Kechoklim Karjong Akai pen Ajok Monit Aphan Ahok Atovar Japonthek
Arnam aphan akekroidun along masapso apharman atovar anchot si nangtum ke damchot’lang, lapen nangtum ke ahok atovar along non si kilutdun longjilang, lasi nangtum ke Arnam akeme angden kepaledunji aphan helopiklang. Non amat ke, nangtum kedobom angdeng Alangli akenangji pen cheton damdepinlang. Nangtum akethek ason lapen nangtum kahenodak asema pen apot, Arnam asai aphan thangbakbe pusi kaike nang hokronglo; nang laphan arsikjik pen hokhe. Lake nangtum kapherememenei akepho si nangchemanpo. Karjong Kangthir akedam atovar along inutnat tame kelongdun thekji abang ave; ongdung atum nang chinidun pememe lapen la ketheklong klardakdedet. Anparta, ongdung atum nang laso aputhak mathadundedet, ansose si ning arlo kacheponji aphan avemuchotlang. Nang jongsi lason ateng dobom, Karjong Kangthir asai keklem along kapanungdun si rengbom, tangte nangtum Arnam aphan kekroi atovar kachongvai ke thangnat ale ave si manpo. Lake pipotma pulote nangtum nangmena ajakong pen ajat ta klem’et’edet Arnam aninghang ateng kepaplengdunji aphan kiri along lapen athema nangtum Arnam along kajalangdun pangkrevelo. Lake Arnam nanglong ajat asai ta nangkeklemkledet apot kali, mate Karjong Kangthir le nangphan nangkejaje lapu kali. Lake nang mena si pangkreve pen Karjong Kangthir asai aphan arsikjik en’edet apotlo. Tongsekot pen nang laso ahin pen chelarthu si monit atum aphan Karjong Kangthir akeja atovar si dun nangpo. Lahenlo pini arni kenangsot athepi ke. “Karjong Kangthir pen keja atovar” pu kipudam ke karjong katheang adak-atur kelongdun; Arnam alam heihui kachinidam peme; ephrang atovar kedamji klardak pen ketheklong; ahok along isi pen isi akengkam kilutdun kethek; lapen Arnam aputhak kachinidam kethedung kelong. Monit atum aphan Karjong Kangthir akeja atovar ke Arnam alam heihui klardak pen kachinilongji aphan kechengsi atovarlo, kachethakjam lapen kamanghudetji meme kavepin, lapen komatmat ma kedam atum an laso along kengset si dam nangpo. Laso kelongji aphan ke nangtum Arnam pen ingsamjin si sai klem nangkokpo, kecharliji aphan choklim atovar rinon, lapen Karjong Kangthir pen keja atovar le dunnon. Lake monit atum ahin pen tame mesen akajalangdun nangji: lake, Arnam nangtum aphan akenangji ateng keplengji aphan kopi nangtum klem nangpo, lapen Arnam aphan akekroi ahok atovar along kilutdun longji aphan koson si nang chelar nangpo.
Karjong Kangthir pen kejapon atovar along kengkam kachejordun ketheklong sungchetji ason tahai meme, bonta kejoike si nang longponji jongsi nang le kacharliponji atovar klardaklo pulote. Ahokpet alam abang ke monit atum Arnam latum aphan akenang ateng asontin ta paplengpi’un – lake Alangli phak atum aphan le kapangjar kethan lapu kalidet. Ajat ahut along tame, Arnam ke monit atum akesung doan kapaveji si kiri lapen alangtum kaningridam doan paplengpibom. Nangtum kadokave ta lake chinivek nangji; Arnam aphan akaprek mathathedet nangji. Karjong Kangthir kedam atovar along si monit atum aphan Arnam alam ateng pen japonbomlo. Aphrang ta pachinitanglo, nang Arnam aphan nangning chipivek nangji. Karjong Kangthir pen keja atovar along kidunji aphan pulote lake aphrangsi keklemvek nangkokpo. Nang lake klemvek nangpo ahok atovar along kilutdun thekji aphan. Kopuson si monit atum matha peme pen alangtum aning Arnam aphan kachipiji asai keklemlo? Nangtum arnivang kereng achethe along, nangtum le Arnam asai chomat longlo lapen Alangliphan ardom lote, nang la klem pemeji – nang sai keklem ahut si Arnam aphan nang ardomji. Tangte lake Arnam aphan nangning kachipi pu pudam unjima? Nang ke ok aningkehang hemtun along alam mate akepho heihui aphan si mathalo; nang ke kaike ta nangning pahinidaklo. Tangte lason ke Arnam angno nangning kapadojoilo pu hokdam unjima? Lake pipotma pulote nang ning ke kaike ta angtan ason-amung along si cheraphet do lapen Arnam angno nangkachiruiji un’edetlo. Arnam angno nang jongsi ahokpet pen nangning ingsamjin kelongji aphan pulote, mathe peme pen akajalangdun si nang sai klemvek nangpo. Lake pulo pulote nangtum anuttin tame kardom-kardi apor mena chithikvek nangpo, laso apor ahut ke monit, sai angdeng, lapen hormu-hortar doan aphan nang chetengne nangpo; nangning chithik pemenon lapen Arnam angno nangmena chepadojoinon. Abangphutin tame mena jongjung kardom-kardi alamthe chibivek nangji, alangtum Arnam alam heihui kachini an lapen koson si alangtum akarjong akeja doma pangsip’et nangji, latum le kethedung mate athak kacheklangdong puvoiphit tamelo; anuttin ta alangtum aning Arnam angno pachok peme pen chepajoi nangji. Kechoklim karjong akai aphan nang jongsi arnivang ghonta isi mate hini anbak apor chipidet pulote, halabangso arni nang kai ke keplenglim lapen nangning ta theangplin lapen klardang ason si manpo. Nang jongsi lapuson le karjong akai arnivang ta rengdunbom tangte, nangning ke Arnam nangkacheparideng along ansose chiruidun thekpo, nang karjong tame ingtangpo lapen ingtang ponbompo, nang keklem-kedam anta kaike meponbompo, Karjong Kangthir pen keja atovar along nang kidun longji aphan ansose si unponpo, lapen Arnam pen ajok nanglong kebat’o ahirjume si nangpalongpo. Nangtum karjong akai athe ke Karjong Kangthir akacheja kemesen pen kelongdunji aphan henlo. Lake aron heihui kedengdunji mate dhorom asai keklemji pu aphan kali, bonta Arnam pen ahokpet lamdon kachibiji aphanlo, nang bang arpum athikpet kapinchongji aphan – lake kopima monit atum klemvek nangpo, lasi nangtum chitikrup pen lake klemvek nangkokpo. Kemesen pen nang akacherapdun kedo lapen kopuan ma nang jakong kachipidunthek, lapuan sose si nangning tame Arnam along patebokdam thekpo lapen memuchot si nangning tame Alangli ingno chepadojoi pen nang unpo. Elong an angdeng ke, Arnam si nangning aphan angton pen nangcheraidetpo. Madu tame nangning aphan terek un’e lapen nangnepchek un’edetji, lapen nang ke Arnam amar si angton pen cheplangpo. Nang jongsi laso atovar damlo te, Arnam alam pen si nangphan aportin along tame nangpaklangdetji lapen nang kachinidam an tame katheang adak-atur pen nangphan pachiniji – lake nang kemesen kacherapdun peme pen si angton ta chunpo. Laso apot si Arnam kaike ta ningjelo, “Komatma doan Ne pen lamdon kachipi abang ke, Ne nong’e batai hini an pajirji.” Nangtum bangso atovar klardak pen lang nangji. Nang jongsi ahok atovar along kidunji ninghang do pulote, Arnam aphan ningkapangsam asai doan nangtum klemvek nangpo. Karjong akai kelongji aphan nangtum aboi doan pen klem nangkokpo. Kecheng ahut ke, laso akeklem-kedam along nang thedung angthek longledet tahaiji, bonta nang nangmena aphan aphi pachiruithu nangnelo mate akeheho akamatha pen pachingvuikung nangnelo – nang keklem ke chepedukbom nangpo! Koan ma karjong akai pen nang kereng, lapuan sose si Arnam alam pen nangning plengsetpo, kaike ta laheihui alam penle matha’enon, lapen laso anghor le kaike ta inghornon. Laso pen lote, nang karjong akai pen ajok Arnam aphan nang aklong’et ahok alam pachininon; kopisi nang keklem kangtungma Alangliphan thannon, kopi aphan si nang kamathabom doma, nang akachinidam lapen Alangli alam aphan kelangdam. Ajat tame aphi otpringpredet nangji, masapso pu tame! Nangning arlo along alamthe kaningje charlinon lapen Arnam aphan nang ahokpet kamathadam alam chethannon; la jongsi nangning along dolote, ajat pen tame, ningjedetnon. Koanma lapuson ateng nang lam kaningje, lapuan sose si Arnam akanghonmeme nang chematha longpo, lapen nangning along Arnam ingtangkring pen nangchesanpo. Lason le chemandet lote, anut kaprek aphan anpar te Arnam aphan si kachinghonmu pu nang chechinipo. Nang Arnam adung pen kaike amat cheterekredetji, ajat le cheplang tame. Nang jongsi lason karjong akardom-kardi arnivang tame klemvoilo lapen nang kamathadam pen angtan bidamdepin, alar ke nang kai along kethedung akenang pusi laphan hokdetlo tangte, Arnam alam heihui si nangning cheraidetpo. Lake pulote Karjong Kangthir pen si kepapho pu aphanlo. Lasonlo pulo tangte nangning aphan Arnam si kaike ta cheparidengtang pu asonlo, lake nang kanghon ke nangning along kaike ta do pu asonlo. La madu tame nanglong pen nangthipon un’elo. Lason le chemanlo te, nanglong Arnam chenam si do pemelo lapen nangning arlo along adim dolo.
