Arnam pen Mesen Kachepho Kedoji Aphan Akenangsot Thepik Chenam

Monit atum Arnam aphan kekroi do, kachinghon ta do, lapen alangtum aning pen Arnam aKarjong aphan papho si Arnam aphan aningpangsam, lason pen si Alangliphan akenangji paplengpilo; alangtum aning pen Arnam alam heihui akachephosap dobom ahut lote, latum aphan Arnam aKarjong chenam si akajalang dopo. Karjong akai keplengset kenangji akar’i jongsi nang do lapen Arnam pen si akacherap’het kithirthip selamji pulote, apharangsi nangning Alangliphan chipidet nangjilang, lapen Alangli ingno kepadojoi aning pen dovek nangjilang. Arnam aphan nangning kedoan nang chipi thekdet aphi si nang karjong akai ahokpet keplengset pajo pen longdunji. Alangliphan akekroi along monit atum jongsi Arnam aphan alangtum aning chipipelang pulote, alangtum aning jongsi Alanglilong avelang pulote lapen Alangli anghor latum mena anghorlo pu charchakchete, la kadokave akeklem heihui ke Arnam aphan kachongthuilo, lapen laheihui ke dhorom kekroi amonit atum aot-adurlo – lason pen ke Arnam akero long un’e. Arnam lason amonit atum along pen ke thangnat longdunde; lapuson amonit atum ke Arnam asai-amo along kekhamkhedun si chemandunronglo, Arnam ahem along kapamat asonsi chemanlo, adim pachingkindunchot, lapen thangnat akemesen aphan kali – lason amonit atum aphan ke Arnam akerap enpon’e. Lapuson amonit atum along, Karjong Kangthir asai keklemji aphan avarsai kavedet anchot ta kali, bonta la pen anpar, kechoklim aphan ale amat ta thangnat ave. Lason ke chenam ta “damvoi akithitang” amonit atumlo. Latum along Karjong Kangthir asai klem’iji meme amung amat si ave – latum along doan tame Hi-i aninghang aling si chepahemphu’etlo, Hi-i pen ajoine si kechokche ta litpiklo, lapen latum ke Arnam along pen kachekak nangji atumlo. Nonjong amat Karjong Kangthir ke monit atum along kemesen asema kethap pen ajok asai pacheklembom anchot ta kali, alangtum kevangji arni kephomeme ason pen tame pachokponbom lapen larponbomlo. Nangning jongsi Arnam aphan chehodaidet unlo lapen Alangli ingno chepadojoi pen dolo tangte, Karjong Kangthir nanglong sai keklem ki’undetji angdeng lapen avarsai longdunpo, Karjong Kangthir katheang adak-atur lapen kakhelandang tame longdunpo, lapen anpar tame, nanglong kevangji ahut kephoji meme ason doan tame Karjong Kangthir si kapachokponvetji aphan avarsai nang dopo. Arnam aphan nangning nang kachipi lote, karnukkrung kemesen akrong ahin si nang un’an lutdun thekpo lapen kachini ajakong ta akangtui aphar ansi dopo; akaheno akrong anatthu aphan ke, nangmena akechokche lapen kevangji ahut akepho meme ason aphan nang kachichini longponpo, Arnam aninghang kapaplengji aphan si nang thek’an kiri dopo, lapen nang kedojoi ason ke dodelo, lapen sangsepin si klempo. Lasonlo pulote nangphan ke kechokpet amonit lo pusi nangjongpo. Arnam angno nangning kedojoi pen si dolo pu kechengchenglo, Karjong Kangthir pen akero nang longjima longlema pu aphan lapen Arnam aphan nang ningkapangsam kalima kalangma pu ke nang laklepin pen klem unjima un’ema pu aphanlo. Karjong Kangthir le inut amonit aphan katheang adak-atur pilo lapen laso amonit aphan sai klem’ilo tangte, alangphan kaike tame akeheno pu pachemanme, bonta kaike amat ta palak’lepin si alangphan sai paklembomji. Alang le keboi-ke’un’e heihui dokok tame, bang atum ason alang kedoji aphan ke thekthedetji, alang akai kachingthur along kapader’i aphan alang chepahelo thekji, lapen alang kaike chimitmepin si Arnam aninghang ateng kapaplengpiji aphan kiri unji. Lake Karjong Kangthir akajalang nang longdun etlo pu dorplup angthek kacheklangdak isi ardi doklong angdenglo. Jongsi inut amonit kaiketa kahenolok si dobom, lapen katheang adak-atur longlok aphi ta alang amena aphan chichinine si kaheno dobom lapen sangkoklo lepute, chepesungsepin pen akarjap lapen Arnam pen kedorapji aphan ningchepangsam’i thekthelo, lason amonit atum aphan ke Arnam akangjinso si longponchotpo, tebonta Karjong Kangthir ke alanglong avelo. Kahenolok si kedobom amonit lote, lason ke Arnam along alang aning chehodaidelang lapen Arnam aKarjong alang akarjong aphan jalanglelang. Lake madu tame kapangthekvek nangpo.

Arnam angno inut amonit aning kepadojoi pen kedothek aphuthak henlo kenangsotnei alamlo lapen lake keklemponlongtang pen si chethek longlo. Laso aphuthak henlo monit atum karjong akai pen keplengsetji akamatha memeverlo, lapen alangtum akai kachingthur’iji apotlo. Nangning Arnam angno ingsamjin pen dothekdet ansi ahokpet aphuthak chodengdun unji lapen nang kun heihui kachelar do si athe patheji. Atheke nang Arnam angno kevang anghor kardik pen apot lapen kaike ta nang kadurepik si nang chemanthalo, akeongpi ahokpet aphuthak nang kachini nangji do’olang, non keklangdong aphuthak kacharli nangji dopik’lang, lapen Arnam aninghang apharman kalana pemeji aphan nang klem nanglang – laheihui alam ke nangphu along kaike doverlo, lapen laheihui apot nangphan ha aber an nangberthip si nangchethe vang un’epin ason dokoklo, lapen la apot si nangning ardik’hup si chemathalo (bonta akeheno aning pen le kedo kali). Lason pen kedobom amonit atum henlo Arnam alam akatheang adak-atur kelongdun unji aphan kedengji lapen Arnam aKarjong pen si jalangponpo. Lake alangtum anghor pen apot si, atheke latum aning ardik’huplo, lapen, lason aphan ke pudetme, atheke kenamji aphan kachipi nangkok anam lapen latum Arnam angno akesungpik chechakdet si latum along Alangli katheang adak-atur lapen kakhelandang longdunlo, pipotma pulote Arnam ke anuttin aphan kapaprekjek akelana ke klemkle. Alangli ke monit aphan akalana pachingbarpetji, bonta Alangli monit atum aphan kithikvet alam ke Alangli chelarle che’otthip si do, lapen latum aphan kachimitmepin pen ke pipedetji. Lake Alangli kangthirjir kemesen akun angbong pen epharlo. Nonjong kereng akai along, penang an amonit atum labangso ahormu kelong nangji do’olang. Kijumnei angbong pen ke, alangtum aning Arnam along kachingbe nangji dolang, lapen laso apot si alangtum akai along akun heihui thedung akachelar avedetlang. Pipotma pulote lake latum Arnam akangjinso along si rengdunlo, lapen bonta Karjong Kangthir asai ke kachodengdun longji dolang. Arnam kopuson amonit atum aphan si sai keklem’i ma pu akenangji heihui ke la aber paklanglo: Arnam along alangtum aning kachingbedun, Arnam alam heihui pen si latum anghor kachepardikpon, latum along kachorivung aning kedo, lapen ahokpet aphan akiri angthek latum along kelongpon henlo. Lapuson amonit atum anchot si Karjong Kangthir asai longdun unchotji lapen kaike ta katheang adak-atur lapen kakhelandang longdun unchotji. Arnam pen asai keklem’i amonit atum ke athak pen kacheklang prekdunsiji lapen bang atum pen mesen akachepho avedet tahai memeji, latum kejumesen ale kedo alam le ningje tame, thangbakbe alam le ningjejedet, lapen Arnam angno kaike ta aning chepadojoi pen do theklo. Tebonta lason amonit atum aphan henlo kedorplup pen Karjong Kangthir asai keklemji. Lason “keprekdunsi” amonit henlo Arnam kaningje ta latum ke bang atum pen mesen akachepho avedet tahaiji meme, lapen latum along athak kachepaklangchot akanghon ave lapen kapamanghuhakji keklem’ithap ason klemkle, bonta latum jongsi karjong keplengset ahormu pen kachepho-kachetonglong dolo te latum ke aning chipudang lapen mena aphan chemathathepin pen bang aphan si alangtum Arnam along pen abinong’et kelongpontang katheang adak-atur lapen kakhelandang pajirpondetji. Lason henlo latum Arnam aphan kachinghon pu kachepaklang lapen Arnam aninghang ateng kapaplengdun. Bang atum doan kipuduntot lapen kangnekdunchoi alam pen ningjedunbom ahut, latum ke bang angtan amonit ajoine, kopinene asai-amo, mate hormu pen kapachehemphu longledetji aphan chekhang unlo, lapen Arnam angno chepadodunjoi pen do theklo. Lason keklem undet amonit atum along ke alangtum alongthot si keprekjek aklong akachinidam dolo. Bang akaprek pen pangbardam lote, alangtum aning ke Arnam aphan kaike tame che’o’e. Bang atum doan le hangjojo lapen kangnek pen chingki-chethanbom ahut tame, alangtum aning ke Arnam angno si dobomlo, Arnam alam heihui aphan si chemathapon’e mate aalangtum aning arlo pen Arnam aphan kedojoi pen kardom dolo, Arnam akar’idam kopima lasi ridunlo. Bang amonit atum pen kemesen akachepho aphuthak ke latum kenangsot athe pura kachelanadam kaita ave. Lason amonit ke chenam ta kai along kopi-koson-konat pu aphuthak mathathedet ason tahai meme. Athak kacheklangpon ke, lason amonit ke prangset, langmeme, lapen athikdukji, bonta kangsamjin ason ta alanglong doji. Lahenlo Arnam asai keklemji amonit kechelon binong. Kai along kopi-konat-koson pu akamatha ason mate “kephover athe mate ason” heihui ke lason amonit atum along ke lutdam un’edetji; lason amonit atum ke Arnam alam doan si aning aklong pen chehodaidetlo, lapen aning along Arnam pen anpar thangnat ta kavedet asonlo. Lapuson amonit atum aphan henlo Arnam kejongdam ke “ason kavedet” atumlo, lapen lason amonit atum aphan ke Arnam anchot si asai klem’iponlo. Arnam si asai keklem’ipon pu amonit atum angthek kacheklangdam ke: Konat mate komentu pu langdamdepin pen, alang aning ke Arnam angno si dolo, lapen bang atum le mena aphan ningchepangsam’i keklembom ahut tame, koan ma latum kahenopik akar’i along si dobom tame, ok aning kehang ke chepaplangbom tame – alang aning ke kaike ta Arnam aphan che’o’edetji, lapen mulukpi along alang aphiphi dundedetji. Lason amonit atum anchot si Arnam asai keklemji along kachetondun unchotji, lapen lahenlo chenam ta Karjong Kangthir pen kapachoklim kepamanji abanglo. Nang jongsi labangso angdeng an ledundelang pulote, Arnam aphan nang kelongdunji undundelang, Karjong Kangthir pen kapachoklimji ta avejilang.

Nang jongsi Arnam pen mesen akachepho do ingtung tangte, nangning Arnam anat pangno nangpo, lapen bangso atiri along, nang kaprek amonit atum pen mesen kachepho dopo. Nang jongsi Arnam pen mesen kachepho avete, nang jonghe le kaprek amonit atum pen mesenji aphan bor’i sitame, nang jonghe le keklem chepaduk mate jakong cheharjak sitame, lake monit atum chethe aphan kachini apharman si doverji. Nang monit atum angbong nangdim kacheraibom lake monit atum kethekdamlong ateng lapen monit atum kapinchong abidi ateng atheke alangtum nangphan nangparonang pu aphan. Nang Arnam kapinkhat ateng penle monit atum pen kachepame kali. Nang jongsi monit atum pen kachepame aphan mathadamde bonta Arnam pen si chepamesen, nang jongsi Arnam aphan nangning kachipiji nangninghang lapen Alangliphan kekroi charli, lake amethang amat si, nang kaprek amonit atum pen chemesen nangmandetpo. Lasonsi, lahei mesen kachepho ke a’ok penle kachekam kali, bonta Arnam akanghon atiri pen. A’ok pen anvet kachingki puke avedet pu ateng, bonta akarjong penke kachingrumrap pen-pen kanghon ta dolo, karengme, lapen kisiktang kachepajir seroi. Lahei kadokave ta Arnam akemang kepaplengpi aning atiri pensi klem’un. Lahei kachepho ke monit atum kapinchong abidi aphan kachiki penle kacherai kali, bonta lahei ke Arnam aphan kipi arpu pensi amena amat chemanji. Halahei aphan monit atum kakirsan akenang ave – Arnam kethan alamthe aron pensi lahei klem un. Nang Arnam akemang aphan kedengji ninghanglo ma? Nang Arnam athengno ‘athe thangnat kave’ abang kemanji aphan chisiklo ma? Nang nangning Arnam aphan akangthimlim amat kachipiji ar’i loma, lapen monit angbong nang’inghoi aphan mathathepin poma? Nang kachechinisar amonit doan angbong pen komat pensi nang kachemenei lo? Lahei angbong komat pensi nang kachehenonei? Nang pen monit angbong kachepho mesen ma? Nang kadokave amonit aphan kelang chingbarkre loma? Nang pen kaprek amonit angbong kachepho ke nangmena kapinchong abidi atengsi chelang ma, mate halahei doan Arnam akanghon atiri ateng si dolo? Inut amonit jongsi Arnam aphan aning chipipe lote alang karjong ke ang-ang karkanlo, hala thihi lapen ajakong kave mandet. Lason amonit ke mantune ta Arnam kethan alamthe chini un’elo lapen mantune ta Arnam pen kachepho mesen dothekthelo; lason amonit atum ke mantune ta akun chelar un’e. Inut amonit akun kachelar lake alang aning kangthimlim Arnam aphan kachehodai asai lo, lapen Arnam alamthe pen karjong kachepangthir lapen kachepaklar aphan kedenglo. Arnam asai inut amonit aphan prangchen pen arlo pavanglong, lapen te alangphan gian longdet aphi akaheno ason kamatha penta angtan pabar un. Nang Arnam aphan nangning chipi undetlo te, nang nangkarjong along kedobom masapsap ason anta chichini unpo, lapen nang Arnam pen kelong doan katheang adak-atur lapen keklardang ason anta chini undetpo. Laso along le nang riphet noi, lapen nang pajo pen Karjong Kangthir arideng nangkepamesenji atovar lutpo. Arnam athengno nangning koan si kachepabi un, hala ansose si nangkarjong ajat ason ta kachinidap un lapen kanghong meme chemanpo, lapen hala ansose si nangkarjong hala Karjong Kangthir keklembom asai chini unpo, lapen lasonlo te nang pen Arnam kachepho ansose si mebom-mebompo. Monit angbong mesen kachepho kapacheman ke alangtum Arnam aphan aning kachipi atiri pen; lahei ke monit kakirsan penle kelong ason kali. Aning along Arnam avepin ke, monit hejan angbong kachepho ke a’ok angbong kachepho anvet pinak. Lahei ke akeme kali, bonta lahei ke kopine kar’i atoi ki’un’e penchot – lahei akachepho henlo Arnam aning kedokde, Alangli kelangselet. Nang jongsi nangning chelarlo pu ningje, bonta kachingrumrap kedo ningkehang ke kaiketa nangphan ningnangpangsam amonit atum pen, komat si nangphan mepik pu kamatha abang pen, lapen jongsi komatne kirirok abang nangphan ning pangsamse do, komat aphan si nang kelangpangkre kedo lapen kachingkike abang, lahei ke angtheklo nang inut ningkangdukvok abang lapen nang Arnam pen kachepho kemesen ave. Nang nangmena along aketer kachidip lapen Arnam aphan kachongthuiji si kirilok. Nang masap kachini-mathathek le chingbardun pusitame nangning along kachibiding akemang ke akeheno saide, nang keklem ason doan ta monit atum a’ot si mesenchot. Arnam ke nangphan nangrore – nang kacheparjan ke a’ok kapinkhat ateng, Arnam kanghor arpu ateng kalidet. Nang jongsi Arnam athengno nangning aphan kapadomjoithek lapen Arnam aphan aning kedok atum pen kachingki-chethan chepamesen, halaso ahut ansi nangphan Arnam asai aphan nangke’en a’otpo. Lasonsi, nang bang pen kopusonle chelang tame, hala ke akai pen kapinchong alammo puchot kalilo, bonta halake Arnam athengno reng’akji, Alangli ke’en arpu aphan kedeng. Nangtum angbong lason amonit bang koan do? Nang pen kaprek amonit angbong kachepho doan mesen saidelo? Kopi atiri pensi halahei kapinchonglo? Nangning arlo kai aphan kapinchong abidi son koan do? Halahei ephongbak keplung pholo ma? Nangning jongsi ingthimlim an Arnam anat chetevar thekthe, tangte nang Arnam apharman kalilo – nang ke Hi-i pen lo, lapen kijutsi ahut ke nangphan Hi-I along si nangpacheruipo. Nang Arnam arat angbong inut kemandunji a’ot ave. Lahei kadokave nanglong pen kelangpeme pen kedengdun akenang thepik.