pemeji aphan lapen Ne men Gentile adet angbong kapachethangji aphan, pima lake, Israel pen angtan adet kaprek doan along kapachethangji aphanlo. Lake lasi pima Ne men, Ne sai amo, lapen Ne se Gentile adet adangpi tame kachethangji mene pu aphanlo, lapen lasi halahei kadokave adet doan mat si Israel along kalidet aphan anke Ne si cheraidetji tahai lapen Nephan si archoji, Israel lapen Egypt alongle pen angtan si Ne kangthir alongle chemanpo. Ne sai kapangdang pu ahokpet ke Ne kachepahaidongji asai kapangdanglo lapen Ne kangthir alongle kapangdanglo; lake pirthe along Ne kengkam kapathirji adim kapangdanglo. Nangtum klardak pen chichini nangji pima nangtum doan ke Ne kachepahemphutang Gentile adet angbong kapinchongtang amonit atum anchot. Abinong’et ke, nang ke man-peng ta ave mate ke’en longji aphan thangnat ale ta ave, lapen akenangji thangnat ta avepin henlo. Lake athema hi abui-angsom along pen ingthan ke’en’et pu aphanchot athe angton alongri along Ne kachepahemphuji aphan angthek ke’enpon atum pemanlo, angton alongri along Ne kachepahemphuji aphan “kejongpon ason-amung” si pemanchotlo, pima Ne pen kachetonglong ke nangtum aphan kopai kemelo, lapen Ne pen nonke doraprap longlo. Lake athema nangtum man-peng kangdei pen pima Ne kachepahaidongji asai pachunji aphan Ne kangvaipon angthek lapen kejongpon atum ke nangtum saidelo. Lake pima laso athe pen anchot si nangtum angbong Ne klemlo lapen ningjelo, lapen pima Ne renglo lapen nangtum pen lomso dolo. Lake athema Ne kisik-kedangpon apot anchot pu pima nang chinivek nangji lapen hi abui-angsom along angthan aphan Ne kelangseletpik ajoine pen si pima Ne nangtum angbong lam kaningje – lake pima Ne ningkithipik pu along an kelelo. Jehovah le Israel along keklem asonthot ke Ne nangtum angbong keklem ke chingbarbepin, lapen, jongdamvet pen, lake Jisu le Judea along keklem ason pen tame chingbarbe. Lake thedung akachekhang pen si pima Ne kaningje lapen keklem, lapen lake thedung ningkithi lapen akangsai pen si pima Ne laheihui kahenodak atum aphan kachepahaipon. Jehovah le Alang amonit atum aphan Israel pen kejapon ason kalipin. Alang Israel along asai ke an lapen chethe alang kipichot, lapen latum aphan kipibom ahut Alang amonit atum aphan Alang kanghon lapen kangjinso ongparpik. Pini arni asai ke hirjunotang adet along kangvaivedet amonit atum angbong si klemponlo. Keongdung a’an ta ladak ke ave, mate ladak ke chethe alang pen kang’it kachepamedetji pu amung ta ave, lapen keongdung ason-amung ahormu heihui kepador pu tame lake durepik an; kangsai, hirjuno kipi, lapen ado kipi anchot si keongdung pen padorlo. Laheihui hi abui-angsom along kedobom angthan atum doan ke chenam si bi lapen biresak keplengchen anglong kelongji ke ingthirthepinlo, lapen akemeneinei aosomar kadokave alongri along, lason si Ne le Israel aphan kipi ason. Nonlom a’Israel ke bi lapen biresak lapen ser lapen rup ahormu pen Ne monit atum aphan kalana kipipon akachelarlo, aron aber along isi pen kep an Jehovah akenangji ateng pen ongjetlo, lapen lasi Ne latum aphan kipi paongthu muchotlo – aron aber along Israel atum kelong nangji ateng pen isi pen batai pharo isi an pabatdetlo. Pima laso pen si Abraham kelong kedoan pen ke Ne Israel aphan kelana palitjetlo, lapen kadokave Isaac kelong pen anpar. Israel along ahemtun aphan Ne athe pathe’opo lapen abat pipo, lapen pirthe adangpi along Ne Israel amonit atum aphan Ne pachethangpo. Komatmat ma Ne hirjume lapen kalana kipi atum doan aphan ke kangvaitang Israel amonit atum saidelo – lake, mat si Nephan kachipidet amonit doan lapen mat si Ne pen ajat tame kelongtang doan. Lake athema latum Nephan aphu along chibilo pima alangtum Ne kangthir adim along pahachemi achainong lapen biresak aso doan latum athok-ajir pilo lapen Ne thengno asontin tame latum nanghodaidetlo, Ne puthot kevangthuji pu ningchethedam pen alangtum hachemi kechengsi asopo aphan tame nangkipidetji angdeng an dolo. Lapen nnagtum ke kopusonlo? Ne kasedeng nang pathurlo, Nephan si nanghang bomlo, lapen Nephan asonson ahormu kipitang komatmat ma kachipidet atum doan; lasi, kadokave nangtum kelong ke kangting along kachiru lapen ado kepho anatlo. Nangtum Ne kasedeng penang an abatai nangpathurlo, lapen Ne kekar’ang ame Ne elong angdeng anke paklodutlo pima la ajahak amonit atum ke jinsomeme akijut chetong nangkoklo, lapen ningkarong ahemtun amokha ke kangtheidang kithitang atum kedo adim si chemandetlo. Kadokave Ne laheihui angthan atum doan aphan ke kijut un’epin ningkithi si dolo, lapen latum aphan Ne hirjume kipiji aphan mathaletle. Lake pima Ne sai apot ajoine pusi Ne kedengponchot lapen kangthurchotlo, lapen thedung katherak chechak nanglo lapen nangtum angbong sai klemlo. Ne Po aningkehang aphan jongsi kalidet tangte, kosonsi ne le hi abui-angsom along kijuijam angthan atum pen isipet ahem along kedo thekpo? Ne ke nangtum keklem-kedam lapen lamthe heihui doan apot nanglangseletpik, lapen ajatnoi, athema nangtum keterbung lapen kachedandong apot along Ne ajahak “ninghangdun” dolo, lake Ne lamthe keongdung kapangrum si chemandetlo. Kali pu asonte lapuan arjikiding Ne chenam si nangtum along nangdodundedetji apotlo. Laso apot si, Ne nangtum aphan kamathadam pima nangtum chinivek nangji ke isi kangjinso lapen ningkerengnodun henlo; nangphan imubak anta Nelong kanghon ave. Kopima Nelong nangtum aphan kedo ke kachechak anchot henlo, athema Ne la keklem ke Ne sai aphan ajoine puchot. Lapen Ne sai amo nangtum theklonglo athema keterbung lapen kachedandong aphan si “kechamsap ason-mung” Ne ingvaiponlo; kalite, laheihui angthan aphan Ne sai amo Ne chenam si nangpachininedetji. Ne nangtum along keklem ke ningkehanghe pen, Israel along Ne sai Ne keklemdam ason kachisik lapen ningkehang pen puke kalipin khangjang. Nangtum angbong lam kaningje kabor’i along Ne ningkithi mena aphan Ne kachekhang’onglo. Jongsi Ne thedung asai aphan kali pu asonte, lason angthan atum amek angden Ne kachechaklun pen kosonsi kedopo? Jongsi Ne men aphan ajoine kalidet pu asonte, kangtui apar kangtui adim an hako pen si Ne chedam’etpo lapen alangtum hi abui-angsom pen pen laheihui angthan aphan pavir’etpo! Jongsi Ne nongthe aphan ajoine kali pu asonte, kosonsi Ne laheihui kahenodak hi-i atum aphan cheklangdak pen Nephan pakhang longji alangtum aphu Ne mek athengno kapakanchot pen? Jongsi asapsobak anta kapavirklung pavepin pen Ne sai keklem ingsamjin pen kalidet pu asonte, kosonsi laheihui angthan aphan kepekji – kaiketa Nephan kapinremver amonit atum ason? Jongsi erong along don pharo amonit atum Israel along Nephan lason si nangkekhang aphan arjap lote, Nephan latum athok-ajir chipidet pu sitame, Ne latum aphan pavirvekji lapen longle kanghang along paklolapji lake pima monit atum aphan akaprek arongsopi along kekhang pen puthot pachedandedetji aphanlo. Ne ke kadokave kechopet ame pinak lapen Ne ke masap ta akoi kipi chekhangkhe. Athema monit atum ke Ne si kadokave kapinchongchot, kopima Ne kaningje lapen keklem, latum ke kroivek nangpo, lapen latum ke nangchedan longlelo. Monit atum Ne sai along hokum avepin pen nangkachejokdun ke longle, lapen latum ke Ne sai lapen Ne lamthe along kopi si akechok mate kechokche kangsirdunji puke ki’unji aphan durepik’lang. Ne ke kapinchong abang aHemphu, lapen kapinchingtang api doan ke Nephan man-peng kipi aning pen si Ne kenangji ateng pima dovek nangji; latum ke Nephan kejongdunji aphan bor’i nangne, lapen latum jasemetpet chekhangji nangne. Ne hokum ateng pen Ne monit atum aphan langchariji, lapen kadokave komatmat ma Ne kapinchong atum anke Ne hukum along si chipidet nangji. Pini arni nangtum le Ne thengno angthin chepathetan lapen ang-ang kithik pen palitjetlo puvoiphit tame, Ne nangtum aphan kethan alam heihui doan nang dengdedetlo puvoiphit tame lapen kaphere chininedetlo, Ne ke nangtum kachedandong pen kachekhang si chetongchotlo; Ne kasedeng ne chekhangpo lapen Ne sai along athema masapso, ardi kavedet angthan atum hi abui-angsom along kapater si nangthurlo. Ne la non kedo-kedambom asontin along tame chekhangdunlo pima Ne langselet lapen kadokave ahormu aphan Ne Po aningkehang ajoine pen pima Ne langseletlo, lapen Ne lam kaningje patangtetik anke Ne la klempo, Ne kapadusi ahut anlo. Matha chepesung nangne! Amen kavedet angthan aphan ason angdeng ke Ne nangpanglimle, lapen Ne kethek aphant nangphan ke Ne pachingbardamde. Ne nangphan langseletlo, bonta Ne ke kachechak ta unlo. Nang Nephan dengdelo, bonta nang ke Ne nangphan ado kipiji arni chepajok un’elo, Ne Po Nephan lamchak kipitang atenglo. Kapinchong angthan atum Hemphu kapinchong ason pen chepangbar unji puhe? Chung-phang’ok abotor ahut, kangjuitang arvo doan alangtum angkur along chedampo; nang “po” ahem along nang cheledamthupo, lapen Ne ke Ne Po ahin si cheledampo. Nephan Alang kanghon’op pen si nangchejadunpo, lapen nang ke nang po nangkeberponthip pen si dunnangpo. Ne Po anongthe si Nelong ke dopo, lapen nang mena akatherak si nanglong ke dopo. Ne ke pima Nelong arjidingklui pen kedo akangchekji ado si nangphan pipo, lapen nang ke Ne kangchek ado kipi chetongpo nangmena keterbui a’ok pen pima lake aningkan suri kep an pen si phangnotanglo. Ne ke Ne lamthe asai nanglong patang’etpo, kachechak’un tame dodunpo, lapen nang ke Ne lamthe heihui pen kivir akesung kachechaknang kichunji pangchengpo. Ne ke kachehok thedungpo lapen Israel along sai klempo; nang ke chirupo lapen aso chingkritpo, longle along si dopo lapen thipo. Ne ke Ne abinong’et arpum chelongthupo lapen nang pen aketer along anpar ke dodundelo, bontame nang ke nang mena abinong’et aketer si cheklangthupo lapen hi abui-angsom anagkang si angthor chihutbomverpo. Ne sai lapen lamthe heihui patangdet lote, lake Nephan ningkarong arni si manpo. Nang kachekhang lapen kachedandong heihui ington lote, lake nangphan ke kachiru arni si chemanpo. Ne ke nangphan nangjinso dundedetji, lapen nang puthot Nephan anpar ke theklongledetpo. Nang pen anpar ke Ne lam chingkikedetpo, lapen Nephan anpar ke puthot chetongthu longlelo. Ne ke nang kachedandong aot aphan langseletpo, lapen nang ke Ne kanghon meme aot aphan chingtungpo. Nangphan Ne paphodetpo, lapen nang Nephan chingtungpo. Ne ke chehokjok pen si nanglong pen dampo, lapen nang ke Nephan kachitu nangji apreng chichinipo. Puthot Ne ke nangphan chetongtelo, bonta nang ke Nephan kaiketa ningthebompo. Ne ke nangphan langseletpo athema nang ke Nephan nangkhanglo, lapen nang ke Nephan chingtungji athema Ne non nangphan kangchek ado pilo. Ne ke nang pen adung-arei kedoji ninghanghelo, bonta laphan si nang ke ar’isippo lapen kai apr kai ta chirupo, pima nang ke kadokave Nephan keklemtang doan apot ningcheoipo. Nang ke nang mena kachedandong lapen kachekhang aot kechokche apot ningchedonopo, nang ke ningcheoipik pen apot longle athak si arje chepatongkipo lapen Ne thengno domkruppo lapen puthot Nephan kekroiverji alamchak chipipo. Nang ning along, tebontame, Nephan si nang inghonchotpo, tebonta nang ke Ne se kaike arju longlelo. Ne ke nang methang aphan si kapatherak pemanpo.

Nonke Ne ke pima Nephan kachongthuidetji nang kachisikdingver aok aphan si cholangdinglo, lapen Ne nangphan asapso akether ansi dochot, Ne nangphan kangchek ado “kipi” pavedet puvoiphit tame. Nang chichinivek nangji Ne sai along kopi si nang kacheparjanpon loma, lapen tangte Ne ning ingsamjinpo. Laso pen anpar alam aputhak, jongsi nang le Nephan khanglo mate Ne tangka padam’etlo, mate Nepharman kachehodai chotheilo, Jehovah, mate jongsi nangtum ingthan hejan chekorbom, mate jongsi nang methan ason api nangnak atum lahinhin angbong kachedan mate chekhamkhebom – lason pen Ne ke ajat ta chinidunde. Nang ke kopuson ahormulo pu ansi nangtum chichinichotlo, lapen Ne ke ning ingsamjinpo. Laso pen anpar kaprek doan, jongsi nangtum hele-kaman keot pen lahinhin chejong mate lamthe heihui pen lahinhin chedandut lote, lake mesenlo; Ne ke lasonson along kachejokdunji ninghanghepin, lapen monit atum kacharvo along masapsobak anta kachejokdun ave. Lake pima nangtum angbong kachebohongsai apot Ne kelangdundedet lapu kali; lake pima Ne ke nangtum angbong pen inut kalidet, lapen laso apot si pima nangtum angbong alam along nangchejokdunde. Ne Methang amat tame nangkapinchongtang abang kalidet lapen laso apirthe aphan ta kali, lasi sai keongpik monit akai aphan Ne langseletlo lapen kachingvuikung, latum pen ke kemesense akachepho si dolo. Ne jongjung ke kachehangjo amulukpi langseletpik. Tebontame, Nelong ke asontin pinchongtang api doan aning aketer heihui aputhak kachinidam kethedung do, lapen nangtum aphan Ne pinchongche aphrang, Ne ke monit atum aning arlo kangthirthe keplengset alam chini’etlo, lapen Ne ke kadokave monit atum aning along kachongthui lapen kachobei alam kachinitanglo. Laso apotsi, kadokave monit atum kangthirthe ason keklem doan ta kachiniji aphan angthek avepin puvoiphit tame, Ne ke nonpu chini pima nangtum aning along kangthirthe si paplengchen kibi lapen lake Ne kapinchongtang kedoan ahormu akemepik aphan palitjetlo. Nangtum anuttin tame isi ahormu akangtuiving angdeng an thurlo; mulukpi aphisar-phusar kachemanji aphan thurlo. Nangtum doan ke kithirthe peme, lapen nang ke kachari un’edet kadokave angthan angbong si katlo, chepajoike pen kedoji adim si rilo lapen pima nang pen kibichet angthan aphan anke kehaithorji si bor’ilo. Nang ke bang aphan pasungji si mon’e lapen kisung phoji pusi nangtum aning along do, pima lake talo aklong’et kanglimtang ahi-i akarjong aphan ta palitjetlo. Nang ke hi angsom aklong’et si dolo, latum ningkangsam kavedetji aphan ingthan atum aphan athak pen ha aber an pasiksaklo, alomso aphan ke lahinhin pachebohonglo lapen aphi ke papangsamlo. Nangtum ke nangmena adim chichinine, tebonta nang ke lahinhin angbong hi angsom along chedanbom. Kopilo nang lason akachesong along pen kelongji? Nangtum jongsi ahokpet pen Nephan arsikjik man-peng nangning pen do pulote, Ne nung kopuson si nang lahinhin angbong chebohongjilang? Nang man le jonghe ingtuipik pu tame, tangte nang ke hi angsom along kibihek kanemthuhak angki kalilang puhe? Tangte nang ke arveng chingjok si sining angsong kangjar avothung cheman unji puhe? Nangtum kibihek kanemthuhak angki atum Ne kachepharlotang, Jehovah, aphan athok-ajir along pen chonghudetlo; lason keklem pen si, nang kivir pen nang jok unji ma, keremdet aman-peng lapen kangvaitang Israel amonit atum cheman unjima? Nang ke katherakmeme kahenodak abanglo! Halahei athok-ajir kapharlotang doan ke monit atum Nephan si pipajirlo, ardi dojot akamatha pen si matmat ma Nephan man-peng kipi atum doan chepaklanglo. Latum ke Ne rideng si dolo lapen Ne pharman si klempo, lasi kosonsi nang le Nephan kipitang hala kibihek vothung chitung amonit atum Nelong pen chonghudet unpo? Judas ason kemandetji nang phererema? Tangte nang longri ke vi aklam kemandetji pen nang phererema? Nang katherakmeme ason! Nang kamatha ke pima la vothung chitung monit atum kipitang doan ke nang ingthan apok aphan kemepiklo puloma? Kopima Ne nangphan kipitang ke kopima Ne ningkangsamlo lapen nangphan kipiji ninghanglo; kopima Ne nangphan kipipelang ke Ne kibivet kaprek along si dolo. Nang thangbakbe Ne athok-ajir doan chonghu nangne. Ne henlo hala Inut keklm abang, Jehovah – Hemphu pinchong abang – lapen Nephan ajoine si monit atum athok-ajir pibom. Nang kamatha lake nang kadokave keklemtang doan apot kelong nangji asonlo puloma? Nang chenam si therakmeme abang! Komat apharman si nang katbomlo? Lake nangmena aphan kalima? Ne athok-ajir doan kopi si nang kanghulo? Ne tangka ajarong pen kopisi nang tangka kanghuponlo? Tangte nang ke Judas Iscariot aso kalilang puhe? Nephan athok-ajir doan, Jehovah, lake kurusar atum si longchotji. Tangte nang ke kurusar ma? Ne athok-ajir doan nang ane chepatheklong pen kopusi kecho hailo, lapen jailap si kibi adim athak lahei bilo; nang ke ale kavenei abanglo! Nang ke ale kavenei kahenodak abanglo! Ne me, Jehovah ame, nangphan pavirdetpo!